آخر 10 مشاركات
إمرأتي و البحر (1) "مميزة و مكتملة " .. سلسلة إلياذة العاشقين (الكاتـب : كاردينيا الغوازي - )           »          هدية للقلب - جودي تونوز - ع.ج ( عدد ممتاز )** (الكاتـب : سنو وايت - )           »          نبضة قلب - جانيت ديلى - عبير الجديدة ( اعادة تنزيل )** (الكاتـب : امراة بلا مخالب - )           »          فضاءات اليأس والأمل (الكاتـب : #أنفاس_قطر# - )           »          عشقكَِ عاصمةُ ضباب * مميزة ومكتملة * (الكاتـب : sandynor - )           »          قصر الشوق -باتريسيا هولت -عبير جديدة (الكاتـب : Just Faith - )           »          عشق من قلـب الصوارم * مميزة * (الكاتـب : عاشقةديرتها - )           »          ملكه للأبد (12) للكاتبة Rachel Lee الجزء الثانى من سلسلة التملك.. الثانى عشر (الكاتـب : nagwa_ahmed5 - )           »          416 - عصفورة النار - هيلين بروكـس (الكاتـب : ^RAYAHEEN^ - )           »          345 - هروب من الماضي - تامي هوبر - م . د** (الكاتـب : * فوفو * - )


العودة   شبكة روايتي الثقافية > قسم الروايات > منتدى الروايات والقصص المنقولة

Like Tree15Likes

إضافة رد
 
LinkBack أدوات الموضوع انواع عرض الموضوع
قديم 26-06-20, 10:08 AM   #11

فيتامين سي

مراقبة عامة ومشرفة منتدى الروايات المنقولة

alkap ~
 
الصورة الرمزية فيتامين سي

? العضوٌ?ھہ » 12556
?  التسِجيلٌ » Jun 2008
? مشَارَ?اتْي » 41,357
? الًجنِس »
? دولتي » دولتي Saudi Arabia
? مزاجي » مزاجي
?  نُقآطِيْ » فيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond repute
?? ??? ~
My Mms ~
افتراضي




البارت السابع

وفي بيت ابو خلف
وصل ابو خلف وراح لامه وابوه يسلم عليهم لكن شاف الضيق على وجهه امه واضح
ابو خلف : يمه وش فيك!؟
ابو ناصر: مافيها شي
ابو خلف : وش فيكم!؟ خلف وينه !؟ صاير له شي
ابو ناصر: لا
ام ناصر: الله يستر لا يطق خلف من القهر ويموت
ابو ناصر: اذكري الله يامره
ابو خلف فز بخوف: وش فييييه
ام ناصر: هاللي ماتستحي سحر علقت رجل با لارض ورجل بالسماء ما تبي تتزوج خلف
ابو خلف : وشوووو!؟
ابو ناصر : اسمعني يا ناصر اسمع العلم مني اترك هالكلام الفاضي
ابو خلف اللي فاار وعصب : شللللون ترفض خلف !؟ هااه وشلون ترفض ولدي
ابو ناصر: الزواج ماهو غصب
ابو خلف : وشوله مانطقت من سنين!؟ ورا ما تكلمت الا بعد ما ضاعت هالسنين كلها ، سحرررر سحررر
طلع عزوز على صوت عمه وهو خايف من هالخطوه : وش تبي فيها ياعمي !
ابو خلف : انقلع ناد اختك
ابوناصر: مالك شغل بالبنت هي عطتنا رايها وانتهينا
ابو خلف : لا والله!؟
عزوز: عمي سحر ماهي مجبوره تزوج خلف دامها ما تشوفه الا اخو
التفت له ابو خلف بغضب: ماشاء الله من متى طلع لسانك وصرت توقف بوجهه كبارك
دخل عقاب وخلف على صوت الصراخ وهذا اللي الكل خايف منه
عقاب : وش صار وش هالصرراخ!؟
ابو خلف : اخيراً جيت يالكبير العاقل تعال اسمع اختك وش تقول
عقاب : وش تقول!؟
خلف : يبه صوتك عالي والناس تسمعك !
ابو خلف : ماهمني احد
الكل كان يناظر خلف ينتظرون كيف بيتقبل الخبر
وقال ابو خلف : تقدر تفسر لي وشوله اختك ما تبي خلف
عقاب: الله يهديك ياعمي وهذا اللي مطلع صوتك وصراخك واصل اخر العالم
خلف : يبه اذكر الله واسمعني
ام ناصر: مافيه شي ينسمع ياخلف انت سمعت اللي ابوك قاله او ما سمعت
خلف : سامع ياجده سامع لكن المواضيع ما تنحل بالصراخ وسحر ما عليها لوم ابد
ابو خلف : انت انهبلت انت
خلف : لا ما انهبلت بالعكس
ابو ناصر: ياخلف يا ولدي ماودنا يضيق صدرك لكن تعرف ان الزواج قسمه ونصيب
خلف ابتسم بهدوء: ماضاق صدري ابد بالعكس انا راضي ما دام هالشي يريح سحر انا راضي
ابو خلف : خللييف اعقل واترك عنك الهبال يقولك البنت ماتبيك رافضتك
خلف : وهذا من ابسط حقوقها
عقاب: اختي ما رفضت خلف لعيب فيه بالعكس رفضته لانها تشوفه اخو وهذا شي ماينعاب
ابو خلف : وش ذا العذر التافهه
خلف : يبه الله يهديك هذا ماهو عذر تافهه بالعكس هذا الحقيقه!؟ من يوم عرفنا الدنيا وحنا وعيال عمي في نفس البيت نفس المكان نتشارك بكل شي ومثل الاخوان وحنا اخوان فعلاً ولا واحد منا فكر يبدل هالاخوه بزواج انتم اللي فكرتوا وانتم اللي كبرتوا هالشي ومحد اخذ راينا لكن هذ قبل وحنا صغار لكن الحين اختلف كل شي وحنا ما اخترنا اي شي غير إنا اخوان انا اشوف بنات عمي خوات وهم يشوفوني اخو وسند
انجلط ابو خلف : لااا واضح أنه ملعوب في راسك زيين
عقاب : وهنا ينتهي الموضوع اهل الشور هم خلف وسحر وهم رفضوا هالشي عن رضا وقناعه بعدها محد له كلام
ابو خلف وقف يصفق بقهر: الله يرحم ابوك ليته حي ويشوف وش يصير وحزتها انا اضمن لك انه يدفنك حي انت وهاللي ما تستحي معك
ابو ناصر : نااااصر لين هنا وبس قلنا لك الزواج قسمه ونصيب وحنا ندور الخير لعيالنا مانبي ندفنهم وهم حيين مايبون محد جابرهم
ابو خلف : زين يبه اجل اسمعوا اخر كلامي والله ما تطب رجلي هالبيت ودام هالزواج ما تم وانسى ياعقاب ان عندكم عم اذا ما وقفت هالمصخره وربيت اختك وعقلتها
عقاب : اختي ما تنجبر على شي ماتبيه
ابو خلف: هذا اخر كلامك!
عقاب : ايه
التفت ابو خلف لخلف بحده: وانت راضي بهالمصخره!؟
غمض خلف بضيق وهو يدري ان ابوه يبيه يثور ويعصب ويزعل عشان يجبر عقاب يزوجه سحر لكن قال الجمله اللي خيبت ظن ابوه : انا راي من راي عقاب وما تنجبر بنت عمي على شي ما تبيه
احتدت نظرة ابو خلف بقهر : اجل اسمعوني لا اني عم لعيال نايف ولا عيالي عيال عمهم ولا انا ابو لخلف ولا عيالي اخوانٍ له وتجي تقش قشك وتنقلع من بيتي وخلك عند هاللي تحامي عليهم مايجلس ببيتي واحد يعصي كلامي
شد خلف على اسنانه بكل قوته والكل اتسعت عيونهم بصدمه ومحد مستوعب ان ابو خلف اللي مستحيل يبعد خلف عنه يطرده من البيت لكن كان هذا تصرف انفعالي من ابو خلف عشان يجبر الكل يخضعون طلع وصفق الباب وخلف متكتف بصمت
ام ناصر: والله عشت عمري واقول ربيت وثمرت تربيتي لكن ياحساافه ياحسافه
طلعت هي بعد وتركتهم ومابقى الا خلف وعقاب وعزوز وابو ناصر وكلهم يناظرون خلف اللي لف ببتسامه : انا اسف بالنيابه عن ابوي هو اذا عصب مايدري وش يقول
عقاب: لا تعتذر ياخلف حنا اللي نعتذر لك المفروض مايصير هاللي صار
سكته خلف : اللي صار عين الصواب وانا عند كلامي
ابو ناصر تقدم يمسح على كتف خلف : ماعليك لا يضيق صدرك انا بكلمه
خلف : ماعليه ياجدي خله يهدا شوي
طلع خلف رايح لبيتهم وهو يقول بنفسه( تووك بديت بدربك يا خلف وعثرات هالدرب كثيره وبتحلمها كلها وحده وحده وانت ساكت دامك بديت تحمل )
_______________________.
وفي بيت ابو خلف
الكل طلع على صوت الصراخ والهواش والكل واقف عند الباب الفاصل يسمعون وشهقت ام خلف وهي تعلق في ابو خلف اللي دخل بغضب وهو يصرخ: طلعوا قش هالردي عني لا اشوفه
ام خلف : تكفى يا ناصر لا تطرده وين بيروح وهو للحين تعبان
ابو خلف ابعدها بغضب : يروح عند هاللي مبديهم على رضاي
وعد : يبه اذكر الله
ابو خلف : اسمعوني كلكم والله اللي يعتب هالباب ولا يكلم هاللي مايستحون ليشوف شي عمره ماشافه
ام وعد : اذكر الله يا ابو خلف مهما كان حنا اهل
ابو خلف : هذاااك اول لكن الحين حلفت واللي بيعصاني بيذلف ورا هالردي
فيصل وقف بذهول يناظر في ابوه وهو بعد زعلان من رفض سحر لخلف والكل زعلان على سحر مهما كان ماهم متقبلين وهم محد يدري وش السالفه الا وعد والباقين مصدومين
طلع ابو خلف ولفت ندى بزعل على اخوها وهي تشوف ان خلف ملاك مستحيل احد يرفضه وهي محقه بوجهة نظرها دامها ماتعرف السالفه: وش صار لها هاذي ! انهبلت !
ام وعد : الله يصلحها عاد خلف ما ينعاف
وعد :وش فيكم انتم هي ماعافته هي تقول انه مثل اخوها
اماني بزعل : وين مثل اخوها كلنا كنا نعرف وشايفين
وعد : انتي اص احسن لك
حنان: صح اني ضايقه على خلف بس سحر يمكن صادقه
ام خلف ببكي : بكيفها بكيفها تبيه او ماتبيه ما احد بيجبرها لكن وشوله ناصر يطرد خلف هذا جزاه اللي وقف مع عيال عمه
حنان : عميمه ما عليك خلف بيجلس عند جدي اكيد
فيصل بغضب: اصلاً لو جلس عندهم بيصير خبل ! جالس عند الناس اللي رافضته وين كرامته
وعد : انت اسكت احسن لك مالك شغل
دخل خلف وهو يشوفهم مجتمعين وفزت ام خلف وهي تركض له: خلف يمه حبيبي لا تزعل ولا يضيق صدرك يمه
قرب خلف يبوس راسها: لا ياحبيبتي ماني زعلان والله
ام وعد : ماعليك بيعوضك ربي
خلف : الله يوفقها والله يوفقني بعد
ندى بغضب: ماعليك منها تتزوج اللي احسن منها
خلف : ندى انهبلتي!؟ هذا كلامك عن بنت عمك
اماني : لا تلومنا ياخليف ترا مقهورين حنا بعد
ام خلف : اسمعني يمه لا تطلع ابوك زعلان شوي وبيرضى اكيد هو ماتهون عليه انت
فيصل: لا تطلع ! ولا تروح عند ناس مايبونك
خلف : الظاهر اني بتعب معكم اكثر
لف وهو يناظر سالم: سكر الباب زين
ورجع يناظرهم: اجلسوا كلكم من دون صوت ولا اسمع
حرف زياده
الكل جلس وتكتف خلف يناظر: اول شي مهما صار ولو تقوم الدنيا وتقعد إياني وإياكم اسمعكم تغلطون على عيال عمكم او تزعلونهم! وبعدين وش صار فالدنيا اذا رفضت سحر!؟ هذا حقها ولا احد يقدر يجبرها ووش فيها اذا رفضتني انا ماني ملاك واذا هي علي انا بعد اشوف بنات عمي كلهم خوات واذا ما بدت سحر بديت انا والزواج قسمه ونصيب
ام وعد : ما قلنا شي بس ليه ما تكلمت من سنين
وعد : هي ما وافقت من البدايه !؟ هذا كلامكم انتم يالكبار وانتم تتحملون
خلف : اللي بقوله محد له شغل بهالسالفه ترضى سحر ولا ترفض هي فالنهايه اختكم وبنت عمكم وولا اشوف واحد فيكم قالب وجهه على عيال عمه حتى لو ابوي نفسه حلف وحتى لو ابوي يقوم الدنيا ويقعدها ما تقطعون صلتكم فيهم ابد
فيصل : وكرامتنا وييين ؟
خلف : انت مجنون!؟ كرامتك من كرامتهم وبعدين من جاب طاري الكرامه
فيصل: وش اللي من جاب طاري الكرامه ! سحر طلعت وقالت مابيك وكل الدنيا درت ما تشوفه شي يمس الكرامه
خلف : يمس الكرامه اذا كان على غير وجه حق وعلى عيب ومنقود لكن هي رفضت لانها تشوفني اخو وبالعكس هذا مايمس الكرامه
وجدان: طيب ابوي حالف
خلف : ابوي يومين ويرضى المهم ما يكبرها الشيطان بينكم سمعتي يا ندى واماني
ندى : سمعنا
خلف : وبعدين حطي نفسك في مكانها انتي وياها !؟ لو عقاب خطب وحده فيكم وهي ما تبي ولا تشوفه اخو! وش كنتوا بتسوون!؟ وانت يا فيصل كيف بتصرف!؟ كلكم بترفضون وكلنا بنوقف مثل وقفة عقاب وعزوز
الكل سكت ولف خلف : هذا اللي بقوله والله لو اعرف ان واحد منكم ضايقهم والله ليزعل مني
ام خلف : طيب ياحبيبي لا تروح اجلس هنا
خلف : يمه انا هنا عند جدي ماني رايح واذا بغيتيني بتلقيني بس ناديني والسالفه ماهي مطوله
سكتوا كلهم وطلع خلف بعد ما اخذ ادويته والكل ساكت بضيق مايدرون مع من يصفون وكيف يوقفون
_______________________.
في الخبر
وصل نادر الشقه ودخل وهو يرمي نفسه بتعب ووقفت شوق تناظر حولها
اعتدل نادر وهو يبتسم: جعتي صح !
شوق هزت راسها بخجل ( لا)
خاف نادر انها رجعت تخاف : ماعليه حتى لو ما جعتي لازم تجلسين معي وتاكلين لاني ما اكل لحالي ابد
وقف وهو يلف : انا بروح اجيب العشاء وانتي رتبي الاغراض وريحي شوي ولا تفتحين لاحد
شوق :زين
طلع نادر اللي ميت جوع وتعب ومهدود حيله مايدري كيف بيمشي الايام الجايه اخذ العشاء ورجع وشافها مرتبه كل شي وجالسه على الكنب ونايمه وهي جالسه اول ما سمعت صوت الباب فزت بخوف
نادر: بسم لله عليك مادريت انك نايمه
شوق :عادي
نزل نادر العشاء وجلس وهو يشوف كيف تعبانه وبعد ما تعشوا ناظر نادر ساعته: ودك نكلم خالتي
فزت شوق بفرح: ايه
نادر ابتسم لا شعورياً : زين تعالي
جلسوا عند التليفون وهم يتصلون وينتظرون واخيراً ردت خالته اللي كانت تكلم شوق اللي بكت وتورط نادر وهو يحاول يهديها واخذ السماعه وهو يودع خالته وجلس جنب شوق: افا يا شوق ما قلنا ما نبي دموع
ماكان يشوف وجهها اللي مغطيته بيدينها وقرب نادر بحذر وهو يحاول يبعدها : انا ادري انك مشتاقه لهم بس بعد مايصير تبكين وتزعلين نفسك
شوق اخيراً تكلمت وقالت : ماني متعوده ابعد عنهم
نادر كان يحايلها مثل الطفل: اسمعيني طيب اوعدك اذا سكتي ومابكيتي بعد ما نخلص من الخبر اخذك لهم
فزت شوق بفرح: قول والله
ارتخت ملامح نادر بضيق وحزن : والله
مسحت شوق دموعها : خلاص ماعاد ببكي
ابعد نادر ببتسامه : يلا اجل انا معك لين هنا وخلاص انتهيييت بموت من النوم
شوق ابتسمت: طيب
بدل نادر ورجع يبي ينام لكن شايل هم شوق مايبي ينام وهي ما نامت
لكن شوق بدلت ورجعت وهي تناظر ظهر نادر اللي واضح عليه التعب ما تدري وش هالطمأنينه اللي تحسها اتجاهه نادر لكن كانت تحس انه مصدر امان نزلت عينها اول ما لف نادر : تعالي نامي شوفي عيونك كيف تعبانه
ماقدرت شوق ابد تخطي اي خطوه ولا تروح تنام جنبه
حس نادر فيها وجلس : شوق لا تخافين تعالي نامي والله ما اسوي لك شي
تفشلت شوق وجت بهدوء جنبه ودخلت بهدوء ولا طولت الا نامت بتعب ولف نادر اللي ارتاح اول ماشافها نايمه عدل اللحاف عليها وهو يحس بمسؤوليه رغم انه انسان ماهو صاحب مسؤوليه ابداً
_______________________.
وفي بيت الجد قايد
في غرفة البنات كانت سحر منهاره وهي تبكي وهيا حاضنتها بهدوء
مضاوي : انا مدري!؟ ليش تبكين دام هذا اللي تبينه
سحر: انا مابي الشر لخلف بالعكس ما ابيه ينضر ولا عمي يزعل عليه ويطرده بالطقاق يزعل علي انا بس هو وش ذنبه
عهد : خلاص يا سحر كلنا نعرف عمي ويحوس الدنيا بس مايقدر يزعل خلف صدقيني يومين وبيجي يدوره
مضاوي : ماعليه احسن انا مبسوطه ان خلف بيجي عندنا يومين نغير به جو
شهد : اللي يسمعك مايقوول جالسه عندهم 24 ساعه
مضاوي : مب شغلك انتي
هيا : ان شاء الله السالفه ما تطول ويومين وكل شي يرجع لوضعه
مضاوي : يارب
عهد : خلاص سحر ذبحتي نفسك
ماردت سحر اللي دخلت بفراشها وهي تحاول تحصل حل ما يتأذى فيه وهو كان حريص انه مايأذيها
_______________________.
اما عند خلف
اللي طلع يمشي في الحاره وهو متجهه لمكانهم المعتاد بس مايدري وينه نادر! ولا يقدر يفضفض لعقاب ولا يدري كيف بيخمد وجع قلبه جلس وهو يعدل ابريق الشاهي وارتخى على التكايه ورا ظهره وهو يبي يتخلص من هالمشاعر اللي بصدره يبي يعرف هي حب ليلى ولا ردة فعل عكسيه ضد الواقع اللي فرضوه عليه بس ما طول تفكيره اول سمع صوت ضاري العالي اللي جاء : خليييف وراك لحالك ! مسكون ياحبيبي
ضحك خلف : جيت بوقتك والله
طل ضاري في ابريق الشاهي وابتسم: في وقتي بالتمام لكن وينه ولد عمك الجني
تنهد خلف : وش تبي فيه ! اذا ناوين هوشه فكوني راسي من غير شي بينفجر
جلس ضاري بجديه: وش فيك !؟ صاير شي !
خلف : لا بس مشكله في البيت
ضاري : تراني اعين واعاون
ناظره خلف بتمعن وهو من هالفتره لللي عرف ضاري فيها عرف انه انسان طييييب وامين ويحفظ السر لكن قال خلف : ضاري عمرك حبيت !؟
ضحك ضاري : شوف انا في حياتي كلها ما حبيييت الا شخص واحد ولا حبيت احد قبله ولا بحب بعده ولا اشوف الا هو بدنياي
ابتسم خلف : والله!؟ ومن هالشخص
ضاري بضحك وحسن نيه: امي
ضحك خلف : خبل انت ندري تحب امك محد مايحب امه كل الناس يحبونها بس انا اقصد يعني حبيت حب يعني كيف افهمك
ضاري بصراخ: اييييه قلي كذا!؟ حب وخرابيط
خلف :دامها خرابيط واضح صفحتك بيضاء
ضاري: ناصعة البياض بعد انا حتى لو بحب ما اعرف
ضحك خلف وهو يناظره وقرب ضاري: علمني اجل! من اللي لون صفحتك
ابتسم خلف : محد بس أسالك
ضاري : شوف انا على النيه ايييه لكن ماني غشيم اعرف احوالكم يالمعذبين
خلف : لا يا ضاري السالفه ماهي سالفة غشامه لكن انا قصتي معقده شوي
ضاري : طيب قل اسمعك الليل توه بأوله ولا تخاف سرك في بير
ماقدر خلف انه يتكلم وقال : خلها في وقتها
ضاري : على راحتك
ولف ضاري يناظر الساعه: بتمشي!
خلف: لا جالس
ضاري : غريبه!؟
خلف : ليه!؟
ضاري :انت ماتجلس لذا الوقت تقول ابوك يحتري
صد خلف بضيق: لا ابشرك اليوم لو الموت بيده كان ذبحني
ضاري : افا ليه !
ضحك خلف : شكل مافيه منك مفر
ضاري ببتسامه: والله على ضيقة هالصدر اللي باينه عليك مالك مفر الا تكلم
خلف : اجل اسمع .. قاله خلف سالفة سحر بحذافيرها من البدايه بكل التفاصيل زي ماهو يعرفها وختم وهو يقول : يعني انا مدري هي صدفه او مدري وشو لكن فالنهايه انا اشوفها اخت وهي بعد تشوفني اخو وبكذا تكنسل الزوواج وانجلط ابوي وحاس الدنيا
ضاري بهدوء: وهاللي تحبها ! تستاهل كل هالحوسه!؟ انلجم خلف اللي ماجاب له طاري الحب ابد وضحك ضاري : قلت لك ماني غشيم وواضح ترا من البدايه ان فيه طرف ثالث وطرف قوي بعد وهو اللي غير كل مفاهيمك والا انت قبل راضي ومستسلم
ارتخى خلف بقلة حيله: يعني مكشوف
ضاري : ايه
خلف : كلامك صح لكن انا كل اللي بيني وبينها صدف ومدري اذا هي تستاهل هاللي يصير او لا
ضاري ببتسامه: كل هاللي فيك من صدف!
ضحك خلف : والحاصل اني طلعت خفيف
ضاري: طيب اذا تبي شوري زين ان ما دخلت مع بنت عمك في مشاكل انت ففي غنى عنها وزييين ان من البدايه حسمت الموضوع لكن انت لازم تحل هالمشكله كلها من جميع الاطراف باقل الاضرار
خلف : هذا اللي بسويه يعني مشكلتي الحين مع ابوي وبس
ضاري : وابوك مستحيل يزعل دايم وانت ولده مهما كان
خلف : هاذي كل القضيه
ضاري : صدقني بتحلها الايام لكن دام هذا وضعك وش رايك تجي معي
خلف : وين!؟
ضاري: لشباب اعرفهم صدقني بتوسع صدرك شوي
خلف : زين اجل
اخذ خلف اغراضه وطلع مع ضاري
_______________________.
وفي حي ضاري
وفي اطراف الحااااره كان فيه حوش مليييان بالشباب اللي مختلفه اهتماماتهم مابين غنى وسوالف ولعب وضحك وقف ضاري لف على خلف : وين كمامك !
خلف : معي !
ضاري : ألبسه عشان داخل شباب وانت عارف فيهم اللي يدخن وفيهم اللي يشيش
خلف سحب الكمام بضيق وهو يلبس ودخل مع ضاري اللي وقف له الكل يرحبون فيه ووسكتهم ضاري وهو يقول : رحبوا في خوي الليله خلف
اختلفت الردود مابين : حياك الله ، منور يا خلف ، اسفرت وانورت
رد عليهم خلف والكل اجتمع قريب منه وبدا ضاري يعرفه عليهم
ولف على الشخص اللي ماسك العود وجالس مبتسم : وهنا ملك الفن تركي ابو الطرب وسعة الصدر
تركي: من بعدك ياحبيبي
خلف : تشرفت الله يا تركي
تركي : لنا الشرف
ضاري : تركي اليوم خلف بين يديك يقول ضايق صدره قلت مالك الا تركي يطلع ضيقة الصدر غصب
تركي : يخسى الضيق يا خلف ، صفوا يا عيال صفوا
ابتسم خلف يناظرهم وهم اتفرقوا كل واحد يجيب له شي وجلسوا وقرب واحد يعطي خلف شاهي واخذه مبتسم وهو ينتظر وش بيطلع من هالجمعه لكن جلس قدامه واحد يقاله سعد : اقول يا خلف وش اللي مضيق صدرك عشان نغني على ليلاه
قبل يرد خلف رد تركي بس بطريقه مختلفه وهو يدق ويغني ( ‏ياسعد لاتحاول كل شي ن تعرفه ‏خل الاسرار تبقى بالقلوب الحزينه)
لف له خلف ببتسامه وضحك : وصلك العلم يا سعد
رجع سعد وهو يضحك والكل يضحك وهم يعرفون تركي ما يحب احد يبحث في جروح احد حتى لو مايعرفه
وكمل تركي وخلف مبتسم معه ولا شعورياً هدت ملامحه اول ما تذكر كلام اماني ( ان ليلى تدق العود )
اخذ نفس وهو شايف انه استوى تماماً وايقن انه يحب ليلى لكن وش بعد هالحب
طال الليل معهم ونسى نفسه خلف معهم وهو كل اغنيه يتغنى بها تركي تطير خلف فوووق لكن انتبه للوقت ووقف يودعهم وطلع وهو يحس نفسه احسن من قبل
_______________________.
في بيت الجد قايد
عجز عقاب ينام وهو مايدري وين خلف دوره بمكانهم ما ماحصله ونادر ماله حس وخاف لا يكون خلف تعب ومحد عنده جلس بنص الحوش وهو يفرك يدينه ببعض ينتظر متى يجي خلف وماكان بس عقاب لا الجد قايد بعد مانام وهو ينتظر وسحر بعد كانت تنتظر
فزوا على صوت الباب وكان خلف اللي دخل بهدوء واقبل عليه عقاب : خلف وينك وين رحت !
خلف : وش فيك !
عقاب : وش اللي وش فيني ! اشغلتني عليك عجزت انام دورتك في كل مكان ما لقيتك والله اني خفت عليك
خلف ابتسم بهدوء : لا شدعوه مافيه شي يخوف
سكت خلف اول ما قرب عقاب له وهو يشم ريحته : انت وين كنت! وش ريحة الزقايير هاذي!؟
خلف : اقصر صوتك لا احد يسمعك ، كنت مع ضاري ورحنا لاصحابه وعاد فيهم اللي يدخنون بس و... سكت اول ماقاطعه عقاب بغضب: رجعنا على هالسايب!؟ خلف وش تبي فيه ذا ما بيجيب خيير لك وفوق هذا يدري انك مريض والدخان يأثر عليك وموديك لناس تدخن ! ما تقولي شتبي فيه
خلف : عقااااب انا ماني بزر اعرف مصلحتي زين مايحتاج تركضون كلكم وراي وبعدين تراكم أذيتوني بهالمرض
رفع الكمام بغضب : تشوف ذا ولا لا هذاني كاتم نفسي فيه عشان ما اموت
وبعديين ابعد عن ضاري تراك اذيته ما تحبه براحتك لكن مالك حق تدخل بيني وبينه
عقاب : الله يالدنيا ياخليف!؟ صرت تبدي هالخبل علي!
خلف : عقاب وش فيك لا تزيد الطين بله ترا ماني ناقص مشاكل انا ما بديت احد على احد لكن خلني اتنفس ياخي
عقاب : على راحتك ياخلف على راحتك
مر خلف بيروح بس رجع لعقاب : عقاب انا ما اقصد ازعلك لكن ... عقاب : ماعليه ياخلف المهم تعال وين بتنام بغرفة عمي محمد ولا عندنا !
ضحك خلف : لا لا ابي انام معك من زمان عنك
ضحك عقاب : اي والله من زمان تعال تعال
طلع الجد وهو يناظر: هاه خلف جيت!؟ ابطيت وانا جدك
خلف : لهيت شوي ياجدي
ابو ناصر: زين يلا يلا ناموا لكم شوي قبل الفجر
خلف : زين
دخلوا وابتسم خلف لعزوز اللي متعمق بنومه وقرب عقاب يبعده وهو يتحلطم : يموت لو ما يلف الغرفه كلها وهو نايم
ضحك خلف : عندي وعندك خيييير
عقاب : خلني افرش لك
خلف : اجل انا بطلع الحوش اشوف اخواني وارجع
ابتسم عقاب : اتوقع نايمين
رفع خلف ساعته: لا وعد ما تنام ذا الوقت
صد عقاب بكرهه وهو يفرش وطلع خلف للسطح وهو يفتح الباب بشويش ودخل وهو يشوف البيت ساكن
_______________________.
في بيت ابو خلف
ام خلف ما نامت وهي ضايق صدرها على خلف بالقوه لين غفت وهي تسمع هواش ابو خلف وماصدقت انه طلع وراح لام وعد عشان تنام براحه عن هواشه
وفي غرفة العيال بما ان خلف ماهو فيه افترى فيصل في سالم وغيث اللي ماصدقوا تنقذهم وعد وتغسل شراع فيصل اللي طبيعي استسلم لوعد
وفي غرفة البنات بعد ما الكل نام كانوا كل وحده بفراشها وكلهم يشتركون بنفس الذهول
حنان : من اليوم افكر ابي اطلع سبب مقنع للي صار ماا لقيت
وعد : رجعنا على طاري اللي ! وش فيكم انتم السالفه واضحه وقضت
ندى: ايه واضحه اذا كنا ما نعرف ان سحر بتموت على خلف وش قلب مخها
اماني: للامانه انا فكرت في شي ! واللي هو عمرها سحر ماقالت انها تحب خلف
وجدان: بس واضح عليها
وعد : وش اللي واضح هاه!؟ طول عمرها تبتسم وتسكت وهاذي ردة فعلها لكل شي يصير سواً راضيه عنه او لا اماني: هذا اللي اقصده
ندى : ولنفترض انه كذا انا اشوف حتى خلف ما تضايق بالعكس واقف معها وكأنهم متفقين
وعد : كلنا نعرف خلف وش كثر يحب عيال عمي وبعدين عمره ما وقف في وجهه احد وعارض رايه ومستحيييل يقبل انه يفرض نفسه على سحر
اماني : ترا حتى هو ماكان يجيب طاري سحر خير شر
حنان: شكله بعد هو يشوفها اخت
وعد : ايه هذا اللي حاصل
سكتوا على الدق الخفيف على الباب ووقفت وعد بغضب: فيصل ذا موته على يدي
فتحت الباب وشهقت : خلف
سكر فمها خلف وهو يدخل : اص فضحتينا
اعتدلوا البنات بفرح وتقدم خلف : اشوفكم سهرانين
وجدان: نحلل اللي صار
وعد :ماتعرفين تسكتين انتي
خلف اخذ نفس: سكروا السالفه يرحم امكم ولا عاد تنفتح
حنان: ابشر بس انت ليه ما نمت للحين ! تعبان
خلف : لا لا بس توي جيت وقلت امر اشوفكم
ضحكت اماني : خليف وش عندك اعلنت الحريه وطلعت عن القانون!؟ لو يدري ابوي انك ماجيت الا الحين ذبحك
ضحك خلف : يوم واحد مايضر
ندى : طيب خلف وش بتسوي!
خلف : ما فكرت للحين
فزت وجدان بخوف :يوووه
فزوا كلهم معها: وش فيك
وجدان بفشله :مافيه شي بس بكره المفروض انه يوم المقاضي يعني من بيقضي لنا
ضربها خلف على راسها بشويش: وجع خبله انتي للي يشوفك يقول ميت
حنان: بسم لله عليك
ندى: صدق بكره وش نسوي!؟
خلف : ماعليك انا اجيبها المهم ابوي قال شي بعد ما رجع
ندى : لا
خلف : زين يلا انا برجع عقاب ينتظر
طلع خلف زي ما دخل وهو يفكر كيف يحلها مع ابوه ورجع وهو ينسدح بجنب عقاب اللي كان يكافح النوم ولكن استسلم اخر شي ونام وخلف مثله
_______________________.
ومن بكره
مثل اي يوم الكل صبح والكل طلع لشغله لكن ابو خلف مصر ما يكلم خلف ولا يرد عليه مع ان خلف يحاول يسلم عليه ويكلمه بس مطنش تكتف خلف وهو واقف عند باب الدكان ويشوف ابوه ياخذ مقاضي البيت من عند ابو ممدوح
طلع متجهه بضيق: يبه عطني اعاونك
ابو خلف : طس عني لا تكلمني
خلف : يبه الله يهديك الناس تناظر عطني بعاونك
ابو خلف : والله لو ماذلفت عن وجههي لغسل شراعك والناس تشوف
اخذ اغراضه وراح وترك خلف اللي صد بضيق ورجع للمحل وهو من الفجر طلع من البيت بعد الصلاة وماعاد رجع له كان جالس في الدكان مايبي يروح ولا يجي ولا يتكلم مع احد
ابو ناصر : خلف قم وانا ابوك نبي نروح للبيت الغداء يحترينا
خلف : روح انت ياجدي انا معزوم
ابو ناصر: وين!؟
خلف ماكان معزوم بس مايبي يرجع للبيت وللمشاكل : عند ضاري
ابو ناصر: زين زين وعقاب بعد مداوم اجل الله يعين
راح ابو ناصر ووقف خلف وهو يسكر الدكان عليه وعدل له مكان وانسدح فيه كان ميت يبي ينام بس التفكير مو مخليه يغمض حتى
_______________________.
وفي بيت ابو خلف
لاول مره ينعزل ابو خلف بعياله وكان المفروض الغداء يكون عند بيت ابو ناصر لكن ابو خلف منعهم يروحون وطلبهم يسوون الغداء هنا
في المطبخ
كانت حنان تنزل الغداء وهي ضايقه ولفت على ندى اللي تقطع السلطه : بنات انا ماني مصدقه ! ابوي عمره ما ترك غدا عند جدي معقوله بعد هالعمر يسويها
ندى : شكل السالفه بتكبر
دخلت وجدان الللي توها جايه من المدرسه وجلست بضيق
وعد : وش فيك قالبه وجهك!
وجدان: بنات تدرون ان ابوي اليوم ما اخذ عبد العزيز وشهد معنا المدرسه
لفت وعد بصدمه: وشوو!؟
وجدان: طلعنا اليوم بدري كلنا لكن ابوي ما ناداهم وراح وتركهم
اماني : معقوله يخليهم!؟ يمكن نساهم
سالم هو بعد ضايق : لا انا شفت ابوي شاف عزوز واقف وراح وخلاه
شهقت ندى بخوف : يا ويلي اذا هو صدق مخليهم
وعد: سلوم خلف يدري عن هالسالفه!؟
سالم: لا اصلا خلف من بعد صلاةا الفجر شفته نازل اسفل الحاره ولا عاد شفته
وعد : الله يستر
جاء فيصل اللي متضايق بعد وهو ماعمره ابعد عن عزوز : ابوي يقول وين الغداء
وعد :اخذوا الغداء واطلعوا وانت فيصل اجلس
طلعوا كلهم وبقى فيصل ولفت وعد: شفت خلف اليوم!؟ فيصل: لا
وعد : طيب عزوز داوم !
فيصل بغضب: يداوم مع من اذا ابوي راح وتركه
وعد : متاكد ابوي تركه!؟
فيصل :انا كلمت ابوي وقلت ليه خليته وقال يبي يربيهم
وعد : لا اله الا الله خلاص روح تغدا وبعد الغدا روح دور خلف
فيصل : طيب
جلست وعد وهي خايفه من ذا القصه والواضح انها ماهي منحله بس لازم هي تحلها
_______________________.
وفي بيت الجد قايد
كانوا مجهزين غداهم وجالسين ينتظرون ابو خلف لكن محد جاء
ولف ابو ناصر: عزوز قم وانا جدك شف وينه عمك وعياله
عزوز اللي كان ضايق صدره من الصبح بعد ماعمه تركه عرف عزوز ان سالفتهم كبيره لكنه قال للشهد تسوي نفسها تعبانه وترجع وتغيب ولا تعلم احد عن اللي سواه ابو خلف وهو راح وجلس في مكان قريب لين طلع جده ورجع بدون مايقول اللي صار
وقف لكن جات مضاوي بغضب اللي توها تعرف من شهد اللي صار : لا مايروح
التفت ابو ناصر بغضب: وراك تصارخين يا خبله!؟ مضاوي : مايروح عزوز لولدك هاللي مايخاف الله
ام ناصر: قص يقص لسانك يا قليلة الحياء
ابو ناصر: وش فيك على اخوك انهبلتي
مضاوي : ايه بنهبل من سواته
ابو ناصر: وش فيه
عزوز التفت عليها مايبيها تقول بس قالت مضاوي : تدري انه اليوم راح وترك عزوز وشهد ما اخذهم معه
فز ابو ناصر: وشهوو!؟
مضاوي : اييه كلهم اليوم غايبين
التفت ابو ناصر على عزوز: صدق ذا الكلام
عزوز: لا ياجدي انا مابي اداوم
عهد نزلت وهي مقهوره: لا تكذب ياعزوز مب انت اللي قايل لشهد ترجع وانت بعد ما راح جدي رجعت وغبتوا عشان عمي ما اخذكم
سكت عزوز ووقف ابو ناصر بغضب: حسبي لله ونعم الوكيل ماعاد الا هي عيال ولدي يصير بهم كذا
عزوز: ياجدي لا تروح له تكفى عمي اكيد زعلان وبيرضى خله شوي لا تكبر المشاكل زود
هيا : يبه استهدي بالله واصبر لين يجي خلف ويحلها
ابو ناصر: هيين يا ناصر هييين
جلسوا كلهم على الغدا ومحد له نفس ياكل بس سحر ما نزلت وهي خايفه ما توقعت بتكبر هالمشاكل كذا
_______________________.
وفي بيت النوخذه
الكل كانوا مجتمعين على الغدا
ولف ام نهيان : اقول يا ابو نهيان
ابو نهيان: قولي
ام نهيان: جارتنا صيته عازمتنا الليله على العشاء وبنروح لها اذا ماعندك مانع
ابو نهيان: زين روحوا وقوموا بواجبها وانا بعد معزوم بتروح وياي يا جابر
لف جابر اللي كان يتهاوش مع ليلى على السلطه: لا يبه مالي خلق
ابو نهيان بغضب: انت متى بتعدل هاه متى بتصير رجال
جابر : يبه انا رجال بس تعرفني ما احب مجالس الشغل
ابتسمت ليلى: يبه حبيبي لا تزعل انا اروح وياك
ضربها جابر بشويش: حمدلله انچ بنيه
ابو نهيان: ليت ربي كتبها ولد كان برد قلبي
ام نهيان: شدعوه يا ابو نهيان جابر رجال وسيد الرجال بس للحين شباب يبي يستانس لاحق على الشغل
ابو نهيان: اي بس انتي ربيه على هالدلع الماصخ
ليلى : يمه الله يهداچ وين سيد الرجال ، هذا حده سيد لعبة الجنجفه ( البلوت عندنا😂)
شيخه: اول مره اوافقچ بالراي
جابر بغضب: ليلوووه قضبي لسانچ
ابو نهيان: بس بس انت وياها بس
سكتوا وليلى تحارش جابر لين يطقها وتشتكي لابوها اللي طفش فالنهايه وقام وتركهم
_______________________.
في الخبر
عند نادر اللي لف الخبر لف وهو يمشي شوق يحاول يسليها وينسيها الخوف وهو يشوف انها حتى العبايه يالله تعرف تلبسها ولكن كان يفكر وش اكثر بتستانس فيه لو راح له واول ما طرا له على طول الملاهي دخل وهو يراقب عيونها من ورا النقاب كيف ابتسمت وابتسم لا شعورياً
ولفت شوق تناظره بإمتنان وهي ماكانت تروح الملاهي كثير خصوصاً بعد ما تغطت : بنلعب فيها!؟
نادر: ما جينا الا عشان نلعب
شوق لفت تناظر الناس : بس الناس بيناظرونا
نادر: مايهموني الناس المهم ننبسط حنا
لف شوق ببتسامه ومسك يدها نادر لاول مره ومشى وشوق تناظر يده برعب كان يدور فيها بالملاهي ويلعبون هو مبسوط ومستانس وشوق بعد والناس تناظر مستغربه وجود نادر اللي فارع طوله وصراخه وحماسه عكس شوق اللي كانت هاديه لكن في بعض الالعاب تضطر انها تصرخ او تمسك نادر بكل قوتها واخيراً انتهى من الملاهي وشوق خلاص ماتقدر تكمل
نادر : دام انبسطنا واستانسنا وش رايك ناخذ عشانا ونروح الشاطي
شوق : للي تبي
نادر: زين دامها على اللي ابي انا امورنا تمام
اخذ العشاء وطلعوا لشاطي وفرش نادر وهو مقرر انه يشوي ويسوي العشاء وينبسط ويستانس
وكانوا في مكان صاد شوي مافيه احد ولف عليها ببتسامه: نزلي عبايتك مافيه احد
استغربت شوق وهي كان ابوها لو تطلع طرف يدها ذبحها بالقوه نزلتها وجلست ونادر يشوي ويغني والتفت لها ببتسامه: دامنا جالسين احكي لي عن نفسك! يعني دراستك طموحك يعني كيف كنتوا فالحفر يعني سولفي
شوق ارتبكت بشوي بس بدت تسولف شوي شوي وكانت خايفه وهي تقول : كان طموحي اني اصير دكتوره بس ماساعدني الحظ
قطب نادر وجلس قدامها : وليه مايساعد الحظ !
شوق بخوف وهي متوقعه نادر مستحيل يخليها تكمل: يعني ماعادني دارسه
نادر: ليه!؟
شوق : ابوي يقول دامك تزوجتي مافيه دراسه
صد نادر بضيق : بس انتي الحين في ذمتي ما عاد انتي تحت حكم ابوك
شوق بالقوه تجرأت وقالت: وانت بعد مثله
وقف نادر وهو يكمل الشوي : لا ماني مثله! وابد طال عمرك بتكملين دراستك وتخرجين وتجيبين الشهاده ولا يادكتوره
ابتسمت شوق بفرح وفزت : امانه انت صادق يانادر
اول مره يسمع نادر اسمه منها وابتسم : اكيد صادق بس هاه عاد تخرجين بمعدل ممتاز مو اراهن عليك فالاخير تسودين وجهي
فزت شوق وهي توقف جنبه بفرح: لا والله ابيض وجهك
ضحك نادر: زين
وعد بسيط من نادر طير شوق لسماء وفعلاً حست بالامتنان لنادر وهي تتمنى انه فعلاً يكون صادق بكلامه
_______________________.
انتهى♥



فيتامين سي غير متواجد حالياً  
التوقيع



شكراً منتداي الأول و الغالي ... وسام أعتز به


رد مع اقتباس
قديم 26-06-20, 10:09 AM   #12

فيتامين سي

مراقبة عامة ومشرفة منتدى الروايات المنقولة

alkap ~
 
الصورة الرمزية فيتامين سي

? العضوٌ?ھہ » 12556
?  التسِجيلٌ » Jun 2008
? مشَارَ?اتْي » 41,357
? الًجنِس »
? دولتي » دولتي Saudi Arabia
? مزاجي » مزاجي
?  نُقآطِيْ » فيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond repute
?? ??? ~
My Mms ~
افتراضي



البارت الثامن..
.
.
بعد المغرب
عند خلف اللي رجع من المسجد لبيت جده ودخل بهدوء وهو يشوف الكل جالسين ماعدى سحر وعهد وشهد وهيا وواضح الكل معصب
خلف : سلام عليكم
الكل : عليكم السلام
خلف : خير وش فيكم!؟
ابو ناصر وقف بغضب: تعال تعال ياخلف شف ابوك وش هو مسوي
دق قلب خلف بخوف : وش مسوي ؟؟
بدا ابو ناصر يقص القصه على خلف كامله واتسعت عيون خلف بذهول من اللي يسمعه بدون اي كلمه زود طلع ولبيت ابوه وهو يدق الباب بغضب وفتح فيصل : خلف وش فيك
ابعده خلف بغضب ودخل : يببببه يبببه
وقفوا كلهم والتفت ابو خلف : خييير خيير داخل زريبه تصارخ
رمى خلف شماغه اللي بيده : يبه وش ذا اللي سويته بشهد وعزوز
ابو خلف : وش سويت !
خلف : شلون تروح وتتركهم وانت تدري ما احد يوديهم المدرسه الا انت!؟
ابو خلف: لا والله تبيني اخدم عليهم بعد !؟
خلف : من قالك اخدم يا يبه اقل شي بلغ عقاب يوصلهم دامك ما تبيهم
ابو خلف : بكيفه هو واخوانه
خلف : وش صاير بالدنيا يبه مب هذولا عيال عمي نايييف اللي تكفلت فيهم من يوم هم صغار!؟ تبي تخليهم الحين!؟ عشان امر تافهه
ابو خلف : امر تافهه!؟ زواجك تعتبره امر تافهه
خلف : ايييه تافهه قدام هالعشره اللي بينا والسنين تافهه قدام زعل عيال عمي وخاطر سحر وتفاهه قدام صلة الرحم اللي بتنقطع من وراه
ابو خلف : اقصر صوتك ياخليف لا ترفع صوتك علي وماهو انت اللي تعلمني كيف اتصرف وعلمٍ وجاك يا تعقل سحر يا ينقطع كل شي
خلف : يبببه وش بلاك استقعدت لسحر!؟
ابو خلف : ماهي هي اللي ترفض ولدي
خلف اللي بدا يفهم ان ابوه مستقعد لسحر وكل اخوانها عشانها رفضته عشان كذا جاء من طريقه ثانيه : الحمدلله انها رفضت وفكتني من هالزواج
الكل التفت لخلف وكمل خلف : كنت ساكت من البدايه بس الحيييين ماني ساكت ، اسمعني يبه انا لا ابي سحر ولا ابي هالزواج كله على بعضه ولو ما سحر سبقتني كنت رحت وقلت لعقاب وقلت لجدي اني مابي سحر ولا تحسب اني ضقت وزعلت لا والله انا مبسوط وبموت من الوناسه عشان كذا لا تفكر تظلم عيال اخوك على الفاضي لاني طال الزمن ولا قصر ماني متزوج سحر ولا متزوج من بنات عمي وترا ماهمني اخذ كل اغراضي واذلف لاي مدينه وتنتهي سالفتي لكن عيال اخوك في رقبتك وبتتحاسب عندهم وصدقني يبه انا اليوم صادق بكل كلمه اقولها والخيار لك
اخذ اغراضه وطلع وهو معصب وخلف نادراً ما يفقد نفسه ويعصب
كلهم مصدومين من كلام خلفه وانه مايبي سحر وبان هالكلام بصوته ماكان وده يصرح بكل ذا بس يبيهم يحملونه الذنب ويعفون سحر من هذا كله
_______________________.
وفي بيت الجد
الكل واقف عند الباب والكل سمع اللي صار الا سحر وهنا بانت القصه
وابعدوا كلهم بهدوء وافترقوا بدون اي كلمه زياده لكن وقفهم ابو ناصر اللي قال: هالكلام اللي سمعتوه مايوصل لعقاب او سحر وان عرفت انه وصل والله ما يحصل خير
الكل : طيب
جلس الجد بضيق وهو مايدري وش نهاية هالموال والسيره
وطلعت عهد وشهد لسحر اللي نايمه وجلسوا بضيق وهم متضايقين من هالايام الشينه بنظرهم
اما مضاوي وهيا ما كانوا مصدقين ان خلف يرفض بنات عمه كل هالرفض
وعزوز اللي طلع يجلس عند الباب بضيق والتفت على فيصل اللي بعد طلع وهو يناظره بهدوء وقرب : وش تسوي لحالك
عزوز صد بضيق : جالس
فيصل جلس جنبه وهم كل واحد ساكت مايكلم الثاني واخيراً نطق فيصل وقال: ترا ما احد راضي عن اللي سواه ابوي اليوم
ابتسم عزوز بضيق: ماعليه عمي ويمون
فيصل : تدري انه مقهور على خلف يعني مهما كان ابوي يفكر ان سحر رفضت خلف عشانه مريض
التفت له عزوز بحده: بس اللي نشوفه هو ان خلف بعد مايبيها
فيصل: وش يسوي يعني!؟ يموت اذا هي ماتبيه طبيعي بيصير ما يبيها
عزوز: جاي تمشكل انت
صد فيصل: لا
سكتوا كلهم وكل واحد وده يسولف بس كل واحد مقهور على اخوه
_______________________.
عند خلف
نزل وهو مايدري وين بيروح اخذ نفس اول ما شاف جابر وهذا ماهو وقت جابر ابداً حاول يهدي نفسه وتقدم جابر : ماشاء الله خلف وشلونك الحين ان شاء الله زين
خلف بهدوء: حمدلله احسن انت كيفك
جابر : بخييير ! وين رايح!؟
خلف : ا والله ماني رايح لمكان ،اتمشى
جابر: زيييين زييين يا معود ، عيل حياك وياي البيت نتقهوى ونتعشى
خلف بسرعه: لا لا يا جابر ماودي اكلف عليك والله
جابر: مافيه كلافه يا رجال ، تعال وياي وترا مافي البيت احد الا انا وانت
اصر جابر على خلف اللي تفشل لكن انجبر يروح معه وهو ماله خلق بس ماقدر يرفض
_______________________.
وفي بيت النوخذه
الكل راح لعزيمة صيته الا ليلى اللي رفضت بحجة ان ماعندها بنات وبتطفش وقررت تجلس بالبيت لحالها واول ما فضى البيت اخذت اغراضها وطلعت للسطح بما ان الجو حلو ومثل العاده فتحت الكاميره وشغلت الراديو وهي تربط الشال على خصرها وابتدت موهبتها اللي تحبها وهي ترقص وتغني ماهي حاسه بالدنيا
_______________________.
تحت في بيت النوخذه
دخل جابر وهو يرحب بخلف المنحرج
جابر : اسمع ياخلف اطلع مع الدرج لسطح فوق وانا بزهب الچاي واجي خذ راحتك البيت بيتك وترا ماكو احد
خلف : الله يسلمك
طلع خلف وهو يطلع بخاخ الربو من جيبه وطلع السطح وهو كل ما قرب يسمع صوت اغنيه
ودخل لكن جمد وهو يشوف ليلى اللي بطرف السطح ترقص وما انتبهت لدخوله لا شعورياً جمد وقلبه شوي ويطلع من صدره وهو اول مادقق عرفها
اما ليلى للي كانت في قمة اندماجها وانثنت ولفت وهي ترقص لكن وقفت عيونها برعب على اطراف ثوب رجال ورجوله شهقت وهي ترفع راسها لكن تعثرت وطاحت بصدمه اول ما شافته خلف
اللي عيونه من الصدمه ما ترمش وهو يناظرها واول ماطاحت بدون ما يحس قال : بسم لله عليك
فزت ليلى بخوف وهي صوتها : انت شنو تسوي هنييييه !؟ شنو جابك لبيتنا
لف خلف بتوتر : ا اقصري صوتك جابر تحت
ليلى اللي نست كل شي وهي من زمان شاكه بخلف ونظراته وخافت منه كثير انه عارف مافي البيت احد وجاي بيسوي لها شي انهبلت وهي خايفه : جااب..
قاطعها خلف بتوتر وخوف : يابنت الحلال اهدي ولا تصارخين والله ماني مسوي شي اخوك عزمني وجيت معه وهو قال اطلع مافيه احد بالبيت
ليلى : چذاااب وخر عني وخر
ابعد خلف لكن اول ماسمع صوت جابر تقدم وهو خايف ان تصير سالفه اكبر : ليلى ادخلي يابنت الحلال فكينا من الفضايح واالله مادريت انك هنا ولا كان ماجيت
ليلى : شنو عرفك اسمي انت!؟
خلف اللي ماعاد يقدر يفكر بشي الا ان جابر بيجي ويشوفهم وحزتها يبتلش جمع كل اغراضها وهو يعطيها ودفها بالطرف المظلم من السطح ورجع بارتباك لكن شاف خلخالها طايح بعد ما انقطع من رجلها اول ماطاحت اخذه بسرعه يحطه بجيبه وجلس على الكرسي متوتر
ودخل جابر : العذر والسموحه صيفت عليك!؟
خلف : ا لا عادي
جابر: والله قعدت احوس بالمطبخ ما ادل وين السكر والچاي بس حمدلله اخيراً زهب
ابتسم خلف وهو مرتبك وقلبه يدق وخايف ليلى تطلع وتصير بلاوي : ماعليه
اما ليلى اللي بعد ما سمعت صوت جابر عرفت انه جاب خلف وتفشلت من خلف وتفشلت اكثر من وضعها وهي متخبيه ورا القراشع اللي بالحوش ناظرت في اغراضها اللي لمها خلف لكن شهقت وهي تشوف بخاخ الربو معها !؟ ماتدري كيف جاها لكن خلف وهو يلم الاغراض رماه معها ما انتبهه شدت عليه بفشله وهي تناظر فيهم من بين الاغراض وتشوف خلف اللي واضح ماهو مرتاح ما تدري ليش خباها عن جابر وهي تدري لو عرف جابر بيذبحها
طالت سواليف جابر وخلف واللي كان خلف فيها يرد بهدوء وتركيز لانه يدري ليلى تسمعه وقلبه معها
جابر: اقول خلف انت چم عمرك!؟
خلف : 27
جابر: الله يطول بعمرك بس غريبه ما تزوجت !؟ انحبست انفاس خلف : ا ما صار نصيب للحين
شهقت ليلى ( حسبي لله عليك يا چذاب ! عيل مافيه نصيب وسحر المسيكينه شتسوي فيك يالعيار)
جابر : والله انا اشوف بعدنا صغار على الزواج والمسؤوليه
ضحك خلف : لا يسمعك ابوي اللي يشوفني الحين شايب
ضحك جابر: كلهم چذيه ما ادري شنو حكمتهم
خلف : ابوي لو هي عليه زوجني وانا ابو 20 بس زين اني قدرت اهج
جابر : والله انا كنت مع ابوي يومياً نجره وهوشه على هالزواج وبعدين اقتنع ماعاد يفتح الموضوع
خلف : وانت وشوله ما تزوج!
جابر : بيني وبينك انا ما شبعت من العزوبيه شحلاتي بروحي صافي قلبي وعقلي اسهر على كيفي وانام على كيفي مابي مسؤوليه
ابتسم خلف : منطقي والله
كملوا سوالف عن هالمواضيع وليلى حاقده على خلف وهي ودها تقوم وتلعن خيره وهي مصدومه ليه ماقال انه خاطب ويكذب بعد
_______________________.
وعلى الحدود
وعند عقاب اللي كان واقف في استلامه وهو منسجم في التفكير ماعاد في راسه الا وعد هاللي خربت كل شي وهو متأكد انها سبب في خراب زواج خلف وسحر رفع راسه على جيت ( مبارك )
مبارك: عقاب وراك جالسٍ لحالك
عقاب: ماسك خفارتي ؟!
مبارك قرب وهو ينزل القهوه قدامه: تعال تقهو
جلس قدامه عقاب وهو ساكت ولف وهو يشوف مبارك زعلان ومعصب : وش فيك !
مبارك باندفاع : مليت مليييت وطقت كبدي
عقاب: وش فيك !
مبارك : متهاوش مع مرتي وطقيتها وطلقتها ورميتها في بيت اهلها
اتسعت عيون عقاب بذهول : وليه!؟
مبارك : ماتستحي على وجهها وطويله لسانك وانا ماني ما اتحمل الحرمه اللي لسانها طويل
عقاب : بس الطلاق ماهو حل
مبارك: كنت اقوله لكن والله ياعقاب انها من طولة لسانها تجبرني اطقها ليييل ونهار ولا تفهم
عقاب : انت ما عندك عيال !؟
مبارك: لا والحمدلله ما جبت منها عيال وبلشت
سكت عقاب يناظر مبارك اللي مندفع ويهاوش ويكسر حوله كل شي
عقاب : وش بتسوي !؟
مبارك: بخليها تذلف واتزوج غيرها
ابتسم عقاب اول ماطرت له فكره: ومن بتزوج!؟؟
مبارك: بنات خلق الله واجد
عقاب سكت وبعدين قال: اي ولله تزوج انت رجال وسيد الرجال وكلٍ يزوجك بنته ويتشرفون فيك
فجأه لف مبارك : وانت تزوجني!؟
عقاب : ابشر بعزك
مبارك : عندك خوات
عقاب : عندي خوات لكن كلهم مزوجهم ووحده صغيره لكن اذا ودك عندي بنت عمي وانت تستاهل الخير
فز مبارك بفرح: الله يسلمك ياعقاب بس انت صادق!
عقاب : اكيد صادق شرواك ينشرى بالذهب
مبارك: اي والله بارك الله فيك ، ومتى نخطب
عقاب: ابد بعطيك رقم عمي وكلمه وتفاهم معه وترا البنت اكبر بناته
مبارك: زين الله يوسع صدرك بالرضا والسرور
ابتسم عقاب وهوو مايحب مبارك كثير ويعرف انه اقشر وشين بس هذا هو انتقامه اللي بيكسر به شوكه وعد و يذوقها نفس الكاس اللي ذاقته سحر بوجهة نظره
عطاه رقم عمه وتكتف وهو باقي لخطته بقيه وبيكملها
( مبارك : رجال في الاربعين متسلط واقشر وصاحب امراض و ومتعصب جداً ورجعي بتفكيره وكان من ضمن الكتيبه اللي ينتمي لها عقاب ويعرفه عقاب وعشان كذا اختاره)
_______________________.
في بيت النوخذه
وعند خلف ما صدق انه يتقهوى ولا عاد قدر يجلس يحس انه جالس على شوك متوتر وقرر انه يطلع وبالقوه لي تخلص من جابر وطلع
اما ليلى اول مانزلوا ركضت لغرفتها وهي خايفه يكشفها جابر دخلت وهي ترمي الاغراض يالدرج بخوف لكن ناظرت بخاخ خلف واخذت بضيق وهي ماتدري وش تسوي ( وليّييه شسوي فيه هذا!؟ اكيد انه مريض ويحتاجه )
دخلته بسرعه ودخلت بفراشها تمثل النوم اول ما سمعت صوت جابر وامها وشيخه
وتحت لف جابر يناظر امه وشيخه: وين ليلوه!؟
ام نهيان: ما رضت تروح ويانا
شيخه : قالت بتنام ليه ما شفتها!؟
جابر : لا والله اصلا انا عزمت رجال ومن شوي راح ما سمعت لها حس
ام نهيان: يمكن نامت
جابر: زين انها نامت ما درعمت علينا
رجعت ليلى بخوف لفراشها وهو تفكر وش بيسوي خلف بدون هالبخاخ وهي قلبها يدق للحين من منظره وهو واقف قدامها وشلون عرف اسمها
وشهقت اول ماتذكرت الكاميره اللي نستها بالسطح وشغاله طلعت تركض للسطح قبل احد يحصلها واخذتها وطلعت لغرفتها مسرعه
_______________________.
عند ضاري
اللي كان يدور خلف وشافه جاي يمشي وهو حاط يده على صدره ومبتسم وفي عالم ثاني كان منظر ليلى ماهو راضي يطلع من عيونه وهو شافها قدام عيونها شافها بكل شي يحبه فيه حتى شامتها شافها زين ووصله حتى ريحة عطرها
فز على صوت ضاري : هيييي هييي هيييي اقلع وليدنا والله يستر عليه
ضحك خلف : متى جيت انت!؟
ضاري : وبعد ما دريت عني بعد
خلف : تكفى اسكت اسكت مابي اطلع من اللي انا فيه
ضاري : جوك حلو يا الطيب بس علمني الليله معي ولا
خلف : لا لا روح لحالك انا برجع البيت
ضحك ضاري: زييين زين بس قبل نادر وينه !؟
خلف : مدري يمكن مسافر خبري فيه يقول بطلع للخبر عاد مدري طلع ولا باقي
ضاري : طيب وش صار مع ابوك
خلف : اليوم كبرت زياده لكن هي الاخيره يا تزين يا تشين
ضاري : استهدي بالله وكل شي محلول
خلف : ان شاء للله يلا انا رايح انتهيت من الصبح للحين
ضاري : الله معك
رجع خلف لبيت جده وهو من يوم طلع مايدري وش صار وهل ابوه سوا شي او لا لكن من الهدوء واضح ان الموضوع ما زالت بنفس السوء
التفت على مضاوي اللي طلعت: زين انك رجعت قبل انام
خلف : ليه وش تبين!؟
مضاوي : عقاب موصيني عليك
ضحك خلف : مب صاحي عقاب
مضاوي : خلف دامك جيت تعال بسولف معك
خلف : شكلك مروقه وانا والله ابي انام
مضاوي: ماني مطوله تعال غرفة محمد
اتجهوا لها ودخل خلف : لايكون ابوي جاء
مضاوي: لا بس ابي اسألك عن الكلام اللي قلته لابوك!؟ انت صادق انك عايف سحر وماتبيها !؟
خلف غمض بضيق : مضاوي لا تصيرين خبله انتي بعد!! اكيد ماني عايف بنت عمي لكن تعرفين ابوي كيف يفكر هو طول عمره مستوعب اني بتزوج سحر وفجأه طلعنا وقلنا سحر رفضت وانهبل اكيد بيعارض وهو زي ما تعرفين ولده الكبير ويشوفني عنده مافي احد مثلي اكيد بيستصعب الرفض لي وبعتبره اهانه هذا اذا ما فكر ان الربو حجه عشان ترفضني سحر وانها بتقول مابي اتزوج انسان من ادنات الدون يطيح وينكتم ، مضاوي تعرفين ابوي
ابتسمت مضاوي براحه: والله كنت خايفه انك صادق وحزتها كنت بكرهك
دفها خلف بضحك: مهبوله انتي قومي قومي تيسري نامي ولا حطيتيني بدال عقاب تحارشيني
مضاوي : احمد ربك ابي النوم ولا ماخليتك
طلعت وتركت خلف رمى نفسه على السرير بهدوء وابتسم على نهاية ليلته الحلوه تذكر ودخل يده بجيبه وهو يطلع الخلخال ابتسم من كل قلبه وهو ينعاد في باله حتى هواشها وغضبها ضحك وهو يردد اسمها بهمس وشلون تجرأ ونادها دخل الخلخال ببوكه ورجع ينسدح بتعب وهو رغم ركام المشاكل اللي ينتظره الا انه نام وهو يحلم بليلى
_______________________.
وفي بيت ابو خلف
مانام ابو خلف وهو يدور بهدوء ويفكر بكلام خلف ويفكر بتصرفه الطايش مع عيال اخوه مهما كان هم ايتام وامانه اخوه عنده كيف سمح لغضبه يسوي هاللي سواه
غمض بضيق وهو مايبي يضايقهم بس انه كبر بخاطره رفض سحر لخلف لكن كلام خلف اليوم لخبط موازينه معقوله خلف مايبيها معقوله يسويها ويروح ويخلينا
كان هالوسواس ما خلاه ينام
وام خلف بعد مانامت ماتدري وينه خلف ولا تدري وش صار له
اما وعد كانت تفكر كيف بتحل هالسالفه ولازم تحلها قبل البلاوي طلعت وهي تفكر في اي شي ممكن يحسس ابوها بالذنب
ولف ابو خلف : وعد وش عندك صاحيه هالوقت
وعد بتمثيل : ا مدري يبه حلمت حلم فجعني وصحيت
ابو خلف : بسم لله عليك ، خير وش هالحلم
وعد كانت تستغفر ووهي خايفه من اللي بتسويه بس مجبوره عشان تحسس ابوها بغلطه : يبه حلمت بعمي نايف كان زعلااان عليييك مره يبه
التفت ابو خلف اللي كانت نقطة ضعفه نايف اخوه واللي انكسر بموته : وشو ؟
وعد جلست جنبه : مدري يبه كذا حلمت انه زعلان مره وتكلمه ولا يكلمك وصاد عنك مره وواقف جنب خلف وجدي
سكتت وهي تدور كلمه قويه بس قالت وهي تستغفر بنفسها على كذبها : اييه وكان يقول ضيعت الوصيه يا ناصر
فز ابو خلف واقف بخوف وهو نايف موصيه على عياله ووقفت وعد وهي تدعي بنفسها ان هالكذبه تأثر في ابوها ويحس بغلطته
ناظرها ابو خلف وقالت وعد : يبه اخاف عشان السالفه اللي صارت اليوم ! وبعدين يبه انت تدري ان الزواج ماهو غصب ولا يجوز الغصب فيه ومهما كان عيال عمي امانه برقبتك وخلف مهما كان ولدك يبه انت تدري خلف ما يتحمل زعل وتوتر وضيق اخاف يصير له شي وحزتها مايفيد الندم
وقف ابو خلف بغضب وابعد وتركها ووعد متكتفه وهي تدعي ان خطتها تضبط هالمره
اما ابو خلف اكلت قلبه الهواجيس والظنون والندم وعجز ينام الليل كله يفكر
_______________________.
ومن بكره في بيت الجد
كان خلف من بدري صاحي ينتظر عزوز وشهد بيوديهم بنفسه للمدرسه
طلع عزوز وجنبه شهد اللي متغطيه وهي متفشله من خلف
طلعت مضاوي وهي تعطيهم مصروفهم اللي عطاها اياه عقاب في غيابه عشان تعطيهم
نزل خلف القهوه: يلا جاهزين
عزوز: ايه
ابو ناصر: وصلهم وارجع بسرعه يا خليف تدري ورانا شغل
خلف : ابشر ابشر
ام ناصر كانت صاده بضيق من ضيق ابو خلف وما تكلم احد بالبيت كله
طلع خلف ومعه عزوز وشهد وكانت سحر تراقبهم من فوق بضيق ولفت بضيق وهي تنهد بقهر
عهد : وش فيك !؟ ما شبعتي بكى وضيق خلاص
سحر : زعلانه على اخواني شوفي اخر شي وش صار فيهم
عهد : ماصار فيهم شي بخيير وعافيه وما احنا محتاجين عمك عشان نعيش وخلف ذا اللي مسوي بطل بكره بيجي عقاب ويفكنا من خدماته
سحر: وش فيك عليه انتي!
عهد : وش اللي وش فيني عليه !؟ انهبلتي انتي !؟ وش تبين اكثر من كذا!؟ من هذا عمك وعياله اللي كنت مخدوعين فيهم هذا هم طلعوا لك على الحقيقه
سحر: لا تنجننين عمي يحبنا وعياله بعد وخلف هذا هو واقف معنا
ضحكت عهد باستهزاء: ايه واقف لكن عشان يغطي سواد وجهه لكن انا من الحين اقولك انا مالي شغل فيهم كلهم على بعضهم ولا لي عم ولا عيال عم بعد
دخلت هيا على اخر كلامها: وش ذا الكلام !؟
لفت عهد : اللي سمعتيه
هيا: ماشاء الله من متى صرنا ما نستحي
عهد : من الساعه اللي سكر اخوك الباب في وجيهنا وتبرى منا وكله عشان خاطر ولده اللي ماصدق ان تجي هالسالفه عشان يفتك من هالزواج
هيا: استحي على وجهك يا عهد !وش هالكلام نستيني كل افضاله عليك ! عشانه طلع عن طوره في وقت غضب
عهد : محد له فضل علي جدي رباني وعقاب يصرف علينا ومحد له فضل علينا
طلعت عهد بقهر وتركتهم واقفين وصدت هيا بضيق : الله يهديها الله يهديها
_______________________.
وفي بيت ابو خلف
اللي كان يستعجلهم كالعاده ووعد تراقب ملامحه اللي واضح الندم والضيق فيها ماكان ودها تضيقه لهدرجه بس لازم يحس بالندم
فيصل بهمس: وش فيه ابوي !؟
وعد : مدري لكن حاول اذا طلعتوا تقولون بتمرون عيال عمي لا تسكتون
سالم: وااذا هاوش !
وعد: خله يهاوش لكن لا تخلونه يتركهم ابداً
وجدان : طيب يلا يلا
قربت ام وعد تصحي غيث اللي نايم بشنطته وطلعوا واول ما لفوا شافوا خلف وشهد وعزوز
وركض غيث لخلف : خلللف ليه ماجيتنا يومين
استقبله خلف وهو ينزل يسلم عليه مبتسم : جدي يبيني
لف يناظر ابوه اللي واقف وهو ضايق وقال : عزوز يلا انت واختك
لف عزوز بصدمه على خلف والعيال كل واحد يناظر الثاني فرحانين
وابتسم خلف وهو يهمس لعزوز: روحوا وسلموا على راسه ترا ابوي يحبكم وبيرضى على طول
ابتسم عزوز بفرح: طييب يلا شهد
اتجهوا لابو خلف اللي ركب وهو مايناظر خلف وقرب عزوز يبوس راسه: صبحت بالخير ياعمي
ضعف قلب ابو خلف وهو يناظره بضيق: هلا صباح النور
قربت شهد وهي كالعاده تبوس راسه ويده: عمي كيفك
ابتسم ابو خلف بدون مايحس : بخير انتي بخير
شهد : حمدلله
قال ابو خلف بضيق : امس تاخرتتوا احسبكم ما انتم مداومين
كان يعتذر بس بطريقه غير مباشره ابتسم عزوز يجاريه: ماصار الا كل خير
فيصل طل من الحوض مبتسم: يلا عزوز اركب
راح عزوز وهو يمد له يده ورفعه فيصل معه وركبت شهد جنب وجدان اللي قربت تضمها بفرحه وغيث بينهم مبتسم
وكان ابو خلف مبتسم بنفسه وهو يشوفهم فرحانين ببعض ولف للمرايه يشوف خلف اللي كان واقف متكتف ومبتسم لكن كالعاده يكح بس هالمره كحته قويه يسمعها ابو خلف وهنا شال همه وضاق صدره زود
اما خلف اللي في عز فرحته هجمت عليه كحته اخذ المويه يشرب بهدوء ورجع للبيت مبتسم: جدي
وقف ابو ناصر: مسرع جيت!؟
ضحك خلف : لا ابشرك الوالد الغالي رضى علينا اخذ العيال وراح
ابو ناصر : والله
خلف : ايه
ام ناصر: ناصر قلبه كبير لكن الناس اللي ما تخاف الله واجد
صد خلف مبتسم : هاه نطلع لدكاننا
ابو ناصر: اي واللله يلا يلا وانا جدك
اخذ ابو ناصر وطلعوا على جيت عقاب المبتسم : طالعين
ابو ناصر: اي والله انت خلصت
عقاب : خلصت وميييت ابي النوم
خلف: ادخل ادخل مضاوي تحتريك
ضحك عقاب : زين
دخل وشاف مضاوي قدامه وفزت : هلا هلا مابغيت تشرف
عقاب : ابد رايح اتمشى ! خبله انتي وش اللي مابغيت اشرف اشتغل انا اشتغل
مضاوي : وش فيك اكلتني بقشوري
ام ناصر : ادخل افطر
عقاب: مابي شي بنام مافيني حيل شي بس وين البنات
مضاوي : كل وحده في شغلها
عقاب : وانتي اكل ومرعى وقلة صنعى
مضاوي : مثلك بالضبط
دفها عقاب وطلع وهو ما يبي يقابل احد لانه مايبي مشاكل ومايبي يفكر ولا ينحاس تفكيره عشان يضبط الفكره اللي في راسه
_______________________.
في بيت النوخذه
كانت ليلى تنتظر ليين صار وقت السوق ونزلت لأمها اللي جالسه تنقي الرز هي وشيخه
ليلى : ييييمه
ام نهيان: نعم وش فيچ تصارخين !
ليلى : يمه الله يخليچ قومي بنروح السوق
لفت ام نهيان باستنكار : شنو شنو !؟ مجنونه انتي مو صاحيه !؟
ليلى : لييييش يمه
شيخه: شنو اللي ليش! شتبين بالسوق
ليلى: مليييت من الحكره بطلع بتمشى
شيخه : والله اذا انتي مليتي تعالي حطي إيدچ ويانا وساعدينا
ام نهيان: شيخه صادقه تعالي تعلمي شوي شغل البيت خليچ سنعه
ليلى: شيخوووه شهالنحاسه!؟ لاحقه الشغل ، يمه الله يخليچ قومي والله ما نطول شوي ونرد
نزلت ام نهيان الصحن: احمدي ربچ اني ابي اروح العطار وقومي يلا زتچ (اسرعي) مانبي نصيف
ليلى : من عيوني
ركضت لغرفتها وهي تلبس عبايتها وتلبس نقابها وركضت تاخذ بخاخ خلف وهي تدور شي تحطه فيه شافت علبه صغيره وحطته وهي تحطه بالشنطه وكتبت ورقه سريعه وحطتها ولفت تدور وشافت الراديو واخذته معها
ام نهيان: شحقه اخذه الراديو!
ليلى: مدري شفيه
وطلعت مع امها لسوق
_______________________.
في السوق
كان خلف اخذ طاولته وجالس على الباب ويشتغل بهدوء وابتسم اول ما تذكر ليلى واستند على الطاوله وطرت له اغنيه الحين بذات خاطره يسمعها الحين هي تشرح كل شي يحس به طلع الشريط وهو يشغله بالراديو ويغني مع الاغنيه
لكن رفع راسه على صوت الحرمه اللي واقفه بطرف : لو سمحت يالاخو
عرف خلف عيون ليلى وفز واقف وقلبه يدق وبالقوه طلع صوته وقال: سمي
ام نهيان: يا وليدي عندي هالراديو مدري شفيه مايشتغل
خلف بارتباك : ا ابشري ابشري عطيني وانا اشوف وش فيه
تقدمت ام نهيان تعطيه الراديو: متى بتخلصه!
خلف : ا ساعه بس وتعالوا اخذوه
ام نهيان : زين بخلص غريضاتي من السوق وارد لك
خلف : زين كانوا واقفين جنب الردايو
ولكن انلجم خلف اول ماشاف ليلى تطلع علبه من شنطتها وهي مخبيتها وراها وحطتها بشويش وحذر ورا الراديو وسحبت يدها بسرعه
ما يمدي خلف استوعب حركتها الا انصعق من صوت الاغنيه اللي جاء في وقت مايدري يقول خلف صح او غلط وكان صوت خالد عبدالرحمن يردد
( لاعتني بنظره وبعد ما كفاها
حطت بجوفي من الجمر شوق موقود
شامه تعلّى ثغرها من حلاها
تظفي على نور الحسن نور مردود
صابتني بداها ونفسي دواها
من العيون السود دواي منشود)
ارتبك خلف وانصدمت ليلى اللي بانت في عيونها صدمتها ومشت ورا امها بسرعه وقلبها لا شعورياً يدق
سحب خلف العلبه يدخلها بين الاغراض التفت يشوف احد انتبه !
وجلس براحه وهو مبتسم عجز يسيطر على ابتسامته عجز يتحكم بنفسه والتفت لراديو اللي مازال يغني
وضحك وهو يكمل معه (اهاوده قلب انشغف في هواها
متحمله صار الصبر منه مفقود
عزاه نفسي صابها ما طواها
طي الورق رطبٍ مقطوف من عود
حق الله اعلم بالحشا وش غلاها
تضحك لها عيني ولو كنت مزهود
الناس ما تدري بروحي وخفاها
يكفي اجنّب نفسي عن كل منقود)
تنهد وهو يتكي على الطاوله ومازاال مبتسم وهو مايدري وش في العلبه
اما ليلى اللي كانوا عند العطار وكانت تحاول تسرق النظر وتناظر خلف اللي ابتسامته تنشاف من 10 امتار وهو متكي بهيمان ضحكت لا شعورياً من شكله بس سكتت تفكر بالاغنيه اللي سمعتها وصوته امس وهو يناديها ونظراته لها وخافت حيييل
لكن خلف اللي دخل المحل ببتسامه وفتح العلبه وضحك من قلبه وهو من امس يدور البخاخ بس ما حصله ما توقعه معها ابد اخذ الورقه وفتحها وكانت ( خذ هذا دواك طيحته امس مع اغراضي ورديته لك، وترا الراديو مافيه شي بس حطيته حجه خفت تمرض ما تحصل دواك )
اخذ البخاخ وهو يبخه بفمه كان فعلاً يحتاج نفس عميق ونفس كله عطرها دخل الورقه بمحفظته وشاف الخلخال وابتسم : اييه والله اني مرضت بك وانتهيت و صار دوري ارجع لك الامانه يابنت النوخذه
دخل العلبه ولف على صوت ابووناصر: خلف وش فيك مخلي الاغراض برا
خلف : بدخلها الحين ياجدي
دخل الاغراض ولف : جدي
ابو ناصر: سم
خلف بإحراج : ودي بسلفه منك لين الراتب
ابو ناصر: افا الحلال حلالك ياخليف اخذ اللي تبي وانا جدك وماهي سلفه بعد
ابتسم خلف وهو يبوس راسه : يا بعد طوايف خليف والله وانا بروح شوي وارجع
ضحك ابو ناصر واخذ خلف الفلوس وطلع مسرع ووصل للمكان اللي بيحصل فيه الامانه والعوض لليلى وقف في محل الذهب وهو يدور الخلاخل وابتسم اول ماشاف اللي اعجبه واشتراه بدون مايحس على نفسه ومشاعر الفرح تدق بقلبه وتتحكم بتصرفاته اخذه وهو مستانس فيه حطه بظرف وهو كتب ورقه معه ورجع مسرع وهو يجلس عند الراديو حقهم وقلبه وهو يطلع البطاريات وحط بدالها الظرف وسكره وجلس متكتف ومبتسم ويدندن الاغنيه براسه للحين
وبعد شوي رجعت ام نهيان : هاه يمه خلصت ؟!
فز خلف : ايه ياخالتي هذا هو وترا صلحته والحين صار زين وطلعت البطاريات برا فالبيت ركبوها
ولف بنظره سريعه يناظر ليلى وابتسم وارتبكت ليلى اللي بالقوه مسكت كيس الراديو واخذوه ورجعوا وهي مفجوعه من ابتسامته اللي كانت حلوه لكن هزت راسها ليلى بغضب وهي تهاوش نفسها ( ليلى انهبلتي!؟ لايغرچ بضحكته هالعيار لا تنسين انه خاطب وفوق ذا عينه زايغه )
مشت مع امها وتركت خلف هاااايم ومبسوط ومستانس ومنطرب وناسي كل البلاوي اللي بالبيت تحتريه
_______________________.
انتهى♥



فيتامين سي غير متواجد حالياً  
التوقيع



شكراً منتداي الأول و الغالي ... وسام أعتز به


رد مع اقتباس
قديم 26-06-20, 10:10 AM   #13

فيتامين سي

مراقبة عامة ومشرفة منتدى الروايات المنقولة

alkap ~
 
الصورة الرمزية فيتامين سي

? العضوٌ?ھہ » 12556
?  التسِجيلٌ » Jun 2008
? مشَارَ?اتْي » 41,357
? الًجنِس »
? دولتي » دولتي Saudi Arabia
? مزاجي » مزاجي
?  نُقآطِيْ » فيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond repute
?? ??? ~
My Mms ~
افتراضي



البارت التاسع ..

وفي الخبر
صحى نادر وهو يناظر ساعته بتعب والتفت ماشاف شوق وفز مسرع يدورها وشافها جالسه بالصاله وتتابع التلفزيون وابتسم اول ماشاف اللي تباعه كان افلام كرتون وكانت عدنان ولينا ضحك : الله من زماااان ما تابعت هالاشياء
تفشلت شوق : ا لقيتها وخليتها اذا تبي بغير
جلس نادر جنبها ببتسامه: لا لا خليها انا احبها
شوق : تبي فطور!
لف نادر بهدوء: تقدرين تجهزينه
ضحكت شوق واول مره يشوف نادر ضحكتها : وش فيك تضحكين!
شوق بحرج: سؤالك غريب كلها نواشف احضرها وشاهي
نادر ضحك : يعني تقدرين ؟
شوق: لا يغرك اني صغيره اعرف اطبخ واشتغل كل شي ، لاني اصلاً ما كنت مرفهه لدرجة اني ما اعرف شي
ضحك نادر: ما عرفتي تكسبين الموضوع لصالحك لانك لو قلتي معرف بقوم اسويها انا
وقفت شوق بضحكه: زين علمتني عشان استغلها بعدين
جلس نادر مبتسم وهو يشوفها ارتاحت كثير وبدت تكلمه براحه وتسولف وترد عليه
وولف لتليفون وهو يبي يكلم خلف من زمان ما كلمه ولايقدر يتصل على تليفون بيتهم واتصل على محل جده ورد خلف : الو
نادر وهو يقلب صوته صوت بنت: خلف شلونك
دق قلب خوف مايدري ليه خاف انها ليلى وقال بارتباك : ا هلا
نادر : ماصدقت انك رديت والله اشتقت لك
قطب خلف بذهول وقال: هاه!؟
لكن انفجر نادر يضحك: افا ياخلف طلعت خواف وش بلاك بغيت تموت
غمض خلف : الله ياخذ عقلك يانادر الزفت
نادر:ههههههههههههههههههههههههههههههههههههههههههههه ههههههههههه وش فيك هاه وش بلاك مختبص
خلف بضحك: استغفرلله ! لا واضح انعديت من البنت اللي عندك
ضحك نادر: اسكت تكفى انا بكره بجيكم مربية اجيال مضبوطه
ضحك خلف : لا تسمعك البنت بس
نادر: ماعلينا المهم ترا طلعت للخبر وتوي فضيت
خلف : كذا لا احم ولا دستور ولا قلت لنا ضاري كل يوم يدورك يخاف انك صفيت مع شوق تبكي
ضحك نادر: يازينه ضاري والله ان له فقده
خلف: ليتك تعلم عقاب فجر مرارتي هو وياه
نادر : خله ياخي خلهم ينشبون مع بعض ويفكونا
خلف : خلنا منهم كيف امورك!
نادر: ماشيه تمام ويومين ثلاثه وراجع
خلف : زين اجل اهم شي انبسط لا تنكد على نفسك
نادر: هذا اللي اسويه المهم يلا بسكر سلم على العيال ونفسك
خلف : ابشر يلا مع السلامه
سكر نادر وهو يناظر شوق ببتسامه وجلست وهي تتابع مع نادر ببتسامه بريئه جذابه
_______________________.
وفي بيت النوخذه
طلعت ليلى لغرفتها وهي تطلع الراديو : استغفر الله لازم يطلع البطاريات يعني
قلبته وهي تفتح الغطاء بس شهقت وهي تناظر الظرف : يممممه ييمممه شنو مسوي هالمجنون
ضربت خدها بخوف :ياويلي لو احد يدري حسبي الله عليك يالعيااار
ركضت تقفل باب الغرفه وسحبت الظرف وفتحت بشويش وداخت اول ماشافت الخلخال الجديد مسكت راسها وهي تدور: شنو مهبب هاللي مايستحي ياويلچ ياويلچ يا ليلوووه يا ويلچ انفضحنا انفضحنا
سحبت الورقه وهي مفجوعه وشافته كاتب بخط واثق وجميل ( اعتذر على هالجرأه يا بنت النوخذه لكن عندي لك امانه ودامك رجعتي امانتي وجب علي ارد امانتك ، امس شفت خلخالك انقطع اول ماطحتي وفجعتك ودام انا السبب ،هذا العوض واتمنى تقبلينه ...ومشكوره انك رجعتي لي الدواء )
سكرتها وهي مغمضه:هذا مو بس عينه زايغه!؟ هذا مايستحي ماينتخي وفاصخ الحياء مره وحده لكن انا اراويك شغلك يا چليل الحياء يالجيكر ( شين)
جلست بغضب بس ابتسمت بضحك: استغفر لله شنو جيكر !؟ اذا هذا جيكر عيل منهو المزيون الذرب
وقفت وهي تضحك ورجعت كل شي محله وهي ترجع الخلخال بالظرف وهي تفكر كيف ترجعه وتوقفه عند حده
شافت الكاميره واخذتها وجلست تشوفها وشافت الفيديو امس وفتحت وهي مستغربه ان الكاميره مسجله وكانت البدايه رقصها وبعدها دخول خلف كبرت تناظر وجهه المذهول وراها وهو يناظرها وبعدها كل شي صار بينهم وبعدها سوالفه كامله مع جابر
ضحكت وهي تكبر وتصغر: شهالجني اللي في كل مكان موجود ، يمه منه
سكرت كل شي ونزلت مبتسمه وهي تفكر وش بتسوي بالخلخال
_______________________.
في بيت الجد
فزت هيا على دق الباب وفتحت وابتسمت: محمد حمدلله على السلامه
محمد : الله يسلمك
مضاوي :ادخل ادخل
محمد : خذي تكفين الاغراض دخليها
دخل وهو متوقع اجتماعهم كالعاده لكن شاف البيت هااادي ولف باستغراب : وين الناس!؟
تنهدت مضاوي بضيق : الناس متشتتين
لف محمد بذهول واستغرب : وشو !؟ وش فيكم ! احد صاير له شي
مضاوي : تعال اجلس وبقولك
جلس محمد وبدت مضاوي تهل عليه السالفه ولف محمد بذهول : كل ذا صاير وانا مالي خبر
مضاوي : من وين بنقولك وحنا ما ندري وين ارضك من سماك
محمد : وناصر انهبل!؟ هو الزواج غصيبه
مضاوي : مب بس ناصر امي بعد معصبه معه
محمد : لا حول الله وييين امي!؟
مضاوي : راحت لجارتنا سعدا
محمد : انا بروح لناصر اتفاهم معه
مضاوي : عساك على القوه
طلع محمد متجهه بيت ابو خلف ودق الباب ينتظر وفتحت اماني : عمي محمد ياهلا حمدلله على السلامه
محمد : هلابك يا اماني ،الله يسلمك
الكل طلع على صوت محمد واجتمعوا حوله يسلمون عليه
ولف محمد اللي باين عليه الزعل : وين ابوكم!؟
حنان : راح يوصل العيال ماجاء للحين
ندى: اجلس انتظره اكيد انه على وصول وانا بسوي لك قهوه يحبها قلبك
محمد : زين زين
راحوا يساعدونها وجلست وعد : عمي سمعت باللي صار
محمد : سمعت سمعت وانا وش جابني الا هالخبر
وعد : انا حسفت ابوي اليوم واتوقع لو بتكلمه بيسمع منك
بدت تقوله وش صار وسكتت اول ما دخل ابوها وابتسم لشوفة محمد اللي اقبل يسلم عليه وهو زعلان
ابو خلف: وش فيه وجهك!؟
محمد : خلينا ياوعد
طلعت وعد وهي متأمله ان محمد بيحل الموضوع
ابو خلف : تكلم يا محمد لايكون صاير شي!؟
محمد : ليه هو فيه شي اكبر من اللي صار واللي سويته!؟
ابو خلف : وش سويت !؟
محمد : ياناصر نايف مات وهو يوصينا على عياله ويوصيك انت بذات ياما طلبك انك ما تظلهم ولا تجور عليهم وتقسى ! مسرع ما نسيت يا ناصر
ابو خلف: انا ما ظلمت لكن ابي لهم الخير مابي بنات اخوي يطلعون عند غريب مايخاف الله فيهم
محمد : كلنا نبي لهم الخير لكم هذا ما يعني إنا نجبرهم على التعاسة انت تدري لو تزوجوا مغصوبين عمرهم ما بيشوفون الخير ، ياناصر خلف يشوفها اخت وهي تشوفه اخو !؟ ليه تبي تحول هالاخوه لعداوة
ابو خلف : لا سحر رفضته عشانه تعبان
محمد : اول شي خلف طيب ماهو لا مريض ولا تعبان كل السالفه نوبات ربو تتعبه ولا هو بخير ولا يعيبه هالشي وثاني شي سحر ما تسويها
صد ابو خلف وهو متضايق وزعلان وكمل محمد بقهر: شوف هالبيوت من يوم عرفنا الدنيا وهي بيت واحد وعيالهم اخوان ووجبتهم وحده وخاطرهم واحد واللي يزعل واحد يزعل العايله كلها ؟ لا تخلي عزة النفس تهدم كل هالحياه ناظر حولك شوف الضيق اللي رسمته على الكل شوف السكون اللي يضيق الصدر كله عشان امر ما كتبه ربي ، اسمعني يا ناصر مهما كان ومهما صار انتبه تفرط بالوصيه وتظلم عيالك وعيال اخوك وتزعل ابوك وامك وخلف بكره بيتزوج وسحر بيوفقها الله والعبره ماهي في انهم يتزوجون بعض عشان نرتاح ويكونون بخير ! المهم يكونون بخير حتى لو ما ارتحنا حنا ... فكر في كلامي زين
طلع وتركه حاير وهو ماهو ناقص بعد كلام وعد وحلمها المزعوم
_______________________.
الظهر
في بيت ابو خلف اللي من يوم طلع محمد وجلس مع نفسه وفكر وندم نادى على وعد وهو يقولها تجهز غدا يكفي كل العايلتين وابتسمت وعد بفرح وهي من قبل حاسبه حسابهم
كانوا ام خلف ابو خلف وام وعد جالسين ولفت ام خلف :اقول يا ابو خلف
لف ابو خلف : نعم
ام خلف : ماودك تنادي خلف يرجع للبيت والله ان قلبي مشغلني عليه امس سمعته يكح وكحته شينه
ابو خلف : يصير خير ، سالم قوم افتح الباب الفاصل ونادهم للغدا
سالم: ابشر ابشر
فز يفتح الباب مبسوط وركض ينادي : جدي جدي
هيا : سالم وش فيك !
سالم : ابوي يقول تعالوا للغداء ! وينه جدي وخلف
مضاوي : بيجون الحين
ام ناصر وقفت وهي تستند على عكازها : انا بروح ألحقوني
مضاوي : ايييه رضى عين السيح
ضربتها امها بالعكاز: ياقليلة الحيا اص اص
لفوا على دخول ابو ناصر وخلف وركضت مضاوي بفرح: يبه ناصر ينتظركم للغدا
ابتسم خلف : طاح الحطب اجل
ابو ناصر: ان شاء الله انه طاح ان شاء الله ، مضاوي قومي عقاب يلحقنا
مضاوي : يقول لا احد يصحيني
ابو ناصر:صحيه بس صحيه
مضاوي : زين بس ترا محمد بعد رجع ونايم
خلف : زين على زين خليهم يجون كلهم
طلعوا كلهم متجهين بيت ابو خلف ووقف ابو خلف وهو يبوس راس ابو ناصر وتقدم خلف مسرع يبوس راسه ابوه وكتفه
والكل كانوا ساكتين بهدوء لكن كسر الصمت محمد وعقاب وعزوز اللي دخلوا وعقاب مستغرب ان عمه رضا وقربوا يسلمون عليه وجلسوا كلهم بنفس المجلس
ابو ناصر: هاه يا ناصر عساك دحرت ابليس
ابو خلف : الله يلعن ابليس والانسان يطلع عن طوره احيان وانا كل اللي ابيه ان عيال اخوي مايغيبون عني عقاب : ياعمي حنا ما نغيب عنك ابد وتحت شورك باللي تبي لكن بما يرضي الله ياعمي
محمد : نهاية هالقصه اعرفوها كل شي قسمه ونصيب
ابو ناصر : هذا اللي نبي نقوله
ابو خلف : انا شلت يدي وكيفهم يتزوجون ولا يجلسون
اعتدل خلف وهو يبوس راسه: يبه انا اسف وانت تدري انا ما اعصيك لكن الله يلعن ابليس
فيصل ببتسامه: حمدلله يا جماعة السالفه انحلت وان شاء الله مافيه مشاكل بينا
الكل : ان شاء الله
غيث : خلف بتجلس عندنا
رفع خلف راسه مبتسم: ان سمح لي ابو خلف
ابتسم ابو خلف : مرد البيت لك ياخليف
خلف : الله يطول بعمرك يبه
رجعوا لسفرتهم من جديد والكل ارتاح من هالهم وصح ان ابو خلف للحين زعلان بس ماكان يبي يخسر اكثر وبيحاول يتجاهل
_______________________.
في قسم الحريم
الكل جاء الا سحر اللي كانت متفشله منهم وعهد اللي بعد كلام ابو خلف ما تبي تطب بيته ابداً
ام خلف: وين البنات يا هيا؟؟
هيا : والله تركتهم يقولون مالهم نفس
ام ناصر : ناديهم ياشهد من متى ما يجون يتغدون!؟
وعد : اجلسي شهد انا بروح،بس اخوانك وين!؟
شهد : كلهم هنا
وعد : زين
ركضت وعد لبيت جدها وهي تطلع من السطح ودقت باب غرفتهم بشويش وطلت: ويييين بنات عمي اللي اشتقنا لهم
وقفت سحر بفشله: هلا وعد
قربت وعد بحب : هلابك وينكمم! ماجيتوا الغداء ولا ما اشتقتوا لنا
سحر: الا بس.. وعد: بس وش!؟
سحر بضيق: متفشله من خالتي ام خلف احسها زعلانه
وعد : لا يابنت الحلال عاد ما لقيتي الا عمتي تزعل افا بس هي تحبك وبالعكس تقول مو مهم ترضى بخلف المهم تكون مبسوطه ومرتاحه تعرفينها كيف طيبه
سحر: هذا اللي مفشلني هي طيبه وانا
وعد : انتي وش؟؟ سحر حبيبتي خلاص صار للي صار وانتهى والدنيا ماهي غصب بالعكس شوفي الكل واقف معك ومحد رضا عليك حتى خلف وكلنا وقفنا ضد ابوي لين رجع كل شي لمجاريه ورضا بالامر الواقع وصدقيني كلنا نبيك تكونين مبسوطه
دخلت عهد وتكتفت : قصدك تبون خلف ينبسط!؟
لفت وعد لها : نبي الخير لهم كلهم
عهد ضحكت: والله لو افكر مليون سنه ما اتوقع كل ذا يطلع منكم
وعد: وش طلع منا !؟
سحر: عهد خلاص
وعد : اسمعي ياعهد مهما صار انتم عيال عمنا ونحبكم وانا ابد ما الومك لو انقهرتي وعصبتي ابوي غلط فالنهايه لكن مهما كان اقولك حطي عقلك براسك وحنا ما نضركم ابد ، نهاية الكلام يلا معي للغداء
قبل تتكلم عهد وتزيد الطين بله قالت وعد بغضب: لا تقولين حرف زياده تخلين ابليس يدخل بينا فيه يلا الكل ينتظر للغداء
تحركت سحر معها وعهد ما راحت وانقهرت وعد من عهد وشدت على اسنانها بقهر( اييييه تدريس اخوها الكلب اكيد انه معبي راسها علينا)
دخلت سحر وهي منحرجه لكن الكل لف لها ببتسامه ووقفوا يسلمون عليها واولهم ام خلف اللي قالت بحب وطيبه: تعالي يا سحر يا حبيبتي تعالي تغدي
تقدمت سحر بضيق تبوس راسها: خالتي انا اسفه
ام خلف: وش تعتذرين عليه يا حبيبتي ! ماسويتي شي غلط بالعكس تعالي يا امي واجلسي وماصار الا كل خير
ام وعد : كل شي قسمه نصيب وهذا شي وارد
الكل: صادقه
جلست سحر بجنب ام خلف اللي حاضنتها كأنها بنتها وهذ يوجع سحر اكثر مو كفايه فقد حنية خلف!؟ ماهي مصدقه انها في يوم بتشوف ام زوج غير خلف !؟وماتدري اذا هي بحنية ام خلف او لا
_______________________.
العصر في الخبر
وقف نادر بعد ما جهز : شوق
لفت شوق : هلا
نادر: يلا اجهزي عشان نروح الحفر
فزت شوق بفرح : ولله
نادر: اي والله مب انا وعدتك!؟ انا عند وعدي بس هاه من الحين اقولك بتبكين بهون
شوق : لا لا اوعدك انا بعد ما ابكي
نادر : كذا اتفقنا يلا اجل اجهزي نبي نطلع قبل الليل
شوق : ابشر
ركضت تجهز ونادر متكتف على الشباك ونزل زقارته يطفيها بعد مارجعت شوق: خلصت
نادر : يلا
طلعوا متجهين للحفر وفجأه انتبه نادر لشوق اللي راح نص الطريق وهي سرحانه فيه والتفت ببتسامه وهو يدق خشمها بأصبعه بخفه: ماهقيت اني مزيون لذا الدرجه اللي تخليك تسرحين فيني
تفشلت شوق وابعدت : لا بس
ضحك نادر: لا وشو! ماني مزيون يعني
رفعت شوق راسها بفشله : ما اقصد بس اني افكر شلون كل هالسنين وحنا عيال خاله ولا نعرف بعض
نادر كان يحاول يلاطفها ويوسع صدرها ويعودها عليه: والله اذا علي انا بروح ارفع قضيه عليهم ! شلون عندي بنت خاله حلوه ما دريت عنها للحين
ضحكت شوق بخجل وسكتت وكمل نادر : الا تعالي صدق! معقوله ماكنتي تعرفين عني شي!!
شوق : اعرف ان خالتي عندها ولد بس
نادر: كذا متصافين انا بعد ما اعرف الا كذا
شوق : بس انت صرت تعرف كل شي عني
نادر: ابد الطريق طويل احكي لك فيه
بدا نادر يسولف لها عنه وشوق تناظره ببتسامه : ابد ولد خالتك شاب وسيم يبلغ من العمر 27 عاماً اشتغل في شركة يعني والله ماني مجتهد في الشغل بس شكلي بستحي منك واشد حيلي مايصير تشدين حيلك وتصيرين دكتوره وانا اصير كسلان
ضحكت شوق : اللي يشوفك ما يعطيك عمرك ! كنت اظنك اصغر
ضحك نادر : ايه هاذي ميزه فيني يعني تراني انسان مميز
ابتسمت شوق : ايه كمل
كمل نادر يسولف لها عن حياته وكيف عاشها
وقالت شوق : وخلف وش يصير لك!؟
لف نادر باستغراب: شعرفك بخلف !
شوق : تتذكر وعد اللي جت لي!؟ قالت لي انه اخوها وهو صاحبك
نادر: ايييه خلف مايصير لي بس انه صاحب من عمر الدنيا واخو اعز علي من عيوني وظني لو عندي اخوان ماحبيتهم كثر خلف وعقاب اللي هو ولد عمه
شوق بفشله : وش عرف وعد طيب ! يعني كيف جت عندي
نادر بضيق : والله زي ما قلت لك خلف اخو دنيا ويوم شفت وضعك صعب وعجزت انا اتصرف قلت له وهو جاب اخته وزييين انه جابها كثر خيره
شوق : الله يسعده ويسعدها
وكمل نادر سوالفه عن نفسه ومواقفه وشوق مبسوطه ما توقعت يجي يوم وتشوف نادر اللي ياما تخيلته وحش بهالطيبه والحنيه كلها
_______________________.
وفي بيت ابو خلف
اليوم كانت جمعة الحريم عند ام وعد وام خلف
والكل مكروف طلعت وجدان اللي تكرهه الشغل وهي تنزل المكنسه بضيق : انا اعلن اضرابي عن الشغل مو حاله هاذي
اماني : بدري حبيبتي بدري
ام وعد : اقول بلا كلام فاضي وخلصي مع خواتك
وجدان: يمه حرام عليكم انا صغيييييره
وعد :صغيره على الشغل لكن الكلام والحش ما انتي صغيره عليه
ام خلف : خليها خليها ياوعد تعبت من اليوم تكرف
ركضت وجدان وهي تضم ام خلف : انا ليش ماجيت بنتك من زمان
ندى: حبيبتي في كل الحالتين طال عمرك بتكرفين احسن لك قومي الحين والا ترا بخلي المواعين بعد الجمعه عليك
فزت وجدان باعتراض: لا والله
طلع خلف من الغرفه : وش فيك انت !؟ما تعقلين عن الصراخ !
وجدان: خلف بالله يرضيك يكرفوني الحين وبعد الجمعه
خلف : فكونا من ازعاجها وخلوها تقعد
وعد : اصلا انتهى الشغل لكن بعدين نتفاهم عند هالشكاوي
ام خلف : وين بتروح ياخلف!؟
خلف : المحل يمه
ام خلف : طيب انتبه لنفسك اسمعك تكح كثير
اماني : ما فيه شي ياعمه هذا هو ماشاء الله
خلف : شتبين انتي ! غيرانه
ضحكت اماني وطلعوا يكملون الشغل وطلع خلف للدكان
_______________________.
وفي بيت الجد قايد
صحى عقاب وطلع وهو يسمع صوت البنات لكن شك اول ما سمعه هواش وكانت هيا وسحر ومضاوي يهاوشون عهد ودخل عقاب : خير وش هالصوت !؟
الكل سكت لكن لفت مضاوي بقهر: عقاب شوف هالمجنونه وعقلها عن الهبال اللي تسويه
عقاب : وش صاير؟؟
عهد : وش اللي وش صاير وش فيكم !! كأن ماصار شي وكأن عمي ما مسح فيكم الاراضي راجعين له وراضين
هيا :يابنت الحلال انتي مجنونه وش هالكلام !
مضاوي : شفت الهبال اللي تخربط فيه!؟ تقول وشوله اصلا تروحون لناصر وليه ما تزعلون والمفروض نقاطعه هذا كلام بالله عليك؟
عهد : ايه كلامي صح مو هذا عمي اللي قلب الدنيا علينا عشان يرضي ولده!؟
عقاب بغضب: اقول ابلعي لسانك!؟ الظاهر انك برد جلدك ونسيتي الحياء والتربيه ؟ انتي ما تستحين تكلمين هالكلام على عمك!!
عهد : بس انت شايف اللي صار وش سوى عمي
عقاب : وانتي وش دخلك!؟الموضوع بيني وبينه وبين سحر ! اسمعيني يا عهد كلمة ولا بثنيها اقسم بجلال الله لو تعيدين هالحركه وهالكلام لقطع العقال فوق ظهرك تسمعين!؟ تحترمين نفسك وعيال عمك وعمك وتعقلين وكثر هالكلام اللي ماله داعي ترا ماهو بصاالحك والكلام للجميع
طلع وهو يدري انه ما يحتاج يكثر كلام هالكلام اللي قاله يمشي عهد على المسطره
وصدت عهد بقهر وطلعت وتركتهم وتكتفت مضاوي : الله اكبر انتهينا من جنان الكبار وبدينا بالصغار
هيا : يلا بس مانبي نتاخر على الجمعه
سحر: بخلص واجيكم
الكل :زين
_______________________.
وفي بيت النوخذه
كانت ام نهيان تجهز وطبعاً ليلى من زمان تجهز عشان تروح للبنات لانها حبتهم لكن شيخه ما راحت على قولها عندها كتاب مهم بتكمله
جهزت ليلى وهي ماتدري ليه متوتره وخايفه من ان يصير موقف مع خلف كفايه الايام اللي راحت واللي صار فيها اخذت نفس وهي تاخذ الظرف اللي فيه الخلخال وكتبت فيه رد صارم لخلف عشان تنهي هالمهزله وطلعت مع امها وام سعود وصيته رايحين بيت ابو خلف
_______________________.
وفي السوق
كان خلف مكمل شغله وهو في قمة روقانه ويسولف ومبسوط وعقاب ومحمد جالسين قريب منه
عقاب : الله يديم سعة الصدر
خلف : امين
محمد : غريبه هالروقان كله
استند خلف على الراديو وابتسم: يعني حمدلله خلصنا من مشكله مع ابوي بأقل الاضرار وما تبيني اروق
عقاب: يعني منطقي روقانك
محمد : اقول شخبار نادر على الطاري
عقاب : ايه مختفي وينه!
خلف : ابد مبسوط وراح للخبر يتمشى وبيجي بعد كذا يوم
عقاب بعدم انتباهه: زين حمدللله ان اموره زانت
محمد: ليه وش فيها اموره !
خز خلف عقاب بعتاب : مافيه شي ياعمي بس مثلك عارف اهله سافروا وهو شايل همهم
محمد: ليه يشيل هم المفروض ينبسط دامه عريس اكيد بياخذ راحته
خلف : عاد تعرف ماهو متعود على بعد ابوه وامه
محمد : الله يعين اقول دام اجازة الاسبوع جت والجو برد وزان وش رايكم نطلع نخيم على الشاطي ونوسع صدورنا شوي
عقاب : كنك جالس بقلبي ياعمي مريت البحر اليوم وكان ودي انزل عنده بس قلت اخليها لين تضبط امورنا ونكشت
خلف اللي كانت طلعة البحر بتكون له فرصه يرتب افكاره: حلوو اجل انا ماعندي مانع
محمد : اجل بروح عند الشياب ( ابو ناصر وابو خلف ) وبعدين بكلمهم ونشوف
خلف: موفق
طلع محمد والتفت عقاب بضيق : جاك يا مهنا ما تمنى
قطب خلف حواجبه باستغراب لكن ضحك اول ماشاف ضاري اللي جاي من اخر السوق ورافع طرف ثوبه ورابطه على بطنه وهو يسلم على اصحاب الدكاكين وصوته مسموع في السوق كله : ياخي علامك عليه انت ؟
عقاب : ما اواطنه
خلف : ياخي جرب بس مره تسولف معه والله بتحبه
عقاب : حبه انت بالنيابه انا مابي احب احد
دخل ضاري واول ماشاف عقاب قال : السلام على الانس والجن
عقاب : جني يشيلك
وقف خلف يضحك: رد السلام زين انت وياه
ضاري : شوف انا احب ارد على كل العالمين الانس والجن الانس يردون ونسمعهم والجن يسبون ونطنشهم
عقاب : خاطرك اقوم ألسعك بهالعقال
ضاري : جرب حظك
خلف: فكونا يا عيال الحلال خلونا نتقهوى ونروق
ضاري : على قولك
جلسوا وعقاب وضاري كل شوي يتهاوشون وخلف يفككهم
_______________________.
وفي بيت ابو خلف
الكل اجتمع وانبسطوا البنات اول ماشافوا ليلى اللي تقدمت تسلم عليهم بفرح
اماني : الله صديقتي الطربيه جت
ليلى ضحكت: افا عليچ ماهديت امي اول ماعرفت ان الزواره ببيتكم قلت الا اروح معاچ لرفيچاتي
مضاوي بمزح: اللللله يازينكم يالچويتين شوفي بس تقول رفيچاتي
ضحكت هيا: الله يحيك بس وين شيخه ما اشوفها
ليلى : والله عندها شغل ضروري تسويه
حنان: خساره ماجت رفيچتها على قولك
ضحكت ليلى: الايام الجايه واجد
وعد: تفضلي ليلى الغرفه
دخلت ليلى معاها حنان والبنات راحوا يسلمون ويجهزون القهوه
وليلى بعيونها تدور سحر خاطرها تشوفها وهي قلبها موجعها عليها مقهوره من خلف اللي تشوفه بعينها خاين
ولفت : حنان اقولچ وينهم بنات عمچ سحر وعهد
حنان: بيجون الحين
ابتسمت ليلى: زين والله اشتقت لهم بعد
حنان: وهم بعد اشتاقوا لك
لفت ليلى : ماشاء الله بيتكم واحد!
حنان: اي بيوتنا لازقه ببعض
ضحكت ليلى : يعني سحر محظوظه بيت اهلها يمكم على طول لو تزوجت خلف ما رح تبعد عنهم
ضحكت حنان بضيق وبان عليها : ا ما تعتبر محظوظه كثير
ليلى بشك: ليش!؟ صاير شي مو قلتوا سحر خطيبة خلف ولا انا سمعت غلط
حنان بحسن نيه: لا سمعتي صح بس ماصار نصيب وتفركشت الخطوبه
سكتت ليلى بصدمه وهي تتذكر كلام خلف لجابر ومصدومه شلون يفركش خطبته من بنت عمه !؟
غمضت وهي في نفسها تسب خلف بقهر بس قالت بنفسها( احسن خليها تفتك من هالعيار اللي مايتسحي ومايخاف الله )
لفت على جيت سحر وعهد وبعدها البنات واجتمعوا مبسوطين ويسولفون وليلى تراقب سحر بقهر عليها كان الضيق بييين على ملامحها كل ماجابو طاري خلف وهذا اللي قهر ليلى وازعجها
_______________________.
وعند نادر
اللي وصل الحفر والتفت وهو يجدد الوعد مع شوق عشان ماتبكي واول ما ضمن انها بتتماسك وقف عند بيت ابو شوق ونزل ومعه شوق اللي كل شوي تلتفت بفرح وتناظره بعيون مليانه دموع ويرجع يكرر نادر : تراك وعدتيني ما تبكين
وتمسح شوق دموعها : ابشر
دق الباب وفتح ابو شوق اللي رفع صوته يرحب فيهم وركضت له شوق تسلم على ابوها بس وقفها وسلم على نادر قبلها وهذا اللي فجع نادر اللي ماهو مستوعب كيف بداه على بنته
لكن ابو شوق المتمسك بالعادات والتقاليد كان يشوف انه ممنوع يسلم على الحرمه قبل الرجال
سلم نادر بضيق صدر وابعد وبعدها سلم ابو شوق عليها لكن شوق اللي في مثل هالموقف المفروض تبكي لكن دموعها بردت من سلام ابوها البارد
وابعدت وهي تدخل لامها اللي قابلتها بسلام حار واستانست شوق واستانس نادر
لكن كل تركيزهم على نادر وسوالفهم مع نادر اللي ينتظرهم يلتفتون لشوق بس لا حياة لمن تنادي وفجأه وقفت ام شوق ونادتها وراحت معها شوق وابتسم نادر في نفسه يقول ( اخيراً اهتمت بشوق )
لكن شوق اللي انصدمت من برودهم اللي يعاكس شوقها لهم جلست بفرح مع امها اللي اول ما جلسوا قالت : هاه شفتي ان الزواج زين هذا وجهك الحمدلله زين وانتي زينه
كانت شوق مستعده تقول ( انها حمدلله بخير ومبسوطه ونادر ماهو مقصرر ! لانها متوقعه ان امها بتسألها عن احوالها بس امها صدمتها وهي تثبت لها ان كلامها صح)
هزت راسها بضيق : ايه صدقتي
لكن ماصبرت ام شوق وصدمتها بسؤالها اللعين اللي في غير محله عن نادر هل تمم زواجه منها !؟ ووش صار وكيف صار !
لكن شوق غصت بسؤالها بخوف وهي ماتدري وش تقول امها ووش هالكلام المرعب اللي تقوله وسؤالها الوقح عن تفاصيل تجهلها شوق الطفله
ام شوق :وش بلاك انخرستي تكلمي
ناظرتها شوق بخوف وماتكلمت لكن ام شوق قالت بشك : لايكون مسويه شي مزعل نادر منك ومرجعك علينا
هزت شوق راسها ببكي: لا لا والله لا
ام شوق : اجل انطقي قولي لي صار شي!؟
كانت شوق خايفه بس ماقدرت تكذب وهزت راسها بخوف : لا
شهقت ام شوق : وش اللي لا وش اللي لا نادر ماقرب لك!
شوق :لا
انهبلت ام شوق ووقفت وهي تسكر الباب وتضرب خدها بغضب: حسبي للله عليييك من بنت كانك فشلتينا وفضحتينا حسبي الله عليك
شوق : ليش تحسبين علي يمه وش سويت !
ام شوق ضربت كتفها بغضب : وش اللي وش سويتي هاذي سوات بنت عاقله ! انتي وشلون ترضين انه جالس لذا الوقت بعيد
شوق بخوف وبكى :انا مالي شغل
ام شوق :خبله انتي تبين الرجال يطلقك ويرميك علينا ولا انتي مانتي فالحه الا بالدموع
شوق : وش تبيني اسوي يمه
ام شوق : يا غبيه ياغبيه الرجال مايبي انسانه بكايه ونكديه يبي انسانه مليانه حياه تملى عينه خليك ذكيه لا تطيرينه من يدك بغباءك
اسمعيني زين وحطي كلامي حلقه بأذنك ووالله يا شوق والله لو مايصير هاللي بقوله لذبحك واقول لابوك عن سوياك
سكتت شوق ببكي وهي تسمع البلاوي اللي تسردها امها عليها
اما نادر كان متحمل ابو شوق بالزور وهو بس ينتظر متى تجي شوق عشان يطلعون ماهي الا ربع ساعه وجت شوق اللي تقطع قلبها من الصياح وكانت ماسكه نفسها عشان ما تهاوشها امها طلع نادر وركبوا والتفت اول ماحس ببكاها وكان متوقع انها جلست مع امها جلسه حلوه : افا ياشوق ما وعدتيني ماتبكين
شوق مسحت عيونها بخوف : غصب عني
نادر: طيب خلاص امسحي هالدموع والله ماهي حلوه على عيونك افا بس يا شوق اللي مثلك يستانس وينبسط
شوق ماردت وهي ودها تصرخ بكل صوتها بس مسحت دموعها وسكتت وماعاد قالت شي
نادر: طيب تبين نروح بيت جدي ولا نريح اليوم وبكره نروح
شوق لفت بخوف ورجاء: اذا قلت بكره بتقول شي!؟ا (تقصد انه بيعصب ويرفض )
ابتسم نادر بخفه: بقول تم يا دكتوره
ضحكت شوق من بين دموعها: مشكور يا نادر
قرب نادر يبي يسليها بالسوالف : بيني وبينك مالي خلق حنة جدي وهواش وصراخ وانا مصدع
وكمل يسولف عن هواش جده له وقدر يضحكها لين وصلوا الشقه اللي استأجروها
_______________________.
في بيت ابو خلف
قبل المغرب وقفت ليلى اللي ضاق صدرها من سحر اللي اغلب الوقت سرحانه وهي تحس ودها تقولها عن بلاوي خلف عشان ماعاد تفكر فيه
وعد: ليلى وش فيك حبيبتي !
ليلى: بروح دورة المياه
وقفت وجدان: تعالي معي
اخذتها وهي تقول: هذا هو الباب الصغير انتبهي تغلطين لان الباب الكبير غرفة اخواني
ضحكت ليلى: زين
نزلت وهي ماكان لها نيه الا تبعد عن سحر لكن قبل تدخل الحمام طرا لها شي وتقدمت لغرفة العيال وهي تتلفت ودخلت وطلعت الظرف واول ماصارت بنص الغرفه شهقت من الشخص اللي واقف وراها لفت له وهي تشوف طفل صغير واقف وواضح توه صاحي من النوم يناظرها باستغراب ومعه قطعة خبزه في يده
ليلى : من انت !؟
غيث : انا غيث انتي من !؟
ليلى اللي ماكانت تعرف ان عندهم اخوان غير خلف وقالت من الارتباك والخوف: انت اخو خلف!؟
غيث : ايه من انتي ليش جيتي غرفتنا
ليلى غمضت بفشله وهي خايفه ان غيث يفتن عليها : اسمع حبيبي انا جايه هنيه عشان اعطي خلف علاج عشان يصير زين وما يمرض مره ثانيه ، مو انت تحب خلف واجد صح وما تبيه يطيح ويمرض صح!
غيث: ايه
ليلى : زين انا عشان چذيه جيت بحط له هالعلاج لكن هالعلاج لازم ما احد يدري عنه وما تقول انت حق احد انك شفتني هنيه عشان بعدين ما يمرض خلف اكثر
ليلى اللي ماكان عندها عذر عشان تضمن سكوت غيث الا مرض خلف متوقعه انه يحبه زي حب البنات لخلف وتدعي ان غيث فعلاً يحب خلف ولا يفضحها
ناظرها غيث بصمت وضيق : يعني اذا ما قلت لاحد خلف ماعاد يتعب ويدونه للمستشفى و ماعاد يتشنج وبعدين ماعاد عمتي الجازي ( ام خلف) معاد تبكي عليه كثير
ضاق صدر ليلى : ايه ياحبيبي يعني اذا سكت ان شاء الله خلف بصير زييين
غيث : طيب خلاص ما اقول لاحد
ليلى وقفت بسرعه: زين وين احطه عشان محد يشوفه
غيث مسكها بيدها ومشى فيها وليلى اللي خايفه ومبتسمه كانت تشوف في طرف الغرفه دولاب ملابس وبجنبه مجموعة لحف وبطاطين مطويه واشمغه واغراض تدل انها غرفة عيال مفروشه فرش عربي عادي
في زاويه كان في فراش واضح ان صاحبه توه صحى منه جلس عليه غيث وهو يرفع المسند اللي بالزاويه وليلى مستغربه بس جلست معه وعرفت من اكياس الادويه ومن البخاخات انه فراش خلف حست بقشعريره لا شعورياً لكن لفت بغيث اللي رفع طرف الزوليه وكان تحتها اوراق واشياء كثيره
ليلى: شنو هذا!؟
غيث : خلف يحط اغراضه المهمه هنا عشان ما احد يجيها وياخذها واصلا محد يقدر يطلع شي عشان مايعصب خلف يعني حطي العلاج هنا ومحد يجيه ولا احد يعرف
ابتسمت ليلى وهو تناظره بحب ونزلت الظرف مع الاوراق كان ودها تفتش بس الوضع مايسمح رجع غيث كل شي ووقفت ليلى مبتسمه: اتفقنا ياغيث لا تقول حق احد
غيث : اتفقنا
ليلى : زين
طلعت بسرعه قبل احد يشوفها ورجعت للبنات وهي مرتبكه من غيث كثير وخايفه ماصدقت امها نادت الا طلعت تركض
.
.
انتهى ♥



فيتامين سي غير متواجد حالياً  
التوقيع



شكراً منتداي الأول و الغالي ... وسام أعتز به


رد مع اقتباس
قديم 26-06-20, 10:11 AM   #14

فيتامين سي

مراقبة عامة ومشرفة منتدى الروايات المنقولة

alkap ~
 
الصورة الرمزية فيتامين سي

? العضوٌ?ھہ » 12556
?  التسِجيلٌ » Jun 2008
? مشَارَ?اتْي » 41,357
? الًجنِس »
? دولتي » دولتي Saudi Arabia
? مزاجي » مزاجي
?  نُقآطِيْ » فيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond reputeفيتامين سي has a reputation beyond repute
?? ??? ~
My Mms ~
افتراضي




البارت العاشر..

في شقة نادر
بعد العشاء كان يشوف شوق زعلانه ومتضايقه ولكن مايدري وش يسوي فيها ولو يدري انهم بيضيقون صدرها ماكان جابها دخلت شوق الغرفه ومالها صوت وماطلعت وخاف عليها واسرع للغرفه ودخل لكن جمد وهو يشوف المنظر اللي قدامه
اما شوق من يوم رجعت وهي في دوامة خوف خايفه من امها ومن الكلام اللي فرضته عليها وهددتها اذا ما صار شي بتحوس الدنيا عليها وخايفه من نادر ومن كل شي لكن مجبوره تخاطر بدموع الخوف وقفت قدام شنطتها وطلعت اخر الملابس اللي كانت مستبعدتها من عقلها لكن مجبوره لبست قميص ماكان ساتر كثير لكن غصب عليها لبسته ورتبت شعرها وشكلها وهي تمسح دمعتها كل ثانيه كانت ماهي قادره تسيطر على رجفتها انتهت من شكلها وجلست وهي تدري ان نادر اذا شافها تاخرت بيجي يدور عليها ولاهي الا دقايق وجاء نادر لكن وقف مثل الصنم عند الباب
وهو يناظرها ماقدر حتى يرمش مصدوم ومفجوع مايدري كيف طاوعه صوته وقال: شوق!! وش ذا اللي مسويته بنفسك
نزلت راسها شوق بصوت مرتجف وهي ماتدري وش تقول لكن كلام امها اللي حفظتها اياه يضرب براسها غمضت وهي تقول : مو هذا اللي انت تزوجتني عشانه تبي زوجه ماتبي بزر
انصعق نادر من كلامها وتقدم بخطوات ثقيله : متى قلت هالكلام انا !
ماردت شوق اللي انهلت دموعها وقرب نادر وهو يدري انها مستحيل تتصرف كذا من راسها جلس بذهول جنبها وهو شايف خوفها جرب يحط يده على كتفها المكشوف لكن فزت برعب وهي تغمض بقوه : وش اللي تزوجتك عشانه يا شوق؟ من اللي محفظك هالكلام!؟ من قايلك تسوين كذا
مازالت شوق ساكته ببكى اخذ نادر نفس بغضب وهو يلفها له بقوه: اكلمك يا شوق!؟ انا طلبت منك شي!؟ جبت لك طاري شي!! ليش تتكلمين كذا
انهارت شوق تبكي بحراره وغمض نادر بضيق اللي ماكان مهتم بهاللي يصير ولا كان يفكر بالزواج ولا يبي من شوق شي بالعكس كان رافض كل هذا بما انها مازالت طفله وقاصر
بالقوه لين قدر يهديها ويفهم منها وش صار وش اللي غيرها وانصعق اول ماقالت شوق له ان امها قالت لها كل ذا واجبرتها تسوي شي هي ما تدري وش عواقبه ولا تدري عن شي وهددتها وشرحت لها كثير اشياء مفجعه فجعت نادر قبل شوق ابعد وهو يحط يده على جبينه بهدوء يبي يحاول يفهم هاللي سووه في شوق مايدري كيف بيفهمه انكسر قلبه عليها وشلون خايفه وضايعه وتشرح له وهي ماتدري وش تشرح تقوله اللي قالوه لها وهي ما تفهم اصلا معناه شد على اسنانه بغضب وهو يحاول يهدي نفسه وبعد شوي رجع وهو يجلس جنبها اخذ اللحاف الخفيف ولفها فيه و بدون ما يحس حضنها وهو يمسح عليها بهدوء : شوق لا تسمعين لهالكلام ابد مهما قالوا لا تسمعين انسي كل اللي قالوه واسمعيني انا لا تفكرين بكل هالافكار ولا تخافين مني ، انا ابد ما ابيك تسوين اي شي منها ولا اطالبك بشي ولا ابي منك تكونين بهالصوره بالعكس انا مابي الا شوق اللي عرفتها وهي عرفتني بنفسها ما تخبت ورا افكار امها والعادات والتقاليد وهالبلاوي كلها لا تفكرين بزواج ولا بأي ششي ولا حتى تعتبريني زوج اعتبريني صديق اعتبريني اللي تبين لكن انا ما ابيك تموتين نفسك عشان رضا احد سمعتيني يا شوق ....
اما شوق اللي من زمان متطمنه لنادر لكن ما توقعت انه يتنازل عن كل شي عشان خاطرها ما توقعت ان كل هالحنيه بصدره ما حصلتها على صدر امها وابوها كل هالخوف عليها ما عرفته من امها وابوها ماعرفته الا بعيون نادر اللي حتى بشدته عليها بحضنه كان حنييّن
رفعت يدها بدون ما تحس وهي تتعلق بنادر اللي كل ما سمع بكاها ضاقت به الوسيعه كان يناظرها كيف كانت صغييييييره بحضنه وبين يدينه ماهو مستوعب كيف يبونه يتجاهل طفولتها ويقتحمها وينسى انسانيته وضميره مسح على كتفها بهدوء وهو يمسح دموعها: قومي يا شوق قومي بدلي وغسلي وتعالي مو قلنا بنسهر على فيلم ونضحك وننبسط
نزلت شوق راسها بضيق وقالت: طيب
وقفت وهي خجلانه من نفسها وتدعي لنادر من كل قلبها وبدلت وغسلت وجهها ورمت القميص بالزباله بكرهه لهالموقف ورجعت تجدل شعرها وطلعت لنادر للي كان في صدمه لكن يحاول يتصرف وكأن شي لم يكن عشان شوق جلست بجنبه شغل نادر الفيلم وجلس يتصنع الابتسامه وهو يفكر في حال شوق لو ماكانت عنده لو ربي ما لطف وتزوجت واحد مايخاف الله وش كان بيصير فيها انسدت نفسه عن كل شي حتى عن روحته لاهله وكرهه خالته وابو شوق وكل واحد له يد في زواج شوق او اي طفله من عمر شوق
_______________________.
وفي بيت ابو خلف
كانوا كلهم مجتمعين هناك بحكم ان العشاء عند ابو خلف ومحمد وعقاب يطرحون فكرة الكشته ويأيدونها ويتناقشون فيها
وخلف جالس يتقهوى بهدوء بس الكل لف على غيث اللي مر من قدام الكل وهو كان طول اليوم ساكت راح لخلف اللي نزل الفنجال ومد يده يستقبل غيث متعود ان غيث غالب الوقت يجلس جنبه لكن غيث مسك يده وهو يسحبه عشان يقوم
خلف : وش تبي!
غيث: تعال هناك ابيك شوي
فيصل: انت وش مسويي هاه من اليوم هاجد وامورك ماش
عزوز : مكشوف من يوم جاء لخلف واضح مسوي مصيبه اعترف احسن لك
ابو خلف : غيث وش فيك
خلف : خلوه وش فيكم عليه
محمد : قم معه طيب
وقف خلف وراح مع غيث اللي دايم مايسوي كذا الا اذا فيه شي دخلوا الغرفه وسكر غيث الباب والتفت خلف : غيث وش فيك !؟ صاير شي احد فالمدرسه قايلك شي
غيث: لا
خلف جلس مقابله : وش فيك طيب
جلس غيث: تعرف جيرانا الكويتين
فز قلب خلف وقرب : ايه وش فيهم؟
غيث: اليوم جو هنا وجت بنتهم ليلى عندنا
احتر وجهه خلف وهو مايدري وش عرف غيث بسالفة ليلى وعمر غيث ما حكى بالحريم اللي يجون عندهم خلف : طيب!
غيث : دخلت هنا غرفتنا
بدا قلب خلف يضرب مايدري وش النهايه والتفت يناظر الغرفه بتوتر: وش تبي!؟
غيث : كان معها علاج تقول انها جابته لك عشان تصير طيب ولا عاد تمرض وعاد يصير لك شي
تنح خلف واتسعت عيونه بذهول وهو يشيل غيث وجلسه على رجله بذهول : وشو علاج وينه!؟
غيث : هنا تحت الزوليه انا قلت لها تحطه عشان هي قالت اذا احد عرف ما رح تطيب انت
ابعده خلف ورفع المسند بسرعه واخذ الظرف من تحت الزوليه بذهول وصدمه وفرحه تدارك نفسه قبل ينتبهه غيث لفرحته ولف: هي شافت الاوراق هاذي!؟
غيث: لا هي بس حطت الظرف
دخل خلف الظرف بيجيبه وهو يرجع كل شي ولف على غيث وهو يجلس قدامه بتحذير : اسمعني يا غيث زين ما ابيك تقول لاحد ابد عن هاللي صار طيب، عشان اطيب واصير بخييير واذا قلت لاحد بزعل عليك ولا عاد اكلمك وبصير امرض كل شوي
غيث: لا لا ما اقول لاحد
خلف:واذا احد قالك شي علمني طيب
غيث: زين
خلف: يلا روح ولا تقول شي
طلع غيث وجلس خلف ورا الباب وهو يفتح الظرف وهو مبتسم وقلبه يرجف من وناسته لكن شاف الخلخال وشاف ورقه معه مكتوب فيها ( اسمع يا خلف انا ماتعنيت وجبت لك دواك الا خوف من ربي لا يصير فيك شي وانا السبب لكن هاللي تسويه مو مقبول ولا تكررها احسن لي ولك عشان ما اقول لجابر وحزتها ما يصير لك طيب )
كان المفروض يعصب خلف من الكلام كان اقل شي يسويه انه يتضايق لكنه ضحك خلاص مافي يده حيله كل شي صار بصفها وكل شي فيه صار يحبها مافيها حيله سكر الظرف وحطه بمحفظته وطلع وهو لا شعورياً يبتسم
ابو خلف : وش يبي فيك غيث
خلف : ولا شي بس قبل عطيته اغراض لي يخبيها وتوه يتذكر
عقاب : ماشاء الله يالامانه
محمد ضحك وهو محتضن غيث : كفو السنع كفو
عقاب : خليف اجهز بكره بنطلع للكشته ان شاء الله
خلف : اتفقتوا !!
ابو ناصر: ايه ايه
دق الباب وفتح سالم وابتسم : خالي ماجد
دخل ماجد وهو يسلم عليه : حي الله سالم
وقفو كلهم يستقبلون ماجد ويرحبون فيه وكانوا متعودين على جيات ماجد كل اسبوعين
ابو خلف : طولت علينا هالمره يا ماجد
ماجد: والله جتني مهمه بشغلي واضطريت اطلع لجده كم يوم
ابو ناصر: لله يوفقك
فيصل :زين ان وعد ما راحت تدرس كان الحين رايح ومخليها
الكل لف له بغضب لكن عقاب ابتسم لانه اعجبه هالموضوع وينتظر بس قنبلة مبارك تنفجر وتزين اموره بعدها
ماجد: بيعوضها الله وعد ان ماكان السنه ذي السنه الجايه
وقف عقاب بكرهه: وش باقي على عشاكم يا فيصل
فيصل: جهز خلاص
جاء سالم ينزل السفره والكل اجتمع العشاء وبعد العشاء طلع عقااب وهو مايطيق ماجد ابد وراح جده وعزوز والكل رجع لبيتهم وخلف استأذن انه بينام لانه تعبان واخذ معه غيث عشان يضمن سكوته وابو خلف بعد وام خلف
ولا باقي الا ام وعد وماجد وعيالها مجتمعين بالسطح
_______________________.
في بيت النوخذه
ليلى من المغرب وهي كأنها على نار وخايفه ان غيث يعلم ووتنفضح ويوصل الخبر لجابر وياويلها لو جابر عرف
تحركت بانزعاج ولف ابوها: ليلى شفيچ يبه وين رايحه
جابر : غريييبه شصاير بالدنيا وين العود والازعاج
ابو نهيان: فيچ شي يبه احد مضايقچ
ليلى ابتسمت بضيق: لا يبه ماكو شي بس تعباانه خاطري انام بدري
جابر بضحك: تعبانه من شنو الرقص!؟
ضحكت شيخه: لا وانت الصاچ من الهذره والسوالف ويا بنات القايد
ابو نهيان: بس عاد انت وياها جوزوا عن بنيتي روحي نامي يبه روحي
طلعت ليلى ودخلت غرفتها ولف ابو نهيان: ام نهيان شفيها ليلى !؟
ام نهيان: مافيها شي تعرف بنتك عياره اكيد هاذي خطه عشان بكره ما نروح الكويت ونقعد هنيه
جابر : والله صاچه امي
ابو نهيان: لا والله ليلى اعرفها اذا تعبانه
شيخه: يبه والله مافيها شي تعشى بس
سكت ابو نهيان يفكر بليلى وليلى تفكر باللي صار اليوم وتفكر لو خلف استنذل واستلعن من تهديدها فالرساله وممكن يخرب حياتها لكن من طرف تفكر بالسبب اللي خلاه يفركش خطبته من سحر
_______________________.
وفي بيت ابو خلف
كان خلف منسدح بهدوء والتفت لغيث اللي جنبه يلعب ولف خلف بهدوء لكن اول ما شد له اللحاف كأنه شم فيه ريحة عطر غريبه !؟ وصد بضحك ( انهبلت يا خلف ما وصلنا لدرجة العطر ) ولف يبي يتاكد من غيث : غيث شم اللحاف !
قرب غيث : ليش !
خلف: تشم عطر!؟
غيث قرب بهدوء وابتسم : زي عطر ليلى
فز خلف وجلس :وشو!؟
غيث : ليلى جلست هنا اليوم
الحاصل ان ليلى كانت معطره يدينها واول ما جلست مسكت اللحاف وابعدته ماتوقعت عطرها بيمسك باللحاف
رجع خلف بهدوء ينسدح وهو يسحب له اللحاف وغمض وهو يفكر لبعيد لايام ماعمره فكر فيها الا اليوم
دخل غيث معه ونام غيث وخلف يبحر في احلامه
_______________________.
وفي سطح بيت ابو خلف
كانت ندى تقص على ماجد اللي صار وماجد في ذهول
ماجد: وليه سحر رفضت!؟
اماني : مو بس سحر حتى خلف طلع رافض
ماجد: ليه؟؟
ام وعد: كل واحد يشوف الثاني مثل اخوه وعاد كل شي قسمه ونصيب
وعد : زين انها ما كبرت اكبر من كذا
وجدان: خفت ان ابوي يزعل على عيال عمي والله وقتها اموت من دون شهد
فيصل: لو سواها ابوي بتكون حسنته الوحيده يفكنا من انتي وياها
سالم : انا اشهد
ام وعد: اقول ورا ما تقوم تنام انت وياه بكره ورانا كشته يلا يلا
قام فيصل وسالم ولفت ام وعد لوعد: قومي وعد حضري فراش خالك
وعد : ابشري
الكل رجع يسولف وماجد في عالم ثاني كان يفكر في رفض سحر للي من سنين وهو خاطره يجي هالرفض من سنين وهو مب قادر يمر هالمرحله اللي كان فيها خلف عايق لكن الحين فرجت الحين يقدر يقول حلمه المستحيل بيتحقق كان في عالم ثاني وهو يقول ( سبحان الله اللي رجع لقلبي الامل ووجبت هالمعجزه اللي ما هقيتها تصير )
حنان: خالي وين وصلت؟؟
ماجد: هاه !؟ ابد قريب بس تعبت من الطريق
ام وعد: يلا شوي وتجهز وعد مكانك وتنام وترتاح وزين جيت عشان تطلع معنا
ماجد : زين
_______________________.
عند وعد
اللي طلعت تركض عشان تجهز لماجد فراشه لكن وقفت عند الباب بذهول وهي تسمع كل شي قاله غيث لخلف واتسعت عيونها بذهول ( وش جاب ليلى لغرفة اخواني!؟ وش وداها لفراش خلف !؟) حست بصداع اجتاحها لكن ما حبت تسيء الظن ودخلت بهدوء لكن وقفت وهو تناظر خلف اللي كان مبتسم لكن اختفت ابتسامته فجأه وهو يسكر يده واضح فيها شي
خلف : وش فيك!؟
وعد : ولا شي بجهز فراش لخالي
خلف : زين
صد قبل تنتبه لملامحه وهو يدخل الخلخال في الظرف بدون ما تشوفها ورجعها تحت الزوليه
ووعد اللي ماغاب عنها تصرفه وشاكه فيه وهي ماهي قادره تفكر في شي من كثر ماهي مصدومه وبعد شوي دخل فيصل وسالم وبعدهم ماجد وطلعت وعد وهي للحين تحاول تفكر
رجعت لفراشها وهي تفكر لكن جلست بذهول خايفه ان خلف له سالفة مع ليلى وبسببها رفض سحر غمضت وهي تدعي بنفسها ( يارب لا يارب )
_______________________.
ومن بكره في بيت الجد قايد
الكل صاحييين والكل يجهزون ومحمد وعقاب مشرفين ومضاوي تركض بينهم وهي مستانسه اكثر وحده وطبعا كل طلاب المدارس فرحانين لانهم غايبين اليوم
والباب الفاصل بينهم مفتوح والكل يركضون رايحين جايين ويجهزون
وفيصل عزوز وسالم يرتبون الاغراض بالسيارات وابو خلف يشرف عليهم
وخلف راح يجيب اغراض من البقاله ومعه غيث
وفي هاللحظه وعد كانت تجمع اغراض اخوانها ووقفت عند فراش خلف وهي تبعد المسند تبي تشوف وش مخبي خلف طلع الظرف وهي تدعي مايطيح من عينها خلف ولا يطلع مخبي شي كايد
فتحت الظرف وطلعت الخلخال وفتحت الورقه وهي تقراها بذهول
كان مكتوب فيها رد خلف على ليلى وكان ناوي يرجع لها الخلخال وكاتب لها رد يقول فيه ...
( شوي شوي على نفسك يا بنت النوخذه لا تفهميني غلط وتسيئين الظن .. انا ماني ناوي شر ابد لكن انا قلت لك نسيت دواي عندك وانتي ماقصرتي وجبتيه لي وانا احب اني اتصرف بنفس كرم الاخلاق واصلح اللي صار بسببي وجبت لك بدل خلخالك المقطوع خلخال انا ما ابيك تعتبرينه شي سيء لانه فالنهايه من حقك ، وعلى فكره قدرتي تقنعين غيث بعذر ان معك علاج بيشفيني تماماً لكن احب اقولك ان مو عذر ابد هذا حقيقي انتي معك دائي ومعك دوائي)
مسكت راسها وعد بذهول وصدمه مرعوبه من كل فكره شينه طرت لها !؟ وجاب خلف عند ليلى عشان ينسى دواه عنها !؟ وش وصله لخلخالها عشان يقطعه!؟ وكثير اشياء تعبت براسها وصدمتها
ولفت بصدمه على باب الغرفه اللي انفتح وكان خلف اللي دخل اول ما تذكر انه نسى فلوسه ورجع ياخذها لكن جمد اول ماشاف الظرف في يد وعد والورقه اسرع وهو يسحبها من يدها كلها : وش تسوين انتي!؟
وعد ناظرته بذهول : انا وش اسوي!؟ السؤال مردود عليييك يا محترم! وش ذا اللي اشوفه
خلف :من سمح لك اصلاً تمدين يدك لاغراضي ! وتفتشين فيها
وعد : لا تحول الموضوع يا خلف !؟ بتقولي الحين وش بينك وبين هال..
قاطعها خلف بغضب: مب شغلك هذا واحد وبعدين كم مره قلت لك انتي وغيرك اللي بتاخذ اغراضي بكسر يدها
وعد : لا تصارخ علي ياخلف ! انا ماني مثل غيري والحين بتقول وش وداك ليلى عشان يصير دواك عندها وش جاب خلخالها لك وقطعته!؟
ناظرها خلف بغضب من تفكيرها وسوء فهمها: انهبلتي انتي وش هالكلام
وعد :هالكلام انت اللي تقوله بالزفت اللي انت كاتبها لها ، لكن تدري طول عمري اشوفك اطهر انسان فالدنيا ماهقيتك مثل باقي الرجال دنيء وماتستحي
بدون مايحس خلف رفع يده بيضربها لكن تماسك في اخر لحظه وهو طول عمره ما مد يده على خواته حتى لو هم غلطانين
ضرب الجدار جنبها وهو ييقول بهمس غاضب: اقصري صوتك وانكتمي لا احد يسمعك وهالكلام اللي تخربطين فيه كله غلط بغلط
وعد : بتضربني! عشانها ! وبتسكتني عشان ما تنفضح!؟ خفت من الفضيحه بس ما خفت من ربك عشان كذا تركت سحر المسكينه اللي تركض وتداري مصيبتك ومتحمله البلاوي اللي صارت عشانها وخليتني شريكه لك في بلاويك
مسك ذراعها خلف بغضب وهو يهزها : كلمة ثانيه صدقيني تندمين وان عدتي كلامك دفنتك بأرضك واصحي احسن لك لا تاخذك العزه بنفسك وتشوفينك انتي الصح دايم عشان ما التفت واذا التفت صدقيني بتشوفيني احقر من كذا بكثير
اخذ الظرف وطلع بغضب وهو يكرهه هالتصرف وهاللي صار لكن من الارتباك مايدري وش يسوي هذا غير وعد اللي فهمت كل شي غلط وممكن تسوي مصيبه بعد طلع من البيت ضايق صدره وبالقوه ياخذ نفس من الضيقه
ابو خلف : انت ما رحت الحين عجل علينا
خلف : الحين بروح
طلع للبقاله وهو مايدري كيف بيحل هالكارثه كيف بيتفاهم مع وعد وكيف بيفهمها هاللي صار
اما وعد اللي كانت في دوامه ماهي مصدقتها كيف خلف اخوها اللي طول عمرها تشوفه احسن واطهر قلب وخلق كانت تحطه بكفه والعالم كلها بكفه كيف يسوي هالشي وكيف تهتز صورته بعينها بذا اللي سواه نزلت ماهي مع العالم ولا تدري كيف بتفسر اللي صار
_______________________.
في بيت النوخذه
الكل كان يجهز عشان يروحون الكويت يقضون فيه هالاجازه ويرجعون وطلعوا متجهين للكويت لكن وقف جابر : احد يبي شي من الدكان
شيخه : انا خاطري بعصير بارد
ابو نهيان: جيب لنا كلنا
ام نهيان: انت تعرف للي نحبه
فزت ليلى: يبه تكفى بنزل وياه الدكان
جابر: ما عوزچ حبيبتي وين رايحه ان شاء الله
ابو نهيان: شفيك عليها ترا دكان كل الناس تنزل له خذها وياك خذها
انجلط جابر : يببببه وين تنزل !؟ يشوفونها وياي
ليلى تخصرت: ليه حبيبي مستحي مني !؟
ابو نهيان: كم مره اعلمك عن هالحركات ما تفتهم انت اسمع الكلام بس
جابر : زين يبه لكن تغطي عيونها لا ابطها ( افقعها)
نزلت ليلى وهي مبتسمه ودخلت معه وهي تحوس بالبقاله وتاخذ شي يكفيها لطريق
لكن لفت بقوه اول ماسمعت جابر يقول : خلف حياك
تصلبت يدها على الرف وبردت اطراف خلف اول ماعرفها ماكان متوقع يشوفها بعد موجة العصبيه اللي تسببت بها وعد لكن تذكر الظرف اللي معه ويدينه قدام ولازم يتخلص منه تقدم يسلم على جابر اللي كان سلامه حار واقرب للحضن وكان خلف يشوف ان ليلى تناظر مايدري كيف تجرأ وطلع الظرف من جيبه بهدوء ومده ليلى وهو للحين يسلم جابر عشان ما ينتبه
في لحظة بغى يوقف قلب ليلى من اللي سواه ماكانت تفكر بشي كثر ماتفكر بجابر للي لو شافه ذبحها وذبحه سحبته بسرعه وهي تدخله بكم العبايه وابعد خلف وهو مبتسم بتوتر
جابر : زين شفتك قبل نروح الكويت
لف خلف بقوه: رايحين الكويت!
جابر: يومين ورادين ان شاء الله
خلف : الله يستر عليهم ويحفظكم
جابر : زين اترخص ورانا طريچ
خلف: وداعة الرحمن
لف جابر وشاف ليلى متجمده وقرب بهمس غاضب: خلصتي!
ليلى: ايه ايه
جابر: ذلفي لسياره يلا
طلعت ليلى وهي نص اغراضها ما اخذتها وطلع جابر بعد ماحاسب وهو يعطيهم الاغراض وليلى مصلبه ماهي قادره تتخطى اللي صار كانت شاده على الظرف بكل قوتها ماهي قادره تخبيه او تفتحه اخذت نفس وقالت لهم انها بترجع للمرتبه الخلفيه بتنام ورجعت وقلبها يدق وفتحت الرساله تقراها بذهول وغمض وهي تسكرها ( مافيه فايده ييييمه ياقوة قلبه وجرأته ، مدري شسوي فيه لله يستر الله يستر)
_______________________.!
وفي سيارة عقاب
كان خلف وفيصل وعزوز وسالم وغيث في سياره وحده وكانوا فيصل وعزوز وسالم وغيث ماسكين فعاليات السياره وهم اللي مسوين جو بالرقص والحماس
وخلف يفكر بالكارثه اللي صارت!؟ وعقاب يفكر بالانتقام
وكلهم ساكتين لكن قرب فيصل : خييير يا الاخوان وين وصلتوا
عقاب : وش فيك انت فجعتنا !
فيصل : ابيكم تشاركون في الحماس
خلف : انت مستانس
فيصل: ايه
خلف : خلاص مالك شغل فينا
ضحك عزوز: قايلك خلهم بحالك امش امش ارجع
رجعوا لحماسهم والتتف عقاب: خلف وش فيك اليوم!؟ خلف : ا مافيني شي بس احس تعبان شوي
عقاب : وش فيك تحتاج مستشفى!؟
خلف : لا لا شوي واصير كويس ، انت وش تفكر فيه!؟ عقاب : ولاشي
ما دقق خلف كثير ورجع لمصيبته
_______________________.
وفي سيارة محمد
كانوا مضاوي وهياا وسحر وشهد وعهد ووجدان معه والجو كااان رهيب معه والكل يتهاوشون عشان يروحون معه لكن قالت عهد: وجدان ! ليه مارحتي مع خالك!؟
وجدان: انا احب اروح مع عمي محمد اكثر من خالي ومع شهد اكيد
مضاوي لفت بحقد على عهد: وش فيها اذاا راحت معنا !؟
عهد: مافيها شي
محمد : ليت وعد جت بعد
هيا ضحكت: لا عاد وعد ماتخلي خالها ابداً وتجي
ابتسمت سحر بهدوء: ايه عاد كلهم يحبون خالهم
محمد : ينحب والله ماجد
وجدان: اصلا خالي مايروح بدون وعد لو مدري وش يصير يحبها
عهد بنفس الحقد : والله مدري وش هالمنافسات على حب وعد
كانت مضاوي مستقعده لعهد : والله وعد تحب الكل والكل يحبها ما تحقد ولا تحسد
محمد : وش صاير انتم!؟؟ فيه شي
سحر: لا مافيه شي ياعمي
سكت محمد وهو يرفع صوت الاغاني واستنزلت عليهمم مضاوي وهي تستهبل وتضحك والكل يضحك منها
_______________________.
في سيارة ماجد
كان الوضع مختلف كان جو سوالف بما ان ماجد يحب السوالف مايحب الاغاني والازعاج
اماني : خالي خاف الله قدر حسي الفني شغل اغنيه شي تقطع علينا الطريق
حنان: لا تكفى كذا احلى نسولف مبسوطين
ندى: ليه ما رحتي مع عمي دام تبين الهيصه
اماني : ما لقيت مكان والله
ماجد: افا والله لهدرجه ما ينجلس معي
ضحكت اماني: لا والله محشوم بس الدنيا ماهي كلها سوالف
ضحك ماجد ولف يناظر وعد السرحانه: شكل اليوم مزاج وعد يحتاج اغاني ورقان دامها ماهي رايقه
لفت وعد تحاول تسولف : لا والله لكن فيني صداع شكلي تاثرت من الهوا
ماجد : بسيطه خذي مسكن وان شاء الله بسيطه
وعد :اخذت
ماجد: اجل انقذينا يا اماني بأغنيه تروق
ندى: خالي كل الشرطان اللي عندك اثنين وكلها حفظناها
طلعت اماني من شنطتها شريط وهي تضحك: ماعليكم انا اضبطكم وصيت عمي محمد امس وجاب لي هالشريط اللي يوسع الصدر في اغنيه لطلال بلللسم
ماجد : احب اقولك انك مسوقه رائعه تجيبين الشي وهو شين وتحببين الواحد فيه غصب
ضحكت اماني: افا عليك ياخالي ماراحت كتبك خساره
اخذ ماجد الشريط وهو يشغله واماني تعدي فالاغاني لين وصلت الاغنيه اللي تقصدها وقالت : اسمحوا لقلوبكم وعقولكم انها تعيش الاحساس
سكتوا كلهم ينتظرون الاغنيه وارتفع صوت طلال اللي تغني معه اماني بكل احساسها وترقص بضحك وكملت معها ندى (مرحبابك ياهلا ... يا هلا يا مسهلا
جامعٍ زين و حلا ... يا حبيب الله عطاك
انت ما مثلك بشر ... يا قمر خمسة عشر
زاد همي و السهر ... من هواك و من غلاك)
ضحك ماجد وهو يهز راسه بحماس كان يردد بنفسه يقول ( اي والله ياهلا ويا مسهلا)
الكل في عالم ووعد في عالم ثاني
_______________________.
في سيارة ابو خلف
كانوا موجودين فيهاا الكبار كلهم وكان ابو خلف شارد شوي
ولف ابو ناصر: وش فيك يا ناصر !؟؟
ابو خلف : والله يبه وصلني اليوم اتصال مدري كيف افسره
ام ناصر: خير ان شاء الله
ابو خلف: هو خير خير
ابو ناصر: وشو!؟
ابو خلف : اتصل فيني رجال اسمه مبارك يقولون انه من زملاء عقاب في الدوام
ام ناصر بخوف : لا يكون عقاب مسوي شي اشوفه له ايام ماهو عدل
ابو خلف: لا عقاب ماله شغل بس الرجال جاي خطاب
ابو ناصر: يخطب من!؟
ابو خلف : يقول ابي اكبر بناتك ويبي مني موعد عشان يجي
الكل لف له فرحانين ام ناصر: زين الله يكتب نصيبها بكل خير
ابو ناصر :لكن وش مضيق صدرك انت ؟؟
ابو خلف اللي كان تخطيطه غير كان راسم ان خلف يتزوج سحر وعقاب ياخذ وعد وكثير اشياء حلم بها لكن الحين بعد اللي صار ما عاد يقدر يحقق هالحلم ولا يقدر يقول لعقاب تزوج بنتي ويرميها عليه عشان كذا كان في حيره: لا بس ما اعرف الرجال
ام خلف: تقول انه من اصحاب عقاب اساله عنه
ابو ناصر: وهي صادقه
ابو خلف : يصير خير ان شاء الله
ابتسمت ام وعد وهي فرحانه واخيراً ممكن تشوف وعد عروس
_______________________. .
عند نادر
اللي كان يجهز عشان يروحون بيت جده لكن كان خاطره يكلم شوق بشي لكن مايدري كيفف يتكلم وهو متوقع اي شي من امه
اتجهه لها وهو يشوفها تمشط شعرها ووقف وراها مبتسم
ولفت شوق: وش فيك !؟
نادر ببتسامه: تسمحين لي اجرب !
شوق: وشو!؟
اشر لها نادر على المشط : بمشط شعرك
ضحكت شوق بذهول وضحك نادر: كنت قبل احب امشط شعر امي استانس عليه مدري الحين صار ودي امشط شعرك
ابتسمت شوق وهي تعطيه المشط اخذه مبتسم وجلس وجلست شوق قدامه شوي ونادر يمشطه بهدوء وقال: شوق
شوق : سم
نادر : سم الله عدوك بس اسمعيني بكلمك بشي
شوق: اسمع
نادر: احنا بنروح لامي الحين واحتمال امي تقول نفس كلام امك او تقابلين احد تافهه بيسألك نفس الاسئله اللي مالها معنا وانا ما ابيك تردين على احد ابد ولا تعطينهم اي تفصيل مهما صار
واذا امي اصرت عليك .. سكت شوي بضيق قولي لها : تسألني انا طيب !
نزلت راسها شوق بضيق : ابشر
نادر : تبشرين بالجنه ، بس شوفي كذا خلاص
وقفت شوق تناظر شعرها وابتسمت: ايه
نادر: زين اجل يلا
طلعوا للبيت جد نادر اللي على نار متوتر ومكشوف توتره وهو كل همه شوق ماهمه نفسه
_______________________.
وعلى الشاطي
الكل وصل ونزلوا الكل وبدوا الرجال يسوون المخيم والكل يشتغل وشاد حيله وبعد ما انتهوا وتغدوا وبرد الجو العصر افترقوا يتمشون بالبحر ويركضون يلعبون
لكن عين خلف على وعد اللي واقفه بلحالها بعد عن الناس عند البحر وواضح تفكر قلبه موجعه عليها مايدري كيف بيفهمها
وماكان بس خلف يراقبها حتى عقاب كان واقف ببتسامه وهو يشهد على اخر وقفات الشموخ بالنسبه لوعد واول الانهزام
ضحك وهو يتجهه لخلف : خليف وينك عن البحر
خلف : بجيكم اسبقوني وبجي
عقاب : عجل لا تخليني مع هالمجانين
ضحك خلف : زين
راح عقاب يسبح مع العيال وهم يشوفون فيصل وعزوز يلعبون بسالم وغيث يرمونه على بعض وماجد مع محمد يسبحون ويسولفون
وابو خلف وابو ناصر واقفين ما دخلوا يسبحون لكن ابتلشهم عقاب وهو يمزح معهم يرش عليهم المويه لين قررر ابو ناصر يدخل عشان يلعن خيره ودخلوا كل الرجال يسبحون
_______________________.
طرف الحريم كانوا يتقهوون عشان بعد المغرب يجي وقتهم
ورمت مضاوي الفنجال بقهر: اااه ياحظ الرجال شوفوا اخذين راحتهم يسبحون ويرقصون ومحد عليه من احد لكن احنا محكوريين
ضحكت ام خلف : ليه ودك تطبين تسبحين مثلهم وكلٍ يشوفك
مضاوي: ايه وش فيها!؟
شهقت ام ناصر : هذا اللي ناقص عليك ياللي ما تستحين
اماني : قلنا احلمي يا مضاوي ماقلنا افصخي الحيا
هيا : الله اللي يوزع العقول يعطيك عقل بس
مضاوي: خلاص خلاص ماني سابحه بس قوموا نلعب كوره ورا محد عندنا
ام وعد: انتبهوا لا يسمعونكم الرجال
هيا: و لا تصارخون لو سمع عقاب صراخ دفنكم
مضاوي : انتي ما تبين تلعبين
هيا: لا بجلس اتقهوى
وجدان وشهد : يلا سرقنا الكوره من العيال
طلعوا كلهم ورا ورمت مضاوي العبايه وانطلقت تلعب ومعها البنات والكل متحمس ويلعب
_______________________.
انتهى..♥




فيتامين سي غير متواجد حالياً  
التوقيع



شكراً منتداي الأول و الغالي ... وسام أعتز به


رد مع اقتباس
قديم 26-10-20, 06:55 AM   #15

سجينة هواه

? العضوٌ?ھہ » 457829
?  التسِجيلٌ » Nov 2019
? مشَارَ?اتْي » 78
?  نُقآطِيْ » سجينة هواه is on a distinguished road

السلام عليكم رواية حلوة كتير متى البارات القادم طولتي علينا يا دمدوم ان شاء الله تكونين بصحة وعافية

سجينة هواه غير متواجد حالياً   رد مع اقتباس
قديم 20-06-21, 08:04 PM   #16

ام مبروكه

? العضوٌ?ھہ » 442312
?  التسِجيلٌ » Mar 2019
? مشَارَ?اتْي » 32
?  نُقآطِيْ » ام مبروكه is on a distinguished road
افتراضي

السلام عليكم ورحمة الله وبركاته اختي الكاتبة أديم راشد الرائعة في سرد الروايات ربي ايوفقك تبارك الله وربي يعطيك الصحة والعافية

ام مبروكه متواجد حالياً   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة

الانتقال السريع


الساعة الآن 04:59 PM



Powered by vBulletin® Version 3.8.9
Copyright ©2000 - 2021, vBulletin Solutions, Inc.