27-07-23, 02:29 PM
| #1 | ||||
 
|  ليتني ما حبيتك ،،، بس صار ... لم أرحل لأنني لم أحبك .. كان رحيلي إجباري لتسعد ... كان يوم عادي كأي يوم بالنسبة للعالم ولكن لها كان أسعد يوم بحياتها ، اليوم الي كانت تنتظره على أحر من الجمر ، أخيرا بتتزوج حب حياتها وبتروح عنده وبتكون ملكه ، قاعدة تحضر كل شي وهي تطير وتنقز وتروح شمال ويمين كأنها نسمة هواء وهي بعز حماسها سمعت الصوت الي كانت تتمنى ما تسمعه ابدا ، صوت يهز قلبها ويزعله صوت يخليها تفكر مليون مرة في قرار الزواج غمضت عيونها بقوة وفتحتها وهي تتنفس بهدوء وتردد :- كل شي بخير كل شي بخير اليوم زواجي ،،، اليوم بتزوج ،،، لا تفكرين خلص خلص لا تفكرين .... - قطع عليها دخوله الغرفة وهو يناديها بلقبها لدرجة نست اسمها :- يالغيث يالغيث لفت عليه وراحت عنده بسرعة :- سم يبه أمرني مسك يدها وجلسها وجلس جنبها وهو يبتسم :- ها جاهزة يبه هزت راسها وهي تحاول ما تبكي تمسك نفسها وتكون قوية :- جاهزة يبه بس انتظر فارس يجي ياخذني وبروح بيت جدي زي ما قلت حط يده على راسها وبدأ يمسح عليها :- الله يحفظك يا بنيتي ويحميك ويسعدك بزواجك ولا يضيمك يا رب ما تمالكت دموعها ونزلت وقفت وحبت راس ابوها :- ويحفظك لي يا ابوي ولا يحرمني منك كانت بتاخذ شنطتها بس مسكها ابوها ووقف قبالها وطلع علبة من مخباته وبصوت متكسر :- اليوم زواجك يا بنيتي وانا عارف انكي ما تغريك الهدايا وش ما كانت عشان كذا اليوم الي بعطيك اياه ابغاك تحطينه بعيونك لانه من ريحة الغالية ومحد شاركني في غيرك ... - فتح العلبة وكان في عقد ذهب واسوارة وخاتم وساعة وكان تصميمه قديم واضح بس جديد وكأنه مو ملبوس ابدا - غرغرت عيونه وهو يعطيه لبنته :- هذه أول هدية أعطيته امك واول هدية بيننا ، ويشهد ربي يبنيتي اني ما قد حبيت حد كثرها واليوم انا اعطيك اياه لانها وصتني تلبسينه ويكون هدية منها لك يوم زواجك حضنت ابوها بقوا وهي تصيح :- الله يرحمها ويغفر لها ويديمك لي يا رب ... عم الصمت بالغرفة رغم ضجيج البيت عندهم ، رفع راسه ومسك راس بنته :- أوصيك يا بنيتي اهم شي تنتبهين لنفسك ولبيتك والسمعة الحسنة هزت راسها وأخذت شناطها وطلعت من الغرفة نزلت الدرج وهي تمسح دموعها وشافتها زوجة ابوها ونادتها :- نور ،، نوور نور :- هلا امريني ميثاء ( زوجة ابوها ) :- البنات ينتظرونك برا انتي للحين ما طلعتي لهم نور ابتسمت :- اسفة كنت مع ابوي وتأخرت شوي ميثاء مسحت على راسها :- يلا لا تتأخرين وروحي بسرعة ما عاد في وقت نور هزت راسها وطلعت ، اول ما طلعت شافت الكل واقف ومعصب بدت تمشي بخطوات سريعة وبصوت عالي :- اسفة اسفة اسف... - قطع عليها صوت اخوها الصغير زياد وهو معصب :- الحين اركبي ونتفاهم بعدين جدي شوي ويطلع لنا من الجوال كل شوي يدق فارس ( اخوها الكبير ) :- بنوصلكم الحين بتتجهزين انتي والقطيع هذا والساعه ٧ بنجي ناخذكم ولازم نكون هناك ع ٧ونص بتبدأ الزفة والأشياء هذه البنات بشهقة وحده :- قطيع لي شايفنا غنننممم عندك فارس بعصبية :- اقول لا يكثر واخلصو علينا بسرعة الكل ركب السيارة واتجهوا لبيت الجد عشان تبتدي تجهيزات الزواج .... [ نبدأ تعريف العايلة الأولى لروايتنا المتواضعة مع الاب الحنون العصبي صاحب القلب الطيب والمتحجر " مساعد " الي تزوج نور زوجته قبل ٢٨ سنه وجاب منها ولد وبنت الي هم فارس ونور وتوفت بعد ولادة نور بسبب مضاعفات ونزيف صار معها ، شخص طيب ويحب اولاده وصاحب مال وعز وما يحب اللف والدوران بس مشكلته عصبي وانسان يحب القواعد والعادات والتقاليد وما يحب احد يكسر كلمته . ♡ فارس :- الابن الأكبر للعايلة عمره ٢٥ سنه ، انسان جميل رياضي ومعضل ومن الصفات الحلوة هذه وزي ما يقولون يطيح البنات بغمزة ، انسان ثقيل وما يحب التهاون ابدا بس مع القريبين منه ضحوك وونيس ويتغير مليون درجة ، يشتغل مع ابوه بالشركة وهو ال cio لشركة قام بتأسيسها هو وعيال عمه بمشروع خاص فيهم . ♡ نور :- عمرها ٢٤ سنه ، انسانة مرحة وقلبها طيب بس قوية ما تسكت عن حقها ، شخصيتها قوية وما ترضى احد يقلل منها ، خلصت جامعة جديد وتدرس مهندسة معمارية وتطمح تكون مهندسة عالمية ، تحب ولد عمها ناصر وهو يحبها وبعد مشاكل كثيرة وافقوا على زواجهم . ♤ زياد :- عمره ٢١ سنه ، بعده يدرس جامعة وحاط هدف قدامه انه يكون طيار ولسا يشتغل على نفسه ، يشبه امه بطيبتها وماخذ عصبية ابوه وجميل ومن هالاشياء < تعرفون عاد التفاصيل الزيادةمالها طعم بس تخيلو حلو وعضلات واسمراني كذا  ))) ،،،،( بعد وفاة ام فارس ابو فارس جلس سنتين بدون ما يتزوج لانه كان يحب زوجته وبسبب اصرار امه وابوه قرر يتزوج " ميثاء " تقرب للعايلة كانت مطلقة وعندها ولد بس زوجها اخذ ولدها لما تزوجت بحجة انه ما يسمح لولده يتربى عند عيلة ثانية بس كل فترة يزور امه ، تزوجت " مساعد " وجابت منه اول شي زياد وبعدها توأم بنات منار وميار ) ♡ منار وميار :- توأم مختلف بس يتشابهون بكل شي أعمارهم ١٩ وبنات حلوين طيوبات وقويات بنفس الوقت توهم مخلصين ثانوي وماخذين جامعة وحدة تطمح تكون دكتورة نسائية ( منار ) ووحده رائدة أعمال وحاليا عندها مشروع تشتغل عليه وناجح وهي بسن صغير ( ميار ) وهكذا تعرفنا عالعائلة الأولى وباقي عيلتين ابو ناصر ، وابو فهد ونبدأ أحداث الرواية بصح وصحيح ، احنا تعرفنا على البطلة والابطال بجهتها باقي نشوف البطل والابطال من جهته ، الرواية رح تكون متساوية يعني ما رح يكون بس في بطل وبطلة لا الكل بنركز عليه لان في قصص كثيرة حابه اني ابينها وتكون واضحة بالقصة ... | ||||
|  |
|
11-08-23, 03:00 PM
| #2 | ||||
| البآرت الثاني:- [ فأنت وحدك من بالحب يسكنني ، وأنت أجمل ما ضمته أقداري ] البآرت الثاني :- * وصل الكل بيت الجد وكان في فوضى كبيرة والكل محتاس محد يدري ايش له وايش عليه ، كانوا البنات كلهم بغرفة وحده ومتجمعين وعندهم الي يمكيج والي يسوي شعر والي يقيس الفستان والي يصيح والي ياكل والي نايم رغم كل هذا كانوا مبسوطين أخيرا انتصر الحب على المشاكل والصعوبات والعقبات والتقت قلوب العشاق وكأن الفوز هذا بالحب والزواج طوّق قلوب كل من كان بالغرفة ، كلهم فرحانين من قلبهم لبنت عمهم .... ولكن كأي بداية لازم في نهاية ولأي فرح في وجه اخر حزن ولأي حب مجبور يكون في كره ، وهالكره مو جاي من بعيد لا بل من اقرب الناس ،،،، الكره مو شرط يكون بسبب احيانا تنظر لشخص وتحس انك ما تحبه خلص قلبك يكرهه بدون اسباب وهذا الي صاير مع " ابو ناصر " الي قلبه تعبى بالكره اتجاه اخوه ان كان بسبب او بدون .... وما في أخطر من كره الأخ لاخوه لان تخيل بس لو اخوك الي من أمك وابوك يكرهك ويسوي اي شي عشان ينتقم منك توصل معه لمراحل مخيفة من الانتقام ايش ترك للغريب ؟؟؟ وش تركت للغريببب يا ابو ناصر ؟؟؟؟ هذا كان سؤال ابو مساعد ( الجد الكبير ) الي كان يتكلم بحسره وبعصبية بنفس الوقت :- اليوم عيالكم بيعرسون خلاص ما به رجوع وانت هنا تبطبط ( يعني تبربر ) وتحلّف لاخوك انت صاحي يا ولد ؟؟؟ كم صار عمرك وعمره صرتو شيبان الشيب سادح راسك وراسه وللحين ما تعقلتوا * ابو ناصر وهو يصد وجهه عن ابوه :- يبه انت تدري من الاول وعارف الي فيها لي مسوي متفاجئ الحين * ابو مساعد :- اسمعني زين وكلامي ما رح اكرره اخوك يوم يدخل من هالباب تنطل عليه وتحب راسه والا قسم بالله الحلفان الي ما سويته من ٥٠ سنه اني اسوي الحين ولا تاخذ بلحيتي هذه وشيبتي والله يا مفلح اني لاوريك نجوم الليل بعز القايلة تفهمني ولا لا *ابو ناصر وهو عارف راس ابوه زين وما يبغا يخربها الحين :- تآمر يبه تآمر - كان يقول كلامه وهو يطلع من المجلس قفل الباب وراه بقوة وطلع - * كانوا واقفين عند الباب يحاولون يسمعون شي او يعرفون شسالفة لين طلع ابو ناصر بوجههم وصارو كل واحد يجههة - طالع فيهم وصد عنهم وطلع - * جاهم فارس وسلم على عمه بس ما عطاه وجهه وقرب للشباب :- عمي إذا شفته مبتسم بذبح غليص *فهد وهو يضحك :- هههههههههههههههههه اذبح غليص وعمي بيذبحك وراه *راكان وهو يسوي معصب :- اقول انت واياه حدكم ابوي ما ارضى عليه *زياد وهو يرمي عليهم الاكياس ويقلد راكان بصوت مايع :- ابووي ما ارضى عليه *الكل صار يضحك عليه * فارس :- ناصر وينه * راكان :- راح هو وسعود قالو عندهم شي بخلصونه وبيجون *زياد :- الا صح سمعتوا بالبنت الي شردت * فهد :- الا يبوي يقولون مع حبيبها * زياد :- وش حبيبها تراه اخوها * فارس :- شلون تشرد مع اخوها صاحي انت * زياد :- البنت محبوسة ببيتهم من ١٥ سنة ما طلعت تخيلو الحين صار عمرها ٢١ سنه وما تعرف عن شي اخوه من امها لما تطلقت من ابوها عييا تاخذها معها وقال انا بربيها ، قليل الاصل والشرف كان يعتدي عليها ويضربها ولما يسألونه عنها يقول لهم انها ما تحب تطلع لان امها تركتها وعندها صدمة بس امها ما سكتت وحاولت تطلع بنتها قامت سوت الفيلم هذا كله وقالت لولدها يروح له ويقول له انه غني ومعاه فلوس والناس قالت له انه عنده بنت ويبغى يبتزوجها قام تزوجها واخذها وطلعها من عنده وسافر معها كل ذا ومحد يدري عنهم وبس الام تاكدت انه بنتها بخير راحت للابوه عشان تتشمت في قام هو قلب وحرف القصة لصالحه والكل صدقه * فارس :- وانت شلون عرفت كل هالتفاصيل *زياد وهو يسحب يده من جيوبه ويضحك :- أسرار مقدر اقول * فهد :- لو كلامك حقيقي يستاهل قصاص الحقير هذا الكل مع بعض :- ايه والله قطع عليهم صوت جدهم وهو يناديهم يدخلون عنده :- شسالفة واقفين برا ما تدخلون *زياد يضحك :- كنا ننتظر تخلص الطاقة السلبية الي نشرها عمي مفلح اليوم تدري فينا مبسوطين قلنا ما نبغا شي يعكر علينا *الجد وهو يضحك :- دام عمك مفلح معانا بهالعايلة صدقني الطاقة السلبية ما بتخلص ابدا ملازمتنا ملازمتنا دخل ناصر وسعود :- السلام عليكم الشباب وقفوا بسرعة وراحوا يسلمون على ناصر وتعالت الأصوات والمباركات فارس بضحك :- طالعوا وجهه شلون ، يولد لي كذا مسوي بعمرك ناصر وهو يتحسس وجهه بخوف :- والله اني قايل لسعود الحلاق ماله امانه قعد يقولي تنظيف العريس تنظيف العريس وجهي اخترب صح زياد وهو يضحك :- ههههههههههههههههههههههههه هه يارجال يستهبل معاك فارس وهو يمسك وجه ناصر :- يخوك وش استهبل الحين هذا ناصر طالع وجهه يلق لق ويلمع متعود على ناصر القديم النظيف هذا مالي في ناصر فك يد فارس ورفسة برجله :- شقصدك يا حيوان يعني انا كنت موصخ الشباب كلهم ضحكوا عليه الجد :- ها يا شباب خلصتوا الي عليكم ناصر ؛- ايه يببا خلصت الحمدلله باقي البس وخلاص وان شاء الله بنتزوج اليوم راكان يحضن اخوه :- منك المال ومنها العيال ، الله يهنيكم ناصر :- بروح اكلم وريد ارسلت تبغاني راكان :- لا خلاص ماله داعي انا شفتها ، كانت تبغاك تاخذ فستان اريام معاك للخياط بس قالت حلت الموضوع __________________________________________________ _ عند البنات :- وسن بفرحة :' مو قادرة أصدق خلاص الحين انتي وناصر بتتزوجون ونرتاح من زن ناصر وتهديداته للعايلة نور وهي تضحك :- تصدقون عاد كان ودي نتزوج بس اخلص كل الي وراي عشان ارتاح وريف وهي تزبط شعرها :- يمه تخيلي ننتظر سنه زيادة احتمال يموت ناصر نور ضربتها على كتفها بقوة :- بسم الله عليه وش هالكلام اسيل :- بنات اليوم بصراحة مبسوطة مرة يعني تخيلوا كل شي بدا يصير كويس في العيلة وانتهت المشاكل اتمنى نبقى كذا منار :- ما اتوقع عمي ساكت كذا لله قلبي يقول في شي كبير قاعد يصير بس اصبروا بكرا تطلع ريحته وريد بزعل :- والله ابوي كويس بس مدري لي كل هالمشاكل بينه وبين عمي نور وقفت بسرعة :- تكفون انا مو ناقصة الي فيني مكفيني خلونا نطلع الحين ونروح عشان نخلص الي علينا مو باقي شي ويبدون يتصلون ويسفلون فينا ترا اريام وهي تلم الشنط :- بنزل احطهم بالسيارة واجي اخذ الباقي وانتوا لملموا الباقي ونزلوها للباب اوكي هزوا البنات روسهم ونزلت اريام تحط الشنط بالسيارة وشافت سيارة فهد وفتحتها وبدت تحط الشنط بس خافت من الصوت الي طلع من وراها فجأة ، لفيت راسي بسرعة وشفت فارس واقف وراي بس معطيني ظهره ويكلم بالجوال ، سحبت نفسي بشويش وقربت اشوفه من بعيد كان يمشي طرف المسبح وباين انه مو منتبه ومنغمس بالمكالمة وسمعت بعض من كلامه ، جيت بروح بس انتبهت انه في حيه كبيرة جايه عند رجله وهو مو منتبه قاعد عالكرسي ، ركضت بسرعة ومسكت يده لفيته علي ، كانت لقطة عفوية المفروض البطل يسويها بس بحالتي شكلي انا بسوي كل شي ... طاح جوالي مني وانا الف وشفت بنت واقفة قدامي وباين عليها الخوف بعدت عنها :- شصايير جوالي طاح بسببك.. ما كملت كلامي الا وهي طالعة فوق عالكرسي وتشدني جمبها وتأشر عالحية :- لو ما جيتك كنت بتخرب علينا الجو طالعت فيها وانا انزل :- تقدرين تروحين يلا نزلت وانا اشوفه يقتل الحية وساكت :- ترا كلمة شكرا للحين فري يولد عمي لفيت عليها ورجعت صديت :- روحي عصبت من طريقته بالكلام كأني طفلة ويسلك لها :- فارس ماني بزر عندك احترمني رميت الي بيدي علارض وقربت منها وصرت مقابل وجهها :- اريام خلاااص خلاص ماني ناقص طالعت في وانا امسك نفسي مابي اعصب ولا اصيح وبعدت عنه بسرعة ورحت ، وقفت عند الباب وانا احاول اتنفس واضبط نفسي عشان محد يحس فيني * كنت واقف وشفت الي صار اريام دخلت البيت وهي مضايقة وفارس جلس عالكرسي ونزل راسه قربت منه :- لي سويت فيها كذا ما قدرت اطالع بسعود خفت يحس بضيقتي :- وش سويت سعود جلس قبال فارس :- خلاص عاد يفارس خلاص ما طفشت من هالحالة ما طفشت من المكابر والكذب ، ياخي انا تعبت عنك طالعت بسعود وانا احس بضيقة قاعدة على صدري :- سعود مالي خلق سعود الي بدأ يعصب من حركات فارس :- فارس القصة صار لها سنتين خلاص يا تنساها يا تقوم وتكلم عمي وتكون رجال اما كل ما شفت البنت تحط حرتك فيها وتلومها على كل شي صار كأنه هي السبب ما يصير وش ذنبها هي ، انظلمت زيك زيها خلاص عاد فارس الي ضرب يده بالكرسي :- الا لها دخل يا سعود لها انت نسيت انا وش صار فيني ، ابوي ولا نور كله بسببها وبسبب غبائها وجهلها نسيت ولا اذكرك سعود :- لا ما نسيت بس ما تقدر تلوم اريام لحالها انت بعد مسؤول عن كل شي صار مثلها ويمكن أكثر ، ولي تحط الحق عليها اخر شي هي بنت ما بتترك عايلتها وابوها عشانك او عشان حبك صح وقفت وانا بتفجر :- سعود انا سويت كل شي اقدر عليه عشان اخليها معاي قلت لها بحارب ابوي وعمي وجدي وكل العالم بس هي اختارت عايلتها هي اختارت تبعد وتتركني لا تلومني الحين سعود :- وانت ما كنت احسن منها يا فارس ابوك بس قالك طلقها طلقتها صح ولا غلطان فارس قاطعه :- بس انا قلت لها انها لو بقت وتمسكت فيني زي ما تمسكت فيها اني بحميها وما رح اطلق سعود يمسح وجهه :- احنا الحين خلينا نتحرك ونروح الكلام هذا كله ماله داعي الحين فارس مشا بس سعود مسك يده :- لا تعذب نفسك يا فارس وتعذبها اذا ما قدرت تنساها حاول يمكن الحين بعد زواج نور وناصر كل شي ينحل فارس هز راسه وحضن سعود :- ان شاءالله فكوا بعض وراحو بس ما انتبهوا للي كان واقف ويسمع لهم ، مسحت دموعها وطلعت للحمام فوق وقفلت الباب على نفسها وبدت تصيح بهدوء وتمتم :- معاه حق ،، معاه حق ، وش استفدت الحين باللي سويته لو اني وقفت معاه وسمعت كلامه كان الحين مبسوطين مع بعض ،،، الله يسامحك يبه ،،، الله يسامحك يا عمي ،،، الله يسامحكم كنت جالسة علارض وساندة نفسي عالباب ومغمضة عيوني ومدري كيف رحت بنومة بعد التعب هذا كله .... * عند البنات الي نزلوا وتفرقوا بالسيارات ،،،، نور وميار ومنار وامهم مع فارس ،،،، وسن ووريد واسيل مع فيصل وريد :- اريام وين راحت وسن :- مدري جوالها وشنطتها معاي ،،، تلاقيها ركبت مع راكان شوفي هناك حرك وريد هزت راسها وطلعوا كلهم للقاعة ، وصلت العائلة كلها ونزلوا كلهم والرجال راحوا لقسمهم والحريم طلعوا للغرف فوق يخلصون اللمسات الاخيرة ،،،، نور بخوف :- قاعدة ارجف احس قلبي بوقف يبنات وسن تضحك :- شي طبيعي حبيبي الحين انتي عروس وبتصيرين زوجة الشخص الي تحبينه وش تبين أكثر نور جت بتتكلم بس قطع عليهم ام ناصر :- بنات اريام وين نور مستغربة :- ما جات معاكم وسن وتهز راسها لا :- انا حسبتها جت مع راكان لاني جبت شنطتها واغراضها معاي ام ناصر بخوف :- بسم الله الرحمن الرحيم ،،، بنتي وين وريد وهي تطلع جوالها :- بدق على راكان شوي ،،،،،،،،،،،، اوووف ما يرد ،،، شوي بشوف ناصر ،،،،،،،،،،، وناصر ما يرد ام سعود :- اسيل يممه دقي على اخوانك اسيل اتصلت على فيصل :- ،،،،،،، ألوو فيصل وين راكان ،،،،،،،، أخته تبغا تدق عليه ما يرد ،،،،،،، اووك بسرعة تكفففى اسيل قفلت من فيصل الا وجوال وريد يدق :- راكان اريام وين ،،،،،، كيف ما كانت معاك يعني ،،،،،، لا ما جت معنا فكرت انها معاك ،،،،، يعني وين بتروح ،،،،، تمام تكفى دق علي اذا عرفت شي - وقفلت منه - ام ناصر :- تكلمي وش قال وريف :- قال جا مع العيال وكان يحسبها معانا ام ناصر بصياح :- بنتي وين راحت وين كانت معانا وفجأة اختفت ،،،، ليكون انخطفت نور وهي تهدي فيها :- خالتي تكفين اهدي ان شاءالله ما فيها شي ،،،، معقولة ما طلعت اصلا من بيت جدي منار :- يمكن ما انتبهت بما طلعنا وكانت بالحمام او شي * عند راكان الي ركض بسرعة وانتبهوا له الشباب :- شصار شفيك راكان بخوف وهو يطالع فارس :- ارييام ... ما جت معهم فارس الي طالع سعود بسرعة وبعدين راكان :- وش ما جت معهم وين راحت يعني راكان وهو يركب السيارة :- برجع بيت جدي واشوف فارس وهو يركب مع راكان وطالع بسعود :- لا تحسسون احد تمام سعود وفيصل يهزون رأسهم :- اذا صار شي دقوا علينا لا تنسون راكان حرك وطلع لبيت جده وهو خايف وفارس مو احسن منه - غمض عيونه وهو يلوم نفسه عاللي صار ،،،، انا السبب انا السبب لي تكلمت معاها بهالطريقة ،،،، بس انا دايما اتكلم معاها كذا ولا مرة سوت كذا ،،،،،، اوووف منك يا اريام لي لي هالحركات لييي - ما حسيت على نفسي وانا اضرب الشباك بيدي بقوة - راكان كان يسوق وحس على فارس سرحان ويضرب الشباك بيده حط يده على كتفه :- ان شاءالله ما في شي هدد طالعن براكان وغمضت عيوني وانا اتخيل الحالة الي بلاقيها فيها ،،، حية ولا ميتة ...... * صحيت على نفسي وانا منفجعة طالعت الساعة بيدي وكانت ٨ قمت بسرعة بس علقت رجلي بالفستان وزحلقت على وجهي وضرب وجهي بالأرض وصار خشمي ينزل دم وشفتي التحتية ،،، قمت بشويش وأخذت مناديل وحطيت على خشمي وفمي الي بدو ينزفون وفستاني كله صار دم رحت افتح الباب بس طلع الباب معلق وبديت اضرب وانادي :- يممممه ،،، نووووور ،،، وريييف ،،، جيييني ،، ويينكم ،، اننا هنا لفيت عالشباك وكان عالي طالعت حولي ما في شي اسوي وما في صوت بالبيت كله هدوء ،، تسرسب الخوف لقلبي وجلست علارض :- يرببي هذه آخرة الدراما انحبست بالحمام اووووف ،،،، طالعت بالحمام وقمت ادور على اي شي افتح في الباب فتحت الخزانة والدروج ولقيت مفكات وصرت احاول افك الباب فيهن وعلفاضي قمت اضرب للباب بيدي لين صار تنزل دم ،،،، رجعت جلست مكاني :- كله منك يا فارس انت السبب انت السبب بحالتي ،،، نزلت راسي وانا دموعي تطيح ... وصلنا بيت جدي وكان الباب مقفل ،،، راكان ضرب الباب برجله :- اووووووف فارس وهو يمشي لجهة باب المطبخ :- راكان باب المطبخ ما يقفلونه ،،،، ركضنا لجهة الباب وكان الحمدلله فاتح دخلنا وقمنا نصارخ باسم اريام وندور بكل الغرف * رفعت راسي وانا اسمع صوت فارس وقفت عالباب وقمت اضرب واصارخ :- فاااااارسسسس اننننا هنننا فارس طالع براكان وطلعوا يتسابقون عالدرج وصلوا للباب وبصوت عالي :- اريااااممم اول ما سمعت صوته غمضت عيوني ونزلت دموعي :- فااارسس حاولت افتح الباب مو راضي :- خلينا نكسره راكان طالع بفارس وهز راسه وقال لاخته :- اريام ابعدي عن الباب بنكسره رجعت خطوات لورا وانا احس الباب بطير علي فجأة نزل الباب وحطيت يديني عوجهي وصارخت حسيته بطيح فوقي وقفت ثواني استوعب الي صار بس فارس ما عطاني فرصة فتحت عيوني لقيت نفسي بحضنه واسمع دقات قلبه كانها طبول اشك انه راكان سمعها بعد ،،، كسرنا الباب ودخلت شفتها واقفة وضامه وجهها بيدها جيت بقرب لها بس سبقني فارس وحضنها كان واضح عليه الخوف كنا اسمع صوت أنفاسه العالية كنت احس بالنار الي كانت بقلبه لدرجة قمت احس اني غلط بينهم رغم انه هو الغلط هنا !!! فكني من حضنه وبدأ يتفحصني شاف الدم الي على يدي وكان باقي شوي على وجهي والارض وبخوف مسك وجهي يلف في شمال يمين :- انتي بخير ،، صارلك شي حد سوا لك شي ،، وش ذا الدم ابتسمت عليه :- زحلقت رجلي وطحت وانجرحت بس مو خطير عادي بس يدي توجعني رجعت حضنتها أقوى من الاول وانا متناسي وجوك راكان او اتناساه ما فرقت عندي :- خوفتيني عليك ،،، حسيت الدم نشف بعروقي يوم قالو انك مو معهم لييي سويتي كذا ابتسمت غصبن علي :- كنت مضايقة من شي وجيت هنا ومدري كيف نمت وصحيت ما لقيت احد فارس فهم انه هو السبب وشد عليها :- اول واخر مرة تسوين الحركات هذه فاهمة وشدد على كلمة فاهمة هزيت راسي وانا احس مو قادرة أوقف ابتسامتي هو للحين يحبني ويخاف علي ويهتم فيني حتى ،،، مدري كيف تجرأت وسألته :- وش يهمك يعني لي خايف علي عرفت انها تضربني بسؤالها بس ما خليتها بخاطرها :- انتي تدرين لي اخاف عليك وتدرين شكثر تهميني وتدرين شكثر احببك بعد أريام الي خلاص دورو عليها ما تلاقونها حست الدنيا تنحرق حواليها حرارتها وصلت خمسين حست كل جسمها يرتعش .... كنت واقف اشوف كل شي قدامي كأنهم بعالم اخر نسوني او مو شايفيني يعترفون لبعض قدامي ويحضنون بعض قدامي حسيت الموضوع كله غلط والمقطع الي يصير كله غلط رفعت ايدي وقمت اصفق اصحيهم من الي هم في :- اسف اني قطعت عليكم بس تراا ورانا عرس بنلحق عليه !!! بعدت عن فارس وانا اشوف عيون راكان واحسه بيدفني :- بس ... بروح ابدل فستاني ... - وركضت للغرفة وانا ارتعش مدري من الخوف ولا من الحب ولا الاثنين ؟؟؟ نزلنا عند السيارة تحت ننتظر اريام وانا اشوف ابتسامة فارس وحسيت بفرحته بس مو قادر اقول شي .... حسيت بشعور غريب ، اول مرة احس اني بفقدها ، كنت احس بنظرات راكان لي واحس بعصبيته بس الكل يدري انه الي صار غصبن علي وغصبن عنها وأننا نحب بعض :- انت تدري بكل شي يا راكان لي هالنظرات راكان الي كان ينتظر فارس يتكلم عشان يطلع الي بقلبه :- انت يا فارس تدري بمعزتك عندي وتدري بغلاتك وانك زي ناصر وأكثر بس الي صار من زمان خلاص راح انتهى وادري انكم ما قدرتو تنسون ولا تتخطون بس الي صار اليوم غلط وغلط كبير بعد وانا مسكت نفسي واعصابي لاني ادري وش اريام بالنسبة لك بس انتوا خلاص تطلقتوا وكل واحد شاف حياته وانت تدري زين انه ابوي ما رح يوافق لو رجعتوا فارس الي كان مبسوط لدرجة انه كلام راكان ما أثر في نقطة :- ادري يا راكان وماله داعي تعلمني ، انا الحين عرفت حجم الخطأ الي سويته يوم سمحت لابوي وعمي انهم يحددون مصير حياتي او انهم يتحكمون فيني وعلاقتي مع اريام ، اريام مو مجرد انسانة بالنسبة لي لا هي كل شي بحياتي ، هي حياتي كلها حتى واليوم الي عمي او ابوي بيرفضون صدقني ما رح افكر مرتين او اخذ رأي احد لو اخطفها ما همني اكبر راس فيهم كل الي اسوي احترام وبس ، وما ابغاك تاخذ الأمر عليك او تحس بالإهانة بس انت اكثر انسان يدري وش يعني أنك تخسر شخص تحبه صح ولا لا ؟؟ حسيت كلام فارس صدمني ، ليش يفتح هالموضوع الحين وبهالوقت ليش ؟؟؟ جيت بتكلم بس قطعت علينا اريام :- خلصت نقدر نروح الحين امي تكون زعلانة وخايفة والزفة بدت اكيد ________________________________________________ اتمنى تنآل إعجابكم :- #هدوئي_كارثة | ||||
|
| |
|
21-08-23, 03:16 PM
| #4 | ||||
| مليت من شوفت عيونك وشاريك... مليت من شوفة عيونك وطاريك ما عاد ابي قربك وقسوة عذابك بقول عيني مالها نظرة فيييك عافت عيونك يوم طاحت اهدابك عفت المحبة والسبب هو تعاليك تحسب مصيري مرتبط في جنابك لو خيروني بين مرك وحاليييك بختار مرك وادمي جرحن سطابك ♧ البارت الثالث ♧ في مكان آخر :- واقف قدامه وهو يضحك بإستفزاز ويمسح الدم عن حاجبه ويحاول يقرب بشويش وبهدوء :- ما رح استسلم فهم ما رح استسلم جاه الرد بصهيل مخيف وقف على رجوله الي ورا وينزل كان المنظر مرعب لكل الي بالمزرعة والكل يحاول يتفادا ، دق جواله واخذه طالع الاسم وابتسم رفع السماعة وهو عيونه ما فارقت عيون خيله :- حيي هالصوت وصاحب الصوت - ما كمل باقي كلامه الا وبدت الشتايم تنزل عليه من صاحب الاتصال - استح يولد عمك انا ،،،،،،، - ضحك ضحكة طويلة وهو يحاول يقرب من الخيل - ،،،،، صدقني ما قدرت لكن اوعدك بكرا بكون بالرياض وجاييك لو اجيك بيتك ،،،،، واقف قدامه ، مو راضي اركب معصب ،،،،،، اييه صح قل لراكان ترا شامخ مشتاق والشوق لا زاد عن حده ما هوب زين ،،،،،،، شفت شوق اصيل وش سوا فيني لا يطول ،،،،،،،، ومنك المال ومنها العيال سلم على ابوي وقله غيث بيرجع بس عطه وقت ....... - ، قفل الجوال ورجعه مكانه وقف قدام اصيل :- تدري مالي غيرك لا تعذبني كثير رد عليه بصهيل بس هالمرة خفيف وصد عنه ابتسم بخفوت :- حتى انت صديت عني كان الخيل يمشي ويروح عنه بدأ يركض ولمح طاولة عالجنب قفز عليها وحط طرف رجله وبسرعة لف على أصيل وصار فوقه ، ما استسلم ولا طاح رغم محاولات أصيل انه يطيحه ، مسك اللجام وبقوة ضرب عليه وكمل ركض الخيل وما انسمع الا ضحكة غيث وصهيل أصيل ..... ________________________________________________ ابو مساعد بحزن :- لين متى هالحالة لين متى راكان وهو يحب راس جده :- تكفى يا معيظ تراك قوتنا واليوم ما نباك تزعل ولا تضايق ابو ناصر بضحكة استهزاء :- هو يوم زواجه ما فرح فيه بيفرح بزواج ولد اخوه الجد ضرب عصاته بالأرض :- مفللححح اقطططععع !!!! الكل قام يناظر بعض وهم عارفين انه مو وقته بس عمهم مفلح ما يضيع فرصة عشان ينشر اي طاقة سلبية ويخرب عليهم دخل ناصر وهو يضحك وراح قبال جده وحب راسه :- غيث يسلم عليك ويقولك بكرا جاييك وانت تدري بأصيل وشوق أصيل ما يخليه ولا يبعد عنه الحين - وحط يده عكتف راكان وابتسم - :- وشامخ مشتاق يبو شامخ نزل راسه وابتسم :- جعلني افدا فارس :- والحين خلاص نروق يابوي ما نبا نخرب فرحة العريس دخل زياد وهو متوتر :- أدق على ابوي ما يرد مدري وينه قال بيتأخر بس ما هقيت هالكثر ابو مساعد وهو يوجه كلامه لمفلح :- وش قلت لاخوك يا مفلح وش قلت له يخليه ما يحضر زواج بنته ابو ناصر وهو ينفض ثوبه ويطلع من المجلس بدون لا يرد على احد فارس ماسك اعصابه ويدعي انه يمسك نفسه لين تخلص هالليلة عشان ينفجر ويرتاح .... ________________________________________________ ابتدت الزفة الي كانت أشبه بالخيال ، كانت واقفة فوق ويدها ترجف الكل واقف ويطالع فيها ويضحك الي يبكي ، مو مصدقة انها خلاص بتتزوج الشخص الوحيد الي حبته بحياتها بتتزوج ناصر .... نزلت بشويش وما سلمت من انظاره الي كانت عليها ، كان عيونه تميل للإحمرار وواضح عليه انه باكي لمحت طرف الدمعة بعينه وما قدرت تمسك دموعها تجمعت كلها بطرف عينها كانها لؤلؤ ، نزلت راسها وابتسمت بعد ما شافته وهو يهز راسه بالنفي بمعنى لا تبكين ... قربت عنده ومسك يدها بايده وأيده الثانية مررها على خدها يمسح باقي دمعتها بعد عنها خطوتين وهو يطالع فيها مو مصدق :- انت حلم ولا حقيقة ، انتي قدامي ولا بتخيلاتي ، انتي ملكي ولا اتهيأ هزت راسها بأيه :- انا حقيقتك ، انا قدامك ، انا ملكك !! كان يطالع فيها كأنها أعظم إنجازاته ، كانها فخره ... [ كانت لابسة فستان ابيض ضيق عالجسم ومن عند الصدر قصة v بدون اكمام ومن ورا ذيل طويل ومنفوش عليه حبات كريستال لامعه بس جمالها وجهها وعيونها كانت اكثر جاذبية من الفستان الي مستحيل ياخذ ربع جمالها ، كانت رافعة شعرها فوق ماسك بتاج ومرجعة نصه ورا نازل على الظهر مع شفايفها الصغيرة الوردية وخشمها الواقف مثل السيف وعيونها الوسيعة بلونها الأسود وبشرتها البيضة كانت تأسر قلب ناصر وتكسره كسر وهو يشوف دموعها تنزل بشويش ] ، قرب منها وباس جبينها وهمس بإذنها :- لعلمك هذه آخر ساعة اشوف دموعك فيها فاهمة ابتسمت غصبن عنها ورفعت راسها وقابلت عيونها عيونه وبهاللحظة اختفى كل الكلام ، الشوق ، العتب واختفى العالم كله من عندهم كل شي حولهم كان بالنسبة لهم مو موجود وما في غيرهم يتوسد هذا العالم .... خلصت الزفة وطلعت نور الي ماسكة يد امها وأخواتها وكانت ماسكة دموعها لين حست بشهقة ميار ، طالعت بعيونهم وهي تودعهم وتحمرت محاجرها وبصوت ينتابه البكاء :- تراني جنبكم ما ببعد ووقت تبوني بنجيكم وتجوني ابتسمت وهي تحس حضن زياد وقبلة فارس الي توسدت راسها وجبينها وهمس لها بصوت مسموع :- انتبهي له وانتبهي منه واذا بيوم طاحت دمعتك بسببه بنسا مين هو ومين يكون وانا حذرت ابتسمت غصب وسط دمعتها الي نزلت وحضنت فارس :- ربي لا يحرمني منك برطم زياد وهو يتصنع الزعل :- طبعا كل الحب لفارس وزياد بح قربت منه تمسك خشمه وباست يده :- انت روحي يولد ، انتبه لأمي والبنات وخلك من محارشتهم اذا زعلتهم بزعلك هز راسه وهو يبتسم ويحضنها :- انتبهي لنفسك اهم شي واذا حد زعلك - وعيونه كانت تلاحق عمه مفلح - انتي بس ناديني بجيك تنحنح ناصر الي واقف وهو يحس الجو بدأ يتصاعد من ابوه الي يبتسم بسخرية على جني ونظرات فارس وزياد الي ما وقفت تحرق عمهم :- ياجماعة لي هالبكا كله كله اسبوع بنروح ونرجع بعدها بنقابلكم كل يوم مسحت دموعها وهي تتلفت وتدور ابوها :- ابوي باقي داخل ما جا لي ابتسم زياد بسخرية ولف نور لجهته وكان بيتكلم بس سبقه فارس الي ما حب يخرب عليها فرحتها :- انتي عارفة زحمة ناس داخل ومعارف ابوي واجد شوفي حتى جدي ما يقدر يجي انتي الحين روحي مع زوجك وابوي بتشوفينه الايام جاية ابتسم ناصر لها ووجه انظاره لفارس الي يحاول يكتم غضبه :- ما قصرت يبو مساعد بعرس عيالك أن شاء الله هز راسه بشويش وهو يحاول يتفادا الكلام مع ناصر الي فهم عليه بالمثل واخذ نور من يدها وطلعوا ^ عند الرجال ^ ماسك عكازة ومثبت انظاره لمفلح الي جالس قباله يتكلم مع المعازيم " اههه منك يا مفلح ، كل هالحقد وكل هالكره على وش قصة قديمة ما قدرت تنساها ولا تتخطاها تحرم الابو يزف بنته ، تحرم الرجال من حرمته ، تسوي مصايب وتحط عيالك يلملمون وراك ،، لا حول ولا قوة إلا بالله ، الغلط مني الغلط مني ما وقفتك عند حدك من اول الغلط مني ولازم يتصلح !!! لازم " ، هذا كان كلام معيظ الي تعب من حركات ولده وتعب من مصايبة الي ما تخلص وتضره هو والعيلة كلها .... ! ♤ باقي الشخصيات ♤ عيلة مفلح < ابو ناصر > مفلح : انسان جبروت بمعنى الكلمة لا يعرف التفاهم والتفاهم ما يعرفه ، يشيل الحقد بقلبه لين يشبع انتقام ، وللأسف هالشي كله واضح على عياله ، قدام العالم شغله قانوني بالشركة بس يا ما تحت السواهي دواهي .... زوجته العنود : انسانة قلبها ما يشيل عكس زوجها انسانة خفيفة عالقلب ، هي خالة فارس ونور بس مو من نفس الام وزواجها من مفلح اكثر شي تندم عليه بكا حياتها ناصر : اكبر عيال مفلح اوسم عياله واصحاهم ، محامي شاطر بشغله اثبت جدارته بعمر صغير، صاحب نظرة قوية وما يثق بسهولة ولا يهاب احد وأهم شي عنده الحق ، له من العمر ٢٩ سنة راكان : ثاني عيال مفلح ، يشابه ابوه بطبعه وبعصبيته الي مالها ريموت كنترول بإختصار لما يعصب لا توقف قدامه عشان تعيش ، وسيم وله من الجمال حصه قوية ، رغم عصبيته ماخذ طيبة امه بس مستحيل تبان للكل ، يشارك فارس بمشروعهم الي حقق نجاح كبير ، عمره ٢٨ اريام :- أوسط عيال مفلح ، وأكثر من يتم تجاهله رغم محبتهم لها بس مالها ظهور ، جميلة ولها من الجمال حصة ، رهيفة المشاعر ورهيبة الصمود ما تبين زعلها ولا تعبها لو على حافة الانهيار ، خلصت دراسة وتخرجت وتوظفت بالشركة جديد بتوصية من مفلح الي كان له هدف من ورا ولها من العمر ٢٤ وريد : اصغرهم واجملهم ، رغم سنها الكبير الا انها باقي بعالمها الطفولي تهرب منه بعيد عن واقعها ، جميلة وملامحها هادية ورزينة بس فيها من الهبال اذا اجتمعت مع بنات عمها تنسا نفسها ، عمرها ٢٠ وتشتغل على نفسها وبتدخل طب مع ميار ♤ عيلة راجح ♤ راجح : الابن الثالث لمعيظ ، اهداهم وافصحهم وافهمهم ، عاقل ومتفهم ، اهم شي عيلته والباقي يجي بعدين ولو ما يجي ما يهمه ، متزوج من الهنوف ، بنت خالته وحبيبة قلبه من الصغر ورغم انوفهم أخذها، انسانة جميلة وطيبة ورغم ابتعادهم عن الرياض واستقرارهم بالبحرين الا انهم ينذكرون كثير بحكم عيالهم الي يشتغلون بالرياض مع عيال عمهم وكل فترة يروحون ويرجعون سعود : اكبر عيال راجح وسيم الطلة وبهيج القلب ، رغم جروح القلب الا انه البال مرتاح والابتسامة عنوانه ، يشتغل مع ابوه بالبحرين ومشارك بمشروع فارس والعيال ومعاهم يعيش بالرياض جنبهم ببيت واحد ، عمره ٢٨ فيصل : اهدا عيال راجح ، يكتم داخله ولا احد يشوف تعبه ، اشتغل على نفسه وحصل على المركز الأول في الفورميلا والسباقات هي حياته ، عمره ٢٦ فهد : اصغرهم واهبلهم حياته مستحيل ياخذها بجدية لازم يعيش وفق شروطه واختياراته وهذا بسبب ابوهم الي معطيهم الثقة والأمان ومحد للحين تخطاها منهم ، جميل وقاسي بنفس الوقت ، عمره ٢٥ وسن :- اصغرهم واجملهم ، صغيرة السن بس صاحبة العقل الكبير جميلة وملامحها هادية ، هدوئها حلو بس لما تجتمع مع البنات تتغير، عمرها ٢٢ فتحت براند بعمر صغير لحبها بالتصميم اسيل :- بنت لطيفة هادية غريبة الطباع ، مختلفة كليا عن الباقي لها عالم خاص فيها بين الكتب والقراءة تحب نفسها وفيها الثقة الي تحليها زيادة ، كاتبة وصحفية عمرها ٢٤ سنة ♤ الابن الأصغر لمعيظ :- ♤ غيث - أصغر عيال معيظ ، انسان ماله بأحد غير نفسه يحبهم ويحبونه بس ما يتعدون عليه لأنه ينقلب ، حياته مو بالهدوء الي يظهر على وجهه ، وراه أسرار كثيرة ، عمره ٣٠ ، قدام الناس هو شرطي ! ☆ خلصنا تعريف الشخصيات وبنبدا ان شاء الله بالأحداث من الحين كونوا على ترقب :- ☆ | ||||
|
| |
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
العرض العادي
