الشاهد الأخير / للكاتبة ساندرا، رواية جديدة مكتملة

[لامارا]

بسم الله الرحمن الرحيم
اللهم صل على محمد وعلى آله وصحبه أجمعين
السلام عليكم ورحمة الله وبركاته

نقدم لكم رواية
الشاهد الأخير
الكاتبة ساندرا



قراءة ممتعة للجميع....

[لامارا]

السلام عليكم ورحمة الله وبركاته

المقدمة


أسوأ ما في الخيانة أنها لا تأتي من عدو ، تأتي من استأمنت ووثقت به . .
أنها الحقيقة التي يجب أن استفيق و أعي ممن حولي . .
ليس كل من تحادثه ينوي الخير لك ، قد قرأتها في إحدى المقالات ولكنني لم افهم معناها الحرفي إلا حينما تجرعت مرارة الكأس .

فليتني لم أخبر أحدا عنك لكي تبقى الخيبة بيني وبينك فقط !

روايتي ( الشاهد الأخير ) بقلم ساندرا

[لامارا]

رابط لتحميل الرواية

هنـــــــــــــــــــــــ ــــــــــــــا




البــــارت الأول

كانت بمكتبها وهـي تتصفح الموقع من لا بتوبها وتتم شراء لأدواتها الجديدة لصالونها نقرت الزر بالتلفون: كوب نسكافية بدون سكر نهله ..

نهله: أبشري طال عمرك

رفعت شعرها الداكن بطريقة مبعثرة وبهمس: الكراسي حلوة آخ بس لو بها لون أسود , كل شيء طار برسل رسالة للموقع نفسه وأحجز من قبل أفضل ..

إلا بدقة الباب وبصوت مسموع: تفـضل

أم حسن: السلام عليكم

ردت بابتسامة على وجهها: وعليكم السلام والرحمة

أم حسن: يا صباح الورد للورد

بنفس ابتسامتها: صباح الخير

أم حسن وهي تشيل النسكافية من الصحن وتحطه بطاولة المكتب: أطيب نسكافية لأطيب مديرة بالعالم
مسكت الكوب: جاء بوقته , أحتاج تركيز عشان أطلب الطلبية من الموقع ونسيت موضوع الحجز , شعرت بالخيبة ..

أم حسن: تتيسر إن شاء الله , تأمرين بشيء؟
: سلامتك ..

.
.
.
وهـي تتصفح الأنستغرام مع أمها : يمه شوفي المصممة إيمان نزلت تصاميم جديدة , أنا عجبني الأسود " وتمد لها ألايباد " شوفي ..

أنتبهت أن أمها مو معها : علامك قلقانة يمه ؟

أم عبدالعزيز: أختك راح تجلطنـي , اتصل بها ولا ترد , أتصلي بها يا مها ممكن ترد عليك ..

مها: ما تعرفين راغده يعني ؟ بس تكون بدوامها ما تنتبه لجوالها

أم عبدالعزيز: محدن يعرفها كثري هي تتجاهل أتصالاتي ..

مها: أحسنـي الظن يمه ممكن مشغولة مع الزباين !

أم عبدالعزيز أقفلت الخط: أنا بتصرف " وقامت "

مها: لوين ؟

أم عبدالعزيز: لمقرها ..

مها: أروح معك ؟

أم عبدالعزيز: لا منيب مطولة , أجلسي مع بنتك جوان أحسن , لو تريدين شيء من برا راسليني واتس ..

مها: الله يحفظك ..
.
.
.
بخارج السعودية , بمستشفى الخليج..
بالمستشفى , مسك يدها وبحنان: قوي نفسك ..

ناظرت به بعيون أتعبها المرض: تتوقع أني بقوم من الكيماوي يا طلال ؟

طلال: أكيــد بإذن الله بتقومين مثل كل جلسة , وبعدين يا نوال كل جلسة تقولين هالكلام ..

نوال ناظرته بحزن: أحساس يقول لي أني بموت قريب ..

طلال أخفـى حزنه: خلي أملك بالله كبير ..

دخلت الممرضة: ممكن برا شوي سير ..

طلال بابتسامة طافية لأخته: منيب مطول شوي وارجع لك ..

طلع من الغرفة إلا يشوف الدكتور قباله

طلال باندفاع: طمنـي يا دكتور ..

الدكتور: سرعة أنتشار الكانسر بجسمها سريع , أنتشر بكامل جسمها ..

طلال بعدم تصديق: يا دكتور أنت قلت لأخوي أن حالتها مستقرة .. وجسمها بدأ يستجيب للكيماوي

الدكتور: أنا ما أذكر أني قلت لأخوك هالكلام وأنا مش ناسي أسمه وأعرف وش قلت له ..

طلال بقهر: كان يكذب علي !

الدكتور تنهد .. طلال الحزن خطف لونه: لا إله إلا الله , يعنـي ما بيدك تسوي شيء؟ ما ممكن أختي تتشافى ؟

الدكتور بأساء على حالة: هو كل شيء على الله , لكن طبيا ما معها علاج.. كل يوم حالتها تسوء وأنا أشوف أن ماله داعـي جلستها هنا يا طلال أنا أشوف أنكم تضيعون وقتكم .. "حط يده بكتف طلال" أقدر شعورك يا طلال لكن ما بيدي شيء , تأكد أن كل يوم يمر عليها هو وجع وأذى لها , لا تزعل من كلامي ..

وراح لغرفة المريضة نوال

طلال غطـى وجهه بيده وصار يبكـي على حال أخته
.
.
.
ركبت سيارتها و أتصلت فيها من جديد ولا ترد وبغيض: طيب يا راغده أنا أعرف كيف أتصرف معك

وسرعان ما وصلت لصالون , لبقت سيارتها ونزلت وفتحت الباب ودخلت بشموخها الكل ألتفت لها , و أقترب منها
أم عبد العزيز : وينها ؟

أم حسن بتردد : بـ ..بمكتبها ..

توجهت لدور الثاني حيث يقع مكتب راغده إلا بنهله تمنعها: بعطـي المديرة خبر بـ ..
أم عبدالعزيز أبعدت يد نهلة و دفعت الباب .. وشافت راغده مع الفلبينية وهم يتصفحون الكاتلوج ..

راغده: خلاص روحي الآن بعدين نكمل حديثنا ..
الفلبينية: أوك ..
وسكرت الباب أم عبدالعزيز تناظر الفلبينية بطرف العين لما سكرت الباب أقتربت من بنتها: ليه تتجاهلين اتصالاتي ؟

راغده: يمه قصري صوتك لا يسمعونك الموظفات عندي ..

أم عبدالعزيز بنفاذ صبر: أنتي لو يهمك مكانك بينهم كان رديتي علي , وش هالشغل ألي مقطعك

راغده جلست بكرسي مكتبها وأنقرت زر التلفون: هاتي كوب نعناع بسكر دايت ..

نهله: أبشري طال عمرك ..

راغده: وسـريع الله يبارك بيك " أغلقت الخط "

أم عبدالعزيز فتحت عينها: تستخفين بي ؟ أحر ما عندي أبرد ما عندك ..!

راغده ببرود: واضح أن نفسيتك تعبانه كوب نعناع بيريح أعصابك إن شاء الله , وبعدين ليه أنتي واقفة حياك أرتاحي ..

أم عبدالعزيز: راغـــــده !! تعدلي أحسن لك ..

راغده بنبرة هادية: طالمة أنك تعنيتي لهنا أكيد به شيء مهم , كلي أذان صاغية ..

أم عبدالعزيز خذت نفس عميق وجلست: راغـده أسمعيني زين , أنا مو كل مرة بجي أنصحك
وأعيد لك نفس الكلام كل ما شفتك , أنتي عمرك 33 سنة مو صغيرة شوفي أختك مها عمرها 25 سنة متزوجة ومعها بنت ..

راغده: ..........

أم عبدالعزيز : أنا باخذك معي للجمعية ألي منظمتها أم شاكر وجايبه معها ألي لهم كلمتهم ووزنهم بمنطقتنا " و بابتسامه" أم شاكر تقول لي أن
أم صهيب ولدها جاي من بعثته و بيتوظف وظيفة كفـو ..

أندق الباب .. راغده: تفضـل ..
أم حسن: السلام عليكم " حطت الكوب قبال أم عبدالعزيز" تفضلي ..
أم عبدالعزيز: تسلمين ..
أم حسن عند الباب: تأمرين بشيء طال عمرك ؟

راغده: سلامتك " لما شافت أنها طلعت فتحت خط التلفون" نهله أي أحد يتصل بي أو يريدني أجليها لما أخلص اجتماعي مع الوالدة ..
نهله: أبشري

أم عبدالعزيز شربت كوبها وناظرتها: وأنا ما أبغـى تكوني أقل من أختك لزوم تتزوجين واحد صاحب نفوذ ومنصب
وألي بعمرك خلاص طافهم القطار , وصيت أم شاكر تمدحك وتثني بزيادة مع أصحاب الجمعية عشان تأخذك أم صهيب لولدها ..

راغده رجعت ظهرها لورى: يمه أنتي عارفه رأيي بالزواج ..

أم عبدالعزيز: لمتـــى ؟ لما يوصل عمرك 40 سنة ؟
راغده: مو شرط يكون نهاية كل بنت زواج وعيال ! ليه حاطين ببالكم أن الزواج هو كل شيء ..

أم عبدالعزيز: أنا تعبت لما وصلت لهنا يا راغده
راغده: يمه أنا كونت نفسي وصرت مستقلة ماديا مو لزوم زوجك يصرف علي ما قصر ..

أم عبدالعزيز بكذبة: هو شايفك مثل بنته مها وما عمره حسسني أنك ثقيلة بالعكس هو ألي خلاك تكملين تعليمك وصرف عليك ولا طالبك بريال ..
راغده: وأنا ما جحدته يا يمه , بس خلاص أنا كبرت ولي مالي الخاص ..
أم عبدالعزيز: ما يخالف زيدي مالك بعد وتزوجي واحد يـ.....

راغده قاطعتها: يمه ما تعبتي من نفس السيرة ألي كل ما شفتيني جبتي لي عريس غير شكل ..

أم عبدالعزيز: إذا مو عشان المادة تزوجي عشان تجيبين عيال ولا تريدين لكبرتي تجلسي لحالك ؟
راغده: الله يسخر لي عباده الصالحين ..
أم عبدالعزيز مسكت شنطتها: واضح أن الكلام معك ضايع أنا بخلي خالك بدر يقنعك
راغده باندفاع: لا يمه أنا بجي خلاص ..
أم عبدالعزيز: يوم الخميس الساعة 9 بالليل ..
راغده:طيب طيب ..
أم عبدالعزيز: بتجين اليوم البيت ؟
راغده: خليها بكره أحسن ..

أم عبدالعزيز: وش عندك ؟

راغده: عزمت حالها نرجس عندي ..

أم عبدالعزيز: طيب باي باي ..

.
.
.

أجرى بيانات خروجها , وغادرو المستشفـى
وبالطيارة: سامحني طلال أتعبتك وياي 8 شهور وياي وتارك العسكرية ..

طلال: أعوذ بالله وش هالكلام يا نوال , تزين إن شاء الله ..

نوال: أعيش معكم كم يوم ولا أموت دايركت صح ؟

طلال بملامح حزينة: لا تقولين هالكلام ما تدرين أيش ممكن يصير ؟

نوال بابتسامة طافية: أنا عموما مو متمسكة بالدنيا أريد بس أرتاح من الألم ..

طلال صار يناظر بعينها وهو يفتكر كلام الدكتور: نوال أيش خاطرك به ؟ أول ما نوصل السعودية وش ودك أول حاجة تسوينها ؟

نوال: أريد أذوق طبخك مثل أيام زمان ..

طلال يدعي الضحكة: ههههه بس ؟

نوال: خاطري البرياني حقك ..

طلال أشر على خشمه: أبشري , على هالخشم ..

نوال: لا تصحيني بنوم الآن ..

طلال راح يضبط لها اللحاف ويغطي جسمها كامل به , بسبب فقر الدم أخته تعاني من بروده دايم ..
صار يناظر بعينها ألي دايم تكون دامعه ووجها أصفر شاحب , غمض عينه بهدوء

.
.
.

وهي تطلع ملابس من دولابها وتجربها على نفسها وترميها وبيأس: يمه ما معي ملابس , تعبــت ..

ام نرجس: ليه كل ذه ؟ ترى هي مو سهرة مجرد حفلة شاي ..

نرجس بنفس يأسها: ولو يا يمه ما أريدها تتفوق علي ..

أم نرجس: يا بنتي مستحيل تتفوق عليك أنتي صغيرة وهي الكبيرة فرق بينكم 6 سنوات ..

نرجس بقهر: ومع ذلك هي الي معها مدخولها الخاص وأشترت أرض وبنتها وهي الآن جارتنا !
ألي سوته هي ما أقدر أنا أسويه ..

أم نرجس: وليه تسوينه ؟ طالمة أبوك مو مخلـي عليك قصيرة أنتي بنتنا الوحيدة ..

نرجس: أبوي حي الله وظيفة حكومية ماله مثل أهل راغده ..
راغده أختها متزوجة دكتور ..
عبدالعزيز مدير مستشفى وزوجته مدرسة ..
يوسف يدرس بالكويت
ولا أم عبدالعزيز مديرة مدرسة , وأخوها بدر يكمل تعليمه بالكويت ومايندرا وش بيصير ذه بعد "وهي تشد على الملابس ألي بيدها ألي شوي ويشق"
كل ذه يا يمه , هم يلعبون بالفلوس لعب ..

أم نرجس: وش دعوة هم من الوزراء أو الملوك ترى هم من العامة ليه حاطتها برأسك أنتي ؟

نرجس: ليه أحنا مو مثلهم , مثلا أنا أكون بمكان راغده وأنتي مديرة مدرسة ..

أم نرجس: صدق لقالوا أن البيوت أسرار , بلاك ما تدرين إيش بلاوي هـالعايلة , عبير ودها تزوج بنتها لأن عمر بنتها مو صغير
وما عاد به عرسان ما غير تجيبهم من الخطابات ههههه وليتهم كفو بعد أغلبهم معددين أو مطلقين , ما لقت ولا عازب ..

نرجس: بس ممكن تحصل بعدين ..

أم نرجس بضحكه: ما هقيـت , تسولف لي أم شاكر أن عبير مخططة على ولد أم صهيب , بس هل بتوافق عليها ما ندري , النتايج بتبان يوم الخميس ..

نرجس بتفكير: وهل هو مركزة كبير ؟

أم نرجس: أي أبو صهيب ما مخلي على ولده قصيرة درسة بالخارج وخلاص بيرجع السعودية ويستلم الوظيفة ..

نرجس: وهو يريد راغده ؟ ولا هم غاصبينه ؟

أم نرجس: عاد هذا العلم ما أدري عنه ..

نرجس بحماس: بروح معك يوم الخميس ..

أم نرجس: أبركها من ساعة ..

نرجس: لازم لي فستان أنيق ألبسه وما يندرا ممكن أم صهيب تعجب بي ..

أم نرجس بعد فهم: وش قصدك ؟

نرجس ببتسامة خبيثة: القصــد واضح ..

# # # #
على الساعة 7 المغرب رجعت بيتها
دخلت غرفتها شلحت عبايتها وبصوت مسموع: ماريان.. ماريان ..
شلحت كعبها وبدخلة الخدامة أخذت عبايتها كالعادة وعلقتها: متى يبي العشاء ..؟
راغده: الكمية لشخصين تمام ؟
ماريان: أوك سنيورة ..

راغده: بأخذ دوش , خذي هالملابس وعلى السلة للغسيل " وفتح غرفة الملابس " خذي هذا كويه
ماريان: أوك سنيورة ..
دخلت الحمام " أعزكم الله " وأخذت حمام مليان بالفقاقيع وهي تفكر وتسرح بخيالها " أندق باب الحمام "
بصوت واطي: أيوه !
دخلت مريان ومدت لها جوالها: سنيورة يور فون ..
راغده طلعت يدها من البانيو وشافت المتصل نرجس ردت عليها: هلـوو ..
نرجس: هلا حبيت أتأكد من الموعد ..
أتصلت عليك من قبل ما تردين قلت ممكن صار معك شيء وجايز الموعد أتلغى

راغده بصوت رايق: لو أتلغى بكتفـي برسالة أبلغك بها , أنا مو من النوع المستهتر وألي يحب غيره ينتظر ..

نرجس بلبكه: طبعا ..

راغده: حياك الساعة 9 ..

نرجس: طيب ..

راغده أقفلت الخط ونزلت راسها بالبانيو وهي مستمتعة برائحة اللافندر وخلاها رايقة مرة


قدوم الســاعة 9 , أندق الجرس وفتحت الباب الخدامة: تفضلي سنيورة ..
نرجس تتحلط: عشتوا ملزمة عليها تناديها سنيورة , تظن نفسها إسبانية الأخت " ناظرت الخدامة وبتريقة " أجل وين السنيورة ؟
ماريان: رومـ ..
نرجس: قولي لها سنيورة نرجس تحت تنتظرك ..
ماريان: أوك
ودخلت وهي تشوف الحديقة كيف سوتها بأبداع والعشب الأخضر وأحواض الزرع وتماثيل الفلامينغو ..
دخلت البيت وظلت تناظر بالخدامة لما راحت من عينها وهي تشوف البيت الي كأنه البيت الأبيض
وهي تشوف النوافذ الطويلة بستاير الدانتيل , أول ما تدخل تشوف الصالة مطلة على المطبخ , كان التصميم غربي , والدرج بزيج ذهبـي ..
كان لون المكان موحد بس لون الأثاث هو ألي يميز المكان , ألتفتت لصوت الشبشب ألي بالدرج تغيرت ملامح وجها لما
شافتها كانت لابسة فستان خفيف بأكمام حاير لونه أسود لنصف الساق وحركة الصدر نصف قمر و شوكر أسود وحلق أسود وشبشبها أسود
شعرها مسيحته على كتفها وينزل لمنتصف ظهرها ووجها ولا نقطة مكياج بس حددت حواجبها
راغد أستغربت نظرات نرجس لها: مضيعة شيء بوجهي ؟

نرجس أنتبهت لنفسها: آسفة سرحت شوي

راغده: تحبي تشلحين عبايتك ؟

نرجس " أجل ليه تزينت حضرتك " باندفاع: طبعا ..

راغده: ماريان لو سمحتي ..
نرجس شلحت عبايتها واعطتها ماريان " مدري ليه حطيت ببالي أنها بتكشخه كشخة كبيرة , بس مو مهم الأهم أنا أزين منها , شوفي زيني وأنقهري " ..
راغده أستغربت لبس نرجس: كنتي بزواج ؟
نرجس بتناحه: هه ..
راغده: أنسـي الموضوع , طمنيني عنك ؟

نرجس صارت تتفحص نفسها , شكت بحالها" كل ذه قهر ؟
أي ما ألومك عجوز ما يصلح عليك لبسي ": الحمدلله زين وقدرت أخذ منك موعد " قالتها بسخرية "

راغده: معليش نرجس أعذريني أنا مرة مشغولة بالآوان الاخيرة بغير موديل المشغل وأخذ مني وقت طويل بالتحضيرات ..
نرجس" عشتوا": أي ولا يهمك الأهم شفناك أخيرا ببيتك ..

ماريان بدخولها: سنيورة العشاء جاهز ..
راغده: حياك على العشاء ..
توجهت معها لغرفة الطعام نرجس بلمت على التصميم والأثاث ..
راغده جلست: حياك نرجس ..
نرجس وهي تشوف المائدة والعشاء عبارة عن سلطة شمندر وستيك لحم وعصير : !!!!
راغده فهمت نظراتها: أحب اتصرف على سجيتي , العشاء يكون بروتيني وعلى قد ما أقدر أبتعد عن النشويات بمثل هالوقت لا سيما أن تعدى عن الساعة 7 ..
نرجس بفضول: لاحظت أن طاولة طعامك مو كبيرة مرة بس لـ 8 أشخاص ..
راغده وهي تفرد المنديل على فخذها: مو من كثر العزايم ..وأنا لحالي بالبيت ليه أحتاج لطاولة أكبر ؟
نرجس: أي على رايك ..
ألي كانت تشوف راغده وتراقبها حتى بأكلها: كذا دايم نظامك ولا مسوية دايت ؟ تروحين النادي ؟
راغده: كنت أروح بس لضيق وقتي ما عدت أشتركت , أسويها ببيتي ..
نرجس: أي بسم الله عليك امرأة عاملة ! كلها صالون ..!
راغده ناظرتها بنظرة أربكتها: وش دراك أن به صالون بس ! ممكن أكثر
نرجس انقهرت " أعرف تريدين ترفعين ضغطي بسم الله عليك وعلى إنجازاتك" : الله يسهل عليك ..

وبعد صمت دام دقيقتين : بتروحين للجمعية ؟

راغده: أمي ودها أني أروح ما بكسر بنفسها ..

نرجس " حلو الآن ضمنت روحتك " : حلو تغيري جو عن العمـل شوي ..

راغده: أتمنى عجبك العشاء ؟

نرجس: أي مرة حتى الأستيك عجبني حيل ..

راغده بابتسامة: بالعافية ..
نرجس " بالموت تبتسم من جيتها تو تبتسم , ثقيلة طينة" ردت لها الابتسامة ..


وبعد الأكل الطيب , جلسوا بالصالة
نرجس: متـى نفرح فيك يا راغده ؟

راغده ببرود: لما نفرح فيك بالأول ..

نرجس بإحراج: أنا لي مواصفات مميزة لذلك تأخرت , الموضوع محتاج لدراسة ..

راغده بعدم أقتناع: أي , الله يوفقك ..

نرجس: لا تزعلين مني راغده بس أنا شايلة همك بجد , عضوات الجمعية يسولفون عنك ..

راغده بستغراب: عني ؟

نرجس: أي حبيبتي وهذا سبب جيتي لك اليوم ما رضيت عليك والله ..

" طيرت عينها لفوق " يقولون أن أم عبدالعزيز موصية أم شاكر عليك ..

راغده: ما فهمت كيف يعني ؟

نرجس: يعني من الآخر تبرزك عند عضوات الجمعية ولما تبرزك توصي عليك ..

راغده بعدم استيعاب: يعني وين المشكلة ؟ وليه أمي توصي علي وأنا روحاتي للجمعية مو دايمه ..

نرجس بنفاذ صبر: يعني عشان يمدحونك وتتزوجين من أحدى اعضائها أو معارف العضوات ..

راغده بقهر شدت على قبضة يدها: .....

نرجس كملت وهي تناظرها بخبث: وأمك يا حياتي من العام وهي تبحثث
وتحاول توصـي أم شاكر عليك عشان تكلم العضوات وهكذا و الآن برأسها أم صهيب ألي ولدها بيرجع من بعثته وبيستلم وظيفته ..

راغده " أجل كذا يا يمه ؟؟ طيب طيب أنا بعرف كيف أتصرف بيوم الخميس "

نرجس: لذلك سألتك متى نفرح فيك لأن حسيت أن زواجك قريب , بولد أم صهيب ..

راغده وهي تدعي الابتسامة: ما بيحصل إلا المكتوب ..

# # # #
دخلت البيت وهي تدور أمها بعينها : يمــــه , يمـــه ..
أم نرجس: أنا هنا بالمطبـخ

نرجس رفعت عبايتها وراحت لأمها ركض: يمـه , يمــه

أم نرجس ناظرت ببنتها: بسم الله علامك تصارخين ؟

نرجس بفرحة: ليتك شايفة وجها هههههه من جواتها نار واضح أنها بتصير هوشه بكره هذا إذا ما كان اليـوم ..
أم نرجس: أيش تقولين أنتي ؟

نرجس بحماس: خلصي ألي بيدك وأنا بمسح مكياجي ..

أم نرجس: طيب طيب بسوي لأبوك شاي وأكون جاهزة

نرجس وهي بالدرج وبصوت عالي : وأحسبيني معه ..

أول ما دخل السعودية
نوال بابتسامة: رجـع لي الأمان الآن ..
طلال: الحمدلله على سلامتنا , يلا نروح البيت ؟
نوال: أشتقت لأبوي ولأمي ولفهد وميس وعبدالرحمن ..

دخلوا الخبر وتوجهوا لبيتهم ..
أبو فهد بفرحة وصول بنتها: هلا هلا بنوال , نورتـي ..
أم فهد والدموع بعينها: الحمدالله على سلامتك , عساك ما تعبتي من الطيارة ؟
نوال: وش دعوة يمه يبه .. كأنكم مو متوقعين شوفتي ..
أم فهد وأبو فهد:.........
فهد: ليه سادين علي الطريق خلوني اسلم على أختي " اقترب منها وباس راسها " الحمدالله على سلامتك نورتي السعودية والخبر , أتعبتك الغربة ؟
نوال: الله يسلمك " ومسكت يد طلال " الفضل لله ثم لطلال ما خلاني أحس أني برا السعودية ..
لما أخذني فهد العام كان مستعجل يا دوب أ....

أم فهد قاطعتها: يا حبيبتي لا تنسين أن فهد متزوج ومعه عيال وأشغال وطلال ما وراه شيء ..

نوال: بس يا يمه طلال أخذ اجازة طويلة عشاني ..

أم فهد : عشتــوا حسستيني أنه ضابط توه عسكرية ماخذ سنتين من دخلها أبو شريط واحد بس
شوفـي فهد بسم الله عليه توظف من هنا وتزوج من هناك وطــلال " شدت على أسمه " لا ألتزامات ولا شغل ولا مشغلة ..

طلال: أستاذن ..

نوال ناظرت بأمها: ليه يمه كذا ؟
أم فهد كشرت بوجها: وأيش سويت أنا ؟ فهد كان عندك الأسبوع ألي راح وتفاهم مع دكتورك وماقصر, مو معـي الحق يا أبو فهد ؟
أبو فهد: صحيح , وبعدين يا بنتي لا تشغلين نفسك بهالكلام أرتاحـي ..
فهد مسك يدها: يلا أخذك لغرفتك ..
نوال قامت معه وأخذها لغرفتها ..
.
.
.
كان بغرفته وأتصل بخالته وبفرحة: هلا طلال هلا بأبوي ..
طلال بابتسامة طافية: هلا خالتي شريفة كيف حالك ؟
شريفة: مشتاقة لك يا عين أبوي , علامك ما جيت عندي؟ أنا لحالي ما معي أحد ما غير بوجهي خالك وزوجته وبزورتهم ..
تحملت غيبتك عشان أختك ..
طلال بحزن: والله يا خاله أني غبت عشان نوال مو بالقصد أتركك ..
شريفة: معذور يا طلال ..
طلال بنفس حزنه: الله يعوضنـي ..
شريفة ما فهمته: وش بك طلال ؟
طلال: وش رأيك نطلع ؟
شريفة: ما ودك ترتاح ؟
طلال: راحتي بشوفتك , مسافة الطريق بس ..
شريفة: أوك شويات وأجهز ..

# # # #
وبالمقهـى ..
شريفة: يلا هذا وصلنا قول ألي عندك , طول الطريق ساكت ..
طلال وهو يشوف القائمة: أيش خاطرك به ؟
شريفة: علـى ذوقـك ..
طلال نقر على الزر ألي جنب كل طاولة لطلب , جاء القارسون
طلال: كيكة العسل 2 , شاي بالنعناع 1 , شاي بدون نعناع 1 , ماي قارورة 1 ..
القارسون سجل الطلبات وراح
شريفة بتفكير: ليكون تريدني أخطب لك ..

طلال: وألي مثلي يتزوجون يا خالة ؟
شريفة: ليه وش ألي يعيبك ؟ جمال وطول وتعليم ووظيفة صح مو راتب مكبير بس توك بالعسكرية والزوجة بتقدر ..
طلال:......
شريفة ويدها على نحرها: وأنا بزوجك بالشيخة ألي قلبها عليك وتقدر أوضاعك ,
ولأني عارفه أبوك الرخمـة ما بيخليك تسكن عنده فوق مثل فهد بس لا تشيل هم بيتي مفتوح لكم وأنا بكلم خالك ولا تشيل هم ..

طلال تنهد: يا خالة سامحيني أني ما قلت لك ..

شريفة: على وش ؟

طلال: العسكرية فصلتني ..

شريفة بصدمة: وكيـف وليش ؟

طلال: ما عدت أداوم بسبب سفرتي مع نوال قالـو أني لا أستحق , حاول أراجعهم منا ومناك رفضوا .. بالأخير قلت أجلس مع أختي بسفرها ..
شريفة: كيف ؟

طلال : أخذت الإجازة السنوية ورحت مع نوال وطولت هناك أكثر من الشهر , ظنو أني فصلت , كلمتهم منا ومناك ولا فاد ..

شريفة: طب وأبوك يدري ؟

طلال: لا أنتي أول وحدة تدري ..

شريفة: كلم أبوك ممكن معه معارف بواسطة يرجعونك ..

طلال ناظرها بغرابة : تظنين مرت أبوي بتسمح له ؟

شريفة بقهر: الله يتولاها , ممكن ألي جاء نوال بسبب ظلمها لك ..

جاء القارسون وحط طلبهم بالطاولة وراح

طلال : ادري تحبي الشاي بدون نعناع سمـي ..

شريفة بحزن :طلال ..

طلال وهي يدعي البسمة: لا تشيلي همي يا خالتي باقي شهرين بس وينظف ملفي من العسكرية وأشتغل بالقطاع الخاص ..

شريفة: ألي أعرفه أن أبوك ما بيقبل أنك تجلس عنده بيظن أنك بتطلب منه فلوس عشان يصرف عليك وهو لو وافق مرت أبوك النسرة بتعارض
طلال: ما أحتجت له وأنا أدرس بحتاج له الآن ؟

شريفة: ما تدري وش بباله الله ييسر لك بس ..

طلال: بالكلية وأنا أعين نفسي أشتغلت كداد وأبو حسن مو مقصر ..

شريفة: بس يا طلال ..

طلال قاطعها :انسي السالفة ..

شريفة: وايش صار على نوال ؟

طلال: ما عاد جلسات الكيماوي تفيد ..
شريفة: وراه ؟ مو على أساس استجاب جسمها للكيماوي ؟

طلال: ذاك العام أما بروحتي معها قالو بعد ما شالو السرطان رجع لها واحد ثاني وانتشر بجسمها ..
" وبقهر " أنا هناك كأني اطرش بالزفة فهد موصي الدكتور ما يقول لي الجديد بحال نوال ,
راح أسبوع هناك وجاء ولا قال لي أن ما عاد يفيد معها الكيماوي ..

شريفة بخوف: أعوذ بالله , الله يحمينا من الشين , ربي يجيرها ويرحمها ..
طلال: دعواتك لها يا خالة ..

وبعد صمت دام دقيقة: ومتى بترجع لبيتي تسكن هناك ؟
طلال: ناسية خالي أيش سوا بي ؟

شريفة: هو إذا عصب يقط كلام ماله سنـع بسبب السكر والضغط بس والله يحبك وينشد عنك..

طلال: لا أنتي عارفه ليه متضايق من وجودي , زوجته ما تأخذ راحتها وصعبة يا خالة أتركيني ببيت أبوي لين ما ربك يفرجها ..
شريفة: عاد هذا بيت أبوي الله يرحمه وهو سكن به مع مرته ..

طلال: عاد هذا بيت أبوه وخلاص يا خاله سدي هالسيرة ..

شريفة تنهدت
.
.
.
لبست قميص نومها ورفعت شعرها لفوق وحطت عنايتها قبل النوم إلا يرن جوالها ردت: أهلين نهلة ..

نهلة: أتمنى ما أكون أزعجتك ..

راغده:باقي على موعد نومي نصف ساعة ..

نهله: تمام , بكره معك موعد لدكتور الأسنان الساعة 9 صباحا ..

راغده: بس ؟

نهله: بكره ما معك أي شيء مهم غير الموعد ..

راغده: فرصة أرتاح , شكرا نهلة ..

نهله: العفـو , تأمرين بشيء طال عمرك ؟

راغده: تصبحين على خير ..


انتهـــى البارت ..

[الواثقه بالله]

البارت مره جميل ماشاء الله ، بدايه موفقه يا عسل♥️.

[لامارا]

البارت الثــــاني




أم نرجس: يا ساتر .. لا تقول أسمك عند امها ..
نرجس: ليه وش بيصير ؟

أم نرجس: يعني بتطردني من الجمعية أم عبدالعزيز ..

نرجس بقلق: لا يا يمه مو لهدرجة ..

أم نرجس: وأزود من كذا بعد ..

نرجس: هي الدنيا سبهلاله كذا ؟

أم نرجس: يعتمد على التصويت لو صار عدد ألي قابلين خروجي أكثر من عدد الرافضين يعني خلاص بح ..

نرجس: ياربي ..

أم نرجس: أتصلي بها يا نرجس ..

نرجس صارت تتصل بـ راغده و راغده جوالها مغلق ..

أم نرجس: أكتبي لها رسالة وبيبان عندك كان هي قرأتها أو لا ..

نرجس : هـي لاغية مؤشر القراءة ..

أم نرجس بعدم أستيعاب: يعنـي شنو ؟

نرجس: يعني لما أرسل لها أي رسالة ما يجيني صحين أزرق ..

أم نرجس: وتعرفين متى تقوم هي؟ ولا ألغت أخر ظهور بعد ؟

نرجس: لا ما ألغته الحمدلله , تصحى 8 أو 9 صباح ..

أم نرجس: حطي لك ساعة يلا عشان تقولين لها وتحذرينها ما تعلم أمها بـ أسمك , وهذا إذا ما قالت وخلصت ..

نرجس بخوف: أنا بحاول يمه على قد ما أقدر و يا رب أنك تعيين ..



رن المنبـه على الساعة 6 صباحا
قامت غسلت وجها وحطت واقـي شمس ولبست ملابسها الرياضية وجزمتها رفعت شعرها ذيل حصان
ونزلت تحت بالحوش ألي سوتها حديقة وصارت تمشي ثم تهرول ثم تركض وبعد ساعة إلا ربع
دخلت داخل وبدون ما تناظرها: لا تسوين فطور , بفطر برى ..

ماريان: أوك سنيورة ..

راغده: بتلاقين ملابسي فوق السرير روحي أكويها ..

أخذت دوش لكامل جسمها ..

وشافت لبسها مكوي ومعلق قبال التسريحة..
كانت عبارة عن تنورة سكيني سوداء وبلوزة رسمية أزرق نيلي ..
حددت حواجبها وحطت واقـي شمس ومرطب شفاه ولبست كعبها الأسود
لبست عبايتها وضبطت حجابها ولبست نظارتها الشمسية وصعدت سيارتها وحمتها إلا تشوف أتصال من نرجس 5 مرات ورسالة بالواتس جات بتفتحها إلا بإتصالها
راغده: أهلين ..

نرجس بفرحة أنها ردت عليها: أخيرا رديتي ..صباح الخير ..

راغده: صباح النور ..

نرجس: ما أعرف هل رحتـي بلغتي أمك بخصوص ألي قلته ..

راغده قاطعتها: لا تشيلي هم , ما بذكر أسمك

نرجس بفرحة: وياليت لو يكون بيني وبينك ..

راغده: ما في شيء بيني وبينك بس أن كان اتصالك هو للمعرفة فـ تطمني ..

نرجس " مدري ليه رافضة أي احتكاك بيني وبينها" شكرا لك ..

راغده: وغيره ..؟

نرجس: سلامتك ..

راغده: أوك " سكرت الخط"

نرجس: سكرت الخط بوجهي ! على أيش شايفة نفسها ؟

أم نرجس: مش مهم الأهم أنها ما علمت أحد ..

نرجس: فيها كمية غرور وثقة ما شفتها بأحد ..

أم نرجس: معليش يا بنتي هذا هم مديرات الأعمال ..

نرجس بقهر: لا تزودين قهـري يمه ..

& & & &
دخلت غرفتها وطفت التكييف وولعت الأنوار وبحده: يلا قم هات من الفوال ..

طلال بطل عينه بثقل ..

أم فهد بنفس حدتها وعند الباب: قوم لا تخليني أرجع لك من جديد ..

طلال: وفهد وش وضعه ؟

أم فهد: فهد مو مثلك بإجازة ..

طلال " صبي عندها أنا ! " وقام بكسـل
.
.
.
توجهت لعيادة الأسنان للكشف على أسنانها ..

الدكتور: أسنانك مش بحاجة لتنظيف ماهي كده كويسة جدا ..

راغده تشوف على المراية: هذا بداية تسوس دكتور ممكن تحشيه لي , وهذا بعد ..

الدكتور: تمام ..

وبعد مضي ساعة إلا ربع توجهت لصالونها

أول دخولها , الطاقم: صبـاح الخير ..

راغده وهي تمشي بثقة: صبـاح النور ..

صعدت لمكتبها , نهلة قامت وراها: صباح الخير ..

راغده: صباح النور , أي مواعيد ؟

نهله وهي تأخذ عباية راغده: لا ..

راغده تجلس على كرسي مكتبها : والموقع أيش صار عليه ؟

نهلة : بعتت طلب عبر البريد الإلكتروني وللآن ما جاني رد ..

راغده: والفطور ؟

نهلة: طلبتها من ربع ساعة ..

راغده: نهلة ضيفي لجدول أعمالي يوم الخميس الساعة 9 للجمعية ..

نهله: أبشـري , تأمرين بشيء ثاني ؟

راغده: تسلمين ..

وبعد لحظات وصلني منقوشتين زعتر وشاي بالنعناع ..

راغده ببتسامة: هذا ألذ فطور ..

ام حسن: فيه العافية ..

راغده: أفطرتي ؟

أم حسن: أي الحمدلله من ساعة كذا ..

راغده ناظرتها: تريدين شيء ؟
أم حسن بتردد: أي طال عمرك , أنتي عارفه العام الدراسي بعد شهر محتاجة سلف 1000 ريال لمقاضي مدرسة العيال ..

راغده: أبشري لا تشيلين هم " مسكت جوالها وأجرت عملية التحويل لحسابها " وهذا حولنا أيش ثاني ؟

أم حسن رفعت يدها لفوق: الله يعمر بيتك ويرزقك الزوج الصالح بالقريب العاجل " انتبهت على نفسها "
أقصد الله يزيدك من فضله كمان وكمان " وعند الباب " أستأذنك ..

راغده تنهدت" مدري وش الغاية من الزواج , وليه الناس تدعي لي بزيادة بالزوج الصالح ؟
كلهم منحرفين ووصخين , الله يأخذهم بس " مسكت المراية وصارت تشوف وجها: هذا أنا قمر وشباب ما شاء الله تبارك الله ..

ومسكت جوالها وجلست على الواتس آب : ايش معك شغل الليلة بعد صلاة العشاء ؟
فرح: أهلين حبيبي , ما معي شيء ..
راغده: أتمنى ما تتعذرين مثل كل مرة , عازمتك على مطعم بحري ..
فرح: ودك بمريم ومروة معنا ؟
راغده بفرحة: ودي , معك تواصل معهم ؟
فرح: أي العلاقة ما أنقطعت
راغده بحماس: مختفيات عن الأنظار خليها مفاجأة لهم قولي أنك أنتي ألي عازمتهم ..
فرح: تـم براسلهم وأكد عليك مباشرة ..
راغده: أرسلت فيس يبتسم مع قلب
سرحت بفكرها " الله على أيام الثانوية كنا صديقات وبعد الثانوية الكلية وكل وحدة ما عادت
مثل أول مشغولات بحياتهم , كل ما حاولت ألتقي بهم ما تضبط , ظروفهم تحكمهم
ويارب هالمرة تضبط " بابتسامة نقزت على التلفون: تعالي نهلة ..
نهلة: حاضر طال عمرك ..

دخلت نهلة لراغده وبحماس سألتها: لو معك صاحبات ما شفتيهم من زمان أيش أفضل هدايا ممكن تعطينهم اياها ..

نهلة : على حسب نوع العلاقة , يعني هل هم صديقات مقربات أم زميلات و ألتقيتوا ؟

راغده بحالمية: صار لنا فترة ما ألتقينا أكثر من عشر سنوات , بس بيننا تواصل على الواتس آب ..أقصد متواصلة مع وحدة منهم , وذي متواصلة مع الباقي ..

نهلة: حلـو , أنا بحجز لكم مطعم راقي vip

راغده: أعتمد عليك يا نهلة , حبثا تكون الليلة على الساعة 8 ولو تم كل شيء على خير أرسلي رابط الموقع ..

نهلة: لكم شخص ؟

راغده: 4 أشخاص ..

نهلة: تم

راغده: الله يحفظك
نهلة نزلت راسها وطلعت من المكتب

بعد 7 دقايق وصل لها الموقع وأرسلت لفرح وخبرتها الخطة الجديدة ..
.
.
.
على الغداء كانت معه بالمطبخ طلال: لا تحاولين ما بتتعلمين هو يعتمد على النفس ..

نوال بضحكة: خف علينا يالشيف رمزي ..

طلال: لو مو عاجبك طبخي , كان ما طلبتي مني البرياني

نوال: ما ذقت أحد مثلك بالطبخ يا طلال ..يا بخت من ألي بتتزوجها ..

طلال:........

نوال: ليه سكت ؟

طلال ناظر أخته: وهل الزواج أساسي يا نوال ؟

دخلت عليهم ميس وبابتسامة: يا مساء الخير جميعا , أنا شامة ريحة أكل فضيعة دوختني , قلت بشوف طلول كان حسبني أو لا ..
طلال: هو أنا أقدر ما أحسبك ؟

نوال: حزر فزر أيش الطبخة ؟

ميس: لا مش معقول طالمة نوال بالمطبخ يعني برياني ..

طلال ونوال بصوت واحد: صــــــح ..

ميس: هههه أنا ذكية ..

نوال: لو ذكية كنتي خلصتي الجامعة مو نايمة فيها ..

ميس بتأفف: زين أني دخلت الكلية , بس ليه سكتوا لما دخلت بينكم سر ؟

نوال: لا بس كان السؤال هل الزواج ضروري ؟

ميس: عن نفسي أساسي " وهي تتلفت وبهمس " عشان أفتك من أمك ..

نوال وطلال: هههههههههه ..

ميس بحالمية: متى بس يجي وأنا موافقة وبدون مهر ..

نوال: لا تسمعك أمي بتقومها عليك ..

ميس: محد يقدر يأخذ راحته بهالبيت , حتى السوالف ممنوعة ..

أم فهد عند الباب: عسـى هالجمعة خير .. !

ميس جمدت مكانها: يمــه !

أم فهد ناظرتها: علامك كذا كأنك شايفة جني ..

ميس: أبد يمه بس دخلتي فجأة ..

أم فهد تناظر طلال بنصف عين: وأنت كلا بالبيت و هالإجازة ذي ما خلصت ؟

ولا جالس تطبخ مثل النسوان ..

نوال: يمـه ..

أم فهد: أطلعي أنتي برا مع أختك ..

نوال: بس ا...

ميس خذت نوال برا

أم فهد: من أنت عشان يعطونك إجازة 8 شهور حتى ألي معه منصب كبير ما سووها له ..

طلال: معليش يا مرت أبوي ..

أم فهد رفعت حاجبها: ما تقدر تقول خالتي أو عمتي .. ولا على ترباية شرفوه

طلال: خالاتكم أمهاتكم وأنا ما شفت هالشيء فيك , مرت أبوي يعد لفظ محترم على ألي تعامليني فيه ..

أم فهد : الله الله والله وطلع لك صوت يا طلول , أنت ناسي أيش ممكن أخلي أبوك يسوي فيك ؟

طلال بتريقة: أكثر من ألي تسونه فيني ؟

أم فهد عطته ظهرها: وش سوينا لك ما كل وشارب والبيت يسترك ..

طلال: بيت يسترني ؟ وينه ؟ كل سواليفي عند الجيران وعند أهلك ,
وليت الكلام صحيح أيش فايدة أعمدة البيت ألي أنحطت لستر وفيها ألي يفشيها ويخلي البيت شفاف ..

أم فهد رفعت حاجبها: ما يحتاج أوصل إنجازاتك لناس وبعدين أنت تظن كذبك علينا بيستمر ..

طلال: أي كذبة .. !!!

أم فهد بتوعد: طيــب , خلك كذا وش أيش بيصير ..

& & &
أختارت لبسة خفيفة لمناسبة عظيمة بالنسبة لها وهـي تتعطر: أحسن من روحتي لهالجمعية
ألي هدفها بس زواج , ألتقـي بـ أصدقاء الثانوية أفضل ومنها أغير جو ..

حطت ميك آب نو ميك آب ..

لينغز تايقـر وبدي أحمر بحمالات عريضة وكعب متوسط أحمر واكسسواراتها بلون الذهبـي قلادة طويلة وخاتم وساعة ..

رفعت شعرها ولبست عبايتها وحجابها وصعدت سيارتها وبرسالة من فرح ( وصلنا للمطعم أنتظرك )

راغده ابتسمت: الحمدلله أخيرا بنتشاوف ..

وبالمطعم ..
دخلوا الغرفة مروة بأعجاب: حبيبي فرح ليه متكلفة كل ذه ؟

مريم: أكيد معك خبر أو به مناسبة خاصة ..

مروة بحماس: بمـوت من الوناسة بصور سناب وأقهر حماواتي المهرجات ..

مريم: وأنا بعد ..

فرح: أسمعوا بنات خلو التصوير على جنب و انتبهوا لي ..

ألي حجزت وعزمتنا هـي راغده ..

مريم ومروة تغيرت ملامحهم: نعـــم !

مروة: وش تقولين أنتي ؟

مريم: ناقصنا حسد أحنا ؟

فرح: حتى لو ما تحبونها تكلفت عشانا والله ..

مروة بقهر: الله يسامحك يا فرح أنا لو أدري إن هي بتجي ما كنت قبلت بعزميتك ..

مريم: أي والله , عينها حارة بتحط عينها علينا ..

فرح: مو ذنبها لأنها ما تزوجت ..

مريم: بس ذه ذنبك أنتي لأنك قبلتي دعوتها ..

مريم بخوف: قل أعوذ برب الفلق , قل أعوذ برب الناس ..

مريم: وليـه أيش تريد منا ؟ وأيش معنا الآن مو أحنا قاطعنا علاقتنا فيها من بعد زواجنا ..

مروة: أي هي معقدة وتريد تخرب عقولنا عشان نصير مثلها لا زواج ولا أهداف ..

مريم: يــوه جلست اتذكر كيف كانت بالكلية " بتفكير "
كان عمرنا 22 سنة ممكن وهي إنسانة ثانية كنا عندها إنفصام وتحقد على كل وحدة متزوجة ..

فرح: هيه هيــــه لا تبالغون عاد , ممكن هي ما تحب أو مو متقبلة موضوع الزواج ..

مريم ومروة ناظروا ببعض وفطسوا ضحك ..

فرح: !!!

مروة بضحكة: طالـع هاذي بس ..

مريم: ههههه هي مو عشان ما تحب هي مو حــــاصل لها كم عمرها الآن ولا تزوجت
وشوفينا الحمدلله متزوجات لكن هـي وش سوت ووش عندها أصلا ؟

مروة: ومدري من وين جابت هالفلوس عشان تحجز لنا بهالمطعم أنا زوجي راتبة فوق الـ 11 الف ولا فكرنا حتى نمر عليه ..

مريم: بسم الله بسم الله ليكون سرقة ولا وش !

فرح: عن الدراما أنتي وهي , وخلاص أسكتوا قبل لا تسمعكم ..

مروة بدون أهتمام : وخير يا طير , لو هي قدامي بقول هالكلام بوجها ولآني بخايفة ..

مريم: وأنا بعد , ناسية لما ...

فرح باندفاع: اوووص جـــات ..

دخلت راغده بابتسامة العريضة: هلــــو ..

الكل أنصدم من شكلها: !!!!!

راغده اقتربت من فرح وحضنتها ومروة ومريم وبشوق كبير: يــا الله يا بنات قد إيش اشتقت لكم يعني لو ما فرح تعاونت معي ولا ما كان شفتكم ..

شلحت حجابها وجلست جنب فرح وهي قبال مريم مسكت يدها: يا الله يا ميمي تغيرتي .. كيف حالكم ؟

مريم وهي تتحسس يد راغده الناعمة: وش جرى عليك ؟ تغيرتي بقوة ..

مروة بنفس ذهولها: لو مريتي قدامي ما كان عرفتك ..

فرح: أحلويتي ونحفتي راغده ..

راغده حست أن بوجها شيء: بروح الحمام أعزكم الله , بالأذن ..

أول ما أختفت عن عيونهم كلهم بصوت واحد: من ذي ؟

مريم: مصيبـة مسوية تجميل ؟

مروة: لا مستحيل ملامحها نفسها بس حلوت كثير ..

مريم: سقـى الله أيام الكلية كانت سمينة والآن شوفي كيف ..

فرح بحماس: نفسي أشوف جسمها بدون عباية , بنظم حفلة ببيتي قريب أجل ونشوف كل شيء , هي كانت تقول لي نادي ونادي ..

مروة: أقول بنات نترك كل شيء لبعدين الأهم نعرف إيش تستخدم وأيش تسوي والله كأنها أم 22 سنة ..

مريم: أيش رايكم نضيفها سناب ؟

مروة: لا مستحيل والله أن تجيك مصيبة ..

مريم: أسمعـيني , هـي نسوي لها تخصيص ما نضيفها من ضمن إطار قصتي ممكن هي من النوع ألي يصور ..

سمعوا صوت كعبها وألتزموا الصمت وجلست معهم بابتسامة: حي الله هالشوفة ..

فرح: تغيرتي أيش سويتي يا بنت ؟

راغده: ما سويت شيء بس شيكت على حالي بالمراية ..

فرح بضحكة: لا أسالك عن شكلك كـ اجمع ..

راغده: هههههه معليش تو أنتبه , أشياء كثيرة ..

مروة مسكت جوالها: معك سناب ؟

راغده: طبعا ..

والكل ضافوها ..

راغده: أيش خاطركم تطلبون ؟
.
.
.
أبو عبدالعزيز: أنا ما كنت راضي من البداية أنها تسكن ببيت لحالها , الناس وش بتقول عني ؟
أم عبدالعزيز تمد له الشاي : هالبنت عنيدة تحب تسوي أي شيء يقهرني ويرفع ضغطي ..

مها: مو ممكن هي تبغى تسكن هناك عشان تتزوج وتسكن به هـي و زوجها ..

أم عبدالعزيز فتحت عينها: لا عاد مو لهدرجة ..

أبو عبدالعزيز: بنتك كل شيء تسويه وما أعتقد أن فكرة مها غلطانة ..

أم عبدالعزيز: بنتي أصلا ما تفكر تتزوج أصلا عشان تسكن زوجها معها ..

أبو عبدالعزيز: حاولي تقنعينها بالزواج بعد سنتين ما عاد بيكون لها فرص زي الآن ..

أم عبدالعزيز تنهدت: من أحين ما عاد فيه أصلا ..

أبو عبدالعزيز: علمـي نفسك أجل وأقنعيها ..

مها: أتركوا هالشـيء علي أنا بكلمها ..

أم عبدالعزيز بأندفاع: كلميها بعد يوم الخميس , لو كدرتيها ممكن ما تجي وأنا بالموت أقنعتها ..

ويارب تعجب بها أم صهيب وتخطبها لولدها ..

أبو عبدالعزيز: وأيش لازمك أغراض للجمعية ؟

أم عبدالعزيز: وصيت عبدالعزيز عليها ..

أبو عبدالعزيز: هالولد مختفي مرة ..

أم عبدالعزيز: جياته ما تصادف جياتك , وتلقاه مشغول أصلا ..

أبو عبدالعزيز: وأخبار د.حمود ؟

مها: مشغول مرة يا دوب يفضـى لي ..

أبو عبدالعزيز: هذا هـي مهنة الدكاترة الله يعينه ..
.
.
.
بتردد: يبه أنا فصلت من الدوام ..

أبو فهد عدل جلسته: وش تقول ؟ وش السبب ؟

طلال: بسبب سفرتي مع نوال ..

أبو فهد: كلمتهم ؟

طلال: أي و مابه فود ..

أبو فهد: لا حول ولا قوة إلا بالله ..

طلال: أنا بشتغل بالقطاع الخاص بعد شهرين إن شاء الله ..

أبو فهد: الله يكتب لك الأجر , ويعينك على ما أبتلاك به , أنت توك صغير وما يندرا إيش بيصير بعدين ..

طلال" كل شيء يكون سهل بدون مرت أبوي وتدخلاتها ": إن شاء الله ..

إلا بدخول فهد: السلام عليكم ..

أبو فهد وطلال: وعليكم السلام والرحمة ..

فهد جلس جنب أبوه: أبو ظافر جارنا يشتكي من عبدالرحمن ..

أبو فهد: وش مسـوي ؟

فهد: يقول كل شوي داخل وطالع عندهم والبنات مو مرتاحات ما عندهم خصوصية ..

أبو فهد: هـــاه .." بصوت عالي " يا عبدالرحمن .. يا عبدالرحمن , قـم يا طلال ناده ..

طلال قام: أبشـر ..

أبو فهد: وكيف يدخل ويتمشـى عندهم ..

جات ميس بروعه: علامك يبه تصارخ ؟

أبو فهد: أخوك الثـور ..

طلال وعبدالرحمن دخلو ..

فهد بحده: صح أنت كل يوم عند الجيران ؟

عبدالرحمن : أي جيران ؟!!!

فهد: أقصد أبو ظافر لا تستغبى معي ..

عبدالرحمن: أي أروح ..

أبو فهد بعصبية: وش دخلك عندهم ما تدري البيت به حريم ..

عبدالرحمن: أي حريم ! أنا أدخل المجلس بس ..

فهد بعصبية: مو أنا محذرك ما تدخل بيتهم !

عبدالرحمن: لا تدخل أنا أكلم أبوي ..

فهد فتح عينه على الآخر وقام عليه يضربه: أيا ألي ما تستحي على وجهك تقـل أدبك بعد ..

أبو فهد بصوت عالي: بـــس أنت وياه ..

طلال يحاول يفصل بينهم

ميس بصراخ: يا ويلي خلاص يا فهد بتذبحه ..

عبدالرحمن كان يغرس أظافره الطويلة بجلد فهد ويدافع عن نفسه على قد ما يقدر ..

طلال مسك فهد بقوة وبعده عن عبدالرحمن

ميس أبعدت عبدالرحمن : بـس بـــس خلاص ..

أبو فهد : ما عندكم إحترام لي جالسين تتطاققون قدامي ..

عبدالرحمن بعصبية: هو ألي بدأ يبه كل ما سويت مشكلة أو سوء فهم ما غير يجلدني يحسب أني أصغر عياله , يظن أني صغير مثل قبل ما أقدر أدافع عن حالي ..

أبو فهد: جـــب , توك أبو 14 سنة ولسانك طويل على أخوك الكبير , أحترم وجودي على الأقل ..

فهد يتنفس بسرعة: آسف يبه بس هو ألي بدأ بطولة اللسان ..

أبو فهد: في شيء أسمه تفاهم مو تضربه على طول ..

عبدالرحمن بسخرية: شف على كم ضربه ونفسه بينقطع من الدخان ..

فهد بعصبية: أنت ولا كلمة ..

أبو فهد ناظر فهد: صح هالكلام يا فهد ؟

فهد: يكذب مو صدق ..

عبدالرحمن: أنا يبه معي مقطع مصورينه وهو يتفنن بالتدخين وطلع الدخان من خشمه بعد ..

طلال: خلاص يا عبدالرحمن رح غرفتك ..

أبو فهد بحده: وقف , وين المقطع ؟

فهد تغير معالم وجهه وناظر بعبدالرحمن بوعيد

إلا بدخلة أم فهد: وش صاير ؟ " وهي تناظر بولدها يده مخدوشة ومجروحة بقوة وبخوف: وي وي من ألي مسوي بك كذا ..

طلال: يا مرت أبوي أ...

أم فهد ناظرته بكره وقهر: جعل يدك الكسر أنت حيوان ؟ وش هالحوافر ألي معك وش سويت بولدي ..

ميس: يا يمه لا تصيرين مثل فهد تهجم على طول , أسمعي السالفة ..

أبو فهد: وأنا من أطلع شوي تصير أمور كثيرة ..

أبو فهد: خلك من هالسيرة وين جوالك يا عبدالرحمن ..

عبدالرحمن فتح المقطع ووراه أبوه

أبو فهد بصدمة: أيا أسود الوجه أجل ذي سواتك ؟ ولما أسالك قبل تقول إشاعة ؟ تقلع الله يقلعك

فهد عند الباب بقهر: أنا أوريك ..

أبو فهد: ويهدد أخوه بوجهي بعد ..

أم فهد: وش السالفة ..؟

ميس مسكت يد أمها وبهمس: تعالي يمه أنا بعلمك ..

وراحت معها

طلال: يا يبه هد نفسك , ذي صحته وبراحته ..

أبو فهد بقهر: أحصلها من العود ولا من المراهق ألي بالشني بكل يوم مصيبة يا مرة مكسر لمبة أبو جابر ولا فالع واحد ولا متهاوش والآن عند أبو ظافر ..

طلال: يا يبه مراهق وش لك به , أنا بنفسي بكلمه لا تشيل هم وإذا على فهد هو كبير مو صغير وعارف وش قاعد يسوي ..

أبو فهد: أنا ما أريده يصير مثل عمه الله يرحمه , مات بسبب سرطان الرئة وش سبته التدخين ..

طلال تنهد: لا حول ولا قوة إلا بالله ..


وبالصالة جلستها وصارت جنبها: جاء فهد من برا وقال له إن أبو ظافر يشتكي من عبدالرحمن داخل طالع عندهم
والحريم يشتكون منه , إلا بدخله عبدالرحمن وتصير نجرة بينهم ذه يضربه وذاك يرد عليه بكفخة ..

أم فهد: يعني طلال ماله علاقة , كان يباعد بينهم من أول ؟

ميس: يمه مو أنتي شايفة بعينك أن طلال كان ماسك فهد بقوة وش يعني ؟ يعني أن هو ألي باعد
بينهم , وبعدين ليه تحبي تطيحي كل شيء برأس هالطلال , مسكين والله ..

أم فهد: لأن عمره مو معتبركم إخوانه هو خبيث أنا أعرفه من كان صغير , ماتت أمه من كان عمره 5 سنوات , وهو شري ما تحملته والله ..

ميس: طيب الآن هو كبير ما يوصخ ولا يسوي شيء ..

أم فهد: والمطبخ ألي مخليه حسرة؟

ميس: يا يمه به شغالة تنظف مو لازم تنظفين أنتي , وبعدين طلال لجاء يطبخ نظيف جدا , شوفيني أنا لطبخت خليت المطبخ إعصار ..

أم فهد: ليه تحبونه أكثر من فهد ؟ رغم أن فهد أخوكم من أم وأب واحد ..

ميس: يمه أنتي عارفه طبع فهد عصبي وحريقة , لكن طلال لا ,
نصيحة يمه حاولي أنك تلينين على طلال ما تدرين ممكن هو الوحيد ألي يفيدك وأحنا ننشغل ولاهيين ..

أم فهد: ما أحبه ولا أحب أمه وأهلها , ما بغت تحمل إلا لما تزوجني أبو فهد ..

ميس بعجب : يمه أنتي الدخيلة بينهم , مو أم طلال ترى أنتي الثانية وهي الأولى وبعدين مو ذنبها أنها ما حملت إلا لما تزوجك أبوي ..

ام فهد: كنت متوقعة أنها بتطلق بعد ما تزوج عليها لكنها جلست معه وعادي ..

ميس: يا يمه لا تصبين كرهك على طلال ترى الظلم ظلمات ممكن ألي صاب نوال بسبب ظلمك له ..

أم فهد: أنا ما ظلمته بس ما أحبه , وبعدين ألي في نوال بسبب العين ..

ميس: الله يدري , حتى لو نكرتي , ولا تبيني لأبوي كرهك له خلاص , بيجي يوم يوقف ضدك وممكن هو سنة بالكثير ويتزوج بنت عمي ..

أم فهد: يتزوج من يا حسرة ؟ من ألي بتقبل فيه بدون وظيفة ..

ميس بعدم أستيعاب: مافهمت عليك ؟؟

أم فهد: فصلوه خلاص , وبنت عمك ولا غيرها بتقبل فيه .. أبوك لو عرف بيطين عيشته لأنه معطي اخوه كلمة أن جنان لطلال ..

ميس: يا رب أنك تعين ..

نوال الي كانت تسمع الكلام كامل دخلت غرفتها بهدوء ..
.
.
.
أنتهت الأمسية راغده عند سياراتها: أحد يريد أوصله ؟

مريم باندفاع: أنــــا ..

فرح: خلاص أنا باخذ مروة وأنتي خذي مريم ..

راغد ببتسامة: يلا ..

وصعدت معها السيارة , مريم ألي كانت تشوف سيارتها بإعجاب : أقول راغده خذيني أول لبيت أهلي بأخذ عيال ..

راغده: ماشاء الله معك عيال ؟

مريم: أي 2 ..

راغده: الله يحفظهم لك ..

مريم: آمين ..

وقفت عند الاشارة شافت جوالها 7 مكالمات من نهلة كتبت لها رسالة" أوصل وأكلمك "

راغده: ودك بشيء , قهوة أو شاي تتسلين بالطريق ؟

مريم: لا أنا فل .. خلاص ما به مجال أكل أكثر ..

راغده: بالعـافية ..

وصلت لبيت أهل مريم وخذت بناتها ووصلتها لشقتها وتوجهت لبيتها أول ماحطت سيارتها للكراج أتصلت بها : هلا نهلة أعذريني كان جوالي صامت ..

نهلة: إن شاء الله كانت أمسية حلوة ؟

راغده: جدا ..

نهلة: ردوا علي الموقع بالبريد قالو من أول كان عملتي حجز مثل العادة ..

راغده: نسيت والله , عارفه تو أنتقلت لبيتي وما كان معي وقت , لكن بلغيهم أني بكره بتناقش معهم ..

نهلة: ما ينفع الآن ؟

راغده: ودي , لكن الآن الساعة متوخرة وأنا أول ما أدخل الصالون بتفاهم بإذن الله وبباشر فيهم ..

نهلة: تأمرين بشيء ..

راغده: سلامتك ..

وسكرت الخط وصعدت فوق لغرفتها , شلحت عبايتها وحذيانها وقطت نفسها بالسرير " أيام , أيام ما تغيروا مثل ما خبرتهم "


يوم الخميس كل شوي تتصل أم عبدالعزيز , تأكد لبنتها عشان ما تنسـى الروحة
لبست فستان زيتي طويلة وبه كسرة من ورى ماسك على الجسم بحمالات عريضة وجاكيت جينز وصندل متوسط الطول ذهبي مع أكسسوارات ذهبية
رفعت شعرها ذيل حصان , ورخت شعرها من قدام
مكياج ناعم وغلوس أورنج خفيف ..

عند قدوم الساعة 9:12

وصلت و استقبلتها مها وبعد السلام: ليه ما تردين على أتصالات أمي ؟

راغده: أنا قلت كلمة أني بجي يعني بجي مو كل شوي تشيك تتأكد ..

مها: طيب كان رديتي ..

راغده: ناسية أني أسوق ؟

ريهام: ياربي.. مو وقت عتاب ولوم .. بنتأخر على أمي يلا ..

جات الخدامة شالت عبايتي , فتحت شنطتها وتعطرت وشيكت على حالها بالمرآية
وضبطت شعرها دخلت مجلس الحريم وشافت أعضاء المجموعة من ضمنهم أم نرجس وبنتها
سلمت على أمي وعلى الموجودين , نرجس تناظر فيها من فوق لتحت وبهمس لأمها: وجات السنيورة ..

ام نرجس بإعجاب: جسمها نحت تبارك الله ..

نرجس بغيرة: أي الله يسلم فلوسها ..

أم نرجس: يمـــه من غيرتكم يالبنات ..

نرجس: احتاج أكون مروقة يمه رجاءا ..


أم عبدالعزيز غمزت لأم شاكر وفهمتها وبترحيب: هلا بالزين كله , ماشاء الله تبارك الله..

راغده بابتسامة: هلا أم شاكر ..

أم شاكر: زاد نور المكان ..

راغده: تسلمين حبيبي ..

ومسكت يدها وجلستها عند أم صهيب , أم صهيب: وش هالزين ووش هالجمال ..

أم شاكر بابتسامة وبهمس: للآن كل شيء مبشر بالخير

أم عبدالعزيز بفرحة: الله كريم يـ أم شاكر , يارب يكون زواجها بهالسنة يارب ..

أم شاكر: أي يـ أم عبدالعزيز ادعي لها ترى دعوات الأم مجابة ..

أم عبدالعزيز: يارب أنك تجيب ..

أم شاكر: أجلسي جنب أم صهيب وأمدحيها وأثني عليها ..

أم عبدالعزيز جلست جنب أم صهيب: سمعت أن ولدك صهيب رجع لسعودية ..

أم صهيب بفرحة: أي الحمدلله ..

أم عبدالعزيز: الحمدلله على سلامته ..ومبروك تخرجة

أم شاكر: ومتى نفرح فيه ..؟

أم صهيب: هذا أنا جالسة ادور له ساعدوني ..

أم عبدالعزيز: مو ممكن تكون قبالك بس أنتي مو شايفتها ؟

أم صهيب: لا وين , تعبت وأنا ادور ما لقيت البنت المناسبة ..

أم شاكر: يعني هو معه مواصفات محددة؟

أم صهيب: ما قال بالضبط , بس يريدها على ذوقـي ..
" ألتفتت لراغده" وأخبارك راغده ما تزوجتي ..

أم عبدالعزيز باندفاع: لا للآن ..

ام صهيب: أي .. الله يرزقها , أما أنا ما بزوج ولدي إلا بشيخة البنات وياليت لو تساعدوني عليها ..أم عبدالعزيز وأم شاكر خبري معكم معارف
, وتروحون للمناسبات أريدها وحدة صغيرة ما تعدت الـ 28 سنة ..

ام عبدالعزيز تغير وجها , أم شاكر:.........

أم صهيب: وأريدها ست بيت , لا موظفة ولا شيء , أريدها تفضـى لولدي وهو ما يردها موظفة ..

راغده بحماس: كأني لقيت لك البنت الكفـو ..

أم صهيب بنفس حماسها: وينها؟

راغده بهمس:شوفي ألي جنب أم نرجس هي بنتها الوحيدة و لو أحكي لك
عن خلقها وأدبها , رغم أني ما أعرفها من زمان يا دوب من شهر من لما أنتقلت لبيتي ..

أم صهيب بغرابة: بيتك ؟

أم عبدالعزيز باندفاع وبكذب: أي بنتي بسم الله عليها أشترت أرض وبنتها ممكن تفكر تأجرها ..

أم صهيب: ماشاء الله ..

أم عبدالعزيز وبقهر من بنتها: روحي شوفي المعازيم وش ناقصهم ..

راغده أخفت أبتسامتها: طبعا يمه " وقامت "

أم صهيب: ماشاء الله عليها جميلة بنتك , وجسمها متعوب عليه , ما معك بنت بسن الزواج ؟

أم عبدالعزيز بخيبة: لا ما معي إلهام بسن الـ 14 ..

أم صهيب: أي صغيرة مرة, وليه للآن ماتزوجت بنتك راغده..

أم شاكر ألتفتت لأم صهيب: ما جاء ألي يدخل مزاجها للآن ..

أم صهيب بصدمة: أي مزاج , عمرها 33 سنة وللآن تفكر , لو أنا منك يـ أم عبدالعزيز زوجتها
أي واحد يدق بابها , على الأقل تجيب لها عيال , بس لأنها تأخرت بتجيهم ورى بعض الله يعينها ..

أم عبدالعزيز شدت على قبضة يدها: بنتي ما عليها عيب وقاصر , العيب ألي مثل تفكيرك ..

أم صهيب: وش غلطت به أنا ..؟ كلمة الحق صدق ينزعل منها ..

أم شاكر بتدخل: هـدو الله يعافيكم , ما صار إلا كل خير ..

أم عبدالعزيز: هي ألي بدأت , وبدأت تقط كلام ماله سنع لبنتي ..

أم صهيب بغرور: إذا كتب صهيب كتابة بعزمك على زواجه ..

ريهام راحت تركض لراغده: تعــالي بسرعة شوفي آيش يصير بالمجلس " وسحبت يدها للمجلس "

أم نرجس قامت: علامكم ؟ مو وقته كلش ..

أم صهيب: شوفي كيف متقطعة تريد ولدي يأخذ هالعجوز بنتها ..

أم عبدالعزيز: عجوز بعينك , على أساس ولدك الخمة توه بالعشرينات بسم الله عليه و يكون بعلمك هو من سن راغده ..
بنتي كونت نفسها بنفسها , ما أحتاجت لوقفة عمها أو وقفتي , مثل ولدك معتمد عليك وعلى أبوه ..

أم صهيب بقهر وضيم : أنا أوريك , هالأهانة ذي ما راح اعديها ..

أم عبدالعزيز: يمــه خفت انتفضت , يكون بعلمك لو تفكرين بس تفكير , برفع عليك قضية والفاظك النابية عن بنتي عليها شهود ..

أم صهيب شدت على قبضة يدها: أقلها بنتك بتظل عانس , يا حرام وما بيكون
به مجال تجيب طفل صاحي , ألي بعمرها عرضة أنها تجيب متلازمة داون ومرضى , بعد قال آيش قال ما بعد يجي الي على مزاجها , صدق عجايب ..

راغده صارت تناظر أمها ألي واضح أنها بتنهار وتبكي دخلت بشموخها للمجلس وبصوت رايق: لحظة يـ أم صهيب ,
الكل ألي بالمجلس "ألتفتوا لها وهم مصدومين من تواجدها"
أم صهيب تغير وجها لما شافت راغده:.......

المجلس كان ولا همس و الصوت ألي كان واضح , صوت كعبها بالبلاط: من قال لك أني ميتة على ولدك
أو حطيته من طموحاتي ..؟ تظنين أنه رجل يعني أنه يقدر يغطي على جرايمة ؟ ناسية فعايل ولدك ولا أذكرك فيها ؟

أم صهيب بلعت ريقها , راغده بابتسامة ثقة: الفضايح مو زينة , أنا لو أريده بأخذه حتى بدون شورك
, وهو بنفسه بيقول لك يمـه زوجيني راغده حتى لو عمرها 40 سنة ..

أم صهيب بقهر: وش هالثقة ألي فيك أنتي ؟

راغده اقتربت من أم صهيب ونزلت لمستوى طولها وبهمس لأذنها: أنصحك تلمين أغراضك وتطلعين
من البيت , مو عدلة اقول لعضوات الجمعية أن ولدك يلعب قمار
وبدل ما جالس يذاكر ويكمل تعليمه راح يفسفس فلوس أبوه على بنات الحرام ,
نصيحة من قبل لا تزوجينه روحي حلليه , حرام يعادي بنت الناس بأمراض معدية التهابات وفايروسات ..

أم صهيب جمدت مكانها وأرتبكت لما شافت حدة نظرات راغده القوية لها: هـ..هالكلام مو صحيح..

راغده بنفس همسها: حتى لو ما كان صحيح بالنسبة لك , أني اشهر بولدك عند الحريم مو زينة
, وبعدين ولدك بيطيح بكبدك , ووقتها روحي أخذي له أندونيسيا أو نيبالة تقبل فيه , وتلقينها متردده فيه بعد ..

أم صهيب فتحت عينها على الآخر: صدق أنك قليلة آدب ..

راغده رفعت ظهرها لورى: العين بالعين , والسن بالسن , أسحبي كلامك ألي قلتيه عني وأعتذري لأمي ..

أم صهيب بلا مبالة: وليه أسحب , وهذا الصدق ؟ قولي لي على واحد دق بابك
من دخلتي الـثلاثينيات وأمك تدور لك على زوج " وبتريقة" يا حياتي شايلة همك , ما تدري أن
ألي بيقبل بك أما مطلق أو أرمل أو معدد , ألي مثلك يتزوج أعزب ؟

راغده:......

أم صهيب كملت: خطابة ورى خطابة , ولا أحد قبلت فيك , ولدي لو أيش يذنب ويغلط ألي بتقبل به , لكن أنتي تؤ تؤ تؤ أحلام أمك عالية ..

راغده وهي تحاول تمسك أعصابها:الرجال موجود بس أنا وأمي مأجلينه لأسباب ..

أم صهيب بضحكة: موجود ..! هههههههه " وهي تأشر على أم عبدالعزيز" لو موجود ماكان عرضتك
على خطابات , ولا أم شاكر ألي دبلت كبدي بالمدح عنك , وش قصدها هاه؟؟

راغده: طبيعي بتمدحني , من حبها لي ودها أتزوج على ذوقها ..لكن أنا قلت لها ولد أم صهيب مو داخل مزاجي , كبير علي ..

أم صهيب: أكبر منك كلها أسبوع فقط ..

راغده: شايب , بتزوج شباب وصغير يزهر لي حياتي , ولا شايب وعايب يقرد علي حياتي ..

ام صهيب بتحدي: أتحداك تلقين الي يقبل فيك وهو بسن صغير إلا أن كان طايح من عين نفسه ..

راغده بنظرات ثاقبة: حا تشوفين , وعند نهاية هالشهر بيكون كتب الكتاب ..

أم صهيب ببتسامة ثقة: ووقتها أنا بسحب كلامي عنك ..

أم علي قامت: ووش الضمان أنها ما بتدور أي واحد من وسايطهم يتزوجها ..

أم صهيب بتفكير:أي صحيح ..

راغده: وش ألي يثبت لك ؟

أم صهيب ناظرت أم علي: بعد زواجك المزعوم وبعد شهر العسل ما يخلص تعالي هنا ببيت عمك أبو عبدالعزيز وأنا بشوف وبعرف كل شيء ..

راغده بعدم أستيعاب: ما فهمت ؟

أم علي: أم صهيب معها نظرة ما تخيب , معها حدس تعرف كان به حب له لك أو لا , أن كان مجبور أو لا ..

راغده بستخفاف: سهـلة ..

أم علي: شكلك واثقة من نفسك ..

راغده: لأن ألي بيتزوجني وده اليوم قبل بكره أنه يتزوجنـي ..

أم صهيب فرطت ضحك ومدت يدها للمصافحة: تــم ..

وسط ذهول الكل

نرجس تهمس لأمها: بسم الله , مخاوية ذي ؟

أم نرجس: أم صهيب ذي بنظرها تعرف الصادق من الكاذب , ومو صعب عليها تعرف كان هل ألي بتجيبه راغده هو صدق ولا زوج بالإيجار ..



انتهــى البـــارت ..

[لامارا]

البارت الثـالث


نرجس تهمس لأمها: بسم الله , مخاوية ذي ؟

أم نرجس: أم صهيب ذي بنظرها تعرف الصادق من الكاذب , ومو صعب عليها تعرف كان هل ألي بتجيبه راغده هو صدق ولا زوج بالإيجار ..

نرجس نفثت على صدرها:تفو تفو , بسم الله بسم الله ..سكنهم بمساكنهم ..
.
.
.
بعد تردد شديد دخلت لعند أبوها: مساء الخير يبه ..

أبو فهد نزل جواله: مساء النور ..

نوال: مشغول يبه ؟

أبو فهد نزل نظارته: لا بنتي .. حياك

نوال جلست وهي تلعب بأصابع يدها , أبوها انتبه لتوترها: قولي ألي عندك نوال ..

نوال: صح ما بيتزوج جنان عشان أنه بدون وظيفة ؟

أبو فهد: من قال لك هالكلام ؟

نوال: أنا سمعت من أحد ..

أبو فهد: ومين هالأحد ذه ؟

نوال: يعني هالكلام ذه صحيح ..؟

أبو فهد ما كان وده أن بنته تعرف : شوفي يا بنتي , هو صار من سنين دار بينا , أن جنان لطلال وطلال لجنان , بس عمك ما عاد يريد طلال , لعدة أسباب باستثناء الوظيفة ..

نوال بفضول: أيش الأسباب طيب ؟ طلال مابه شيء يعيبه لا من ناحية الشكل ولا من ناحية الثانية ..

أبو فهد كان يدري لو ما جاب سبب لبنته مستحيل تقتنع: عمك ما يطيق طلال وقال أن راتبه ما يوكل عيش , وأن لزوم ينتظر بعد لما يترقـى ويزيد من راتبه وجنان خبرك فيها تحب الشياكة مستحيل تقبل بواحد راتبة أقل من 12 ألف , وأخوك تو متعين من سنتين ..

نوال: بس هذا سبب حقيقي ولا تأليف ؟

أبو فهد: لو مو مصدقتني روحي أساليها , قالت ما تقبل بطلال وراتبة أقل من 12 ألف ..
هي يا بنتي واضح أنها ما تريد طلال ..

نوال: كيف دريت ؟

أبو فهد: واضحة يا نوال , البنت إذا حبت بتتزوجه حتى لو أنه بدون وظيفة , لكن الله يرزقه ببنت الحلال , والوظيفة السنعه ..

نوال تنهدت براحة:الله يسمع منك ..

& & & &
بعد ما راحو الضيوف
أم عبدالعزيز بعصبية: أنتي تبين تذبحيني , تبين تجلطيني ؟

مها: يا يمه هدي ما يصلح لك العصبية ..

أم عبدالعزيز: والله أن ريهام أم 14 سنة عقلها أكبر من عقلك ..
ليه تسوين فيني كذا ..

راغده: ليه أيش سويت أنا ؟

أم عبدالعزيز: هذا ألي ترفع الضغط والسكر بجد , أنتي واعية وش قايلة لأم صهيب ؟ راح تنزلين راسي بالقاع , لو أنك قايلة واحد كبير كان أوقع , بس صغير ليه ؟ مو من زود الخطاب الي يجونك , أحنا ندور بمطلق بدون عيال لك ما حصلنا ..

راغده: ما في شيء مستحيل يمه ..

أم عبدالعزيز: بس معك أنتي يصير مستحيل , ما توفقتي بأي رجال إلا وطلع به عاهات ,
كان قلتي بتزوج بنهاية الشهر ليه تحددين أعزب وصغير , مو من الجمال الي مقطعك يا هانم ..

راغده: الجمال يمه مو كل شيء وبعدين أنا مو شينه بالعكس لي جمالي الطاغي المتفرد بي ..

أم عبدالعزيز بنفاذ صبر: والله لو تجلس دقيقة وحدة قطعت لحمها ورميته للكلاب ..

ريهام مسكت يد راغده وبهمس مسموع: خلاص روحي راغده وبكره نتفاهم ..

أم عبدالعزيز بصراخ: هدوني عليها هاتوا لي الخيزرانة ..

مها قامت بينهم تردع أمها: خلاص يمه , راغده روحي وبكره نتفاهم معك طلبتك روحي

راغده طلعت وركبت سيارتها وهي تفكر كيف تجيب لها زوج بهالمواصفات ..

مها وبيدها كوب ماي: أشربي يمه وبردي على قلبك ..

ام عبدالعزيز تشرب ونفسها مقطوع: ذي بتجيب أخرتي بتذبحني يا مها , سامعه وش قايلة ؟ متقطع أنه بيتزوجها ومنـى عينه يتزوجها " ضربت ركبتها" أبـوك يا الغبنه ..

ريهام بتفكير: ما تدرين يمه يمكن به واحد يحبها بالخفاء وأحنا ما ندري ..

مها " ما أعتقد واحد غريب , لأني أعرف من تحب " ..

أم عبدالعزيز: أنتي جب ولا كلمة , أختك من وين بتنحب وهي بهالأسلوب والطبع الخايس أي رجال بيتودد لها..؟

مها تريد تهدي أمها: ريهام معها حق يمه , ممكن راغده تحب واحد ..

ام عبدالعزيز: وهـا الواحد ذه ليه ما جاء وخطبها " وبخوف" ليكون حابه لها واحد متزوج ؟
يمه قلبـــــي ..

مها " للأسف " باندفاع: لا لا يمه ممكن زين بس ما قدرت تعرفنا عليه لأن ممكن هي خايفة ما نقبل فيه ..
أم عبدالعزيز: ومن قال أن أختك معطتنا أهمية أو وجود عشان تخاف , أنا رفعت الراية البيضاء خلاص
, لو تجيب لي فراش أو مزارع أنا بقبل فيه بس تتزوج وتفكني من كلام الناس ..

مها: طولي بالك أنا بكلم راغده بكره يوم الجمعة ما معها شغل بتفاهم معها..


وبالسيارة حطت السماعة بأذنها و أتصلت عليه
أبو حسن: هلا طال عمرك ..

راغده: معك شيء بكره ؟

أبو حسن: أبد فاضي خبرك إجازة ..

راغده: ممتاز , تعرف الحملة ألي سويتها من فترة لدعم الشباب الطموحين والكادحين ..

أبو حسن: أي فاكر

راغده: معك تواصل معهم؟

أبو حسن: طبعا للآن ..

راغده: أريدك تجمع ملفاتهم كلهم وترسلهم لأم حسن يوم السبت ..

أبو حسن: ما أقدر بظرف يوم ..

راغده: بحول لك 2000 ريال مقدم لحسابك , وبس تتم بحول لك الباقي ..

أبو حسن: أبشري طال عمرك ..

راغده: أسمع جيب لي العزاب منهم , المتزوجين لا تفكر ..

أبو حسن: لا تشيلين هم ..

راغده: أستأذنك " وسكرت الخط "

وبالمكتب
أم حسن قدمت لها الملفات: هذا ألي طلبتيه طال عمرك ..

راغده رفعت شعرها وحطت التوكه: بس 4 أشخاص الباقي وين ؟

أم حسن: ما أعرف ..

راغده: طيب , أنصراف ..

أم حسن نزلت راسها وطلعت

راغده نقرت الزر: لا أحد يدخل نهلة معي شغل مهم ..
نهلة: حاضر طال عمرك ..

وفتحت الملف الأول كان به صورة ومن تحت معلومات عنه راغده: لابد أخذ واحد مزيون وكفو "
إلا تسمع صوت من برا وبسرعة دخلت الملفات بدرج المكتب وقفلت عليه "

أم عبدالعزيز بنرفزة: مو قلت لك أنا مو زبونة أفهمـــــي ..

نهلة: آسفة بس ذي أوامر المديرة..

مها: يمه لا تعصبين بتلمين علينا الموظفات , و بتصير فضيحتنا بجلاجل ..

أنفتح باب مكتبها , نهلة باندفاع: طال عمرك مصرات يدخلون ..

أم عبدالعزيز وبناتها:!!!!

راغده: مو مشكلة نهلة , أعتذر منك " ناظرتهم" تفضلوا "

دخلت أمها وبناتها راغده باستغراب: عسى خير , أمي وأخواتي هنا بمكتبي ليكون لم الشمل بيصير هنا ؟

ريهام بإعجاب وهي تشوف أختها: له له وش هالكريزما ووش هالشياكة , والمكتب الفخم ..

راغده جلست بمكتبها: أيش تشربون ؟

ريهام: عصير ..

ام عبدالعزيز ناظرتها بنص عين: مو جاين عشان نشرب ..

ريهام برطمت: ليه يمه؟

مها: قلت لك يمه لا تجيبينها هنا , شوفي أيش تسوي ؟

راغده: ما يصير هذه أول زيارة عائلية جماعية بدوامي لزوم التضييف ..

ريهام بابتسامة: عصير ليمون بالنعناع ..

أم عبدالعزيز ناظرت ريهام بغضب

راغده: والمها وأمي ؟

:........

راغده نقرت على الزر: نهلة لو سمحتي كوب نعناع بسكر دايت 1 , شاي بالنعناع 2 , عصير ليمون بالنعناع 1 ..

نهلة: حاضر طال عمرك ..

أم عبدالعزيز وبناتها يناظرون ببعض

راغده: وريهام معكم ؟ أكيد به شيء خارج عن المألوف .. هالمرة وش سويت ؟

ريهام: أبد كنت سهرانة خبرك إجازة و قلت أشوف مكتبك ..

راغده: أعجبك ؟

ريهام: جدا.. صايرة من مديرات الأعمال , لايق عليك ..

أم عبدالعزيز: جب أنتي وياها , ذه مو موضوعنا .. أنتي تستهبلين صح ؟

راغده: !!!!!

مها: وين كنتي فيه يوم الجمعة ؟ أمي راحت عندك وقالت الخدامة أنك برا أنتظرناك ساعتين ما جيتي ..

راغده وكأنها أفتكرت شيء: أيوه افتكرت , قالت لي ماريان صحيح , ما رجعت دقيت عليك لأن كان ميعاد نومي ..

أم عبدالعزيز: وين كنتي ؟

راغده: كنت بالجيــم ..

أم عبدالعزيز: ساعتين ؟
راغده: أي ولا تنسي مسافة الطريق ..
أم عبدالعزيز: بدل ما تروحين الجيـم , كان فكرتي بالمصيبة ألي وقعتي نفسك فيها و وقعتيني أنا وياك ..

راغده: يمه أن كانك شايلة هم ألي قالته لأم صهيب أنا جالسة أعمل على الموضوع ..

أم عبدالعزيز: يعني معك صدق رجال ؟

راغده: ما به شيء أكيد ..

أم عبدالعزيز: شغل الألغاز ذي أبد ما تصلح لي , معك أو لا ؟

راغده: ألي يريحك وش ؟

مها: راغده تلف وتدور يعني صدق توقعاتي ..

راغده: أي توقعات ؟

مها تخاف ظنونها تكون صحيحة: أنك تحبين واحد وعازفة عن الزواج عشانه ..

راغده عجبتها الفكرة: يا سلام عليك يا مها , وكيف عرفتي ؟

أم عبدالعزيز بصدمة: شنــــو !!!!

مها " يعني مو متزوج ! ": الحمدلله يمه طلعت تحب يعني مو معقدة .. ولا تحتاج طبيب ..

أم عبدالعزيز: وليه للآن ما خطبك ..

أندق الباب راغده: صمتا ! " بصوت مسموع" تفضـل ..

أم حسن: السلام عليكم

وحطت الشاي بالنعناع عندي والباقي حطتهم لقبالهم وعند الباب: تأمرين بشيء طال عمرك ؟

راغده: سلامتك ..

وطلعت أم حسن , ريهام بإعجاب شديد: يالله حبيـــت كلمة طال عمرك ..

أم عبدالعزيز: وتلوموني بعقلها , لا الكبيرة ولا الصغيرة معهم عقل ..

راغده: الشغل يمه شغل الألقاب ذي هي ألي أرفعت ناس ونزلت ناس ..

ريهام: ليه تريدين تزوجين راغده يمه , حياتها مثالية أنا لكبرت أريد أصير مثلها ..

أم عبدالعزيز: جـب ولا كلمة أنتي , هذا ألي كان ناقصني بعد ..

راغده تشرب الشاي: أنتي كل همك أني أتزوج , خلاص جهزي نفسك أنتي والصبايا كتب كتابي نهاية هذا الشهر ..

مها: مو الأول نعرف من هو !

أم عبدالعزيز: مالنا قدر عندك لهذه الدرجة ..

راغده: يمه ألي تريدينه بيصير .. وأنا ما همني أم صهيب قد ما تهميني أنتي ..

ام عبدالعزيز:......

راغده كملت: خايفة من كلام ونظرة الناس لك أن بنتك عانس وأن الزواج هو الستر , خلاص أنا بريحك من هالهم ..

أم عبدالعزيز: وألي تجيب بنت زيك تعرف كيف طعم الراحة ؟ ما يجي منك إلا المصايب والبلاوي , ما تأخذين شوري بشيء , تسوين ألي براسك وبس ..

راغده:........

أم عبدالعزيز كملت: تغيرتي بقوة , ماكنتي كذا من قبل من دخلتي الكلية وأنتي إنسانة ثانية ,
الآن برود لا مشاعر لا تعابير إنسانة بلا عواطف وأحاسيس , لو فعلا تهتمين لي , ماكان أتعبتيني كذا معك , خسرت أم صهيب بسببك ..

راغده: كل همومك بتروح بس أتزوج وين المشكلة ؟

أم عبدالعزيز: المشكلة أنك بنتي ..

راغده نقرت على الزر: نهلة تعالي ..

نهلة: حاضر طال عمرك ..
ودخلت نهلة : أمري طال عمرك ..

راغده: أريدك تورين الأستاذتين مها وريهام المكان ..

نهلة نزلت راسها: ابشري طال عمرك , تفضلــوا ..

مها وريهام قاموا بثقل , كانت تناظرهم لما تسكر باب مكتبها: مثل هالكلام ما حبيتهم يسمعونه ..

أم عبدالعزيز ببرود: وليه ؟ ما الكل عارف وأردده كل يوم ..

راغده: أنا مو فاهمتك , ليه مو مبسوطة أني خلاص بتزوج وراح ترتاحي ..

أم عبدالعزيز: طالمة تحبين واحد ليه ما قلتي لي ؟ وأحنا ندور لك كذا واحد ليه تخليني بهالصورة ؟
عاجبك كلام أم صهيب عنك ؟ كلامها جرحني وآذاني أن ليه معي بنت كذا .. ليه ما تصيرين مثل مها , مها أول ما يجيها خطيب كانت تحطني بالصورة ولو أقول لها لا تقول لا , حتى لما وافقت على زوجها د.حمود كان بعد ما أنا وافقت ..

راغده: وعشان كذا هي مو سعيدة , زواجها كان مجرد شكليات عشان وظيفته وأسمه ..

أم عبدالعزيز: لما تزوجت أبوك مات وأنا حامل فيك محد من أهلي قام فيني , قالو تزوجي راح أبوي زوجني بعد ما ولدت بموظف حي الله , حملت بعبدالعزيز وأنا كنت أطبخ وأبيع كونت نفسي بنفسي وبعدها تعينت مدرسة ثم صرت مديرة رافضة تعيشون زيي بيوم , ولما ربي فتحها علينا صرنا معروفين بالبلد تقولين يهمني الوظيفة والمركز ؟ ترى يجون خطاب طبعا بس لثروتك حتى لو ثروتك ماتعدت المليون ونصف , بس مستقلة ماديا ومعك فيلا ولا أيش يخلي رجال أعزب يتزوج وحدة مثلك إلا عشان فلوسك , تعبت وأنا أكون علاقات من الطبقات الألمعية وعشان نحافظ على هالطبقة ما تنزل تزوجي واحد صاحب مركز لزوم نعدد علاقاتنا تزوجي محامي أو مهندس أو لواء ..

راغده بنفس برودها الخارجي: وإذا ذول ما جاو أيش أسوي ؟

أم عبدالعزيز: ننتظر بس لا تتزوجي واحد تشقين معه ويشقيك وياه , أنسي كلام أم صهيب خلك في نفسك الزواج عمره ما كان تحدي قد ما هو أستقرار وراحة ..

راغده رجعت ظهرها لورى: ألي أنتي منتظره أنه يجي ما بيجي , خليني هالمرة أتزوج بدون تخطيط منك ممكن تضبط .. هالرجال صبر كثير عشاني ..

أم عبدالعزيز: ليه كان بحرب ؟ وين طول هالسنين ليه ما تزوجك لما كنتي بالعشرينيات ..

راغده: كان صغير والآن كبر ..

أم عبدالعزيز بصدمة: كيــف؟ قصدك بتتزوجي واحد أصغر منك أبو 19 سنة؟

راغده: مو لهدرجة يمه .. بس فارق العمر بيننا مو كبير مرة ..

أم عبدالعزيز: تبين تجلطيني ؟ من وين جبتي هالوقاحة ؟

راغده قامت من مكتبها وبخطوات واثقة أقتربت من أمها

أم عبدالعزيز وهي تمسح وجها بيدها وتحاول تمسك غيضها: كم عمره ؟

راغده: ......

أم عبدالعزيز بصراخ: تكلمي ..أصغر منك بكم شهر ؟

راغده: 7 ..

أم عبدالعزيز رمشت عينها بسرعة وبراحة: الحمدلله ..

راغده قاطعتها: سنــين ..

أم عبدالعزيز تجمع الدم بعينها وأعطتها كف قوي: ألي مثلك حرام انه يعيش , تفــو عليك ..

خذت شنطتها وشناط بناتها وطلعت من مكتبها ..

راغده تغيرت ملامحها من برود لحزن " مو كل ذه عشانك يمه ؟ "

رجعت لمكتبها وجلست رن التلفون: هلا نهلة ..

نهلة: تريد شيماء تتناقش معك ..

راغده: بخصوص ؟

نهلة: بخصوص مدخول الشهر ألي طاف ..

راغده: أي نسيت , معليش خليها تدخل , وخلي أم حسن تجي تنظف مكتبي ..

نهلة: حاضر طال عمرك
.
.
.
بالمطعم ..
فرح: خلاص نبتدي صفحة جديدة ..

مريم: من أضفناها ما نزلت شيء بالسناب .. !

مروة: وش السالفة فرح ؟

فرح: مدري عنها ..

مريم بعجب: مو أنتي صديقتها ؟ والوحيدة ألي ظلت معها طوال هالسنوات ؟

فرح عقدت حاجبها: ومن قال لكم أني كنت متواصلة معها طوال هالسنوات ؟

مروة: وكيف خططتي وياها للعزيمة ؟

فرح: أنا كنت بالمستشفى وشفت أمها وأختها , وأخذت رقمي أختها مها وقالت لي راغده حا تنبسط بس تعرف أني قابلتك , ومن بعدها أتصلت بي راغده وهي تحدد معي موعد لمقابلتنا , بس أنا كنت كثير أأجلها أكتفي برسايل واتس , ولما قالت أنها بتعزمني على مطعم بحري قلت ليه يا فرح ما تشوفي أيش عندها وأيس سبب أصرارها .. والباقي أنتو تعرفونه ..

مروة بدهشة: يعني ماكنتي تعرفي عنها أي شيء إلا لما جينا وشفناها ؟

مريم: مو مهم الاهم , هي متفاعلة بالسناب ولا لا ؟

فرح: مو أنتو شفتو بنفسكم بالمطعم أني أخذت سنابها معكم ..

مريم بخيبة: ياربــي ..

مروة: تقربي منها وعرفي كل شيء منها لأن واضح معها كريمات وخلطات ..

فرح: صح تغيرت بقوة ما توقعاتها كذا , ممكن تأكل أكل صحي أنا إذا عزمتها بسألها عن كل شيء , أي يوم يناسبكم ؟

.
.
.
شافت باب غرفته مردود ودقت بابه وبصوت هادي: أزعجك ؟

طلال عدل جلسته: هلا نوال حياك حبيبي ..

نوال دخلت بهدوء , طلال بابتسامة: أي رياح طيبة دعتك لقدوم غرفتي ..

نوال بضحكة: ههههه وش عندك ؟

طلال: ولد فهد هبل بي بهالكراتين ..

نوال: ياربي يقر عينك بشوفة عيالك و.. " أدركت نفسها وجلست جنبه وبينهم مسافة بعيدة" سامحني طلال ..

طلال: على أيش ؟

نوال: سامحني أشقيتك معي , لا وظيفة ولا شيء .. محيت كل أحلامك ..

طلال: ما معي أي حلم ..

نوال: لا تكذب علي طلال , كان حلمك تستقر وتتزوج , وكنت تحكي لي عن كل شيء , والآن تقول ما معك حلم !

طلال مسك يدها: أنتبهي لنفسك وبس يا نوال , وش لك بهالسوالف ألي ما تودي ولا تجيب ..

نوال دمعت عينها طلال أحتضنها وبحزن: والله يا نوال شوفتك وأنتي بخير تسوى عندي الدنيا وما فيها ..
وإذا على العسكرية بلاقي وظايف أفضل والعسكرية على أي حال ما تناسبني وبعدين مو كل مرة تعيدي هالسيرة , 8 شهور متحمل كلامك , سامحني وسامحني ..
" وبمزح" ليكون ماخذه حلالــي ؟

نوال مسحت دموعها: الله يجبر بخاطرك يا طلال , ويرزقك ربي بالزوجة الصالحة ألي تساعدك وتساندك ..

طلال أكتفـى أنه يبتسم بصمت ..
.
.
.
نزلت من سيارتها وبيدها شنطة دبلوماسية وشنطتها الصغيرة إلا برنة الجرس ما أعارت أهتمام ودخلت بيتها إلا بوجها ماريان: ذا دور سنيورة ..

راغده على عجل: شوفي مين وقولي سنيورة راغده إز بيزي ..

وصعدت فوق وشلحت عبايتها وغيرت ملابسها لروب بيت مريح
عند باب الشارع ماريان: سنيورة راغده بيزي ..

نرجس أبعدتها: أقول توني شايفتها تدخل , كلا مشغولة هالسنيورة ..!

ودخلت البيت وماريان تحاول تمنعها : ناديها قولي لها سنيورة نرجس تبغيك ضروري ..

ماريان: أو ماي قودنس , أي تل يو سنيورة راغده إز بيزي ..

نرجس: طلعه من هنا مابطلع إلا بوجود هالسنيورة ..


وهي عند التسريحة تمسح مكياجها تسمع صوت نرجس تحت: أستغفر الله شكل شوفتي لهالملفات ما بتتم إلا بطلعة الروح , وش جيبها ذي ؟ لا بالدوام ولا ببيتي بفضـى .. " جات بتعطر ملابسها وقفت" لا لا ما ينفع كذا معها لزوم البس شيء أكبر ..
أنتظرتها نصف ساعة نرجس تشوف ساعة الحائط: أووفـ وش تسوي ذي , أقول مدري وش أسمك روحي نادي السنيــ ...
إلا تسمع صوت كعبها على الدرج أنفجعت من شكلها
كانت لابسة قميص نوم أسود علاق لتحت الركبة وفوقه كارديغن تايقر ويبان كتفها العاري ..
ورابطته من نصف خصرها بشكل مبهدل وريحة عطرها وصلت لعندها ولابسة كعبها : هلــو نرجس ..

نرجس تتفحصها من فوق لتحت , راغده تخصرت وبغرور:عاجبك شكلي؟

نرجس حست بنفسها : بس ما توقعت أنك بتنزلين لي كذا ؟!

راغده: هذا ألي يجي بدون موعد , يتحمل يشوف هالمنظر ..

نرجس " وقحة ": أخبارك بعد يوم الخميس ؟

راغده: ليه وش صار يوم الخميس ؟

نرجس: نسيتي ولا أذكرك ..

راغده: لو أنه مهم ما كنت نسيته , أمري ؟

نرجس تريد تغيضها: أم صهيب كلمت أمي خطبتني لولدها ..

راغده: برسل لك بطاقة تهنئة مع بوكية ورد , كافي ؟

نرجس بقهر: وش هالبرود ألي معك , بعد ألي صار لك عادي ؟
مو هامك شيء عادي عندك أخذ صهيب ؟

راغده ناظرتها 5 ثواني ثم فطست ضحك: هههههههههههههه

نرجس بقهر: ما أظن أني قلت شيء يضحك !

راغده: كلامك هو ألي يضحك , من قال لك أني أريد صهيب أو حاطه عيني عليه ..

نرجس: بس أنتي قلتي لأم صهيب أنك تقدرين تخلينه يتمسك فيك وغصب عنها !

راغده حطت رجل على رجل وبصوت أربكها: ليـه أنتي خايفة أني أخذه منك ولا أيش ؟

نرجس بربكه: لـ...لا بس جيت بقول لك لو خاطرك فيه بخليه لك ..

راغده: ليه هي لقمة متنقصتها لي من القدر ! شايلة همي مرة يا أستاذة نرجس ! وعشان أطمنك أنا بنفسي إلي رشحتك لأم صهيب عشان تزوجك لولدها ..

نرجس بصدمة: تكذبين !

راغده: لو مكذبتني روحي أسالي أم شاكر وأسالي أم صهيب كانها صادقة بتصدق بتقول أي ..

نرجس: وليه رفضتيه ..؟

راغده: أسالي أمه ..

نرجس: ما جيتك عشان أسال أم صهيب , جيت اسالك أنتي ! كنتي تتهامسين وياها بالمجلس وجها قلب ليه وش صار ..؟
راغده: جيتي لشخص الخطاء , أنا فعلا سألت عنه قبل لأروح لجمعتكم , وطلعت ما يناسبني بس ممكن يناسبك !

جات مريان وقدمت لهم العصير بأكواب فاخرة ..
نرجس: بحق الجيرة قولي لي وش عيوبه ألي أنتي تعرفينها ..

راغده مدت لها الكأس وخذت كاسها وضربته ببعض: بصحتــك ..

نرجس بنفاذ صبر: راغـــــــــده !

راغده رفعت جوالها بيدها الثانية و أتصلت بنهلة وحطته سبيكر: هلا طال عمرك ..

راغده: معي شغل يوم الثلاثاء هذا الأسبوع ؟

نهلة: دقيقة من فضلك , أي معك شغل مع المنسقة إجتماع مع الطاقم حول مدخول الشهر ألي طاف ..

راغده: ويوم الربوع

نهلة وهي تتصفح الأوراق: أممم , مامعك أي موعد ..

راغده تناظر نرجس: يناسبك يوم الربـوع ..

نرجس بعدم فهم: حق أيش ؟

راغده: خلاص نهلة أحجزي موعد مع نرجس..

نهلة : على كم الساعة ؟

راغده تناظر نرجس: 8 زين ..

نهلة: أي أوامر ثانية طال عمرك

راغده: بحفظ الله "وسكرت الخط"

نرجس :!!!

راغده تشرب العصير: خلاص حجزت لك موعد يوم الربوع على الساعة 8 , في حالة أعتذارك عن الموعد بلغيني قبلها بـ 3 ساعات , تمام ؟

نرجس بذهول: أنتي مريضة ؟

راغده: و طالمة عارفه أني مريضة , جايتني ليه ؟ و جايه للمريض تسألينها عن خطيب هي رافضته ! ليه ؟

نرجس: أحسك مو طبيعية أبدا .. مفكرة حالك Boss ولا مديرة أعمال عظيمة ألي الدقيقة عندها بالملايين ..

راغده بنظرة حادة: أنتي وش تبين مني نرجس ؟

نرجس: أريد أعرف سبب رفضك لصهيب ..

راغده قامت وأعطتها ظهرها وبيدها الكوب تحرك به وتدق الثلج على كوبها: نرجس عمرك ما تقبلتيني ولا حبتيني سهل جدا أني أشوف هالشيء , بتصرفاتك ونظراتك تقدرين تنكرين أنك مبسوطة بخناقي أنا وأم صهيب ؟

نرجس بلعت ريقها: السالفة سوء فهم ..

راغده: ســوء فهم ! هذا رد ما توقعته نهائي .. ليه نلف وندور يا نرجس بس لو هاللعبة تريحك أبشــري بجاريك فيها والمستخبي حا يبان , ولكم من الوقت حاتصبرين , مو كثير .. تقدرين تنصرفين لأني مشغولة , أستأذنك ..

وصعدت فوق وتركت نرجس بصدمتها , سكرت باب غرفتها وقفلتها وفتحت رباط كارديغان التايقر ورمته بالاريكة وفتحت الشنطة وطلعت الملفات
وفتحت كل ملف وحطته بجهة بعيدة عن الثاني وهي تشوف وتقارن بين هذا وذاك: الرابط المشترك بينهم ذول أنهم بسن الـ 28 , آممم من أختار ؟!




آنتهــــــى البـــارت

[لامارا]

البارت الرابــــع



صحـى على أتصال ورد بدون ما يشوف وبصوت ثقيل: نعـم ..
: مساء الخير , كيف حالك طلال ؟

طلال: مين ؟ " ناظر بشاشة جواله وفز من مكانه" هلا هلا أبو حسن , كيف حالك عساك طيب ؟

أبو حسن: الحمد لله , علومك ؟ وكيف هي صحتك ؟

طلال: الحمد لله , من زمان عنك ..

أبو حسن: أنا ما نسيت صوتك وأنت نسيتني ..

طلال باحراج: السموحة أخر محادثة بينا كانت من مدة طويلة" وهو يحاول يتذكر" ممكن 5 سنوات ..

أبو حسن: مشغول بعد ساعة ؟

طلال: افضـى عشانك ..

أبو حسن: حياك بمقهـى #### فاكره ولا أرسل لك الموقع ؟

طلال: لا فاكره أفا عليك بس ..

أبو حسن: أنا بانتظارك .. لا تبطي ..

طلال: الآن ؟!

أبو حسن: أي نعم ..

طلال طلع من غرفته وتوجه للحمام: طيب أبشر ..

ميس وهي تشوف مستعجل: بسم الله , وش بك ؟

طلال وهو يفرش سنونه: جهزي لي ثوبي بسرعة , الله يخليك , بقابل شخصية مهمة بالنسبة لي ..

ميس بفضول: مين ؟

طلال طلع من الحمام: فاكره أبو حسن؟

ميس وهي تحاول تفتكر

طلال يطلعها من الغرفة: السالفة مطوله شكلها بس أرجع من البيت ببلغك ..

ميس: طيب , طيب ..
.
.
بالواتس آب , بالقروب ..

فرح: ليه كل هالحماس ؟

مريم: يا ربي منك جاوبي ردت ولا ؟

فرح: أنا من أمس أتصل ما ردت علي .. شكلها مشغولة ..

مريم: أي شغل وألي يرحم والديك ما غير بالبيت لا شغل ولا مشغلة ..

مروة: وليه مو ممكن هي تتعمد أنها تطنشك !

فرح: سلامات ! ترى السالفة ما خذت لها وقت وتو قبلت انتظروا شوي , زي ما صبرت علي 3 شهور وتو قبلت عزيمتها معكم نصبر عليها وش ورانا ؟

مروة: وليه ما قبلتي عزيمتها بسرعة مو حضرتك تدافعي عنها ؟

فرح: كنت تعبانة نفسيا ..

مروة ومريم: سلامتك أيش فيك ؟

فرح: والله أعصابي متوترة ومشدودة تعبت من العلاجات عشان الحمل ..

مريم: جربتي أعشاب ..

فرح: جربت كل شيء ما غير زاد وزني على قلة سنع , ولما تركتهم الحمد لله رجع وزني السابق ..

مروة: أقري سورة البقرة يوميا ممكن حسد أو عين و أنفثي بجسمك كامل بعد ما تختمي البقرة ..

فرح: رحت لشيـخ شخصيا ما فيني شيء وأقرأ قرآن , بس جواد وش ألي يفهمه أنه على كتبه ربي ..

مروة: أي هذا هم الرجال نفسهم وبس ..

مريم: هذا زوجي يحن علي أحمل وأنا الوحام متعبني مرة زين وجبت له 2 ..

فرح: محد مرتاح بحياته يا رب أنك تعين ..
.
.
.
وبالمقهــى ..
أتصل عليها : هلا طال عمرك أنا الآن أنتظره بالمقهـى ..

راغده: قول له ألي يريده أنا حاضره به , ووصـه علي ولا تحسسه أني أنا ألي أريده كأنك أنت ألي تشور عليه الزواج بي وأنك ما بتشوف أفضل منه ..

أبو حسن: وإذا كان خاطب أو عاشق خبرك هالأيام ذي حتى البسه تعشق ..

راغده: تصرف , ولك الحلاوة ..

أبو حسن يشوف طلال من بعيد: أي , الآن شفته أتواصل معك بس أخلص منه ..

راغده: الله معك ..

أبو حسن قام وصافحة: تعجبني دقتك ..

طلال: إن شاء الله ما تأخرت عليك ..

أبو حسن: لا أبد توني وصلت , علومك ؟

طلال: الحمد لله كيف حالك وكيف هي صحة خالتي أم حسن ..

أبو حسن باستغراب: الحمد لله من وين تعرفها ؟

طلال: ما أنسى وقفتها معي وأنا أدرس الكلية ..

أبو حسن: كيف ومتى ؟

طلال: مو هي زوجتك ألي مسويه الحملة ؟

أبو حسن بابتسامة: لا .. لا ..

طلال: أنا متوكد أنها زوجتك لأن عملية التحويل كانت تجيني بـ أسم حرمة ..
أبو حسن: وش أسمها ؟

طلال: راغده ناصر ..

أبو حسن: وهذا ألي جايك عشانه ..

طلال: تبشر يا بو حسن , وش تأمر به ؟

أبو حسن شرب قهوته: ليه للآن ما تزوجت ؟

طلال:......

أبو حسن كمل: شاب وسيم مثلك وش ألي يعيقه لزواج ..؟

طلال: خبرك فيني من سنين , أنا توظفت بالعسكرية وبعد سنتين فصلوني ..

أبو حسن: أفا ! وراه ..؟

طلال: سافرت مع أختي للعلاج وعلموني أنهم فصلوني ..

أبو حسن: لا حول ولا قوة إلا بالله العلي العظيم , طيب وألي يقول لك أنه بيضمن لك الوظيفة والزواج والبيت ..؟

طلال بفرحة: كيـف ..؟

أبو حسن: أنا معي لك بنت خوش بنت , ما معها أي عيب ..
ومن مدحي لك هي أعجبت بك , ما معها أي شروط غير أنها تريد رجل خير لا يدخن ومحافظ على صلاته ..

طلال بحماس: بس ؟

أبو حسن: حتى المهر هي متنازلة عنه , البنت ذي واصلة معها فلوس وربي أغناها , بعد وفاة أبوها خذت ورثها و استثمرته وكونت لها شغلها وبيتها الخاص ..

طلال: ما شاء الله ..

أبو حسن: وزوجتي أم حسن ما غير تسولف لي عنها وعن حسنها كل شيء كامل بس تريد ألي يتزوجها ..
تو سكنت ببيتها بـ ارقى الأحياء بالخبر بس ما بعد يجي نصيبها ..

طلال باستغراب: ووش ألي فكرك بي طوال هالسنوات ؟

أبو حسن: لأنك أصيل وشهم أنا ما كذب عليك وقع عيني على أثنين من هالحملة ألي سوتها راغده ناصر , الأول أجريت معه مثل هالمقابلة ولا ارتحت له واضح أنه مو رجال , ويدخن ..

طلال باعتزاز: الله يجزاك خير ..

أبو حسن " وعرفت كيف أكذب عليه هههه أجل ضمنت الحلاوة ": وش قلت ؟

طلال: خلنـي أفكر , أنا للآن مو مستوعب ..

أبو حسن: وين تحصل لك مثل هالعروض بالحياة ؟ يا بــلاش ..

طلال: صادق بس أنا هم وراي أهل لأبد أعلمهم , ونسأل عن البنت أكثر , ذه زواج مو لعبة يا بو حسن ..

أبو حسن: من حقـك وأي سؤال أنا حاضر به ..

طلال: هي من بنته ؟ كم عمرها؟ ووش تشتغل ؟ عطني كل المعلومات عنها ..

.
.
.
أم عبدالعزيز بقهر: أي معلومات ألي أسال عنها يا مها ..

مها: كان قلتي وش يشتغل مو تتفلي بوجها وتطلعي من المكان ممكن صح أصغر منها بس ممكن واصل أو زين لها << واصل يعني معه فلوس ومكون ثروة

أم عبدالعزيز: وش يقولون الناس عني يا مها , وأعضاء الجمعية أيش بقول لهم ..

مها: بس هالرجال يحبها صبر هالسنوات وأختي ما فكرت تتزوج غيره آيش يعني ؟

أم عبدالعزيز تفرك يدها وبنفس قهرها: يعني أنها تريد تجلطني , طالمة تحب واحد ليه ما علمتني أنا أخطب فيها من كثير وبالأخير تطلع معها واحد تحبه ؟ ليه ظلت ساكتة ؟

مها: أعتقد ممكن ما كون نفسه وبس كون نفسه خطبها ..

إلا بدخله أبو عبدالعزيز: السلام عليكم ..

أم عبدالعزيز ومها: وعليكم السلام ..

أبو عبدالعزيز: جهزوا الغداء حدي جوعان ..

مها قامت: أبشر ..

أبو عبدالعزيز لاحظ قلقها: وش مهببه به بنتك ؟

أم عبدالعزيز: وكيف عرفت انها بنتي !؟

أبو عبدالعزيز: لأن محد شاغل لك بالك إلا هي خصوصا هالأيام ذي ..

أم عبدالعزيز :مدري وش أقول لك يا فؤاد , شيء يفشل ..

أبو عبدالعزيز: كل شيء متوقعة من بنتك لا تحاتين قولي ..

أم عبدالعزيز: تريد تتزوج واحد أصغر منها بـ 7 سنين ..

أبو عبدالعزيز: وهو زين ؟

أم عبدالعزيز: أشوف كأنه جاز لك ؟ أقول لك أصغر منها بـ 7 سنين ..

أبو عبدالعزيز: أي ووين المشكلة ؟ لو هو زين و كفو وقادر على الزواج خلاص ..

أم عبدالعزيز: وين كلامك قبل تقول لابد نزوجها واحد له منصب عشان نوسع دوايرنا وتكون لنا كلمة ومعارف ..

أبو عبدالعزيز :ذاك قبل سنين لما كانت بنتك بسن زواج مبكر الآن هي متوخرة مرة وزين وكثر الله خيره أنه شاري بنتك ..

أم عبدالعزيز: بس يا فؤاد ..

أبو عبدالعزيز: ما يخالف نتنازل أحيان عن معتقداتنا عشان عيالنا , لا تزعلين مني بس هذا الصدق , لو الرجال زين وكفو خلاص , لو طافها الزواج لا يطوفها الأنجاب حلو لكبرت بالعمر يكون معها ولد أو بنت جنبها , منتي ضالة طول عمرك معها , شوفيها أنعزلت وأنتقلت لبيت لحالها يدل أنها تريد تتزوج وجاها بلاء , تتمنى تعيش ببيت لحالها مع زوجها , ممكن تأثرت بحياة صاحباتها أو أختها مها , من حقها أنها تتزوج ألي تبغاه طالمة هو زين ..

أم عبدالعزيز:........

أبو عبدالعزيز: وكـافي دقة الناس لي بالهرج , هذا وهي مو شايلة أسمي لو شايلة أسمي تعتقدي أنهم بيخلوني كذا الناس ؟

أم عبدالعزيز: أنا بنتي واثقة بأخلاقها ومستحيل تسوي شيء من هالشيء ألي ببالهم ..

أبو عبدالعزيز: وأنا بعد واثق بس الناس مالهم إلا الظاهر و طالمة أنها تو منتقلة هالشيء لصالحنا ونزوجها ونفتك من القيـل والقال ..
حاولي تتصالحي مع أم صهيب أخاف أنها تأثر بـ أبو صهيب , هو رجال كفو ولا أريد أخسره وبيننا مصالح مشتركة ..

مها دخلت: يبه الغداء جاهز ..

.
.
.
أبو حسن: أشوفك سكت ..

طلال: ما أدري وش أقول لك ..

أبو حسن: مو مشكلة لا ترد الآن فكر ورد علي الآن , بس لو كان جوابك سلبي راح تضيـع فرصة عمرك ..

طلال " يقول على كيفي وأسلوبه يدل أنه بتأخذها غصب ":...........

أبو حسن: أنا ما كنت أحلم بهالفرصة ولا جاتني الحمدلله لكن أنت جاتك وش له ترفض ؟

طلال: أنا ما رفضت ولا وافقت بس هذا موضوع محتاج لتفكير ..

أبو حسن: أنتظر ردك بكره ..

طلال: وراك مستعجل ..؟

أبو حسن: خايف أنها تروح عليك أني أعزك يا طلال مثل معزتي لحسن , البنت كفـو ..

طلال: في نظرة شرعية ..؟

أبو حسن: ما بعد أتطرق لهالأسالة ..

طلال: المعذرة أنت وش تقرب لها ؟

أبو حسن: ما بيننا صلة قرابة , بس هي سالفة قديمة مرة , كنت سواق للكليات وكنت أطلب عونيات وهي ما كانت تقصر معي بأي شيء .. وجابت لي وظيفة ووظفت أم حسن الله يجزاها خير ..
وين بتلاقي وحدة مثلها ومثل أخلاقها .. وأنت طيب والطيبون لطيبات ..

طلال: ووحده مثلها وش لها بواحد مثلي أنا ؟ كان بإمكانها تتزوج واحد أفضل أقلها منصب , وزي ما أنت شايف ما معي شيء أقدر أكرمها به , وممكن ما تقبل بي ..
& & &

راغده: يعني شنـو ؟

أبو حسن: الرجال مو مقتنع ويريد يعرف سبب رغبتي بالزواج منك ..

راغده: ما شرحت له ..؟

أبو حسن: إذ أنا بنفسي مستغرب رغبتك بالزواج منه ! ألي مثلك سهل أنك تأخذي واحد اكفـئ منه ..

راغده بصرامة: أرسل لي رقمه بالواتس آب ..

وسكرت الخط وقامت من مكتبها وضمت وجها بيدها: وش الحل الآن ..؟ واضح أنه مو سهل جدا , كيف أقنعه الآن بالزواج مني ! لو قلت له الحقيقة هم ما بيقتنع أستغفر الله ..
توجهت لمكتبها ونقرت زر الهاتف: نهلة تعالــي ..

دخلت نهلة: آمري طال عمرك ..

راغده: كيف تقدرين تنقنعين أحدهم بفكرة ودك فيها وهو مش مقتنع فيها !

نهلة: أشرحي أكثر ..

راغده: أقصد كيف تجذبينه وتزرعي براسه فكرة هو مو مقتنع فيها رغم وضوح الأسباب ..!

نهلة: التفاهم والتوضيح وإيجاد نقاط الضعف ..

راغده: ما فهمت !

نهلة: لو تزرعي برأس أي أحد فكرة هو مش مقتنع فيها مستحيل بيسويها إلا أن كان غبي ..
تفاهمي وأعرفي سبب رفضه , وضحـي له سبب رغبتك بالفكرة وإذا رفض لزوم تعرفي نقاط ضعفه و أستخدميها لصالحك بقبول الفكرة ..

راغده: ......

نهلة: كل شخص معه نقاط ضعف , حاولي تعرفيها ..
راغده" وكيف أعرف وأنا ما معي علم عنه وتقابلنا مرة بالصدفة ومن ذاك الوقت ما غير صورته فقط بالملف , وأبو حسن ما يقدر يلزم عليه أكثر طالمة مثل ما قال لي أنه يمدحني كثير وذاك ما هزه شيء "

نهلة: تأمرين بشيء طال عمرك ؟

راغده: شكرا لك , انصراف ..

ورجعت قامت من مكتبها وصارت تمشي وهي تفكر " ممكن أبو حسن ما عرف يوصلها له بالطريقة الصحيحة , ممكن أنا أبالغ بالتفكير والشيء فعلا بسيط أنا بتفاهم معه بكل شيء "

.
.
.
كان سرحان ضربت رأسه بالمخده : ما قلت لي من ذه أبو حسن ؟

طلال عدل جلسته: هذا الوسيط بيني وبين صاحب هالحملة لدعم الشاب السعودي الطموح والمكافح ..

ميس كأنها تذكرت شيء:اااييي فاكرته , زمان عنه وش فكره فيك ..؟

طلال: أتوقع وصل له علم عن فصلي وحب يساعدني ..

ميس: حلو فيه الخير والله ..

طلال: بس هالمرة غير بقوة , تصوري يريد يزوجني ..

ميس: كيف يزوجك وهو عارف أن ما معك وظيفة !

طلال: ألي فج عقلي أن ألي بيزوجني أياها وحدة واصله لها دخلها الخاص امرأة أعمال مو بحاجة لي أصلا , وفوق ذلك البيت والحرمة جاهزين بس علي الموافقة !

ميس:مو جايز أن سالفة الحملة ذي كذب ..

طلال: كيف ؟

ميس عدلت جلستها : أقصد حملة وهمية قصدها أنها تتقرب منك يعني هي كانت تحبك زمان بس قررت تساعدك عن طريق حفظ كرامتها ..

طلال: ما فهمت !

ميس: أحنا معشر النساء نستحي نبدأ بالأعتراف بالحب وبعدين مو ممكن هي ألي موصية أبو حسن بعرض الزواج منك وجايز عرفت وقفتك مع نوال وأعجبت بك ..

طلال بأعجاب: من وين جبتي هالفكرة ذي !؟
ميس: واضحة يا طلال ..بس ألي مخليني أفكر كثير أن وينها كل هالسنوات ذي كلها ! مو ممكن تو تدري عن وقفتك مع نوال أو ممكن هي من النوع ألي تريد رجل كفو يكون أب عيالها مستقبلا ..

طلال بإقتناع بتحليل أخته: صحيح ما فكرت فيها ..

ميس: نصيحة مني لك يا طلال , أقبل عرض أبو حسن ..

طلال: في شيء ما قلته لك , هي عمرها 33 سنة ..

ميس فتحت عينها كا ردة فعل: وليه ما قلت من أول , الآن أتضحت المسائل ..

طلال: وش يالمحقق كونان ..

ميس: شوف تحليلي وأنت براحتك , هي ما تزوجت من قبل لأنها ما تريد تأخذ واحد مو كفو قالت أنتظر لما يجيني الرجال الصح ولما سمعت بموقفك مع نوال ممكن سمعت من جهة عملك والله أعلم ثم أعجبت بك وبشهامتك , وقالت هذا الأب المناسب , والشريك الصح لحياتي ..

طلال هز رأسه بالإيجاب: أممم ..

ميس: وهي وصلت لعمر ما يجونها عرسان إلا لمصلحة , طالمة معها فلوس خلاص , فا قررت أنها تختار شريك حياتها بنفسها .. وأترك أسراء عنك ما وراهم إلا الفقر بس هالبنت بتعيش معها حياة كريمة ..

طلال: طيب ..

ميس: وأنتبه تعلم أمي بهالسيرة أو أبوي وخل خالتك شريفة تخطبها لك أو مع أهل أبو حسن ..
" مدت لها الجوال" خذ أتصل فيه وقول أنا قابل بعرضك ..

طلال: لا خليها بكره , ما أريد أبين له أني سهل المنال , مو بالساهل تلاقي حرمه تخطبك ..

ميس فرطت ضحك: أنقلبت الموجة يعني ! ههههههه , أي من حقك يا عريس والله والدنيا ابتسمت لك ..
طلال: مو ممكن تكون شينة يا ميس ؟ أنا ما معي أي معلومات عنها ..

ميس: أنت لما توافق على العرض لك حق أنك تطلب نظرة شرعية , وقول شروطك كلها ..

طلال: مو مشكلة بشوف بكره وش يقول لي أبو حسن ..

& & &

أبو حسن: أمهليني يومين بس وأنا أعرف كيف أقنعه ..

راغده: وإذا ما أقتنع ؟

أبو حسن: أتركي الموضوع علي , ولا تشيلي هم والموافقة بتجي لعندك ..

راغده: إذا تمت الموافقة إن شاء الله لي كلام معه ..

أبو حسن: أبشري طال عمرك ..

راغده: الله معك ..

وسكرت الخط رفعت شعرها وكملت رياضتها وصارت تجري ..

& &
أم نرجس تناظرها بالمراية: خلاص يا بنتي روحي لها ..
نرجس: أنا جاهزة أنتي جهزي نفسك ..

أم نرجس: أنا بس ألبس عبايتي وأطلع ..

نرجس ضبطت حجابها وخذت شنطتها وطلعت مع أمها مشي لعند بيت راغده , فتحت لهم الخادمة الباب ودخلتهم الصالة ..

أم نرجس بإعجاب: وش ذه كله , ما شاء الله تبارك الله البيت ولا غلطة , أقول نرجس إذا ربي تمم زواجك من صهيب قولي لراغده تصمم لك ..

نرجس: مو بالأول أعرف ليه هي رفضته , وبعدين أنا ذوقي أحسن من ذوقها ..

نزلت راغده على الدرج بعد ما أخذت الدوش ولبست فستان أسود طويل بأكمام طويلة و أكسسوارات ذهبية وبدون مكياج ..
أم نرجس: بسم الله ما شاء الله تبارك الله ..
راغده صافحت أم نرجس وبنتها وجلست وكتفها مشدود على وراء: أيش خاطركم فيه ؟ عصير قهوة شاي ؟

أم نرجس: ألي تشوفينه حبيبتي ..

راغده رمشت بعينها للخادمة والخادمة راحت ..

أم نرجس بابتسامة عريضة: الله الله هذه هي عيشة العز شفتي يا نرجس بعينها بس رمشت وهي فهمتها ..

نرجس بإحراج: خلاص يمه كأنك ما شفتي خير ..
أم نرجس: صدق لايق عليك أسم طويلة العمر , كذا هيبة بسم الله عليك ..

راغده أبتسمت بلطف: هذا بس من ذوقك ..

إلا يرن الجرس وراحت الخدامة تفتح ..
أم نرجس: منتظرة أحد ؟

راغده رفعت نظرها وشافت أمها مع أم صهيب ..

ناظرتهم بنظراتها الباردة ..
نرجس تغير معالم وجها وبهمس: يمه وش تسوي أم صهيب هنا ؟ ليكون مخبرتها راغده أن أحنا جايين نسأل عن ولدها ..؟

أم نرجس بنفس همسها: الظاهر كذا من نظراتها لهم واضح أنها تدري ..

راغده وقفت: أهليــن حياكم ..

أم صهيب نظراتها بإعجاب شديد لبيت راغده كانت واضحة للجميع ..
جات ماريان وقدمت الشاي مع كيكة الشاي ومكسرات وفصفص ..

أم عبدالعزيز: كنتي تعرفين أني بجي ؟

راغده: لا !

أم عبدالعزيز تناظر لعدد الأكواب والصحون ..
راغده فهمت نظرات أمها: أول ما شفتكم جايين قلت للخدامة أنها تزيد ..

أم عبدالعزيز بذهول: متــى ؟

أم نرجس: بنتك تتعامل معها بلغة العيون , ما شاء الله عليها شغل عدل ..

راغده ناظرت بـ أمها : متعودة على زيارتك المفاجأة الدايمة لي ..

أم عبدالعزيز بتريقه: وعسـى بس ما أزعجتك ..

راغده: تضيف لي أكشن وحماس ليومي , ما تزعجني نهائـي ..

أم صهيب تناظر أم نرجس ونرجس: كيف حالكم ؟

ردو بتردد:ا..الحمدلله طيبين ..

راغده: معك علم أنهم جيراني ..؟

أم صهيب: أي مو من مبطي ..

راغده: استأذنكم شوي ..

أم عبدالعزيز لحقتها بعد دقيقة: بروح الحمام أعزكم الله ..
ولحقت بنتها لداخل ..
أم عبدالعزيز: الشيء الوحيد ألي يعجبني فيك هو فهمك لنظرات آيش تعني ..

راغده بنفس نظراتها الباردة: للي سبـق وتعاملت معهم فقط ..

أم عبدالعزيز: أسمعي بنتي , عمك فؤاد يريدك تستسمحي من أم صهيب على ألي جرى بينكم ..

راغده: وآيش ألي جرى ؟

أم عبدالعزيز: لا تستغبي كلش مو وقته , لأن شوي وبتجي أم شاكر وأم علي لهنا ..

راغده بابتسامة باردة: بيصير جمعة الأعضاء الأساسيات هنا ؟ ما قلتي لي ! كنت جبت شيء يبيض الوجه ..

أم عبدالعزيز: مو مهم قد ما هو مهم أنك تعتذرين منها ..

راغده: وآيش ثاني ؟
أم عبدالعزيز بغرابة: يعني عادي ؟

راغده أخذت جوالها وأجرت أتصال لأبو حسن يجيب لهم عشاء على الساعة 9 ..

أم عبدالعزيز: من هذا ؟

راغده: شخص أعتمد عليه بمثل هالمهمات ..

أم عبدالعزيز: راغده وش جرى لك !

راغده: الضيوف ينتظرون ..

أم عبدالعزيز: وقفـي ..

راغده وقفت بدون ما تلتفت ..

أم عبدالعزيز بصرامة: ما خلصت كلامي ..

راغده بنفس وضعها: يمه , لما يروحون الضيوف ..

وتوجهت لصالة ولحقتها أمها ..
راغده: أعتذر على التأخير ..

أم صهيب ألي تناظر راغده وتتفحصها من فوق لتحت ..

راغده حست بنظراتها بس ما ناظرتها .. وسكبت لها بكوبها الزجاجي الأنيق بيرة وثلوج , كانت تحب تملئ الكأس لأقل من المنتصف وهي تستمع لحديثهم وكلامهم ..

أندق الجرس وراحت الخادمة فتحت الباب
دخلت أم شاكر وأم علي بنفس نظرات الجميع ألي مليئة بالأعجاب لتصميم بيتها وديكوره , كان هذا الشيء ألي تفتخر راغده به ..
أم عبدالعزيز: والآن تجمعنا و ألتمينا ..

راغده فهمت مغزى كلام أمها: بسم الله والحمد لله وعلى بركة الله
اللهم صل وسلم على نبينا محمد وعلى آل وصحبه آجمعين ..

الكل: عليه الصلاة والسلام ..
أم عبدالعزيز " وش بتسوي ذي ؟ محاضرة !! "

راغده : شرفتوني وأسعدتوني بزيارتكم .. وطالمة الجمعة واللمة بمقصد التسامح أرجو منك يا أم صهيب تعذري ما بدر مني بيوم الخميس ألي طاف ..

أم علي ناظرت أم صهيب بذهول ..

أم صهيب: ما توقعت أنك بتعتذري مني بعد الكلام ألي قلتيه لي , أعترف أنك فاجأتيني واضح أن شخصيتك صعب التنبؤ فيها ..

أم عبدالعزيز " كأنها تقول أجتماع إدراي , يلا المهم أعتذرت وخلاص":والآن خلاص , صـافي يا لبــن ؟

أم صهيب بابتسامة: حليـب يا أشطه ..

أم علي ألي ماعجبها أن الموضوع وصل لصلح بسهولة: أفهم من كلامك خلاص ما بتتزوجي ؟

راغده:......

أم علي : أيــوا عشان كذا أعتذرتي , ما كان له داعي صراحة مسوية آكشن وبالأخير تعتذري ..

راغده أعطت أم علي نظرة وصغرت عينها: وش الي حارك أنتي ؟

أم علي تغير معالم وجها:......

راغده: تعيدين بالكلام !
آنتهى ألي دار بيننا بإعتذار وهي قبلت , إن كان معك مشكلة أن أم صهيب قلبها أبيض وكبير وسامحتني بسرعة روحي تصالحي مع نفسك ..

أم صهيب أعجبها كلامها , أم عبدالعزيز " طالمة تعرف تقول هالكلام الزين ليه تشيبين رأسي ؟"

أم علي لما ما شفت ردع أحد منهم لها بإحراج: لا يا راغده مو قصدي ترى بس حبيت أفهم سبب اعتذارك , يا حياتي ما بتتزوجي على آخر الشهر أجل ..!

راغده رجعت ظهرها لوراء ناظرت بكوبها وهي تحرك الثلج: أم علي ..

أم علي بلبكة: نــ..نعــم ..

راغده: أنا ما أدري وش ألي بينك وبيني عشان تكنين لي هالكره ذه كله , كل ذه عشان أني رفضت الزواج من أخوك ؟

الكل بصدمة ناظرو أم علي ..

راغده كملت: في شيء أسمه نصيب " وناظرتها بحده" ولا ما سمعتي به ؟

أم علي بلبكة: ههههه السالفة قديمة وأنا نسيتها للآن تفكرين فيها ..؟

راغده: لأن ما معك أي سبب يخليك تقلبين ضدي بشكل مفاجئ كذا ! وألي دايم توصلينه لي أن أخوك تزوج ومرتاح وكل فترة تنعاد , آيش يعني ؟ يا راغدة يلا أندمي وتحسري ؟

نرجس كانت تناظر راغده بإعجاب لقوة شخصيتها وجرأتها " ياليت أصير مثلك "

أم علي ردت بغيض: تقولين أن ما جاء ألي ببالك لحد الآن قصدك أنه ما أنخلق للآن ههههه أفهم أنه للآن هو ببطن أمه ..؟

أم عبدالعزيز: خلاص راغده وأم علي ترى السالفة مو بحاجة لهالقد ..

راغده: حلو .. يوصلك هالخبر الأكيد إن شاء الله , أني بتزوج نهاية هالشهر ..

نرجس بصدمة ناظرت أمها ..

أم عبدالعزيز:...هههههههه بنتي راغده يا حبني لها تدمج المزح والجد معليش يعني ..

راغده شافت جوالها وبصوت مسموع: ماريان بليز " وأشرت لها "

أم نرجس صفقت: الله الله , روعه يا رئيسة ..

الكل:!!!!

نرجس بإحراج: تقصد سرعة بديهة الخدامة ..
أم نرجس: لا , كنت أقصد راغده شوفي كيف ممشيتها صح من نظرة بس عرفت وش تريد معزبتها , لازم تعلميني ..

راغده: هي بالفطرة ..

أم نرجس: أي ما شاء الله عليك , شخصية قيادية ..

نرجس ما عجبها كلام أمها رغم أنها تأيده وتتمنى تكون مثلها ..

راغده قامت: المعذرة ..

ام عبدالعزيز: عن أذنكم ..

ولحقت بنتها لغرفة الطعام وبصدمة: أم علي خطبتك لأخوها ؟ من متى ؟

راغده وهي توزع الصحون فوق الطاولة: كنت متوقعة سؤالك ..

أم عبدالعزيز: جــاوبي ..

راغده: السالفة قديمة والرجال تزوج ..

أم عبدالعزيز: وليه رفضتيه بدون ما تشاوريني و تحطيني بالصورة ؟ أقلها يكون معي علم ..

راغده تحط الأكواب: متى الوقت ألي يناسبك ؟

أم عبدالعزيز: بكـره ..

راغده: بشوف جدولي كم الساعة ألي أكون بها فاضية بكره وأجيك ..

أم عبدالعزيز: ولا تغيري رايك ..

راغده: لو غيرت رأيي بتصل بك ببداية النهار ولا ناسية إن بكره يوم الخميس ؟

أم عبدالعزيز: ما نسيت بس اللمة مو ببيتي أنا ذاك الأسبوع الآن على أم شهد ..

ماريان توجهت لصالة: تفضلـوا على العشاء ..
راغده صارت تولع الشموع وتحط الأشواك والملاعق ..

دخلوا أعضاء الجمعية بغرفة الطعام منبهرين بكـل شيء من راغده ..

أم عبدالعزيز برزت صدرها لفخر من نظرات الأعجاب بتقديمات بنتها ..

نرجس جلست جنبها وبدهشة: مو على أساس ما تأكلي نشويات على الساعة 9 ؟

راغده ألتفتت لها: من قال أني بأكل ؟

نرجس: !!!
راغده حطت بصحنها سلطة الجرجير ودجاج مشوي مسويته بالبيت ..

نرجس: وليه ما قدمتي لي كذا قبل ؟

راغده: لأنك جارتي وبتكثر زيارتك لي , حبيت أكون على سجيتي ..
جاها إشعار برسالة نصية " طـال عمرك بيكون الرد بكره " وقلبت جوالها وصارت تأكل معهم

أم شاكر: الله الله عليك يا راغده فـن يا فن ..
كنت أتلقـى الكثير من الإعجاب ببيتي وبتنسيقاتي ممكن هذا هو الشيء الوحيد ألي أقدر عليه وبإمتياز ..


أنتهت الزيارة على الساعة 10:30 , صعدت فوق وشلحت الشبشب وغيرت ملابسي , فتحت درج الكومدينه وصرت أناظر بصورته: ليه تصعبها علي ؟ وافق خلاص ..
سرحت بشكله أبيض وملامح وجهه حادة حواجبه مرسومة وعوارض وبشعره الأسود الكثيـف
قاطع سرحانها

رن جوالها ردت: هلـو ريهام ..

ريهام بروقان: اهليــن حبيبة بدر ..

راغده تغير معالم وجها:.......

رايهام بحماس: خالـو بدر بيرجع ..

راغده بصدمة: آيش ..؟

سمعت صوت مها بضحك : حرام عليك تريدين توقفين قلبها من الفرحة ..

طاح الجوال من يدي وبفجعـة: وش رجعك !




انتهــــى البارت

[لامارا]

البارت الخـامس



ريهام: الــو الــوو ..

أم عبدالعزيز بفرحة: لزوم نسوي حفلة لرجوعه ..

مها بتفكير: مو شرط حفلة كبيرة يمه ..

أم عبدالعزيز: لا يمكن .. توه راجـع من الكويـت ومعه الشهادة ونسوي حفلة أي كلام ؟ بحجز استراحة وتصير هناك أفضـل ..

مها: ونعزم بنات عمي ..

ريهام: وأعزم صاحباتي ..

أم عبدالعزيز: أعزموا ألي تريدون ..

ريهام بحماس: كم باقي يوم ويرجع ..؟

أم عبدالعزيز: شهر كذا ويجي ..

ريهام: الحمد لله ..

مها : و راغده بتجي ولا بتطنش زي كل زيارة له لهنا ما تجي , بحكم الحالة تجيها ..

ريهام: ممكن مشغولة !

مها بنفي: قبل لما كانت تدرس لو آيش ماكان تكون متواجدة , كانت تزعل لو ما ينزل عندنا بالإجازات وفجأة كل شيء تغير , والحالة زادت عندها بس تشوفه ..

ريهام: كنتوا تسمونها حبيبة خالها بدر , الآن تعصب بس أقول لها كذا والآن سكرت الخط بوجهـي ..

أم عبدالعزيز: أختكم لو أنكم شايفينها اليوم تقولوا مو هـي نهائـي هي ممكن معها مرض تعدد الشخصيات لو تشوفونها بيوم الخميس ألي طاف كيف كانت قوية وتتوعد الآن قبلت أنها تعتذر لأم صهيب بسهولة بدون ما أقنعها بأي شيء .. !

مها: غامضة راغده , ولا مو ممكن الحالة جاتها عكسية هالمرة ..

أم عبدالعزيز: كل ما جيت أفتح معها الموضوع تنفعل ..

ريهام: تريدون أكلمها ..؟

أم عبدالعزيز: ما بتأخذي منها لا حق ولا باطل لما كنتي صغيرة كنت أحاول أكلمها ترفض رفض قطعي ..

مها بتفكير: ليكون ......

.
.
.
صارت تحوم وتدور بمكتبها

راغده بنفاذ صبر: أستغفر الله , كم الساعة ولا رد علي خبر ..

وبعد مرور نصف ساعة أتصل وردت بسرعة: بشـر !

أبو حسن: حاولت به وحاولت وبالمـوت وافق

راغده تنهدت براحة: الحمدلله

أبو حسن: بس شرط أنه يكلمك بأشياء عامة ومهمة تخص الزواج ..

راغده باندفاع: الآن بتصل فيه ..

وسكرت الخط وجلست بكرسيها ونقرت على الزر: نهلة لا تسمحين لأين كان يدخل حتى لو كانت أمي ..

نهلة: أبشري طال عمرك ..

أخذت نفس عميق و أتصلت برقمه رد على الرنة السادسة

راغده بلبكة: السلام عليكم ..

طلال بصوته الفخم: وعليكم السلام ..

راغده زادت ربكتها لما سمعت صوته رجعت خذت نفس عميق: آيش معك إستفسار وسؤال ..

طلال بتردد: تشوفين أنه مناسب بالتلفون ؟ ولا وجها لوجه ..!

راغده: آيش قصدك ..؟

طلال: أنا آسف بس أسال وش ألي يناسبك !

راغده: ألي يناسبني وآتس ..

طلال: طيب ..

وسكر الخط منها " صوتها كأنها وحدة كبيرة مرة , أبد صوتها مو حلو مدري وش وكيف يكون شكلها "

أنتبه لصوت رنة الواتس , جاء رقمها ودون أسمها وبتفكير : مدري وش أسميها , أممم بكتب عليها الدوام " ورد عليها السلام

راغده: قال لي أبو حسن أن معك إستفسار أيش هو ..؟

طلال: أنا مستغرب أن ما شاء الله كل شيء أوك معك بس تبغين تتزوجين واحد بدون وظيفة !

راغده: لفترة محدودة ..

طلال باستغراب: آيش ألي لفترة محدودة ؟

راغده: لأنك بتتعامل معي لابد يكون معك سرعة بديهة , أقصد لفترة محدودة بلا دوام ..

طلال: حا توظفيني ؟

راغده: أجل تصرف على نفسك وتعيش كيف ..؟ ألي سمعته من أبو حسن أنك ما تحب تعتمد على فلوس أبوك وهالشيء أعجبني وأنك كافحت لدخولك الكلية رغم ظروفك الأسرية تعبانة شوي ..

طلال " لا مو تعبانة ولا شيء بس مرت أبوي الله لا يوفقها تحرض أبوي علي ": ما خلا شيء ما قاله أبو حسن ..

راغده: لا تنسـى أني أنا صاحبة الحملة ..

طلال: أي صحيح , بينما هو ما علمني عنك شيء ! كل ألي علمني عن حياتك المهنية فقط ..

راغده: وش تحب تدري عنه ..؟

طلال: شكلك ..

راغده: شكلــي !

طلال: هذا زواج ولابد أعرف هل بتناسبيني أو لا , مثل ما أنتي لك حق تشوفيني بعد ..

راغده: وأنا ما عندي مشكلة نهائي بس حتى لو ماكنت بنفس ما طمحت الزواج بيتم ..

طلال: إجباري ؟

راغده: لا , بس أنا محتاجة الزواج يتم بسرعة ..

طلال " هههههه طلع كلامك صح يا ميس , واضح أنها عاشقتني ": بس أنا ما معي مهر ولا شقة ولا سويت شيء ..

راغده: لا تشيل هم , حسابك الراجحي نفسه ما ألغيته ؟

طلال: أي للآن شغال ..

راغده: أنا بحول لك مهري 30 ألف زين ؟

طلال: ألي يريحك , لأن هذا لك ..

راغده: لا هذه بتكون لك ..

طلال: ما فهمتك ..؟

راغده: أعتبر أنك سويت عمل خير لي , والبيت جاهز ..

طلال أستغرب منها: متى تصير الخطبة ؟

راغده: يوم الأحد ..

طلال: مرة قريب وأنا بعد ما أستعديت ولا بلغت الأهل ..

راغده: يمديك ..

طلال: 4 أيام فقط ..

راغده: أرجوا أنك توافق وتوعدني أنك تقنعهم في حالة رفضهم ..

طلال: ممكن أبوي وأخوي والبنات أما مرت أبوي ما أعتقد أنها بتحضر ..

راغده: مش مهم أنا يكفيني الرجال كـ خطبة رسمية ..

أتصلت راغده بـ أبو حسن: أمري طال عمرك ..

راغده: رح للخياط كومار وخذ معك طلال ..

أبو حسن: أبشري طال عمرك ..

سكرت منه وأتصلت بالخياط كومار تفهمه على ألي تريده ..

ورجعت لمحادثتها وقرأت وش كاتب " لو أبوي سألني وش سبب العجلة ومن وين لك الفلوس آيش أقول له ؟ "

كتبت له: أستاذ طلال رح مع أبو حسن , وأنا بتفاهم معك الليلة بس يخلص شغلي بالصالون ..
طلال" مداها كلمت أبو حسن وهي معي ": طيب ..

وصعد مع أبو حسن وتوجه للخياط كومار ألي دايم تتعامل معه عايلة أبو عبدالعزيز ..

كومار صار يمتر ويقيس طلال وصار يختار له أقمشة مختلف والأغلب كانت بيضاء على طلب راغده


أتصلت بـ ريهام: صدق خالي رجع ..؟

ريهام: ما خلتيني أكمل , على طول قفلتي الخط ..

راغده: طاح الجــوال مني ..

ريهام بابتسامة: لا تشيلي هم , أمي قررت أنها بتسوي حفلة أول ما يرجع من الكويت ..

راغده: يعني متى بيرجع ..؟

ريهام: بعد شهر ممكن ..

راغده بابتسامة: الحمدلله ..
& &
وبالمطعم يفطرون برا

أم صهيب: مهما وش كان يا أم علي كان علمتيني أنك خطبتي أخوك لها ..

أم علي: هالخبر ماله علاقة بألي صار ..

أم صهيب: بس كرهك لها واضح أنا ماكنت أدري سبب كرهك لها كان لهالسبب ..

أم علي تنهدت: أخوي زعل .. زعل كبير لما رفضته..

أم صهيب: ليه هو وين شافها ؟

أم علي : كنت أروح لعند عبير وياليت ما راح وخذني وشاف راغده نازلة من السيارة وتولع فيها , تعب وتعب يا أم صهيب وأنا تعبت معه , خفت اخسره بسببها ..

أم صهيب: ذه نصيب يا أم علي , وأخوك كأنه البخت ما مات ولا صار له شيء !

أم علي: حاولت أتقبلها من بعد ألي صار عجزت وأكبر فرحة لي أنها ما بتتزوج خلاص ..

أم صهيب: بس هي قالت أنها بتتزوج ..

أم علي: لو بتتزوج ما كان أعتذرت هي وأمها لك ..

أم صهيب: والله ما كنت بقبل الأعتذار لو ما أبو صهيب كلمني وحرص أني أقبل الأعتذار لأن المصالح مشتركة بينهم ..

أم علي تشرب كوب الشاي
أم صهيب: وإذا فعلا تزوجت يا أم علي , واضح أنها صادقة هالبنت صعب التنبؤ بطريقة تفكيرها ولا بشخصيتها ..

أم علي بذهول: أنتي تقولين هالكلام ! وين عبقريتك وتحليلك ..؟

أم صهيب: هالبنت تخفي شيء وشيء كبير , وهو سبب ورى شخصيتها كذا بس تقول لها أمها أعتذري راحت تعتذر أحسها غريبة !

أم علي بدات تخاف: ليكون مسحورة !

أم صهيب: كل شيء وارد ..

& &
لبست عبايتها وحجابها وطلعت من مكتبها , نهلة لحقتها
راغده: ألغي كل المواعيد لو في مواعيد وأجليها لبعد العصر ..

نهلة: حاضر طال عمرك ..

راغده: بتجي بشرى الظهرية أريد لها شغل عدل .. أعرف أنها صعبة الأرضاء بس سلكوا لها ..

نهلة: أبشري طال عمرك ..

ركبت سيارتها وتوجهت لبيت عمها فؤاد
فتحت الببت بمفتاحها ودخلت شافت أمها وخواتها

الكل ناظرها بصدمة..

ام عبدالعزيز تشوف الساعة مشيرة على الساعة 1:22 بخوف: سلامات آيش صاير ؟

راغده حطت شنطتها بالكنب وشلحت عبايتها: آيش تسوون ؟

أم عبدالعزيز: نطلب من المصممة إيمان ..

راغده تلعب بخاتمها : يمه قاصدتك بموضوع وعلى إنفراد

أم عبدالعزيز: قوموا شوفوا الغداء , يلا أبوكم على وجه جيه ..

راحت مها وريهام , أم عبدالعزيز باهتمام: وش صار ؟

راغده: راسلتني أخته تقول أن أخوها ما عاد عنده صبر ويريد يتزوجني ..

أم عبدالعزيز: ابو 7 سنين ؟

راغده: أي هو ..

أم عبدالعزيز: طيب يجون أهله ونتفق وين أمه تشوفك ..

راغده: يا عوينتي أمه ماتت من لما كان عمره 5 سنين ..

أم عبدالعزيز: من الوصي عليه ؟

راغده: أبوه عايش وخالته هي ألي بتتكفل بالجيه .. وأنا جيت عشان أخذ منك موعد يناسبك الليلة !

أم عبدالعزيز: الليـــلة !! وليه كل شيء صار فجأة وليه هالعجلة ؟

راغده: حتى أنا أستغربت بعد أخته تقول العراقيل ألي منعته من الزواج ما عادت موجودة الحمد لله ..

ام عبدالعزيز: خليها لبعد حفلة خالك وفرحتنا بالوصول له , ثم نشوف عريسك ذه ..

راغده بنفاذ صبر: يمه والله ما في وقت و خايفة العريس يروح من يدي ..

أم عبدالعزيز ناظرتها بشك , راغده بلبكه: يمه أنا خاطري أجيب ولد أو بنت

أم عبدالعزيز: سبحان الله من عمري ,انا أقول لك هالكلام تو تنتبهين له ؟ وينك عنه من زمان , عقلك كان مسافر وتو رجع ؟

راغده: كلام أم صهيب خلاني أفكر أكثر

أم عبدالعزيز: وراك أعتذرتي و أنتي بتتزوجين ؟

راغده: يمه أنا بتزوج مو عشان تحدي , لابد أستقر وأكون أسرة ..
أم عبدالعزيز: كلمي خالته مدري أخته يجون الليلة نشوف وضع ولدهم ..

راغده بحماس باست راس أمها: ما يحرمني منك يا رب ..

أم عبدالعزيز أستغربت من بنتها وكأنها تشوف راغده لما كانت 22 سنة , وبتأثر: تحبينه ؟

راغده:؟؟؟

أم عبدالعزيز: هذا أبو 7 سنين ..

راغده باستيعاب: مو واضح علي ؟

أم عبدالعزيز: إلا لدرجة أنك تركتي شغلك وجيتي هنا ..

راغده: أقنعي عمي فؤاد يوافق عليه ولا يعطل الزواج علي ..

ام عبدالعزيز: هو موافق عليه لو أنه حفار قبور..

راغده قامت: يلا أترخص ..

ام عبدالعزيز: ما بتتغدي معنا ؟

راغده: المرة الجاية إن شاء الله ..
ام عبدالعزيز توصلها لعند الباب : وكم بيجون ؟

راغده: بعد صلاة العشاء بيكون وقتهم ..

أم عبدالعزيز: أنا وراي جمعه ببيت شهد , ولا نسيتي الجمعية !

راغده: لا ما نسيت بس أمي هم كلها نصف ساعة و بيطلعون ..

أم عبدالعزيز: أجل خليها لبعد صلاة المغرب على الأقل يمديني أتجهز لطلعة ..

راغده: أوك أنا ببلغهم ..


صعدت سيارتها ولبست نظارتها الشمسية وحطت السماعة بإذنها: أبو حسن وينكم فيه ..؟

أبو حسن: طال عمرك تو خلصنا من الخياط والآن بالمطعم ..

راغده: بس يصعد سيارته أتصل فيني ..

أبو حسن: أبشري طال عمرك ..

وصلت لصالونها وهي تشوف الساعة: كل ذه غداء !

دخلت نهلة لها: طال عمرك الطلبية بتجي على الاسبوع الجاي ..

راغده: إن شاء الله يوم الأربعاء القادم يكون كل شيء جاهز ..

نهلة نزلت راسها: بالأذن ..

وجاتها رسالة" صعد سيارته الآن "
راغده: حلو

صارت تعض شفتها وتقضمها من الربكة" أخاف ما يتم بهالسرعة ويرفض , لا لا بتتم الأمور مثل ما أنا أطمح إن شاء الله "
وأجرت الأتصال

طلال حط السماعة :مرحبا ..

راغده: متى توصل البيت ؟

طلال: 20 دقيقة مع الزحمة ..

راغده: تمام ..

سكرت الخط
طلال: الـوو .. الوو ! سكرت الخط مدري وش وضعها ذي ..

دخلت نهلة : طال عمرك الآنسة بشرى تـ...

بشرى دخلت: أهلين ..

راغده قامت: هلــو بشرى

نهلة: أعتذر على هذا التسيب طال عمرك ..

راغده أبتسمت لها: لا تشيلي هم ..

نهلة نزلت راسها وطلعت وجلست راغده وأشرت لبشرى تجلس : تفصلي

بشرى: مالي إلا أدخل عندك قبل أسوي أي نيو لوك , من ألي صار ..

راغده: هو أنتي لسه فاكره ! من سنتين هالكلام !
والموظفة قدمت استقالتها خافت أنك تشتكين ..

بشرى وهي تتعلك: أي لان مو شعرك ألي حرقته .. حرق الله مصارينها ..

راغده: وش تشربين ؟

بشرى: ماي بارد وفيه ثلج , اليوم حــــر ..

راغده نقرت الزر: هاتي كوب ماي بارد وبه ثلج ..

نهلة: أبشري طال عمرك .
راغده التفتت لها: وش ناويه تجددين اليوم ..؟

بشرى:طال عمرك أريد لون رمادي تعبت من هاللون ..

راغده: إن شاء الله بس تشربين كوب الماء وننزل تحت وأنا بنفسي أوصي سالي عليك ..

بشرى بابتسامة عريضة: وأنا أقدر بدون توصياتك ..


أبو عبدالعزيز: زين .. وأخيرا صار الموضوع جدي .. أول ما تعرفي عن الرجال وتسمعي كلام أهله عنه بلغيني أسال عنه هذا إذا ما كانت بنتك سألت عنه وخلصت ممكن معها برنت عنه ..

أم عبدالعزيز: أنا بلغت خواتها يتجهزون , بنتي ما بتاخذ إلا شيء كفو وزين , أقول لك قالت أنه ميت عليها والآن راحت العراقيل ألي مسببه تأخير الخطبة و يا رب لك الحمد وأخيرا بنتي بتعرس , أنا نفسي أبط عين أم صهيب بط على ألي قالته عني وعنها يا أني نفسي أشفي غليلي منها ..

أبو عبدالعزيز: إن شاء الله مثل ما تطمحين ولا القيل والقال الكاثر عنها وعنا ..

& & &
دخل غرفته وفتح الواتس آب وكتب لها: أنا تو دخلت البيت ..
أنتظر 5 دقائق ثم كتب: وينك ؟

بعد 7 دقائق دخلت الواتس وكتبت: أنا فاتحت موضوعنا عن أمي ورحبت بالموضوع على أن خالتك أو أختك تجي اليوم بعد صلاة المغرب وتفاتح موضوع الخطبة ..

طلال: أنا أهلي حتى ما فاتحتهم ..

راغده: بسيطة قول لهم أن خالتك بتروح تخطب لك بنت أعجبت فيها ..
وأنت علم أهلك أن البنت ألي تحبها بتروح منك ..

طلال: ......

راغده:؟؟

طلال: بشوف خالتي وأرد عليك ..


أتصل بخالته ..
شريفة: هلا وغلا وكرتون حلا ..

طلال: هلا بيج يا خاله كيف حالك ..؟

شريفة: الحمدلله طيبة , طمني عنك ؟

طلال: متضايق حــدي ..

شريفة: آفا سلامات ..

طلال: فاضية ؟ أجيك بعد ربع ساعة ..

شريفة: أي حبيبي أفضـى عشانك ..

طلال: أوك , فمان الله ..

شريفة: الله معك ..

طلال رجع لسيارته وبقهر يتحلطم: ليه ما قالت لي من أول , بس خسارة بنزين أستغفر الله ..
وتوجه لبيت خالته , جلسته بالمجلس وصبت له الشاي : عسى خير يا بعدي ..؟

طلال نزل راسه: يا خاله أنا أحب بنت ..

شريفة بفرحة: أمي وأبوي أنت ومتى تريد أخطبها لك ..؟

طلال: اليـوم ..!

شريفة: من جدك ؟

طلال: هالبنت أحبها حب كبير يا خاله ما كانت راضية أني أتزوجها من قبل تقول أنا صغير عليها ..

شريفة: ليه كم عمرها ..؟

طلال: 33 سنة ..
شريفة: هذا الأختيار الصح مو مثل بنات اليوم ..

طلال: يعني أنتي شايفة أنه عادي ..؟

شريفة:طبعا عادي , ولا على الرجال حلال وعلى البنات حرام ! شوف شايب عايب يتزوج أم 19 سنة جات عليك أحين , أهم شيء أنت تحبها يكفي ..عاد البنت مزيونة " وبغمزه"

طلال " ماهقيت " : والله يا خاله ما شفتها أبد رغم أنها محجبة بس ما شفتها بمكان نهائي , البنت يا خاله خلوقة ومستورة ..

شريفة: ما شاء الله , عاد هي من بنته ووش أسمها ..

طلال: أبوها ميت .. مات من لما كانت ببطن أمها وبعدها أمها تزوجت بعد ولادتها وهي عايشة عند عمها زوج أمها ..

شريفة برقة قلب: يا عوينتي , يتيمة خلاص يبه أنت كون لها أب وهي تكون لك أم , وضعك ووضعها ممتاز الله يجمع بينكم ..

طلال: وتو البنت وافقت علي , خايف تروح مني ..

شريفة: وأنا جاهزة من أحين ..

طلال: لا خلا ولا عدم ..

شريفة بابتسامة: وأنا أقول ليه عايف بنات عمه , طلع الولد عاشق ..

طلال: بنت عمي جنان لآني بعاشقها ولا هي بعاشقتني , بس عمي أصر أخذها وهو بنفسه ألي رفضني .. و أسراء حب طفولة وقضــى ..

شريفة: زين زين , هالعايلة لا ترتبط فيها أكثر يكفي أنك شايل أسم أبوك ألي ما يتسمى , خذ لك من برا أرحم , يا ولدي لحم على لحم يخيس , خذ لك شيء طازج ..

طلال بهمس: على الله تكون طازجة ..

شريفة: ما سمعتك وش تقول ..؟

طلال: سلامتك ..


وبالسيارة كانت تناظر البيت من برا: ماشاء الله واضح أنهم من العوايل ألي فوق وفوق المتوسطة , متحمسة لشوفة راغده ألي حتى أسمها راهي ..

طلال يبين لخالته أنه عاشقها: خالتي ماهمني شكلها قد ما يهمني طيبة قلبها ..

شريفة: من نصيبك إن شاء الله ..

طلال:بس تخلصي منهم أتصلي بي ..

شريفة: أبشر ..

طلال أرسل رسالة لراغده ..

راغده وهي تسيح شعرها شافت رسالته وبقلبها تقول" يا رب يتم كل شيء مثل ما خططت له "
أندق الباب وفتحت الخدامة

أم عبدالعزيز بابتسامة: يا مرحبا , هلا بيج , نورتي الدار ..

شريفة: بنورك يا أم راغده ..

أم عبدالعزيز: حياك ..

وجاو مها وريهام وبعد السلام والتحية: ما شاء الله بناتك حلوات ..

أم عبدالعزيز بخجل: تسلمين كلك نظر , أجل وين خوات طلال ..؟

شريفة: تعرفي مرت الأب إذا منعت عيالها عن ولد زوجها ..

أم عبدالعزيز: آييي الله يعين , وكيف ولدنا ..؟ معك صورة له ..؟

شريفة فتحت جوالها: هذا هو ..

ريهام لزقت بـ أمها ..

أم عبدالعزيز وريهام بذهــول: ما شاء الله تبارك الله ..
ريهام بإعجاب: اللـــــه .. معه أخ .. ؟ أحجزيه لي لبعدين ..

أم عبدالعزيز بإحراج: ... هههههه بنتي ما تجوز عن مزحها ألي مدري كيف جاي " وبهمس" أقول يالمها خذي المطفوقة وطلعيها من هنا لا تفشلنا ..

مها سحبت ريهام وطلعت وياها من المجلس ..

شريفة بحماس: أجل وين عروستنا ..؟

أم عبدالعزيز جات بتناديها إلا تسمع صوت كعبها يطق البلاط , بوقفة واثقة من نفسها: السلام عليكم ..

شريفة بأنبهار: وعليكم السلام والرحمة , مدري كيف أشكال حور العين , تبارك الله ..

أم عبدالعزيز بغرابة ألي تدري أن بنتها مو بزين خواتها: صدق تشوفينها حلوة ..؟

راغده أعطت أمها نظرة وجلست جنبها وأكتافها مشدودة على ورا: تو منور البيت ..

شريفة بابتسامة عريضة: يا أرض أحفظي ما عليكي , طلال ذبحني عنك وقال والله ما أتزوج إلا ألي دخلت قلبي ..

أم عبدالعزيز: ومن وين شافها ..؟

شريفة: ما شافها بس من مدح أخته لراغده تولع ..

أم عبدالعزيز: من متى بنتي عندها صاحبات , خبري فيها أنطوائية ..

شريفة: بالمشغل شافتها , الظاهر أنها زبونة عند راغده ..

راغده" كفو عليك يا طلال ولخالتك نفس الخطة بالضبط" : يا يمه السالفة طويلة وش لنا فيها ..

شريفة: أي بالله , خلونا بالمهم ألي تأمرون به أحنا حاضرين فيه .. طلباتكم ..

أم عبدالعزيز: راغده بكري ولابد لها شيء عدل , شقة مستقلة وتكون فخمة والأثاث على ذوقنا , وشهر العسل بـ أوروبا , والمهـر ..

راغده قاطعت أمها: هالأمور كلها تناقشتها مع أخته أما المهر يهمني رجال شاريني ..

شريفة أعجبها كلامها:طبعا يا بنتي لو تشوفين كيف ترجانـي أني أقبل بكل شروطكم الأهم راغده تكون على سنة الله و رسوله ..

أم عبدالعزيز عجبها كلام شريفة: على كذا .. وش وظيفته ..؟

شريفة تغير معالم وجها : ما معه وظيفة , هم فصلوه بالعسكرية وبيشتغل بعد شهرين ..

ام عبدالعزيز ناظرت راغده بصدمة ومسكت يد بنتها بعنف وسحبتها لبرا المجلس ..

ريهام ألي كانت تتسمع وبيدها بسكويت دايجستف: بشروا .. ؟ نقول مبروك ؟

أم عبدالعزيز مسكت شعر راغده وهي تصر على أسنانها: شنـو ذه يا خرا ..؟

مها جاتهم وبعدت أمها: وش سالفتكم مخلين المرأة لحالها ..

راغده تحتمي بالمها: أنا بشـرح لك يمه ..

أم عبدالعزيز تحاول تضربها: والله للعن جدفك ما بنتظر لما تروح ..

راغده وهي تتصداها: يمـه أنا ما معي قصـور ..

أم عبدالعزيز جمدت مكانها من الصدمة: نـــاوية تصيرين شوقر مامي يا حمارة ..

ريهام: يعني شنو ..؟

مها: يعني هي ألي تصرف على الرجال وكلمتها عليه ..

ريهام بغمزه لراغده: الله عليك يا شوقر ..

أم عبدالعزيز ناظرت ريهام والشرار يطلع من عيونها: والله اليوم ما بيعدي على خير لا عليك ولا عليها " وضربت على فخذها " أنا أوريك ..


عند شريفة ..
بالتلفون: مدري يا طلال شكل الأم بتجلدها من قلت أن ما معك وظيفة والأم وصل حدها خلاص ..
البنت ما عليها قصور أنا بالنسبة لي هي ملكة جمال لكن لابد من النظرة الشرعية يا طلال , كثير أسمع قصص أنا عن هالسوالف ألي خذ بمدح أمه واخواته وبعد الزواج أنفجع من شكلها , أي أنا بعلمهم لا تشيل هم ..

إلا بدخله أم عبدالعزيز وراغده وراها ..

شريفة شافت شعر راغده مخترب ووجها أحمر من الكفوف: عسـى خير ..؟

راغده تضبط شعرها وحطته على جهة اليسار ..

أم عبدالعزيز خذت نفس عميق : ما بيصير الزواج إلا بعد ما يتوظف طلال ..

راغده: طبعا , بس كتب الكتاب بيصير نهاية هالشهر ..

شريفة: لحظة لحظة ما تكلمنا عن يوم النظرة .! لابد ينظرها طلال ..

أم عبدالعزيز بسخرية: ومعه شروط الأستاذ طلال ؟

شريفة: طبعا مثل أي رجال , أنها تكون ست بيت تعرف تطبخ وقايمة بأمورها , والمعذرة يا أم راغده أي حاجة تصير بينهم تظل بينهم ما تطلعه عندكم , هذه الأصول ..

أم عبد العزيز غمضت عينها وهي تحاول تكتم غيضها

راغده ألي تناظر بأمها ألي مقفلة عينها: طبعـا الخصوصية لابد منها , ومن ألي ما تعرف تطبخ هالأيام ذي ! الأنستغرام والتواصل الاجتماعي ما خلو عذر لأحد ..

أم عبدالعزيز عينها وسعت وهي تناظر براغده ..

شريفة بإعجاب: تبارك الله , رغم أن هيئتك ما تدل , يـدك ناعمة ..

راغده: حتى لو ما أعرف مرة , عشان طلال بتعلــم ..

شريفة: خلاص متـى يوم النظرة .؟

أم عبدالعزيز بعصبية: والله لا أتـــولاك يا حمــــــارة ..

راغده قامت من كرسيها وصارت ورا الكنب: بسـم الله .. بسـم الله ..

أم عبدالعزيز بنفس عصبيتها: من ألي ما تعرف تطبخ هالأيام هاه..! وأنتي بيض تقلينه مع قشوره " وبصراخ" تعــالي هنا ..

راغده تروح للجهة الثانية: ما يخالف أتعلم..

شريفة خافت من صراخ عبير وقامت معهم: يـ أم راغده هدي الله يبارك فيك ..

أم عبدالعزيز تركض للجهة الثانية: ولما يجي خطاب كنتي تقولي حتى البيض أحرقه سود الله وجهك وعشان ذه بتتعلمين يا حمــارة ..

راغده وهي تجاريها وتروح للجهة الثانية: للحـب مذاهـب يمه ..

أم عبدالعزيز صفقت يدها الأثنين: حبك برص وعشرة خرص , تعــــالي هنا ..

دخلت مها وريهام بعد ما سمعوا صراخهم راحو يمسكون أمهم : يا يمـه هدي ما يصير كذا , شريفة ما راحت للآن ..

أم عبدالعزيز: هدونــي , وهي خلت بي صبر طلع حلمها تصير شوقر مامـي ..

ريهام راحت عند راغده: خـلاص يا شوقر سمعي الكلام ..

راغده: أنا وش قلت ..؟ وافقت أن الزواج بعد الوظيفة بس كتب الكتاب قريب ..

أم عبدالعزيز وصلت لعند راغده وصارت تضربها وسط صراخ البنات وشريفة: ومستعجــلة بعد .. لا بارك الله فيك ..

شريفة مسكت راغده وحطتها ورا ظهرها و بانفعال : يا أم راغده البنت مهيب صغيرة وتقدر تتزوج بالمحكمة ويزوجونها هناك طالمة أنها تعدت الـ 30 , ما يصير كذا أستغفر الله , كل شيء بالهدواة يصير بس طولي بالك ..

أم عبدالعزيز وهي تتنفس بسرعة ووجها أحمر: حسبي الله ونعم الوكيل فيك من بنت , ميته بتتزوجين الآن ..!

ريهام بإحراج: السموحة شريفة بس أمي سريعة الأشتعال ..

أم عبدالعزيز: الضرب فيك أنتي وأختك مو حرام والله , أجـــــل أنا سريعة الأشتعال ..

مها بمداراه : تقصد أنك فقدتي أعصابك بسرعة أسمعـي يمه وش عندها ونسمـع شروط الرجال ونشوف اللأزم ..

أم عبدالعزيز بانفعال: وهو خـلت أي مجال لشروط ..؟

شريفة: يا أم راغده ولدنا ما أنفصل من العسكرية من إهمال بس أخته نوال جاها كانسر وراح معها من جلسه لجلسة العام أستجاب جسمها وقالو خلاص راح بعدها رجع وأنتشر بجسمها كامل , ما رضى طلال على حال أخته ..

الكل سكــت

شريفة كملت بحزن: والله حاول يرجعونه بس ما ربي راد ما معنا واسطة .. والله أن طلال شيخ وألف من تتمناه لكـن الشكوى لله , وهو يحب راغده وبزوجهم لبعـض لو أضطريت أنا ألي أتكفل بزواجه كله ..

ريهام بتأثر كبير: يمه وافقي خلاص على أنهم يتزوجون ..

أم عبدالعزيز هدأت أعصابها :السموحة يا شريفة بس بسبب هالبنت ما عاد معي صبر طلعت أسوأ ما فيني ولي عذري , بس هم أنتي تفهميني من وين بيصرف على نفسه وعلى البنت وهو عاطل ؟

شريفة: بيتوظف بعد شهرين مباشرة , أحنا نعرف الأصول بعد يا أم راغده آفا عليك بس , خلينا نمشي حبة حبة الخطبة الرسمية والنظرة الشرعية ثم كتب الكتاب والزواج بعد ما يتوظف ..


وصعدت السيارة شريفة
طلال بأندفاع: بشري خالتي ..؟

شريفة: وآي وآي يا طلال ربي يعينك على عمتك ..

طلال: وش صار ..؟

شريفة: حرك السيارة بسرعة قبل لا تجيني بساطور ..

& &
مها: يا يمه فشلتينا كان مسكتي نفسك مو كذا , الآن وش بتقول لطلال عنا .. ووش بتسولف الناس عنا بعدين ؟ وين البروتكول والإتكيت ..

أم عبدالعزيز: روحتـه أختك الحمارة ..

راغده: يمه خلاص , أنا لو أدري أنك بتسوين كذا كنت بنفسي تزوجته بالمحكمة ..

أم عبدالعزيز تحاول تمسك أعصابها: ريهام هاتي الخيزرانة بسرعة ..ذي ما شبعت كفوف ..

ريهام جابت عباية أختها: روحي لبيتك أبرك لا تسوي فيك جريمة يـلا ..

راغده تلبس عبايتها وتعدل حجابها: مو مشكلة يمه لو ما صارت الخطبة الرسمية هالأسبوع بعقد قرآني بالمحكمة ..

أم عبدالعزيز خذت قارورة الماي وحذفتها عليها بس ما صابتها ..

& &
طلال نزل للمحطة وجاب لها مويا باردة: سمي ..

شريفة شربت الماي

طلال: و راغده كيف موافقة .. موافقة ولا تمشية الحال ..؟

شريفة: البنت قابلة فيك لو تظل عمرك بدون وظيفة , واضح أنها تحبك يا طلال تمسك فيها وكون كفو لها لو ربي تمم بينكم على خير ..

طلال حرك سيارته بصمــت ..
.
.
.
أم عبدالعزيز: لو يدري أبوك وش بيقول !

مها: أنا بعلمه لا تشيلي هم ..

أم عبدالعزيز: والله أن يتشمت فيني ..

مها: أبوي يعز راغده مثل ما يعزنا ..

أم عبدالعزيز:......
ريهام: قومي تجهزي يمه عشان تروحين لبيت أم شهد ..

أم عبدالعزيز:الواحد ماله نفس يروح بعد ألي سوته أختك ..

مها تنهدت: يمه طالمة أن هالطلال بيبسطها خلاص أتركيها ..

أم عبدالعزيز بشك : وأنتي ليه مستعجلة على زواج أختك ..؟

مها بلبكة: هه , عشان ودي أفرح فيها يعلم الله ..

أبو عبدالعزيز دخل:السلام عليكم ..

الكل: وعليكم السلام

أبو عبدالعزيز: كيف صارت الخطبة ؟

أم عبدالعزيز: البنت استخفت وقعدت ..

أبو عبدالعزيز جلس: ليه من متى كانت صاحية ؟

أم عبدالعزيز: هالمرة غير , جايبه لي واحد بدون وظيفة , يقول بعد شهرين بيشتغل بالقطاع الخاص ..

ابو عبدالعزيز: ووين المشكلة ..؟

أم عبدالعزيز بذهول: يعني أنت راضي ؟

أبو عبدالعزيز : أنا مالي علاقة أوافق أو أرفض ..
الرأي رأيها هي . طالمة الرجال لا هو شراب خمر ولا مدمن مخدرات ولا هو بخيـل خلاص , هاتي لي أسمه كامل وأنا بنفسي بتكفل بالسؤال عنه , رغم أني واثق أن بنتك ما جابته هنا إلا وأنها مطلعه برنت عنه لا تشيلي هم ..

أم عبدالعزيز بحزن: طيب ..

أبو عبدالعزيز: إذا أتاكم من ترضون دينه وخلقه فزوجوه , لا تتشرطين يا عبير خلاص وبنتك ما رضت إلا به , زوجيها وكفاية فضــــايح ..

ريهام: أنا ما أشوف أن الرجال به عيوب يكفي سبب فصله من العسكرية كان موقف شهـم وما يسويه إلا الرجال ..

أم عبدالعزيز : ما لحقنا ونعرفه عشان تقولين أن ما معه عيوب , يا مها خذي ريهــ...

ريهام قاطعتها: لا يمه ما بطلع من هنا أنا أول مرة أشوف راغده كذا حسيتها مبسوطة وعينها كانت تلمع وداخله المجلس بكل ثقة أن طلال جاء يخطبها ونفذ وعده لها , طول عمري ساكتة الآن بتكلم وبقول لا , راغده لابد تتزوج طلال ..

أبو عبدالعزيز: وش السالفة ؟

مها: العسكرية فصلته عشان أنه سافر 8 شهور لأخته المصابة بـ كانسر ..

ريهام: بالله يبه مو هذا موقف بطولي ويدل على أنه رجال لو قدر الله وأختي تعبت ما بيقطها بيقوم فيها حتى لو ترك شيء مهم بحياته ..

أبو عبدالعزيز بتفكير: معك رقم خالته أو أبوه ..؟

.
.
.
ريهام دخلت غرفتها وأتصلت براغده: هلا غدو ..

أبوي مو معارض على طلال وقال بنفسه راح يكلم ولد عمي عشان يرجع طلال للعسكرية ..

راغده بفرح: صدق ؟ الحمدلله ..

ريهام: أي أضحكي وأنبسطي من زمان ما شفتك كذا راغده ..

راغده: إن شاء الله , عمـي بالبيت ..؟

ريهام: أي تعالي طالمة أن الحديد حامـي ..

راغده: يلا مسافة الطريق ..

ودورت مسارها ورجعت من جديد لبيت عمها وفتحت الباب ودخلت بعد ما ضربت خدها وصارو حمـر وعيونها دامعه: السلام عليكم ..

أبو عبدالعزيز ألي كان لحاله أنفجع من شافها كذا: وعليكم السلام .. سلامات علامك راغده ..؟

راغده بكت وجلسها عمها:بسم الله عليك من ألي مسوي فيك كذا ..؟

راغده بصعوبة كلام: أ..مـ....ي

أبو عبدالعزيز: هدي يا بنتي ترى مو فاهم عليك ..

راغده بشهقه: أمي رافضـة أتزوج ..

أبو عبدالعزيز تنهد براحة: لا تشيلي هم يا راغده أنا مكلم أمك وقلت برجعه للعسكرية ..

راغده كأنها تسمع الخبر أول مرة:صدق ! الله لا يحرمني منك يا عمي ..

أبو عبدالعزيز: هذا موضوعها أنحل وش تبغين بعد ..؟

راغده ببحه: قلت لأمي خل كتب الكتاب أول ثم يصير الزواج لكنها رفضت ..

أبو عبدالعزيز: لا تشيلي هم وكل ما أسرعنا كل ما كان أفضل يوم الأحد الخطبة الرسمية وبنفس اليوم إذا كل شيء أوكي تروحين للمشفـى تحللين وياه وأنا بنفسي بكلم زوج أختك د.حمود يعجل بالنتايج .. أو أخوك عبدالعزيز

راغده أبتسمت وهزت رأسها برضـى ..

أبو عبدالعزيز: كلمي خالته وقولي أي يوم يناسبهم , ولو بغيتي أنا بنفسي أخطبه لك ..

راغده: ما أنحرم منك أبد ياعمي ..

أم عبدالعزيز ألي سمعت ألي دار بينهم ووقفت بصمت ..


بالقروب ..

مريم: ما صارت كل ذه تحديد يوم ..؟

مروة: يوم السبت أنا ما معي شيء ..

مريم: خلاص بس تدخل فرح تقرأ كلامنا وتتصل براغده تخبرها عن الموعد والعزيمة ببيت فرح أو ببيتي ما تفرق ..

بعد 5 دقايق دخلت فرح: أهليـن صبايا .. طيب تمام , خليها ببيتك أفضل ..

مريم: أوك ..



بالبانيـو مليان بالفقاقيع بريحة الورد وهي تغنـي وبقمة أنبساطها " يارب تتم الموضوع على خير "

جنبها جوالها أتصال من فرح وردت: هلــوو حبيبي , يوم السبت !

فراح: أنا والبنات مسويين حفلة عند مريم أتمنى تجين ..

راغده " يوم السبت الخطبة ! تكون الفرحة فرحتين ": طبعا ما معي شيء إن شاء الله ..

لبست روب الحمام وتوجهت لغرفة الملابس أختارت قميص نوم عنابي بحمالات رفيعة ودهنت العود بـ أماكن النبض ودهنت جسمها باللوشن وهي تدندن ورجعت لواقعها وهي تفكر بجية خالها بدر: الله لا يردك ..

ونزلت تحت سكبت لها مشروب بالعنب الأحمر بكوبها الرفيع والرقيق ومكعب ثلج وبيدها ملف سيرة طلال: شاب وسيم , مزيون !

بس ظروفك وأوضاعك ظالمينك .. أنت الشخص ألي ممكن أثق فيه ..

& &
بعد الدوش أخذ الفوطة ولفها على خصره وعند المغسلة مسح بيده على المرآية ألي بيها ضباب بسبب الحرارة والبخار وهو يناظر بوجهه وبشعره المبلول الطايح على وجهه ورجعه على ورا " وش تريد فيني ؟ ممكن وقعت في حبي ؟ " وبنرجسية " معذورة أنا حسن المظهر معذب قلوب البنات
وصار يصفر وعند دولابه

عبدالرحمن: رآيق حيل

طلال: أي لقيت بنت الحلال ألي تلوق لأخوك الوسيم ..

عبدالرحمن: من هي غير جنان وأسراء ؟

طلال: لا ذي غير , فوق فوق ..

عبدالرحمن: مــــبروك , بس من ألي بترضى بوضعك غير بنت العم ألي تستر على ولد عمها ..

طلال يمشط شعره: ذه كلام سنة 2000 قبل ما تنولد ..

عبدالرحمن بفضول: لا بجد من ذي ألي بتقبل بوضعك ..؟

طلال بنظرات ثاقبة على نفسه بالمرآية: شخص يتمتع بالوسامة مثلي وتسأل هالسؤال !

عبدالرحمن بضحكة: آخص خف علينا يا جيمس دين ..

طلال: وتنكر بعد ..

عبدالرحمن: دايم تأخذ خوياتي مني مدري وش لقو فيك ..

طلال: لما كنت بعمرك كنت أغسل سيارة أبوي , ما معي جوال ولا شيء , الله يسلم الحب ألي جابت لي جوال بعد ما دخلت الكلية << يقصد راغده

عبدالرحمن: ما تدري ممكن إذا كبرت أصير نسختك ..

طلال: مستحيـــل , لأنك نسخة أمك وأنا نسخة أمي ..
من الآن واضح شوف

عبدالرحمن: طيب ممكن أغطي عليك وأصير من المشاهير ذول ..

طلال : فعلا كل شيء جايز , لأن أغلب المشاهير تافهين أنشهروا لأسباب غبية ..

عبدالرحمن: ههههه مقبولة منك , لو أنك فهد لـ أهبدك ..

طلال بابتسامة جذابة: تسلم ..




آنتهـــــى البـــارت

[لامارا]

البارت الســـــادس




طلال بابتسامة جذابة: تسلم ..

لبس قميصه وتعطر وشاف أبوه ومرت أبوه وميس : السلام عليكم

الكل: وعليكم السلام ..

طلال باس رأسه أبوه: كيف حالك ..؟

أبو فهد: الحمد لله ..

أم فهد بتريقه: أجل كيف كانت الخطبة ..؟

طلال: الحمد لله كل شيء تمام , عم البنت يبغون خطبة رسمية يوم السبت ..

ميس تحس بالغدر: يالخاين ما قلت لي أروح أشوف البنت ..

أم فهد: طايحه من عين نفسها عشان تقبل بواحد بدون وظيفة ولا منتظرنا نصرف عليك وعليها ..؟

أبو فهد ناظر ولده: صح هالكلام ..؟

طلال: لا يبه , عمها وافق وقال مالها لزمه لتأخير وتصير الخطبة رسمية ..

أم فهد: وعسى جازت لها شرفوه البنت ..؟

ميس: يمه خلاص لا تنسين أن خالته حسبة أمه ..

أم فهد: يعني خلاص ! أنا صرت خيخه ولا مش قد المقام يا طلول عشان ما تعرفني بالبنت ..

طلال: السموحة بس خالتي لزمت علي وشافت البنت وأعجبت فيها ..

أم فهد: يعني بعد ما تتوظف بيصير الزواج ؟

طلال: إن شاء الله .. هذا بعد رضى الوالد ..

أبو فهد: وأنت خليت لي شور أنا ما أبغى لك المضرة بس لازم نعرف البنت من هي و آيش أسم عايلتها وأهلها ..

طلال: البنت أسمها راغده ناصر آل ..... , أبوها متوفي وعمها زوج أمها فؤاد بن عبدالعزيز آل ........

أبو فهد عدلت جلسته: يه يه ذول كباريه .. وش عرفك فيهم ..؟ وكيف قبلوا فيك ؟

أم فهد بدهشة: يعني وش ..؟

أبو فهد: هذا فؤاد بن عبدالعزيز كون نفسه بنفسه لو تعرفي قبل كيف كان ووين وصل , سبحان الله معه زوجة تدير أمواله , صح أنا كم عمري ولا عندي ألي معه ..

أم فهد بقهر: وش تقصد ؟

أبو فهد: ما علينا من الكلام ذه , كيف رضو فيك ؟

طلال: أظن سمعوا بألي صار لي وألي سويته بـ أختي وأعجبوا فيني ..

أبو فهد: رب ضارة نافعة , يا ولدي لا تشيل هم هالعايلة هم بنفسهم بيرجعونك للعسكرية وبسهولة ..

ميس بفرحة: ألف مبروك يا طلال ..

طلال: الله يبارك فيك ..

أم فهد كتمت غيضها وقهرها ..

أبو فهد: أنا و عمامك إن شاء الله بنخطبها , هذا النسب ألي الواحد يفتخر فيه ..

.
.
بطلت عينها بشويش وهي تشوف أمها بوجها تروعت: بسم الله بسم الله ..

أم عبدالعزيز: ليه شايفه جن ..؟

راغده قامت من السرير ولبست كادريغن وربطته من خصرها: جايه من صباح الله خير , عسى خير بس ..

أم عبدالعزيز: أن كانك نايمة أنا ترى ما نمت , وقلت ألحق عليك قبل لا تطلعين ..

راغده تشوف الساعة الحائط تشير لساعة 6 : وين اطلع بهالوقت ..؟ يألي حتى دوامي أروح له 9

أم عبدالعزيز: أعرفك بتقولين بتمرن ..

راغده بمغسلة الحمام: حافظة جدولي ..؟

أم عبدالعزيز: وعشان ما أعطلك لبست ملابسي السبورت وقلت بمشي معك ..

راغده تفرش سنونها ولبست ملابسها الرياضية وكندرتها ورفعت شعرها ذيل حصان وأمها معها وصارت تمشي بالحوش : قولـي ألي معك ..

أم عبدالعزيز: يا بنتي عمك فؤاد مو مهتم لأمرك , لو ريهام ما رضى لها هالشيء ..

راغده: أدري ! ليه طالعه أنا من بيته ؟ لأنه مستثقل وجودي ويتمنى أني أتزوج أي واحد ويفتك فا طبيعي هو بنفسه بيتكفل بتوظيف طلال ..

أم عبدالعزيز: وطالمة تدرين ليه وافقتي عليه , أنتي ببيتك الآن محد يعكنن عليك الجو , ولا أحد يحاسبك , يعني ماله كلمة عليك ..

راغده: صحيح وأخوي عبدالعزيز مو معارض ..

أم عبدالعزيز: لا هو ولا عمك يحبونك , ما يريدون مصلحتك يا بنتي ..
راغده: ووين مصلحتي لما شكيتك عن أخوك الحثالة ..

أم عبدالعزيز: أنتي لسى فاكره ! ذه ماضي وأخوي بدر مسافر له سنين يدرس أبتعد بس شاف أنك ما تطقينه ..

راغده: قصدك خايف من أني أفضحه عند عمي ويطرده ..

أم عبدالعزيز: أخوي ما يغلط يا راغده مير أنتي كذابة من صغرك تبغين الكل يلتفت لك وصرتي تدعين أشياء ما صارت , فاكره بحفلة خطبة أختك أيش سويتي ؟ وكل ذه عشان لفت الانتباه ..

راغده عضت شفتها بقهر: وطلال بتزوجه يحميني من أخوك ..

أم عبدالعزيز تسرع خطواتها عشان تجاريها: أستحي على وجهك هذا خالك وما يجيب لك المضرة أبد , لكن أنا ألي ما عرفت كيف أربيك عدل , كل شيء بغتيه جبته لك ..

راغده وقفت وأنفاسها تتسارع: كل شيء ! أكيد السهر جاب مفعولة معك ..يمه خلي اليوم يمشي بسلام ,لا تعكرين مزاجي

أم عبدالعزيز وقفت قبالها: وش سويت لك عشان تعامليني هالمعاملة ؟

راغده ناظرت أمها بذهول وبعد مضي 7 ثواني: ولا شــيء

أم عبدالعزيز بأنفعال: تكلمي ! ليه ساكتة ولا ما معك سبب ! وجالسة تدعين ..

راغده أبتعدت عن أمها وصار تهرول , أم عبدالعزيز بصوت عالي: والله راح تندمين بزواجك منه , وأن أخذتيه أنسي أن لك أم ..

راغده كملت رياضتها وأمها لبست عبايتها وراحت ..

&&&&

عبدالعزيز: كل ذه يصير وأنا ما معي علم ؟

أبو عبدالعزيز: وأن دريت وش بتسوي ؟

عبدالعزيز: أقلها يكون معي دراية .. أتجهز لبكره ! وأشوف الرجال ألي قبلت فيه راغده أخيرا ..

مها تنهدت بفرج: الحمدلله أقلها بتتزوج..

ريهام تلتقط الفستق من صحن المكسرات: أمي من صباح الله خير راحت عندها , عشان موضوع زواجها ..

عبدالعزيز: تتزوج أحسن من ألي تسويه ذه ..وين صارت ذي تسكن ببيت لحالها !؟

ريهام: والله البنت قالت بتحط كاميرات مراقبة وتكون شغالة 24 ساعة وتشوف من الداخل ومن الطالع ..

عبدالعزيز: وهل بعرف لوين راحت ..؟ مو جايز تلعب بذيلها !؟

أبو عبدالعزيز بنفي: أستغفر الله عيب عليك تقول هالكلام أختك أشرف من الشرف نفسه , وتو أنتقلت مو من زمان ..
يعني بتصيع وتضيع بـ شهر !

عبدالعزيز: والشهر بيصير شهرين .. يمه لا تعارضين زواجها خلاص ..لو عرفتي يمنـى أكيد الخبر بتوصله لأهلها مو ناقصين فضايح ..

أم عبدالعزيز باندفاع: أنتبه حتى تفتح السيرة وأن جابت طاري راغده قل برا تشتغل المهم لا تجيب لها سيرة أنها تعيش لحالها أو بتتزوج ..

مها: وش دعوة يمه ! ترى مو أول ولا آخر وحدة بتتزوج ..

عبدالعزيز: مو ممكن غلطت معه ؟

أبو عبدالعزيز: أستغفر الله وش هالكلام العوج ..؟

عبدالعزيز: فكر فيها يبه ! طلعت من هنا وشوي جابت لنا واحد يتزوجها..

مها: ألي بيغلط بيغلط حتى لو أنه بوسط القبيلة كلها .. راغده مو من النوع ألي يخاف ..

عبدالعزيز: وهنـــا الغلط ! ما عندها أحد يردعها الكل عامل لها ألف حساب و خايفين منها..

ريهام : أنا ما أخاف منها بس أحترمها .. وبعدين وش قصة الشك ألي معك أنت تدري أن راغده ما تطيق تشوف ظل رجل ..

عبدالعزيز: مو هنا الغرابة ! وفجأة جابت واحد مدري عن أصله وفصله .. ويلا يا أهلي زوجوني ..

الكل ألتفت لدخولها: السلام عليكم ..

الكل بأرتباك عدا ريهام: وعليكم السلام ..

راغده: علامكم سكتوا من دخلت فجأة !

عم الصمــــــــت !
ريهام بابتسامة: دايم دخولك بالوقت المناسب ..

راغده حطت كرتون الدونات بالطاولة: قولي للخدامة تسوي شاي ..

ريهام: طيب ..

راغده فتحت حجابها وجلست بعبايتها: نعم يا عبدالعزيز معك أي سؤال أو شك أنا أجاوب عنه ..

عبدالعزيز: أنا أقول أن ما يصير تسكنين ببيت لحالك وش بتقول الناس عنا !

راغده: والله هذا مو بيت أبوي عشان الناس تتكلم , وبعدين أنت طول عمرك كنت ساكت أيش معنى الآن تكلمت ؟ " ناظرت أمها " ولا أحد موصيك علي ؟

عبدالعزيز:.......

راغده: انا طلعت من البيت ومحد عارضني ولما بنيت البيت كان مع الكل علم أني بنتقل هناك وعشان أريحكم جبت معي خدامة من صالوني عشان ترتاحون ..

عبدالعزيز: والخدامة ذي مرأة ما تقدر تدافع عن نفسها وعنك لو صار شيء !

راغده بابتسامة: عليك نور , لذلك أنا تزوجت ..

عبدالعزيز: ما فهمت ..؟

راغده بنفس أبتسامتها: أنا قلت لعمي فؤاد ولأمي أني بكتب كتابي بسرعة عشان الزواج يكون قريب بعد وظيفته , مير عمي سو اللازم الله لا يحرمني منه , وكلم ولد عمه عشان يرجع طلال للعسكرية , وبكذا بسكن معه بالبيت ..

أم عبدالعزيز: يعنــــي بيسكن ببيتـــك كذا ! ما شاء الله تبارك الله ونعم العقــل يا بنتي ..

راغده: يعني بالعقل أسكن بشقة وأنا معي بيت ملك ..؟

أبو عبدالعزيز: وهي الصادقة يا عبير .. كذا أزين وأفضل لا تعقدين الأمور هي حرة بتصرفاتها , طالمة ما تسوي شيء غلط ..

أم عبدالعزيز بصدمة: كل ذه وما سوت شيء غلط َ! الزواجة ذي كلها غلط ! وهالطلال كلش مو من مستوانا ..

أبو عبدالعزيز: ألي يسمعك يقول أن أحنا من الملوك , أتركي عنك كلام حريم الجمعية خلاص كلنا بتراب الأهم أنه رجال زين ..

أم عبدالعزيز: وش عرفك أنه زين ؟

ريهام دخلت وصبت الشاي بالنعناع لراغده وللكل ..
أبو عبدالعزيز يمسك الشاي: تسلمين , أنا سألت عنه عن طريق ولد عمي قال أن الرجال كان منتظم بدوامه بس بعد اجازته فصلوه , المدة ما كانت شوية بس مدحوا أخلاقه بالعمل ..

عبدالعزيز بحماس: بشوف ألي هز أركان قلبك ..

ريها: وآآي وآآي يا عبدالعزيز , يجنن ..

راغده: من وين شفتيه ؟

ريهام: خالته شريفة ورتني أنا وأمي ومها ..

راغده: ما لحقت وشفته أجل .. شفته أنا بصورة بطاقة الأحوال بس كان واضح أنه وسيم ..

ريهام: أقول راغده تعالي معي أختاري لي وش ألبس بكتب كتابك ..

راغده قامت: يلا

أم عبدالعزيز: عشتوا ..

مها: خليها تفرح لأختها , كم مرة بتتزوج راغده ؟

دخلت غرفتها ريهام: زين ودخلتي بالوقت المناسب ..

راغده: البركة فيك ..

ريهام: عبدالعزيز مو مهتم بس سمعت أمي ألي خلته يجي وصته أنه يرفص ويعارض بس ما يقدر عليك كل همه أن زوجته المدام يمنى ما تدري , خبرك أن زوجته وكالة , ألي يضحك أن عبدالعزيز وافق على زواجك منه وصار ضد أمي ههههه ..

راغده: هي بنت عمه طبيعي تكون داريه بس ممكن هو ألي مو عارف أن معها علم وأنا بنفسي وصلته لأم صهيب وجاراتي هم عضوات بالجمعية يدرون أني ساكنة بلحالي ..

ريهام: ما أدري بس أي شيء يصير ببلغك فيه أول بـ أول , ولا تطنشي اتصالاتي , لأن أحيان تكون مهمة ولابد التدخل السريع ..

راغده: على قولك ..

ريهام مسكت قطعتين: أي واحد أحسن .. ؟
.
.
لبست فستان سترج أحمر طويل بأكمام طويلة مكشوف الكتف .. ماسك على جسمها شوي , شوكر بلون الأسود المخمل , حددت حواجبها وحطت مرطب شفاة بنكهة المانجو .. وساعة ذهبية تزين معصمها , تسبحت بالعطر وسيحت شعرها الداكن إلا بدخله أمها: الله الله كل ذه لكتب كتابك ..؟

راغده تشيك على حالها بالمرآية: طبعا ولا تنسي النظرة الشرعية ..

أم عبدالعزيز: ولون أحمر !

راغده: لبسي طويل وساتر وأنا بدخل عنده والشال فوق رأسي , خالته شريفة قالت ضروري يشوف نوعية شعري وطوله ..

أم عبدالعزيز: عشتوا هالشريفة ذي واضح أنها من دقة أول ألي إذا جات الأم تزوج ولدها , تشد شعر البنت كانه قوي ولا ضعيف , كان شعرها ولا وصله , وبعدين مو على أساس يحبك وبيموت لو ماخذك ..

راغده تلبس كعبها الأسود متوسط الطول : يمه أنه يحبني ما يعني أنه شافني أو طلعت معه أو من ألي ببالك , من مدح خالته وأخته عني أعجب بي وهم زباين بصالوني زمان , ما كنت أعرف أنهم مخططات لي , لا تخلين ولدك يأثر عليك , ومو كل شوي أعيد لك بهالسالفة ..

عبدالعزيز دخل : يلا راغده , جاهزة !

راغده حطت الشال فوق راسها ونزلت تحت وبالغرفة المجاورة دخل طلال وخالته شريفة ..
عبدالعزيز: أي شيء ودك تسأله لراغده قوله أنا بكون قريب ..

طلال ناظر بخالته: متوتر خالتــي ..

شريفة: بتشوف الحب أخيرا ,بتعجبك أنا متوكده ..

طلال: يارب تكون مثل ما طمحت ..

شريفة: لا توترني معك , وبعدين يكفي أن أبو حسن ألي مرشحها لك , بدل ما تقول كثر الله خيره ..

طلال: مو هذا ألي مخوفني يا خاله , أني أخذها ردا لجمايله معي وبعد زواجنا ما أقدر وأعوفها ..

شريفة بغرابة: مو أنت ألي قايل لي أهم شيء أخلاقها ! وألي يحب ما يهتم لشكل ..

طلال:........

شريفة: وأنا ما أدري وش حاطط ببالك من وصف لشريكة حياتك بس يا رب تحوز على أعجابك , وقفت يا ولدي ضد أمها قدامي وشرتك ..

طلال: مو هنا الكلام , أنها عوبه وبتطيح بكبدي ..

شريفة: مو أبو حسن طمنك ..؟

طلال: أكيد داهنه سيرة يا خاله .. << يعني أعطته ثمن أتعابه وشغله

شريفة: ولك عين تتكلم بعد منتوف جناحه ويتشرط ..

دخلت أم عبدالعزيز بنقابها أنبهرت بوسامة طلال: السموحة آخرناكم ..

طلال وعينه تحت : لا تشيلي هـم يا عمه " ورفع عينه " أنصدم من ألي شافه

كانت ورا أمها وعينها لتحت ورفعت نظرها له وتلاقت عيونهم , راغده نزلت عينها بخجل من نظراته لها " ما تغير بس أستواء له ذقن وزادت وسامته "

راغده دخلت بثقة وأكتافها مشدودة على ورا أمسكت يدها شريفة وجلستها جنب طلال الأيسر ومسافة بينهم طويلة , جلست بكنبه أنفرادية ويفصلهم كنبين ..

طلال بلا شعور: تبارك الرحمن ..

شريفة أعطت طلال نظرة يعني شيل عينك عليها ..

راغده أرتبكت من نظراته لها وأشعرت بخوف شديد هالشيء كان واضح لهم ..

طلال نزل عينه وتارة يرجع يناظرها ..

راغده صارت يدها رطبة وصارت تمسح بالمنديل ألي بيدها وتحك يدها لما تفتفت المنديل ..

راغده جات بتقوم إلا بيد شريفة : ممكن وجودي مع أمك سبب أحراجك وخوفك ..

راغده" لا ياربي , وش جرى لي ؟ رجعت لي الحالة ! ": ممكن ..

شريفة: أحنا بنكون بالمدخل , طلال وده بكلمة لك خاصة لو تسمح عبير ..

أم عبدالعزيز جات بتعارض إلا بسحبه يد شريفة لها برا ..

راغده ما قدرت تتكلم جف ريقها وهي تبلع ريقها كذا مرة ..

طلال بنظراته الحادة لها وصوته الخشن: أنا آسف لو سببت خوفك ..

راغده غمضت عينها بقوة وهي تستجمع قوتها للكلام: أنا معـي كلام لك ..

طلال " نفس الصوت بس الصوت ظالمها " : أسمعك ..

راغده جمعت قوتها ورفعت نظرها له ودها لأنها تستجمع ثقتها بنفسها وتقول ألي ببالها أول ما شافت نظراته الحادة رجعت نزلت وجها وبصعوبة: ممكن تنزل عينك عشان أتكلم ..

طلال" ودي بس مو قادر " بتفهم: أبشري ..

ونزل عينه لتحت , راغده رفعت عينها بشويش وشافته منزل عينه بلعت ريقها من جديد : أنا معي كلام قلت أقوله لك وجها لوجه ..

طلال ألي كان يسمع راغده تتكلم بالقطارة رفع عينه لها وهي نزلتها على طول :أنا مفهمه أهلي أنك تحبني وأنك منتظر موافقتهم ولما وافقوا جيت وخطبتني ممكن تستمر على هالكذبة ..؟

طلال أبتسم: لا تشيلي هم وإن شاء الله أكون الزوج ألي تطمحين له ..

راغده ألي حست بضيق الأكسجين زاد عليها وصارت تأخذ هواء بسرعة وقامت بثقل من كنبها وتمشي بصعوبة ..

طلال أنتبه عليها وقام: أنتي بخير ..؟

راغده ألي مشيتها تتراوح ما كانت متزنة أبد " يارب ساعدني أعدي من هالباب بسلام , هو وراي أي هو وراي " جات بتطيح إلا بيد طلال تسندها ..

راغده بخوف هايل نزلت رأسها وضمت راسها كامل : لا تلمسني , لا تقرب , لا تلمسني ..

طلال أرتبك وشال يده منها وباندفاع: أنا آسف بس فيك شيء ؟ وجهك أصفر ..!

راغده بصعوبة نطق: يمـه .. شريفة ..

طلال أبتعد وراح عند الباب : يا خاله , يا عمه ..

ودخلت شريفة وعبير , والصدمة بوجهم ..

أم عبدالعزيز بخوف: وش فيك ؟ أيش سويت فيها ..؟

طلال بقلق: ولا شيء يا عمه ..

أم عبدالعزيز بنفس خوفها مسكت بنتها وطلعت معها من الغرفة ..

شريفة بقلق وبخوف: وش صابها يا طلال ..؟

طلال بعدم فهم: والله ولا شيء يا دوب البنت نطقت , إلا أشوف وجها مصفر وتتنفس بسرعة ..

شريفة: خلاص أنت رح لمجلس الرجال وأنا بشوف وضع البنت ..

طلع من الغرفة مع عبدالعزيز وراح معه للمجلس ..

أبو فهد: خلاص بس الحريم يخلصون ألي عندهم بيكون التواصل بينهم بخصوص التحليل ..

أبو عبدالعزيز: إن شاء الله ..

أبو فهد قام مع فهد وطلال

طلال ألي بباله صورة راغده وواضح عليه التوتر والتفكير ..

أم عبدالعزيز دخلتها غرفة ريهام وصارت تشربها ماي: بسم الله عليك آيش صابك يا راغده ..؟ تكلمي ؟

ريهام بالمروحة اليدوية تهف على أختها: رجعت لها الحالة يمه ..!

مها بخوف: ليكــون ...

راغده: وش ..؟

مها خذت أمها لبرا: يمه لا يكون راغده فيها سحر , أو معيونة ..

أم عبدالعزيز: تتوقعين ؟ يا ربي ما كان ببالي هالشيء , ممكن سحر ليه لا ..
هالحالة كانت فيها ورجعت , بس وش رجعها صار لها سنتين وأكثر وما جاتها ..

مها تفرك يدها بقلق: يا يمه ممكن هالسحر معمول عشان أنها ما تتزوج ..

أم عبدالعزيز تجمع الأحداث: كيف طافتني ذي !؟

مها: يا عوينتي طول وقتها ترفض مو منها من ألي فيها ..

ريهام ألي كانت تبعد شعرها من وجها وتهف على أختها وتسمي وتقرأ المعوذات

راغده نزلت دموعها " وش صار يا ربي ؟ أيش بيقول عني الآن ممسوسة ؟ والله مو بيدي الشيء ألي صار حسبي ونعم الوكيل فيك وعلى ألي وصلتني له "

ريهام أول مرة تشوف دموع راغده , نزلت دموعها بلا شعور وراحت عند أمها وهي تبكي وبروعه: يمـــه ... راغده ..

أم عبدالعزيز ومها دخلو بسرعة لعند راغده وصارت تبكي عبير وتمسح دموع بنتها: بسم الله عليك , وش صابك راغده تكلمي ؟ وش ألي يعورك ..؟

راغد بحرقه: كــل شيء .. كـــل شيء ..

أم عبدالعزيز تضم بنتها ودموعها تنزل خوف على بنتها

راغده صارت تهز نفسها وتضم حالها , مها همس لأمها: يمه مش معقول الحالة نفسها بس هالمرة في أختلاف ..

راغده كانت تبكي وتهز جسمها بلا شعور وتردد وبهمس غير مسموع: وصــخين يا يمه , وصخين ..

أم عبدالعزيز بصوت مبحوح: تكلمي يا يمه وش فيك ؟ وش ألي صابك , انطقــــي
طلال ما تبغيه ؟ اكلم عمك فؤاد وهو بنفسه بيتفاهم , خلكم معها أنا بتكلم معه ..

مها مسكت يد راغده شافت أطراف يدها باردة : راغده أنتي بخير ؟
راغده بصعوبة نطق: أتركوني لحالي أرجوكم ..

مها وريهام طلعوا من الغرفة بثقل

راغده قامت بسرعة وقفلت الباب وطارحت بنوبة بكى : ليه ياربي ليه ؟ كنت أظن أني أفضل وتشافيت اهئ اهئ ..

مها وريهام ألي كانوا يسمهون صوت بكاء أختهم برا الغرفة يحاولون يفتحون الباب بس ما قدروا


وبالصالة
أم عبدالعزيز : البنت رجعت لها الحالة ما عادت تبغيه ..

أبو عبدالعزيز : أنا ماهقيت أنها بتتزوج خلاص يا عبير والرجال خلاص بيرجع لوظيفته..

أم عبدالعزيز: أعتبره أجر بس بنتي تموت قدام عيني وكاد فيها سحر أو مس ..

أبو عبدالعزيز ببرود: كلمي الشيخ يقرأ عليها , لا تهملين الموضوع ..

أم عبدالعزيز تمسح دموعها: توقعت أنها تمثل مثل قبل وتكذب علي يا فؤاد هالمرة زاد وضعها وصارت تهز جسمها مثل المجانين وتبكي ..

أبو عبدالعزيز: أنا لله , وأحنا ما خلصنا من هالموضوع من سنتين ..؟

شوي يسمعون صوت ضرب الباب , راحو بخوف : وش فيه ..؟

ريهام بين دموعها: راغده تصارخ وتبكي نكلمها ما ترد ..

أم عبدالعزيز بعدت مها من عند الباب وصارت تدقه : راغده أفتحي الباب , أنا أمك , أفتحي يا راغده ..

أبو عبدالعزيز بصراخ: هاتي المفتاح الأحتياطي بسرعة ..

مها صارت تركض وجابت المفتاح وأبو عبدالعزيز حاول يفتح بس ماقدر..

أم عبدالعزيز: وش فيه ..؟

أبو عبدالعزيز: ما شالت المفتاح من عند الباب عشان كذا ما فتح ..

أم عبدالعزيز: وش السواة ؟ نكسر الباب ؟

عبدالعزيز جاهم بخوف: وش فيكم صوتكم طالع برا الشارع ..

مها: راغده رجعت لها الحالة ..

عبدالعزيز: أستغفر الله وش بتسوي الآن بتأذي نفسها ؟
تكفخ حالها زي المجنون ؟

أم عبدالعزيز بعنف: مو وقتك الآن الباب لابد ينخلع ..

إلا بفتحه الباب وهم يشوفونها لابسة عبايتها وحجابها: ما فيني شيء

أم عبدالعزيز وهي تتفحص بنتها: وش صابك ؟ صار لك شيء ؟

راغده بصوت خفيف: لا , بس أريد أرتاح بروح بيتي ..

أم عبدالعزيز وهي تشوف عيون بنتها الحمراء: لا يمكن تروحي بهالحال خلك هنا ..

راغده: لا يمه أنا أرتاح في بيتي ..

أم عبدالعزيز: طيب أوصلك ؟

راغده: لا أنا بخير الآن !
وطلعت من عندهم

عبدالعزيز بسخرية: شفتوا الدراما ألي سوتها ؟ وأنتو معها مثل الخبلان ! ماله داعي والله ما غير صجه ولجه على قلة سنع ..
أبو عبدالعزيز بتأيد: معك حق , لكن أمك وحركاتها ألي ما تخلص , ألي يشوفها يقول أن أول مرة تجيها هالحالة راغده !

توجهت لسيارتها كانت تمشي بصعوبة وبثقل اطلقت العنــان لدموعها وهي تجدد دموعها وأحزانها وقيودها من الماضي الآليم ..
فتحت جوالها وتركت رسالة أعتذار على عدم حضورها لعزيمتهم الليلة ..

فرح وهي تقرأ الرسالة بخيبة: بنـــات مو جاية راغـده ..

مريم بقهر: صدق أنها وصخة ليه ما قالت من أول ..

فرح: لسـى ما سوينا شيء ! زين أنها بلغتنا قبل ما نسوي شيء .. كلمي مروة وقولي لها

مريم: بننبسط مثل كل مرة وش علينا منها , عسى عمرها ما جت ..

فرح: الغايب حجته معاه , أن شفناها بعدين بنسألها وعسى خير يارب ..

مريم: قلعتها ..


شريفة: مو مصدقتك ..!

طلال: يا خاله أقسم لك أن هذا الي صار !

شريفة: وش جرى لها !

طلال: علمي علمك ..

شريفة: ليكون البيت فيها بلاء وقطوها في كبدك يا يمه , من بدايتها شر أعتذر عن هالزيجة ..

طلال: البنت عاجبتني ياخاله ..

شريفة: ما يخالف , مالك إلا أنك تجمل مع عمك عشان يزوجك بنته جنان , ولا ذي البلوة والواحد يقول خلك مع مجنونك لا يجيك الأجن منه ..

طلال حط يده بفمه وصار يعضها خفيف " البنت وراها شيء , مستحيل يكون مثل ما تقول خالتي كان طبيعية بس من أنفردت فيها رغم وجود أمها وخالتي من بعيد جاتها الحالة ! كل ذه حياء ؟"


نزلت من سيارتها ولبست نظارتها الشمسية داخل العيادة تخفي تورم عينها وبالأستعلام: الدكتورة سلمى عبدالله موجودة ..؟

الاستعلام: اضطرت تطلع اليوم معها ظرف ..

راغده: طيب بكره بتكون موجودة ؟

الاستعلام: نعم بتكون موجودة إن شاء الله دوامها من الساعة 9 الصباح لساعة 2 , ومن الساعة 5 لساعة 9 ..

راغده : في حالة عدم وجودها ؟

الاستعلام: تفضلي هذا الكرت أختي تقدرين تستفسرين عن وجودها صباح الغد الرقم في أسفل الكرت ..

راغده خذت الكرت: شكرا ..

وصعدت سيارتها وتوجهت للبيت ..


أتصل فيه طلال: كيف حالك ..؟

أبو حسن: أقلقتني , عسـى خير ..

طلال: العذر والسموحة بس ضروري أعرف ..

أبو حسن بخوف: عسـى جرت النظرة زين وأعجبتك ..

طلال: ألي اريد أعرفه راغده معها مرض أو مس أو شيء ؟

أبو حسن: لا , ليه تسأل ؟

طلال : معقولة تمثل يعني !

أبو حسن: وش ألي صار ؟

طلال: من شافتني وهي تعبت ..

أبو حسن: ما فهمت قصدك ..
طلال: مرضت وش يعني ..

أبو حسن: ممكن معها ضغوطات بسبب العمل ..

طلال: تواصلت معها من أمس ..؟

أبو حسن: نهائـي ..

طلال: طيب , تسلم ..
قفل الخط ورجع سرحان بتفكيره ألي مو عارف وش وضعه هل رفضوه أو لا


لبست عبايتها وحجابها وطلعت من مكتبها : نهلة أنا مضطرة أطلع معي موعد مهم لو صار أي شيء طارئ أتصلي فيني وبخصوص الأستاذة بشاير أعقدي معها إجتماع يوم الثلاثاء ضروري ..

نهلة: أبشري طال عمرك ..

صعدت سيارتها وتوجهت للمستشفى عند الاستعلام: دكتورة سلمى عبدالله موجودة ..؟

الاستعلام: نعم تفضلي .. من هنا

راغده ألي كانت تجي من قبل هنا: أعرف المكان تسلمين ..

توجهت لمكتب الدكتورة سلمى عبدالله كانت مثل ما خبرتها راغده بس كبرت شوي وبابتسامة: السلام عليكم

د.سلمى بصدمة مفرحة: وعليكم السلام معقول ألي اشوفه ؟

وبعد السلام والحال

د.سلمى: وينك غايبة طوال هالسنوات , طمنين عنك ؟

راغده: رجعت لي الحالة ..

د.سلمى لبست نظارتها: أيوا والسبب ..؟

راغده: كان بالأمس خطبتي ..

د.سلمى بدهشة: كويس واخيرا ..

راغده: وجرت النظرة الشرعية وما أعرف ايش صار دكتورة ..!

د. سلمى: هدي هدي راغده لازم أعرف كل شيء بالتفصيل الممل ولا تتركي أي جزء , وبعدين مو من الأول أقول لك أكسري الحاجز وتزوجي آيش معنى الآن ..؟

راغده: خبروني أن بدر بيرجع ..

د.سلمى: آممم مو على أساس أنك أنتقلتي لبيتك خلاص .

راغده: أنتقلت دكتورة عشان لو بيوم رجع أنا ما أكون بالبيت نفسه وأنا الآن خايفة ..

د.سلمى: من آيش راغده ؟

راغده:يرجع ووقتها لا أمي ولا أحد بيصدقني خصوصا أمي و أيش أقول لها أصلا !

د.سلمى: طيب طيب , الآن نهدا شوي , أطلب لك هوت شوكلت ترتاحي وتحكي لي كل شيء ..
&&&

رجع من دوامه بعد ما خلص جراءته , أم فهد بسخرية: عسى ما أشوقك ؟

طلال:......

أم فهد: أشوف ما عاد أتصلوا و حددوا يوم التحليل , ولا كنسلوا ؟

طلال: أقول يا مرت ابوي طبختي غداء ..؟

أم فهد: أي ..

طلال: روحي أكلي عيالك

وصعد لغرفته
أم فهد: يا جعلك ما تربح ولا يتمم لك ربي فرحة ..

نوال شافت أخوها يصعد فوق وصعدت وراه وبإندفاع: طــلال ..

طلال ألتفت لها وبابتسامة: اهلا نوال كيف حالك اليوم ؟

نوال: الحمدلله مبروك رجعوك لدوام ..

طلال: أرتحتــي ؟

نوال بابتسامة: كثير كثيــر ..

طلال: ما ودك تقيلين ؟

نوال: وش وراي غير هالنومة , بس السوالف معك راح تجدد نشاطي ..آيش صار بالشوفة ترى ما كلمتني

طلال تنهد:ما صار شيء مثل كل شوفة !

نوال بتريقة: على أساس أنك مجربها ولا أنت ما جربتها من قبل وأحنا ماندري !..

طلال: أتفقنا أنا وعمها على مهر 30 ألف وحسن العشير ومن شروطها الثانية وأنا قبلت وشفت البنت .

نوال بحماس: جينا لأحلى جزء ..

طلال بحالمية: كانت ملاك شيء ثاني , بعدين مدري وش صار !

نوال بابتسامة: حب من أول نظرة ؟

طلال : ممكن تقولي المواصفات ألي كنت تتمناه لقيتها في هالمخلوقة ..

نوال: يارب يارب تكون من نصيبك , ويجمعكم ربي ببيت واحد وتكون أول خلفتك منها توائم ..

طلال: آمين يارب ..
&&&

د.سلمى:رجعت لك الحالة بعد ما أنفرد فيك ..؟

راغده: بالضبط أول ما كنت بغرفة مع أمي وخالته كنت خجولة وتوتر بسيط , بس زادت الحالة بعد ما طلعوا كنت أتكلم بصعوبة بالغة دكتورة أنا توقعت أني شفيت خلاص ..

د.سلمى: تشافيتي من شيء واحد فقط , أما بقية الاشياء كانت تكمن في الأنعزال , لو عشتي معه ببيت واحد يا راغده كيف بيكون وضعك ..؟ لا تستعجلي بالزواج خليها كتب كتاب وأدرسيها معه بهدوء وسلام , ومن هالوقت أنا بساعدك عشان تتحس حالتك ..

راغده بحزن: دكتورة أنا يأست ..

د.سلمى: أنتبهي يا راغده اليأس ما بيوديك لمكان بس الأمل والتفاؤل ما طلوب ..أنتي تقدمتي على عقدتك وخوفك من الرجال ..

راغده: كلام الجرايد ما يفيد معي يا دكتورة , ما أريدك تدعميني أريدك تحلين مشكلتي ..

د. سلمى: وهذا هي مهنتي كـ مستشارة أسرية ..

راغده بآسى على حالها: أعرف أن حالتي محتاجة لطبيب نفساني بس هالشيء يأثر على مركزي , نظرة الناس لطبيب النفساني مزرية وأمي أن عرفت بجد هالمرة ممكن تنهار عشان كذا هي ودتني لك , أنا موصله لها فكرة أني بأخذ دروس من أستشارية أسرية ..وأني أستفيد من دوراتك ..

د.سملى: لا تشيلي هم راغده أنا أحتاج لمساعدتك بعد لابد تساعديني في نفسك , والشغلة كلش سهلة , بس أرجوك ساعديني ولا تقطعين العلاج من نفسك ..

راغده: صح أنا قطعت بس كنت أراسلك عبر البريد الألكتروني عن كل جديد طرأ علي ..

د.سلمى: أعرف وهالمرة نفذي ألي أقوله حتى لو كان صعب عليك , عشان تحلي مشكلتك لابد تواجهينها لاتهربي منها ..

راغده:........

د.سلمى: لابد تزوريني لو مرة بالشهر على الأقل وأن دعت الحاجة يكون مرتين الأهم تظلي على تواصل معي لو رجعت لك الحالة لأي سبب من الأسباب ..

راغده: طيب ..

د.سلمى: أريدك توعديني راغده ..

راغده: أوعدك ..

د.سلمى: بعد كتب الكتاب أحتاج من طلال يزورني هنا ..

راغده: ليه ..؟

د.سلمى: عشان اطمنك ..

راغده: بـ أيش ..؟
.
.
.

طلال كان سرحان يناظر سقف غرفته وعبدالرحمن معلي على صوت التلفزيون يلعب بلاستيشن إلا يجيه أشعار على الواتس لديك رسالة واحدة من الدوام ..
بسرعة فتح الرسالة ورد عليها السلام

راغده أرتبكت من دخوله السريع والمفاجئ

طلال عارف أنها ما تراسله إلا لطلب أو شيء: قبل أي شيء أخبارك ..؟

راغده: الحمدلله ..

طلال: فيك شيء ..؟

راغده: للان تفكر ..؟

طلال: وذه شيء ينسي ..؟

راغده: أنا إذا توترت أصير كذا , أول نظرة شرعية لي طبيعي ألي صار لا تشيل هم ..

طلال: وأنا بعد أول مرة ..

راغده: بكره نحلل ..

طلال تنفس براحة , راغده ارتبكت لما شافته ما علق: غيرت رايك ..؟

طلال: بأيش ..؟

راغده: بالزواج مني ..

طلال: لا لا أبدا .. على كم الساعة .؟

راغده: الساعة 10 ونصف يمديك .؟

طلال: ماعلي دوام على أي حال ..

راغده: الله معك ..

وطلعت من الواتس آب وطفت الواي فاي ..
طلال مستغرب من تصرفاتها " هالبنت غموض وراها سالفة طويلة " ناظر بأخوه: قصر صوتك وراي مشوار الصبح ..

عبدالرحمن : طيب ..
&&&

بالصالة
أم فهد: بس ..؟
فهد: بس يمه قالو المهر 30 ألف , شفتي كيف حظة يا يمه ..؟ وأنا بنت عمي اسيل 40 ألف غير القاعة واثاث وحالتي حالة وهو محمول مكفول ..

أم فهد: أنت دفعت بس مهر والقاعة على أبوك والأثاث دفعت نصفه ..

فهد: وهو بس 30 ورجعوه للعسكرية ..

أم فهد: أنا ماهمني من يأخذ الأهم يطلع من هالبيت , وألي عرفته من أبوك أنه ما بيقسم الشقة عليك .. يعني الدور العلوي كله لك ولعيالك ..

فهد: أي هذا الشيء ألي مستفيد أنا ..

.
.
تأخرت على مكتبها عن قصد توجهت للمستشفى وحللت تحليل الزواج وصعدت سيارتها وراحت لدوامها , أبو حسن: أبشري طال عمرك , الآن متوجهين للمستشفى هو معي إن شاء الله ..

طلال: وش قالت بتنتظرنا ..؟

أبو حسن: لا خلاص حللت ورجعت لدوامها ..

طلال " جيت قبل الموعد عشان أشوفها وهذا ألي صار ": مشغولة مرة !

أبو حسن: بس تتزوجها يالسبع بتعرف كل جدول أعمالها , أنا حدي لهنا ..
مامعي علم بحياتها وأعمالها , والشيء ألي أعرفه أن معها هالصالون وبس ..

.
.
التـسع الأيام ذي جددت صالونها ورمت الكراسي المكسورة وغيرت ديكور أستقبال الصالون باللون الأورنج والسكري والسماوي , نهلة تمشي وراها : طال عمرك الأستاذة بشاير هاتفتنا وبتجي اليوم , رغم عدم وجود موعد لها ..

راغده: آيش جدولي اليوم ..؟

نهلة: مراجعة عند الاستشارية الأسرية د.سلمى عبدالله على الساعة 5 , ملابس الخياط عند كومار جاهزين على حسب الـأتفاق , الساعة 8 سهرة ببيت مريم ..

راغده شدت على جكيتها الأسود: ممتــاز , يعني ما في زحمة ..

نهلة: توصين بشيء مسبق للأستاذة بشاير ..؟

راغده تدخل مكتبها: أول ما توصل أطلبي من أم حسن كوب شاي بالنعناع 2 , هي جياتها خفيفة ما تطول ودايم ما يصادف وقت لضيافتها ..

نهلة بابتسامة: مبسوطة طال عمرك ..؟

راغده: جدا نهلة , الله يتم ألي ببالي على خير ..

نهلة هزت رأسها بالإيجاب

جلست راغده بمكتبها وهي تناظر ركن ركن فيها , تشعر بفخر بأنجازاتها ولكل شيء سوته وأثمر معه , غمضت عينها " اللهم لك الحمد , كل شيء مثالي وممتاز , بكره تطلع نتايج التحليل ونشوف العريس أي يوم يناسبه لكتب الكتاب "

فتحت عينها وهي تسمع دقت الباب: تفضل ..

نهلة: طال عمرك الأستاذة بشاير وصلت ..

راغده رمشت عينها للقبول , دخلت بشاير بابتسامة: السلام عليكم ورحمة الله وبركاته ..

راغده وقفت وصافحتها: وعليكم السلام ..

بشاير: مبروك عليك التجديد ..

راغده وهي تأشر لها للجلوس بالجلسة وجلست قباله وكان بينهم طاولة : أتمنى يكون حاز على أعجابك ..

بشاير: جدا ..

إلا بدخلة أم حسن قدمت لهم الشاي بالنعناع وطلعت بهدوء
راغده: بخصوص الأرض ..؟

بشاير: كلمت راعيها طلع في شاري غيرك , وبيحولها للمزاد وأي واحد تصير من نصيبه ..

راغده: إن شاء الله من نصيبي ..

بشاير: وإذا زادت لمبلغ ما يستاهل ..؟

راغده: كل شيء بالأصول يا أستاذة بشاير ..

بشاير: بخصوص هالموقع هذا " تمد لها الورقة" معروضة للإيجار وهذا رقم صاحبها ..

راغده: ممتاز , أحتاج الآن لعامل أمين ويصير المشروع قيد الأنشاء ..

بشاير: وإذا مافي ربح ..؟

راغده: نجرب شهرين وش ورانا وإذا كان الدخل فوق الـ 9000 بيكون كل شيء تمام .. وأبو حسن ما بيقصر ..

بشاير تشرب الشاي: إن شاء الله طال عمرك ..

.
.
.
أبو عبد العزيز :أنتي مصدقة ألي تسويه بنتك ؟

أم عبدالعزيز: أيش قصدك ..؟

أبو عبدالعزيز : بنتك تمثل يا عبير , شوفيها وهي تقضي أمورها , أمورها وكل شيء لحالها كأنها رجال ولما شافها رجال بغت تموت ! يا سبحان الله..

أم عبدالعزيز: بنتي ما توصل لهنا , درجة أتقانها لتمثيل ..

أبو عبدالعزيز: يا عبير يا نظر عيني أنا لو ماني واثق من كلامي ما قلت لك أنتي تضخمي الأمور ..

أم عبدالعزيز : قبل بنتي كانت إذا جاتها الحالة تشد على حالها ويدها مشدودة كأنها مقيده ..

أبو عبدالعزيز : والآن ..؟ تغير صح ؟ دليل أنها نست حالتها ألي قبل آيش كانت تسوي فا قالت أخترع حالات جديدة ..

أم عبدالعزيز: حتى بنتي تدري أنك ما تحبها بس ما توصل أنك تتهمها بالعاطل ..

أبو عبدالعزيز: أنا أقول الصدق , حبـي أو كرهي لها ما بيودي لنتيجة , ما عرضت حالتها لدكتور نفساني وحلل شخصيتها مباشرة بعد ما شفت ردة فعلها بكتب كتاب بنتي مها , تقولين شيطان وخربت علينا الحفلة ولمت الناس على قلة فايدة , ولا أجل ذي سواة ..؟ تجلس تصارخ بالمخزن لحالها كأنها جنية , هي غيرانة من مها و زين أقتنعت أنها تتزوج أخيرا , ما همني من بتأخذ المهم أنها تبعد مشاكلها عنا وعن عيالي ..

أم عبدالعزيز " طول عمرك يا فؤاد مو متقبل بنتي": تصبح على خير ..

أعطته ظهرها وتدفت وهي سرحانة بتفكيرها ..
.
.
.
بالواتس

أبو حسن: أي يوم يناسبك لكتب الكتاب ..؟

طلال وألي كأنه الوضع مو عاجبة: أسال طويلة العمر ..

أبو حسن: برضوا لك رأيك هي تركت هالشيء عليك أنك تقرر ..

طلال " زين والله وخذت رأيي فيها الخير ": سوت كل شيء لحالها وبتخطيط منها الآن بتاخذ رايي بيوم كتب الكتاب !! عموما قل لها تحدده مثل ما تبغى ..

أبو حسن: طيب ..

راح بلغها برسالة وردت عليه: يوم الجمعة مناسب ..

أتصلت بـ أمها: يمه بيوم الخميس أعزمي من تحبين لكتب كتابي ..

أم عبدالعزيز بصدمة: بس ما سوينا شيء ..

راغده: بيكون بس كتب كتاب , الحفلة بوقت ثاني يمه ..

أم عبدالعزيز: أي زين طالمة كذا يكون عائلي أفضل , أهله وأحنا كافي ..

راغده: الي تشوفينه , أستأذنك ..





آنتهـــــــى البارت

[لامارا]

البارت الســــابع



حطت سموكي بني وروج أحمر صريح ولبست لينغز أسود وقميص أسود بأكمام حاير وكعب أحمر جذاب قلادة طويلة ذهبية وساعة ذهبية ..
عملت ويفي لشعرها ولبست عبايتها وتحجبت .. صعدت سيارتها راحت لبيت الكيك و اختارت كيكة العسل ومن محل ثاني أخذت بقلاوة وتوجهت لبيت مريم ..


مروة: أخاف تلغـي الموعد ..؟

فرح: مستحيل أنا أعرف راغده لو ما بتحضر بتقول قبل الموعد بساعات ..

مريم تشيك على نفسها: ننتظر وش ورانا ..

إلا بدقة الجرس
البنات بربكة: جــات .. جـــــات ..

مريم: خلاص أووص ألي يقول جانا وزير , خلكم طبيعيين .. مروان رح أفتح الباب ..

مريم وفرح ومروة جلسوا كأن مو مهتمين ..

مروان يركض: جابـت كيك ..الله

صوت كعبها وريحة عطرها سبقت دخولها وبابتسامة: هلــوو ..
الكل: هلــوو ..

سلمت عليهم بحفاوة وفتحت حجابها وناظرتهم: الدنيا حر برا , اللهم قني عذابك يوم تبعث عبادك ..

مريم بهمس لمروة: ذه رأس جديد ..

مروة: علــى رأيك ..

فرح: اشلحي عباتك مثلنا ..

راغده قامت : أي بالله أفضل عشان أبرد ..

شلحت عبايتها وسط نظراتهم ألي كانت مليانة صدمة
راغده انتبهت لنظراتهم: تغيرت مرة !

الكل باندفاع: كثيــــــــــــر ..

مريم: وش سويتي بنفسك أعطينا الخلطة ..؟

مروة: ليه ما تنزلين بالسناب وتصورين ؟

راغده: مو متعودة أني أصور بس لو قررت أصور برسل لكم خاص ..

مروة: أي ياليت لو نسوي قروب بالسناب ونصير ننزل به يومياتنا يكون تواصلنا أسرع وأقوى من الواتس ..

فرح: فكرة حلوة ..

راغده: سولفوا لي عن إنجازاتكم طوال هالسنين .. وآيش صار عليكم ..؟

فرح: أنتي تعرفين سالفتي بس هما لا ..

راغده: نبدأ بمروة ..

مروة بتوتر" وش معنـى أنا البداية " : معي بنتين , تزوجت خبرك معهم من كنا بالكلية , آخر سنة ..

مريم: وأنا معي ولدين ..

راغده:.....

فرح: خليك منا علميني وش سـر هالرشاقة جسمك ما يمزج ..

راغده: خبركم بي مو متزوجة ..

فرح قاطعتها بحماس: ندري بس قولـي وش سـر جمالك ؟

راغده: أمارس رياضة كل صباح عدا يوم الجمعة اخليه يوم مفتوح لي , أخذ فيتامينات وأشرب 8 أكواب ماء يوميا , وأشيـل أثقال ..

فرح: أي أذكر كنتي تقولين لي عن النادي قبل , أي نادي تروحين ؟

راغده: بسبب أشغالي ما عدت أتمرن بالنادي صرت اسويها ببيتي ..

مريم أعطت نظرة لفرح ولمروة بمعنى " ركزوا بكلامها ما تريد تعلمنا أي شيء عن حياتها وعن ألي تسويه "

راغده بابتسامة: جبت لكم كيكة طايحة فيها أنا هالأيام ذي ..

فرح: كنا شايلات هم ما تحضرين و الحمد لله جيتي ..

راغده بنفس ابتسامتها: ما توقعت أنكم تبغون شوفتي هالقد , ضاع عمرنا وأحنا بعاد عن بعض نعوض هالأيام الآن ..

وسالفة تجر سالفة ..
راغده باست مروان: بسم الله ما شاء الله ولدك يجنن ربي يحفظه ..

مريم: من ذوقك تسلمين ..

مروة: آيش رايكم نشترك بنادي ؟ لمدة شهر كـ بداية نشوف أوضاعنا كيف جرت وإذا أعجبنا خلاص نستمر ..

الكل تحمس لفكرة مروة ..

راغده: في نادي قريب من بيتي أسمه بوابة حواء لرشاقة أنا مشتركة به أكثر من 5 سنوات معهم ممتاز لابعد درجة ..

مريم بتفكير: ايوه سمعت عنه بس هذا بعيد عن بيتكم ..

راغده " أقصد بيتي أنا , وش هالورطة ":.......

مروة: شكلك مخطبة ممكن قريب بالنسبة لك , رغم أنه بعيد ترى ..

راغده تغير الموضوع: والبنات الحلوات ذول أيش أسمهم ..؟

مروة: أفنان ولجين ..

راغده باستهم: ما شاء الله تبارك الله ربي يحفظهم لك ..

سرحت بتفكيرها " لو قلت لهم أني ببيت لحالي أكيد بيتضايقون , أعرف نظريتهم لهالموضوع نفس عبدالعزيز وطقته , ليه أفتح هالسيرة وأنا كتب كتابي قريب أتركها لبعد الزواج أو أتركها للفرصة متى ماجات جات "

كانت سهرة ثقيلة معضم الشيء ما حسيت أني أنتمي لهم وكان لقاءنا عبارة أسالة كثيرة ..
دخلت غرفتي وعند المراية صرت أشوف نفسي : لهدرجة أنا متغيره عليهم ؟! كنت لدرجة كبيرة قبيحة ! أوك صح نحفت بس ما كنت سمينة مرة
" نزلت رأسها بحزن" أقلها شخصيتي الباردة ما أقدر أمارسها وأنا لحالي , أبتسمي راغده بكره كتب كتابك ..

أبتسمت بحزن وأنكسار: الله يسهل الأمور يارب ..

وصول أبو فهد وعياله وإخوان أبو فهد , أبو أسيل وأبو سطام

فرحة فؤاد عظيمة اليوم .. هو وعبدالعزيز ..


كانت عند المراية تضبط آخر لمسات المكياج ..

وهي تشوف امها ومها بالمراية

ام عبدالعزيز ترتب شعر بنتها: كذا احلى عليك ..

مها بعدم اقتناع: ما احس اللبسة حلوة علي ..

ام عبدالعزيز: إلا تجنن تناسب ملامح وجهك الطفولية .. دايم تبدع المصممة ايمان في اظهار جمالك .. شوفي كيف بارز بياضك ..

مها بابتسامة ثقة وصارت تناظر راغده : على رأيك ..


كنت اناظر لهم وتارة اناظر نفسي كان فستاني بسيط جدا وناعم كـ كتب كتاب فقط .. اعتمد دايم اللون الأسود بملابسي ممكن هو اللون ألي يناسب عالمي المظلم
فستان كلاسيكي بأكمام طويلة وقصة الصدر بحرف v .. وفتحة من قدام جهة وحدة لفوق الركبة .. عقد ألماس ناعم وساعة ألماس ..

شعرها ويفي ، ميك اب نو ميك اب وعدسات زرقاء
ريهام جات من وراها: ملكة جمال ..

راغده انتبهت لاختها: حبيبتي

ريهام: تعجبيني ..

ام عبدالعزيز تضبط فستان جوان: خلصنا ..

وناظرتني : وش ذه ؟ حطي مكياج عدل ..

ريهام: يا يمه ذه مكياج صعب الي يسمونه ميك اب نو ميك اب..

ام عبدالعزيز: حطي روج احمر ع الاقل

راغده لبست كعبها الفضي ووقفت : جهزت ..

ريهام تعطي أختها السماعة وبهمس: يوسف ..

راغده اخذت السماعة وبشوق: هلا يوسف وحشتني .. كيف حالك ؟ الدراسة خلصت ولا نزلت للإجازة ليه ؟

يوسف: وحشتينــي اكثر .. خالي بدر رفض قال ننبسط شوي قبل لا ننزل .. الف مبروك كتب الكتاب ليتني عندكم ..

راغده تغير معالم وجها من جاب أسمه

ام عبدالعزيز سحبت السماعة منها وصارت تسولف له باشتياق ..

نزلت تحت راغده وهي لابسة السترة السوداء لتغطي مفاتنها

دخل عبدالعزيز بالكتاب وكعادتي أقرأ الكلام قبل أوقع , مهنتي علمتني , ووقعت بتردد ..

شريفة سلمت علي بحرارة: مبروك يا عسل ..

ميس وهي تناظر لراغده بإعجاب: تبارك الله ما شاء الله .. كل هالحلا لطلول ..

شريفة: اعرفك هذه أخت طلال ميس ..

راغده تصافحها : تشرفت بمعرفتك ..

ميس بخفة: مبروك حبيبي مبروك .. هذا هي الي جننت طلول .. والله وطلع معه ذوق رفيع

راغده تدعي الخجل: تسلمين ..

ميس: عاد طلال موصيني .. لابد تكون لكم جلسة حلوة بعد كتب الكتاب ..

راغده بلبكة : ايـــــش !؟

ميس بغمزة: عاد يقولون أن هالاوقات ذي ما تنسي أبد تصير مخلدة بالذكرى ..

ومسكت يدها ودخلتها بمجلس النساء .. بعد ما شلحت سترتها

راغده غمضت عينها وصارت تردد الكلمات الي نصحت بها دكتورة سلمى لها وبتمتمة: أنا قوية أنا بطلة كل هالفترة بتعدي وما بيصير شيء نهائي .. كل شيء سهل ..

واخذت شهيق وزفير ببطء ..
دخل بدون ما تنتبه وصار يتأملها من فوق لتحت ..


بالنسبة لطلال

شريفة: اسمع لو رجعت مثل حالتها بس نادني وانا بقتحم ..

طلال: هههههه لا تشيلي هم ..

ميس: وش عندكم تتساسرون يلا ادخل هي تنتظرك جوا ..

عبدالعزيز عند الباب : احم درب درب ..

ميس وشريفة دخلوا وهم يأشرون له انهم بيكونون برا المجلس ينتظرون ..

سميت بالله ودخلني عبد العزيز المجلس طاحت عيني على الملاك الجميل كانت لابسة فستان إغراء وجذاب صرت اناظر فيها واكحل عيوني فيها ، عينها مغمضة وتقول كلام مو مفهوم بس الي فهمته كلمة: انا اقدر انا أستطيع ..
دقيت الباب و انخرشت حسيت كأن جاتها نفضة ..
طلال بابتسامة: السلام عليكم

راغده وعينها تحت: وعليكم السلام ..

طلال جلس بعيد عنها شوي : مبروك راغده ..

راغده كان اسمها له نغمة على صوته ..

طلال: ترتاحين بوجودنا لحالنا ؟ ابتعد اكثر ولا كذا زين ..

راغده غمضت عينها وضمت نفسها وبهمس: انا اقدر انا استطيع سأتغلب انا اثق بنفسي .. كل شيء كان بالماضي ..

طلال: راغده !

راغده فتحت عينها بشويش وصارت تشوف ريهام من بعيد تأشر لها انها جات
راغده شعرت بالارتياح : اعتذر من الي صار سابقا وان شاء الله ما يتكرر .. كنت احصن نفسي ..

طلال بابتسامة اربكتها: من حقك .. كل هالزين لي ؟

راغده صارت تناظر فيه بضياع وباندفاع: ايش الي كنت بتقوله من قبل بالنظرة ولا قلته ..

طلال: نسيت بس ان تذكرت بلغتك .. مبسوطة ؟

راغده " ما ادري هل ألي سويته صح أو خطاء ":......

طلال: اوعدك اني اكون لك الرجل الصح وأكون قد ثقتك فيني ..

راغده:.......

طلال بنبرة صوت واطية اربكتها: تدرين انك جميلة ؟

راغده وكأنها ما تسمعه صارت تناظر ريهام من بعيد ارتاحت مبدئيا وناظرته: أنا معي كلام مهم بس قبل ما أقوله "مدت له الكرت" هذا رقم صاحبتي دكتورة سلمى عبدالله هي استشارية اسرية اوصتني أنك تروح لها هالاسبوع بوقت الظهيرة ..

طلال بابتسامة ذوبت قلب راغده: طيب

راغده قامت بسرعة: عن إذنك ..

ومشت قباله ومسك يدها .. راغده تسارعت نبضات قلبها وناظرته والتفتت لريهام ما لقتها قل اكسجينها وصارت تتنفس بسرعة: لا تلمسني .. وخر يدك

طلال بخوف: راغده علامك ؟

راغده تحاول تحرر يدها من بس ما تلمسه بتحريك معصمها يمين ويسار وبصوت مبحوح: لا تلمسني خلاص .. اتركني

وصارت تتلفت وتدور بعينها على ريهام

طلال شاف الدموع متجمعه بعينها وبصوت مسموع:يا خاله .. ميس

دخلت شريفة بسرعة ومعها ميس
الي مو فاهمه سبب سرعة شريفة

طلال ترك يد راغده

راغده ناظرتهم ارتاحت مبدئيا

ميس تشوف راغده: بسم الله علامه لونك مخطوف ؟ وش مسوي لها طلال؟

طلال يناظر براغده وبحده: يـلا خاله .. وميس مشينا

راغده الي سمعت صوته وحدته ناظرت فيه والتقت عينها به:ا...

طلال: امشوا قدامي وخلكم عند الباب " ولما ألتفتوا ناظرها بحده" ليه قبلتي الزواج طالمة انتي تتقرفين مني !؟

راغده " لا مو كذا السالفة " وبلبكة: السالفة ...
طلال بقهر: الشغلة واضحة راغده احنا على البر يمديك من الآن تنفصلين ..

راغده: انت فاهم غلط

طلال: عن إذنك ..

وطلع من المجلس

راغده" ياربي وش أسوي .. الله يسامحك ريهام وين رحتي فجأة "

وطلعت تدور ريهام بعينها ولما شافتها كانت تخانق جوان عشان انها لعبت بالبالت حقها ..

ريهام بقهر: كان مسكتيها

مها: لا تعصبي عليها كذا خلاص بجيب لك غيره ..

جوان تبكي

مها ضمت بنتها: بس بس حبيبي ..
راغده" ما عاد ينفع اللوم لزوم اتكلم معه" مسكت جوالها تتصل فيه ما يرد وبعدين صار مغلق" اقفل جواله! يا رب يكون معي رقم خالته .. اي هذا هو "

واتصلت فيها


بالسيارة ..
شاف اتصالاتها " الدوام" يتصل
تعب وحط جواله وضعية الطيران

ميس : علامك معصب طلال ؟

طلال:.......

شريفة ردت على الاتصال: هلا راغده

راغده: طلال جنبك ؟ اذا جنبك اعطيني اياه

شريفة مدت له الجوال: تريد تكلمك

طلال بنفس حده صوته : انا أسوق ..

راغده تغير معالم وجها

شريفة: اذا فضى بيتصل فيك ..

راغده : ياليت توصينه ..

وسكرت السماعة

شريفة: لا توصين حريض ا... الوو الوو

طلال بابتسامة استخفاف: هذا طبعها تقفل بدون ما تقول بقفل .. عبيد عندها احنا ..

ميس وشريفة:..............



توجهت لاختها وبعتاب: ليه رحتي ؟ مو قلت لك مهما وش كان ما كان خليك بمكان انا أشوفك ..
ريهام بقهر على مكياجها: شفت السخيفة جوان تلعب بالباليت حقي الي تو اشتريته ..

راغده كتمت غبنتها لان اختها مالها ذنب بالي يصير فيها ..

ام عبدالعزيز سحبت يدها: وينك فيه يا خانو ؟

راغده بعدم استيعاب: وش ؟

ام عبدالعزيز: كيف تدخلين المجلس بدون ما تعلميني أقلها بلغيني أنك معه بالمجلس ..
لا احترام ولا تقدير وش بيقول الان عمتي مو قابلة بي ! حتى ما باركت له

راغده تلبس عبايتها: شفتك مشغولة بتجهيز مها وبنتها ماحبيت أقطع اندماجكم ..
استأذنك

ام عبدالعزيز: شفتي اختـــك ..؟!!

ريهام: يا يمه اتركيها براحتها بمثل هاليوم ما تشوفيها مرتبكة !؟

ام عبدالعزيز تفرك بيدها: من الخيبة ألي هي فيها ..

ابو عبدالعزيز نزل شماغه: خليها يا عبير ما هقيت أنها خلاص بتتزوج ..
ان شاء الله يحددون الزواج بسرعة ونفتك ..

ام عبدالعزيز: مو بالاول يسون حفلة كتب كتابهم ..

ابو عبدالعزيز: اه من شكلياتك يا عبير ..

ام عبدالعزيز: انت ليه مستعجل طالمة هي مو ببيتك ..

ابو عبدالعزيز: نفس الشيء بعيدة ولا قريبة الكلام موجود .. وانا خوفي انها تغير رايها بالأوان الاخيرة وتطلق ..

ام عبدالعزيز: الله لا يقوله



دخلوا البيت ..
شريفة بهمس: يا ولدي غير وجهك الي يشوفك كذا يقول أنك مغصوب لا تشمتهم فيك ..

طلال: غصب يا خاله ..

شريفة: فات الأوان ياما قلت لك أترك هالبنت من بدايتها ما وراها إلا الشقى وانت مالك فيه الي فيك مكفيك ..

طلال: بس شفتها كيف متقززة مني ..

شريفة: وي عشتوا وليه ان شاء الله ! مزيون تبارك الله وين بتلاقي واحد مثلك يقبل فيها؟ وبتصرفاتها ذي .. الي بس من تشوفك تقول كأنها شافت عزرائيل ..


ميس قطت نفسها بالكنب: يمه يمـــه وينك

ام فهد دخلت عليهم: هلا هلا بالعريس وبخالته ..

شريفة بدون نفس: اهلين ..

ام فهد تناظر بطلال: اشوف ان العريس متضايق عسى خير ؟

شريفة: تعبان بسم الله عليه .. روح يا يمه ريح نوم احسن لك من مقابل بعض الوجيه

ام فهد: ايش قصدك ؟

ميس باندفاع: وانتوا هذا سالفتكم .. لابد تعكننون مزاج اخوي ! خلوه مبسوط انا بروح اشوفه ..

شريفة تمنعها: لا خليه ينام فديته مواصل ..


دخل غرفته وفتح ازرار ثوبه وشال الكبك والشماغ وطف الانوار وتسطح بالسرير يفكر" ممكن هالشيء طبيعي ! انها تتوتر وتقلق ؟ " غمض عينه ونام على طول من التعب ..


ظليت أتصل فيه أمس ما رد .. نقرت على الزر: كوب نسكافية نهلة

نهلة: ابشري طال عمرك ..

دخلت على البريد الإلكتروني وكتبت رسالة لدكتورة سلمى

" السلام عليكم والرحمة
كيف حالك د.سلمى ؟
أمس تم بحمد الله عقد قراني بطلال حالتي ما تسوء بس أشوف شخص اثق به او اعرفه طلبت من اختي ريهام تكون واقفة برا المجلس وانا اشوفها وجرى كل شيء على نحو جيد معضم الشيء وفجأة اختفت ريهام ورجعت حالتي وطلبت منه لا يلمسني ويبتعد عني خصوصا بعد ما مسك يدي حسيت بخوف شديد وأطرافي بردت هو ناد خالته وأخته و دخلوا رجع لي الأكسجين من جديد هو زعل وتضايق يا دكتورة سلمى قال لو متغصبه علي ومتقرفة مني ما كان قبلتي بالزيجه .. وعلى فكرة أنا بلغته انه يجيك هالأسبوع على الظهيرة
تحياتي / راغده ناصر "


دخلت أم حسن وبابتسامة: صباح الخير للعرسان الحلوين

راغده ببتسامة طافية: صباح النور ام حسن ..

ام حسن سكرت الباب وحطت الكوب بطاولتها: الله يجعل أيامك كلها سعادة ، ابو حسن يمدحه كثير مو من الان من قبل خوش رجال .. الله يسخركم لبعض يارب ..

راغده:امين يارب العالمين دعواتك الدايمه لي يا ام حسن انا بفترة احتاجها كثير ..

ام حسن رفعت يدها لفوق: يارب انك تسعد قلبها وتحنيها وتنول لها مرادها وتفرج همها يا رب يا كريم ..

راغده بصدق غمضت عينها: يا رب يا رب ..

ام حسن: استأذنك

راغده شافت جوالها لا إتصال ولا رسالة تنهدت ورجعت ظهرها لورئ " مطنش ولا ماخذ موقف " فتحت جوالها وكتبت رسالة نصية " ارجوك روح لدكتورة سلمى عبدالله هالأسبوع ضروري وأنا بشرح لك كل شيء "


بالدوام ..
مسكه على كتفه: ألي مآخذ عقلك يتهنئ به ..

طلال انتبه له: ....
سامي: اقول خليفة خلك في حالك لا تتحرش فيه

خليفة: من فرحتي برجوعه

طلال تبسم: تسلم ..

خليفة: منت على بعضك اليوم غير عن الأيام ألي راحت ..

سامي: لا تسوي نفسك ما تدري .. الرجال كتب كتابه

خليفة بفرحة: يه يه ولا تقول لي بعد .. ألف مــبروك ..

طلال: الله يبارك فيك

خليفة: اكيد سوت نفسها مستحية وبيغمى عليها ..

سامي بضحكة: وممكن انهارت

خليفة وسامي: هههههههههههههه

طلال باهتمام: يعني هم يسون كذا ؟

خليفة : انا زوجتي اغمى عليها الله يسلمك ..

سامي: انا بس تبكي ..

خليفة: يوم ما ينسي

طلال: يعني هم كلهم كذا .. طبيعي!

سامي: طبعا طبيعي والبعص يتمادئ

طلال" ظلمتها أجل .. اعوذ بالله وش السواة الآن "

خليفة: الحمد لله على تغيرات الأوضاع وصار به نظرة شرعية ونجلس مع بعض قبل الزواج .. لأن يوم الزواج ذي قصة ثانية .. تقول لي امي ان بزمانهم ما في نظرة شرعية ولا يجلس معها وهدايا زي الآن .." وبغمزه" عاد لا أوصيك هالله هالله بالحنان اللازم لا تفاجئها بحركاتك وسوالفك اتركها بالتدريج ..

طلال هز رأسه بصمت ..

فتح جواله وصار يقرأ رسايلها وكتب لها رسالة " بكره بروح عند الدكتورة "

قرأ رسايلها ألي كانت على خوف وقلق لكن كاتبتها بصيغة فيها كبرياء ! او ان سياستها كذا بالكلام ما كان يشوف ضعف بكلامها إلا لما يكون معها , وهالشيء أخذ كل تفكيره ..


ما تلقى منها اي رسالة بعد رسالته لها على الساعة ١٢ ظهرا
توجه للمستشفى : د.سلمى عبدالله من فضلك هي موجودة اليوم ؟

: طبعا ، الدخول على الدكتورة بمبلغ ###


جاء بيجلس بالانتظار الا ب اسمه ودخلت غرفتها استقبلته بابتسامة: تفضل استاذ طلال ..

طلال عدل غترته وجلس : جيت عندك على طلب منك بالحضور ..

د.سلمى: انا ممتنة جدا لحضورك استاذ طلال .. في الحقيقة كنت خايفة أنك ما تحضر ..

طلال:......

د.سلمى اخذت نفس عميق: ولو ما كان الموضوع فعلا مهم ما كنت استدعيتك للحضور الموضوع بغاية الأهمية

طلال باهتمام: عسى خير يا دكتورة !

د.سلمى: ممكن تحكي لي ايش الي صار ب اول لقاء بينك وبين راغده ويفضل لقاء بالتفصيل الممل انا محتاجة استمع لكذا شخص من وجه نظرة .. وما معي الا أنت ، ممكن مع الايام راح تشوف أن علاقة الاستاذة عبير ببنتها راغده مو قوية فـ كان صعب اني استدعيها و يا رب تكون متفهم .. وتتعاون معي بشرط ألي اقوله لك يكون بيني وبينك بدون علم لراغده نفسها ..
انا ألغيت كل مواعيدي لبعد هالساعة بعد ما قالت لي راغده أنك بتجيني اليوم ، لأن السالفة طويلة ..

طلال بخوف: اشغلتيني دكتورة راغده فيها شيء ؟

د.سلمى: إن شاء الله تكون متفهم .. توعدني؟

طلال: اوعدك ..

د.سلمى: احكي لي بالتفصيل عن ألي صار لك هاليومين بالنظرة وبكتب الكتاب ..

.
.
.
ام شاكر: انتي هدي نفسك يا عبير ما يصير تسوين بنفسك كذا ..

ام عبدالعزيز: يا منيرة تمنيت راغده تتزوج احسن منه ، وفؤاد راضي به لان عمره ما كان يشوف راغده بنته ما كان يحبها من صغرها ..

ام شاكر: اجل ليه تزوجك؟ كان أخذ بكر او مطلقة بدون عيال ..

ام عبدالعزيز: من الي بترضى فيه وهو بوضعه ذاك القديم لا مسكن عدل ولا لقمتن زينه الحمدلله جبت عبدالعزيز مباشرة وبعدها انتظرنا ٨ سنوات ثم جبت مها ثم يوسف ثم ريهام ربك بارك لنا وقدرنا نمشي امورنا صح .. فؤاد لو ان وضعه مثل وضع اليوم ما كان قبل فيني لكن قبل كانت العيشة تكسف .. دايم ينزلها على اخوانها يعطي ساير عياله إلا بنتي راغده لو انه شيء تافه وبسيط .. لانها مو منه من شخص ثاني والان يقول عادي تتزوج من موظف حتى رتبته بالعسكرية تفشل ما توكل عيش يا دوب يصرف على نفسه ..

ام شاكر مسكت يدها: يا عبير لا تحملي نفسك فوق طاقتها .. ممكن هالطلال هو ألي يسعدها .. ولا تنسي ان وضعك انتي وفؤاد قبل كانت كسيفه ما يعني ان هي بتكون مثل وضعك قبل لأن ما شاء الله قايمة بنفسها ولها مشروعها وتجارتها .. انتي تزوجتي بالاول وانتي بسن ال ١٤ وبفؤاد ١٥ فكري فيها .. بنتك الان ٣٣ سنة مو ام ١٢ ..
لا تقيسي تجربتك بتجربتها ..

ام عبدالعزيز بين دموعها: ودي تكون افضل من خواتها يا منيرة ودي احرق الكل بإنجازاتها كنت دايم معها بكل قراراتها عدا الزواج وزواجها من طلال غلطة ..

ام شاكر: يعني تبغين تطلقينها منه ؟
البنت خلاص تزوجته يا عبير الله يصلحك ويهديك .. وممكن بعد ما يتزوجها ما تجيها الحالة ..

ام عبدالعزيز تمسح دموعها: انا ظلمت البنت كثير يا منيرة ، ما اريد تترك طلال بعد فوات الاوان ودي تشوف ان طلال مو مناسب وخلاص .

ام شاكر شدت على قبضة عبير: ربك ما بيقدم إلا كل خير بطلال ولا بغيره وذه نصيبها ..



طلال: وهذا كل ألي صار دكتورة..

د.سلمى: قبل سنوات جبت ام راغده لهنا المدام عبير عشان اسمع كلامها عن بنتها كانت تقول ان بنتي تدعي بنتي تكذب لأنها تريد تلفت انتباه الي حولها بسبب اهمال الجميع لها ..
من طريقة كلامك عرفت انك مؤمن بوجود خلل وأنك مو مكذب تصرفاتها و هالشيء شجعني اكثر للكلام ..تأكد لو شفت تكذيبك لـ راغده ولو شوي ماكنت بتجرأ واعلمك السر ورى انطباع راغده .. امها اثبتت لي بكلامها أن راغده مريضة وتدعي وتتهيأ أشياء وما كنت اقدر أعلمها بأي شيء يخص راغده غير الاشياء الرئيسية ..

طلال بنفاذ صبر: لعبتي بـ أعصابي دكتورة ارجوك قولي لي ايش في راغده !؟

د.سلمى : راغده معها قيود الماضي ألي صار و ياها قبل ١١ سنة للان مأثر بشخصيتها وهالشيء بيأثر عليك بطبيعة علاقتك و ياها مستقبلا ، هي وافقت عليك انت بالذات لأسباب انا اجهلها رغم أن في كثير خطبوها ورفضتهم انا ما اقلل من قدرك استاذ طلال لكن راغده ما وافقت عليك من فراغ أنا أجهل سبب رغبتها بالزواج منك انت بالذات ..

طلال بفضول: ما سألتيها ؟

د.سلمى: ما تعطيني سبب واحد .. واسباب مو قوية بس ألي فهمته أنها تثق فيك ثقة عظيمة .. متأكد ما صار بينكم لقاء من قبل أو من سنوات موقف او شيء !؟

طلال يحاول يفتكر: نهائي يا دكتورة أنا أول مرة اشوفها ..

د.سلمى: اعذرني بس ممكن أنت ناسي لأن السالفة من سنوات والله اعلم ..

راغده عانت كثير من " وبصعوبة" من التحرش الجنسي ..
طلال انفجع من كلامها: ايــــش!!

د.سلمى: للاسف .. ومن مين ؟ من خالها ..

طلال الخبر نزل عليه مثل الطامة الكبرى ..

د.سلمى : استاذ طلال حابب نكمل بيوم ثاني واضح انك ..

طلال بنفس صدمته: لا لا دكتورة كملي ..

د.سلمى: اقدر تفهمك ورغبة مساعدتها لكن أنت الحل الوحيد ألي ممكن يساعد راغده وتجتاز هالمرض والتعب النفسي ..

طلال: وكيف وايش صار ..؟

د.سلمى: لما كان عمرها ٢٢ سنة ب ايام الشتاء خالها بدر قرر يطلعها للبر بالليل .. علاقة راغده بخالها بدر كانت قوية جدا وما يرفض لها اي طلب .. بذاك اليوم وقعت الطامة الكبرى صار التحرش يا استاذ طلال على ايام طويلة ما كانت راغده تعي ايش يعني التحرش بحد ذاته لكن كان يلامس يدها كثير ويبوس يدها ويمزح معها باليد طبعا التحرش ما كان واضح بيان عيان لين ما جاء بهالليلة ألي حاول ان يبوسها رفضت راغده وحاولت تبعده راح يربطها ويحكم قبضتها .. صارت تتشنج بس تكون بمكان خالي به اي رجل حتى لو كان زوج امها او حتى اخوها .. وخالها ما اعرف ليه حاول يربطها ويحطها بشنطة السيارة هل هو مرض فيه أو إثارة رعب بنفس راغده .. صار يمزق ثيابها ويحاول يغتصبها

طلال غمض عينه بقوة

د.سلمى: خالها من بعد ذاك اليوم حاول يجيها كثير ويقدم لها عروض قال هي تقدرني اكيد ما بترفض لي طلب! وهات هداية وهات عروض لطلعات والتمشيات والسفريات راغده ترفض وبس ، وألي ببالك تطمن ما صار ..

طلال بأساء على حال راغده: وكيف ممكن نعالجها وايش بيدي أقدر اسويه ؟

د.سلمى: محتاج منك طولة بال وصبر معها .. قول لها انك مريض ..

طلال بعدم فهم: مريض بـ وش ؟

د.سلمى: أنك مريض .. أقصد معك ضعف ..

طلال: ضعف ايش؟

د.سلمى بتردد: جنـ...

طلال فهمها وبأنفعال: لا لا دكتورة هالشيء يقلل من رجولتي وكيف اقولها .. اعوذ بالله حتى الي معه ضعف ما يعترف ان معه ضعف وانا الي ما فيني الا العافية ادعي واكذب به!!!

د.سلمى اعتلت نبرة صوتها: استاذ طلال ارجوك افهمني ولا تنفعل أعرف ان هالشيء يقلل من قدر رجولتك واعرف نظرة معشر الرجال لهالشيء وللمراة بس بمثل مرض راغده هي محتاجة لهالشيء وبقوة وممكن بعد ما تقول لها هالشيء هي تبدأ تثق فيك ان لا يمكن يوم تضرها او تتحرش فيها .. وهالشيء خطر على راغده ممكن تسوء حالتها أكثر من كذا .. انا تعبت سنوات في معالجتها والان في تحسن كبير بس لما جلست معك لحالها رجعت لها الحالة وراجعتني خايفة أن هالشيء يتكرر وترجع لصفر .. راغده بسن ال ٢٢ سنة كان الكل يشهد بوجود خلل فيها والان هي انسانة ثانية ارجوك قدر جهدي وضحي عشانها .. اقلها تقديرا للي سوته لك قبل .. ارجــــوك كون متعاون معي استاذ طلال ..

طلال بعد صمت دام ١٣ ثانية: يعني هي الي قالت لك قولي لطلال ان ..

د.سلمى باندفاع: لا لا .. ايش قلت لك ببداية حديثي معك أن هالشيء بيني وبينك حتى راغده ما تدري به ، لما فهمتها ان سبب جيتك لي لهنا هو معرفتي بقوتك هل انت قادر او لا .. سهل معرفة الشيء لدكتورة شاطرة مثلي بقياس تعابير الوجه وبعض من الاسئلة اقنعتها بهالشيء ووافقت وهي تنتظر مني اخبارها بالنتائج لتحليلي النفسي لك ..

طلال: يا دكتورة افهميني ..

د.سلمى بنبرة عميقة: استاذ طلال .. لا تخليني أندم اني بحت لك بسر مريضتي لانها مو من اخلاق الطبيب وانت تجبرني لاستشعار الندم وخيانة مهنتي .. راغده مو بحاجة اظهار رجولتك بهالشيء هي محتاجة رجولتك لحمايتها والدفاع عنها ..

محتاجة تشعر بالأمان ألي فقدته .. سبب تعلقها بخالها بدر قبل لأنها مهملة من امها واخوانها بحكم هي الكبيرة والباقي صغار والوحيد ألي اعطاها الحب والتقدير والدلع هو خالها وللاسف هو حيوان على هيئة بشر استغل هالتعلق لاشياء ثانية ..

طلال:.......

د.سلمى: راغده اعطتك اشياء كثيرة بوقت كنت امس الحاجة للعطاء ممكن ترد لها بعض من جمايلها عليك ؟ أو اعتبر هالشيء انساني وربي بيعوضك بالافضل ..

طلال: منيب عارف وش أقول لك لكن .. حــ أفكر ..
د.سلمى: خذ راحتك بس لا تطول اكثر لان كل ما بدينا بالخطة العلاجية من الآن كلما كانت النتايج اسرع وأفضل لك ولها .. ومن يدري ممكن تعيشون بعدين كـ اي زوجين .. لكن لابد تكون حركاتك مدروسة وما تسوي اي خطوة إلا بعد ما تقول لي وانا وقتها اقرر .. " وبصيغة رجاء" ارجوك ساعدني في مساعدة هالانسانة ارجـــوك تذكر كل جميل سوته هي لك ..


طلع من العيادة وهو في حالة ذهول قلق تفكير ارتباك .. صعد بسيارته " ياربي وش السواة الان ، المهمة صعبة علي وأنا ألي كنت مفكر أنها مولعه بي .. ظنيت اني بعيش حياة زوجية هادية الان انا في تحدي لصبر ! معها مشاكل قيود كثيرة ماجات بس مع خالها ، هي مامعها ثقة بأي رجل كيف بقدر على هالمهمة الصعبة ، السؤال هنا ليه بغتني أنا !؟ " وسرعان ما وصل للبيت وشلح شماغه وتسطح لسرير " لو هي تثق فيني ما كان جاتها الحالة معي .. اقلها شعرت بالاطمئنان بس هي شوي وتفقد اكسجينها ! "
ما حس إلا بضربه خفيفة على رجله : وينك يالحبيب ..؟

طلال: وش ؟

ميس: ليه اناديك تمشي وتطنشني ؟

طلال: متى هالكلام ؟

ميس: من شوي ..

طلال انتبه لدخول نوال عدل جلسته: هلا حبيبي تعالي ..

نوال بابتسامة: كيفك يا عريس ؟

ميس بلمزه: اي سرحان اكلمه ما يرد علي ما خذه عقله هالراغده ..

نوال: نفسي اشوفها ..

ميس صفقت بيدها وكأنها افتكرت شيء: إيش رأيك نقول لها بنسوي لها زيارة عشان نوال ما شافتها ومنها تجلس وياها وتكحل عينك " وغمزت له"

طلال" خليها على الله " : خلاص روحوا لها أنتو ، أنا معي دوام مرابط ..

ميس: اقول بس حدد يوم أنت ما تكون مرابط فيه ..

طلال يتنهد: خليها على الاسبوع الجاي ..

نوال: علامك يا خوي تعبان ؟

طلال: مصدع راسي من كثر التفكير ..

ميس بمرح: أي بـ راغده .. ريح نفسك لا تخلي راسك ينفجر من كثر ما تفكر فيها ..

طلال: غصب عني افكر فيها ..

ميس ونوال: ههههههههههه

طلال: وش فيكم تضحكون !؟

ميس تناظر نوال: ما قلت لك ميت عليها ..

نوال: ماتوقعت انك من هالنوع حب وعشق قبل الزواج طلعت منت بهين ..

ميس: ههههه يقولون ان الأذن تعشق تعرفين شريفة اذا مدحت غصب تعشقين ..

طلال" عن ابو هالتعقيدات اهلي يظنون ان خالتي هي الي ولعتني فيها .. وخالتي واهل راغده يظنون ان خواتي يعرفونها من صالونها وهم الي ولعوني فيها وانا لابد ما اغلط عشان ما اجيب العيد " وبتسليك: اي اي ..

ميس: بس تصدق .. ذوقها حلو البنت معها كاريزما وقوة بشخصيتها تخلي ألي قدامها يرتجف ..

نوال بحماس: حمستيني لها .. يلا خير البر عاجلة يا طلال ..

طلال: اوك بس روحوا لها لحالكم ..

نوال: عشاني يا خوك ..

طلال ناظر فيها وفي ميس ألي ضمت يدها بترجي انه يوافق: حكم القوي على الضعيف ..

ميس ونوال بفرحة: يــــس ..

طلال: بس على الاسبوع الجاي طيب ؟

ميس ونوال باندفاع دقو له التحية العسكرية ..

طلال: ههههههه خبلان ..
.
.
.

راغده بفضول: طلبتي حضوري دكتورة سلمى ؟

د.سلمى: ما كان هالشيء يكفي أني أخبرك عبر البريد كان لابد حضورك ..

راغده: انا قلقانه من النتيجة دكتورة بشري ايش طلع معك ؟

د.سلمى : فالك حلو يا راغده ..

راغده بابتسامة عريضة: صدق دكتورة يعني معه ضعف !؟

د.سلمى: ١٠٠%

راغده عيونها لمعت وتنهدت براحة: اللهم لك الحمد .. اللهم لك الحمد .. يعني ما بيقرب مني وبكون مثل اخته ؟

د.سلمى: بس يا راغده انتبهي تقولين له هالكلام الرجال ما يقبلونها حتى لو انهم يعانون من هالشيء ..

راغده بتفكير: عشان كذا رفض الزواج من البداية .. يا حياتي طلع خايف .. طيب متى حا يعرف أني دريت ؟

د.سلمى: ممكن بعد الزواج ..

راغده بقلق: اخاف دكتورة يتعالج او يأكل حبوب ..

د.سلمى: لا تطمني ألي عرفته من طلال وطريقة جوابه لـ أسألتي انه شخصية خوافه للحبوب .. في وسوسة يعني وممكن هو اصلا ما يرغب بهالشيء ..

راغده: معقول .. توقعت كل الرجال تفكيرهم بس في العلاقات ..

د.سلمى بابتسامة: انا يجوني سيدات كثار يشتكون من برود ازواجهم بالعلاقة وعدم رغبتهم لوجود ضعف البعض يعالج بالخفاء والبعض ما يعالج .. وطلال ما يعالج

راغده بفرحة كبيرة: انا مو مصدقه دكتورة من فرحتي منيب عارفه اعبر ..
طيب وإذا دكتورة هو خوفي منهم كبير يعني سوا قرب ولا ما قرب عندي واحد ..

د.سلمى: جربي ما حتخسرين شيء بشرط يكون بجد لحالكم إيش بيكون وضعك وتصرفاتك ..

راغده صارت تقضمت شفتها
د.سلمى: لا تخافين راغده خلي الشغالة تكون بالبيت بس بعيد عن ناظرك وشوفي ايش ممكن يصير .. وهالشيء محتاج ممارسة منك راغده .. لا تنسي ان هو تضايق بعد ابتعدتي عنه بهالطريقة لان مو عارف حالتك لذلك بعد انتي قدري وضعه النفساني .. انتي وهو مستفيدين من بعض
هو وده يسكت كلام الناس وأهله وحط فصله لدوام حجة لعدم زواجه وبالحقيقة هو يعاني من ضعف
وانتي ودك تسكتين كلام أمك وبنفس الوقت تتزوجين شخص ثقة .. وبسالفة الثقة ايش الي خلاك تثقين بطلال !؟ وتختارينه من ضد الجميع راغده ..

راغده:......

د.سلمى: مو من حقي اعرف !

راغده: هو مو سر د.سلمى ..

د.سلمى: اجل ؟

راغده : كان عمري ٢٨ سنة .. رحت
زيارة لاختي ريهام عشان حفل امهات امي ما قدرت تروح وانا رحت ولما جيت بروح وقتها

عبدالعزيز راح حاولت اتصل به ما يرد ..

د.سلمى: ليه راح ؟

راغده تحاول تفتكر: توقع أني بجلس وبروح معها بباص المدرسة ..
وطلعت مع أختي برا عشان اتصل بعبدالعزيز وكان فيه واحد يروح ويجي علينا ويقط رقمه ويقط كلام مو زين انا جمدت ما عرفت وش اسوي غير اني اضم ريهام بقوتي خايفة لا يسوي شيء ..

د.سلمى ألي كانت تعرف أن راغده قبل من تشوف أي رجال تنهار وتبكي خصوصا إذا كان يتحرش وقبل كانت حتى بين الناس تتعب كثير: طيب؟

راغده تكمل وكأنها تشوف الموقف قدامها: وريهام تقول له وخر .. ريهام ألي قدرت تتكلم أنا جمدت وصرت ارجف .. وهالرجال كلما يقرب منا نزل سواق الباص وتخانق معه خناقة كبيرة وهو كان يقول روحي روحــــي .. ومن بعدها ريهام تقول لي ان سواق الباص فصلوه بسبب هالهواشة والرجال ألي يغازلنا معه كسور .. ولما سألت مديرة المدرسة عن معلوماته طلع هو طلال ..

د.سلمى بذهول "عشان كذا وثقت به": وليه ما علمتيني بهالقصة ؟

راغده: اسمحي لي دكتورة سلمى وقتها كنتي تصدقين كلام أمي اني ادعي واكذب ما قدرت اسولف لك بكل شيء وبالتفصيل ..
د.سلمى: انا عمري ما كنت ضدك بس كنت اقول لامك انها تاخذك لدكتور نفساني رفضت رفض قطعي وطلبت مني انا ألي اهتم فيك هي صديقتي كان صعب اني ارفض طلبها .. بس والله يا راغده ما بيوم حسيت أنك كذابة او تبالغين بس ما كنت أصدق كل شيء كنت محتاجة لأدلة اعرف من هو الصح ومن هو الخطاء ..

راغده بحزن: تصدقي دكتورة سلمى عمري ما حسيت ان امي تحبني .. كانت دايم تقول لي أني اشقيتها بحياتها وانها ليت ما جابتني .. وانها من حملت بي توفى أبوي واهلها ازرو فيها
زوجها جدي الله يرحمه بـ فؤاد واحد مو قد المقام على قولتهم بس قدرت تكون نفسها وتسانده لما صاروا اليوم ..
عمي فؤاد ألي يكرهني عشان اني من رجال غريب يشوفني تجيه الغيرة يموت لو شاف امي تهتم بي لو اهتمام بسيط يظن انها تكن مشاعر لابوي ناصر الله يرحمه ..

د.سلمى ألي كانت مصدومة من عبير رغم انها متعلمة وواعية يجي منها هالتصرف .. الأنسان لا يتعافى من جروح أهله
المجروح من اهله لا يتعافى ..
د.سلمى تنهدت ..

راغده بحزن: انا مو مراهقة ولا حساسة دكتورة بس اتكلم عن واقعي وحياتي هل ممكن كل ذه يزول ؟ هل برجع مثل قبل ؟

د.سلمى: ‏يتغير الإنسان في حالتين، إذا زاد وعيهُ، أو كُسِر قلبه ..
أنا واثقة ان طلال بيغير اشياء كثيرة فيك للأحسن .. تحليلي ونظرتي له لا يمكن تخطئ ..

راغده بتفاؤل: وأنا أثق فيك دكتورة
طلعت راغده من د.سلمى مبتهجة بعد ما دخلتها بقلق وخوف وتوتر ..
رجعت بيتها تحتسي فوار الخوخ واتصلت فيه بروقان: هلوو كيف حالك؟

طلال" وش جاها": امري ؟

راغده تذكرت انه كان زعلان منها وبربكة: احتاج اتكلم معك ..

طلال يشوف الساعة: بكره وراي دوام ..

راغده: بس ساعة ..

طلال:.......

راغده: الموضوع مهم بالنسبة لي ..

طلال: تمام وين حابه ؟

راغده: تعشيت ؟

طلال: لا!

راغده: برسل لك الموقع على الواتس

وسكرت السماعة
طلال: ما في ذوق ما غير تسكر الخط بوجهي ..الله يستر وش عندها بعد ..

راح لبس ثوبه الأبيض وغترته البيضاء وعليها زيج أسود وجاكيته الأسود وساعته الجلد

ميس تناظر فيه من عند الدرج: اووه وش عنده ..

نوال صغرت عينها وبابتسامة: اي عنــــد ذاك ..

ميس: هههههه اي عدل

طلال يشيك على حاله من جديد بمراية الصالة: تأمرون بشيء؟

ميس: هات مفرحات بنسهر أنا ونوال اليوم ..

طلال ابتسم وبانت غمازته: لا تنامون عاد خلونا نسهـر سووا ..

نوال بحماس: لا تبطي اجل ..

طلال اشر على خشمه وطلع

توجه للمطعم الجارسون: معك حجز ؟

طلال: حجز بـ أسم راغده

الجارسون: تفضل من هنا

وأخذه للغرفة انصدم لما شاف طاولة لـ 6 اشخاص " عازمه ناس ؟"
اتصل فيها واعطته مشغول ..


بالنسبة لراغده كنت بالسيارة لما رن جوالي أول ما دخلت المطعم رحب بي الجارسون : لحظة بروح تواليت قبل

الجارسون: تفضلي مدام ..

راغده بالمراية تشيك شكلها حاطه ميك اب نو ميك اب ضبطت حجابها الأسود وغسلت يدها ثم دهنتها باللوشن

الجارسون شافها من بعيد ودخلها للغرفة ..

راغده غمضت عينها " يارب يارب اكون تعافيت وانا قوية استطيع ..بسم الله" ودخلت بعد ما استجمعت قوتها وبثقة اكتافها مشدودة على روا وفتحت الباب ..

بذهول وهي تناظر فيه والمكان الي قلبت ريحته عطره الرجالي قام أول ما شافني ولما جلست جلس وراي

طلال يناظر فيها بس تنزل عينها او تنشغل بشيء " اخذ منها موقف ولا اسوي نفسي كأن شيء ما صار ":.....

راغده " انا قوية انا أستطيع والحالة خلاص ما بترجع لي " نزلت شنطتي تحت الطاولة كان بيننا مسافة كرسيين كان هذا الشيء ألي يريحني أفضل من أنه يكون قريب مرة ..

طلال: عازمة ناس؟

راغده: لا .. بس كذا اريح لي ..

طلال: راغده أنتي متقززه مني؟

راغده : لا مو قصدي بس ..

طلال: خجلانة ؟

راغده:........

طلال: انا ما اعرف وش سر العزيمة ذي .. عموما أنا رحت لدكتورة سلمى ..

راغده: أنا ممتنة لتلبيتك دعوتي اليوم وممتنة أكثر أنك رحت لعند الدكتورة وقبل اي موضوع .. ايش تحب تطلب ؟

طلبت سمك مشوي وسلطة

طلال: على ذوقك .. واضح انك من رواد هالمطعم ..

راغده " يا ربي مو مصدقة ما معي اي أعراض للحالة" ابتسمت وبانت ارنبة سنونها: عفوا ايش كنت تقول ؟

طلال نزل راسه بابتسامة ورجع رفعها وبانت غمازته: مبسمك حلو تدرين ؟

راغده صارت تناظر فيه: هه

طلال: اطلبي لي على ذوقك ..
راغده احمرت خدودها : تحب البحريات مثلي ولا معك حساسية

طلال:!

راغده باندفاع: المعذرة ما سألتك من قبل كان معك او لا ..

طلال: لا ما معي .. اطلبي ما تحبين لي انا باكله..
راغده ابتسمت بخجل" الحمدلله ما معه .. كيف راحت عن بالي ..بالعادة انا اهتم لهالامور ولا من فرحتي بتحليل دكتورة سلمى وحالتي ألي ما جاتني وانا معه"
طلبت له فوتشيني بالربيان
شوربة ثمار البحرية
شرمب بالربيان
سمك مشوي
سلطة
ومشروب
الجارسون: تمام
وراح

راغده تغير وجها" ياربي وش فيني اليوم المفروض اول لقاء ما يكون بمطعم احين كيف أقدر أكل السمك زين "

طلال انتبه لها: تفضلي وش الشيء ألي بتكلميني عنه ..

راغده بلبكة: ط...طلال

طلال اكتفى بالنظر

راغده خذت نفس عميق: أنا آسفة على كل شيء صار بسرعة بدون حتى ما أوضح بالأسباب ..

طلال: لا تعتذري .. عارف اسبابك

راغده: ايش تقصد ؟

طلال:......

راغده بتوتر: ايش تعرف ؟

طلال " خايفة اكون عرفت سالفتها ": واضحة ! تبغين تستقرين صح ؟

راغده ارتاحت: اي طبعا ..

طلال: بس في شيء ما قلته لك راغده ..

راغده: وش؟

طلال: أنا ما أقدر على الزواج و ... " عدل جلسته"

راغده بابتسامة: ايوه عارفه

طلال: ليه ؟ فرحانه؟

راغده اخفت ابتسامتها: لا أبد بس احنا مناسبين بعض ..

طلال: وعلى اي اساس حكمتي ؟ ممكن بعد الزواج ما نتفاهم !

راغده: اذا تفاهمنا بالمهم خلاص الحمد لله كل شيء بعده يهون .. ألي فيك من الله لا تشيل هم لأن مو مهم بالنسبة لي ..

طلال: و ايش الي فيني ؟

راغده: مو انت مريض بالقلب ؟

طلال بفهاوة: هه !

راغده: الدكتورة سلمى قالت لي انك مريض بالقلب .. ومريض بالقلب ما يقدر على أي جهد ونشاط ..

طلال " عن ابـــو الكذب بس " : نتكلم بهالموضوع بيوم ثاني ..

وجاء العشاء وبعد ٥ دقايق
راغده تمسح فمها المنديل: طلال ممكن أتكلم معك بصراحة اكثر ..

طلال " ياليت بدون كذب": تفضلي ..

راغده : سبب دعوتي لك اليوم اني أرغب بأن اكون صديقتك ..

طلال: صديقة !

راغده: طبعا .. احس أنك مو مرتاح معي بالجلسة وكأنك متضايق ..

طلال بصراحة: صحيح

راغده : ليه؟

طلال بنظراته الحادة : راغده أنا لا أعرفك ولا تعرفيني .. تزوجتك بعد ما طلب مني ابو حسن هالشيء اقصد رشحني اني اتزوجك بحكم انك بنت مالك مطاليب وتبغين الستر ، اجي اشوفك مرتين يضيق التنفس حقك وتبدأين بالتعب .. والان كل شيء عادي ليه تسوين كذا طالمة هو عادي ..

راغده" مو عارف وش السالفة ": غصب عني انا اسفة طلال .. شعرت بالخوف لان اول مرة اجلس مع رجال لحالنا ..

طلال: بس انا زوجك مو اي احد !

راغده: تحسسني أن احنا من تزوجنا لنا سنين ! هالمشاعر الخوف والتوتر طبيعية جدا لأي بنت ما سبقت بزواج .. الحياء شيء طبيعي ..

طلال: حياء ! ذه قلة اكسجين .. ليكون انتي مصابة بمرض القلب مثلي .. " اخفى ابتسامة النصر "

راغده فتحت عينها على الاخر: مريضة بالقلب ! لاا ما فيني إلا العافية .. قال مريضة قلب قال

طلال" هههههه انا اوريك انتي ودكتورتك الي ما بقى مرض ما حطتوه فيني" يحاول يستفزها: لا تعصبين راغده انتبهي لقلبك ..

راغده عضت على شفتها بقهر " قال اصادقه قال .. ذه صعب المراس " وبغيض: على اساس انت الخالي منها ؟

طلال عقد حاجبه: وش قصدك ؟

راغده بابتسامة: اكتشفت بجلسة وحدة انك مستفز ومغرور والجلسة معك لا تطاق و شايف نفسك " وقامت وبيدها شنطتها" ومدري على ايش شايف نفسك عاد من حلاتك ..

طلال وقف معها واقترب منها وسحبها لعنده وسمع شهقتها وبنظرات حادة وترتها: مو بس كذا انا نرجسي بعد ..

راغده صارت تناظر فيه بضياع وترمش بسرعة

طلال بعدها عنه: واحد مثلي مزيون المفروض يأخذ وحدة من مستواه ..

راغده رفعت حاجبها: عشتــوا .. أنت لو تشيل ذقنك تطلع على حقيقتك .. الكنتور حقكم ومكياجكم بعوارضكم وشنبكم..

طلال: يطلع طبيعي ما يحتاج احط بوجهي شيء ..

راغده بقهر: يــوه منك .. احاسب ابرك لي

وطلعوا من المطعم وحركت سيارتها ع سيارته من قدام
طلال بـروعه فتح النافذة: خبله أنتـــــي ؟
راغده بابتسامة: مو قدك ..

وحركت سيارتها
طلال" مصيبه صابتها وش هالحلا ألي فيها "

راغده بقهر وهي تفتكر كلامه: مثلي مزيون المفروض يأخذ وحدة من مستواه !! " خذت جوالها واتصلت بالدكتورة " وبعصبية: قال ايش قال أطلب صداقته !! شوفي ايش عمل فيني وشايف نفسه مدري على ايش ! هو ليه يسوي بي كذا ؟

د.سلمى مو فاهمه شيء: راغده هدي كذا ما أقدر افهم عليك شيء ..

راغده: يعني هذا جزاتي رايده صلح وود ويسوي بي كذا !

د.سلمى: طيب طيب انا مو فاهمه شيء تحديدا تعالي لي هالاسبوع عشان اتفاهم معك ..

راغده: ما اعتقد مشغولة ببعض الترتيبات ..

د.سلمى: خلاص على الأسبوع الجاي ؟

راغده: تم ..


طلال توجه لهايبر واشترى اغراض السهرة ورجع البيت
البنات بترحيب:هلا بالحامل وبالمحمول ..

طلال بابتسامة: هلا بزينة البيت .. اغير ملابسي وانزل لكم ..

ميس: اي ما يحق لنا نجلس معك بزينك ولا خلاص راح لراغده ..

طلال افتكر الي صار : هههههههههههههه

ميس: وش فيك !

طلال عند الدرج: بغير وانزل سريع

ميس اشرت على راسها لنوال يعني استخف خلاص ..

ونزل لهم بعد ما لبس بجامته وهو يلعب بشعره ..
ميس: خلاص شعرك حلو يا زينب العسكري ..

طلال بتحسر: كان اطول من كذا بس كل ما طال قالو قصه .. كان مداه يصير اطول ..

نوال: لا كذا طوله حلو مناسب لك ..
طلال: ايش رسيتو عليه ؟

نوال: تو خلصنا فيلم ندور على فيلم كـوميدي ..

عبدالرحمن عند الدرج: اوه جمعه ! السالفة فيها خيانة

الكل: هلا دحوم ..

عبدالرحمن: لا تصفيق ارجوكم

طلال بضحكة: انت وخشتك تعال بس ..

عبدالرحمن: وبه نبيذ بعد ..> يقصد البيرة

طلال يسكب له كوب : تفضل بعض من النبيذ ..

نوال: واخيرا شفناك دحوم

ميس: شف عيونه من السهر كيف صايرة جافة وهالات سودة تحت عينه ..

عبدالرحمن: خلني انبسط بهالعطلة .. المهم معي لكم فيلم ما حصلشي ..

ميس بحماس: كوميدي مو رعب مثل سوالفك

نوال بضحكة: وبعدين ما ينام بالليل من الخوف ..

الكل : هههههههههههه

طلال: اقول بس خلاص , نتمسخر على السبع والسند .. كل شيء ولا دحوم ..

عبدالرحمن : اي حيلك فيهم طلال .. هالسالفة لها سنتين ولا نسو ..

ميس بضحكة: وامي وقتها حلفت ما يشوف أفلام رعب إلا بوجود الكبار

نوال : هههههه وحلفت علينا بعد هههههه ..

طلال: صدق والله ؟

نوال وميس: اي بالله .. انت كنت بالدورة العسكرية ..

طلال بفرحة: حلـو .. اجل حطوا لنا فيلم رعب ..

الكل: هههههههههههههههه
ميس: حرام عليك طلــول ..

طلال: اقول حط لنا فيلم رعب ..

عبدالرحمن حط فيلم رعب وبعد مضي ٤٥ د من الفيلم .. بلقطة حماسية ومرعبة
ام فهد دخلت البيت وولعت الانوار عليهم والكل صراخ عدا طلال ..

ميس باندفاع: يمه قلبي كان بيوقف ..

ام فهد تشوف التلفزيون: وجع جالسين تشوفون رعب مو انا محذرتكم ..

عبدالرحمن: عاد يمه انا كبرت الان ..

ام فهد: اكيد ذي سوالف طلول بس يريد يعصاني ..

طلال يسوي نفسه مو فاهم شيء: وش السالفة ؟

ميس فهمته: يمه طلال كان بالعسكرية ما يدري انك حالفه ..

ام فهد تفتكر وباندفاع: اي والله . .

ميس: خلاص الفيلم بينتهي شوي بس ..

نوال: عشـــاني يمه ..

ام فهد برضخ: طيب ..

طلال اخفى ابتسامته ولما راحت ..

نوال وميس: واااي منك ممثل بارع ..

طلال : ههههههههه افا عليك بس ..

ميس: الله يعينك يا راغده عليه ..

طلال بابتسامة نصر: في ذي صدقتي ..

ميس تضربه بالمخده : وتعترف بعد ..

طلال يضحك
عبدالرحمن: خلاص خلونا نشوف الفيلم ولا والله بتجي امي وتطفي علينا غصب ..

طلال بهمس: اي هادمة اللذات ..



على الساعة ١٢ ظهرا توجهت للعيادة
د.سلمى بذهول: وللآن ما اتصلتي او اتصل بك من بعد الي صار بالمطعم !؟

راغده: هو المذنب يا دكتورة ..

د.سلمى: وبعدين من وين جبتي سالفة المرض هذا مرض القلب ..

راغده: ايش اسوي .. خفت اجرح مشاعره لو قلت ان معك ضعف فـ حفاظا على كرامته قلت انه مريض بالقلب ..

د.سلمى: كفو بيض الله وجهك

راغده: ادري تصرفت من راسي بس هو كان الي يسأل ايش السبب وايش ألي تغير .. واضح خاطره مكسور بسبب النظرة وكتب الكتاب ..

د.سلمى: مو مشكلة أنتي هدي ولا تفكرين .. بس اريدك الان تحكين لي بالتفصيل عن لما مسك يدك وقربك منه ..

راغده تتذكر: فجأة قربني منه ومسك زندي ويكلمني بغرور وثقة بنفسه ..

د.سلمى: كيف كانت مشاعرك ؟

راغده: شعور غريب ..

د.سلمى: نفس اعراض الحالة ؟

راغده: لا لا شيء ثاني .. اعجز عن وصفه بس ان تكرر معي ببلغك دايركت ان ما حضرت بدزه لك عبر البريد الالكتروني ..

د.سلمى: برافو عليه طلال يعني المرض عندك مرض نفساني وطلال بيقدر يخرجك منها بيسر وسهولة ..

راغده: كيف؟

د.سلمى: اريدك تنسين شيء اسمه كبرياء معه .. اتركي نفسك له ولا تحسسينه بشيء لا عن عجزه ولا عن شيء .. اعتبريه أخوك صديقك ..

راغده: هو رافض اكون معه صداقة يا دكتورة ! تهجم علي على طول ..

د.سلمى: وضعك ما يسمح أنك تستسلمين بعد ما وصلنا لهنا .. راغده أرجوك

راغده: وش بيدي واسويه؟

د.سلمى : حاولي تتقربي من طلال أكثر وأكثر بعدة اماكن وبالتدريج عشان ما يكون عليك صدمة كبيرة بعد الزواج وترجعين لصفر وتنتكس حالتك

راغده بقلق: معقول ؟

د.سلمى: طبعا راغده لزوم نحط عدة احتمالات .. احنا عدينا المنتصف من العلاج ..

راغده: طيب امري لله ..

د.سلمى: اعزميه على بيتك خلي الخدامة حولكم عشان تتقبلين وجوده ..


ارسلت له رسالة : السلام عليكم ..

طلال: وعليكم السلام ..

راغده: مشغول الليلة ؟

طلال: لا

راغده: حياك عندي ببيتي ..

طلال: قصدك بيت عمك ؟

راغده: لا ببيتي ..

طلال: بالمناسبة .. نوال تريد تشوفك ماتسنت لها شوفتك بكتب الكتاب ..

راغده انبسطت: اي طبعا حياها الله ..

طلال: وميس بعد معنا ؟
راغده: طبعا طبعا .. حياكم عندي على العشاء ..

طلال وهو يتذكر كلام الدكتورة سلمى له
د.سلمى: ارجوك يا اخ طلال انك تتعاون معي .. وتلين معها شوي وحاول تتقرب منها حبة حبة عشان تكون النتيجة حلوة بدون انتكاسة والموضوع ما بيطول على اي حال لان راغده بنفسها ودها تتغير
وتروح منها العقدة .. لا تظن انها مبسوطة كذا! كلام الناس ما يرحم
يشوفونها نفسية ومجنونة

رجع ظهره لورى واتصل بميس: اهلين حبيبي .. معك شغل الليلة انتي ونوال ؟

ميس: نو .. وآي؟

طلال:راغده عازمتكم عندها الليلة على العشاء ..

ميس بفرحة: صدق ؟ يلا أجل بـــاي بروح اتجهز ..

طلال: ربي يحفظك ..

على الساعة ٨ ونصف جهزوا
وراح لبيتها ألي ارسلته له الموقع بالواتس ..

ميس نزلت وبيدها صينية الحلا: الله وش هالفيلا .. ماشاء الله ..

طلال عند المراية: لا تنسون شيء ..

نوال: قمر يشوف لنفسه بالمراية ما يحتاج ..

طلال لابس قميص بأكمام حاير زيتي مع بنطلون أسود ..
وساعة سوداء ..

طلال بابتسامة جذابة عيونك الحلوة حبيبتي .. يلا ندخل ..

ميس ضربت الجرس وفتحت لهم الخدامة ودخلوا البيت وهم منبهرين بالديكور والاثاث وريحة البخور بالبيت والمكان بارد والانوار خافته وهادية ..

ماريان: تفضل أجلس .. السنيورة راغده بيجي شوي بس .. انت ايش حاب يشرب قبل العشاء؟

ميس: واتر بليز اند بوت ايس ..

مريان: أول ؟
ميس: تبغون غير الماي ؟ اي بس واتر لنا جميع ٣ كوب ..

مريان: اوك سنيورة ..

نوال: ههههه كلامك متعوب عليه

ميس: هذا ألي طلع معي ..

طلال يناظر الفيلا بعينه " معقول ذه بيتها ؟ شيء عجيب كل شيء تمام " سمع صوتها تكلم الخدامة اقترب لمصدر الصوت تنح من جمالها
كانت لابسة فستان بيت ناعم باذنجاني بدون أكمام وفتحت الصدر مرفوعة وطويل .. حلق دائري أسود وشبشب بيت فرو أسود واساور عريضة أسود وفضي ..
وشعرها ويفي فاردته لآخر خصرها..
ومكياج جذاب

راغده: هاتي الليمون " وقطعتها وهي تحاول تعصرها كانت عصه" اف وش سالفتها
وجات بتقطع الليمونة
الا بيد طلال تمنعها
راغده جمدت مكانها من الروعه

طلال كان وراها وبهمس اربكها: لزوم تتحسسي الليمون كذا" وضغط على يدها الي بيها الليمونة" شفتيها قاسية دحرجيها كذا على المنضدة شوفي" وحط الليمونة بالطاولة واخذ يدها بنعومة وبسطها فوق الليمونة وبنفس همسه: دحرجيها يلا ..

راغده تلفتت براسها وهي تناظر فيه وصارت تدحرجها مع الضغط على الليمونة

طلال بنظرات حادة: برافو كذا اتقنتي الان اقطعيها ..

وقص الليمونة وحطها بيدها
حط يده اليمين بخصرها وبيده الثانية على يدها .. جمدت مكانها وصارت تعصر بصعوبة لما طارت الليمونة

راغده التفتت كل جسمها له وبربكة: طلال لو سمحت ..

طلال بهمس ذوبها: واضح أن أعصابك تعبانه الليمونة كانت لينة بما فيه الكفاية عشان تدر لك .. ولا خدرك قربي ..

راغده:!!!

طلال ابتعد عنها وبنرجسية: صعب مقاومة سحري ..

راغده تنفست بسرعة بغيض : مزحك الثقيل كلش مو وقته ..

طلال انهبل بالكحل ألي بعينها واقترب منها ونزل بمستواها: اخاف عليك تطيحين بحبي ويعذبك فراقي ..

راغده بلعت ريقها وبتمتمه: هـ...و..هو اصلا م..ا " وجمعت قوتها وبعدته عنها" اف نرجسي

وراحت لصالة وهو وراها و بابتسامة توتر: هلوو

ميس ونوال التفتو لها وبترحيب حار: اهليـــن سنيورة ..

ميس بمرح: حركات اسباني وكذا ..

نوال تناظر طلال: من حقك أجل كل هالشياكة والحلاوة لراغده .. قمر يا راغده ..

راغده" اقول النرجسية ما جات عبث .. هذولا المعززات" : يقول طلال انا مو قد المقام ..

نوال : لا وش دعوة .. محتارة من فيكم الاجمال والازين ..

ميس: معليش راغده بس طلول يهبل واي واي شوفيه اذا ابتسم كيف تيان غمازته .. ابتسم من فضلك

طلال بابتسامة ساحرة بانت غمازته: كذا ؟

ميس بحماس: هــــــووا ده ..

راغده عقدت حاجبها وبهمس سمعه طلال: عشتوا .. " توجهت للجلسة" حياكم ..

طلال جلس جنبها وبهمس: قول موتوا بغيضكم ..

راغده : اللهم طولك يا روح .. مريض انت ؟

طلال ياشر على قلبه: مريض بنفس مرضك القلبي ..

راغده قامت وجلست جنب نوال سريع .. ميس كانت بتجلس بس راحت لعند طلال ..

ميس باعجاب: ذه بيتك صدق راغده؟

راغده: اتمنى يحوز على اعجابك

ميس: من هالناحية فهو ما حاز وبس الا هبد فيه ..

نوال: الله يهنيك فيه ..

راغده تناظر بنوال كانت بدون رموش وحاجب مرسوم وباروكة " هذا هي ألي بيها كانسر !؟ حياتي والله "

طلال يناظر براغده الي نظراتها كلها حزن : معليش راغده وش محضره لنا على العشاء ..

راغده انتبهت له: هو ديلفري .. استاذنكم بروح اجهز السفرة خذو راحتكم ..

طلال: اساعدك ..

قام بدون ما ينتظر ردها

راغده بدون ما تلتفت: وش عندك من كلام ؟

طلال باستغراب: كيف ؟

راغده: نظراتك توحي انك تريد تتكلم معي ..

طلال وهو يشوفها توزع الصحون بالطاولة: نظرات الشفقة ذي لنوال ما اريدها تتكرر ..

راغده بدون ما تناظره: اي نظرات ؟

طلال: لا تتغابي راغده كلش مو وقته خبري فيك فطنه وتفهم بسرعة .. والان صايرة غبية ..

راغده: لا تطاول ..

طلال: نعم !

راغده ناظرته: معك كلام تقوله قوله بصيغة افضل من كذا ماله داعي هالزمرة وطريقتك بالكلام ذي ..

طلال بحــده: راغـــده .. ما أريد نوال تنتبه وتتحسس من نظراتك ..

راغده اسندت يدها بالطاولة: محد متحسس بهالمكان غيرك ونوال ما انتبهت لي ..

طلال: بس انا انتبهت ..

راغده: نظراتي ما كانت بنفس نظرتك نهائي ..

طلال: تكذبيني؟

راغده ابتعدت عنه وهي توزع الكؤوس والملاعق ..

طلال اقترب منها بكل عصبية

راغده انتبهت لخطواته وبخوف بان على ملامحها ..

طلال بانفعال: نوال عانت سنوات والناس تناظرها بهالنظرات ذي .. شيء ما جربتيه رجاءا لا تتفلسفين عليه ..

راغده وفكها يرجف: ابتعــــد ..

طلال يكمل: لا تظنين أن بفلوسك شرتيني .. انتي محتاجه سمكرة من داخل ومن برا .. نوال عانت وانا شهدت معاناتها .. ما كانت تنام من الوجع .. الوجع خطف صحتها وجمالها وكل شيء ..
راغده بعدته بكل قوتها وبدأ الأكسجين يقل عندها وجات بتطلع من الغرفة الا الكهرباء تنطفي
راغده شهقت وصارت تتنفس بسرعة وبهمس: يمه .. ريهام .. مهـا وينكم
وكملت يمـــــه ..

طلال: راغده وينك ..

راغده بين دموعها " لا يمكن تتكرر لا يمكن" وحطت يدها على فمها وتوجهت لجنب الدولاب وضمت نفسها به" ما راح يشوفني ما راح يشوفني ..




آنتهــــــى البــــــارت