مُبعثر فيك ِ مالا الحـزن لايُشفى ، للكاتبة/ ايمان يوسف "مميزة " ( مكتملة )

[ايمان يوسف.]

المشاركة الأصلية كتبت بواسطة قلب لايصدأ

هلا هلا والله بارت طغى عليه الفرح والاكشنات مع تنغيص بسيط
☘اجواء العيد خيالية وخاصة الطراطيع على فكره لحد اليوم لازم عيدنا فيه طراطيع وانا المنفذه 😂😂
☘جمان والله في البداية قلت بدأت تنخ لكن كلامها يدل على ان في راسها حب ماانطحن
☘بلقيس وهادي كناري حب
☘ خبال عبد الاله جاب نتيجة وزينه خذت نواف 💃🏻💃🏻💃🏻💃🏻حلو صار عندنا زواج جديد وافلام واكشنات في الطريق
☘☘☘☘فرحتينا بهذا البارت لكن اعتقد انه تمهيد للبارت الجاي اللي بتلعبين فيه بحسبتنا خاصة سيف الصغير ومهره وكيف بتتحمل الصدمة اذا درت بسالفة سما
☘☘☘☘ننتظرك بشوق وباجهز من الحين المناديل و حبوب الصداع 🤷🏻‍♀

☘اجواء العيد خيالية وخاصة الطراطيع على فكره لحد اليوم لازم عيدنا فيه طراطيع وانا المنفذه 😂😂


ايه مايزين العيد الا بالطراطيع 😍🔥🔥🔥
اثارينا كلنا مهره واحنا ماندري😂🦦❤

[COLOR="Red"☘ خبال عبد الاله جاب نتيجة وزينه خذت نواف 💃🏻💃🏻💃🏻💃🏻حلو صار عندنا زواج جديد وافلام واكشنات في الطريق[/COLOR]

اي والله رب ضاره نافعه …وجاك يامهنا على ماتتمنى 😂😂😂😂😂

☘☘☘☘فرحتينا بهذا البارت لكن اعتقد انه تمهيد للبارت الجاي اللي بتلعبين فيه بحسبتنا خاصة سيف الصغير ومهره وكيف بتتحمل الصدمة اذا درت بسالفة سما

اكيد شفتي المقتطفات …البارت الجاااي صيااااح …جهزوا المناديل …ودوا النزر 😂😂😂😂😂😂😂😂😂😂😂

[ايمان يوسف.]

المشاركة الأصلية كتبت بواسطة maha bint saad

مساء الخير على الجميع …

امونه واه منك يا المبدعه … ايش ها الجمال والابداع …

تعجز الكلمات عن وصف جمال وروعة البارت 💞💞💞

بارت سعيد شوقتينا للعيد وعيشتينا اجواءه

ياعمري يامهره مبسوط بالعيد ورجعت لها ذكريات الطفوله وعيدها مع ابوها …

مهره حاسه ان فيه شي من نظرتها لسيف الكبير وسرحانه وتصرفاته الغريبه بس مو فاهمه شي 💔

بلقيس وهادي واخيراً تمم حبهم بالزواج …

زينه واه من قهرك يازينه ومن اللي سواه فيك عبدالاله …

والعوض بنواف باذن الله …

عارفه ردي قصير بس والله ياله قدرت ادخل شوي وارد واعذريني امونه على التقصير 💞💞💞

امونه واه منك يا المبدعه … ايش ها الجمال والابداع …

تعجز الكلمات عن وصف جمال وروعة البارت 💞💞💞



والله الروعه حضورك يالمها …عساني ماعدمه 🙏🏼❤❤
والعوض بنواف باذن الله …

اي والله يازينه من عوض…عسى كل مقروده الله يعوضها بمثل نواف🦦❤

عارفه ردي قصير بس والله ياله قدرت ادخل شوي وارد واعذريني امونه على التقصير 💞💞💞

تواجدك حتى لو بحرف يالمها …على راسي والله❤❤❤❤

[فيتامين سي]

السلام عليكم ورحمة الله وبركاته


شاهين..
واعيادي السابقه.. كانت مختلفه.. بغضب جمان وصدها.. واستمتاعي بتعويض كل ذلك مع غاده.. والهروب من جفاءها.. لضحكة الاخرى.. ولقائي بها..

عذر أقبح من ذنب ياشاهين يعني شفت جفاها وصدها وانت مالك ذنب ماتعرف سبب صدها خيانتك

******
جمان

كنت خائفه.. من الموت وحدي.. وشاهيني.. اللئيم ليس معي..
كنت مرعوبة من فكرة موتي.. وان يضيع ابني في الغربه..
من فكرة ان يموت ولا اجد من يجمعني من ارض الفاجعه..!
تخيلتني ثكلى.. مجنونه.. في طرقات.. لن تحضني.. ولن تبر فيِّ..


صح النوم تو ه يرجع لك عقلك مافكرتي في كل هذا من قبل طول فترة ابتعادك

بس مادري كل اتخيل شاهين لو رجعت يذبحني على هالفعله..!
ابي ارتب ردة فعله لو درى ان جبنا فهد..

تستاهلين الذبح على تصرفك الغبي وكثير اللي بيذبحونك
وأولهم أنا شاهين مدري شوفته للولد اللي تمناه بيشفع لك
والا بيزيد زعله لأنك حرمتيه من فرحته به

***********

سيف

سيف رفع حواجبه ويطالع الجوال وضحك :
وش فيه.. خفيف.. هالحين مايبي العرس.. وراه طار بالعجه..


ههههههههههه بلاك ماتدري بعلومه وإنه طاح وما أحد سمى عليه وإنت تظن إنك ضغطت عليه وهوجاته من الله يامهنا جاك ماتتمنى


***********

نواف بطفاقه:
ابي اشوفها.. هادي.. لصق ببلقيس.. بالبيت والمزرعه.. زين ماشالها بيتهم.. وانا قاعد.. حتى رقم جوالها ماعرفه..

هههه لو درى عنك سيف كان أخذ منك مبلغ وقدره على أكبر تضبيطه لك حقق أمنيتك وزوجك بأسرع وقت

*******
صبحا
وصبحا.. كانت بتشخط صوت (وش هوووو.) . بس اسكتت..

مسويه شخصيه على البنات وهي يوم شافت السلاح ضاعت علومها الحمد لله ماجاتها جلطه ههههههه

*****
عبد الإله كل هذا حب في زينه والا خوف من انكشاف أمرك
لازم تسلم بالخساره راحت من يدك وأنت اللي ضيعتها بشكك وتعاملك معها

مزنه يازينها اللي تدافع عن زينه لكن زعلت نواف بوصفها لها
قدام سيف تحمست زياده ههههه

موضي مثل كل أم تطمح أن زوجة ولدها بنت ماهي مطلقه
لكن زينه تستاهل نواف ومسيرها ترضى عن زواجه من زينه
خاصه مع تعامل زينه معها

مهره تحاول تسعد الكل وما تعرف اللي منتظرها صدمه كبيره
لها أخذ سيف منها

زينه اسم على مسمى زينة مخبر ومظهر وكلامها عن عدم اخبار
الجميع بملكتها حتى ماتخرب على بلقيس فرحتها يحسب لها ويدل على طيبتها وعقلها ويمكن هي حسبتها صح في حال رفض البعض هذا الزواج ماتحصل شوشره في ملكة بلقيس وتخرب فرحتها

سندس متسرعه ومالها حق توقف ضد زواج زينه خاصه بعد
زواج مهره عارفين العائله

تسلم يمينك اموني منتظرين باقي الأحداث

ههههههه الحمد لله لحقت أرد في الوقت بدل الضائع

[ايمان يوسف.]

البارت الرابع والعشرون


في مزرعة صبحا..
مهره بعصبية:
كان قلتوا لي انك بتجي مع سيف يانواف.. ترى زوين نفسيتها مب شي.. لاتبلشوني معها..
سيف جلس على احد المقاعد في الجلسات الخارجيه:
والله انا قلت له وهو اصر.. تعلبش فيني.. مثل البزارين.. وكسر خاطري.. وجبته..
نواف بنص عيون:
والله يا اني انذليت ذل على الشوفه.. يعني مهره اختك ماتبي تكلمني.. وشايله الدنيا فوق راسه.. وتفكرني مغصوب على هالعرس..
مهره تجلس جنب سيف:
والله انا مستغربه وش فيك مطيور..
نواف بانفعال:
انتوا وش فيكم كلكم ماحد فاهمني.. وين الزينه ابي اشوفها..
مهره توسعت عيونها :
لازم تستعد وتترتب.. اول شوفة بينكم.. حسستني من سنه متزوجين..
نواف:
انا ابي اشوفها باللي هي فيه.. ممكن..؟!
الجده طلعت من داخل وباين سمعت الحوار وهي تقول.. :
الزينه عند الخيول هناك.. رح يمه ودربك خضر..
نواف راح باس راسها ويدها :
ايه هااااا.. والله ياجده انك شيخه.. هذا اللي تفهم..
مهره بانفعال:
جديده.. شفيك.. والله زوين ماراح ترضى..
الجده:الخلاا انتي وياها.. دامها تممت.. وملكت على هالامير.. من حقه يشوفها..
سيف وهو يسلم على الجده :
والله انك نصيرة الرجال ياجده..
نواف.. اشر على المزرعه:
الطريق سالك..؟!
مهره :ايه سالك.. دام زوين صارت حرمتك سالك..
راح نواف..

*ذهبت لدرب الذي رماني لسحرها اول مره.. لصورتها اللتي التصقت في ذهني شهور.. ذهبت وانا قلبي يختلج يكاد يركض امامي.. بدءت اقترب.. حيث هي.. سمعت صوت شيلة.. من سماعة..
على مقطع.. :
مسكين قلبي ماتهنى بغاليين
ولاضنتي شاف الهنا بالحقايق

مكتوب يانجلا نسافر غريبين
ونمشي على درب الشقا والعوايق

طاحت عينه لسماعة صغيره محطوطه على برميل.. كبير.. مع جوال.. والشيله تشتغل منه..

وراحت عينه على الماي يسري من هناك.. تتبعه.. وصوت الفُرشه بيدها..

اول مايبهره بزينه بساطتها.. اللي كلها حلى ياخوذ العقل..
كانت بجينز رافعته لمن نص ساقها.. وبدي كات.. كله مويه..
شعرها مرفوع كعكع متراخي.. وخصلاتها الناعمه عابثه ورى اذنها وعلى رقبتها..

*ضعت في خصرها وظهرها وهو يبان مع حركتها بالفرشاه في تنظيف الحصان..
حسدت قفل السلسال كيف يقبع خلف عنقها يتبجح في موقعه من جسدها بينما انا بعيد.. ذبت مع خال واضحه على كتفها..

كنت انسان لايجد في الأنثى مايلفت الانتباه.. ليس لي شغف.. في التعمق فيها والتأمل.. اما ومنذ رأيت زينه.. قلبت معادلاتي..صرت اجيد التمعن.. صرت لماح.. واخطف ادق التفاصيل من نظره..

انا وصلت.. واقف قريب.. لكن..!
لا ادري مااقول.. وكيف ابدء.. امام خرافتي اللتي اصبحت واقع..!

هاهي تحمل الماء وتسكبه على الخيل.. وانا واقف صامت.. كالفزاعه..!
وكأني اعتدت اختلاس النظر لها..بالخفاء*

بعد تردد قال:
صبحها بالخير..
التفتت بسرعه عليه.. طالعته بدهشة.. وعدم استيعاب..
وجوده غير متوقع..
ولا المكان ولا الزمان مناسب..
رمت السطل من يدها...
واختفت بسرعه داخل الاسطبل..

راح لحقها وقبل يدخل.. زينه:
تكفى.. لا..
نواف:زينه.. تراك زوجتي.. الى متى بتتهربين..
بتوسل:
طيب انا ماقلت شي.. خلاص روح.. وانا ارتب نفسي.. واجي..
نواف بتسلية:
طيب انا حبكت ابي اشوفك ذا الحين..

قال كذا وهو يدخل..
وهي لاصقه في الجدار.. وماسكه البدي.. جهة صدرها رافعته..
نواف بخفوت:
زينه..ابوي.. تراي طاق الدرب وجاي.. ومتشفق لشوفك..
رفعت راسها.. لما حست بقربه..
وقائمة التشغيل بالجوال تشتغل.. على تنويعات زينه.. في الشيلات والاغاني..
بدت اغنية (من عذابي.. قلت لعيونك هلا..) ..

زينه سبت الاغنية.. والسماعة.. وعبادي.. ونظرة نواف وابتسامته الخبيثه..
قال:انا اشهد ان عبادي جابها على الجرح..

طبعا ً..
زينه ماتدري وش خفايا قلبه.. ولا حبه.. ولاتدري.. ان هذي مو المره الاولى اللي يشوفها فيها..
وان نواف وهو يشوف عيونها من هالقرب..
ذاب وضاعت علومه..

حط كفه على الجدار..
وحكرها وقال:والله هالشعراء.. لاقالوا هالكلام.. ماينلامون..
زينه.. تمر من تحت ذراعه وتقول:
تافهين..وفي كل وادي يهيمون..

وحسب ضنها.. ان نواف.. فقط يبي يستفيد من الوضع.. ويستقل هالزواج..
رفع حواجبه وابتسم
وهو يطلع لها..
وهي تتوجه للسماعه وتطفيها.. ولاحظها كيف تنزل بلوزتها.. وتسحب ايشارب من السور.. وتلفه برقبتها..
قال:ليه ماتبين تتواصلين معي..؟!
راحت تجمع الاغراض اللي تغسل فيها:
ماطلعت شريحه.. هاك الشريحه خذها مني بوفارس..
نواف:واذا صعبه انك تطلعين شريحه ثانية.. وقت اتصل على جوال مهره.. واطلبك.. وشهولا.. ماتكلمين..
حطت الشغلات محلها.. واللتفتت وتكلمت:
نواف..!.. انا اقدر لك اللي سويته.. ووقفتك.. بس انا مارضى انك تنجبر علي.. كيف اوضح لك.. يعني بوفارس راح تصرف.. واحنا اضطرينا نسايره.. وهوبا.. صرنا زوجين.. غلط.. وانت بطيب اصلك.. جاي تبي تحسسني.. انو احنا بنقدر نتخطى هالشي.. ونبتدي مع بعض.. ونعيش فترة خطوبة.. وزواج تقليدي.. واحترام منك.. وود مني.. وتقض البصر انو انا مطلقه.. ونروح نكمل شي بدايته اصلا خطأ..وبينتهي بخطأ..

عقد حواجبه.. :وين الخطأ بزواجنا..؟!
زينه بانفعال:كله خطأ... انت تزهلت.. وانا تممت.. وكل بسبايب.. الكلب عبد الإله.. الله لايحله..
نواف بخفوت حازم:
لاعاد يمر اسمه على لسانك ممكن..؟!
زينه بعصبيه وتهكم:
شفت صعب.. صعب.. انك بتتعايش معي وانا سبق وكنت زوجه لغيرك.. يعني ممكن تتقبلها.. لو كنت ارمل ولامطلق..ممكن..!

وراحت ضربت الحصان بشويش.. عشان يدخل الاسطبل..
راقبها.. وهي تمشيه.. وتفتح له مكانه.. وتطلع اصوات من فمها..
والحصان مطاوعها..
وراحت شالت كمية علف.. وحطتها.. وقفلت عليه..
وهو مستمتع في تأملها وتحركاتها..
لو بيتكلم اللحين.. ويقول عن مشاعره.. قبل.. بتكذبه..
وبعدين ماعنده مشاكل.. حبه حبه مع زينه..

طالعته:
سكت.. ماعجبك الكلام..
نواف :لا بس اسمع لك.. انا مايهمني.. ان كان في شخص قبلي كان زوجك.. واثق بنفسي.. واني لااقارن بذاك السفيه.. بس عشانك انتي.. يعني عبدالإله واللي اعرفه تجاوز حدوده بشكل معك.. ماهو الشخص اللي ذكره على لسانك يحرك غيره بنفسي..انا امنعك عشانه شخص ماضي.. وانتهى.. وذكره يضيق صدرك انتي ولا انا غلطان..

زينه تركت لنفسها المجال.. في النظر لوجه نواف.. واسلوبه في الكلام.. وصوته الرجولي..
ماادري ليه تذكرت.. يوم اقنع مهره على عساف.. وكيف كنت اعلق على وسامته..
يوم اعجبني عساف شكلا ً..
ماكنت متوقعه اني برتبط بإنسان ذات شكله.. بس باخلاق.. اجمل..!
وانا اتأمل طول نواف.. وتقاسيمه.. طرى علي عبد الإله.. وصلعته.. دوم يحلق زيرو ولا نمره واحد.. ..
دقن نواف.. وشنباته..
طرى علي عبدالاله وشنبه وكيف مايربي دقن لانها تطلع كلها فراغات..وماظل زيت حشيش.. وثوم مافركه.. عشان تنبت كامله.. ومانفع..
فكان كل يوم يحك وجه بالموس ومخلي شنبه نفس الحشاشين..
زول نواف خفيف.. وجوده مريح.. عكس عبدالاله وملاغته.. كنت اكش منه وماحب حتى يناظرني..!!
يعني..
مالومه وهو يتبجح وواثق من نفسه..!
اللحين وش جاب هالرزه..
للمختل عبد الاله..

شارده في وجهه..
ونواف ابتسم :ترى لاناظرتيني اكثر.. ببوسك..

نفضت راسها.. وشالت جوالها والسماعه.. :
انا بروح اتروش..
مشى معها:تمام.. بس انتبهي.. سيف جالس بره مع مهره والجده..
قربو من مبنى البيت.. قالت:
خلاص.. روح عندهم انا بدخل من الباب ورى..
نواف مسك ذراعها:انتظرك..
سكتت شوي.. وهزت راسها ايجاب:
ماشي..
وتركته وراحت..

‏خلي عيوني في عيونك تسلّى
‏ يا من يعد الحسن منها و اليها

‏ما تل قلبي من عراويه الا
‏عيونك اللي يا ماشاء الله عليها
..........
هادي بعصبية بالجوال:وعمي راسلك هالاحداث والتفاصيل.. علك تحنين وترجعين.. وانتي ماكلفتي نفسك وقلتي له انك والد وجبتي له حفيد جديد..

جمان بانفعال:هادي..!
هادي بانفعال:وش جمان.. وش.. والله لو ادري.. انك بطولينها كذا ان كان ماطاوعتك.. خلاص ولدتي.. قولي لعمي اقلها.. وعلميه مكانك..

جمان :بيجي وبيجيب شاهين.. وبيسعى يصالحنا.. وانا والله مابعد الحب اللي في راسي انطحن.. مابعد رضيت ياهادي..
هادي بعصبية:وعمرك ماراح ترضين.. تصدقين.. طيعي خيك وروحي تعالجي.. البلااا اللي فيك ماهو زعل وشيلة خاطر.. انتي شكلك نفستي.. وقريب تجنين..
جمان :شكرا ً على هالكلام الجارح.. ماهقيتها منك تعايرني ياهادي.. وانا اللي عريت جروحي عندك..
هادي بانفعال:سايرتك.. ودعمتك.. بس بناتك ياجمان.. بعيونهم غصه تذبح..
جمان تتهرب:فهد يبكي بقفل..

وسكرت..
هادي تعب من جمان وعنادها.. ومهددته لو نكبها وقال شي.. بتغير مكانها حتى هو مايدري وين تروح..
فاتح صفحة الاسماء.. وصبعه على اسم شاهين.. متردد..
ومشكلته.. الوعد والحلف..
جمان ما أمنته الا انها عارفه.. الامانه اللي عنده.. وانه مستحيل ينكبها..!
رمى الجوال ع الطاوله: اف جمان.. اف..!
*****


دخل مشاري غرفة سما..
تكتف.. ويراقب البوكسات.. والالعاب.. والغرفه.. اللي جهزت فيها جهه لسيف.. وواقفه على كرسي تعلق فريمات طفولية..
مع نزولها من الكرسي.. انتبهت له.. ببتسامه وحماس:
وش رايك مشاري.. حلو مكان الفريمات كذا..
ابتسم..
وهو يدخل..:
حلوه بس لو فيها صور احلى..
قالت:
لمن يجي عندي سيف.. وبسوي لنا صور سوا.. واحطها فيهم
مشاري.. موجعه قلبه على حماسها..
وخايف من النكسه اللي ممكن تصير لها.. لو مر الوقت اللي متفقين عليه.. ورجعوا سيف..
مسك كتوفها:
سما حبيبي.. بس لازم يكون عندك تقبل.. سيف ماراح يكون زي ماتبين.. يعني يمكن يعذبك.. لانو متعلق باهله..
ارتبكت.. واسحبت نفسها من يدينه.. :
انا بعلقه فيني.. انا امه.. بيحبني على طول وبتشوف.. اصلا ً احنا نحب بعض.. ولانسيت..

ليان جات وهي تنادي مشاري.. قال:
تعالي انا هنا..
دخلت.. وارتفعت حواجبها.. :
اففف يالحماس.. وش سويتي.. حسيت اني داخله بفرع لماماز باباز..
سما تشيل العلب.. :
ايه كلها تجهيزات عشان ولدي حبيبي..
ليان مدت شفتها.. وتوها بتعلق..
مشاري مسك ذراعها :
وش فيك تنادين..!
عطته اوراق.. :
هذي اوراق عطاني اياها ماجد.. من ابوه.. وصلها لابوي.. اذا بتشوفه..
خذها وطلع: تمام..
تلفتت ليان حولها.. وطاحت عينها.. على الملابس.. والماركات..
سما متسوقه.. حق امير صغير..
كل فلوسها حطتها بهالتجهيزات..
لسيف اللي مابعد جاا عندها.. شالت بدلة رسمية.. وشافت السعر:
سما لاتبالغين..
خذتها منها:حبيت اشوفها على سيف..
ليان وكاسره خاطرها سما:
اوك.. بس يمكن يتضايق.. مع الجاكت.. هذا قصدي.. خاصه صيف..
سما:
البدلة صيفية.. بس خذتها.. حق مناسبة او شي.
ليان تنهدت.. وابتسمت..:
والله حتى انا تحمست.. لولدك..
سما بحماس:
جد ليان..؟!
بحنية:
ايه جد.. ترى انا خالته.. ولاانتي نسيتي..!
ضمتها سما:
يارب يجي وننبسط معه..

******


زينه بعد ماتروشت ولبست جلست في الصاله.. وهم بره..!
تحججت داخل نفسها.. ان سيف بره..
ومهره مسوية فطور ..يفطرون..
فظلت تطقطق بالجوال على النت..!.
انفتح الباب.. وكان وراها مو بنطاق رؤيتها.. فكرتها عايشه..
مرتخية على الكنب ورافعه رجولها على الطاوله اللي قدامها...

نواف.. انتظرها تنتبه له.. ويوم مالتفتت.. قال :
قومي البسي عباتك بنطلع اشوي..
استعدلت بسرعة والتفتت :
هاا.. وش.. نطلع.. وين.. جدتي ماترضى..
رفع حاجب:
جدتك راضيه سئلتها قبل اجيك..
زينه تضب شعرها بربطه:
طيب ليش نطلع..
نواف: بنشري خبز من البقاله..
زينه بغباء: اما خلص.. تونا شارين.. لحظه اشوف الفريز..
وتوها بتروح.. :
تعالي.. بنت.. امزح..
زينه واصلا مربكها وجوده:
الله يهديك..
ورجعت بتقعد..
قال لها: قومي البسي عبايتك.. والله بطلع معك شوي..
طالعته بتردد..
سحبها قومها :
وش فيك مبلمه.. يلا..

بعد شوي..
طلعت.. وكان نواف ينتظرها جنب سيارته.. فتح لها الباب..
وزينه.. طالعته.. بعدين ركبت وسكر..
توترت اعصابها..
وعقلها يقارن ويقارن..
جا جنبها..
قال:نورتي سيارتنا يالزينه..
ابلعت ريقها :
نورك..
ابتسم وحرك.. ماعلق على نقابها.. ماقال غطي عيونك.. ماقال لها موشح ان ستر الحرمه بعباة الراس..
فتح جواله وحطه على اليوتيوب وعطاها اياه :
اطربينا على ذوقك.. الجوال مشبوك على مسجل السياره..
زينه:لاا.. ماعليش..مافي شي جاي في بالي..
زينه في بالها.. (لااوفر.. وبيعطيني جواله وهو مفتوح.. تعال ياعبد الاله يابو رموز وقفول)..
نواف :تسمعين لخالد عبد الرحمن..
زينه:ومن مايسمع لمخاوي الليل..
نواف شغل (رعش قلبي)..

وكل شوي يختلس النظر لعيونها.. اللي تطالع كل شي الا اهو.. كيف مبين خجلانه منه..
قصر الصوت :
قولي لي.. وش ودك نسوي عرس كبير.. ولامختصر.. ولا ودك نسافر..
زينه:عرس..!!. من جدك..
نواف:ايه.. وكل شي خاطرك فيه يصير..
زينه: خلينا مانسبق الاحداث.. يعني يمكن مانكمل وكذا..
رفع حاجب:مانكمل..!.. كيف.. يعني.. زينه لايكون انتي مفكره بعد ماصرتي لي بطلقك..

مربكها حماس نواف.. ومستغربه..!
ولاتبي تكون سلبيه معه..
يعني حتى مربكها ان امه مادرت الا بعدين..واللي صار بينهم اتصال وباركت ورحبت.. بس يمكن.. ماهي راضيه..
اكيد ماترضى..
ولدها.. ماتزوج قبل.. وزين وعلم ومركز..
وياخذني انا مطلقه..
قطع صمتها:
زينه..!
التفتت عليه بسرعه :ارحب..
نواف التفت عليها.. ياخي.. وش ذا.. وش هالشعور..
هو اللي ارتبك هالمره.. وتنحنح.. :
لابس.. قلت..نتخطى التفكير بالحفل.. ونخطط على شهر العسل.. وش تحبين.. اوروبا.. ولاشرق اسيا..
زينه لااا.. لاا..اوروبا مره وحده..وعبدالإله.. خذني جده في عز الحر والرطوبة..وظل يعشمني بيوديني مصر.. وتطلقنا قبل نروحها..

اطلقت ضحكه صافيه..
ونواف مستمتع بمد متسائل.. :اييييييه..!
زينه:فاجآتني صراحه بالشطحه..
نواف:ليه..؟!
زينه:طبعا ً نواف.. اهنيك على مواكبة الحدث.. وانك معطي جو.. للوضع الغريب اللي احنا فيه.. وفوقه تتكلم عن شهر عسل مخملي.. اوروبا اجل..؟!!

نواف :ورويسك الغالي..لاقعد معك بارياف انترلاكن.. ونتقهوا في هبات نسيمها.. ولامشيك في النرويج.. وتشبرينها.. والله لااوكلك من باستة الطليان.. واذوقك روتية فرنسا.. وش تامرين بعد فيه..

*لكم ان تتخيلوا.. اني انا تنهال علي كل هذه الوعود.. بعد جفاف عبدالاله.. نواف حلم جميل.. لكني.. فقط.. حذره.. من كل هذا الحماس.. وواجمه امام.. موجات جميلة.. لم تكن تستقطبني.. *
قربوا من نقطة تفتيش.. .. وقال:
قفلي حزامك..

*كنت مفهيه بافكاري.. مديت يدي بسحبه.. ومادري ماعرفت.. ماكنت مركزه.. نواف يميل بجذعه.. ويسحب الحزام بخفه ويقفله.. ويستعدل..

قلبي يرقع من تلامس جسدينا.. اخفيت اناملي حتى لايلمح رجفتي الغبية..
لاحظته كيف يكلم العسكري بأدب.. وينهي الحوار.. بعساكم ع القوة..

عبدالاله يلعن ويشتم.. مع انه معلم.. حتى لو ماعطوه مخالفة..
كذا عاده.. يشتم اللي في الاشارات.. الماره... البلديين.... لسانه زفر وبذيئ..

ولاستغرابي..
نواف كان ماخذني.. اطلع شريحة باسمي.. ودخلني الفرع.. والوضع كان عادي وانا امشي جنبه.. مع ان في موظفين وعملاء..

كان يضحك مع الموظف.. ويسئلني .. وانا ارد.. ويخيرني في الارقام.. والموظف يأشر على واحد..(ذا مميز) ..
نواف يشوفه.. ويقول :تحبين الاصفار..
زينه:عادي..!.
خذ مني بطاقتي الاحوال.. وعطاها للموظف..بدون مايغطي صورتي..
وبصراحه انفجعت..
عبدالاله.. كان مسكر صورتي بالبطاقه.. بقصاصة نوته.. ومايسلمها لاحد.. الا وصبعه ع الصوره..
انا لو بتخرفن..
من هالتناقض الرهيب..!.

رجعنا السياره..
ونواف مشتط يركب لي الشريحه.. بعدها سجل رقمه..وبادل الارقام.. وسجل اسمه بجوالي.. (حبيبي وجنبه قلب احمر) .. وضحك وهو يحط قلب فيه سهم..!
زينه:ايش حركات المراهقين هذي..!
وتوها بتاخذه سحبه.. :
ماتغيرينه..!
زينه:اصلا ً مو حلوو.. بطلع كذابه..
نواف مروق :طيب بيجي الليوم و بيصير صدق..
زينه:طيب عطني الجوال..
نواف:وعد..!
زينه:تمام..

اكملنا مشاوير صغيره..
اشترى نواف ايسكريم..وقفنا على جنب ناكله.. وخلاني افتح وجهي عشان ماعدم النقاب..!
خذني لماركت..
وظل يشري شغلات ويسئلني وش احب..
يعني باختصار..
كان نواف بس يبي يقضي الوقت معي..
قعدت اطالع العربه.. ملاها.. شبسات.. مكسرات.. كافيات.. كان واقف ينتظر دوره في المحاسبه.. ويشيل.. شوكلت وام اند امز.. مالتيز.. ويحطه.. خذ حتى بطاريات للرموت.. ومادري ليش.. بس كذا.. خذهم..!!

ابتسمت لاارادي وانا اتأمل نواف.. وكياتة نواف.. وحلاوة نواف..
الا اني حذره.. وخايفه من البدايات..!
.........
بعد كم يوم..
اليوم سيف ونواف بيفتحون الموضوع للعايله.. بعد ماحاولوا يستبعدون اليوم هذا..!!
بس بكره بيوصلون وليد ومشاري.. عشان ياخذون سيف لسما..

وليد دخله سيف بالصوره وعلمه كلشي.. واصر عليه يجي.. عشان يكون مع سيف.. خطوة بخطوة..
❤️

لان هو ماراح يقدر يروح ولايبي مهره تروح هالفترة..
لأن لو كانت موجوده مستحيل سيف بيعطي سما امه وجه.. ولاحتى بيظل عندها..!

نواف علم بلقيس كلشي و انصدمت وبغت تموت من صياح..!
بس قال لها لانه يبيها تطلع مع مهره لاي عذر من البيت.. وماتكون موجوده وقت اللي بيقولون السالفه..
لسعود وموضي..
لانهم خايفين من اي ردة فعل عكسية.. اول يوضحون كلشي..
تالي تجي مهره ويقولون لها..
لأن سيف مستحيل بيقدر يفشي اسرارها.. وهو يطالع عيونها..
هي بتنهار وتسكته..!
مايبيها تنجرح.. مايبي يأذيها.. بس كل شي بدون ارادته..!!

كانت في السياره.. مع السواق وبلقيس.. وسيف الصغير..
مهره باستغراب:
مادري وضعك غريب يابلقيس..
بلقيس شارده:هاا.. ليش..!
مهره:يعني الطلعه مالها داعي كلها.. وانتي مفهية بالسوق.. وبس اتصل نواف.. قلتي بنرجع..
بلقيس: طيب وش فيها.. تنفسنا شوي..
مهره بشك :لايكون امي الى الان ماهي راضية على ملكة نواف وزينه.. وهم يقنعونها ومايبوني اكون موجوده..
بلقيس ابتسمت بحنيه:
والله يامهره انها راضيه.. وامس رايحه شارية الشبكه لزينه.. وانا صادقه معك.. هي في البداية.. ردة فعلها غريبه شوي.. بس متوقعه.. لكن الحين وربي الأرض مب شايلتها بعد ماستوعبت ان نواف اخيراً ملك.. وان زوجته بنت ناس وكفو..
تنهدت مهره: الحمدلله.. بس وش فيهم.. سيف بعد اليوم.. ماهو عاجبني.. مادري.. مادري بلقيس.. قلبي قارصني..
بلقيس.. شوي بتبكي وهي تطالع سيف لاصق في مهره ويلعب بجوالها.. ومهره كيف حاسه ان في شي..
ربتت على يدها : مافيه الا الخير فديتك...!
......
وصلنا..
مادري احساسي غريب.. وعيوني ضايعه..وضعي اليوم.. مثل يوم وفاة ابوي..
كنت اقول لجديده.. قلبي كأنه يتفتت ولا أدري ليش..!
اليوم قلبي يتفتت وذايب ولا آدري ليش..
دخلت مع بلقيس..
كانوا في الصاله..
ضغطت على يد سيف ولدي بقوه..
وانا اشوف وجوه واجمه..
ودموع ..
في عيون امي موضي..
تحاول تخفيها..!

فارس.. ناظرني وحاول يبتسم.. بس عيونه غاصه بدمعه..
قربت منهم.. وبصوت يالله طلع:وش فيكم..؟!.. اهلي فيهم شي.. جمان.. فيها شي.. امي وش فيك..؟!
امي نزلت عينها لسيف الصغير.. وارفعتها لي.. ودمعتها نفرت مع الكحل..!
مهره بعصبية :
سيف وش فيكم.. يبه.. بلقيس.. انتي ماطلعتيني هالطلعه.. الا فيكم شي.. جديده فيها شي..

سيف قام خذها.. وقال :كلهم مافيهم الا العافيه.. في سالفة صارت تخصنا هنا في البيت.. تطمني الكل سليم.. وماحد مات ولاشي.. وش فيك شطحتي الله يهديك..

جلسها وجثى قدامها ومسك يدها وغمز لبلقيس عشان تبعد سيف.. وتشغله عن الأجواء..
بس شافت بلقيس انسحبت بسيف..تمسكت بمعصمه بقوه.. وبانفعال:
قلت لهم عن سيف صح.. قلت لهم..
سعود:اهدي يايبه..
مهره طلعت عروقها من جبينها.. والدموع تنحشر في عيونها وبانفعال:يالخااااااااين.. انت وعدتني..
سيف نزل عيونه.. وماعرف يتكلم..
رفعت عيونها لنواف وبكى وصياح:
نواف ليش ماسكته.. ليش خليته يقول.. مو انت وعدتني بعد وقلت هالشي بينا بس..

وقامت وقفت قدام سعود وبانهيار:
والله ولدي يبه.. لاتصدق هالاثنين.. يمه لاتصدقينهم.. يرضيك يقولون عنه هالحكي.. يرضيك يطلعون سيف ولد حرام..
ضربت رجلها في الارض:
ولد حلااال.. انا جبته.. ابوه عساف وانا امه..
موضي قامت لها مسكت وجهها ومسحت دموعها:
ولدك يايمه ويخسي حد يقول غير هالحكي.. اهدي.. وخافي على اللي في بطنك..
مهره بانهيار :
ليش يقوول.. ليش يخليكم تشوفون سيف بهالصورة.. ماله ذنب اذا ابوه غلط... عساف نظف فعلته فيني.. وانا قبلت.. سيف ولدي انا..

بكت وهي تجلس على الارض وتمسك صدرها وبمرار :
والله يايمه اني رضعته من صدري.. امه.. ان كنت ماولدته.. امه من الرضاع.. ماكذبت عليكم.. والله..
وحطت يديها على وجهها وتبكي..

سيف.. جلس قدامها.. بعد كفوفها عن وجهها :
مهره ركزي.. ماحد معترض.. فهمي الموضوع.. وليش فتحناه.. سيف ولد حلال.. مو نتيجة خربطه من عساف..
طالعته بصدمه..
وعيونها تهل دموع :
كيف يعني.. مافهمت..وش قصدك..
سيف بلع ريقه.. :
شفتي واحنا بلندن كيف جاك هاجس ان سما.. ام سيف.. لانها تحب عساف.. هو.. صدق.. سما امه.. ومو حرام.. عساف كان متزوجها.. وفي عقد في الموضوع....
وراح يكمل لها السالفه.. بالتفصيل.. وش بيسونه الحين..!!

*كانت الكلمات تخرج.. من فمه.. وتدخل الى اذني كالحديد المذاب..!
كيف تخرج سما وتطالب بابني..
كيف اعطي لابني لمرأه لااعرفها..
انا حتى الخادمه لااسمح لها ان تغسل يديه او فمه..
كيف يقنعني.. ببساطه انها شهران وسيعيده..!..
كيف يطلبون مني..
نزع قلبي وابعاده عني..!
كيف يكون الصبح صبحا ً.. وكيف يكون الليل ليلا ً.. الا بسيفي الصغير..
ستختل الدنيا والموازين..*

دفته بقوه من صدره:
والله ماتاخذه.. والله ماعطيها اياه..
سيف مسك يديها بقوه :
مهره.. قانونياً تقدر تاخذه.. ولو صار تحاليل واثبات نسب.. بتروحين في ستين داهية.. وعساف اللي سوا السالفه ماهو فيه عشان يشهد.. خوفي عليك والله...ولا والله ماخليها تشمه..

صاحت فيه :
شهالجوووور.. شهالظلم.. هي ماتبيه.. ماكنت اعرفها بس عساف كان يقول امه ماتبيه.. كانت تبيه يموت.. ليش تجي الحين تطالب فيه..
سعود بحنيه ووجع:
صلي على النبي يابوي.. تجزلي وصبري.. ويرجع لك.. كلنا معك..هي فترة امه ولها حق لانصير ظالمين.. فوق ظلم عساف.. ويتعذب بقبره..
نواف :
والله لو علينا.. ماحد ياخذه يامهره.. ماحد له حق فيه غيرك.. بس مايرضينا.. يضيع عمرك بسجن ومحاكم وقضايا.. وراجح واصل.. لو بغى يعقدها عقدها..

مهره قامت وطاحت عند حضن موضي:
يمه.. هم رجال مايفهمون.. انتي ام.. هاللحين فارس ماولدتيه.. بس ولدك.. يرضيك.. احد يشلعه منك وياخذه..
موضي باست راسها وهي تبكي معها:
بس يايمه لايجيك شي..
مهره ببكى يقطع القلب :
اذا هي انوجعت فاطلق.. انا اوجعني عساف.. اضعاف الطلق..
مدت كفوفها.. لموضي:
شوفي حروق زقايره.. في يديني عشان اسكت..
جسمي يمه.. كله اثر ضربه عشان اسكت.. انا كنت اطلق تسع شهور كامله.. انا ولدته من كرب وضيق.. ووحده..
كانت ترتجف وهي تتوسل وتبكي:
عساف عطاني اياه.. وقال لك.. قال ماحد ياخذه.. مسح على قلبي به..كافئني على صبري ابه..
صاحت مهره بقووه:
ابوووه عطاني ايااااه.. مالكم حق تاخذونه مني..
مالكم حق...
ضمتها مووضي وانهارت:
خاااافووووو الله... ياسعود شووفو حل.. آااااااه ياظلمكم ياعيالي وجوركم.. الله وكبر عليكم .. الله وكبر.. الله يحلك ياعساف.. ويبرد عليك.. الله يحلك ياعساف ويبرد عليك....


مهره كانت تبكي بصوت عالي.. مكتوم في صدر موضي..
تمسكت فيها وخايفه يجيها شي..
الكل.. منجمر..
فارس نزلت دموعه..
هو من سيف اللي تعلق فيه وبيروح..
ولامن مهره وانهيارها اللي يقطع القلب..

لحظة صمت.. وغصه..
ونحيب مهره..!
ذبحهم مره وحده..!
.....
بعد شوي..
وفي الدور الثالث..
بعد ماصعدت.. مهره لمكتب سيف وقفلت الباب..
انزوت على نفسها.. ماراحت لسيف..الصغير.. حست في لحظة غريبه..
ان سيف عقوبة..!!
كأن كل شي مؤلم هو.. حبته لحد العذاب.. دخل حياتها بوجع..
كان العثره قدام حبها وزوجها..!
انضربت عشانه..تزوجت عمه عشانه.. انطعن شرفها عشانه..
مهدده قانونيا ً وبالسجن عشانه..!.
مسكت بطنها..
من شدة الحزن الحين.. ممكن تفقد جنينها عشانه..!!!

ضمت ركبها بقوه وهي على الاريكه الوحيده في المكتب..
خبت وجهها..
وبكت بكت.. حد الجزع..!

سيف يضرب الباب :مهره افتحي..
مهره :سيف الله يخليك.. والله ابي اظل الحالي..
بخفوت:بس اشوفك.. مهره ابوي.. اوعدك هالشهرين بس.. اتفاقي معهم كذا..
مهره.. وفي داخلها.. ان تعلقت فيه امه ماراح ترجعه.. وان طلعت اوراق اثبات بتاخذه..
سيفي لي..
لي انا..
الكلام ماطلع من شفايفها.. بس صاحت بانفعال:
خلاص سيف.. اذا تحبني خلني اشوي.. والله ابي استوعب.. تعبانه سيف تعبانه..
سيف موجوع:
ياروح سيف وعيونه.. بسم الله عليك من التعب والوجع..
ضمت نفسها.. وبكت..
وسيف يسمعها..
اسند جبينه على الباب..

عزيّ للي جور الزمن عقد حجاجه
‏انبرى حالـ?'ه عقب ماهوب ضحُوك .
............

يتبع ....

[ايمان يوسف.]

..........
(نواف)...

حجم الضيق في صدري لايرحم..
خرجت..
وصوت مهره يطرق اذني.. نحيبها.. والظلم.. اللذي وقع عليها..
وكأني عساف..
وكل ذنوبي تفترسني..
لاادري..
لكن كاتوارد الارواح.. شعرت اني اختنق.. ومهره ترخي كفوفها.. تمدها.. بأثر جوري بها وسخطي..!

فتح ازرار ثوبه.. ودلك رقبته.. من زمان ماجاله هالشعور..
نفس الانفصام..
وكأن عساف يدخل جواته ويصير هوو..
مسك علبة مويه شرب منها.. وكبها على راسه.. ووجهه..
وهو يسوق..
ونحيب مهره وهي تردد كلماتها.. بأحقيتها بسيف.. تعرية اللي جاها منه وصار..!!

قام يردد:اللهم اني اعيذ عساف.. من ظلمه.. اللهم اني اعيذ عساف.. من سخط مهره.. ووجع قلبها.. الله يرحمك.. الله يبرد عليك..

وجدت نفسي.. عند الصرافه.. اسحب مبلغ.. واخر..
ذهبت الى حي فقير.. طرقت الابواب.. وزعت الصدقات عن روح عساف..
كنت بضعفي اطلب من هذه الارمله دعوه له.. ومن هؤلاء الايتام.. ان يقولو الله يرحم اخوك.. ومن هذا المُسن..
ان يترحم عليه.. بعدد حبات سبحة يده الألفية.. زدت المبلغ في حجره.. عله يصدق ويترحم بهذا العدد..!!

خرجت.. وقد ضاقت فلا تفرج..
امي قلبها كرب.. ومهره تسخط عليه بظلمه لها.. وسما انظلمت.. ونزع ورعها منها..
وقفت بشيشة بنزين..
عطيت العامل مبلغ يوازي راتبه..
فكرني غلطان..
رجعها..
قلت له برجا :هذا لك.. سوي دعاء.. اخو انا موت..

كم نصبح ضعاف.. ونلجئ لهم.. للفقراء والمساكين.. نجد سلوتنا في عطاءهم.. نطبطب على يأسنا بالإحسان اليهم..
ذهبت واشتريت عدد من كراتين المياه.. وضعتها امام باب مسجد مغلق.. فالوقت يقترب من منتصف الليل..
كنت اصارع.. دعوة المظلوم على عساف..
باغداق الصدقات عن روحه..!
مهما كان ظالم..
عساف نصف روحي..
لا اقوى ان يتعذب..!!

سلكت درب طويل..
لا أدري..
كيف وجدت نفسي.. على طريق زينه.. دون ان اتصل.. او ارسل شيء..!
.........
سيف بعناد يمسك بدلته:
ماما لبسني بجامة ميمه.. وخري..
بلقيس :
ماما نامت.. يلا سيف حبيبي.. لاتعاند..
دخل فارس الغرفه.. بعد ماكان فوق وحاول في مهره تفتح وتكلمه.. ولاقدر..!

شاف سيف كيف معاند.. ومجنن بلقيس..
تنهد :
سيف وراه.. لاتصير بزر..
تكتف بعناد:
ليش ماما.. راحت.. ليش ماتبي لبسني.. انا اقول ميمة.. ناديها.. ماتروح..
بلقيس بتعب.. وقفت.. وتكلمت مع فارس :
جنني.. يبي امه.. والمفروض ينام خلاص.. لاراضي يدخل الحمام ولايبدل..
فارس بخفوت:
بالله.. كيف سما النفسية بتتعامل معه..
بلقيس بعصبية وخفوت:
عيب فارس..
فارس بعصبية:
نفسية ومجنونة.. وماتصلح انها تكون امه.. يلعنها من وين طلعت ذي..
سيف يطالعه.. بقلق ومو فاهم..
فارس سحب البجامه من يد بلقيس :
خلاص اطلعي انا اعرف له..
بلقيس :
مادخل الحمام..
فارس :اوك ادخله..
طلعت.. فارس جلس على سريره.. وشرد.. ومغبون.. مقهور.
يتخيل مهره..!
قصتها..
معقول عساف سوا كل ذا..
ايش هالاجرام..
كيف عساف توأم نواف..!
مسك راسه بقوه.. ضربها وحرقها.. مهره.. ياحيوان مهره..!
ابوه قال تفاصيل.. موجعه..!
ابوه ونواف.. ظلموها بعد.. قبل مايكتشفون هالحقيقه..
اللتفت ولقى سيف رافع عيونه الكبار ويطالعه.. بصمت..
تنهد:ليش ماخليت بلقيس تبدلك..؟!
هز كتوفه:
ابي ماما.. بعدين نونو جديد ياخذ ماما.. انا لوحي..
سيف بغصه:
من قال تخليك بروحك..بس تعبانه ونامت.. خلك رجال وخليني اساعدك.. عشان بكره ماما تنبسط..
قرب وحط يده على ركبته:فالس افيك _(شفيك)
قام :مافيني شي..
بعد شوي كان فارس خذه الحمام.. وضبطه.. وجالس يلبسه بجامته.. وهو جالس يمه على سريره.. وبس لبسه بلوزته..
راح سيف ضمه بقوه..وارخى راسه على كتفه..
ضمه فارس..
سيف قلبه يرجف.. وكنه حاس باللي قاعد يصير..
ضل متعلبك برقبة فارس..
ربت على ظهره.. وداعب شعره.. وسيف يتحرك بوتيرة التهويدة..
لمن خدر ونام..
فارس ظل ضامه..!
كيف يعني..
كيف ياخذونك..
سيف الصغيرون حقي..!!
..........
وصل عند المزرعه.. طالع الساعه قريب من الثنتين..
نفخ واسند راسه على الدركسون..
علاقته بزينه سطحية..
هي ماعندها لهفه ولاحماس..
مر كم يوم من جاها هاك اليوم..
مابينهم الامكالمات قصيرة..
بس في هالوقت والضيقه يبيها هي.. يبي يشوفها..!
اتصل عليها.. ماردت.. كرر الاتصال.. وردت وشكلها نايمه:
هلاا..
ماتكلم..
طالعت الشاشه.. ورجعت الجوال لاذنها:
نواف..الوو..!
بهمس:آسف.. ازعجتك..
زينه :ولاازعاج ولاشي.. فقدت اتصالك اليوم.. ترى جد..
ابتسم وطلعت ابتسامته حزينه:
ويوم انك فقدتيني.. ورى مادقيتي..
زينه ذراعها على عيونها وبصوتها الناعس:
امممم.. لسى ماعرف اتصل عليك.. بس يعني تعودت على مكالمتك وصوتك..
بصوته الخافت:كويس.. تقدمنا شوي.. ع الاقل تعودتي على صوتي.. نقطه..
بتسائل قلق:نواف فيك شي...؟!
سكت شوي..
وبخفوت قال:زينه.. انا عند الباب....
استعدلت بسرعه :
ايييييش..؟!
قال:متضايق شوي.. وماجا في بالي الا انتي.. اما انك تفتحين.. ولا اعود..!
قامت بسرعه.. وطلعت من الغرفه :
وش تعود.. انتظر.. بفتح..
سمعها وهي تفتح قفول الباب الداخلي.. ونزل ينتظرها عند البوابه..
زينه تسرع في الظلام.. ناحية الباب..
قفلت الجوال..
وهي تقول: نواف..
رد:يلا افتحي..
شغلت لمبه..
افتحت القفل بصعوبة..بعد ضربتين برجلها للباب..
دف الباب ودخل..
طالعت شكله المرهق.. وازراره المفتوحه.. بقلق:
خوفتني نواف وش فيك..
فاجأها يوم ضمها.. وارخى راسه على كتفها :
خايف زينه.. خايف..
بتردد رفعت كفوفها.. وضمته:
وش منه خايف.. بسم الله حولك وحواليك..
همس عند اذنها :
الحين لو خفنا على ميت من عذاب الله وش نسوي..
زينه:ندعي له.. نتصدق عنه.. من اللي مخوفك حسابه يانواف..
حسته ضمها بقوه وتنهد بحرارة..
*نواف بحاجتي انا..
لجئ لحضني انا.. صورته الان تخلو.. من اي تظاهر.. وشكليات.. ومحاولات..
لاادري.. لكني ارى نواف بدون اعتقادتي.. عن تقربه..!
او تظاهره.. بالاقدام في علاقتنا..!
ضممته بدوري. اكثر.. مسحت على راسه.. وهمست :خلينا نروح الليوان.. ونسولف.. تمام...؟!..
وخر راسه :تمام..
وباس جبينها..

مشى معها.. لمن الليوان.. دخلت وشغلت النور..وقالت :حياك..
جلس.. رفع عيونه لها وهي تشغل التكيف..
انتبه انها لابسه قميص كات ميد.. وشعرها مفتوح..
وجهها ولانتفة مكياج..
التفتت :دقايق اسوي لنا شاي واجي..
وابتسمت..
*فكانت ابتسامتها مطمئنة لقلبي المعتل اليوم *
....
طلعت مهره من المكتب.. بعد ساعات..
البيت ساكن.. وهادي.. بعد ماقامت فيه القيامه قبل شوي..!.
ساكن.. كامهره الان.. كأنها ارض قامت فيها حرب..
فلم تبقي الا انقاض واشلاء..!
جفت دموعها.. جفونها حمراء ومتنفخه..
توجهت لغرفة فارس وسيف..
افتحت الباب بخفوت.. ودخلت..
فارس كان يلعب بجواله ببجي.. استعدل بس شافها..
مهره ناظرته.. وحست لو بتقول شي بتبكي.. فا توجهت لسيف.. النايم.. جلست جنبه..
وظلت كذا تطالع فيه..!.
لمست شعره وخده.. وظلت تناظره بصمت.. وشرود..
فارس بهمس:مهره.. بيرجع لك..
تنهدت.. وراحت انزلت عن السرير وجلست على الارض.. ثنت ركبها لصدرها :
فارس.. هو مو لي.. انا خذت شي ماهو لي.. وربي بياخذه مني..
نزل فارس.. وجلس عندها.. :
ماهو انتي اللي تقولين هالحكي.. سيف ولدك.. عساف رغم اللي سواه.. كان عارف ان ولده ماتصلح له ام غيرك..
مهره.. بشرود:
ماكنت عامله حساب هاليوم.. كنت خايفه من اهل عساف ياخذونه.. وتزوجت ابوك.. وتطمنت.. رقدت وامنت يافارس.. طلع عمك متزوج.. وعندها اثباتات.. ولو تسوي تحاليل.. بتوديني في ستين داهية.. ليه يصير فيني كذا..؟!
فارس :
مهره كلنا معك.. ابوي ماراح يتخلى عن سيف.. الاجراء اللي بيصير.. عشان يسكتون سما.. سيف ماراح يتأقلم.. يابنتي.. نسيتي ايش سوا وقت سافرتي مع ابوي.. وهو معنا ومتعود علينا.. كيف سما..
مهره مدت شفتها.. وابتسمت بغصه:
مابي افكر كثير في نفسية سيفي هناك.. ان بكى وعارض.. بيوجعن قلبي.. وان تأقلم وحب الوضع بيذبحني..
تنهدت :
يعني انت وسيف عيالي.. ولالي حق فيكم.. في اي لحظه تختفون من حياتي..الله يستر مايجي يوم بعد تبعد عني يافارس.. طبيعي.. هو انا امكم بس ماجبتكم..
حط كفه على يدها وبصدق متأثر :
مهره.. انتي امي..انا حطيتك بمكان نجود..انا علي برك لمن تشيب عيوني.. انا ولدك.. ولك حق فيني.. مثل اللي في بطنك وزود..

ابتسمت بحزن..
وهي ترفع كفها تحطه على خده:
الله لايحرمني اياك يمه..
قالت كذا.. بصوت مبحوح.. ومجروح..
ودمعه.. تنزل وتنصف خدها نصفين..
فارس راح ضمها:
اف مهره اف..
*****


دخلت زينه المجلس معها صينية شاي.. وتسالي.. لقت نواف منسدح.. وحاط ذراعه على عيونه..
نزلت الصينيه بخفوت..
رفع ذراعه واستعدل:
نام نواف اذا تعبان..
قال :مافيني النوم.. تعالي اقعدي..
جلست..
وصبت شاي مدته له:ايه..؟!.. اسمعك.. وراك..
رفع حاجب..وهو ياخذ البياله :
وش اللي وراي..
زينه:واضح انك روقت.. باين من اسلوبك الخبيث ونبرتك..
ضحك:
وين الخباثه.. ماقلت شي..!
زينه:
يعني مصحيني من النوم.. وواصل.. كن احد لاحقك.. وتقول كلام غريب.. وخايف على ميت من حسابه.. وش.. بتتكلم.. ولا انا اغراب..

شرد فيها وهي تشرب الشاي.. وهمس:
لو انتي اغراب.. ماخذني قلبي لك يوم ضاقت..
التفتت وعقدت حواجبها :
بسم الله عليك من الضيق..بعدوك..
ابتسم وحط بيالته:
تدرين.. نبرتك حنونه علي.. لاول مره..
زينه.. تشرب شاي :
انا كذا قلبي فضيخ..
فاجئها لما انسدح.. وحط راسه على فخذها.. ويقول :
فديت قلبك..
ورجع سكت وشرد..
زينه.. مستغربه..وش فيه..!
هي ماتعرفه صح.. ولاتعرف مشاكله.. ولاهمومه..!
بس ودها يتكلم.. مو هاين عليها.. نواف بالكم يوم اللي مرت بمكالماته لها.. مرح.. ويضحك.. ويحاول يسليها..
دخلت اناملها بشعره..
وداعبت راسه:
اسمعك.. ترى انا شاطره في الاستماع واحتواء الفضفضه..
نواف:وفاشله بالفضفضه.. ورمي همومك..
زينه:
كثر التشكي للمخاليق يشناك
يحط من قدرك.. ويفرح معاديك..

نواف رفع عيونه لها :
المخاليق.. ماهو نواف..
تعمقت في عيونه..وبهدوء :نواف اللي شهامته.. خلته يسوي شي غصب عليه..
نواف بالهجه فيها معاني :
من قالك غصب.. زينه.. انا ابيك.. واللي خلق عيونك الحلوات.. ابيك قبل يقولها سيف.. لاني مجبور.. ولا انا متمم شي غصيبه..
عقدت حواجبها :
هذا اللي مابيه.. لاتحسسني بشي اصلا ً ماهو موجود.. خلينا.. الزمن كفيل فينا.. بس لانكذب على بعض..
شرد في السقف.. : على هواك يابنت غازي.. انا معك.. ولو طالت دروبنا..
وخذ يدها وباسها..
تشبثت اناملها بيده اللي تمسكها.. وبالحاح حنون:
سولف.. قل لي.. وش مضيق صدرك اليوم..
تنهد.. :
بقول.. لاني محتاج وقفتك..
باستغراب :وقفتي..؟!.. كيف..
استعدل.. وناظرها:مو معي.. مع مهره..
بخوف ورجفه:بسم الله.. شفيها خيتي.. نواف تكلم.. وش صاير..؟!.
......
سيف جالس بره على احد الكراسي..
يدخن..
ضايق ومهموم.. كم مره يصعد ويحاول في مهره تفتح ورافضه..
جاته رنه.. رد:هلا ابوي..
فارس بهمس:يبه..بطمنك.. مهره نزلت.. جات عندنا الغرفه.. ونامت مع سيف..
تنهد :تمام حبيبي..
فارس:وانت نام يبه.. لاتظل كذا..
سيف:ان شاء الله ابوي.. تصبح على خير..
فارس :تلاقي خير..!
..........
اليوم غريب..
اليوم الأخير.. وبكرة سيف بيروح.. كما رُتبت الحجوزات..!

مهره.. بغرابة.. ووتيرة عجيبه.. كانت تجهز اغراض لسيف..
كانت تتكلم معه بحماس عن القادم..
تحببه.. انه بيركب الطيارة ويقابل صديقته سما..
لكنه فعلياً نساها..
حتى اسعفت ذاكرته بصورة.. كانت التقطتها لها..
سيف باعتراض:
مابي اروح.. انتي معي..؟!
مهره وتتحاشى تطالع وجهه..
وتنشغل في ترتيب اشياءه..
وتقنعه.. انها بتجي.. بعدين..
لكن كان الاقناع صعب..!

وكان الوضع صعب للبيت كله..
واليوم كأنه يوم جنازة..!

وكأن تحضير مهره.. لتلك الحقائب.. ماهي الايوم جمع ثياب متوفى..
سيتخلص منها.. من المنزل..!

لكن الكل..
احتذا بمهره.. وكتم مشاعره.. وحاولو اظهار.. ان الوضع طبيعي..
وبتروح كم يوم وتجي..!
زينه جات مع نواف.. بعد ماقال لها كل شي.. والصباح قال لجدتها..
اللي ارتفع عندها الضغط ومايبي ينزل..
ماقدرت تجي.. وخلت زينه تروح عشان توقف مع اختها في هالظرف..
عيونها كانت متورمة من البكي..!
جات مع نواف عند غرفة مهره.. كان سيف طالع من عندها.. ووجهه تعبان..
زينه:اخبارها يابوفارس..
زفر بقوه وبخفوت:
اي اخبار يازينه.. ادخلي واقنعيها.. تاكل شي.. لايجي لها شي ولا اللي ببطنها..
زينه امسكت ضلوعها:
ياقلبي ياخيتي..
نواف مسك ذراعها:
تكفين زينه.. اصملي.. الورع بيرجع لها.. لايجيها شي.. والولد حي ومعافى..
همست :طيب خليني اشوفها..

دخلت لمهرة.. كانت فاتحه الاب.. وايباد سيف وتحط له بعض الاشياء..
همست لمهره:
مهره.. حبيبي.. كيفك..
مهره ماقامت تسلم.. بشتات وتوتر وعصبية:
كويس جيتي زيون.. وش اسم الاغنية الكويتيه القديمه اللي يحبها سيف.. ذيك اللي فيها ليلى اللي بخالتي قماشه...

زينه بحشرجة.. وهي تشوف اختها ونفسيتها اللي مو مضبوطة:
قناديل الأمل..اذا تقصدين اللي مع محمد المنصور..؟!
مهره مشتطه تبدا تطلعها:
صح هذا هي.. كلش راح اسمها من بالي..

قربت منها :
مهره..!
مهره تشتغل برجفه ع الاب.. وتقول:
ذكريني زيون.. بالشغلات اللي يحبها بعد.. تعرفين ذائقة سيف.. بس هم ماراح يعرفونها.. بتحطط له امه في شغلات انجليزيه وهو مايحب. !
زينه اجتمعت الدموع في عيونها وهي تاخذ يدها.. :مهره امي.. اتركي اللي في يدك شوي.. وجهك شاحب قومي اكلي شي..

مهره وكأنها شخص ماخذ حبوب لجه..:
ابي اخلص كلشي اليوم.. احس يوم مايكفي.. انا بجهز ملابسه.. ولاايباده... ولا بقنعه.. ولابشبع منه.. مايكفي زينه.. مايكفي.. وتقولين اكلي..

سيف واقف مع نواف جنب الغرفه..
حط كفه على جبينه وضغطه:
بتجن.. مهره بتجن..
نواف.. :هي تاكل شي ع الاقل.. لاطيح من طولها.. وش تحب.. خل اطلع اجيب لها يمكن زينه تقنعها..
سيف :لاتحاول.. مجربها انا.. ماراح تاكل الا اذا هي بغت..
وتوجه للدرج :بنزل.. احس تعبت.. قلبي يتواكل وانا اشوفها بهالحال..
نزل..مع نواف..

والوضع مأساوي.. ابوه ساكت.. ووجهه منحقن..
وامه رابطه راسها.. ومنجمره..!
وفارس.. وبلقيس..
في محاولات فاشله.. مع سيف.. اللي يبكي ويقول.. :
ماما ماتبيني.. تبي نونو جديد..!.. قولي رح مع شالي.. وليد.. طياره.. انا مابيهم..


كيف..
هذا اليوم سيمضي..!
*****

نزلت مهره.. بعد محاولات زينه..
واسمعت سيف يبكي.. ويردد نفس الموال..
حست صوته مزعج حيييل..!!

كان على طاولة الاكل.. وبلقيس تحاول تأكله..
اندفعت له واضربت الطاوله.. بكفوفها وبحده وعصبية:
سييف.. خلاااص انكتم.. اسكت.. صوتك كل مخي..ابلعهااااا....
بلقيس تناظرها وخافت من خزتها وعيونها :
مهره.. وش فيك..هدي..

موضي بتقوم.. تمنع مهره.. وصراخها على الولد..
بس سيف منعها..!

وفاجئهم سيف.. لما وقف ع الكرسي.. وضرب الطاولة زي امه وصرخ في وجهها.. :
انتي ووووااااانه.. خليني.. عشان نونو جديد..
صاحت فيه:
من اللي يخليك عشان النونو الجديد.. من.. انااا..؟!.. انا سيف اناااا..؟!!!!!..
صاح فيها :
ليش خليني اروح لوحي مع وليد.. شالي.. (ومشاري)..
مهره بانهيار وانفعال..توضح لسيف شي اكبر من مخه بس بسلوب يستوعبه:
لان ياماما.. اذا انت مارحت.. بيحطوني لحالي.. بغرفة ظلمه.. بيربطون يديني ورجولي.. بيخلوني جايعه.. مع الفيران والذبان.. تبي ماما يصير لها كذااا...؟!.. تبي ماما يضربونها.. ويحبسونها...

توسعت عيون الجميع من الشفافية.. اللي اشطحت لها مهره..
موضي مسكت راسها :يااااويلي..
سيف بهلع ضمها :
لاااا ماما.. مابي...ماما اتقولين كذا.. حاااف.. (اخاف).. خلاص والله الوح.. معهم..
مهره ضمته.. وبدون تبكي.. وبحزم :
كفوو ولدي.. كم يوم ونرجع مع بعض.. صح ولا..؟!
سيف يبوس خدها بقوه: الاا..
وشوشت في اذنه.. وابتسم..
بعدها حطت جبينها على جبينه:
وعد..؟!
قال:وعد..!
مهره تجلسه فوق الطاولة..
وتسحب الصحن.. وبخفوت:
خلاص خليه بلقيس.. انا أأكله..

حطت لقمه في فمه..
كلها..
والكل جلس بصمت وتوتر.. بعد الوضع اللي حصل..!

مهره وسيف.. المعاناة اللي اقترنت ببعض.. هي وياه اكثر اثنين.. يفهمون لبعض..

*كان سيف رغم شهوره.. الاولى.. قادر ان يفهم تقلبات مزاجي.. يصفو اذا صفيت.. ويتعكر معي.*


‏يا رب
غصنٍ بصدري
لو لمسته وقع ..
أرسل لي من الغمايم
ما يبلّه وأعيـش
وازرع بصوتـي ..
سوالف ما سقاها وجـع
من ضحكة الغيـم
ولا من حمام وريـش .
.........

اتمنى البارت حاز على رضاكم واعجابكم ..
بنتظار تعليقاتكم .. ورايكم ..


تابعوني سناب
i_em1234

تويتر
i_Em1234@

[ايمان يوسف.]

لذين يشاهدون محتوى الموضوع الآن : 51 ( الأعضاء 10 والزوار 41)
‏ايمان يوسف., ‏امل الفقيه, ‏عزة عبد الحليم, ‏مس كارولينا, ‏زهرة اللافندر العطره, ‏ام يوسف مالك, ‏ساره سيساني, ‏صمت الهجير, ‏هند .ربا, ‏Sariha

[فيتامين سي]

الذين يشاهدون محتوى الموضوع الآن : 55 ( الأعضاء 13 والزوار 42)
‏فيتامين سي*, ‏هند .ربا, ‏hapyhanan, ‏ميمي بيوتي, ‏Maha bint saad, ‏ايمان يوسف., ‏قلب لايصدأ, ‏صمت الهجير, ‏امل الفقيه, ‏عزة عبد الحليم, ‏مس كارولينا, ‏زهرة اللافندر العطره, ‏ساره سيساني


سلفي مع الحبايب

قراءة ممتعة لكم ........ وردود ممتعة لنا.......... وللغاليه ايمان ................

[هند .ربا]

وش هالبارت وربي إجرام بحقنا ياويلك من الله الدموع م وقفت بارت قوي قوي اهنيك
الحمدلله علاقة زينة ونواف تقدمت وصار فيه تطور
مهره وش اقول عنها وربي بكيت معها تقطع القلب مره
حسبي الله على سما اذا م راح تهتم بسيف مره قاهرتني
ننتظرك على خير

[هيدراانجياا]

اهئ اهئ😭😭😭😭😭😭
حراام وش هالبارت اكتب الحين ودموعي تنزل
اااه يامهره قطعتي قلبي 😭😭😭😭

[هيدراانجياا]

الذين يشاهدون محتوى الموضوع الآن : 57 ( الأعضاء 9 والزوار 48)
‏هيدراانجياا, ‏ايمان يوسف., ‏ساره سيساني, ‏هاااجررر+, ‏شاكرة, ‏الكتمان, ‏هند .ربا, ‏منـال مختار