18-08-22, 05:00 PM
| #65 | ||||
 
|  البارت الخامس نزل الخبر على اذانها مثل الصاعقة ....ناظرت خزامى وهي تحس بخنجر الغدر والخيانه منها ...وبنبره هجوميه نطقت: متزوجة وليد؟! وانا مثل الغبية جالسه معك والموية تمشي من تحت رجولي!! وطول الوقت تكذبين وتقولين اسم زوجك سعود؟! يا قو عينك عندك بنت من وليد قاطعتها خزامى الي للحين مصدومه من الخبر: والله ما ادري عن شيء .. وما اعرف وليد الي تتكلمون عنه!! تابعت كلامها وهي تناظر اسيل باستجواب: انت من وين جبت هالكلام ؟! اسيل بكره لخزامى وهي تشوف منار جلست على الارض تبكي بقهر: هذا الي صار بالمجلس والرجال الحين تفرقوا ...وتفركش موضوع منار بسببك!! ختمت كلامها وهي تؤشر عليها باتهام! خزامى ناظرت جدتها الي دخلت الغرفة بملامح واضح عليها الضيق وبتبرير نطقت: والله ما ادري عن شيء يا جدتي قاطعتها ام سلطان وهي تقترب من منار : ادري إنك ما تدري عن شيء ...ما احد فاهم السالفة وكيف صرتي زوجة وليد ...عمك بدر يقول إنه وليد انكر هالموضوع وحلف ايمان إنه ما يعرفكم!! ما ادري سلطان من وين طلع لنا بذي السالفة! على اساس قلتم زوجك مسافر والحين تقولون وليد زوجك!! خزامى هزت رأسها بالنفي..وبنبره ضعيفه والغصه بحلقها من نظراتهم: ءءءءأنا اسيل بغضب: وانا اقول ليه ملتصقة بمنار تأخذين أخبارها منار وهي تمسح دموعها: اتركوني بحالي ... حسبي الله عليك يوم نويت تخربين بيتي وكأنه ناقصه خراب!! خزامى اقتربت منها: اقولك والله ما ادري عن شيء من كلامكم...وحتى لو كلامكم مضبوط انا كل الي ابغاه يطلقني ويسجل بنتي والموضوع منتهي بالنسبة لي!! صدقيني ما رح اكون عثرة بطريقك دفتها منار بقوة: انقلعي من وجهي الله يأخذك!! عبست ملامحها خزامى لما دفتها ...ناظرتهم والكره والحقد يطلع من عيونهم .... وقفت وهي ناويه تطلع وتشوف ابوها وتفهم السالفه منهم ...متأكده في لبس بالموضوع! حملت نفسها وطلعت وهي تسمع جدتها واسيل يخففون على منار مصيبتها!؛ عقلها ما هو قادر يفهم شيء الحين سعود هو نفسه وليد !! مسحت دمعه نزلت على خدها .... وقفت سيارة اجرة ومباشرة توجهت للبيت !! *** *** ** حاضن رأسه بين يدينه والهم اكتساه بعد هالسالفه ...رفع رأسه وناظر امه الي تتكلم بحيره: وش رح تعملون الحين؟!! نطق بضيق: ما ادري وش مصلحتهم من هالكذبة؟!! عبدالله بثقه: انا متأكد انها نفسها الي كانت معك بالمستشفى!! انت قبل المستشفى وين كنت؟!! ناظره بعجز : ما ادري ..ما ادري!! ام فيصل بقلب محروق : تذكر يمه ...انت غبت عنا ٣ اشهر قلت تبغى تروح لمنطقة******* تغير جو وقلت ذيك المنطقه ما فيها شبكة ورح تتأخر هناك...تذكر بذيك المنطقه وش عملت؟! تنهد وهو يهز رأسه: ما ادري ما ادري ...والله ما اعرفهم ام فيصل بتوجس: والبنت!! صك على اسنانه بقهر وهذي البنت لحالها عملت له حالة نفسيه : ما عندي بنات الا ليان!! كذابين اكيد يبغون يرمون بلاهم علي!! ابو فيصل ساكت من البداية يسمع لهم ...وزع نظره ونطق بقوة ومن الداخل يغلى غليان: وليه انت بالذات يبغون يتبلون عليك؟!! سلطان ولد عمك معروف باخلاقه وما ظنيت توصل اخلاقه لذي الدرجة!! انت تخفي شيء عنا وما تبغانا نعرفه؟! هز رأسه بالنفي: وش رح اخفي عنكم؟! ابو فيصل بقوة: وش سبب تكتمك على ذيك الفترة؟!! فيصل ناظر ابوه بتدخل: انا اقول نعمل فحص قاطعه ابو فيصل بغضب: اسمعني زين سلطان يكون ولد اخوي الله يرحمه ..عرضه من عرضنا وسمعته من سمعتنا ...ومستحيل أعملها وتصير بيننا قضايا على ذي المواضيع فيصل ما عجبه كلام ابوه: اجل يحضر الشهود الي حضروا عقد الزواج قاطعه ابو فيصل بحده: تبغى أذله واكسره قدام الرجال؟!! اسمعني زين حتى لو كانت بنته غلطت مع شخص ثاني طول عمره ولد العم ستر لبنت عمه ...رح يتم زواجك منها يا وليد لاني متأكد سلطان ما رح يتبلى عليك...الحرقة الي ارتسمت على ملامحه ما هي تمثيل ... حرقة حقيقية نابعه من قهر استقر بأعماقه!! وليد مط شفته بسخرية: تبغاني اتزوج ذيك المتسوله واتبنى بنتها؟!! حنا وين عايشين ؟! اذا كان ولد اخوك فأنا ولدك !! كيف تقبل لي هالشيء!! ام فيصل وزعت نظرها بينهم للحظات وبعدها نطقت: أنا اقول نترك السالفه تبرد ...شهر شهرين ونعطي كل الاطراف التفكير العميق ما نبغى نتسرع بالقرار وبعدها تندمون!! وناظرت زوجها: اتركه يا ابو فيصل يفكر ... ابو فيصل هز رأسه : أنا رح اترك السالفة لفترة قصيرة وبعدها نشوف وش رح يصير!! عبدالله باقتراح: اطلب منه تشوف البنت ...يمكن اذا شفتها يا وليد يمكن تتغير نظرتك قاطعه بقرف: ترى لما تقولون بنتك احس نفسي رح استفرغ ..ما ابغى اشوف احد منهم!! ام فيصل بعتب: وش هالكلام يا وليد!! ترى كلنا من التراب...ليه هالنظره المستعليه؟!! انت ما تعرف الخير ..يمكن بنت سلطان الي ما هي عاجبيتك تكون خير لك من منار ... ابو فيصل نطق بتحذير: انتبه انتبه تقل احترامك لسلطان يا وليد مهما قال تجاهله أنا الي رح اتفاهم معه!! زفر بضجر من السالفة الي طلعت له ...نطق بهدوء: ان شاء الله!!؛ ** ** ** ام خزامى بقهر من كل شيء: كيف يعني يتركون السالفة لفتره؟!!! يا برودهم ...حنا نحترق على اعصابنا وهم ولا على بالهم!! كل الي نبغاه يثبت الزواج ويثبت حق هالطفلة وبعدها يطلق خزامى ..ونرتاح منهم!! لا تسكت لهم ارفع عليهم قضية يظنون اننا بدون حيلة ويضحكون علينا!! وليه تطول السالفه وهي قصيره!! ابو خزامى وملامحه اكتساها الهم والغم والضيق: المشكلة إنه ينكر معرفته لنا ويحلف ايمان انه ما يعرفنا!! للحظة اتراجع واقول معقول مخربط ؟! وبنفس الوقت متأكد نفسه هو نفسه!! قلت لعمي ما ابغى هالزواج خليه يطلقها ويرجع منار لذمته ما عندنا مشكله!! ااااخ من القهر ...ما يحس بالنار الي احترق فيها!! جالسه تسمع كلامهم والسكون يحيط فيها ...منكر زواجه منها ...للحين ما نسيت كلامه عنها بالمستشفى دوم يتكرر بإذنها ....كيف رح تعجبه وكل عقله وفكره مع منار. ...وش جابها لمنار ما في مقارنة بينهم .... ليه يتزوجها من الأصل؟ الي قاهرها ليه ينكر هالزواج؟! رجحت إنه خايف يؤثر على علاقته مع منار!! ناظرت أبوها الي يكلمها: وش رأيك يا خزامى؟! ما تكلمت بشيء!!! نطقت بغصه..والدموع تلمع بعيونها بانكسار: الحين تبغى رأيي ؟! ومن قبل لما رفضت قلت لي ثقي فيني؟! والحين وش استفدت ؟!! سكتت للحظات بعدها تابعت بحرقه وتوعد :رح ارفع عليهم قضية مثل ما قالت امي وخليهم يعرفون انهم ما يدوسون على طرفنا!! قاطعها بوجع: لا تقهريني يا خزامى ..تظنين علي سهلة ارفع قضية بهذا الموضوع ؟!! عمي واضح من كلامه معنا ..ورح يرجع لنا حقنا ...رح ننتظر ونشوف وش رح يطلع معهم قاطعته بتصميم على رايها: معهم اسبوع واحد ...ما رح اسكت ولا ثانيه. ام خزامى بتأييد: وهذا الي رح يصير ما رح اسكت اكثر من كذا ...يكفي المدة الي قضيناها وحنا نبحث عن حضرته!! ابو خزامى هز رأسه : رح اكلمهم اليوم وشوف وش رح يصير معنا!! خزامى ناظرت أبوها بحزم: من الحين اقولك ما رح ارجع لذمته كل الي ابغاه الطلاق ...ويأخذ بنته وانا رح أرجع للقرية مثل قبل ..بدون هموم ونكد وأحزان ؟ ابغى ارجع مثل قبل حنا الثلاثه نعيش حياة بسيطه ..كل همنا المزرعة!! ما ابغى دراسة ولا زفت ...انا كرهت الحياة هنا..ابغى ارجع للقرية قاطعها ابوها بحزم: وش هالكلام؟! رح تكملين دراسة غصب عنك وبنتك معك صارت جزء من عيلتنا الصغيرة وما رح نتخلى عنها!! كبري عقلك وفكري بواقعية ..هذي البنت ما لها ذنب حتى تعامليها بهذا الجفاء ..انا بالاول كنت ساكت وعاذرك على نفسيتك باختفاء سعود ..دام الحين عرفنا مكانه وبإذن الله نخلص الموضوع باسرع وقت ...ما رح اسمحلك تجافين هذي الطفلة...تفهمين؟!! تنهدت بضيق ...تعرف انه كلام ابوها صحيح ..بس وش تعمل بقلبها الميت !! رح تحاول من جديد لعل وعسى قلبها يلين لهذي الطفلة...ناظرت امها الي نطقت:هذي قطعه منك يا ليت قاطعت امها ما لها خلق تسمع محاضرات : إن شاء الله يمه ** ** ** جالس بالمجلس ويناظر سلطان بكره وحقد بسببه حطم كل اماله برجوع طليقته ....للحين كلام ابو خالد يتردد على اذانه لما زارهم البارحه لعل وعسى يضبط الموضوع " لو ما بقى رجال غيرك بذي الدنيا ما زوجتك منار ... الله يستر بعد سنه نلقى لك بنت ثانيه" قطع هالأفكار وناظر ابوه الي يتكلم بهدوء: انا ما ابغى السالفة تكبر يا سلطان!! يعني وليد مر اسبوع وللحين مصر إنه ما يعرفكم سلطان قاطعه لما حس من نبرته التخلي : أنا بإمكاني من الاسبوع الماضي ارفع قضيه قاطعه ابو فيصل بنبره هادئة: قلت لك من قبل انت ولد أخوي الله يرحمه ومستحيل اقبل توصل بيننا لذي المواصيل!! سلطان بضيق: والحل الحين!! فيصل بتدخل: وين اوراق العقد الي بينكم؟؟! سلطان هزراسه وهو يطلع الاوراق من جيبه: هذا هو العقد عبدالله تناول منه الورقه يتأملها ...لحظات جحظت عيونه وناظر وليد بشك: وليد هذا توقعيك على عقد الزواج؟! عقد حواجبه باستنكار لكلام عبدالله ...كيف توقعيه ؟؟! رح يوصل للجنان بسببهم ...تحرك بسرعه حتى يشوف توقيعه !! ابو فيصل سحب الورقه من عبدالله وهو رافع حاجب!! اقترب وليد من ابوه وناظر الأوراق انصعق وهو يشوف توقيعه على الاوراق كيف وصلوا لتوقيعه!! سلطان ما يدري كيف ما جاء في باله هذا الحل وبتأكيد نطق وهو يقترب من عمه: هذي بصمته هنا!!! ابو فيصل هز رأسه بضيق وكل الادله تدل على صدق سلطان ... رفع نظره لوليد بنظرات ناريه وبعدها ناظر سلطان : باكر رح نبدأ اجراءات اثبات الزواج ونسجل البنت قاطعه وليد وبداخله نار مشتعله: يبه! عبدالله بتدخل: بعدين يا وليد ! ختم كلامه وهو يعطيه إشارة يمشي الموضوع...جالس معهم ومن الداخل يحترق !! بعد ما غادر سلطان ...ناظر وليد ابوه بعتب: كيف قاطعه بغضب: كيف وصلوا لتوقعيك؟!! كل شيء يثبت انك انت الي تزوج ابنتهم!! والشهود موجودين بس انا قلت له ما ابغى نكبر الموضوع ...اسمعيني زين ..تكمل الإجراءات وترجعها زوجه لك وان بغيت تنفصل عنها بعد فترة ما عندي مشكله ما اجبرك تعيش مع انسانه ما تبغاها ... وإن بغيت تتركها على ذمتك وتتزوج عليها ما عندي مشكله...ومنار تنسى سالفتها للأبد لو ما بقى غيرها بالدنيا ما رضيت تكون زوجه لك ..ويكون بعلمك اليوم الي تفكر فيه ترجعها لذمتك هو اخر يوم بيني وبينك ..هذا اخر كلام عندي!! رفع حاجب بعدم تصديق من كلام ابوه .. وبنبرة مقهوره: تبغى تموتني بعز شبابي؟! وكأنك ما شفت بنت سلطان!! ابز فيصل قاطعه بحزم: الي عندي قلته وانتهى الموضوع بالنسبة لي!! زم شفته بقهر وتعجب: والله! طيب مثل ما تبغى ..رح ارجعها لذمتي ... لكن يكون بعلمك رح تكون زوجتي الاخيره وتحرم علي الحريم من بعدها..ورح يكون عندي منها درزن عيال حتى ما تنفك مني ورح ادفن عمري وشبابي علشان ولد عمك الي فضلته علي ..وينه عنك ولد اخوك طول هالسنين! هدات نبرته وهو يكمل بعتب: مشكور يبه ما قصرت! والحين بالإذن!! بعد ما طلع نطق فيصل: ليه تحمله فوق طاقته وبعدين سلطان قال ما يبغى يرجعها بس يبغون الطلاق ويسجلون البنت ابو فيصل قاطعه: اذا هم يبغون الطلاق ما رح اوقف بوجهم ..اما اخوك هو الي اعترض طريقهم و ضعهم بموقف محرج قدام الناس ومجبور يصلح اغلاطه ...حتى لو كان ولدي ما اسمح له يتمادى بتصرفاته ...وفوق هذا ما اعطانا مبرر لغيابه ذاك الوقت !! يظن بنات الناس لعبة يلعب على كيفه؟!! والله حاله!! ** ** ** عدل جلسته وهو يتكلم بالجوال وبنبره لوم وعتب: يعني وش تبغين مني اترك خزامى ضايعه بالدنيا علشان حضرة منار ترجع لطليقها ؟! انا لو ما في بينهم بنت ما علي منه يرمي عليها يمين الطلاق وانتهينا ..بس هالطفلة وش ذنبها؟!........ يا يمه قلت لك بعد ما نكمل الإجراءات رح يطلقها وارجعي منار للسيد وليد .......انا وش دخلني اذا ابوها رافض يرجعها؟! .......لا حول ولا قوه الا بالله خزامى وش علاقتها؟!! .......دام هالكثر تحبه وهو يبغاها ليه تطلقوا ؟! .....النصيب؟!! خلاص اعتبري زواجه من خزامى نصيب دام إنك مؤمنه بالقدر ......وش المطلوب مني ؟؟! ....... قلت لك كلمته بس رفض وقال لو تجلس حياتها بدون زوج ما رجعها له؟! ....طيب طيب يصيرخير ...ان شاء الله مع السلامه!! قفل الخط وزفر بضجر وهو يناظر خالته: رفعوا ضغطي!! ام سعيد بهدوء: لا تسمع لكلامهم ..ونصيحتي لك رجع خزامى لزوجها لا تطلقها ابو خزامى تنهد: بس تكلمت تضغط عليه: جماعتك كلهم عرفوا بزواجه من خزامى ...باكر ان طلقها رح يتكلموا الناس عنكم ..رح يقولون لولا انه شاف عليها شيء ما هجرها وتركها .. وبالنهاية طلقها!! كلام الناس ما يرحم.. وبعدين كذا تزوجها عند بيت عمك ..وابو فيصل رجال والنعم فيه ما رح يظلمها ...ترك ولده ووقف معك ... وكذا تكون مرتاح انها بخير!! هز رأسه بحيره: والله ما ادري وش اقول ؟!! وبتساؤل: وليد ومنار ليه تطلقوا؟!! سكتت للحظات وبعدها نطقت: يقولون مشاكل بينهم!! هز رأسه بتفهم: كم جلست عنده ؟! ام سعيد بهدوء: بعد ما صار الحادث بفترة الخطوبه ..قرروا يزوجهم بدون طقطقه او شيء ... لأنه وضع وليد الصحي تعبان ويحتاج زوجته تكون جنبه ...جلست قريب السنة وبعدها تطلقت بسبب المشاكل بينهم!! الناس ما تترك احد بحاله ...وقتها طلعت اشاعة انها حملت في بيت اهلها واضطروا يزوجوهم بذي السرعه ...شفت كيف كلام الناس ما يرحم؟!! جلست عنده سنه والناس رغت عليها بالكلام .. كيف لو تطلقها مباشره بعد ما تثبت العقد؟!! صدقني ما هو من صالحك وان رفضت خزامى اجبرها او انا اكلمها واقنعها!! لا تنسى بينهم بنت ؟!! وبكلا الحالتين اختك منار ما رح ترجع لوليد أبوها معند وربط رجعتها بطلاق امك !! زم شفته بتعب من هالموضوع: حتى اكون صادق معك يا خالتي انا ما ابغى ارجعها لوليد ...ما عندي غيرها وللحين ندمان على تسرعي لما زوجتها ...يمكن ظنيت انها فرصة تتزوج شاب وبعمر صغير وخاصة بمجتمع يبغى الزوجة كامله والكمال لله!! ما رح اكرر الندم ولما نكمل الإجراءات رح اطلقها وبعد ما تتخرج نرجع للقرية ... أنا هنا الحياة ما تعجبني احس نفسي ضايع هنا ...بالقرية احس اني اعيش مع اهلي وربعي... ام سعيد ما عجبها الكلام: بينهم بنت قاطعها بملل من كل شيء: اذا يبغى البنت يأخذها مباركه عليه ..خزامى متنازله عنها ما رح تكون مشكلة قاطعته بقهر: ترى هالخزامى زودتها ...هذي من لحمها ودمها ...حملتها ٩ شهور بداخلها معقول ما حملت لها مشاعر ...وين مشاعر الأمومة ؟! تراها مريضه وانا انصحك تراجع فيها عند دكتور المجانين ..لانها مجنونه وعندها نفسيه قاطعها بدفاع: ما هو كذا ...بس الظروف الي مرت فيها ايام الحمل جبرتها تكره هالطفلة وتكره سعود!! نطقت بقهر من دفاعه: ما هو مبرر لتصرفاتها المجنونه .. والحين الموضوع انحل وليه للحين كاره هالبنت!! زفر بضيق: مشاعر مؤقته ..انا متأكد لما نرجع للقرية ونستقر هناك رح يتغير كل شيء!! ** ** ** مط شفته بسخريه وهو يناظر ابوه: وهذا ولد اخوك بعد ما ثبت العقد ونسب لي بنت ما ادري من وين جاءت ...اشوفه اصر على الطلاق وطلقها!!! ابو فيصل بهدوء: انا قلت لك من قبل رح انفذ الي يبغاه سلطان ..وسلطان ما يبغى يكمل بهذا الطريق ...وما أجبره حتى يستمر هالزواج!! تابع كلامه بنظره ناقده: وبعدين الي يسمعك كنت مهتم كثير ترجع لك ..ما كأنه هذا الي تبغاه؟!! تنهد براحه: والله يبه حمل وراح عني!! فيصل متكتف ويناظرهم بهدوء: والحين البنت وش وضعها ؟!! نطق وليد بقوة: مع امها ما ابغاها...رح ارسل لها مصروف وانتهينا!! ام فيصل مطت شفتها بسخرية: ونعم الابوة ؟! وكأنه الابوة بالفلوس؟! هذي البنت لها حق مثلها مثل ليان!! ناظر أمه بضيق: خليني الحين كذا ! فيصل بسخرية: لأنك شاك بنسبها؟! ترى والله تشبهك قاطعه بفزع: خاف ربك وش جابها لي ؟! انت ما شفتها قاطعه فيصل بجديه: انسى لون بشرتها ..ملامحها كثير تشبهك!! ابو فيصل بهدوء: كل فترة تطلب البنت والي بقلبك خليه بقلبك ...الحين البنت باسمك ومثلها مثل ليان!! ودام سلطان طلق خزامى وما له نيه ترجع ..خلينا نشوف ابو خالد حتى نرجع منار ناظر ابوه بعدم تصديق من تغير رأيه !! تابع كلامه ابو فيصل وهو يشوف الصدمه على ملامحه : لأني ما ابغى ابتلش بزوجه ثالثه وتنجب طفل قاطعه بملامح متهلله: ان شاء الله!! ** ** ** مرت الأيام والهدوء يخيم على حياتهم ...انشغلت خزامى بالدراسة حتى تتخرج بثلاث سنوات ...وتكفلت امها بالصغيره!! وليد يرسل مصروف لها وكل شهر يأخذها .. ما تغيرت مشاعرها اتجاه بيلسان ..وللحين مب قادرة تتقبلها ..شيء غصب عنها ما هو بيدها ...اليوم مرتاحه منها ..اخذها ابوها عنده لمدة ساعة وبعدها يرجعها ... وضعت الكتاب بضجر ... وناظرت امها الي تكلمها: ام سعيد رح تزورنا اليوم!! خزامى بضجر: الله يكون بعوني على محاضراتها!! ام خزامى جلست : وهي صادقة يبغى لك تكسير رأس!! خزامى بلامبالاة: كل واحد يعمل الي يشوفه مناسب وما احد يقدر يفرض علي رأيه ام خزامى مطت شفتها بتعجب: يفرض رأيه!! الحين الي ينصحك ويبغى مصلحتك يكون يفرض قاطعتها خزامى بتبرير: يعني للحين تلوم فيني ليه ما رجعت لوليد!! واحد يحب ويبغى عمتي ليه احشر نفسي بالوسط واعيش حياتي على الهامش! وما تدري يمكن يطلع كل عقده النفسيه وحرمانه من منار فيني!! لا يمه انا مستغنيه عن كل شيء ...ابغى ارجع مثل اول قبل الزواج كل همي المزرعه والجلسه مع نورة! ام خزامى هزت رأسها بأسف: نشوف اخرتها معك!! ** ** ** جالسة على الارض بيدها لعبة تضرب عليها بيدها بشويش والدموع تلمع بعيونها على وشك البكاء.... بالبداية كانت تبقى طول الوقت تبكي ..بس الحين تعودت على الحال ...ما تدري ليه يحضرونها هنا ؟! ام فيصل بيدها المسبحه منشغله بالتسبيح ...ووليد على الجوال ... دخلت زوجة فيصل وناظرتها...جلست وهي تنطق بانتقاد: ما ادري ليه تحضرها هنا!! نزل الجوال وناظرها : كيف ما فهمت؟!! ام فيصل ناظرتها: وش نعمل لها ؟! كل الهدف تعرف انه لها اهل!! زوجة فيصل : بعدها صغيره وما تفهم ذي الامور!! دخلت ليان وهي تركض وخلفها رؤى وصوت ضحكاتهم بالصالة!! وليد ابتسم من قلبه وهو يشوف ليان ...هالبنت من لما يشوفها ترد له الروح!! ليان وهي تتكلم: بابا هذي رؤى قطعت كلامها لما انتبهت على لعبتها بيد الصغيرة ...وبدون سابق انذار سحبتها منها بقوة: هذي لعبتي ليه تعطونها!! ام فيصل بنهر: اعطيها اللعبه الحين تبكي ترى رأسي مصدع وما لي خلق للازعاج!! ليان حضنت اللعبة بقوة متجاهله بكاء الصغيرة ...زوجة فيصل بانتقاد وهي تؤشر على ليان: ترى بالغتم بتدليلها ... وقف وليد وهو يرد بحده: يعني اذبح البنت حتى ترضون؟! فوق انها ما تشوف امها اعاملها بقسوة علشان ترضون ...على الاقل هذي القروية تعيش عند امها مو مثل ليان باعتبار يتيمه! ورجاء ما ابغى اي مقارنة مرة ثانية!! حمل الصغيره الي تبكي ونطق بجفاء: رح ارجعها لامها!! زوجة فيصل نطقت بقهر بعد ما طلع: ما ادري ليه هالتفرقة بينهم !! بالله يا خالتي عمرك شفتيه لاعبها او باسها؟! عكس ليان الي دوم قاطعتها ام فيصل بترقيع: هذي صغيرة لما تكبر وتفهم اكيد رح يعاملها مثل ليان ..انا متأكدة!! مطت شفتها بانزعاج من تصرفاته: الله يهديه!! ** ** ** ** يناظر جماعته الي بالمجلس والضيق تلبسه ...ما يقدر يردهم خايبين وبنفس الوقت خزامى ما رح يجبرها على شيء ما تبغاه!! ما يدري وش رجعهم بهذا الوقت ...وليه مصممين على رجوعها ؟!! قاطع افكاره عمه الكبير جابر: وش قلت يا سلطان؟! وقبل ما يتكلم سلطان تابع جابر كلامه: البنت طول عمرها لولد عمها ...وسالفه الطلاق ما نقبل فيها ابدا ...من متى بجماعتنا ولد العم يطلق بنت العم؟! بينهم بنت ما يصير تتشتت ..توكل على الله وما رح تخسر ..اخوي ابو فيصل الكل يعرفه ويعرف طيب اصلهم رح تنسعد معهم!! ابو خزامى ناظره بحيره: والله يا عمي ما ادري وش اقول .. أنا ما عندي الا هالبنت وما رح اجبرها على شيء ما تبغاه!! ابو فيصل بثقه: اذا على البنت انا اقنعها بالرجوع!! ناظر سلطان وليد للحظات جالس بهدوء وكانه الموضوع ما يخصه ...تنهد وهو ينطق: امهلوني اسبوع وإن شاء الله ترجع لذمته قاطعه جابر: ان شاء الله الخميس الجاي رح تكون في بيت ابو فيصل وهذي كلمة اخذناها منك وما رح تردنا!! سلطان على مضض نطق: بإذن الله ** * * جالسه بالغرفة وتناظر امها وهي تحثها تطلع لزوجها ...ايام وهم يتكلمون فوق رأسها ويقنعونها ترجع لوليد ...ما قدرت ترفض وهي تشوف ابوها وهو يرتجي فيها ويقنعها... قطعت افكارها ونطقت بتردد: كيف اعيش مع انسان يبغى عمتي قاطعتها: لو يبغاها ما طلقها ؟! تظني انه قيس والا عنتر يعيش حياته على اطياف زوجته؟! ومثل ما قال لك ابوك اي احد يضايقك ولو بحرف مباشرة تكلمينه ..ما رح يرضى احد يهين بنته ويسكت له!! يلا تحركي أبوك ينتظرك بالسيارة ؟!! ختمت كلامها واشرت على الصغيرة: انتبهي عليها!! خزمى برجاء: يا يمه خليها عندك انا ما اعرف اهتم بالصغار وبعدين هي متعودة عليك قاطعتها بحزم: خذي البنت معك !! اقتربت من الصغيره على مضض وحملتها بهدوء وتوجهت خارج الشقة متجاهله محاولة الصغيرة الافلات منها..ما تدري كيف تعيش مع شخصين ما تبغاهم ..وليد وابنتها!! ما تدري وش الي رجعهم بعد ما انفصلوا!! اقتربت من السيارة بتردد وهي تشوف ابوها واقف معهم...اشر لها ابوها بعيونه حتى تسلم عليهم ...سلمت على ابو فيصل بهدوء: كيف حالك يا عمي!! ابو فيصل برحابة صدر: هلا هلا بخزامى ..كيفك يا بنتي!! نطقت والتوتر واضح عليها: الحمد لله بخير!! مسح على رأس الصغير وهو ينطق: الله يحفظها!! سلطان بهدوء ظاهري: سلمي على وليد يا خزامى! هزت رأسها وهي تحس بالتوتر والخوف والقلق .. لمحته واقف والبرود يكتسيه ما نطق حرف واحد ...مدت يدها وسلمت بيدها ...بدون ما تنطق حرف واحد!! ابو فيصل بهدوء: توكلنا على الله ...ثق فيني يا سلطان خزامى رح تكون بين اهلها سلطان بأمل : ما تقصر يا عمي!! واقف يناظر هالفيلم ببرود ..ما هو قادر يصدق إنه تزوجها وعنده بنت منها ...ما هو تكبر او غرور بس بنظره كل انسان له حرية الاختيار ...ومن حقه يضع شروط ومواصفات بزوجة المستقبل ...ما يحس بينهم تناسب ...والبنت الي تحملها ما حس لها بمشاعر ولا هو مقتنع إنها بنته ...ما تشبه لهم ابدا ...العيلة كلها بشرتهم بيضاء ....وحتى سلطان بشرته أقرب للبياض ... قطع افكاره لما فتح السيارة ابوه وهو يحثه يركب... تحرك مكانه بهدوء ... فتح سلطان الباب وهو يهمس لخزامى: انا معك لا تخافين!! بغت تركب بدات الصغيرة تبكي تبغى سلطان ...ناظرت أبوها برجاء حتى يأخذها ما تعرف تتعامل معها!! سلطان تجاهلها وهو يحثها تركب وقفل الباب بهدوء!! زفرت بضيق بعد ما قفل ابوها الباب..الرهبه والخوف يسيطر عليها ...رح تدخل عالم ما تعرف رح يكون استقبالهم لها!! تتمنى لو يسمع أبوها الكلام ويطلقها وترتاح نفسيتها من الحال ... ابو فيصل التفت عليها بانزعاج : وش فيها تبكي!! ردت بضياع: تبغى ابوي !! ابو فيصل هز رأسه بتفهم وما علق وهو يرجع يناظر للأمام!! استرق النظر بانزعاج من صوت البكاء والي استغربه ما شاف منها اي محاوله حتى تسكتها! وكأنها متعمدة تزعجهم ...التفت على ابوه الي يكلمه عن بيت صديقه قريب من المنطقة ... ارتاحت لما سكتت البنت لوحدها ...ما تعرف كيف تتعامل معها ... مستغربة من الهدوء الي يحيط بوليد. .زادت دقات قلبها بخوف ..تخاف يطلع حرته فيها كونها السبب بانفصاله عن منار ...ما كانت تبغى يكون مصير العلاقة بينها وبين منار الانقطاع .... زادت دقات قلبها لما وصلوا ...تحس نفسها تبغى ترجع وتهرب من هنا ...بس مضطرة تكمل هالطريق!! اخذت نفس وهي تشحن نفسها ..ما رح تسكت له وإن رمى عليها كلام رح تمسح فيه الارض ورح تتصل بابوها ياخذها ما رح تقبل أحد يهينها او يعاملها بطريقة مب حلوة!!! نزلت وناظرت عمها الي يحثها على الدخول: تفضلي تفضلي حياك!! هزت رأسها وتحركت تمشي معه ...وبيلسان رجعت تبكي من جديد تبغى جدتها !! ابو فيصل ناظرها: واضح إنها نكديه؟! ناظرته خزامى للحظات وبعدها نطقت: شوي! دخلت الصالة وهي تكتم انفاسها للحظات ...ابو فيصل اشر على زوجته: هذي ام فيصل اقتربت رحيق وسلمت بهدوء عليها ...ام فيصل باسلوب دافي : تفضلي حياك الله!! وش اخبارك واخبار اهلك؟! خزامى ارتاحت لملامحها :الحمد لله بخير!؛ دخلت مريم تسلم بهدوء ومعها ليان...خزامى سلمت عليها بهدوء وهي منزعجة من نظراتها التفحصيه!! جلست وهي تحس ما لها حيل تتحرك ....وبيلسان تبكي!! اقترب وليد بهدوء وجلس على نفس الكنبة وهو يأخذ بحضنه ليان.. نطق وهو يقرصها بخدها بخفه: كيفك يا بطه!! ليان بابتسامه: بخير وليد وهو يؤشر على خزامى بهدوء: هذي خالتك خزامى سلمي عليها!! ناظرت خزامى ليان وما استغربت الجمال الي تحمله ..ابوها وامها ما شاء الله جمالهم ملفت للنظر ...مدت يدها وسلمت عليها بمجامله: كيفك يا حلوة؟! ليان هزت رأسها وهي تؤشر على بيلسان: ليه تبكي ؟! نزلت خزامى بيلسان على الأرض : يمكن نعسانه!! بعد وقت كان ثقيل على خزامى بالرغم من قصره ..وقف وليد وهو ينطق بنفس البرود : خلينا نطلع للجناح وترتاحين!! هزت رأسها وحملت بيلسان الي متمسكه بعبايتها!! استأذنت وطلعت معه!!! دخلت الجناح وهي تناظر المكان بتأمل ..قطع تأملها وهو ينطق بهدوء: خذي راحتك!! هزت رأسها وجلست على اول كنبه ودقات قلبها تزيد ...جلس مقابل لها وهو ينطق ببرود: كيف حالك ؟! هزت رأسها بدون ما تنطق حرف!! تابع كلامه بنفس النبره: انا رح اعتبر اننا اول مرة نلتقي ...ما ابغى افتح صفحات الماضي ...كل الي يهمني الحين ليان ابغاها تكون مبسوطه على طول وما احد يكسر بخاطرها ..اعتبريها مثل بنتك وسالفه انها بنت ضرتك ما ابغى اسمعها .. لأني حرف واحد يزعلها ما اقبل فيه!! ما أبغى تحس انها عايشه في بيت ابوها غريبه!!. واهلي اتمنى منك تحاولين تتأقلمين معهم وما ابغى مشاكل وقيل وقال ... وبالنهاية هذا الجناح بيتك خذي راحتك واي شيء تحتاجينه لا تنحرجين اطلبيه مني ..ما رح اقصر !! ناظرته بعد ما ختم كلامه وينتظر منها اي رد فعل ...مستغربه منه كيف يغطي على الماضي وما يبغى يفتح صفحاته ...بداخلها قهر وما يروح حتى تعرف ليه تركها ....شجعت نفسها ونطقت بضيق: ليه تنكرت لنا؟! رفع حاجب بانزعاج: دوبني قلت ما أبغى نتكلم بالماضي!! اتمنى تسمعين الكلام حتى ما نتصادم مع بعض!! نطقت بتساؤل: ليه ارجعتني لذمتك..كان بإمكانك ترجع منار قاطعها بانزعاج: انا وش قلت؟! لو ابغى منار كان ارجعتها!! لا تظنين إني إنسان ما عندي ضمير حتى اظلمك او اهينك لأني كنت أبغى عمتك!! قلت لك كأننا اول مرة نلتقي!! قفلي الموضوع ولا تفتحي صفحات انطوت! ختم كلامه وناظر بيلسان الي بدأت تبكي ..تنهد وبعدها نطق: الظاهر إنك دلعتيها بزياده طول الوقت تبكي وحالتها حالة!! ترى الدلع الزايد ما هو زين! مطت شفتها بسخرية من كلامه اي دلع يقول عنه ...وبنبره هاديه: امي وابوي مدلعينها!! اشر عليها بضيق: سكتيها لاني ما اتحمل ازعاج الصغار!! هزت رأسها بهدوء ..حملتها لعلها تسكت!!! ** ** جالسه مع اهله وهي تفكر باللقاء الاول ما توقعت كذا ...كان مسالم لأبعد درجه .... بشخصيته يشبه سعود وكأنه ما تغير الهدوء والبرود نفسه ما في اي اختلاف .... ناظرت مريم الي تكلمها: شوفي البنت وين طلعت!! عبست ملامحها من بيلسان الي من اول ما جاءت وقلبت حياتها نكد وبكاء الظاهر تبغى جدتها!! ما تدري أمها وش ينقصها لو اخذتها ....بغت تتحرك ..سرعان ما جلست لما دخلت ليان وهي تسحب بيلسان للداخل: تبغى تطلع برا!! مريم بابتسامه وهي تناظر وجه بيلسان مع البكاء صار وجهها مخلوط سمار مع اللون الاحمر من كثر ما بكت!! ام فيصل وبيدها السبحه: احمليها يا خزامى سجت راسي من كثر البكاء !! نطقت بهدوء:ان شاء الله خالتي! حملتها وتوجهت للجناح بعد ما استأذنت ..اول ما دخلت تركتها على الارض ...وتوجهت تعمل لها قهوة تريح راسها الي صدع من بكاء بيلسان ...ما هو بيدها ما تقدر تطيقها او تقرب منها !! تحس بشيء يكتمها اذا اقتربت منها ...بعد لحظات دخل المطبخ بعبوس وهو ينطق: تاركه البنت تبكي صوتها واصل لتحت! رفعت حاجب بتعجب: تراك ابوها وليه ما تسكتها انت او تحملها؟! احتدت نظرته: سكتيها ترى والله ما لي خلق للصغار نطقت بتعجب: وليان؟! اقترب وعيونه تشع نيران..وبنبره تحذير: عيدي هالكلام مرة ثانية وشوفي وش رح يصير!! ليان خط احمر ..تعرفين وش يعني خط احمر!! ما تدري ليه خافت من ملامحه ..تحركت لا شعوريا للصالة حتى تسكتها ... اقتربت منها ونزلت على مستواها ونطقت بعبوس: خلاااص اسكتي!! هزتها خزامى لما زاد بكاء بيلسان ...حملتها وتوجهت لغرفة النوم ... حطتها على السرير وبعصبيه نطقت: وبعدين ! خلاص ليه تبكين ؟! تحس رأسها انفجر وصدع من هالبكاء الي ما شافت له مبرر وبدون سابق انذار ضربتها كفوف وهي تنطق بغضب: انكتمي انكتمي الله ياخذني وارتاح منك!! جلست خزامى على الارض وهي تناظر بيلسان جالسه على السرير ومستمره بالبكاء ....بعد وقت تعبت من البكاء ...ألقت رأسها على السرير وهي تفرك عيونها بيدينها وصوت شهقاتها توصل لمسمع خزامى الي تناظرها بهدوء!! بعد وقت قصير بدأ النوم يداعب اجفانها ..نامت على امل تصحى وتلقى نفسها بحضن جدتها صاحبة الحضن الحنون!!! ** ** **انتهى البارت... انتظروني يوم الثلاثاء بإذن الله...دمتم بخير 🌹 | ||||
|  |
|
19-08-22, 02:52 AM
| #68 | ||||||||
| البطله احسهاا مو خزام احسها بيلسان ابرار تكفين وربي قلوبنا عورتنا تكفين خلي خزام تحن ع بناتهاا والله العظيم بكيت بكي مو طبيعي ماني قادره اتحمل مجرد تكفير بالي تعانيه هالبنت | ||||||||
|
| |
 |
| أدوات الموضوع | |
| انواع عرض الموضوع | |
|
|
2373Likes
العرض العادي
