آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
12-04-21, 02:59 PM
| #91 | ||||||||
| مراقبة عامة ومشرفة منتدى الروايات المنقولة  
|  البارت الأخير ج1 #وضاقت_الأرض_بي للكاتبة #لبنى_الموسوي ولدتُ حرة أبية امرأة تعزف على قيثارةِ الحياة أنغام الحرية حتى كبلوها طارت النوارس حولها فـ طاردتها الذئاب الى أين تهربين ؟!! التفتُ الى عواءهم فـ نظرتُ حولي خائفة ها هي السُبل قد انقطعت الآن وضاقت الأرض بي بما رحبت فـ باتت الحرية مقيدة لا زمان لها ولا مكان ها قد كبلوني اغتصبوني غسلوا عاري سيطر عليهم الشجع لِـ مالي حقدهم الدفين جعلهم ينتقمون من براءتي مات أبي استغلوا ضعف حالي اجبروني حتى تأقلمت مع حياتي فـ اليكم التالي زواج بلا أنجاب ثم زواج مع أنجاب راح ضحية لزواج اخر رجلٌ مجرد من الرجولة اصبح لعبة بـ ايدي شياطين البشر من اهلهِ حياة طيبة هُدمت بمكيدة لأُناس سيطر الخُبث على سريرتهم قاصرة تزوجت دميتها جميع ما تملك فـ كانت هي عروسها البيضاء لا تنظروا بـ أستغراب هذه ليست حكاية واحدة أنها حكايات في رواية واحدة عندما ضاقت الأرض بي ضاقت بهن فـ أجتمعنا كما يجتمع النحل في ذات الخلية فـ باتت مسكننا الأرض لم تعد تنفعنا فـ التضيق كما تشاء نحن ايضاً نشاء نساء قويات أن لم نجد لنا مكان في الأرض فـ قلوبنا كافية لتحتوي بعضها البعض ننسج منها أرض جديدة كلما ضاقت بنا أرضكم رحلنا لها مودعين آمنين قائلين في ختامها مهما ضاقت بكم دنياكم لا تيأسوا فـ هناك في مكان اخر نورٌ ينتظركم قلبٌ يحتضنكم روحٌ تجعل من نيران من حاربكم جنة لكم فـ تكون هي مأواكم الأخير حيث لا ضيق بعدها ابدا.... غسق.. اليوم گال ماشين للحلة موعد الجلسة صار خليت البنات يم هناء وطلعنا من الفجر وصلنا قريب الـ 11 بوجهنا رحنا للمحكمة طبينا للقاعة هاي شديصير هنا يربي ما صدگت عيوني الواگفين بالقفص بيت عمي عمي سالم و ولدة مهيمن ورضا ومحمد ومؤمل وابوية واخواني سيف ويوسف ومازن شنو السالفة ؟!!! معقولة إسحاق فتح قضية شجن ويا قضيتي يا رب أي يااااا رب حط ايدة إسحاق على ظهري واشرلي امشي رفعت راسي عليهم كلهم عيونهم بـ أتجاهنا رهبةةةةةة رهبة ما اگدر اوصفها احس وكـ أني داشوف الشيطان گدامي حتى جسمي صار يرجف بعدت عيني منهم على السريع القاضي گاعد مقابيلنا من شاف إسحاق گدامة هز الة راسة بالتحية وابتسم انعقدت الجلسة وذكر القاضي الجريمة بالتفصيل عرف بـ أسماء المتهيمن واخذ اقوالهم وكالعادة اكيد كلهم نكروا جريمتهم ماكو واحد صار بيهم رجال لحد هـ اليوم لأن الأعوج راح يظل كل عمرة اعوج وصل المهيمن راد ياخذ اقوالة التفت علية باوعتلة بـ أستهزاء خلينا نشوف ندمك حقيقي لو بس كلام هنا راح تثبت صدق ضميرك مهيمن رجع القاضي سألة - أبني احچي مو سألتك رد على السريع - لا سيدي كلامهم كلة كذب هم قتلوها واني چنت حاضر وياهم بذاك اليوم مؤمل ضربها بالسچين وراها اخذها سحل من شعرها للمطبخ طبعاً بعد التعذيب ورضا خلص عليها ما كلفة موتها غير جليكان بانزين وجداحة حرگها واخواني ساعدوا ما خلوني اتدخل لحد ما نفذوا جريمتهم بالكامل بعدها رضا كمل تخطيط فعلتة شمر السچينة بالفرن الغازي ومباشرتاً طلع الكل من المطبخ وشغل الغاز حتى تبين الشغلة قضاء وقدر مو جريمة - اي وبعدين - ماكو بعدين سيدي التموا الناس لأن بيتنا احترگ وطبوا يطفون بي ونقلوا أختي الله يرحمها للمستشفى - وانت ما حاولت تبلغ عليهم ؟!! - لا سيدي - سيف مسلم اقوالك والمغدورة شتقرب الك ؟؟ - بت عمي وخطيبتي سيدي - سيد لو محكمة - الأثنين - كمل أبني نسمعك - اني ما اعرف شي عن الحادث بيومها دخلت حالي حال الناس ومن سألنا شصار گالوا طگ الطباخ على شجن وركضت حتى اساعدها وياهم وراها اختي چانت حاضرة ساعة الحادث - جريمة - نعم سيدي !!! - جريمة مو حادث صحح كلامك - اي سيدي چانت حاضرة الجريمة واجت حچت النة يعني الية والأبوية واخوتي وگالتها بالتفصيل مثل ما مذكورة گدام حضرتك هسه - وانتم ما حاولتوا تبلغون ؟!! - لا سيدي بس حچاها التفت القاضي على الشرطي الي بالباب - نادي على الشاهد الأول صاح بصوت عالي ومرتين على التوالي زينب محسن درت وجهي متفاجأة بس لا هي ؟!! چان تطب مرت عمي على الكرسي المتحرك وأنهار تمشي الها لحد ما وگفتها گدام القاضي القاضي.. غادري القاعة بنتي طلعت أنهار گبل حلفها اليمين وراها سألها - مقربتك من المجني عليه - بنتي - تفضلي نسمعچ ادلت شهادتها مثل ما مطلوب ما خلت شي مخفي طلعوها من القاعة دخلت أنهار شهدت ضدهم وبس طلعت صاح القاضي غسق مسلم باوعت الإسحاق هز راسة بمعنى گومي گمت قسمت يمين بديت احچي كل شي صار ودموعي تجري امسح وحدة تنزل عشرة اخر شي جابولي ماي ما خليت شي بگلبي ما گلتة حتى حقدي عليهم بينتة وهم صافنين بوجهي مديگدرون يستوعبون هاي الواگفة گبالهم هي نفسها غسق الحاولوا بكل ما عدهم حتى يعدمون شخصيتها للأبد ويخرسون لسانها - اخر سؤال كان للقاضي ليش ما بلغتي ؟!! - لا سيدي بلغت اتصلت وبلغت بدون ما اذكر أسمي بس هم طمطموا السالفة ويا ضابط عرف وطلعوا منها - تفضلي استريحي يلا ابني نادي على الشاهد الأخير صاح حسين لو اني انصدمت حتى هذا دبرة إسحاق والله عجيب هـ الرجال كل يوم يصدمني اكثر من اليوم القبلة نفسة صاحب الدراجة البلغت من موبايلة وهم شهد بنفس كلامي وهنا انغلقت الدائرة على بيت عمي واهلي وانكارهم ما راح يفيدهم بشي بعد هاللحظة صاح القاضي الحكم بعد المداولة الكل طلعوا اقل الخمس دقايق ورجعنا للقاعة عاد القاضي الجريمة وصاح النطق بالحكم كلنا وگفنا ونطق القاضي الحكم بالأعدام شنقاً حتى الموت على أبن عمي رضا بالسجن المؤبد على ولد عمي محمد ومؤمل ابوية وأخواني يوسف ومازن وسيف بالحبس شديد ومهيمن بالسجن لمدة خمس سنوات اما عمي سالم طلع براءة لأن التستر على الجريمة هنا ما يشملة بالقانون بـ أعتبار الجريمة ارتكبت من أولادة باوعت عليهم والضحكة تارسة وجهي واخيراً تحاسبتوا واخيراً حق الحق واخذت العداااالة مجراها الصحيح طلعوهم من القفص فات أبوية من يمي گمت على السريع ويا مديطلع صرت يمة باوع علية أبتسمت اذا تذكرني اني غسق في يوم من الأيام كنت بنتك وانت دفنتني بـ أيدك سحبني إسحاق الخارج القاعة طلعوا ورانة ابوية اخواني ولد عمي شگد صعبة من تاخذ حقك من المنك وبيك لأن هو ظلمك قبل الغريب انهاريت بالبچي ومو بـ أيدي اهلي يا عااااالم هذولة الي ما رحموني بيوم ليش لحد الأن گلبي لا زال مُصر يرحمهم ليششششش ؟!!!! مد إسحاق ايدة الجيبة طلع الچفية مسحت وجهي والتفتت داحاول اهدي بروحي صارت مرت عمي گدامي عفتة ورحت الها ركض أنهار دايرة ظهرها بس گلتلها عمة التفت علية وحضنتني تبچي بادلتها الحضن وعيوني على أمها مقعدة على الكرسي من يوم ما حرگوا بتها گدامها بدم بارد هالميخافون ربهم أنهار.. ولچ غسق واخيراً والنبي ما صدگت عايشة اني بحلم لو حقيقة احچي خلي اسمع صوتچ احچي حبابةةةة حچتها تناشغ من البچي مسحت دموعها بـ أبتسامة وگعدت يم رجل مرت عمي - ما اگدر اگولچ شلونچ عمة لأن داشوف بعيوني شصاير بيچ بس كل الأگدر اگولة الچ حق شجن رجع وهيچ راح ترتاح بگبرها بالعافية عليها راحت شهيدة ادري انت أم وادري محد توجع على مصيبتها بگدچ بس لازم تقوين روحچ حتى ترتاح شجن وگعتچ هاي دتأذيها والله عيشي عمة عيشي وحقها مراح يضيع لا بالدنيا ولا بالأخرة هناك راح تحضنيها وبـ لسانچ هذا تطالبين رب العالمين بقصاصهم بالگوة گالت وانتِ شلونچ يمة - عايشة الحمد لله صح المريت بي مو سهل بس دائماً وابداً رب العالمين وياية وهالشي كلش كافي بالنسبة الي أنهار.. الله ينتقم من مهيمن الحقير أمي من يوم ما عرفت بالسالفة وهي تدعي علي وبس رجلچ اجة وطلب منة نشهد وافقت بدون تردد لأن غصتچ انتِ وشجن مدتخليها ترتاح ولا تتعافى من مرضها الدتشوفيها بي - رجلي اجة الكم ؟!! - اي ولچ غير صدمنا عيني انت منو اني رجل غسق !!!! يا غسق يمعود غير ماتت وشبعت موت كل اسبوع احنة يمها بالنجف نزورها تالي گعد سولف السالفة وگال اشهدوا بقضية بتكم شجن واني مستعد آآمن الكم الحماية اللازمة وما اخلي احد يتعرضلكم بسوء مهما كان امي اصلاً وافقت بدون ميگولها هي بس تريد ترتاح والنوب عرفت بيچ شگد تعذبتي تالي حتى اني القاضي راد يحبسني تصدگين كلة لأن تسترت على الجريمة بعدين من عرف الضغط النفسي والتهديد التعرضت الة من ابوية واخواني اطلق سراحي الله يخلي الچ غسق والله مبين علي خوش رجال وأبن حلال احلى تعويض هذا من رب العالمين عن الظلم العشتي بي بحياتچ ويا اهلچ الله ليوفقهم - فعلاً يمة حافظي علي الي يسوي علمودچ كل هذا وانتِ الچ ماضي صعب لو ضاع ميتعوض بعد دتحچي سلم عليهم إسحاق التفتت باوعتلة گال الهم نوصلكم من دربنا رفضت مرت عمي بس أصر وما گدرت تعارضة وصلناهم والطريق كلة عيوني عليهم بالمرايا احس ما شبعت منهم ذولة ريحة شجن بس الله اليعلم شگد ارتاحيت بشوفتهم گدامي اليوم وصلناهم لزموا بينا ما قبل إسحاق رجعنا للبيت المأجرة نزلني وراح يجيب غدة نص ساعة ورجع ما اكلت شي ما اشتهي بعد هاليوم المتعب صليت وتمددت بالي ظل يم البنات گمت ع السريع طلعت جهازي خابرت هناء حچيت ويا ود واطمأنيت على رقاوي وگبل نمت تعبانة لليل يلا گعدت باوعت للساعة عشرة ونص طلعت للصالة إسحاق نايم رحت للمطبخ جايبلي لفات حاطهن ع الميز اكلت لأن جوعانة ورجعت للغرفة هم اتصلت بهناء وصليت وراها ظليت اتفرج برامج للفجر يلا رجعت نمت گعدت الصبح على صوتة فتحت عيني أبتسم صباح الخير بوية بسچ ما شبعتي نوم من أمس وانتِ نايمة - صباح النور لا گعدت بس انت چنت نايم وما حسيت علية - گومي نتريگ بالعجل عندي شغلة وياچ گمت غسلت وجهي ورحت للصالة چان مجهز الريوگ باوعتلة وأبتسمت شديسوي هذا بية حتى اخجل ازعل منة بعد كل شي قدمة الية رحت ع السريع حضنتة بس حط ايدة ومسح على ظهري بچيت ما ادري شبية !!! ليش هيچ تعبانة غير المفروض افرح بعد جلسة البارحة - عليش هالبچي - ما ادري مخنوگة متشوفني حتى ما گدرت احچي وياك بالموضوع بعد ما رجعنا من المحكمة - هساع ترتاحين بس گعدي اكلي - شكراً إسحاق.... - قاطعني بنترة بوية بطلي سوالف الأغراب تراني انزعج منها ازود مما تتصورين حچاها وسحبني من أيدي للصينية گعد يوكلني برد الچاي وهو ما حاط لگمة بحلگة گتلة اكل گال مالچ غرض بية المهم انتِ تتغذين خلصنا گال روحي غيري بالعجل وتعاي طبيت للحمام الحليب شگد ميأذيني گلبي يأذيني اكثر مو سهل علية عايفة رقية وهي بـ هالعمر فرغتة شوية وطلعت دگ جهازي ركضت چان بالصالة اجة إسحاق گال هاي هناء رديت بسرعة ها هنو خير خو ما البنات بيهن شي - ما تسلمين عوبة - وچ والله بالي يمهن فدوة طمنيني - رقاوي زينة لا تخافين جاي اوكلها وماشي الحال بس هاي ود عفية حاچيها بس تبچي - يا ليش ؟!! - تگول عافونا وراحوا بعد ما يردون من الصبح على هالحچايتين ما عدها غيرهن - وينها يمچ - اي هاي اخذي بلكت تقتنع من تسمع منچ - حچت ود وهي تناشغ الووو ماما - يروح امچ شجاچ والله ما عفناچ عدنة شغل يومين ونرجع مو هاي اختچ يمچ وساكتة متبچي - لا عفتونا هالنوبة اثنيناتنا... وبچت - منعوفكم اكو واحد يعوف روحة غير انتم روحنا وأعز ظليت اقنع بيها بعدين إسحاق اخذ الموبايل حچة وياها لحد ما قنعت رحت بدلت وطلعنا بس بالي يمهم باوعت للطريق هاي وين رايحين للمحكمة لو شنو ؟!! - لا للنجف نزور - اي عفية والله كلش محتاجة الزيارة اجت بوقتها - تتدللين بوية چنچ اعلة الزيارة بسرعة وصلنا لأن المسافة قليلة زرنا الأمام علي عليه السلام وطلعنا بس مشينا مسافة عرفت راح يوديني لأمي وشجن وفعلاً دقايق و وصلنا الهم سلمت وگعدت يم قبر شجن الله يرحمها دنگت راسي عليها وبچيت بحرگة رجعلچ حقچ خيتي رجع يروح غسق البارحة الأذوچ تعاقبوا البارحة تحققت العدالة الألهية وانكشف المستور وكل ساقي ذاق من نفس المر السقى الچ نامي مرتاحة يا مظلومة اهلچ تجازوا وجمالچ التشوه بـ أيدهم راح يرجع بعد ما يوگفون گدام رب العالمين وينالون عقابهم الي يستحقوا حبيبتي ما نسيتچ ولا راح انساچ صح الحياة تمشي بس عمرنا يوگف يم الناس النحبهم ونخسرهم قبل لا نشبع منهم تغيرت اني مثل ما چنتي تترجين مني صرت قوية صرت اعرف ادافع عن نفسي اذا ظلمني احد وصارت ثقتي بروحي مثل ثقتچ شجونة تذكرين من سيف ظلمچ شلون وگفتي بوجهه ما ترددتي ولا لحظة رحتي بلغتي اهلچ بالرغم تعرفين هالشي ممكن يأذيچ موقفچ هذا صار مصدر قوة الي اني هم مثلچ من انظلمت وگفت بوجههم وحچيت عن معاناتي بس لأني أعرف بنفسي مظلومة وغيري الظالمني شكراً حبيبتي شكراً على كل نصيحة قدمتيها الي شكراً على خوفچ علية واهتمامچ بية من دون الكل شكراً على محبتچ المتتعوض شكراً على هـ الشجاعة الزرعتيها بية حتى بعد موتچ شكراً ولو اشكرچ لحد أخر يوم بعمري هم قليل بالعافية عليچ الجنة وان شاء الله نلتقي فديوم يم ربچ الكريم بوجه أبيض التفتت على أمي بست گبرها وشهگت - اشتاقيتلچ يمة اشتاقيت الحضنچ الي ياما وياما احتاجيتة وما لگيتة اشتاقيت الحبچ وحنانچ وصوتچ الدافي اشتاقيت النصيحتچ واشتاقيت الأيامي القديمة الچانت احلى شي بيها انتِ ادري بيچ دوم وياية حتى بولادتي ما عفتيني لذلك مراح اگولچ اني بخير وصار عندي بنوتة تخبل وعسل مثلچ بس راح اگولچ اني محتاجتچ واظل احتاجچ اكبر خسارة بحياتي انتِ ليش شنو قيمة البنية من دون أمها خصوصا اذا مچان عدها اهل غيرها هي وبس المهم انتِ مرتاحة لأن ساعتها اني ارتاح حق شجن رجعلها وحقي هم راح يرجع وقبل الكل حقچ يروحي ذولاك رجلچ وجهالچ نايمين بالسجن نامي مرتاحة يجي اليوم النتقابل بي واتمنى تكونين راضية علية وما قصرت بحقچ فد يوم گمت مسحت دموعي وباوعت على إسحاق چان گاعد يقرا (يس) بصوت مخفي طلعت موبايلي حافظتها ملف بالجهاز قريتها وقريت الرحمن وسلمت عليهن التفتت شفت قبري تنرفزت بشكل كلما يصير گدامي احقد على ابوية وكل أخواني اكثر من حقدي هذا طلعنا من المقبرة ويا الأذان رحنا للأمام صلينا وطلعنا للمطعم اكلنا ورجعنا للشقة سألتة عن موعد جلستي گال باچر ان شاء الله رحت نمت للمغرب فزيت على صوت الهوسة طلعت من الغرفة هناء وخالة جايات !!! تفاجأت كلش طلع إسحاق هو الداز عليهن علمود يشهدن بحادثتي لأن شهادتهن تعتبر جداً مهمة رحت سلمت على خالة وسحبت هناء بهدوء - بناتي وين ولچ - يم ثناء وترف شبيچ قابل عفناهن بالشارع واجينا - يربي يوميا باقيات بمكان ليش ما جبتوهن وياكم - إسحاق ما قبل باچر كلنا بالمحكمة وين يظلن - اي هم صح زين منو جابكم صهيب مو ؟؟ - لا شبيچ صخر جابنا نسيتي صهيب صار الة عشرين يوم ويا أمل بـ أيران علمود عملية باقر - اي يمعودة نسيت راسي صاير منخل من المشاكل - الله يساعدچ - ويساعدچ بشري ما صار شي جديد وياكم - لا هو اسبوع ظل يم اهلة عگبها سافر جاي يتصل يوميا أمي ترد علي شلونكم محتاجين شي ويسد الخط گبل - هناء لتخسري صهيب ميتعوض - والخلفة متتعوض - بس هو يريدچ الچ ميريد الأطفال ليش متفكرين - يجي يوم ويتندم تاليتها يكرهني - صهيب ميسويها - خية يموت على الجهال روحة بيهم ما تدرين شيسوي ويا جهال اخوتة بس هو ما يبين الي خاطر لا انقهر واحسن بالنقص - صح كلامچ هناء بس احياناً يستوجب نكون أنانيين اذا شفنا الطرف الأخر متمسك بينة - دعوفي هالسالفة خايبة وخلينا هسه بقضيتچ - اوووف دتدمرين روحچ بـ هالعناد - لا خية لا ادمرها ولا شي كل شي بالقسمة والنصيب وآنه هاي قسمتي وراضية بيها ظلينا بيومها سهرانين للوحدة إسحاق جمعنا وصار يلقنا شنو نحچي وشلون نرد على اسألة القاضي گالتلة خالة هاي اول جلسة گلها اكيدن لا خمس جلسات گبلها بس آنه اجلتكم اعلة الجلسة الأخيرة وخلصت الراحن الوحيدي خاطر لا تتبهذلون بالوحدة ونص گال يلا ناموا ورانا گعدة من الصبح نامن خالة وهناء بالصالة وهو اجة يمي بالغرفة صارلنا هواي منايمين بمكان واحد تمدد رحت طفيت الضوة بس نمت بصفة گبل سحبني الحضنة باس خدي وگال تصبحين اعلة خير رديت وانت بخير ثاني يوم موعد الجلسة دخلت للقاعة بنفس خوف الجلسة الراحت مهيمن وحسن بالقفص گعدت وعيوني عليهم سحبني إسحاق من ايدي بنترة لا تتنوعين ليهم غسسسق هزيت براسي أي نفس القاضي الحكم بيت عمي ديرأس الجلسة بدت المحاكمة مهيمن اعترف گبل اما حسن كالعادة ينكر گمت اني شرحت الحادثة مثل كل مرة بس بدون خوف بدون خجل شهدن خالة نجمة وهناء على كلامي وراها صاح القاضي الشاهد الأخير كل الصدمات متجي يم صدمتي بدخول رؤى للمحكمة ظليت صافنة هاي شجابها وشتسوي اجت ؟!! حچت الصار وياها وبالأخير انطت موبايلها للقاضي شاف الرقم وبعض من الرسائل الأخيرة الباقي ممسوحات التفت على حسن وأمرهم يشغلون التسجيل مكالمات بصوتة وياها ديحاول يهددها لو تقبل بالشرط لو يفضحها بالعشيرة هنا حسن انتهى ما ظل عندة غير الأعتراف بلكت هيچ تتخفف عقوبتة شوية وفعلاً أعترف مثل مهيمن اساساً أعتراف مهيمن بالجريمة الجماعية وحدة كافي حتى يدين حسن بالأدانة الشديدة سأل القاضي حسن ليش سويت هـ اللعبة القذرة ما كفاك الأغتصاب يعني - رد علي حتى أخلص روحي رجلها قاضي وكل السنين الراحت چان يدور على مهيمن وتوصلي الأخبار دائماً گلت ويا نفسي اكيد لو وگع مهيمن بـ أيدة راح يعترف علية...... - وانت يعني شلون عرفت هو ميدري بيكم مشتركين بالجريمة ؟!! - بت اخو بلغتني والدليل اني گدامة وما حاسبني لو يعرف مچان سكت - كمل نسمعك - ومهيمن قتل صديقي علاء فـ هنا هم ردت اخلص منة وارتاح من هالكابوس بعد ما يعترف على نفسة ويغطي علية وهم انتقم الصديق طفولتي لأن هو مو احسن منة حتى يقتلة على الأقل ما اعتدى على عرضة - انتم منطي حبوب حسب اقوالة - كذب سيدي لأن ماكو شي يثبت كلامة هو اصلاً چان يتعاطى - عندك شي تريد تضيفة بعد - لا سيدي گبل إسحاق همس بـ أذن المحامي رفع أيدة اشرلة القاضي تفضل گام وگف وحچة بصوت عالي اطالب بهدم القبر الرمزي لموكلتي كونها لا تزال حية هز راسة القاضي بالموافقة باوعت الإسحاق ااااخ هذا يمكن اكثر هم چان غصة بصدري وهسه يلا انزاح عني وارتاحيت وصار وقت النطق بالحكم انحكم حسن بالسجن المؤبد مع أعتباره ظرف مشدد لأن هو موظف حكومي الأغتصاب كان جماعي والمجنى عليها باكر وادى الفعل لأزالت بكارتها وانحكم مهيمن ايضاً بالسجن المؤبد مع أعتباره ظرف مشدد لنفس أسباب حسن اضافة عليهن المجنى عليها كانت أقاربة وبهاي الطريقة كانت عقوبة مهيمن أقوى بهواي حادثة شجن حادثة الأغتصاب وعندة بعد حادثة قتل علاء راح يتحاكم عليها نهاية هذا الشهر شهر الواحد من 2019 نفس الشهر الي انقتلت بي شجن وبعد سبع سنوات رجع حقي وحقها حتى يثبت رب العالمين للعالم بـ أن عدالته سـ تحق ولو بعد حين رفعت عيني بعينهم نظرة أنتصار بعد تعب سنوات ومباشرتاً غادرت القاعة صار حنظل بوجهي واگف هو ورؤى عفت الكل ورحت بـ أتجاها هـ الأنسان الي أول ما شفتة تمالكني الخوف وبعد سنوات طوال أثبت الي هو سندي اكثر من الناس الأحتمي بيهم من هالدنيا وبشرها تقربت منة مبتسمة بحزن رد الأبتسامة - شكراً خوية.... - لا تشكريني اعلة الواجب هاذ اقل شي اگدر اقدمنة ليچ خاطر تعذريني عن الصار وياچ - معذور وما قصرت باوعت الرؤى ترجف من الضعف و وجها صاير خريطة رجعت نظري على حنظل - كافي خوية أشهر مرت وانت تعاقبها أن الله غفورا رحيما وخير الخطائين التوابون هز راسة وسحبها من أيدها ديطلع راح إسحاق مدري شحچة ويا ورجع بسرعة طلعنا من المحكمة للبيت خلصت مهمتة بعد هنا اتصل على صاحب البيت سلمة المفتاح ورجعنا للبصرة وصلنا هناء وخالة لبيتهم ورحنا لبيت الشيخ چانوا مجتمعين بالصالة الدنيا ليل وحتى الشيخ موجود من دخلنا گام باسني من راسي والله خجلت كلما يشوفني يسوي هالشكل ممتعودة حقي ابوية عمره ما باسني حتى بالأعياد شگد هالرجال كبير وافعالة أكبر بست أيدة التفت على إسحاق رجع باوعلي وعيونة تلمع بدموع الفرح گال اعلة الخير بوية حگچ رد والظلموچ تجازوا - ما قصرت بوية فضلك ما انسى - الفضل الصاحب الفضل ومن ثم الزلمتچ الواگف جارچ آنه كل شي ما سويت - لا سويت هواي كافي انت الجمعتني بـ إسحاق لأن تدري بس هو اليگدر بيوم من الأيام يرجعلي حقي منهم - الطيبون للطيبات وانتِ تستاهلين الميزان بس حچاها باس إسحاق ايدة بـ هالأثناء طلعت ترف من غرفتها ود ورقية وياها بس شافتنا ودة اجت الحضني تركض - ماما اشتاگيت ليچ هوااااي - واني اشتاقيتلچ حياتي شفتي مو گتلچ راح نرجع - اي اي.... حچتها بفرحة گبل حضنتها رجعنا للبيت هلكانة من التعب بس نومت البنات نمت يمهن بالغرفة حتى ما بية بعد اگوم الغرفتي شلون غفيت هم ما ادري علاقتي بـ إسحاق ظلت مثل ما هي ما ادري ليش خجلان يا ترى من الشي الصار ؟!! لو زعلان ويريد اني الأبادر وأراضي مدافهم سر سكوتة هناء.. قريب الشهر وصهيب بـ أيران كل يوم قبل لا أنام تنترس مخدتي من دموعي لحد ما يظل راسي يوجعني من البچي واليوم نفس الحالة عشتها بچيت بقلة حيلة حد ما غفيت فزيت من الصبح على لمسات تتنقل بين أطراف شفايفي فتحت عيني هذا صهيب بلا شعور گمت حضنتة حيل مشتاقتلةةةة بادلني الحضن شوية وبعدت عنة رفع وجهي بـ أطراف اصابيعة وگال اشتاگيت الرويحتي - ورويحتك اشتاقتلك - عليش عيونچ هيچ تعبانة شني خلصتيها بچي ؟!! هزيت راسي وبچيت چان مگمبص يم رجلي گبل گام گعد بصفي وسحب راسي الحضنة يمسح علي بهدوء - ما جاي افهم عليش تأذيني بيچ امي مشكلتچ ؟!! وحگ ربچ بسبب طلابتنا الأخيرة عليت حسي اعليها بس تظلها امي اتبرى منها لو شني الأسوي اخذتچ وعزلت وهمينة ما فاد شني اهجن بيچ اخذچ ونبعد عن البصرة كلها تردين هيچ حاچيني بوية - لا هاي مكانك شلون تعوفها - چا انتِ شايلة همي بالمچان وما شايلة همي بيچ انتِ شني يعني موش سهل اعوفن مچاني بس سهلة اعلية اعوفنچ شلون تفكرين هناء لچ كل شي ما يجي يم ظفرچ وحگ من زرع حبچ بية - بس انت حقك تريد جهال يسندوك بالكبر - انتِ سندي الوحيد ما اريدن غيرچ - تحبهم ادري - أي أحبهم بس أحبنچ أضعاف حبي ليهم ولون خسرتچ كل شي ما يجي بعيني بعد - تزوج بموافقتي أحسن ما تكسرني بالغصب لو بالسر - گلتها ليچ بيوم زواجنا واردن واگولنها موش صهيب أبن الشيخ ضاري اليكسر حرمتة وهاي آنه كسرت چلمتي وما فكرت اكسرنچ - واذا صارت - موش زلمة لون سويتها وهاي شواربي تحرم تظل اعلة وجهي كل العمر - خايفة - آنه أمانچ بس ما اعليچ من الوادم وأولهم أمي - تعبت من هسه تعبت - آنه راحتچ اليمتة ما تتعبين حطي راسچ هنا...... وأشر على صدرة ولمن تشكين تعبچ الـ راحتچ ما يظل كل تعب ساعتها - انت الكل شي مجهز جواب ؟!! اكيدن عبن هالشي نابع من گليبي ما مستعد اخسرنچ هناء وبذات الوكت هالزلمة القوي ينكسر لون لگاچ مستعدة الخسارتة - ما اريدن اخسرك بس ما اريدن اصير أنانية - صيري أنانية چا آنه همينة أناني بحبچ عفت كل الوادم الأجلچ بوية لو انتِ ربچ وحد باوعتلة وبچيت سحب العلاگة طلع علبة ساهون حط بحلگي ضحكت ودموعي تجري ها شلونها طيبة - مالحة يا طيبة - تراها حلوة بس غير دموعچ غرگتنة بسچ عاد شكثر تبچين مو عيونچ الحلوة صارن دگم - هههههه ها من هسه صرت ما اعجبك أستاذ صهيب - هساع والأخر يوم بـ عمري ما تعجبني حرمة غيرچ - شلون حبيتني وانت انجبرت بية - حظي والحمد لله حچاها وباس ايدة وجه وگفة صحت بي صهييييييب گبل طگها بضحكة وباس راسي - اتمازح وياچ رويحتي غير انتِ تجيبين التايهة شلون ما أحبنچ وحگ ربچ اروحن وارد ابوس أيدين ابوي وراسة عبن جبرني اعليچ - اي لو ما هو ما چان تزوجنا - يعرف مصلحتي غير زوجني البت نجمة وهو أعرف الوادم مني نجمة وشني تربيتها - هههههههه راح انغر عليك ترى - يلوگ بوية يلا گومي غسلي خل وجهچ يبرد شوي صاير شحالة بست خدة وطلعت غسلت جاي اروح للصالة امي طلعت من غرفتها لابسة العباية ها يمة وين - ماشية الغسق اتفگدها هي وضناها - باوعت للساعة يوم لساها بثمانية ونص يجوز نايمة - لا دگيت اعليها صاحية حچتها وطلعت.... ضحكت خطية مبين راحت علمود صهيب رغم هو ابد ميتحسس منها او يستحي يعني عادي احنة قبل هم عايشين ويا اهلة مو غريب الوضع علينا درت وجهي جاي اردن الغرفتي سحبني ضحكت ودفعتة اووووي نززتني آنه جايتلك عليش هالحركات حبيبي - محترگ جد جد جد جدي لا تناقشيني كلششش - هههههههههه بس خل ناكل الساهون ما لحگت احسن بطعمة شلونة - انتِ الساهون هنائي وآنه عاد سكري هابط يعني علاجي يمچ انتِ وبس حچاها وباسني بلهفة كلامة كلش ريحني ومثل ما يگول راح اصير أنانية بي وبحبة وآنه ادري بصهيب ما يكسرني ريحان.. عرس خالد وجابر تأجل اكثر من شهر صارت مشاكل وي أهل خطيبة جابر واضطرينا نأجلة تالي تحدد الموعد يوم 2/14 بعيد الحب الهوسة كلها علية خطية ما عدهم أهل حتى الزفة راح تصير ببيتي واكيدن هالشي رغبتي قبل لا تكون رغبة ايوب البنات وياي ما قصرن بشي خصوصاً حريم اخوي من ثناء لحد ترف ظنيتني راح اتعب تالي شالن عني كل التعب الله يعافيهن صارت الزفة قريب الثمانية وعبن أيوب يزف خالد وعمتة ويا بالصدر رحت بسيارة إسحاق اما جابر زفة حنظل صعدت ليورة يم ود وغسق بالصدر بدت الزفة شكبرها هوسة والسيارات ما تنعد وهالشباب متسودنة واحدهم اليگول قرد كل شوي وناط گدامنة غسق.. خبلونا جماعة العرسان كل شوية يصيرون يم إسحاق حركات وشحطات من يمي لزمت گلبي لا يسوون حادث طول الطريق إسحاق يصيح عليهم بس اكيد ميفيد فرحانين وفرحتهم ميعبرون عنها إلا بهالسوالف بدون ميفكرون بالعالم وبروحهم خلصت الزفة تقريباً ورجعوا استداروا قريب منوصل للبيت علگوها مرة ثانية نزل الجامة إسحاق ديحچي وياهم كسر گدامنا واحد منهم فجأة وبدون مقدمات فقد إسحاق السيطرة على السيارة لو يضربة لو يضربنا بالرصيف حط ايدة گدامي اني ورقية وصاح بريحان عينچ اعلة وووود بـ ايدة الثانية فر الستيرن حيل شحطت السيارة دارها سريع صارت الضربة من جهتة براسة وچتفة اما احنة ما صارلنة شي بس انخضينا من قوة الحركة باوعت علي خايفة والبنات يتصارخن وجهه كلة دم الزفة وگفت من صوت الحادث فتح الباب ونزل الشرار يتطاير من عينة لزمهم رزايل وغلط ما سمعتة من إسحاق قبل اخر شي گلهم حسابكم وياي اجة ايوب يهدي بي بعدين دنگ علية وعلى ريحان ها خوبن ما صابكم مكروه ريحان.. لا الحمد لله بس اخوي تأذة شوفة خطاية هز راسة ورجع علي بالگوة سكتة عنهم گلة امشي ويا اخوتك ما قبل صعد بالسيارة واشرلهم اتحركوا باوع علية ورجع راسة على ود وريحان بيچن شي بوية خاطر اخذچن للمستشفى غسق.. إسحاق وجهك كلة دم إسحاق.. ضربة عادية لا تشيلين هم المهم انتم بخير حچاها وسحب الكلينس مسح گصتة وصلنا العرسان ورجعنا من نزلت شفت السيارة ضربتها قوية من جهة إسحاق زين ما صارلة شي أسم الله دخلت للبيت رقاوي متنحسة و ود عيونها حمر بس بدلت ملابسهن نامن طفيت الضوة وطلعت إسحاق واگف گدام المرايا يعقم بالجرح سحبت الگطن منة اخذتة للچرباية نظفت وجهه زين دافر راسة لأن يم اذنة مجروح صرخ ها شبيك شيوجعك - متني متشنج - شو خلي اشوف انزع قميصك فتح الدگم انصدمت المنطقة كلها حمرة باوعتلة بخوف إسحاق خاف عندك كسر لا سامح الله - لا بوية لون عندي كسر تشوفيني گاعد جدامچ هيچ ؟!! - لعد ليش هيچ حمرة - رض قوي عبن الضربة صارت اعلة هاي الجهة طلعت ع السريع جبت زيت الزيتون ودهنت المنطقة بس الوحها يصيح شلون حظ عود ردت اصالحة اليوم بالگوة گدر ينام خطية طفيت الضوة علي ولميت الهوسة بالغرفة طلعت غسلت وجهي ورجعت نمت گبل بلا عيد حب بلا بطيخ هو احنة شكول هاي السوالف ريحان.. تأخرنا يم العرسان كلش قريب الـ 12 يلا ردينا بس طب ايوب غير ملابسة وتمدد صاح طفي الضوة مسودني هالأشهر خاطر يشرد من موضوع الخلفة ما يتقرب مني رغم آنه اعرف كلش زين هو ما يگدر بدوني تقربت منة كالعادة حاط المخدة اعلة وجهه سحبتها بعصبية - گوم لا تشرد بالنوم ادريك تريدني بس خايف ايوب - لا بوية تعبان - اي عادي آنه همينة تعبانة - چا ما تنامين بس حچاها ابتسمت ودنيت منة ابتعد يضحك بستة من خدة گبل سحبني الحضنة - يعني ما راح تگعدين راحة شلون وياچ تالي ريحانتي - مشتاگتلك شسوي حبيبي - وآنه مشتاگ الكل شبر بيچ يرويحة حبيبچ وهم رجعت احسب الأيام ادفع عمري بس ارجع اشيل طفل ببطني خسارتي الأبني ما نسيتها ولا راح انساها إلا اذا حبلت نوبة الأخرى غسق.. يومين وإسحاق على العلاج باليوم الثالث صبح شوية احسن صادف 2/17 يعني عيد ميلادة وعيد ميلاد رقاوي الأول طلع الصبح گال راح اجيب كيكة العيد رقرق گبل وصيتة خلي اسم ود وياها حتى لتتحسس چان ديطلع بس حچيتها ضحك ورجع باسني من راسي أول ما سد الباب اتصلت بشمس سولفتلها العندي گالت راح اشوف بيجات بالبصرة حتى طلبچ للعصر يوصل والكيكة هم ويا الهدية نص ساعة ورجعت راسلتني واتس اب دزتلي صور علبة بيها محبس رجالي وعلامة الميزان وعطر وساعة وقلم ودفتر صغير للمفكرات دزتلي ؟؟؟؟؟ رديت اي حلوة هو شكو غير هالسوالف ضحكت وگالت راح اوصي گمت رتبت روحي للظهر اجة تغدة ونام ساعتين وطلع همزين ويا طلعتة اتصلت شمس گالت راح يوصل الطلب وانطيتهم رقمچ عشر دقايق واتصلوا جابوا الهدية مغلفة بشكل يجنن توني داطب اتصل علية مندوب الكيك اخذتها منة للثلاجة گبل حطيتها بالطابق الأخير حتى متبين كملت تجهيز روحي وبعدين سبحت البنات وبدلت الهن مسويت عشى كافي الكيك راح يطلع من خشمنا اجة قريب الثمانية جايب اشكال ويا هدايا على ألعاب على زينة خلة البنات يرگصن من الفرح محتارات بـيمن يلعبن رتبت زينة الصالة وجبت الحلويات السويتهن رجعت لگينة ديجهز بالميز جايب كرزات وحلويات جاهزة وچكليت وانواع النساتل باوعتلة وضحكت شدعوة هالگد جايب - عيد ميلاد الغالية غير كل هذا شوي اعليها خلني اعوضها عن الأيام العاشتها بدوني ولو ما تتعوض صعب حسيت كلامة بي بسمار الية مو كلش اهتميت هسه راح يبين مهتم لو لا من يخلص عيد ميلاد رقاوي بدينا نحتفل والبنات فرحتهن ملت المكان اكلن رگصن تونسن وإسحاق خو نسى نفسة وياهن أول مرة اشوفة فرحان هالگد رقاوي هم ممقصرة لوگية درجة أولى بحيث مطيرة عقل الرجال من راسة بسوالفها وحركاتها الحلوة خلصنا الأحتفال اخذتهن للغرفة اللعابات بـ أيدهن ما قبلن اخذهن بدلت ملابسهن ونومنهن ع السرير وياهن طلعت إسحاق ديلملم بالصالة اخذت الغراض من ايدة عوفهن عنك اني أرتب باوعلي وگعد ع التخم حسيت نظراتة بيها سؤال وين معايدتي غسق مو اليوم عيد ميلادي فرحت كلش هو هذا الأريدة بالضبط لازم يسأل حتى أعرفة مهتم لو لا خو ما اتنازل وحدي كملت الصالة لميت شعري واجيت يمة - ها راح تنام - اي نعسان طفي الضوة من دربچ رحت طفيتة والضحكة على وجهي دامشي للغرفة چان يگول خوبن حتى الكل عام وانت بخير شطبتيها براحتچ بوية براحتچ درت وجهي گتلة يااااا نسيت كل عام وانت بخير عود... واعذريني لأن التهيت ببنتي ونسيتك صح ظلمة بس شفتة شلون ضاج دار ظهرة نام رحت للغرفة ع السريع طلعت الكيكة من الثلاجة ورتبت الميز بدلت ملابس نوم وظلمت الغرفة بس قبلها حطيتلة الهدية ع الچرباية السلسلة مالتة برگبتي دوم شلتها بستها وطلعت تقربت منة وسديت الروب حتى ليحس بشي وتخرب المفاجأة - إسحاق إسحاااق شبيك مو داحچي وياك ليش متجاوب - نايم - والنايم شلون يحچي - عادي رديت اعليچ من الحلم خليني مرتاح لا تزعجيني - گوم الغرفة بيها صوت مدري شنو مثل الوزة - وزة شني - ما ادري مال كهرباء اخاف اكو شي يريد يحترگ لأن الصوت كلش قوي صدگني وگام بسرعة رحت ورى فتح الباب الغرفة ظلمة بس ضوة الشموع التفت علية باوعتلة من ضوة المطبخ چان مبتسم بـ أبتسامة خفيفة سحبتة من أيدة وسديت الباب - كل عام وانت روحي وكل حياتي كل عام وانت سندي كل عام وانت أبوية وأمي وأخوية وكل شي خسرتة كل عام وانت الرجال الحساديني علي كل العالم كل عام وانت قوة وعنفوان الغسق كل عام وانت الشخص الوحيد الي مراح اندم بيوم لأن خليت بي كل ثقتي عبالك انسى عيد ميلادك اكيد لا اني بولادتي وبعز زعلي منك تذكرتة تريد هسه وبعد كل شي سويتة وقدمتة الي انسى وانساك !!! شكراً إسحاق شكراً ولتگولي لتشكريني لأن ماكو غيرك يستحق الشكر من بعد رب العالمين طبعاً شكراً على حقي الرجعتة الية شكراً على حق شجن شكراً على قبري الهدمتة وقبر أبو علي العمرتة بحبك شكراً على الحب القدمتة الية شكراً على ودة ورقاوي احلى هديتين حصلتهن بحياتي ومچان حصلت عليهن لو ما انت حط ايدة على حلگي ودنگ همس بصوت دافي - شكراً الچ شكراً اعلة إسحاق الرديتي لية بعد ما فگدتة سنيين رفع راسة باوعتلة مبتسمة راد يبوس شفتي حطيت أطراف اصابيعي منعتة بسرعة - لحظة بس اسمعني اريدك توعدني قبل كل شي بعد متشك بية لو تشوفني بعينك إسحاق - تخلصت من مرضي رويحتي ويا ما تخلصتي انتِ من الماضي وهيچ صرنا غير غسق وإسحاق الماتوا سحبتة من أيدة للكيكة يلا لعد اتمنى وطفي الشمعة لازم تطفيها مو راح تطب بالكيكة ضحك وغمض عيونة شوية وطفاها گتلة شنو تمنيت التفت علية ولزم أيدية الأثنين بقوة - تمنيت طفل اخر منچ خاطر اعيشن وياچ كل يوم بيومة واعوضنچ واعوض رويحتي عن كل شي فاتنا بحملچ الأول اتحمل عصبيتچ بالحمل تقلب مزاجچ تعبچ سهرچ تنساتچ احضر ساعة ولادتچ خاطر اهون اعليچ كل شي غسق كل شي فاتني وگصرت بي وياچ اريدن اعوضنة ابتسمت وبست خدة رحت جبتلة الهدية وشغلت الضوة - كل العمر مو بس كل عام وانت حبيبي وأبو اطفالي - وكل العمر وانتِ نبض هذا... ودگ على صدرة فتح الهدية وأبتسم باوعتلة بدلع چان يگول لا تلعبين بأحوالي يبت الناس - هههههه ليش شسويت قابل - ما سويتي بس جاي تسطريني بحركاتچ هاي - امممممم بس انت ميزان واني ادري بالميزان ميهزة شي - اي آنه يسموني الميزان بس كل توازن ما يظل عندي جدام حسنچ فستقة حچاها وباسني لهفة سنتين اتترجمت بنص ساعة ويا كل لمسة منة يثبت حب الميزان الفستقتة بس هالمرة حب جديد كلة ثقة وعزة نفس غير الفات..... يتبع | ||||||||
|  |
|
12-04-21, 03:01 PM
| #92 | ||||||||
| مراقبة عامة ومشرفة منتدى الروايات المنقولة
| البارت الأخير ج2 #وضاقت_الأرض_بي للكاتبة #لبنى_الموسوي هناء.. 2/20 هالتاريخ الأجتني بي احلى مفاجأة كملنا الغدة وراحت امي تنام سويت چاي الصهيب ورحت للغرفة چان گاعد يگلب بالموبايل ويمة ظرف انطيتة الچاي وعيوني علي شنو هذا النوب مبين هدية لأن مغلف بـ أطار ؟!! ردت اشيلة اخذة بالعجل - ليش هذا مو الي - لا - چا المن !!! - مال صاحبي موش يمچ السالفة - هاااا گعدت ضايجة اموت اذا ما اعرف شنو شوية وگمت أركض سحبتة راد ياخذة ما خليتة فتحت الظرف بي ورقة طلعتها ع السريع لزم خاصرتي درت ظهري علي صرت اقرا بصدمة أمر أداري بتعيين هناااااء ؟!!! باوعت علي باس شفتي لساعني ما مستوعبة السالفة بوستين والثالثة صحاني - شمالچ رويحتي - شلون ليش يمتتتة ما مصدگة صهييب والله ما مصدگة - صدگي بوية صدگي صار بالسنة اشتغل اعلة الموضوع واليوم تم الحمد لله هساع صار عندچ شي تلهين روحيتچ بي ما اريدن بعد أفكار سودة الحياة حلوة والحب احلى وآنه وياچ وخل الوادم شما حچوا يحچون راسهم والحايط - أحبك والله أحببببك - چا آنه مييييييت حب بيچ ي هنائي راد يبوسني دگ جهازة باوعت صخر فتح الخط الصوت عالي گلة تعال البغداد الجماعة جاي يسألون اعليك نهى المكالمة باوعت علي - يا جماعة - طيف اختي - هههههههههههه وآنه عبالي منضم الحزب الجماعة - هههههههه والله اعليچ سوالف - اخذني وياك - وين - البغداد - بوية غير تامرين الأخر الدنيا همينة اخذچ موش الـ بغداد وبس ريحان.. بعدني احسب وممصدگة فاتتني يومين ايدي على گلبي الثالث الرابع بالخامس ما تحملت چنت يم اهلي دگيت اعلة عمة سكينة واجت بالعجل رحنا للمختبر القريب بين ما طلعت النتيجة طلعت روحي وألف الحمد لله اكو حمل رديت طايرة ما عولت يصير الليل ويجي ايوب ياخذني للبيت أول ما دشيت للغرفة جهزت ورقة التحليل طب وراي انتظرتة يغير ملابسة دار وجهه مبتسم جاي يحاچيني شلت النتيجة گدامة - شني هاي - اقرا شني ما تعرف يعني قراها لو هو انگلب وجهه ادري بي خايف بس عادي يعني أولها وتاليها راح احبل خوبن ما اظل كل عمري بلاية خلفة باوع علية ورجع باوع للنتيجة - ها ما تگول شي - صار التردي بالعافية اعليچ - ابد ما فرحت يعني - آنه خااااايف اعليچ ولچ حسي بية حسسسي ريحان لون صار ليچ شي ما راح اسامحنچ انتِ بالذات لون تركتيني ومشيتي مثل البقية ما راح اسامحنچ عبن كل شي جاي يصير وراح يصير من ايدينچ انتِ - مستحيل اتركك انت مصدر قوة الريحان والقوي ما يهزمة شي بالحياة - حچي هذا حچي - لوعة گلبك الردت من حلگ الموت ليك ما راح تموت وتتركك اطمأن يعمر ريحان وحياتها انت - اااااخ يلوعة گلبي چنتي وراح تظلين ملوعتة الـ هالضبع المسيچين - تشكي يعني من لوعة گلبك - اشكي گليبي الـ گليبي وما اشكي من لوعتة بيوم بس حچاها حضنتة اكيدن يظلة خايف بس آنه عكسة ابد ما چنت خايفة من هيچ حاولت اخفف عنة بكلامي ولو بس شوي شمس.. شهرين مرن على كلام الشيخ شهرين وصخر زعلان ميمر ولا يتصل بس مجرد يدز المصرف بـ ايد رجل أختة مثنى اليوم طالعة من المستشفى اجاني فرات هاي مو أول مرة اجة قبلها اكثر من مرة بعد ما عرف اني ببغداد بس ما چنت انطي مجال يحچي حرف واحد دامشي قطع علية الطريق وگفت اريد اشوف شيريد - ها شلونچ شموسة - شعليك - اهاااا مو نسيت اعذريني ادري بيچ شلونچ ميحتاج اسأل متابع تفاصيل حياتچ أول بـ أول - شتريد فرات ؟!! انت مو خطبت هاي الچنت مصادقها وتطلع وياها تلوگلك والله حل عني ولتراويني وجهك القذر بعد ما عايزة مشاكل - ههههههه شنو غرتي اي ليش لا فرات ديبني حياتة وانتِ حياتچ دتتهدم بس ولا يهمچ اني مستعد افسخ الخطوبة ونتزوج حتى لو عندچ أربع أطفال عادي الأطفال احباب الله - لك شدتخربط اني مرررة متزوجة بعدين بنات العالم مو لعبة عندك اليوم تخطب باچر لا ما عجبني الوضع اريد افسخ - عوفچ من بنات العالم حاچيني يالمتزوجة سي السيد مالتچ وين هااااا وين گتلچ حبيبتي تذكرين يجي اليوم وترجعيلي مكسورة بس ما صدگتي حتى تعرفين محد بكل هالدنيا يفيدچ ويخاف عليچ غير اهلچ المنچ وبيچ لأن الغريب ميفيدچ بشي - هه أهلي ؟!! ليش اني لو عندي أهل هذا حالي !! منو أهلي بلا زحمة الطمعوا بشوية فلوس وقطع أراضي وعلمودها چانوا مستعدين يسلبون شرفي لو عمامي لتعاركوا بيناتهم يا سبع منهم ياخذني الأبنة لو انت يا فرات العار علمود شوية فلوس قتلت روح بريئة مالها ذنب بحقدك عموماً غلطان ي أبن عم الجيران ابد ما انكسرت لأن اني شمس ومستحيل الشمس تنكسر بيوم لتحلممم ورغم كل شي عندي رجال گول وفعل رجال شاريني بماي عيونة ورغم كل هالزعل لا تخلى عني ولا راح يتخلي ويكسرني علمود والله شنو فرات افندي يتشمت وانصحك لتحاول فرات مراح يجي اليوم التتشمت بي صدگ ولا راح تحصلني أول بالأصح ممكن تحصل فلوسي هسه اروح اسحبلك من البنگ كم شدة اعتبرهن دفع بلاء عني وعن أطفالي واشمرهن بوجهك ومن يوگعن بالگاع تركض عليهن مثل الكلب من يركض على قطعة اللحم هذا اقصى شي تگدر تحصلة مني وروح أهلي أما شمس وأسمها ومكانتها عشم ابليس بالجنة وانت وابليس واحد بالنسبة الية على الأقل حچيتها ومشيت راد يلزمني سحبت أيدي حيل گوة وصلت للسيارة صعدت گبل نزلت الجامة مخنوگة خنگة بس الله يعلم بيها سقت مسافة بلا شعور نزلت دموعي هواي حاولت اداريها بس هسه صدگ حسيت بنفسي تعبت وما عندي طاقة اتحمل هالمسؤولية وحدي ما ادري شلون وصلت للبيت بعدني بالباب سمعت صوت جهالي واصل للشارع فتحتها وطبيت لگيتهم داير مداير خالتي بالصالة يبچون وهي گاعدة بنصهم وايدها على راسها - السلام عليكم - وعليكم السلام تعالي سكتي جهالچ ترى تعبت والله - شبيهم متفهميني - شبيهم يعني يبچون على أبوهم كالعادة شمرت الجنطة من أيدي ورحت حضنتهم ردت حاولت قريب الساعة اقنع بيهم ولا اكو واحد من عدهم سكت كلش متعلقين بـ صخر اقصى شي يصبرون عن غيابة أسبوع وراها يتنحسون وهو عودهم على هالشي دللهم ويوميا چان يتصل فيديو وهسه فجأة بدون أي مقدمات اختفى من حياتهم !!! راسي وراس خالتي انفجر من البچي حتى ميگدرون يجرون النفس بعد ما تحملت اكثر گمت اخذت الجنطة ورحت الغرفتي اتصلت بي ما رد گعدت ع السرير ابچي مثل الجهال ليش هيچ شلون انطاك گلبك تسوي بينا هيچ والله مگاعد اصدگ صوتهم لهنا واصل طلعت فتحت الباب وصحت بيهم كل صوتي كاااااااااااااااااااااااا اافي من الخوف بس شهگتهم تنسمع حضنتهم خالتي وصاحت بية - تخبلتتتتتتي وووولچ من الصبح وهم يبچون فوگ راسي ما اگدر يعني اصيح عليهم هاي ساعة ما تحملتي حضرتچ طبيت للغرفة منهارة اعصابي تلفت ما اتحمل أكثر من هالشي بعد شلت تلفوني اتصلت بالشيخ جاوبني واللگمة بحلگة سلمت علي وانتظرتة يخلص - هلا بنيتي هلا - وبيك اكثر عمو شلونك صحتك شلونها ان شاء الله بخير - هههههههه يوميا ادگن اعليچ ويوميا تسأليني ذات السؤال عموماً لا تاكلين همي صحتي كلش زينة و الحمد لله - دوم يارب عمو اني فكرت بكلامك هواي موافقة ارجع استقر بالبصرة ببيت وحدي اني وأطفالي - اي يا الله واخيراً بس اكمل الغدة وادگن اعليچ خاطر نتفاهم بالموضوع - ان شاء الله سلمت علي وسديت الخط اسمع خالتي تقنع بالجهال ماكو أقل الدقيقة ودگ جهازي باوعت صخر ردت ما اجاوبة مثل ميسوي هو بس لا اني اريد اخلص من هالمشكلة مو وقت عنادي رديت بدون ما احچي گال شلونچ - الحمد لله بخير - صدگ تردين تردين للبصرة مثل ما گال ابوي ؟!! - مجبورة شسوي أطفالك يبچون عليك وانت ولا يمك خو ما اخليهم هيچ اني راح اجيبهم وأجي لأن مهما صار همَ يظلون ابرياء مالهم ذنب بزعلنا - تنور البصرة بيكم بوية - شكراً - وين همَ افتحي التصوير خاطر احچي وياهم شوي طلعت برة بعدها الشهگة لأزمتهم من كثر البچي اتصلت بي وخليت الكاميرا گبالهم بس شافوا رجعوا يبچون بالگوة سكتهم اقتنعوا بكلامة من گلهم باچر جاي اعليكم اتصل الشيخ وتفاهمنا بالموضوع توسلت بخالتي تجي وياية ابد ما قبلت گالت اني انولدت هنا وراح اموت هنا بس اكيد شوكت متحتاجيني تلگيني يمچ أسبوع تقريباً ورتبولي الوضع هو والشيخ اجة علينة يوم الخميس طب ديسلم على خالتي بس شافوا الجهال گبل ركضوا الحضنة يتصارخون مو يبچون ظل يبوس بيهم ويعتذر بعدين انطاهم العاب التهوا بيهن فـ سكتوا شوية تغدينا سوة و ودعنا خالتي شبعت بچي علينة خطية تعودت علية وع الجهال مو سهلة سنين واني عايشة وياها وعدها صخر كل اسبوعين يجيبنا الها تشكرنا منها وطلعنا وصلنا للبصرة بالليل وگف السيارة يم واحد من البيوت الشيخ خطية چان واگف بالباب استقبلنا بالصلوات ردت اطب اشرلي صخر هذا بيت غسق وذاك هناء يعني كلهن يمچ باوعت زين والله بيت غسق بصفي بالضبط اما هناء بعد عني بيتين بس دخلنا سلم الشيخ وراح البيت كامل من كل شي وماطول ذوق صخر فـ أكيد يعجبني لأن ذوقة يجنن خصوصاً بالديكور افتريت بالبيت اني والجهال وراها بدلت الهم حتى ينامون تعبوا من الطريق راد صخر يگوم بچوا علي بدون ما اباوع واني دابدل لجوهرة گتلة ظل هنا خطية مشتاقيلك ما ادري شنو ردة فعلة لأن عيوني مو علي اخذتهم ينامون بچوا يخافون يعوفوا ويروح هيچ تعلق ما شايفة بـ حياتي كلش متعلقين بـ أبوهم مو شلون مچان اخر شي گام هو نومهم طبيت للغرفة تعبانة بس بدلت نمت على وجهي للفجر شبعت نوم گعدت لگيتة نايم يمهم بالغرفة وهمَ واحد منا ومنا واثنين على ايدة ما ادري شلون متحملهم هيچ الكل فرح برجعتي دوامي نقلة صخر ردت ما اداوم بسبب الأطفال بس هو أول واحد عارض هـ القرار خالة نجمة گالت خليهم يمي ثناء غسق الحجية كلهم ما قصروا وياية رجعت للدوام بالبصرة وحياتي مشت الحمد لله شهر يلا گدرت استقر شوية صخر من يوم ما رجعنا صار يبات يمنا اني هم ما عارضت أطفالة محتاجي ما اگدر احرمهم منة ويمكن اني محتاجتة اكثر منهم بس الخوف مديخليني أتقدم خطوة اليوم العصر گاعدة الملم بالبيت والجهال ويلعبون يمي اندگت الباب خليت حجابي على راسي وصحت منووو اجاني صوت مريم آنه عمة رحت فتحتلها ع السريع تقريباً يوميا دتجي تظل لليل وتروح تتونس ويانة طبت سلمت داسد الباب طبت أمل باوعتلها متفاجأة سلمت رديت بثگل گالت ها شني ما راح تگليلي تفضلي فتحت الباب وأشرت الها بـ أيدي طبت بوست الجهال رحت للمطبخ جهزت العصير والكيك رجعت لگيت باقر ديلعب وياهم بستة وانطيتة 25 ألف - لا هاي شني شمس - مو الچ السلامتة ما صارت فرصة اشوفة بعد العملية - رحم الله والديچ - هزيت براسي بدون ما اجاوبها ظلينا ساكتين شوية وگالت جايتچ بشغلة واترجاچ لا ترديني - خير ان شاء الله - ردي الصخر خطية مالة ذنب هو - أمل - بس اسمعي مني وتالي احچي التردي آنه الغلطانة هو مالة ذنب كل الصار امي وخواتي ونجاة ونجيبة لعبن بعقلي بعد أربعين إلياس الله يرحمة اشتعلت الحرب الباردة من جدي اعلية واعلة فروخي جدام الشيخ گال فروخنا ما ننطيهم وجدامي يگول تظلين هنا الوحيدچ وفروخچ يردون الأهلهم عبن آنه ما اتحمل مسؤوليتهم عيشني بـ أيام بس الله اليعلم بيها تالي اجاني عمي گال تزوجي اختاريت صخر عبن هو يحبچ وما راح يجي اليوم اليتنوع لية بنظرة مرة بس صار شي عكس كل تصوراتي أمي وخواتي لامني شمس ماراح ترضى ويجي اليوم وتخلي يطلگچ لأجلها وصخر ما يرفض ليها طلب ظلن زن زن زن بـ أذني وانتِ تدرين الزن اعلة الأذان امر حتى من السحر واكيدن شفت كلامهن صح عبن ادري بي شكثر يحبچ وما راح يتردد يعوفني لون انتِ طلبتي منة هالشي واستمر الحال هيچ سنة منين ما ادورن وجهي يحچن بـ أذني خصوصاً آنه شفتچ شلون تغيرتي عگب زواجي وعرفت ما راح تظلين ساكتة وبقن يمشن بية بلاية عقل سمعت چلمتهن وصار الي صار لحد اليوم الراد يطلگني بي بسبب اختي هنا آنه عرفت برويحتي غلطانة خواتي موش هيچ ما يردن مصلحتي بكثر ما يردن خراب بيتي واستقراري ويا فروخي وعگب ما شفت رجولة صخر وتمسكة بشهامتة رغم كل شي عملتة ويا عرفت الصح انتم والحولي كلهم غلط وربچ چنت اتمنى تصير لية هالفرصة واجيچ بس ما اتجرأ لحد اليوم الصبح اجاني الشيخ وردينا نحچي بالسالفة من عرف گال عليش ناطرة روحي ليها واحچي هالحچي كلة وهي تتفهم شمس گلبها چبير والدليل رغم كل مشاكلها ويا زلمتها ما رضت يطلگچ لأجل فروخچ نطرتچ تردين من دوامچ وما صدگت صار العصر اجيتچ بطرگ العباية سامحيني شمس وردي الزلمتچ وراس ابني هذا المريض حچتها وطفرت على أبنها تبچي لزمت راسة - وعافيتة المسلوبة منة آنه موش هيچ ولا تخافين مني ما طولني اعلة اسمة ومستقرة ويا فروخي ما اريدن شي بعد بس لا تخلي يطلگني التفتت داير مدايرها تمسح بدموعها شالت القرأن من الميز حطت ايدها علي وقسمت يمين عظيم يكسر الظهر صخر محرم علية مثل حرمة ابوي وربي يحرمني من فروخي وعافيتهم لوني چذبت ردي شمس والقرأن خصيم بيناتنا ساعة الأخلف بچلمتي هو الياخذ حگچ مني موش الوادم ما حچيت شي هي هم گبل اخذت أطفالها وطلعت مدري شصارلي خلصتها بچي لليل كلما انسى الموقف أرجع اتذكر وابچي اجة صخر بالعشرة سويت العشى گال شمالچ گتلة تعبانة تعشوا ورحت نومت الجهال بسرعة حتى اختلي بنفسي رجعت الغرفتي گعدت ع الچرباية ابچي صوتي ارتفع بدون ما احس گبل صخر فتح الباب وطب من شافني ابچي ركض گعد يمي وسحبني الحضنة انهاريت اكثر عبالك اريدلي حجة ظل يمسح على راسي وعاصرني بحضنة لحد ما هدأت - شمالچ بوية من اجيت ولساع آنه احسن بيچ شي وانتِ ما ترضين تحچين لية - خايفة مخنوگة ضايجة كل شي صخر كل شي ماكو شي ديريح گلبي - احچي اسمعنچ خاطر ترتاحين شوي سولفت الة كل كلام أمل باوعلي مبتسم ومسح دموعي الگاعد تنزل مثل المطر بـ أطراف اصابيعة - گبل لا تحچي أمل آنه حچيت گتلچ ما اسويها حرمة اخوي ما راح تصير لية حرمة الحين ما يوسدوني بلحدي وعليش ادور غيرچ وآنه ما اشوفن إلا انتِ وبس صار شگد هاجرتني ما اگدر يعني اروحن اتزوج مو إلا أمل لا الحريم خير من الله وألف وحدة تتمنى تصير بمچانچ ولا تنسين انتِ دفعتيني اكثر من نوبة گلتي روح تزوج بس آنه ما سويتها ولا راح اسويها تعرفين عليش ؟!! آنه اجاوب عنچ اولاً اعرف هالشي ما نابع من هنا.... وأشر على صدري ولون سويتها تموتين مثل موتتي بغيابچ وموش صخر اليرضى يصيب حرمتة الي تعذب علما حصلها مكروه ويظل واگف يتفرج ثانياً والأهم من الـ أولاً الدنيا بعيوني مثل سما ربچ الواسعة لو ما هي ما تمشي الحياة الشمس والگمرة واحدهم يكمل الأخر أما النجوم وجودها وعدمة واحد عندي آنه بلياچ اظلم شمس گمرة بلاية شمس معناتها الحياة توگف ومامش بشر يحب حياتة توگف بالظلمة عبن احلى شي بدنيانا نور الشمس رويحتي باوعت علي ابچي گال صح لو لالة هزيت براسي أي - بس انت تخليت عني بـ أخر ايام - ردت اجبرچ تردين عبن ادريچ مأمنة هناك بسبب جيتي المستمرة اعليكم - خبيث والله.... حچيتها بشهگة گبل مسح دموعي وباسني استسلمت مباشرتاً لأن چنت مشتاقتلة حيل همس بـ أذني بعد ما نومني مشتاگلچ شمس دنياي اشتاگيت شوگ المسودن عبن ما ظل عگل براسي عگب عنادچ الحرگتيني بي ابتسمت والدموع بعيوني دنگ باسني بلهفة وصارت هالليلة من احلى ليالي حياتي بعد سنين من العذاب والتفكير الحمد لله مشت حياتنا واخيراً صح خايفة وراح اظل خايفة بس اعتمدت على شغلتين الأولى ثقتي بصخر وحبه النادر والثانية اليمين العظيم الي قسمت بي أمل على القرأن بعافية ابنها العليل واثنينهم يعرفون مو شمس الينضحك عليها وتسكت غسق.. أربع اشهر مرن على حملي إسحاق شايلني بالصلوات توصل بي من يجي للبيت يشيل عني كل شي حتى دراسة ود فرق بيني وبين ريحان أسبوع بالحمل دخلت هي بالرابع وانتظرتني أسبوع يلا رحنا للسونار قبل لا اطلع خبصتني ود ان شاء الله بنية وان شاء الله بنية بصراحة متفرق عندي بس لأن حملي صعب واريد اشوف مستقبلي تمنيت ولد اخذت ريحان سونار طلع بيها ولد من الفرحة بچت الحمد لله واخيراً رب العالمين عوضها عن ابنها الراح صعدت وراها وغمضت المهم عندي الطفل سالم وكل شي يجي من رب العالمين خير وبركة سمعت نبضات قلبة فتحت عيني باوعت للدكتورة ها بي شي الطفل ؟!! - لا بالعكس ولد وصحتة عال العال سحبت نفس براحة وغمضت لو اشكر ربي واحمدة ألف مرة هم ما اوفي حق افضالة ونعمة المستمرة علية طلعنا اني وريحان إسحاق وايوب ينتظرونا اثنينهم خايفين مدري شجاهم صاح ايوب ها ريحان بشري بوية بيچ شي هزت راسها وبچت خطية من الفرحة ايوب.. احچي عاد عليش تبچين ريحان.. فرحانة راح يجيني ولد ايوب ايوب.. چا ألف الحمد لله بوية يلا تعاي اوصلچ خاطر اردن الإسحاق عدنة شغل مهم حچاها وصعدوا بالسيارة سحبني إسحاق من ايدي صعدني وسد الباب أول ما ركب گال احچي عليش ساكتة مو گليبي راح يوگف - راح يجي اخ البناتك حبيبي هو اني گلتها ما احس إلا رفع ايدي باسها ضحكت منا العالم شدتسوي يمعود - هم صح خلي الفرحة للبيت... وغمزلي مرت الأيام والأشهر والحمل كلش متعبني اني لا شيء يم ريحان خطية سكرها دمرها منا لما وصلت للتاسع ماتت باليوم ألف موتة أول ما دخلت شهرها حددولها عملية انخبصوا بوقتها حتى إسحاق اخذني ورحنا بتنا يمهم بيومها علمود اظل وياها يدري بيها خايفة الحمد لله جابت بالسلامة بعد ما وگعت گلبنا ايوب سمى أحمد حسب رغبة ريحان وهيچ انزاح اكبر هم چان محاوطنا طول هاي السنة اني تأخرت وراها اكلت شهري كلة اخر يوم بالتاسع يلا اجتني الطلوگة ما عافوني خطية كلهم يمي عمة صبيحة سكينة الحجية خالة نجمة حتى البنات وكلهم كوم وإسحاق كوم ثاني احتار شيسوي خايف علية اكثر من خوفي اني الگاعد اطلگ والوجع مسيطر علية صدگ حسيتة عوضني وين ولادتي الأولى و وين هاي هناك احتاج الكلمة وهنا بس اريدهم يسكتون ويعوفوني ماكو محاوطيني من جميع الجهات والحمد لله جبت بالسلامة طلعت من المستشفى إسحاق ينتظرنة بالباب گبل باس راسي گدامهم اخذ مني يوسف أذن بـ أذنة ورجعنا للبيت ود طارت فرح بأخوها بس اويلي من غيرت رقاوي ترف.. صارت 2020 كورونا والدنيا مخبوصة حتى المدارس تعطلت وبسبب هالشي جاب حبيب موبايل الي حتى ادرس ع النت خصوصاً هالسنة اني وزاري والموضوع صعب علية ما قصر وياية بشي چان يرجع من دوامة تعبان يشرحلي لحد ميغفى على نفسة شگد اتوسل بي يرتاح ميقبل علاقتي بي تطورت شوية عاف سالفة بت اخوية وخلصها بوية ارحم عاد بهواي حبي الة يكبر يوم بعد يوم واحس بأهتمامة بس مع ذالك ابد ما تقدم خطوة بـ أتجاهي رغم اني بينت الة رغبتي بي اكثر من مرة اليوم الظهر طبيت للغرفة تعبانة من شغل البيت بعدة ما راجع من برة ظليت اگلب الكتب بملل سمعت صوتة برة گبل گمزت للزاوية ختلت مدري ليش طب للغرفة صاح ترف وينچ بوية ما رديت راح للحمام ما لگاني صاح بصوت عالي تررررف چنت ورى گبل طلعت ندستة بخاصرتة فز فزة بس الله يعلم بيها - شمالچ بوية صگد تحچين - هههههه اي - اللهم طولچ يا روح هالجاهل اليمتة تكبر ما اعرف - اني مو طفلة - جاهل وموش أي جاهل طگة ونص همينة - مو جاهلة - جاهلة - مووو جاهلة موووو جاهلةةةةة حچيتها وتقدمت بستة من شفتة ظل متصنم لا ياخذ ولا ينطي من الصدمة حطيت ايدي على رگبتة وحضنت خصرة حيل شووية وبادلني البوسة بس بسرعة صحى على روحة بعدني يصيح - شجاي تسوين تسودنتي خوبن ما تسودنتي حچيت ويا نفسي يلا هي خربت - اي تخبلت انت خبلتني كم سنة صارلنة سوة وبعدك تصيح جاهلة اني مو جاهلةةةةة بعد سنة وابلغ السن القانوني شوكت اكبر بنظرك شوكت تشوفني مرة مو بس بت اخوك وبتك وهالسوالف التعبانة ليش تحسسني انت عايش بالخارج ترى البعمري صارن امهات لتفهمني غلط مو قصدي البراسك بس لتگول جاهلةةة ما حچة شي خلة وطلع لليل طب چنت اقرا گعد بصفي ما اهتميت صاح ترف ما جاوبت رجع صاح مو احچي وياچ وسحب الملزمة من أيدي - خير شتريد - احچي عدل بوية ما احب هالنبرة بصوتچ - تفضل اسمعك شرايد حبيب - انتِ شني التردي ؟!! - اريدك اي اريدك لتباوعلي هيچ كافي كبرت واريد اعيش وياك حياة طبيعية وهالشي حقي - اخافن يجي اليوم التندمين بي آنه تركتچ تكبرين خاطر تقررين حياتچ مثل ما تردين حطيت ايدي على حلگة سكتة بسرعة - ليش اندم !!! تتصور اگدر احصل رجال مثلك يحبني ويحترمني والأهم يصيرلي أب وصديق قبل لا يكون مجرد زوج - متأكدة يعني - احبك اني احبك متأكدة شنو ؟!! ابتسم گتلة لتصير خبيث احچي خلي اسمعك گبل نومني ع الچرباية دنگ علية يباوع لعيوني اجة يغمى علية هاي أول مرة يتقرب مني هالشكل دنگ يم اذني بهمس - آنه اموتن اعليچ غير انتِ بنيتي الربيتها اعلة ايديني مثل النبتة وهاي آنه اليوم جاي احصدها - أي وبعد - ونطرتها تكبر خاطر تصير احلى حرمة لية - ههههه وبعد - وراح اسوي ليها احلى زفة تلوگ لـ هالعيون الحلوة بس حچاها گمزت على حيلي - صدگ والله - اكيدن آنه مقرر ومن زمان لون رضيتي بية زلمة اسوي ليچ العرس التتمني - يعني راح البس بدلة بيضة مثل البنات وعرس وهيچ - هههههههه وآنه الأجل فرحتچ هاي مستعد اسوي ليچ بدال العرس عشرة يرويحتي بس حچاها حضنتة ماكو ثاني يوم انطا العمتة فلوس حتى تجهزني أسبوع واحنة نجاهد ولا كأنو صارلنة سنيين عايشين سوة وگاعدين عقال اليوم عرسي من اعقل وأنبل رجال شفتة بحياتي اخذوني من الصبح للصالون وأمي ممصدگة كل شوية وتسأل صدگ اليوم عرسچ شمس.. نفس مأسات كل عرس الهوسة بس علية جوهرة مريضة فـ صايرة نحسة كلش گاعدة يم رجلي وتبچي شلتها وطلعت للصالة ماكو بس النسوان گاعدات تمشيت للممر لگيت صخر واگف يم الباب داير ظهرة ويلعب بالموبايل ضربتة على چتفة تلزم بنتك لو اليوم تنحرم من حقوقك دار ظهرة صهيب گوة لازم الضحكة بس واضحة علي لو بـ ايدي اطم روحي بمكاني المصيبة يتشابهون وجه وگفة وهذا هم مثل اخو لابس نيلي بلا اني شلون اميز من الظهر - أسفة خوية والله أسفة عبالي صخر حتى ميگدر يحچي من الضحكة الحاصرتة مد ايدة اخذ جوهرة رجعت اغم بروحي فشلة متنسى راح تظل يمة وصمة صار عليچ شمس الثولةةةة لاگتني هناء تضحك هاي شبيچ تسودنتي سولفت الها الصار بدل متواسيني خربت ضحك علية گلتلها لو تموتين ما امكيجچ اليوم وعفتها ورحت طبيت للغرفة طيف دتشتغل بيهن اجت بطلب من حبيب علاقتها بالشيخ مو كلش بس أحسن من قبل ع الأقل بالمناسبات صارت تجي لهنا ترف.. رجعنا من الصالون الهوسة شگدها عود كورونا احلى شي گاعدات النسوان ياكلن لگمة ويصعدن الكمامة منظرهن يخرب ضحك صدگ ورغم كل الظروف تونست بيومها كلش احلى زفة صارت صورنا ورجعنا للبيت اخذوني للغرفة شوية وطلعوا لأن طب حبيب عود اني الچنت سباعية تالي صرت مثل الفارة يمة لا اخذ ولا انطي بعد سد الباب وتقرب مني يضحك هزيت براسي شكو چان يگول وينها التصيح آنه موش جاهل - اي مو جاهلةةة - چا يلا راويني الترفة شني ناوية تعمل خاطر تثبت انوثتها الزلمتها بمثل هاليوم ما سويت شي غير البوسة بيها انطيتة الضوء الأخضر حتى ياخذني واصير مرتة تعامل وياية بيومها بكل هدوء صدگ حسيتة أب يخاف علية من كل لمسة وكل حركة وقبل ليسوي أي شي يسألني اخاف داتوجع او أعارض قربة والحمد لله صرت مرتة رغم جمال اخلاقة ورجولتة بالسنين الراحت بس بعد اليوم اكتشفت بي أنسان احلى بألف مرة من الأنسان العاشرتة بالسابق هناء.. العصر گاعدة اني وامي نتفرج تلفزيون اندگ الباب گمت صحت منو ردت مريم آنه عمة تعودت كلما تروح أمها البيت جدها تجي يمي مرات تروح البيت الشيخ ومرات يم شمس بس اكثر شي يمي لأن اني اونسها نوگف نطبخ نرتب الملابس وهي تموت على هالسوالف - ها عمة شلونچ - بخير حبيبتي شنو ماما راحت البيت جدچ - اي وگالت اليوم ابات عبن حبوبتي مريضة شوي - امممم يعني راح تباتين يمي - اي ونسوي كنافة انتِ وعدتيني من النوبة الراحت - هههههه مو تتدللين كنافة وبيتزا وكل شي تحبي يلا تعاي من هسه نبدي جاي نشتغل اجت شمس صدگ بيومها تونسنا عبن شمس هم عدها واهس بهاي السوالف مثلنا شمس.. رجعت من يم هناء بالليل ما سويت عشى اتصلت على صخر گتلة اكلنا ببيت اخوك مراح اسوي شي گال چا آنه اكل يم اهلي واجيكم للعشرة ونص يلا اجة ظل يلعب ويا الجهال لحد ما تعبهم وناموا اجة للغرفة چنت متمددة حضني وظليت اسولف الة شصار اليوم ويا مريم يم هناء وهو يسمعني ويضحك نايمين الفجر الباب تكسر مو اندگ گام صخر مخروع طلع بعد ما رجع ظليت الوب بمكاني شصار ويا يربي هناك واسمع صوت الأطفاء وصياح وهوسة والدنيا مخبوصة برة لبست عباتي وطلعت أركض شفت طفل بالشارع سألتة شصاير - بيت عواد احترررررگ هو گال هيچ لو اني تخبلت بيت عواد يعني أمل يا الله بايتة يم اهلها هي وولدها من الخوف ظليت ابچي واني ما اعرف شديصير وفعلاً خوفي بمحلة بصيف أب 2020 احترگ بيت أهل أمل بتماس كهربائي بسبب التبريد وانفجعنا اكبر فاجعة ممكن تمر علينا أمل وولدها ماتوا ما ظل من أطفال إلياس غير بس مريم يتيمة الأب والأم راحوا وعافوها وحدها ومو بس احنة انفجعنا حميد هم انفجع بـ هالمصيبة لأن ابنة واحفادة ماتوا بهالحادث ما ظل أي بشر من أهل أمل بحيث حميد انجلط وگعد ع الكرسي ولليوم ما تعافى الصدمة چانت كلش چبيرة ما گدرنا نتجاوزها بسهولة خصوصاً الشيخ والحجية على أثرها اثنينهم وگعوا بالفراش أيام طلبت من صخر يجيب مريم اني اداريها رفض بسرعة گال ابوي انطاها الصهيب همين عبن ما عندة جهال وهمينة هناء تجرب احساس الأمومة وياها غسق.. 2020 اسوء سنة مرت علينة احنة بالذات رغم كل مساوئها العامة بس موت أمل وجهالها چان فاجعة متنوصف على كل بيت الشيخ وگدرنا نتجاوزها ونعيش صح بصعوبة بس الحياة تمشي وهذا قانونها للأسف بداية 2021 سوالي إسحاق هوية النقابة وبديت اداوم بالمحكمة ودة كبرت وصارت تعتني بـ أخوانها واني هم ما اتأخر ساعتين تلاثة وارجع علمودهم وهيچ استقرت حياتنا الحمد لله شمس تداوم بالمستشفى وبعدها على اطفالها الأربعة وعلاقتها بصخر احسن ما يكون مريم اجت هدية من السما الصهيب وهناء عوضتهم حرمان الأطفال وصارت تصيح الهم بابا وماما بحيث هناء تحبها وكأنها ربتها من الطفولة الحجية وبعد خسارتها الجهال إلياس وصدمتها الچبيرة بيهم تغيرت كلش خصوصاً بسبب مريم من شافت هناء شلون تداريها وهي تصيحلها ماما سكتت عنها وعن موضوع الأطفال ترف وحبيب عصافير بيت الشيخ ضاري حياتهم احلى ما يكون بس لحد الأن ممقررين يسوون أطفال علمود دراستها ايوب طاير بريحان صارت الة أهل قبل لتكون زوجة عوضتة غياب امة واختة وترست بيتة بالحب والحنان لوعة گلبة بعد هاي وصارت ام أطفالة شلون ما يفرح بيها جمار ما عدنة اخبارة بعد سجن امة ومرتة وخطوبة ريحان اختفى هو وابنة وطبعاً ريحان فرحت لأن متريد شي يذكرها بالماضي كلمن ظلم نال جزاء ظلمة فاتن ونهلة وعامر لسه بالسجون اهلي وولد عمي وكل الظلموني اخذوا العقاب اليستحقوا حميد مقعد ع الكرسي بعد خسارة ولدة رؤى لحد الأن مثل السجينة لا تطلع لا تطب معيشها حنظل بحرب نفسية حتى العرس حبيب مخلاها تحضر بيومها من غير أمها المنعهم هي واخوانها منها بحيث هاي السنة الثالثة لا شايفتهم ولا شايفيها وكلما واحد يفتح ويا الموضوع يسكته بصوته العالي نجاة ونجيبة ابوهم ما قصر وياهم نجاة من الضرب سمعت صار برجلها اعاقة تكزل عليها ونجيبة حابسها بالبيت مثل ما اطفالها تحرموا عليها اتحرمت عليها شمس رب العالمين عرفت بعدين نجاة السبب بكل المشاكل حتى سالفة الفلوس يوم النباگن من غرفتي هي چانت وراها علمود يتهمني إسحاق لأن تعرف علاقتنا بذيچ الفترة چانت متوترة بشكل وما اهتميت للموضوع الصدمات الي تلقيتهن بحياتي اكبر من أن اهتم الهيچ موضوع بسيط من وجهة نظري طيف لسه ما تجاوزت أزمتها أي تحب الشيخ وتتمنى تتقرب منة بس المشكلة متگدر تنسى حياتها الماضية رغم هواي حاولت وياها اما إسحاق فـ تعجر الكلمات عن وصف هالرجال الشخص الأحتواني بعز ضياعي وصارلي وطن يوم الغربتني الدنيا وأب يوم الي تبرى مني ابوية الواگعة من ظهرة ورغم كل شي ظل مثل ما هو ما تغير شهم ورجال بمعنى الكلمة ما فديوم عيرني بالماضي ولا حملني منية افضالة علية بالعكس دائماً من اشكرة يگول ما سويت إلا الواجب والأهم من هذا مثل ما تخلصت من كابوس الماضي هو تخلص من كابوس الخيانة اطب اطلع موبايل اختلط لا فد يوم حاسبني ولا شك بية ولو حتى لو بالكلام هاي احنة مثال بسيط عن نساء العراق الآبيات غسق شمس ريحان هناء ترف اثبتنا الكل العالم احنة قويات بلا سند وعمر الشرف ما ينباع بحجة الظروف كنا ولا نزال شامخات فـ رغم عواء الذئاب تبقى الطيور تحلق بـ أسم الحرية وكل واحدة منا سـ تردد دائماً وبداً أن ضاقت الأرض بي فـ سماء الحب واسعة وأنا امرأة بَنت جناحها من حديد تسقطكم ولا تسقط -------------------- وصلنا وأياكم الى ختام رواية وضاقت الأرض بي بعد أن غُلقت ابواب الضيق على أبطالنا فتحوا لكم باب حياتهم لتأخذوا العبرة من بين سطورها والأن نودعهم راجين من العلي القدير أن تبقى حياتهم خالية من جميع المشاكل والصعاب طبعاً رافقتكم على مدار أشهر طوال تحملتوني وتحملتكم أسفة لو بيوم قصرت وياكم بشي ابرولي الذمة ومن يمي بارية الكم ألف ذمة القاكم قريباً في العمل الجديد (الراحلون الى السماء) القصة موجودة بحسابي Lubna_Almusawi دخلوا ضيفوها للمكتبة حتى من استراح وأبدي بيها يكون عدكم علم بنزول البارت الى ذالك الوقت استودعكم الله احبتي ♥🥀 اختكم الكاتبة (لبنى الموسوي) | ||||||||
|
| |
|
15-08-21, 06:41 PM
| #95 | ||||
| نجم روايتي وفراشة الروايات المنقولة 
| السلام عليكم روعه جدا عاشت ايدج على هالروايه الجميله والمشوقه واللي فيها الكثير من الحكم والامثال والنقد لمجتمعنا بسب تصرفات جاهله من الاهل بسب عادات وليس دين فيها مشال لكل فتاه مرت بهاي الحاله ولم يرحمها المجتمع وكانت ضحيه بسبب العار ولكن فوق كل ذي عظيم وكبير اعظم واكبر الاه سبحانه وتعالى هو مو يعطي ويحاسب ويعدل لي نقد صغير للكاتبه رغم قوه اسلوبها وروعته الا انها للاسف تساعد على الجهل من حيث الدعاء والانتخاء والطلب من الاموات وان كانو من اهل البيت وغيرهم هم اموات وليس لهم قوه ولا فايده للاحياء ليش تنسب لهمالقوه الخارقه لانقاذ طفله من التشوهه وبعدها تولد طبيعيه معظم الروايات للاسف فيها هذا الكفر واعطاء القوه والتغير لغير الله وهم اموات ليس لهم قوه لدفاع عن انفسهم يوم الحساب تقلبي مروري وانتقادي لانك مسوءوله امام الله عالكلمه والحرف وان كانو سردوها لكي بالعقل لا تحتاج تفكير مرتين الكفر واضح وانساب الامر لغير الله والقوه بالاموات اللي هم رفات اكلهم الدود | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
2Likes
.png)
.png)
العرض العادي
