آخر 10 مشاركات
الإغراء الممنوع (171) للكاتبة Jennie Lucas الجزء 1 سلسلة إغراء فالكونيرى..كاملة+روابط (الكاتـب : nagwa_ahmed5 - )           »          فضاءات اليأس والأمل (الكاتـب : #أنفاس_قطر# - )           »          225 - اريد حياتك .. فقط - ميشيل ريد (الكاتـب : Fairey Angel - )           »          83 - عصفورة الصدى - مارغريت واي (الكاتـب : فرح - )           »          قلبك منفاي (الكاتـب : Hya ssin - )           »          389 - رقصة على ايقاع الحب - سوزان ستيفنز (الكاتـب : بلا عنوان - )           »          جرح الماضي (79) للكاتبة: جاكلين بيرد ...كاملة... (الكاتـب : *ايمي* - )           »          1012 - طقوس الحب - ريبيكا وينترز - عبير دار نحاس (الكاتـب : Just Faith - )           »          [تحميل] لجل الوعد للكاتبة/ المحظوظه (جميع الصيغ) (الكاتـب : فيتامين سي - )           »          تائهون إلى أن يشاء الله ، للكاتبة/ رررمد " مميزة " (الكاتـب : فيتامين سي - )


العودة   شبكة روايتي الثقافية > قسم الروايات > منتدى قصص من وحي الاعضاء > الروايات الطويلة المكتملة المنفردة ( وحي الأعضاء )

Like Tree9Likes

إضافة رد
 
LinkBack أدوات الموضوع انواع عرض الموضوع
قديم 28-02-08, 02:57 PM   #1

غيوم الشوق

كاتبة في قسم قصص من وحي الأعضاء


? العضوٌ?ھہ » 3033
?  التسِجيلٌ » Feb 2008
? مشَارَ?اتْي » 382
?  نُقآطِيْ » غيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond repute
20 ξξ بيـــتنــــا الطيــــن ξξ ( كاملة )


بسم الله الرحمن الرحيم

السلام عليكم ورحمه الله وبركاته

كيفكم يا حلووووووين




قصتي الجديدة .... ξξ بيـــتنــــا الطيــــن ξξ



قصة تحكي ذكريات وتراث قد تعايش بعضنا معه أو قد سمعتم عنه من أبائكم قصة تحكي الماضي قبل العولمة قبل الانترنت قبل الفضائيات زمن حلو عاشوه أبطال قصتي بكل فرح


أحداث عائلية ومواقف ولحظات حب عاشوها أبطال قصتي وتسردها لكم بطلة قصتي


" نوره " هنا قصتي تختلف تماما عن قصتي الغريبة وابطال القصه سوف تتعرفون عليهم خلال القصة منهم الرئيسي وسوف تعرفونه بكل تأكيد ومنهم الاستثنائي سوف يظهر خلال الأحداث وسوف اطرحها كل أربعاء بأذن الله الا اذا قدر الله منعني ظرف ما


اتمتى ان تنال اعجابكم وتلقى استحسانكم



اختكم غيوم الشوق


غيوم الشوق غير متواجد حالياً   رد مع اقتباس
قديم 28-02-08, 02:59 PM   #2

غيوم الشوق

كاتبة في قسم قصص من وحي الأعضاء


? العضوٌ?ھہ » 3033
?  التسِجيلٌ » Feb 2008
? مشَارَ?اتْي » 382
?  نُقآطِيْ » غيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond repute
Elk

ξξ بيـــتنــــا الطيــــن ξξ


هاااااي يا حلوين .....

/
\
/
\

اعرفكم على نفسي .. انانوره او.. مثل ما اهلي ينادوني النوري ....

ياربي وش اقول عن نفسي امممممممم... بعلمكم مثلا انا بنت أحب امشي بالشارع

حافية ما البس انعول وانتو بكرامه الا وقت العيد عشان كل شي جديد طبعا يوم كنت بزر يعني مو الحين J
واحب بعد العب بالرمل كان قدام بيتنا حوووش كبيييييييير وبجنبه كوم رمل هذا مكاني المفضل من يروح ابوي العصر للدوام وانا راميه كتبي وجايه فوق كوم هالرمل وتعالوا عاد شوفوا بزران حارتنا اذا التموا منهم الأصدقاء ومنهم الأعداء كل خططنا على كوم
هـ الرمل ويما شهد هـ الكوم زعلنا وفرحنا عشنا فيه اجمل لحظاتنا......

....: النوري تعالي تغدي

اكيد سمعتوا الصوت المزعج هذا وحبيتوا تعرفون من الي صوتها واصل لأخر الحاره تبون تعرفون هذي اللزقه اختي منور او مثل ما اناديها انا منير يعني اختي الي اصغر مني بسنه منيرة اقولكم سلمكم الله ليش سميتها لزقه هذي دايم ناشبة بحلقي اذا رحت لبنات جيرانا او بنات قرايبنا الا تنط بحلقي وتبي تروح اقولها اختاري وين تبين تروحين اذا قالت بروح لجيرانا عيال مزنه قلت خلاص بروح لبنات عمتي صيته يعني انا وياها أطقاق مع العلم لا انا ولا اهي نقدر نستغني عن بعض بس مدري ليش اتوقع لانها اصغر مني ويمكن غرت منها يوم جابتها امي مع اني ما اتذكر بالضبط متى امي جابتها هههههههههههههههههههههه

خلوكم من خرابيطي .......

بيتنا الطين آآآآآآآآآآآه ومن بيتنا الطين وش بقول وش بخلي ذكريات حلوه وبنفس الوقت ذكريات تبكي تسئلوني ليش تبكي لأنها صارت ذكرى يعني مراح اقدر اعيشها مره ثانية راح الطهر الي فيها راحت البراءه مافيها خوف من المستقبل حياه حلوه هذا الي اقدر اقوله يعني يا نوره خلاص أنتي كبرتي صرتي كل خطوة تخطينها محسوبة عليك ..

طبعا ما يحتاج نتأخر على المدرسة لأنا نام من المغرب بسبب الفرفرة في الشوارع J
شفتوا كيف حنا حلوين لا دش ولا خرابيط بس القناه الأولى وتعالوا شوفوا بس الرسوم المتحركة وقت العصر يعني لا سبيس تون ولا ام بي سي ثري اربع وعشرين ساعه الي عيالنا متنحين عندها أول كان مسلسل النمر الوردي وش حليلة هو مخدته الي دايم يشيلها ويبي ينام ويجيب النوم لنا ولا توم وجيري أو على قولتنا الفار و القطو متى عرفنا توم وجيري يناس ياهوه اشتقت لزمنا الأول بدون تصنع بدون زيف زمن حلو مافيه لا برستيج ولا غيره ابي بيتنا الطين لالا ماعلي ابيه بتقولون وش ذا المرجوجه وش اسوي كل ما اتذكر ذكرياتي ابكي وتجيني هالحاله وكل اهل البيت يضحكون علي ويئسو مني لكن خلوكم مني وتعالوا اكلمكم عن بيتنا الطين شوفوا طبعا انا ما سكنت بيت طين لكن بعلمكم وش شكل بيتنا الطين هذا بيت جدي الأول بانيه بنفسه كل لبنه فيه وكل ذرة من طينه وترابه لمسها بيده الله يرحمه ولد فيه ابوي وتزوج فيه بعد لكن يقال عنهم تطورا شوي بنو في الأرض إلي جنبه بيت شعبي قديييييييييييييم تدرون كم غرفة بقولكم كم طبعا المجلس والمقلط هذا شي لابد منه في كل بيت رجل عربي قبل يكون سعودي يوووه مشكلتي الوصف ما اعرف اوصف زين لا تعصبون الله يهديكم ركزو معي وراح تفهمون فيه غرفه بالمزرعه أي مزرعه كنا ساكنين بمزرعه صح مو مزرعه كبيرة بس انا احب اذا تذكرت بيتنا اقول مزرعتنا كان فيها ست نخلات كبار وسدرة وشجرة عنب يآآآآآه وش ذكرياتي مع هالشجره خلوني شوي بعلمكم بوصف بيتنا وبعدين ذكروني اقولكم سالفة شجرة العنب المهم هذا الحوش او المزرعه الي فيها ست نخلات وسدرة وشجرة عنب وصندقة صغيرة فيها ارانب زين...J
دايم انا ومنور طقاق انا كل الأرانب البيض حقتي عيونها زهر والله ما اكذب عليكم عيونها زهر سبحان الله ومنور تاخذ البنيه وهي تصيح تبي البيض لكن من عليه انا النوري اخذ حقي وحق جد جدي بعد المهم وفي الحوش غير الصندقه غرفة سواقنا ابراهيم هذا شايب سلمكم الله هندي وش حليلة مسلم ويحبنا وله سوالف كثيرة مع جدي راح تتعرفون عليها بقصتي وبعد مخزن هذا المخزن صغير يحطون فيه الرز والطحين وثلاجة التمر وجنب المخزن غرفة جدتي تحب تكون في الحوش وتحط بعد قدامها سرير كبير حقها تنام عليه هي وجدي في البراد ما يحبون هوا المكيف وجنب غرفة جدتي عاد المقلط والمجلس الحين هذا التفصيل الدقيقة للحوش نجي للتفصيل لبيتنا من داخل اول غرفة هي غرفة امي وابوي بابها من حديد تقولون ليش لأنا دايم من كثر ما نطق عل امي وترفض تفتح لنا خربنا باب الخشب وصار باب حديد يبون الفكه من شرنا والغرفة الي بعدها غرفة التلفزيون الي نجتمع فيها وبعدين تجي غرفتنا العيال مع البنات وتعالوا شوفوا الطقاق شلون طبعا مافيه شي اسمه سرير كان بس دواشق اذا تعرفونها اذا ما عرفتوها طقوا انتر ههههههههههههههههههههههههههه

المهم كان فراشنا بالارض وكل يوم هواش .. فينا سر وهو الخوف ما نحب نجي يم الباب الكل ينحاش ما يبي يكون جنب الباب يعني اذا جا حرامي بيسرق الي جنب الباب ....
المهم ويجي بعد غرفتنا المطبخ ياحلو مطبخنا زمان لا فرن ولا غيره طاوله كبيره وعليها القز من ثلاث عيون ورف واحد والمواعين تعالوا لا كثيره ولا شي يحطونها بقدر كبيره مستودع هههههههههه ياحلوها بس من ايام ونجي الله يعزكم ويكرمكم لدورة المياه مافيه الا وحده كلنا فيها والصاله هذي كبيرة ومفتوحة من فوق بس مضللينها بعريش وهذي ناكل فيها الوجبات الرئيسية

والله والله لو يقولون يانوري لو نعطيك 15 مليون ولا نرجعك للايام ذيك وتعشينا للابد لحد ماتموتين لاقول رجعوني اعيشها بتدرون بعدين ليش انا كرهت عيشتنا الحين وليش ابي ارجع لذكرياتي الاوله لا تستعجلون وتنزلون لا اخر الصفحة شوي شوي بتعرفون وكل شي بوقته حلوا صراحه انا تعبت وانا احكي لكم عن ذكرياتنا اصبروا الحين برتاح وبرد لكم
\
/
\
/
\
/


رديت لكم بعد ما نزلت تحت للمطبخ وشربت نسكافيه الله يرحم ايام أول مافيه لا نسكافية ولا غيرة ما غير بيبسي غراش ومرندا مثل ما اخوي رويشد يقوله واذا جا الشتا شربنا حليب بزنجبيل اما الحين نسكافيه وكبتشينو يقالنا تطورنا وصار الواحد يحب يرتقي ونسينا تقاليدنا ومدري مع الأيام عيالنا وش بيكون مصيرهم يمكن لو يمشون بالشوارع نتوقع انا في امريكا مو السعوديه الله لا يقوله يالله ادري غثيتكم نرجع لقصتي اصبروا برشف رشفة من النسكافية قبل يبرد ايوا وين وصلنا لا تعصبون خلاص تذكرت وين وصلنا يوم وصفت عليكم البيت نجي للشارع لا تضحكون من جد لازم اوصف لكم شوارعنا والله يا بنات وانا اوصف انها خانقتني العبرة يوم اتذكر هذيك الشوارع والأيام المهم نجي للشارع ماهو مزفلت مثل ما قلت لكم قبل قدامه حوش بلك وهالحوش سلمكم الله فيه غنم جدتي J
الي دايم تلقونا على سورها عشان نطل على الغنم اذا راحت جدتي يعني من غير ما احد يدري عنا العصابة وكوم الرمل وارض كبيرة فيها "تراب احمر" بوجه العدو المهم وفي الأرض هذي العابنا تعالوا شوفو العابنا كيف سيارات بس لا تضحكون ياويلكم سياراتنا مو مثل الي في محلات الالعاب لاااااااااا سياراتنا تعرفون الجالون حق زيوت السيارات هذا سلمكم الله نقطه ونفتحه ونربط فيه حبل واحلا سيارة بعد وبعد نسوي حديقة حيوانات والله بس حيواناتنا عفازههههههههههه أي بعضكم ما يعرف شنو العفاز هذا نمل الي يجي كبير شوي نجمعه ونحطه بهالحديقة هههههههههههههههههههههههههههههههههههه اتخيل اشكالكم وانتو تقرون البعض يضحك والبعض متقرف اكيد كل واحد منكم مرت عليه ذكريات طفولة وعاشها بشكل مختلف ما تحسون بحنين وله لذيك الأيام ما تبون ترجعون لها ياناس الحين اعيالنا ما نشوفهم بالشارع مثل اول اغلب وقتهم قدام التلفزيون يمكن ماعاد امان مثل اول او يمكن الزمن تغير الله يعين الزمن كل شي نرميه عليه لالا مو الزمن حنا الي تغيرنا الزمن ماله شغل تطورنا في البدايه جانا الدش وبعد الدش الانترنت وياعالم وش بيجي بعد كدرتكم ادري خلوني بس ارجع لذكرياتي وصفت بيتنا وشارعنا باقي بيوت جيرانا يا ناس تعالوا شوفوا جيرانا وش كانوا قلوبهم على بعض اول بيت جنبنا ام احمد وعيالها ذولي من اهل الجنوب ولدهم احمد كبير ومتزوج ويحب شي اسمه نصر لا تضحكون أيام كان عز النصر كان معاهم ماجد عبد الله واذا جت مباراة ما نسمع الا صياح احمد ونضحك بزران نضحك عشان صياحه وحنا ما ندري وش السالفة أي نسيت أعلمكم بعد أبوي هلالي متعصب ويموت في ياربي وش اسمه تذكري يا النوري لاعب ابوي يحبه اسمه صالح على ما اعتقد بس اسم ابوه ما اتذكره ماعليه اذا ذكرته قلته لكم ويمكن بعد ملخبطه بالاسم المهم بيت جيرانا أم احمد وكان بينا وبينهم سور ولنا ويا هالسور قصص وحكايا وبعد بيت ام احمد بيت عمتي وبعدها في الشارع الثاني عماني ثلاثة بيوتهم جنب بعض بينا وبينهم شوارع ضيقة بس الحين لو تشوفونها تحسونهم قريبين من بعض وباقي البيوت ربعنا وجيرانا الي صاروا حسبة ربعنا عشرة عمر وفيه مخبز وبقالة العم صالح " الله يرحمه يارب " ياما خذينا منه بالدس علوك وكنا نتوقع انه ما يدري وهو كان يتغاضى عنا ويسوي نفسه ما يشوفنا
" الله يعفى عنا بس " J
ماكان فيه مغاسل مثل الحين بس بقاله ومخبز وبوفية صغيرة بعد يحليلها هـ البوفيه ومحمود إلي يبيع فيها
%
%
%
%
%


يلا ابحرو معي ترجع قبل 20 سنه يوم كان عمري سبع سنوات

منور : النوري الحين المدرسة شلون
النوري : اقول منيرة اسكتي ترى بطني يمغصني من الخوف وبعدين تعودي تناديني نوره مالت عليك
منور بغباء : ليش طيب مو حنا ناديك بالبيت النوري
نوره : أي يا خبله هذا بالبيت لكن الحين حنا رايحين لناس اول مره نشوفهم يمكن يضحكون علي
منيره ببراءة : طيب ...... واخذت منور تدور وهي تقول هاه نوره وش رايك في مريولي وكشختي

( كانت منور لابس مريول شوال وحاطه جدلتين شعرها كان طويل وشبرات من فوق ومجدلة شعرها ومن تحت بكل بيض وقتها مايعرفون شي اسمه شبصات صغار )

نوره وهي ودها تذبح اختها : وهذا الي هامك
جتهم أمهم تمشي :يالله يا بنات تعالوا افطروا
نوره وشوي دموعها تنزل : يمه مو مشتهيه
أمهم أم راشد : طيب بلف لكم سندوتشات إذا شتهيتوها في المدرسه تاكلونها
نوره : يمه ليه نروح للمدرسة حنا مرتاحين بدون دراسة
ام راشد : لا يمه لازم تروحون تدرسون عشان تتعلمون وتصيرين بعدين مدرسة وتستلمين راتب واصير ام المدرسة
منور : هههههههههههههههههههه يمه وانا بعد بصير مدرسة
ام راشد وهي تبتسم لمنور : والله يا منور ستعجلنا عليك ودرسناك بدرري مع النوري عشانكم ماتفترقون عن بعض
نوره وهي تناظر اختها بنظرة استهزاء : خبله مدري وش مستعجلة عليه

سمعو صوت الهرن ....
ام راشد : يالله يا بنات ابراهيم يضرب لكم هرن يلا الله يوفقكم
شالت نوره شنطتها وهي خايفه وترتجف ومنور تضحك وما همها شي
ام راشد : لحظة يا بنات اخذو الفلوس وعطوها ابراهيم يمر البقالة ويشتري لكم بيبسي للمدرسة
منور وهي تنط : هاتيها يمه
نوره : يمه وراشد مهو رايح معنا
ام راشد : يقول مايبي يداوم اول يوم مراح يعطونهم شي
نوره وهي تناظر منور : يلا مشينا


[+][+][+][+][+][+][+][+][+][+][+][+][+][+][+][+][+][+][+][+][+][+][+][+][+][+]




%% في المدرسـة %%


(المدرسة قديمة وكانت مبنى عادي بيت ومستخدمينه مدرسة ومكثرين الله يعزكم دورات المياه)

كانوا البنات موزعين بالساحة اشكال متنوعة الي بالمستوى الاول والثاني والثالث والرابع والخامس والسادس واشكال المستوى الاول واضح الي تبكي وترتجف والي تضحك والي مربوشه
نظرات نوره للي حولها نظرات تفحص من يوم ما كانت صغيرة وهي حذرة تحب تتفحص الي حولها
سمعوا صوت الجرس الي في المستويات متعودين على صوت الجرس لكن المستوى الاول كان غريب بنسبة لهم فزت نوره مخترعه
منوره : هههههههههههههههههههههههههههههههههه
نوره : ليش تضحكين
منور : شكلك يضحك يوم نقزتي
جتهم ستاذة سعاد وهي تبتسم وتجمع بنات أولى عشان تزين صفوفهم: يلا بسرعة يا بنات تعالوا يا بنات أولى تجمعوا هنا و تأشر على مكان صف أولى ابتدائي ....
التفتت أستاذة سعاد وشافت نظرات نوره لها ابتسمت كانت عيون نوره تلمع بشي خاص يمكن لان عيونها حلوه وفيها شي يجذب خلت أستاذة سعاد تبتسم وتروح لمهم : وش اسمك يا حلوة
نوره بنظرات جادة : اسمي نوره
أستاذة سعاد : عاشت الاسامي يا نوره وش هـ الزين والحلا الله يحفظك يارب
نطت منور : و أنا و أنا اسمي منيره
أستاذة سعاد : ههههههههههههههههههههههههه ياحلوك بعد يا الله حبايبي تجمعوا عشان نصفكم

"" جمعتنا وصفتنا وصاروا يعدون الأسماء وحطوا أولى "أ" وأولى "ب" وأنا صرت في أولى "أ" ومنور في أولى " ب" اول مره نتفرق انا ومنور كل اهل المدرسة سمعوا صياح منور وهي تبي تجي معي بصفي كنت وقتها أناظر منور و أكابر ولا ابين اني مهتمه كانوا الأستاذات يسحبونها بيديهم وهي تبكي وتناظرني كانا راح نفترق ومراح نجتمع جلست وأنا ضامه شنطتي بحضني كانوا البنات أشكالهم بالصف تضحك الي تدمع عيونها والي مستحييه جتنا استاذة ساره وهي تبتسم
أستاذة سارة : هلا والله ببنياتنا
كنا نطالعها وكلنا خوف
أستاذة سارة : يالله عرفونا على أنفسكم وحده وحدة
كانت فطوم في أول صف وبعدها نوال .... مدري ليش من يوم كنت في أولى وأنا في الأخير لأني طويلة يجلسوني ورى جرحوا إحساسي J



[+][+][+][+][+][+][+][+][+][+][+][+][+][+][+][+][+][+][+][+][+][+][+][+][+][+]



"" في البيـــت ""


منور وهي تصيح : مابي مابي اروح للمدرسة مخليني في فصل بروحي
نوره وهي تاكل تفاحة :ابلتكم اسمها نوره حسن وابلتنا اسمها ساره
منور بدلاخة : أي ابلتكم حلوه وشعرها طويل وبصوت عالي وصياااااااح مااااااااااااااابي فصلي ابي اروح مع النوري
امي انزعجت من صياح منور وشالت الصينية وراحت للمطبخ
وقفت وانا اركض واغمز لمنور عشان تفهم وتجي معي لكوم الرمل كنت مشتهية نسوي مقلب للعيال ما فكرنا في عواقب الأمور اهم شي بس نضحك ونلعب كان وقت ظهر والشمس حارقة كان غايتنا الضحك والعب
منور : هاه وش بنسوي
نوره : وش رايك نلعب عليهم نحفر حفره كبيرة ونغطيها بقشاش ونقول لهم الي يبي بسكوت يجي وهم راح يجون ركض

منور : طيب اصبري لحد ما تجي سارونه بنت خالي محمد
نوره : يا خبله سارونه بحاره ثانيه ودرست و اليوم السبت مراح تجي اهلها مراح يخلونها تجينا الا يوم الاربعاء
منور بحباط : حرااام
نوره وهي تناظرها وتضحك : حرام عشان سعيدان مو عشان سارونه
احمر وجه منور : انقلعي اصلن انا احب سعد عشانه ما يخلي احد يضربني
نوره وهي تبتسم : يالله خلينا نادي فطوم بنت جيرانا الجنوبيه
منور وهي تشهق : خبله انتي ترى اخوها احمد بيذبحنا مو يقول تلعب معكم العصر بس وحنا الحين الظهر
نوره وهي تحك راسها :طيب بس انا وياك الي نحفر الرمل
منور وهي تنفخ يدها : نوره يوجع الرمل حار
نوره وهي تحفر ومتحمسه : ماعليه اصبري

جاهم صوت صراخ من بعيد التفتوا البنات شافو راشد قاعد يطالعهم ومستغرب وش يسوون
راشد وهو معصب "على صغر سنه كان وقتها بخامس ابتدائي الا انه مسبب رعب لخواته ما يحبهم يلعبون مع العيال " : وش تسووون
تعلثمت منور من الخوف : هاه نسوي مدري انوري نقولي احفري
نوره ولا همها راشد : وش انت تشوف قاعدين نحفر
راشد : تحفرون بهالقايله
نوره : كيفنا أي وقت نحفر فيه
هنا عصب راشد وشال عصى بالارض منور يوم شافت العصى ما شافو الا غبرتها يوم راحت


غيوم الشوق غير متواجد حالياً   رد مع اقتباس
قديم 28-02-08, 03:10 PM   #3

غيوم الشوق

كاتبة في قسم قصص من وحي الأعضاء


? العضوٌ?ھہ » 3033
?  التسِجيلٌ » Feb 2008
? مشَارَ?اتْي » 382
?  نُقآطِيْ » غيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond repute
Elk

الجزء الثاني



هنا عصب راشد وشال عصى بالأرض منور يوم شافت العصا ما شافوا إلا غبرتها يوم راحت
نوره تناظره بجسارة عين و هي من داخلها تحس بخوف غير طبيعي بس ما تبي تبين
راشد قرب منها وهم يضربها لكن وقفة صوت ورآه

...: راشد وش تسوي ليش تضربها

راشد وهو يبرر موقفة :خالد جالسات يحفرون بعز الظهر وقلت لهم يدخلون وهي عيت

خالد : طيب صارخ عليها بس تضربها ما يجوز تضرب بنت ما قالك أبوي الشايب ما علمك انه من المرجله الرجل ما يضرب البنات

راشد وهو ينافخ : بس هي تنرفزني

خالد : اعرف تحكم با اعصابك

%% كل هـ الكلام كان على مسمعي كنت اسمع اخوي خالد أي صح نسيت أعلمكم عن اخوي خالد هذا اكبر إخواني في الثانوية بس مو ساكن معنا أي لا تستغربون ساكن مع خوالي مع جدي وجدتي لان خالي جته دوره في الشرقية وعيو جداني يرحون معه وكانت الدورة مهمة عشان ترقيت خالي وحلت امي المشكله يوم خلت اخوي خالد عندهم وبكذا يروح خالي وهو مطمأن على أبوه وأمه باقي اخواني بقولك عنهم خخخخخخخخ لا تضحكون علي ما بقى الا اخر العنقود عزوز وحطيتهم كثير يعني عندي خالد وراشد وعبد العزيز وانا ومنور أي نرجع للسالفه يوم اخوي خالد يعاتب راشد عشانه يبي يضربني بعدها فهمت اني ما اخالف امر اخواني واطيعهم كان اسلوب اخوي خالد بمثابة درس لي حتى لو كان هـ الدرس مو موجه لي %%
" الحياة دروس مو بس كل شي نتعلمه في المدرسة لا تمر احيانا علينا مواقف حتى لو كنا صغار تكون درس لنا""

خالد يوجه امر لي : روحي داخل البيت

مشيت مثل عادتي كالبرق اركض ركض دخلت داخل وانا اتنفس بسرعة منور وهي جالسة على سفرة الغدا وتناظرني
منور : طقك رويشد
النوري جت تمشي تجلس على السفرة : لا ما طقني

دخل راشد وخالد والتمينا كلنا على الغدا ابوي وامي وجدتي وجدي وعزوز كان غدانا بسيط رز ولحم وصالونه

ابوي يناظرنا ويضحك : هاه وش سويتو اليوم في المدرسة
منور بلقافتها المعتادة : يبة فرقوني مع النوري وخلوني بفصل بلحالي
ابوي التفت على امي : بكره تروحين للمدرسة عشان يجمعونهن انا ما درست منور الا عشان تجي مع النوري
فزت منور وحبت خشم ابوي
الكل ضحك وعلق ابوي : كان خليتي حبة الخشم بعد الأكل وسختي خشمي
منور : ههههههههههههههههههههههههههههه ماعليه يبة اغسله
التفت علي ابوي : هاه يا النوري ما قلتي وش صار اليوم
نوره : ما سوينا شي كل شوي داخله علينا مدرسه وتعرف على اسمائنا
منور : يبه ابلتهم مزيونه وشعرها طويل
امي : وانتي ماتستحين توصفين الحرمه قدام الرجاجيل

جدتي وبضحكة: لا تقولين الرجاجيل قولي قدام ابوك خايفتن ياعرس عليها منور هي معرسة

ابوي ومستانس على غيرة امي : ههههههههههههههههههههههه أي والله يا منور انشدي هي معرسة
امي ومعصبة بس ماتبي تبين : الحمدلله " وقامت من الأكل "

جدتي : تعالي تعالي الحين مخليه الغدا عشان طاري عرس انتي الداخله وهي االطالعه ومحد يقدر يغير ام خالد

شفت وقتها الابتسامة بعين أمي واضحه
امي : لا والله يا خالتي ما همني الكلام بس انا قايمه من الصبح والحين يالله اشوف

التفتت امي علينا نظفوا السفرة بعدكم

نوره : ابشري

" أي لا تستغربون انا يوم علي يوم على منور في تنظيف المواعين والغساله وتغسيل الملابس انا ومنور كلنا مع بعض تضحكون على اشكالنا يوم نغسل ملابسنا وكيف ننشرها بين النخل حاطين حبل في نخله ورابطينه في النخله الثانيه وانا اذا غسلت عطيتها منور وهي تنشرها على الحبل وكذا كنا نساعد امي بدون شغالة كنا بسيطين كل شي بسيط مافيه تعقيد كان بيتنا مريح كنت شلون انظفه J
تعرفون مكانس الي تسوى بخوص كنا نخم البيت بها ونظفه كنا على بساطة بيتنا الا امي معودتنا يكون بيتنا نظيف ونافس فطوم بنت جيرانا الجنوبيين
صح نسيت اعلمكم عن فطوم هذي اختنا قبل تكون جيرانا من اهل جيزان جو مع اخوهم احمد يوم تعين عندنا بالعسكرية بطبوطه وسمراء وشعرها مفلفل اموت فيها اذا قعدت تضحك قمة البراءة كانت فطوم اذا شافتنا نظف بينتا على طول طيران لبيتهم تنظفه كنا نتنافس في نظافة البيوت وترتيبها "اوووووه ..... يلا ارجع على وش صار بعد ما تغدينا
كل اهل البيت راحو يريحون شوي قبل اذان العصر وخالد رجع لجداني الا انا ومنور ورويشد جلسنا قدام القناة الاولى كان فيها برنامج عن الحيوانات وكنا كل شوي نصارخ


منور : مابي مابي هذي الأسود لي انا بس
نوره : انا الغزلان
راشد بكل تسلط : كل الحيوانات لي انا
منور صدقت : واااااااااااااااااااااااااااااااع مابي لي انا

مليت من هواشهم طلعت منهم رحت للحوش تحت النخل كان نخلنا تحته ظل العسف اممممم شلون اشرح لكم تعرفون شكل النخله صح كان سعف النخل متشابك مع بعض لدرجة انه مسوي مثل العريش سبحان الله ومخلي تحته ضل تمددت في هالضل مثل ما اسوي دايم وصرت اغني واحفر والعب بالرمل ما كنت اتذكر اغنيتي بالضبط بس
سمعت صوت فطوم تناديني قمت وجلست وتلفت ادور صوتها تدرون وين لقيتها لقيتها على جدارهم جالسه كان يفصل بينا وبينهم جدار طبعا هذيك الايام الجدران صغار بس وقتها كأنها قمت افرست J

تقدمت لحد ما وصلت عندها وكلمتها بضحكه
نوره : وش تسوين
فطوم : احمد الدب مايخليني اجيكم يقول العصر روحي لهم وانا مليت بلحالي وجلست العب مع الدجاج وسمعت صوتك وانتي تغنين ورقيت على كرتون الخشب

قربت اكثر من الجدار وكان جنب جدارهم شجرة العنب جلست اخذ من عناقيد العنب واكل
فطوم وخدودها حمر من الشمس : النوري عطيني
نوره : هههه اخذي

جلست اكل انا وفطوم ونسولف لحد ما سمعنا اذان العصر كنت وقتها احب اصحي جدي من النوم رحت ركض ابي اسبق منور قبل تصحيه لكن دايم تجري الرياح بما لاتشتهي السفن

من الطفاقة فينا تصاقعت مع منور بالدرب كل وحده فينا تبي تصحيه وطحنا على الارض وقعدت افرك جبهتي ومنور ماهمها الضربة وقفت تبي تصحيه بس طلع علينا جدي وهو يفسر اكمامه يبي يتوضى
قعدت اضحك بصوت عالي
نوره : ههههههههههههههههههههههههههههههههههه
منور : هههههههههههه ماعليه ماعليه اهم شي سبقتك
نوره : ما سبقتيني

كنا فرحانين لانها ساعة الافراج عنا وعن فطوم وعيال حارتنا رحنا ركض للشارع لقينا ابوي قدامنا وطلبنا منه فلوس وقعدنا نحتريهم لحد ما يطلعون من الصلاه عشان نروح نشتري بيبسي اغراش وفش فاش شمس وبسكوت مدور اولكر وونجي نبسط بسطتنا حول كوم الرمل ونتفرج على العيال وهم يلعبون كوره وكل وحده تجشع اخوها قمت ونفضت الغبار وجلست احت يديني من التراب واركض وكل البنات وراي كنت ابي اطلع كوم الرمل وقتها صرخت صرخة ضحك لأني سبقتهم ويمكن لأني صرخت بصوت عالي اتحدى العالم كلهم

منور : فطوم تدرين اني بكره بجي في فصلكم
فاطمه تجي وتمسك يدين منور ويصيرون يدوورن بقوووة وانا اضحك على اهبالهم

فطوم ببراءة : ما عطونا كتب
النوري وهي ملانة : بكره بيعطونا تقوله استاذة سارة
منور : ياحرام خرب علينا رشود كان الحين نضحك على العيال
نقزت فطوم : وش خرب عليكم
تذكرت السالفة ونقهرت : أي كنا نبي نلعب على العيال بس رشود خرب علينا
فطوم : احسن عشانكم ما قلتوا لي
نوره : كيف نقولك واخوك يمنعك تلعبين معنا الظهر
فطوم تحك راسها كأنها تذكر اخوها احمد : أي طيب علموني وانا بس بتفرج عليكم مع الدريشة
منور : حتى حنا رويشد يقول لا تطلعون الظهر فيه شمس

شفنا جدي من بعيد وبيده بساط يفرشه في الأرض الي قدام بيتنا وجدتي معها ترامس القهوة والشاهي ناظرنا بعض انا ومنور وعلى طول صرنا نركض ونمسك في اثياب بعض عشان كل وحده ما تسبق الثانية وفطوم معنا بس لأنها دبدوبه ما قدرت تسبقنا على طول طحت انا ومنور على البساط وكل وحده تصرخ مثل دايم انا انا الي سبقت
منور : أنا ألي سبقت
نوره : لا أنا إلي سبقت
جدتي و نزعجت من صراخنا: بتسكتون ولا روحو العبو بيعيد عنا

سكتنا وحنا نشوف شلون جدي يناظرنا ويبتسم جيت وجلست جنبي جدي وحطيت يدي على فخذه يعني متعانزه عليه مثل المركى
جتني منور بلقافتها وغيرتها : قومي بجلس انا جنبه
النوري : يوووه وانتي كل شي لازم تقلديني

جدتي وهي تضحك : لانها تبيعتك
نوره : شلون يمه تبيعتي
جدتي : يعني والده بعدك مابينكم فترة طويلة عشان كذا تحب تقلدك
جدي يشيل مقداع التمر " الإناء الذي يوضع فيه التمر يسمى مقداع عندناJ "
يلا اكلو تمر تراه مسامير الركب وزين لكم

أي صح نسيت أقولكم لأن فطوم وصلت متأخرة و إذا كان جدي وجدتي فيه ما تتكلم كثير جلست بهدوء وصارت منزلة رأسها طول القعدة جدتي تحبها مره لأنها تستحي
و أنا ومنور سوالف وجدتي تعلمنا بقصص من الأولين بعضها غريبة والبعض الثاني مستحيل المهم وقتها كنا نضحك ونستغرب من قصصهم

جانا ابراهيم" علمتكم قبل سواقنا" : ماما عجوز هذا فيه غنم يولد

وقفت جدتي وراحت تشمي بسرعة للحوش وقفنا كلنا نركض نبي نشوف إذا ولدت
قعدنا عند الباب نتفرج عشان تخلينا جدتي وما تطردنا شفناها يوم يشيل ابراهيم الشاة ويحطها بصندقة بلحالها وكانت جدتي تمسح على بطنها وكانت سبحان الله الشاة تون يعني تحس مثل ابن آدم سمعنا صوت " الطلي << هذي معلومه من امي تساعدني في بعض المعلومات J" كلنا ضحكنا يوم ولدت وقربنا اكثر شفنا الطلي كان صغيييييير مره ضحكنا وفرحانيين الحين جدتي بتعطيه لحد منا يا انا يا منور يا راشد يا خالد يا عزوز شافتنا جدتي شلون ملتمين عليها ضحكت وقالت الطلي هذا بنعطيه فطوم
كلنا ناظرنا بفطوم وحنا بين شوي قهر ومستغربين وفطوم قعدت تضحك بشكل هستيري وتغوص عيونها بخدودها يا حلوووه يا ناس كنت وربي اموت فيها لكن وقتها فرحت عشاني احب فطوم قرار جدتي كان حاسم ومحد يقدر يقول شي
جدتي : هاه يا فطوم وش بتسمينها
فطوم وهي تحمر خدودها : بسميه ابو ذنيب " قصدها النمر الوردي J"

منور والنوري : ههههههههههههههههههههههههههههههههههههههه يا خبله لالا ما يصلح سميه نجمان عشان كان في راسه بياض مثل النجمه J




" سمعنا صوت أذان المغرب "
شفنا امي تطلع من الباب وتنادينا بصوت عالي رحنا وتفرقنا فطوم راحت لبيتهم وحنا رحنا لأمي كان بيدها صحن فيه سلييق " عبارعن رز مطبووخ مع للبن " كلينا وبعد ما خلصنا رحت انا ومنور لغرفتنا ونمنا




[+][+][+][+][+][+][+][+][+][+][+][+][+][+][+][+][+][+][+][+][+][+][+][+][+][+]



( في المـــدرســة )



كنا مجتمعين حول استاذة ساره وهي توزع الكتب علينا كان على طول تعليم مافيه اسبوع تمهيدي

استاذة سارة : يالله كل وحدة تجلس في كرسيها

وخذت طبشورة وجلست تكتب وكان اول حرف "أ" وكانت تقولنا هذا اول حرف من حروف الهجاء الف يعني أب أم يالله عطوني يا بنات اسماء تبدى باول حرف ويكون ألف

نوره : انا انا ابلى بقول

ابتسمت استاذة ساره لي : يالله جاوبي يا نوره
نوره : ابراهيم

بنات الفصل : هههههههههههههههههههههههههههههههههههه
وقتها زعلت وجلست اناظرهم ليش ضحكو علي
استاذة ساره وهي تطالع البنات : صح صفقو لنوره صح عليها ليش تضحكون بعدها البنات تفشلوا وكملت تشرح لنا الدروس وتعلمنا كيف نكتب حرف الالف كان القلم يرجف بيدينا وناخذ ساعه على بال ما نعرف نمسكة زين كان بعض البنات يبكون ما يعرفون يكتبون ولا يمسكون القلم

وسمعنا طق علينا وانفتح الباب وكانت منور ومعها مساعدة المديرة كانت منور تضحك وشايله شنطتها قعدت انا وفطوم الناظر بعض ونضحك وقعدت استاذة ساره تكلم استاذة سعاد ودخلت منور وحطتها بالكرسي الي جنبي
منور وهي تضحك : جيت فصلكم
استاذة سارة ببتسامة : اعرفكم على طالبتنا الجديدة منيره اخت نورة

جا وقت الفسحة وطلعنا وقعدنا انا ومنور نفتح سندوتشاتنا لكن استغربنا يوم فطوم تأخرت كملنا فطورنا وجتنا فطوم وعيونها حمر وتنزل دموعها بدون صوت على طول وقفت
نوره : فطوم من طقك علميني
فطوم تبكي بصمت وما ردت علي دموعها تنزل وتسيل على خدودها وتصقع بالأرض
كل شوي انا ومنور نصارخ عليها نبي نعرف من زعلها منو صارخ عليها
شوي التفتت علينا وناظرتنا : فيه بنات يوم رحت للمقصف اشتري وزحمة دفوني وقالوا روحي يا العبده يا السوده



""فبلال كعلي ليس من فرق تراه كلنا لله عبد وله تحنو الجباه""


كان اصحاب النبي عليه السلام عبيد بلال مؤذن الرسول عبد وزياد حبيب رسول الله عبد لم يستنقصهم الإسلام وعدم يحاسب الله الانسان يوم القيامة يدعى بأمه يا ابن فلانه يعني لا يوجد لا حسب ولا نسب ينظر إلى أعمالهم وليس إلى أنسابهم

نزلت دموعي عشان اعز صديقة كيف أهانوها ما كنت وقتها قادرة أدافع عنها كانوا البنات الي سبوها بسادس ابتدائي اكبر عنا

دق جرس يعلن الحصة الرابعة رحنا لفصولنا نركض على صغر سنا إلا إنا نسينا بسرعة إلي صار وجلسنا نضحك
كانت الحصة أناشيد وكانت أستاذة سارة تنشد بصوت عالي وحنا ننشد ورآها كانت أول أنشودة هي السلام الوطني لنا كنا نردد معها بضحك وناظر في بعض ونضحك




الله



الله رب الخلقي أمد نابالرزقي إذا دعاه الداعي يحقق و المساعي يسهل الأمورا ويدفع الشرورا وكل شي عنده و بنعمت ايمده



اكرم به منمحسنن يبر كل مؤمنن



من حقه انا يعبدا صدقن وان يوحدا





استاذة ساره : بكره لازم أشوفكم حافظين الأنشودة وحرف الألف اكتبوه زين




[+][+][+][+][+][+][+][+][+][+][+][+][+][+][+][+][+][+][+][+][+][+][+][+][+][+]



( في البيـــت )



على طول ركض انا ومنور نبدل ملابسنا عشان روح نلعب في الحوش لحد ما يجي ابوي و نتغدى
رحنا نمشي ولقيت جدي عند النخل قاعد يلحقهم صح ما كانوا كثير بس ست نخلات بس كان وقتها كنز عندنا تمددت انا ومنور على الأرض نتفرج على جدي كان جالس على سعف النخل ويلقحها وكنا نسولف معه
جدي : استانستوا في المدرسه
نوره : أي عطونا انشوده
منور : وعلمونا حرف الألف
جدي : ما درسوكم قران
نوره : تقول استاذة سارة انا مدرسة القران بكره بتجينا
جدي : والله يا بنياتي اهم شي يدرسونكم القران

سمعت صوت امي تناديني فزيت اكيد تبيني اساعدها بفرش سفرة الغداء

وانتهى البارت بتوضيح جانب من حياة نوره واهلها عندما كانت بالابتدائية


غيوم الشوق غير متواجد حالياً   رد مع اقتباس
قديم 01-03-08, 11:29 AM   #4

سعود2001

مراقب عام ومشرف منتدى قصص من وحي الأعضاء وكاتب في قسم وحي الاعضاء

alkap ~
 
الصورة الرمزية سعود2001

? العضوٌ?ھہ » 52
?  التسِجيلٌ » Dec 2007
? مشَارَ?اتْي » 3,289
? الًجنِس »
? دولتي » دولتي Saudi Arabia
? مزاجي » مزاجي
?  نُقآطِيْ » سعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond repute
¬» قناتك mbc
¬» اشجع naser
?? ??? ~
My Mms ~
افتراضي

يا مال العافية غيوم الشوق ..........


بجد انا من متابعين قصتك و بشغف ..... بس عندي رجاء انك تكملينها لحد اخر بارت نزلتيه في المنتدى الثاني


و لكي مني فائق التقدير و الأحترام .....


سعود2001 غير متواجد حالياً  
التوقيع
لا اله الا الله وحده لا شريك له له الملك و له الحمد و هو على كل شيء قدير

لا اله الا انت سبحانك اني كنت من الظالمين


رد مع اقتباس
قديم 01-03-08, 08:27 PM   #5

غيوم الشوق

كاتبة في قسم قصص من وحي الأعضاء


? العضوٌ?ھہ » 3033
?  التسِجيلٌ » Feb 2008
? مشَارَ?اتْي » 382
?  نُقآطِيْ » غيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond reputeغيوم الشوق has a reputation beyond repute
افتراضي

الله يسلمك اخوي سعود صراحه تفاجأت يوم عرفت ان انت سعود الي بالمنتدى الثاني

وانا صراحه شدني اسم المنتدى وقلت حلو شكله يهتم بالقصص وقلت راح انزل قصتي الغريبة

بس قلت يمكن الغريبة الكل قراها عشانها مكتملة قلت خلاص راح انزل بيتنا الطين بس للاسف ما اشوف فيه تشجيع جاني احباط صراحه مافيه ولا رد وانا لي كم يوم منزلتها

ماعليش اذا ما شفت فيه متابعه مراح اكمل واعتذر منك


غيوم الشوق غير متواجد حالياً   رد مع اقتباس
قديم 02-03-08, 05:51 PM   #6

سعود2001

مراقب عام ومشرف منتدى قصص من وحي الأعضاء وكاتب في قسم وحي الاعضاء

alkap ~
 
الصورة الرمزية سعود2001

? العضوٌ?ھہ » 52
?  التسِجيلٌ » Dec 2007
? مشَارَ?اتْي » 3,289
? الًجنِس »
? دولتي » دولتي Saudi Arabia
? مزاجي » مزاجي
?  نُقآطِيْ » سعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond reputeسعود2001 has a reputation beyond repute
¬» قناتك mbc
¬» اشجع naser
?? ??? ~
My Mms ~
059

لا أحباط و لا شي ...... أختي غيوم

أتمنى تكملين عرض قصتك عندنا بروايتي لانها قصة جدا رااااائعه .... و مميزة ....

و لا يكون تربطين نجاحها بعدد قرائها ....صدقيني القصة ناجحة بس الاعضاء يبي لهم وقت شوي و خصوصا و أحنا بالبدايات


و ياريت لو تكملينها لانك بديتي فيها و حلو ان الواحد يكمل شغله اللي بدا فيه ...... و أنا عن نفسي ماراح أعلق


الا بروايتي تشجيعا و مطالبا باكمال قصتك معانا :showoff: ............. تقبلي مني فائق التحية و الاحترام


سعود2001 غير متواجد حالياً  
التوقيع
لا اله الا الله وحده لا شريك له له الملك و له الحمد و هو على كل شيء قدير

لا اله الا انت سبحانك اني كنت من الظالمين


رد مع اقتباس
قديم 02-03-08, 11:08 PM   #7

زارا

? العضوٌ?ھہ » 297
?  التسِجيلٌ » Dec 2007
? مشَارَ?اتْي » 84
?  نُقآطِيْ » زارا is on a distinguished road
افتراضي

مرحباااااااااااااااا غيوووووووووووومه...
اشووفتس وصلتي هناااا.. موفقه ياختي..

بس بقوولتس اذا بديتي شي لاااااا تخلين شي ياااقف في طريقتس..

وانتي بديتي هنااااا.. والقصه توهااا باولهااااا... استمري يااااعسل.. ولااااا تحصرين القصه بمنتدى وااحد.. اللي ماقراها هنااك يقرااها هنااا.. يكفي بس وجووود الزعيم الهلااااالي راااشد فيهاااااا. هذااا برووحه يضمن لتس ان القصه مستحيل تمر هناا مروور الكرااام.. .. خخخخخ

بالتوفيق ياقلبي.
وتحياتي لتس.
..


زارا غير متواجد حالياً   رد مع اقتباس
قديم 02-03-08, 11:23 PM   #8

زارا

? العضوٌ?ھہ » 297
?  التسِجيلٌ » Dec 2007
? مشَارَ?اتْي » 84
?  نُقآطِيْ » زارا is on a distinguished road
افتراضي

غيووومه شوفي لاني احبتس واحب قصتس قررت اني انسخ ردودي اللي هنااك واجيبها لتس هنااا.. تشجيع مني لتس ... وطبعاا انا قاريتها لاخر جزء كتبتيه في المنتدى الثاني.. بس التعليق بانسخه تبع كل جزء تنزلينه كل ماجا لي فرصه.. ويـــله استلمي اول رد رديته على القصه..
--------------------------------------------------------------------------------


غيوم وش ذا القصه ؟؟؟ رووووعه ياغيومه... هذا وحنا تونا بالجزء الثاني ومعيشتنا جو...اجل كيف باقي القصه؟؟ اتمنى تستمرين على هالقوه وخصوصا بالوصف..ترااااني امووووووت بالوصف...ابي اشووووف مشاهد مو اقرأ مشاهد؟؟؟ اتمنى انك فهمتيني...

نجي للقصه وابطالها...

نوره : تهبل والباين انها قاعده تتذكر ايام حياتها وشكلها الحين عمرها 27 سنه...
بس هي ليش تبي ايام اول ترجع الا اذا ماهي مبسوطه بحياتها اللي هي عايشتها الحين...
وشكل شخصيتها قويه من هي صغيره باين من سيطرتها على منيره وفطوووم... وقوفها قدام راشد وعدم خوفها منه لما كان بيضربها...

منيره : شكلها شاطره وبتمشي بالدراسه... بس موقفها لما كانت رايحه للمدرسه وهي مبسوطه ولا هامها شي.. ولما انصدمت بانهم فرقوها عن اختها ...كان يجنن.. صدمتها تضحك.. ولما راحت البيت وتصيح على امها .. وشوي لما جا طاري اللعب نست كلش... صراحه باين عليها انها طيبه بس شخصيتها احس ماراح تكون قويه زي نوره..وشكل منيره بيكون لها قصة حب مع ولد عمها اللي قالت عنه نوره ..بس نسيت اسمه..

فطوووم : ياويلي عليها .. تبين الصراحه ياغيوم حنا بعد الله يعفي عنا كنا نعير البنات بكذا.. الله يعفي عنا.. بس صراحه لما عطتها جدتهم الطلي وفرحتها فيه..سبحان الله كيف فعلا الناس كانوا شي واحد مايفرقهم لا لون ولا شكل( الحمدلله على نعمة الاسلام )

خالد : الولد هذا احس بيكون له شخصيه مميزه بالقصه.. وبيكون له تاثير فيها... وشكلي ياغيوم والله العالم اني حبيته .. بس هو في الثانوي والبنات بالابتدائي شكل فرق السن بينهم كبير مرره..
هل خالد بيصير يتحمل مسؤولية اخوانه لسبب ما؟؟؟
وموقفه مع راشد موقف تربوي مرررره لدرجة ان نوره تعلمة منه وهو مو موجه لها.. بس فعلا بيكون له تاثير على اخوانه...

راشد : الرجل الصغير... بس احس انه يبي يصيطر على خواته وبيكون دكتاتوري.. ولا بس لانه صغير.. واخوه الكبير مو موجود ويبي يمارس هذا النوع من الرجوله المبكره؟؟؟ نشوف وش بتصير اذا كبرت يارشووود...

تدرين غيوم اني انا بعد حافظه الى الان الله رب الخلقي... لانهم ماغيروا المناهج الامن 5 او 6 سنوات.. يعني انا وامي درسنا نفس المنهج...خخخخ

وكل المواقف اللي ذكرتيها في حياة نوره احسها مناسبه لامي وخصوصا اذا شافت بنك بنثر والقطو والفار.. تنبسط مررره وتقول هذي الكراتين مهوب الخبال اللي يجي الحين..
وكانت بعد تعلمني عن واحد ماعرفه تقول اسمه شفاط النمل.. وواحد ثاني تقول اسمه نقار الخشب..وتموووت فيه وتقول اذا شفتيه علميني... صراحه امي عليها حركات... اجل هذي اسامي ..خخخخ

تحياتي لك غيوم ... واتمنى نشوفك بالموعد ولا تاخرين علينا واذا بتجين بدري ترى خير و بركه....خخخ


زارا غير متواجد حالياً   رد مع اقتباس
قديم 03-03-08, 01:58 AM   #9

عذبة التجريح
كاتبة في قسم قصص من وحي قلم الأعضاء
 
الصورة الرمزية عذبة التجريح

? العضوٌ?ھہ » 1987
?  التسِجيلٌ » Feb 2008
? مشَارَ?اتْي » 204
?  نُقآطِيْ » عذبة التجريح is on a distinguished road
افتراضي

اقتباس:
المشاركة الأصلية كتبت بواسطة غيوم الشوق مشاهدة المشاركة
الله يسلمك اخوي سعود صراحه تفاجأت يوم عرفت ان انت سعود الي بالمنتدى الثاني

وانا صراحه شدني اسم المنتدى وقلت حلو شكله يهتم بالقصص وقلت راح انزل قصتي الغريبة

بس قلت يمكن الغريبة الكل قراها عشانها مكتملة قلت خلاص راح انزل بيتنا الطين بس للاسف ما اشوف فيه تشجيع جاني احباط صراحه مافيه ولا رد وانا لي كم يوم منزلتها

ماعليش اذا ما شفت فيه متابعه مراح اكمل واعتذر منك

حياك الرحمن أختي غيوم الحبيبة بيننا

وأنا عضوة أيضا جديدة هنا

وانصدمت ومازلت مصدومة لأن لاردود على الرواية

غير أن الأخ سعود هو من يرفع من معنوياتي

والأخت بحر الندى

ولكن بالصبر والمثابرة سوف تتكون لديك مجموعة من عشاق روايتك

وفعلا يالغالية أنا قرأت البارت وهو فعلا روعة

ولقد عيشتني بالأجواء لدرجة إني شممت رائحة التراب الأحمر والمميز لأرض المملكة الحبيبة

والنوري شخصية أحببتها وأحببت فطوم جارتهم الجنوبية


وأعتبريني من متابعين روايتك من الآن

وأسجل اعجابي بها وبقلمك أختي الحبيبة

وفقك الله وجعل النجاح حليفك

أختك ومحبتك


عذبة التجريح




عذبة التجريح غير متواجد حالياً  
التوقيع
رد مع اقتباس
قديم 03-03-08, 12:02 PM   #10

شذى الحياه
 
الصورة الرمزية شذى الحياه

? العضوٌ?ھہ » 3377
?  التسِجيلٌ » Mar 2008
? مشَارَ?اتْي » 6
?  نُقآطِيْ » شذى الحياه is on a distinguished road
افتراضي

رووووعة غيوم الشوق روووعة يالغلا

مع أني أحب القصص اللي بالفصحى إلا أن قصتك حلوه وتشد

أنت أول كاتبه قريت قصتها اليوم

بصراحة روعة يعطيك العافية كملي القصة

اذا سعود و زارا يعرفونها كملي عشان الباقين تكفين

والله عاجبتني حتى لو ما كملتيها أنا أسجل إعجابي فيها

تحياتي شذى


شذى الحياه غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة

الانتقال السريع


الساعة الآن 07:09 PM



Powered by vBulletin® Version 3.8.9
Copyright ©2000 - 2021, vBulletin Solutions, Inc.