29-09-22, 05:28 PM
| #152 | ||||
 
|  اللهم صل على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم وبارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم في العالمين إنك حميد مجيد لا تنسوا الباقيات الصالحات سبحان الله الحمد لله لا إله إلا الله الله أكبر لا حول ولا قوة إلا بالله العلي العظيم | ||||
|  |
|
01-10-22, 03:58 PM
| #155 | ||||
 
| بارت ١٢ مرت الأيام على بيلسان وما عرفت طعم النوم وهي مواظبة على دراستها ...والحين الامتحانات النهائية على الابواب.. تنفست وقلبها مقبوض كلما تتذكر الامتحانات الي رح تحدد مستقبلها !! جلست على حافة الشباك تريح نفسها من ضغط الدراسة ... أرخت رأسها وهي تناظر للخارج باسترخاء ... ما بقى شيء على تحقيق حلمها... بس رح تواجه مشكلة السكن ..جدها كل فترة يقول لها لا تهتم بهذا الموضوع... ناظرت جدها بالحوش وهو يكلمها: وش رأيك ترافقيني للمزرعة وتغيرين جو ؟! ردت بابتسامة وهي تتحرك : انتظرني لحظات!! بحركة سريعة لبست عبايتها والشاله ..اقتربت من المرآة وناظرت الهالات السوداء من حول عيونها بسبب السهر وضغط الدراسة...تحركت وبداخلها متأكده بعد الامتحانات رح يرجع كل شيء مثل ما كان ..وتستعيد نضارة وجهها!! قفلت الباب واقتربت من جدها : وين أمي؟! سلطان وهو يتحرك للخارج: راحت لبيت أم مفلح!! هزت رأسها وتابعت السير وهي تناظر كل شيء من حولها بهدوء... سلطان بابتسامة: لا تضغطين نفسك كثير ...جسمك ونفسيتك لها حق عليك ... ردت بتبرير:يبه الطب يبغى معدل عالي سلطان باهتمام: وكيف الحين تحسين نفسك مطت شفتها بضجر: مليت وربي مليت ..احس الكتاب يقول لي اتركيني بحالي ....حفظت وفهمت كل شيء ...والبنات ساعدتهم بالشرح والفهم وكأني الأبلة ...شعورجميل تكون المعلم وتشرح للطلاب!! ختمت كلامها بغمزه مع ابتسامة ثقة بنفسها! سلطان هز رأسه: أنا واثق فيك ..وبإذن الله رح تدخلين الطب حتى لو أدرسك على حسابي الخاص أو أسفرك برا ..الطب ما في غيره ابتسمت باستبعاد: اسافر برا مرة وحده!! سلطان هز رأسه: وش فيها؟! اروح معك أنا وجدتك! مطت شفتها ما استساغت الفكرة: خلينا ندرس هنا افضل لنا !! سلطان بهدوء: ما رح نستبق الأحداث لكن بإذن الله رح تدخلين الطب! هزت رأسها بابتسامه وهي تتخيل نفسها دكتورة وتجلس بمكتبها ! تحس قلبها طار لهذا الشيء ..متى يتحقق؟! ..بالرغم إنها بداية حياتها ما كان الطب من احلامها..بس بالفترة الاخيرة من كثر ما تكلم جدها عن الطب ..دخل رأسها واقتنعت فيه إنه يناسبها!! بعد وقت دخلت المزرعه ..ناظرت جدها وهي تؤشر على شجرة صغيرة يابسه: شوف يبه ماتت الشجرة الي زرعها جدي !! سلطان بابتسامه وهو ينزل لمستوى الشجرة ويمسك بأوراقها الصفراء: عرقها أخضر ..بس الأوراق تيبست ...لو تموت رح ينقهر ابو فيصل ...للحين عنده إصرار يزرع شجرة هنا وتكبر! مطت شفتها بسخرية: ذول اهل المدينة مدلعين ما يعرفون الزراعة سلطان وقف وهو يقاطعها: ما تذكرين بيت ابو فيصل ...كل الشجر والورد هو الي زرعه ..ما ادري ليه هنا يموت الشجر الي يزرعها؟! تثاوبت وهي تتحرك: ما أدري ! سلطان: حركي جسمك وتمشي بالمزرعة لوقت اكمل بعض الشغل هنا!! هزت رأسها بطاعة....تحس نفسها بحاجة للاسترخاء من ضغط الدراسة!! استقر بها المطاف لشجرتها المفضلة ...تسلقتها بشويش وجلست براحة وهي تناظر المكان من حولها. ... كالعادة استقر نظرها للمزرعه المجاورة ... الهدوء يحل بالمكان تتوقع إنهم مو هنا بما إنه نهاية الأسبوع....طول الفترة الماضية ما شافته إلا مرتين...كتمت ضيقها وللحين ما فهمت قصده بالكلام الي قاله لها ...ما تدري وقتها ليه سكتت له....للحين كلامه يتردد بإذنها...من بعدها ما شافته... وما عاد يوصل رنا للمدرسة ...وحتى البنات مع الايام ماتت سوالفهم عن صاحب المزرعة وانشغلوا بالدراسة... نقزت وهي تشوف كرة وقعت من المزرعه الي جنبهم تحت الشجرة ...نزلت بشويش ومسكتها وهي تقلبها باستغراب ...توقعت يكونوا بالمدينة...تسلقت الشجرة مرة ثانية وبحوزتها الكرة وهي تسمع صوت الولد صاحب الكرة ....وبخطوة مجنونه اقتربت من الجدار ..تأكدت ما في أحد الا الولد ...جلست على الجدار وهي تتنفس الصعداء ...ناظرت البيت نفس الشكل ما تغير ...بس الحديقة صارت أجمل .. نفسها تتجول فيها أخذت نفس..وناظرت الولد وهو يقول لها: ارمي الكرة! ابتسمت له: وش اسمك؟! نطق بحده: وش دخلك ! كشت عليه نفس اسلوب رنا بصغرها ماكانت تعطيها وجه...وباستفزاز نطقت: ما رح تحصل على الكرة الا لما اعرف اسمك!! عبس ملامحه بقهر: اسمي فلاح! عقدت حواجبها باستغراب: فلاح!! انقطعت الاسماء يوم ابوك يسميك هذا الاسم! نطق بقهر: وش عليك مني ..ارمي الكرة؟! عبست ملامحها من فضاضته: وانت ليه خلقك سيء كذا؟! رد بتكبر: ما احبكم وأكره القرية!! رفعت حاجب الظاهر إنه مثل إخوانها ...واضح إنه غصب عنه عايش هنا.. وباستغراب: دام انك ما تحب القرية ليه ما ترجع قاطعها بضجر: اعطيني الكرة كشت عليه والفضول قتلها تعرف وش يقرب لهم صاحب المزرعة او على الاقل تعرف اسمه ....ما تدري ليه احتل كبير من تفكيرها ... وبتساؤل نطقت: مين يعيش هنا ؟! رنا تكون أختك؟! قاطعها وهو يخزها: انت سروق تبغين تعرفين عدد اهل البيت حتى تسرقينا ضحكت بخفه على تفكيره الطفولي: من زين مزرعتكم حتى أسرقها ؟! نطق بقهر وهو على وشك البكاء: اعطيني الكرة والا أكلم بابا كشت عليه: يالماصخ كله ولا البابا ... تنهدت وهي تناظر المقعد الي كان يجلس عليه صاحب المزرعة ..اشتاقت تكلمه مثل قبل بس الحين كل شيء تغير!! ابتسمت وهي ترفع رأسها تناظر اسراب الحمام .. وبدأت تدندن بصوت هادئ.. متجاهلة الولد وقهره من برودها! يا صاحبي وين الامان وين المحبة والحنان وين العيون الي تشوف وش سوت اقدار الزمن ياصاحبي ماتت مشاعرنا جفا والبرد ما بقى دفى وين المشاعر والحنين ؟! يا صاحبي!! سكتت والتفتت على جدها وهو يكلمها: ما تتركين حركات البزران!! وش هالكرة الي معك! ناظرته بابتسامة: الولد هذا وقعها هنا وطلعت ارميها له! ما في احد غيره ناظرت الولد ورمتها له : خذ كرتك لا تموت علينا يالمدلع! أول ما مسك الكرة ناظرها ومد لسانه بغيض ! نطق سلطان بجديه وهو يناظرها. : انزلي يمكن في رجال وانت ماتشوفيهم! هزت رأسها بتفهم: راحت عن بالي ذي السالفة!! نزلت واقتربت من جدها وهي تسأل باستفسار: كم صار لهم جيران لنا وما عمرنا تعرفنا عليهم سلطان بلامبالاة: وش تبغين فيهم ؟! تعالي نجلس هناك واتركي اللقافه عنك!! ابتسمت على تعليقه وهي تبرر موقفها: ما هي لقافه يعني تقدر تقول حب فضول!؛ تابعت تحركها خلفه لما ما رد عليها وتابع طريقه بهدوء!! ** ** ** ليان عقدت حواجبها: لا والله!؛ جدتي بالله عليك قولي دراسة الصيدلة صعبه؟! ام فيصل بهدوء: والله ما درستها حتى اجاوبك!! ضحك مسعود على رد جدته: ما لقيت الا جدتي تشهد معك!! بس خلينا نتكلم بجديه وش جاب الصيدلة للطب؟! عائشة بتأكيد : فرق كبير بينهم إلي درس طب يكون دكتور وله هيبته والصيدلاني مجرد بائع يعني مثلك مثل بياع الخضرة ..يدخل عليك واحد يقول لك اعطيني كيلو بنادول!! ليان خزتها بقوة: سخيفه!! جسار بابتسامه هادئة نطق: كل تخصص وله مميزاته! كنان هز رأسه بتأكيد: بالضبط يعني حتى الطب فيه تفاوت بالتخصصات ليان اشرت بيدها بلايك: والله جبتها يعني الي يكون دكتور جراحه ما هو مثل الطبيب عام! عائشه رفعت حاجب: ما هو عاجبك طبيب عام؟! يا اختي يكفي فخامة الاسم الدكتورة عائشة بغض النظر عن تخصصي! رعد حاط يده تحت خده بملل من الدراسة: تراك نافخه رأسك علينا وانا متأكد ابره ما تعرفين تغزينها! رؤى ضحكت بخفه: وأنا بعد أشك بالموضوع! عائشه خزتها : لا والله تراكم مسختوها ...والله طبيب عام ومتوظفه ما هو مثلك على مقاعد الدراسة الله اعلم تتخرجين وتصيرين دكتورة مثلي او لا!؛ كنان بهدوء: إن شاء الله رح تتخرج وتصير افضل جراحه! ام فيصل ناظرتهم: يعني كل واحد نافش ريشه فيكم على الثاني بتخصصه ..وش هالتفكير الي عليكم؟! خففي يا عائشة وكأنه ما احد صار دكتور غيرك!! رعد بتأكيد: صادقه يا جدتي ..وربي صكت رأسي وهي تقول دكتورة دكتورة! عائشه ناظرته: ما بقى الا البزران خلينا نشوف وش يطلع بيدك قاطعها بثقه: أنا رح اصير دكتور بيطري بإذن الله! عبست ملامحها: بيطري ليه قاطعها بابتسامة خبيثه: حتى اقدر أعالجك فتحت عيونها باستنكار من كلامه...وقبل ما ترد ...نطق مسعود بنهر: انت ما تستحي على وجهك؟! ام فيصل بانزعاج: رعد اطلع لغرفتك افضل لك ..وانتم يا بنات اشوفكم جالسات هنا !! ليان وهي توقف : أنا عندي دراسه...استأذن! عائشه ورؤى وقفوا: وين وين اليوم ما في دراسة ..تعالي نجلس بغرفتك ونأخذ راحتنا! جسار مط شفته بسخرية بعد خروجها: يعني كذا ما اخذت راحتها!! ام فيصل ابتسمت: هي انسانه انفعالية بس قلبها طيب !! ** ** ** اليوم اول يوم بالاختبارات ...وقفت باب البيت اخذت نفس عميق وتحركت بخطوات هادئة باتجاه المدرسة ..وقلبها يدق طبول ... جالسة باب بيتهم وهي تناظرها تمشي من قدام بيتهم ...نطقت ام سلمان بحسره: هذي أكيد رح تجيب الاولى على المملكة!! سلمان وهو يشرب الشاي: اسمع بناتي يقولن إنها ذكية ..تخيلي تدرس البنات الي بصفها وحتى فرع الادبي شرحت لهم قواعد الرياضيات والإنجليزي؟! يقولون افضل من المعلمات بشرحها...واهلها مرسلين لها اسئلة سنوات سابقة واسئلة متوقعه لذي السنة .. يعني أكيد رح تحصل ١٠٠٪ مطت شفتها ام سلمان بقهر: قول للبهايم الي عندك ولا وحده فيهم فالحه بالدراسة...بس شغل يبلعون مط شفته بقهر: وش اعمل فيهم اذا عقلهم محشي تبن؟! وبعدين يمه الوراثه لها دور ... أمها دكتورة وابوها مدير مستشفى******* ويقولون كل عيال عمها بالثانوية حصلوا معدلات عاليه ومن الاوائل على المملكة ودرسوا تخصصات ترفع الرأس..واكيد رح تطلع مثلهم!! أم سلمان هزت رأسها: علشان كذا ملتزق فيها راكان ..أكيد طمعان بوظيفتها وبفلوس أهلها مط شفته بسخرية: وتظنين اهلها يقبلون بواحد منتف مثله؟! ام سلمان عقدت حواجبها: الي يسمعك يقول من زين ابنتهم ؟!! هذا حنا جالسين نناظر ونشوف مين رح يتزوجها!! ** ** ** بدأت تكتب وتحس عقلها مشوش مب قادرة تجمع المعلومات ..قلبها يدق بقوة من الخوف ...وش هالتوتر الي صايبها ...زفرت بضيق ..ورفعت نظرها للمراقبة الي اشتبكت مع سما !! سما بغضب مقهورة من المراقبة ومن صعوبة الأسئلة: قلت لك ما ناظرت أحد المراقبه1 بحزم: اي نظره ما تعجبني رح اسحب ورقتك قاطعتها سما بقهر: على كيف ابوك تسحبين الورقه..ما اسمح لك تتهميني بالغش المراقبة2: خلاص التزموا الصمت وما تشوشي على زميلاتك...وانت ناظري ورقتك! بيلسان تضايقت من طريقتهم بالكلام: أنا قاطعتها المراقبة 1بحزم: بدون اي كلام ..كل وحده عينها بورقتها غير كذا رح أعتبره محاولة غش!! ناظرتها بيلسان بقهر وهي ماسكه نفسها ما تمسح فيها الارض وش هالاسلوب الخايس الي يتكلمون فيه ...نزلت نظرها للورقة وهي تمنع دموعها تتساقط من المشاعر الي اجتاحتها ....عقلها مشوش والتوتر ملازمها ..لزوم تهدي نفسها وتستجمع نفسها من جديد!! بعد وقت انتهى الامتحان ... زفرت بيلسان بضيق وهي تناظر البنات الي تبكي والي تردح بقهر من صعوبة الاسئلة!! سما اقتربت منها: وش حل السؤال الثاني ...والله ما فهمت وش يبغون!! بيلسان احتضنت رأسها من الصداع الي يضرب برأسها: اصبري يا سما بس يخف الصداع!! دفنت رأسها بالمقعد لما اجتمعوا البنات فوق رأسها يسألونها عن حل الأسئلة!! ما تدري وش كتبت وش خبصت بالامتحان! ** ** ينتظر رجوعها من الامتحان على نار ..اول ما دخلت نهض بلهفه: بشري وش صار؟! زفرت بضيق: والله ماادري ..حليت بس ما ادري وش كتبت كنت خايفه ومتوترة ام خزامى: بالبداية تحسين نفسك ملخبطة وما كتبت شيء..هذا يصير من شدة الخوف..تتذكر يا سلطان خزامى نفس الشيء اصابها توتر وخوف وما تدري وش كتبت بس بالنتائج كان معدلها ممتاز!! هزت رأسها : إن شاء الله يكون كذا...جو الامتحان مرعب وربي أناظر يدي ترتجف وانا أكتب سلطان يهديها: اول متحان رح يكون كذا ..الامتحان الثاني رح تحسين الخوف والتوتر بدأ يتلاشى!! سكت وهو يناظر جواله يرن ...نطق بخفوت: هذا أبوك!! هبط قلبها من ذكراه وبداخلها تردد الله يستر من هالاتصال!! رد سلطان بهدوء: هلا وليد!!...الحمد لله بخير وش اخباركم .....الحمد لله....ايه رجعت من الامتحان...الحمد لله إن شاء الله خير.... مد لها الجوال بهدوء: خذي يبغى يكلمك!! انقلبت ملامحها بضيق ما لها نفس تتكلم ...أخذت الجوال وردت بهدوء: الو ....الو ناظرت جدها: ما في صوت!! سحب سلطان الجوال : راحت الشبكة!! تنهدت براحه لما انقطع الاتصال ...تحركت بهدوء: أنا رايحه أدرس قاطعها سلطان بحزم: ترى جسمك له عليك حق ...ذبحتي نفسك بالدراسة ..خذي لك ساعة او ساعتين ارتاحي فيهم وبعدها تصحين تأكلين وتشربين شيء يعدل مزاجك وبعدها تدرسين قاطعته برفض: هذي الامتحانات النهائية ما في مجال للتكاسل ..رح اضغط نفسي بهذي الفترة!! سلطان هز رأسه بعدم رضا ...يحس ضغطت نفسها كثير..ولوزم ترتاح ..بس هالبنت عنيده!!.. نطق باستسلام: اعملي الي تبغينه!! ابتسمت بملامح باهته: ربي ما يحرمني منك!! ** ** ** رمى الجوال جنبه لما رجع يتصل وفشل الاتصال ...نطق بنرفزه: وش هالقرية المتخلفه حتى شبكة مثل العالم ما في!! خزامى بضيق من ملامحه المتجهمه: طيب وش قال عن امتحانها؟! رد بعبوس: يقول الحمد لله .. أنا متأكد إنها من جنبها ...والا المفروض اي طالب لما يرجع من الامتحان يحسب كم علامه راحت عليه ...بس ابوك ما عنده الا الحمد لله ..ما ادري قلبي يقول ابوك دللها وخربها بدلاله والبنت ما تدري عن الدراسة بشيء..يمكن الحين نايمه وكأنه أهل القرية يهمهم الدراسة... وأكيد مصاحبه شلة فاشلة دراسياً... خزامى مطت شفتها بقهر دوم يحاول يحط الحق والغلط على ابوها ..وبدفاع عن ابوها: يعني اذا البنت غبية وش يعمل لها أبوي؟! وليد بحده: ما في طالب غبي الي يدرس يلقى النجاح ..بس الظاهر ابنتك من جنبها ....خلينا نشوف اخرتها يوم النتائج الي متأكد رح ترسب بكل المواد!! كتمت ضيقها خزامى: ليه نستعجل الاحداث قبل حدوثها نطق بقهر:إخواني واخواتي عيالهم تخصصات ترفع الرأس ..أبغى وحده من البنات تكون طب تعرفين وش يعني طب؟؟ وغير كذا ما رح أقبل!! خزامى بملل: لجين ذكيه وإن شاء الله تحقق حلمك !! ليان دخلت الصالة وبيدها كتاب: القهوة جاءت بوقتها ...نشفت ريقي هالصيدله!! وليد ناظرها وهو يؤشر مكانه: تعالي ريحي نفسك شوي!! خزامى بابتسامة وهي تمد لها القهوة: باكر لما تتخرجين رح تنسين كل هالتعب ..وتصيرين أحلى صيدلانيه!! وليد ابتسم لها بالرغم من الكدر الي واضح عليه: ربي يحفظك ...لاتنسين اتصلي باختك واحسبي لها كم علامة راحت لها!! رح تصيبني جلطه قاطعته ليان : رنيت لها قبل شوي وما في شبكة ...يا ليتني عندها الحين واساعدها بدراستها ..ان شاء الله تنجح وتصير احلى دكتورة!! ** ** ** مرت أيام الامتحانات مثل الكابوس بحياتها ... الصداع ما فارقها وهدها المرض والتعب .... تحس خلال هالمدة فقدت التركيز وحالها غريب ...وما تدري وش كتبت بالامتحانات ....جدها طمنها إنه حاله طبيعية تصيب أغلب طلاب الثانويه... زفرت بضيق ومسحت وجهها بتعب ..وعقلها منشغل بالنتيجة ... تخاف ما تحصل معدل الطب!! آمال جدها عاليه وما تحب تخيب امل أي احد ...ناظرت جدتها وهي تنطق: يا قلبي نامي وريحي نفسك ...اجهدت نفسك طول الامتحانات نطقت بنبرة بائسة: خايفه ما احصل الطب .. لأني ما ادري وش هببت بالامتحانات!! ام خزامى بهدوء: هذي وساوس شيطان ... وإن ما حصلت على معدل الطب عادي وش رح يصير بالدنيا؟! انقبض قلبها بضيق: لا تقولين كذا يمه ... إن شاء الله رح أدخل الطب ام خزامى بنبره حانيه: إن شاء الله ربنا يوفقك لكل خير ...والحين نامي وريحي نفسك!! هزت رأسها بالنفي: مب نعسانه .. خليني جالسه الحين ام خزامى قاطعتها بتذكر: احتمال كبير خزامى تزورنا تكدر خاطرها بزياده من هالخبر ..وبذبول نطقت: انا رايح أنام لا احد يصحيني !! رح تلجأ للنوم حنى ما تلتقي بخزامى..ما لها خلق لانتقاداتها وكلامها الي يغث!! ** ** ** اقتربت من جدتها ام فيصل وسلمت فوق رأسها: كيفك يا عسل! ام فيصل ابتسمت لها: ربي يسعدك..وين العزم؟! ليان بابتسامه دافئة: نهاية الأسبوع اكيد رح اكون عند ماما اشتقت لها كثير ..وعزمتني على مطعم قاطعتها ام فيصل: يعني رح تمرك هزت رأسها بابتسامة: اتوقع إنها وصلت ...سلاااام!! هزت رأسها ام فيصل وهي تنطق: الله يحفظك!! طلعت ليان وعيون جدتها تتأملها بإعجاب ..ملفته للانتباه بكل شيء... جميله رقيقه هاديه حنونه مؤدبه ومحترمه ..يا حظ الي رح تكون من نصيبه!! ما تلوم وليد يوم قال لها إنها اغلى عياله واقربهم لقلبه!! قاطع افكارها دخول خزامى ..ردت السلام وهي تجلس قريب منها ! ام فيصل باستغراب: ما نزلت للقرية؟! خزامى بضيق: لا تأخرت بالجامعة وما يمديني! اجلتها لباكر رح تروح معي ليان! أم فيصل باقتراح: دام إنها كملت الامتحانات ليه للحين جالسه بالقرية..يا دوب يمديك قبل النتائج تعلميها عاداتنا وتقاليدنا وتصرفاتنا..بدون زعل البنت بحاجة لدروس تكثيفيه بالاناقة والترتيب قاطعتها خزامى بضيق: وتتوقعين تسمع الكلام او تتغير ..ااااه يا خالتي وربي حامل هم انتقالها هنا ... لأنها رح تتصادم مع وليد ...متأكدة من هالشيء ...عنيده وما تسمع كلامي وكأني عدوتها !؛ مفتخره بنفسها وكأنها شيء عظيم .. ومفتخرة بالتخلف الي عايشه فيه... باكر لما تنتقل عندي ...لما يزوروني صديقاتي كيف اقدمها لهم ؟! حتى بين سلفاتي ما أدري كيف أتعامل معها ..وانت تعرفين سلفاتي كيف بناتهم قاطعتها ام فيصل: كلميها بالطيب أمك تقول إنه أسلوبك جاف معها قاطعتها باستنكار: أنا اسلوبي جاف؟! ما ادري امي كيف تنظر للأمور...دلعوها بزيادة يا خالتي وكل شيء تبغاه تعمله وما احد يعارضها سواء كان صح او غلط! والمشكلة راكبه رأسها ما تعيش هنا ..ابوي يقول رح يشتري سيارة وبنفسه يوصلها للجامعه ويرجعها ..متخيله لأي حد وصلت بالدلال؟! أنانيه وما تفكر إلا بنفسها .. أهم شيء مصلحتها ما تقول وش جابره ابوي يطلع للمدينه كل يوم علشان حضرتها!! وربي لو يسمع هالكلام وليد ما يحصل خير ... أنا متأكدة رح تصير مشاكل وعلوم يوم النتائج وتقع فوق رأسي!! قولي يا خالتي وش اعمل؟! ام فيصل زمت شفتها بضيق: المشكلة وليد وسلطان خشبهم ما هو متراكب وما نبغى تصادم بينهم!! الله يهدي النفوس..انت يا خزامى باكر لما تنزلي للقرية حاولي تكلمي معها بهدوء وخليها تتفهم الموقف ..لا تنسين علاقتها بليان حلوة ..يمكن تقدر تقنعها وتغير رأيها!! خزامى بعبوس: يصير خير!! ** ** يوم النتائج في بيت ابو فيصل ...ام فيصل بابتسامه فخر بأحفادها..نطقت بفرح: مبروك يا عبدالله !! عبدالله بفرحه بابنته الي طلع اسمها من ١٠ الاوائل..نطق وهو يضمها بقوة : الحمد لله ...تستاهل ريناد!! ريناد ودموعها تنزل من الفرح : الحمد لله ليان بابتسامه: ودكتوره جديده بالعائلة ...علامة عمر سكتت لما دخل عمر وبيده الجوال ويصرخ:نجحت نجحت فيصل الي كان جالس على أعصابه: كم نسبتك؟؟! عمر بفرح: ٩٨ ٩٨ اوووووه يسسسسس ام فيصل مطت شفتها وهي تشوف حركاته: الله يعطينا العقل ..قول الحمد لله!! نطق بفرح: الحمد لله وبدأ يسلم ويبارك له الموجودين!! رعد وهو منشغل بالجوال ..وبضجر: اففففف ليان بعبوس وقلق ناظرته: ما في شبكة!! رعد بعبوس: ما في شبكه...ليه ما أخذتي رقمها كان طلعناه قطع كلامه وهو يناظر أمه وابوه لما دخلوا والعبوس مرسوم على ملامح أبوه.. نطق بتردد: بابا وش صار وليد زم شفته بضيق وهو يناظره وبعدها التفت على أمه الي نطقت بتساؤل: وش صار على نتيجتها؟! جلس وهو ينطق : ما في اتصال عبدالله بانتقاد: وهي ليه للحين جالسه بالقرية؟! المفروض لما انتهت الإمتحانات انتقلت هنا! خزامى ناظرته بضيق من كلامه وكأنه ينقصها أحد يعبي راس وليد !!..ما تتمنى غير تمر هالايام على خير!! ...لو ما ركبت بيلسان رأسها ورجعت معهم كان الحين الاوضاع اخف!! فيصل بتساؤل: هي كيف مستواها ؟! رعد نطق بحميه: اختي أشطر وحده بالقرية عبدالله مط شفته بتعالي: تلاقي ما احد يدرس بالمدرسه غيرها !! خزامى انتفخ وجهها من كلامه ... كانت رح ترد بس سكتت وهي تناظر زوجة فيصل لما نطقت: بالعكس نسبة التعليم بالقرى ممتاز ويحصلون على نتائج مرتفعة ! فيصل ناظر ساعته: أنا وعبدالله طالعين للتجهيزات خبرونا بنتيجة بيلسان اذا نجحت حتى تكون حفلة جماعية الليلة!! ليان ما عجبها كلام عمها حست بنبرته استهانه وانها ما رح تنجح ...زفرت بضجر ورجعت تحاول تتصل بسلطان لعله يمسك الخط!! ** ** يوم النتائج ما نامت الليل وهي تنتظر النتيجة...ناظرت جدتها وقلبها يدق طبول: ابوي تأخر!! ام خزامى وهي تفرك يدينها بتوتر: الحين يجي إن شاء الله!! عضت على اصبعها الابهام وهي تحاول تهدي أعصابها من شدة الخوف والتوتر ....تعبت كثير بالدراسة ...تبغى تفرح وتزغرد بعد النتيجة ...الحين رح يتحدد مصيرها ومستقبلها ... ام خزامى جلست بتعب من الوقوف: اذا طلعتي من الاوائل على المملكه رح نروح للمدينه قاطعتها وقلبها ما هو متحمل اي شيء: يا رب مب قادرة اتحمل ..احس اعصابي تلفت! أم خزامى تحاول تسيطر على قلبها الي يدق بسرعه ... همست بخفوت : يا رب!! بدأت بيلسان تمشي بالصالة بعشوائية ...اذا تأخر جدها كمان شوي رح تموت ... أول ما فتح جدها الباب نطقت برعب: وش صار؟! سلطان قفل الباب خلفه ودخل بخطوات ميته ...ناظر زوجته الي نطقت وأعصابها تلفت: بشر يا سلطان ترى اعصابي على نار!! تردد بالكلام وهو يحس بالخيبة ..ما يدري كيف ينقل الخبر ... وبصعوبه نطق: نجحت ام خزامى براحه: الحمد لله الحمد لله!! بيلسان تحس قلبها رح يوقف بأي لحظة..ملامح جدها ما ريحتها ...نجحت بس كم معدلها ...نطقت بريق ناشف..وصوت مرتجف خايف يسمع الخبر: كم نسبتي؟! سلطان سكت للحظات وبعدها نطق بضيق: ٦٩ حست نفسها سمعت غلط ..من هول الصدمة رجولها ما تحملتها ..جلست على الارض مباشرة...عقلها ما استوعب هالكلام..يمكن مقلب من جدها ...وبصوت مخنوق نطقت: كم؟! ام خزامى بعدم تصديق: ٦٩ اكيد في غلط بالموضوع!! سلطان اقترب من بيلسان وتجاهل اعتراض زوجته ...نزل لمستواها ونطق بمواساه: قولي الحمد لله! ناظرته وعيونها غرقت بالدموع ... تحس الرؤية عندها ضبابيه ...تحس نفسها بحلم ورح تصحى منه بأي لحظة...تعبها وسهرها كله طار بالهواء.... تتجرع خيبه ما بعدها خيبة ...٦٩ كيف صار كذا ؟!! سلطان حط يده على كتفها: قولي الحمد لله! ناظرته ودموعها تنزل بغزارة .. وبصوت مخنوق نطقت: الحمد لله ال قطعت كلامها بشهقه ما قدرت تكتمها!! سلطان يمسح على شعرها بحنيه: ولا تهتمي يا ابنتي ...كله امتحان لا راح ولا جاء ...ما خسرت شيء ..الخسارة إنك ما تدخلين الجنه وباقي الامور مقدور عليها .... هذي مراحل الحياة بعد مده رح تكون الثانوية ذكرى وما تعني لك شيء...يلا عاد امسحي دموعك وخلينا نفرح بنجاحك!! بيلسان وهي تمسح دموعها..نطقت بضعف: مب قادرة قبل ما تكمل احتضنتها ام خزامى بحنيه وهي تنطق وتبكي على حال حفيدتها: ابكي يا بيلسان وما تكتمي شيء بقلبك .. ابكي رح ترتاحين الحين!! كلام جدها كان عبارة عن زر لدخولها بموجات بكاء مريرة ... سلطان زم شفته بضيق وهو يسمع لصوت نحيبها بصوت مرتفع ... ما توقع هالنتيجة لانه يعرف بيلسان ومستواها الدراسي مرتفع ...ما يدري وش صار معها حتى حصلت على هالمعدل ... مسح دمعه تسللت لخده حزن على حالها ... تعبت وماذاقت طعم النوم ومتأكد إنها تستحق الطب...ما هو سهل عليها تحصل على معدل متدني !! دوم يتمنى يدخل السعادة لقلبها ... بس الثانوية شيء ما هو بيده !! ناظر جواله الي يرن بإسم وليد ..ما له خلق لهم ..وضعه صامت ورجع ناظر بيلسان الي بدأت تهدأ .. ام خزامى بحنيه: ارتحتي يمه؟! بيلسان نهضت عن حضن جدتها ..مسحت وجهها وهي تحس باختناق وكأنها تتنفس من خرم ابره...وبنبره موجوعه: أنا آسفه تعبتكم معي وبالاخير خذلتكم سلطان قاطعها بعتب: وش هالكلام؟! لا تهتمي يا بنتي الحياة محطات ..ما زبطت معك هذي المحطة رح تلقين محطة ثانيه ...ما تدري وين الخير؟! دوم قولي لعله خير؟! ام خزامى بتأكيد: خير ان شاء الله..وش تبغين بالطب كله دم وإبر ...يوجع القلب مناظره ابتسمت بمراره على كلام جدتها ... ورجعت ناظرت جدها الي نطق: غسلي وجهك .. خليني اروح أحلي اهالي القرية بهذي المناسبة ...ابنتنا الحلوة كبرت ونجحت ..وش نبغى اكثر من كذا!! ضحكت بالرغم من شحوبها على كلام جدها ...نطقت بتعب: لا تخلينا مضحكه للناس ..من زين هالمعدل ام خزامى : الاهم انك نجحتي! هزت رأسها على مضض وبداخلها ماسكه نفسها ما تدخل بموجه نحيب من شدة الحزن والخيبة الي بداخلها ... انكسر خاطرها بالنتيجة ...ما توقعتها أبدا ...همست بالحمد ما يدري الانسان وين الخير ... استأذنت وتوجهت لغرفتها تغسل وجهها ....اقتربت من المرآة وناظرت نفسها..عيونها منتفخه ..وجهها احمر شاحب باهت ..خالي من معالم الحياة!! يضيق النفس عندها كلما تتذكر المعدل عقلها ما هو مستوعب النتيجة...يمكن في غلط او خربطه بالموضوع!! وش يطلع بيدها إلا إنها ترضى بنصيبها !! ** ** ** صدمته بالمعدل ما توقعها .. وش موقفه من اهله شيء مخزي ...وبنبره غاضبه نطق:كله من إهمال اهلك...دلعوها بزياده وطول الوقت ساحبها للمزرعه واذا في دراسة ما تدري عنها ! ...بس أنا الغبي الي قبلت بذي المهزلة قاطعته بقهر: اذا هي غبيه اهلي وش دخلهم!! نطق بنبره اعلى: شوفي عيال اخواني معدلات ترفع الراس ...وربي شيء يقرف خزامى رح تنفجر منه يكبر الموضوع بدون معنى: لا تشمت الناس فينا .. وخليك عادي ...التدريس بالقرية سيء علشان كذا البنت ما حصلت معدل ..وبعدين نافشين ريشهم الله يخلي الدروس الخصوصية كم دفعوا إخوانك تكاليف حتى حصلوا على هالمعدل قاطعها بقهر: اسكتي اسكتي ..هذي ليان ما بخلت عليها بالدروس الخصوصيه ومع ذلك ما حصلت الطب ...وربي فيني قهر زفرت بضيق: وليد خلاص قفل الموضوع وخلينا ندخل للداخل وكأنه الوضع عادي !! ما نبغى فضايح! هز رأسه وملامحه منتفخه من القهر....دخلوا للصالة وجلس بهدوء ...ابو فيصل ناظره: مبارك نجاح بيلسان ناظر ابوه بضيق وكأنه يتريق عليه ..على وش يبارك ؟! ام فيصل وهي تناظره بانتقاد: وش فيك قالب وجهك ...كل طالب وله قدراته ...هذي قدرة البنت ..لزوم تبارك لها وتأخذ لها هدية نطق بقهر: يبغالها عصاه تكسر رأسها ...البنت تدلعت زيادة عن اللزوم وما تدري عن هوى الدراسة! ابو فيصل بدفاع: والله البنت درست وتعبت بس خلاص نصيبها كذا!! والله سلطان من فرحته بها يوزع الحلوان على كل اهل القرية خزامى مطت شفتها بقهر من تصرفات ابوها ... يبغى الناس تضحك عليهم ؟! فيصل وهو يلعب بالسبحة: ما عجبك معدلها خليها تعيد هنا مرة ثانية!! ابو فيصل باعتراض: وشهوله تعيد مرة ثانية..تقدم للجامعة والي يطلع لها تدرسه ... اتصل بسلطان وخليه ييجي علشان الحفلة وليد ما عجبه الاقتراح .. وكأنه ناقصه مسخره: من زين معدلها حتى تحتفل ابو فيصل بإصرار: لو كانت نسبتها ٥٠ تستاهل بيلسان حفلة ..تنسى من خلالها تعبها بالثانوية!! وليد مط شفته بسخرية: اي تعب والسبعين ما قدرت توصلهم!! كلمه انت يبه يمكن يسمع الكلام منك!! ** ** ** جالسة على حافة الشباك بروح خاوية ...مرت ايام على نتائج الثانوية للحين ما قدرت تتخطى معدلها. .... رفضت تروح للمدينة ما لهاخلق تشوف أحد وتجامل فوق طاقتها .... تحاول تظهر لجدها وجدتها إنه كل شيء رجع لطبيعته ...لكن بداخلها غصة ما قدرت تبلعها ....تحس كل طموحاتها وأحلامها تحطمت مرة وحده .... تحركت خارج الغرفة وهي تسمع صوت جدتها تنادي عليها...اقتربت بملامح هادئة: هلا يمه!! ام خزامى بتردد ما تدري كيف تنقل لها الخبر: جهزي يمه اغراضك وليد باكر رح يأخذك عبست ملامحها بضيق: بس ام خزامى برجاء: يا يمه والله لو يطلع بيدي ما تغيبي عن عيني لحظة وحده!! ابوك وجدك احتدت الامور بينهم ..ما ابغى تكبر المشاكل اكثر ...وجدك ركب رأسه يقول ما تطلع الا برضاها ..ويقول رح يأخذك للجامعه بنفسه مطت شفتها بسخرية: اي جامعه يمه؟! ما رح يطلع لي ..ودام إني ما رح ادرس وشهوله ارجع لهم قاطعتها بضيق: وليد راكب رأسه يقول حتى لو ما درست خلاص ما عاد يبغاك تجلسين هنا ...وانت تعرفين كان يبغى يسحبك قبل النتائج قاطعتها بضيق: هو فجأة تذكرني ام خزامى برجاء: ما رح تخسرين شيء جربي تعيشي معهم اسبوع ..اذا ما ارتحت كلمينا وربي ما اتركك عندهم!! بيلسان ناظرت جدتها للحظات ..بعدها نطقت بهدوء: ان شاء الله وتحركت لغرفتها والضيق تلبسها...بإمكانها تعاند وترفض الانتقال ..ما تبغى تكون السبب بالمشاكل... وبالنهاية هم أهلها ومصيرها ترجع لهم .... سمعت إنه يوم النتائج اشتبك مع جدها بالكلام ...ما هو عاجبه نسبتها ...مقارنة بعيال عمها ... قبضت يدها عند قلبها...ما هي قادره تتخطى النتيجة !! مسحت دمعه تسللت على خدها... بدأت تجهز أغراضها ... وكلما تمسح دمعة تنزل غيرها!! ** ** ** ** قررت تجتمع مع صديقاتها وتودعهم ...لبست العباية والشيلة على عجله وطلعت من الغرفه تستأذن من جدتها ... بعد وقت وقفت قدام البيت وهي تتنفس الصعداء ...تناظر من حولها نظرة وداع ..ما تدري متى ترجع لهذا المكان ...زمت شفتها بضيق وهي تحس انها رح تفارق روحها ... تحركت باتجاه بيت نجوى حتى تجتمع مع البنات هناك ... طرقت الباب بتوجس ...رجعت خطوة للخلف وهي تحس بالاحراج لما فتح لها ابو نجوى ... نطق بترحيب: هلا حياك الله يا ابنتي ادخلي .. وبصوت عالي نطق: نجوى يا نجوى!! اقتربت نجوى وناظرت بيلسان وصرخت من الحماس لشوفتها! نهرها أبوها بغضب:وجع .. ابتسمت نجوى بتورط نسيت وجود ابوها ...سحبت بيلسان للداخل وهي تنطق: ما بغيت تزوريني! بيلسان ناظرت الغرفه وبضيق نطقت:ارسلي اختك تجمع الشلة هنا ابغى اقولكم شيء!؛ نجوى هزت رأسها ..طلعت من الغرفة حتى ترسل أختها للشلة... وبسرعه رجعت وهي تحقق : وش صاير ابتسمت بيلسان بدون نفس على لقافتها:لما يجتمعوا البنات نجوى كشت عليها:انا وش يصبرني لذاك الوقت. ..المهم قولي وش هببت بالامتحانات يا مجنونه ؟!! وش هالمعدل الخايس الي حصلتيه؟! ابتسمت بيلسان بمرارة: ترى جايه اتونس فكيني من النكد نجوى تربعت على الأرض قدامها : وربي لما قالوا ما صدقت ..قلت اكيد قي خطأ بالموضوع والا بيسو كيف تحصل هالمعدل..طيب ابوك وليد وامك وش قالوا؟! بيلسان مطت شفتها بسخرية: سمعت إنه مولع من العصبية وتشاجر مع أبوي سلطان ...وكان يبغى يسحبني لعندهم بس جدي ابو فيصل تدخل وحلف عليه يمين يتركني كم يوم ... ما ادري احس رد فعله مبالغ فيها ؟! نجوى مطت شفتها بحسره: قولي الحمد لله جدك تدخل .. أنا المسكينة ما لقيت احد يحميني من امي .. كشفت عن يدينها : شوفي مكان ضربها وربي شعري قطعته بيلسان عبست ملامحها وهي تنطق بسخرية: ليه أمك متوقعه تكونين من الاوائل على المملكة ؟! نجوى بضحكه: لا كانت متوقعة احمل مادة أو مادتين ..وما توقعت أرسب بكل المواد! بيلسان خزتها: استغفر الله حتى التربية الإسلامية ما قدرت تنجحين فيها ! بس أمك كمان بالغت بتصرفها ..يعني رسوبك شيء مؤكد منه ...ما أدري ليه تضايقت وتصرفت كذا نجوى قاطعتها بابتسامة عريضة: من قهرها ...وقت الشغل أمسك الكتب وما اقبل اشتغل بحجة الدراسة ...طبعا لما شافت النتيجة وراسبه بكل المواد ...ما أدري كيف هجمت علي ونزلت فيني طق تطلع حرة الايام الماضية!! ابتسمت بيلسان على ملامحها: وتضحكين؟! نجوى بروقان: متعوده عليها دوم تطقنا! ما عندنا مصطلح الكرامه بيننا أنا وأمي ...حنا مو مثلك يا مدلعه اذا احد قال لك بسسسس تبكين!! فتحت عيونها باستنكار: يالكذوب! بصراحه أنا ما اذكر عمري انطقيت ! نجوى مطت شفتها: يا عمي انت غير عنا !! يا حظك رايحه للمدينة ما هو مثلي مندفسه هنا !! بيلسان بوجع: روحي مكاني وأنا اتركوني هنا ... أنا مثل السمك يموت بدون الموية وأنا بدون القرية أضيع قطعت كلامها بألم وهي تناظر نجوى: وجع ليه تضربين؟! نجوى تبغى تفترسها: لأنك وحده غبية وعبيطة .. تدرين راكان والا تركي وكثير عليك ! حركت شفتها ترد بس سكتت وهي تسمع الباب ينطرق اكيد البنات وصلوا!! ** ** ** قضت البارحة يوم جميل مع شلتها...تونست وغيرت نفسيتها شوي...ما تدري تونست فيهم وخاصه انه الشلة كلها راسبه!! ابتسمت بمحبة للبنات ...تحب بساطتهم وعفويتهم ..ما في تكلف أو مجاملة بصداقتهم!! رح تشتاق لهم كثير ...تنهدت بضيق وهي تسمع صوت جدها يحثها حتى ما تتأخر.. أكيد أبوها وصل!! تحس نفسها تساق للموت ...حملت اغراضها وطلعت من الغرفة بملامح هادئة... وليد رفع نظره لها لما اقتربت منهم .. انزعج من الذكريات الي تداهمه لما يدخل القرية .... اقتربت وسلمت عليه بهدوء ...هز رأسه بنفس الهدوء: كيفك قاطعته وهي تسحب يدها: بخير وليد وهو يناظر سلطان: نستأذن ام خزامى تحس روحها رح تغادرها ..ما تتصور البيت بدون بيلسان..نطقت بصوت فيه اهتزاز ينذر بالبكاء: اجلس قاطعها باحترام: ورانا خط يا خالتي سلطان يحس بالاختناق وما هو طالع بيده شيء ...ومن داخله مقتنع بانتقالها ...وخاصه البارحه سمع عن اشتباك راكان وتركي ..يخاف واحد منهم يؤذيها..الحين تجلس عند أبوها افضل من هنا ..وبنبره هادئة نطق: بيلسان بأمانتكم سكت لما اقتربت منه بيلسان وحضنته بقوة ..ونطقت باختناق: لا تقول كذا وكأني ما رح اشوفكم مرة ثانية شد على احتضانها وهو ينطق بضيق: كل اسبوع رح اكون عندك ... ام خزامى سحبتها وهي تحضنها وتقبلها ودموعها تنزل على خدودها ...بيلسان بصوت مخنوق: ليه تبكين يا يمه ..الحين أبكي! ام خزامى بوجع: لا تبكي يا قرة عيني ..رح اشتاقلك ..ربي يسعدك ويحفظك!! زمت شفتها بقوة تمنع دموعها تتساقط ما هي قادرة على وداعهم !! سلطان ابعد زوجته : ربي يسهل طريقكم ...خلاص كافي الحين تهون البنت ! وليد وهو يناظر ملامحها والاختناق واضح عليها بس ماسكه نفسهابقوة...متعلقة فيهم وكأنهم اهلها ...نطق بهدوء: مشينا!! مطت شفتها بضيق ..وهي تتحرك بدون ما تناظر جدها لأنها ما تضمن نفسها ترتمي بحضنها مرة ثانية وترفض الرجوع مع وليد ... اقتربت من السيارة ...ناظرت المكان من حولها بوداع ...اخذ وليد اغراضها ووضعهم بالسيارة .... سلطان وهو يحثها تركب: قولي بسم الله وتوكلي على الله!! ناظرته برجاء يخلصها من هالموضوع ..اقترب وليد وهو ينطق بحزم: يلا تأخرنا!! مطت شفتها بضيق ...وجلست جنبه ....غمضت عيونها للحظات ..بعدها التفتت لجدها لما رفع يده بابتسامة: مع السلامة!! رفعت يدها ودموعها على وشك النزول...تحرك وليد بهدوء ..وعيونها تناظر كل زاويه بالقرية وكأنها آخر مرة رح ترجع لها !! تحس تركت قلبها هنا .....وغادرت بدون قلب... لما وصل الخط العام ..نطق بهدوء : متضايقه ؟! كتمت ضيقها ونطقت بهدوء: عشت معهم كل سنين حياتي ما هو سهل علي أبعد عنهم! هز رأسه بتفهم: رح تتعودين ...الحين رح يصير لك حياة جديده واهتمامات جديدة ... والدراسة رح تعيدي الثانويه ناظرته بفزع بالنسبة لها الثانويه كان كابوس ..تعبت وذبلت وذاقت الويل فيه وبالنهاية انكسرت كل احلامها .. وبداخلها غصة ما تجاوزتها ...مستحيل ترجع لنفس العذاب برجلينها ...اخذت حظها فيه وما رح تعيد التجربة مرة ثانية! كرر كلامه لما شاف سكوتها: رح تعيدي الثانويه ..ورح اسجلك بأفضل المدارس قاطعته بنفس الهدوء وبداخلها إحباط وما عادت تثق بقدراتها بعد ما خابت بالنتيجة: ما رح أعيد الثانوية...كل إنسان وله قدراته .. وأنا هذا المستوى الي استحقه قاطعها برفض لتفكيرها: مو كل الناس يحالفهم الحظ بالتجربة الاولى ...في ناس كثير عادت قاطعته تنهي الموضوع: وفي ناس كثير رضيت بمعدلها قاطعها بنرفزه: عاجبك نسبتك؟! هزت رأسها بمكابره: ايه الحمد لله ..غيري يتمناها ابتسمت بدون نفس لما طرى في بالها نجوى الي تمنت لو حصلت على ٥٠ !! مط شفته بضجر من تفكيرها ...سكت للحظات وبعدها نطق: رح انتظر قبولات الجامعة ..بعدها نشوف وش رح يطلع لك!! هزت رأسها بتسليك ..ومن داخلها الشغف للدراسة مات وما له حضور ...ما عادت تفرق معها تدرس او ما تدرس كله بدون طعم !! ** ** ** بعد وقت من وصولها جلست بالصالة وهي تحس بالغربة ...ياااااه زمان ما دخلت هذا البيت ... جلست ليان جنبها وقرصتها بخدها بقوة...وهي تحس الدنيا ما هي واسعيتها من الفرحه: اموت على الي يستحون!! زمت شفتها بيلسان بضيق وهي تنطق بهمس خافت: انكتمي!! رعد بابتسامه: وربي اول ما دخلت البيت حسيته منور.. لجين وهي تناظرها بغيره: تراه كذاب من الطراز الحديث ..يحب المدح والمجاملة بيلسان ناظرت لجين ...العلاقة بينهم شبه معدومه يمكن بسبب فارق العمر بينهم... وكأنه ينقصها بزران!! عبود ناظر لجين: تقولين هالكلام من غيرتك .. لأنها ليان تحب بيلسان أكثر وحده! ليان بفرح: وربي أحبها اكثر وحده ...فرحانة كثير وأخيرا رح تشاركني نفس الغرفة ..نجلس نسهر مع بعض!! بيلسان ناظرت ليان وحكت جبهتها باحراج تحسها تبالغ بالكلام وبإظهار مشاعرها!! خزامى قفلت الكتاب الي بيدها ...وبهدوء نطقت: ليان خذي بيلسان للغرفة خليها ترتب اغراضها !! عبود بتدخل: خليها جالسه ..زمان ما شفناها ... والتفت على اخته وهو ينطق: وش شعورك لما انتقلت هنا قاطعه رعد : انكتم انت واسئلتك البايخه... ختم كلامه والتفت على بيلسان بلقافه : بالطريق ابوي وش قال لك ؟! خزامى ناظرته بصرامه: رعد!! عفس ملامحه بقهر : يا ربي أنا وش قلت ...مجرد سؤال سؤال ليان ضحكت على ملامحه: يا حبك للقافه ! تعالي يا بيسو خلينا نجلس بغرفتنا!! تحركت معها بهدوء...دخلت الغرفة وهي تناظر ليان الي تتكلم عن الغرفة والترتيبات الي عملتهم ... قاطعتها بملل: ليان اتركي ذي السوالف...لو بيتكم قصر ما يغنيني عن غرفتي بالقرية!! ليان بإحباط ناظرتها: يا أختي انت عجيبة وغريبة..احيانا اشك بعقلك ...وش يعجبك هناك؟! جلست بيلسان على السرير وهي تنطق بحنين: تتوقعين امي وأبوي وش يعملون الحين؟! ليان : باكر تتعودين على فراقهم ..تخيلي نفسك تزوجتي ؟! كيف رح تتركينهم؟! بيلسان ما تدري ليه طرى في بالها صاحب المزرعة ...نهرت نفسها على الغباء الي فيه ..تقنع نفسها انها تجاوزت الموضوع بس تحس دوم يكون على بالها وتتمنى ترجع صغيرة تجلس معه وتكلمه ... مع انتقالها للمدينة انقطع اي أمل يكون من نصيبها ...واضح إنه ابن عز ما رح يناظرها ...وكل نظراته له كانت حقد وكره بس البنات فهموا غلط ..يبغون عرس يطبلون فيه ...وما لقوا الا قلبها العبيط يصدق كلامهم ... ليان وهي تشوف سكوتها ..نطقت بضيق: بيلسان وربي ما نعض ولا نأكل اللحوم البشرية عقدت حواجبها بيلسان بعدم فهم لكلامها! ليان بعبوس: يعني الي يشوفك يقول ذول وحوش ..والله إننا عسل ورح تندمي على الايام الي قضتيها بالقرية...بنات عمي وعمتي وحتى العيال يا زينهم ...رح تنبسطين معنا وتنسين القرية!! خلاص فكي الكشرة ! ابتسمت بيلسان على كلامها: مو كذا الموضوع ..بس أنا عشت حياتي هناك صعب أتأقلم على حياة جديدة ليان بثقه: رح تتأقلمين ** ** ** في اليوم الثاني ..طلعت من الحمام وهي ما تشوف من النعاس..ما نامت الليل ...ما عرفت تنام على السرير...صلت الفجر وفرشت على الارض ونامت... أول مرة يمكن تصحى وقت الظهر ... عقدت حواجبها باستنكار وهي تشوف ليان داخله ومعها مجموعة بنات ... نطقت بفرح: رح أعرفكم على أختي الحلوة! ضربت جبهتها بعدم استيعاب لتصرفات ليان ...تحسها مبالغ فيها ... زمت شفتها لما بدأت تذكر اسماء البنات وصلة القرابة بينهم ...ما استوعبت أي كلمة ...كتمت انزعاجها من تصرف ليان كذا مدرعمه عليها بالبنات ... وبابتسامة مجاملة سلمت عليهم!! حست من نظراتهم واضح ما عجبتهم ... ناظرت ليان الي نطقت بحماس: وش رأيكم اليوم نطلع للسوق...حتى تشتري ريناد وبيسو ملابس للجامعة! ريناد بتأييد: ما تحتاج رأي أكيد رح نطلع!! عائشة وهي رافعه حاجب: أي ساعة لأنه دوامي ليلي!! رؤى: بعد العصر شروق : مع مين نطلع؟! ليان بفرح للطلعة: خالتي خزامى قالت اتفقي مع البنات ورح تأخذنا بنفسها!! تحركت بيلسان بهدوء بدون اي تعليق ..لبست جلال الصلاة ....فرشت سجادة الصلاة ...وقفت باعتدال ونوت الصلاة وهي متجاهلة كلامهم!! شروق رفعت حاجب وبصوت هامس: وهذي اختك وش فيها منفسه كذا!! ليان بترقيع: دوبها صاحية للحين عقلها ما اشتغل... عائشه جلست على سرير ليان وهي تنطق : ومتى يشتغل عقلها!! ليان اشرت لها على شفتها حتى تسكت وما تتكلم كذا قدام أختها تخاف تزعل! رؤى باقتراح: بنات خلينا نجلس بالصالة ولما تكمل اختك صلاة تنظم لنا! ارتاحت بيلسان لما اقترحوا هالشيء وطلعوا من الغرفة!! كملت صلاتها وجلست تستغفر ...ما استلطفت البنات والانطباع الاول الي أخذته عنهم كان سيء ... حست إنهم متعاليين وهي ما تحب الناس الي كذا..يمكن تكون نظرتها غلط ...بس الانطباع الأول كان كذا !! رفعت نظرها لأختها لما دخلت وقفلت الباب بهدوء: تعالي اجلسي! بيلسان بملل: انت من عقلك مدرعمه البنات علي كذا بدون خبر! ليان تتريق عليها:نسيت اخذ منك موعد! اقول قومي نجلس وقبل ما تعترض سحبتها بقوة للخارج ..اقتربت من البنات وجلست بهدوء ! اكره ما عليها احد يناظرها بتأمل ...عائشة وهي مسلطه عيونها عليها بتأمل: كيفك يا بيلسان؟! ردت بهدوء: بخير رؤى: رح نسألك أسئلة حتى نتعرف عليك وعلى شخصيتك... وأول سؤال لي ...ليه رافضه تسكنين هنا؟! بيلسان عقدت حواجبها بعدم رضا ...ليه جالسه بمؤتمر صحفي..ما راق لها هالكلام .. وبأسلوب هادىء نطقت: ما أحب الاسئلة ..والتعارف يكون مع الايام!! ريناد اعطت رؤى نظرة شماته..وبعدها نطقت تغير الموضوع: يقولون هاليومين نتائج القبولات ...معقول يطلع لي التخصص الي أبغاه؟! عائشه بتأييد: اكيد رح يطلع لك معدلك يؤهلك لأفضل التخصصات ليان بابتسامه: احيانا افكر أعيد الثانوية عائشه عبست ملامحها: ولا تفكرين بالموضوع ..خليك بائعة ادوية افضل!! شروق وهي تقترح لبيلسان: لو معدلك مرتفع شوي كان درست مثل عمي وليد إدارة مستشفيات وتصيرين مديرة! بيلسان انزعجت من كلامهم ..ما تدري هي منفسه والا هم طينتهم ثقيلة ؟! أو تعرضوا لموضوع للحين مجروحه منه؟! وبهدوء ردت عليها: ما تهمني الدراسة ... وعلى الاغلب ما رح أدرس عائشه باستنكار:كيف ما تدرسين! عائلتنا معروفة بالفهم والذكاء الكل دارس بأرقى التخصصات ما يصير قاطعتها بيلسان ببرود: عادي يصير لكل قاعدة شواذ ..ما رح تنقص الدنيا اذا تخلف واحد عن الذكاء العالمي الي عندكم؟! شروق غمزت لها: قولي تفكرين تكملين نص دينك؟! عائشه قاطعتها بقوة: يا ويلها تفكر بالموضوع .. أنا اكبر وحده وما احد يتزوج قبلي!! ليان مطت شفتها بسخرية:عشتو ...ومتى إن شاء الله نجلس ننتظرك! عائشه عبست ملامحها بقهر: وش رأيكم اقوله تعال أخطبني؟! رؤى فتحت عيونها بصدمه: الاخت مزبطه وضعها؟! عائشه كشت عليها: تخسين اكون كذا ... أنا اتكلم بشكل عام... وبعدين جدي أبو فيصل قال ممنوع اي وحده من حفيداته تتزوج قبل ما تكمل دراسة ... شروق باستبعاد: ذيك المرة كان يقول للعيال الي يبغى ونوى يكمل نص دينه يختار اي وحده من البنات والحفلة على حسابه!! عائشه تونست: ايه وش قالوا ؟! شروق بقهر: نادت علي جدتي واضطريت اروح قبل ما أحد يكتشفني اتجسس عليهم!! بنات بالله عليكم ما أحد يتكلم بهذا الموضوع وتفضحوني وربي اذا عرف بابا الا يمسح فيني الأرض ليان بانتقاد: وانت ليه تتجسسين من الاصل؟! شروق زمت شفتها بضيق: للصدفة كنت قريبة ..وشدني الموضوع وحبيت اطمئن على مستقبلي؟! عائشه بجدية: بنات بعدكم صغيرات على ذي السوالف ...لا احد يسمعكم وتصير علوم ! مر الوقت وبيلسان تسمع كلامهم بهدوء...رفعت نظرها على دخول خزامى وهي تنطق: جهزوا نفسكم حتى نطلع! بيلسان ناظرتها تحسها تبالغ بالبرستيج ....من لما جاءت ما انتقدتها او تكلمت معها بشيء ..البرود يمثل العلاقة بينهم ....نزلت نظرها لما أشرت خزامى لليان ...ما تدري وش همست لها !! بعدها اقتربت ليان من بيلسان: يلا نجهز قاطعتها بيلسان بملل هذي الأمور آخر همها: ما رح اطلع !! خزامى بحزم ناظرتها: لا تأخرينا قطعت كلامها والتفتت لوليد الي دخل وهو يسأل باستغراب من تجمعهم :وش فيه؟! خزامى ناظرته: ما تبغى تطلع للسوق تشتري ملابس للجامعة!؛ ألقى نظرة سريعة على البنات يناظرون الموقف بدقة..بعدها سلط نظره على بيلسان جالسه بهدوء ولا كأنه الموضوع يهمها..وبهدوء نطق: مو مشكلة تروح مرة ثانية ...اتركيها على راحتها حتى تتعود على الاجواء!! خزامى ما عجبها كلامه ...التفت على بيلسان الي ملامحها واضح عليها الاستغراب ..وبحزم نطقت: أنا مو فاضيه كل يوم اطلع للسوق قاطعها بهدوء: خلاص انت لا تشغلي نفسك أنا أخذها بنفسي للسوق ...تقدروا تروحون الحين!! تحركي ليان ولا تأخرين البنات!! هزت رأسها ليان تجهز نفسها ....وبيلسان من الداخل مصدومه من تصرف وليد ...توقعت يجبرها تروح معهم؟!! كتمت ابتسامتها وهي تشوف خزامى الي واضح عليها الغضب ...مطت شفتها بملل يعني الشيء عندهم بالغصب ما لها مزاج تطلع للسوق ..هي انسانه ولها قرارات ورغبات ما أحد يتحكم فيها!! بعد وقت غادروا البنات ..تنهدت براحة بعد خروجهم ...نقزت لما نطق وهو يقترب منها : بيلسان!؛ رفعت نظرها له ..اقترب وجلس مقابل لها وهو ينطق بنبرة هادئه فيها صرامه: اسمعيني زين .... ناظرته وما تدري ليه قلبها رجف من نظرته .. تابع كلامه وهو يشوف سكوتها: أنا إنسان ما أحب العناد والدلع الي على قلة سنع .... أنا اقدر وضعك مو متعودة على البنات ومن هذي الأمور...لكن مع الايام هذي الاشياء لزوم تتخطيها ...وتتفاعلين مع الناس بشكل طبيعي... والأهم تسمعين كلامنا ....أمك قالت لك تروحين للسوق تطلعين معها وما له داعي العناد وتفشلينها قدام البنات!!, نطقت بتبرير: أنا ما فشلتها... أنا ما لي خاطر بالسوق وهذا الشيء راجع لي ...ما هو عناد ..بس للإنسان مزاج وأنا ما لي مزاج أطلع قاطعها وهو رافع حاجب: وحنا ما نعيش على مزاجك ..في قوانين بهذا البيت تمشين فيها انت وإخوانك ...سواء عجبتكم او ما عجبتكم ..حنا نبغى مصلحتكم ونعرف أكثر منكم!! نطقت بتبرير: انا ما خرقت قوانين البيت..وما عملت شيء غلط ... هز رأسه بهدوء: أدري وأتفهم موقفك وأراعي مشاعرك الحين .. لكن أنا اتكلم للأيام الجايه بإذن الله...انت عشت عند عمي سلطان وحيده وأكيد كان مدلعك ..بس هنا يختلف الوضع تعتمدين على نفسك بكل شيء وتثبتين جدارتك .. والاهم من كل هذا .. حياتك بالقرية لا تطبقينها هنا ... عقدت حواجبها : ليه وش فيها حياتي؟! نطق بهدوء: ما فيها شيء... المطلوب منك تعملين مثل ليان ومع الوقت رح تتأقلمين على حياتنا!! مفهوم!! بلعت ريقها من نظراته أبدا ما ريحتها ..هزت رأسها بهدوء وهي تنطق بتسليك: إن شاء الله! وبتساؤل نطقت: قوانين البيت ما فيها غداء؟! عقد حواجبه باستنكار لكلامهت هو بجهة وهي تفكر ببطنها !! نطقت بإحراج لما شافت نظراته : يعني ما أفطرت والحين بعد العصر .. قاطعها بتفهم : تعالي ننزل تحت الاكل جاهز حست بالاحراج وبتراجع نطقت: خلاص قاطعها بحزم: أنا وش قلت؟! هزت رأسها وتوجهت للغرفة لبست عبايتها والشال ..ناظرت نفسها ما تدري وش فيه وجهها كذا شاحب... طلعت من الغرفة ونزلت مع الوليد بخطوات هادئة ...ناظرت جدتها جالسه بالصالة مع جدها ..اقتربت وسلمت بابتسامة دافئة!! ابو فيصل بابتسامة: عسى عجبتك الجلسة هنا ؟! نطقت بهدوء: الحمد لله!! ام فيصل بهدوء: رح تتعود مع الايام ... ليه ما طلعت مع البنات للسوق بيلسان بهدوء: مرة ثانيه وليد وهو يسأل: اكلتم؟! ام فيصل بنفي: لا ..ننتظر العيال اليوم عازمهم عندي ما ادري وش فيهم تأخروا!! وليد هز رأسه: بيلسان ما تغدت للحين على الاساس يتغدون بالمطعم بس ما راحت معهم!! ابو فيصل هز رأسه : حياها الله ..دقايق ويكونوا العيال هنا نطقت باعتراض: أنا وش ابغى بالعيال أبو فيصل ضحك: خلاص ادخلي للمطبخ وخلي ام خليل تحط لك ! ام فيصل تحثها: روح يمه تغدي ولا تستحين .. هزت رأسها وتوجهت للمطبخ وهي تحس بالحرج ...المكان فاضي ..ناظرت الباب الي يفتح على صالة السفرة...فتحت الباب وحست خارت قوتها وهي تشوف اصناف عديده على الطاولة .... اقتربت من الطاوله وهي تناظر الأكل ...مسكت صحن وبدأت تأخذ لها من الاكل... تشجنت وهي تسمع جدها يرحب بأحد ...غبية لزوم طلعت قبل يوصلون ... ابو فيصل اقترب منها وبدأ يحط لها من الاكل:لا تستحين انت في بيتك! نطقت بخفوت: كافي!! ابو فيصل بابتسامة وهو يناظر احفادة: هذي بيلسان بنت وليد ..البارحة انتقلت هنا ورح تستقر معنا!! وصلها صوت ينطق: حياك الله هزت رأسها بدون ما تناظر احد : الله يحيكم اخذت صحنها ورجعت للمطبخ ..قبل ما احد يكلمها..قلبها يدق بقوة من الاحراج!! الحين يظنون انها مفشوحة أكل!! وصلها صوت وليد وهو ينطق بضحكه: تعرفني يا مسعود ما رح ازوج بناتي الا بعد التخرج ..تبغى خطبة بدون ملكة!! ابو فيصل قاطعه: قولوا باسم الله واتركوا عنكم الكلام! عبست ملامحها معقول أبوها ذبح حاله حتى يسحبها هنا ويزوجها لمسعود!! مسعود !! ليه السالفه على كيفهم يزوجونها؟! حسبي الله على العدو انسدت نفسها عن الاكل..تركت كل شيء مثل ما كان وانسحبت ..وهي تحس بالاختناق اذا كانت هذي خطة أبوها! الا الزواج ما تنغصب عليه!! ** ** ** ابو فيصل وهو ينادي بصوت معتدل:بيلسان بيلسان! ام فيصل باستغراب: ما امداها تكمل اكلها!! هم وليد يشوفها...اشرت له ام فيصل : خليك أنا اشوفها ... تحركت للمطبخ ...استغربت لما شافت الصحن مثل ما هو وما لها أثر ... طلعت للصالة ما في أي احد ...نطقت اول ما شافت رعد: وين بيلسان؟! رعد وهو مستعجل: بغرفتها!! زمت شفتها بتعجب من تصرفها ...رجعت لهم وهي تنطق باستغراب: رعد يقول بغرفتها ابو فيصل: ما امداها تأكل قاطعته وهي تجلس مكانها: الصحن مثل ما هو ما ذاقت منه شيء!! وليد عقد حواجبه باستغراب من تصرفها ...ناظر مسعود الي نطق بروح مرحه: يمكن خافت لما شافتنا داخلين ...انحرجت قاطعه أبو فيصل: ما اتوقع كذا!! وليد : الي يأكل على ضرسه ينفع نفسه!! عمر بتفكير: يمكن تذكرت جدها وجدتها..وانسدت نفسها عن الاكل... جسار رفع حاجب بانتقاد: حتى لو متعلقه بجدها وجدتها المفروض خلاص تتأقلم على الوضع..الي بعمرها يتزوجون ..وما هو معقول كل شوي تبكي او تزعل تبغى أهلها كنان باستبعاد: يمكن تذكرت شيءوطلعت للغرفة تجلبه...تراكم تستبقون الأحداث! أبو فيصل: كملوا أكلكم وما عليكم من البنات ودلعهم انا اتصرف معهم!! صحيح زياد وياسر ما قلتم سبب اعتذارهم للعزيمه!! كنان ابتسم بهدوء: طلع لهم شغل قطع كلامه وناظر وليدالي رن جواله!! وليد ناظر الجوال ..زم شفته بضيق...وبعدها رد بهدوء ....الو ...هلا عمي ...الحمد لله بخير ... الحمدلله...بيلسان بغرفتها ...الحين تكلمها؟!.... لحظة الحين اطلع لها ..لا خليك على الخط ...تحرك خارج المكان وهو عابس ملامحه من سلطان الي رح يكون عثرة بينه وبين البنت!! انتهى البارت ... دمتم بخير 🌹 | ||||
|
| |
 |
| أدوات الموضوع | |
| انواع عرض الموضوع | |
|
|
2373Likes
العرض العادي
