04-09-21, 06:38 PM
| #1 | |||||||||
 
|  ألف سنة لحبيبي * مكتملة * المقدمة رغم ان الحياة بها الكثير من المتعة والرفاهية الا انها تضعنا فى تجارب فى اوقات غير معلومة، مما تجعل قلوبنا تقطر دما من شدة الصدمات، ولكن الوقت يمر ولا يتوقف عند ساعة معينة. تابعوا معنا الرواية القصيرة الاجتماعية الممتعة ألف سنة لحبيبي. روابط الفصول الفصول 1 - 8 الأخير .. بالأسفل التعديل الأخير تم بواسطة ebti ; 04-09-21 الساعة 11:23 PM | |||||||||
|  |
|
04-09-21, 06:39 PM
| #2 | |||||||||
| اقتباس _ ازاى هعيش مع واحد عاجز دمر حياتي وليه اخدمه يا بابا ارجوك أنا عاوز أطلق مش هقدر أعيش معاه _ صدق اللى قال الولد بيفضل يرضع من أمه لحد ماتموت ، خلاص يا بنتي اعملى اللى انت عوزاه ... الجزء الاول كان يا مكان في يوم من الأيام ،طلعت شمس شموستنا على الحلوة القمورة اللى اتولدت في مدينة القاهرة الجديدة ، بنت مصرية جميلة اسمها نجوى بتتميز عن غيرها بملامحها الهادية ، بشرة خمرية ،وعيون بنية ، وشفايف رقيقة وردية ، أكتر حاجة حلوة فيها كانت غمزاتها اللى ظاهرة كل ماتتكلم او تضحك . كان هادفها في الحياة اللعب والضحك والهزار بس كان عندها مشكلة . اتربت الحلوة وسط أهلها ميسورة الحال المكونة من أب وأم ،وولد وخمس بنات ، وكانت البنت الوسطانية المهجور حقها بين الكبير والصغير . الكل كان بيجي عليها وعلى حقها عشان كانت الفرد الضعيف فيهم وكمان لا بتحب المشاكل ولا المريسة . كبرت نجوى قافله على نفسها ملهاش اصحاب بسبب اخوها الكبير اللى بيدخل في شؤن اخواته البنات في كل كبيرة وصغيرة ودايما يعقدهم في صحوبية البنات بتوع اليومين دول وان الجيل بتاعهم مش محترم ، ومن غباءه فشل مع كل إخواته الا نجوى عشان كانت شخصيتها مهزوزة شوية بسبب انطوائها بقت تحذر من كل شخص يتحاور معاها وتبعد عن الكل لحد ما دخلت الجامعة وبسبب السكاشن الاجبارية والحضور الملزم لكلية التربية اتعرفت على بنتين يمنى وتسنيم وطبعا ماكنتش هتقرب منهم وتعرفهم من غير يمنى لأنها اجتماعية أووى فصاحبتها في شلتها وبقي كل أصحاب يمنى هما أصحاب نجوى بس من بعيد لبعيد الا تسنيم لأنها كانت شبها أوى . نجوي كانت بتروح الجامعة عشان تقابلهم وتفطر معاهم كانت بتحس انهم مش مجرد أصحاب بالعكس علاقتهم ببعض كانت قوية أووى تدخل في عِشرة الاخوات . الأربع سنين بتوع الجامعة مروا زي الهوي . ويوم التخرج كان كله عياط بسبب انهم خلاص كل واحده هتشوف حالها ومعتش هيكون في جامعة تاني ، بس اتفقوا هيبقوا على اتصال وانهم هيتقابلوا كل فين وفين عشان بلادهم بعيدة عن بعض. وبعد مدة بسيطة كل واحدة انشغلت في حياتها يمنى وتسنيم اتجوزوا وبقي التواصل معاهم صعب ومش زى الأول . وبقت نجوى لوحدها في كل حاجة ، أخواتها كلهم اتجوزوا الكبيرة والصغيرة ،والحياة اتعقدت معها لما ابوها طلع على المعاش وبقي الحال على القد فطلب منها ابوها انها تبدأ تشتغل وتشوف مصلحتها لأنه شال همها عشان مش بيتقدم ليها عرسان خالص . والست الوالدة قالتلها _ سيبك من موضوع الدروس في البيت واطلعى اشتغلى بره عشان الناس تشوفك وتتعرف عليك . طبعا نجوى موفقتش في البداية ، وبسبب مامتها اللى مبتعرفش تستلم فضلت تلح عليها ،لحد ما فى يوم عرفت ان واحد من أعيان البلد عاوز شوية بنات من البلد يشغلهم في المول الكبير بتاعه . وافقت نجوي تروح بعد ما مامتها قرصت عليها بان فلوس الدروس اللى بتعطيها قليلة جدا ،وخاصةً انها هتاخد مرتب حلو تقدر تجهز نفسها منه لو اشتغلت فيه . وبرغم ان نجوى زعلت لان كل اخواتها.. أمها وابوها اللى مجوزنهم بفلوس ارضهم والقروض فاشمعنا هي اللى تجهز نفسها وكمان تصرف على البيت . بس كتمت في نفسها متقدرش تطلب حاجة في وقت الحرج ده . وبدأت نجوي تشتغل في المول الكبير في قسم الكشير (الحسابات )، كل البنات اللى كانوا معاها تعليم متوسط وهى الوحيدة اللى فيهم تعليم عالى ، ولكن الشباب اللى بيشتغلوا معاها معظمهم طلاب منهم الدكتور والمهندس ، فعرفت ان مش من حقها تحس بالغرور ، وان الشغل مش عيب ،وان صعوبة الحال تخل الملك ينزل سواق ، وكل المهن مش لأى حد مهما وصل للاجتهاد ، وكل وظيفة ليها أهمية في حياة الناس ،وغير كل ده اتعلمت حاجة مهمة في سوق العمل أن الكل متساوي ومفيش حد أحسن من حد ، ومن حق الكل يتعامل مع غيره بالحسني وبكل احترام . ومن هنا اتعلمت تبقي صبورة وبقى كل همها يبقي في جيبها مبلغ تجيب بيه كل يوم أكله هنية لأمها وابوها . ومرت الأيام على نفس النمط ،حتى جه اليوم اللى قلب كل الموازين ، وقف قدامها شاب باين علية في أواخر العشرينات ، بشرتة صافية وبيضة جدا مفهاش شائبة فانتبهت له بمنظره الغريب حبتين . حط قدامها صندوق الحاجات اللى اشتراها عشان تحسبها في المكينة ، وبعد ماخلصت قالت بصوت هادى. _ 140 يافندم .. بص ليها الشاب باستغراب ورد وقال بنبرة معترضة _أنا كل مرة بجيب الحاجات دى وتطلع تسعين جنية .. _ طب ثوانى راجعت نجوي المشتريات لقت ان عنده حق فاتحرجت جدا وطبعا سبب ارتباكها ان الشاب ده اشترى حاجات خاصة بالحريم ولما بصت على ايده وملقتهوش متجوز .. او خاطب فخافت منه عشان هي بتشك في اى حد قدامها وشخصيتها درامية . _ اسفه ..انت حسابك فعلا تسعين . اعطي ليها الفلوس وعنيه فضلت متركزة على شفايفها بطريقة غريبة ، دورت على الفاكة بسرعة واعطيته المتبقي من الحساب ومشي وهو بيبص ليها من بعيد . حاولت تهدى نفسها وهى بتفكر أنه اكيد اشتري الحاجات دي لأخته زي ما أخوها كان بيجيب الحاجات دي ليهم . _ ياترى هو بيستخدم ايه لبشرته عشان تبقي بالصفاء ده ..زى بشرة الأطفال بالظبط . بتقولها نجوى وهى بتكلم صحبتها يمنى على تطبيق الماسنجر لترد عليها . _ متشغليش نفسك ده شكله عيل نايتى . _ بالعكس ..ده عنده عضلات وملامحه تحسيها حادة شوية .. _ انت جبتيلي فضول . بس ازاى راجل يشترى سويت هو مكنش محروج _ ابدا ..مع ان كان فيه بنات بيستنوا دورهم وراه . _ ناس عجيبة .. وبقت نجوي تتكلم مع صحبتها يمني ثلاث ساعات في التفهات وميبطلوش ضحك وهما بيفتكروا حياتهم في الجامعة وقد ايه وحشتهم الأيام الحلوة دي . وبعد يومين وفى نفس التوقيت راحت نجوى للخزنة عشان تقبض مراتبها وكان اليوم ده بالنسبة ليها يوم السعد . مسكت المرتب وحطيته داخل شنطتها وهى راحة عشان ترجع مكانها لمحت الشاب ده واقف في قسم الحريم بيمشي ايده على ملابس الستات لا وكمان بيشم فيها . طبعا عنيها كانت هتخرج من مكانها واتأكدت من شكوكها في الشاب ده ،فحولت تغير وجهة طريقها وتمشي من مكان تانى ، بس اخينا ده لمحها وشاور ليها وبيسألها على سعر قطعة من الملابس . حكم القوي خلاها تروح له عشان المدير كان بنفسه بيراقب الكاميرات . اى نعم مش شغلتها بس ممكن تتجزي على تصرفها في الشغل وانها مش ساعدت العميل . فراحت له وهى حريصة انها تكون بعيده عنه بخطوات . _ نعم يافندم .. بتقولها نجوي وهى بترسم ابتسامه كدابة فظهرت غمزتها الرقيقة . رفع الشاب حاجبه بعجب ورد عليها .. _ تعرفي ان اسنانك حلوة أوى ونضيفة . اتصدمت من رده وبعدت خطوة زيادة فلقيته ملهوف وبيقرب منها وبيضيف على كلامه وبيعطي ليها الموبايل بتاعه . _ اكتبيلي رقم الحاج .. نجوي كانت أول مرة تتعرض لموقف زي ده في حياتها فمكنتش عارفة تتصرف ازاى غير انها تروح على مكان شغلها جرى من غير كلمة واحدة . وفضلت تكمل شغل وهى شايله هم الشاب ده لما يجي يحاسب . وبعد ساعه كاملة ظهر قدامها ومعاه صندوق المشتريات وبيقدموا ليها وهو بيقول . _ ياسر .. _ نعم .. _عمرى خمسة وثلاثين سنة موظف في بنك وشقتى جاهزة..هاه .... مش هتجبيلي بقي رقم الحاج ؟ ... يتبع | |||||||||
|
| |
|
04-09-21, 06:40 PM
| #3 | |||||||||
| الجزء الثاني نجوي عنيها تاهت منها والتوتر بدأ يظهر عليها وخدودها بقت زي الطماطم . واحده زملتها في الشغل وجارتها كانت بتراقبهم ولما سمعته بيقول كده ونجوي ساكته والشغل وقف والناس عاوزة تمشي راحت له وهى بتضحك وبتقوله _ شارع الاستبن عمارة رشيد الدور الأول عم يسري راجل محترم جدا ..واختيارك ياسيدي في محله . لفت نجوي وشها وهى خلاص حاسة ان هيغمي عليها على جارتها اللى كانت بتبص ليها بابتسام هي وياسر . نزلت نجوي رأسها وهى مكسوفة من جارتها اللى مشت وراحت مكانها . وبعد يومين بالظبط لما رجعت نجوي بيتها لقيته قاعد وسط باباها ومامتها اللى بصوا ليها بفرحة كبيرة وهى مش مصدقة نفسها ومش مصدقة انه فعلا ايجه واتقدم بالسهولة دي ،مامتها قربت منها واخدتها تقعد معاهم ، الكل فرحان وبيضحك وهى وشها مكسوف ومش عارفة تقول ايه ، وهو فضل يبص عليها ويبتسم وبتضحك معاه عنية ،كان طول عمرها نفسها تتجوز واحد عنيه ضيقة عشان بتشوف فيها سحر في وقت الكلام ووقت الفرحة . وبعد ما استأذن ومشي شمت نفسها شوية ومدت أيدها واخدت كباية العصير تشربها مرة واحدة ،باباها بيقولها وهو بيبص ليها بفرحة .. _ شوفتي اخرت الصبر يانجوي حلوة ازاى . وقالت مامتها رد على كلام باباها _ عريس لقطة مجاش لحد من اخواتك شخص بالموصفات الحلوة دي ..، احنا لازم نمسك فيه بأيدنا واسنانا . نزلت نجوي كباية العصير من على بقها وهى بتراقبهم وقالت وهى رافعة راسها _ بس انا لسة مقولتش رأي .. بصت مامتها ليها باستغراب وردت _ رأيك اللى هو انت موافقة طبعا ؟ اضيقت مامتها لما شافتها ساكتة وضافت بضيقة على كلامها _ انت شوفتي شكله عامل ازااى الجدع مفهوش غلطة . وقام باباها ضاف من عنده كمان _ مامتك عندها حق يانجوي ..احنا اكبر منك وفاهمين كويس الدنيا عنك .. _هفكر ..الاول _ انت هتعدي تتفرعنى من اولها بلاش الحركات دي عشان ميروحش مننا وقفت نجوي وراحت اوضتها من غير ماتقول ولا كلمة ليهم وسابتهم وهما مش فاهمين هى بتعمل كده ليه . رمت نفسها على السرير وفضلت تتقلب وتفكر فى ياسر وانه ازاى قِبل انه يتجوزها بالسهولة دي من غير ما يعرف عنها حاجة ! ومرت الايام وياسر بيجي المول فى معاده ياخد عدته ويمشي . محصلش بنهم اي حوار غير ابتسامه منه بس ليها . حست نجوي بالخوف انه يكون غير رأيه عشان كده مرحش ليهم من اخر مرة ولا أتكلم ولا حتى اتصل . واتعاد كلام مامتها فى ذكرياتها وهى بتقول ( بلاش تتفرعني ليروح منك ) وقامت قايلة وهى تايهة _ معقول يكون غير رأيه ..بس هو كل مايشوفني بيضحكلى . زعلت نجوي اوي فى نفسها وفضلت تكتم فى قلبها الحزن ،بالرغم انها مكنتش مبينه كده قدام مامتها ولا باباها بس طول الأيام دي كانت بتتخيل ان يبقي عندها شقة خاصة بيها وعيلة وزوج . وبعد ما خلاص حاولت تنسي الموضوع ومر شهر كامل ،لقيته قاعد فى بيتهم هو واهله وبيتكلموا مع مامتها لما رجعت من الشغل . ... يتبع | |||||||||
|
| |
|
04-09-21, 06:42 PM
| #4 | |||||||||
| الجزء الثالث قد ايه الفرحة هجمت علي وشها بالسعادة والامل رجع من تاني ، ومقدرتش تخبي فرحتها وهى بتبصله . وبعد اتفاق سنه كاملة خطوبة عشان يقدروا يجهزوا بنتهم ، ياسر قال _ احنا الحمد لله مستورين والشقة جاهزة بعفشها ،، هى تيجي بشنطة هدومها .. ومش عوزين نطول يعني فى خلال ثلاث شهور كده نتجوز . بص باباها عليها ولقاها فرحانه فرد على ياسر وقال _ على بركة الله يابني . كانت السعادة وقتها مالية الببت بالزغاريد والاغاني ، والعيلة كلها اتلمت الولد والخمس بنات . نجوي برغم فرحتها الا انها كل لما تبص فى وش ياسر تحس انه غامض وكلامه كله معاها بحذر ،بس حولت تكبر دماخها بحجه ان دي مجرد خطوبة وانه اكيد بعد الجواز هيكون حاجة تانية وحياتها هتبقى احلا وان الحب بيجي بعد الجواز . ومرت الثلاث شهور زي الهوى ،وجه معاد الفرح ، الكل كان فرحان وسعيد جدا ونجوي كانت هتطير من الفرحة انها اخيرا هتلبس الفستان الأبيض وهيبقي ليها عالم خاص بيها ومعدتش هتقوم من النوم بدرى عشان الشغل وسنينه . الفرحة اللى جواها قلبت توتر وخوف وهى داخله برجليها اليمين شقتها مع جوزها واتقفل عليهم باب واحد . اول مقابلة بينهم كان كلها توتر فحاول ياسر يهديها وهى رافضة تتقبل انه يقرب منها ، ومر اسبوع كامل على الحال ده . كانت بتستغرب هدوءه الغريب وتعامله معاها بكل احترام ، فبدأت تضايق من نفسها ،وجه اليوم اللى هيأت حالها زي العرائس يوم الفرح ، ومرت الليلة على خير. حست نجوي بعد ما ياسر أخد منها اللى عاوزه اتغير وبقي شخص تاني ، كل. لما تيجي تتكلم معاه تلاقيه صامت مش بيشارك فى اي حوار، وقليل اووي لما يجي يعد معاها، لاما فى الشغل لاما عند مامته واخواته البنات . **** وفى يوم اكتشفت انها حامل بالصدفة افتكرت وقتها انها لما تعرفه هيفرح وهيبقي كويس معاها، بس اتصدمت فيه جدا، وكالعادة كان بيسبها لوحدها كتير وحياته كلها عبارة عن ولدته واخته.. حتى الخروج دايما معاهم وبيتفسحوا وهى زي اللى ملهاش لازمة. ولما ولدت وجابت طفلة صغيرة افتكرت برضه ان البنت هتخليه يتغير وتقربهم من بعض، بس الصدمة ان ولدته بدأت تدخل جامد فى حياتهم ويحصل مشاكل وتوصل بيه انه يطاول عليها بالضرب والمعاملة السيئة. حست نجوي ان مش هى دي الحياة اللى كان نفسها فيها، حاسة انها فى قوقعة مش عارفة تخرج منها ولا تهرب حتي من الظلم اللى هي شيفاه، لا كلمة حلوة ولا ضحكة تخفف الوجع ولا اي حاجه خالص غير الظلم. وفى يوم قررت نجوي انها تعتمد على نفسها وتبدأ شغل من البيت من وراء جوزها، عشان مكنتش ضامنة حياتها معاه وبدأت تسرق فلوس من جيبه بحجة انه مش بيعطي ليها مصروف وان فلوسه كلها ضايعه على امه واخواته. ولما جمعت مبلغ حلو اتكلمت مع واحدة على الانترنت واتفقت معاه على شغل تسويق الملابس من البيت بحيث انها تعلن عن قطع الملابس فى الجروبات واللى يعجبه حاجة توصله لست التانية دي ويشترى والفلوس توصلها عند بيت أهلها بعد ما أتفقت مع أمها تحوشها ليها . ولان نجوي كانت شاطرة وبتعرف تلاغي الناس بقي ليها زبائن كتير وبيثقوا في اختياراتها . وبدأت تكسب ولما جمعت مبلغ يكفيها قررت انها تطلب الطلاق وتعيش لنفسها ولبنتها. وفضلت مستنية جوزها يرجع من الشغل، عشان تصارحه بطلبها اللى هى متأكدة انه هيوافق عليه لان حياتهم قايمة على السرير وبس مفيش لا رحمة ولا مودة. ولما الساعة دقت على 12بليل سحبت فى النوم غصب عنها بسبب تعبها الشديد مع بنتها وشغل البيت. وفجأة حد ضرب جرس البيت جامد ومسبش ايده من عليه، وصويت مالي البيت كله. .. يتبع | |||||||||
|
| |
|
04-09-21, 06:46 PM
| #5 | |||||||||
| الجزء الرابع قامت نجوي من النوم مفزوعة وطلعت تجرى على البلكونة تشوف مين ، اتصدمت لما لقت ان جوزها مرمي على الرصيف غرقان دم واصحابه بيحاولوا يشيلوه وهو مغمي عليه زي القتيل . ولقت نفسها بتصوت بحسرة لحد ما وقعت مغمي عليها . *** وبعد مرور ست شهور نجوي لسة حاسة انها في كابوس ، ومش قادرة تفوق منه ، كل يوم تروح المستشفى تطمن على ياسر اللى خلاص هيدخل في سبع شهور غيبوبة . وكل الاطباء قاله ان حالته خطيرة مفيش منها شفا ، وانهم يتوقعوا موته في اى لحظة . نجوي برغم الهم اللى عاشته مع جوزها الا انها اشفقت عليه وعلى منظره والأكثر ان أهله مش بيجوا يزروه الا كل فين وفين ، حتى مامته نفسها بقالها فترة طويلة مجتش ، سألت نفسها أن ازاى يكون في ام بالقلب الأسود ده ، مش هو ده اللى كان على طول بيسبها ويروح يعد معاها ، وتعد تقول ابني وابني .. ايه اللى حصل دلوقتي ؟ معقول عايشين بياكلوا ويشربوا وفقدوا الامل بالسرعة دي واعتبروه ميت؟ واستمر الوضع على ماهو عليه لمدة اربع اشهر كمان . نجوي كل يوم تقوم الصبح تبص على بنتها وقد ايه بتصعب عليها انها اتحرمت من ابوها بدرى . _ يعني خلاص يا ماما بابا هيموت معدناش هنشوفه تاني . نجوي قلبها وجعها على بنتها ومن كلامها وخاصةً انها بتقول الكلام ده وعنيها مليانه دموع ، فردت عليها وقالت بزعل _ ربنا كبير يا بنتي وقادر انه يكتب له الشفى ، أدعيه انت بس . البنت الصغيرة مسحت دموعها وقالت _ تعرفي ياماما الابلة النهاردة حكتلنا على ايات الاستشفاء ، انا خلتها تكتبهم في ورقة وحفظتهم عشان اقرأها لبابا . ابتسمت نجوى لبنتها وهى بتطبطب عليها وتمسحلها دموعها. وراحوا الصبح لباباهم في المستشفى البنت فضلت تقرأ الآيات على باباها ويوم ورى التاني ومزهقتش ابدا . وفى يوم راحوا المستشفى لقوا السرير بتاعه فاضي فوقع قلب نجوي ووقفت ممرضة تسألها عن مكانه بخوف وقلق فردت عليها وقالت _ البقاء لله . نجوي حست ساعتها ان الأرض اتشقت وخدتها للجحيم ،هي عمرها ماحست انها بتحبه لأن كل لما كانت تعطي له فرصة وتحاول تحبه تلاقى منه العذاب فتنفر منه ، مكنتش متخيلة ان الحزن هيكوي قلبها بالطريقة دي عليه وان قد ايه الدنيا ساهلة انها تسحب حد مننا في اى وقت ،وفي لحظتها قالت بوجع _يارب انا مسمحاه . البنت الصغيرة مبطلتش عياط وطول الطريق هم وغم شيلاه نجوي على رأسها يا ترى هتبقي حياتها عامله ازاى والبنت الصغيرة دي هتعوضها عن فراق ابوها ازاى ؟ هي اختارت الطلاق قبل كده بس لما شافت تصرف بنتها في تعب ابوها عرفت انها كانت مستحيل تبعد عنه عشانها برغم الخلفات وحقها المهدور . ولما رجعت البيت والدموع ساكنة عنيها ، اتصدمت لما لقت حماتها وبناتها وأحفادها شغالين زغاريد واغاني . دخلت عليهم بسرعة بكل قهر وهى بتقول بهجوم _ بتزغرطوا علي ايه ياظالمه يامفترين ..ابنك ماات اللى كنت وخداه مني ومن بنتي مات اللى مسالتيش فيه وزورتيه في المستشفى ..منكم لله ..حسبي الله ونعم ال... فجأة وهى قاعده بتصوت بحسرة لقت قدامها ياسر قاعد على كرسي متحرك ورقابته مايلة علي كتفه وبيبص ليها بصة صعبة جدا زي اللى عدوه واقف قدامه . ولسه جاية بتقول بس الله الرحمن الرحيم . لقت حماتها بتقول ليها بزعيق جامد _ مين اللى ماكنتش بزوره احنا كنا قاعدين معاه أربعة وعشرين ساعة الدور والباقى عليك ياللي بقيتي تسرحي كتير بعيد عن شقتك وبنتك اللى رمياها عندنا . اتفاجأت نجوي من كلام حماتها اللى كله افترى عليها ، بس صريخ بنتها بالفرحة وهى بتجرى على ابوها بالاحضان خلاها تسكت وتحس ان الدنيا بدات تحن على بنتها شوية . **** ياسر بقي قعيد وعاجز عن اى حركة وصعب جدا انه يتكلم . بنته حوليه مش بتسيبه دقيقة وهو ملامحه مكشرة مبتتفردش ابدا . نجوي بقت مسؤولة عن كل حاجة من احتياجات البيت للبنت لجوزها العاجز . اللى متكفلة بيه بكل حاجه أكل وشرب وحمام . وبرغم أنها عانت من الغضروف بسبب ولادتها كانت بتشيله وتحركه من مكان لمكان . واستمر الوضوع ده لمدة شهور . _ حرام عليك ..طب بص في وشها واضحك بس ..بلاش تكشر البنت بتقول انك مش بتحبها . بتقولها نجوي لياسر وهى بتغطيه على السرير وهو وشه على نفس الوتيرة . ومرت الأيام والاحوال اتغيرت أووى ، والدنيا ضاقت عليهم مفيش مصدر دخل ، دايما تنزل لحماتها تطلب منها فلوس عشان الكشف المستمر بتاع ياسر ، وكانت الفلوس بتجلها بالموت والزل ، ولوله ان فلوس شغلها متكفيش الدكاترة ولا مصريف البيت ولا درس بنتها مكنتش طلبت منهم مليم . كل ده ويما جيت على كرمتها جامد وكل ده وياسر لا بيتكلم ولا بيضحك برغم أن دكتور جلسات الطبيعي اللى بيجيله البيت بيقول ان في نتيجه واستجابة بس مكنتش بتشوف اى تاثير نهائي . وفى يوم كانت رايحة على السرير تنام جنبه وماسكه التلفون وبتكلم تسنيم صحبتها وبتقولها . _ انا بفكر اجيب حد يساعدني ، الدنيا بقت صعبه عليا أووى ظهرى باظ ..معتش بليح اشيله ولا انقله من مكان لمكان ولا عت بعرف اطبخ ومقصره اووى في حق بنتي . ردت تسنيم وقالت _ طب ماتجيبي حد يساعده ويشيله عنك شوية ..وامه اللى تدفع . _ ايوة انا هعمل كده فعلا ..لا يكلف الله نفسا الا وسعها ..وانا والله ياتسنيم مبعرفش انام من وجع ظهرى . وبعد ما نجوي خلصت المكالمة وريحت على السرير وصعبان عليها نفسها لحد ماسمعت .. _ انا مش موافق ..! .. يتبع | |||||||||
|
| |
|
04-09-21, 06:47 PM
| #6 | |||||||||
| الجزء الخامس اتصدمت نجوي من الصوت ده ، ولأنه مر وقت طويل على سمعه ، شكت انه مش صوته ، فلفت وشها له وهى بتبص له بصدمه وبتقول _ أنت بتتكلم ..؟ أنا متاكده أنى سمعتك بتقول .. رد بصوت مضايق _ ايوة انا مش موافق على الكلام ده ..واجب عليك تخدمي جوزك لحد اخر يوم في عمرك .. نجوي كانت بتسمع لصوته وهى فرحانه لفرح بنتها لما تعرف ان ابوها أتكلم ، بس مع أخر كلام له اضيقت جدا بس حاولت تغير الموضوع من فرحتها وراحت تنادي على بنتها وتصحيها من النوم . الاب فضل يتكلم مع بنته طول الليل ، نجوي شافت انه بدأ يحرك وشه شوية ويفرد ملامحه ويضحك وكان فرحه بنتها خلتها تحس بسعادة كبيرة . **** مرت الأيام والضغط شد عليها جامد وظهرها بقى يوجعها أكتر ، نجوي اعتقدت انه لما يتكلم الحياة هتبقي خفيفة عليها وانه هيعتني بالبنت شوية ، بس طلع العكس وبدأ يرجع لأسلوبه القديم السلبي ومش بيرحمها لا بالسب ولا بالنقد اللى مبيخلصش ولا في اى رحمة . لحد ما أخدت قرار انها تجيب حد يعد معاه وامه هتحاسب ليه لأنها معتش عندها القدرة تتحمل لسانه ولا خدمته . _ أنت أنانى ومش بتحس بحد وهجيب حد يخدمك أنا قرفت منك ..ومعتش قادرة استحملك في حياتي لا أمك بتيجي تسأل فيك ولا حد من أخواتك يجي حتى يساعدك ولو يوم فالاسبوع ..، مش هما دول برضه اللى كنت بتضربني وتشتمني عشانهم ...قولى هما فين دلوقتى ؟ بتقولها نجوي وهى حالتها صعبه ومتنرفزة على الاخر بسبب طريقة ياسر معاها الصعبة . رد عليها بهجومية _ مش هقبل ان حد غريب يدخل بيتي ..أنت فاهمة _ يبقي تطلقنى ..أنا أصلا مبشوفش منك أي تقدير ولا رحمة شغال شتيمة وتهزيق وقرف مشفتش منك يوم واحد حلو .. ياريت يا اخى كان ربنا أخدك وريحني منك . فضلت تنهج وتلقط نفسها بصعوبة بعد ماقالت الكلام ده بعصبية وصريخ وملامحها كلها قايدة نار من الظلم ، اتصدمت لما لقت جوزها مش عليه اى تعبير خالص غير البرود التام من كلامها ورده اللى صدمها _ مع السلامة .. نجوي اضيقت جدا واتنرفزت اكتر ولمت هدومها واخدت بنتها اللى مبطلتش عياط. وقبل ماتفتح بوابة البيت فاتت على حماتها وقالت ليها بضيق ـ انا سيبالك البيت وماشية وانا طالبة الطلاق مش هرجع هنا تاني ابدا.. ضحكت حماتها بصوت مستفز وعوجت بقها وهي بتقول _ ياختي فى داهية.. رجعت نجوي لبيت باباها وعنيها كلها دموع وحسرة على حياتها اللى اتعذبت فيها ، هى مهما قدمت ليه مش بتلاقى غير المعاملة الوحشة وعدم التقدير. باباها اول ماشافها وهى ماسكة الشنطه فى ايدها قدام الباب وبنتها بيعيط اتفاجئ بس فهم على طول _ ليه بس يابنتي...مكنش ينفع ترجعي فى الوقت ده وتسيبي جوزك _ ازاى هعيش مع واحد عاجز دمر حياتي وليه اخدمه يا بابا ارجوك أنا عاوز أطلق مش هقدر أعيش معاه _ صدق اللى قال الولد يفضل يرضع من أمه لحد ماتموت انت حرة.. اعملى اللى عوزاه. *** مر يومين بالتمام والكمال قضيته نجوي كله نوم فى السرير مش بتبطل تتقلب، ولا بتاكل ولا بتشرب، راحت لولدتها تاخد منها الفلوس اللى كانت بتوصل ليهم من شغلها ، اتصدمت بقهر لما عرفت انها اعطتهم لأخوها سلف عشان تساعدوا بيهم ، وكل ده وهى عارفه ان اخوها طول عمره طماع وعمره ماهيرجع الفلوس ابدا ودى اكتر حاجه وجعتها . اكتمل الهم لما لقت باباها بيطلب منها فلوس ..وأنها لو اطلقت تساعد أخوها من مؤخرها عشان الشغل بتاعه القديم وقع . الغم فضل طاير فوق راسها وحست أن أهلها بيستغلوها ، وان طول فترة جوازها كانوا يهدوها لما تتضرب من جوزها ويقولوا ليها انها لازم تستحمل ولا حد منهم فكر في يوم يروح يتكلم مع جوزها اكتشفت انها كانت مجرد شيء مركون عند الحاجة ليه .. وهى قاعدة في البلكونة مع نفسها وهى تايهة بحزن شديد جالها فجأة شعور ان ممكن تكون مامته واخواته مش بيساعدوه ولا بيسألوا فيه، وشوية تانيين تكدب شعورها بانها راحت وقالت لولدته انها ماشية وان مش معقول كده يسبوه ، فضل الشعور مستمر معاها لحد الليل مانزل.. الراحة رافضة انها تزور قلبها.. وسؤال بيلح عليها ياترى هو بيعمل ايه؟ مقدرتش تستحمل اكتر وقالت _ انا لازم اروح اشوف حصل ايه عشان ارتاح وبالمرة اقوله ان يرجعلى حقوقى كامله ويعوضني على كل اللى شوفته معاه. وبعد ساعه بالظبط كانت واقفة قدام باب البيت . البيت هادي خالص ملهوش حس، وخاصة الشقة بتاعت حماتها، فتأكدت بكده انهم قاعدين عنده فوق. طلعت على السلم ووقفت قدام بيت شقتها، السكون مالي المكان بطريقة غريبة، فتحت الشقة واتصدمت انها فاضية زي ماسبتها أخر مرة .. جاء فى بالها انهم اخدوه مثلا يخرجوه ،فرجعت برجليها خطوة وكانت هتقفل الباب خلاص بس سمعت فجأة صوت عياط بقهر، رجليها اتوقفت عن الحركة وعرفت ان الصوت جاي من اوضة النوم بتاعتها، راحت هناك وشافت منظر وجع قلبها بطريقة صعبة. ... يتبع | |||||||||
|
| |
|
04-09-21, 06:48 PM
| #7 | |||||||||
| الجزء السادس كرهت نفسها فى اللحظة اللى شافته قاعد لسه على الكرسي وراسه مايلة على صدره تحت بدون حيلة ومش عارف يرفعها بسبب الشلل اللى اتصاب بيه والدموع مغرقة جسمه.. واكتر حاجه وجعتها انها زي ماسبته بالظبط. حست ان الدنيا ضربتها بالقلم وقد ايه هى انسانة قلبها ميت انها تسيب جوزها العاجز بالمنظر ده. مقدرتش تتكلم بكلمه واحده تدافع بيها عن نفسها. وراحت شالته وحطيته على السرير لتتفاجي ان مقدرش يسيطر على نفسه ونزل منه بول كتير على الأرض طول اليومين ، بكدة اتاكدت ان محدش طلعله . دموعها هربت منها وهى حاسة بندم كبير وتخيلت انها لو كانت مكانه وربنا كتب عليها الابتلاء ده وهو سبها بنفس الموقف اكيد هيكون احساس مميت ملهوش وصف ، قالت فى نفسها _انا لو مكانه عمرى ماكنت هسامحه . فضلت الامور مستمرة لحد اسبوع كامل، عنيه من كتر الدموع خلت بياض عنيه دم، وهى حاسه انها هتقتل نفسها من كتر الذنب، مهما تكلمه،وتحاول توصل ليه مش بتلاقى منه غير الدموع. شخصية زي ياسر كانت جبروتها كبير، ورؤية انه يبكي قدامها بالشكل وضحتلها قد ايه هو انسان متحطم من اللى حصله ومن تصرف اهله معاه ، خاصة ٍ انها لما نزلت تعاتب امه كان ردها بارد وهى بتقولها .. _ كنت فكراكي بتهزرى ..وكان رد نجوي .. طب مطلعتيش تتأكدي ولا تشقرى عليه ولو مرة واحدة .. وفى الاخر طلعت نجوي الغلطانة بحجة انها ست كبيرة وانها مشغولة بوجود أحفادها جنبها . اتصدمت نجوي من كلام حماتها وقد ايه اشفقت على ياسر . *** كل حاجه فضلت زي ماهى، لحد لما فتح كلام _ انا اسف.يانجوي..!!! كانت ساعتها نجوي بتنضف الاوضة والهم راكب راسها وقافل شفايفها عن اي كلمه الحسرة بس فى عنيها والدموع محبوسة فيها. قد اية كتم الدموع صعب وبيوجع القلب. الكلمه وصلتلها خلتها فاقت ولفت ليه بعيون بهتانهة. حست ساعتها انها هى اللى عاوزة تعتذر.فقالت _انا اللى اسفه انى سبتك فى الوضع ده وقولت ليك كلام مينفعش ان يخرج مني. _ سامحيني.. يانجوي..انا اذيتك. فى اللحظة دي نجوي لما سمعت الكلمتين دول ، واللى كانت نفسها تسمعها من زمان مشاعرها اهتزت وملامحها انهارت وفضلت تهز راسها بمعني انه مش لازم يوضح موقفه وان كفايه اللى هو فيه. _ انا هكتبلك الشقة باسمك يمكن اعوضك شوية على اللى شوفتيه وتضمني حقك . انت طلعتي بنت اصول..انا لو مكانك عمرى ماكنت استحمل اعيش مع واحد عاجز مكنش بيني وبينه اي رحمة. انا استغليت ضعفك وسكوتك وقت ماظلمتك.. كان مفروض ساعتها تديني على دماخي..كان لازم تقفيلي عشان افوق . يمكن.مكنش كل ده حصل.. انا اتعاقبت عشان اذيتك..وحرمتك من حاجات كتير.. وانا راضي بقسمة ربنا ومش.طالب غير انك تسمحيني. نجوي كانت بتسمع كلامه وعنيها منهارة من الدموع،لان مكنتش حابة تسمع الكلام ده وهو ضعيف وباهت ولأنها حسيته في عياطه وحسرته على نفسه ،فقالت له وهى بتعيط _ انا عمرى ما اتمنيت ان يحصلك حاجة ابدا زي كده. _ صدقيني...انا ندمان على كل حاجه عملتها معاك.. وبتمني ان اموت عشان ترتاحي.. استحمليني لحد ما اموت يانجوي انا مقدرش اخل حد تاني يشوف ضعفى غيرك.. فجأة حاجة دقت قلبها بخوف عليه، هو كان وحش ومتقدرش تنكر وانه اذاها بس شعور الشفقة عليه انه شاب لسه صغير وشكله جميل يحصل له كل ده ويتحرم من ممارسة امور حياته ، كانه اتعاقب على ذنب اكبر من ذنبه بكتير . هي كده كده حقها هتاخده في اى وقت والعوض هيجي ليها ، انما هو خلاص يعتبر ميت بجسد بينبض بقلب مكسور ومتدمر . ياسر شاف في نظرتها له حزن وشفقة عليه فقال ليها _ أنا راضي باللى ربنا كتبه ليا . **** وتمضي الايام ياسر اتغير كتير جدا عن الاول بقي انسان تاني، انسان متقبل العجز اللى هو فيه راضي بقضاء الله وقدره، بقي يتعامل مع نجوي بامتنان ودايما الابتسامة مش بتفارقه، لدرجه ان نجوي بتسأل نفسها انه ازاى بقي قوي وبيضحك ويهزر بالشكل ده وهو مش بيقدر حتي يحرك ايده . اتفاجئت لما قالها انه عاوز يروح المصيف معاها ولو لمرة واحده فى حياته. افتكرت ساعتها لما كان هو بيطلع مع والدته واخته ويسبها لوحدها فى الشقة محبوسة مع بنتها فى بداية الجواز. حست بطلبه ده انه عاوز يعوضها عن كل حاجة، فقالت له _ انا مش عوزاك تحس بالذنب ابدا... صدقني انا سامحتك وبتمني ان ربنا يشفيك على خير. وان شاء الله هتقوم لينا وللبنتك بالسلامة وربنا يحفظك لينا ان شاء الله. صمم ياسر انه يروح المصيف ونجح فى الاخر، وراح معاهم كان يوم عائلي كله ضحك وهزار.. الحياة اتغيرت بنسبة ٨٠٪ سعادة وضحك في حياة نجوي والعشرين الباقين متوقفين على شفاء ياسر رغم تعبها الشديد معاه الا انها بدأت تحس انه خفيف على قلبها وانها حابة تساعده في كل حاجة . _ تعرفي انا اتجوزتك ليه... وكنت مصمم عليك؟ بيقولها ياسر وهو قاعد فى البلكونة بليل تحت ضوء القمر اللى مدفى قلوبهم بالفرحة. ... يتبع | |||||||||
|
| |
|
04-09-21, 06:49 PM
| #8 | |||||||||
| الجزء السابع نزلت نجوى عنيها من على القمر بعد ما اتفاجئت بكلامه، وطبعا كانت زمان هتموت وتعرف ايه اللى خلاه يتقدم ليها بالسهولة دي، فردت علية وقالت _ ليه؟ _نفسي تقوليلي... ليه ياحبيبي.. حست باحراج من طريقته فى الكلام ،هى نفسها تجبر بخاطره باي كلمه عشان تفرحه ،فقالت له وهى بتنغنها بحب _ليه ياحبيبي _من قلبك؟ بصت له باستغراب لانها اخر مرة قالتها كانت فى اول اسبوع فى جوازهم قبل مايتغير معاها وطول السنين دي مقلتهاش.. ومكنتش قادرة تقولها لانها عمرها ماحست انها بتحبه ،بس دلوقتي بتطلع من شفايفها زي النغمة اللى طالعة من القلب متلحنه مخصوص ليه هو وبس . عرفت فى اللحظة دي انها حبيته ،بس لسه متعرفش حب شفقة ولا حب من القلب اللى مليان مشاعر دافية . هزت راسها بموافقة انها من قلبها.. فرد وقال _ انا اول مرة شوفتك حبيت اسنانك البيضة وضحكتك .. حسيت انك نضيفة اووي تعرفي ان فى حياتي ممسكتش ايد حد غريب.. غير ايدك انت.. لما حسيت ان حابب اقرب منك.. اتقدمتلك على طول.. .... تعرفي عشان كده اهلي لما عرفوا انى طالب اتجوز بنت استغربوا..وقالوا اخيرا شفيت من وسواس النضافة اللى عندك.. ولما اكتشفوا انى لسه مريض بيه..عرفوا انى قد ايه حبيتك..فكانوا بيحاولوا يبعدوني عنك وامي كانت دايما تهاجمني وتقولى انى بحبك اكتر منها فكنت مش حابب انها تفكر كده واشوفها تبكي قدامي.. فكنت ببعدك عن اي مشوار بخرج فيه معها لحد ما عشت الدور ده ..قد ايه انا كنت ضعيف قدامهم انا محستش انى قوي غير لما بقيت عاجز.. وعرفت حقيقة اللى حوليا... انا متكسرتش باللى حصلي..انا اتكسرت بسبب بعد امى واخواتى البنات عني فى اكتر وقت كنت محتاج ليهم... وانها متمنتش ليا الخير مع مراتي زي ما اتمنيه لخواتى البنات مع ازواجهم . مكنتش اعرف ان الحياة بتتقسم كل ما الانسان بيكبر ويتجوز..بتبقي حياتها كلها عبارة عن زوجته واولاده..لان هما اللى هيعيشوا ليه فعلا .. الأم هي الحياة ..بس الزوجة هي الدنيا .. نجوي كانت بتسمع لكلامه وهى مش مصدقة، وحست ان كان ليها ايد فى الغلط ده لانها لما كانت بتشوفه يبعد مكنتش بتعاتب ولا حتي ترد وتدافع عن نفسها،كانت بتاخد الضربة وتسكت بحجة انها عاوزة تعيش عشان بنتها بعد ماتسمع كلام مامتها الغلط .وانها حتي محولتش تقرب منه لما.كان يحصل مشكله كانت تاخد جنب لفترة ومتعرفش انها بكده فتحت باب التوقيع وسمحت لاهله انهم يدخلوا فى كل شؤنهم. سألت نفسها هى ليه كانت متوقعه منه الغلط دايما ،وساعه لما يحصل تقول لنفسها (كان احساسي صح) ندمت انها مدتش فرصة لنفسها تقرب منه خطوة حتى لو الخطوة دي هتساهم بلو 5٪ . ماهو الحب ده باب عاوز مفتاح، اصله عمره ما هيتفتح ليها من نفسه بالعكس هيتقفل كل فترة والتانية ، القلب عاوز اللى يفتحه مرة واتنين وثلاثة. اكتشفت نجوي ساعتها ان الحياة متقلبة وخط السير متغير..والحب له اعداء مبينجحش فيه غير المحارب وانها كانت مجرد جبانة،وفعلا الانسان الجبان هو اللى بيخسر..مش بيمشي فى الدنيا دي غير اللى بيطلب حقه أول بأول ومن البداية ** نجوي بقي عندها ياسر ادمان مش قادرة تستغني عنه للحظة حست ان حبه ليها غنيها عن اي حاجه حتي لو محرومة من حقوقها الزوجيه بسبب عجزه الا انها كانت بتشوف فيه عاطفة بتغذي قلبها بكل كلمه حب . فعشان كده كانت كل لما تشوفه تحضنه وفى حضنه بتحس انها اخدت نصبها من السعادة فى الدنيا دي. ولأن الدنيا مسرها بينعطف لطرق مجهولة ، بدأت تحس نجوى ان ياسر بدأ يضعف ويخس على غير العادة. فراحوا لدكتور يطمنوا... الدكتور قالهم ان كل حاجة كويسة ومفيش اي قلق، بس الاحوال يوم عن يوم بتتغير، الهالات السودة بقت على جفن عنيه زي الكحل ومبقاش يعرف ينام.. ودايما يلقط نفسه بصعوبة ويقوم متشنج فى عز الليل.. راحوا لدكتور قلب ونجوي كانت اعصابها خلاص هتنهار وبقت تصرفاتها مش معقوله عصبية زايدة وارتعاش فى جسمها.. وكل همها انها خايفة تفقد ياسر. _ عضلة القلب ضعيفة جدا ومحتاج عملية ... يتبع | |||||||||
|
| |
|
04-09-21, 06:50 PM
| #9 | |||||||||
| الجزء الثامن والاخير اتفزعت نجوي وشفتها بترتعش بخوف من كلام الدكتور بعكس ياسر اللى وشه الابتسامة مش بتفارقه.. فردت عليه _ ماشي تتعمل العملية.. _ للاسف صعب جدا وهو بالحالة دي.. _ يعني ايه.. _ الامر متروك بيد الله **** نجوي جالها حالة صعبه جدا لا بتاكل ولا بتشرب لحد ماخست خالص والهالات بقت على عنيها زي الميتة، على طول بتراقب تنفس ياسر وهو نايم وماسكه ايده مش بتسيبه.. وبتدعي ربنا ليلي نهار انه ميبعدش عنها.. _ تعرفي انا فرحان جدا.. ان ربنا قبل دعوتي و ان وقتي خلاص هينتهي أنا عاوزك تعيشي حياتك من تاني.. وصيتي ليك انك.تتجوزي ..وتعيشي حياتك.. ربنا يعوضك يانجوي عن كل.دمعة نزلت من عنيكي ... ارتجفت شفتها بحزن وبدأت تبكى بقهر وهى حاسة بحزن السنين على قلبها وان الحاجه اللى بقيت مدمناها زي العلاج معرضة انها تروح منها فى اي وقت فقالت له وهى بتعيط _ متقولش كده... انا لو اقدر اعيش الف سنة لحبيبي مش هتأخر.. انا عوزاك تكون جنبي بس... متسبنيش يياسر.. حرام عليك.. انا ممكن اموت من غيرك... _ نفسي فى اللحظة دي اقدر اتحرك لمده دقيقتين احضنك بس فيهم... نجوي حست انه بيودعها بعد ماراحت له تحضنه بكل خوف كانها عاوزة تدخل جواه ،وحاسة انها مهما تقربت منه أن روحه بتبعد عنها فقالت له _ انا طول الفترة دي كنت بحس انك جنبي وبتحضني بنظرة عنيك بس... انا بحبك يياسر وهفضل طول عمرى احبك... _ سامحيني...يا حبيبتي . مسكت نجوي فيه جامد وهى بتحضنه والوجع بيقتل فيها وهى معتدش حاسة بنبض قلبه...وفضلت تعيط بقهر زي الطفلة الصغيرة . ومات ياسر وراحت معاه كل حاجة حلوة وكل.كلمة حلوة وكان كل يوم بيمر عليها فى بعده كان الف سنة. ساعات الحياة بتقرب مننا ناس بديتنا معاهم بتبقي غلط بسبب دخول أطراف تانية بس ساعات المسار بيتغير فى اى لحظة ووقت ماقلبنا يضعف ونحبهم يروحوا مننا بكل سهولة . اختارت نجوي انها متتجوزش ، عشان تبقي زوجته في الجنة ،وانها تعيش عشان بنتها ،وكانت بتستني يخلص وقت شغلها كل يوم عشان تروح تعد فى اوضتها وتقفل عليها الباب وتعد بالساعات الطويلة لوحدها. وتمر السنين بطولها وعرضها وبنتها مرعوبة عليها وحاسة انها اتجننت بسبب كلامها طول الليل مع نفسها في اوضتها ولحد دلوقتى خايفة تواجها ، ولو بنتها تعرف انها قاعدة تلبس فى هدوم ياسر وتشم فى ريحته وتتخيل طيفه ماشي قدامها بضحكته الراضية اللى كانت سبب انها تعيش لحد دلوقتي مكنتش هتقول عليها مجنونة بس ده هتقول عدت مرحلة الجنون بكتير اللى بيطلق عليه لفظ العشق . رفضت نجوي فكرة ان ياسر ذكرى حلوة وكانت دايما تقول لبنتها انه عايش جوه عنيها وفى قلبها... ꧁꧂ تمت بحمد الله ꧁꧂ | |||||||||
|
| |
|
04-09-21, 07:00 PM
| #10 | |||||||||
| الخاتمة من بعد ما أبحرنا مع نجوي وياسر اكيد اتعلمتوا ان من حق شريك حياتك انك تعطي له فرصة انك تحبه يمكن هو ده اللى قلبك بيستناه من زمان، وانك متستناش انه يفتحلك الباب الاول افتح باب قلبك انت فى البداية وحبه يمكن تخرج منه أسمي معاني الحب اللى تغذي قلبك طول الحياة، وزي ما احنا عارفين ان الدنيا شُربتها ساعات مرة وساعات مسكرة ومش دايما الحال ها يثبت على طريق واحد اكيد فى منعطفات.. اتمني تكون الرواية عجبتكم.. وشكرا على متابعة القراءة لنهاية، نلقاكم على خير ان شاء الله فى رواية جديدة. كتبت بواسطة سارة منصور دوار الشمس ♡ | |||||||||
|
| |
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
العرض العادي
