11-10-22, 06:41 PM
| #11 | |||||
| كاتبة في قسم وحي الاعضاء 
|  البارت الثاني .. * صباح يوم جديد .. صباح سنه دراسيه شارفت ع الانتهاء مابين زحمه الشوارع والازعاج .. باص ابو ملوح .. واقف عند بيت ضاري .. ابو ملوح متكي ع يده ويسمع اذاعه الصباح وينتظر بطوله بااال .. سعاد بحلطمه : هه جينا لبيت البنت البطيئه الي دايم مأخرتنا هديل وبيدها المرايه وبالثانيه تحط ماسكرا : وتتهزأ من فهيد ولا تحس وجنبها اختها السماعات بااذونها وعايشه جوها ولا همها احد فهده منسدحه بااخر مرتبه فالباص وبصوتها الخشن : ياابو ملوح دق بوري ثاني الله يرضى علييك ريميه طلعت وقفلت بابهم الاسود وراها بقوه .. ومشت للباص ودخلت ونفسها بخشمها توها متهاوشه مع اريج الزفته .. وجلست في مكانها المعتاد مرتبه منفرده عند الشباك .. فهده : ماتبين نغني لك فز له ياارض لاجاك بشويش يتمايل ريميه تعدل نقابها : لا مااحبها سعاد : نامي فهيد حبي لاتتعبين حلقك مع هالسلحفاه ريميه لفت تناظر الشوارع مطنشتهم .. هي اخر بيت يمرها الباص وبعده ع الجامعه .. شهقت لما حست بالكف الي جنب بوجهها وخلا راسها يصقع بالقزاز فهده واقفه عند راسها وبصوتها الخشن : يمين باالله ان تأخرتي مره ثانيه احش رجولك من هالباص حشش ريميه وقفت بسرعه وردت لها الكف اقوى ودفتها ع المرتبه الي وراها اسما ودلال صرخو لما طاحت فهده ع حجرهم .. ريميه مسكت يد فهده بقوه بتلويها بس فهده بيدها الثانيه مسكت شعر ريميه من فوق الحجاب البنات تدخلو يحاولون يفكونهم عن بعض بس كل وحده اقوى من الثانيه ابو ملوح يسمع صراخ البنات من ورا الستاره وعرف انهم يتهاوشون : ياابنت فكن بعضكن الله يصلحكن هديل تبكي بخوف : يابنات وقفوو عييبب الرجال سعاد تناظر كيس قهوتها الي طاح والفناجيل تتدحرج فالباص ضربت رجلها بكفها : حسبي الله ريميه رفسه فهده خلتها تبعد عنها ووقفت ووجهها مكشوف ونقابها نازل ع رقبتها ونص شعرها طالع وناظرت فهده الي جالسه تاخذ نفس : تفوو عليك وعلى الوصخين الي متشبهه فيهم فهده تمسح عينها بألم من اظافر ريميه الي دخلتهم فيها : والله ان ماجريتك للشرطه ماكون فهده بنت سلمان ريميه تفك ربطه نقابها وتحاول تتعدل بسرعه وتضحك بسخريه وهي ترجع مكانها : ههههه شفتو يابنات رجعتها لاصلها البنات يكتمون ضحكاتهم وهم يشوفون فهده ترجع مكانها متألمه وتطلع جوالها تكلم اهلها .. ابو ملوح : يابنت ابو فايز البنات الي تهاوشو بنات من ؟ سعاد الي ابو ملوح جارهم وهي مقهوره من البنات : بيت ضاري ال وبيت سلمان ال ابو ملوح : يصير خير كلامي مع اهلكم * * وقفت ع باب الغرفه تشوف امها تبخرهاا والعبره خانقتها .. امنه تلف بالغرفه تبخر وهي تتأملها .. فتحت الدولاب وبخرت ثيابه وملابسه وتنهدت : اخخ هانت بكره تنور هالغرفه رحاب مسحت دمعتها الي فلتت : الحمدلله يمه الحمدلله امنه لفت ع بنتها ودموعها تنزل : اخاف اموت قبل بكره رحاب تتقدم تحضن امها : بعيد الشر عنك امنه تبكي : ماني قادره اصبر ابي اشووفه رحاب تمسح ع شعرها : هاانت الي صبرنا 6 سنين يصبرنا هالليله عند الباب .. ولاء : يووه من الحين دموع وش خليتو لبكره اصايل : وحنا تحت طربانين ومبسوطين رحاب تضحك : زيين يله يمه انزلي ارقصي وافرحي ماعاد للحزن مكان ببيتنا ولاء : اييه بكره القعده بيجي وياكل علينا الجوو * * طلع من دوامه .. يشتغل بااحد الدوائر الحكوميه حرك سيارته ونزل شماغه ع كتفه .. باله مشغوول بكره يطلع منذر من السجن .. يتذكر اخر لقاء بينهم اول مادخل السجن زاره واعترف له بكل شي سماح اتصلت عليه تقوله الحق اخوي راح شقتك ناوي ع بنت اخوك ضربه منذر ضرب وماقاومه عارف انه غلطان والسبب بضياعهم تركه بالغصب لما تدخلت الشرطه وفكوه عنه ماقدر يرجع له بعد ذيك المره .. انسحب بعيد وعاش حياته ماحس ع نفسه الا لما وقف عند بيته البسيط .. نزل من سيارته وهو يستغفر ويريح اعصابه دخل البيت ابتسم وهو يشوف بنته ساره تجري له : بااباا جلس ع ركبه وفتح يدينه : ياروح ابووك هلااا هلاا ساره الي عمرها سنتين رمت حالها بحضن ابوهاا .. وقف شايلها معه وراح للمطبخ وهو يسمع اصواتهم وقف ع باب المطبخ يشوف ام عايض تقفل عن القدر .. وتلف عليه : زيين جت بغو ياكلوني شاهر : متنا جووع وحنا ننتظرك عايض : متى اخلص المدرسه واتوظف وغصب عن خشومكم تنتظروني شاهر : مت ياحمار لين يجيك الربيع خلص الابتدائي اول عايض : ماحمار الا انت ياورع المتوسط ضاري ينزل بنته ع الارض : وين اريج ام عايض : نايمه مصدع راسها من الدوام عايض : الله والدوام كلها فراشه روضه ههههههههه شاهر يضحك ويضرب كفه بكف عايض : لاتسمعك تقول انا امن مو فراشه عايض يضحك : امن طولها شبر ونص هههههه شاهر : اخاف بيوم يغلطون يحسبونها من الطلاب هههههه ام عايض عصبت : اصص قم انت وياه حطو معاي الاكل عن الكلام الفاضي ضاري طلع من المطبخ وراح لغرفته .. دخل وقفل الباب وراه وهو يشوفها نايمه ع السرير راح علق شماغه ع الشماعه وجلس ع طرف السرير يناظرها .. صار لهم ثلاث سنوات متزوجين وللحين ماتفاهم معها .. لسانها طويل ولاتهتم فيه كسوله .. مايدري لو ماامها ساكنه معهم كيف بيعيشون .. امها شايله البيت وفوقه تربيه بنتهم ساره ريميه بعد الي صار تعبت نفسيتها عجز يتفاهم معهاا .. مالقى الا انه يوديها لخالتها والي ماكان حاسب حسابه .. ام عايض متمشكله مع زوجها وماصدقت لقت ضاري محتاج لها طلبت منه ياخذ لهم بيت بجده وهي تهتم في عيال اختها ونفذ الي طلبته واخذ لهم بيت ويزورهم كل شوي .. ام عايض تطلقت .. وكل مايجيهم تلمح له تبيه يتزوج بنتها ويكون سند لهم كلهم عجبه الوضع تعب من المصاريف .. ع الاقل يعيش معهم مايصرف سكن له ومطاعم .. وفوقه زوجه .. وقد لمحها مره وعجبته تزوجها ودفع مهر قليل وعرس مختصر .. ابد ماكلف فيها جته ببلاش تعتبر .. كله كان تمام لين وصل لها ابداً ماهي ع جوه .. صعبه .. حاول يحبها يبي يحس معها نفس الشعور الي حسه مع سماح .. بس اريج شرق وسماح غرب * * الاثنين الساعه 4 العصر .. عند بوابه البيت جالسين اطفال باعمار متقاربه ( فهد - رعد - غازي - زياد ) غازي ولد فرح : والله سمعتهم يقولون خالي كان في السجن زياد اخوه يايده : ايييه حتى انا سمعتهم حتى ابوي قال لامي السجن نحفه فهد ولد اصايل مستند ع كتف اخوه رعد : السجن للرجال رعد فزز لما سمع صوت بواري السيارات : جو جو وراحو جري للبيت يعلمونهم .. وعند مدخل البيت امنه وقفت تزغرت وتزغرت ودموعها تنزل .. عبدالله وقف السياره قبال المدخل وناظر خاله منذر فتح الباب ع طول وراح جري لامه حضنها وطاح عند رجولها نزل من السياره وطلع جواله يصور .. وبالسياره وراه نزل ابو نواف وولده نواف والسيارات الثانيه ازواج بناتهم وعيالهم .. وعند المدخل البنات بعباياتهم يتزاحمون بيسلمون ع منذر امنه ترفع راس منذر وهي جالسه ع الارض ماشالتها رجولها من الفرحه : قرت عيني والله منذر يمسك راسها ويبوس عيونها : جعلني ماابكييك ياتاج راسي اصايل تشهق ببكى وتحضنه : يامرحبااا يامرحبا منذر يوقف معها ويبوس راسها .. ويلف ع خواته وبناتهم كل وحده توخر الثانيه وتسلم عليه والبزارين حولهم مو قادر يميز هذا مين وهذا بزر ميين !! ولاء تمسح دموعها وترفع بزر بعمر 3 سنوات وتقربه لمنذر : شوف هذا ولدي منذر منذر يناظره بسعاده ويبوسه : ماشاءالله حيّ السمي نواف من بعيد يحرك يده : يله يله جوا انتِ وياها رغد لفت ع البنات وحطت يدها عند رقبتها .. وبتول وجود يضحكون منذر لف ذراعه ع كتف امه وبيده الثانيه حاضن رحاب الي منهاره بكا للحين ومشى معهم لداخل البيت .. وهو يرفع نظره يحاول يحبس دموعه .. وعند شباك الصاله واقفه شروق زوجه نواف مشاركتهم الموقف والدموع .. وفي بالها تردد كلمات فهد المساعد "يضحك ولا احد تنبه له يوم التفت يمسح اهدابه" * * طلعت من غرفتها بعد ماختمت مادتها الي اختبارها بكره .. رغم كل الظروف مهتمه في دراستها اهم شي عندها بالحياه وقفت قبل تقرب وهي تشوف الكل بالصاله .. شاهر وعايض واريج يلعبون لودو .. ضاري منسدح ع الكنب وبحضنه بنته نايمه ويمسح عشعرها ويناظر لعبهم اريج بيدها الشيش : طلعت لي سته "ودف يد عايض" وخرر بس عايض : والله انا شفتها اربعه مو سته اريج : والله عيونك فيها بلا سته يابويي سته وخرر خل اكمل لعب خل نخلص عايض كتم غيضه تغش عليهم عيني عينك وتنكر شاهر شاف انها اربعه بس من مصلحته يسكت عشان يمديها ترجع عايض ويفوز هو .. ريميه وقفت عند راسهم : هاا ضاري توديني انت بكره لاختباري ضاري : مايمديني بتأخر ع دوامي وانتِ تدرين لو يمديني كان بلاش الروحه مع ابو ملوح الي فشلتينا عنده ريميه : وشوو يعني تبي البنت تضربني واسكت واصير ملطشه للكل ! اريج : وينها قالت بتشتكيك للشرطه مو كأنهم تأخرو ريميه ناظرتها بطرف عين : انتِ تبينها من الله اريج ترفع يديها : اعوذ باالله ريميه طنشتها وناظرت ضاري : شسوي الحين ؟ ضاري سحب ذراعه من تحت سارونه بشويش وجلس : اشوف ابو تغريد ياخذك مع بنته ريميه : يع تغريد الشينه ضاري : اقول احمدي ربك "وناظر اريج" وانتِ هييه خلي عنك اللعب وقومي خذي بنتك للغرفه اريج : نايمه وتبيني اشيلها ثقيله تبي اطيحها تبي اموت بنتييي واموت بحسرتي شاهر ناظر عايض واشر له يغير فاللعبه دامها مو منتبهه لهم خل يغشون عليها الجنيه ضاري : لو تشيلينها زين وبحنيه ماهي طايحه ريميه بتقهرها قربت : انا اوديها حبيبتي سارونه "وشالتها بشويش" بسم الله عليك ياعمريي اريج ناظرت ريميه بقهر : فيك شده بعد روحي غسلي مواعين العشاا ريميه مشت للغرفه سافتها وبنفس الوقت ام عايض دخلت مع باب البيت وهي تشيل نقابها عن وجهها بتعب : السلام عليكم ردو عليها السلام وجلست ع اقرب كنبه ونزلت كيسها جنبها عايض : هاا يمه كم حصلتي اليوم ام عايض تمغط يديها : والله ماحسبت زاد عددهم وحسبو الفلوس هم وعطوني اريج لما انتبهت انهم غاشين عليها سحبت بساط اللودو ورمته بعيد وراحت جلست جنب ضاري وهي تناظرهم بغل شاهر صرخ : يامجنونه وش سويتي كان باقي لي واحد وافوووز عايض بقهرر : الحيووانه اريج تشد ع اسنانها : غلطانه اني لعبت مع بزارين غشاشين عايض وقف بسرعه بيضربها وهي انخشت بسرعه ورا ظهر ضاري وضاري يناظرهم بملل .. ام عايض بقوه : ياورع وخر عن اختك حشاا ماتستحي احشم زوجها ع الاقل عايض بقهر : الله يعين زوجها الي ابتلا فيها النذله ومشى معصب ولحقه شاهر الي عطى اريج نظرات احتقار وراح .. ام عايض تضرب بيدها ع رجلها : الحين لو متعلمه النقش وتروحين معي تترزقين بدل مناقر البزارين اريج تأفف : يمه الرسم موهبه من الله عطاك اياها بس انا لاا ماعطاني ام عايض : عطاك طوله اللسان والرفاله الله يصبرني اريج انقهرت كله يهاوشونها قدام ضاري : يماا ترا ضاري مايرضى اروح لبيوت الناس انتِ كبيره عادي بس انا لا مايرضى ضاري ناظرها متفاجأ : متى .. "سكت وهو يحس قرصتها بجنبه" ام عايض تدري ان بنتها نصابه بس خلاص تعبت .. وقفت : سوو الي تبونه ماني جابره احد ع شي ومشت عنهم لغرفتها بتنام .. ضاري لف عليها : اظن مابقى الا انا تنحشينه منك اريج ضحكت ولفت ذراعها بذراعه : لاا انت حبيبي لو تنحاش بنحاش وراك ضاري وقف وهي وقفت معه : قصدك لصق اصلي اريج برمت فمها مو عاجبها ووخرت عنه : لاتصدق عمرك قاعده اطقطق عليك ضاري سكت وهو يشوفها تروح عنه وهي تضحك بسخريه .. وليتها راحت لغرفتهم لا راحت لغرفه ريميه كالعاده سوالفهم وضحكهم الا بالليل اما بالنهار هواش ومناقر طلع برا البيت وقفل الباب وراه .. وجلس ع درج المدخل ويناظر الفراغ شاغل باله منذر .. وده ينقطع عنه ويختفي من حياته يحس انه يكرهه .. يخاف منه مو خايف انه يفضح ريميه لاا هو سكت وستر عليها كل هالسنين مارح يتكلم الحين هو يعز ريميه ويخاف عليها ولا ماكان تهور وقتل ذاك الخسيس بس هو يخاف يفضحه هو .. يخاف ريميه تدري انه السبب .. واريج غمض عيونه وصوت منذر الغاضب يتردد بباله "بطلع من السجن وبتزوجها واستر عليها وتنسى ان عندك بنت اخ يالوصخ" هل صدق بيثبت ع كلامه .. وده انه يتزوجها وتعيش حياتها محد بيرضى فيها الا منذر .. محد يدري عن الي صار الا منذر للحين ماانخطبت بس اكيد بيجي يوم وتنخطب وبيرفض محد بيتقبل الي صار لها ويصدق بس يفضحهم ريميه مالها الا منذر .. وان شاءالله يجي ويثبت ع كلامه لازم يصلح علاقته معه ويكتم كرهه وخوفه .. * * بعد ماراحو الرجال وفضى مجلسهم .. كان جالس مع عبدالله ولد اخته يعلمه ع برنامج بالجوال .. رفع راسه لما سمع صراخ نواف ع سلمان الي جالس ياكل تمر ببرود نواف وشوي وينفجر من العصبيه : كم مره اقولك عند الرجال تنطم علمني وش كنت تهرج مع نايف ال سلمان : ماقلت شي نواف : بلا كذب انا شاايفك رجال ماتعرفه وش قاعد تقوله هااه سلمان يرمي فصى التمره بعيد : مدري نسيت نواف يكور يده : قم انقلع داخل فشلتنا مدري وش قايل له مالقيت الا نايف ياحماار كم مره نقولك انثبر عند ابوي ولاتهرج مع احد بس الحمار حمار منذر وهو يتذكر دعوته عليه : نواف خله سلمان وقف بزعل وطلع من المجلس .. نواف لف عليهم مقهور : مدري وش يهرج مع نايف طول وهو يهرج الله ياخذه اكيد طلع كل فضايحنا منذر : الي ياخذ ع كلام الخبل خبل مثله ونايف قلو الرجاجيل يقعد يتسمع لكلام سلمان الي مو داري وين الله حاطه نواف : ماهوو خبيث انا عارف يدور علومنا من سلمان منذر : ذا الاشكال الوصخه مفروض ماتعتب مجلسنا نواف تنهد : مجبورين شنسوي عاد عبدالله : ودك اكمل خالي ولا اروح منذر : لا خلاص انا بنام عندي مشوار ضروري بكره عبدالله : زين الي تشوفه * اليوم الثاني .. ماصدق اخذ الوصف من واحد من اخوياهم القديمين .. وطلع سيارته وحرك بسررعه وهو يهز راسه : جاايك يالوصخ جاايك وقف عند البيت اللي عليه الوصف .. بسيط نزل القزاز وهو يتأمل شبابيك البيت الريم هناا يحس قلبه يدق بقوه ازعجه فكره ان ماتفصله عنها الا مسافه بسيطه اهلكت مشاعره ياالله شكثر اشتااق مايبي ضاري الحين يبيها هي وبس وبعدين يتفاهم مع ضاري ابتسم بحنين لما جا بباله شاهر .. ااه ياارب لف للسياره اللي وقفت عند البيت .. ونزلت منها بنت متنقبه .. وراحت السياره ريميه تدق الجرس وتعلق عليه وهي معصبه من تغريد وحركاتها مغتره عليها عشانها رايحه معهم .. منذر نزل قزاز السياره وهو يشوفها ومو عارف من هي الي يتذكره ان ريميه ماتغطي وجهها .. اجل من ذي ؟! اريج : ميين ريميه : ريميه تاج راسك منذر حس صدره ينشرح لما سمع الاسم وفوق هذا متغطيه .. ابتسم بسعاده اريج : كم تدفعين وافتح لك ريميه تأففت وهي تحس ان بيطلع دخان من راسها وكأنها ناقصه الفراشه اريج : نسييت انك متعوده تاخذين راتب ع فتح الابواب واستقبال الناس يالفراشه اريج قفلت السماعه بوجهها .. ريميه طلعت جوالها من شنطتها بتكلم ضاري تعلمه عن اريج وتخليه يهاوشها انا اوريهاا منذر يناظر حركاتها وهو للحين مو مستوعب انها هي قدامه .. صوتها متغير .. وده ينزل ويلمها .. بس ماعاد هي ريميه البزر .. يدينه ثابته كله ثابت مو قادر يفتح الباب ويطلع لها ريميه رجعت تدق الجرس وتعلق عليه وهي تدعي وتسب بداخلها ع اريج شافت ظل ع الارض وبنفس اللحظه جاها صوت اريج القريبه للباب تصارخ : وجعع ان شاءالله جعل يدك الكسر سمعت صوت رجولي وراهاا : في عدوينك ان شاءالله ريميه لصقت فالباب بخووف من الصوت الغريب .. القريب وثواني مرت حستها طوييله انفتح الباب ودخلت بسرعه .. منذر مافاته خوفها .. مايلومهاا قرب للباب قبل يتقفل : ضاري موجود اريج تناظر ريميه الي وقفت بوسط الحوش بخوف واستغربت الصوت : لا بالدوام منذر : زين اريج سكتت تنتظر يقول شي بس شكله راح ناظرت من فتحه الباب شافته معطيها ظهره ورايح لسيارته لفت ع ريميه : مين هذا ؟ ريميه تهز كتفها وهي تحس برجفه من صوته الغريب : مدري جلس في سيارته ينتظر .. وعيونه ع البيت يحاول يخمن ايهم شباك غرفتها لف للسياره اللي وقفت .. ورجع الحقد لقلبه شاف ضاري لما نزل هه متغير حيل كبران ابد مايعطيه عمر 28 سنه هه الظلم مكبره حسبي الله نزل بسرعه واتجه له وهو يشوفه ينزل اكياس معه وقف وراه : شلوونك يالحبيب ضاري وقفت يده بالهوا قبل ياخذ اخر كيس طلع راسه من السياره ولف وهو عارف صاحب هالصوت .. ماامداه يستوعب وجوده الا جاه بقس لف وجهه... * * نهايه البارت الثاني .. | |||||
|  |
|
13-10-22, 06:53 AM
| #13 | ||||
| بارت جميل قرأته قبل وحبيت اعلق على رواقه للاسف صداقة منذر وضاري الجميلة انقطعت والسبب ضاري الحقير وهذا اللي جناه بالتعرف على سماح الوسخه وله عين يبي يتشرط بوحده يفز له القلب كفوك اريجوه وقدرك ماعلينا من ضاري اهم شي ريميه الزين انها مازالت في قلب منذر وهذا اهم شي منتظرة البارت الجاي بشوق | ||||
|
| |
|
14-10-22, 08:02 PM
| #15 | |||||||
| بداية جميله استمري حبيبتي تسلم يدك ❤ الحمدلله ان منذر بياخذ ريميه بس الحين ام منذر احسها ماتوافق وهم سبب دخول منذر السجن💔 ضاري يستاهل اللي جاه اهمل عيال اخوه 🥹💔 اريج حبيتها 🤣🤣 امم اتمنى اذا الفصل جاهز تنزلينها متحمسه مره🥹❤❤❤. | |||||||
|
| |
|
15-10-22, 01:18 PM
| #16 | ||||
| مساء النور حيا الله الكاتبة الرائعة والله العظيم كنت انتظر منك رواية بعد ماقريت رواياتك السابقة اقول يارب نقرا الثالثة والله تفاجأت لما اتصفح المنتدى والاقي الرواية مفاجأة ماكانت ع البال نجي للرواية يالله ياضاري المفترض انك كافل ايتام ومحافظ على الامانه لكن ضيعتها بجريك ورى الحب الزائف منذر احس مشواره صعب مع ريميه لعدة اسباب بانتظار البارتات الجاية لاتطولي علينا 😘 | ||||
|
| |
|
18-10-22, 12:55 PM
| #18 | |||||
| كاتبة في قسم وحي الاعضاء
| البارت الثالث .. * * نزل بسرعه واتجه له وهو يشوفه ينزل اكياس معه وقف وراه : شلوونك يالحبيب ضاري وقفت يده بالهوا قبل ياخذ اخر كيس طلع راسه من السياره ولف وهو عارف صاحب هالصوت .. ماامداه يستوعب وجوده الا جاه بقس لف وجهه منذر شده مع ياقه ثوبه بيديه الاثنين : عاايش حياتك مبسووط يالوصخ هاااه ضاري طاحت الاكياس من يده ومسك يدين منذر يحاول يوخره عنه : استهدي بالله منذر منذر يناظره بقهر وحسره : تزووجت ؟؟ عندك عياال ؟ سحبت ع خويك اللي ضاعت سنين من عمره عشانه دافع عن شرفك ضاري يتلفت حوله : اهدى منذر وتعال نتكلم داخل انا ماسحبت عليك منذر اخذ نفس ووخر عنه بس عشان اللي يبيه .. ضاري يعدل ثوبه واخذ الاكياس من ع الارض : حياك منذر دخل بيته وهو كاره بس يصبر لين ياخذ الريم ويسحب عليه ويعلمه ان الله حق ضاري بعد مادخله المجلس راح للبيت شاف اريج جالسه بالصاله هي وامها : سوي قهوه بسررعه اريج : ايش مين معك ضاري وحده متوتر : اا وين ريميه اريج وهي رايحه للمطبخ : نايمه ضاري تنهد وطلع لمجلس الرجال منذر يناظره بكره : ماانيب شارب قهوتك ارتاح انا بس ابي ديني منك ضاري جلس قباله وبثقه ويحمدالله انه حسب حساب هاللحظه : جاهز كل قررش دفعته لي او لعيال اخوي حسبته وجمعته وفوقه زياده بعد منذر ضحك بسخريه : من قالك ابي فلوس "وبثقه وغرور" انا ولد نعمة وشبعان مو محتاج فليساتك ضاري : اذا حاط لوم سنينك بالسجن علي فاانت غلطان مو ذنبي انك ماتتحكم بااعصابك وتقتل الرجال منذر ثارت اعصابه وبصوت عاالي : موو ذنبك هاااه مو انت اللي لعبت بااعراض الناس وردو لك الدين ضاري وحرقه بصدره بس متحكم بااعصابه : اللي فات مات قلي الحين وش تبي منذر يشد ع اسنانه اللي فات ماات هه .. اخذ نفس يهدي اعصابه : ابي ريميه ضاري وجزء منه ارتاح يعني منذر ماغير رايه بيستر عليها : ماعندي مانع بس الراي الاخير لها مارح اجبرها ع شي منذر يهز راسه : زين ضاري يناظره بحب مصطنع : عزيز وغالي يامنذر انا ماابعدت الا عشان بنت اخوي مايطولها كلام وتتضايق ولا قلت لاحد من اهلنا عن الي صار محد يدري منذر يحس خاطره برد : زين ماسويت انت شاورها وانا بكلم اهلي ونجيكم * بالليل .. ضاري دق الباب المفتوح وهو يشوف ريميه تسوي شعر اريج : مشغولين ريميه تناظر شعر اريج باقي لها شوي : حياك اجلس لين مانخلص ضاري دخل وسحب كرسي المكتب وجلس وهو يناظر شعر اريج الطويل الي دايماً تاركته كيرلي جزء منه صار ناعم سايح : وش عندكم اريج تناظر ريميه بتهديد فالمرايه .. ريميه ناظرتها وابتسمت : ابد ولا شي نتسلا اريج : انت وش عندك احسك بتقول شي ضاري يناظرها وبهدوء : ايه بس شي بيني وبين ريميه اريج ترفع حاجب : يعني تطردني ريميه تناظره بااستغراب .. ضاري : تقريباً اريج سحبت شعرها من ريميه ووقفت وناظرتها بعتب هذا الي تقنعها تغير من شكلها له مالت عليه .. وطلعت من الغرفه وهي تنفش شعرهابيدها ريميه لفت ع ضاري : وش فيه ضاري اخذ نفس وبهدوء : منذر طلع من السجن ريميه وحست رجفه سرت بعروقها من سمعت بااسمه .. والخبرر .. ضاري يراقب ردت فعلها هاديه : وجاني كنت مجهز له فلوس ابي ارد له كل الي صرفه عليكم بس رفض يبي شي ثاني ريميه ورجفتها تزيد تبي تنهي هالسالفه تبي تقطع اسمه من حياتهم ماتبي تتذكر ذيك الليله .. ضاري : يبيك انتِ زوجه ريميه شهقت بخووف وتهز راسها : لاااا لااا ضاري وهو يشوف خوفها : ادري ماانتِ مستعده ومااقدر اقوله يرجع بعد كم سنه اخاف يغير رايه ريميه تجي تجلس قباله وبرجا : خله يروح ولايرجع تكفى انا طايبه نفسي ماابي اتزوج كلش ضاري يمسح ع شعرها : مايصير .. ريميه تقاطعه والدموع ماليه عيونها : الا يصيير ماابي صدقني والله راضيه وبظل طول عمري راضيه مااتزوج ضاري وقف : ماابي اضغط عليك الحين ريحي اعصابك وفكري بعقل وتقبلي الموضوع زواجك من منذر لازم يتم ريميه بعد ماطلع عمها وقفل الباب وراه .. جلست بتعب ع السرير .. حطت يدها ع قلبها وغمضت وهي تحس بدقاته سريعه وتنفسها يضيق وكأنها جاريه مسافه طويله دموعها بدت تنزل بصمت وذيك الليله تمر زي الشريط قدامها * بعد اسبوع .. جالس في مكتبه وبيده قلم رصاص ويرسم ابو حمدان الي جالس في المكتب قدامه ومندمج بشغله ع الكمبيوتر .. ابوه خلاه يشارك ابو حمدان المكتب ويتعلم منه الشغل لان باقي له سنه ويتقاعد وياخذ مكانه هو ابتسم لما خلص الرسمه وحاول يكتم ضحكته ابو حمدان برسم كاريكاتير يضحك .. مسك الورقه ولفها عليه : بو حموود شوف ابو حمدان ناظره وتنهد : ياولدي خل عنك هالكلام الفاضي وركز بشغلك منذر ترك الورقه ع الطاوله ووقف : احس اختنقت من الجلسه اتمشى شوي وارجع ابو حمدان : الله يصلحك منذر طلع من المكتب وهو يعدل شماغه يشوف نظرات الموظفين له يحس وفاهم نظرتهم له خريج سجون وابوه المدير وظفه بدون شهاده بيمسك منصب مايستاهله في غيره تعب من سنين واحق بهالمنصب .. فااهم وعاذرهم بس مع هذا مقتنع ان ابوه يحق له يتصرف مثل مايبي حلاله ويوظف بكيفه وهو ولده اولى من الغريب طلع برا المبنى ناظر السما المغيمه .. كل هالوقت تفكرين ياريميه .. تنهد بقوه واتجه لمكان الامن .. وقف عند الباب شافهم جالسين ع الارض وفارشين السفره والفطور والشاي انتبه له عريمان وارتبك : اا هلا سعيد وبفمه اللقمه ناظر منذر .. منذر يحرك يده : خلكم خلكم افطرو بالعافيه احمد وقف : سم امر بغيت شي طال عمرك منذر ابتسم : لا كمل فطورك ماابي شي عريمان يصب كوب شاهي ويمده له : تفضل احمد يأشر ع فطورهم وهو منحرج : حياك افطر معنا منذر اخذ الكوب من عريمان وجلس ع الارض معهم : زاد فضلك سعيد بفهاوه : بتاكل معنا .. فلافل !! منذر ابتسم بااستغراب : ايه مو انتم عزمتوني ! احمد يطلع خبزه جديده لمنذر : سم خله عنك هالفاهي عريمان يناظر منذر يفطر معهم ورفع عيونه لاحمد ورقص حواجبه .. احمد صد بعيونه عنه مايبي منذر ينتبه لهم .. * الساعه 5 العصر : ريميه طلعت من البيت وبيدها شنطه القهوه .. طلعت وراها اريج ومعها صينيه حلا وقفلت الباب ومشو للعماره الي جنبهم .. ريميه تمشي بصمت وهي تسمع لحلطمه اريج اريج : جعل يدينه للكسر عشانها متغربه عن اهلها وماعندها احد هنا تفرد فيها ريميه تمشي بصمت وهي تفكر بكلام اريج الي يسمعها يقول فاطمه سهله هه اريج كتمت ضحكتها لما شافت سلوم الواجد يطلع من العماره الي الدور الاول له وفوق شقق مأجرها ووحده منهم فيها فاطمه : عمو سلووم شلونك سلوم شق الابتسامه لما عرفها : هلاا بخيير والله اريج : معنا قهوه عمو اصب لك امي مسويتها ريميه تقرصها وبهمس : والله لو درا لك ضاري بينتفك تنتيف سلوم بفرحه : اييي باالله صبي لي اريج ضحكت بشويش واخذت شنطه القهوه من ريميه وصبت له ريميه اخذت صينيه الحلا ومشت عنهم لداخل العماره وهي تأفف وصلت الدور الثاني ودقت الباب .. فاطمه فتحت الباب : هلااا ريموو وين اريج ماجت ريميه دخلت وشالت نقابها : اووف الغبيه تقهوي سلوم الواجد فاطمه تركت الباب نص مفتوح ودخلت للمجلس مع ريميه : مصدقه انه بيتزوج امها هالهبلا وليته يسوى دخلت اريج وقفلت الباب وراهاا : يسووى من قال مايسوى ياغبيات هذا الووااجد فاطمه : خلاص عاد حرام تنابزون بالالقاب اريج تجلس وتربع قدامهم : حب عيني انتِ حنا مانقولها عياره هو لقب اطلقوه عليه طوله واجد وزنه واجد فلوسه واجد ريميه بملل : وكرشته اكثر شي وااجده اريج بضحكه : فشفتي كيف هو خلاص صار لقب شهره لو اقول سلوم ساده ماحد يعرفه بس اذا قلنا سلوم الواجد هوووب اشهر من علم فاطمه تنهدت : فكونا منه الحين انا شسووي ليت يدي انقصت ولا هفيته بالدجاجه ريميه : نعممم !! وانا مسويه الحلا عشان هالبطوله الي سويتيها والحين ندمانه اريج : هو مااحترمك بالاول يستاهل الي جاه ولكل فعل رد فعل حبيبتي ريميه : ولا تندميين باالله هذا اسلوب زوج محترم يرمي الدجاجه ع السرير ويقولك قومي سوي لي اكل اريج : عما بشكله بيموت اذا مالقى اكل قلت المطاعم ريميه بسرعه تقاطع فاطمه لما حستها بتبرر له : حبيبتي صح من حقه يجي من دوامه ويلقى غدا بس مايحق له يعاملك بهالاسلوب فاطمه : بس حتى لو احس مدري شلون هفيته بالدجاجه احس هذا تأثير النوم اريج : بس شفتي بلع العافيه وانقلع برا البيت ريميه تقطع الحلا وتحط بصحن لفاطمه واريج تصب القهوه .. فاطمه تناظرهم كيف مبسوطات!! : وانتِ ريميه ليش ماتبين المعرس ريميه تشد ع الفنجان تخفي رجفه يدها : توني صغيره ع الزواج فاطمه : ايه بس والله عريس لقطه مايتفوت ابوه بطرااان اريج وهي تتقهوى : ابوه البطران مو هو خريج سجون وبعدين ترا عيال الاغنياء دايماً مايعتمد عليهم فاشلين تبينها تتزوج ثم تبتلي فيه ماعنده مسؤوليه ويحسب كل شي ياخذه بفلوسه ريميه لفت ع اريج : هذا عمي بنى نفسه بنفسه وشايل مسؤوليه عيله ولاهو عاجبك !! اريج تلوي فمها : من يقوله ريميه : والله تعاملك معه وكل شي يقوله اريج تلف عنها : انا وحده استحي مااعرف اتعامل مع رجلي قدام الناس صدقيني لما اكون معه لحالي اعامله غييير فاطمه تضحك : هههههه عشتوو ريميه : كذب عيني عينك اريج تتقهوى وتناظرهم بصمت .. * * دخل البيت وهو ينزل نظارته الشمسيه ويمشي بسرعه .. ناظر الصاله فاضيه سمع صوت الضحك بجهة الحديقه الخلفيه .. زفر بقوه ومشى لهم فرح تصب شاهي لامها وتمد لها الكاسه : اييه البنات كبار ينتبهون ع اخوانهم اجيبهم ليه معي وانا ابي اروق عندكم رحاب تاخذ بيدها كاجو وتاكل حبه وتتكي ع المركى : ماتنلامي 3 سنوات حامل هههههه اصايل تطبطب ع فخذ رحاب : اقول انتبهي من كثر طقطقتك عليها لاتصيرين مثلها فرح : ماعليك ولدها عبدالله طولها وماجابت غيره ولدت نمر ههههه رحاب تضحك : يؤبشني مااحلاه رح ازوجه ويملي بيتي احفاد آمنة ولاهي مع مناقر بنتها .. : ابوكم اليوم ماهو عاجبني احس في شي مضايقه ولاء تركت جوالها : من غيره نوافوه اكيد هو الي ضا نواف طلع من باب البيت : ماشاءالله متجمعات عند امي وكالعاده ماتقولون لشروق تجيكم ولاء همست : لو طريت مليون احسن آمنه : سلم اول وشروق ماهي غريبه باب بيتنا مفتوح تجي وقت ماتبي حياها الله نواف قرب منهم باس راس امه وجلس : هذا شي مفروغ منه بس لما تتجمعون اذكروها واعزموها اصايل تنهي هالحوار لايبدا بمشكله : خلاص ان شاءالله نواف اخذ فنجان القهوه من رحاب : وين ابوي آمنه : طلع لعمك .. هو علامه ابوك مكتم اليوم نواف بسخريه : هه ومن غيره ولدكم المدلل الفاشل ماهو فالح بشي آمنه : منذر ! نواف اخذ شوكولاته واكلها كامله وهو يمضع بقوه يحاول يهدا .. شرب فنجانه كامل ونزله آمنه : وش مسوي منذر قولي نواف ناظرها : توه يعلمنا انه خطب ذيك البنت الي بسبتها دخل السجن وفشلنا خطب لنفسه ولا شاور احد آمنه وبناتها شهقو بصدمه !! اصايل بقهر : الله يسامحه لييه مايعلمنا نواف يضحك بشماته : هههههه وصار له اسبوع ملطوع رحاب : وجعع وتتثيقل بعد فرح : اي والله يدخل بسببها السجن وتفكر بعد هه لايكون بترفض نواف : يمكن من الي ترضى فيه خريج سجون وفاشل لاا وترك الموظفين المحترمين وصاحب لي الامن ولاء تلوي فمها وتلف بعيونها بعيد .. مغرور .. غيور .. هذا وهو الكبير فرح تناظر البنات وتقلد نواف بدون صوت "الموظفين المحترمين وصاحب لي الامن" اصايل ورحاب صدو عنها مايبون يضحكون ويقعد يحقق معهم .. آمنه : لاتقول عن اخوك كذا مايصير نواف : وش اسوي ماهو فالح بالشغل حتى ابو حمدان يشتكي منه آمنه وقفت بتروح تتصل ع منذر .. كيف يهونون عليه يخطب بدون مايشاورهم .. نواف طلع جواله واتصل ع شروق .. شروق الي كانت تتفرج ع التلفزيون : هلا قلبي نواف : تعالي البنات جالسات بالحديقه ينتظرونك شروق تأففت : باالله اعتذر لي منهم بشوف مسلسلي مالي خلق جمعه وهذره نواف يحاول مايبين عند خواته : خلاص انا اجيب لك بنادول معي ياهلا البنات كل وحده تسوي انها منشغله بشي .. نواف وقف ودخل جواله بجيبه : لاتجمعتو مره ثانيه كلموها انتم اصايل : تراه مسيار عصريه ع المغرب كل وحده رايحه بيتها موب جمعه ذي بس نجلس مع امي شوي نواف ناظرهم ولبس نظارته ومشى عنهم .. ولاء تحط راسها بحجر فرح : يااصبر الارض فرح تضحك : شفتوو يعزمها وكانه حنا الي عازماتها يكذب قدامنا رحاب : من كثر مايلزق شروق فينا صرنا مانطيقها فرح : ياشييخه اتوقع حتى هي زهقت مننا اصايل : كم صار لهم الحين كان ولاء : 8 سنين رحاب : الله يرزقهم ياارب بالذريه الصالحه * في حوش البيت .. الزوليه الحمرا مفروشه تحت النخله .. جلست وحطت صينيه الشاهي قدامها ضاري عدل المركى وهو يناظرها تصب له كاسه شاهي وتمدها له اخذها وحطها قدامه ريميه تحس بطنها تمغصها من اول ماقال لها سوي شاهي وتعالي برا عارفه في وش بيكلمها .. تعبت من هالموضوع لازم تنهيه اليوم .. اخذت نفس : من الاخر ضاري لاتحاول خلاص رد عليه وخله يروح يبعد عن حياتنا انا مااتخيل ارتبط فيه او بااحد غيره انا اخاف منه اسمه بس رجع لي الرعب ووجع القلب والله ماعاد اقدر انام من الكوابيس ضاري بتردد من الفكره الي تدور بباله من فتره : شوفي ريميه انا عطيتك وقت تتقبلين الموضوع لان زواجك من منذر بيتم لاازم ريميه برجفه : تكفى ضاري انت لو تبي روحي عطيتك بس الا هالشي مقدر والله امووت ضاري يمسك يديها ويشد عليها : نتمم هالزواج وعادي وبعد العرس تروحين معه ليله وحده وبعدها تخليه يرجعك لنا ريميه تقاطعه : اخليه يرجعني !! انا لو بس اشوفه اموت في مكاني شلون تبيني اكلمه ضاري الله يخليييك ضاري : الله يخليك انتِ اسمعيني هو مارح ياذيك مسوي فيها حبيب وراضي بعيوبك قبل حسناتك استغلي هذي النقطه انه يحبك والي تقوليه يسمعه بعد العرس قولي ابي اهلي ولزمي عليه ولاجابك عندنا ترفضين ترجعين معه وانا اوقف معك بدون مايحقد علي بيفهم انك امانتي ومااجبرك ولو رفض يطلق نرفع قضيه خلع وانتِ صغيره تتطلقين والحياه قدامك انا مو دايم لك ريميه غمضت عيونها ونزلت دمعتها : مقدرر والله مقدر ضاري بقووه : خياريين ياتتزوجين بالغصب ولاني واقف معك ياتمشين ع خطتني وانا معك ريميه تحط يدها ع قلبها الي ينقبض بقوه توجعها : مقدر اخاااف ضاري وقف : الي عندي قلته معك يوم واحد بسس * * حضن يدين امه وباسهم وشد عليهم : ماخطبت رسمي انا بس تكلمت مع صاحبي ويشوف رايها واذا وافقت اجيبكم ونخطب رسمي آمنه تمسح ع راسه : صاحبك ! مو هو باعك لما انسجنت منذر يكتم كرهه له : هو ابعد عشانها ولا ماتغير رحب فيني وبعده يعزني آمنه : لو رفضتك خلاص ابعد عنهم وخل ادور لك بنت الحلال الي تعوضك منذر شتت نظراته ورجع ناظرها : انا ماابي غيرها حتى لو رفضت برجع اخطبها هي بعدها صغيره وبتغير رايها بعدين انا متأكد آمنه لمعت الدموع بعيونها : يايمه لاتوجع لي قلبي لمتى تنتظر هالبنت وتضيع من عمرك عشانها منذر : يمه انتِ تبيني اعيش مبسوط صح انا مارح انبسط مع غيرها خلاص سكنت القلب واعمت عيوني عن غيرها آمنه تنهدت : ياخوفي انها ماتستاهل هالحب منذر سكت وبداخله خوف .. يجهلها .. ماتوقع يطولون عليه بالرد .. ياترا وش تغير فيك ياريميه * فتح باب البيت بقوه والشر بعيونه .. ام عايض شهقت : بسم الله وش فيييك ضاري بصوت عالي وهو يتحرك بااتجاه الغرف : وينهن حسبي الله ع ابليسهن ام عايض تمشي وراه : وش صاير علمني يارجال تعوذ من ابليس ضاري لف عليها ووجهه احمر : بناتك مطلوبات عند الشرطه جارنا احمد ال.. مشتكي عليهن يحرشن زوجته عليه اريج طلعت من غرفتها بخمول : وش فيكم ام عايض ناظرت اريج بعصبيه : حسبي الله عليييك هذي اخرتها ضاري شدها مع ذراعها وسحبها معه لغرفه ريميه وفتح الباب بقوه ريميه الي كانت جالسه ع السرير شهقت لما انفتح الباب وضاري دف اريج وطاحت ع سريرها ضاري : وش قايلات لحرمه احمد ال.. ريميه تناظر اريج الي قامطه العافيه ولا نطقت رجعت ناظرت ضاري : ماقلنا شي وش فيه ام عايض عند الباب : الرجال مشتكيكم للشرطه محرشات حرمته عليه هذا تخبيب ومحاكم الله ياخذكم من بنات اريج توخر شعرها الكيرلي بيدها ورا : يمه لاتدعين عليناا ام عايض تقرب منهم : اصص ولا كلمه وش قايله للحرمه انطقي ريميه : عمي اهدى ماقلنا شي بس هي تهاوشت معه وحنا رحنا نواسيها وننصحها ام عايض تضرب كفوفها ببعض : ماالت عليكم وانتِ يالعوبا سنعي حالك اول بعدين انصحي الناس "ولفت ع ضاري الي يناظرهم بقهر"وش السوات هالحين ضاري اخذ نفس يهدي اعصابه : بروح واتفاهم معه يسحب شكوته حنا جيران ولاياخذ بهرج الحريم الفاضي اريج وقفت : وانا بروح معك اصفقها كفين المنافقه واعلمها التخبيب شلون ضاري حط كفه بوسط وجهها ودفها ع ورا : انثبري ريميه تلف يديها حول اريج لما طاحت بحضنها وهمست : انطمي ماتشوفينه معصب ضاري طلع من الغرفه .. ام عايض تمسك الباب : ان شفت وحده عتبت باب هالغرفه ماتشوف خير عز الله * * نهايه البارت الثالث .. | |||||
|
| |
|
20-10-22, 07:07 PM
| #19 | |||||
| كاتبة في قسم وحي الاعضاء
| احمم مساءالخير بسوي حركات اعتبروها اعلان نفس المسلسلات 😅 * * " دخلت مع الباب تمشي بهدوء بدون ماتناظرهم .. لابسه فستان ناعم صيفي .. وشعرها رافعته ومنزله غره .. رحاب ناظرت اصايل وكأنها تقول مشيتها مستفزه .. * انتِ الي لويتي ذراعي برضاك وخليتيني اطلع من الشقه وانا داري ضاري مايعتمد عليه * شاهر : عمي ريميه ماهي بخير * وقف وبدون تردد هجم عليه وكل واحد حيله قوي .. ويتضاربون من قلب لما سمعو اصواتهم طلعو بسرعه يفكون بينهم .. " | |||||
|
| |
|
22-10-22, 07:37 PM
| #20 | ||||
| يا هلا بالحامل والمحمول 🌹اشررقت وانوورررت يا كلوود منوره كالعاده بأحداث ولا اروع 💓. ريميه بطلتنا الاستثنائيه خيارك الوحيد هو منذر وافقي عليه بالرضا لان منذر ما راح يوافق ع الانفصال . متى الفصل الجاي 🔥🔥🔥🔥 | ||||
| |
 |
| أدوات الموضوع | |
| انواع عرض الموضوع | |
|
|
1089Likes
العرض العادي
