آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
18-12-20, 12:12 PM
| #101 | ||||||||
| مراقبة عامة ومشرفة منتدى الروايات المنقولة  
|  #البارت_الاخيررررررررررر رواية...جولييت_واسرها...غياه� � الإنتقام بقلمي...نور سمو العراق ❤💔❤💔❤💔❤💔❤💔 ليت بإمكان المرء أن يفعل ما يرغب بهِ دون عناء أن يمتلك القُدرة على نزع كل الأمور التي تُثقله بسَلاسَة، دون شَقاء. 🖤🍃 .................................. جولييت... من اخذوني اسوي عمليه جان يوم كووولش صعب بالنسبه اليه ومر عليه شريط من الذكريات اووف يا الذكريات تفتح من الحزن ابواب... ما جنت اتوقع ان اني اتزوج بهل حاله ولا انفرض علئ شخص داخله مو الي واعيش علئ الهامش ببداية زواج وعش للزوجيه... للاسف الارضاء بهل شئ جان صعب ومن بعدها ضليت اتحسر علئ ايام زواجي من بعد ما صرت حامل وانقتلوا اهل جاسر من هل لحظه وبدت رحلة عذاب واهانه واشياء فوگ الخيال... جنت دائما احمد ربي واشكره علئ نعمته حتئ وان واجهتني ظروف قاسيه بس رب العالمين ما تركني ابد و خله ناس بطريقي زينه وفاهمه وتدافع عني دفاع مستميت مثل خاله صبريه ومثل ماما رضيه... الشئ الي صار بين الحاضر والماضي اني متعجبه علئ روحي جنت اذا اموووت من الوجع ابره ما اضرب من خوووفي... ومن تزوجت ضلت العمليات والأمراض والابر والمغذيات تركع عليه حتئ مرات يشدولي مغذي ما احس بروحي... كعدت مقبوض علئ گلبي من العمليه كوني حكون بيد دكتور يمكن يزيد الي جرعة بنج واموت ويمكن ما اتحمل ويمكن تسكط عيوني وتتشوه... وهذا كله مو مهم عندي المهم اطفالي ما اريد يتيتمون من بعدي ولا اريد افاركهم اني ابد مشبعانه منهم واحس هم النفس الي يغذيني ويمدني بالحياة... بدون ريوك ولا اي شئ رحت للمستشفئ وياهم ودعت اطفالي شميتهم وبجيت وطلبت يدعولي بظهر الغيب... وقبل لا ادخل للعمليات لزمت بيده مثل ما يلزم الغريگ بكشه تنقذه ودموعي جاريه همست بانين...جاسر اذا متت اطفالي امانتك امانتك انت مو احد غيرك لا تصيح بوجههم ولا تهملهم قدمهم علئ نفسك... احتضن وجهي بكفوف ومسح وجهي بحراره...اششش ترجعين وتشوفين وتربينهم وهااا ويعضونج وتتكافشون ههه بعد شتردين... نزلت راسي وشهكت بدموع...هدوره امانتك البنيه بدون ابوها واهلها ما تسوه فلس بنيتي هاي محد الها احتضني بقسوه ورد عليه بغضب...كافي لا تحجين هيج ان شاء الله عمليتج بسيطه ...ليش مضخمه الامور بلعت ريكي بحيره...لا اني مو مضخمه بس اني اذا علئ نفسي ما اهتم طبني مرض خلي اموت بس اطفالي منو الهم احبببهم والله احبهم اكثر من اي شخص بحياتي... عاد هو ضاج كال...ديله كافي مصختيها بس هم تحبهم يالله كافي ودخلي للعمليه الدكتوره راح يطلع تقاعد من وراج ... ضجت منه وهم اخذوني للعمليات اني اصلا ما اشوف شئ هم ياخذوني هيج وهيج ضربوني ابره وبنج وبعدها رحت بغير عالم... كعدت علئ اصواتهم وضليت يومين بالمستشفئ حتئ من بعدها يشيلون الشاش... هو بهل يوم راح كال اريد اروح ابدل واغسل واكلي لگمه وبعدين اجيج... وبهاي الاثناء دخل الدكتور كال...أن شاء الله ساعتين ونفتح الشاش من عيونج حتئ نشوف سلامة النظر خووف ورهبه وفرحه ومشاعر متلخبطه يارب ارجع اشوف يارب والله اريد اعتمد علئ نفسي احس مربطه وينه يجي ما ضل وقت اريده يجي ويكون اول واحد اشوفه ويجيب اطفالي وياه... ........................... ريهام... من اجت شام ودخلت امها جوه يم ماما رضيه ماما رضيه جانت تحجي وياها عن حياتهم وتسالها وما اعرف شنو اني انطيتهن الجاي وبعدها اخذت الجاسر وشام سويت اله جاي ودا ادك الباب سمعتها كلتله بكل حزم واصرار...جاسر اناااا اءءء اناااا هو كلها...انتي شنو احجي شام اكو شئ زاعجج مضوجج لا تضمين عليه محتاجه شئ... ردت بحسره...لا بس انا قررت اسافر علئ أميركا وكمان انا بدي اتطلق منك وعيش حياتي... اني بسرعه دكيت الباب ودخلت وهو اصلا ما انتبه الوجودي ولزمها من اكتافها وهزها بعنف...شنووو انتي شتحجين شنو تتطلكين شنو تسافرين باوعتلي وضحكت بفشله ولزمت اديه ونزلتها من اكتافها...اهدئ شوي اشرب الشاي و من بعدا نتفاهم .. دفع ايدها بغضب...شنو اشرب الجاي انتي تعرفين شجاي تحجين... بلعت ريكها وضلت تباوعلي وتبتسم بتوتر اني خليت واستاذنت وطلعت... رحت الغرفة جولي اركض خطيه بنتها تبجي ركضت عليها شلتها واني اسكت بيها وابوس بيها...يالله روحي هاي اني يمج اجييت... سويت الها ممه ورضعتها واني بالي،يم طلب شام الغريب شلون تنازلت وليش... رغم جاسر ما يحجي عن شام ولا اذكر ان علاقتهم متحسنه بس صلاح اخو ويعرف شنو الي يدور بينهم... ومن سألته كال...هي زوجته عادي يروح الها وينطيها ويكعد وياها من جولييت راحت الها من اول ما رجعت ترئ هي شام الي كلتله جولييت اجتني مو اطفاله وهي خابرته وراح وحجت عن الكلام الي دار بينهن ...يعني يروح ويجي ويجيب ومثل ما يسوي الجولي يسويلها... بس عجيب ليش طلبت هيج طلب هي،مو من جانت جولي مخطوفه كالت كلمن ببيت شكو شنو الي ديصير... وهو جاسر هم ما يكدر يتخلئ عنها تضل ام بنته وزوجته وعاشت وياه سنين... مر تقريبا ساعتيين اقل وهي صاحت علئ امها ورادت تروح من شافت هدوره بيدي ابتسمت وحطت ايدها علئ شعرها وطبعت بوسه دافيه علئ جبينها...ياولي الحمامه البيضه كيفا ؟ ابتسمت الها باوعت الهدار...الحمد لله زينه جرت نفس كالت...الله يحفظها يالله امي صار الوقت خلينه نروح جاسر كلها بتوتر و وجهه محتقن...اني اوصلكم هسه ثواني بس ابدل باوعتله بسرعه...لا لا ما في داعي اني وامي بنروح وكمان بدنا نشتري كم شغله من الصيدليه هو تجاهل كلامها وبدل واخذ السويج واخذهم تحت رفض كبير منها... نص ساعة ورجع شمر روحه علئ القنفه وحط ايده علئ وجهه بتوتر محتار ما اعرف شنو وشنو البي يمكن كلام شام ازعجه او يمكن عندها طلب ثاني اجه مرتضئ كعد بحضنه وهو مزعوج كال...انت وين اخذ سكيته اخدها وضل ووووووايه ما اجي عنه « انت وين تاخذ جكليته تاخذها وتضل هوايه متجي عدنا » ضحك عليه بحزن وكرص خده شويه واتصل موبايله من وقار لان وقار كالت حتروح للجولي وهناك خالتي صبريه وعمتي ام فلاح ... كالت انطيني جاسر اتصل بي بس ما يرد عليه انطيته اله جاوبها بدون نفس كلها...هااا وقار خيير هي حجت وياها وهو وكف مفزوع كلها...يالله تمام جاي... قفل الخط وخله وطلع خلاني بحيره من امري اتصلت علئ وقار مجاوبتني ... ........................ وقار... طلعنه اني وجابر وعمتي ... جاي نروح الجولييت لان ما رحنه الها هل مده اول ما وصلنه لكينه بس خالتي صبريه كاعده يمها وتدخن سلمنه عليها كلتلها...لعد وين جاسر ماما رضيه امي اشو محد بس انتي ... نفخت الدخان بانزعاج وطفت جكارتها بطرف اصبعها بعد ما بللت ريقها من اصبعها كالت...شمدريني بيهم روحة مردي والهوه شرجي الاجو والضلو... عرفتها مزعوجه منهم بس شنو السبب ما اعرف كعدت يم جولي سألت عنها كالت...خابري جاسر عفيه لان مضل شئ ويفتحون الشاش،من عيوني... وهو هماتين يريد يجي فدوه خلي يجي بلكي يجيب وياه اطفالي اريد اشوفهم... ردت صبريه بانزعاج...شعنده جاي ابو الرياء لو يريد ما راح وفروخج بعدين تشوفينهن ما طايرين هسه خلي يفتحون الشاش... ردت عليها بزعل...لا خاله مو وصاني حركت اصابعها بقهر...هووو هووو وصاها المايعه يمه كون اكلج بسنوني... هي لزمت ايدي بتوسل..عفيه وقار خابري بره لا تسمعج خاله صبريه وتخنكج... اني خليت ورحت خابرت بره كتله جولي حيفتحون الشاش وتعال تريدك جاوبني بسرعه...يالله جاي جاي... استغربت ردة فعله كان انسان مهموم وعايش بقلق ما حسيت اكو لهفه بكلامه اكو شئ غاثه بس لا يعرف نتيجة عمليتها احتمال تكون مو ناجحه... رجعت يمها واجه الدكتور قاس ضغطها والسكر وشاف تحاليلها ومن بعدها ضل يفتح بالشاش شويه شويه وبهل اثناء دخل جاسر من دخل شافهم يفتحون بالشاش والكل متجمع عليها بس جان جابر وعمي عكاب بره ... تقرب منها ولزم ايدها هي حست بوجوده وعصرت اصابعها علئ ايده بلعت ريكها...جاااسر ادعيلي همس بتوتر وقلق...ان شاء الله ن شاء الله يارب تشوفين ترجعين احسن من قبل... كمل الدكتور فتح الشاش و وخر قطع الشاش،من عيونها وامرها تفتح عيونها... جانن عيونها تحتهن زراك كووولش قوي ومحاوطها شئ من السواد داير ميدور الجفون ومثل النقط الحمره فوك عيونها.. حطت ايدها علئ عيونها وهي تحجب قوة الضوء منها ورجعت غمضت كردة فعل... ضحكت بفرحه...شفتتتت اي والله شفت شفتكم شفتتتكم اني والله شفتكم ضحكت بفرح وباوعت الخالتي صبريه الي جانت طاله بوجهه جولي وتعصر بديها...يمه جولي صدك يمه شفتي يبعد عيوني كولي فرحيني رجعت فتحت عيونها ببطئ وهي تباوع النه بضحكه ودموع...اي والله اشوووف دا اشووف بس مو واضح مشوش شويه... جاسر كردة فعل احتضنها بحنان وباس راسها بلهفه...مبرروك مبروك يا ام مرتضئ ان شاء الله ما تشوفين شر ... وهي صبريه من فرحتها هوست وهي تدبج وتصفك وهل صفگة يسميها جعفر صفگة العفطيه... كالت وهي تدبج...وتوهن فتشن يا عيوني توهن فتشن يعيوني... عين الحاره الحمزه يطفيها وعين البارده كل الهلا بيها بعدها لزمت الدكتور وهي تبوس براسه...فدوه اروحلك دكتور فدوه اروح لهل جهامه وروح امي وروح امي تفائلت بيك وجهك يجيب النعمه جاا مثل ابو اللول وابو الرياء هاي الوجوه الي تجيب الخير... خطيه محتاره جانت شنو تسوي تركض هيج وهيج والدكتور ضل يضحك عليها ويتشكر منها... جولييت رفعت اديها وهي تبجي وتضحك تريد تحضن خاله صبريه وصبريه شمرت روحها بحضنه...يمه بنيتي يمه جويليته يماااي هسه يالله انه فتشت هسه يالله انه شفت والله ليلي ما انامه وانه اتذكرج ما تشوفين... وجولييت جانت تبوس بيها وتبوس بيدها الدكتور كلها..بابا كافي لا تبجين مو زين عليج انتي هسه بفترة علاج ونقاوه خليج طبيعيه وابتعدي عن الإزعاج... ضل جاسر كاعد يمها يسألها عن نضرها والرؤيه عندها وهي تجاوب بفرح ولو دكول لحد الان ما اشوف واضح حييل ... كلها ...اي لان جنتي بحالة حرجه وجنتي ما تشوفين فاكيد الرؤيه عند ضبابه شويه شويه يستقر عندج النظر... ضلت لليل بالمستشفئ ومن بعدها كتبوا الها خروج وسجلو الها علاج وكذلك قطرات وعصاره وحتئ نظارات كتب الها الدكتور التقويه النظر... وطلب منها تبتعد عن التركيز والعصبيه وشد الاعصاب وممنوع الموبايل حاليا والتعرض للضوه القوي والقرب من التليفزيون... طلعنه وهي فرحانه وتباوع هيج وهيج وتتلفت بالاماكن ولازمه ايد جاسر وصبريه ... تحمدوا الها جابر وعمي بالسلامه ومن بعدها اخذناها البيتها... خطيه تلكوها اطفالها وهم يبوسون بيها وهي تحضنهم وتبوسهم وهم مكيفين يكولون..سكيته تسوف بعد ما باوع علئ الحايق باوع علينه... وهي تضحك وتبوس بيهم بعدها ريهام جابت الها غزوله هي فرحت بيها حييل بس خطيه مابيها حييل ولحد الان الوجع مال العمليه متعب جسمها... بس وكفت وهي تستقبل بنتها اخذتها من ايد ريهام وتبوس بيها وتشمها وترجع تباوع الها...ياروحي يمممه فدوه ونبي تشبهني جنها اني من جنت طفله ...نفسي حييل نفس شكلي بالضبط... ضمتها الصدرها وتبوس بيها ضحكت...شوف جاسر تشبهني هو جان صافن واحد ايده علئ شفايفه انتبه عليها كلها وعدل كعدته كلها...هااا اي تشبهج ههه هي اختفت ابتسامتها ورجعت حضنت بنتها بفشله وكعدت بعدها خلينه الها علاج وضمدناها لان الدكتور طلب عناية ونضافه وقطرات كل ساعتين... عاد هم مشمش وروضي شافوا القطرات وهم لزكوا...اقينه نحق للديج هو ما يسوف عنونه اودعنه...« اطينه نحط للديج هو ما يشوف عيونه يوجعنه » خمطوا مني القطره واني اركض وراهم وهم يركضون وره الديج الي سابقهم بالركض ويردون يخلوله قطره خطيه مسويه فار تجارب شكو شئ وجربوا عليه... طولنه عندهم لليل ومن بعدها خلينه ورحنه وحتئ رهومه راحت اخذها صلاح ... بس صبريه ورضيه ضلن وهن اكيد ما يقصرن ويه جولي... ..................... جولييت... مرت الأيام طبيعية بس انتبهت الجاسر مو علئ طبيعته ابد وبس مزعوج ويصفن حسيت اكوو شئ خابرت رهومه ضليت احجي وياها هي ما حجت شئ بس كالت استفسري منه اخاف اكو شئ زاعجه خليله يحجيلج شكو شنو الي زاعجه... كلتلها...ونبي حجيت وياه بس مدا يحجي متعرفينه الحماج سره ما يطلعه لو يجي عمو مهيوب من الكبور ردت بتنهيده...اي والله هو ابد ما يحجي بس ميخالف احجي وياه او احجي ويه وقار يمكن تحجي شئ تعرف شئ... جريت نفس...يالله تمام عود اخابرها واشوف كالت بضحكه...تدرين اليوم عرس منوو ؟ رمشت بعيوني...عرس منووو؟ ضحكت بصوت عالي...لج اليوم عرس هاله بنت خالتج فتحت عيوني مصدومه...ياااا صدك لج ليش هي شوكت انخطبت ردت عليه بتنهيده...باعي سمعت من خالتي ام فلاح وحده من اقاربها مسولفه الها هي متعرفه عليه عن طريق الفيس وخاطبها بسرعه بسرعه وعمج ما راضي وهي معانده هي وخالتج واخذته بس يكولون حلووو... ابتسمت بحيره...الله يسعدها وتكف مشاكلها عني قابل اني شريد والله ما بيني وبينها شئ من زمان اتمنئ الها السعاده بس هي مصختها ويايه كالت...اي والله ربي يسعدها مهما يكوون بس شلون تتزوج واحد متعرف عنه شئ،وبعدين شهل زواج المفاجئ... رديت عليه بهدوء...يجوز نصيب ضليت اسولف وياها وبعدها قفلت الخط خابرت علئ وقار مجاوبتني... انوب رحت كعدت يم ماما رضيه بس احس نار تفور بداخلي كالت ماما بحنية...هااا يمه جولي شبيج اشوفج مو طبيعيه تنهدت بصوت سلبه الحزن...ماما تعرفين شئ وضامته عني دا اشوف جاسر مو علئ بعضه واشوفه مهموم عبالي يرتاح من ارجع اشوف اشو شفته العكس واكول ياريت ما شفت ولا سويت العمليه لزمتني مرعوبه من كلامي...كافي يمه كافي شهل كلام شلون مزعوج لان شفتي لا تتحسسين يجوز عنده شغل موضوع براسه ... ابتسمت بوجع...ميخالف يمه اذا بي شئ خلي يكولي يفتحلي كلبه ليش مخليني هيج علئ الهامش ليش ما يلتجئ اليه يكول شنو الي محيره... نزلت عيونها وهي تقبض علئ سبحتها...الي محيره يا يمه هي مرته شام هي الي محيرته رفعت عيوني لا شعوريا وباوعتلها مصدومه...ليش شبيها ؟ تنفست بتوتر...يمه هي هم حامل وهم تريد تتطلگ بهتت ملامحي من كلامها ونزلت راسي واني مدا استوعب هل صدمتين شنو حامل شنو تريد تتطلگ رفعت راسي بديها وهي تواجهه وجهي الحزين والكئيب... كالت باسف...يمه ما يصير تتطلك وهي حامل بس يجوز البنيه تحسست منج لان من انخطفتي اهتم بيج وهي تحسست ومن حقها.. هزيت راسي بنفي...بس مو مال تطلب الطلاك اذا هي حامل مسحت وجهي بقهر وتوتر لزمتني ماما رضيه...ضجتي لان حااامل ؟ باوعت عليها ثواني وبعدها جاوبتها...ليش ؟ ترئ هو زوجها وهي اوله بي هي الاولئ واني شنو اصلا حتئ اضوج وبعدين هذا رزق من الله اروح اعترض علئ رزق رب العالمين ماما اني مو هيج اني انسانه بس اريد اعيش لنفسي والاطفالي ومستعده أخسر الكل الخاطرهم صدكيني هسه صرت زينه واكدر اعتمد علئ نفسي واتخلئ عن الكل ترئ اكدر اعيش من دون جاسر اني عشت من دون اهلي فعادي هل شئ بس اطفالي لا ما اكدر... عضيت علئ شفايفي بحسره ...ماما خلينه نروح الها ليش هيج مخليته مهموم وحاير ومتعذب ردت عليه بغضب...انجبي جولي جاسر ما يقبل... تنهدت بدموع ومزح...وليش ميقبل ترئ مدا اسوي شئ مو زين دا اصلح ذات البين وابنيلي قصر بالجنه واجمع راسين بالحلال هههه باوعتلي بوجهه حزين ...تضحكيين وانتي كلبج شايل هموم الدنيا تكابرين وانتي مكسوره الف كسر من داخلج ...شكد قويه يا يمه يجولي ويجي كلب ويكول مايعه .. سحبتني الحضنه واني اخذت منها استجابه بجيت بصمت مطبق وشهكت بصدرها الدافي ونتحبت كلتلها...فدوه يمه خلي اريح ضميري واروح الها... اول مره ما قبلت ومن بعدها قنعتها خابرت هي جاسر كلتله طالعين للسوك ما اعترض وخلينه ورحنه... وصلنه للشقه الي كاعده بيها دكينه الباب فتحته امها من شافتنه انصدمت وبعدها ضحكت بارتباك...اهلين اتفضلوا تفضلوا ... دخلنه جانت شام كاعده تتصل علئ الحاسبه وتضحك من شافتنا قفلت الحاسبه كالت...يالله مع السلامه بعدين بتفق معك خالي... سلمت عليها وهي ردت عليه ببرود قاتل ... كعدت بارتباك واجت كعدت يمي ياسمين وهي تباوعلي بحقد عكس شام جانت ما مهتمه... اول مره اشوف شام بعيوني جانت شابه حلوه لا يعلئ عليها وثاقه من نفسها جانت لابسه تشيرت طوويل ونص اردان وبجامه لحد الخصر وهي جسمها حلوو ولافه شعرها ليفوك و واكعه بعض الخصل منه... رمشت بعيونها بتساؤل...بدكون شئ ؟ جريت نفس عميق وحزين وابتسمت الطف الجو شويه...اي اني جايه امنع الموضوع الي اجيتي بي الجاسر رفعت حاجب بعدم قبول...اي موضوع وبعدين مين انتي لحتئ تمنعي موضوع خاص فيني انا وجاسر غمضت عيوني من كلامها بس حبيت اواجهها...اي مو شئ مهم بس صدكيني اني من اجيت بس حتئ ابري ذمتي كدامج وكدام الله... باوعتلي بنظره مستهزءة...انتي شو عم تحكي انا ما عم افهم عليكي شو انتي ماخده جوزي حتئ تبري ذمتك عندي ؟ غمضت عيوني بصبر...لا ما اخذته ولا سويت وياه علاقه قسمتي صارت اله واني اصلا جنت لا يمه ولا بقربه جنت صغيره بس اني ظروفي عاكستني وصار الي صار ... ضحكت باستهزاء..اني بعرف شو الي صار بس عتبي علئ امك كونك صغيره يعني امك ما لقت غير جاسر يحميكي ولا كان عندها غايه وقالت ان هل رجال مانو قليل وعندو مصاري وعندو هيبه خليني الصقوا ببنتي ... استفزتني بكلامي...لا تحجين علئ،امي امي انقئ من هييج وهذا مو تفكيرها وحتئ مجان همها ان تزوجني بس القدر عاكسها وضلمني وضلمها... ردت بعدم اهتمام...ممكن تسكتي لانو محدا مظلوم هوون غيري انااا...ههه عشتي مدلله عندوا ولو ما كنتي مدلله كنتي رحتي لاهلك وتركتي عذابو... باوعت بعيونها منهاره من كلامها اللاذع واهتمها الباطل تقربت منها واني اااشر علئ نفسي بانهيار...اي عشت مدلله جنت انام بصفه وهو يلهج باسمج اي اني مدلله ههههه مخطوووبه واسمي مرتبط باسمه وهو لابس حلقتج وعايش علئ،ذاكرتج اني حييل مدلله عنده بحيث هو مخلصه مزعوج ويخابر ويراسل ويسافر يدور عنج واني ادعيله يلكاج لان اني جنت غبيه وفطيره ما اريد اشوفه مقهور... اني عشت مدلله من ماتوا اهله وبنته والكل حملني السبب من اجن من الدفن هجمن عليه بالضرب والاهانه والرفس والله حتئ جام الغرفه كسرنه عليه عشت بخيير ونعمه واني اسمع من تهديد ما اريدها لا هي ولا اطفالها وجابر يكول مستعد يموت طفلها ويخلص منها... طلعت اركض واني حاضنه جنيني بيدي هاربه منه لامي اشتغلت فلاحه وازرع واديه رايحه من البرد وميت عار مثل داوود مر بحياتي يوم واحد ردت انامه بدوون خوووف بدون قلق بدون دموع طفلي ببطني واني ادعي يمه فدوه لا تخذلني يمه لا تعوفني يمه محد الي... اي اني حييل مدلله من رجعني ضرب وكتل ورعب وهددني باطفالي ياخذهم بس اجيب صرت خدامه للكل بس حتئ يرضئ عني ويرحم ضعفي ويخليني عند اطفالي... احترك ابني بسبب نوال واني روحي احتركت وياه عشت عذابه وعشت مأساته جبت مجتبئ وهو مريض ومعووق وقلبه تعبان وجنت عبالك مثل اليتيمه الي عايشه بنص الوحوش... عشت وحيده واهلي سدوا بابهم بوجهي محد استقبلني منهم محد كال هاي شنو ذنبها تتحمل غلطة اخوها المتهور محد منهم كال خلي نجيبها خلي ناخذها منه ذول ناس فاقدين والفاقد مصدوم ما يعرف شيسوي ويمكن ينتقم محد نصفني لا اهلي ولا اهله عشت خدامه عند اهله ومحد يقبل اكل وياه عازليني بالمطبخ جعفر سواله سالفه كلها صاحت بوجهي اخووج العار هو الي خطف جعفر بنت النعال بنت الزمال... سبو ابووي المظلوم وهو ما اله ذنب..ومات ابوويه واني مو يمه ولا حضرت جنازته ولا شفته وضليت بحسرته... من حقدهن وغلهن انطن ابني العمته حتئ تعوض عم اموتها المبتوره... واخر شئ ختمتها وياي نوال بضربه فقدتني النظر والثقه وصرت بحاجة الكل... جاسر كتل عاصم ورجع الدم مره ثانيه وعشت بعار نايمه ويه كتال اخوها متستحي كلبه عار بس الساقطه هيج تسوي... اني تدللت من اهلي ومن اهل زوجي و زوجي شفتي اني شلون مدلله ههههههههه وهااا ازيدج من الشعر بيت جاسر حرمني من اطفالي وهم كومة لحم يعاقبني بيهم يحسسني بالفقدان مثلج تماما من اجيتي وطالبتي بيهم ... باوعت للوجوه الي تباوع عليه نص حاقده ونص حزينه ونص مصدومه ضحكت بدموع. اكو احلئ من هيج دلال... امها نزلت راسها باسف وشام جانت تباوعلي،بحيره اما ياسمين كالت...بس هاد مانوا مبرر...شام عاشت متلك ويمكن اكتر ... ردت شام...اي انا عشت اكتر انا تهجرت وانضلمت ومات ابني واخي كمان انا انسجنت واجيت ولقيت بنتي ميته وجوزي متجوز... شو بدك ياني اعمل بحضنك ولا بوسك ؟ لك انا تعبانه وما عاد بدي شئ بتتهني في ... هو لو بيحني عنجد كال لقاني ليكو انتي ما انخطفتي اله ايام وهو تبهذل عليكي وكمان لقاكي ليش انا لا؟ ضحكت باستغراب...تحجين صدك تقارنين نفسج بيه اني الي اخطفوني ناس عزل وانتي ما انخطفتي انتي تهجرتي ونفيتي الغير بلد جاسر حتئ السوريا راح وسأل عنج بسجون سوريا و ويه اللاجئين بغير مناطق وماكو انتي والكل كالو ماتت لان عائلتها ماتت بالقصف ... يعني انتي جنتي بين تلث دول سوريا والعراق ولبنان واني جنت عند تلاثه مهتلفين ومو بين الدول هي دول ما كادره الداعش جاسر وين يلكاج وهو ما قصر باحداث سوريا والعراق والاوضاع والقتل والذبح وهو مجازف بروحه ويدور عليج ويلهج باسمج من اكدو انتي متي يالله تزوجني وما تزوجني فرحان بعرسه تزوجني حتئ ينقذني من الظلم الي تعرضت اله... وسنين وهو حارم نفسه من كووولشي،ومن الزواج وعايش علئ ذكره منج هو هم تعب ومن ماتت غزل ماتت روحه وياها... وجان عنده امل برجعتج وهل امل انذبح عنده شلون ترجعين وهو ما حافظ علئ امانتج ... لا تضلمين جاسر هو تعب وهو يدور عليج وانتي خالج الي بامريكا ما اعتقد سوه مثل جاسر... الكل جان يحجي عنه كافي جاسر هسه تنكتل هسه تموت حتئ شغلك تركته حتئ اهلك عذبتهم ابوك شنو ذنبه وهو عنده بس غايه وحده الي هي انتي ... لا تتحسسين من اني انخطفت هو ضاج عليه لان صدكيني اني عشت مثل هل ايام وحتئ من بعد ما جبت التوم وهو يبحث عنج ... وهسه انتي حامل انسي سالفة الطلاك واني اذا تحبين اطلع من حياتكم وللابد لان اني دخيله بحياتكم... باوعتلي مستغربه...مين يلي حاااامل... ميلت راسي بغباء...غير انتي ؟ ضحكت بقهر...مين قال هل حكي ؟ جاوبتها ماما رضيه...ليش يمه تنكرين غير انتي حامل وخلف الله علئ ياسمين هي الي انطتنه الخبر هي تقربت من ياسمين بحقد وجابتها براشدي شلع خدها شلع صرخت بيها بغضب...لك يا كزابه انتي شو عم تحكي لي عم تكزبي انا من اتمئ حبلت وانا مو حكيت الك ان هل حكي ما بدياه انا خلاص بدي سافر انتي ليش ما عم تفهمي... حطت ايدها علئ خدها وهي مو مستوعبه الي صار ردت بتلكئ...اءء اء انا كل يلي سويتوا مشانك انتي لانوا انا ما بدي يصير فيكي متلي نحنا اذا فقدنا جاسر بدنا نفقد الامان لانو هو يلي ساعدنا وانتشلنا من كل شئ صرخت بيها بانهيار...وبتكزبي بتقولي انا حامل وبتحددي مصيري انا شوو بيكون موقفي قدامو اذا طلعت كزابه لك شو هاد بدك تصعدي علئ اكتافي ردت عليها ببكاء...اي لا تسافري انتي الحق الك وانتي صاحبة الشان ليش بتتخلي هل بنت بتتنعم بجوزك واملاكوا ... غمضت عيونها بقهر...لك اناااا ما بيهمني املااااااك انا يا اما بكون يا اما لااااااااا ما بقدر عيش مع واحد عندوا عيله ويكن مشاعر حتئ لو قليل لغيري افهمي وبطلي زعرنه... انصدمت يعني مو حامل وهل شئ الي سوته ياسمين حتئ تداري مصلحتها...اندك الباب وراحت امها فتحته... سمعتها دكوله...تفضل ابني تفضل جاسر اهلا وسهلا والله... عاد اني هنا بلعت العافيه وسخنت من شافني هو انذهل من وجودي بلل شفايفه بعصبيه وتقرب مني كأن ناكر وجود الكل لزمني من زندي وهمس بغضب...ولج شجابج هنا... بلعت ريكي بخووف...اءءء ان اني هو اي ... تقربت منه شام وهي تباوعله بنظرات لوم ومبتسمه سحبت ايده من ايدي كلتله...بيكفي اجت لحتئ ترضيني لا تحكي معها... مسح وجهه بتوتر كال...يالله امشي جاوبته شام...مو قبل ما نصفي حسابنه يا جاسر... رد عليها ببرود...اي حساب لزمت ايده وايدي واخذتنه الغرفته وكفت بالنص واحنه ثنينه صرنه مقابيلها كتفت اديها وهي تباوعلنه ... صعب مرات من نعبر عن الصمت الي بداخلنه الاه تقتل الاه... احس ارواحنه حايره ومعلگه بالسماء والگلوب بيها بذور من الآهات... شام قطعت الصمت من كالت...الاختيار حلو ازا نحنا اختيارنا بنفسنا بس بيكون قاسي كتير ازا نحنا انجبرنا عليه... وانا هلا بهاد اختياري عنجد مختارتوا بنفسي وماني مجبوره عليه لهيك لازم تتقبل هل اختيار يا جاسر .. جاسر رد عليها بتعب وانزعاج...اي اختيار شام انتي اختاريتي النار وقفت مقابيلي واحتضنت وجهه باديها وهي تبتسم بحزن...صدقني هاد افضل حل عندي انا رافضه اني كون مرتك انا بدي عيش بدي ابني حالي من جديد بدي سافر بدي كمل باقي احلامي ماني زعلانه منك عندي فرصه وخالي بدو يسحبني عأمريكا هونيك بدرس وكمان بشتغل وكون حالي وعيش مرتاحه... انا هوون ما عااد عندي شئ يربطني بهل بلد وكمان ما بقدر كمل هووون اكتير اشياء بتمنعني وانت اذا ما طلقتني بدي ارفع عليه دعوه وعمل حالي مضطهده وبتطلق غيابي وكمان هونيك بيساعدوني كتير... فتح عيونه مصدوم من كلامها المعلن لزم ايدها بقوه...انتي شتحجين تماديتي هووواي انتي ليش هيج تتصرفين ضحكت باستهزاء...لانو معاد الي مكان هووون اني تنهدت وكوه شجعت نفسي وطلع الكلام مني...اذا حابه اني كتلج اطلع من حياتكم بس انتي ليش هيج ما عندج صبر خلي املج بربج كبير اني هماتين جنت مثلج بس الحمد لله حاربت وان شاء الله اوصل لحل... ردت عليه بقهر...مشان شو بدي حارب انتي عندك ولادك بيستاهلوا تحاربي مشانن انا لو غزل موجوده ما كنت راح اتطلق وكنت راح عيش معك ضره بس انا ما بدي كون عاله عليكن وانه اجتني فرصه ... وانا كمان شفتوا الجاسر وشفت لهفتوا عليكي وحبو الك وهل شئ واضح وانا ما بدي حدا يحب غيري انا يا اما بكون يا اما لاااا... كلتلها بحزن...زين عادي اني اتطلك واعيش ويه خاله صبرية ... رد عليه بضحكه...ليش هو بيرضئ بيحبك يا خانوو بيحبك لمست خده بطرف اصبعها واشاحت بنظرها عني ...انا كمان ما راح انساك ابد وبدنا نكون اصحاب بسأل عنك وانت كمان صدقني ما راح انساك بس انا بدي شغله وحده منك تكاليف سفري كلا انا وامي قديش ما بتكون انت يلي تتحملها... باوعلي كال بهدوء...جولييت روحي يم رضيه هسه اجيج طلعت واني اجر ثياب الذل والقهر والله لو ما ولدي ما اضل احس كرامه ما ضلت عندي وموقفي ضعيف حييل لا من اهل ولا من وطن ...وحيده بهل عالم وبركبتي تلاثه بس احجي يكولي همه هم ولدي... ما انتظرته يطلع منها ابد اخذت ماما رضيه وطلعت... رجعت للبيت واني ابجي احس ما عرفت احجي حسيت نفسي طفله بنصهم وهم عمالقة ولا الي كلمه بنصهم... مرة الايام طبيعية من غير هو شويه مزعوج واني كل يوم احجي ويايه ماما رضيه اكولها دكوله اذا يريد خلي يطلكني ويخليها اني ما عندي اشكال... باليلة ضلمة واشتد بيها المطر وهو جان ما موجود صار يومين طلعت بالحديقه واني حاضنه نفسي وابجي ... ما اسمع بس صرير الليل وحفيف الأشجار شفته دخل وهو مهموم والبطل ينزل عليه بهدوء... تجاهلته وهو ما شافني دخل جوه واني ضليت ابجي والمطر يغسل باحزاني .. تقريبا خمس دقايق وحسيت بي احتضن خصري وحط ذقنه علئ رگبتي ضميت اديه علئ صدري وبجيت بنحيب وألم واني اباوع العنان السماء... همس بعذاب ...لا تعذبيني فووك ما اني متعذب غمضت عيوني باسئ علئ حالي...لا تطمن ما اعذب بس نفسي همس بهدوء...شام سافرت درت وجهي عليه بعيون دامعه ومتفاجئة...سافرت ؟ بلع ريكه بحيره...اي صار يومين نزلت عيوني واني مقهوره...الله يكون بعونها... كال...ادخلي جوه لا تتمرضين عضيت شفايفي بحزن...خليني اتمرض باوعلي بحزن بعيوني واني بجيت بصوت حزين حضني بدون سابق انذار وضم راسي لصدره احتضني بقسووووه واخذني للغرفه وهو محتضني حط راسه علئ صدري مثل طفل يتيم وهو يشكي من مأساته ومن احزانه لاول مره حجالي عن شام وعن غزل وعن كووولشي ومن بعدها حجه اليه عن مأساته تجاهي... وشلون جان يعذبني ويشوف الحزن بعيوني ويتعذب بعدها رفع عيونه الحزينه الذابله اليه كال ...تدرين انتي الوحيده الي داويتني بالرغم من جروحج والالمج... نام علئ صدري واني امسح علئ راسه واقره عليه ايات وابجي ما اكدر احقد عليه ابببد ما اكدر يمكن لان هو الوحيد الي ما سد بابه بوجهي وساعدني رغم اذيته... ....................... وقار... مرة الاشهر والايام اختي اشواق مو سوت طفل انابيب خطيه جابت من بعد معاناة وربط وما اعرف شنو جابت بنوته يعني احنه هل موسم كلها جابت بنات ريهام وشهد و اشواق وجولييت... واني مداريتها واروح الاهلي اشوفها اني وجابر علاقتنه تحسنت وارجع للدكتوره وكالت ان شاء الله عندج حمل لان رحمج مهيئ... وفعلا شهر وحبلت...وشهد العوبه حبلت وياي شكو مو ذاك اليوم جابت بس بعد هي وجعفر مو امان ... سجئ صارت بنيه شابه والناس تتخطبها بس اخويه جاسر ما ينطيها شلون ما كان وصديقه نبيل راد مره كله ما عندكم وهو فاتح امي بخطبة سجئ وامي كيفت وهي البنيه هم مفلفله تريد تتزوج... وهاي شهد نهار كله وليل كله تقره قصص وكاتله روحها تريد تنشر قصتها وتراسل بكاتبه ومدري شسوي حمستني انشر وياها... خالتي صبريه خطيه ضهرها صار عندها سوفان وسوت عمليه الضهرها عند دكتور قريب من الامام الكاظم عليه السلام وجولييت كالت من تخلص من عمليتها تضل شهر عدنا اداريها خطيه لان محد الها هناك... وراحت وياها جولي وجاسر وصلاح وجعفر واني وجابر كلنه عبالك زفه... وجعفر يضحك عليها من طلعت من البنج صورها هي دكوله بدون وعي ...ولك خاله جعفر ولك خاله اني كاتلني جويسر اموتني واحد خبيث معذب جكليته بس اني حلفت بس يطلع راتبي اخذها ولا اخليها عنده ابو الرياء ... همست بصعوبه وثكل ...اكلك جعفر ابو العرك راح اكلك سر بس مو دكوله كلها بضحكة وهو يصور بيها...اي ابد ما اكول بس شنوو كالت بهمس وخفوت و جاسر يباوعلها ويبتسم وجولي ناطه من الضحك علئ سوالفها... كالت...اني مو مطلكه من ابو اللول من زمان وما مسويلي راتب هسه سويته خليت محامي محد يعرف بس انت وراح يطلع راتبي الكراكمي...« التراكمي » راح يطلعن كووومة فلوس ازوج كنوش منهن ومن بعدها اخذ جكليته من جاسر ونشرد بغير ديره اردفت بتوسل...بس بعد امك مو دكول الجاسر وتخرب الخطه كلها بضحكه...لااا لا ما اكله بس راح اكل الجابر ههههه ردت بقهر ولوم...كلشي ولا جويبر الاخوث ابو المتعه هو و وقيره الطرمه يفضحونه ذووول ما عندهم امان ثولان ... جاسر تقرب منها كلها...ادري صبريه جاسر شمسويلج وهيج شاده وياه ... ردت عليه بعصبية...ياااا خلي يولي يكتل ببت بيش وهي بت ابيش عسل علئ كاهي تنضرب هي والله مره نايمه وطالعه رجليها من شردت يمي ... واني ضليت صافنه كلت جااا اذا الرجلين هيج الصد... هو حط ايده علئ حلكها وكتم كلامها كال بقهر...ولكم جيبولنه لاصق صبريه تعدت الحدود الحمره... وجولي صار وجهه احمر وتفشلت وهي تعض بشفايفها ببتسامه ... وصبريه توخر بيده وهو يكتم وتصيح...الص الص شش شلوون...وهو ما يخليها... تقرب منها جاسر كلها بوعيد...بسيطه ام نوم المنحرف اني الج همس بخفوت وهو ياخذها علئ صفحه ...صبريه طلعت مو راحه بعد اذا كعدتي يمها رجلج اكسرها توصف انوب ... ضلت خالتي صبريه تقريبا شهر عند جولي وجولي مداريتها بعيونها وصبريه كل يوم تخابر عمي تشتكي من جولي دكوله...موتتني اله تشربين هذا العصير اله تاكلين هاي الركيه اله تاكلين هاي السمجه وكل شويه ومشطت شعفتي وعطرتني انه وين هناك يم كنوش اسبح بس بالعيد تعال اخذني وفكني منها... وجولي تصيح...ياااا والله ولا ترحين وسويتلج عصير برتقال تشربينه وغصبا ... مرة الايام حلوه ودنحضر الخطبة الحلوه سجاوي... ............................... من جاسر اشتري الي موبايل كووولش فرحت بي احب الموبايل اني من زمان بس عمري ما تهنيت بي لان بصراحه مره امي اشترت اليه موبايل ومن وره هاله وخطيبها طاح حظ حظي... اجتنه فرح نزلت اليه فيس كالت ولج بي اشياء حلوه واكو كروبات مال قصص حلوه وهماتين خلي انزلج الواتباد خفت كلتلها...اخاف جاسر ميقبل كالت..لا يمعوده ترئ شئ عادي هي قصص تسلين نفسج بيهن .. جاوبتها بتردد...يالله نزلي بس هااا نزلي من الكوكل يعني افتحه من متجر بلي ميطلع عندي هنا ... هي نزلته وسوت اليه حسابات كعدت اتصفح ما اندمجت اببد ما عجبني اي شئ او اني بالي مو يم هيج شئ كلت خلي اخابره واكوله سويت فيس وبرنامج مال القصص،وحتئ اذا ما قبل احذفهم... هو جان بشغله خابرته ضليت احجي وياه شويه وفاتحته بالموضوع ضل يستفسر ويفتهم مني وبعدها كال...بس لا تتواصلين ويه اي شخص بالفيس او الماسنجر .. جاوبته بقبول ومن بعدها كعدت اسلي نفسي وشهد ترسل الي قصص واني اقره اول بارت وبصراحه ما اندمج اببد يمكن لان هل شئ جديد عليه ..او يمكن اني قصتي اصعب من هل قصص... دخلت للفيس وضليت اتصفح بحسابات اقارب ابويه اول ما دخلت علئ حساب عمي وانوب دخلت علئ كل الاصدقاء ومن حساب الحساب كدرت احصل علئ حساب اخويه حازم من شفت حسابه ما اعرف شصار بيه احس كلبي انرعب ورجلية ماتت من الخووف والحنين والرعب... ومن دون شعور مني،ومن اشتياقي الامي وريحتها دخلت علئ،الماسنجر كتبت...شلونك حازم. مرة نص ساعة واني بلهفتي وكل شويه ادخل للحساب،وشفته لحد الان مجاوب مرت تقريبا ساعتين وهو ممجاوب غصيت بعبرتي ياربي ليش خلي اكتب اني جولي رجعت كتبت...حازم جاوبني اني جووولي انتظرت هووايه ولحد الان ماكو رد منه عاد حذفت الرسائل بسرعه وحذفت حتئ الماسنجر اخاف يجي جاسر ويشوفني... شفت مرتضئ ومشمش طلعوا برا كلت عزا بس لا يسوون شئ لكيت الديج كاعد ياكل بالتمن وهذول الملائكه البريئه شمروا الطاسه الاستيل بصفه وهو خطيه كمز مرعوووب وخله وشرد... صحت عليهم بغضب...ولك ليييش مو خطيه كمزتوا وشرد رد عليه مشمش...حلي يولي يتل جاجات...« خلي يولي يكتل الدجاجات » خزرتهم ودخلت جوه يمه شكد وكحين انوب غزوله صايره تزحف واوكح من اخوانها كل شويه وصعدت الدرج وماما رضيه صاحت ...جولي يمه بنتج واني اركض وراها...وخالتي صبريه عدنا وكل شويه وكالت...طالعه علئ ابوها ما تنجرع مو مثل امها هاديه ... واني اضحك عليها ضلت عدنا شهر تقريبا من صارت زينه راحت...بس جاسر راح جابها واجه يكول خطيه عملية الضهر ينراد الها عنايه شويه واجن البنات كلهم عدنا كالو علمود خطبة سجئ لان حتصير عندكم ضلن يسولفن وشهد مهووسة قصص كالت...قررت انشر قصتي اله تطك ردت عليها وقار..شتطك يمعوده بالله شيكتبون عنوان القصه ابو العرك والمجنونه جاوبتها بزعل...لا كلبي لااا لا يروحي اني قصتي حزينه حبيت واحد عفطي ومرته سحرتني وطلكني بيها عبره ومن بعدها انصلح ولو هو لحد الان ما نصلح حييل بس ميخالف ريهام ضحكت..اوك انشري قصتي وياج اني انسانه حاربت السرطان واملي كبير بربي والحمد لله انرزقت بهل بنوته وقار...ضلت عليه نشروا قصتي اني هم فقدت اصابعي وتزوجت ابن عمي عن طريق النهوه وسوالفي اني وجبورتي... شهد وهي تراسل...تمام اراسل الكاتبه واكلها صارن تلث قصص ريهام كالت...انشري قصتج جولي ترئ حلوه وبيها عبر هوايه وحتئ ترفهين عن نفسج والعالم تدعيلج تلتقين بامج جريت نفس...لا ماكو داعي وجاسر ميقبل اكييد شهد...ترئ جاسر مراح يعرف هيج هو فارغ يقره قصص والله تافهه انتي جولي وبعدين ترئ القصه مراح تنفضح لان تغير الأماكن والسنين وانتي تتفقين وياها شنو الي ينحذف وشنو الي يبقئ... تنهدت...والله ما اعرف اشوووف اذا نشرتوا كلكم عود انشروا ههههه اني جنت اشاقه وياها مرة ايام وما اشوف اله الكاتبه دخلت عليه وهي تستفسر تفاجئت منها اثاري شهد و وقار خارطات الاول والتالي ممخليات شئ والكاتبه معجبه بيه ههههههههههه اول مره ترددت بس هي طمنتني وكدرت اتواصل وياها وبعدها ادمنت عليها ومصار يوم اذا مراسلتها عاد زاعلت جاسر وصادقت الكاتبه ههه جنت اسرد الها الاحداث وابجي وجنت مرات اضحك وجنت مرات احب جاسر ومرات اكرههه ... هي اخذت الاحداث بس ما نشرت القصه كالت عندي قصه غيرها من اكمل انشرها ... كعدت الصبح علئ صوت الأذان واشوف الديج خانس،كتله بقلق...جاسر فدوه الديج خانس شبي حتئ ما يصيح ولا يكعد بالاذان كال بقهر...مو الله يساعده كله من وره جهالج جاوبته بضحكه...جاسر اخاف يريد يزوج ما كفنه الدجاجات هز ايده وهو يلبس بساعته...يا زواج هم ولدج ممرعدين دينه حتئ الانجاب انقطع عنده ما يخلف لو يجي دينج... ضحكت...ههههههه اي والله خبلو بس خطيه صيح بيهم كال...اي صيحي بيهم انتي .. رديت عليه بخيبة امل...ما يخافون مني ضحك...عساس اني يخافون مني اكلج جولي ليش بعد ما نخلف بعد مثلهم ثنين حطيت ايدي كدامه بصدمه...لا جاسر لاااا ماااا ما اريد وكحين وهاي غزوله الكاع متجرعها انوب متلخ بشعري سحبني من ثوبي من الصدر وهو يضحك.. وانتي منو يجي يكتلج؟ نزلت عيوني ببتسامه...شسوي فقيره وبريئة رد عليه بقهر...وبربوك ليش ولج ما تلبسين الي تكشخين لو بس ضاله تقدمين شكاوي علئ ولدج والديج... باوعتله بدلع....منا وهيج عوود كال بغموض...البسي ثوب النوم الابيض ترئ جبته الج هديه من زمان وجانت امنيتي اشوفج بي .. تفاجئت...ياااا عزا شكد منحرف شلون تجيب اليه هيج اشياء مو جنت محرمتك علئ نفسي وهماتين جنت حاسبتك اخويه... باوعلي بنظرات سخيفه وبعدها التهم شفايفي بشغف ابتعد عني كال بتهديد بعد ما رفعت اصابعي لشفايفي...اذا مسحتيها اخنكج ببوسه اقوه من هاي نزلت اديه بسرعه وضميتها جوه رجلي هو ضحك علئ ردة فعلي ورجع باسني براسي... خله وراح علئ شغله واني التهيت ويه زعاطيطي وعندي ملابس خيطتهم بس هاا هو رغم ترك شام ويكول تطلكت غيابي بعد ما اعرف... بس لحد الان تخابره عادي وهو كذلك يخابرها بس مو دائما يعني مرررات وهي كلتله اذا انقطع اتصالي عنك يعني صرت علئ ذمة غيرك... بعد ما رسلت اله الرسالة انتظرته يرد عليه واني متوترة والتليفون بيدي .. لم رن تليفوني يعلن عن وصول رسالة ، احس قلبي انخطف مني .. بحيث اديه صارن يرجفن وحيوكع مني الفون بأي لحظة واني احاول التقطه .. شفته راد عليه جوليت خيتي شلوونج يا بعد عمري ... رديت عليه بسرعة ودموع تجمعت بعيوني .. شلوني بعد شلووني .. !! انتوا خليتوا عليه حال يا خويه خليتوني من صكعة لصكعة الله يسامحكم .. ماكول غير شي .. رد ... حقج خيتي حقج والله حقج وشنو تكولين وشنو تحجين امي اسمع منج واتقبل واسامحج همين اصلا ما يحق الي ازعل على اي كلمة واي حرف مسحت دموعي بطرف ملابسي .. وكتبت اله ماما شلونها .. رد شلونها بعد ياخوية والله تنوح ليل نهار ومابقالها بس اني .. صدك جوليت ترة الحجي مو مال رسائل خلي اخابرج وهم تحجين ويه امي .. شهكت شهكة عذاب .. صارلي شكد ماسامعة صوت امي راح اموووت على صوتها بس زعلانة اي والله زعلانة عليها وزعلي صعب لان الي صار الي مو سهل ابد تعذبت وبسببهم هم .. ظل يرن الموبايل جاوبت واجاني صوت امي تشهك تناشغ وتنحب وتكول يييمه جووليت يمممه شلونج يا نظر عيني شلونج يا موتي وعذابي شلووونج .. واني اشهك جاوبتها ماما ليش ليييش ؟؟ ولج يمه سامحي امج يييمه سامحيني والله الصار مو بيدي والله تسامحين امج جولي يمه تسامحيها!!! سكتت بس صوت انفاسي المحملة بالبكاء مسموووعة .. وهيه تردد يمه جوليت ادري الاعتذار مايفيد ولا يداوي جروحج بس الصار غصبا عني ييمه غصب والله .. جاوبتها ماما بس شوفتج تداوي جروحي مشتاقتلج كد العذاب الي اتعذبته كد الالم الي عانيته وتحملته كد وجع ووحشة فراكج يمه كالت ببكاء بعد روحي ييمه اجيج والله اجيج تدللين بعد روحي والله انه اذا ماشوفج امووت والله اي والله اموت وشوفتج تحييني جوليت مشتاكة لوجهج الحلو يمه ... رديت : اي يوم تعالي حتى تجي نكعد سوه وأسولفلج شكد تعبني فراكج .. شكد عانيت بعدج .. تعاي شووفي جهالي يمه تحسرت كالت اووووف اوووف والله ظالين حسررة بكلبي جهالج هيج كوون اشوفهم الزمهم ابووسهم لمن ماتكليلي بس يمه كافي كون اضمج واضمهم بضلوعي يمه سامحي امج ييمه سامحيها .. بعدها وعدتني ماما تجيني للعراق .. وحجيت ويه حازم .. كال عذرينه خوويه اذيناج هوواي ... كتله اووف حازم شحجيلك اووف شسوويتوا بيه كلها تهون تهوون بس لمن دزيتوا اولاد عمي وخطفوني هاي بعمري ماراح اسامحكم عليها انتوا شون تأمنوني عدهم شوووون... رد والله هاي كلها سوالف عاصم شكد قنعته شكد حجيت وياه بس ولا يهمج خيتي .. ترة عاصم اخذ نصيبه جاسر اشتكى عليه وعن طريق وزارة الخارجية العراقية القوا القبض عليه هنانه السلطات وانسجن تنهدت .. يستاهل خلي ياخذ جزاته هواي طغى وتفرعن وهذا نصيبه واني اخذت نصيبي وكفاية من اذيته رد .. اي خويه رجلج حوك اخذ حقج وزيادة اولاد عمج هشام وميثم انسجنوا كل واحد عشر سنوات تهمة اختطاف وشروع بالقتل واطلاق نار على الشرطة .. والمهربجي ما مات طلع منها وانحكم مؤبد وهو اصلا حتى تاجر مخدرات وعنده تهم اختلاس وتبييض اموال وتزوير وتهريب .. حاجيته بعتب ... اي بيد منو امنتوا عليه اخوتي بيد المجرمين ليش!!! يعني اني لو رجلي واحد فاهي جان هسه ضعت والله اعلم شصار بيه بس صدك جاسر سندي موو انتم والله عوضني بي .. التفتت شفته واكف بباب الغرفة مكتف اديه ويباوعلي خليط من المشاعر العنيفة والقاسية تتلاعب بملامحه .. سديت المكالمة بسرررعة .. ووكفت اباوعله .. كال بغضب مكتوم ونفاذ صبر .. هاي ويامن جنتي تحجين جوليت! وكعت دموعي المتبقية بعيوني على خدي واني اباوعله بيأس: جاسر ب بس اسمعني .. والله طااك كلبي على امي والله هو عصب حيل وعااط وللج ويااامن تحجين بس فهميني ويا شببببب دمااااارج ؟ هااا جاوبيني ... واني عاصرة الفون ومخليته على صدري واباوعله بخوووف .. واتمتم امي جااسر ام اام امي هو مد ايده للتحفية شمرها بخشونة ووكعت على الكاع وتفلشت ... ومد ايده باتجاهي بتهديد : لا تبررين جوووليت لا تبررين ما اريد اسمع تبريراتج .. يعني عاجبج الي صارلج اخر مرررة عااااجبج هاااا!!!! هزيت راسي برفض وعنف وهو كمل لوو انتِ تحبين الاذية تحبينها موووو ؟؟؟ شهكت والدموع غركت وجهي .. هو حس مراح يسيطر على نفسه وميريد يأذيني طلع وطبك الباب بعصبية ... واني كعدت بالكاع الم ببقايا التحفية المكسورة خاف الجهال يجون ويدوسون عليها وظليت ابجي ... بس والله ما اتحملت بعد اكثر ما اتواصل ويه امي ماتحملت .. صعبة لمن امج بعدها طيبة وماتجمعج وياهه ولو كلمة ولو سالفة تبادل اخبار صعبة .. هاي امي ياناس امي ، جنتي وناري امييييي .. ..................... سجى ... خابرتني نوال واني انفجرت بوجهه .. كارهتهها كره مو شون مجان كره العمى .. ع الي سووته بينا اني واخواتي .. جنت اساندهه بكولشي واكول امي وامي بس بعدين اكتشفت انها ام باطلة وجنت عمية عين وقلب لمن امشي وراها واكتشفتها على حقيقتها لمن تخلت عنا اني واخواتي .. لمن خابرتني .. كتلها بعد لتخابرين وانسي عندج بنات واني واخواتي ناسين عدنا ام ... وسديت الفون بوجهه واني بقمة عصبيتي .. باوعت لاخواتي شلون مرتاحات من كتلها ووجهن مابي اثار ضرب صار فترة حضنتهن وبوستهن وكعدت العبهن .. وراهه بأيام اجوي خطار النا .. دخلت عليه شهد كالت بضحكة ولج هاي جايين عليج بدلي ملابسج وتعالي سلمي عليهم كمت على حيلي وكفت يمها افرك باديه بقلق .. شكو جايين عليه منوو هذول وشعدهم ويايه !! فكرت خاف امي مسويه فد فاينة وجايين علينا اني واخواتي .. بس شهد صدمتني لمن كالت شبيج انخطف لونج لج جايين يخطبوج والله وكبرتي وصاروا يخطبون بيج ... الي يسمع شهد يكول هيه داخلة بالعمرين ميكولون اني وياهه اعمارنا مقاربة لبعض .. كتلها عفية خطوبة شنوو ترة استحي والله .. ضربتني على كتفي دوولي تستحين شنووو مو قبلج انخطبنا لا استحينا ولا شي .. عضيت شفتي .. ورحت غيرت ملابسي ولبست ثوب وردي فاتح ولفيت ورفعت شعري ليفوك ونزلت خصلات .. رحت وكفت يم باب الاستقبال وخجلانة افووت .. وافرك باديه واطكطك باصابعي .. طلعت بيبي وفوتتني ، لمن فتت جانوا نسوان اثنين وحدة عمرها بالخمسين والثانية بالثلاثين .. سلمت كعدت وهم جانوا مظيفيهم عصير وكيك .. وهنه ظلن يباوعن عليه كصني كص بالنظرات واني خجلت كولش ودنكت بعد مارفعت راسي ... بعدها راحوا وبالليل اجه عمو جاسر وحجه ويايه كال شفتي الناس الي اجو اليوم يخطبوج! اني كولش خجلت واجيت افوت ببطن القنفة من الخجل مجاوبته سكتت خجلانة هو كرر كلامه بابا سجى احجي وياج شبيج .. عصرت اصابعي وبلعت ريك وصوتي كووة يطلع اي اي عمو .. كال هذا ملازم اول نفسه الي خطبج خوش ولد حباب ودرة مال الله واعرفه كلش زين بحيث انطيج اله واني مغمض .. واله فضل عليه كلش كبير ويرجع القرار الج وانت كيفج بعد اني ماريد اجبرج على شي اني ماكدر اقرر اي قرار بحضور عمو جاسر لان اخاف منه واله رهبة كلش كبيرة .. كتله بكيفك عموو .. هو حس بيه خجلانة ومرتبكة .. كال لا مو بس بكيفي وانت هم رأيج مهم واني راح انطيج وقتت تفكرين وتقررين اني مجاي اجبرج على شي او حتى اخذ موافقتج هسه لا بس جاي انطيج علم بالموضوع واحجيلج على نبيل وانت شفتي ذاك اليوم بالعزيمة بلعت ريكي الجاف اكثر يعني هو هذا الضابط الصاك هو الي خطبني .... راح عمو .. وترك القرار الي .. واكد عليه افكر .. يوم ثاني .. اندكت الباب وراحت بيبي فتحتها واسمع صوت نوال يلعلع بالكراج .. طلعت اركض .. وكل الي بالبيت طلعوا يركضون حتى عمو جعفر .. هيه من شافتني كالت يمه سجاوي .. اني صيحت بسرررعة موو امي انتي مووو امي روووحي ماريدج مانسيت لمن طردتينه .. ولج يمه والله رجلي مات واني وحيدة ظليت واجيت ارجعكم .. رديت برفض قاطع بس احنه مانريدج مااانريدج .. جعفر كاللها ولي يله منا وبعد ديري بالج تجيين والله احش رجليج حش .. كالت بصيااح موو بكييفكم والله اخذهم منكم بالمحكمة .. رد عليها ووولي تجسحين رجولة وشهد كلتلها على شنو تاخذيهم بالمحكمة وهيه اصلا شهد حتتزوج ترى اصلا حتطلع من مسؤؤليتج هيه شهد كالت هيج لو ماما تخبلت خباالل وكعدت بالكاع وظلت تدك وتلطم ووولج يمه يردون يزوجوج وانتي بهالعمر يمه يردون يرتاحوون منج ... بس كليلي جبروووج ولج يمه احجي .. رديت عليها بنتر محد جبرني واني الي حرية بالاختيار واني موافقة لمن اتزوج شخص اختاره الي عمو جاسر احسن مما اعيش تحت رحمتج وشابعتني ضرب والله أعلم المن راح تزوجيني .. بعدها طردوها من البيت وهيه تتوعد تاخذني اني واخواتي .. دخلت للبيت واني مقهورة ليش اني امي هيج من دون البنات ليش ياربي .. ظليت طول لليوم ضايجة وهيه بس تخابر واني اقفله بوجهه .. وراها دزيت موافقتي لعمو جاسر عن طريق بيبي ووراهه اجه نبيل وامه وابوه عمود الرؤية الشرعية .. هو صح اني شايفته وهو هماتين بس بعد هاي الاصول .. وراها حددوا الخطبة واجه عمو جاسر وشافني ضايجة حجيت اله عن امي والي سوته بيه .. كال مالج شغل بيها شحدها تدنالكم لو تتدخل بحياتكم بعد منا وجاي انسي عندج ام هيج ام هم متنراد وحمدي الله وشكري تنورت بصيرتج وعرفتيها على حقيقتها والا جان ضيعتكم بتصرفاتها انتي واخواتج .. كلام عمو ريحني هواي وفعلا كلت الحمدلله الله خلصني منها وعرفت حقيقتها .. اخذني لبيتهم وهناك بديت اجهز للحفلة مالتي وفرحانة .. رحنا اني وجوليت وبيبي رضية واجرنا بدلة للحفلة مالتي .. وحجزنا صالون وبعدها رجعنا للبيت وخطية جوليت سوتلي شيرة واهتمت بيه ومقصرت وياي وكفتها هايه خلتني اتندم على كل كلمة كلتها بحقها وحتى خجلت اخلي عيني بعينها .. وراها صارت الحفلة اخذوني للصالون .. عمة وقار راحت ويايه .. جنت متوترة وخجلانة حيل بس بداخلي فرحة ، وحتى اخواتي اخذناهم ويانه سوينه شعرهم ولبسن نفس البدلات وطكيت صور وياهن .. رجعنا للبيت ... وكعدوني بالكوشة جانوا مزينين بيت جدوا وبعدها كالوا اجو اهل العريس .. واني عيني ع الباب ومن اشوف المعازيم يباوعولي اخجل وادنك واسمعهم يكولون خطية صغيرة .. اجيت ابجي على روحي .. بعدها اخذوني لغرفة وجان كاعد بيها سيد وعمو جاسر ونبيل وويايه فاتت ماما رضية وعقدوا النا .. رجعوني للكوشة وبعدها دخل نبيل واني وجهي لزك بحضني من الخجل ... استقبلوا اخواته يباركون اله ويبوسوا ويصفكون ويهلهلون .. ويطشون الجوكليت .. لم صار يمي كوموني اخواته واني مدنكة كلوله بوسها ... كال وين ابوسها اشو مينشاف منها شي .. كلولي رفعي راسج خجلت ومارفعته .. هو جريء لزمني من حنجي ورفع راسي وجان مبتسم و باسني على راسي .. وبعدها كال والله لو يدري ابو مرتضى .. ضحكت .. لبسني الذهب وقطعنا الكيكة ، وراها... عمو دخل عليه كله...يالله نبيل امشي اطلع برا لزكت رد عليه...علئ كيفك ابو مريضي ترئ هسه دخلت خلي اشوف مرتي جاوبه عمو ...تمام ضل بس هااا ترئ جعفر بي كورونا تريد اجيبه ادخله عليك هو صاح ...كمامه محد منكم جايب كمامه ولكم اطلعوا النه ذول بيهم كورونا .. اني انخطبت بايام كورونا وصدك عمو جعفر بي كورونا وانوب مو بس هيج لازك اله يكعد بخطبتي ... وكل شويه وعمو جاسر طرده وكلها..بس تطلع اكسرك بالبوري مال المرجوحه ضل بغرفتك واسكت وهو يرد عليه بقهر...ادري شسالفه هم مريض وهم تكتلني ترئ ما صايره هاي جاوبه عمو...لا مو قصدي اكتلك اكتل كورونا لبداخلك وخطيه عمو جعفر حاجرينه ومخليله اوكسجين وبعد فتره طاب وصار زين ويفتر بالكهاوي... بس انتبهت بالخطبه عمو زعلان من جولييت ما اعرف ليش... ......................... مقهوره حييل لحد الان زعلان مني لان تواصلت ويه اخويه هو يكرههم حييل بس اني والله من شوقي الامي هو صح ما ضربني وحتئ ما يحجي ويايه بس سكوته عذبني رجال يجرح بهجره... رجع من شغله وكعد علئ الجربايه وهو ينزع بساعته وكفت مقابيله والحسره بداخلي باوعلي بطرف عينه ورجع نزل نظره وهو ينزع بالساعه همست بحزن...جاسر ؟ رد عليه ببرود...هاااا بلعت ريكي وتقربت منه واني افرك باصابعي ...اءء والله مو قصدي الصار بس من شوقي الامي سحب ايدي وكعدني علئ رجله باوعلي بهدوء...يا جولييت قابل اني ما اريدج تتواصلين ويه امج بس اني اريد اسويلج قدر اريدها ترجع الخاطرج ودكول هاي بنتي واخوتج اذووج اريدهم يحسون بغلطهم حتئ حازم اني ما اريد ترجع نفس المشاكل ومثل قبل احجايه تاخذج وحجايه توديج... اعرف اهلج كلشي يسوون حتئ يبعدونج عني هم وبيت عمج حتئ لو عاصم بسجن حطيت ايدي علئ صدره بحزن...لا اني اعرف انت شنو بعد ما اخذ كلامهم اني بس الك مراح اعوفك والله همس بخدر ...راضيني يالله ترئ اليحب ميجافي رمشت بعيوني من كلامه وتقربت منه وطبعت بوسه دافيه علئ شفايفه جانت صغيره وخاطفه خليت ورحت اركض وهو سحب ايدي بعصبية كال...شسويتي رمشت بعيوني ببراءة...شسويت ؟ كال...يعني هيج تبوسين وتتدلعين وتنهزمين تردين تموتيني باوعتله ببتسامه...لعد شسوي علمني وكف وراح طلع الثوب الابيض وخلاه بيدي كال...البسي وبعدين اعلمج علئ طريقتي... خله وراح للحمام بعد ما اخذ ملابسه واني اخذت الثوب جان قصير لحد الفخذ والصدر مالته دلع... لبسته وفتحت شعري حركته ونفشته اخذت قلم حمره احمر وحطيت لشفايفي ما عجبتني دا امسحها وهو طلع... سحب ايدي بسرعه وما قبل امسحها اخذني بحنان وهو يقبل شفايفي بحنان واخذني بعالم اول مره احلق بي واكون ما خايفه منه جنت طوول الوقت حاضنته واني بقربه... باسني براسي وهو يهمس اليه بحب همس اليه بحنان...ادمنت حببج... نمت بين احضانه واني احلم بي باوعتله برجاء...جاسر خلي اتواصل ويه امي واخويه فدووووه رد عليه بعد ما باس خدودي ...تواصلي بس هاااا لا تستمعين لاي كلام يجرح ولا تقبلين بالنفاق اذا الكلام ما عجبج ارجعيلي حتئ ما يورطوج... هزيت راسي بقبول ودفنت راسي بصدره العاري واني ابوسه ...وهو يمسح علئ شعري... شفته راح للحمام سبح واني بلدت رتبت الجربايه ومن طلع دخلت اسبح واباوعله مبتسمه وبعيوني نظره خجل هو ضحك عليه واني دخلت للحمام... من طلعت لكيته نايم خليت وطلعت برا للحديقه واسقي،بالورود والاشجار وانطيت للدجاج مي واكل باوعت للديج جان كاف وكاعد تفاجئت منه طحت بي و وخرته شفته كاعد علئ البيض مال الدجاج ضحكت بصوت عالي وبعدها كعدت علئ الكرسي واني ميته ضحك ولازمه بطني... شفت جاسر طلع للحديقه صحت عليه ..جااسر كال...هاااا ضحكت...يالله طلكني بييض الدييج هو باوع للديج شافه رجع وكف علئ البيضات هز راسه بضحكه...هههه ولدج مو يخلون الديج بس يبيض يخلو حتئ تصير عنده ولاده طبيعيه... ضحكت ورحت اله لفيت ايدي علئ رقبته كتله...مو كلت من يبيض الديج اطلكج يالله بيض طلكني رد عليه ببرود...لا والله بويه ما اطلك لو يبيض كنوش... ضحكت وهو سكتني ببوسه قويه ابتعد كال...ولج بربوك فضحتينه منا الجيران هسه يكولون شماله هذا مرته بس تتمضحك... ابتسمت علئ كلامه وضربته علئ صدره بزعل ودلع لزم ايدي وباس العرق النابض بيها... كال..طالع محتاجه شئ هزيت راسي بنفي هو طلع واني خليت ودخلت جوووه خابرت عليه وقار كالت...ولج ما تدرين شصاير استغربت...خير شصاير ؟ كالت بارتعاب ...هاله بنت خالتي يردون يطلكونها وصايره ويه عمج بالرشاشات حطيت ايدي علئ خدي...ياااا ليش جرت نفس كالت...يكولون عود متهمينها عندها علاقه ويه حماها ولازمتهم مرة حماها وعمج متخبل لان هيج صار وهاد عليهم بسلاح تنهدا بقهر ونفخت بملل..ذول ما يملون من السلاح الله يمهل ولا يهمل تهمتني بشرفي وانطعن بشرفها صدك لو كالو كما تدين تدان... قفلت الخط وكعدت ارتب بالكنتور وكع الظرف من بين اغراض جاسر ابتسمت بفرح اييي الظرف ... فتحته بسرعه اخاف ياخذه مني جاسر قريته واني ابتسم وابجي واقره حروف كلماته ضميته الصدري ورجعت بسته الظرف مره ثانيه... رجعت اقراها وجان هذا مضمونها... لا تذهبي... ستندمين..ستعلنين الشوق لي كل المجانين.. وتركضين لاحضاني كل محبين.. قاتلي وابتعدي لكن من العقل لا تنزحين.. انتي طفلتي والروح لكي من التابعين... اخاف عليك من جاسر يا جولييت... طال الحنين وتعلقمت المصائب وانتي تهربين.. صغيرتي طفلتي مدللتي هاجري وابتعدي كما تشائين.. اعدك لبيتي ستعودين وتكونين انثئ ابد لا تنحنين... جولييت الا تعلمي بانك لجاسر مجبره لا تتخيرين... وانك لحبي تنتميين وبعقلي تهيمين... صغيرتي لا تنفري مني ما كنت بحبك الا اناني ومهووس وغريب الأطوار... وصلت نهرك وسقيتني من روحك المعذبه فادمنتك فصار ادماني بين الحب والحرب ...وغاهب انتقام ادمنتك اسيرتي ادمنتك مجنونتي... نهاية القصه....😍 كونوا انتم كونوا بخير...احبكم 😍😍😍 كونوا بالقرب مني دائما كومه احبكم ❤ لا تنسوا التصويت احبتي...🌹🌹 شكر خاص الئ كل من وقف هنا لمؤازرتي اذا كانت بتعليق ناقد او سلبي او ايجابي والي كل من صوت واشاد بابداع الروايه والئ جميع المتابعين من جميع الدول احبببكم كووولش هوووايه واتمنئ ان تنال القصه اعجابكم ولأن اقف حابسه انفاسي خوفا من ان لا يرضيكم ما قدمت واطلب منكم ان تبروني الذمه اذا تعبتكم او تعصبت او بدر من اني اي غلط اني انسانه مو معصومه وان شاء الله قد اكون قدمت الكم صوره زاهيه عن روايتي وعني واكون ما جرحت أحد... واخص بالشكر الكاتبه المبدعه علم من اعلام البصره الداعم الاكبر الي الكاتبه نورا ناصر Nora-Naser علئ الدعم المستمر والمساعده بكثير من الاوقات الها لمسه مبدعه بكل روايتي حياتي نورا اختي الغاليه الي ما يكمل يومي من دونها ما اعرف شلون اجازيج...😍😍😍 | ||||||||
|  |
|
13-02-21, 08:51 PM
| #104 | ||||
| نجم روايتي وفراشة الروايات المنقولة 
| السلام عليكم ورحمة الله وبركاته عاشت ايدك والروايه كلش حلوه لو بيها شي من الكفر ولكن العتب عالكاتبه من باب انها اعلم بهذه الامور وكل الاحترام لطاءفه الشيعيه اللي اعتقد الاخت سمو تنتمي لها العتب كيف تقبلين بكاتبه كفر على ذات الله وان حلم هو من انقذ انسانه من السرطان وبسبب تحزمها بعلم اخضر او وصله خضراء بالحلم قامت ما فيها شي اعتقد تستخفين بعقول القراء ومرض الوكيميا من اصعب انواع السرطانات ولكن ليس على الله شي يعجزه قد يشفي منه المريض بقدره الله وليس بحلم في اهل القبور يحتاج علاج مو من وصله وحلم يطيب انتي احلتي الامر بالشفاء للحلم وليس بيد الله تقبلي مروري | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
1Likes
.png)
.png)
العرض العادي
