بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته كيف حالكl إن شاء الله دائما بخير ؟ أنفاسنا وحبنا وغاليتنا وعزيزتنا غلا روح والقلب والعين مشكورة على الفصل الهدية
مو غريبة على الكريمة الحاتمية
//
نجي للعتب شوفي قبل لا تقولين عتبك أنا لاحظت شغلة على القراء سواء هنا ولا في الانستغرام يسئلون أسئلة تحسسني إنهم يقرون رواية ثانية مالها علاقة بروايتنا فكنت أقول إما هم يقرون الفصل بطريقة مرور الكرام أو إن يختارون فقرات حسب الأبطال إللي يحبونهم فما يعرفون جميع الأحداث...
يعني مثلاً بالمقدمة حضرتك كاتبة التالي: "نجمتنا الثانية للفقيرة إلى الله
قالت توقع ماحد قاله.. يخص حمل دانة
هي الوحيدة اللي قالته.." تجي وحدة تسأل:
دانة ما تركت المانع صح ؟
سواء هي أو غيرها واضح إنهم ما يقرون بتمعن وتلذذ للرواية ، ودام إنكم ما حرصتوا على الكلام إللي مكتوب بذمة وضمير فما لكم حق تطلبون من أنفاس نقطة زيادة ، لأن إللي طالعك بعين عطه الثنتين وأنفاس مو قاعد تقصر لا بوقتها ولا بمجهودها كافي إنها عادت بعد غياب طويل غيرها في روايات مهجورة باقي بس بارت ولا بارتين راحوا ولا رجعوا وإحنا عاذريهم أكيد عندهم ظروف بس دام كاتبتنا رجعت لازم نعبر عن شكرنا قبل عتبنا وإذا طلبنا نطلب بذوق و مودة ورفق وتقدير، والله في قراء وانا مشرفة في المنقول كنت أقرا ردودهم يحسسوني الكاتبة تشتغل عندهم ، أرد عليهم ليش تتعبون أنفسكم تعاتبون المعاش إللي تصرفونه للكاتبة خصموا منه على أساس هي موظفة عندكم.... فلا تكثرون عتب وتتطلبون واعتبروا أنفاس نعمة و حمدوا ربكم عليها لأنها فعلاً نعمة....
الحمدلله وشكر لك يا رب على أنفاس
تدرون في بين الأمس واليوم كان في بنات يسئلون أنفاس يعني شنو وِرد ؟؟
المهم ما أبي اطول عليكم عندي كم كلمة مع أنفاس
أنفاس حبيبتي ذاك اليوم وأنا أفرفر في رواية بين أمس واليوم ولا أتواجه مع وحدة عزيزة وغالية سلمت عليها وسلمت علي وسألت عنك قلت لها إنك رجعتي تكتبين عاد قالت بتجي معي تسلم عليك وهذي هي معي تفضلي لك المايك أنفاس تسمعك....
الضيفة: السلامو عليكو أزيك يا بنت يا أنفاس عماله إيه فكراني أنا أمو غانم ابن راشد آل ليس ؟
تكونيش مش فكراني يا نهار أبيض دا انتي إللي مألفاني....
إيه الغيبة الطويلة دي "أشحنيشيشش" أاصد وحشتيني أوي أوي
كلام كتير بيني وبينك بس سمعت إنك عاوزة ميت ألف لايك إنتي فاكرة إحنا ما بـ نأدرش عليها دا إحنا إللي بنينا الهرم واحنا إللي إللي بلطنا البحر واحنا إللي قبنا لبن العصفور فاكرة إحنا بنخاف لاااا دحنا ما بنخافش وحتشوفي وابئي أولي أمو غانم ما آلتش ميت ألف لاااااايك ، لايلاااك ينطاح لاااايك حيوصل لك تحت التراب إللي بتمشي عليه يا أنفاس...
لامارا: قولي لا إله إلإ الله يا أم غانم، البنت ما قالت شي، أنفاس بـ....
أم غانم: لامارا أرقوكي لا تجاطعيني خليني أتكلم مش كفاية سبتنا عاشر سنين....
لامارا بصوت مكتوم لا حول ولا قوة إلا بالله ما تنعطا وجه هذا إللي شرا له من حلاله عله فضحتنا قدام أنفاس....
حاولت لامارا تلطيف الوضع: وهذي هي ارجعت الحمدلله ونورتنا وشرفتنا ونزلت الرواية الحلوة خلك قريبة بس....
أم غانم: طبعاً حكون قريبة وبشوفااا , وإحنا كم أنفاس عندنا وحدة وما فيش زيها أبداااااً....
لامارا : خلاص أجل طاح الحطب يا أم غانم....
أم غانم طاح وراح وما عدشي موقود أبداااااًًً
ودعت أم غانم أنفاس ووعدتها بلقاء قريب إن شاء الله....
لامارا اخذت المايك
عدنا والعودُ أحمدُ
أنفاس شكراً شكراً شكراَ على النجمة التي تعادل ليرات الذهب وفهي وسام على صدري راح أعمل لها برواز ذهب وشكها بسلسلة وألبسها نجمة أنفاس خبرك راجعين على موضة الليرات عاد توه خواتي الغاليات عطوني سلسال ليرة في يوم ميلادي الله يشهد يا ننوسة إنك حالك حال خواتي.... أصلاً حتى خواتي يحبونك... أصلاً أختي الحلوة إللي تشبه كاسرة هي إللي عرفتني عليك وإختي الصغيرة إللي تشبه جميلة شجعتني وهذاني مستمرة معك.....
مبروك للغالية الفقيرة إلى الله وحظ أوفر للغاليات الباقيات الصالحات
لو تدرين يا ننوسة وش السوالف إللي صارت على هالنجمة ؟؟!! إللي باقت اسمي وإللي قامت تستجدي بدالي عطوا لامارا نجمة عطوها مسكينة يا الله من مال الله وأنا عايشة الدور أتغلى لا لا ما أبي نجمة أهم شي أنفاس حبيبتي وأسبل عيوني وأبتسم بخجل ، ولما حصلتها الله وكيلك قمت أناقز كني كنغر الحمدلله والشكر يا مثبت العقل والدين سكنهم بمساكنهم يا رب :heeheeh:
المهم أنا اسمي ألحين لامارا الذهبية أم نجمة يا ويكم يا سواد ليلكم أحد مرة ثانية يقرب من اسمي ترا زعلي شين الله لا يوريكم 
بسم الله الرحمن الرحيم نفتح الباب وندخل على أبطالنا نحلل ونعلق ونتوقع إما تصيب وإما تخيب.... مشهد الهنوف والمتغطرس المشهد الذي بسببه أخذت نجمة تجاهل تعليقها وهو يسألها بشكل مباشر: أشلون عرفتي إني موجود؟؟
أجابته بذات مباشرته وبنبرة أقرب للسخرية: الجيران شموا ريحة عطرك.. أشلون اللي مابينك وبينه خمس أمتار..
أتوقع العطر إللي يستخدمه تركي المتغطرس هو ديور سوفاج، بس يا المتغطرس تدري وش تعني كلمة سوفاج sauvage بالفرنسي تعني بَرْبَريّ , هَمَجِيّ , وَحْشِيّ , حَيَوان مَنْسُوب إلَى البَرّيَّة، سبحان الله لكل امرءٍ من عطره نصيب.
عاد أنا أحب عطر سوفاج فخم حيل يدخل في النخاشيش والرئتين ويقعد معشش.
الهنوف همست الهنوف بذات الحزم الذي تشعر أنه قد يغمى عليها خلفه:
زين يا أبو عبدالمحسن.. وخر من طريقي قدام أشتكيك لعمي ..
أجابها ببرود مغلف بالحزم: تراني ماني ببزر تهدديني بإبي.. وتراني أقرب لش منه..
عادي قولي له اللي تبين.. واشتكيني كثر ما تبين..
.
ترا ردك واهي جداً يـ الهنوف رجال وشكبره متعدي الثلاثين ودكتور عشو تقولين له أشتكيك عند عمي صراحة بايخة منك وما توقعتها ما شاء الله عليك عندك حضور وحزم في الرد علامك دودهك المتغطرس بعطره، خلك قوية ما تهاب لأنك على حق وراعي الحق محد يغلبه....
ثم أردف بنبرة مقصودة: وتبين تطلعين؟!!.. قدمي مقابل واطلعي.
بالله الهنوف شنو تفهم منك قدمي مقابل ؟؟؟
بعدين تسوي روحك فكرك بريء و الهنوف العكس فكرها جريء
هتف تركي بنبرة باسمة أقرب للضحك: ما أدري وين وداش تفكيرش؟؟.. بس شكله راح بــــعـــيــــــد..
كل اللي أبيه.. أنش توعديني ما تتغطين عني..
أنا رجّالش ومعش في البيت وتتغطين عني!!!.. تشوفينه شيء منطقي؟؟..
إن شاء الله اختك البندري إذا تملكت خل تكشف قدام رجالها بدال ما تفرض على الهنوف شي هي ما تبيه....
يقهرون يقطون كلام مبطن بعدين يقولون حق بنت الناس وين راح فكرك ؟؟ راح فكرها مكان ما وديتها بالضبط بالسانتي والملي...
"رغم أنه أطلق في داخله سيلا طويلا من الشتائم المقهورة"
ترا الدفتر موجود والحسابة بتحسب عليك احمد ربك ما سمعت شتيمة هنا ولا هنا كان كرت أحمر ومطرود برا الرواية....
أما إنتي يا الهنوف
"امتقع لونها (يا الـــخــســيــــس!)
لم تتكلم.. وإن بدا ارتعاشها واضحا.."
فاستمري دربك خضر والقلب داعي لك عسى ربي يوفقك في مسعاك وتوصل الرسالة للغلطوا في حقك إلهي آمين يا رب العالمين....
من عافنا عفناه لو كان غالي
ومن باعنا بالرخص بعناه بزهود
وش عاد لو هو بالمحبـة حكا لـي
ولو كان من جود العهد يمسك العود "كنت أخشى أن ينفجر قلبي فلا أجد إلا أشلاء متناثرة يرهقني جمعها من تحت قدميكِ وأنتِ تقفين عليه..
هاهنا.. حيث كنتِ تقفين تماما..."
القاعدة النفسية الشهيرة الضغط أو الكبت يولد الانفجار ، عادي يا المتغطرس عادي انفجر واحنا نشوفك ونصب عليك قاز ونتشمت فيك عادي عساك في هـ الحالة وأردى ما تكسر خاطري أبد ، بس إللي راح يفقع مرارتي مع إني شايلة المرارة ما عندي مرارة بس أكيد في شي داخلي راح ينفقع إذا عجلوا بزواجك من الهنوف قبل ما تتفحم وتترمد وتعرف إن الله حق وتتذكر كلام عمي بو متعب
سمعا الصراخ أن يتقدما : دامني غصبتها على قولتك.. تطلقها ذا الساعة .. طلقها وذولا سعود ومتعب شهود..
خلصنا من ذا السالفة.. ثمان سنين وأنا أحايل فيك تعرس وأنت تمنن.. على ويش تمنن؟؟.. بنت علي هي المنة عليك..
طـــلــقــــها.. يا الله طلقها ذا الساعة.. والله ماتكمل عدتها إلا هي عند اللي يسواك ويسوى طوايفك يا الرخمة.. 
صح لسانك عمي بو متعب مع إني ما أحبك انت وعيالك طولين اللسان بس صح لسان على هالكلام الدرر
ويا المتغطرس أقدم لك نصيحة سلي نفسك رتب شغلك مع فُرات الإمبريالي اشغل وقتك بشي مفيد بدل ما تتنطط في وجه الهنوف ، عد الطوف عد النجوم وشكثرها إللي في قلبي المتروس عليك كثرها....
منتظريك يوم السبت ناخذ احتياطنا من الانفجارات عسى بس ما تصير انفجارات بالجملة
مشهد دانة وسعود
إللي فهمته إن دانة حامل و مو قايلة للسعود خايفة إنها تسقط وبعدين يزوجون سعود ، على الرغم من أن سعود لم يطلب العرس، لكن الله يهديها أم سعود هي إللي تضغط عليه....
ألحين التوقعات بين يثبت الحمل ولا يسقط الحمل
إن شاء الله بأمر الله يثبت الحمل
اما إذا سقط فأتوقع إن سعود ما راح يتزوج عليها لأن سعود راعي دين وشرط الزواج الثاني العدالة بين الزوجتين فكفة الدانة راح ترجح ، طبعاً هالكلام محد يطبقه إلا في الروايات والكتب وإلا من رحم ربي...
لكن عندما نرى إنسانة تحب زوجها بهذه الطريقة كيف يطاوعه قبله بأن يتزوج عليها ؟
(أعلم أنني أنانية.. ولكن متى كان الحب غير أناني؟!
الحب هو الأنانية بحد ذاتها..
وأنت تعلم ياسعود أن حبي لك ليس كأي حب..
أنا وُلدت وأنا أحبك.. يبدو لي أن أمي أرضعتني حبك بدل الحليب..
فكل خلية في جسدي نمت وهي تشهق باسمك..
أيام عمري كلها مضت وحبك يبني في داخلي قلاع وسراديب وقصور
حتى استولى على كل ذرة في جسدي وروحي..
أرجوك..ابحث لي عن عذر..
ابحث لي عن عذر)
فحتى في فكري لا أريد أن أتخيل بأنن سعود يطاوعه قلبه ويتزوج عليها لأنها وجيعة قاسية على دانة شي ليس بـيدها و لا غلطتها فكيف تُحاسب عليه ؟؟!!
الله يفرجها من عندها يا رب
مشهد بثينة و محمد
ترا يا بثيتة 90% من قراء الرواية يريدون تزويج محمد من مزنة، 10% فقط إللي قاعد يفزعون لك وأنا منهم ولا أزال الله يشهد.....
لـــــــــكــــــــن
شكلك إنتي إللي حرامة محمد من الخلفة، لا بسب عيب مرضي أو خلقي ولكن نفسي فهل موت الوالدان مأثر عليك بطريقة ما ؟؟ هل هو اليتم المبكر ؟؟
لأن أنفاس في مقدمة المشهد ذكرت
"ذات المشكلة.. ذات القرب.. لكن ببعد آخر.."
بعد آخر يعني لا ظرف صحي ولا عشق مصفى مثل دانة وسعود فالأكيد إن محمد يحترمك ويودك واضح لكن تبهتينه وتنطرينه 4 سنين تاخذين مانع بدون إذنه يا كبرها عند الله....
مسكين محمد كنت أقول عنه بعير ، ظليمته شينه ولد الحلال ما طاق دمعه وحدة من عيونك تقومين تتمنين ينسى.... ينسى شنو بالضبط ؟؟ !! الضنا أحد ينسى إن لازم يكون عنده ضنا ؟؟!!
انتي ما تحسين بشي لما تشوفين صور الأطفال بالمهد ما تدغدغك مشاعر الأمومة أحلا عمر، عمر إللي ما يمشون وتوكلينهم وترضعينهم حتى البامبرز شعور مسئولية تجاههم ضحكتهم ريحة شعرهم حجم إيدهم مناغاتهم نظراتهم الفضولية استجابتهم لك...
عفيه قلب ما يتأثر !!!
أكيد فيك شي نفسي لأن هذا ضد الطبيعة البنات من هم صغار لعبتهم بنتهم ترضعها وتنيمها وتلبها وتسبحها وتنام معها لان الأمومة غريزة طبيعية ، وطالما إنك حارمة نفسك منها وحارمة ولد الحلال منها فـ في السالفة
إن كبـــــــــــــــيـــــــ رة جداً جداً.....
إن شاء الله محمد يضغط عليك تفحصين ويكتشف إنك مسوية مانع ، عاد تشتغل عليك أم سعود شنو يفكك منها الظاهر أم سعود عندها صديقات واجد كل وحدة عندها 10 بنات قد عرس بتناخذ حق سعود 3 و حق محمد 3 من كل صديقة بنت تخفف عنهم العنوسة....
والله أعلم....
مشهد مها و متعب.... والجازي عبر الأثير
جبهة ثالثة.. أحــــد.. وأهـــــدأ..
أحد موجودة الحدة أهدأ المقصود بها حياة الصقيع والبرود حتى التجمد موجود جداً >>>> صار في مألوم بصوت أفضل....
نرجع للثنائي الظالمين والمظلومين في نفس الوقت
من قراءاتي لردود القراء السواد الأعظم موب قادر يأخذ صف حد منكم لأن ثنينكم غلطانين واحد الغلط بالبداية كان من متعب ومها الثانية بالقرار....
نجي بالوضع الحالي صارت المشكلة وتفاقمت وصلت للـ الجفا والهجر
عاد تصدقين يا مها الليلة إللي قالك فيها متعب:
"شعرت بأنفاسه دافئة على أذنها: يهون عليش يا أم ريم تخلين أبو ريم ينام زعلان ما راضيتيه.."
وانتي رديتي عليه
"متعب أنا ما أني بطايقتك.. أرجاك تعرس وتفكني منك.."
انتي بدون عذر رديتي عليه هذا الرد فانتي في اشكال شرعي الملائكة ذيك الليلة لعنتك واشبعت تلعن فيك يمكن إلى اللحظة هذي تلعنك....
بالنسبة لوضعك الحالي مثل القطة إللي تلعق جراحها و تعالج نفسها بنفسها بس هل طريقتك صح وتفيد ؟
ومن كلامك إللي في ضميرك عباراتك ما خلت من الشوق والتعود والذكريات الإيجابية حتى الاهتمام سؤالك عن تغير وقت عمله ، ولا أحط لك عشى يعني مو رافعة الجام تماماً ومخلية منفذ.
بالنسبة لسالفة نومك مع البنات الله يحفظهم
أذكر الوالدة أم سعود الله يخليها أذكر الطويرات الصغار دايم حولها وحواليها وهي تبزي فيهم يا خوفي لا وحدة تغرد قبال الوالدة وتقول أمي تنام معنا، عاد يا مهيو تعالي رقعي وترا متعب ولد أختها حلاته تخطب له 3 بنات من صديقاتها الواجد وبصير عرس سعود ومحمد ومتعب بيوم واحد
ننتقل لموضوع ثاني بالمشهد
الجازي
تقول الجازي
"الجازي بقهر: مها مر 3 شهور..3 شهور.. وهو ماتحرك..
ولا سعود ولا محمد ولا عمي هادي.. ولا حتى دانة.. ماحد منهم كلمني.. ولا قال لي شيء..
ولا إنه خالد كلمهم في أي شيء..
يعني اشلون؟؟ .. ما يبي يطلق؟؟
يبي يحدني أسحبه المحكمة؟؟"
الجازي هذا طال عمرك يسمونه الهدوء إللي يسبق العاصفة يعني حرفياً جايتك عاصفة راح تقلعك من جذور بيتك وتزرعك في بيت خالد
عاد السؤال كيف ؟ وشلون ؟
شوفي يا الجازي حمدي ربك إن الكاتبة أنفاس هي إللي قاعد تكتب قصتك ولا لو كاتبة ثانية كان كتبت خالد يخطفك ويسوي فيك إللي سوي وبعدين يرميك عند أهلك ويقول لهم هذي بنتكم ما أبيها ويصير هو الطرف الأقوى بالموضوع ،وتنعكس السالفة يقومون الأهل يصالحونها عليه ويلمون السالفة وترا بالواقع صايرة هذي السوالف مو شي من الخيال.
لكن أنفاس تنظر للضمير الحي عند البطل مو لشروره ، ولأن خالد مهما كان ولد أصل والجازي بنت عمه فـ أتوقع راح يحلها بدون محاكم ، أنا كنت متوقعة إن يلجأ لسلطة القبيلة إللي هي عند القبايل أعلى من سلطة المحكمة فما جا في بالي شي ثاني حتى الآن، عن نفسي أتمنى الطلاق عشان خالد وغيره يتأدب ويحرمون يمدون بدهم على بنات الناس لكن دام خالد بطل في الرواية فلازم البطل يتزوج البطلة ولا ما يصير بَطل بفتح الباء، را يصير بُطل بضم الباء.
ونحن في انتظار واقعة 2009 بنشوف الحق مع منو ؟ و هل في مبرر للجريمة الإنسانية النسوية التي حدثت للجازي....
مشهد متعب و جابر
في هذا المشهد يطلب جابر من متعب
لو أنا عندي جوال بس مافيه شريحة.. هل ممكن إني أعرف من صاحب الجوال اللي استخدمه؟؟
أنا صراحة ما فهمت زين إللي فهمته إن جابر عنده تلفون قديم بدون شريحة وهناك من أحد قد استخدمه، يعني أكيد الشخص إللي حط في الموبايل شريحة ثانية شخص يمكنه الوصول للجوال بسهولة.
لكن
هل في تقنية توضح من إللي استخدم الجوال ؟؟
أتوقع قصده من صاحب الشريحة إللي حطها بالجوال ؟؟
أنا ما أدري إذا في هذي التقنية أو لا ؟؟
بس أصلاً منو معطي غالية هذا الجوال القديم ؟؟
في مشهد جاي ان جابر يطلب من غالية الجوال راح أعلق فيه عن هذا الموضوع.....
مشهد أبي فُرات و حامد و مي وش سالفة الكروت الحمر أبوفرات يصل إلى حامد.. ويجلسه ويجلس جواره..
بينما مي اقتربت وجلست على مقعد مقابل لهما.. في الوقت الذي كان أبوفرات يهمس بحزم:
حامد أنت منت ب بزر.. ولا عادك في عمر تربية أوجهك..
بس السالفة ذي صارت كم مرة.. وأنا ماقلت لك ولا شيء في المرات الماضية..
بس بكرة ب يشيع بين اللاعبين: لا بغيت تطرد حامد آل سطام.. عطه شتيمة تحت الحزام..
وتصير ذي نقطة ضعف لك.. ونقطة ضعف لفريقك عقب.. خصوصا إنك هدّافهم..
أكبر العيب إنك تخذل فريقك اللي حطوا ثقتهم فيك.. لأنك ما تقدر تمسك أعصابك..
الظاهر حامد راح ينطرد من المنتخب قبل لا يعتزل ولا راح ينتظر سنتين أو ثلاث عشان يعرس مثل ما كان مخطط
أبوفرات المستغرق في لوحته يهتف بنبرة مقصودة: ماشافت قدوة حسنة فيك ..هذي هي تسوي سواتك..
ذيك المرة ما عجبتني مي لما قالت عن حامد وحمد الكلاب الظاهر هم إللي معلمينها هالكلام
والله أعلم
مشهد الجليلة جيلو و مساعد وأميرة
أخـــــــــــــــــــــــ ــــــــــــيــــــــــــ ـــــــــــــــــراً
عرفنا شهاب أخوهم لا خالهم ولا عمهم ولا ولد جيرانهم ولا اخوهم برضاعة
عاد أخوهم من أمهم وأبوهم ولا من أمهم بس ؟؟؟ ما يندرى
و في هذا المشهد
ما أدري الحداقة الشاطرة أنفاس قاعد ترمي لنا طعم لأن حتى الآن ثلاث طعوم في بحر هذا المشهد....
طعم رقم (1)
أميرة بمرح: يا الله يارب مع ذا الصباح الباكر.. ترزق مساعد ولد أم شهاب..
ب مرة لسانها متبري منها.. يشوفني عندها ملاك منزل من السماء..
منو أم لسان في الرواية ؟؟؟ >>>> ضي
طعم رقم (2)
مساعد بمرح شبيه: ويا الله يا كريم مع ذا الصباح.. إنك ترزق أميرة بنت أم شهاب
برجّال يهاجر بها للبرازيل.. ولا تشوف الجليلة إلا كل عشر سنين مرة..
منو إللي مستقبلة سفرات ويعمل في السلك الدبلوماسي >>> حامد
طعم رقم (3) و (4) نفس الوقت
ابتسمت الجليلة وهي تجلس بجوار مساعد وأميرة تركب خلفها: الله والنعم اللي يستاهلها الأمبريالي..زوج الإمبريالية..
مساعد يتأكد من ترتيب غترته في المرأة الأمامية ومن ثم يحرك سيارته وهو يهتف بتلقائية: بس فرات مهوب متزوج..
جليلة صار عندها علم إن فُرات غير متزوج لأي سبب ؟
حينها أطلت أميرة برأسها بين مقعديهما وهي تهتف بمرح: صحيح دكتور فرات موب متزوج؟؟ ومرته الأميركية وينها؟
مساعد بغيظ مكتوم: ماتت الله يرحمها.. وارجعي ورا لا أعطيش كوع في وجهش..
ألف مرة قايل لش لا تسوين ذا الحركة..
جليلة عرفت إن فُرات أرمل و أميرة ليش فرحت إنه أرمل ؟ و مساعد ليش عصب على أميرة
هل حسن إنها قاعد تتقصى عن أخبار دكتور فُرات الامبريالي ؟؟
ننتظر ونشوف شنو راح يصير ؟؟؟
مشهد مي و فٌرات الإمبريالي 
"فُرات يغادرها وهو يهتف بإبتسامة خبيثة: أجل خلني أوصل بدري استقعد للبنات اللي بيتاخرون..
وأنتي شوفي حمد بيوديش.. وإلا قولي لجدش.."
هذا الاستقاد إللي راح يسويه الدكتور فُرات الإمبريالي هو إللي راح يصير بداية الشرارة بين بنات بو شهاب وفُرات الإمبريالي، جليلة تشوفه بنص عين وهو ما يشوف البنات كلهم بطرف عين....
ودي لما يتناقش مع البنات يشوفهم من زاوية ثانية وغير الصورة إللي في باله عنهم....
بس وما نيل المطالب بالتمني ولكن تؤخذ الدنيا غلابا مشهد أم متعب وتركي المتغطرس و صيتة ضمير غائب
يبدأ المشهد تركي يعرض على أم متعب ترافقه للسفر لأمريكا لكنها ترفض بحجة الحلفان
طيب صومي 3 أيام شنو المشكلة
طبعاً تركي المتغطرس جاب سيرة فهدة إن قلبها متروس على أمها من سوالف العجايز بس ما أتوقع أم جابر لها علاقة بالحكي عن صيتة أتوقع بس أم متعب....
والقراءات الكل بدون استثناء توقعوا إن صيتة متزوجة وطلعت متزوجة فعلاً لكن ما أتوقع شهاب لأن شهاب في مصر وهي بأمريكا....
بالحوار كانت صيته حاضرة معهم ولكن غائبة فعلياً عنهم:
أم متعب بذات الجبروت المُدعى: لأنه تقدر تجي.. رجّالها ألف مرة قال لها إنها تقدر تجينا..
وهو موجود في مكانها.. بس هي مارضت..
لأنها ما تبي تجي..
وهو موجود مكانها
مممممم موجود مكانها شنو يسوي بالضبط يراقب منو ؟
فهل في طفل مريض مثلاً ؟؟؟
شنو الشي إللي يسد عنه الزوج مكان الزوجة
ما أتوقع الشغل يخلي ام تترك بنتها أو ما تبر والدينها لدرجة مرحلة غضب الوالدين
قال وش حادك على المر قال إللي أمر منه مشهد الفهدتين وغالية وجابر
بداية المشهد الكبار كانوا يتكلمون عن سفر فهدة الصغيرة إللي كانت رافضة
أتوقع إن فهدة الصغيرة عندها أخ أو أخت من أمها صيته وهذا الطفل أي كان جنسه مريض ويتعالج وفهدة الصغيرة تغار منه لأنها تشوف أمها تاركتها من أجل هذا الأخ أو الأخت المرضى ،وهناك شخص يغذي هذه الطفلة بالأوهام من جهة أم متعب ومن جهة أخرى ربما تكون ضي....
أتوقع سوف تسافر فهدة مع تركي المتغطرس وكذلك راح تسافر أم متعب وتطلب من الهنوف مرافقتها.....
في الفقرة الثانية
جابر بتذكر: إيه أبي التلفون اللي عندش..
غالية باستغراب: أي تلفون؟؟
جابر بحزم: التلفون اللي سمعتيني التسجيلات فيه.. أبيه..
غالية صُعقت وكانت على وشك الرد.. لولا خروج فهدة الكبيرة من غرفتها..
مستحيل يقع تلفون خاص بيد أشخاص من خارج البيت
فمن هو الشخص السام الذي يبث سمومه في رأس غالية ؟؟
حتى غالية عندما كانت على نار كانت خارجة من الجامعة
الدوائر تدور حول ضي ، لكن لا توجد إشارة ودليل قاطع على ذلك
بُكرا يذوب الثلج ويبان الثلج على قولة اخوان اللزم الشوام
ملاحظة بنات أنا بدأت في كتابة الرد بعد قراءة الفصل مباشرة ولكن وصلت إلى منتصف التعليق تقريباً كان وقت إقامة صلاة المغرب وبعدين صليت ورها انشغلت حتى وقت صلاة الفجر صليت وعدت أكمل وأنقح التعليق‘ عاد أتوقع طارت الطيور بأرزاقها ولا في نجوم ولا سبق لي بالتوقعات لكن قلت عشانكم وعشان العادة ما تنقطع وأتواصل معكم على الخير والمحبة لأني أحبكم كثير... وألحين عاد عن إذنكم بأروح أناااام بعدين إذا قعدت سأقرأ ردودكم على الراحة جمعة مباركة حبايبي 
04-06-21, 03:53 PM
66227Likes
.png)
العرض العادي
