15-06-21, 02:21 PM
| #1 | |||||||||||
| مشرفة منتدى عبير واحلام والروايات الرومانسيةومنتدى سلاسل روايات مصرية للجيب وكاتبة في قسم قصص من وحي الأعضاء 
|  قسمة ونصيب  قرأتها على الفيسبوك وكانت بدون عنوان فاخترت أنا اسمهاقسمة ونصيب _ مش هوصيك على مسك يامروان. دي في عيني ياصاحبي متقلقش _ عشان خاطري أنت عارف كويس هي عندي إيه! ما تتجوزها أنت وخلاص؟ _ مش وقت هزارك، ياريت كان ينفع، أنا لو لفيت الدنيا كلها مش هلاقي زيها. وإيه كان مانعك عنها؟ _ يابني دي كلها يومين وتبقى مراتك! يعني أنا سبب عدم قربك منها؟ _ أنت أهبل ما هي قدامي من زمان، اللي بيني وبين مسك أكبر من الحب، أكبر من العاطفة، رابط قوي ومتين لدرجة متتخيلهاش، احترام متبادل بينا كبير حدًا، بينا رابط أقوى من الحب ولو اتجوزنا هيتكسر، أنا عمري ما شوفتها زوجة، اتربينا مع بعض وطول عمري بحميها وبحل ليها أصغر مشاكلها بس ولا مرة حسيت من ناحيتها مشاعر عاطفية بالعكس مشاعري ناحيتها بتتحط تحت بند " الإخوة، السند، الضهر، الحماية، الإهتمام " لكن العشق والحب لا. " فلاش باك " مينفعش تسيبها من إيدك يايزن، مش هتلاقي اجمل من مسك لا في هدوئها ولا جمالها ولا أخلاقها ولا حتىٰ دينها. _ ياماما مسك مفيهاش عيوب، أنا أقل بكتير منها، مسك حاجة مقدسة بالنسبالي مقدرش اقتحمها. يابني اقتحام إيه اللي بتتكلم عنه ده اللي بينكم مش هيقوى غير بالجواز، الجواز سكينة ورحمة مش تدمير حنية وإهتمام. _ ياماما إنتي عارفة إن مسك بالنسبالي أغلى من روحي بس مش بالمعنى اللي حضرتك فاهماه، أنا مبفكرش فيها كزوجة، لكن مقدرش أنكر إن مسك بالنسبالي كل حاجة، عارف كمان إن محدش بيفهمني قدها ولا حد بيريحني في تعبي غيرها، روحانيتها في الكلام بتهدي قلبي مهما كان جواه نار، تفسيرها الحكيم للمشاكل عاملها هيبة في نظري عمرها ما هتقل، خوفها عليا من النسيم اللي بتشوفه من بعيد فتشدني خوفًا إنّه يلفح وشي مخليني غصب عني بحميها ولو طولت احطها في جفوني هعمل ده، عارف إنّها بنت على شكل حور، كلها شفَف ورقة ودلال وأنا حاططها في مكانة كبيرة جدًا فأرجوكم بلاش تضيعوا اللي بينا لمجرد إنكم عاوزينا نكون لبعض! يابني جرّب مش هتخسر حاجة، اخطبها وشوف هتقدر تكمل معاها ولا لا ..؟ _ وليه ادخل في تجربة أنا عارف نتيجتها كويس وعارف إنها هتضعف اللي بينا؟ وليه متقولش إنها ممكن تقويه؟ _ ياماما مش يمكن نصيبها مع الأحسن مني وأنا نصيبي مع بنت حلال؟ ولو قولتلك عشان خاطري، ريحني. _ أنا مش جاهز لسه ياماما. هي مننا وعلينا ومش هتحتاج حاجة وملكش دعوة أنا وأبوك هنتكلف بأمر جوازك منها لحد ما تلاقي شغل. _ ماشي ياماما سيبيني اصلي استخارة وشوفي رأي مسك برضو. ربنا يريح بالك ياحبيبي. _ " لما مسك صلت ومرتاحتش وأنا كمان محسيتش بهدوء بعد الصلاة الموضوع إنتهىٰ، وشكرت ربنا إن الرفض كان متبادل بينا عشان الوِد والإحترام اللي بينا يفضل، مقدرش اخسرها مهما حصل، دي أكبر مكسب ورزق ربنا رزقني بيه " _ مسك إتجوزت واحد قبل صاحبي نفسيتها كانت وحشة جدًا، حسيت إن سعادتها تخصني، زعلها كان بيفسّخ أنسجة قلبي، بعد موت عمي حسيت في الوقت ده إن ضحكتها بقت مسئوليتي وشغلتي الوحيدة. _ لما صاحبي وصديق عمري طلب إيديها خوفت، حسيت بنغزة في قلبي، فهمته سبب طلاقها لكنه صمم وطلب يقعد معاها رؤية شرعية، مقدرتش اتكلم وسيبت القرار ليهم وبلغتها بطلبه ومامتها وافقت. _ قعدت شوية في البلكونة لاقيت خطوات بتقرب ناحيتي بهدوء واستحياء، عرفت إنها هي من طلتها ومشيتها اللي بدون صوت، شدت كرسي وقعدت قصادي وقالت " إيه رأيك في مروان يايزن " _ بصيتلها بتفهم وقولت " الرأي رأيك يامسك، هو جايلك بكره من حقك تسأليه كل الأسئلة اللي نفسك فيها و.. _ قاطعتني في الكلام وبعدين غمضت عيونها الواسعة وخدت نفس عميق مليان تعب خارج منه تنهيدات غير عادية وقالت " عارف يايزن أنا لما محمد اتقدملي حسيت تجاهه بإنبهار بسبب شياكته ولباقته وخفة دمه، اتخدعت في مظهره ونسيت أركز في تفاصيله، مميزاته الظاهرية خلتني مشوفش الخبث اللي مخبيه، نسيت خالص إن الدنيا معادن وإحنا المعادن اللي فيها، عندك مثلًا أنت أهو بتحبني جدًا وبتخاف عليا لأبعد الحدود بس ولا مرة قولتلي إني غالية عندك ولا حتى وسط هزارنا، حتى لمّا إلتزمت وبعدت عنك احترمت رغبتي لإنك شايف إنّي صح، رغم قلة كلامنا بس اللي أنت شايلهولي جواك حاجة كبيرة وأفعالك بتلخص كل الكلام اللي ممكن تقوله، أما محمد كان باين من كلامه الحب وقد إيه هيحافظ عليا بس اللي كان شايله جواه إهانة وذل. لما روحت معاه أكشف على تأخر الحمل والدكتورة قالتله " المدام عندها تكيسات على المبايض وعاوزة شوية متابعة وعلاج مع حالة نفسية هادية مفيهاش أي توتر عصبي لاحظت إن ملامحه إتغيرت ولون وشه بقى شاحب، مش زعل عليا لا زعل مني وكأنّي اجرمت في حقه، ولا مرة جه معايا الكشف، كان مفهم اهله إن عندي عقم، كنت بسمع من مامته بما يكفي من تلقيحات وإني عائل على ابنها، لما أبويا مات يايزن قولت جوزي هيبقىٰ أبويا وأخويا وسندي بس لما كان بيمد إيده عليا كنت بحس بشعور وحش جدًا وحسيت لتاني مرة إني مليش سند. _ إنتي بتقولي إيه ضربك؟ _ ردي عليا متسكتيش كان بيضربك؟ ايوه _ مكنتيش بتقوليلي ليه هو أنا قصرت في حمايتك؟ أنا لما كنت بقولك بيزعلني كنت بتهد الدنيا يايزن فما بالك لو قولتلك ضربني كنت هتعمل إيه، أنا مكنتش عاوزة خراب بيتي يبقى على إيدك حتى لو مش أنت السبب. _ " دموعها اللي بتبرق في عينيها ومنعاها تنزل بتدبحني، نفسي امسك ايديها واقولها أنا جنبك بس مش عارف، مش هقدر أخلي احساس العطف اللي جوايا يدفعني لتصرف يتحسب عليا حب واللي بينا مش حب؛ هي حلوة زي عذوبة القدس بس بختها ونصيبها بيقع مع ناس يهود .. جميلة جدًا وكل الناس بتحبها بس مش لاقية حضن واحد يكفيها ويغنيها عن حب العالم كله ويوم ما بتختار شعورها بيخونها ويهيأ ليها إن الشخص ده صح " _ لاقيتها باصة للشارع بزهق قطعت شرودها وقولتلها " اعملك قهوة بالفانيليا اللي بتحبيها من ايدي..؟ " _ ابتسمت ببراءة وهزت راسها بالموافقة. _ وأنا بعمل القهوة حاولت أقلّب في دماغي عن حاجة تهوّن عليها، ضماد لخدوشها، دفىٰ لعرىٰ روحها. _ قهوتك ياست العرايس. تسلم يايزن. _ بصي هو أنا مش ملتزم زيك ولا بعرف اطبطب على حد زي ما بتعملي ولا عارف حاجات كتير عن الدين ويمكن بخذلك بقلة كلامي ولخبطتي لما تيجي تشكيلي من حاجة خنقاكي، عارف كمان قد إيه محمد خذلك قدامنا وحماتك حسستك إنك حاجة قليلة بدون ما حتى تعرف حكمة ربنا من تأخر إنجابك بس هقولك حاجة " مينفعش أبدًا تحسي إنك وحشة لمجرد إن اللي حواليكي شايف ده، كل شخص بخدوشه وتفكيره ونظرته وأنتي مش هتقدري تغيري لكل واحد نظام تفكيره ولا عقليته، هو حابب طبع الغباء والتجريح والدبش، صفات اللي حواليكي زي المية اللي وقعت منك على الأرض عمرك ما هتقدري تحطيها في الأزازة بتاعتها تاني بس تقدري تبعدي بسرعة وتتلاشي الطرطشة اللي هتيجي عليكي من وقوعها، مش مطلوب منك توضحي لحد إنك كويسة بس مطلوب منك تخلي نفسيتك كويسة عشان تقدري تعيشي وتكملي بصبر وهدوء، طبيعي جدًا نتواجد في مكان كله خراب، وارد كمان نفسيتك يكون فيها خراب، روحك ممكن يتساقط منها غبار نتيجة خراب، لكن اللي مش طبيعي بقىٰ إنك تسمحي لنفسك تكوني جزء من الخراب ده، لازم تدي استطاعتك باور يعلي فولت قوّتك اللي هترزعي بيها ضحكة وسط حزن، تنوّري بيها شمعة في ضلمة، تحطي بذور تفاؤل في روحك عشان ينبت منها نظرة مُختلفة لبكره، نظرة تشجعك تقاومي الضربات المتسمرة على قلبك، كلنا جوانا خراب بس مينفعش أبدًا نكون جزء منه لكن واجب علينا نكون جزء منوّر ومختلف فيه، أنا عارف إن الوقفة صعبة والنهوض هيكلفك مجهود كبير لكن لازم تعرفي كويس إنك لما تيجي تقفي إوعي تسندي على كتف كان في يوم سبب من أسباب انتكاسك، إقفي لوحدك واسندي على ربنا؛ ربنا بيحطك في مشكلة ضخمة تقعدك على الأرض وبيقولك بينك وبين السعادة الخمس خطوات دول قومي احصلي عليها وبيبعتلك إشارات بكدا بس إحنا بنتلاشى الإشارات دي ونقعد نعيط ونكتئب ونقفل على نفسنا ونعتزل العالم عشان منبذلش مجهود. الشيخ الشعراوي قال جملة عظيمة جدًا بتلخص كل مشاكلنا " بين كل خير وخير مسافة مُرهقة تُسمى الإبتلاء، مليئة بالأجر لمن يصبر ويحستب فقل الحمد لله " _ خدت رشفة قهوة وبصتلي بخبث طفولي وقالت " الحمد لله " _ مالك يامسك؟ أنا فاهمة كلامك ده كويس يا يزن. _ لو كنتِ فاهماه مكنش كلام حماتك دخلك في حالة نفسية، سمعت كلامي وسكتت، لاقيت نفسي بقولها بسرعة " عارفة عيبك الوحيد إيه يامسك؟ " إيه؟ _ إنك برغم جمالك وإختلافك معندكيش ثقة في نفسك؛ عشان شخص مقدّرش قيمتك حسيتي إن العيب فيكي ومحاولتيش تفهمي إن الشيطان بيخاف من النجوم، برغم جمالها لكنها بتولع فيه بنورها وإنتي نورك مكنش طبيعي على شيطانيتهم. _ قلة ثقتك في نفسك مش هتوصلك لحالة نفسية بس لا ده ممكن توصلك للجنون. _ حطت القهوة على الترابيزة وقالت " إزاي ده؟ " _ كان في تاجر في الأندلس شاطر جدًا في شغله ومشهور؛ التاجر ده كان عنده أربعة صحابه ومقربين لقلبه بس الغيرة استحوذت على قلوبهم لإنه أشطر منهم ووقع بينهم تنافس قوي فأبغضوه واتفقوا عليه، في يوم التاجر ده كان خارج من بيته رايح للمتجر بتاعه ولابس عمامة بيضاء وقميص أبيض فأول واحد شافه حيّاه بلُطف مصتنع وقاله " ما أجمل هذه العمامة الصفراء!؟ " فرد التاجر وقاله: أعمى بصرك؟!!! هذه عمامة بيضاء.. فقال: بل صفراء .. صفراء لكنها جميلة. تركه ومضى إلى متجره مذهولًا مشى خطوات فشافه ثانيهم فقاله "ما أجملك اليوم .. وما أحسن لباسك .. خاصًة هذه العمامة الخضراء. فقاله" يارجل العمامة بيضاء " قال: بل خضراء اتعصب التاجر وقاله " بيضاء بيضاء ارغب عني " وكمل مشي لمتجره وهو بيكلم نفسه؛ فالتالت شافه بيفتح الدكان فقاله " ما أجمل هذا الصباح وزاد اناقتك هذه العمامة الزرقاء " قعد يفرك في عينه ويقلّب العمامة ويصيح في وجهه ويقوله " إنها بيضاء " بعدها بشوية قعد في دكانه وهو باصص على العمامة بتركيز فدخل عليه الرابع وقاله "أهلًا يافلان .. ما شاء الله!!! من أين اشتريت هذه العمامة الحمراء؟ " فصاح التاجر وقال " عمامتي خضراء " رد الرابع وقاله " بل حمراء " رد التاجر " بل صفراء .. لا .. لا .. بل خضراء .. بل زرقاء " ثم ضحك .. ثم صرخ .. ثم بكىٰ .. وقام يقفز!!! فقال ابن حزم رأيت هذا التاجر المشهور في شوراع الأندلس مجنونًا يقذفه الأطفال بالحصىٰ؟ _ متخيلة عدم ثقته في نفسه شالته منين ووصلته فين؟ قصدك تقولي إن مش كل حد قريب مننا ينفع يكون مرايا لينا وممكن الغل والحقد يدمروا البني آدم؟ _ بالظبط؛ ولو مكنش كل واحد فينا في معية الله هنتكسر وروحنا هتكون هشّة جدًا. _ مسكت مج القهوة تاني وبصتلي وقالت " عيونك حزينة ليه ومتحاولش تكذب عليا؟ " _ ضحكت بصوت عالي وبصيت للشارع والعربيات وقولتلها " بجد مفيش " ما دام خبيت عيونك وانت بتجاوبني يبقى فيه؛ احكي عشان احكيلك أنا كمان. _ خايف يامسك؛ خايف من بكره؛ طلاقك ده وجعني وخايف تتوجعي تاني، مش قلة ثقة في مروان بس كلنا نفوسنا بتتغير وأنا مش حمل اشوف قلبك بيتكسر ابدًا. سيبها على الله يا يزن. _ أنا مسافر بعد فرحك بيومين. مسافر فين؟ _ السعودية. ليه؟ _ عشان اعمل شقتي وأشوف حالي قعدتي هنا مش جايبة همها والحظر موقف الدروس وأنا زهقت. _ ظهر على ملامحها عبوس مفهمتهوش حاولت تخبيه فقالت " خلاص اللي يريحك، دوّر على مصلحتك، أنا طالعة بقى " _ مش هطمنيني؟ مش فاهمة. _ كل مرة بقولك خايف كنتِ بطمنيني بطريقتك؛ إنتي نسيتي؟ _ رجعت خطوتين وقالت " لو خايف عليا ف أنا مش خايفة على نفسي وأنت في حياتي، أما لو خايف من مستقبلك ونصيبك واتعقدت من الجواز بسبب طلاقي فأحب أرد عليك بجملة للشعرواي زي ما أنت بترد عليا بكلامه " سيأتي يومًا وتجد من يُضحي لأجل ابتسامة على وجهك فلا تغلق أبواب قلبك، فليس كل من يدقها ينوي جرحها ".. _ مش عارف بقى. بقولك إيه أنا عاوزة اشتري دريس جديد اقابل بيه مروان بكره تعالى نجيب واحد. _ يلا استنى هطلع أجيب ساندي ونمشي. ماشي مستنيكي. _ جابت ساندي في إيديها ونزلنا اتمشينا شوية قبل ما نروح نشتري، مالك يازفتة ساكتة ليه؟ بفكر أطمّنك إزاي! _ لا ياختي طمّني نفسك أنا خلاص بقيت كويس. انت من شوية ادتني درس في الثقة في النفس أنا بقى مش هسكت غير لما اديك درس في الإطمئنان بالله. _ مستني أهو. _ سكتت دقيقة وقعدت تدندن شوية بكلمات مبهمة وغامضة وبعدين قالت بصوت كرتوني" وجدتُها " _ هي إيه اللي وجدتيها؟ عارف سيدنا عمر ابن الخطاب طبعًا؟ _ ياختي عليكي هو في حد ميعرفهوش.! في يوم من الأيام جاء رسول عمر بن الخطاب من إحدى الغزوات يبشره بالنصر ♡ فسأله سيدنا عمر : متى بدأ القتال ؟ فقال : قبل الضحى قال عمر : ومتى كان النصر ؟ فقال : قبل المغرب فبكى سيدنا عمر حتى ابتلّت لحيته ! فقال : يا أمير المؤمنين، نبشرك بالنصر فتبكي ؟! فقال سيدنا عمر رضي الله عنه : والله، إن الباطل لا يصمد أمام الحق طوال هذا الوقت إلا بذنب أذنبتموه أنتم، أو أذنبته أنا . ثم قال : نحن أمة لا تنتصر بالعدة والعتاد؛ ولكن ننتصر بقلة ذنوبنا، وكثرة ذنوب الأعداء؛ فلو تساوت الذنوب، انتصروا علينا بالعدّة والعتاد. "سيدنا عمر جاله النصر وعيط كان ممكن واحد غيره يضحك وميركزش ويقول ما دام انتصرنا يبقىٰ خلاص ربنا بيوفقنا وجعلنا مؤيدين مسددين لكن هو ركز على المدة والذنوب، إطمّن بربنا مش كل سعادة هتجيلك فيها خير؛ شيل الخوف من قلبك: كل الحكاية يايزن إننا مش مطمنين بربنا ومهما قربنا منه في جانب مقصرين فيه والجانب ده بيكون سبب في عدم راحتنا في عز سعادتنا، لكن لو عبدنا ربنا حق عبادته واطعنا أوامره كما يجب أن تُطاع كان زماننا في عز بلائنا مطمنين وكويسين جدًا؛ إحنا بنصلي الصلاة عشان فرض علينا ونرتاح منها مش عشان نرتاح فيها ودي أهم صلة بتربطنا برحمته فما بالك بباقي الطاعات وتقصيرنا فيهم؟ " _ لو كل الناس بتفسر المشاكل زي ما بتفسريها إنتي مكنش ده بقى حالنا ♡ عارف.. _ نعم؟ صدقني لو توكلت على الله هيكرمك، أنت أكيد مش فاهم حاجة دلوقتي ومتلغبط زي ما أنا كنت متلغبطة أيام طلاقي وقتها حسيت إن العالم إنتهى وكمان هدخل تجربة مش عارفة هتكمل ولا لا بس اللي واثقة فيه إن ربنا دايمًا شايلي خير في كل حاجة بتوجعني. في واحد كان من أحد أعلام السنة اسمه حاتم الأصم واحد سأله في يوم وقال بما حققت التقوى فكان رده بكل بساطة حققتُ التقوى بأربعة أمور وهي : علمت أنَّ رزقي لا يأخذه أحد غيري فاطمئن قلبي، وعلمت أن عملي لن يتقنه غيري فاشتغلت به، وعلمت أن الموت يطلبني فأعددت الزاد لهذا اليوم، وعلمت أنّ الله مطلع عليّ فاستحيت أن يراني وأنا على معصية " عشان كدا أنا بصبر وبحتسب حتى لو اتوجعت، هو لخص كل اوجاعنا لما قال " رزقي لن يأخذه غيري، معناها لو حد كسرنا ومشى يبقى مش هو ده رزقنا صح يا يزن؟ " _ صح! مش هسمح لحاجة توجعك متخافيش. _ أنا كل اللي مزهقني بس القدرة المادية مش عارف هخلص شقتي إمتى إنتي عارفة إنها كبيرة وعاوزة كتير. _ ابتسمت وبعدين طلعت ورقة من شنتطها وقالت " خد الورقة دي اقراها لحد ما ادخل اقيس الدريسات وأشوف لساندي طقم حلو " _ مسكت الورقة وفتحتها فورًا كان محتواها عن حاتم الأصم نفسه اللي كانت بتحكيلي عنه " اليقين بالله ونعمة الولد الصالح : عندما حانت فريضة الحج وبدأ الحجاج يستعدون للذهاب للحج ، أشتاق حاتم للخروج للحج ولكنه كان لا يملك نفقة الحج بل لا يملك نفقة تكفيه وأهله تلك الفترة ، فحزن حزنًا شديدًا ولاحظت ابنته حالته الحزينة ، وكانت ابنته صالحة تقية نقية ، فقالت لوالدها ما يحزنك يا أبي ؟ بدأت دموعه تنزل على وجهه وهو يقول لها : الحج أقبل ولا نفقة لدي للحج هذا العام فقالت البنت الواثقة من رزق الله يرزقك الله يا أبي فقال لها ونفقتكم تلك الفترة ، فقالت له يرزقنا الله ، فقال لها عودي لأمك فهي من تتحمل أعباء البيت ، فقالت الأم لها ونفقة البيت ماذا نحن فاعلون ؟ فقالت البنت لوالدتها وإخوتها : ( إن والدنا ليس هو الرازق والذي يرزقنا هو الله فدعوه يذهب للحج ) ، فخرج حاتم الأصم للحج ولم يكن ببيته إلا نفقة تكفيهم لثلاثة أيام فقط ، وبالفعل خرج وكان يسير خلف القافلة التي ستذهب للحج لأنه لا يملك النفقة لينضم للقافلة . وأثناء الرحلة تعرض أمير القافلة للدغة عقرب وأصيب بألم شديد وكاد أن يهلك ، وعلموا أن الرجل الصالح حاتم الأصم يسير خلف القافلة فقاموا باستدعائه لكي يرقي الأمير ويدعو له بالشفاء فدعا له وقام برقيته فشفاه الله تعالى ، فقال له القائد إن نفقة حجك عليّ ففرح حاتم الأصم ، وعلم أن هذا الفضل من الله عز وجل وقال حينها : (اللهم إن هذا تدبيرك لي فأرني تدبيرك في أهلي) أما في بيت حاتم : لقد مضى اليوم الأول والثاني والثالث وازداد الأمر سوءًا ولم يعد بالبيت طعام ، فأخذ الأم والأبناء يعاتبون البنت الصالحة ويخبرونها بأنها السبب في كل ما حدث لهم ، لكن البنت الواثقة برزق الله كانت تقول : (اللهم قد عودتنا فضلك فلا تمنعنا من فضلك) . وكانت الأم تتعجب من ثقتها وتقول لها ماذا سنفعل ؟ والفتاة تقول لها بيقين : هل أبونا هو الرزاق ؟ فتقول أمها لا إنه الله عز وجل فتقول الفتاة الصالحة : ( لقد ذهب للحج أكل الرزق وبقي الرزاق ) ، وبعد عدة ساعات طرق بالباب طارق يقول لهم إن الأمير يستسقيكم . فقد كان الأمير برحلة صيد وأصابهم العطش ، فأرسل وزيره إلى أقرب بيت وكان بيت حاتم الأصم ، فقامت الأم بإعداد كوب من الماء البارد فشرب الأمير وأحس بحلاوة هذا الماء ، فسأل عن صاحب البيت فأخبروه أنه بيت حاتم الأصم ، فطلب منهم أن يحضروه ولكنهم أخبروه أنه يحج هذا العام . فقام الأمير بخلع حزامٍ من القماش كان مرصع بالجواهر ورمى به في بيت حاتم وقال لوزرائه : ( من كان منكم لي عليه يد فليفعل مثلي ) فخلعوا جميعًا أحزمتهم المرصعة بأغلى الجواهر ورموها ببيت حاتم ، ثم جاء تاجر لبيت حاتم واشترى تلك الأحزمة بمبالغ كبيرة من الذهب . وأصبح بيت حاتم من أغنى بيوت المسلمين ، واشترت الأم طعامًا وشرابًا ليسدوا به جوعهم ، ولكن البنت الصالحة كانت تبكي فتعجبت الأم وقالت لها لما تبكين وقد أغنانا الله ؟ فقالت البنت : ( إن هذا مخلوق لا يملك لنفسه نفعًا ولا ضرًا ولا موتًا ولا حياة نظر إلينا نظرة واحدة برحمة وشفقة فأغنانا ! فكيف لو نظر إلينا الله عز وجل ! فسبحان الله الرازق العاطي ، إنها لنعمة عظيمة أن يرزقك الله سبحانه وتعالى بالولد الصالح الذي يثبت في قلبك اليقين بالله وحسن التوكل عليه ، اللهم ارزقنا ذرية صالحة تكن لنا خير معين في الدنيا والآخرة ." _ الكلام ده غيّر كل حاجة جوايا، شال من قلبي كل الهموم، زاح كل التفكير في بكره، وليه أفكر في بكره وأنا فعلًا مستقبلي في إيد من لا تغفل عينه ولا تنام؟ _ انا عليا اليقين بالله والإجتهاد للحصول على رزق الله ♡ _ خلصنا وروحنا البيت، مروان ومسك اتفقوا على الجواز، كل تحضيراتهم أنا اللي جهزتها، خدت مروان للحلاق يوم الفرح، طلعت مروى أختي لمسك تساعدها في لبسها، قاعد بسقف وهي على الكوشة، حسيت بغصة في قلبي، طول عمري بفرح لفرحتها وزعلها بيموتني ويقطع في قلبي من جوا لكن المرة دي فرحتها وجعاني ومش مريحاني، معقولة مروان يعمل معاها زي محمد؟ _ ولا أنا حبيتها ومش طايق غيري ياخدها مني، أنا عرفت بنات كتير غيرها وكلمت بنات كتير بس مكنتش بعرف أحط مشاكلي في إيد بنت غيرها، طيب لو ده حب اشمعنا حسيته دلوقتي وكمان في فرحها؟ _ يمكن تعوّد وزهقان عشان الحاجة اللي بتهون عليا مشت؟ سيبت الفرح ومشيت قعدت بعيد، وجع قلبي بيزيد، مش طايق اشوفها جنبه، دي غيرة؟ _ مش فاهم شعوري، عاوز أصرخ، مش عارف أنا عايز إيه، ما هي كانت قدامي طول الوقت اشمعنا دلوقتي؟ _ إيه حكمة ربنا من كل ده؟ _ هتجنن مش قادر؛ معقولة يكون كلام أمي بجد " الشخص مبيعرفش قيمة الحاجة اللي معاه غير لما تضيع منه؟" _ طيب ما هي ضاعت مني مرة وكنت مبسوط ليها؛ مش قادر التفكير بيذبذب خلايا عقلي ويهز قلبي، الفرح عدى وخنقتي بتزيد كل يوم عن التاني، سافرت السعودية كان كل يوم بقضيه من غيرها واجعني، بهلك نفسي في الشغل عشان مديش لنفسي مساحة افتكرها. _ عدت سنة وكل ما اكلم مروان ميجبليش سيرة الحمل، ولما سألته في مرة قالي " والله يا يزن روحنا للدكتورة وقالت إن مسك خفّت والمفروض يحصل حمل بس مش عارف إيه السبب" _ هو المفروض أزهق ولا أفرح؟ _ بعد شهر مرات عمي كلمتني وهي بتعيط وبتقولي " عاجبك صاحبك، طلّق بنتي يا يزن، مش ده اللي قولت إنك واثق فيه؟ " _ إهدي ياحبيبتي بس وفهميني حصل إيه؟ بيزعلها من زمان بس هي كانت بتبلع كلامه وساكتة، كل ما يحصل مشكلة بينهم وتحاول تعاتبه يقولها الله يرحم جوزك الأولاني كان بيضربك بالجزمة وكنتي مبسوطة، وإمبارح يطلقها ويقولها " شكلك مبتخلفيش وأهلك ضحكوا عليا " هي تستاهل كل ده يا يزن؛ هي بنتي بتغلط في إيه؟ _ قفلت الموبايل من غير ما اجاوبها، صحيح اكتشفت إني بحبها بس ده ميدنيش الحق إني أكون أناني وأفرح وأنا شايفها بتتألم كل شوية من واحد مقدرهاش. _ حجزت أول طيّارة ونزلت روحت على بيته وحصل بينا خناقة كبيرة جدًا وقطعت علاقتي بيه، جريت على البيت قعدت أدور عليها ملقتهاش، فتحت أوضتها لاقيتها قاعدة في جنب وحاطة راسها بين رجليها بتعب، لأول مرة اتجرأ وبدون تفكير رفعت راسها بإيدي وقولت " حقك عليا ياحبيبتي " _ بصتلي بعيون وارمة وقالت " حبيبتك؟ " _ أنا معرفش حصل إمتى ولا إزاي بس أنا والله بحبك ♡ _ ساكتة ليه؟ _ مسكت ايديها فشدتها مني وقالت " يزن كدا غلط " _ ضغطت على ايديها وقولت " تتجوزيني يامسك " يايزن أنت مش عارف بتقول إيه أنت مش صغير عشان حزني يأثر على رأيك ويلغبط مشاعرك. _ بس أنا مش مراهق عشان معرفش أميز مشاعري. متهيألك أنت طول عمرك شايفني أختك. _ مش يمكن ربنا حط جوايا الشعور ده لحد ما أكون جاهز،مش يمكن لو إتجوزتك وأنا محتاج كنت حسستك بالإحتياج ومكنتيش ارتحتي معايا؟ عاوز إيه يعني يايزن. _ عاوزك يامسك أنت حاسس إني مسئولة منك لكن مش مسئولة من قلبك. _ ده كان تفكيري قبل ما اعرف إنك قلبي وكل حاجة كانت ضايعة مني وهي قدام عيني. _ هقولهالك تاني وتالت وعاشر " تتجوزيني يامسك " متأكد من قرارك. _ مش متأكد من حاجة غير إني عمري ما هكون لحد غيرك ♡ بحبك. _ وأنا بحبك ♡ " بعد أربع سنين " " كنت بشوف بنتنا بتلعب قدامي في الشقة، ايوه بنتنا، مكذبش عليكم هي كلها مامتها والحمد لله إن مش شبهي " " غيابُها غربة وحضنها وطن وغاوي الموت بين أحضان وطنه لا يهاجر ولو جاءت له جميع الأوطان ساجدة طوعًا لقلبه " عزة العمروسى | |||||||||||
|  |
 |
| أدوات الموضوع | |
| انواع عرض الموضوع | |
|
|
العرض العادي
