آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
17-04-19, 08:39 AM
| #1 | |||||||||||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  أساور الفضة / للكاتبة نهى ، عراقية من جزئين مكتملة
التعديل الأخير تم بواسطة لامارا ; 13-07-19 الساعة 06:06 PM | |||||||||||||
|  |
|
03-07-19, 11:31 PM
| #2 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
|  رابط لتحميل الرواية هنـــــــــــــا بسم الله الرحمن الرحيم السلام عليكم ورحمة الله وبركاته #أساور_الفضة #بقلم_الكاتبة_نهى مساءاً محملاً بالحب لكم مني يا احبتي تعالوا واجتمعوا من حولي لاحكي لكم قصة منبع نهرٌها عنوانه الوفاء ................. انا... سوار فضة في معصم امي فرحة لم تكتمل حين الولادة ولد .. امي تمنتني لتزين الصدر لا المعصم بقلادة دمع دعاؤها الليلي بلل الوسادة انا.. سوار فضة في معصم امي قيود نار وعار فمدينتنا متوازية الاعراف شوارع لا تلتقي لا تعرف لغة الحب لا تأبه بالبدايات لا تنهي نهايات شوارعهااا ... لا تلتقي فيها الانثى مذمومة .. ومن تلد الانثى مذمومة وحده الذكر من يكمل الامومة انا.. سوار فضة في معصم امي ((بقلم هدى )) @houda_s .......................  التعديل الأخير تم بواسطة فيتامين سي ; 18-07-19 الساعة 04:13 PM | ||||
|
| |
|
03-07-19, 11:37 PM
| #3 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| أساور_الفضة #البارت_الاول #الكاتبة_نهى طلعت من يم الدكتورة وبيدي ورقة السونار ودموعي تصب عشرة عشرة النسوان الي بالعيادة يباوعون علية بفضول سمعت مرية جبيرة تحجي وية البصفها تكللها .. خطية بس لا كلتلها الدكتورة بيها شي خطير حرت وين انطي وجهي غمضت عيني واخذت نفس ومسحت دموعي قبل لا اطلع برة العيادة اخاف وحدة من نسوان منطقتنا تشوفوني ابجي وتوصل خبر لعمتي لان مو كلهم يعرفون بضيم كلبي مريت.. من يم الممرضة واخذت الفايل مالت المراجعة من يمها وكالت .. بثينة مو تنسين الاسبوع الجاي موعد اللقاح تجين تلقحين ونسجله بدفترج الصحي جاوبتها.. ان شاء الله المستوصف الطبي جان بنفس منطقتنا قريب على بيت عيالي خايفة ومحتارة ما اريد ارجع للبيت واني عيوني حمر اخاف يعرفون بمصيبتي وانفضح وساعتها ينهجم بيتي رفعت راسي للسماء جانت الساعة ب١١ الصبح والشمس عالية تصكع بالراس صرت اناجي رب العباد ربي ضاكت علية الواسعة خايفة من عبادك يبطشون بية واني مرية ضعيفة لاحول ولا قوة وانت اعلم بيهم اكثر مني وين انطي وجهي جنت امشي بطيء اجر بخطواتي جر اتمنى الطريق كون يطول وما اوصل لبيت عيالي بسرعة شحجي وشكول خطية بناتي هسة يرجعون من المدرسة ينتظروني على احر من الجمر يردون يعرفون الخبر جنت امشي وصلت لراس الشارع العام وكفت سيارة باص نفرات كبل اجة على بالي اروح ازور ابو الجوادين عليهما السلام اي واريد هناك يم شباكه اذب حملي يمه واشكي همي اي هو ماكو غير هذا المكان الي راح يهون علية مصيبتي وينطيني الصبر فتحت الجزدان وشفت عندي فلوس مال خياطه البارحه استلمتها صحيح قليله بس الحمدلله . رحت وكفت عالشارع العام انتظر اركب نفرات واجتي سيارة مقبطة اشرتله وكفلي ركبت شلون ماجان ووصلتنا للكراج ومناك ركبت سيارة ثانية نفرات للامام الكاظم عليه السلام على طول الطريق انا اتحسب واكول ربي لا اعتراض على حكمك احمدك واشكرك على كل حال بس شسوي المصيبة الي عندي شيقنعهم وصلت وهناك مريت على سوق الكاظمية وصار بوجهي محل صايغ الفضة القديم جان كاعد بي رجال جبير اتعودت دائما من عنده اشتري السوارات شافني الرجال.. هلا عمو وين هالغيبة اتفضلي عمو بشنو اخدمج .. خادم ربك عمو والله اجيتك هالمرة مثل كل مرة اشتري سوار فضة وتنقش عليه الرقم ابتسم.. ها عمو راح تجيج الخامسة يعني انقش عليه رقم خمسة .. اي والله مثل كل مرة بعد شسوي هذا امر الله جنت اتمنى اجيك اشتري كلادة رجلي مواعدني بس يصير عندي ولد يشتريلي بس هذا امر الله ... سوار فضة خامس .. والنعم بالله انطاني السوار بعد ما نقش عليه رقم خمسة انطيته فلوسه ورفض ياخذ مني فلوس الصياغة اكتفى بس بفلوس الفضه اخذته واني اتشكر منه واندعيله رحت ودخلت للامام وهناك زرت وكعدت و ابجي واشتكي واطلب من الله يقضي حاجتي بجاه كلمن عنده جاه عند رب العالمين رحت صليت وخلصت صلاتي وكعدت انتجيت على الحايط جان الحايط مرمر رخام بارد وجانوا مشغلين تبريد وروائح العطور الزكية الطيبة اتسربت وية انفاسي احس مفعوله مثل المهدء سنحت عالبرودة وتجيت راسي عالحايط وعيوني ثكلت اتمنيت اغفى من التعب جانت اصوات الزوار تعم المكان واني مغمضة عيني حسيت على وحدة كعدت بصفي تحجي وية بنتها مدري جنتها مااعرف شتصيرلها تكللها نصلي ونزور ومن نطلع نتغدة فتحت عيني ومسحت دمعة معلكة على رموشي جذبتها حركتي جانت مرية جبيرة كالت.. ها خالة ان شاء الله حاجتج مقضية عند ابو الجوادين وان شاء الله ما يردج خايبة هي حجت هاي الكلمات واني انهديت بالبجي .. كولي يالله يمعودة ماكو شي يصعب على ربج كلشي ينحل هونيها وتهون جانت تحجي حتى تطمني .. خالة شتهون واني الفاس وكع بالراس بمصيبتي ما يفيد غير بس الصبر واني حتى الصبر مل مني .. كولي خالة شنو سالفتج فضفضي وطلعي الي بكلبج اترددت بالبداية وبعدين كلت هي مرية غريبة ما راح تضرني مرات الواحد يحتاج يحجي وية ناس ما يعرفهم وياخذ راحته وياهم لان يعرف ميأثرون على حياته .. خالة والله ما اعرف منين ابديلج بس خلي احجيلج اني مرية خلفتي كلها بنات وعيالي صعبين ورجلي اصعب هددني اذا هاي المرة اجيب بنية ينطيها لاخوه ويطلكني واني ماعندي اهل اروح عندهم اهلي الله انطاهم والله خذاهم اني خلفت اربع بنات وهسة اني حامل بالخامسة وصرت احجي وية المرية عن حياتي وعن زوجي وبناتي وعيالي المرية بالمقابل صارت تهون علية وتحجيلي مصايب الناس الي كانت اسوء من مصيبتي وكأنما الله دزها مخصوص حتى تصبرعلية وبأثناء الكلام طلعت السوار الي اشتريته من جنطتي وراويته للمرية ورفعت ايدي وجنت لابسة اربع سوارات فضة وهذا السوار صار الخامس وباوعت عليه بأمل رفعت ايدي ولبست السوار جانت المرية تباوع علية كالت .. هذني اشتريهن منا .. اي خالة من السوك القريب عالامام اشتريت بس واحد هذني الاربعة عندي قديمات مشتريتهم من نفس المحل .. بالعافية خالة كلش حلوات حجيت واني اباوع على السوارت .. الله يعافيج تدرين خالة اني وية كل سوار من هذني السوارت عندي قصة .. قصة؟؟ .. اي قصة جانت امي الله يرحمها اذا تسمع بية حامل ببنية تروح تاخذني تزورني الامام وتشتريلي سوار فضة وتكول يمة الفضة فضية وعساه فال خير على بناتج وصرت كلما احمل ببنية اشتري سوار فضة صارت عندي عادة وصار سوار يجر سوار لحد ما صارو اربع سوارت وهسة اجة السوار الخامس يكملهن .. يارب يسعدهم ويباركلج بيهم وتشوفين بناتج باعلى المراتب .. اشكرج خالة ربي يسهل امرج مثلما هونتي علية مصيبتي .. يمة مسحي دموعج وكولي الحمدلله اهم شي تمام الخلقة .. خالة والله ماعندي اي اعتراض على زرق ربي بس خايفة من ردة فعل زوجي وعيالي خاف يأذوني اذا عرفوا بية حامل ببنية .. يخالة من ترجعين كليلهم ما بين عندي شي بالسونار الدكتورة مكدرت تعرف جنس الجنين ومنا لحد ما تولدين الله كريم يحلها الف حلال على الاقل من تجيبين ويعرفون جبتي بنية بساعتها انتي تعبانة من الطلوك وما يكدر رجلج يحجي عليج وانتي بهيج وضع تعبانة .. اي هو احسن شي اسويه اسكت وما اكللهم شي رفعت راسي وشفت الساعة صار وقت الظهر وهسة بناتي اكيد رجعو من المدارس عدلت عباتي والتفتت على المرية .. خالة كعدتج حلوة اني هم يالله ارجع للبيت هسة الكة بناتي ينتظروني على احر من الجمر سلمت على المرية وهي اندعتلي دعوة غريب لغريب يكولون مستجابة طلعت وكان لازم امر عالسوك ومناك يطلعني عالشارع العام حتى اركب نفرات توصلني للكراج واني دا امشي بالسوك شميت ريحة الدهينة الحارة والله رف كلبي عليها فتحت الجزدان جان المبلغ الباقي بعد ما اشتريت السوار قليل يادوب تجيبلي قطعة صغيرة اشتهيتها واني اباوع على ابو الدهينة شلون راش عليها جوز الهند المحمص وفوكه لب جوز ماحسيت الا على رجلية ماخذتني يم ابو حلاوة الدهينة وسألته ينطيني على كد فلوسي باوع علية اخذ صحن بلاستك وصار يكص بيها واني احسر روحي رايحه وية الحلاوة اويلي .. مرات الانسان المحروم من هاي الاطايب يتلهف حتى يضوكها حط علبة الحلاوة بالعلاكة انطيته فلوس واخذتها حسيت بدية صارت دافية اتمنيت اكعد يمه واكلها بس عيب بالسوك اكل وصلت للشارع العام انتظر الباص وحطيت علبة الحلاوة وفتحتها ومديت ايدي اريد اكل باوعت لبنات طالبات يعبرون الشارع توهم طالعين من المدرسة تذكرت بناتي واتنغصت الهم وباوعت عليها قطعة صغيرة شميت ريحتها ورجعت غلقت العلبة وشديت العلاكة خطية بناتي يحبونها ومو كل مرة يكدرون ياكلون حلاوة هه قصدي يضوكون وكفت باص وركبت اروح للكراج غمضت عيني وتجيت راسي عالجامة واباوع عالناس من طلعت عالدنيا واني احلم واتمنى وكل يوم اكول باجر اجمل واحلى لكن مع الاسف طال انتظاري والباجر الي جنت اتأمله ما اجة ولا عدا علية نزلت من السيارة عالشارع العام مال البيت الحلو بأثير من كثرة اهماله الي ولبناته ما يعرف الله وين خالقنا جنت امشي ووصلت يم راس الفرع وهناك اشوف رياجيل ملمومة يم بيت عيالي انخمط كلبي .. ياستار استر شنو هاي اللمة صرت امشي سريع وكلبي يريد يطلع من صدري منا الى ان وصلت لبيت عيالي ميت الف حسبة اجتي على بالي انتبهت على امجد اخو زوجي من بين الرجال يدفع بأثير زوجي يريد يدخله للبيت واثير يهد ويصيح .. اليوم احرك بيتهم على راسهم ولك اني واحد مثل حازم يعيرني ..ضربت على صدري عزة هذا اثير وية منو متعارك. هالمرة دخلت للبيت وشفت عمتي ام اثير تلطم وجنان مرت حماي امجد تهدي بيها انتبهت على بناتي كاعدات عالدرج شافوني اجتي بنتي الصغيرة تركض هدى .. ماما لحكي بابا اتعارك وية جيرانة حازم .. على شنو اتعارك يحظي اتلكتني عمتي من الباب .. ياا صلوات عالنبي شرفت الفكر بنت الفكر ظليت فاتحة حلكي ومصفصفة بوجها هاي المرية مريضة نفسية وتبقى مريضة مجاوبتها واشرت لبنتي شيماء الجبيرة انطيتها الحلاوة وكلتلها تاخذ خواتها وتصعد بيهم فوك لان الكل مخبوص خبص داخلين بالانذار واني متعودة كل مصيبة بالبيت عمتي تطلع حركتها بية وبألبنات صعدن بناتي فوك ودخلت للمطبخ اشرب ماي واباوع من شباك المطبخ دخل امجد واثير جان كلش متعصب ويصيح على اثير امجد.. اثير رحمة على والديك كافي ترة والله ملينا من مشاكلك وتالي وياك ما راح نخلص اثير.. اشك حلكه شنو تريدني اسمعه يبسمرني واسكتله امجد.. يا اخي جان سويت حساب لهذا اليوم اذا انت هشكل حريص على كرامتك .. ياكل تبن واكسر راسه اجتي عمتي وكامت تحجي على اثير .. ولك يمة شوكت تبطل مصايب اي مو طلعت روحي وراح اموت من وراك جنت بس اباوع عليهم امجد .. شوف اثير اني بعد ما اتحمل مشاكلك راح اتصل على علي اخوي حتى لو تكلفني المكالمة الدولية كومة فلوس مو مهم امري لله بس اهم شي اريده يشوفلك حل حتى تطلع من المنطقة انا مليت من المشاكل اثير.. ترة اني ما كاعد ببيتك انا كاعد ببيت ابوية ام اثير.. شوف يمة كلام اخوك صحيح كفاً للمشاكل انت تنتقل من هاي المنطقة تركتهم يحجون بينهم اريد اروح لغرفتنا صعدت فوك وحسيت ضاقت انفاسي من صعدت جان الفوك اظلم والحيطان ماكلتها الرطوبة دخلت للغرفة لكيت بناتي مبدلات ملابسهم وفارشات كتبهم شافتني شيماء دخلت للغرفة كامت من مكانها واجت يمي .. ها ماما شنو بابا ليش متعارك جاوبتها مروة .. يعني متعرفين ابوج مثل كل مرة يتعارك على نفس السبب دنكت شيماء مقهورة نزعت ملابسي ولبست دشداشة وسألتني شيماء بصوت ناصي وبخيبة خلاني التفت .. ماما هاي شنو لابسة سوار خامس باوعت على ايدي واتذكرت مصيبتي من ورة مشاكل اثير نسيت مشكلتي والتفتت اخاف احد يسمعنا وحجيت بصوت ناصي .. اي ماما سوار خامس شيماء بجزع.. يعني شنو طلع بيج بنية .. اي ماما راح تجيكم اخت خامسة بس سدي الموضوع كافي لحد يسمعنا خلي هذا سر بيني وبينج كعدت بالكاع وكلتلها جيبي علاكة الحلاوة جابتها واجوي البنات اتجمعوا داير مدايري وصرت اوزعلهم الدهينة واباوع عليهم شلون فرحوا بيها هدى.. الله ماما عاشت ايدج شكد طيبة هاي الحلاوة ضحى .. ماما بعد مرة ثانية جيبي هواي مروة.. ماما اني حصتي قليلة انطيني بعد كمت انطيتها حصتي لان اصلاً هي مو هواي انتبهت على شيماء قسمت من قطعتها وقربتها من يم حلكي .. ماما الله عليج فتحي حلكج واكلي مني ابتسمت واخذتها منها واكلتها ياربي البنية شكد حنينة على امها ويلوموني من احب البنات الي عنده بنية الله حابه بس اثير حظي يبجي بوجه الله وبقينا اني وبناتي كاعدين فوك دخل علينا اثير وهو ينافخ ضايج كال.. بثينة حضري غراضنا وشدشدي الغرفة عكب باجر انشيل لان امجد اتصل على اخوي علي وسولفله عالصار وعلي كال خلي اثير ياخذ عائلته ويروح يكعد بالمشتمل الجديد الي اشتراه كال بدال ما ظال فارغ وما بي احد روح اكعد بيه هم عينك عليه وهم تكفنا من المشاكل خلص كلامه ودار وجهه وطلع يدردم شكله ما قابل عالقرار بس حكم القوي عالضعيف بس يكولون مصائب قوم عند قوم فوائدً اي من سمعت كلام اثير بقينا اني والبنات وحدة تباوع بوجه الثانية ممصدكين الخبر يعني معقولة الله التفت لحالنا واخيراً راح نطلع من هذا البيت ونعيش ببيت لوحدنا بعيد عن عمتي وظلمها رفعت راسي .. ربي فدوة رحتلك ما انسى فضلك كمنا اني وبناتي من الفرحة والحماس صرنا وحدة تدعم بالثانية عبالك بحلم مروة .. واخيراً راح تصيرلنا غرفة لوحدنا خاصة بينا ضحى.. الله ونلعب براحتنا وبعد ماكو بيبي تضربنا علمود اولاد عمو امجد لان ما نلعبهم ويانا شيماء.. يالله اتحركوا لمو كتبكم ودفاتركم حتى ما تضيع وية الغراض بالشيلة صرنا نشتغل بهمة ونشاط واني الافكار والاحلام صارت تتوالى على بالي اتذكرت عندي كم قطعة قماش لازم اخلص خياطتهم واوديها للنسوان اخاف نشيل والتهي ويصير مشوار بعيد شيوديها الهن كعدت اخيط وخليت شيماء والبنات يضبون الغراض ........ ورة يوم حملنا الغراض وانتقلنا للبيت الجديد بس ما شاء الله جانت المنطقة الي انتقلنا الها فخمة وبيوتها كلش كبار صرت اباوع وافر براسي مروة.. حيييل هاي شنو من بيوت عبالك قصور شيماء.. كولي ما شاء الله مروة.. ماما شعجب عمو علي عنده هنا مشتمل بهاي المنطقة الراقية .. حبيبتي عمج من سافر للخارج دائما بين فترة وفترة يحول فلوس لبيبيتج يجمعها عندها وهي جمعت فلوسه وكللها هذني الفلوس اشتريلي بيهم بيت حتى لو صغير بس اهم شي بمنطقة راقية حتى اخاف ارجع انا وعائلتي يكون عندي بيت ضمان بالعراق وكفت سيارة الحمل الي بيها الغراض يم بيت صغير مبين مشتمل ماخوذ من بيت المهم نزلت واني كلي لهفة وصرنا ننزل بالغراض واثير والعمال ينقلون الغراض القليلة وغرفتنا وبلشنا بتنظيف البيت اني والبنات واثير جاب النجار حتى يشد الغرفة ورة فترة اندك الباب وطلعت ضحى تشوف منو بالباب شوية واجتي وكالت ماما هذا ولد يكول احنا جوارينكم بيت المختار ابو رائد الي بصفكم طلعت شفت ولد يجي عمره ١٣ سنة وشايل بيده صينية. بيها اكل شافني الولد وسلم. خجلان وكال .. خالة هذا غدا الكم من بيت المختار ابو رائد اخذت الصينية من عنده .. مشكور خالة متقصورن نردلكم اياها بالافراح بس كلي وين بيتكم بالضبط اشرلي على بيت كلش حلو وجبير يصير بصفنا جانت هدى واكفة يم الولد وتحجي وياه وهو لزمها من كصيبتها وكرصها من خدها على كيفة سألها على اسمها استأذن رائد وطلع واني والبنات هدينة عالصينية جان بيها مطبك دجاج ولبن وطرشي وخظرة وركية ومركة فاصوليا وبيها لحم وخبز حار باوعت لبناتي شلون عيونهم لمعت سودة علية صارلهم هواي ماداخلة اللحمة لبطنهم صحت لاثير وكال هذا منين وكعد ياكل ويانة جان احلى واطيب اكل اضوكه بحياتي خلصنا وضميت الباقي للعشا يفيدنا نحمي وناكله الحقيقه دازيلنا هواية المنطقة الي انتقلنا الها عكس منطقة بيت عيالي وناسها يختلفون اهل خير جنت ملتهية اشتغل وسمعت صوت تكسير مواعين .. يبوووووي دخلت للمطبخ والكة هدى بنتي الصغيرة موكعة كارتون الصحون .. لج هاي شنو سويتي جنية لج وتالي وياج جانت تباوعلي بعيونها الوساع وترمش وخدودها حمر ولامة حلكها .. ماما اغيد (اريد) اساعدكم .. لج ماما شتساعديني صحت لشيماء.. ماما شومة تعالي اخذي اختج منا لا تجرح رجلها بالكزاز المكسر خليني الم المواعين شيماء.. شلون بيج جنية شوداج عالصحون انتي وين ما ترحين تسوين مصيبة وتأذين نفسج يالله تعالي امشي منا برطمت .. لا تصيحين علية ماما تعاي لشيماء كغصتني(كرصتني) .. لج شومة ليش تأذين اختج شهكت شيماء .. عزة بعينج فصمة ماما هاي بنتج جذابة ممسويتلها شي اباوع لهدى طلعت السانها تعيب على اختها وراحت تركض شيماء.. لج تعالي فصمة اني الج وين ترحين مني ابتسمت على شكلهن .. امانة عليج شومة لاتأذيها جرتها من ايدها وهي ترزل بيها وهذيج تعيب مطلعة السانها على اختها صحت لمروة ولضحى .. عفية بنات بس تعالوا نقلو مكينة الخياطة من مكانها حطوها الي جوة الدرج بعدما استقرينا بالبيت ونقلنا البنات من مدارسهم القديمة على المدارس القريبة من عدنا مرت الايام والحمل صار يوم عن يوم يثكل علية حتى خياطة صرت كوة اخيط ما عندي قوة اكعد افصل واخيط وفوك هذا كله انا جديدة عالمنطقة فنسوان هاي المنطقة مو كلهم يعرفون بية اني خياطة بس كم وحدة من جارتنا جنت كاعدة وعقلي يتحسب لباجر شلون بية وببناتي المصرف جاي يقل وهذا اثير حتى ما يكلف نفسه يطلع يشوفله شغلة ويساعدني بمصرف البيت لا وفوكاها يريد نفسه مني يجي يوكف فوك راسي يريد ادبرله فلوس ما اعرف منين اتلكاها ياربي والفرحة الفرحتها باول ايام انتقالي لهذا البيت وكلت ارتاحيت من نكة عمتي بسرعة اتبخرت واكتشفت ان كعدتي ببيت عيالي اصرف بهواي الي ولبناتي على الاقل هناك ما جنت اشيل هم الاكل جنا ناكل وياهم سوية وامجد حماي هو المسؤل عن مصرف البيت وجانت فلوس الخياطة بس للبنات وطلباتهن ومدارسهن هسة منين ما التفت احس تضيك الواسعة بعيني حطيت شوية كليجة ام التمر بماعون شيماء .. ماما هاي المن الحلاوة سويتيها .. هاي حلاوة طحين سويتها لبيت جوارينا ابو رائد كلت عيب ارجعلهم مواعين الاكل فارغة وشوية بقالكم بالماعون ضميته من ارجع انطيكم منا يالله ماما شومة عينج عالبيت اجتي هدى تركض هدى.. ماما اخذيني وياج .. لا ابقي يم خواتج .. ما .. ما .. اغوح (اروح) وياج شيماء.. ماما اخذيها وياج وفكينا منها لا تكوم تبجي فوك راسنا .. يالله لبسي نعالج وتعالي وياي راحت تركض كدامي وكصايبها وراها دكيت باب بيت جوارينا ما شاء الله ربي يزيدهم ويباركلهم بيتهم كلش فخم سمعت صوت مرية تسال منو جاوبتها .. عيني اني جارتكم ام شيماء النزل الجدد شوية وانفتح الباب وطلعت مرية تقريباً بعمري مبين عليها الخير جانت لابسة دشداشة قصيرة ولابسة سوارات وتراجي ذهب كلش حلوات وكاصة شعرها قصير فرنسي حلوة سلمت عليها وسلمت علية من ورة خشمها جانت تحجي بتكبر وياي وعيونها كصتني من فوك ليجوة عبالك دتعاين بضاعة عرفتها على نفسي وقدمتلها الحلاوة واتشكرت منها عالاكل ودخلتني جوة لبيتهم وكعدنا بالمطبخ وشفت ابنها رائد كاعد يدرس على ميز الطعام شافنا وابتسم وسلم علينا وظل يحجي وية هدى الي راحت كعدت يمه وانطلقت بالسوالف وياه وانطاها الوان ودفتر رسم اباوع عليها شلون لمعت عيونها بفرحة وانطلقت ترسم وتسولف وياه انتبهت على ام رائد دتحجي وياي وسألتني كم سؤال عن زوجي وبناتي مثل التحقيق مبينة مرت مختار المنطقة دخلت بنتها اسمها ليلى سلمت علينا جانت بعمر مروة بنتي ..ام رائد من الناس القداما بالمنطقة وتعرف تقريباً كل واحد بهاي المنطقة ووعدتني ان تكول لنسوان المنطقة عني حتى اخيطلهم اذا يردون ام رائد.. بس عيني ام شيماء اكلج اياها من الاخير ترة جاراتنا مو كلهم يخيطون اغلبهم يشترون كله جاهز بقت بس اشوفلج كم وحدة من النسوان الكبار هنة الي يحبون يخيطون ام شيماء..والله يا ام رائد الخياطة باب رزقي وتسوين علية فضل اذا تساعديني طلعت من بيت ام رائد واني اتأمل تساعدني ورة فترة تقريبا دزت علية ابنها رائد تريد تحجي وياي فرحت كلت بلكي جابت معاميل اخيطلهم رحتلها ودخلتني لبيتها مثل كل مرة تكعدني بالمطبخ ام رائد.. شوفي ام شيماء اني دزيت عليج حتى اكلج حجيت وية صديقاتي ووية نسوان المنطقة عليج بس كم وحدة وافقت تجي تخيط عندج وكالوا على وقت فراغهم يجون بس خلي اختصر عليج التعب اني اعرف نسوان منطقتي الخياطة هنا عدنا ما ناجحة هالكد وانصحج تشوفيلج باب رزق ثاني وية الخياطة اذا انتي كلش محتاجة .. والله يا ام رائد بس الله اليعلم بحالي شكد محتاجة ام رائد .. شوفي راح اقترح عليج اقتراح واعتبريه مساعدة مني الج وهم انتي المستفادة واني المستفادة .. كولي حبيبة الله وايدج .. شوفي ام شيماء مثل ما تعرفين اني بيتي جبير واحتاج وحدة تساعدني بالبيت وانتي محتاجة شغل فتعالي كل يوم ساعديني بشغل البيت واني انطيج الي اكدر عليه وهاي من غير يلوحج مني الملابس الزايدة الاكل الزايد وخير من الله وانتي اولى بيهم .. والله ما اعرف شنو اكلج .. انت شوفي وفكري ورجعيلي خبر حتى اكول لأبو رائد يجريلج راتب .. ان شاء الله اخذ رأي ابو شيماء بالموضوع واردلج خبر بعد فترة طلعت من بيت ام رائد افكر باقتراحها والله هو اجة بوكته وانعم الله عليها من كلفت روحها تساعدني خلي ارجع للبيت واشوف اثير شنو يكول بعدما وافق اثير وكيف من كلتله عالشغل اثير.. اي والله اجة بوكته انا مفلس ومحتاج كم فلس .. هاي بدال ما تساعدني وتعيني تجي انت تريد مصرفك مني شطلعت هاي .. لا تظلين تمنين علية ترة بعدج ما اشتغلتي ترة انا دا ادور على شغل بس ماكو .. اشتغل عمال او اطلع عامل بمحل مو الا وظيفة .. شنو منو يقبل يشغل واحد عنده بظهره انزلاق من ورة الدك الي اكتله زين ما صار بية شلل .. شنو تزرع تحصد غمضت عيوني بصبر اتعودت على اثير وحججه الما تنتهي ومن عهدها صرت اروح كل يوم اشتغل عند بيت ام رائد وهي المرية الله فوك الراس ما مقصرة وياي بس بيتهم جان جبير ويتعب صرت اطلب من شيماء من تحل من المدرسة تجي وياي تساعدني سودة علية هي مكالت شي واجتي بكل رحابة صدر تساعدني وتدرس امتحاناتها صرت احط الفلس عالفلس واجمع حتى اسد احتياجات البيت احنا من انتقلنا للبيت طلعنا بس بطرك غرفة الاخشاب جان ما عدنا اي شي لا ثلاجة لا كاونتر صرت باول ايام الزكها شلون ما جان وبعدها كامت ام رائد تنطيني غراض قديمة زايدة متحتاجها اخذها للبيت فادوني كلش هواي مرت ضحى من يمي وراها هدى تمشي وتبجي وشعرها مكوش ومبهذلة تريد من ضحى تطلع تشتريلها صحت .. ماما شيماء الله يرضى عليج تعالي اخذي اختج سبحيها وجلفيها زين وجيبيها الي انا امشطها .. صار ماما بس اخلص الشغلة البيدي واجيج اباوع عليها خطية امتحانات وملتهية اجتي اخذت هدى الي كامت تلعي متريد تسبح سطرت راسي بنت اللذين رحت كعدت على مكينة الخياطة حتى اكمل خياطة صدرية ضحى لان الست اجتي من المدرسة شاكة الصدرية كعدت اخيط ومروة يمي كاعدة تدرس مروة اشطر وحدة بخواتها وهواي تهتم بدراستها وتأمل من تكبر تاخذ شهادة عالية وترفع راسي كعدت اخيط واحس بألم ينزل من ظهري على محالبي لازم اشوفلي يوم واروح للمستوصف مال المنطقة واجيك لان هاي الايام راسي وظهري هواي اذوني شوية واجتي شيماء ولافة هدى بالمنشفة جابتلها ملابس وكعدت تبدلها كدامي اباوع عليها شلون تبدل اختها جريت حسرة جبيرة ما اعرف ليش اموت من القهر كلما اشوف الوحمة الي بجسم هدى جانت وحمة سودة جبيرة ماخذة نص من خصرها ونازلة على فخذها الايسر بقعة سودة متناقضة وية لون بشترها البيضة سودة علية على كدما هدى حلوة على كدما البقعة مشوهة منظر جسمها جنت اتأمل من تكبر تخف الوحمة وتبدي تصغر مساحتها بس اشو هاي البقعة صارت تكبر وتمدد وية نمو جسمها صرت يوم عن يوم اشيل هم هاي البنية خطية بنية وين تنطي وجها خلصت خياطة الصدرية .. يوم ضحاوي تعالي بالله شو لبسي الصدرية هاي هية خيطتها الج وعدلت الاكتاف اتعشينا اني والبنات بعدما انتظرنا اثير بس ماكو ما اجة عدت الساعات وصارت الساعة ب١٢ واثير ما بين محتارة هذا وين صار ظليت كاعدة سهرانة انتظره جانت شيماء كاعدة تنتظره وياي متحب تتركني لوحدي .. كومي ماما شومة روحي نامي انتي باجر وراج دوام صبحي هم يالله تنامين شيماء.. يعز علية اخليج لوحدج تنتظرين .. روحي ماما نامي اني اتعودت عالسهر من ورة ابوج وصدك بأثناء الكلام جان يندك الباب طلعت واني خايفة سألت من ورة الباب منو سمعت صوت اثير ثكيل كوة يطلع منه ويجر بالحجي جر لطمت على صدري وفتحتله الباب ودخل اثير يتطوطح كدامي لطمت على صدري بجزع .. ها اثير رجعت لشرب السم من جديد لك وتالي وياك زين انت مو كلت تبت وبعد ما تقرب للشرب اي صدك تعال كلي منينلك فلوس حتى كعدت تشرب صاح بصوت عالي بوجهي ودفعني وفات دخل للغرفة وكال وهو يمشي من كدامي .. اخذت من الفلوس الي ضامتهم عني ما ادري بيج بنت كلب وتضمين علية الفلوس وانا اسألج تكولين ماعندي الله سلطني ..... عليهن اليوم..... واحذتهم منج حتى توبين وتبطلين تضمين من وراي جان يحجي بلسان ثكيل ويترنح كدامي وراح للغرفة ضربت حلكي من الشوطة .. عزة العزاني صخام هذا ماخذ فلوس السلفة الي جنت مجمعتها حتى انطيها لنهاية الشهر شلون مصيبة هاي ياربي منين اتلكاهة باوعت على شيماء تبجي ادري بيها صعبة على البنية تشوف ابوها بهيج منظر بس شبيدي عليها صرت ابجي من من القهر ما اعرف ربي شوكت يهدي هذا الرجال رحت اخذت فراشي ونمت بغرفة البنات طول الليل واني اسمع صوت اثير وهو يتقيء بالحمام ما طلعتله ولا رحت يمه يطبه طوب يشرب السم وتعالي يا بثينة ابتلي بيه كعدت يوم ثاني راسي صايرطبل من ورة التفكير شفت البنات كاعدات قبلي ومحضرات نفسهن للدوام وهدى نايمة لان بعدها مامسجلة السنة الجاية تداوم بصف الاول طلعو البنات للدوام واني لبست عباتي ورحت على بيت ام رائد وقبلها كلت لأثير يدير باله على هدى جاوبني من جوة المخدة اي ان شاء الله ادير بالي عليها طلعت واني ادردم كون تعرف الله صدك جان بطلت سوالفك المصخمة ومثل كل مرة اروح لبيت ام رائد ابلش بغسل الكراج وبعدها ادخل للبيت جان ابو رائد موجود سلم علية وشغل سيارته وطلع وام رائد نايمة والجهال راحو للمدرسة وية ابوهم بالسيارة اللهم لا حسد بس اتمنيت ولو واحد بالمية من حرص ابو رائد يكون عند اثير خلصت وطلعت اللحم من الثلاجة بين ما تخلص تنظيف يموع اللحم وابلش اطبخلهم غدة الحياة غريبة جنت اتفنن بالطبخ لبيت ام رائد من مطبك دجاج من سمك مشوي من مرك بي لحم وكبب هذا كله اسوي الهم بيدي واتمنى لو احصل جزء منه لبناتي بالعافية عليهم جانت مرات ام رائد تحن علية وتنطيني ماعون من الاكل الي اطبخه ومرات لا متنطيني تنسى او تلتهي عني واني استحي اطلب عزت نفسي ما تسمحلي اطالب بلساني خلصت شغلي وكملت غداي وطفيت النار عن الجدور وكعدت ام رائد من النوم متأخرة وحضرتلها الجاي كعدت تتريك جنت اشتغل وبالي مشدوه وافكر بالفلوس مالت السلفة شلون راح ادبرهن على نهاية الشهر شكول عليك اثير والله صخمت وجهي استأذنت من ام رائد اريد ارجع للبيت اطبخ غدا للبنات خاف يحلون من المدارس واريك هدى خطية هسة الكاهة كاعدة ميتة من الجوع انطتني قبل لا اطلع علاكة بيها بامية كالت هاي البارحة بالليل جابو جماعة ابو رائد سلة متروسة بامية وكونية بطيخ انطتني بطيختين يصير حجمهم صغير اتشكرت منها واخذتهم وطلعت رجعت للبيت وبعده العلة نايم وهدى كاعدة مهوسة البيت ولكتها واكفة منتظرتني ورة الباب اول مدخلت صاحت .. ماما متت من الجوع شاكل .. سودة علية يخسة الجوع هسة اسويلج ريوك وصرت اطبخ واوكل بهدى شوية وحلو البنات من المدرسة دخلت شيماء ترزل بمروة ومروة تنافخ وتبجي وضحى بس تباوع عليهن الظاهر متعرف شنو الموضوع .. خير يمة مروة ليش تبجين جاوبتني شيماء.. ماكو شي لتخافين عليها جانت تحجي وتخزر بمروة مروة..لا تباوعيلي هشكل ما اسكت ماما انتي صدك تشتغلين خدامة عند بيت ابو رائد .. اي ماما اشتغل عند بيت ام رائد ليش تسألين اتذكر من بلشت اشتغل عند بيت ام رائد البنات ميعرفون بالموضوع بس شيماء تعرف وهي تساعدني من يشوفوني اطلع واروح لبيت ام رائد البنات عبالهم اسير عليها لان هي جارتي وصديقتي مكان ببالهم انظف هو مكان سر بس همة مسؤلوني وين اروح جنت اتوقع هنة بنات صغار وما ينتبهون لهيج امور مروة بقهر.. يعني كلام ليلى صحيح .. شكالت ليلى .. ليلى اليوم عيرتني بالقميص الي لابسته وكالت هذا القميص مالتي قديم وماما انطته لامج كلتلها .. لا هذا جديد ماما اشترته الي من السوك ليلى.. هي امج منينلها فلوس حتى تشتريلج .. ماما عندها فلوس وتكدر تشتريلي قميص ضحكت علية كدام البنات وكالت .. امج لو عندها فلوس جان ما اشتغلت عدنا خدامة جانت مروة تحجي وتبجي بغيض مروة الوحيدة من بناتي الي دائما تتشكى على العيشة ودائما ترفض الرضوخ للوضع خصوصا من انتقلنا لهاي المنطقة .. ماما مروة ترة الشغل مو عيب اهم شي الواحد يكسب ماله بالحلال ويعيش اهل بيته .. اي صحيح الشغل مو عيب وصحيح الواحد لازم يعيش اهل بيته بس مو على حساب كرامتنا ماما انتي ما تعرفين اني اليوم شنو صار بية كدام البنات بعد ما اكدر ارفع راسي بينهم اني مروة الشاطرة المتميزة الي كل المدرسات يشهدون بشطارتي جنت امشي بين البنات مفتخرة بس اليوم انتي كسرتيني حجت الكلمة ودخلت للغرفة تبجي وتنوح كسرت كلبي حرت شلون اسكتها مرت الايام ومروة اعتكفت بغرفتها زعلانة من عندي رحت طلعت للسوك القريب من بيتنا واشتريتلها قميص جديد حتى اراضيها كلت من ترجع اليوم من المدرسة انطي الهة انتبهت من صفنتي على هدى دتفتح بباب الحوش صحت عليها .. لج هدى سدي الباب ودخلي جوة لتطلعين .. ما اغيد (اريد ) اطلع اشتغي (اشتري ) هدى عندها لدغة بحرف الراء ترتل .. لج شنو تشترين كعدي انتظري خواتج يحلون من المدرسة واخلي ضحى تاخذج للدكان تشتريلج .. ما.. ما. اغيد اشتغي هسة طلعت وخلتني اصيح وراها كمت على حليي واني ادردم عليها باب الحوش ينفتح عالشارع كبل ما عدنا طارمة مديت راسي اريد اشوفها وين راحت شفتها دتركض وفجاء عثرت ووكعت بالكاع كامت تبجي .. اهوووو عفية عليها هدى شكد تعثر وتوكع انتبهت لمرية جبيرة بالعمر جانت تمشي بالشارع من شافت هدى وكعت اتوقفت عن المشي واتجهت عليها وكومتها من الكاع وكعدت تنفض ملابسها من التراب ولزمت كف ايدها وكعدت تمسح بي من التراب جان ظهر المرية علية سمعتها تحجي وية هدى وهي تمسح كف ايدها .. خطية هاي البنية يامكثر العثرات بحياتها سإلتها وين بيتكم اشرتلها هدى وهي تبجي على بيتنا لزمتها من ايدها والتفتت جمدت بمكاني متفاجئة حطيت ايدي على حلكي ممصدكة اقتربت المرية ورفعت راسها تريد تحجي وياي ومن وكعت عينها علية اختفت ابتسامتها وعقدت حواجبها بسؤال مستنكرة .. لاتكولين انتي بثينة بنت ام سامي يتبع احبكم كومة احبكم هواي مو تنسون التصويت ♥️♥️♥️♥️♥️ | ||||
|
| |
|
03-07-19, 11:39 PM
| #4 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #أساور_الفضة #البارت_الثاني #الكاتبة_نهى جمدت بمكاني متفاجئة حطيت ايدي على حلكي ممصدكة اقتربت المرية ورفعت راسها تريد تحجي وياي ومن وكعت عينها علية اختفت ابتسامتها وعقدت حواجبها مستنكرة .. لاتكولين انتي بثينة بنت ام سامي دمعت عيوني وهزيت راسي بموافقة الغصة اتزاحمت وية الدموع بحنجرتي وسلبت مني الكلام .. ياايمة هاي انتي بثينة ما اصدك اقتربت مني وحضنتني بقوة وكملت .. عزة لج خالة بثينة هاي شصاير بيج ما دا اكدر اصدك عيني معقولة انتي بثينة يعني لوما عيونج العسلية ما عرفتج ما بيج اي شي من بثينة القديمة وماظال بس بقايا بثينة لج هاي ليش هشكل متغيرة خنكتني العبرة وحضنتها حيل مثل الطفل الي يشوف امه هشكل كان حالي من شفت ام فرزدق صديقة امي الروح بالروح اتبادلنة الاحضان وسحبتها من ايدها واني ما مصدكة معقولة الدنيا تجمعني بأعز ناسي كلتلها احس الزمن رجع بية .. تعالي خالة لا نبقى واكفين نسولف بالباب خلي ندخل جوة دخلتها للبيت وكعدت بالمطبخ يمي ام شيماء_ شلونج خالة شخبارج و الولد شلونهم ..ياربي متدرين شلون مشتاقتلج والله من شفتج عبالك شايفة امي الله يرحمها ._ الله يرحمها لامج.. والولد فرزدق وصادق تزوجوا وصار عندهم اولاد وبنات سولفيلي انتي شلونج ولج صايرة هواي تشبهين المروحة امج لو تدرين من رجعت من الاردن شكد سألت عنج بس محد يعرف بمكانج وين صفة بيج الدهر من ذكرت اسم فرزدق اتزوج حسيت رجع بية الوكت لذيج البنية الي كلبها يصير مثل الطير يرفرف بس ينذكر طاريه .. يالله معقولة بعد كل هاي السنين بعده كلبي يحن عليه واني بكل ضني زماني نساني كل شي غمضت عيني _ متدرين خالة شكد جنت مهمومة بس من شفتج احس نص همي راح _ يابعد كلب خالتج تعالي كعدي يمي واحجيلي عن احوالج جنا نحجي واندكت الباب التفتت ام فرزدق عالباب وكالت _ اخاف عندج شغل وانا ضايقتج .. لا هذولي يمكن بناتي اجوي من المدرسة رحت فتحت الباب ودخلو البنات يباوعن على ام فرزدق .. شيماء سألتني _ ماما منو هاي المرية _ هاي خالتي ام فرزدق صديقة امي روح بالروح اعتبرها امي الثانية بس مع الاسف الظروف بعدتنا وهمة انتقلوا من يم بيت اهلي وبعد فترة سمعنا بيهم سافروا للاردن ومنها بعد انكطعت عنا اخبارهم روحي سلمي عليها ام فرزدق _ صلوات على النبي هذني الحلوات بناتج ابتسمت _ اي خالة هذني بناتي خلي اعرفج عليهم صحت للبنات تعالو بنات لتستحون ترة ام فرزدق مثل جدتكم اشرت على شيماء _ هاي شيماء بنتي الجبيرة _ ما شاء الله عروسة شكد عمرها _ عمرها ١٥سنة وهاي بنتي الثانية مروة عمرها ١٤ سنة وهاي بنتي الثالثة ضحى عمرها ٧سنوات اما هاي الشحرورة ام عيون التلمع فهاي بزر الكعدة هدى السنة الجاية اسجلها صف اول .. ما شاء الله صلوات على النبي ربي يحفظهم الج ويفرحج بيهم بس مكلتي شنو ماعندج ولد _ لا والله خالة مصار عندي ولد _ لا تأيسين من رحمة ربج اشرت على بطني _ وهسة انت حامل بشنو بولد لو بنية _ بنية _ الحمد لله اهم شي تمام الخلقة ولد بنية كله خير من الله صرت اسألها وتسألني على احوالي - شنو صارلكم شكد من انتقلتوا هنا ؟؟ _ مصارلنا هواي من انتقلنا واني هسة داشتغل خياطة اذا تحتاجين تخيطين تعالي عندي خيطي _ صلوات تخيطين همزين كلتي بعد كلة اجيب قماشي يمج شنو منو تجيج من نسوان المنطقة _ والله خالة محد تجي تخيط عندي لان مو هواي بالمنطقة يعرفوني اخيط لذلك من شفت الخياطة وكف رزقها صرت اشتغل عند بيت المختار اساعد ام رائد بشغل البيت وتنطيني هالقاسمه الله _ تعالي كليلي هاي شصاير بيج ورجلج شلونه وياج وليش دتخيطين وتشتغلين بالبيوت شنو رجلج وينه عنكم شنو مديصرف عليكم؟؟ _ والله يا خالة ما اعرف شحجيلج _ احجي خالة خليني اعرف لوين صفة بيج الدهر انتي ريحة الغالية صاحبتي _ اني من اتزوجت اثير كاعد عطال بطال وهو الله يحفظه كوة يدور على شغل وجنت ادعي ربي يرزقه بوظيفة وبالف ياعلي بالكوة حصل وظيفة واتعين وصار موظف بالبنك وكلت الف الحمد لله هانت وانحلت مشاكلنا وراح تفرج بس يا فرحة ما تمت مرت سنة وجان يجي اليوم الاسود ................. جان الوقت ظهر نزلت اسوي جاي لأثير وتركت البنات يمه بالغرفة دخلت للمطبخ على كيف حتى متشوفني عمتي ام اثير حطيت القوري عالنار واني بالي كله مشغول بأثير وضعه ما عاجبني هاي الايام هواي متغير علينا صاير ما يتحاجة على الاساس انا عايزة ضيم وهو يجي يزيد فوك ضيمي مدري شجاه وشغيره جنت صافنة وعقلي مشدوه سالفة تجيبني وسالفة توديني سمعت باب الشارع اندك حيل جان بالاول الدك عالباب وبعدها صار يضغط عالجرس ويدك عالباب بالحاح مثل المستعجل صار الدك كلش قوي عبالك راح يفلشه طلعت من المطبخ احجي .. يمة ياستار استر هذا منو هشكل ديدك الباب لاكتني عمتي ام اثير.. هذا منو بالباب بالله شو روحي صيحي لواحد من الولد خلي يروح يشوف منو بالباب حرك للجرس حرك رحت صعدت فوك حتى اصيح لأثير لاكاني حماي امجد عالدرج ديلبس الفانيلا مستعجل سألني .. شنو منو بالباب .. ما ادري اني صعدت حتى اصيح اثير يفتح الباب .. انا رايح افتح واشوف منو كمل طريقه ونزل جوة جان الوقت ظهر دخلت للغرفة شفت اثير كاعد ويمه البنات شيماء ومروة وضحى وهدى نايمة بسريرها وبيدها مميتها دترضع اثير.. شنو وين صار الجاي .. خليت القوري عالنار واندكت الباب وصعدت اصيحلك بس امجد راح يشوف منو بالباب جنت احجي وياه وسمعنا صوت عياط وصياح رياجيل وهوسة جوة طفر اثير من السرير اثير .. شكو ياستار راح ركض على باب الغرفة يريد يفتح الباب ويشوف شكو بس فجاءة اندفع باب الغرفة بقوة بحيث انخلع من مكانه وصارو بوجهنا جماعة مسلحين دفعوا اثير واني عطت بخوف .. يمة صخام انتوا منو اباوع لأثير يباوعلهم مخطوف وجهه بخوف مفزوع منهم واحد منهم سأله ..انت اثير .... ....؟؟ كله .. اي نعم انا اثير صاح الرجال .. يالله شباب جتفوه وجيبوه وراي يمة اني شفتهم ديضربون اثير كدامي اني والبنات وهويريد يخلص نفسه من بين ايديهم وهمة اتولوه ضرب عزة بعيني صرت اصرخ بدون شعور رحت عليهم اريد ابعدهم عن اثير بس واحد منهم دفعني وخلع جتفي من الالم وشفت روحي واكعة بالكاع بناتي صارو يتصارخن خايفات ومفزوعات من المنظر ومن الخوف كامن ويصيحن .. بابا .. ماما ويبجون قيدوا اثير كبال عيني وسحلوه من بين عائلته همة ينزلونه عالدرج سحل واني نزلت وراهم اعيط خايفة عليه ما اعرف هذولي منو وشنو يردون منه صرت اصيح واحشم بالناس شفت حماي امجد همين مجتفينه ومكعدينه بالكاع وواكفين اثنين مسلحين فوك راسه وخالتي تتوسل بيهم يتركون ابنها وتكللهم خالة داخلين على الله وعليكم هدوا ولدي بس المصيبة محد يجاوبنا عبالك دنحجي وية اصنام بعدها سحلوا امجد واثير واخذوهم بسيارة بس طول ما همة يجرجرون بأثير واني وعمتي نصرخ ونتوسل بيهم يتركونهم اباوع لعمتي وكفت كدام رجال طويل ضخم عنده شوارب وسألته تترجى بيه ام اثير.. يمة فدوة رحتلك ولدي وين ماخذينهم جاوبها بنترة وصوت عالي .. بعدي عن طريقنا وخلينا نشوف شغلنا ودفع عمتي من طريقه وراح وعمتي ام اثير طلعت بالباب وظلت تحشم بالناس .. يبوي .. يبوووووي يالوادم لحكو علينا انهبنا واخذوا اولادنا التمت الجوارين والمشكلة وقت ظهر حارة يعني اغلب الناس نايمين ببيوتهم ومحد بالشارع بس على صياح عمتي طلعوا الناس من بيوتهم واجوي الجوارين وسألو عمتي عن الصار وكعدت عمتي تحجيلهم الصار واني ادك والطم على وجهي .. يمة سودة بوجهي اثير راح يروح من ايدي عزة العزاني هاي وين جانتلج يابثينة خطية اباوع على بناتي شلون يتباجون ويسإلوني ماما ليش اخذوا بابا شراح يسون لبابا واحد من جوارينا من سمع كلام خالتي ووصفتلهم المسلحين كللها خالة هذولة المسلحين من الامن يعني ولدج اخذوهم الحكومة شوفي شنو مسوين ولدج عمتي بس سمعت الامن وحكومة .. كعدت بالكاع وفتحت شيلتها وصارت تدك وتلطم .. يبوووووي سودة بوجهي ولدي راحوا ابو احمد .. حجية صلي عالنبي لتخافين انا عندي معارف بالامن راح استفسرلج واعرفلج شصاير ام اثير.. ولك خالة منين اجتني هاي المصيبة السودة يمة ولدي ما عندهم اي شي عسكرية وخادمين بيها ومتسرحين منها وما لهم شغل لا بالسياسة ولا بالدين ماشين بصف الحايط سودة علية يرحون ويرجعون بطريقهم ومالهم شغل لا بحزب ولا الهم شغل بدين ولا يوم سمعتهم حجوا عالريس القايد او جابوا سيرته بالشينة الرجال.. والله حجية ما اعرف شنو اكلج بس خلي استفسر واردلج خبر ورة ساعة كلمن رجع لببيته واني باقية على كعدتي بالطارمة اندب حظي وادعي بكلبي وبناتي كاعدات يمي وهدى جانت صغيرة نايمة بحظني ترضع وكلها بصوب وخالتي ام اثير بصوب تروح تروح وترجع عليه دارت علية تغمني وتغلط علية ..ها يابنت الفكر كسحتي ابني بجرفتج الفكر انتي وبناتج مجاوبتها هسة احنا بيا حال هاي المرة من يومها ابد ما تفوت فرصة اذا ما تتهجم علية شكو مصبية تصير بالبيت تطيح براسي وتعلكها علية وتنزل علية غلط ومسبة عبالك عندها شماعة تعلك عليها الرزايل سكتت خليها تحجي لوحدها وخليني اني محتارة بضيمي احاجي بروحي رفعت راسي اشكي همي ربي فدوة رحتلك ليش كلما اكول هانت تطلعلي سالفة عوجة لا عالبال ولا عالخاطر تردني ردود لنقطة الصفر صار الليل واحنا ماعندنا اي علم عن ولدنا وين صفة بيهم الدهر لليل اجة جارنا ابو احمد وعم الولد كعدوا بغرفة الخطار وعمتي لبست عبايتها وراحت يمهم كبل رحت وراها لبست ربطتي ودخلت وراها اريد اعرف الصار ام اثير .. ها حجي بشرني وكلي لكيت ولدي كللها.. حجية اتطمني مثلما كلتلج ولدج ماخذيهم الامن وهسة همة بالسجن جاي يحققون وياهم .. يمة صخام بوجهي يعني شنو ولدي ضاعوا ومحد راح يلحك عليهم بعد .. حجية كولي يالله خلي نفتهم من ابو احمد التفت عمهم وحجة .. خوية ما عرفت همة ليش ماخذينهم .. والله الي افتهمته منهم ان الموضوع يخص ابن اخوك اثير الي يشتغل بالبنك عليه قضية تسريب فلوس مزورة لداخل البنك اما امجد استفسرت منهم كالوا باجر يطلقون سراحه ما لكو عليه شي ام اثير .. يمة صخام بوجهي اثير يشتغل بالفلوس المزورة لا يمة كول غيرها اثير ماعنده بهاي السوالف كون هو صدك مثلما تكول يزور لعد وين الفلوس الي حصلهم من هالتزوير وليش الخير ما يبين علينا اشو هذا بيتنا على حطت ايدك من اتعين اثير لحد هذا يومك كلشي مجايب للبيت لا ثلاجة ولا تلفزيون لا غراض ويادوب يصرف على عياله .. والله حجية ما اعرف شنو اكلج بس الجماعة ما يخطون هيج خطوة اذا ما متأكدين وعندهم معلومات وادلة تثبت ان اثير الة يد بالتزوير واحتمال راح يحيلون اثير للمحكمة وينحكم اجتني كلمات ابو احمد مثل ضربة العامود من يوكع فوك الراس ويقسمه نصين اي انا هذا حالي من كال اثير يشتغل بالفلوس المزورة وراح ينحكم انا حسيت الدنيا افترت بية وضاكت الواسعة بعيني يعني شنو اني وبناتي راح نضيع زين شلون وشوكت وليش اثير يسوي هشكل مامعقولة ما اصدك ماعنده شي بحياته يدفعه يسوي هشكل هو صحيح غير مسؤل بس مو لدرجة يوكع روحه بالمشاكل ويودي نفسه للتهلكة بس فجاءة اتذكرت موقف مشبوه لأثير شهكت ولطمت على حلكي مصدومة التفتت عمتي وعمهم وابو احمد يباوعون علية عمتي بس شافتني غمتي وظلت تحجي ..لا حلت بركة بيج بومة طلعت من يمهم جسمي كله يرجف من الي عرفته صعدت فوك لغرفتي دخلت للغرفة ولكيت بناتي كاعدات يدرسن اتجيت عالباب وكعدت بالكاع ابجي بيأس وقهر التفتوا يباوعون علية وبعيونهم نظرة تسأل اجتي بنتي شيماء اقتربت مني ومدت ايدها مسحت دموعي واتبعنها خواتها وكفوا قريب علية شيماء.. ماما ليش دتبجين ؟ ضحى.. بيبي ضربتج ؟ جاوبتها مروة .. هي اكو غيرها عجوز النار ياربي هاي شوكت تموت ونرتاح منها بس تحجي على ماما باوعت لبنتي الصغيرة هدى اجتي يمي اقتربت مني تريد تكعد بحظني مديت ايدية وحطيتها بحظني ودموعي مبطلت التفت تباوع علية وبرطمت شفايفها تريد تبجي وياي انمرد كلبي عليها شكول عليك يا اثير شنو ذنب هاي الطفلة بعدها حتى ما لحكت تفطن على وجودك بحياتها جانوا بناتي يحجون خطية ميدرون بأبوهم شنو مسوي من مصيبة شكالتلك روحك يا اثير وسويت هالمصيبة زين مفكرت ببناتك المكرودات رجعت شيماء تسألني .. ماما ليش دتبجين احتاريت شجاوبها شكللها اكللها ابوج حرامي يشتغل بتزوير الفلوس وراح ينحكم لان مد ايده عالحرام علمود نفسه الدنية مو علمود بناته اي اثير كضة طول عمره يمشي بطريق المنكر شرب ونسوان دومه مخربط واناني بس معقولة وصلت بي المواصيل تدفعه يخطي هيج خطوة ويورط نفسه بعملية قذرة ويزور الفلوس معقولة لهاي الدرجة باع اخر قطرة شرف بوجهه جريت نفس عميق احمد الله الف مرة ما صارف عليه او على بناته فلس احمر من مال الحرام هسة عرفت ربي شكد يحبني اني وبناتي اي عسى ان تكرهوا شيئاً وهو خيرلكم جنت شكد اشتكي من اثير لانه ميصرف علية اني وبناتي جان حيل بخيل علينا ويقطر علينا المصرف بقطارة اي نعم افضل نموت اني وبناتي من الجوع ولا لكمة الحرام تدخل ببطن بناتي ومر شهرين على اثير بالسجن يالله انحكم وامجد حماي طلعوه ورة يومين من اخذوه كثرت اسألت بناتي عن ابوهم حماي امجد كللهم .. ابوكم سافر عبرت عليهم كذبة عمهم لان بنات صغار مينتبهون على كلام عمهن وبيبيتهم من يتناقشون بينهم بموضوع اثير ومرت الايام علية وعلى بناتي وزادت معاناتي وية عمتي احس بيها شنت علية الحرب وكامت تحتار شلون تسود علية عيشتي اني وبناتي وضاكت علية الحال وصرت بعازة الفلس خاف جان اثير ينقط علينا بالمصرف هسة صرت بحسرة الفلس و عمتي الله يحفظها حتى الاكل الي ناكله تشوفه هواي علينا اني وبناتي صرت انام واكعد واني شايلة هم بناتي وافكر بالعيشة شلون ادبرها حماي امجد يشتغل على كده ويادوب موفر عيشتنا وتعرفين الدنيا حصار هاي الحجي ح شهر الرابع 92 هدى بنتي توها صاير عمرها سنة ... ومثل ماكتلج امجد هو عنده عائلة محتار بيها وانعم الله عليه من متكفل بأكلنا وشربنا بس هي الحياة مو بس اكل وشرب وبالذات اني صاحبة بنات والكبار شيماء ومروة عدهم مدارس ويحتاجون هواي اشياء باوعت بغرفتي عندي مكينة خياطة جنت اخيط بيها لبناتي دشاديش او بجايم ومرات اخيط بيها الملابس المفتوكة واجتني الفكرة اخيط لنسوان منطقتنا ومن عهدها صرت اخيط بالبداية كم وحدة وبعدين انعرفت بالمنطقة لان خياطي سريع وحلو مرتب وحتى تكلفة الخياطة قليلة صحيح الي احصله من الخياطة قليل بس احسن من ماكو وصرت احط الفلس عالفلس حتى اوفر لبناتي جنت كلش فرحانة لان كدرت الكة باب رزق الي ولبناتي اما عمتي ام اثير بالكوة قبلت اتخليني اخيط للنسوان كلما تشوف وحدة تجي تريد تخيط تظل تحجي لان ما يصرفلها النسوان يدخلون ويطلعون لبيتها لذلك حطيت مكينة الخياطة فوك بغرفتي وفرغت زاوية صغيرة خليتها خاصة للخياطة والقماشات والنسوان الي يجون علية بسرعة اصعدهم فوك بسكوت احاول بقدر الامكان ما اخلي عمتي تحس حتى ما تسويلي عرس وتظل تحجي كدام النسوان وتفشلني والحمدلله كدرت عن طريق فلوس الخياطة اسد بعض من احتياجاتنا وجنت شايلة هم جبير لبناتي خايفة عليهن من هاي الدنيا خصوصاً هنة بنات وما عدهن اخ يكون الهم السند لذلك جنت كلش حريصة على دراستهم واحاول اوفرلهم الي يحتاجونه من ملازم ودفاتر او اي شي ثاني يخص المدرسة واذا اشوف عندهم درس يصعب عليهم كبل البس عباتي على راسي واخذهم واروح لبنت جوارينا الي مخلصة تعليم ومتخرجة واكعد يمها واخليها تشرحلهن خطية هي متقبل تاخذ فلوس التدريس لان تعرف بية وبحالتي ماعندي امكانية ادفعلها لذلك صرت اخيطلها ببلاش هذا كلة يهون علية من اشوف بناتي شاطرات بالمدرسة عندي شيماء ومروة كلش شاطرات بالمدرسة اريد بناتي يكبرون وياخذون شهادات حتى يكدرون يعتمدون على نفسهم اي الشهادة بهذا وكتنا سند للبنية والله مو بس بهذا الوكت بكل وكت الشهادة سند للبنية تنفعها خاف الوكت يحوجها الهة ما تظل تنتظر الناس يعطفون عليها ما اريد تكون حياتهم مثل حياتي اريد الهم الاحسن ومرت الايام طويلة اي ايام التعب والصبر دائماً تكون طويلة جنت دائما انتظر اسمع خبر عن اثير واصبر روحي واكول بثينة صبري واتحملي ان شاء الله ربي يفرجها عليج من دخل اثير للسجن لليوم ما شايفته لان اثير يرفض نروح نشوفه اني والبنات بالسجن بلكي السجن يصيرله عبرة من الصار ويتوب ويتغير حاله بعد مدة وبيوم من الايام حلوا البنات من المدرسة ودخلت علية شيماء تبجي وراها مروة مضروبة وقميصها دكمه مكطعة وجان منظرهم يخوف ركضت مفزوعة .. لج يمة شومة شبيج تبجين شيماء.. ماما صدك بابا مسجون .. منو كلج هذا الحجي جاوبتني مروة .. اليوم جنت كاعدة بالصف و المعلمة طلبت مني بابا يجي للمدرسة تريد تحجي وياه علمود مستواي بالمدرسة كلتلها .. بابا مسافر بس وحدة من الطالبات كلتلها .. ست مروة جذابة ابوها ما مسافر ابوها مسجون لان هو حرامي وانا كمت عليها وكلتها لا تجذبين بابا مسافر وما اسمحلج تحجين هشكل عن بابا سامعة ريناد ضلت تضحك علية وتكول ابوها حرامي وما كاعدة راحة ما اتحملت جريتها من شعرها واتعاركنا اني وياها والمعلمة فكتنا وودتنا للمديرة ودزو على شيماء اختي وطلبوا باجر ما اداوم اذا ميجي ولي امري ظليت واكفة كدامهم مصفصة اباوع بوجهم لا حول ولاقوة ما اعرف شجاوبها شيماء بقهر.. ماما جاوبيني صدك بابا بالسجن دنكت راسي وحجيت بصوت واهن .. اي ماما ابوكم صحيح مسجون بتهمة تزوير الاموال وسكتت مكدرت اكمل مرات الحياة تحطنا امام الامر الواقع وتفرض علينا المواجهة شكد جنت اتمنى اجنب بناتي هذا الموقف الصعب بس شكل موضوع ابوهم ميتحمل يبقى سر اكثر من هيج وصار لازم البنات يعرفون حقيقة ابوهم شفت نظرة الصدمة انرسمت على وجوهن و مروة فتحت حلكها تريد تحجي بس اني سبقتها اني كأم يفرض علية اكون صارمة وياهم بهيج موقف وما انطيتهم مجال يحجون غيرت الموضوع بسرعة وعقدت حواجبي بوجهم .. يالله لا تكعدون تنصبولي مناحة وحجيت بكل جدية واني مخنزرة بوجهم وانتي تعاي ست مروة بالله احجيلي ليش المعلمة طلبت تشوف ولي امرج دنكت مروة وحجت بخذلان .. لان اتعاركت وية ريناد .. لا اني ما اقصد عالعركة انتي كلتي المعلمة طلبت مني اجيب ولي امري تريد تحجي وياه بالله على شنو طلبت ولي جاوبتني شيماء .. ماما المعلمة اكدت على قدوم ولي امر مروة لانها كلش شاطرة وصاروا المعلمات ياخذونها للصفوف المتقدمة حسب كلام المعلمة تكول اختج نسبة ذكاها يفوق عمرها حرمات ينهدر هيج نموذج شكد انقهرت من موقف ابوهن بس يافرحتي من سمعت بمروة بنتي متفوقة بدراستها يعني صدك ربي ياخذ شي وينطي شي ثاني ورحت يوم ثاني للمعلمة كالت بنتج تكدر تعبر مراحل يعني تعبر صف وتدرس بالعطلة وتمتحن وصدك قدمت لمروة على التربية علمود يشملها قرار العبور ومرت علية اربع سنين شفت بيهم الويل وصادف وقت حصار وحصرة عالناس اللكمة وبعدما ايست من خروج اثير من السجن لان طالت المدة وجان يجي اليوم الي يصدورن بي قرار الافراج عن السجناء جانت فرحتي ما سايعتني ممصدكة اثير طلع من السجن كلت راح يجي يساعدني وارتاح من نكة عمتي جنت متأملة ان يكون السجن غير من اثير واتعض من الماضي وفعلاً السجن كدر يغير اثير واطباعه لكن مع الاسف تغير نحو الاسوء اخاف جان بس يشرب ونسوان هسة صاير ضرب وصياح وخانكني اني وبناتي وحصرة علينا الطلعة وصار بخيل اكثر من قبل وفوك هذا كله عمتي توزه علية علمود خلفة الولد وهو بروحة ما عايش يردني اخلفله ولد اكل راسي حتى احمل ومرت الايام واثير كثرة مشاكله بالمنطقة وصار كل يوم يتعارك وية واحد من المنطقة والله وبيوم من الايام جان متعارك بالمنطقة وتبين سبب العركة واحد من اهل المنطقة معير اثير بسالفة التزوير وعمتي من يومها كالت تنتقلون لبيت علي حماي وهشكل راح يبتعد عن المشاكل وانتقلنا لهذا البيت والحمدلله ارتاحيت من عمتي بس الراحة شكلها مامكتوبتلي العيشة صارت اصعب من قبل ام فرزدق.. ليش يمة صارت اصعب من قبل .. خالة اكتشفت عيشتي عند بيت عيالي احسن بهواي لان هناك المصرف خفيف علية يعني الاكل والشرب كلة وية بيت عيالي وبعد الانتقال صار المصرف هواي لذلك اضطريت اشتغل عند بيت المختار ام فرزدق.. والله يا خالة الله يساعدج ويعينج على ما بلاج بس لتزعلين مني اذا كلت هاي حوبت ابني فرزدق بيج شكد كتل روحه عليج وكم مرة اتقدملج وانتي ترفضينه دنكت بقهر .. خالة بعد ما يفيد العتاب ولو هو الموضوع راح وكلمن مشى بطريقه وشاف حياته بس صدكي وامني بالله اني رفضتكم غصب عني ابوي غصبني عالزواج من اثير والله يرحمه هددني اذا ما اتزوج ابن صاحبه يذبحني ويذبح فرزدق ام فرزدق .. حرامات والله تعاي شوفي هسة فرزدق شلون الله رزقه وفتحها عليه من وسعه وصار عنده خير من الله ومعيش مرته وجهاله بنعيم وفوك هذا كله لو تشوفين مرته جنها عريف شرطة تخرع وشايلة خباثة ما شايلها احد هسة لو انتي جنتي ومتزوجة فرزدق جان هسة اني وياج كاعدات نتسامر بس يالله كلشي بالقسمة والنصيب ما مقسوملنا تصيرين من نصيبنا .. اي والله خالة كولي مامقسوملي ارتاح بحياتي مكتوبتلي شلة الحال ربي يهني لفرزدق ويرفع شأنه ويعلي مراتبه فرزدق انسان طيب والنعم منه .. امين ام فرزدق باوعت للساعة .. عززة هاي شنو الوكت يركض اركاض ماحسيت عليه شوف هسة الكة الولد مخبوصين لان كلتلهم انا رايحة لبيت ابن عم فرزدق بيت ابو قاسم هنا يمنا بالمنطقة كلت اروح لمرته اتحمدلها السلامة صارت عندها بنية خطية هاي ام قاسم قصتهاهم مثل قصتج خلفتها كله بنات بحيث صاروا عدها اربع بنات يالله صار عندها قاسم وبعد ولادة قاسم حبلت وجابت بنية وبعدها بكم سنة هم رجعت مرة لخ حبلت وهسة جابت البنية السادسة واني رايحة اتباركلها .. ابنها شكد عمره .. عمره ١٣سنة بس خطية امه شكد جانت تتعشم تجيب اخ لقاسم بس ماكو ربج مكاتبلها .. ياخطية يالله الحمدلله على الاقل صار عندها ولد .. اي عفية بس هو شلون ولد الكاع تصيح منه الغوث من وكاحته وشيطنته ما ظال واحد بالمنطقة ما متعارك وياه خطية ابوه وامه يستحون من الناس من يجون يشتكون عليه فانتي ديري بالج نبهي بناتج من يطلعون بالمنطقة خلي ياخذون خذرهم من عنده خاف يضربهم .. يمة اسم الله على بناتي شحده يوصللهم .. هو ماخذ الناس فلاحة ملاجة على ابو هو وحيد اهله وجاي على حشف ونشف فتشوفينة كالب الدنيا واهله مدللينه يالله خالة شوف شلون اخذتنا السوالف خلي اروح مو تنسين اشوف يوم امر عليج اخذج للمستوصف تراجعين .. ان شاء الله خالة مرت الايام وخلصو البنات امتحانات اخير السنة وشيماء امتحنت ثالث متوسط بكلوريا وخلصت شيماء.. ماما منا ورايح اني اروح بمكانج اساعد ام رائد بشغل البيت بعد امتحانات وخلصنا وعندي عطلة وانتي الحمل متعبج .. والله ياماما الله يبارك بيج بس ما اريد اتعبج بعدج صغيرة لاحكة عالتعب .. ميخالف ماما عود من تولدين وتكومين على حيلج رجعي استلمي الشغل من جديد باوعت عليها وصدك كلامها الالام زادت عندي هاي الايام ......... شيماء امي وضعها هاي الايام معاجبني صحتها صارت بالنازل احاول اساعدها ولو بشي بسيط خطية هي هواي تعبت بحياتها علمود تعيشنا اني وخواتي صرت كل يوم اروح لبيت ام رائد اساعدها بشغل البيت بالحقيقة ام رائد متسوي اي شي حتى الطبخ عافته علية خطية امي معلمتني على كلشي تنظيف طبخ حتى حلويات علمتني اسوي وام رائد مرتاحة لشغلي حاولت بقدر الامكان ما اخليها تشتكي من شغلي او تشوف علية تقصير حتى ما تضغط على امي وترجع تشتغل عندها كلشي تمام ببيت ام رائد بس هاي الايام ابو رائد نظراته صايرة مو راحة باتجاهي كلما ادور وجهي الكاه يراقبني ويباوع علية من جوة لجوة بس اني اسوي نفسي غبية ومنتبهت عليه بالاول فضلت اسكت بس ما اعرف شجاه صار يوم عن يوم يقترب مني ويحاول يستغل اي فرصة حتى يلمحلي ويتحارش بنظراته او بالكلام جنت كلش اتضايق منه وصرت اتعامل وياه بحذر واحاول ما ابقى لوحدي بأي مكان جنت اصيح ليلى لو رائد يبقون يمي من اشتغل رايحة لبيت ام رائد ومثل كل مرة متعودة ادخل اذا الكة بابهم مفتوح جان رائد يلعب بالدراجة الهوائية بالباب سألته عن امه كال .. امي وليلى طالعين لبيت جدي وماما كالت اذا اجتي شيماء خليها تدخل و تشوف شغلها بالبيت انتبهت سيارة ابوهم مو بالباب فرحت مموجود حتى اخذ راحتي بالشغل واخلص بسرعة وارجع للبيت رحت دخلت حضرت المنظفات والماسحة ووصلة المسح طلعتهم وشكلت دشداشتي وكعدت انظف واني مندمجة بالشغل وافكر بكلام صديقتي فيحاء راح تقدم على اعدادية التمريض مثل اختها الكبيرة تكول اختي بعدها طالبة وصارت تضرب ابر للناس بالبيت وتاخذ ضغط وتضمد العمليات وتطلع للبيوت وجاي تحصل خير من الله كمت اكلب الفكرة براسي اريد احجي وية امي ما دام خلصت الثالث متوسط حتى تقدملي على الاعداية التمريض واساعدها بمصرف البيت لان منا علما اخلص اعدادية وبعدها الكلية وتعالي علما استلم الشهادة وبعدين ياعونت الله منا علما احصل تعيين يعني يحتاجلي كم سنة حتى اكدر اشيل عن امي حمل البيت والمصرف جنت ملتهية انظف وحسيت على حركة وراي التفتت وشهكت بخوف عمو ابو رائد واكف متجي عالباب ويباوع علية جانت نظراته مقززة نزلت ثوبي وعدلته بسرعة وصرت امتمت بالحجي .. هلو عمو محتاج شي عض شفته واقترب مني .. لا عمو مامحتاج شي بس اجيت انطيج هاي باوعت بيده علاكة جان يحجي وعيونه سافرت على طول جسمي يباوعلي بشراها بقيت واكفة جامدة بمكاني من الخوف لو يذبحوني ما يلكون قطرة دم بية .. هاج اخذي البارحة شفت ثوب حلو واتخيلته عليج وما كدرت ما اشتريه الج .. شكرا عمو ليش كلفت نفسك بس اني ما اريد .. دخذيها اعتبريها هدية مني الج بس لا تكولين لام رائد عنها .. لا عمو ما يحتاج اكللها لخالة لان اصلا ما راح اقبل اخذها اقترب مني ولزمني من زندي وقربني عليه وهمس .. هو انتي وين صاحلج واحد يقدملج هدية صيري حبابة وسمعي الكلام واخذيها خلي اشوفها عليج واوعدج بس تصرين حبابة وتطيعيني اغركج بالذهب والفلوس و ... ما انتظرته يكمل جانت انفاسه حارة نترت ايدي منه جان لازمني قوية احس زندي يريد ينخلع من مكانه دفعته بالكوة وابتعدت عنه كلي ارجف اجيت اتقيء من الخوف كام يغلط .. بنت الكلب لج انتي تدفعيني اتجه علية يريد يلزمني و فجاءة دخل رائد للمطبخ بس ما انتبه على وضعنا ولا حس راح للثلاجة وطلع دولكة ماي وكعد يشرب اجيت ابجي من الفرحة شفت ابو رائد ابتعد وطلع من المطبخ بسرعة اني ما انتظرت يطلع رائد من المطبخ خفت خاف يرجع علية من يطلع ابنه كبل طلعت من بيتهم اركض مثل الخبلة بدون ما التفت ورحت دخلت لبيتنا لاكتني امي .. ها ماما شومة شبي وجهج مخطوف لونه ليش راجعة من وكت وشبيها انفاسج سريعة منو راكض وراج بس شفت امي كدامي رحت ركض عليها وشمرت نفسي بحضنها وصرت ابجي واعيط وارجف من الخوف مكدرت اتحمل اضم بكلبي اني متعودة شنو يصير وياي اجي احجي لأمي .. يمة دخيلك ربي شبيج شومة احجي منو وياج جنت ابجي واناشغ وحجيت لأمي عن كلشي باوعت علية لمتني لحضنها وصارت تبجي بحركة .. سودة بوجهي يمة شومة انتي يصير وياج هشكل عمت عين الدنيا الله لا يوفقه بجاه الحبيب محمد كون تنشل ايده المدها عليج الناقص العار جانت تحجي وترجف بقهر ام شيماء مصيبة شيماء والله اندليت مكان كلبي من القهرة ما اعرف شصار بية احس النار صارت تطلع من وجهي شكد صعبة عالواحد من يشوف وصلة من كلبه يدنسونها ويلوثونها حسيت بطعم مر بحلكي والله شعور ما ينوصف صعبة عالوحدة بينا تعرف ببنتها اتعرضت للتحرش شكد مار علية ضيم وشكد شفت لوعات وقهر بحياتي بس مثل هاي اللوعة مامر علية ..انعل ابو الشغل لابو اليروحلهم وينظفلهم والعيشة كافلها الله بعد ما ترحين لبيتهم ولا تتقربين منهم ورب الكعبة بس اشوفه اتفل بوجهه الناقص الحقير الله كون يكسر ايده الي انمدت عليج اباوع على امي خطية كامت تحجي وترجف من القهر بس والله غصب عني كلتلها مكدرت اتحمل اسكت اكثر من هيج خفت يسويلي شي ومن يومها لا اني ولا امي رحنا عتبنا لبيت ابو رائد ورة يومين دزت ام رائد ابنها حتى اجي اساعدها بس امي طلعتله وكالتله .. كول لامك شيماء بعد ما تجي تشتغل عندكم امها مريضة امي فضلت السكوت ومتحجي لان تعرف كلش زين اذا حجت الناس كلها راح تذب الصوج بينا لان ابو رائد معروف بالمنطقة واحنا مصارلنا هواي من انتقلنا لهنا بالمنطقة ونطلع احنا الغلط راح رائد وبعدها اجتي ام رائد طبعا تجي لان اني وامي هواي سادين عنها وفايدينها بالبيت والا هي كاضيتها كلة دياحة متدري بطبخ بكوي تنظيف ومن ترجع للبيت تلكة كلشي جاهز دخلت وسلمت على امي وبيدها سلة فواكه وكالت هاي ابو رائد دزها الكم مخصوص ويسلم عليكم ويكول الحمد لله على سلامة ام شيماء والله اشتاقينالكم جانت امي تحجي وياها من ورة خشمها وكوة تجاوبها .. الله يسلمج حبيبة ليش كلفتي نفسج .. لا هذا واجب دارت وجهة علية .. اي صدك شيماء اشو هالايام متجين عدنا تساعديني .. ماما مريضة ما اكدر اتركها وحدها .. واذا امج مريضة خواتج موجودات يديرون بالهم عليها واحنا بيتنا هياته يم بيتكم يعني تكدرين تنظفين وترجعين ام شيماء.. شوفي ام رائد شيماء بعد ما تطلع تنظف ابوها ما يقبل يكول البنية كبرت وعيب طابة طالعة كل ساعة من البيت ام رائد.. براحتكم اني حبيت افيدكم لان اعرف بيكم انتوا بحاجة الفلس .. العيشة كافلها الله بعد شنسوي هذا حكم القوي عالضعيف طلعت ام رائد وباوعت على امي احس بالذنب بأتجاهه عميت عليها وسديت عليها باب رزقها اجة بابا ودخل وصاح صبولي غدة دخلت للمطبخ لكيت امي تكلي طماطة حطتها بالصينية وحطت خبز وخضرة واني وياها اساعدها وصاحت للبنات كعدنا كلنا ناكل وبابا ويانا جان ياكل وينافخ .. ادري شنو ترة والله ملينا من الطماطة الكلي .. احمد الله واشكره مو زين وحصلت اكل يعني هم ما تشتغل وهم كاعد تتشرط شوف اثير سوي حسابك تطلع وتدورلك على شغل لان اني بطلت من بيت ابو رائد بعد ما اشتغل عندهم لان صحتي انتكست هو سمع حجي امي منا وهو حرك الدنيا على راسها وكلب الصينية وظل يكفر ويغلط ويسب بأمي وهي ساكتة منطقت بأي حرف بس تباوع بعيونها وتتحسب عليه والله انمرد كلبي على امي بس ما بيدي شي اقدمه الهة واشيل عنها اباوع على خواتي خايفات كل وحدة ماخذة صفحة وتباوع بعيونها مروة جانت لازمة كتابها وحاطة ايدها على اذاناتها خطية هي حتى بالعطلة تدرس وضحى واكفة بزاوية وتاكل بأظافرها بخوف التفتت ادور على هدى ماكو غمضت عيوني واتذكرت هدى كلما يتعاركون امي وابوي خطية تطلع من البيت وتوكف يم باب الشارع تخاف من بابا اذا يعصب حتى ضرب يكوم يضرب ظل يصيح .. شوكت الله يخلصني منكم وارتاح انتوا الله خالقكم بس علة على گلبي وطلع من البيت بعدما كلبه جحيم علينا اباوع لأمي ساكتة متحجي اي اشي بس دموعها تصب جرت حسرة وباوعت للبنات مسحت دموعها .. شومة يمة كومي حمي الطماطة لخواتج خطية ما لحكو يتغدون من ورة ابوج سواه سم عليهم كمت اخذت طاوة الطماطة وحميتها وحطيتها بالصينية وامي صاحت للبنات .. تعالن يمة اكلولكم لكمة مو زين تظلون على لحم بطنكم اجوي البنات بس هدى ماكو رحت مديت راسي من الباب حتى اصيحها تجي تاكل بس ماكو رجعت وكلت لأمي هدى ماكو بالباب .. كومي ماما ضحاوي لبسي نعالج وروحي شوفي اختج وين ولت راحت ضحى تدور عليها شوية ورجعت .. ماما دورت عليها ماكو ملكيتها رحت يم بيت ام قاسم عبالي تلعب وية بناتهم هم ما لكيتها كامت امي ولبست عباتها وطلعت تدور هي وضحى على هدى ورجعت امي وهدى ماكو جانت خايفة وكلساعة تلزم بطنها موجوعة .. شلون بية صخام وجهي ولكم اختكم ماكوا مروة.. لتخافين عليها متضيع ولا يصير بيها شي بزونة بسبع ارواح اصلا اليخطفها يرجعها عليج يوم ثاني من ورة السانها ووكاحتها .. لج غمة هاي بدال ما تكومين تدورين ويانا على اختج جانت امي تحجي واندك الباب كبل ركضت بسرعة افتح الباب وجان اشوف هدى .. لج جنية وين جنتي كلبنا الدنيا ندور عليج وانتي ماكو جانت رافعة راسها تباوع على شيماء ورموشها الكثيفات يرفرفن على وجنتها .. جنت ببيت خالة ام غائد اتغدة وية غائد وليلى اي صدك احنا دورنا بكل الاماكن ونسينا بيت ام رائد ما اجة على بالنا هدى تروح عندهم جرتها امي وحضنتها وبنفس الوكت ترزل بيها .. لج والله اذا بعد عدتيها اشلع اذاناتج رجعنا كعدنا نكمل غدة وامي تثلم بالخبزة وتوكل بهدى هدى.. ماما ما اغيد اكل اني اتغديت وية غائد هناك ببيتهم .. ماما هدى سمعيني زين بعد ما ترحين لبيت ام رائد عيب ماما هدى.. اي بس اغوح اتغدة عندهم امي ابتسمت على برائتها .. لا حتى غدة ما تتغدين عندهم احنا هنا نسوي غدة وتاكلين ويانا .. لا ماما اكلهم طيب بي لحم هواي وعندهم تلفزيون اباوع وياهم كاغتون جوغجي ( كارتون جورجي ) وغائد ينطيني حلويات مروة.. يالله هاج استلمي وانت صارلج ساعة تدورين خايفة عليها والست رايحة تشبع بطنها امي سكتت واحتارت شلون تجاوب طفلة وتمنعها من شي تعتبره من حقها الاطفال يعتبرون كلشي يكدرون يوصلونه يعتبرونه متاح الهم وهلشي من حقهم اندك الباب وراحت ضحى تشوف منو فاتت ام فرزدق محملة بالمسواك اتعودنا عليها كل يوم تجينا وتسأل عنا وتكعد وية امي ويسولفون ويشربون جاي كل يوم عصرية ام فرزدق صارت شخص مالنا غنة عنها احس امي ترتاح من تكعد يمنا سلمت عليها .. هلا ببناتي تعالو شوفو شنو جبتلكم تجمعنا حولها وفتحنا العلاليك بفرحة جانت جايبة لكل وحدة بينا ثوب طرنا من الفرح بس هدى خطية بدلتها كانت جبيرة عليها ام فرزدق.. ادري هي مو عمرها ٥-٦سنوات اني كلت للولد اريد بدلة مال عمر ٦ وهاي قياس مال ستة ام شيماء وهي تضحك.. اي مو نسيت اكلج هدى سنفورة ناعمة بالكوة تطول ضحى.. اي خالة طولها شبر هدى.. شبغ بعينج عوبة هدى عندها لدغة بحرف الراء وجانت دائماً تتجنب نطق الكلمات الي بيها حرف راء تستحي منها ام فرزدق .. يمة فدوة للترتل بلسانها دنكت راسها مستحية من ام فرزدق مروة.. شوف شوف والله وعندها حركات بعد وتخجل هدى.. ماما صيحي على بناتج شوفيهم يعيبون علية سحبتها ام فرزدق وحطتها بحضنها .. والله يغارون منج لان حلوة طلعت السانها وكعدت تسوي بيدها حركة الحنيصة للبنات اباوع لام فرزدق لزمت كف هدى الصغير وظلت تباوع عليه ام شيماء انتبهت على حركة ام فرزدق .. ها خالة بعدج تتنبئين بقراءة الكف ام فرزدق ضحكت .. والله يمة مرات تصير عندي بصيرة واقرة ومرات كلشي ما اشوف وتصعب علية القراءة رجعت تباوع على ايد هدى وكالت .. هاي البنية الله مبارك بيها وعندها نفحة رحمان بوجها وبركة من الله بس يامكثر عثراتها هدى.. اي خالة اني كلساعة اعثغ (اعثر) واطيح ابتسمت ام فرزدق على برائتها طفرت هدى من مكانها بس سمعت الباب اندك وصوت بنت ام قاسم تصيح عليها من ورة الباب راحت تركض ام شيماء.. ها خير وين مولية .. اغيد العب وية البنات حلية .. مو ترحين بعيد بس امد راسي الكاج بالباب .. اي ماما البنات بس عرفوا ب ام فرزدق تقرة الكف راحو كعدوا يمها بلهفة ويسمعونها شنو تحجي بأهتمام ضحى مدت ايدها بلهفة .. خالة خالة اني اني اقريلي الكف مثل هدى ام شيماء تضحك على شكل بناتها .. لج ضحيوة بعدج هالكدود وتدورين قراءة كف ضحكت ام فرزدق .. حبيبة خليها تعالي خلي اقرالج لزمت ايدها وباوعت عليها وكلتلها .. انتي خالة التردينه يجرالج وتوصلين بس تلكين بابه مسدود لا انتي طايلة سما ولا انتي طايلة ارض ضحى ظلت تباوع عليها بدون فهم .. يالله كومي منا هاي اني قريتلج كفج مروة.. واني خالة الله عليج اقريلي همين شوفيني شصير بالمستقبل .. لزمت ايدها وباوعت على كفها وصارت تكلب بيه شوفي انتي الزرع الزرعتيه تحصدينه وراح تكونين حايط ينسند عليه مروة .. يعني شنو حايط .. يعني تكونين سند لخواتج ظلن البنات يضحكون على الكلام ام فرزدق شيماء.. خالة كولي غيرها عفتي الناس كلها ملكيتي غير مروة هي كلاص ماي ما تنطي لو تشوفنا نرافس واربعة وعشرين ساعة تبجي بوجه الله ضحى .. اي صدك خالة اني ذاك اليوم اكللها انطيني شوية جبس ما قبلت وطردتني من الغرفة مروة.. والله الي عنده هيج خوات وحوش مثلكم حرام عليه يحن عليكم ام شيماء.. يالله هاج استلمي ام فرزدق وتكلي حايط وسند هههههه شيماء التفتت على ام فرزدق .. خالة عفية واني نسيتيني اقريلي هماتين مثلهم .. تعالي يمة شومة خلي اقرالج بقت عليج قابل لزمت كف ايدها .. شوفي يا حلوة انتي تشيلين حمل مطروح مو الج وطريقج كلش طويل كان كل كلام ام فرزدق الغاز مفهمنا عليه ام شيماء.. يمة شومة اخذي خواتج وطلعي عندي حجاية وية خالتج ضحى. ماما من شفتج وشفتيني تطردين بينا .. امشي ثولة شوف اللسان صاير شطوله طلعوا البنات وكعدت ام شيماء تحجي لام فرزدق على سواية ابو رائد وية بنتها ام فرزدق.. والله زين تسوين بطلتي من الشغل الله ستر زين ما سوة بالبنية شي الله يسود وجهه على هالسواية .. بطلت بعد ما اروح احفظ مالك ولاتخون جارك والعيشة كافلها الله نموت من الجوع ولا العار يلحكنا وينهشون بلحمنا ام فرزدق.. شوفي خالة على طاري العيشة اني ذاك اليوم من رحت لبيت ابو قاسم ابن عم فرزدق سمعت مرته كالت نريد حارس لان ساطي عليهم حرامي وابو قاسم كام يخاف على بناته وابنه هيج سمعتهم بالله خلي اتأكدلج عينوا حارس لو بعدهم حتى اذا بعدهم اكللهم على اثير رجلج بلكي يشغلونه .. والله خالة ياريت تسوين فضل ما انساه الج واجوي البنات بيدهم صينية الجاي والكعك صبو جاي وكعدو ياكلون كعك وجاي ام فرزدق.. يمة البنات عشرة واكول قليلات يمة البنات صاغهن الصايغ ومات هاي كلمات ام فرزدق كلما تشوف البنات ترفع معنوياتهم وتسندهم حتى لو بس بالكلام جانوا يسولفون ويضحكون ومروة همست للبنات .. اكلكم انتوا صدكتوا كلام ام فرزدق ضحى.. اصلا اني كلشي مفتهمت شيماء.. شبيكم خالة دتاخذنا على كد عقلنا وتحجيلنا هذا الحجي حتى هدى تصير عاقلة وعلى طاري هدى سمعوا صرختها العالية كمزوا من مكانهم مفزوعات ام شيماء.. يمة شومة ركضي شوفي اختج شبيها فتحت شيماء الباب وجان تدخللهم هدى ودمها بطولها .. يمة يا ستار بنيتي يتبع | ||||
|
| |
|
03-07-19, 11:49 PM
| #5 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #أساور_الفضة البارت_الثالث الكاتبة_نهى ام شيماء.. حبيبتي شومة ركضي شوفي اختج شبيها فتحت شيماء الباب وجان تدخللهم هدى ودمها بطولها .. يمة يا ستار بنيتي هدى حركت الجو بالصريخ تبجي يردون يفتهمون منها شي ماكو ام شيماء انخبصت بالدم الي كان ينزل من كصتها وام فرزدق راحت تستفسر من البنات الي كانت تلعب وياهم كالوا هذا قاسم الوكح جان يلعب بالمصيادة وضربها بحصوة ميدري ام فرزدق.. يا عزة بعينه هذا قاسم ما غيره هذا نفسه الولد الوكيح الي ذاك اليوم سولفتلج عليه ام شيماء تضمد بهدى الي كلبت البيت بالبجي .. والله الا اروح لابوه واخليه يشلع اذاناته شلون فاتح كصت البنية ادري لو واكعة بعينها اني شسوي والله ما يشفي غليلي الا افكس عينه صاحت لشيماء .. روحي جيبيلي عباتي خلي اروح لبيت هذا الشيطان اليوم الا اطيح حظه واخلي اهله يسووله حل شنو جلب مسعور وهادينه على جهالنا بالمنطقة واذا جاي على اربع بنات احنا شنو ذنبنا مدلعينه ومطلعين عينه راحت ام فرزدق وام شيماء واخذوا وياهم هدى شادين راسها لبيت ابو قاسم وهناك طلعلهم ابو قاسم وسلم على ام فرزدق وام شيماء وعيونه على هدى التبجي ام شيماء.. خوية شوف ابنك شمسوي بكصة بنتي ابو قاسم .. هذا قاسم المسوي هشكل بيها؟؟؟ ام فرزدق.. اي والله خالة هذا وليدك قاسم ضاربها بالمصيادة صاح ابو قاسم على ابنه وطلع قاسم عيونه تلمع من الوكاحة والعفرته لزمه ابوه .. ولك قاسم هاي شمسوي بالبنية مسكطها انا كم مرة منبه عليك تبطل شغب وتالي وياك قاسم.. يابة اني جنت مقنص عالعصفور وصوبت وما ادري شلون اجتي بكصة هاي واشر على هدى لزمه ابوه من اذنه .. شوف ولك من ورة وكاحتك ومشاكلك بالمنطقة صرت حتى استحي اسلم عالجيران مفشلني وين ما اروح ورب الكبعة اذا اسمع بيك مأذي احد من جهال المنطقة راسك اكسره جانت ام شيماء اعصاب بس من سمعت كلام جارهم وية ابنه برد غضبها وكأنما اخذ بحق بنتها التفت عليهم .. خوية ام شيماء مسحيها بوجهي واعتذر منكم لزم هدى من ايدها وصار يمسح بدموعها وكمل كلامه والله هذا الولد راح يموتني ناقص عمر من ورة وكاحته ام فرزدق.. اسم الله عليك خالة شنو ترة بعده جاهل يكبر ويعقل لاتخلي بالك وياه ابو قاسم.. يا جاهل وعمره دخل ب١٣سنة وماكو ولا يمل من المشاكل ووين ما يروح قاسم اسمع اكو مصيبة صايرة من وراه صرت حتى اخاف اطلعه خاف يسويلي مصيبة عاط بقاسم وكله ادخل جوة جانت ام قاسم تباوع وساكتة بس تهدي بأبو قاسم راحت ام شيماء وام فرزدق بعدما اتبادلوا السلام والاعتذار وية جيرانهم ابو قاسم.. شفتي وين وصلنا ابنج وعمايله ام قاسم.. على كيفك وية الولد ترة هو مامتعمد .. رحمة على والديج كافي محد طلع عين الولد غيرج انتي كله من ورة الدلال دخل للبيت يصيح على قاسم .. لك بابا قاسم وتالي وياك اي مو والله جزعتني من ورة مشاكلك ام قاسم.. صلي عالنبي وعوف الولد ترة كل الاولاد هشكل مو بس ابني بس غير انت مصيحه بالمنطقة .. لج شتكولين يامصيحه يعني بربج كل الاولاد الي بعمره يرحون يتعاركون ويضربون ببنات العالم زين مرة مرتين هو ابنج كل يوم جايبلي مشكلة بكد راسه والله صرت استحي من اجيب طاريه كدام عمامه ما بي اي شي زين يخليني افتخر بي هاج شوفي عمره ١٣سنة وبالكوة بالدفرات وصل لصف اول متوسط وكاضيها كلة يلعب بالشوارع والبارحة رحت للمدرسة يم المدير وكالو قاسم غايب شلون قاسم غايب وانا كدامي طلع من البيت بملابس الدوام تالي طلع الاخ طافر من سياج المدرسة ام قاسم.. على كيفك لاتعصب مو زين عليك اكعد واحجي وياه بهداوة ترة الصياح عمره ما جاب نتيجة وهذا انت كلتها بنفسك ابنك كبر يعني لتعامله مثل الجاهل وتصيح بوجهه صاحت على قاسم .. كوم ماما بوس راس ابوك وكله بعد ما اعيدها ابو قاسم.. على يا مصيبة منهم يعتذرلي اشو هنة كثرن قاسم بحنجرة خشنة وبصوت المراهق .. بابا اسف ل تعصب خلاص هذا هو بعد ما تتكرر .. كثرت اعتذارتك وصاروا ما يوكلن عندي خبز بابا اريدك تنتبه على نفسك ودارستك ومستقبلك تعال شوف اولاد عمامك شلون شطار ومتفوقين بمدارسهم تدري البارحة عمك الجبير محمد بطاريك ويسألني عنك حتى ظل يحجي علية من وراك يكلي ابنك انت السبب بخراب تربيته مطلع عينه بالدلال يكلي لازم تتعامل وياه بحزم ام قاسم .. ماعليك منه هو محمد يشوف نفسه ضابط وصارم ويتعامل وية اولاده كله بالقانون عبالك عنده جنود مو اولاد ما يعاملهم بحنان وهو الله يحفظه يسمي الحنان الي نعامل بي اولادنا دلال .. اي شحصلنا من الحنان شوفي اولاده وشوفي ابنج احنا واحد وكل سنه يطلع اكمال ويمتحن دور ثاني هاي بالابتدائيه كملها بالدفرات وهسه صار متوسطه متاكد كل صف يكعد بي سنه وسنتين وهسه تشوفين اخويه خمس ولد عنده تعاي شوفيهم ما شاء الله كلهم متفوقين وهذا الجبير دخل كلية طب ومو بس اخوي محمد اولاده يرفعون الراس حتى اولاد اخوتي فراس وفاضل شوفيهم شلون يبيضون الوجه الا انا حظي ما اعرف وين نايم تدرين صرت احسدهم على اولادهم شلون رافعين راسهم وانا مثل المسوي مكسورة جان قاسم يسمع منا ويطلع منا هاي المحاضرة اتعود عليها كل يوم يسمعها اصلا حتى حفظها عمه محمد كبير العائلة هو الامر الناهي وكلمته مسموعة وتمشي عالجبير والصغير هواي يتحكم بالعوائل بس دخيل الله شلونه مثل الشوكة بالبلعوم حسرة علية اسوي شي اذا ما الكة عمي محمد عنده علم بيه ادري اريد اعرف منو يوصله اخباري باوعت بضجر الظاهر الوالد ناوي يطول بالمحاظرة وانا وراي طوبة بالساحة الي ورانا وهسة الولد منتظريني الباب اندك هذا اكيد رائد صاحبي اجة علية كمت من مكاني حتى افتح الباب بس قبل لا اطلع افتح الباب رحت اخذت حذائي الرياضي والكسارات مالت الطوبة من جوة الدرج وبست راس امي وشاورتها .. يمة ما اوصيج كون اروح وارجع الكاج مهدئة الوالد ها يوم مو تنسين سويلي عشا كبة لحم .................... ام شيماء.. لج هدى وين طالعة يالله هاي البنية ولاتخاف ولاجنها ذاك اليوم انضربت وضمدنا راسها كافي كعديلج شوية بالبيت لا تجيج ضربة ثانية عالراس هدى.. ماما لا تخافين احط ايدي على غاسي (راسي ) .. يالله بالله هاي شحجي وياها لج والله اذا طلعتي وجيتيني تعوين صدكي اضربج فوك الضربة .. ماما بس هاي المغة (المرة ) عفية طلعت من البت وصوت امها وراها ينبها شافت البنات يلعبون ومن ضمنهم اخت قاسم راحت صاحت عالبنات مو حضرتها رئيسة المجموعة مال البنات الصغار بالمنطقه حتى الاكبر منها يجون يطلبون تلعبهم وياها ركيضان او شده ياورد بس من اجتي اخت قاسم الوكح كلتلها انتي ما تلعبين ويانا جانت اكبر منها بسنه راحت لبيتهم تبجي لان ما لعبتها جانت منطلقة باللعب وصياحها مالي المنطقة وهناك صار قاسم الوكح بوجها جان لازم ايد اخته هالة بلعت ريكها من الخوف من شافته بهت وجها وظلت اتمتمت لان هو صار كلما يشوفها يتحلف بيها ويخزرها ومرات يجرها من ظفيرتها هاي العداوة صارت لان امها راحت اشتكت عند ابوه اقترب منها جرني من الكصيبة قاسم .. لج جنية لييييييييش متلعبين اختي وياكم لزم ظفيرتي وسحبها قوي واني متأذية انبلع الساني من الخوف جان شكله يشبه هذا علي بابا وية افلام كارتون سندباد وجهه مليان شخابيط وحاجبه مكطوم من وكاحته عزة يمة يخوف صرت امتمت هدى.. ااااااااا اني مكلت ما العبها كلتلها بعدين تلعبين ويانة هالة .. جذابة كلتي روحي انتي ما تلعبين ويانا هدى.. لج عوبة هاي مو عليج جنت اقصد على حوغاء( حوراء ) اصلا انتي كلش حلوة وحبابة واني احبج انتي صديقتي جنت احجي واباوع على قاسم بلكي يترك ظفيرتي علي بابا اشتغلت درب اللواكة قاسم .. سمعيني زين جنية اذا اسمع بيج ما ملعبة اختي وياج لو اسمع بيج جايبة امج لبيتنا حتى تشتكي علية يم ابوي شايفة هاي الكصايب الا اسويهم الج حبل يريطون بيهم الخرفان هزيت راسي بموافقة بدون كلام مديت ايدي لاخته وانطيتها صبعي السبابة .. يالله جيبي الصحاب وهي هم مدت ايدها تقدم الصحاب وهو يباوع هدى.. يالله تعالي خلي نلعب صرت كلما اشوف قاسم اجمد بمكاني من الخوف شفت امي طلعت من بيتنا هي وام فرزدق ركضت الهم والتفتت لكيت قاسم الوكح ماكو مختفي حرامات اختفى .. ماما وين غايحة (رايحة) .. للمستوصف وية خالتج ام فرزدق مو تصيرين وكحة ارجع الكاج بالبيت مو تظلين تلعبين بالشارع مو زين على راسج .. اي ماما بالمستوصف الدكتورة .. شوفي ام شيماء السونار الكدامي يكول عندج الجارة ملتصقة بجدار الرحم وهاي لا سامح الله تسوي نزيف عندج واحتمال حتى تخسرين رحمج لذلك لازم تسوين عملية ولادة قيصرية وهسة راح انطيج موعد للعملية يكون موعد العملية اسبوعين من الشهر التاسع كتبت ورقة .. وهاي الورقة ترحين بيها للمستشفى بهذا التاريخ المكتوب حتى نقوم بالاجراءات بعدما سمعت كلام الدكتورة طلعت هي وام فرزدق من المستوصف وحدة تباوع بوجه الثانية جان وجه ام شيماء مخطوف من الخوف ام شيماء.. شلون بية خالة شسوي منين طلعتلي هاي السالفة عالاساس اني ناقصة هم وصارت تبجي بحركة كلب ام فرزدق.. كولي يالله واستغفري ربج ميصير هذا جزع وحرام الجزع لا اعتراض على حكم الله .. خالة امنت بالله وحامده الله وشاكرته على كل حال بس خالة غصب عني الدنيا ما جاي ترحمني صارت تتفنن شلون تضربني على راسي خالة تدرين اني كل يوم انام بالليل والخوف مالي كلبي شايلة هم لليوم الي راح اجيب بيه واثير ياخذ بنتي مني وينطيها لحماي والله يمكن اموت من القهر .. اسم الله عليج يمة صلي عالنبي .. الف الصلاة والسلام عليه خالة ماجاي اتخيل نفسي اكدر انطي بنتي وتروح بحضن ام ثانية وتكول ماما لوحدة غيري وتجينة مثل الغريبة صعبة والله صعبة جانت تبجي وتحجي على طول الطريق وبهاي الاثناء صفت سيارة يمهم ودك هورن التفتت ام فرزدق .. هلا ب فرزدق الله جابك تعال وصلنا بطريقك بس سمعت بأسمه حسيت جن كلبي طلع من مكانه باوعت عليه والغصة اتجمعت بحنجرتي وصارت اضعاف احتار بية زماني شلون يراويني اشكال العذاب سلم فرزدق بدون ميعرف المرية الي وية امه ام فرزدق.. يمة فرزدق عرفت هاي منو الي وياي فرزدق.. لا والله يمة لاصغراً بيها بس ما عرفتها .. يمة هاي بثنية بنت ام سامي انتبهت عليه رفع راسه مصدوم واتسعت عيونه وباوع بوجهي متعجب وحجة .. بثينة هاي انتي معقولة باوعت بعيونه وباوعلي وصارت النظرات تعبر عن الف كلمة وتحجي كلام ما يجوز البوح بي ...وتركوا العتاب بين الاحباب بالكلوب وجانت النظرات كفيلة تعبر عن ما بداخلهم من كلام دنك وما حجة شي ثاني بعد يحس مثل المقيد ما يكدر يطول الي اتمناه كلبه لان كلمن راح بطريقه وكلمن صارت اله حياته صعدوا بالسيارة ولفت انتباهه عيونها الحمر من اثر البجي مكدر يمنع نفسه من السؤال .. بثينة ليش تبجين شبيج موجوعة ام فرزدق.. لا يمة بس ستونا جنا عند الدكتورة وكلتلها الدكتورة لازم تسوي عملية قيصيرية لان عندها مشكلة بالرحم .. لتخافين ميحتاجلها تبجين ترة عمليات الولادة سهلة اذا تردين اوصي عليج بالمستشفى يديرون بالهم عليج ام فرزدق.. لا يمة هي خطية ما تبجي على العملية خطية دتبجي لان خلفتها كلها بنات وجابت اربع بنات وهسة هاي الخامسة بالطريق .. شبيها البنية نعمة من الله .. اي مو هذا رجلها كللها اذا جبتي بنية هاي المرة انطيها لأخوي ماعنده بنات بس اولاد وهي خطية كلب والدة ما ينطيها كلبها تنطي وصلة من كلبها لغير عائلة فرزدق .. الله ينطي الجوز للماعنده سنون شبيهم البنات والله عسى ما عشر بنات نعمة من الله يكفي ان امهم بثينة حجاها بدون ما ينتبه على نفسه دنكت واستحيت احجي وشكول وصلت للبيت واتشكرت منهم وراحوا دخلت وشافت شيماء وابوها ستوهم راجعين .. شنو وين جنتوا طالعين ..اخذت شيماء وقدمتلها بأعدادية التمريض وكملت تسجيلها باوعتلهم بصدمة متفاجئة .. منو كلك تروح تقدملها على اعدادية التمريض والبنية شاطرة وعندها مستقبل اكبر من ان تصير ممرضة ليش هشكل تحطم مستقبل بنتك منو انطاك الحق جاوبتها شيماء.. لحظة ماما لتتعصبين ترة بابا ماله دخل بقراري اني الي طلبت منه ياخذني حتى اقدم وما كلتلج لان ادري بيج راح ترفضين وما راح تقتنعين تسمعين كلامي بس ماما احنا كبرنا وصار لازم وحدة بينا تساعدج بمصرف البيت .. لج ماما منو عاتب عليج وكلج تعالي ساعدينا بمصرف البيت ترة هذا واجبنا اني وابوج نوفرلكم كلشي ماغصبن علينا نشتغل ونصرف عليكم احنة مامسوين فضل براسكم جانت تحجي بحركة كلب .. اكلج لا تخبصينا وتنصبين مناحة خلي البنية الله هداها على الاقل خلي نستفاد منهم .. طبعا حقك انت مخسران شي اهم شي مصلحتك حتى لو على حساب حياة بناتك اسمعني زين بناتي خط احمر ماتتدخل بمستقبلهم ما راح اسمحلك تهدم حياتهم لو على كص ركبتي دارت وجهة على بنتها .. شوفي انتي سمعيني زين هسة ترحين تسحبين فايل التسجيل وتكملين دراستج .. اسفة ماما هذا قراري وما راح اتراجع عنه صدكي اني مقتنعة اكون ممرضة لتزعلين مني اثير .. انا طالع ما اوصيج بابا قنعي امج وكلليها لا تيبس راسها راح طلع وتركهم وحدة تباوع بوجه الثانية ام شيماء.. ليش يمة شومة تكسرين ظهري بيج يعني هذا تالي تعبي وكسر ظهري جبت عمري اكول صبري بثينة واتحملي لخاطر بناتج تالي بناتي يخذلوني بأول الطريق يمة شومة تستكثرين الفرحة من تكحل عينها وتشوفج دكتورة وبأعلى المناصب .. ماما لازم واحد بينا يساعدج بمصرف البيت وخواتي لازم اسوي هشكل وان شاء الله البركة بخواتي شوفت عينج احنا دنمر بفترة حصار والعيشة صعبة ماما ترة اني كبرت مو صغيرة لا عبالج ما اشوفج من تكعدين طول الليل تفكرين بعيشتنا تخيطين وانتي مكسور ظهرج عالمكينة حتى توفرين اللكمة وياما مرت علينا ايام نتغدة بيها ما نتعشا على الاقل انطيني الفرصة حتى نتعاون اني وياج عالعيشة ونوفر لمستقبل خواتي بجت ام شيماء بيأس ودارت وجهة عن بنتها انتبهت لخواتي واكفات يباوعن على امي اتقدمت مروة وباست امي ومسحت دموعها .. ماما مسحي دموعج لتبجين اوعدج احققلج حلمج واصير دكتورة واخليج ترفعين راسج بية غمضت عيونها وجرت حسرة وطلعت من المطبخ صار جو البيت مشحون ومتوتر وام شيماءاعتكفت بغرفتها زعلانة للعصر اجتي ام فرزدق فرحو البنات بجيتها شيماء.. هلا خالة اجيتي بوكتج .. شكو شصاير امكم وين جانت تحجي وتدور بعيونها على ام شيماء .. ماما زعلانة علية ..شنو ليش زعلانة ..زعلت لان قدمت على اعدادية التمريض وكعدت شيماء تحجي لام فرزدق موقفها وردة فعل امها ام فرزدق.. هسة هي وين .. هياتة بغرفتها .. ماعليج اني احجي وياها دخلت ام فرزدق على ام شيماء والبنات ضلو يحومون على باب الغرفة جانوا مايكدرون على زعل امهم ورة فترة وطلعت ام فرزدق وام شيماء من الغرفة جانت الابتسامة الواهنة مرسومة على وجه الام التعبانة شافوها البنات كبل ركضوا عليها وحضنوها شيماء.. ماما برضاج علية سامحيني والله مالي غنى عنج اموت اذا ما تسامحيني .. اسم الله عليج ماما شومة اني شرايدة من الدنيا غير بس اشوفكم باعلى المراتب ومرتاحات جانوا مروة وضحى على جانبين امهم وشيماء حاضنتها انتبهوا لوحدة تدفع بيهم من بين رجليهم هدى .. وخرو هذا مكاني ماما كليلهم خلي يبتعدون اغيد (اريد ) انام بحضنج ام شيماء.. يمة شومة سوي مجال لأختج انتي كبرتي على حضن امج خلي بنيتي هدهد تكعد بحضني لان حضني بس هي يكفيها مروة.. لج فصمة بربج وكت نوم ظلو البنات يقلدون على اختهم الصغيرة احلى لحظات تمر عالانسان هي لحظة الصلح بعد الزعل صحيح امهم ما طولت عليهم بالصد لان كلب والدة بس البنات ميتحملون زعلها يكون ثكيل عليهم ام فرزدق .. شوف نسيتوني على شنو جنت جاية الكم الله يلعن الشيطان .. كولي خالة على شنو اجيتي .. اجيت حتى اكلج اليوم حجيت وية ابو قاسم عن اثير حتى يشغله عندهم حارس ووافق وهاي جيتي منهم حتى اكلج تبلغين زوجج يروح لأبو قاسم ويشوفه شنو المطلوب منه .. الف رحمة على والديج خالة متدرين شلون اجتي بوكتها .. يلا خالة اني اترخص ارجع للبيت هم يالله .. خالة ابقي شعندج والله كعدتج حلوة .. رحمة الله والديج بس لازم ارجع خطية هذا صهيب ابن فرزدق الجبير اليوم واكع من الدرج وايده مكسورة ام شيماء.. يايمة سودة علية وهسة شلونه .. والله اخذناه للمستشفى وجبرنا ايده بس خطية صهيب هواي متعلق بية فلازم ارجع اشوفه وانطيه دواه .. الله يخلي الة ويخليج الهم ويطول بعمرج بالليل ام شيماء .. وين صار ابوكم هسة غير يجي وافهمه على موضوع بيت ابو قاسم حتى يروح يستفسر منهم شوكت يبلش عندهم الخفارة ظلوا البنات وامهم ينتظرون ابوهم الى ان صارت الساعة ب١٢ بالليل يالله رجع بس ياريته ما رجع اجاهم سكران يترنح من كثر الشرب وكوة يحجي .. عزة بعينك ياثائر جايني سكران لك شلون بيك وتالي كعدت بالكاع تلطم على وجها من القهر .. فهمني شنو حلها وياك يارجال جاوبها بصياح .. اششششش لاتاكلين تبن وتظلين تنكين ترة كوة عدلت مزاجي من شفتج وشفتيني فكر جانوا البنات يباوعون لمنظر ابوهم وامهم ويبجون .. لك اثير احنا بعازتك شوكت تحس بالمسؤلية بأتجاهنا اي مو تعبت والله زهكت هد عليها والعيون حمر من اثر الشرب .. وزهكت الكلاب السود لزم راسه دايخ اذا فتحتي حلكج والله اجنزج .. والله ماعندك غيرة على اهل بيتك وعائلتك بيوم ترجعلنا سكران بنص الليالي هد اثير عليها وجانت النية واضحة على وجهه .. اكلج اشششششششش راسي راح يطك من النكة اقترب منها ورفع ايده يريد يضربها بس وكعت الضربة على خد شيماء الي اتصدت لضرب ابوها وصارت كدام امها انشكت شفتها وصار الدم يجري صاروا البنات يعيطون من الخوف وهناك وحدة صغيرة شردت خايفة متريد تشوف هذا المنظر وطلعت بالشارع وكعدت يم باب بيتهم مثل كل مرة اتعودت على كعدت الباب عيونها حمر تبجي خايفة طلع رائد من بيتهم وشافها .. هاي شنو هدهد شعندج طالعة بالليل وكاعدة بالباب انتبه عليها مسحت دموعها وخشمها بظهر ايدها باوعتله .. بابا ضغب (ضرب) ماما وشيماء واني اخاف منه جان منظرها يكسر الخاطر راح كعد يمها ومسح دموعها .. اشش لتبجين اكول صدك انتي شوكت راح تتسجلين بالمدرسة هدى نست خوفها وانطلقت بالكلام .. ماما كالت السنة الجاية تدخلين مدغسة ( مدرسة ) واشتغيلج ( اشتريلج ) جنطة ويصيغ (يصير) عندي دفاتغ ( دفاتر) وكتب جانت ماخذة راحتها بالكلام ورائد خربان ضحك .. هههههههههه هدى كولي رائد رددت وراه.. غائد رجع يضحك .. زين كولي اريد رائد رددت .. اغيد غائد انتبهت عليه يضحك وضربته معترضة اتعودت على تقليد الناس على رتلة لسانها من يسمعونها تلدغ بحرف الراء .. لااااااا غائد لا تعيب مزاعتلك بعد ما احجي وياك جاوبها وهو يضحك .. ههههههه يالله هذا هو بعد ما اضحك ورجع يضحك عليها ما يتحمل يشوفها مبرطمة وخدودها حمر وعاكدة الحواجب واثر الدموع معلك بطرف الرموش .. لا صدك هدى بعد ما اضحك شوفي منا ورايح من يتعارك ابوج وية امج بالليل لا تطلعين بالشارع ترة اكو كلاب هواي بالمنطقة واخاف يعضونج وهم اكو حرامية يخطفون باوعت عليه وعيونها ترمش خايفة .. كول والله .. والله شبيج ذاك اليوم بالليل جنا اني وصديقي قاسم نمشي بالشارع وركض ورانا كلب اجة يعظنا لو ما قاسم شال الطابوكة وشمرها عليه بكل قوة وانهزم الكلب وعلى طاري قاسم سمعو صوته قاسم.. شبي قاسم هي شافته وطفرت من مكانها وختلت ورة رائد انتبه عليها .. ها ولج شعندج طالعة بالليل حجت وية رائد .. عااااا اجانا علي بابا التفت عليها رائد .. ها شنو كلتي مسمعتج ..غائد عفية كله لا يجغني (يجرني ) من ظفيغتي (ظفيرتي ) رائد يضحك على كلامها غمز لقاسم .. قاسم لخاطري هالمرة لا تجغها من ظفيغتها جان يحجي ويقلد على لدغتها قاسم .. خلاص لخاطرك هالمرة ما اجرها من ظفيرتها بس بشرط خليها تردد وراي وتكول مروحة رائد طارت برطمت شفايفها بغيض بس متكدر ترده تخاف منه حجت وهي ضايجة ومغنتبة تدري بيهم ناصبين عليها كالت.. مغوحة غائد طاغت قاسم ورائد خربانين ضحك عليها عبالك لكولهم لعبة يتونسون عليها قاسم.. بالله كولي سافر قاسم الى روسيا هدى بأعتراض.. كافي بعد ماكول تحجي وحاصرتها البجية قاسم بخزرة متنمر يستغل تسلطه عليها .. ها ترة ظفيرتج حلوة حرامات اخربها كبل رددت .. سافغ قاسم لغوسيا رجعوا يضحكون وهي مبرطمة قاسم اتعود يستغل نقطة ضعفها والي هي خوفها منه .. روحي جيبي ماي بارد عطشان .. ماعندنا ثلاجة رائد .. روحي دخلي جيبي من بيتنا راحت شافت قاسم التفت يحجي وية رائد وكامت تمشي وتغم بيدها عليه من حركة كلبها رائد يباوع على حركتها ويضحك على شكلها ............. بعدما مضى الليل محمل بين ثنايا ظلامه الدامس حسرات خوف والم واضطهاد طلع الصباح عليهم لكي تستمر الحياة ام شيماء.. ماما مروة روحي كعدي خواتج خلي يكعدون يتريكون هم يالله نكف الشغل وراي خياطة اريد اكمل خياط حطت كتابها على صفحة وراحت تكعد خواتها مروة تدرس بالعطلة لان قدمت على قرار العبور للمرة الثانية كعدوا البنات باوعت على بنتها شيماءشلون شفتها مشكوكة ومزوركة من ورة الضربة الي اكلتها من ابوها جرت حسرة ورجعت تكمل شغلها وحضروا صينية الجاي وخبز وبيتنجان كلي حطوا الصينية بالكاع ودخل عليهم ابوهم لازم راسه موجوع ويون من الم الصداع اثير .. صباح الخير محد رد عليه بس هدى .. صباح النوغ (النور) بابا كعد وياهم عالصينية ولا كأنه مسوي شي رفع راسه .. عفية بابا شومة صبيلي كلاص جاي راسي يريد ينفجر لفت انتباهه منظر شفة شيماء الزركة وعقد حواجبه مستغرب . بابا شومة هاي شنو شبيها شفتج جاوبته ام شيماء .. شنو تسوي نفسك غشيم ليش متعرف منو سوة هشكل بوجها .. لا والله حرام علية اذا اعرف منو درات وجها على شيماء .. كوليله لأبوج منو سوة بيج هشكل شيماء بصوت هامس .. بابا هذا انت ضربتي البارحة بالليل من جنت .... وقطعت كلامها واستحت تكله من جنت شارب وفاقد ام شيماء اشرت لشيماء تاخذ خواتها وتدخل بيهم للغرفة لان تريد تحجي وية ابوهم كلام ما يجوز يسمعونه اثير كان مصدوم .. انا سويت هشكل بيها؟؟؟؟!!! ... اي انت والمصيبة مو بالضربة الي اكلتها شيماء المصيبة بيك انت الي ما دتتذكر شنو سويت البارحة بالليل بينا .. بثينة مجنت بوعيي البارحة .. تدري هذا كلامك شنو معناه كارثة مو بس مصيبة يعني تشرب وتفقد وتهجم علية وعلى بناتي وثاني يوم تنكر سوايتك بينا يعني هالمرة شوهت وجه بنتك وشكيت شفتها المرة الجاية الله العالم شنو راح تسوي بية وببناتي والله اثير صرت اخاف على روحي وعلى بناتي منك خاف يجي اليوم وتذبح وحدة بينا وانت فاقد من الشرب حجت بجزع اثير ترة والله تعبت وما عاد بية حيل انتبه على نفسك وشوف بناتك بدوا يكبرون وشيماء كبرت وبدت تفتح مثل الوردة بناتك عينهم عليك يترجون منك الخير مثل كل بنية تترجى من ابوها يصونها ويحميها ليش انت عكس الناس صارو بناتك يباوعون عليك بخوف صارو حتى يكرهون طاريك لان ما يتذكرون منك شي طيب قدمتة الهم ولمستقبلهم مثل اي اب يبذل ما بوسعه لحتى يوفر مستقل لعائلته كلي انت شنو محلك بالاعراب شنو دورك بحياة بناتك يعني بس اسمك اب بالجنسية تدري انت حتى ماكلفت نفسك تشتغل وتعيل عائلتك يعني لو اني الي اكد واصرف على هذا البيت لو ماكو نموت اتي ويناتي من الجوع بثينة جانت تحجي وتبجي بقهر اثير يفرك بوجهه .. لحظة بثينة لتبجين مسحي دموعج انطيني فرصة خليني احجي ترة انا مو هيج نذل مثلما متصورتني والله حاولت ابدي صفحة جديدة وية نفسي بس كلما اريد اقدم على ابدي من جديد اشوف الناس تنبذني حتى من اريد اقدم على شغل اتعير بشغلة التزوير ويسدون الباب بوجهي ياهو الي اروحله محد يستقبلني شنو بيدي اسويه .. زين الشرب .. الشرب ينسيني العار الي انا عايش بي مسحي دموع واوعدج من هاليوم بعد ما اشرب ولا اقرب عالشرب وراح ابدي من جديد ادور على شغل مسحت دموعها بأمل .. اثيري اوعدني متشرب .. اوعدج .. ما اعرف ليش ما اكدر افرح بوعدك الي اخاف هم مثل كل مرة من توعدني فترة تكطع وترجع تشرب .. انطيتج كلمة خلاص وانتي هم ساعديني .. ان شاء الله اوكف وياك شعندي غيرك اقترب منها وباسها من راسها .. اي اتذكرت البارحة خالتي ام فرزدق كالت بيت جارنا ابو قاسم يريد واحد ثقة يخليه حارس على بيتهم لان طافرين حرامية عليهم واني كلتلها عليك وهي كالت خلي يروح اليوم لبيت ابو قاسم ويشوف شنو المطلوب منه .. صار تدللين هسة اتريك واروح لبيت ابو قاسم واشوفه شنو يريد مني يالله صيحي البنات خلي يجون يكملون روكهم واليوم لا تسوين غدة انا راح اشوي كباب ونتغدة سوية بمناسبة الشغل الجديد جاوبته بفرحة كلها امل .. يا صدك اثير ناكل كباب منينلك فلوس ضحك .. داينيني اليوم واوعدج بس استلم راتبي ارجعلج الفلوس ابتسمت .. اثير اني وانت واحد ما بينا دين اجوي البنات شافو ابتسامة امهم وفرحوا على فرحتها وكعدوا على صينية وحدة يتقاسمون اكلهم البسيط كانت لحظات ثمينة اثير صاح لشيماء وكعدها يمه وباسها من راسها راح اثير واستلم الشغل وصار حارس لبيت ابو قاسم وصار كل يوم ياخذ خفارة ويروح على شغله وجان كل يوم من يرجع عالغدة يسولفلهم عن يومه وشنو يصير وياه والبنات يستمعون لمغامرات ابوهم وجان دائما يحجي شنو يصير عند بيت ابو قاسم ضحى .. بابا صدك بيتهم حلو .. اي بابا بيتهم ضخم وكلش حلو ضحى.. اي بنتهم صديقتي تكول عدنا حديقة كبيرة ومليانة ورد وكالت تعالي لبيتنا لعبي ويانا ابو شيماء .. اي شكو بيها اخذج وياي انتي وهدى لبيتهم ولعبوا وية بناتهم هدى بخوف.. لا .. لا .. بابا ما اغوح(اروح ) اخاف من ابنهم قاسم ضلو البنات يصنفون على هدى مروة.. هذا اللسان الطويل كله وطلعتي تخافين من قاسم والله عمي خوش طلع قاسم صكارج واخيرا اكو من يردج مرت الايام وقربت امتحان الاختبار مال مروة وام شيماء قرب موعد عمليتها بعد اسبوعين جانت مروة متفائلة بجوابها بالاختبار انطوها المدرسة تكريم للمتفوقين ام شيماء فرحت بيها وحظنتها ياربي اشوفج. احلى دكتورة وينادوني ام الدكتورة مروة .. امين يارب اندعيلي ماما ام شيماء.. مو بس راح اندعيلج لا وهم راح اروح وياج للمدرسة وانتظرج هناك من تمتحنين مروة بتهرب.. هااا ماما لا ميحتاج مو الا تجين وياي .. لا حبيبتي اجي وياج احسن حتى اشجعج وخاف تحتاجين شي مني مروة.. ماما عفية لا تجين استحي ام شيماء صفنت بوجها .. شنو قصدج تستحين ما افتهمت مروة بتردد.. ماما لتزعلين مني بس بنات المدرسة كلهم يعرفون بيج تشتغلين خدامة ببيت ام رائد .. اي وشنو يعني ترة الشغل مو وعيب وبعدين اني بطلت ماكمت اشتغل عندهم بعد شكو .. صحيح انتي بطلتي من للشغل بس بقى اسمج اشتغلتي خدامه عندهم وما اضمها عليج صرت اخجل اكول عليج امي عفية ماما لتزعلين بس انتي الي خليتيني وخليتي نفسج بهيج موقف باوعت ام شيماء على بنتها مروة وحجت .. يمة مروة انا احبكم واتمنالكم الخير بحياتكم واذا تشوفين ان حضوري وياج للمدرسة يسويلج احراج خلاص ما اروح وياج اهم شي عندي سعادتكم كامت مروة وباست راس امها .. شكراً ماما احيانا نجرح اهلنا ونصير سبب حزنهم بدون ما نلاحظ ..... جانت ام شيماء تتأمل ان اثير غير فكرته واتراجع عن قراره وما راح ينطي بنته الخامسة لبيت اخوه لكن مع الاسف من فتحت الموضوع .. اثير سؤال بعدك على قرارك اذا جبت ابنية تنطيها اثير وبدون تردد .. طبعا شي اكيد بقهر .. شلون ينطيك كلبك تنطي وصلة من كلبك لبيت اخوك .. شنو قابل انا منطيها لواحد غريب بالعكس اخوي امجد الله شايل حمالته وراح يساعدني ويشيل عني حملها ظلت تبجي وتترجاه سألها.. ليش هو انتي شنو قابل حامل ببنية الله لا يكولها سكتت وما جاوبته .. ها لا بس هيج اسألك ظلت اليوم كله تحوم وصارت حتى بالليل تحلم احلام تخوف لو تشوف بنتها ماخذيها منها وهي مربطة ومتكدر تسوي شي لو تحلم ببناتها كلهم ياخذونهم منها كابوس يجر كابوس وحتى من حجت لام فرزدق عن احلامها كلتلها يمة هاي من كد التفكير ببناتج هشكل تجيج الاحلام كعدت بالليل مخنوكة وراحت تشرب ماي طلعت الدولكة من الثلاجة وشربت الماي واتذكرت الحلم وكعدت تبجي شيماء بخوف .. ماما هاي ليش تبجين شنو متأذية .. لا حبيبتي ممتأذية هيج دا افكر اقتربت منها شيماء .. بشنو تفكرين بثينة تباوع لبنتها او بالاحرى صديقتها الي تحجيلها كلشي ومستودع اسرارها .. ماما شومة اني خايفة حضنت امها .. من شنو تخافين ماما واحنا يمج .. خايفة على اختكم الخامسة ابوكم معند وكلي اذا بنية بنطيها لبيت اخوه ما جاي اتخيل نفسي انطيها ما اتحمل والله اموت من القهر .. اسم الله على اسمج ماما لتحجين هشكل اذا استدعى الامر نحجي وية بابا ونترجاه وحتى لو نكول لام فرزدق تتدخل او نطلب من ابو قاسم يحجي وياه هو يستحي منهم ويسويلهم حساب مسحي دموعج ماما عجيب امر الدنيا تمشي بالعكس بنت صغيرة تواسي ام خايفة وتطمنها على عائلتها يوم ثاني اجتي ام فرزدق وكالت اليوم اخذكم ونروح نزور الامام الكاظم عليه السلام البنات طارو من الفرح لان صارلهم زمان مطلعوا من البيت وراح تخلص العطلة وهمة كلشي مشافوا شيماء همست للبنات مروة وضحى .. والله اجتي بوكتها واحنا جنا البارحة داخيين شلون راح نشتري هدية عيد الام ونفاجي امي بيها مروة.. اي عفية صدك اجتي بوكتها لعد يالله خلي اروح اطلع فلوسي من المحصلة واشوف شكد مجمعة شيماء.. واني همين اورح احسب فلوسي المجمعتهم ضحى بتردد.. بنات اني ممجمعة ولا فلس شلون مروة.. انتي غبية تصرفين فلوسج على اشياء تافهة جبس عصاير علج ضحى.. شسوي احبهم شيماء.. يالله مومهم نتشارك اني وياج بهدية حلوة ونكللها هاي من عدنا ثنينا مروة .. اني اريد هديتي خاصة ما اريد احد يشاركني بيها شيماء.. براحتج ام شيماء.. يا خالة خاف نسوي عليج زحمة ام فرزدق .. لا مبيهة اي زحمة انتي بنتي وبناتج مثل حفيداتي خليني افرحهم .. ربي يطول بعمرج ويفرحج مثلما تفرحينا بس خالة اليوم حيل موجوعة يمكن ما اكدر اروح وياكم عذريني لازم ارتاح ما اريد اطلك قبل موعد العملية واخاف اروح هناك ازور واتعب ضحى ..لااااا عفية ماما والله طاك كلبنا نريد نطلع ام فرزدق .. لعد خالة انتي ارتاحي واني اخذ البنات وياي ازورهم اتفقوا يرحون يزورون الا هدى تبقى يم امها لان هي حركة واخاف تضييع منهم بالزيارة راحوا البنات وية ام فرزدق وبقت هدى وامها كعدت ام شيماء تمسح دموع هدى الي كامت تبجي وراهم تريد تروح وياهم .. اش كافي مسحي دموعج لتبجين اني اوعدج اخذج للزيارة بس اني وياج لوحدنا والبنات ما يرحون ويانا هدى تمسح دموعها .. اي بس اني وياج لوحدنا نغوح (نروح) ظلت ام شيماء تعدل بالبيت وطلعت كم قطعة قماش وقررت تفصلهم وبعدين تخطيهم على راحتها لان قرب موعد الولادة لكن بهاي الاثناء وهي دتشتغل حست الالام كامت تزيد كل ساعة يزيد الوجع عندها فجاءة حست بنزول سائل غزير وعرفت بلحضتها هذا ماي الطفل جمدت بمكانها خايفة صاحت لهدى هدى .. هدى .. لج يوم هدى وينج .. ها ماما شنو تردين باوعت هدى على امها بخوف جانت واكفة بالمطبخ حاطة ايدها على بطنها وكوة تتنفس ووجها عركان احمر عضت شفتها بألم وكالت .. ماما هدى روحي ركضي بسرعة صيحيلي ام رائد كليلها ماما تريد تجيب هدى باوعت عليها خايفه لان تشوف امها شلون دتتألم بشكل غريب اول مرة هيج تنوجع وتبجي .. ماما لتبجين هسة اصيح بخالة وراحت تركض للشارع لبيت جارتهم ام رائد دكت الباب بكل ما تملك أيدها الصغيرة من قوة وطلعلها رائد شافها وابتسم لزمها مثل كل مرة من ظفايرها الطويلة رائد.. هلا هدوشة كانت تتنفس سريع .. غائد غوح (روح ) صيح امك لان ماما تبجي متوجعة كانت تحجي وياه واجتي ام رائد تسأل منو بالباب دفعت رائد الي واكف كدامها ودخلت تركض لداخل البيت .. خالة ماما تبجي وتكول عندها ولادة ام رائد.. يا خطية زين ليش انتي اجيتي خواتج وين عنج خالة خواتي غاحو وية خالة ام فغزدق كانت هدى تحجي وتباوع بترقب على ام رائد شلون جات لابسه تنورة وقميص نزعت شحاطة البيت ولبست حذاء واجتها تمشي بسرعة لزمت ايدها الصغيرة وطلعت وسمعو رائد يكول من وراهم .. يوم انتظريني اروح وياج .. اني طالعة اشوفها وانت تعال وراي ركض بسرعة وظل يمشي وراهم وصلو للبيت وجانت ام شيماء تتلوة من الالم ام رائد.. لج عيني دادا شكلج واصلة يمكن حتى منلحك نروح للمستشفى ام شيماء .. لج عيني ام رائد لحكيني راح اموت من الالم مو الا نروح للمستشفى اخذيني للقابلة ام احمد بس خلصوني من الالم .. لعد يالله خلي اخذج بس كليلي الغراض مال الطفل وين التفتت على هدى وكلتلها ام رائد.. هدى روحي جيبي عباية امج هدى جانت تباوع على امها كلشي ما مفتهمة وراحت ودخلت لغرفة امها ام رائد.. بثينة جنطة الغراض مالتج وين حاطتهم هاي بنتج هدى صغيرة كلشي متندل جاوبتها ام شيماء .. خطية بعدها صغيرة متعرف اي شي اني كلة اعتمد على خواتها واشرت عالزاوية الي جانت بيها جنطة الغراض وراحت ام رائد سحبتها ونزلتها وكالت .. يالله عيني امشي ام شيماء .. عفية خلي رائد ابنج ياخذ هدى وياه لبيتكم لتبقى لوحدها واخاف عليها تبقى لوحدها ام رائد التفتت على ابنها وكالت .. يوم رائد اخذ هدى وياك لبيتنا وبقيها يمك عينك عليها بين ما يرجعون خواتها لبست عبايتها موجوعة وراحت يم هدى ودنكت عليها واخذتها لحظنها وباستها من راسها وكالت .. هدهد ماما صيري عاقلة وسمعي كلام خواتج .. اي ماما وراحت وية ام رائد ورائد اخذ هدى و طلع من البيت يمشون بالطريق لبيتهم لازم هدى من ايدها وسألها .. تردين اشتريلج جبس فرحت وكلتله .. اي اشتغيلي جبس وعصيغ لزمها من ظفيرتها جانت هدى تهرول بصف رائد تريد تلحك على خطواته وصلو للدكان واشترالها وبين مدا يشترون دخل قاسم هدى ارتدت للخلف ولبدت ورة رائد رائد ابتسم على شكلها الخايف تباوع على قاسم يحجي وية رائد قاسم.. رائد تجي تلعب ويانا راح نلعب دعابل براس الفرع رائد .. لا ما اكدر العب وياكم امي خلت يمي هدى بنت ام شيماء باوع قاسم لهدى وسأل .. ليش امها وخواتها وين رائد.. امها عندها ولادة وخواتها كلهم بالزيارة قاسم.. زين خليها تجي ويانا تكعد يمنا واحنا نلعب دعابل ما عليها شي باوعلي رائد ورجع باوع لقاسم .. خلاص مادام تجي ويانا هذا | ||||
|
| |
|
03-07-19, 11:54 PM
| #6 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #أساور_الفضة # البارت_الرابع # الكاتبة_نهى ............................................... # وداعا_ياامي سوارت فضة بيدج احنا نزعتينا على غفلة ومشيتي صحيح الدنيا ماانصفت وياج ولايوم بيها راحة لگيتي وادري بيج يايمة تعبتي هواي وعلينا سنينج الحلوة فنيتي ادري صار الوكت ترحين عند رب كريم رحمن رحيم وبجنته العالية الوسعة تسكنين ومثل حور العين حلوة يايمة تردين يجازيج على صبرج يل ماشكيتي # امي_سيرة_صبر # امي_ديرة_قهر امي طيبة امي حنينة امي ماتت ماشافت يوم واحد دلال والوكت ااخ الوكت صال بيها وجال حسبي الله على كلمن جار على امي وعال ( بقلم هدى) ... #Hoda .................................................. ... وقفة حزن لشمعة امل انطفت كانت تضوي درب خمس بنات اليوم نطوي اخر صفحة من حياة المراءة الصابرة .. بثينة ام البنات مثلما كانوا يلقبونها وداعاً ايتها الام العظيمة بعد مرور عشر ايام شيماء .. اباوع على اختي الصغيرة خطية ما لحكت تشبع من حضن امي ولا لحكت ترضع من حنانها دنكت راسها وشمت اختها ..وهمست _ افيش ياريحة امي اجتي ضحى تخض الممية وانطتها لشيماء ضحى.. هاج شيماء سويت رقمين حليب شيماء.. انطيني خطية كلش جوعانة انطيت الممة للصغيرة وصارت ترضع بنهم ..باوعت على خواتي الي كل وحدة بيهم رايحة بعالم اراقب اخواتي وكلبي ينزف بصمت على فراق امهي صاروا يسمونا .. اليتيمات اليوم مر عشرة ايام على وفاة ريحة الجنة ومنبع الرحمة ابوية رجعنا اني وخواتي للبيت من يوم السابع صارلنا يومين من رجعنا ..بعدما خلصت ايام العزاء والفاتحة سووها ببيت جدي القديم رجعنا للبيت الخالي من امنا اتعودنا كلما ندخل نسمع صوت امي يملي المكان هسة خالي بارد ومهجور كل وحدة بينا عبرت عن حزنها بطريقتها اني ومروة وضحى كنا نعبر عن حزنا بالبجي يمكن لان احنا كبار ونعرف كلش زين بعد ما نشوف امي للابد عكس هدى بجت شوية على بجينا بس بدون متدرك شنو معنى بعد متشوف ماما وصارت تكضي النهار كله تلعب وية البنات بس بأول ايام من يجي الليل تظل تحوم على راسي وترجع تسألني وتكلي .. وين ماما اجاوبها بقهر _ ماما ماتت تكلي اي اعغف (اعرف) ماما ماتت بس شوكت تغجع (ترجع) اغيد (اريد) انام تغة (ترة) نعست حرت شجاوبها هدى اكثر وحدة بخواتي متعلقة بأمي نلكاها دائماً معلكة بأذيال امي لو نايمة بحضنها ..ما اعرف منو بينا اكثر فقد لأمي كامت كل ليلة تسألني واسحبها لحضني وانومها على ايدي وهي من تعب اللعب تحط راسها وتنام ..لكن من رجعنا هنا هدى صارت تدور بالبيت مثل المضيعة شي بدون متحجي بس معالم وجهها كانت واضحة على شنو تدور باوعت علية بس مسألتني كبل طلعت للشارع تلعب ما اعرف احسدها على كلبها لو انقهر عليها ورة ساعة دخلت علية هدى وهي مفرفحة بجي .. هدى ليش تبجين منو وياج هدى تبجي مفزوعة .. شيماء تعالي وياي هذولي البنات يكولون امج ماتت ودفنوها جوة التراب بعد ما تشوفيها روحي كليلهم لا يحجون هشكل عن ماما حضنتها بقوة وهمست .. هدى كلامهم صحيح امنا بعد ما ترجع وصرت ابجي وياها مكسور كلبي عليها وبهذا اليوم هدى ادركت وعرفت شنو معنى ..امك تموت وتصبح يتيم وبطلت تسألني عن امي شوكت ترجع وصارت يوم عن يوم تتعلق بية وتنام بحضني لكن بدة على وجهها الذبول صحيح تطلع تلعب وية البنات بالباب اصلا زادت ساعات اللعب برة بيبي بيوم سابع من الفاتحة رجعت ويانا للبيت وانطتني سوارت امي الفضة كالت هاي مالت امج ظلن يمي .. واليوم اتذكرت كلت انطيج اياها اذا تردينها اخذتها من عندها وحضنتهم لصدري وصرت اتخيل شكلهم بيد امي وكعدت بيبي تعلمني شلون ادير امور البيت وتوصيني عالبيت وعلى خواتي وعلى بابا واختي الصغيرة صار اسمها..(مريم ) زوجة عمو امجد سمتها لان جانت تتمنى تصير عندها بنية وتسميها مريم رغم اني جنت اتمنى اسميها مثل ماامي تريد (رؤى ) هاي الايام زوجة عمي امجد التهت بوفاة خالتها توفت بعد امي بيومين فبقت مريم عندي وصار عندي امل اختنا تبقى تتربى بينا مثلما جانت امي تتمنى ام اثير التفتت عالبنات مروة وضحى وهدى .. بيبي بعد ما اوصيكم عالبيت وساعدوا اختكم وسمعو كلامها وصيروا حبابات وانتي مروة بسج قراية وعاوني اختج خطية مروة.. بيبي ما الحك مبقى شي للامتحانات .. عيني من شفتج وشفتيني عندج امتحان وتدرسين زين ذاك اليوم شنو. جان مو امتحنتي مروة.. بيبي هذاك مو امتحانات لا هاي يسموها اختبارات اسويها ومن عندها همة يقررون يسمحولي امتحن وية الخامس علمي لو لا شيماء.. لا بيبي خلي مروة تفرغ لدراستها هو البيت صغير كلشي ميحتاجله وخواتي اني ادير بالي عليهم ضحى.. بيبي اني اساعد. شيماء عفية عليكم يالله انا رايحة وخواتج عينج عليهم انتي كبيرة ومعدلة سباعية على امج الله يرحمها انا جان بقيت وياكم اكثر بس شوفة عينج صحتي على كدي ما بية حيل اتنقل من بيت لبيت هم يالله ارجع لبيتي ارتاح هناك اكثر شيماء.. بيبي روحي ليظل بالج علينا خواتي احطهم ببطن عيني راحت بيبي وبقيت اني وخواتي بالبيت وبابا رجع لشغله ومرت الايام جنت مثل كل يوم اكعد من الصبح واحضر الريوك لخواتي واكعد انظف البيت اخذت عهد على نفسي ما اخلي خواتي يحسون بالنقص بدينا شوية شوية نرجع لحياتنا من بعد امي صحيح مو مثل قبل بس الحمدلله على كل حال كعدتهم للريوك واخذت مريم حللتها من الكماط جانت كلش ناعمة رحت غسلتلها وبدلت ملابسها ورجعت كمطتها وانطيتها رضعتها اتعودت عليها وروحي اتعلقت بيها ما اعرف ليش بس يمكن لان هي من ريحة امي او يمكن لان ما لحكت على حنان امي حبيت اعوضها بس خطية هدى تغار منها لكن متبين كدامي بس تباوع عليها من بعيد ومن احط مريم بحضني تركض تحضني وتكلي شيماء اني احبج كومة لو من تشوفني شايلتها تسوي شي بالبيت حتى تلفت انتباهي وتظل تبجي على اتفه سبب حتى اروح يمها واكعد اسكتها مروة اختي هاي الايام خطية تدرس لنظام العبور لان شملها القرار يعني اذا نحجت بالامتحان تنتقل للسادس علمي خطية يمكن اذا داومت السنة الجاية سادس علمي يمكن راح تكون اصغر طالبة بالصف كله لان مروة عبرت سنة من كانت بالمتوسطة ووهسة ناوية تعبرة الخامس علمي وفاة امي انطاها التصميم دخلت عليها للغرفة وشفتها تدرس والغرفة متروسة كتب جنت احاول بقدر الامكان اهيء الهة جو الدراسة وما اخلي البنات يهوسون حتى ما يأثرون عليها رفعت راسها وباوعت علية جنت شايلة بيدي صينية جاي ولفة جبن خطية تنسى نفسها بالاكل متاكل مروة.. اي شومة اجيتي بوكتج ميتة جوع معدتي كامت تعيط تريد اكل حطيت الصينية يمها ومدت ايدها تاكل شيماء.. ها بشري شلونج بالدراسة مروة.. لا الحمدلله زينة خصوصاً من رحت لبنت ابو قاسم كوثر وشرحتلي مادة الرياضيات احس سيطرت اكثر خطية وكالت بعد اذا تحتاجين مساعدة بشرح فيزيا كيميا اني موجودة تعالي بأي وكت هلا بيج .. الله يرضى عليها هي كوثر شنو مخلصة .. مخلصة كلية العلوم ما شاء الله كلش شاطرة مو بس هي حتى خواتها البقية شاطرات بس عندهم اخوها الصغير قاسم شكد كسولي ومو بس كسولي لا وحارك البيت حرك يمة من يدخل للبيت الكل يدخل بالانذار من وكاحته سمعنا صوت مريم تبجي كمت .. يالله اني اعوفج تدرسين ما الهيج مروة.. لا شومة جيبيها وتعالي كعدي يمي بينما اكل جيبي مريم خلي اشوفها جبتها واجيت كعدت يم مروة صار عمرها ١٥يوم اخذتها مروة وباستها .. ياربي شلون حلوة وناعمة لمست بشرتها بضهر ايدها .. اووي بشرتها كلش ناعمة حياتي جاي تنشنش .. اي دانطيها رضاعاتها بوقتها وما افوت ولا وجبة .. اي خطية الله يرضى عليج شومة لوما انتي جان احنا ضعنا من بعد امي الله يرحمها .. تدرين شيماء شكد محتاجة امي خصوصاً هسة ..اريدها يمي شكد جنت ارتاح من اسمعها تدعيلي بالتوفيق وهنت مروة مقاومت انطتني مريم وجرت حسرة ..وحطت ايديها على وجها وصارت تبجي حطيت مريم على صفحة والتفتت لمروة واخذتها لحضني .. كافي بجي اني ما صدكت التفتي لدراستج ورجعتي تحضرين لامتحاناتج مروة.. لج شيماء كلما اتذكر كلامي وية امي اموت قهر .. عن اي كلام دتقصدين .. اتذكر شلون جنت استعار منها ومن وجودها وجنت دائما امنعها من الحضور للمدرسة لان جنت ما اتشرف اكول هاي امي متعرفين شكد جنت غافلة عن امي وما حاسة بنعمة وجودها يمي احس بنار تاكل بكلبي هسة من فقدتها واحتاجيتها يالله حسيت بنعمتها وعرفت اني شكد محتاجة لوجود امي بحياتي لان مجرد ذكر اسمها ووجودها بحياتي سند قوي لحياتي احس بيها ماتت زعلانة مني .. اشش كافي لتبجين ماكو ام تزعل على بنتها لو مهما حصل بينهم من مشاكل يبقى كلب الام متسامح وية اخطائنا وانتي هسة من خلال دراستج وتفوقج راح تكدرين تفرحين ماما مسحت دموعها وهي جاوبتني بامل .. يعني اذا انجح واتفوق امي تعرف بية .. نعم مو بس هشكل اني سامعة الام حتى لو ميتة تدعي لاطفالها مديت ايدي ومسحت دمعتها .. يالله شدي حيلج وفرحينا بنجاحج كمت من يمها وشلت مريم للعصر اجة بابا ووياه عمو امجد وزوجته عمة جنان اثير.. بابا شيماء حضري اختج حتى عمج ياخذها وياه رجعت للخلف بأعتراض وحجيت بصوت عالي بدون شعور شيماء.. لا بابا عفية لا تنطي اختنا لبيت عمو طلعوا البنات من الغرفة على صوتي .. احسنلها تروح هناك لبيت عمج ومرت عمج تعرف شلون تداريها انتي بعدج صغيرة ما تعرفيلها مد ايده .. يالله بابا انطيني اختج شيماء والدموع تجري .. لا لا بابا عوفها والله اني ادير بالي عليها وما اخليك تحس عليها صاح بيها.. شلون ما احس بيها وهي بس قوطية حليبها تكسر الظهر امجد.. عمو لتخافين ترة اني هم مثل ابوها وعمتكم جنان مثل امها وان شاء الله ما راح نقصر وياها وانتوا بأي وكت تشتاقون لأختكم تعالو شوفوها شيماء ظلت متمسكة بأختها ولمتها لحظنها صارت تتذكر دمعات امها وخوفها من هاي اللحظة وساعتها حست بحركة كلب امها لان دتعيش هاي اللحظة وتتجرع منها المر عاط بيها اثير وكام يحجي عليها .. شيماء لا تشلعين كلبي كافي علية انتوا وحملكم ترة والله بزعت روحي منكم احس تتعمدون تصعبون علية حياتي شيماء.. بابا انت ليش كلبك حجر علينا ما احس بيك اب ويحن على بناته مروة شافت ابوها اقترب من شيماء ناوي يضربها وكفت كدامه وكالت .. اذا انت مو حمل مسؤلية اطفال وعائلة شكو خلفتنا ضربها راشدي وكعها بالكاع لزمت خدها وباوعت لابوها بنظرة الم جاوبته بدون ما تنزل منها ولا دمعة .. صرت ما استغرب قسوتك علينا واتعجب اذا بيوم اشوفك تحن علينا راحت دخلت لغرفتها دار وجهه على شيماء .. يالله هسة احسنلج هيج ارتاحيتي خليتيني اضرب اختج بسببج يالله شو انطيني اختج اباوع عليهم شلون سحبوها من بين ايدية احس شاغت روحي عليها واتذكرت امي شلون جانت تفز بالليل تبجي وشايلة هم هاي اللحظة من تولدها وياخذونها منها وينطونها لعمو امجد وينج يمة تعالي الي جنتي خايفة منه صار الله حابج ما حضرتي هيج موقف مجنت احس بقهرتج بوكتها بس هسة يالله عرفت مرارة حزنج من اخذوها من حظني ................................ (( رحتي انتي سواراتج سكتت حزن جارو عليهن ظلم بظلم وتفرهدن جنتي شمعة بيت ويمج يلتمن حسن حديثات على نورج الضاوي تعودن طفيتي يشمعة البيت ومن بعدج طفن صوت القهر مجروح وينادي ييمة حزن بس تعالي .. ييمة بس تعالي بطيف بحلم .. بس تعالي اتنفس عطر هيل انفاسج طعم ابوس ورود خدودج اذبلانة واشم فراكج ييمة هدم حيطان صبرنا هدم وهجم بيت فرحنا بهل الدنيا هجم مابقت منج ييمة غير شوية صور اتنسم بيها على طيوفج الحلوة نسم يل صورتج محفورة وسط گليبي رسم بس تعالي ييمة .. بس تعالي بطيف بحلم ... بس تعالي بقلم هدى ... #Hoda ...)) ....................................... مرت الايام وقربت المدارس والبنات اتعلموا شلون يعيشون بهاي الحياة بدون وجود امهم واتعودوا على معاملة ابوهم يوم زين وياهم ويوم شين شيماء .. هدى كعدي هم يالله نروح للمستوصف حتى تلقحين ويملون فايل التسجيل كعدت هدى من النوم من سمعت بالدوام جانت هواي متلهفة ريكتها وسبحتها ومشطت واخذتها للمستوصف حتى اسويلها الفحص الروتيني ماقبل التسجيل بالمدرسة وبعدها اخذتها للمدرسة ..وسجلتها بنفس مدرسة ضحى هدى جانت كلش فرحانة ومتحمسة وشفت جارتنا خالة ام قاسم وسلمت علينا اني وهدى وسألتني عن خواتي وكالت خالة اني ما ناسيتكم دوم اسأل ابوكم عنكم .. تسلمين خالة .. امانة اذا تحتاجون شي انتي او خواتج كولي ترة اني مثل امكم .. خالة متقصرين جمايلج مغركتنا ومشكورة عالاكل والملابس الي دزيتيهم بيد بابا ذاك اليوم .. لا خالة هذا واجبنا احنا جواريين رجعنا بالطريق ووكفت كدامنا سيارة ابو رائد بس شفته اتخربطت وانخطف لوني لزمت ايد هدى حيل واجيت امشي صاح باسمي _شيماء .. شيماء ونزل من السيارة ابو رائد.. ها شيماء شلونج اشو بعد ما شفناج ..وربي شكد مشتاقلج تعالي لبيتنا اليوم اريد احجي وياج بموضوع صيري حبابة وتعالي لبيتنا ما جاوبته وما انطيته مجال يكمل كلامه مشيت وعفته واكف يباوع علينا جنت امشي واطك رجل وبرجل اريد بس اوصل لبيتنا والله لو يموت ما اعتب باب بتهم كضيت النهار كله خايفة منه احس بي ناويلي هالمرة على نية لليل اجة بابا وكال .. بابا شيماء من باجر ترحين لبيت ابو رائد تساعدين ام رائد بشغل البيت شيماء.. لا بابا ما اروح اشتغل عندهم ماما منعتني عنهم وكالت انتي كبرتي ومايصير بعد تدخلين على بيتهم .. مو بكيفج ترحين وبلا دلع ترة انا ماجاي الحك على مصرفكم وهسة اجتي المدارس ويحتاجلكم كومة فلوس باوعت بوجهه صعبة علية اكول لبابا عن السبب الي يخليني ارفض اروح لبيت ام رائد ..والله استحي اكله بابا ابو رائد اتحرش بية كمت اتوسل وادبر بالاعذار و بابا معند الا اشتغل اتذكر كلام امي شلون جانت تحذرني منهم و كمت ابجي وبقيت متمسكة بالرفض .. بابا ما اروح لبيت ام رائد لو اعرف تموتني شغلني بأي مكان قابلة الا بيت ام رائد ما اروح .. ليش شمسويلج بيت ام رائد .. كلشي مامسوين بس ام رائد دائما تغلط علية وليلى بنتها تعير بأختى مروة اضطريت ادبرله الاعذار لكن بابا ما اقتنع وصار يصيح ويهدد .. شوفي ولج ترحين تشتغلين عند بيت ابو رائد من باجر لا والله اكسر راسج خلي اشوف بنية تكسر كلمتي .. بابا مو شغلة اكسر كلمتك بس ما اريد اروحلهم وهنا الاب كام ضرب شيماء .. شنو ولج تتحديني وتمشين كلامج علية هدى ركضت على ابوها وصارت تضربه على رجليه .. بابا لا لا تضغب شيماء دفعها وطلع جانت ضحى بس تبجي مروة اقتربت من شيماء .. اني لو منج ما ابقى دقيقة وحدة بالبيت والله اشرد وما ارجع .. اعيش عنده الكلاب البالشارع ارحم النا من ابونا كمت من مكاني وباوعت لضحى .. ضحى روحي بيت خالة ام فرزدق كليلها شيماء تريدج تجين ضروري اذا تكدر ضحى.. صار للعصر اجتي ام فرزدق وحجيتلها الصار احنا من يوم وفاة ماما اتعلمنا كلشي يصير ويانا نحجيه لخالة ام فرزدق هي خطية ما تركتنا من بعد وفاة ماما بين فترة وفترة تسأل علينا بعدما كلت لخالة ام فرزدق عالصار وهي بالاساس تعرف شسوة ابو رائد وياية قبل امي الله يرحمها كالتلها ....طلبت منها .. خالة عفية شوفيلي نسوان المنطقة منو بيهم تحتاج خياطة او طبخ او اي شي اني ماما علمتني على كلشي اريد اشتغل اي شي بس اهم شي اسكت بابا وما اروح اشتغل لبيت ابو رائد ام فرزدق.. خلاص هذا هو ما عليج خالة مسحي دموعج وخلي ابوج علية اني احجي وياه ودارت على مروة تسالها عن دراستها واندعتلها وضحى وهدى يلعبن سوية برة بالباب دخل بابا وشاف ام فرزدق وسلم عليها ام فرزدق.. هلة بيك خالة الله جابك جنت جاية حتى اشوفك واحجي وياك بموضوع اثير.. امري خالة بيمن اخدمج .. ما يأمر عليك عدوا بس اذا تقبل اريد شيماء بنتك تجيني للبيت تساعدني بدل ما تساعد ام رائد مثلما تعرف بية اني مرة جبيرة واحتاج واحد يساعدني وهاي مرت فزدق مشغولة بأولادها واني مريضة واحتاج وحدة تقيس ضغطي وتنطيني دواي التفت على شيماء وكال .. هسة بعد ما اضن عندج حجة ترفضين تشتغلين عند بيت ام فرزدق شيماء.. اي اذا اشتغل عند خالة ام فرزدق اقبل باوعت لام فرزدق بأمتنان ام فرزدق.. شوفي خالة منا ورايح تجيني كل يوم بعدما تخلصين شغلج ببيتكم وتكملين كلشي تمرين علية ساعتين تشوفيني شنو احتاج وترجعين ما راح اتعبج يالله هسة اني رايحة بعد ما اوصيكم صيروا حبابات راحت ام فرزدق واجة بابا كال .. حضري نفسج وخواتج اخذكم تشترون ملابس المدرسة لان ابو قاسم اليوم انطاني علاوة عالراتب وكال اشتري لبناتك ملابس للمدرسة فرحو البنات وحضروا روحهم وهدى خطية ما شايلتها الكاع ممصدكة اشترالها بابا ملابس المدرسة وجنطة وكال انتو عندكم جنط ما اشتريلكم ضحى اعترضت .. بابا اني جنطي تعبانة اريد وحدة جديدة شيماء.. ضحى اخذي جنطتي مالت العام اني هالسنة احط كتبي باللفكس بعد ما اشيل جنطة عدت الايام و بدت المدارس والبنات كاموا يداومون ومروة كلش متجندة خاف جانت تكعد ويانة قبل وتسولف وياي عن يومها هالمرة ماكو ابد منشوفها الا من تريد تاكل بس ميخالف ان شاء الله ربي ما يضيعلها تعب اني صرت اداوم بأعدادية التمريض باليرموك تصير قريبة علية و كل يوم من احل من الدوام اكمل شغلي بالبيت واغدي البنات واروح لبيت ام فرزدق ام فرزدق.. خالة شومة انتي مو الا كل يوم تجيني ترة اني ما اقترحت هالاقتراح الا علمود ابوج يكف من عندج وينسى فكرت يشغلج عند بين ام رائد ترة اني ممحتاجة احد يساعدني ولدي كايمين بواجبي وخير من ما خاليني احتاج شي اني اعرف ابوج كلش زين ما راح يتركج حتى لو اجريتلكم راتب هم راح يظل يلح حتى تشتغلين وتجيبين فلوس زايد خير .. خالة ما اعرف وين اودي جماليج وشلون اجازيج .. انتي ريحة الغالية امج جنا نحجي ودخل علينا عمو فرزدق وابنه الكبير صهيب هذا الولد دائما جان يوصل خالة ام فرزدق لبيتنا فرزدق.. هلا عمو شيماء شلونج خواتج شلونهم .. الحمدلله بخير .. امانة عمو اذا تحتاجين شي الج لخواتج ما يردج السانج جان يحجي وبعيونه نظرة غريبة صحيح عطف بس وياها حسرة ما افتهمت عليه هو ليش هشكل دائما يحن علينا اني وخواتي بس كلبي مأمن من ناحيته لان كان رجل طيب وافضاله الي يقدمها الي ولخواتي ما وراها غاية او طمعان بينا مثل ابو رائد لا بالعكس جان حريص علينا .. تسلم عمو ربي يطول عمرك انت وخالة افضالكم مغركتنا .. عمو انتوا ريحة الغالية امكم ما افتهمت عليه بس هاي الكلمة اتعودت اسمعها من خالة ام فرزدق (انتوا من ريحة الغالية ) يمكن هو مثل خالة يعز امي رجعت للبيت وشفت هدى مبسطة بكتبها تدرس بس بطريقتها الخاصة لابسة حذائي الكعب ورافعة شعرها ومعدلة ثوبها بوضعية الكشخة الشخصية حذائي كبير على رجلها جانت تكتب على باب الغرفة بالطباشير ولازمة عصة وتحجي بصوت عالي على اساس كاعدة تعلم بالطلاب الوهميين الي دتدرسهم هدى اليوم جايبة دور المعلمة باوعت على الباب مليان شخابيط طباشير .. لج هدى شمسوية .. داادغس (ادرس) .. هو هيج اليدرس بالله شو نزعي حذائي مو باجر اكعد الصبح ادور عليه ما الكاه .. هسة بس اخلص اغجعة (ارجعه ) لمكانه يالله غوحي لا تباوعين علية هزيت ايدي ورحت اشوف البقية شنو. ديسوون دخلت على مروة شفتها مثل كل مرة غاطة بالدراسة دورت على ضحى شفتها كاعدة بغرفة ماما مكابلة المراية وتعدل بشعرها .. اكول ست ضحى اشو هاي الايام ماكو دراسة ما حاي اشوفج تدرسين ضحى.. ما عدنا دراسة شيماء.. شوفي لج اذا اسأل اسراء بنت ابو قاسم وتكلي عنج كسولي صدكي اشلع اذاناتج اتغير لون وجهها من سمعت كلام اختها ضحى كلش شفافة ويبين عليها الكذب بسرعة دنكت .. سأليها شيماء.. خلاص لعد رايحة لبيتهم واسألها بس متلومين الا نفسج اذا كالت غير شي درت وجهي اجيت اطلع صاحت وراي .. شيماء لحظة لتروحين التفتت عليها باوعتلي بتردد .. احجي شنو تردين .. اني مو شاطرة بالمدرسة .. عزة بعينيج ليش ولج متكولين متحجين حتى ادرسج مثلما ادرس هدى .. ما احب الدراسة اكرها .. انجبي ماغصبن عليج تدرسين مو بكيفج سامعة البنات ضحى ومروة وهدى يخافون من شيماء اذا تتوعدلهم لان متتوانا حتى تضربهن عالخطاء .. يالله شو اتحركي كدامي على دروسج والله نوب اذا شفتج مكابلة المرايا وكاعدة تعدلين بشعرج اكصه لشعرج واخليج مثل الولد لزمت ظفايرها خايفة .. هذا هو خلاص ضحى اجمل وحدة بينا وهواي بيها شبه من امي الله يرحمها بعدها هدى تجي بالجمال والله حسيت بيها تتهرب من الدراسة بس جنت حيل مشغولة عنها بذيج الايام الفاتت لان دخلت اعدادية التمريض ويادوب ارجع واكمل شغل البيت واطبخ واروح بعدها لبيت ام فرزدق لذلك ما فرغت انتبه لدراستهم بس هسة بعد كلام ام فرزدق صار عندي وقت هواي الحك ادرس وادرس خواتي واكمل شغل البيت واتفقت وياها بين يوم ويوم امر عليها اشوفها شمحتاجة جنت كاعدة اغسل ملابس بالحمام واجتي هدى تركض وانفاسها سريعة حجت بصوت ناصي .. شيماء لحكي سمعت بابا وعمو امجد يتعاغكون (يتعاركون ) .. على شنو يتعاركون .. سمعته يكول لبابا ليش رجعت تمشي وية الشلة التعبانة وتالي وياك متبطل من هذا الطريق بابا كله امجد انت اطلع من السالفة هاي حياتي واني حر بيها عمو كله اذا هشكل لعد راح اسحب البنات منك وانطردك من العشيرة نكتب بيك تبراءة مامستعد انتظرك تجيب فوك راسي مصيبة مثل ذيج المرة وهذولي الجماعة الي مرافقهم وصخين .. هذولي التحجي عنهم جماعتي ما يربطني وياهم شغل بس سهرة تالي الليل امجد.. شوف اثير ورب الكعبة لو بس اشم ريحة ان انت راجع للشرب او لسوالفك التعبانة صدكني اسحب منك بناتج واخلي علي يطردك من البيت اثير.. شوف لك انا ما خايف منك انا لو اريد اسوي شي محد يمنعني سامع امجد.. شوف اني عني حذرتك مو تكول ما كال امجد ..... شيماء.. وهسة عمو امجد وين بعده موجود لو راح .. غاح (راح ) زعلان .. اوف ياربي معقولة بابا لهاي الدرجة واصلة بيه المواصيل ما يهتم بسمعتنا صرت كل يوم اراقب بابا من يرجع بتالي الليل بس الحمدلله يرجع ما بي شي وهو اصلا يشتغل حارس عند بيت ابو قاسم يعني ما بيها مجال يسكر حتى ميخسر شغله وينطرد صرت اشيل هم كلما بابا يتأخر علينا .......... مروة.. هذا شنو المسواك كلش هواي شراح تطبخين اليوم شيماء.. اليوم برجعتي من الدوام رحت عالسوك وقررت اخذ من الفلوس المجمعتهم الج واتسوكت حتى اطبخ الثواب لماما لتنسين اليوم دوران السنة الثانية على وفاتها الله يرحمها قررت اطبخ واوزع للناس حتى لو شي بسيط بس ميخالف اهم شي نتذكرها خطية امي مروة.. الله يرحمها ويطيب روحها الجنة شيماء عفية وياج اندعيلي بلكي يطلع اسمي من ضمن المشمولين ب المنحة الدراسية واتخلص من منية بابا ولو ان شاءالله اني متاكدة لان طلعت الاولى على العراق بالبكلوريا سمعتيه البارحة شلون يكلي بطلي لان تكاليف كليتج تهد الحيل ما بية حيل على مصرفج .. ان شاء الله حبيبيتي يطلع اسمج انتي شاطرة واني متأكدة منج راح ترفعين راسنا مثلما رفعتي راسنا وجبتي معدل وطلعتي طبية واذا عن بابا لتخافين اني منا ورايح اشيل مصرفج ومجمعتلج كم فلس لتاخذين منه بعد حظنتني .. يابعد روحي شومة والله هواي متعبتج وياي انتي بالذات هواي حرمتي نفسج علمودي .. دروحي لا تعب ولا شي جنا نحجي وسمعنا صوت هدى يلعلع من الشارع هدى.. ضحى الا اكول لشيماء عليج بس صبغيلي (صبريلي ) ضحي .. انجبي انتي ما عليج لتددخلين دخلو البنات للبيت راجعين من المدرسة شافوا شيماء دتطبخ اليوم عندها اوف هدى.. شيماء شوفي ضحى ترفع تنوغتها(تنورتها) من نطلع من المدغسة( المدرسة ) حتى تصيغ (تصير ) قصيرة ضحى .. جذابة اصلا هي التنورة صغيرة علية وصارت كلش قصيرة دارت على هدى تتوعدلها .. لج جنية اني الج اذا ما اشلع اذاناتج بسيطة شيماء.. اكلي تبن وتعالي خلي اشوفها شلون قصرت عليج هدى.. شيماء والله ضحى تكذب عليج هي تتعمد تقصغها (تقصرها) حتى تطلع سيقانها ويشوفوها الاولاد شيماء بعصبية .. شوفي لج هسة تنزعين هاي التنورة وتنطينياها اشككها الج حتى تبطلين تلبسيها ادبسسز بعدج صغيرة كل عمرج 11 سنه وماكاعدة راحة مروة .. عمي والله خوش بنات اخر زمن بعدها بكد الفصمة وتدور قصير وفيكات ضحى ..اي شنو يعني كل صديقاتي يلبسون قصير بقت علية شيماء.. ها طلع اللسان يعني مو التنورة صغيرة عليج مثلما كلتي قبل شوية ضحى.. لا اني يعجبني البس تنورة قصيرة جنت اباوع لرجلين ضحى بيض يبرجن احنا بنات واني اخاف عليها لان هي كلش حلوة ما اريد احد يأذيها خصوصاً هي صغيره زمخت بيها يالله شو اتحركوا كدامي بدلوا ملابسكم وتعالو ساعدوني بتوزيع الثواب هدى .. صاغ (صار) ابدل واجيج صار وقت العشاء وبدينا نوزع شيماء.. هدى انتي ودي هذا الماعون لبيت ام رائد ولبيت ام صلاح والبصفهم بيت ام قاسم هدى.. شيماء انطيني بس مال بيت ام غائد وام صلاح بس بيت ام قاسم مو اني اوديه اخاف خلي ضحى تودي الهم .. شكو منين تخافين ضحى.. تخاف من صكارها قاسم الوكح كلما يشوفها يجر ظفيرتها ويخزرها حتى لو ممسوية شي لازم يخوفها شكله يتونس من يطلع عظلاته عليها ويشوفها تخاف منه بس والله حيل بيها تستاهل الفتانة شيماء.. لا هذا صدك مصخها ولا جنه كبير حاط دوبه وية دوب هدى والله اليوم الا اروح اشتكي عليه عند ابوه واخليه يطيح حظه هدى.. لا لا عفية شيماء لا تغوحين لبيتهم وتشتكين عليه بعدين يتحلف بية ما اغيد اخاف شيماء.. بس اشوفه اني احجي وياه هسة انتي ودي الثواب اليوم وبس يحجي وياج كليلي هدى.. خوش جيبيهم شيماء.. حتى من ترجعين تذبين الزبل هدى.. اهوووو شنو كلة علية شنو خلفتكم ونسيتكم تغة (ترة) والله تعبت .. يالله روحي بلا حجي زايد ام السان راحت هدى توزع الثواب اتعودت دائما يخلون عليها تقوم هاي المهامات توزع تذب الزبل تروح تشتريلهم ومرات حتى تروح للبقال تتسوكلهم لان صغير القوم خادمهم وهي طايحة براسها دكت باب بيت ام رائد وطلعلها رائد .. هلا بوردايتي شلونج خجلت وصاروا خدودها حمر صايرة كلما تشوف رائد تتخردل وتستحي منه بس اشو قبل مجانت هشكل عادي وياه تلعب وتركض وراه هسة لا صايرة تستحي منه .. هذا ثواب دوران السنة مالت ماما اخذه منها .. لحظة انتظريني ادخل الماعون للبيت واجي وياج اوزع راح ورجعلها ركض .. بالله شو انطيني الصينية عنج ثكيلة عليج انطيته الصينية واني ابتسم وصلنا لبيت قاسم الوكح وطلعتلنا امه واتشكرت من عندنا وصارت تترحم على روح امي جنت حابسة الانفاس واباوع منا ومنا خاف اشوف قاسم الوكح درنا نريد نرجع للبيت وشفنا عركة اولاد براس الفرع سمعنا صياح رائد ضيق عيونه .. بالله شو هاج لزمي الصينية هذا يمكن قاسم ديتعارك اخذت الصينية من عنده وراح يركض لقاسم يشوفه هدى.. حل هاي حوبتي طلعت بي من كدما مأذيني دخلت للبيت وشفت شيماء محزمة دتنظف بالمطبخ وبابا ستوه داخل حجة وية مروة وكللها .. مروة حظري نفسج لكيتلج وظيفة كاتبة عند مكتب صديقي كال محتاج كاتبة ومحاسبة تساعدني وانا اقترحت عليه وكلتله عندي بنتي شاطرة تكدر تفيدك وراح ينطيج راتب كل شهر مروة شهكت .. عزة بابا ودراستي مستحيل ما الحك ادرس واشتغل بنفس الوكت .. اصلا انا قررت تبطلين لان مامحصل منج شي كضيتها كلة علينا دراسة ويعد وراج كم سنة هم دراسة ادري شوكت استفاد منج بعد ميت سنة يالله مروة.. مستحيل ما اخليك تحطم مستقبلي مو بكيفك اني مو شيماء واتنازل واخضعلك بسهولة كام ابوها وجرها من شعرها .. بنت فكر مو وجه نعمة ضربها على وجها ودفعها ووكعت بالكاع اجتي شيماء تركض على صوتهم .. بابا شكو ليش هشكل ضربها لمروة .. خلي تاكل تبن السانها طولان وحجة لشيماء عن سالفة الوظيفة وشيماء شهكت ولطمت على صدرها .. عزة العزاني تحجي صدك بابا بكل عقلك تترك دراستها علمود تتوظف كاتبة وين كاعدين .. يعني شنو تريدني حضرتها اكعد اصرف عليها بعد ٦سنوات كدام عود بعدين الدكتورة تتوظف ولو تحن علينا لو متحن مروة .. والله ما اشتغل لو اعرف تصير موتي ما اشتغل وما اترك دراستي شيماء.. بابا اذا جنت شايل هم مصرف مروة عوفه معليك بعد مالك دخل بي اني المسؤلة عنها .. يطبها مرض فوك مرض انا المن شال حالي قابل هو اني شمحصل منها حتى اترجى منها تصرف علينا ..روحي من وجهي لا حلت بركة بيج بنت فكر مو وجه نعمة راحت مروة للغرفة تبجي وتتوعد يم خواتها هدى وضحى هدى.. كافي مغوة لتبجين .. وعد علية كون الله ويصير البراسي واطلع من هذا البيت ويكولون بعد ارجعلكم لو التفت عليكم بس خلي يتحقق حلمي والله يخلصني من ظلمه بعدما هدأ البيت وطلع بابا حتى يلزم شفت الحراسة عند بيت ابو قاسم مثل كل ليلة صحت لهدى .. هدى وينج تعالي ذبي الزبل لا تغلسين هدى.. شيماء تغة (ترة) اني كبغت ( كبرت ) مثلكم صار عمري 8 سنين ما اغيد اذب الزبل شيماء.. انتي فد وحدة شوكت ما يعجبج تكبرين وتصغيرين روحج باليعجبج يالله شو اتحركي اخذي الزبل ذبيه بالقطعة وتعالي اخذت سطل الزبل واني ادردم لازم اروح يم القطعة الي اتعودنا نذب بيها الزبل وهاي القطعة اخاف منها لان ظلمة وكلها بزازين(قطط) وكلاب وصلت للقطعة وكلبت السطلة اذب الزبالة سمعت حركة من وراي التفتت وجان اشوف هذا الولد سيف المكروه هذا دائما اشوفه يم المدرسة اشوفه بالطلعة هو شلة اولاد يتحارشون بالبنات ويذبون رسايل الهم خزرته ولزمت السطلة وردت اروح بس هو سد علية الطريق سيف.. على وين يا حلوة تعالي ما صدكت اشوفج هدى بخوف بلعت ريكها .. شنو تغيد مني وخغ (وخر) منا اغيد اغوح لبيتنا سيف.. فديته لربج وللسانج العسل اليرتل الراء اقترب منها ولزمها من زندها وهي عضت ايده مفزوعة من حلات الروح تريد تشرد لزمها من شعرها ولطشها عالحايط ورفع ثوبها عاطت بخوف وتفلت بوجهها .. ياحقيغ (ياحقير ) عوفني والله الا اكول عليك لبابا قرب وجهه يريد يبوسني واني خرمشت وجهه صرت ارجف من الخوف عمري وحياتي مخايفة مثل هاللحظة بجيت وصرت اتوسل يبتعد عني .. عفية اغيد اغوح لبيتنا سيف وانفاسه حارة .. اشش نصي صوتج وصيري حبابة ما حسيت الا على سيف انسحب من الخطف وانركع بالكاع شهكت بخوف جانت القطعة ظلمة وبيها ضوة خفيف مكدرت اعرف منو هذا بس ما اشوف الا ركب على سيف وصار يضربه بوكسات مثل المخبل وذاك بس يصرخ يكله .. دخيلك والله بعد ما اعيدها زمخ بي وعرفت صاحب هذا الصوت عززااا هذا قاسم ما اعرف افرح بشوفته مدري ابجي بس قاسم صحيح اخاف منه لان يجرني من شعري بس هيه ارتاحيت من شفته ...شلت سطلت الزبل وصرت على صفحة باوعتله شلون دار وجه سيف للكاع ودفن وجهه بالزبل وذاك يرافس جوة ايده كام من عنده وتفل عليه وحق الكعبة خلي اشوفك معتب بمنطقتنا والله رجليك اكسرهم ناقص ابن الناقص سمعتني لو اعيد كام سيف على حيله ووانهزم وما بقى من عنده بس فردت نعاله دار وجهه علية وهو يتنفس بغضب . . وانتي جنية شعندج هنا بنص الليل وين ما اروح الكاج شنو انتي ما تكعدين .. دااذب الزبل .. سمعيني زين ولج خلي اشوفج مرة ثانية طالعة بالليل تذبين زبل شايفة هاي كصايبج كملت الكلام وهي خايفة .. اعغف (اعرف) تسويهم حبل تغبط (تربط) بيهم الخغوف( الخروف) .. لا ما حزرتي اسويهم حبل حتى اعلكج بيها بالبنكة حطت ايدها على حلكها بخوف وصلني للباب بيتنا وهو يدردم صادفنا رائد طالع من بيتهم وشاف عيوني حمر ولازمة سطلة الزبل بيدي .. خير شكو ليش تبجين باوع على قاسم .. لاتكول انت مبجيها يمعود بعدك حاط عقلك وياها مو كبرنا قاسم حجاله عن سيف ورائد كام يسب ويغلط وكله .. قاسم الله عليك تعال وياي وديلني على مكانه اريد اليوم ازينه صفر واخليه عبرة للولد المنطقة .. ما يحتاج مسحت بيه الزبل وطيحت حظه وانذرته بعد ما اشوفه بالمنطقة وخليه هو ابن رجال ويجرب يكسر حجايتي دار رائد وحجة وية هدى .. هدى مرة لخ متطلعين تذبين زبل بالليل سامعة عندكم زبالة عوفيها يم الباب واني اخذها واذبها سامعة هزيت راسي بنعم بدون ما احجي جنت خايفة وجسمي كله يرحف من الصار يعني لوما هذا قاسم الوكح جان الله العالم شنو سوالي هذا سيف جنت صافنة وسمعت زمخة قاسم بية .. دخيل الله شكد ثولة وفاهية يالله دخلي فوتي جوة كمزت من مكاني ودخلت جوة وسديت الباب واني اعيب عليه وقلد صوته .. دخيل الله شكد ثوولة يييييييي سمعت صوته من ورة الباب .. لج جنية هاي علمين تعيبين عزززة ضربت على حلكي ورحت اركض بسرعة خايفة عبالك راكض وراي كلب وبيومها شفت شيماء وحجيتلها الصار وهي اخذتني لحضنها بخوف .. يمة صخام الصخمني زين مسوة بيج شي الله لا يوفقه همزين قاسم لحك عليج لازم اروح باجر واتشكر منه ............ ، قاسم دخلت للبيت وكعدت اعدل بملابسي وبشعري حتى لا الوالد يشوفني ووينتبه يعرف بية متعارك وصلت يم الدرج اريد اصعد ووجاني صوت ابوي من ورة ابو قاسم.. واخيرا شرف الاستاذ جان ابوي لازملي الدرج وامي واكفة وراه .. هلا يابة .. هلا بيك دكتور قاسم هلا بيك يا رفعة راسي دنكت ادري بي هسة هو حاليا شعلة مال نار شي اكيد امي خبرته بموضوع الطوبة ابو قاسم .. بالله شو تعال انزل وفهمني شنو هذا الخريط الي امك حجتلي عنه قاسم نزلت وانا اسحب نفس للصبر... نفسي ابوي يفهمني. ولو مرة بحياته كلة يمشي وياي بالمكلوب .. اي يابة انا اريد جنت ملتحق بنادي مال كرة قدم والمدرب شاف مهارتي بالطوبة وكال راح ادخل اسمك ضمن قائمة اللاعبين الناشئين بالمنتخب واسافر وياهم للخارج بس يحتاجون حضورك وياخذون توقيع موافقتك والسماح الية اسافر وياهم لان اني عمري 16 ميصير اسافر الا موافقة ولي الامر ابو قاسم بغضب .. والله عال يعني عالاساس انا عندي العشرة واكعد اديحك وافرط بيك هي هاي تاليتك تلعب طوبة ما ينلام اخوي محمد بيوم يكلي ابنك فاشل وما راح يصير براسه خير لك شوف الناس وين وصلت وانا حظي يريد يسافر ويلعب طوبة شوف ولك الظاهر انا طلعت عينك بالدلال بس لهنا وكافي انسى شي اسمه نادي رياضة وطوبة فاهم ولو تموت ما اخليك تسافر وياهم ووانا ولي امرك واشوف منو ينطيهم الموافقة بالله قاسم بغضب ورفض وصياح رج اركان البيت .. والله العظيم اذا ما اسافر وياهم صدكني اسوي سواية اخليك تعض ايدك من الندم صعد قاسم والبيت انكلب جهنم من بعده الاب يصيح والام تهدي والخوات يتحسبن على اخوهم الي مشافوا منه بس اللوعة والوكاحة ........... مروة بصرخة فرح دخلت للبيت تدور على شيماء اجتي شيماء بخوف تشوف شبيها تصرخ وطلعوا هدى وضحى يشوفون اختهم ليش تصيح جانت لازمة بيدها ورقة رافعتها وتبجي .. بنات باروكولي الحكومة راح تدزني على حسابها اكمل دراستي بالخارج ركضوا البنات وحضنوا اختهم بين الفرح وبين الدموع كانت اول فرحة عاشوها البنات من بعد وفاة امهم شيماء.. حبيبتي مروة انتي سباعية بكدها وكدود هسة ماما تفرح بيج مروة ودموع الفرح غركت عيونها .. الله يرحمها لج شيماء مدا اصدك واخيرا اتحقق واحد من احلامي وان شاء الله احقق احلامي البقية شيماء.. على كدما جنت فرحانة لمروة تسافر لبعثتها بالخارج على كد ما جنت خايفة عليها راح تفترق عنا صرت اباوع عليها وعلى خواتي واني شايلة هم لباجر يتبع | ||||
|
| |
|
06-07-19, 09:57 PM
| #7 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #اساور_الفضة #الكاتبة_نهى البارت الخامس ..................... ان قطع الطريق ياخذ منا الوقت والوقت يأخذ من اعمرنا وها نحن نشق الطريق ; وتمضي السنين على عجل هدى.. يالله بنات باي فاطمة .. هدى مو تنسين متجين لعيد ميلادي .. لاتوصين حغيص ( حريص ) اجي لعيد ميلادج لو اعغف ازحف زحوف حلت المدارس والوكت ظهر تسمط سمط والبنات كل وحدة اهلها حاطيلها سايق الا اني زايدة عند اهلي ما عندي سايق اني وكم وحدة من صديقاتي كان بيتهم قريب عالمدرسة نمشي سوية بطريق المدرسة بس اني ابعد وحدة بيهم بحيث اوصل كل وحدة لبيتها واكمل طريقي اتعودت عالمشي حتى حذائي انسحك من كثرة المشي مجنت اشتكي واطلب من اهلي يحطولي سايق لان اعرف الحال ما يسمح بس مرات بأيام المطر والحر القوي او من تجيني الشهرية اتمنى يكون عندي خط يوصلني للبيت يالله اني اتعودت واتأقلمت عالوضع دامشي وية صديقاتي سرى وهديل سرى.. اكول هدى صدك عندج اخت دكتورة هدى.. اي مغوة (مروة) اختي دكتوغة ( دكتورة) وهسة حاليا دتداوم بالمستشفى ليش منو كلج سرى.. البارحة اختي شافتج وسألتني عليج وكلتلها على اسمج وهي اتفاجئت تكول هاي اختها قبل جانت وياي بالمدرسة بنفس الصف وجانت كلش متفوقة .. اي مغوة كلش متفوقة وسافغت (سافرت) بعثة دغاسية ( دراسية) للخارج وهناك اخذت شهادتها ورجعت قبل سنيتين من الخارج سرى.. شعجب انتي مطالعة عليها هشكل شاطرة هديل.. لا هدى شاطرة على الاقل اشطر مني .. يا اختي اني داحاول ابذل اقصى ما بوسعي حتى انجح عادي تغة (ترة) لكل قاعدة شواذ واني شواذ القاعدة مال اهلي وصلنا سرى يم بيتهم وانطتنا دولكة ماي وشربتها كلها من العطش اني اتعلمت على طول الطريق مسويتلي محطات استراحة وحدة يم بيت اهل سرى والثانية يم بيت هديل من بيت سرى اشرب من عندهم ماي وهديل حسب لو ماي لو لفة هديل.. هدى الله عليج اليوم ابقي اتغدي عدنا .. لا عيني حتى ما شيماء تملص اذاناتي ما بية حيل غزالة ( رزالة) يالله سلمينا على خالة وكليلها عاشت ايدج عالكبة مالت البارحة جانت كلش طيبة هديل.. لعد اوكفي انتظري شوية خلي اشوف ماما شمسوية اليوم غدا اجيبلج شوية تصبيرة .. لا حبيبتي خليها عالجايات سلمت عليها وكملت طريقي واني امشي شفت الحجي ابو عبدالله هذا رجال جبير بالمنطقة كلما يشوفني لازم يصيحني .. ها بوية هدى حليتي بالله شو تعالي .. هلا عمو شلونك .. بخير والحمدلله تعالي اليوم جمعت لج النبك بعلاكة حتى بعد مرة اللخ متشمرين حجار على شجرة النبك مالتنة ظليت اتلفت منا ومنا وحكيت خشمي مستحية شكد عيب .. احم اسفة عمو بعد ما اعيدها ضحك .. لا عادي اصلا اتعودت على اولاد المنطقة كلما يمرون منا لازم يشمرون حجار او يتسلقون السياج علمود يشلعون نبك بس انتي اكثر وحدة بيهم اشوفج من تمرين منا تشمرين حجاروتكعدين تلكطين النبك الواكع كلت هالمرة اختصر عليج واجمعه الج ابتسمت بخجل واخذت العلاكة .. تسلملي عمو ربي يخليك الي بس والله النبك مالتكم طيب واحب اكل منه .. بالعافية على كلبج .. تسلم عمو يالله اني رايحة ممحتاج شي .. لا سلامتج عمو الله وياج سلمت عليه وكملت طريقي فتحت العلاكة وكعدت الكط منها النبك الاحمر المستوي واكل لاكاني حنوش ابن جوارينا كاعد يم بابهم ياكل جبس وهو بس شافني وكام يصرخ هههههههه طلعت امه مدت راسها .. ها هدى الله عليج شنو سويتله هالمرة رفعت ايدية اثنينهم ببراءة .. والله خالة هالمغة ( هالمرة) الوحيدة مسويتله شي بس هو طبق المثل قتلني وبكى سبقني واشتكى .. خطية لج كام يخاف يطلع بالشارع من وراج يكلي ماما هدى الجنية تاكل جبسي وتعضني من خدودي .. شسوي ياعني منو كلج خلفي واحد دنفوشي هشكل جنت احجي وياها ودنكت ابوس بخدوده ام حنوش.. اي صدك هدى قبل لا انسى عفية خلي شيماء اليوم تمر علية حتى تضرب الحجية ابرة وتقيس ضغطها .. صاغ تددلين حياتي عفتهم ومشيت وقريب ما اوصل على بيتنا حسيت بروحي مزنوكة ومحتاجة اروح للحمام ما اعرف ليش هاي الحالة دائما تصير عندي كلما ارجع من مشوار واصير قريبة عالبيت احس بروحي مفولة واريد ادخل للحمام بسرعة وصلت يم البيت ودكيت عالباب مستعجلة واتتقل بوكفتي من رجل لرجل وجهي صاير احمر اوووف مزنوكة اريد حماااااااام سمعت صوت واحد يحم حم من وراي التفت يبوووووووووي .. غااائد !!!!! ابتسم .. شنو شبيج شصاير ليش هشكل تدكين على بابكم منو يركض وراج كمت امتمت .. هههه لا هيج هذا المخبل مشعل جان يركض وراي هههه سكتت ووجهي انكلب احمر خرب راح انفضح واسويها على روحي ولكم فتحو الباب يمعودين رجعت ادك حيل مرة ثانية انفتح الباب والتفتت على شيماء ودفعتها ودخلت للبيت كبل ركضت للحمام واني ادردم عليهم عفت شيماء تسلم على رائد طلعت من الحمام .. وين جنتوا سنة يالله تفتحون الباب شيماء.. مخبلة مو عاقلة كلما اكول عليج كبرتي تثبتيلي عكس صحة كلامي .. انتي شايفة طغيق (طريق) المدغسة (المدرسة) شطوله لو يكلولج عليه شيماء .. ميحتاج توصفيلي الطريق شايفته بس شبيج مصروعة حركتي الجو .. اي مو انزنكت كلش شلون يعني تغديني (ترديني) اسويها على غوحي بالشاغع(بالشارع) شكد عيب واليوم من دون الايام التقيت بغائد حتى مسلمت عليه عفته ودخلت للبيت .. دومج مخبلة ابد متكبرين .. اكول شومة عفية صبيلي غدة .. انتظري مو هسة خلي بابا ومروة يرجعون من الشغل يالله وروحي كعدي ست ضحى وياج .. اي صدك ست ضحاوي ليش غايبة اليوم .. والله ضحى راح تموتني ناقصة عمر ولا جنها سادس علمي هالسنة كاضيتها كله نوم وخدة دخلت ضحى عليهم تفرك بعيونها شيماء .. واخيرا شرفت العروسة ضحى رفعت ايدها للسما .. امين كون الله يسمع منج هيج واعرس وواتخلص من هذا البيت لان خنكتوني .. يعني اذا نطلب منج شوية تنتبهين لدراستج نكون خانكيج .. لا انتوا مو بس عالدراسة متشددين وياي انتوا حتى عالطلعة مسوين علية حصار حسرة علية اطلع او امشي مالي حق اروح لاي مكان غير المدرسة وهاي انتي ومروة تمشون وتطلعون و حتى هدى ماخذة راحتها بالطلعة الا اني مسوين علية حضر تجوال هدى.. عمة بعينج وين طالعة اني هسة اليسمعج يكول مكطعة الطلعات والونسة اشو حالي من حالج لايكون ذب الزبل والمسواك حاسبتهم علية طلعة والله ياغيت (ياريت ) تطلعين بمكاني يعني صاغ (صار) (عمري) عمغي ١٦سنة واني ما افتكيت من الزبل وشكلي غاح (راح) اعغس وبثوب العغس وتصحون علية وتكلولي تعالي ياهدى غوحي ذبي الزبل ضحى.. على الاقل تطلعين مو مثلي شيماء.. هدى كافي خليني احجي سمعيني زين ضحى ثقي بالله اذا ما اهتميتي بدراستج بابا ميتردد لحظة وحدة ويزوجج بدون تردد شدي حيلج بدراستج ووعد علية اني اطلعج وين متردين ضحى.. ميخالف اشد حيلي ووادرس جانت تحجي وتكلب بعيونها ممقتنعة اندك الباب واجتي مروة جانت شايلة بيدها المانتوا الابيض كان شكلها جدا عملي وغير متصنعة ما تهتم للاشياء الجمالية الي يستخدموها بنات جيلها مروة عندها هواي احلام بس الاهتمام بشكلها مو احد احلامها اول مدخلت للبيت راحت لشيماء طلعت من جنطتها فلوس .. هاج لزمي اليوم استلمت الراتب اخذي ضميهم عندج وحطيهم على الفلوس المجمعتهم شيماء جانت واكفة عالطباخ مسحت ايديها بالمنشفة ودارت عليها .. راح اضمهم وية الفلوس ذنيج .. بلكي الله يسفرونا ايفاد سمعت الدكتور رافد يكول كل مرة يسافرون بيها ايفاد ينطونهم فوائد منحة اذا طلع اسمي كبل اخذ فلوس المنحة واحطهم عالعندج وساعتها اكدر افتحلي عيادة ضحى بصوت ناصي .. عابتلها ولا مرة كالت خلي انطي لخواتي الصغار فلوس وافرحهم بيها اووف شكد بخيلة هي حتى على روحها متصرف دباوعي على ملابسها شلون قديمات اني لو منها وعندي هاي هلكد فلوس ما اخلي شي بنفسي اشتري احلى الملابس والاصباغ والاحذية والجنط هدى.. ضحى سكتي خطية هي دتجمع فلوسها علمود تفتحلها عيادة وتحقق حلم امي هي مو مثلج تفكغ (تفكر) بكشختها ضحى.. ياحلم هذا هي بخيلة قح مروة.. ضحى ترة سمعتج بس بمزاجي راح اعبر الموضوع لان مالي خلك اناقش وحدة متخلفة مثلج ضحى فتحت حلكها تريد تجاوب شيماء.. ضحى ولا كلمة فاهمة كبل على غرفتج .. سمعتيها شنو كالت علية .. اش ولا كلمة كافي انتي هم تجاوزتي عليها وكلتي عليها بخيلة ضربت على كصتها .. خرب يومكم نسيتوني اليوم خالة ام فرزدق عزمتنا على مولد ضحى .. الله واخيرا طلعة بس صدك شنو مناسبة المولولد .. علمود رجوع ابن عمو فرزدق الكبير صهيب من الخارج جان يدرس هناك ورجع صارله يومين هدى .. هلة ..هلة خلي اغوح اشوف شنو البس كامت هي وركضت ضحى وراها وصاروا يتسابقون منو التلحك تاخذ الملابس الحلوة بالاول ........ حضرنا الاكل وانتظرنا بابا يجي هدى.. شيما متت من الجوع يالله شوكت يجي بابا .. صبري مبقى شي ويوصل هو كل يوم بهيج وكت يجي لكن بابا كلش اتأخر علينا شيماء.. يالله بنات خلي نصب الغدة وناكل شكل الوالد اليوم ومطول الظاهر عنده شغل التهينا نساعد شيماء عالاكل وكعدنا ناكل وحدة تحجي وية الثانية . اتعودنا نتبادل الاخبار على الاكل ضحى .. اكول بنات انتبهتوا على مريم بأخر روحة النة لبيت عمو امجد شلون تباوع علينا من ورة خشمها عبالك شامة خيسة مو عبالك خواتها احنة شيماء.. لتحجين عليها هشكل ترة مريم بعدها صغيرة وكلة على بعضه عمرها ٧سنوات هدى.. لا صدك شيماء حتى اني انتبهت عليها من كمت وطلعت من الهول ورحت للمطبخ وفتحت الثلاجة اريد اشرب ماي اجتي وراي وكالت بعد لا تفتحين الثلاجة من تريدين شي كولي اني اجيبة الج ماما متقبل احد يلعب بغراض البيت اكلج شومة هي مو تعرف احنا خواتها ليش تعاملنا هشكل مروة.. يعني صدك تحجون راح تحطون عقلكم وية وحدة صغيرة متفتهم تلكينها زوجة عمو امجد حاشة راسها عوفها مو هسة تحكمون عليها بعدها صغيرة هدى اباوع على شيماء كل ساعة تصفن .. شومة حبيبتي شبيج اشو مدا تاكلين شيماء.. مالي نفس اليوم جابوا مجموعة شهداء ومصابين اثر مفخخة ومن ضمنهم ضابط خطية دخل غيبوبة خطية لحد هسة اهله ميدرون بأبنهم هدى.. ليش اهله وين .. اتوقع اهله من البصرة وهو هنا دوامه على ما اظن مروة.. اوف سكتي اتعلمت على هاي المناظر كل يوم اشوف هيج نماذج ضحى.. اعووع لعبت نفسي خلاص بعد ما اريد اصير دكتورة هدى.. لا والله على الاساس الشهادة منتظرتج وغة (ورة) الباب شحال لو ما بالشافعات تنجحين ضلو شيماء ومروة يضحكون على كلام هدى ضحى.. كرمينا بسكوتج الرتلة غاغا تعيب على هدى هدى.. اصلا لدغة الغاء عندي تجنن ومدغسة ( مدرسة ) اللغة الانكليزية كالت انتي اذا دغستي (درستي) اللغة الفغنسية ( الفرنسية) تطلعين الاول عالصف حبيبتي معناها اني ثقافتي فغنسية مو مثلج جنا كاعدين ودخل علينا بابا ووراه عمو امجد معصب ويغلط ويسب ويتوعد ما اعرف شبي كمنا من الاكل واشرت للبنات يلمون الصحون بسكوت شيماء.. بابا شبيك معصب .. كلشي ما بية بس هذا الزفت ابو قاسم طردني من الشغل الله ياخذه امجد.. كله من وراك انت سبب خراب باب رزقك .. امجد رحمة على والديك كافي والله البية مكفيني اريد اموت من القهر من ورة ابو قاسم شلون هاني اهانة كدام المنطقة والله ما راح انساها الة بسيطة امجد.. عمي والله حقه واي واحد بمكانه هم راح يسوي مثله هو عنده عائلة وحطك انت حارس حتى تحرس اهل بيته يجي يلكة الحارس سكران ولام شلة سرسرية ومكعدهم يم الباب .. انا ادري بي حظي الملطلط على الاساس هو وعائلته مسافرين شرجعه للبيت ثاني يوم حظي الفكر هدى الي افتهمتة من مشكلة بابا انه ابو قاسك راجع للبيت وشايف بابا وجماعته كاعدين يشربون بحديقة البيت وهذا الشي ما صرفله وطرد الوالد صدك انقهرت من سوايت بابا صار حتى ما يخجل يحجي كدامنا على سوايته السودة جان قبل يداري بأخطاءه ويستحي يحجيها كدامنا اما هسة اشو صاير كلش امجد.. لك اثير اني كم مرة اكدت عليك تعوف هاي الشلة والله ميجي من وراهم غير بس شلة الخال عوفهم يا اخي انت عندك بنات ترة والله شليت حالي وتعبتني وياك صرت حتى ما اتشرف بيك واكول عنك اخوي الله يساعد بناتك شلون بيهم متفكر باجر عكبة يجونهم خطابة من يسألون عنهم بالمنطقة بربك شنو راح يكون جواب اهل المنطقة عن سيرتك شراح يكولون عنك فرك وجهه بعدم اهتمام لكلام اخوه .. اهوووو والله ثبرتني ما عليك بية اطلع من حياتنا واني وبناتي نتجازة انتبهت على شيماء ومروة وضحى يباوعون وما حجوا اي شي اتعودنا على هذا المنظر اب كل يوم جاي بمشكلة شكل بس جنا نخاف من شي واحد ان مشاكله تعم علينا وتحطم حياة وحدة بينا عمو امجد مثل كل مرة تعب من كد ما ينصح بأخوه راح عمووبابا دخل للغرفة رحت وراه .. بابا اصب لك غدا .. لا ما اريد زقنبوت ورة العصر كعدنا نبدل ونعدل روحنا وجوت محتارة شلبس لان اني انعم وحدة بخواتي وكل ملابسهم الحلوة كبيرة علية محتاجة اشتريلي ملابس طلعة بس خطية شومة دتصرف كل راتبها عالبيت ويادوب يوصلها لراس الشهر سمعت صوت شيماء تعيط على ضحى رحت اشوفهم شبيهم شيماء .. لج ضحى هاي شمسوية بوجهج هسة تمسحين المكياج وتعالي كليلي هذا منينلج قلم الحمرة والكحل جانت تحجي وياها وتمسح بوجها ضحى بغيض.. شنو شيماء على كيفج وية وجهي دتأذيني ترة اني موصغيرة وتسوي بية هشكل شيماء .. لج ثولة اني الاكبر منج ما فكرت احط كحلة لو حمرة لهذا يومي ضحى.. والله تغارون مني لان احلاكم عاطت بشيماء .. وانتي كافي ترة اني مسويت جريمة وهشكل تحجين علية مو مشكلتي انتي معقدة وتحاولين تطلعين عقدج علية جمدت شيماء بمكانة مصدومة من كلام ضحى وياها مروة.. ضحى لج انتي شكد تافه عقلج متعلق بحمرة وكلحة ومكياج ضحى.. كافي انتي ما عليج والله راح تخبلوني ادري ماكوا غيري بهذا البيت تكومون عليه بس اني ضحى درسي ضحى لتنامين ضحى لتطلعين ضحى .. ضحى.. ضحى شطلعت هاي والله مو عيشة شوكت ربي يخلصني واطلع من هذا البيت وافتك منكم طلع بابا على صياح ضحى .. شكو شبيج تعوين بنص البيت شيماء بكول برود .. كلشي ماكو بابا بس جنا دنحضر نفسنا حتى نروح لبيت ام فرزدق التفتت علينا .. يالله بنات اتحركوا طلعنا باب مبدلات جنت مسوي شعي ذيل حصان عالي وضحى فاتحة شعرها واصل لخصرها وحاطة فيونكة على صفحة ولابسة فستان كلش مرتب وبسيط اما شيماء كانت لامة شعرها عادي ومروة كالت ما اني ما بية حيل اروح وياكم تعبانة طلعنا بالباب وصادف رائد جان واكف يم بابهم شافنا واجة يمنا وسلم علينا يبووووووي كلبي شبي كلبي من يشوفه يظل يكمز من مكانه باوعلي وابتسم خرب حظي شلون سنون عنده والله ابيض من حياتي غير يموت ابن اللذين رائد.. شلونكم بنات شنو شيماء وين رايحين خلوني اوصلكم شيماء.. تسلم رائد ما يحتاج هياتة رايحين لبيت خالة ام فرزدق اني حجيت.. لا شومة على بختج شلون نغوح واحنا هشكل عبالك طالعات مظاهرة بس يباوع ويضحك من كبرنا رائد انقبل كليته بتكريت ومن عندها بعد ما كمت اشوفه بين فترة وفترة اشوفه خفت بينا ايام اللقاء وصرنا بس نتبادل السلام غيرها بعد ماكو بس اني الي كلبي ميت عليه وكاتلة روحي اريد بس احصل منه ولو ابتسامة يا اخي شكد ثقيل صرت اني اتحين الفرص واعدل بنفسي وانتظره ورة الباب بس اسمع باب بيتهم ينفتح كبل افتح الباب مرات يطلع ابوه ومرات انصدم بأمه وبالايام الي اكون بيها مبهذلة وجني جنية اخوف الله يحطه كدامي وكون يشوفني اني وكوشتي بس ها من يشوفني يرتبك وميحجي اي شي وياي بس يظل يبتسم بوجهي هي وحدة من الثنين لو يشوفني بعينه قرد لو بقرة متقبل غلط اي لعد ليش بس يوزع ابتسامات ركبنا وياه بسيارته جانت كلش حديثة وحلوة صعدنا وعدل المرايا رفعت عيني واجتي بعينه يمة كلبي يريد يوكف صاير وكح ابن الاودام لا وشوية متطور يالله العافية بالتداريج البارحة ابتسامة واليوم نظرة وباجر الله يعلم شنو وصلنا للبيت وشفت رياجيل بالباب نصهم اعرفهم احفاد خالة ام فرزدق اغلبهم لاعبة وياهم واصلا نصهم ما اصيحلهم بأساميهم اصيحهم بألالقاب القديمة مثلا علي جنا نصيحه عيوي حسن حنش وغيرها من الالقاب الصينية نزلت وجنت متعودة اسلم عليهم كعدت اسلم عليهم وهمة وكذلك ردوا السلام والبنات دخلوا واني اتأخرت شوية بالسلام سمعت صوت رائد واكف وراي .. هدى خير سالمين شعندج واكفة توزعين ابتسامات جنج ولد بعد فد مرة روحي كعدي يم الرياجيل هدى.. لاعيب استحي شيكولون علية رائد بعصبية زمخ بيها .. اكلج تفوتين تدخلين جوة كدامي لا والله ابتلي بيج ظليت ارمش بعيوني ممصدكة اني اترزلت معقولة دخلت جوة واني فرحانة ماكلة رزالة معدلة خرب اموت عالغومانسية ( الرومانسية) ياي شلون حلو من يعصب فديت الحمش جريت حصرة ودخلت جوة وشفت ضحى ماعدة ومغنتبة الوجه ومبرطمة الشفايف زعلانة بعدها شكله مزاجها بعده متعكر اجتي خالة ام فرزدق وسلمت علينا وجانوا اغلب النسوان نعرفهم جوارينا وشفنا خالة ام قاسم واترددنا نروح نسلم لو لا شيماء حجت لخالة ام قرزدق عالصار بين ابوها وبيت ابو قاسم .. ها خالة شنو نروح نسلم عليها لو عيب زحمة والله فشلانة منها خاف تردني ام فرزدق.. لا حبيبة ام قاسم وردة مال الله ما عندها هيج نفسية بالله شو تعالوا كومو سلموا عليها كمنا اني وشيماء حتى نسلم التفتنا ما لكينا ضحى شافتنا خالة ام قاسم وكامت سلمت علينا وجنا مترددات بس هي اكلتنا بالسلام ولا عبالك ابونا اثير بدة المولد ووزعوا اكل واجتي ضحى ووجها احمر وحاصرتها البجية هدى .. ضحى وين جنتي وشبي وجهج احمر ضحى بصوت يرجف .. سكتي بعدين احجيلج والله مستحية عفية شوكت نرجع للبيت .. بعدين نرجع خلي يصبون العشا يالله نطلع ضحى.. هسة مو الا نتعشا خلي نرجع للبيت هدى.. خب دتطيغي (دتطيري) ما اطلع منا الا اكل واشبع العزيزة وتأشر على معدتها اتونسنا بالمولولد واتبادلنا الاخبار وية جاراتنا وصادف ام رائد جارتنا موجودة وام حنوش وسمعت ام رائد بالصدفة تريد تخطب لرائد ظليت احوم احس بروحي اختنكت ما اعرف شبية عبالك شاعلين النار بطرف ثوبي هشكل صرت الوب من القهر اريد احجي اريد اتعارك وية منو اتعارك اصلا هم ما اعرف وسمعت خالة ام قاسم تحجي وية خالة ام فرزدق وتكللها والله هذا قاسم شلع كلبي ما اعرف الله شوكت يهديه من يوم الي ابوه رفض يدخل منتخب الناشئين وقاسم احتار شلون يجيب المصايب على راس ابوه يوم يتعارك هو وابوه لان سمع بيه يشرب جكاير ويوم مرافقله شلة تعبانة وذاك اليوم خية بيتي وبينج الحجي رحع للبيت شارب مفول وهسة ابوه يريد يتخبل ما بعرف شيسوي ام فرزدق.. خالة كولي يا الله لا تلحون عالولد بعده عوده ما يبس مو حمل ضغط ترة كثر الدك يفك اللحيم شيماء.. هييي هدى وين صافنة احجي وياج يالله اتحركي نريد نرجع للبيت وبيومها رجعنا للبيت وكعدت وية ضحى سين وجيم ..اليوم ما اخليج تنامين الا تحجيلي شبيج اليوم بييت ام فرزدق اجيتيني وجهج احمر وخايفة ضحى سرحت بنظرها وهي متمددة على فراشها وتلعب بشعرها .. سكتي اني مو طلعت من البيت معصبة فما شفت وجهي ولا رتبته بالمرايا فكمت وسألت وحدة من البنات على مراية اعدل روحي بيها اشرتلي بنتهم على وحدة من الغرف وكالت فوتي هنا بهاي الغرفة بيها مرايا رحت دخلت ولكيت اكلينكس والتهيت امسح بشفايفي وادردم على شيماء واعيب على جهرتي ........ .. يعني هشكل احسن جني عجوز لا حمرة ولا كلحة عابتلها سمعت من وراي صوت واحد يحم حم التفتت مصدومة عزة هذا منو شفته يضحك الظاهر سمعني من جنت احجي وادردم .. والله تخبلين ميحتاج تحطين لاحمرة ولا كلحة لج شنو انتي صارلج ساعة تفركين بالشفة كطعتيها تكطع جان يحجي ويباوع على شفايفي بس اني شنو غير غديت ماي من الارتباك سألني .. منو انتي اني مشايفج جاوبته اوني اريد اطلع من الغرفة بس هو ساد عليك الطريق وواكف كدام الباب .. اني بنت ام شيماء عقد حواجبه .. منو بيهم .. الثالثة .. سبحان الصورج .. عفية وخر عن الباب اريد اطلع لا اختي شيماء تصيحني ومتلكاني .. فديت ربج شلون صوت لج لتخافين ما اسويلج شي انا صهيب ابن فرزدق رفعت راسي وحطيت ايدي على حلكي اني سامعة بصهيب من خالة ام فرزدق جانت دائما تحجي بي بس مشايفته لان اني الوحيدة من خواتي مايخلىني اطلع وهو جان مسافر بس قربان لكلبه شلون شايل وسامة اويلي يابة غير يموت سمعنا صوت عمو فرزدق يصيح على صهيب طلع صهيب من الغرفة واني طلعت وراه وصار هو وابوه كدامي والتفت علية صهيب وهو مبتسم كله .. يابة عرفت هاي الحلوة منو ابو فرزدق.. لا والله ما عرفتها بس ما اعرف وين شايفهة عركت من الخجل احس صرت طماطة كله .. هاي بنت خالة ام شيماء شفت ابوه فتح حلكه متعجب .. يالله شكد تشبهين امج الله يرحمها حجاها وجر حسرة وعيونه بيها الف كلمة وكلمة هدى.. عااااا لج عوبة والله شكلج وكعتي بالحب ضحى.. لج ثولة انتي شعرفج بالحب ها احجي هدى.. احم احم ما اعرف عنه اي شي بس من خلال كلامج مبين انتي انعجبتي بي ضحى.. اششش سكتي وخليني احلم دارت وجها عني وحطت المخدة على راسها عوبة مو صوجج صوجي اني كاعدة اسمعلج يوم ثاني الصبح جان جمعة وكلنا بالبيت بس مروة طالعة وية صديقتها وشيماء دتطبخ شوربة وتحضرها تريد تاخذها وياها للمستشفى شوية ودخلت مروة وبعيونها فرحة .. شومة تعالي بسرعة .. شنو مروة .. بسرعة طلعيلي الفلوس العندج راح ادخل اني وصديقتي زينة شراكة نشتري عيادة واثنينا بيها حضنتها شيماء بفرحة هدى.. الف مبروك مروة ضحى.. مبروك بس انتي مو كلتي راح تشترين عيادة خاصة بيج مروة.. اي بس فلوسي متجيب بس اذا دخلت شراكة اكدر اوفر جنا نحجي وية مروة وشيماء دخلت للغرفة حتى تجيب الفلوس بس سمعنة صرختها ركضنا وشفنا شيماء فاتحة الكنتور وواكفة كدام الكنتور شيماء.. مروة لحكي الفلوس اختفت يتبع قرائة ممتعة لتنسون التصويت احبكم كومة احبكم هواي | ||||
|
| |
|
06-07-19, 10:02 PM
| #8 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #أساور_الفضة #البارت_السادس حيرة .. الم.. وندم .. ومن ثم الفراق هدى جنا نحجي وية مروة.. وشيماء دخلت للغرفة حتى تجيب الفلوس بس سمعنا صرختها ركضنا وشفنا شيماء فاتحة الكنتور وواكفة كدامه بعد مانثرت كولشي بي على الكاع شيماء.. مروة لحكي الفلوس اختفت مروة.. مستحيل انت شدتحجين لج شيماء وين راحت فلوسي راحت للكنتور مثل المخبلة وصارت تشمر بالملابس وتعيط .. لا .. لا .. لا مستحيل وين فلوسي طلعيهم اتذكري وين ضميتيهم احجي شيماء كولي انتبهت على شيماء كامت تبجي شكلها تعرف منو ورة اختفاء الفلوس انقهرت على مروة هذا تعب عمرها كضت كل حياتها تلم فلس على فلس وحرمت نفسها من كلشي علمود تحقق حلمها يالله شلون بيها شراح تسوي احتمال تنهار وربي خفت عليها مروة بقهر وغضب .. شيماء انتي شكد غبية اكو وحدة تضم الفلوس هنا ادري شكالتلج روحج وتحطيهم بهيج مكان تافه لج حتى الطفل يكدر يلكاه وياخذه هدى.. مروة لتصيحين على شيماء فوك ما جمعتهم الج وضمتهم مروة.. وشنو استفاديت اني هسة منو يكلي وين راحت فلوسي ضحى .. حرامات كل ذاك تقتيرج .. شكد حرصتي عليهم ادري بضحى حجتها بدون قصد بس مروة كانت بقمة الغضب من سمعتها حجت هشكل هدت عليها وضربتها راشدي على وجها وسحبتها من شعرها بقيت جامدة بمكاني متفاجئة من حركة مروة مروة.. احجي حيوانه ماكو غيرج اخذهم لان انتي جنتي دائما عينج عليهم ودائما تتمنين يكون عندج فلوس حتى تصرفيهم على سوالفج التعبانة اجتي شيماء ووخرتها عن ضحى .. مروة لهنا وحدج ما اسمحلج تتهمين ضحى شكلج نسيتي احنا تربية منو خلي اذكرج اذا ناسية ترة احنا بنات بثينة وتربية امنا ما ندنسها لو على كص ركبتنا ضحى كامت تبجي ولازمة خدها مروة كعدت منهارة بالكاع وحطت ايدها على وجهه وصارت تبجي مثل الطفل .. ولكم اني اتدمرت وحلم عمري انسرق والله اموت اذا ما تحقق حلم عمري عشت طول حياتي حارمة نفسي من كلشي اشوف البنات يطلعون ويلبسوو ويتونسون الا اني اكول ميخالف مروة صبري كل هذا لاحكة عليه اهم شي حطي الاساس وحققي الحلم وتالي شنو بهفوة من اختي المصون نزلتني لسابع ارض ورجعت تبجي منهارة دخل بابا يباوع علينا وجان مبين علينا متعاركات اثير.. خير شصاير شبيكم وجوهكم مكلبة هدى.. بابا فلوس مغوة جانت بكنتوغ شيماء مجمعتهم هسة اجتي تاخذهم وما لكتهم مختفين اثير.. وهسة انتوا مسوين هاي الهوسة كلها علمود الفلوس هدى .. اي بابا هنة فلوس هواي مو شوية وخطية مغوة تغيد تدخل شغاكة وية صديقتها حتى يشتعون عيادة سوية ويجهزونها اثير.. وشنو يعني كضت طول عمرها مروة تبجي بوجه الله ما محصلين منها اي شي وعلى العموم ترة الفلوس الي تحجون عنها اني احتاجيتهم واخذتهم مروة كامت بغضب احس بيها انجنت عبالك تريد تاكل بابا بسنونها مروة.. قصدك سرقتهم مو اخذتهم اكو هواي فرق بين السرقة والاخذ السرقة تمد ايدك على فلوس مو الك ومتعبان بيهم ومن دون مايسمحلك صاحبها والاخذ تكدر تاخذ فلوسك بأي لحظة وكدام الكل ما حسينا الا على بابا هد على مروة وراح نازل عليها دك ردنا اني وشيماء وضحى نفك مروة من جوة ايده ما كدرنا جنزها تجنز صرت اعيط من الخوف اختي راح تفطس جوة ايده جان كلما يضرب مروة هي تعيط وتصيح بصوت عالي مقهورة .. انت اكبر حرررااااامي ومجرم اريد الله ياخذ حوبتي منك يا ظالم اجيت اتخبل جان يضربها بوحشية وخلة الدم ينزل من خشمها انمرد كلبي عليها شيماء.. بابا ابوس ايدك كافي دمرتها كااااافي لخاطر الله كافي .. بنت الفكر تكول علية حرامي وبواك لج والله حلكج اشكه و ادفنج وما يرفلي جفن مو شفتي روحج كبرتي وصرتي دكتورة تتجاوزين اي الفلوس الي بكنتور شيماء اني اخذتهم وادري بيهم فلوسج كضيت كل عمري اصرف عليج وانتي تقبضين بالرواتب وتضمين اسألج وين متجاوبين لو تغلسين علية خليتج براحتج تلعبين بس مو انا الي وحدة مثلج بكد القندرة تضحك علية وتتهرب مني وهذا انا اخذت تعب عمري منج يالله امشي ولي مروة جاوبته بس كوة تحجي .. كون متتهنى بيهم كون زقوم بكلبك جانت تحجي وتشهك بحركة كلب رجع هد عليها .. لج انتي ما راح تسكتين الا من اموتج كاعده تدعين علية يمة شفته شلون شالهة وضربها بالكاع وهي مثل الخركة بيده متشيل لا ايد ولا رجل شمرها بالكاع وانضرب راسها بحافة الدرج والدم غرك الكاع صرت اصرخ مفزوعة من المنظر مروة امددة بالكاع غركانة بالدم وما يصدر منها اي نفس شيماء ظلت تلطم على وجهها مثل المخبلة .. يمة اختي ..يمة اختي ماتت ضحى طلعت تركض بالشارع تصرخ منعرف شصار بينا بذيج اللحظة بس حسيت مثل الي داخل بدوامة التموا علينا الناس وصار بيتنا هوسة ناس طابة وناس طالعة دخلت علينا خالة ام فرزدق تولول وام رائد ورائد وصهيب اتعاونوا وشالوا مروة لحظات واجتي الشرطة واخذوا بابا منعرف ليش وعمو امجد وبيبي اجوي ورانا للمستشفى هذا كلة يصير كدام عيني مثل شريط الفديوا عبالك اني متفرج بس اباوع بعيوني مصدومة جامدة ما احرك ساكن يمشوني ويكعدوني عبالك جثة بلا روح ما اتجرء احجي كلمة اخاف انهار ما اكدر انطق بحرف واكول مروة وين شيماء تركض منا وتجي منا مثل المخبلة الدم ملطخ ملابسها اتمنيت اروح انام واحط راسي جوة الغطى واروح احلم انام بحضن امي ونرجع بنات صغار وامنا يمنا وكلشي امن بحياتنا ونرجع نتجمع احنا الاربعة مثل قبل تحت جناح امي حسيت على حركة يمي وواحد يهز بية حسيت بشفايفي كامت ترجف وسنوني اصطكت واتبعها جسمي صار كله يرجف سمعت صوت اجاني من بعيد اي هذا صوت رائد يطلب مني اتماسك زين ليش اصلا ابقى متماسكة وعلى شنو اتماسك والمن اذا علمود حياتي فا اني متنازلة عنها حياة وبيها هيج دمار ما اريدها متنازلة عنها ما اريد اكمل بيها غمضت عيوني ورحبت بالرجفة الي هزت جسمي كله ووصلت لحد عضامي حسيت بيدين اثنين قويات لزمتني من كتفي وصارت تهزني سمعت رائد يصيح بصوت عالي .. شيماء لحكي هاي هدى ما اعرف شبيها شيماء.. دخيلك ربي اختي شبيها سودة بوجهي خواتي اتفرهدن وراح يروحن من بين ايدية صاحوا الدكتور وكال .. بسرعة نقلوها المريضة اتعرضت لانهيار عصبي ضروري انطيها ابر مهدئة شكلها متعرضة لصدمة بعدها ما حسيت على اي شي ......... حسيت على ايد دافية تمسح على راسي وتقرة عليها فتحت عيني شفت ضحى كاعدة يم السرير وحاط راحة ايدها على كصتي .. ها شلون صرتي حجيت بوهن .. ضحى كليلي مغوة عايشة كوة طلع مني الكلام ضحى .. الحمدلله مروة بخير وطلعت من مرحلة الخطر عندها كسر بواحد من ظلوعها وراسها مشكوك خيطوه الها والدكاترة كالوا خلال اربعة وعشرين ساعة اذا ما استردت الوعي احتمال تدخل بغيبوبة واحنا هسة منتظرين مرت عليها ست ساعات هدى.. حيل اني جنت نايمة هذا الوقت كله ضحى .. اي الدكتور انطاج ابر مهدئة .. سودة علية مغوة متستاهل دخل رائد للغرفة وبيده اكل .. ها الحمدلله على سلامتج خوفتينا شبيج جبانة .. الله يسلمك مد العلاكة لضحى.. هاج لزمي اخذي العشا اكلوا شوية وضروري تخلين هدى تاكل لان وراها علاج تاخذه هدى.. لا ما اشتهي اكل اقترب مني رائد وحجة بصوت كله حنية قشعر جسمي جنت شكد محتاجة واحد يعاملني بحنية ويهتم بية خاف جنت بس احب رائد هسة صرت اموت عليه من لمست اهتمامه وخوفه علية رائد.. لا تخليني اجي اوكلج بيدي بالقوة ضحى.. ما عليك بيها هاي تتدلع اني اوكلها يالله كومي اكلي ساعدتني حتى اكعد واخذت اللفة وصرت اكل بدون نفس بس لخاطر رائد اكلت وحتى يطلعوني منا اريد اعرف خواتي شنو صفة بيهم الدهر كملت اكلي واخذت العلاج واجتي الممرضة وجيكت ضغطي الممرضة.. ضغطج تمام منو بيكم اخت شيماء ضحى.. اثنينا خوات شيماء الممرضة .. يا هلا وميت هلا بيكم طبعا شيماء جانت دائما تسولف بيكم جنت اتمنى اشوفكم اشرت على ضحى .. انتي اكيد ضحى ابتسمتلها ضحى.. نعم اني ضحى والتفتت علية.. وانتي اكيد الجنية هدى .. نعم اني الجنية عرفتكم من خلال وصف شيماء الكم اني صديقتها اسمي رباب .. اهلا وسهلا اتشرفنا بيج افتهمت منها ان احنا هسة حاليا بنفس المستشفى الي تشتغل بيها شيماء ممرضة يا الله اشكد صعبة علي شيماء صار الكل يعرف بموضوع بابا ومروة بعد مرور اربعة ايام مروة استردت الوعي وكدرت تحجي الي صار للشرطة وقدمة بلاغ ضد بابا واتهمته بالتهجم والتعدي وسرقة فلوسها والشرطة طلبوا شهادتنا وفعلا رحنا وكعدوا يحققون ويانة لكن قبل لا نروح عمو امجد وبيبي كانوا موجودين وكعدوا ويانا حذرونا اني وخواتي ان ما نشهد ضد بابا ونكول بالتحقيق ان مروة وكعت من الدرج وماكو شي اسمه فلوس مختفية شيماء اعترضت بوقتها وكالت .. حرام عليكم شلون تردونا نشهد زور وهو صدك اجرم بيها ووصلها للموت وسرق فلوسها ام اثير.. شوفي ولج اذا ابوج دخل للسجن قسماً بذات الله اشمركم بالشارع واقدم بيجن تبرءة بالعشيرة واكول هذني البنات الي اتبلوا على ابوهم وسجنوه مو عبالكم من يدخل ابني للسجن اني ابقى اباوع عليكم لا والله ما اتردد لحظة وحدة كبل اطردكم من البيت الي انتوا كاعدين بي وشوفوا بالله منو الي يلفيكم وخلي الناس والكلاب السايبة تنهش بلحمكم امجد.. يمة عليمن هالحجي الزايد هذني خليهن علية حلهن يمي التفت علينا وطلع مسدسه ورفعه كدامنا وحجة بتوعد قسما بذات الله شايفات هذا جان يقصد عالمسدس .. خلي اسمع وحدة بيجن شاهدة ضد ابوها والله العظيم كبل احط طلقة براسها واذبها بالبلوعة وخلي وحدة بيجن تطلعلي وتطالب بدمها كبل تلحكها وهنا صرنا امام خيارين اما ان نشهد ضد بابا او نخذل مروة وكفنا امام الموضوع بعجز ضحى بقهر .. والله حرام عليكم انتوا شنو من بشر هسة صرتوا عائلة وحدة وكلب واحد وكلبتوا علينا التفتت على بيبي وكملت .. تردين تطلعين ابنج من السجن على حساب اختنا حقج انتي مشفتي هو شسوة بمروة بيبي ترة بابا حرام يطلع من السجن هو اجرم بمروة وصلها للموت ما حسينا الا على عمو امجد هد على ضحى ضربها راشدي انطبع على خدها مثل الختم وزمخ بيها .. اشش ولا كلمة ادبسز اشك حلكج اذا بعد عدتيها وعليتي صوتج على امي اي شنو حضرتج ترديني اتفرج عليكم شلون تدخلون اخوي للسجن واكعد واسكت هذا عشم ابليس بالجنة لا عبالكم ما اعرف انتوا متفقات على اخوي حتى تاخذون راحتكم باللعب والسفر مثل الست مروة والدياحة وتصيرون مالكم رداد دفع ضحى على شيماء .. اذا تحبين خواتج كليلهم يسمعون كلامي ويطبقونه بالحرف الواحد حتى ما اهدر دمهن وهنا وكفنا عاجزات عن الكلام منعرف شنكول ومن بعدها اتحولت حيرتنا من بعد التهديد الى خوف وانسحب من عدنا الخيار وجبرونا بالتهديد ان نكذب ونشهد زور ضد اختنا اخذنا عمو للمركز ودخلونا على الضابط المسؤل عن التحقيقات والي افتهمنا من عمي امجد منطي فلوس حتى يسد القضية وشفنا مروة كاعدة على كرسي متحرك وايدها مجبسة وراسها مضمد كله شاش ابيض وايدها معلكة على رقبتها بحامل يد وجهه متروس كدمات لونهم ازرق على بنفسجي جان منظرها يكسر الكلب هي اليوم طلعوها من المستشفى وطول هاي الايام جانت شيماء يمها وتخدمها وتساعدها بكلشي واني وضحى رجعنا للبيت ومحد قبل نوصل للمستشفى خصوصاً من بعد ما مروة قدمت البلاغ والشخص الوحيد الي بقى متواصل وياها هي شيماء وجنا نتطمن عليها من خلال شيماء يمكن لوما شيماء ممرضة بنفس المستشفى الي بيها مروة جان هم ما خلوها تروح تشوف مروة .... الضابط .. اتفضلوا كعدوا استريحوا كعدنا مقابيل مروة جانت بعيونها نظرة كلها ثقة ومسيطرة بس شافتنة ابتسمت بأمل وكالت.. سيدي تكدر تتفضل وتسأل خواتي عن الي صار وهمة راح يحجولك كلشي غمضت عيوني بقهر كانت اصعب لحظة بحياتي مريت بيها وعمري ما راح انساها ولا راح تروح من بالي نظرات اختي مروة النا حرت شكللها خية مروة خواتج هددوهم بالقتل وجبروهم يطعنوج بظهرج واحنا اذا كلنا الصحيح او لا القضية راح تتلفلف لان الضابط مرتشي صرنا وحدة تباوع للثانية شيماء عيونها تحجي ضحى كان خدها الاحمر شاهد وخير دليل وانذار يذكرنا بمصيرنا الضابط.. منو بيكم شيماء شيماء بتردد .. نعم اني شيماء وكعد الضابط يحقق وية شيماء واخذ اقوالها لكن من وصل للشهادة بموضوع بابا شيماء نكرت وكالت احنا منعرف دخلنا البيت لكيناها واكعة من الدرج هنا سمعنا صرخة مروة المفجوعة مروة بعدم تصديق.. لج شيماء شتدتحجين الضابط .. رجاءاً دكتورة التزمي الهدوء بلا كلام خليني اكمل التحقيق مروة المغدورة.. شيماء ليش كذبتي شنطوج وسكتوج احجي لج اني اختج نسيتي امي شلون امنتج علينا شلون تفرطين ب الامانة جانت شيماء واكفة بلا حول ولا قوة بس تبجي بحركة كلب جانت متأكدة ان عمو امجد منتظرنا برة وما راح يتردد لحظة وحدة بتنفيذ تهديده وبعدها التفتت مروة لضحى بامل ان ما تخذلها هي الثانية مروة.. عفية ضحى احجيلهم ماعليج بكلام شيماء كليلهم شسوة بية بابا ومنو سرق فلوسي ضحى رفعت ايدها ولمست خدها تتحسس عليه وكأنما تتذكر الوعيد دنكت راسها وكالت مثل شيماء .. بابا مضرب مروة هي وكعت من الدرج واحنا منعرف شنو الفلوس الي تكول عليها صرخت مروة بجزع .. حسبي الله عليكم ونعم الوكيل من وصلني السرة صرت كلي ارجف حسيت بالرجفة رجعتلي ما كدرت اشوف الالم بعيون مروة واسكت صعبة ياناس هاي اختي حجيت واني ابجي منهارة وارجف وصار جسمي كله ينتفض بصورة غريبة .. سيدي مروة ما وكعت .. بابا ..كانت الكلمات تطلع متقطعه قاطعني صوت شيماء المفزوع .. سيدي رجاءاً غير مسموح بأخذ اقوال اختي الصغيرة هدى لان هي غير مسؤولة عن كلامها حالياً اختي عندها انهيار عصبي وضروري تاخذ ابرة المهدئ فعلا كنت بوقتها كلي ارجف وانتفض واسناني اصطكت احس بروحي اتشنجت اريد بس اكمل كلامي واوصل صوتي ما كدرت حضنتي شيماء ووكفتني الضابط .. خلاص ميحتاج راح اكتفي بس بأخذ اقوالج واقوال اختج الثانية ضحى مروة انهارت من القهر وصارت تحجي مثل الفاقدة .. شيماء انتي اكبر غبية شفتها بحياتي وبغبائج ضيعتيني وذبحتي حلمي مثلما ضيعتي احلامج قبلها اني شجاني وامنت حلمي بيد وحدة بايعة احلامها وماكدرت تحتويهم وضيعتهم من زمان ودفنت روحها بالحياة باوعت علينا كلنا .. انتوا اليوم ذبحتوا مروة قتلتوها بيدكم انسوا من هاي اللحظة بعد عندكم اخت اسمها مروة انتو اشتريتو ابوكم العار بفلوسي وبعتوني واني من هاي اللحظه بعتكم بس اني بعتكم بغالي مو برخيص بعتكم بتعب ايام وسنين واشتريت نفسي منكم بعد مااريد اعرفكم ولااشوفكم ولتحاولون بيوم تتصلون بية لان ميشرفني اعرفكم جان موقف كلش صعب ما تتمناها لعدوك ومن يومها مروة بعد ما شفناها صدك طلعت من حياتنا وبابا طلع من السجن وجهه ما يتفسر وشيماء وضحى واني كمنا منحجي وياه على كد تلبية طلباته كمنا بعد ما نسأله وين طالع او ليش رجعت متأخر صار مثل الخطار يطب ويطلع للبيت بدون مواعيد واحياناً تجيه ايام يطول يومين ما يرجع للبيت اتعلمنا على اهماله وعدم وجوده بحياتنا لكن الشي الي ما متعودة عليه هو ابتعاد خواتي عني كل وحدة بينا ابتعدت عن الثانية وكأنما يعاقبون نفسهم عالصار بمروة خصوصاً شيماء كلش اتغيرت وزاد برودها احس بيها صارت بعيدة عنا واتقوقعت على نفسها وضحى زاد هدوئها وزاد اهمالها لدراستها وصارت روحها هناك معلكة عند بيت خالة ام فرزدق كل يوم تروح الهم وظليت اني الوحيدة اتخبط بجدران الوحدة خايفة احس بروحي عايشة لوحدي بهاي الدنيا لجئت بهاي الفترة لصديقتي فاطمة بنية كلش حبابة الله خلاهة بطريقي مثل الرحمة جان كلشي يصير وياي احجي لفاطمة وهي بالمقابل جانت تصبر علية وكمت كل يوم اروح وياها لبيتهم ندرس سوية جنت من ادخل لبيتهم واشوف عائلتها جانت امها حبابة وتستقبلنا بحنان عندها اخوان ثنين واحد متزوج وعازل عنهم والثاني خاطب ويداوم بالكلية وابوها رجل كلش مثقف استاذ جامعي مرات هو يدرسنا من اشوف علاقتهم الحلوة مع بعض واشوف مدى الاحترام المتبادل بين فاطمة واخوانها وابوها وامها احس تخنكني العبرة ربي يديم لمتهم ويحفظهم من كل سوء اتمنيت بيني وبين نفسي ان يكون الي مكان بينهم واصير وحدة من عائلتهم امها جانت تعرف بقصتي اني وخواتي وتدري بية دا امر بمرحلة صعبة ونفسيتي زفت ومحد يسأل عني ولا احد يعرف الله وين خالقني يعني وصلت بيهم المواصيل حتى من اتأخر عند بيت فاطمة محد يدري بية ميحسون على غيابي وتأخيري وشيماء صارت تاخذ خفارات بالمستشفى احس بيها تتهرب من البيت متريد تواجه حياتها واني جنت متعودة انام بحضن شيماء صرت كل يوم بالليل من انام احلم بكوابيس حتى كمت اخاف انام فاطمة حجت لأمها عن الكوابيس وخوفي من النوم ام فاطمة ابتسمت حتى تطمني وسألتني .. ماما هدى انتي تصلين ؟؟ سؤالها كلش غريب علية اي اني ما اتذكر ولا مرة صليت ولا بيوم وحدة من خواتي صاحتني للصلاة او حتى كلفوا نفسهم يعلموني اصلا همة نفسهم ميصلون جاوبتها بخجل .. لا خالة اني ما اصلي ام فاطمة.. شوفي خالة الصلاة علاج الروح والمهديء للاعصاب والاطمنان للنفس يعني جربي تبدين بالصلاة كل يوم وشوفي نفسج شلون راح ترتاحين وشوفي حتى الكوابيس الي تجيج كل يوم قبل النوم راح تختفي نهائياً سألتها بتردد.. خالة اني ما اعرف اصلي يعني عندي كم معلومة عن الصلاة علمتنا عليها ام الاسلامية بالابتدائية بس ما اتذكغ بالضبط شلون ام فاطمة .. كومي حبيبتي خلي بالاول اعلمج الوضوء وبعدها اعلمج الصلاة وفعلا بيومها كعدت ام فاطمة تعلمني الصلاة وصدك من صليت حسيت بصدري انشرح واكو شي ثكيل جان على كلبي وانزاح ام فاطمة.. خلي اعلمج على شغلة لا تتركين صلاتج لو مهما صار لان اوقات الصلاة هي اللحظات الي تلتقين بيها مع رب العباد اتخيلي هاي اللحظات شكد ثمينة تتقربين بيها من الله وهاي يسموها علاقة العبد بربه تكون النفس راضية مرضية ..يعني التزامج بالصلاة معناها انتي متمسكة بالله ومن عهدها صرت كل يوم اصلي وما افوت فرض جنت من اشوف بابا يرجع للبيت سكران حيل اتضايق ومن يطلع يوم ثاني كبل اغسل البيت كله للطهارة من الطول للطول وحتى خواتي انتبهوا علية ولاحظوا التغيير فاطمة.. اكول هدى سؤال انتي شعجب متلبسين حجاب هدى.. ما اعغف بعدني ما مقتنعة البس الحجاب احس غوحي ممستعدة فاطمة.. بس عيب متلبسين حجاب ام فاطمة جاوبتها .. ما بيها عيب وانما لبس الحجاب يكون التزام المراءة مع ذاتها لكن اهم شي من تريد تلبس الحجاب تكون عن قناعة حتى تحافظ عليه لان لا اكراه بالدين وهي شوكت متشوف نفسها مستعدة تلبسه راح تلبسه وخلي ببالج ترة الحجاب مو حكم على شخصية المرة يعني اني اعرف هواي محجبات ما ملتزمات لا بصلاتهم ولا يعرفون الحلال والحرام عندهم الحجاب هيج شكل امام المجتمع فلتحكمين عالكتاب من عنوانه اتعودت على ام فاطمة و كلما اشوفها ارتاح نفسياً واحس بالامان والحنان اهتمامها بية يسعدني ويحسسني بالقرب منهم صرت حتى اكره ارجع لبيتنا دنمر بفترة امتحانات اخير السنة وجنا راجعين من المدرسة ودنمشي بالطريق اني وضحى وست ضحى خلصت السنة يوم تداوم وعشرة غايبة ما اعرف شلون راح تنجح مرت من يمنا سيارة رائد جان وياه بنات خاله واخته ليلى باوع علينا وما سلم صدك انقهرت من تصرفه هذا شبي حتى مكلف روحه يسلم علية ولا كام يسأل عني مثل قبل من يوم موقف مروة لليوم ماشفته دنكت مقهورة ياربي هسة اني شبية حاركة كلبي على شخص اني اخر اهتماماته هو اصلا ما وعدني بشي ولا لمحلي بالحب اني من يمي كعدت اخمن واتخيل اشياء ما موجودة دنكت وكملت طريقي وضحى تمشي سرحانة بغير عالم عدت من يمنا سيارة حديثة عالية نوع برادو بطئت من سيرها التفتت اشوفه منو اتعودنا على هاي الحركات مال الزحف والتحرش اني عني ما اهتم بس جنت اخاف على ضحى لان كلش حلوة وتلفت الانتباه واخاف يأذونها خصوصاً احنا دنمر بفترة خطف وقتل صاير عدنا بفلس وكم مرة نسمع ببنية بمدرستنا انخطفت او انقتلت وهذا الشي شكل نوع ثاني من الخوف عندي شفت رجال يجي عمره بالثلاثين مملوح نزل الجامة وكص ضحى من فوك ليجوة بعيونه اكلها اكل بنظراته وضحى دتمشي وبالها مو يمه اصلا شايلة جنطتها وعيونها تباوع ليكدام ضحى صحيح اكثر وحدة بينا عاطفية تتأثر بسرعة بالكلام المعسول وتحب تتأنق وتلبس وتكشخ وتهتم بروحها وعندها ولع بالمسلسلات ودائما تكول شوكت نعيش ونضوك طعم الحب الي يسمعها يكول عليها هاي مو راحة البنية لكن هي بالمقابل متحب سوالف العلاقات والكبل مثل بقية صديقاتها وسوالفهن الي تسد النفس جنا اني وخواتي نشترك بخصلة وحدة وهي احنا تربية بثينة مستحيل ندنس اسم امي التفتت على الرجال وخزرته لان كام يذب كلام هدى.. خيغ سالمين شيل عيونك لا اجي اعميهم الك بالحذاء جنت ااشر على حذائي المكطع .. خير وانتي منو يمج لو احترك كلبج لان مداتحارش بيج لان قزمة .. احمد الله واشكغه اني قزمة حتى ما يجي قغد مثلك يتسلق عالشجغ .. انا الج هذا السانج المكروط الا اكصه هاي ترتلين وهالطولة لزمتني ضحى خايفة تترجى بية وتباوع منا ومنا خايفة لان وحدنا بالشارع دنمشي ضحى بصوت ناصي.. عفية هدى كافي مالج غرض بي عوفي خلي نمشي بطريقنا باوع لضحى وحجة .. صدقة لربها دسمعينا صوتج خلي رحمة الله تنزل علينا خزرته وجرتني ومشينا وهو مبطل يحرك سيارته بطيء ويوازي مشيتنا وكام يشمر بالحجي ما اتحملت حسبتها بعقلي احنا بعد فرع عن بيتنا يعني ميكدر يسويلنا شي واحنا بمنطقتنا صرت سباعية رحت لزمت طابوكة وكلتله .. انت زلمة انزل من السياغة وخلي اغاويك الامهات شتجيب اتسعت عيونه وراد يفتح باب السيارة بس قاطعنا صوت هورن سيارة وسمعنا باب السيارة انفتح ونزل واحد من السيارة التفتت اباوع منو شفته صهيب ووياه خالة ام فرزدق صاعدة كدام تباوع علينا بخوف جنت واكفة ولازمة الطابوكة بوضعية الاستعداد للرمي شكلي اني والطابوك والحجار قصة لا تنتهي صهيب اقترب وحجة بصوت خشن ووجه كلامه للولد .. خير ابو الشباب مضيع شي .. وانت منو حضرتك ضحى حجت بخوف .. صهيب عفية عوفة ماعليك بي .. لا بالله شو خلي اعرف هذا شعنده واكف يمكم جان يحجي وهو يتوجه على سيارت الولد وذاك دك جرس عنده احنا نعود لصهيب كبل حرك سيارته وشخطها وانطلق من يمنا ما شفنا بس غبار السيارة بالشارع صهيب بعصبية بالله شو امشو كدامي ركبوا بالسيارة جان يحجي ويباوع لضحى الي جانت ترجف من الي صار هي بهيج مواقف تظل بس ترجف خوافة باوع عليها .. كافي لتخافين وداعتج اخذت رقم سيارته وراح اطلعه من جوة الكاع واطين عيشته .. لا عفية صهيب خلي يولي خاف يأذيك صهيب .. فداج صهيب وعشيرته لك اخ يابة لج تخافين علية جان يحجي وعيونه بيهن نظرة عاشك ابتسمت ودنكت خجلانة .. اي طبعا اخاف عليك شعندي غيرك هذا الحجي اني واكفة بيناتهم اباوع عليهم وراسي يتحرك منا ومنا جني بندول الساعة حسيت بروحي حديقة همة كاعدين واحد يتغزل بالثاني بكلام الحب وانااااا اعيط ( بصوت عادل امام) كعدت احم حم .. اكول يا جماعة الخيغ اشو جنكم نسيتوني تغة اني واكفة يمكم مو طغطوغ يالله شو انتي اتحغكي كدامي وانت استاذ صهيب غوح لخالة ام فغزدق صاغلهة ساعة تأشغ عليك ما بيها حيل تنزل من السياغة من وغة غكبتها وتغيد تعغف شصاغ ضحك على كلامي .. يالله اتحركي جنية السانج اطول منج خلي اوصلكم للبيت بطريقي صعدنا ورة بالسيارة وانتبهت لصهيب شلون عدل المرايا ههههه هلة هلة كلك حركات ياعمي وضحى مدنكة راسها مستحية ام فرزدق بعد ما سألت صهيب عن الصار وهو فهمها وهي كامت توصي بينا وتحذرنا وبعدين انتقلت تسألنا عن الامتحانات هدى.. والله خالة اني الحمد لله مجاوبة بس عندج ست ضحى كلش كسولي حسيت بضربة كوع اجتي على خاصرتي وهمست .. اني الج عوبة ام فرزدق.. يا ليش خالة ضحاوي ضحى.. لا خالة هدى تتشاقة وياج اني دا ادرس هاي الايام هدى.. خالة تجذب عليج والله الاخت صايغة سايق مخدة بس نوم ما تشوفيها صايغة جنها تفاحة هذا كله من وغة النوم انتبهت لضحى تكرص بية وحاصرتها البجية ههههه فد اتونس من اكعد العب بأعصاب واحد واتفنن بحرك الافلام وهسة خطية شكلي حركت فلمها الله يرحمني صهيب.. هاي شنو ضحى ما اتوقعتج مهملة بدارستج سمعيني زين منا ورايح اريدج تهتمين لدروسج وتاخذين شهادتج اريد كون اسافر وارجع الكاج ناجحة من السادس بمعدل عالي وداخلة كلية زينة غمزلها بالمرايا اريد افتخر بيج كدام اهلي اقصد نريد نفرح بيج وبنجاحج ابتسمت ودنكت وصلنا للبيت .. سلمولي على شومة وخليها تمر علية من تفرغ ضحى.. ان شاء الله خالة دخلنا للبيت بعدني ما طبيت وضحى الهادئة شنت علية الغارة الجوية صدك لو كالوا الهدوء الذي يسبق العاصفة ما ظل نعال بالبيت اذا ما طار بالجو متوجه نحو معسكر هدى واني لازمة المخدة وحاطتها درع كدامي اركض منا واجي منا مثل القرد وخربانة ضحك عليها جان ووجها احمر من الفشلة دخلت شيماء وجانت ستوها راجعة من المستشفى باوعت عليها جانت عيونها حمر شمرت المخدة من ايدي واشرت لضحى حتى تسكت وحركت عيني على شيماء وهي انتبهت عليها وشمرت النعال من ايدها رحت يمها اريد اشوف اختي شبيها ما عاجبني وضعها هاي الايام هدى بصوت هاديء .. شيماء شبيج ليش تبجين جانت شيماء تتحرك بالمطبخ وطلعت جدر المرك من الثلاجة وحطته عالنار تريد تحميه شيماء بصرامة.، ما بية شي جهزي السفرة بين ما ابدل ملابسي ونتغدة .. صاغ درت على ضحى.. كملي جهزي السفرة واني رايحة اشوف شبيها اختج ضحى.. اوك بس مو تنسين تكليلي من شنو تبجي .. ميخالف رحت وراها ودخلت للغرفة لكيتها مطلعة سوارت امي الفضة وحاضنتهم وتبجي صدك كسرت كلبي عرف اختي شومة من يوم مروة طلعت من حياتنا وهي مو على بعضها لزمتها من كتفها وسألتها .. شومة شبيج رفعت راسها وباوعت علية وانهارت بالبجي وشمرت روحها بحضني لميتها بحضني وصرت امسح على ضهرها اريد اطمنها بس ما اعرف على شنو اطمنها .. احجيلي شبيج ليش تبجين .. هدى اريد اموت من القهر .. اسم الله عليج ليش منو وياج .. مروة اختي .. اشبيها مغوة .. لج هدى صارلي اسبوعين كل يوم امر على مروة بالمستشفى اريد اشوفها واحجي وياها لج يطلعلي الفراش اكله روح كللها اختج شيماء تريد تحجي وياج بس شوية يكلي دكتورة مروة تكول ما عندي اخت بهذا الاسم متقبل تشوفج رجاءاً بلا زحمة اتحركي طلعي منا اعرف انتي اختها بس هي متريد تشوفج واحنا مابيدنا شي عبد مامور... اتحركي لا اطلب الامن يجون يطلعونج منا بالقوة لج كل يوم اروح وهي نفس الجواب لج اليوم رحت كلولي مروة اتزوجت دكتور رافد وسافرت وياه ايفاد قدمت على دراسات عليا بالخارج لج هدى اريد اموت من القهر هذا الدكتور اعرفه واحد ملعب وسمعته مو شي هي شلون سوت هيج وقبلت تتزوج بدون علمنا شلون انطاها كلبها هدى.. اخاف متمكن ماديا وغاح يفتحلها عيادة وتعغفين بيها مغوة عندها تحقيق حلمها يجي بالمقدمة شيماء.. لا مستحيل الدكتور مستواه المادي وسط مو كلش قوي لدرجة يفتحلها عيادة ويجهزها اني متأكدة منه ما يكدر يفتحلها عيادة وهذا المخبلني ليش سوت هشكل جنا نحجي وسمعنا صوت صياح بابا وعمو امجد شيماء كامت من مكانها مرتبكة ومسحت دموعها .. روحي طلعي اني جاية وراج طلعت وشفت بابا يكسر بالغراض ويكفر ويسب ويغلط وعمو امجد يكله هدي وخلي نفتهم منهم شصاير اني لزمت كلبي بيدي وبكل ضني بابا عرف بزواج مروة وجاي معصب علينا ضحى خايفة راحت جابت المكناسة وكعدت تلم بالكزاز طلعت شيماء من الغرفة لابسة دشدادشة .. شكو بابا شصاير ليش معصب جنت لازمة كلبي بأيدي كعد بابا ولزم راسه بثنين ايديه ودنك امجد.. روحي جيبيله ماي خلي افتهم منه شصاير كضاها علية كلة صياح ما افتهمت منة شي رحت جبت كلاص الماي وانطيته لبابا اخذها مني ما شربه.. كبل كلبه على راسه فاير من الغضب امجد.. هسة يالله احجيلنا شصاير اثير يحجي ويرجف بغيظ .. هذولي ولد اخوك علي الي عايشيين بالخارج طلعوا بايعيين هذا المشتمل بدون ما نعرف اليوم اجاني واحد للشغل وطلب مني افرغ البيت لطمت على حلكي مصدومة وشيماء شهكت وحطت ايدها على حلكها وظلينا وحدة تباوع بوجه الثانية يتبع...... | ||||
|
| |
|
06-07-19, 10:12 PM
| #9 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #البارت_السابع #اساور_الفضة هدى جان بابا يحجي بعصبية وية عمو امجد .. هذولي ولد اخوك الي عايشيين بالخارج طلعوا بايعيين هذا المشتمل بدون ما نعرف اليوم اجاني واحد للشغل وطلب مني افرغ البيت لطمت على حلكي مصدومة وشيماء شهكت وحطت ايدها على حلكها وظلينا وحدة تباوع بوجه الثانية دخيلك ياربي الا بيتنا وين نروح شلون ياربي وبيت جدي بايعيين نصه وعمو امجد اخذ حصته وطلع من البيت وبقى على كد مشتمل كلش صغير لبيبي ساكنة بي لوحدها وبابا طلع ماخذ حصته وصارفها واحنا ماعدنا اي علم بالموضوع ان بابا ماخذ حصته من البيت ولو ما استغرب يطلع هيج طلعة شترجة من اب ياخذ تعب بنته ويروح يصرفهم على الشرب والسوالف التعبانة وما خفي كان اعظم والله العالم بعد شنو عنده غيرها من سوالف امجد.. اي هو ذاك اليوم اتصل علية وكلي احتمال يبيع البيت لان محتاج فلوس علمود مشروعه بس اشو ما كلي من باع البيت خلي اروح اتصل عليه واستفسر منه واتأكد مرات الانسان تمر عليه المصائب يحتار اي وحد بيهم توجع راح عمو امجد حتى يتصل على عمو علي وظل بابا يضرب اخماس بأسداس واحنا واكفات ننتظر مصيرنا اني دخلت ادرس رياضيات لباجر احسن شي ادرس امتحاني وخليها على الله اكو رب رحيم هو يدبر الامور كعدت ادرس واجتي ضحى ورة فترة لزمت كتابها طبعا هاي مو من عوايدها رفعت حاجبي .. مو جنج جاية تدرسين متأخرة وما بقى شي على امتحانات البكلوريا بالله شتلحكين تدرسين ضحى.. انتي ما عليج الحك بس اشد حيلي واهتم بدراستي اكثر .. بشنو تهتمين وانتي حضرتج اليوم يالله كلفتي نفسج تجين وياي للمدرسة وتجيبين بطاقة الدخول للامتحان .. عادي هي بطاقة اكدر بأي وقت اجيبها مو فد مشكلة .. هو شلون يصير بعد الاهمال .. عفية هدى الله عليج كافي هاي بدال ما تشجعيني عالدراسة تكعدين تكسرين جناحاتي .. يالله منا ورايح راح اكعد اساعدج واشجعك والزم طبلة واطبلج واشد وصلة واركصلج حتى يصير عندج واهس .. امداج عوبة طاح حظج هو هيج اليشجع المفروض تسويلي اجواء وتجيبلي قهوة لو شاي وتسويلي لفات مثلما جانت شيماء تسوي لمروة من تدرس باوعت عليها .. شوف هاي مصدكة غوحها بنت الاوادم جايه تقاغن (تقارن) غوحها بمغوة ..كلج سالمين شبيج شاغبة (شاربة) نفط ترة انتي ستوج يالله لزمتي الكتاب بعدنا ما كلنا حلال وبديتي تتدلعين وتدورين واهس خاب ما تكومين منا ترة والله حتى ما لايكة عليج تصيرين مجتهدة شمرت علية المخدة وصديتها هدى.. الله عليج مو اصلح اصير حاغس مغمى (حارس مرمى) اصد اهداف ضحى جرت حسرة هدى.. خيغ ليش تنافخين غاح تطيغيني ضحى.. شايلة هم وين راح ننتقل هدى.. خليها على الله لا تفكغ لها مدبغ واشرت بصبعي السبابة للسما غمضت عينها .. النعم بالله سمعنا صوت شيما ء صاحت لضحى تجي تنشر الملابس ضحى.. اووف ويكلك ليش متدرس هو شوكت الواحد يلحك يدرس بهذا البيت .. هههههه اسم الله بالطبك بعدج ما لزمتي الكتاب شوف هاي مصدكة روحها دتدغس طلعت من الغرفة تدردم هزيت ايدي ورجعت اكمل دراستي واكتب المهمات الي احتمال راح يجبوها بالامتحان حطيت طرف قلم الرصاص بين اسناني وضليت اعض بطرف القلم بتفكير شارد منا لحد ما انتبهت على طرف القلم صار يشبه عود المسواك بدون ما احس على روحي جانت سالفة تجيبني وسالفة توديني وما ادري اي وحدة بيهن اشد على عقلي سالفة مروة الي حيرتني لو سالفة بيتنا الي انباع ومنعرف لحد الان شنو مصيرنا ووين راح يصفة بينا الدهر اني وخواتي خلصت الساعات بين التفكير والدراسة حسيت على روحي اتكسرت من الكعدة اتمطيت ومديت ذراعي على وسعهم سمعت صوت بابا يحجي معصب كمت من مكاني اريد افتهم شنو السالفة حطيت الكتاب على صفحة خلي اشوف شنو الصار رحت يمهم شفته كاعد يحجي وعمو امجد ولازم بيده النقال ويحجي وية عمو علي وفاتح سبيكر السماعة حتى بابا يسمع الحجي وعمو امجد جايب بيبي وياه سلمت عليهم من ورة خشمي احنا علاقتنا وياهم مو شي من عهد سالفة مروة ورحت كعدت يم خواتي ضحى كاعدة يم شيماء جانوا اثنينهم يحجون بينهم بصوت ناصي بموضوع البيت اقتربت منهم .. اكول شيماء شنو عمو امجد شيكول عالبيت شيماء.. طلع عمو علي مسوي وكالة لأبنه الجبير لان عندهم مشروع ومحتاجين فلوس البيت بدال ما مجمدين فلوسهم كل هاي السنين .. اي هم صدك حقهم بيتهم وحلالهم وهمة اولى بي زين بابا ليش معصب .. بابا ظال يغلط على عمو علي ويكله شلون تسوي بية هيج دكة ناقصة وتشيلني من البيت ما فكرت بية انا وبناتي وين نروح و انت عندك خير من الله تستكثر علية هذا البيت تخلي الي ولبناتي عمي امجد يكله ماتكول لروحك هذا الحجي هو اذا انت ابو الانة ما فكرت بنفسك وببناتك وحطيتلك بيت مثل الاوادم كضيت طول عمرك عايش عالة علينا وخلصنا عمرنا نركض وراك ونصلح بأخطائك ترة هو انعم الله عليه كعدك بيه من ذيج السنة لهاي السنة هاي لوواحد غيره جان شبع بيه ايجارات بدال ما مكعدك هدى.. والله زين يسوي بي يستاهل وين جان عن بناته هسة يالله صاغ حغيص علينا وصاغ يفكغ ببناته .. اخ من ابوج ما اعرف شيحس عنده قوانين غريبة عجيبة مرات احسه يستفزني بتصرافاته الي صايرة تنطق الحجر .. وهسة تالي احنا وين نغوح ضحى.. سكتي بس لا راح نعيش وية عجوز النار .. عزة لا عفية لا تكوليها والله ناكل تبن شيماء.. ابشركم الظاهر الشعور متبادل حتى بيبي همين من سمعت بينا راح ننتقل نعيش وياها اتخبلت واجتي لهنا وية عمو امجد تريد تشوف حل غير هذا متخبلة تكول انا ما اتحمل اثير وبناته ومصايبهم على راسي من تالي وكت والبيت صغير وين احطهم ضحى.. على الاساس احنا ميتين عليها والله ياربي شلون بينا بعدما خلصو المكالمة وية عمو علي رجعوا يتناقشون بينهم وحجي يجر حجي واحنا كاعدات بس نتفرج عبالك الموضوع ما يعودلنا وتالي صفت السالفة ننتقل لبيت بيبي بنهاية هذا الاسبوع لان بابا طلب من الرجال ابو البيت يمهلنا اسبوع على ما يصرف غراض البيت اي لان بيبي كالت شوفولكم صرفة بغراضكم انا ما استقبل زعابيل ببيتي داومت يوم ثاني وبالي وعقلي كله مشدوه بحيث امتحنت وخلصت الامتحان واني كلشي ما مفتهمة سلمت على صديقاتي وطلعت حتى ما كلت لفاطمة صديقتي عن سالفة البيت جنت كلش مخنوكة يمكن لو بس واحد يطخني انفجر بالبجي جنت امشي وقت ظهر حارة ومحد بالشارع وسمعت واحد يصيح وراي انتبهت عالصوت وفز كلبي من مكانه هذا صوت رائد بعدين اتذكرت اني زعلانة عليه من موقف البارحة كملت طريقي امشي وما اتوقفت اجة يركض وراي بهرولة وكام يمشي بصفي ويحجي وياي رائد.. هدى مو احجي وياج ليش متجاوبين التفتت عليه جان بملابس الكلية ابيض ورصاصي بس غير طالع الابشدة غير اني انسحل كلبي سحل من وراه بس رجعت اتمالكت نفسي ورفعت حاجبي بدون ما اتوقف عن المشي وجاوبته بنترة .. خيغ شتريد ليش تصيح بأسمي بنص الشاغع انت ما تستحي رائد مستغرب.. شكو شبيج هدى ليش مطنكرة وزعلانة مني .. والله اسأل نفسك وشوف غوحك شنو سويت الباغحة عقد حواجبه بتفكير وحجة.. ما اعرف شنو صاير البارحة بالله ذكريني خليني افتهم .. الباغحة حضغتك مغيت من يمي بسياغتك وجنت مصعد بنات خالتك واختك ليلى مغيت من يمي باوعت علية وما سلمت على العموم انت متهمني السلمت والما سلمت عندي نفس الشي بس حبيت اعلمك عالاصول من تمغ من يم احد تعغفه عيب سلم عليه رائد.. والله ما شفتج بيمن احلفلج ما انتبهت عليج جنا نمشي بطيء ونحجي .. هدى شبيج مو دا احجي وياج اكلج والله ما انتبهت عليج ترة متسوى تعصبين وتزعلين جان كلما ينطق بكلمة اني النار تزيد بكلبي التفتت عليه حجيت وياه بحدة _ اي طبعا متهتم ملتهي وية بنات خالتك _شنو اشم ريحة شعواط .. هاي غيرة يسموها لو شنو مجاوبته عاقجة الوجه ومقدمة البوز شبر ليكدام .. انت منتبه لنفسك شلون صاير هواي تتجنبني انت حتى مكلفت نفسك تسألني عن امتحاناتي رائد بصدمة.. انا اتجنب شوفتج ؟؟؟ لا مستحيل متوهمة !!! .. عفية غائد سد الموضوع اصلا ما يسوى نحجي بي يالله مع السلامة عفته مشيت وكملت طريقي جنت امشي عالسريع وهو اتوقف بمكانه بنص الشارع متفاجيء وحجة بصوت عالي من وراي .. هدى صدك تحجين !!!!! ما رديت عليه وكملت طريقي جنت امشي وادردم واغلط عليه والدمعه واصلة بطرف عيني وصلت بنهاية الشارع كدامي لوفة دخلت بالشارع الثاني بس قبل لا ادخل انتبهت عليه بعده واكف بمكانه صافن وفاتح حلكه مصدوم من تصرفي لان اول مرة بحياتي اصده واتهجم عليه كضينا طول عمرنا اني ورائد اصداقاء وما يوم اتزاعلنا امشي واني مدنكة راسي بخذلان وبين ما جنت امشي وادردم عليه سمعت صرخة مفزوعة قريبة علية كمزت من مكاني ورفعت راسي وجان يصير كدامي مشعل المخبل وكفت مصدومة بمكاني عااااااا يمة صخام مشعل المخبل عزة يمة هو شافني وركض علية ما حسيت الا واني دايرة وجهي وطكيتها ركضة مثل البيب بيب رجعت على نفس طريقي اركض والمخبل مشعل يركض وراي جنا اثنينا نركض بس جان اكو فرق بين الركضتين اني اركض واصيح بعالي صوتي .. يبوووووووووي غااااااااااااائد .. المخبل اركض وفردة الحذاء فلتت من رجلي تركتها وراي مرجعت عليها ياروح ما بعدج روح يا حذاء يا كشخة يا بطيخ من حلات روحي احس روحي صارت برائد اريده يلحكني قبل لا مشعل المخبل يسوي بية شي لان ذاك اليوم هو فاشخ واحد من اهل المنطقة وشاك راسه .. غاااااااائد شفته من بعيد بعده على نفس وكفته بنص الشارع شافني وعقد حواجبه مستغرب ليش اركض واصيح .. غاااااااااااائد المخبل اتذكرت مسلسل كارتون عدنان ولينا من تصيح لينا .. عدناااااااااان انقذني ياعدناااان بس الفرق عدنان حافي رائد لابس حذاء هذا الموقف يمثل حالي اجة يركض علية بهرولة وصلت يمه مكطوعة الانفاس وكلبي حيل يدك يريد يطلع من صدري حطيت ايدي على صدري فحطانة من الركض اريد بس اجمع الكلام .. غائد.. مخبل.. مشعل .. يركض رائد.. شنو هدى شبيج بعده ما كمل كلامه اجتنا حصوة طايرة بالهوة ووكعت بكصة رائد .. عاااااا اجانا شردت وعفت رائد وراي بس ما احس الا ورائد هم يركض وراي ويصيح .. احتركووووووو واني اصيح .. يبووووووي رائد يركض يمي .. احتركوا هذا منين طلعلنا صرنا نركض وهو يركض ورانا ويشمر علينا حجار وتالي دخلنا بفرع مسدود وجان مشعل المخبل يحاصرنا اني ورائد كمنا واحد يباوع عالثاني ونبلع بريكنا من الخوف صرت ورة رائد ومشعل يتقدم من عدنا واحنا نرجع ورة اسمع رائد يكله .. مشعل حباب امشي ولي منا بش .. بشش .. بششش ضحكت على شكله بس صدك لو كالوا ان شر البلية ما يضحك همست وحاصرتني الضحكة .. ادري انت دتنش بزونة وين يفتهم عليك رائد.. لج سكتي هذا مخبل وكلشي يطلع منه تعال نوب لا يضربنا بطابوكة على راسنا ويخلي دمنا بطولنا كمزنا اثنينا من مكانا من سمعنا صرخة مشعل المخبل جان صوت الصرخة فد شي مرعب بحد ذاته يذكرني بفلم الرعب (الصرخة ) قشعر جسمي ..يمةةةةة والله بعدني صغيرة ما اريد اموت اقترب من عدنا وهو يمشي يلكط حجار من الكاع لزمت قميص رائد من ورة خايفة وهمست .. عزة هذا شكاعد يسوي .. خرب هذا ديجمع حجار حتى يرجمنا .. ليش .. والله سؤالج غبي شمدريني شسوي بيهم بس يمكن يريد يرجم الشيطان ويتمم مراسيم الحج براسنا حصرتني الضحكة .. عابتلك غير اسأل باوعلي .. والله عليج اسألة تدق الواااا..... ااااااخ الله وجان تجي اول طابوكة طايرة على راس رائد واني صرت اصرخ خايفة ونزل علينا تشمر بالحجار من كل صوب وجان يطلعون اثنين شباب من بيتهم على صوت صياحي ويدخلونا للبيت وواحد منهم كال .. خرب هذا المخبل والله خطر المفروض ما يعوفونه سايب بالشارع طلعت امهم بالطارمة وبيدها عدت الاسعافات ورائد دينزل دم من راسه ما ادري اضحك على شكله مدري ابجي عالموقف المحرج الي احنا بي خطية قميصه الابيض صار كله دم حجة الولد الثاني وكال راح اشحته منا هذا دواه عندي اتعلمت عليه بس انا اعرفله تنطي جكليته وينتهي الموضوع طلع من البيت واحنا كاعدين بالكراج ديضمدون جرح رائد وخطية امهم جابتلنا دولكة ماي واني صكيت الدولكة من الخوف طلعت مفرفحة من العطش حتى ما كلت لرائد اتفضل شوية واجة الولد وكال. اخذته لأهله جان عمر مشعل المخبل يجي تقريبا بعمر شيماء اختي خطية جبير بس عقله فاصل ضمدوا رائد وانتبهت على رجلي حافية تك وتك وانطوني نعال وحطيت فردة الحذاء بالعلاكة واتشكرنا منهم وسلمنا عليهم وطلعنا جنا نمشي اني ورائد بس جان منظرنا تحفة مال صورة جان رائد راسه ملفوف بشاش وقميص الابيض ملطخ بدم واني لابسة نعال وية ملابس المدرسة واكحف بي بالشارع جان يمشي وكل شوية يلتفت علية ويضحك .. شكو ليش تضحك كدامك قرد .. لا بس اتذكرت شكلج وانتي تركضين طايرة جان منظرج يخرب من الضحك كعد يضحك علية ووجهه وصار احمر من الضحك واني اضحك وياه واحجي .. لعد لو تشوف شكلك وانت تغكض وراي جنك كنغغ شتكول _لج الهزيمه ثلثين المراجل .. بس شنو الكنغر من حلكج عسل وصرنا نضحك سوية مثل الجهال ناسين همومنا وعايشين اللحظه من كد الضحك حتى دمعت عيوني سكت وصار يباوع علية واني اضحك وكأنما اول مرة يشوفني همس بصوت خشن .. هدى تدرين كمت احب مشعل المخبل لان صار سبب يمصالحتنا ضحكت.. اي عفية .. هدى .. نعم .. انا احبج كالها هيج كبل بدون مقدمات يمة هو كال كلمة احبج وانة كبل اتعثرت بمشيتي زين ما وكعت على وجهي شكد عيب كلبي الفطير كمز وية عثرتي من مكانه صار وجهي احمر من الخجل ما اعرف شسوي وصرت اراجع بقاموس حياتي وادور على مسطلح يناسب هاي اللحظة حتى اجاوبه بس مع الاسف ما لكيت بقاموسي اي كلمة توصف بيها المحبة الي بكلبي رجع يحم حم .. شنو افتهم من سكوتج ابتسمت مستحية انبلع الساني .. يعني افتهم منج ان السكوت علامة الرضى رفعت راسي واجيت اجاوبه وجان اشوف الفردة الثانية مال حذائي بالشارع وصحت بفرح .. حذااااااائي باوع علية مصدوم عاقج حواجبه .. حذااائي شنو ؟؟!!!! رحت شلت فردة الحذاء وكعدت انكت بي وحطيته بالعلاكة وهو واكف يمي يهز بيده .. وانا جنت منتظر تكولين كلمة حبيبي تالي طلعت حذائي الحمدلله يا ربي خطية هو جان منتظر مني كلمة حب تالي طلعت مني كلمة حذائي ضحكت وعيوني تلمع من الفرحة وصلني للبيت وكان هذا اول موعد حب النا بس شلون موعد اغبر اجلح املح بس مو مهم اجواء اللقاء المهم المضمون وهو اعترف بحبه الي وهذا احلى شي دخلت للبيت طايرة من الفرح احس بروحي طير لكيت شيماء دتعزل بالبيت وشكلها من هسة مسوية حملة لتصفية غراض البيت وضحى دتساعدها التفتت علية شيماء.. ها بشري شلونج اليوم بأمتحان الرياضيات .. الحمدلله زينة جاوبت والله كغيم .. انتبهت علية لابسة نعال لاستيك .. هاي شنو اشو لابسة نعال لا تكولين حذائج انكطع ذاك اليوم اشتريته الج .. لج لا مو انكطع بس اليوم صار بية فلم غير مشعل المخبل طلعلي بالشارع ضحى.. عزززة همزين مجنت وياج جان متت .. هو اني متت بس من الضحك صغت تصنيف وكعدت اسولف لخواتي عن الصار وهنة خربن ضحك علية وعلى رائد شيماء.. خطية وهسة رائد شلون صار .. لا زين الحمدلله ما بي شي وصلني وغاح لاهله ماكلت لخواتي عن اعتراف رائد استحيت احجي اول مرة بحياتي اضم شي عن شيماء رحت بدلت ملابسي ورجعت اساعد البنات شيماء.. تدرون بنات اليوم بالمستشفى التقيت بصديقة مروة الدكتورة فرح ضحى.. ما سألتيها عن مروة وين اراضيها .. اي هو سألتها عن مروة شلون اتزوجت بدكتور رافد وكعدت تحجيلي ليش مروة قبلت تتزوج رافد هدى.. اي صدك شنو السبب الي وغة زواجهم شيماء بحزن .. خطية مروة من بعدما صارت السالفة مال بابا والفلوس كامت تبات بدار الطبيبات بالمستشفى وكم واحد من موظفين المستشفى صار يسمعها حجي وطلعوا عليها اشاعة ابوها طاردها من البيت والله العالم شنو مسوية واهلها اتبروا من عندها حجي الناس اكل وجهها وصل الكلام لدكتور رافد وهو جان معجب بيها فأقترح عليها انه هو راح يدزونه بعثة للخارج على حساب الدولة يكمل دراسة كللها خلي نتزوج واقدملج وياي بصفتج زوجتي ونسافر سوية للخارج ومروة شافت هذا القرار الانسب لوضعها ووافقت عالزواج من رافد وسافرت وياه وخطية هسة هي حسب حجي الدكتورة فرح تكول مروة حاليا دتدرس وتشتغل بدوام جزئي مساعدة دكتور صحيح الراتب قليل بس كالت مدبرة بيها نفسها جانت شيماء تحجي بقهر .. سودة علية اكيد مروة تعبانة غربة ودراسة وشغل هواي عليها ادري بيها بسرعة تتعب ضحى.. الله يوفقها ربي كون ما يضيعلها تعب والله احسنلها خليها تشوف مستقبلها احسن من ما تبقى هنا كلشي ما حصلت بس القهر شيماء.. تدرون اني ليش مقهورة هدى.. ليش .. مقهورة لان مروة سافرة زعلانة علينا وهي متعرف ان احنا جنا مجبورات نشهد ضدها سافرت وهي تحس بنفسها مغدورة جنت اتمنى تسمحلي اشوفها واكعد ابررلها عن الصار وافهمها يمكن بساعتها يبود كلبي وارتاح من تأنيب الضمير هدى.. لتنقهرين لا بد ويجي اليوم الي تتصح بي الامور وينكشف كلشي ماكو شي يبقى على حاله شيماء.. اي بس خاف هذا اليوم يتأخر بجيته ويكون بوكتها فايت الاوان وما ينفع التبرير جنا نحجي وسمعنا صوت نقال يدك انط وضحى كمزنا من مكانا مستغربات صوت نقال وشيماء راحت دخلت للغرفة وجانت تضحك على شكلنا طلعت من الغرفة وبيدها نقال حجت بي وسدته جان نوعه صرصور هدى.. عاااا نقال اخذته من ايدها وصرت اكلب بي ممصدكة ضحى.. هاي شنو شوكت اشتريتي نقال شيماء.. اليوم اجتي صديقتي رباب كالت ليش متشترين نقال ترة ضروري يكون عندج نقال كلتلها اخاف غالي اقترحت اشتري النقال وشريحته يبعونه بالاقساط وهي هم مشترية مثله واني وصيتها وجابته اليوم جانت شيماء تحجي واني اندمجت العب الدودة جانت فاطمة صديقتي مرات تلزم نقال امها وتلعب هاي اللعبة هدى.. لج شيماء غير يجنن وبي شغلات تخبل شيماء .. شنو .. لج حتى يشتغل بي لايت .. يااا شكد حلو بعدها التهينا نشد بالغراض واجتي ام فرزدق لان سمعت بالخبر احنا راح نشيل جانت كلش مقهورة علينا وصار كل يوم يندك الباب وتجي وحدة من جاراتنا تسلم علينا حتى ام رائد اجتي تسلم علينا خطية وحنوش وامه همين اجوي يسلمون علينا وخالة ام قاسم خطية هم اجتي تسلم علينا هي وهالة بنتها جانت وياي بنفس المدرسة بس سابقتني بمرحلة لان هي رسبت بالمتوسطة ما اعرف ليش من شفت هالة طرة على بالي قاسم الوكح وين صفة بيه الوكت سالت هالة .. اكلج قاسم اخوج بعده وكح لو صار عاقل اشو ما نشوفه بالمنطقة هالة .. هو خلي بالاول احنا اهل بيته نشوفه وبعدين يالله الناس تشوفه الاستاذ كاضيها دياحة وسفر بابا اخر مرة سفره للخارج حتى ياخذ شهادة تالي رجع النة ايد ورة وايد كدام ما كو شهادة بس بيني وبينج الحجي صار كلش قوي باللغة الانكليزية بحيث ذاك اليوم من شاف الامريكان اجوي بمنطقتنا كعد يحجي وياهم مسيطر خطية بابا كله واخيرا عندك شي براسه حظ ما راحت سفرتك على خالي بلاش صرت اضحك واني اتخيل شكله جنه علي بابا .. هههههه بعده وكح ويضرب ويتعارك لو تغيير ؟؟ .. اهوو سكتي هو ابو طبع ما يغير طبعه لشوية وراحت خالة ام قاسم وهالة خالة ام فرزدق كامت كل يوم تمر علينا تشوفنا شمحتاجين خطية كلش ضايجة تكول شيصبرني على فراقكم هنا انتوا يمي وشوكت ما يطري على بالي اجيكم ضحى.. لتضوجين خالة خلي صهيب يجيبج النة كلها شغلة ربع ساعة بالسيارة وانتي يمنا واحنا هم ما راح نكطع بيج وتلكينة كل يوم يمج قرب الاسبوع ينتهي واليوم راح نشيل و صرت كلما امشي بطريق المدرسة اباوع واتمعن بكل شبر بهذا الطريق وكأنما اودع اثر خطواتي واريد اطبع صورته بذاكرتي صرت اتذكر ايامي اني وصغيرة ياما لعبت بشوارع منطقتنا هذا الدرب كان شاهد على كومة مشاعر وهواي مواقف جنت امشي سرحانه وعيوني غركت بالدموع غوش عند النظر سمعت صوت عمو ابو عبد الله وكأنما كان منتظرني وديسمع افكاري ابو عبد الله .. هلا بنيتي شنو حليتي هذا سؤاله اليومي صار عندي احلى سؤال رمشت عيوني حتى اطرد الدموع .. هلا عمو شلونك ان شاء الله بخير .. بخير والحمد لله خير بنيتي اشو ما كمت اشوفج تمرين تلكطين النبك شنو لكيتيلج شجرة ثانية نبگها احلى من نبكنا لو صعب عليج المشوار وكمتي ما تمرين بينا اجتي كلماته عالجرح عبالك تعزف عالوتر الحساس انفجرت بالبجي مثل الطفلة المهضومة من تسمع واحد يكللها خطية منو وياااج ليش دتبجين وهي بلحظتها تبرطم شفايفها وتنفجر تبجي بحركة گلب ابو عبدالله .. خير بنيتي المن هاي الدموع الحلوة تنزل وتلامس خدج الترف باوعت عليه وحجيت واني اناشغ بالبجي .. عمو بعد ما امر على شجرتكم ولا اكل من نبكها كللها خل ترتاح من هدى بعد ما تمرمن يمها وتشمر عليها حجار .. ها ليش بوية تحجين هشكل كون احد مسمعج حجاية ومزعلج من عدنا .. لا عمو انتوا اصل الطيب وما بدر منك بس الطيب حالك مثل حال شجرتك نشمرها بالحجار وتنطينا من ثمرها الطيب بس عمو احنا راح نشيل من هاي المنطقة وبعد ما اكدر امر من يمكم باوع علية وابتسم .. بنيتي لا تبجين ومسحي دموعج هذا حال الدنيا ماكو شي يبقى على حاله كلنا خطار ولابد وان يجي اليوم وتفرقنا الطرق مد ايده شايل علاكة النبك وانطانياها باوعت عليه شلون جان يبتسم بوجهي وهو ماد ايده حتى اخذ العلاكة منه نظرات عيونه كأنها تودعني الوداع الاخير يعني شنو بعد ما اشوف عمو ابو عبد الله ينتظرني بالطريق مثل كل يوم يعني بعد ماكو احد يصيحني (بنيتي هدى حليتي) ويسألني عن احوالي واكف منتظرني اخذ العلاكة من ايده ما اتحملت اشوفه لاخر مرة ركضت عليه ودنكت على ايده المجعدة من اثر الكبر وبستها واني ابجي بحزن من اثر الفراق مسح بيده الثانية على راسي وحجة بصوت مكسور .. بنيتي هدى لتضوجين كلما تحنين لشجرتنا تعالي وان شاء الله تلكيني واكف منتظرج هنا وبيدي علاكة النبك امانة لتزعلين حالج اخذت العلاكة من عنده وودعته ورحت امشي اكمل طريقي وعيوني وخشمي حمر من اثر البجي حجة من وراي ووهو واكف بنفس مكانه .. مودعة بالله بنيتي ديري بالج على نفسج وصيري سباعية اصعب لحظات هي لحظات الوداع طعمها يكون مر لاذع يلسع الكلب وصلت للبيت وشفت سيارة الحمل دتنقل بالغراض نفس هذا المنظر اتكرر من انتقلنا لهنا على هذا البيت لكيت رائد واكف يم بابا يحجي وياه وعيونه بيهم حزن رائد.. شلونج هدى .. الحمد لله بخير باوعت بعيونه وانتبه على عيوني حمر من البجي سحب نفس عميق ورجع شعره للخلف عيونه جانت مفضوحة بيهم حجي هواي دخلت للبيت وشفت البنات مخبوصات ووياهم خالة ام فرزدق دتبجي خطية انتبهت للبيت شلون صار فارغ وظلت بس الذكريات معلكة بأكان الحياطين بابا باع كلشي صفة كل غراض البيت وبقى بس مكينة الخياطة ما شيماء اترجته ما يبيعها ويتركها النة ذكرى من ريحة المرحومة امي وبهذا اليوم انتقلنا لبيت بيبي وجانت المنطقة شعبية بيها جهال هواي حفاي وصخين وصلنا للبيت او بالاحرى بقايا بيت كانت الحياطين مفطرة من اثر السنين دخلنا اني والبنات وبابا نزل غراضنا جانت مو هواي اغلبها ملابسنا ومكينة ماما استقبلتنا بيبي تدردم ام اثير.. مو تدخلون بأحذيتكم بالبيت وتدوسونه نزعوها بالباب قبل لتدخلون هدى .. حسستنا عبالك داخلين عالارض المقدسة ضحى.. دخيلك ياربي هذا مو بيت يخوف اظلم جنة كن مال دجاج شيماء.. يالله شو اتحركوا اثنينكم وبلا حجي زايد خلي نكتر الغراض بسرعة كعدنا نكتر بالملابس بيبي فرغت خانتين من كنتورها وكالت دبروا اموركم بيها اني وضحى وشيماء بخانة وبابا بخانة وبقية الملابس صارت تلزك لان خانة وحدة مو كافية واحنا عدنا هواي ملابس شيماء كالت نطلع بس الضروريات النجتاجهم استعمال يومي والبقية يبقون بالجنطة الجبيرة نخزنهم وبين ما خلصنا الشغل شيماء.. هدى هسة عوفي الي بيدج ورحي درسي امتحانج باجر اني اوصلج على مدرستج عبرية ومناك اروح للمسشفى .. اوك اباوع لشومة شلون حلوة جانت عندها نونة بحنكها (غمازة بالحنك ) ناطيتها برائة وعيونها كبار ووساع ورموشها طوال وصاحبة قوام يجنن تقاسيمه مرتبه خطية من كد الشغل ميزيد وزنها ولا ينقص مثلما هو جانت تهتم بالكل الا نفسها هاملة روحها وكأنما مو من حقها تلبس وتتأنق وتكشخ تشوف هذني الاشياء مو لازمة مو اهم من توفير ملابس المدرسة واحتياجات البيت الضرورية تشوف الاولية النة وبعدين هي رحت دخلت للغرفة جانت كلش صغيرة وبيها ريحة رطوبة صرت اباوع للجانب المشرق بالموضوع ان احنا احسن من غيرنا عالاقل لكينا.... سكف يأوينا ويلمنا اني وخواتي غيرنا يتمنون مكانة كعدت ادرس امتحاني لباجر ونعست اجتي شيماء وبيدها لفة جبن وكلاص جاي حار اخذتها منها ونزلت عليها اكس ومربع جنت كلش جوعانة .. رحمة الله والديج شومة .. الف عافية على كلبج دك نقالها وشافت الرقم وعصبت وكعدت تدردم .. استغفر الله صدك ناس متستحي كامت من يمي واخذت نقالها باوعت عليها من فتحت الباب ظلت تحوم تريدلها مكان تكدر تحجي بي براحتها لان البيت كلش صغير رحت يمها وهمست .. شومة صعدي فوك السطح باوعت فوك .. اي صدك هناك يالله اكدر احجي براحتي صعدت فوك ورحت صعدت وراها وكفت يم باب السطح اسمعها تحجي معصبة.. انت وتالي وياك ترة صدك مصختها متستحي متصل علية بهيج وقت كم مرة كتلك لتتصل علية لتجبرني اغير رقمي من وراك وسدت التلفون بوجهه ودارت وجهه تنافخ بغضب شافتني هدى.. شيماء هذا منوا جان السطح اظلم والدنيا ليل وبس ضوة خفيف جاي من البيتونة راحت كعدت على الطابوكة واني هم سويت مثلها وكعدت على طابوكة ثانية .. يالله احجي هذا منو ؟؟ شيماء.. تتذكرين بيوم اجيتكم وكلت اكو ضابط مصاب جابوه للمستشفى اهله ما يعرفون عنه اي شي .. اي اتذكر عليه صدك شلون صار .. بخير يزهو بالنصر هدى.. كملي صفنت شيماء وسرحت بأفكارها وهي تحجي لهدى .. جنت مثل كل يوم اداوم بالمستشفى اسجل حضور اوقع عند مسؤلة الممرضات واروح اسلتم مناوبتي شفت الممرضات مخبوصات ويحجون بينهم على مريض حارك المستشفى حرك ومدخلهم بالانذار سالت رباب .. شكو شصاير ليش الجو متكهرب رباب.. هذا ضابط البارحة جابوه مصاب بطلقتين بكتفه والثانية بخاصرته واليوم استرد الوعي ودخل الدكاترة بالانذار من العصبية مالته لان لحد الان ممطلعين الرصاصة من كتفه .. ليش شنو سبب التأخير .. الدكتور رحمان اتصل عالجراح موفق حتى يحضر حالة طارئة لان الطلقة نازلة ومكطعة الاعصاب ميصير يطلعونها شلون ماجان لازم جراح اختصاص بالاعصاب يشرف عالعملية وهذا الضابط ميقتنع بهذا الحجي كاعد يتكلب من الالم لان الدكتور موفق البارحة جان بالنجف عنده عملية واليوم راح يوصل كال جهزوا غرفة العمليات بين ما ارتاح شوية من اثر السفر وهذا الاستاذ مدا يقتنع بسبب التأخير يتهمنا بالتخلف والفوضى كالب الدنيا بالصياح عبالك الناس عنده عبيد وهسة هاي خامس ممرضة تطلع من عنده وما ترجع كمنا ندزله الممرضين لان شوية يتحملون لسانه الزفر من يغلط .. يالله مو جديدة علينا اتعلمنا على هيج نماذج ابحكم عملي اتعودت على نفسيات المرضى بيهم المحترم نفسه وبيهم الحقنة وبيهم الاعصاب وبيهم العينه زايغة ويتحارش بالممرضات واني كدرت اتجاوزهم بشخصيتي وتعاملي الصارم اول ما ادخل عالمريض اتعامل وياه حسب شخصيته كل واحد تعرفين شخصيته من خلال تصرفاته واسلوبه بالكلام الا هذا الضابط اول ما دخلت عليه جنت مهيئة نفسي للعاصفة الرعدية من الغضب لكن حيرني هدوءه جان كاعد متجي عالسرير وايده معلكيها بحامل يد ولابس قميص نصه مفتوح وطالع صدره ما اعرف ليش ارتبكت من شفته هشكل بالرغم اني متعودة على هيج اشخاص والمفروض ما اتأثر بنظراته عيونه جانت مترصدة عبالك ديعاين مجرم كدامه اقتربت حتى ابدل المغذي الملعك على الحامل القريب عليه جنت اشتغل ومركزة عيوني على تركيب السيروم جلة حنجرته وحجة بصوت خشن ارتعد جسمي من وراه بس ما بينت كدامه ارتباكي .. شنو اسمج ؟؟ .. شيماء .. ممكن تعدلين الشداد من على ركبتي احس حز ركبتي حز اشو هذا عكس الي حجولي عنه .. اي عادي بس لحظة بين ما اخلص السيروم كملت ونقلت الفارغ حطيته بصينية الادوات وعدلت عتلة التقطير حتى تصب بصورة منظمة واقتربت منه ومديت ايدي على الشداد جنت اتصرف بتلقائية هذا حكم عملي بس مو معناها اني بنية مو زينة لان اقتربت منه وكعدت اعدل اللفاف من حول ركبته انتبهت عليه غمض عيونه انتهيت من عنده وابتعدت فتح عيونه وكصته عركانة خزرني وحجة بصوت واهن تعبان .. هاي انتي متعودة تسوين وية كل المرضة هشكل .. العفو مفتهمت عليك شنو تقصد .. اقصد ان كل مريض يطلب منج تقتربين منه ويشم عطرج هشكل اتسعت عيوني من وقاحته وخزرته .. مو مشكلتي اذا كان تفكيرك وصخ وتفتهمني غلط ..................... جانت شيماء دتحجيلي وقاطعنا صوت بيبي تصيح علينا ننزل هدى.. لااااا هسة وكتج بيبي اي كملي وشسويتي بعدين وياه شيماء كامت من مكانها وكعدت تنفض التراب من على ملابسها .. كومي خلي ننزل وغير مرة اكملج شصار وياي يالله هم يالله تنامين باجر وراج امتحان نزلنا جوة وبيبي نزلت علينا بالاسئلة مثل المطر .. شعندكم فوك بعدنا ما كلنا حلال كبل طريتوا السطح اجيت احجي شيماء اشرتلي اسكت شيماء.. بيبي جنت اشر قميصي فوك بالسطح .. يالله فوتن كدامي نامن هم يالله ما اامن تبقن كاعدات لوحدكم اخاف منكم انتوا خوات امريوة الوكحة وكلشي يطلع منكم فرشنا بغرفتها جانت حارة وحطينا راسنا عالمخدة بدون ما نحجي اي شي شفت ضحى رايحة بسابع نومة احلى شي بضحى عندها النوم لا يعلى عليه ووين ما تلكة مكان تحط راسها وتنام عكسي اني ظليت الليل كله اتكلب ممتعودة هذا مو مكاني لكن حطيت راسي عالمخدة وقريت سورت الكرسي وغمضت عيوني واني اتأمل ان باجر اجمل كعدت يوم ثاني على صوت شيماء تنده بية كوة فتحت عيوني من النعاس عبالك نايمة بس ساعة .. يالله كومي اتحركي وراج امتحان هم يالله تغسلين وتبدلين ونلحك اوصلج للمدرسة اتذكرت الامتحان وكمزت من مكاني ورحت ركض اغسل واتوضيت وصليت وبدلت ملابسي عالسريع ضحى كعدت ويانا حتى تكعد تدرس خطية عندها شهر مراجعة وتريد تشد حيلها وتدرس بلكي تنجح طلعنا من البيت ومشينا بالمنطقة احنة نندل الشارع العام لان جنا مرات نجي هنا لبيبي نزورها بين فترة وفترة ركبنا عبرية ووصلتني شيماء على اقرب نقطة للمدرسة يعني اقطع مسافة قصيرة مشري واوصل للمدرسة صاحتني شيماء قبل لا تكول نازل للسايق طلعت من جنطتها فلوس شيماء.. هاج لزمي هذني خليهم يمج ما اكدر اجي عليج للمدرسة وارجعج للبيت لان مثلما تعرفين اتأخر بالدوام فانتي ركبي عبرية مثلما علمتج ورجعي للبيت .. ان شاء الله .. يالله ديري بالج على روحج وصيري سباعية .. لا يظل بالج علية ترة اني هادي اعجبج مينخاف علية صاحت شيماء .. نااااازل واتوقت الكيا ونزلت ورحت كبل للمدرسة والحمدلله امتحنت وخلصت امتحاني وسلمت عالبنات فاطمة وسرى وهديل فاطمة.. تعالي وياي لبتنا عفية .. لا فطومة صعبة لازم الحك اروح اركب عبرية وبيبي كلش صعبة تحاسبنا على كلشي .. والله ماما هواي مشتاقتلج وتسلم عليج .. الله يسلمها والله بس استأذن من شيماء اجيكم . . ان شاء الله طلعت من المدرسة وجان اشوف رائد راكن سيارتة قريب على باب المدرسة شافني طلعت نزل من سيارتة واجة علية ابتسمت من شفته .. شلونج .. صرت بخير من شفتك جان يحجي وعيونه تلمع ونظراته تريد تحضني جان اطول مني بهواي لان اني المعروف عني قصيرة بحيث واكفة يمه ورافعة راسي عبالك جاي ارفع العلم لان هو الله يحفظه طويل وضعيف بس وسيم فديته .. يالله تعالي اوصلج .. وين توصلني مستحيل اخليج تركبين عبرية اليوم الصبح شفتج نازلة من الكية وظل تفكيري كلة يمج اكول شلون راح تدبرها وترجع عبرية لوحدها فقررت منا ورايح اني اوصلج وياي كل يوم .. لا عفية غائد منطقتنا العايشين بيها ناسها تعبانة ويردون بس سالفة يحجون بيها وانت سيارتك حديثة ويشوفوك توصلني والله تنحجي حجايتي وتوصل لبيبي وبابا وبطلوني .. لا يابة لتشيلين هم اوصل بمكان يكون قريب على منطقتكم بشوية وانتي تكملين طريقج مشي لان تحلمين اخليج تمشين لو توافقين اوصلج لو تشتركين بخط وانا ادفع فلوس ابو الخط .. لا مستحيل اخيلك تصرف علية شنو المناسبة همس بصوت ناصي.. لج جنية انا حبيب الكلبما احتاج مناسبة اريد اهتم بيج وارعاج بدون مناسبة انتي مريتي ابتسمت احس كلبي يريد يطك من الفرحة وكلامه الحنون يرويني وافقت اركب وياه لان رائد مو اي واحد كضة طول عمره يهتم بية ويخاف علية وصلت للبيت وشفت ضحى دتبجي .. شنو شبيج منو وياج .. محد وياي .. لعد ليش دتبجين .. خطية قبل شوية خالة ام فرزدق جانت هنا جابها صهيب .. اي كملي .. سلمت عليكم وكامت تسولف وية بيبي اني استغليت الفرصة ورحت اودي دولكة ماي لصهيب جان ينتظر خالة بالسيارة شافني ونزل صهيب.. وربي جنت متأكد راح اشوفج وما جبيت جدتي الا علمود اشوفج واحجي وياج ابتسمت بوجهه جانت بعيونه لهفة كلي.. ضحى اني اجيت علمود اكحل عيوني بشوفتج واسلم عليج قبل لا اسافر للخارج اكمل دراسة انا بعدلي سنة واكمل دراستي اريدج تشدين حيلج وتجيبين معدل اريد كون من ارجع الكاج ناجحة حتى اجيب اهلي ناسي واخطبج من ابوج بس اريدج تصيرين سباعية وتوعديني بالنجاح حتى ارفع راسي بيج كدام قرايبنا لج هدى متعرفين شصار بية من الفرحة اريد اطير .. اي لعد عوبة ليش تبجين .. ابجي عليه راح يسافر وبعد ما اشوفه منا لسنة كلش هواي .. يالله صبراً جميل لا يقلبي مرت الايام وصار رائد كل يوم ينتظرني يوصلني على نفس المكان القريب عالمنطقة حتى لحد يشوفنا جان ابد ما يتأخر بالوقت ولا يحاول يأخرني يكلي انتي عرضي ما احب احد يمسج حتى لو بحجاية جان كلش حريص علية خلصت الامتحانات وكعدت بالبيت وضحى بدت امتحاناتها وكامت تدرس ليل نهار مثل المهووسة خطية شي...... يتبع..... | ||||
|
| |
|
06-07-19, 10:15 PM
| #10 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #أساور_الفضة #البارت_الثامن هدى اليوم اعلان النتائج وجنا كلنا منتظرين بفارغ الصبر نريد نعرف النتيجة خطية شيماء كلفت رائد بالمهمة وهو كللها راح اشوفلج النتائج بالانترنيت واتصل عليج شيماء عندها رقم رائد ماخذته للطوارئ اباوع على ضحى كامت تلوب تريد تعرف النتيجة وما بقى نذر ما نذرته جانت تروح وتجي واني افتر وراها اامن على دعاءها ضحى.. والله بطني كامت توجعني من الانتظار ياربي كلشي ما اريد بس كون انحج هدى .. ان شاء الله تنجحين والله اصلي غكعتين شكغ (ركعتين شكر)لوجه الله تعالى اذا نجحتي ضحى.. اي عفية ادعيلي حياتي كلها معتمدة على نجاحي لحظات ودك نقال شيماء يعلن عن المتصل شيماء صاحت هذا رائد يتصل رحنا ركض يمها ضحى تفرك بيديها ردت شيماء وحطت النقال على اذنها واني وضحى نباوع على معالم وجه شيماء وحركة شفايفها شيماء.. ها رائد بشر شنو نتيجة ضحى لحظااااات ما هي الا لحظات واتغيرت معالم وجه شيماء وصارت الدموع تنزل ضحى رجعت للخلف حاطة ايدها على حلكها منتظرة شيماء تحجي .. رائد انت متأكد جانت تحجي وتبجي .. يالله ميخالف مع السلامة هدى.. ها شنو بشغي (بشري) ضحى محجت اي شي شيماء بصوت هامس .. ضحى راسبة بخمس دروس ضحى كعدت بالكاع متجية عالحايط ودموعها صارت تجري عشرة عشرة متت قهر عليها خطية ولو اني ما استغربت هي رسبت لان جابت السنة كلها متدرس تريد بشهر واحد تدرس وتنجح هاي بكلوريا مو لعب جهال حتى مو كل الشهر درست بي وتريد تنجح ماكو هيج شي رحت يمها وكعدت بالكاع واخذتها لحضني اواسيها .. ضحى عفية لتبجين تغة هاي مو نهاية العالم ضحى.. لج هدى شلون بصهيب وحلمي شيماء.. مسحي دموعج مو هنا وانتهت بعد عندج امل تكدرين تعيدين السنة وتشدين حيلج من بداية الدوام وتجيبين معدل واذا على صهيب فهو حبج لنفسج مو علمود شهادة والدراسة كانت العامل المتمم يسهل طريق زواجكم بس مو شي اساسي واني اعرف صهيب حباب وهو اكبر من ان يزعل عليج علمود النتيجة صحيح راح ينقهرعلمودج بس يبقى يحبج ضحى بأمل.. صدك شيماء يعني عادي اعيد سنة وادرس من جديد .. اي ليش لا بس انتي شدي حيلج .. اي والله السنة الجاية اشد حيلي واكعد ادرس اصلا راح ابدي ادرس من العطلة للسنة الجاية وان شاء الله اجيب معدل واخليه يفتخر بية مسحت دموعها وارتفع الامل بداخل كلبها وبدت تسقيه بقطرات التفائل والاصرار اباوع على شيماء وضحى صافنات كل وحدة همها شكل اتمنيت امسح من على وجههم نظرة الالم وابدلها بنظرة فرح بس مابيدي شي اقدمه الهم رحت يمهم .. اكول ضحاوي عفية كومي سويلنا ريوك بمناسة الدروس الخمسة ضحى.. انجبي حضرتج تصنفين يالله وخري منا لا اطلع حركة كلبي بيج هدى .. خية هاي عين وصابتج والله لازم تحصنين نفسج من الحسد ولو انتي سباعية جبتيها بخمس دغوس حتى تطغدين العين وخمسة وخميسة بعين المايصلي عالنبي شيماء حاصرتها الضحكة .. ادبسزز وخري عنها ضحى ضربتني .. امداج عوبة هاي بدال ما تكعدين اتواسيني غمتني بيدها ضحكت .. اعرف اعرف ميحتاج تأشيريلي بأيدج ادري بيج راسبة بخمسة رجعت غمتني وكامت مبرطمة كوة لامة حلكها .. هسة ما افتهمت وضاعت علية شنو دتغميني لو دتراويني عدد الدروس الراسبة بيهم سبحان الله جايبتهم فيت على عدد الاصابع ظليت افتر وراها وما تركتها تستفرد بروحها وية حزنها ادري بيها تكعد تاكل بروحها احسن شي اخليها تلتهي تتعارك وياي ضحى حاصرتها البجية .. لج هدى ابوس ايدج كافي احلفج بداعت الخوة النظيفة كافي شيماء.. لج هدى كافي ترة اجي اشلع اذاناتج هدى.. يالله هذا هو غاح اسكت بعد ما احجي لان حلفتني بالخوة بس على طاري الخوة النظيفة شلون صدفة حلوة عدد الدغوس الغاسبة بيهن ضحى على عددنا احنا الخوات خمسة ههههه يا سبهااااااااان الله ما حسيت الا على نعال طاير بالهوى من ضحى الحمدلله والشكر رتله لو تحجين عدل شسوين بينا لسانج شطوله طكيتها ركضة واني اضحك عوبة من دودتج اني فغرنسية جانت شيماء كوة لامة حلكها حتى متضحك كدام ضحى ضحى.. وربي مخبلة مو عاقلة اجتي بيبي .. خير شعدكم ملتمات يالله اتحركن سون ريوك شيماء ماجابت سيرة عن موضوع النتائج احسن لان يكعدون يتفلسفون براس ضحى ويرزلونها اصلا هو محد يهتم اذا نجحنا بس اذا رسبنا نسمع الرزايل منهم وواحدهم يسوي روحه براسي بروفيسور اصلا اتحدى واحدهم بيبي او بابا اذا يعرفون احنا بيا صف كامت ضحى تسوي ريوك هي وشيماء ورحت وراهم للطبخ جانن اثنينهن واكفات يم السنك حطيت راسي بينهم وصرت اكلب بعيوني عليهن منا ومنا وهمست .. اكول بنات اليوم شنو من الايام جاوبتني ضحى .. اليوم خميس ليش دتسألين صحت بصوت عالي واني خربانة ضحك على غباء اختي .. يااااااا سبهان الله انه العدد خمسة يظهر لنا من جديد في كل مكان شيماء كعدت تضحك وتغلط علية وضحى دك الجرس عندها متأخر .. ياااا عوبة دتصنفين علية امداج بعد ما احجي وياج .. استغفغ الله هم غمتني بالخمسة لج عيب عليج لتغمين فضحتي غوحج نزلت ايدها بسرعة ضحى.. شيماء الله عليج صيحي بيها ترة والله اكلت كلبي راح اطلع من وراها واصيح بالمنطقة ياناس ياعالم اني راسبة بخمسة خلي الكل يسمع هاي عود واحنا موصينها يبقى الموضوع سر بينا هشكل تسوي بية هدى.. والله موبيدي اني نذل والله نذل كعدنا ناكل ونضحك على فرد صينية الي يشوف ضحكتنا يكول هنيالهم ماعندهم هموم كملنا الريوك وشيماء بدلت ملابسها وقبل لا تطلع بيبي حجت وياها .. اكولج انتي ليش ما تلبسين حجاب شيماء.. ها بيبي والله ما حاطة ببالي مسألة الحجاب ما مهتمة عندي عادي بحجاب او بدون حجاب عندي نفس الشي .. شنو حضرتج ميعجبج تلبسين حجاب .. لا مو قصة ميعجبني بس ممفكرة بي .. ميخالف لازم تلبسين الدنيا تخوف وصاير الخطف والكتل بفلس هدى.. يعني الحجاب غاح يحميها من شغ (شر) الخاطفين شلون تفكير طلع الحجاب بدي كاغد للبنات هي النفوس الضعيفة من تنوي الاذية ما يغدعها (يردعها)لا الحجاب ولا ابو الحجاب غيغ عقلية تعبانة .. ولج هاي عليمن دتحجين شيماء.. مو عليج بيبي جانت دتقصد عالناس الي يخطفون ويقتلون بالبنات عقلهم تعبان .. ها عبالي علية جان زينت راسها .. يالله بيبي اسلم عليكم هم يالله اروح هدى تعالي سدي وراي الباب رحت ورة شيماء حتى اسد الباب شيماء.. عفية هدى الله يرضى عليج لا تتمشكلين وية بيبي تركيها خليها لوحدها تحجي ما عليج بيها ترة تدور حجج .. ان شاء الله صاغ لاتشيلين هم طلعت شيماء واني بقيت انظف وية ضحى بالبيت طلعت كتبي والملازم مال الصف الرابع اعدادي وحطيتهم بعلاكة حتى انطيها للبنات جاوراينا حتى يستفادون منها مضت الايام واتأقلمنا وية بيبي وبيتها وبابا الي كثرت طلعاته ومبيته خارج البيت وكأنما قبل كان يرجع لان احنا لوحدنا وهسة اامن بيبي يمنا ما كمنا نشوفه وبيوم من الايام اجة عمو امجد يحجي وية بيبي ودخل بابا وعمو امجد فتح وياه موضوع خطوبة شيماء فز كلبي بس سمعت بشيماء جايها عريس اجيت ابجي من الفرح واخيراً الله باوع لحالها اختي وصلت لعمر ٢٨سنة ولايوم واحد اجة ودك بابها بالرغم هي حلوة وما ناقصها شي وحدة غيرها المفروض الخطابة يركضون وراها كمت من مكاني حتى اروح افرح شومة وابشرها بالخبر الحلو بس اشو بابا عاط بعمو امجد وكعد يتعارك وياه اثير.. امجد اني كم مرة كلتلك لا تدخل نفسك بموضوع زواج شيماء عاد عمو امجد صار نار كبرة وزمخ ببابا .. لك اثير خاف الله ولا تكسر بقسمة البنية ولك كم دوب تظل هيج يجي عريس لبنتك وانت تطفشه بسوالفك التعبانة .. مالك غرض بنتي وبكيفي ظليت واكفة مصدومة من الكلام السمعته يعني شنو ما افتهمت معقولة بابا هو سبب تعطيل قسمة شيماء زين ليش امجد .. شنو مالي غرض بنتك كبرت وقلوا خواطيبها وراح تعنس من ورة انانيتك .. مو شغلة انانية .. لعد شيسمونها اذا مو انانية .. انا اشوف هذا مو الوقت المناسب تتزوج بعدها خواتها بحاجتها .. وانت من شوكت صرت حنين على خواتها هاي من اشوكت صرت تفكر بيهم بس خلي اكلك اياها من الاخير بدون زعل انت المستفاد الوحيد من تأخير قسمة شيماء .. انا ؟ !! مستحيل متوهم .. لان هي المعيل الوحيد بعائلتك تصرف عليك وعالبيت وعلى خواتها اثير بغضب.. اي يالله وهسة انت شتريد ما عندي بنات للزواج يالله خليك بحالك وعوفني بحالي .. شلون اعوفك بحالك ما اكدر اشوفك تغرك وعائلتك تغرك وياك صعبة ياناس صعبة .. انت مالك غرض .. لك اثير ترة شيماء كبرت لا تكسر بقسمتها والناس راح تاكل وجوهنا ذيج اختها اتزوجت وسافرت من دون علمنا وهاي كبرت ولحد الان ما اتزوجت واحتمال راح يعمن على خواتهن البقية والناس الها الظاهر ماعليها باليصير والمايصير وراح ياكلون وجوهنا بالحجي جنت كلما اسمع كلمة تزيد صدمتي بأبوي يعني لو اسولف سالفت بابا للمخبل البشارع والله ما راح يصدك اكو هيج بشر موجود بالدنيا يملك مواصفات بابا اريد افتهم شنو هو معقولة ماعنده ذرة احساس ادري شنو حيوان ..لا لا والله حشة الحيوان هنت الحيوان من شبهته بأبونا اسمع بيبي تهدي بيهم ومثل كل مرة بابا يمشي الي براسه وطلع عمو امجد من البيت زعلان رحت دخلت للغرفة لكيت شيماء نايمة وضحى لازمة كتبها ودتدرس باوعت عليها شلون غاطة بالنوم من ورة التعب وصرت اتمعن بشكلها جانت اختي حلوة وفاتحة الشعر الي يشبه الليل مثل لون حياتها ناثرته عالمخدة اباوع لطولها تكول نبعة ريحان بس مكرودة اختي ما عندها حظ رحت يمها واتمددت بصفها خطية مدت ايدها وحضنتني متعودة تنومني بحظنها خطية وحتي وهي نايمة تدور على راحتنا وامانا غمضت عيوني واني كلش مقهورة من ورة بابا وصرت افكر لازم ادور على شغل واعيل اهلي حتى بابا يصرف نظر عن شيماء من يشوف اكو دخل ثاني بالبيت ينطي فلوس بس منين الكة شغل خلي اسأل مر اسبوع والوضع على ماهو عليه اكل شغل بيت نوم تالي الليل التلفزيون بالشافعات يالله تخلينا بيبي نباوع وضحى متلهية بالدراسة شكلها ناوية هالسنة تجيب معدل صدك لو كالوا الحب يصنع المعجزات والله لو واحد قبل سنة جايني ويكلي اختج ضحى راح تصير سجاجة وشاطرة واتدرس ما اصدكه وساعتها راح اتهمه بالجنون رحت سويتلها كلاص جاي وانطيته الها رفعت راسها وابتسمت .. عاشت ايدج اجيتي بوكتج اخذته مني وكعدت يمها واخذت كتاب اكلب بي هدى.. شنو ماكو اخباغ جديدة عن حبيب الكلب ضحى رفعت راسها وجرت حسرة .. والله علمي من علمج اخباره توصلني عن طريق خالة ام فرزدق من شيماء تسألها بصورة عابرة عن صهيب وهي تكتفي تكول بخير من الله والحمدلله جنت اتمنى اعرف عن اخباره اكثر اتمنى اعرف كل صغيرة وكبيرة بحياته اتمنى اتصل عليه واتطمن على احواله اووف تدرين شكد محتاجة اسمع صوته محتاجة اسمع نبرة الحنان الي بصوته اتخيلي اني مجرد اشوف خالة ام فرزدق جدة الحبيب اني يزيد حماسي واروح اهد عالكتب واكلهم اكل بالدراسة فما بالج اذا اسمع صوت الحبيب بنفسه هدى.. لا عمي كعدي وستغي علينا لانوب تغحين تاكلين بيبي سليمة وتسممين جنت احس بلهفة واشتياق ضحى لصهيب لان اني امر بنفس الاحساس واللهفة لرائد وهم مابيدي شي اسويه حتى اشوفه او اسمع صوته هي زين اذا جانت تسمع اخبار صهيب عن طريق خالة ام فرزدق اني ماعندي اي حلقة وصل وية رائد دخلت علينا بيبي .. حضروا روحكم اليوم نروح لبيت عمكم امجد ننتظر اختكم ونروح حتى ابوكم يوكع على امجد ويستسمح منه .. صاغ بيبي للعصر اجتي شيماء واتحضرنا واجة بابا واخذنا لبيت عمو امجد الجديد جانو ستوهم مخلصين بناء ومنتقلين احنا جايين الهم قبل لا يهدمون البيت ويبنوا من جديد عمو امجد من بعد السقوط اموره استعدلت لان هو رجل حريص ويفكر بعائلته عكس اخوه تماماً دخلنا للبيت جان كلش مرتب ونظيف مرت عمي جنان كلش نظيفة عندها هوس مال نظافة ونظام ومتخلينا نلمس اي شي ببيتهم هي من قبل من جنا صغار هذا طبعها ضحى .. الله بيتهم شكد حلو شيماء.. كولي ماشاء الله .. ما شاء الله هدى.. خمسة وخميسة بعين المايصلي عالنبي ضحى .. هههه دمج خفيف ما تضحك صارت قديمة هدى.. شنو هي القديمة ضحى.. هدى ابد مو وكتج تلمحين عالرسوب ترة عيب نكعد نتعارك كدام الناس .. ههههههههههههههه خغب يومج تدغين جنت ناسية وذكغتيني ههههههههههههه خغب يحسبون ان كل صيحتاً عليهم والله الي على راسه بطحة يتحسسها شيماء.. ااش كافي سكتوا اجتي مرت عمو امجد وسلمت علينا ضحى .. شلون اتمنى اشوف بيتهم _ لج كعدي وسكتي لاتسمعج والله تنجلط تتذكغين من جنا صغاغ شلون جانت تتخبل من تشوفنا داخلين لغغفتها (لغرفتها) _ ههههه اي اتذكر جانت متخلينا ندخل غرفتها او نلمس اشياءها حاجتها عزيزة _ فما بالج هسة وصاغ عندها بيت جديدة احتمال تكهغبنا (تكهربنا) بالعصا الصاعقة اذا اتجغئنا ولمسنا غغاضهم (غراضهم) وابو طبع ما يغير طبعه شماء.. اكول خالة وين مريم اشو ما اجتي تسلم علينا جنان .. دتسبح بس تخلص من حمامها تجي تسلم عليكم ظلينا نسولف وية خالة جنان وعمو وبابا وبيبي يسولفون عن الانتخابات ومرت نص ساعة ومريم ما بينت صدك اتنرفزت انتبهت لشيماء عينها كل ساعة تروح على باب الاستقبال تريد تشوفها اعرف اختي شومة مشتاقتلها بس ما تتجريء تحجي ما اتحملت كمت من مكاني .. خالة عن اذنج اغوح اشوف مغيم وين صاغت مو عبالك الحمام طول طفرت من مكانها بسرعة .. لا حبيبة ارتاحي بمكانج اني كايمة اصيحلها حجيت بصوت ناصي .. عابتلها والله كمزتني حسستني عبالك فايروس ضحى .. عمة حتى عمة شنو قابل راح ناكلها شفتيها شلون كمزت من مكانها .. لج لا مو علمود مغيم كمزت لج هاي علمود اني لا اكوم واغوح ادخل لبيتها تخاف على غغاض(غراض) بيتها من عندي لان اني تاغيخي (تاريخي)يشهد بالتكسيغ ضحى.. ههههههه اي عفية صدك مشهودتلج شوية ودخلت مريم اختي ما شاء الله كبرانة جانت لابسة بطرون جينز من هذا الموديل الحلو وشعرها مسويته ظفيرة صفح ومخليتها على كتفها ما شاء الله حليانة ضحى .. لج باوعي صايرة تشبه البنات التوب الي شايفات نفسهم اباوع عليها شلون سلمت على شيماء خطية شومة اخذتها لحظنها وصارت تبوسها على خدها وهي تسلم عليها من ورة خشمها وباوستها بالهوى واجتي سلمت علينا اني مسويت مثل شيماء اكتفيت بس سلمت عليها بالايدين وبعد انتهاء السلام وسألتها .. مغيومة انتي هسة بيا صف كعدت وحطت رجل على رجل واخذتلها صفنة اتوقع مسمعتي سؤالي جاوبتني ورة فترة .. اني بصف السادس الابتدائي ظليت فاتحة حلكي مصدومة ضحى راصة حلكها وتحجي من بين اسنانها .. لج هدى عوبة سدي حلكج فضحتينا .. ولكم هدوني عليها الثولة شلون تتشخص وشايفة حالها علينا شيماء .. بنات كافي هدى لخاطري سايريها .. شسايغ منها مداتشوفيها شلون حامضة .. اختنا وغصبن ما علينا وعليها نبقى خوات عمو امجد حجة.. بابا مريومة اخذي خواتج وراويهم البيت هو جان يحجي وعمة جنان جانت تشرب بالجاي شركت من سمعت كلامه وعيونها اجتي تطلع من مكانها مريم دارت على جنان تسألها .. ماما اخذهم اراويهم البيت ؟؟ جنان ببتسامة صفرة .. هه حبيبتي اخذيهم وشوفيهم غرفتج جانت تحجي وتباوع بعيون مريم وكأنما اكو بينهم لغة مشتركة يستخدمونها اذا كان بينهم واحد غريب مريم.. يالله بنات امشوا خلي اراويكم البيت اخذتنا كبل صعدتنا فوك شفنا بطريقنا الصالة المفتوحة والدرج الدائري وصلنا لغرفتها بس ما شاء الله شلون غرفة حلوة ضحى بأنبهار .. الله تجنن عبالك مال اميرات .. هذا بابا اشتراها الي شيماء.. الف عافية حبيتي جانت غرفة بيضة بناتية كيوت اجيت اكعد السرير صاحت بصوت كمزتني مريم .. لاااااا كمزت من مكاني .. شكو ياستار .. لتكعدين على سريري ماما متقبل .. استغفغ الله هاي ماما شكلها مسوية غسيل مخ للبنية ضحى.. اشش سمعتج ترة .. وخليها تسمع باوعت لمريم .. انتي ليش هشكل تتصرغفين (تتصرفين)ويانا باباتي سمعيني زين تغة احنا خواتج فاهمة شنو خواتج يعني اقغب(اقرب) شي عليج من هذولي كلهم لاتخلين دلال جنان ينسيج خواتج ويخغبج (يخربج)علينا ظلت تباوع علية بعناد .. ماما وبابا اخواني همة اغلى ما املك لتكعدين تحشين عقلي بكلامج الاسود ما تنلام ماما من تكول لتطويلن وياهم بالكلام ولاتكعدين يم خواتج هواي لا يخربون اخلاقج ويأثرون على تفكيرج انصدمنا بكلام اختنا الصغيرة وصرنا وحدة تباوع بوجه الثانية وبيومها رجعنا من بيت عمو وجوهنا ما تتفسر بالليل نايمة يم شيماء جانت تلعب بشعري وصافنة بغير عالم .. اكول شومة عجبج اليوم تصغف مغيم (تصرف مريم)؟؟ .. لا ما عجبني وهذا الشي يحز بخاطري اشوف اختي بعيدة عنا وتتعامل ويانا وكأنما غريبات عليها بس ما باليد حيلة اني لو علية ما اخليها تروح تعيش بعيد عنا حتى لوجان عمو مو غريب بس تبقى هي اختنا من لحمنا ودمنا واحن عليها وتحن علية .. لتضوجين نفسج هو حتى لو جان الموضوع بيدج هي غاح تبقى تغفضنا (ترفضنا) جاوبتنا ضحى الي جانت متمددة بفراشها ..بنات خلونا نحجي الصدك لو كنتوا انتوا بمكانها وابوج بنطيج وانتي صغيرة لحمة حمرة لغير عائلة وتعيشين وتكبرين بينهم وتعتقدين همة اهلج وهاي العائلة تعاملج مثل بنتهم وموفرين كلشي الج شنو يكون جوابج اذا خيروج تكنين الولاء لأحد الطرفين منو راح تختارين بيهم خواتج الي همة اصلا ما لاكين مكان يأويهم لو عمج الي اتبناج واجتثت وطلعج من عيشة مرة صعبة جانت ضحى تحجي ووية كل كلمة جنت اتخيل حالي بمكانها .. ما اعرف الخيار صعب انتو خواتي وهذلي الاهل الي ربوني .. لا غلطانة انتي دتحجين هشكل وتواجهين صعوبة بالاختييار لان عشتي ويانة واتربيتي بينا بس بحالة مريم اذا خيرناها راح تختار عمو امجد وخالة جنان بدون اي شك لان هي اصلا ما تربت بينا ولاتعرفنا ومبينا غير بس السلام والمجاملة شيماء.. كلامج صحيح بس عمر الظفر ما يطلع من لحمه تبقى اختنا لابد وان يجي يوم ويحن كلبها علينا .. الله كريم مرت علينا ايام العطلة ثقيلة وبطيئة لان ملل لاطلعة لامشية بس بيبي تطلع تروح زيارة لو تسير على صاحباتها بالمنطقة التغيير الوحيد الصار هو شيماء بدت تتغير صارت تهتم بملابسها ووجها بدة يورد احس اكو شي ورة هذا تغييرها واليوم اتفاجئت بشيماء مشترية. مجموعة شالات وواكفة كدام المرايا دتتعلم شلون تلبس الحجاب ظليت طول اليوم افتر وراها واسألها شعجب قررت تلبس حجاب معقولة بيبي ورة اتخاذ القرار لا اكو واحد ثاني ورة قرار لبس الحجاب شيماء.. دخيل الله شكد فضولية و لزكة .. ما دام تعغفيني(تعرفيني) لزكة اذن معاناها تعغفيني ما راح اعوفج الا تكليلي منو وغة (قغاغ)قرار لبس الحجاب دنكت وهي تضحك امري لله خلي احجيلج تتذكرين من حجيتلج ذاك اليوم عن الضابط .. اي اتذكغ حتى بوكتها بيبي قاطعتنا حتى ما لحكت اعرف اسمه .. اسمه ليث العمر ٣٦سنة ضابط يداوم بوزارة الدفاع ببغداد واهله من البصرة بس هو عايش ببغداد .. الله شنو هاي المعلومات الخطيغة (الخطيرة)منين جبتيهم .. صبري علية جايتج بالكلام ............... اني بذاك اليوم ظليت مصدومة من كلامه وتلميحه حسسني اني سهلة ومتوفرة لكل رجل يطلب مني اقترب منه شيماء .. مو ذنبي انت تفكيرك تعبان اني بحكم عملي يقتضي ان اعالج المرضى حالي حال الدكتورة في غض النظر عن مستوى الشهادات لكن الطريق واحد اثنينا نتعامل وية المرضى .. انتي ليش عصبية اني سألتج سؤال وردت الجواب ومن خلال ردج عرفت الجواب فتحت حلكي اريد احجي هو قاطعني .. خلصتي شغلج هنا باوعت لصينية الادوات .. اي خلصت انطيتك علاجك بالسيروم .. خلاص تكدرين تطلعين برة وتسدين الباب وراج احس صرت نار كبرة من ورة اسلوبه المستفز وهذا الشي جديد علية اني طبعي هادئة ومو اي واحد يكدر يستفزني بس هذا مصارلي عشر دقايق يمه طلع اسوء ما عندي من تصرفات وخربط مشاعري صرت اتكلب ما بين حذر خوف برود ارتباك وترقب طلعت من غرفته واني ادردم عليه جريت نفس عميق وانتبهت على روحي جنت حابسة الانفاس واني يمه عمة العماني عبالك جنت داخلة اختبار مشيت لغرفة الممرضات ونزعت الكفوف البلاستك وذبيت الادوات المستعملة بسلة الزبل ورحت للوكر الخاص بية فتحته وطلعت حافضة الاكل مالتي الي جايبتها وياي من البيت اني اكره آكل من اكل المستشفى متعودة اجيب اكلي وياي اجتي رباب .. هاي شبيج .. شكو ما بية شي .. مريتي من يمنا اني والدكتور صلاح جنج عاصفة حتى ما سلمتي .. تصدكين ما انتبهت عليكم .. هو لعد اني ليش اسألج شبيج .. سكتي هذا الضابط الغضبان اليوم رفع ضغطي الله يلعن بليسه حطم اعصابي .. قصدج ليث .. صلوات طلع اسمه ليث ؟؟ ما استغرب اسمه ليث شكله مال غابة .. اي حبيبتي هو ياهو ما يعرف اسمه لج سكتي لو تشوفين الدكتورات والممرضات شلون كعدن يزحفن عليه بيني وبينج الحجي بالحقيقة هو يستاهل الزحف .. عمة حتى عمة على شنو يزحفون ياحظي اشو اجلح املح .. ياااا اشوفج تكولين ضغطج مرتفع منه الظاهر الاخت اخاف ضكتي ملوحته ببوسة شهكت وضربت على صدري .. عمة بعينج رباب اني كم مرة منبهة عليج ما تستخدمين وياي هيج الفاظ عدنا بعض الممرضات بحكم الميانة دائما يكون السانهم زفر وجريئات بالكلام وخصوصاً اذا كنا لوحدنا بفترة الاستراحة يخلصنها كله غلط بالقلم العريض لو يسولفون بسوالف ونكات جريئة اتعودت عليهم بس رباب صديقتي اعرفها جانت وياي من ايام اعدادية التمريض كله سوية واعرف تربيتها واهلها ناس محترمين بس هي من خلال العشرة وية الممرضات صارت تحجي مثلهن بس ما مشت بطريقهم يعني بس كلام وشقة غيرها ماكو بس المشكلة كان اكو كم ممرضة عندنا بالمستشفى سمعتهن زفت يشتغلن بقسم الولادة كل يوم جايباتلنا مشكلة شكل تصير بقسمهم بس مع الاسف هذني الممرضات وسمعتهم الموزينة مأثرات على سمعة بقية الممرضات واني من ضمنهم اتخيلي وصلت بية مرحلة استحي اكول اني ممرضة واشتغل بالمستشفى كبل المقابل ياخذ عني فكرة ان اني مو زينة مثل حضرة الاستاذ ليث الناس عليهم بالظاهر ........ رباب..يالله ست شيماء اسفين بعد ما نغلط بالله احجيلي استاذ ليث ليش رافع ضغطج حجيتلها عن الصار وعن كلامه رباب .. شكل الاستاذ ناوي عليج .. شنو ما افتهمت .. لج ديلمحلج يجس نبضج يريد يعرف انتي من يا نوع السهل لو الصعب .. لا والله حلفي .. صدكيني تصرفه وكلامه وياج يثبت صحة كلامي لان هو ابد ما يحجي وية الممرضات وقليل الكلام وية الدكتورات عند الحاجة يحجي وياهم لج العوبة سندس سحلت روحها سحل علمود ينطيها وجه ولا عبرها بالاخير ايست وكامت تسميه الحجر تكول خالي من المشاعر .. والله صدك اسم على مسمى الحجر يلوكله لان كلش ثقيل وبارد .. بس حضرتج اليوم نطقتي الحجر وكام يحجي وياج وهذا بحد ذاته مؤشر يدل على الاعجاب ياحلوة .. لا يابة كولي غيرها شمعنا اني اشو حتى شكلي ما يساعد على الاشتعال رباب .. شيماء صحيح انتي ما مهتمة بروحج بس كلمة حق تنحجي انتي عندج هالة مال براءة تحيط بيج تخلي الواحد غصب عنه يلين كلبه لو جان من حجر مثل صاحبنا طبعاً .. ههههههههه لج حبيت نفسي من ورة كلامج رباب الله يجبر بخاطرج رباب.. لج ثولة اني ماجبت شي من جيبي هذا واقع بس لو شوية تغييرين تسريحة شعرج الكباية يعني اني لو منج وما لابسة حجاب وعندي مثل شعرج تلكيني كل يوم مسوية بي فيكة .. ادري قابل اني عارضة ازياء لو ممرضة طبعا اسوي كباية عملية اكثر ومتاخذ من وقتي ولا تزعجني بأثناء العمل .. ظلي جنج امي لا والله حتى امي احسن منج هم عندها فيكات تسويهم بتالي الليل لبابا .. عزة بعينج لج عوبة عيب هالحجي .. خاب ما تطيرين احنا هذا الحجي قبل مو هسة يابة كبرنا وصرنا مفتحين باللبن وكلشي نعرف بس خلي اضحكج على امي وابوي عبالهم احنا بعدنا صغار وما نفتهم من يكعدون يحجون بالالغاز ويلمحون لبعض كدامنا مثلا ذاك اليوم ابوي يكول لأمي بصوت عالي ( اليوم خميس ) عباله ما نعرف شبي يوم الخميس ههههههههه بس احنا بمزاجنا نعبرها الهم نسوي نفسنا منفتهم كدامهم .. خرب يومج رباب صدك ضحكتيني يالله دكومي خلص وقت الاستراحة لا تجي علينة الممرضة الاقدم تشحتنا وتشوفنا نسولف طلعت وكملت يومي كالمعتاد واني افكر بكلام رباب معقولة يكون حجيها صحيح بخصوص ليث اذا كان كلامها صحيح اذن لازم اتجنبه هيج نماذج تخوف اني مو بكده المشكلة بهذا الاسبوع اني المسؤلة عن تقديم العلاج بهذا القاطع الي بي هو وصعبة اتجنبه بس كدرت الكة حل مؤقت هو كان قاطع بي اسرة المرضى يفصل بينهم ستائر الا هو حضرته مخلينه بجناح خاص لان حضرته ضابط وقسمتي شمرتني يمه شلون حظ كمت اخلص واجبات كل المرضى ومن اوصل يمه بتقديم العلاج اكلف وحدة من البنات تروح بمكاني تنطيه علاجه وتبدله السيروم واذا كان يحتاج تبديل ضماد او اي شي ثاني تسويه بيوم مناوبتي على هذا القاطع مثلما اتعودت لازم افتر وية دكتور صلاح وانطيه بيانات ومعلومات عن كل مريض دخلت اني ودكتور صلاح على غرفة ليث جان كاعد متجي وجان وجهه شوية متحسن ملابسه مرتبات مو مثل ذاك اليوم جانت مهوسة بعدما كصيته كص رفعت راسي وجان تجي عيوني بعيونه عزة شكد عيب انتبهت عليه رافع حاجبه شكله فهم نظراتي غلط فتحت الفايل الخاص بي ودفنت راسي بي ورحت اقتربت من يم السرير وطلعت جهاز قياس الضغط من جيب المانتو مالتي اقتربت منة جان طولي واني واكفة حد بحد وية مستواه هذا وهو هشكل طويل زين اذا واكف على رجليه شطوله ما شاء الله عليه مد ذراعه وكان لازم الزمه بس ما اعرف شصار بية من لمست ذراعه احس اتكهربت وايدي صارت ترجف عبالك اول مرة اتعامل مع مريض اتذكرت التوتر بايام التطبيق شلون نكون مرتبكين لفيت الجهاز على العضد ما شاء الله عليه زند مبروم عظلي انتبهت عليه مسوي وشم صغير بزنده كان عبارة عن اول حرف من اسمه لطالما اني اقيس بالضغط ما رفعت عيني من على ذراعه حسيت هذا اامن مكان اباوع عليه لان اخاف احط عيني بعيني انخبص واظل ادعم جيكت الضغط وفتحت الجهاز من على زنده والتفتت عالدكتور وانطيته الدرجة واخذت الفايل وكعدت احجي اني والدكتور مستخدمين المصطلحات الطبية الموجودة بالفايل وكتب الدكتور على الفايل يدون المعلومات ..شومة عندج الضماد بمنطقة الخاصرة لازم يتبدل متعودة على الدكاترة والدكتورات كلهم يصيحوني شومة .. تمام دكتور جنت احجي وية الدكتور واكتب الملاحظات قاطعنا صوته جلة حنجرته بصوت خشن يعلن عن وجوده ويانة رفعت راسي اباوع عليه خزرني بعيونه متضايق من الوضع رجعت كملت كلامي وية الدكتور وهو كعد يحجي وية الدكتور بين ما جنت ارتب بالفايل وبعدها الدكتور استأذن منه وطلعنا بعدها افتريت على كل المرضى وصرت اسوي الي كلي عليه الدكتور بس من وصل الدور لاستاذ ليث رحت صحت لسندس وكلفتها بالمهمة هي فرحت ممصدكة وراحت تبدله الضماد واني رحت اخذت مكان سندس دقايق واجتي سندس وجها احمر تريد تنفجر من الغضب شيماء.. ها شو رجعتي شبسرعة خلصتي تبديل الضماد سندس.. لا ما لحكت ابدل الضماد ما انطاني فرصة افتح حلكي كبل من شافني دخلت وبيدي العدة سألني كم سؤال عن المسؤول عن تبديل الضمادات وجاوبته كلتله هذا شغل زميلتي شيماء هي المسؤولة بس هسة هي مشغولة عندها حالة طارئة هو عاط بية ورفض يبدل الضماد وكال ترحين تبلغين زميلتج اذا ما اجتي تبدل هي الضماد بنفسها لا ورب الكعبة اكوم احرك المستشفى على راسها. فاااااهمة حجاها بصوت عالي رج اركان المستشفى الله يلعن بليسه كمزني من مكاني .. اللهم صبرج يا روح هاج لزمي جيكي هذا المريض بين ما اروح للاستاذ اشوفه شيريد جنت احجي بلا مبالاة بس بداخلي كله يرجف جنت امشي ورجلي تطك برجل دكيت الباب ودخلت عليه لكيته كاعد ينافخ ما حجيت اي شي وما سألته ليش طلبني كبل اتجهت على علبة ادوات تغيير الضماد وحطيتهم على العربة تصير تشبه عربة تقديم الطعام دفعتها وقربتها من السرير بس ابد ما وجهتله اي كلمة او اي نظرة جنت اقتربت من عنده وفتحت الشاش جاي افتح حلكي واطلب منه يتمدد بس ما لحكت ما حسيت الا وهو لازم معصم ايدي وساحبني عليه شهكت مصدومة من حركته المفاجئة ورفعت راسي واجتي عيني بعينه حجة بصوت هامس كلش قريب على وجهي لدرجة انفاسه الحارة لفحت خدي .. شنو حضرتج كاعد تصرفيني ............................. ضحى بصوت عالي شكاعد تسووووووون كمزنا اني وشيماء من مكانة هدى.. عمة حتى عمة كمزتيني عوبة شيماء.. وكعتي كلبي عبالي بيبي ضحى.. شنو جنتو تحجون يالله كليلي شيماء غمزتلي ما اكول شنو جنا نحجي اني متعودة على خواتي اني منبع اسرارهم هدى.. هيج جنا نحجي عن ملابس المدغسة (المدرسة) ضحى.. اي صدك شيماء شوكت تاخذينة نروح نشتري ملابس المدرسة شيماء.. ان شاء الله باجر اخذكم للسوك تشترون ملابس يوم ثاني خلصنا شغلنا وجهزنا نفسنا حتى نطلع للسوك دخل بابا للبيت وشافنا جاهزات اثير.. شنو وين طالعات انتي وخواتج شيماء.. اريد اشتريلهم ملابس للمدرسة الاسبوع الجاي دوام باوع علينا وكال .. زين ضحى المن طالعة وياكم .. اي غير هي هم اشتريلها ملابس مدرسة .. لا ما يحتاج تشتريلها ملابس مدرسة ضحى بعد تبطل وتكعد بالبيت ضحى بخوف.. لا عفية بابا ليش ابطل .. لان حضرتج راسبة وتردين تعيدين سنة ثانية يعني خو ما اكعد اصرف على حضرتج .. لا بابا الله يخليك ما اريد ابطل ابوس ايدك اذا على الملابس هذا هو ما اريد عندي قديمات مالات اولت العام ادبر اموري بيهن بس لا تبطلني اثير.. خاب ما تاكلين تبن هو انا اختج مروة الشاطرة من شفت مصاريفها كثرت ردت ابطلها واكعدها بالبيت مو انتي الكسولي كاضيتها نجاح بالدفرات قرار بابا صدمنا اني وخواتي ضحى بساعتها فرت روحها من البجي ووكعت وصلة من السانها بس تتوسل لبابا يتراجع عن قراره شيماء واني ظلينا هم نتوسل بس هو ابد ما رف له جفن ولا رف كلبه علينا ولا هزته دموع ضحى بيومها طلعنا اني وشيماء واشترتلي قميص وحذاء وصدرية بس جنا مالنا واهس مقهورين على ضحى الي تركناها لوحدها بالبيت تبجي لازم اليوم نطلع لان شيماء ماعندها بعد وقت فراغ تاخذني بس هذا اليوم مرت الايام وبدت المدارس وضحى بطلها بابا بالرغم اتدخلت هواي اطراف حتى يقنعون بابا يتراجع عن قراره بس هو ماكو معند رافض ترجع للدوام وصارت ضحى تعض ايدها من الندم الف مرة باليوم لان فرطت بدراستها وما جانت مسوية حساب لهذا اليوم ضحى.. لو جايني واحد قبل سنتين ويكلي راح يجي اليوم الي تتوسلين بي علمود تدرسين جان خربت من الضحك عليه عظت ايدها بحركة قلب .. ااااااااااخ مني شكد غبية بس ضحى رغم هذا كله ما بطلت محاولاتها وية بابا بين فترة وفترة تروح تتوسل وترجع خالية اليدين اني بقيت على نفس مدرستي ما نقلتها شيماء كالت .. هدى انصحج تبقين بمدرستج نفسها ما تنتقلين .. والله ياريت ما اريد انتقل وابتعد عن صديقاتي .. لا اني مو علمود صديقاتج كلت هشكل اني كنت اقصد على مدرستكم جدا نموذجية وبيها كادر تدريسي درجة اولى عكس المدارس الي هنا رحت استفسرت عنها كالو مو زينة والوضع عندهم حلل وفوضى وما بيها كادر تدريسي مضبوط عندهم النجاح كله بالرشاوي يعني بأختصار تنطي فلوس تنجح تدخل عندي دروس خصوصية انجحك هيج ماشي نظامهم ومن عندها صرت اداوم بنفس مدرستي والتقيت وية صديقاتي ياربي شكد مشتاقتلهم وبيومها حليت من المدرسة واني كلي لهفة وشوك لمحبوبي عيني عالطريق انتظره يجي بس خلص الوكت ورائد ما اجة يالله الغايب عذره وياه عدلت جنطتي على ظهري ورحت امشي للشارع العام حتى اصعد عبرية واكفة على عالشارع منتظرة الكيا وجان تطبك سيارة عالية كلش حلوة رفعت راسي وشفته رائد دكلي هورن يمة كلبي طار وراح لعنده نزل من السيارة وعيونه تبتسم .. ااااااااخ يابة وربي مشتاقلج بكدر رحمة الله .. اني هم مشتاقتلك جانت هاي اول مرة احجي وياه هشكل منطلقة فتح باب السيارة وصعدت صعد ودار وجهه علية.. عيدي شنو كلتي ستوج دنكت .. لا ما اعيد اني كلمتي وحدة ما تصيغ ثنين .. لج ما تدرين شيصير بكلبي من اسمع برتلة السانج واليسمعج يكول هاي اصلها فرنسي همة كله هشكل يحجون غا غو غي .. اي لعد ذكرني اسأل بيبي سليمة عن اصل جدي بس لا يطلع جدي السابع عشغ نابليون بونابغت (بونابرت) .. صدقة لربج اريد جهالي كون كلهم يطلعون يرتلون على امهم استحيت من عنده وغيرت الموضوع .. اي صدك ليش اتأخغت عبالي ما غاح تجي علية .. لج شتحجين جنت اعد ايام العطلة يوم يوم علمود اشوفج بس بأخر لحظة امي طلعتلي بسالفة تعال وصلني بطريقك لبيت جدي ورحت ولزمني الازدحام ماظل سايق بالشارع ما سبيته وغلطت عليه. جنت اريد بس اوصل بس الحمدلله لحكت عليج .. اكول غائد امك تعغف بيك انت توصلني .. لا ليش .. اي احسن .. ليش واذا عرفت وشنو يعني ما مسوين شي غلط .. لا عيب من عندها خاف تاخذ عني نظرة مو حلوة وعبالها استغلك حتى توصلني كل يوم .. انتي ما عليج بس طلعي هاي الافكار السودة من راسج وخلي الباقي على الله .. وصلني مثل كل يوم لاقرب مكان على منطقتي وكملت الطريق ووصلت للبيت لكيت شيماء وضحى موجودات دخلت للغرفة وكعدت ابدل ملابسي جنت بطرك الملابس الداخلية وفجاءة انفتح الباب ودخلت علية بيبي سليمة شافتني وشهكت وضربت على صدرها .. يمة دخيلك يا ربي هاي شنو ولج يتبع | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
1Likes
العرض العادي
