عجاف القلوب / للكاتبة شمس السعدي ، عراقية مكتملة

لامارا · 31-07-19, 08:37 AM

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته

نقدم لكم رواية
عجاف القلوب
للكاتبة / شمس السعدي

قراءة ممتعة للجميع.....

لامارا · 22-08-19, 01:36 AM

رابط لتحميل الرواية هنـــــــــــــــــــــــ ـا

بسم الله الرحمن الرحيم

السلام عليكم ورحمة الله وبركاته كيف حالكم إن شاء الله دائما بخير ؟

مساء الورد وسعادة عليكم حبايب ..
اشتاقيت الكم موووت ..
كل عام وانتو. بالف خير .. ويارب سنة خير وسعادة ع العراقيين جميعا وخاصه حبايبي ومتابعيني بالواتباد ..

قلوب عجاف لاتعرف الرحمة ..
هل حاولت أن تبقي عيناك جافة من الدموع
في دنيا تملئها القلوب القاسية ...؟
هل جربت أن ترفعي راية التحدي في وجه
حظك العاثر.....؟
هل فكرت بأن الدنيا حقيره ولاتستحق
أن تحزن من اجلها.....؟
هل حاولت ان تعيشي الفرح بالرغم من الحزن
هل جربت ان تقفي في وجه دموعك وتمنعيها من السقووط والانهماار.......؟
هل فكرتي بأن الحياة واحدة وحاولت ان تعيشيها ذكرى واحدة...!
تساؤلات كثييرة تمر بمخيلتي....
فلا أعلم إن كان للفرح طعم دون ان تسبقه مراره حزن......
الايام تمضي والاحزان تتزاحم.....
في زمن نحن احوج فيه الى السعادة....
في زمن غاب عنه اصحاب القلوب...
وكثرت فيه تلك القلوب القاسية....
فإلى متى ونحن نجيد سوى الاستسلام في شتى امورنا....؟؟!!
فلقد أصبح لكل منا موطنا من الحزن يسكنه..
ويضع الاغلال والقفال عليه ليكتمها بين احضانه........
قصة اجتماعية رومانسية من الزمن الجميل الى الان قصة حقيقيه من محافظة الديوانية انتضرونـي قريبا ..
تحياتي لكم احبتي .

لامارا · 25-08-19, 12:07 AM

//// البارت الأول ////
عجـاف_القلـوب ..
الكاتبـة_شمـس ..

♣عجاف القلوب لن ينفع معهم ودٍ .. حتى لو زرعت لهم سبع سنين سنابل حبٍ ..
عجيبة تلك النّفس البشرية كم تمتلىء بالتناقضات ..
بين قلوب صافية كماء السّلسبيل..
و قلوب عجاف يلزمها التّعديل ..
اني ياقوت اهلي وناسي كلهم يگلولي ياقوتة .. من الديوانية بنت شيوخ وعشاير واصحاب گيعان ..
ابوي ماخلف غيري ..
وتوفى الله يرحمة .. امي تمرضت بعدة وماتت زوجونـي الابن عمي اكبر مني بأكثر من عشر سنوات واني جنت طفله ..
فتحت عيونـي عليه وحبيتة ..
وماحلالي رجال غيرة .. رغم هو عصبي ومايتفاهم ..
بس حبي اله عمانـي ونطيته مالي وحلالي كله ..
وخلفت اله ثلاث ولد وبنية سميتها درة ..
لأن تشبهني بعيونها زرگ مثل عيوني بس هي مملوحة ماخذه سمارها من ابوها ..
اني صاحبة جسم وضخامة وبياض الكل يحمد بجمالي وعيونـي زرگ على امي الله يرحمها ..
بس اني ماهمنـي الناس الي تشوفني حلوة همي حاكم وبس ..
ابو اولادي وابن عمي ..
ابنـي الجبير اسمة امير
والوسطانـي علي
والصغير حيدر
واخرهم درة گلتلكم عنها ..
عمامي صعبين وولدهم مثلهم ابن عمي الجبير راد حاكم الاخت مرتة وعساس تتم الخطبه وحاجين بيها ..
بس بعد وفاة ابوي عمي اخذني الحاكم والهيج الكل كرهنـي وعبالك اني الاخذت حاكم وجبرته عليه ..
صارت مشاكل هواي .. ببيت عمي ومرت حماي الجبير اسمها سهيلة ..
كل شويه مطلعتلها سالفه عليه وتخلي عمي يحجي ..
وحاكم يجي عليه ويگلي بيتنا جان هادئ وخالي من المشاكل من يوم الاجيتـي انگلب ..
ياقوت .. حاكم اني شمسويه شو اگعد من الصبح اخلص شغلي واگعد ادرس جهالي ..
والله استحي منهم كل يوم واحد معاركني گدامهم وعمي مرات يضربني واني مامسويه شي ..
ترى استحي اني مو زعطوطة وجهالي كبروا وگامو يحسون واني بنت عمكم مو غريبه وهيج تسوون بيه شو الغريبة محترميها اكثر مني ..
حاكم .. اووووه. بدت اسطوانتج . شگد تحبين النكد يامرة الغريبة التحجين عليها شوفي شلون تتلگى ابوي وتتلگانة بالصلوات من نجي من الشغل ..
وتصب الغدا وتحضرة وانتي گاعدة بحجرتج ..
ياقوت .. ياااا وسفه عليك ياابن عمي هسا صارت الغريبه احسن مني .. جيف هي تعرف تتملگ وماخذتكم باللسانها اسألوا عمتي الحجية وهي تگللكم ..
شو من الصبح الحد ماانام اني اشتغل وماگاعدة وحتى خبز اخبز ..
بس هي لان عندها رجل يدافعلها محد يطخ ثوبها ..
اني حجيت هالكلمة وهو انگلب وحش عليه ..
حاكم .. بنت الكلب شنو قصدج اني مو رجال .. والله مايلام ابوي من يضربج يرادلج تربية الظاهر امج الفگرية ماعلمتج الادب ..
ياقوت .. حرام عليك حتى الميتين ماخلصوا منك شنو ذنبهم تغلط عليهم بدل ماتترحملهم ..
اني احجي والضرب من كل جهة اجاني ومااگدر احجي لو اصيح .. مااريد سهيله تتشمت بيه ..
تعودت انضرب واسكت ..
اولادي يگعدون بالزوية مال الغرفه ويبجون عليه ..
وامير مايقبل يدفع بأبوه ويگله لاتضربها يخاف عليه ..
بسبب صوت عياط جهالي ..
اتجمع البيت عليه ..
واولهم سهيلة ..
واگفه ونضرات الشماتة بعيونها ..
الحجية .. يايمة شبيك وي مرتك ليش هيج تضرب بيها ..
حاكم .. يمة رحمة الاهلج اسكتي .. ماتشوفين السانها شطوله وماعاجبها العجب ..
سحبت روحي بالگوة منه وشردت الغرفه عمتي الحجية .. وهو يتوعد ويهدد الي ..
تالي بالگوة اجة حماي الجبير وسحبة مني وگاله العن الشيطان ..
وفرحت عبالي خلصنـي منه ..
تالي يگله .. لاتعب روحك يخوي المايسوگة مرضعة سوگ العصا ماينفعة ..
ضجت وبجيت ولطمت ع حضي الذبنـي بنص اهلي الماترحم ..
ماتلام امي من مات ابوي ..
گالت اهل ابوج مابيهم رجا وخاف حظج يطلع مثل حظي ..
تمرضت وانقهرت وتركتني وحدي للضيم ..
شگد رادت تاخذني وتروح بيه الاهلها بس عمي الحجي ماقبل وگالها اذا طلعتي انسي عندج بنية ..
بقت وضاگت الويل منهم لما ماتت من قهرها ..
واجة الدور علية هسا وعبالك عندهم ثار ويانا اني وامي ..
گعدت ابجي واجو جهالي حاوطوني حضنتهم واسكت بيهم والحجية تلوم بية .. وتگلي .. يمة انتي ليش ماتضبين السانج عنة تدرين برجلج محرگاني وعصبي ..
اسكتي عنه ..
ياقوت .. تحجين صدگ عمة عساس انتي ماتعرفين حاكم من تزوجته وهو يگوم ويگعد يطلع قهرة بية ..
وعبالك مجبور علية ..
كبرت وكبروا جهالي وهو بنفس اسلوبة ..
الحجية .. يمة ماكو وحدة ماعاشت وشافت من زلمتها بس الله انطانه صبر ..
هذا عمج الحجي وجدج قبله ..
نفس العصبيه والحرگة ..
سهيلة .. اي والله عمة امي تگول الرجال بيد المرة .. اذا زينة وياه يصيرلها مثل الماي بالصينية .
واذا عاندت وجادلت طبعا يهيج ويتخبل عليها ..
غمضت عيني واستغفرت ربي .. اني عايزة قهر وتجي سهيله تنطيني مواعظ .
وعبالك مااعرفها ساطرة الرجال بالعمل اعوذ بالله ..
اسمة البيت مشعوط وريحته تكتل ..
ومن يسألون شنو هالريحة تگول ملابس قديمة واستحيت اشمرهن بالشارع خليتلهن نفط وحرگتهن ..
اخذت جهالي ورجعت الغرفتي ..
درة صغيرة عمرها خمس سنين بس تفتهم وذكيه ..
گالت ماما ليش مانروح منا .. محد يحبنا هنا ..
واخوانها صفوا وياها ..
-اي يمة گولي الابوي نشيل وحدنا .. كل احنة محبوسين بهاي الغرفه وبس يضربون بينا ومايحبونا ..
سكتتهم وطلبت مايتدخلون بكلام الكبار عيب ..
صار الليل عشيتهم ونومتهم من وكت ..
طلعت غسلت الهدوم وشريتهن ..
دخلت للغرفه اجة حاكم ..
-گومي سويلي عشا ..
-گمت سويتله وجبته اله ومن غير مااحجي وياه ..
دست على گلبي الي يحبة وتحملت بعده عني ..
مجبورة احبه واريدة لأن ماعندي غيرة بالدنيا ..
بس هالمرة لازم اخلي حد ..
بقيت اسبوع حتى مااخليه يتقربلي وجهالي يخافون منه ومبتعدين عنه وهو حتى ماقبل يقربهم اله لو يراضيني بكلمة حلوة ..
الى ان فاظ بي الشوگ وواجانـي يتوسل حتى ياخذ حقه الشرعي مني ..
اعرف مو جايني اشتياق ولهفة الي ..
بس شهوتة وغريزتة هي الي جابتة الي ..
بس المهم اجة واعتذرلي ..
گتله ياابن عمي لهنا وكافي ..
بعد مااتحمل .. اذا تريدني خلينا نطلع منا ونعيش وحدنا
نربي جهالنا ومحد يتدخل بينا ..
كانت ايدة تلامس وجهي ويحاول يقنعني بأي كلمة ..
حاكم… الي ترديه يصير بس تعاي يمي .. واخذ الي يريدة مني مثل عادتة ودار وجهة ونام من غير مااخذ منه لاحق ولاباطل ..
گعد الصبح ..
حضرتلة الحمام وسبح بين ماسويت الريوگ ..
بدلت الاولادي وريگتهم ..
وهو جاي يبدل بالغرفه ..
گتله .. ها حاكم شگلت ..
حاكم .. على شنو ؟؟
ياقوت .. شبسرعه نسيت مو گتلك نطلع بيتنا وحدنا وانت گلت الي ترديه يصير ..
ضحك بأستهزاء وگال ..
والله النسوان عندجن عقل .. يعني لو اگلج اصوغج ذهب باجر هم تصدگين .. هو شعندي واطلع .. هو هالراتب ويادوب مكفينا ولو ماگاعد وي اهلي هم ماالحگ على المصرف .
ياقوت .. صدگ تحجي حاكم .. شنو حجي الليل يمحيه النهار ..
حاكم .. عفيييية وهاي انتي گلتيها ..
ياقوت .. باوع حاكم كلشي مااريد منك بيت اهلي موجود ونگعد بي ..
واشوفلي شغله واساعدك بمصرف البيت ومااگلك جيب وانطيني بس كون نعيش وحدنا وراسنا بارد ..
فرك وجهة وگال .. انت مخبله شتردين العالم تاكل وجهي وتگول گاعد ببيت مرتة ..
وتعرفين هنا السالفه ماتنظم وباجر اصير علج بحلگ العالم ..
ياقوت .. مستعدة ادور البيت بأسمك بس خلينا ندور بي
حاكم… اي خوش حتى يگولون قشمرها واخذ حلالها ..
ياقوت .. وداعتك مااگول ولااحجي .. واذا تريد گول اشتريته منها واني هم احجي نفس حجيك ومحد بعد يحجي ..
اجيتة بكل الطرق حتى يوافق ..
وگال اروح وارجع من الدوام ويصير خير ..
اخذ الاولاد وطلع وبقينا بس اني ودرة ..
وحسيت براحة وفرحة ..
واخيرا راح ارتاح واعيش اني ورجلي واولادي وحدنا ..
جانت عيون درة تبتسم وي ابتسامتي ..
وماتعرف شنو السالفه ..
بستها من عيونها وگلتلها .. ااااه ياام عيون الخرز ياريت حظج احسن من حظ امج ..
اليوم كلة واني طايرة من الفرح ..
نضفت البيت كله .. وغسلت الفراشات وشريتهن وماخليت شي يغث فرحتي حتى سوالف سهيلة ماهمتنـي ..
وعمتي الحجية فهمت عيوني ورادت تعرف شبيه وماحجيت خفت احد يسمع وتخرب السالفه ..
شوية واجت درة تبجي وراسها مفتوح ويجري دم ..
تخبلت ..
يمة بنتي .. ووحيدتي ..
گمت الطم ..
وهي تبجي وتگول ماما قيصر ضربنـي وعورني ..
عمتي الحجية .. يمة من فلك طرة على هاي العملة .. شمسوي بالبنية ..
سهيلة .. ياعمة ليش تدعين عليه هو هالواحد عندي .. شو شسوتله وضربها الله مايجرعها ..
مو هالعندي بنات شو مو مثلها يتنعوصن ..
ياقوت .. دادة بناتج كبار ويفتهمن شمفهم هالطفله وشسوتله ويضربها هيج ..
مخليه بنتي واعقم براسها والدم مايوگف ..
گلتلها ع الاقل صيحي ابنج خلي يروح يصيحلنا واحد ياخذها للطبيب بنتي راح تروح من ايدي ..
دخل قيصر هو اكبر من ولدي بس شايف نفسة ومايتحاجة اهلة مكبرين راسة ..
لأن الوحيد عندهم وحتى مدرسة يروح وكت مايعجبه ..
وبيوم اليگعد بالبيت لازم يسويله عمله ..
ياقوت .. ولك ليش هيج خاله مسوي بالبنية ..
قيصر .. ادبي بنتج بالاول يله تجيني .. احاجيها ماتسمع كلامي ..
الحجية .. ولك من خفة هالطول شكبرك ووكاحتك بعدها مو ذوله ولد عمك وياك ..
قيصر .. اهوووو هم جابت ذوله المخانيث ..
الحجية .. ولك شنو مخانيث ..
قيصر .. يخافون من خيالهم وخاتلين بسد امهم ليل ونهار اولاد امهم ويهز بيدة ..
الحجية .. والله من طيح حظ امك على هذا التعلوم .. دروح من وجهي وشوفلك واحد ياخذ بنية عمك للدختور يشوفها ..
قيصر .. اسمة دكتور بيبي ..
شالت العصة يمها وضربتة وهو ركض طلع ..
سهيلة هزت ايدها وطلعت جن ماعجبها الحجي ..
واني روحي تفرفر على بنتي البيدي ..
اجت سهيله گالت جاب محسن جارنا .. بس شلون تطلعين غير لمن يجي زلمتج يله ..
ياقوت .. وزلمتي وينه غير بالدوام قابل اعوف بنتي تنزف ..
الحجية .. تعاي ولج انطيني عباتي وجواريبي اني اروح وياها جا اعوفها وحدها هي وهاي الفرخة ..
لبست عمتي وراحت وياي للمستشفى..
خيطو راس درة واخذنا الدوة وطلعنا ..
رجعنا للبيت شفت الوجوه كلها مگلبة ..
وحماي الجبير قاسم يهد ويفلت لان طلعت من غير علمهم ..
وحاكم يصيح عليه ..
صرت ورى عمتي الحجية وحاضنه بنتي ..
عمتي الحجية .. ولكم جنكم ماتستحون بعدني ماوگعت وانتم هيج تسوون ..
البنية مفتوح راسها تردوني انتضر لمن تجون لن دمها ناشف ..
وشنو اني مو بعينكم .. غير رحت وياها واجيت وياها قابل رايحة وحدها ..
ابو قيصر .. يمة مرة بيضه وعيونها زرگ مطلعتها بالشارع شني جان اخذتيها انتي للطفله ورحتي ..
الحجية .. ولك شو ماتستحي شلون توصف مرت اخوك هيج ماتشوفها لافه روحها لف ..
وهاي بدال ماتأدب ابنك على سوايتة السانك شطوله ..
خلي يجي الحجي من الجامع واني اعلمكم ..
حاكم .. گومي الحجرتج ودور من تطلعين تخلين بوشية على وجهج .. وصيح عليه گدامهم بدال مايوگف وياي ويسندني ويگول الاخوه انت مالك دخل بمرتي اني الي اتحكم بيها ..
اختاريت السكوت لأن ماينفع حجي وياهم .. ودووم راح اطلع اني الغلطانة بينهم .. جيف اني يتيمة ومالي سند بهالدنيا ..
حتى عمي اخو ابوي بدال مايصير وياي دوووم يصير ضدي ..
يمكن الله هادي الحجيه عليه شويه ..
نومت درة بفراشها ..
واجو اخوانها يبوسون بيها وامير وحيدر يردون يرحون يكتلون قيصر لان عورها ..
وسكتتهم وگلتلهم عيب هذا اخوكم الجبير مايصير تحجون هيج ..
اذا تعاركتوا يگولون عليه مامربيتكم ..
تقبلون واحد يحجي عليه ويگول ياقوت ماتعرف تربي اولادها ..
هزوا راسهم وگالوا ..
لا يمة مانقبل ..
غديتهم ونومتهم ..
اجة حاكم گالب وجهة عليه ..
باس درة ومسد على راسها وگال ..
باعي يابنت الناس .. اني تعبت وهنا ماتخلص المشاكل فكرت بحجيج ماكو حل غير نطلع منا ..
ولو يعز عليه الناس تاكل وجهي وتگول گاعد ببيت مرتة
ياقوت .. يااا افة عليك ياابن عمي اني اخلي واحد يحجي عليك ..
من باجر نروح اني وياك واتنازل عن البيت ..
وهو مأثث بس ننضفة مايحتاج شي ..
حاكم فرك شعرة وگال هااا الله كريم ..
بس بالليل افاتح الحجي والحجية ونشوف ..
اخذت نفس واحس الدنيا فتحت ابوابها بوجهي ..
واخيرا راح اخلص من هذا الضيم ..
عشر سنوات واني ملطلطه منهم وحتى حمواتي من يجن يآمرن وينهن عليه ولاتگول بنت عمهن ..
بس كل هذا واگول الحمد لله من اشوف جهالي گبالي وبصحة زينة ..
همة سلوتي وفرحتي من هاي الدنيا ..
من شفتهم شلون يخافون على اختهم ويحبوها ..
گلت ماضاعت تربيتج يياقوت اذا بيوم غمضت عينج اولادج راح يصيرون گلب على گلب ..
حاكم رغم عندة ثلاث ولد الا روحة بدرة يحبها بس هو من النوع الي مايظهر مشاعرة ويخبييها دوووم ..
اخذ درة الحضنة ونام ..
واني من الفرحة ماگدرت انام وناطرة شوكت حاكم يفاتح عمي وعمتي بالموضوع ..
طلعت سويت العشا وماخليت شي ماسويته من فرحتي حتى خبز حار خبزت الهم وخبز باللحم سويت ..
اني معروف عن خبزي بالناحية يخبل وكلها تسولف بي.
لأن بطبعنا من نخبز الخبزة لازم نوزع منها للجيران والگرايب ..
مدينا السفرة انـي وسهيلة وبناتها ..
وبيومها جايات حمواتي وولدهن ..
عمي شاف السفرة .. وصل على النبي ..
ولجن شني هالسفرة التفتح النفس اليوم شكو ..
ومسويات خيرات الله كلها بيها ..
سهيله سبقتني .. والله يعمي گلنا ماملتمين هيج لمة والبنات اليوم اجن وهاي كلها من خيرك ..
طلعت الحجية وهي تمشي بعصتها ..
اني بحجرتي واشتم ريحة الخبز باللحم .. هاي سوالفج يياقوت اعرفها ..
من تكونين مرتاحة وبالج صافي ..
تحيرين شتطبخين اعرفج من صغرج ..
ضحكت لأن عمتي رغم ماتبين حبها الي بس هي الي ربتني من تزوجت واني صغيرة لسا ..
باوعتلي سهيلة وهزت ايدها ..
ماردت شي يضيع الفرحة المرسومة بوجهي ..
تركتها تدردم بينها وبين نفسها ..
گعدنا كلنا ع السفرة الرجال بجهة والنسوان وجهالهن بالجهة الثانية ..
بالعادة اذا اكو واحد غريب تنقسم السفرة قسمين سفرة الزلم وحد والنسوان وحد ..
بس لأن ماكو غريب وحتى رجال حمواتي ماجايين. .
گعدنا سوة ..
گمت اسوي لفات الجهالي وانطيهم .. والكل ملتهية بجهالها والرجال مدنگين ياكلون ..
عمي مايحب السوالف ع السفرة ..
وحاكم اختار مو مناسب حتى يفتح بي موضوعنا !!
حاكم .. بوية مدام كلنا مجتمعين هنا .. اريد افاتحك بموضوع ..
رفعت راسي الحاكم واتمنيت يشوفني حتى اگله لا .
ردت اهز براسي اله بس هو مندمج بالحجي ومايشوفني احس گلبي يريد يطلع من مكانه من الخوف ..
لأن اعرف تاليتها شنو ..
رفع راسة عمي وگاله .. شني هذا الموضوع يحاكم الي خلاك ماتنتضر لمن نكمل عشانا ورايد جمعتنا علمودة ..
خير ان شاء الله..
حاكم.. ان شاء الله خير ..
بوية اني اريد اعزل منا ونطلع بيت وحدي اني وعيالي ..
عمي جان مدنگ ويسمع ومستمر بالاكل ..
مارفع راسة بس توقف عن الاكل لمدة ثواني ورجع كمل
عمي .. اي يحاكم وشنو الي مضوجك من عيشتك ويانا ووين تولي وانت بطرگ هالراتب لابيت عندك ولاملك ..
بله ماتگلي شلون راح تدبرها ..
حاكم .. لابوية حاشا .. لاضايج ولاشي .. بس تدري الجهال كبرت واحنه كلنا بغرفه وحدة .. وبعد ماترهم ينامون يمنا زحمة ..
عمي .. هي هاي الكاتلك خلي ولدك ينامون يم ولد عمهم
سهيله .. ياعمي على بختك . هي غرفة وبيها بس بنات وهم ولد شلون ينامون يمهن ماترهم ..
خزر سهيلة وكمل كلامة .. ولج لسا ماتعلمتي طبعي من تحجي الزلم النسوان تلصم ..
واخوهن النايم يمهن شنو ولد لو حرمة ..
قاسم كح وخزر سهيله .. يابة هذا اخوهن ولو عدنا مكان هم مااخليه وي اخواته هم الغرفة صغيرة وهم مايصير كبر وصار رجال ..
راد يغير الموضوع دار وجهة الحاكم .. اي حاكم بس ماجاوبت ابوي وين راح تگعد اذا عزلت وانت ماعندك ملك
حاكم .. هااا اني حجيت وي ياقوت وراح نگعد ببيت عمي تدرون بي فارغ وبأثاثة وصارلة سنين مقفول وماساكنه احد ..
قاسم .. يعني راح تگعد ببيت مرتك ..
حاكم .. من باجر يصير بيتي . ياقوت گالت اتنازلك عنة .
عمتي الحجية .. يمة هاي مال يتيمة شلون تاخذة منها ..
ياقوت .. لاعمة ليش هو اكو فرق بيني وبين ابن عمي بيتي بيتة ..
كل هذا الحجي وعمي ماشال راسة الا لمن اني حجيت ..
جانت طاسة مال طرشي گبالة .. شالها وشمرني بيها ..
وگال ..
ولج طلعتي انتي سوسة البله ومسويتله واهس ومقشمرتة بالبيت حتى تاخذيه وتطلعين ..
تعصب وگام على حيلة وراد يضربني ولزمة حاكم وهاي اول مرة يدافع بيها علية ..
وعمي يسب ويغلط علي ..
والحجية تگلي گومي ولج الحجرتج لايگضيج بين اديه ..
وجهي كله طرشي احمر وهمزين مافتح راسي بالطاسة ..
الله ستر ودنگت ..
اباوع الجهالي تبجي علية وعلى هضيمتي ..
وسهيله والجهال كلها تضحك علية وعلى حالي ..
سحبت ولدي وگمت الغرفتي ..
اجت وراي حماتي بلقيس الوسطانية ..
ولج تدرون بأبوي عصبي ومايتحمل منين طلعتوا بهاي السالفه ..
اعرف حاكم مايفكر بالطلعة بس هاي سوالفج ..
من قهري گمت الطم على وجهي .. ليش دووم تحسبوني غريبه عنكم ..
ليش كلشي يصير تگولون انتي ..
لأن ماعندي ظهر يحميني ..
شسوي اذا الله بلاني وحيدة لااخو ولااب ولاام ..
من اجيتكم لسا فارضه روحي عليكم واداريكم واراعيكم واسوي كلشي حتى ترضون عليه وتحبوني ..
بس انتم مايوم واحد دافعلي غير عمتي الحجية ..
لو انتن بنات عمي واخياتي المفروض تصيرن وياي بس دومجن صافات وي الغريبة علية ..
بلقيس .. كافي ولج خبصتينا لو حابة ابوي يجي هنا يگضيج .. شمسويلج احنه شو بالسنة مرة نجيج ..
بسرعة بديتي تعيرين بينا وطلعتي شايلتنا على راسج وماندري ..
دخلت الحجية وهي تمشي على عصتها ..
ضربت بلقيس من ضهرها ..
اي مداريتكم .. اجت لهنا طفله وانتن تدرسن ومن الدوام للبيت تاكلن وتنامن ..
وهي تجيب الصينية الحد رجلجن وتشيلها ..
مو عبالجن بناتي واصف وياجن .. اذا انتن ثلاثة هي رابعتجن ..
بلقيس .. يايمة دور انتي هم صفيتي وياها .. ماتشوفين ابوي واخوي الي يتاكتلون برة بسببها راح تهجم بيتنا وانتي تدافعين ..
عمتي طردت بلقيس اجن حمواتي الباقيات هم طردتهن اخذتهن بلقيس والله العالم شگالتلهن ..
بحيث شالن علية من ذاك اليوم ..
عمتي .. كافي ولج بجي ماتشوفين الجهال يبجون وياج
امير .. بيبي والله اخذ امي واشرد اذا تضربوها بعد ..كلكم ماتحبوها ..
الحجية .. ولك بگد الزرزور والسانك اطول منك ..
اذا الكبار تحجي الصغار تسكت عرفت ..
ياقوت .. امير يمة موگتلك عيب تتدخل ..
هو ضاج وعرفت ماعجبة هيج يصير بأمة ويسكت ..
حتى فرحتي ضاعت وطيروا واهسي .. وقررت ابطل واگول الحاكم يتراجع ..
احسن من الحجي علية وبعدين وين مايگعدون يگولون طلعتة عن اهلة ..
بس الحجية صدمتني من گالت ..
شوفي يياقوت اني صح اقسى عليج واحجي مرات بس حتى المركب تمشي ..
وحتى البيت ماينهجم من المشاكل لأني مااحبها كلها لو گطعان رزق لو فراگ ..
واني الي ربيتج وانتي اجيتي النا عمرج 13 سنة كبرتج وحسبتج اغلى من بناتي وگامن يغارن منج لان اعزج اكثر وزوجتج الابني حتى ماتروحين للغريب ..
بس سهيلة شيطان هالبيت واعرف سوالفها .. وماتخليج ترتاحين ..
غايتها هذا البيت تريد تصير سلطانته ولو بيدها تخلصت مني وسيطرت عليه ..
بس تدري بية گاعدتلها وعينة مفتحة عليها ..
بس باجر عگبة اني رايحة وهذا عمر بن ادم مامعروف شوكت يجي يومة ..
ياقوت .. لاعمة العمر الطويل ان شاء الله
عمتي .. خليني اكمل ..
اني راح اقنع الحجي واخليه يرضى تگعدون ببيت ابوج ..
بس لاتتنازلين عنه الحاكم ..
ترى حتى لو ابني بس ابن آدم مايتآمن ورجلج سماع حجي ويتقشمر بسرعه ..
وهذا البيت ضمانج انتي وولدج ..
لاتفرطين بي ..
عمتي تحجي واني اهز براسي .. بس داخلي اگول مضطرة اتنازل اله .. والا مايخليني اطلع واعزل وحدي وابقى بهذا الضيم طول عمري ..
مااريد ولدي يكبرون ويصيرون زلم وامهم تنضرب گبال عينهم ..
وبالاول والاخير حاكم رجلي وابن عمي وابو ولدي ..
ومايفرط بينا ..
طلعت عمتي واجة حاكم ومبين ضايج ومقهور ..
اني من يتعصب اتركة اخاف يأذيني ..
حاكم .. باعي ياقوت باجر اروح للدوام اخذ اجازة واجي ومناك نروح الكاتب العدل نسوي تنازل وننضف البيت وبالليل نشيل بي ..
اني بعد مالي مكان هنا ..
وابوي گال اتبرأ منك اذا طلعت وتعارك وياي ..
ياقوت .. بس عمتي گالت اني احجي وياه واقنعه ..
انتضر ياابو امير شويه ونشوف عمتي شتگول ..
مااريد نطلع بزعل منهم ..
هذول اهلنا ومالنا غيرهم ..
حاكم .. منا للصبح اذا ماردتلنا خبر اني باجر شايل ماابقى بعد ..
جنت فرحانة لأن حاكم ولأول مرة ياخذ قرار الوحدة ومايخاف ..
بس داخلي مامرتاح واحس بشي خانگني ..
طلعت بعد ماالجو هدأ سويت لفات الجهالي لأن مالحگوا ياكلون ويشبعون ..
وبعدها نومتهم وبديت الم ملابسهم بصرر واعزلها على جهة ..
شفت الساعه ب 2 گلت خلي انام واگعد وي الصلاة اكمل ..
گعدت على صوت الاذان .. صليت وگعدت حاكم ماقبل يگعد ..
رحت كملت الغراض وجنت اشتغل بسكته خاف جهالي يگعدون ..
صارت السبعه گعدتهم وريگتهم وبدلتلهم ..
وگعدت حاكم ..
ياقوت .. اروح اسويلك ريوگ بين ماتبدل ..
حاكم .. لا مااشتهي .. بس جاي جيبي وشوفي امي اذا گاعدة صيحيها تجي نشوف شسوت ..
رحت العمتي بالغرفة .. شفت عمي يمها خفت ادخل ..
سويت جاي .. وسهيله تدعي عليه من الصبح ..
وتگلي صدگ لو گالوا من تحت السواهي دواهي ..
سوتيها وراح تطلعين بوحدج ..
والله اليعلم شلون قنعتي الحجيه ترضى وتحجي وي الحجي ..
افتهمت منها عمتي حاجية وي عمي ..
گلتلها ..
سهيله انتي شتردين مني .. مو ماتحبيني ومتضايگة من وجودي يمج .. هاي راح نطلع وارتاحي البيت والغرفة راح تصير الج ..
سهيله .. ومنو گلج مافرحت .. بس القاهرني راح تصيرين ست بيت وتنهين وتشورين واني ابقى هنا صخرة للحجي وعزايمة ..
باوعتلها ومااعرف شأرد عليها ..
حقها تضوج ..
وهي من يجي خطار تآمر وتنهي عليه ..
وتنطيني الخرفان اني اطبخهن وبالتالي تگل العمي هاي اني طبختهن ..
لو تتشكى القاسم وتگله تعبت وظهري وياقوت بس گاعدة ..
اخذت الجاي ودخلت ..
انطيته الحاكم. وگتله ..
عمي بعدة ماطالع وخفت ادخل ..
اخذ الجاي من غير مايحجي ..
شرب وكمل ..
گال ..
كملتي لم الغراض ..
ياقوت .. اي كملت يس الغرفه لازم واحد يفتحها ..
حاكم .. هاي بسيطة اني اشوفلي نجار يفتحها ..
يله اني رايح الجهال مكملين مو يأخروني ..
ياقوت .. اي مكملين ..
خليت لفاتهم بجنطهم وطلعتهم وي ابوهم ..
طلعت الحجيه تمشي على عصتها ..
وصاحت ..
يحااااكم ..
التفت ..
هايمة شلونج .. شسويتي وي ابوي ..
-هلا يمة هلا ..
تعال شوية الحجرتي انت وياقوت ..
حاكم ..
وابوي وين ..
الحجية .. طلع ..
گعدت جهالي بالصاله وگلتلهم هسا اجي ..
كانت عيون سهيله تتجسس علينا من المطبخ ..
دخلنا ..
الحجية .. غلگوا الباب واگعدوا گبالي ..
سديت الباب وگعدت ..
الحجية .. شوف يمة حجيت وي ابوك وتدري بي راسة يابس ومايقبل ..
وبالتالي وافق بس گال .. لايجي يوم يبجي وماعندة لو يريد مصرف.. راتبة قليل وجان متكل علينا بالاكل ..
واذا دگة العوز مايجي ويطلب مني ..
فأنت يمة رتب امورك وشوف وضعك واني يمكم ومااقصر بس قبل ماتخطي اوزن السالفه عدل ..
حاكم .. لايمة هاهي اني قررت واليوم بالليل اشيل ..
الحجية ..شني متوازي يمة لو مطرود خل كم يوم ابوك يهدأ واخذ رضاه واطلع ..
حاكم .. لا يمة هاي هي اني قررت ..وهسا اني رايح لأن اتاخرت ..
يله ياقوت طلعي الجهال ..
فتحت الباب لگيت بنت سهيلة الوسطانية اسمها نور تتنصت بالباب ..
شافتها الحجية شمرتها بالعصة ..
ولج يامضروبة الجلوة .. ماتبطلين هاي السالفه لو هاي تربات امج تگلج تسمعي بالبيبان ..
سهيلة .. ياعمة اني شعليه .. ولج نور الا يجي ابوج واگله يله بسرعه اطلعي اتأخرتي ع المدرسة راح تصير الثمانية ..
صيحت على بنتها وطلعتها ..
بعد ماطلعت حاكم وجهالي ..
صاحتني عمتي للغرفة ..
-هاعمة محتاجة شي ..
الحجية .. اي تعاي فتحي البوفية هاي ..
فتحتها .. ماشاء الله كل انواع الفرفوري بيها .. هاي بوفية عمتي الخاصه ولليوم محد فات غرفتها وشاف شبيها ..
ياقوت .. اللهم صل على محمد وال محمد.. عمة ذني يخبلن ..
ابتسمت ابتسامة خفيفه وگالت هاي جهازي من امي ..
جنت مثلج وحيدة اهلي ..
ومن تزوجت حارت شجابت الي وشصاغت اااااه..
واخذت حسرة طويله وگالت ..
شوفي ذاك الطقم المذهب ..
-اي عمة شبي ..
طلعيه ..
طلعت وصفطتة بالگاع ..
طوس وماعين صغار وكبار اكواب وخواشيگ كلهن يتشابهن ..
بحياتي ماشايفة مثله ..
الحجية .. گومي شوفي كارتونة وجيبيها ..
ياقوت .. شسوي بيها عمة ..
الحجية .. وج شتسوين غير تخلين بي الماعين ..
ياقوت .. ليش ؟؟
الحجية .. ولج تبقين دومج فطيرة .. ماتعيشين هيج وحقج ينوكل ..
گومي لميهن بكارتونة ذني هديتي الج الييتج ..
ياقوت .. صدگ عمة وگمت حضنتها وابجي..
الحجية .. كافي ولج عليمن تبجين قابل وين مولية غير بعد كم شارع عنة ..
وعود اجي اسير عليكم وتجوني ..
ومااريدج تگطعين عليه بخبزج وخبز باللحم ..
ياقوت .. صدگ عمة عيوني الج ..
سهيلة .. اي عمة ليش لا بحياتي مامخليتني اشوف البوفية شبيها وياقوت تصوغيها منها ..
الحجية .. ولج شو ماتعرفين تحجين .. غير راح تروح منا وصوغته ..
عود دولي انتي هم واني اصوغج ..
سهيلة .. لاعمة اني مااطلع منا واعوفكم بيت عيالي بيتي خو ماانكر الزاد بسرعه واطلع ..
واذا ع الغراض فهي اول وتالي النا والجهالنا ..
الحجية .. والله اعرفج تدعين اموت وتاخذين كلشي ..
سهيلة .. ياعمة اسم الله طولت العمر ان شاء الله
اجة حاكم ورى ساعه اخذني ورحنا للكاتب العدل وگال بعدين نسوي مداورة لان يرادلها فلوس وماعندي ..
ومناك رحنا للبيت ..
بيت اهلي وطفولتي ..
اشتميت ريحة اهلي بي ..
الحديقه مهجورة والبيت كله تراب ووصخ ..
يومين واني انضف بي يلة كملته ..
اجلنا شيلتنا الثاني يوم لأن مالحگنا نكمل البيت وجان وسخ كلش ..
جاب حاكم نجار وشال الغرفه ..
وطلعنا الغراض كلها ..
وعمي بغرفته ماطلع ولاشفناه ..
من ردنا نطلع گال حاكم ..
يله امشينا نبوس ادين امي وابوي ..
رحنا الغرفتهم ..
حضنت عمتي وبستها وهي توصي بيه وتگلي اريدج سباعية وماتخلين واحد يضحك عليج ..
بس عمي من بست ايدة ماحجة ولارد وماخذ على خاطرة
حاكم .. بوية اني رايح مااريد امشي وانت ماتحجي ويانا
عمي .. بعد شيفيد الحجي انتو مقررين ومكملين بس راح يجي يوم ترجع متندم ..
الحجية .. يا على بختك ابو قاسم لاهو اول ولد ولااخر ولد يطلع عن اهلة ..
وهلتشوف البيت ضيگ والجهال كبرت ..
انطيهم الرضا خليهم يمشون ..
باوعلنا بغضب وگال .. مودعين بالله ..
طلعنا بعد ماسلمت على قاسم وسهيله وماردوا عليه وفشلوني بس المهم سويت الي عليه ..
امام ربي وامام نفسي ..
مايوم ضوجت احد ولاكسرت خاطرة ..
كنت الهم العمية الخرسة المطيعه ..
شيگولون اگول صار ..
الى ان تمادوا وصاروا يدوسون علية ..
بس هسا خلص طلعت وخلصت من ضلمهم وجبروتهم ..
وراح ابدي حياتي الجديدة بس رجلي واولادي ..
واريد الله ينطيني الحيل واسعدهم ونعيش حياتنا الي جنت اتمناها ..

بقلمي_الكاتبة_شمس
يتبع…
.

لامارا · 25-08-19, 12:09 AM

//// البارت الثانـي ////
عجـاف_القلـوب ..
الكاتبـة_شمـس ..

مر اسبوع من شلنا ..
جهالي فرحانين لان صارت غرفتهم وحدهم ماعدي جرباية الهم فرشتلهم بالگاع ..
كل واحد فراشة ومكانة الخاص ..
بس درة تنام يمي بالغرفه لان ماتعودت بعدهي ..

بيت عمـي لاحس ولاخبر منهم .. وماكو واحد اجانا بيهم
حاكم يگول ابوي منبه محد يوصلنا ..
يعنـي گاطعونا ..

حياتنا استقرت واني فرحانة بجهالي وبيتي ..
وريحة اهلي الي بالبيت ..

من يطلعون جهالي للدوام احير شأطبخ وشأسوي حتى من يرجع حاكم والجهال يفرحون ..

رغم كلشي بس حاكم ماحسيته مرتاح ودوم يتذمر ويحجي ويصيح ..
وعلى اقل شي يگول لو ماملحتج ماعفت اهلي وگاطعوني ..

ماعرفت شلون ارضيه ..
صح صعبه عليه يعوف اهلة وهو من الصغر وياهم ..
بس لو ماحسيتة مقتنع وراضي نعزل وحدنا ماحجيت ولاگتله نطلع وحدنا ..
وخاصه بالايام الاخيرة هو الي استعجل وخلانا نشيل بسرعه ..

اجة حاكـم بيوم مغثوث وضايج ..
تلگيتة الله يساعدك ..
مارد!!
شبيك حاكم صاير شي ..
لا مابية بس اريد انام ..
جا ماتتغدا ..
مااشتهي ..
عافني وراح للغرفه ..
جان هادئ وراكد ..
هو اذا ضايج يتعصب على اقل شغله ويصيح ..

غديت جهالي ونيمتهم ..
امير .. يمة عندي امتحان رياضيات باجر ..
ياقوت .. اي يمة نام والعصر اوديك البتول جيرانة تدرسك ..
لان اني مااعرف ادرس رياضيات ومامكملة دراسة ..

گمت لميت البيت وصليت ..
للعصر گعد حاكم گال صبيلي غدا ..

صبيتله وگعدت يمة ..
شبيك يحاكم اكو شي مضوجك ..

حاكم .. ياقوت اني مطلوب .. والي يطلبني اليوم اجاني للدائرة وگال اذا ماتسدد الفلوس خلال هذا الشهر اشتكي عليك واسجنك ..

ضربت على صدري .. يمممة وتالي شراح تسوي ..

فرك وجهة وگال ماادري ماادري ..
گلت اجي وياه واقنعه انطيه راتبي كل شهر بس شلون ناكل ونعيش ..

ياقوت .. جا انت وين وديتهن الفلوس وليش اخذتهن ..

حاكم .. وين وديتهن يعني غير الج والخلفتج .. قابل منطيهن الابوي ..
عود عندي مرة واناقشها ..

ياقوت .. وشبيدي اني ولو اكو شغل اشتغلت وساعدتك بس اني مااعرف لاصنعه ولاشغله اشتغلها ..

حاكم .. اني فكرت اشوفلي شغله ورى الدوام والله كريم ..
وگومي حضري الجهال خلينا نروح لهلي نسير عليهم لازم ارجع علاقتي بأبوي ..
لان من يوم الاجيت الهذا البيت الاكشر طار رزقي ..

ياقوت .. البيت شعليه ياحاكم اذا انت متداينهن من زمان يعني قبل مانجي لهنا ..
حاكم .. دگومي بدلي للجهال بسرعه وبلا حجي زايد ..
ياقوت .. يااا تذكرت امير عندة امتحان وگلت اوديه البتول تدرسه ..

حاكم .. يابتول .. يادراسة .. عود خليه اني بالليل ادرسه
گعدت الجهال وبدلتلهم .. امير ماقبل ويبجي لان عندة امتحان وهو من الاول شاطر ..
ابوه من شافه عصب وضربه بالحزام .. وگال انتم وامكم ماجبتولـي بس الفگر ..

بالگوة سحبت ابني منه ..
امير عقله اكبر من عمرة ويحس ..
اخذتهم ومشينا اباوع الابني دمعته بطرف .
وطول الطريق مخنوگ ويتحسر ..

اووووف يحاكم بعصبيتك وجبروتك راح تخلي جهالك يكرهوك ومايردوك ..
وصلت البيت عمي ..
حاكم گال . ادخلوا انتو واني اروح الابوي للمحل ..

دخلت شفت سهيله تعجن ..
شافتني گلبت وجهها ..
گلت السلام عليكم ..
سهيله .. ها يياقوت شو اجيتي والله گلت بعد مانشوفج وماصدگتي شردتي شرجعج ..
ياقوت .. يايسهيله انتي ناسية هذا بيت عمي وربيت بي وكبرت ..
سهيله .. لامانسيت بس يمكن انتي نسيتي ..

عفتها ودخلت مالي خلگ اتكاون وياها وهي ماصدگت خلصت مني وهسا جاي تعاتبني على طلعتي من البيت ..

دخلت العمتي للغرفه . شهگت من فرحتها وتلگت الجهال وحضنتهم ..
الحجية .. هلا بيكم يمة تعالوا الحضني وتبوس وتشم بيهم ..
دنگت عليها وبست راسها ..
ولج هيج يياقوت ماتسألين عليه ولاتجين واني عيني ع الباب اعاين بلكي تجون ..

سهيله .. يايعمة جا مو احنه وياج بالبيت قابل مامالين البيت عليج ..
الحجية .. ولج يامضروبة الجلوة غير انتو يمي وگبال عيني وبناتج ليل ونهار صارعاتني بمشاكلهن وعركهن ..
بس مامتعودة افارگ واحد من ولدي واولادهم هالگد ..
متعودة على حسهم ولعبهم بالبيت ..

سهيله .. اذا هيج مشتاقتلهم دخلي ياقوتة تگوم تخبزلج اكيد اشتاقيتي الخبزها هم ..
الحجية .. ولج جن اجتج من الله تخلصين من الخبز .. ماتشوفين البنية اجت تتونس يمنا ..
ياقوتة .. لا عمة اني اخبزلج ادريج تحبين خبزي وبعد اسويلج خبز باللحم هم ..
الحجية .. جا اني مااگول لا .. وانتي يسهيله طلعي الدجاج واشويه بالتنور وحمصيه زايد لان عمج يحبه محمص .. .................................................. ...............
بقيت گاعدة شوي يم عمتي بين مايختمر العجين وصافنه افكر بديون حاكم الماعرف منين جابهن النا وهو ماجان يصرف شي زايد وراتبة يسجله ورقه وقلم ..

فززني امير وهو يلح ويبجي .. يمة وين الحگ ادرس باجر اخذ صفر لو شلون ..

الحجية .. وج ياقوتة شبيج احسج مو على بعضج صاير شي بينج وبين حاكم ..

ياقوته .. لاعمة ماكو شي ..
الحجية .. هذا الولد صار ساعه يحاجيج وانتي صافنه وين بالج رايح ..
ياقوته .. ها هذا عندة امتحان رياضيات وابوه جابه لهنا وضاج لان عود گلت الجيرانة تدرسه ..

الحجية .. ولو مو هذا سؤالي بس هسا اصيح بنت عمة درسة ..
هدييييل ولج هدييييل ..
ذني اذا صعدن فوگ لو اصيح منا الباجر مايسمعني ..

نور .. ها بيبي رايدة شي ..
-ولج وين هديل مو راح صوتي وهي ماتگول هااا
-هسا اصيحها ..

اجت هديل .. ها بيبي جاي اقرأ تردين شي ..
-اي يبيبي هذا ابن عمج عندة رياضيات ماتدرسيه وياج لأن سمعتج گلتي الامج ماخذة درجة عاليه بالرياضيات

هديل .. جا كون سمعتيها ماگلتيلي عفيه ماانطتيني اكرامية ..
الحجية .. ولجن يبنات سهيله شلون بيجن ماتمشن الا بكروة ...
درسي امير واذا نجح انطيج اكرامية ..

هديل .. خوش حجي يله امير گوم ..
امير .. لاتعاي هنا ندرس .. تروحين تگرصيني اذا ماعرفت مثل ذيج المرة ..

الحجية .. من يگرصها برص ان شاء الله اموتها بالعصه اذا گرصتك ..
اگعدي درسيه هنا ولج گبال عيني ..

هديل .. اي بس اروح اجيب كتاب من هداوي واجي ..

ارتاحيت من شفت امير يفتهم منها ويجاوب ع الاقل ولدي يصيرلهم مستقبل ويشيلون ارواحتهم ومايصيرون مثلي ..

عمتي زينة وتحب ولدي وماقصرت ويانا وخاصه من عزلت عنهم .. صارت روحها بينا ..

گمت خبزت وثرمت بصل ولحم وكرفس وسويت خبز باللحم ..
سهيله شوت الدجاجات وراي بالتنور وبناتها سون الزلاطة ونضفن الخضرة وحظرن الطرشي بطوس صغار

اذن الاذان اجة عمي وقاسم وحاكم ووياهم قيصر ابوه يطلعه وياه للشغل احسن من الشارع ..
ووياهم حسان وعدنان ولد عمي استشهد وهم صغار وبحسبة اخوانهم لان متربين وياهم وماخذين بنات عمي بلقيس ونرجس بس حماتي الجبيرة متزوجة ابن خالها ..
عمي الحجي مايحب ينطي لو ياخذ من غريب .

رحت بست ايد عمي بس بعدة وجها ثگيل عليه وقاسم دخل بسرعه وماسلم عليه من يوم الي طلعنا ..
حتى استحيت من حسان وعدنان ..
الي سلامهم كان احسن من عمي وقاسم الي ربيت وكبرت عندهم ..

بلعت الغصة الي بگلبي مثل كل مرة وسكتت ..
سوينا العشا وساعدت سهيله بفرش السفرة ..
دخلن بلقيس ونرجس ..
وجهن ثگيل .. سلمت گالن هلا ..
ودخلن الغرفة عمتي ..

سهيله .. والله يياقوتة مااضن احد يسامحج بعد عملتج ..
ياقوت .. وشنهي عملتي يسهيله .. بايگة لو زانية ..
البيت ضيگ واولادي كبروا وماتكفينا بعد ..
الي يشوفكم يگول سافرنا الغير دولة ..
شبيكم وياي محاربيني من صغري ..

قاسم .. صوتج ولج والله وطالعه عينج بنت زمردة ..
ياقوتة .. وشبيها امي ياابن عمي .. المرة ميتة وماخلصت ..
قاسم .. والله اشوفها بيج بشكلج ووكاحتج .. جانت گوية وگدرت تاخذ عمي من اهلة ..
مثل ماانتي سويتي بحاكم هسا ..

مااتحملت كلامة على امي واهانته .. ولااگدر ارد واحجي لأن اعرفها تدور السالفه وتوگع عليه بالتالي ..
سحبت روحي من المطبخ ورحت الغرفه عمتي ..
البنات يسولفن شافني سكتن ..

عمتي الحجية .. ها يياقوته شبي وجهج مكدر منهو الغاثج ..
ياقوتة .. لاعمة مابيه شي ..
بلقيس .. لازم العيشة الجديدة مارهمت عليج يياقوت دگيتي ونحتي وصار الي ردتيه ليش مكدرة بعدج ..

اتنهدت ومااعرف شأرد عليها .. بلقيس هاي جنت حتى ملابسها اغسلهن وماخليتها تشيل الورد منا لمن عرست وهسا تحجي علي وصافه وي سهيله عليه ..

عمتي الحجية ماسكتت ردتها وحجت عليها .. وهذا الي مصبرني ..

تعشينا احنه النسوان بغرفه عمتي .. والرجال خليناهم بغرفه الخطار ..

ماصدگت حاكم گال يله ..
اخذت ولدي وسلمت على عمتي بس وطلعت ..
جنت اتمنـى ماادخل هالبيت بعد ..
بس لو ماحاكم يجبرني .. وشوگي العمتي ياخذني ..

رجعنا والطريق كله محروگ دمي من قاسم وكلامة على امي .. عاينت على حاكم ..
لو عندي رجال يحاميني ويدافعلي جان اكو واحد گدر يدوسلي على طرف ..

اااااه الي الله ويجي يوم الي ينصرنـي بي ويريح بالي ..
فززني صوت حاكم وهو يصيح بأسمي ..
-وين بالج مو صار ساعه اصيح ..

دخلنا للبيت بدلت للجهال ونومتهم بسرعه .. رجعت الغرفتي لگيتة نايم ..
حتى بالجذب ماذكر ابنه قرأ لو لا ..

بدلت واجيت يمة .. صحيته ماگعد ..
رجعت نمت مثل العادة .. اصلا مامعتبرني مرة يمة وهاملني ..

اشتاقله واتقرب منه واريد .. بس دوم يصدنـي ومايجيني الا وكت مايريد هو ..

مشت الايام وحالنا مثل ماهو ..
حاكم من كثر ديونة ..
تعصب وصار شخص ثاني ..

اتذكرت جيرانة ام احمد حافوفه .. رجلها يشتغل بحي الصناعي بتصليح السيارات ..
گلت اروح احجي وياها بلكي يشغل حاكم وياه وهو شاطر بهيج شغله ..

رحت الها العصر .. فتحتلي الباب بتول ..
ها خاله شلونج ..
-هلا خالة امج موجودة ..
-اي تفضلي ..
-----------------------------------------
دخلت شفت عندها نسوان جاي تحف الهن استحيت احجي شي ..
بس سلمت وگعدت ..
المرة عبالها جاي احف ..
من خلصت النسوان .. گالت يله ام امير تفضلي ..

ياقوته .. لا عيني اني ماجايه احف بس عندي شغله وياج ام احمد .. اي مو اگول وجهج حلو ومايبين بي الشعر ..
گولي خية شعندج ..
ياقوت .. والله مااعرف شأگلج .. بس لو مااعرفكم من زمن اهلي الله يرحمهم ..
جان مااجيت ..
ام احمد .. صدگ جذب دادة .. انتي بنت الاعزاز .. امج الله يرحمها جانت هي وامي مثل الاخوات وماقصرت وياها بشي ..

ياقوت .. تعرفين ياام احمد .. ابو امير بطرگ هالراتب ويادوب مكفينا ..
ومطلوب هواي .. عود گلت بلكي ابو احمد يشوفله شغله وياه بالمحل وي معارفه .. اذا يگدر .

ام احمد .. يا دادة هاي سهلة .. بس يجي ابو احمد احجي وياه ومايكون خاطرج الا طيب ..

ياقوت .. والله ماادري شأگلج بس الله يفتحها بوجهكم ان شاء الله..
ام احمد .. لاتگولين هيج خيه صحيح مانعرف ابو امير زين بس انتي خيتي وربيتي وياي ..
وجنا كلنا شارع واحد وبيت واحد ومثل الاهل .. شني نسيتي ..

ياقوت .. لا والله مانسيت ذيج الايام الحلوة .. بس الزمن اغبر خيه وهو الي بعدني من وكت عن منطقتنا ..

ام احمد .. الراح راح وعلينا بهذا الوكت .. ادري بيج متعوبه وهمومج على گلبج بس هو هذا حال الدنيا ..
وان شاء الله تفرج ..

طلعت منهم واني فرحانه وانتضرت حاكم ساعه ساعه حتى يجي وابشره بالخبر ..
رجع هو والجهال .. سويتلهم غدا وتغدوا ..
دخلت ولدي للغرفه وگلتلهم ..

-يمة ابوكم تعبان لاتطلعون حس .. كلمن ينام بفراشة ساعه واگعدكم حتى تدرسون ..
ووصيت درة ماتگعدهم لأن ادري بيها تضوج وتريد تلعب وياهم ..

صاح حاكم .. ياقوت وينج ..
اجيته .. ها ابو امير جنت انوم بالجهال ..
حاكم .. تعاي مرغي رجلي موتتني مدري شبيها ..

گعدت يم رجله ومرغتهن اله .. شفته مرتاح وهادي گلت انسب وقت هذا خلي افتح وياه الموضوع ..

اگلك حاكم ..
-امممم شعندج .
-اليوم مريت الام احمد جيرانا ..
-ياام احمد بس لاهاي الحافوفه .. شعندج رايحتلها مو گتلج ماارتاحلها .. الف مرة تدخل عليها .

-شبيها المرأة حبابه ومتربين سويه جانوا جيرانه الحايط ع الحايط .. وهاي شغلتها ومابيها عيب ..

-گولي يياقوت اكو شي تردين تگوليه شعندج رحتيلها ..
-هااا مو تدري زوجها يشتغل بحي الصناعي ورحمة من الله .. وگلتلها تشوفلك شغله وياه ..
بعدني ماكملت دفرني برجله ..

ولج بنت الكلب دور ترحين تجدين شغل الي .. ترديني اني الموضف اشتغل عند هذا المهتلف . الي مرته مسويه بيتها كراج للنسوان ..
وبعدين اني مو موصي عليج ماتطلعين وراي. .

نزلن دموعي على خدي وحرگت گلبي غلطته على ابوي ..
بدال مااسويله ثواب ونترحمله حاكم يغلط عليهم بالطالعه والنازله ..
-كافي حاكم مااسمحلك تغلط على اهلي .. ابوي عمك ومتوفي هاي بدال ماتترحمله ترضى اني اغلط على ابوك ..

حاكم .. وج تخسين انتي واهلج اذا توصلين الابوي وبيومها گام وگضانـي گضيان وشبعني كتل ..
احس عضام تون من الالم ..
تمنيت اموت وفكرت احرگ روحي بس رجعت واستغفرت ربي ..
وصاروا جهالي گبال عينـي ..
مخليه دبة النفط بيدي والشخاطة وعيوني تهمل بجي وخانگة صوتـي ..
مااريد الجيران تسمعنـي ..

فزيت على شهگت امير گبالي ..
-يمة شتشوين بالنفط .. تردين تموتين وتعوفينا ..
ماتفكرين بينا .. يمة احنه مالنا احد غيرج ..
ابوي مانحبة ومانريدة لاهو ولاجدي ولاعمي ..
انتي ليش تخليه يضربج خلينا نروح للشرطة نشتكي عليه وهمة يحمونا منه ..

اباوعلة وهو يفرفح ويحجي وعصب رگبته مبين من العصبيه مالته ..
معقوله هذا ابني .. عمرة عشر سنين ويدافعلي ويگلي اني احميج منه مااخليه بعد يضربج ..
الي يشوفة يگوب عقله مال ثلاثين سنه مو عشر سنوات بجيت وذبيت الدبة مني ورفعت ايدي اله اريد احضنه واشمة .. احس روحي ردت من يحجي ..
اخذ ايدي وباسهن وباس راسي وايدة تمسح بدموعي ..
-لاتبجين ياام امير .. ماتشوفيني اني ادرس واطلع الاول علمود اكير واتوضف واخذج واخذ خواني ونروح منا ..
مااخلي واحد يضربج بعد ..
عيونة جانت تجدح غضب وبداخله حقد وانتقام ..
مااريدة يشيل بگلبه على احد ولااريدة يصير حاقد

ياقوت .. لايمة مااريدك تصير حاقد وتكره ابوك .. مهما يكون هذا ابوك والله يعاقبك اذا عصيته ..

تأفأف وماعجبه كلامي ..
اخذته من ايدة ودخلنا الغرفتهم ..
تلوگني علي وحيدر ودرة حضنوني ..
كل جسمي يوجعني بس حضناتهم شفتني ..

رفعت راسي للسما وحمدت الله الي انطاني هيج نعمة
اباوع الامير گاعد يم الحايط وبحجة يطلع كتبه يدرس بس باله يمي وعيني تباوعلي بكل فرصه ..

اي يمة انت املي .. وانت خلاصي من هذا الوضع متأكدة بس بعدك صغير ع الهم لاتشيل هموم اكبر منك ..

درة رغم حبها الابوها بس كانت تتدمر وتگول بعد مااحبه ليش يضربج ..
مااحب اشوف اولادي هيج يحجون ويكرهون ابوهم بس مو بيدي هو يتعمد يسوي كلشي گدامهم ..
يغلط ويسب ويضرب .. هذا طبعه ومايغيرة. .

نام وگعد ونسى كلشي ولاعبالك ضاربني ومأذيني ..
صاح ياقوت انطيني ملابس خليهن بالحمام اريد اسبح ..

اتنهدت وردت اگوم ..
امير .. لايمة لاتخذين .. عوفيه ..
ياقوت .. عيب يمة لاتعلم اخوتك ع الحقد مااقبل لاتخليني اغضب عليك ..
امير .. جا حضريهن وانطيني اني اوديهن اله ..

حضرتله ملابس واخذهن امير ..
فكرت وشفت الانسب انه اهمله شويه واحفظ كرامتي ..
ابني رغم عمرة الصغير ..
بس گدر يوعيني ويفتح عيني على شغله ..

حاكم مايحترمني ولايقدرني لأن بكل مرة يضربني ويقسا عليه واني ارجع احجي وياه والبي طلباته ..
هالمرة خلص بعد مااتحمل ولازم اخليه يعرف قيمتي ويحترمني ..
مليت واني انضرب كل يوم وانهان گدام جهالي ..

سمعته يحجي وي امير ..
ليش انت جبت الملابس وين امك ..
امير .. امي مريضه مو انت ضربتها واذيتها بعد ماتگدر تگوم ..
حاكم .. ولك شلون تحجي وياي هيج اني اعلمك بس خلي اطلع ..

ركضت سحبت امير ودخلته للغرفه ووصيته مايطلع ..
طلع حاكم يصيح ..
وين هذا السخيف .. شلون يحجي وياي بنتر هيج.

اجيته رغم جسمي كله متشنج ..
گتله حاكم جوز من الولد .. مو راح تخلي ولدك يكرهوك من افعالك ..
اني تعودت عليك ..
بس جهالك عاملهم بطيب .. لايجي يوم ماتلگي احد يعينك وتبقى وحيد ..

حاكم .. انتي شنو تقويهم عليه لو تعلميهم يكرهوني ..
ياقوت .. اني تعبت منك يحاكم . الاحسن اسكت ومااحجي بعد ..
وراح ابقى هنا الخاطر جهالي حتى غرفه وحدة ماتجمعنا دور انام يم جهالي ..
حاكم .. ايبااااه والله وطالع السانج وصايرة قويه ست ياقوت .. بس لاصاحبتج الحافوفه تعلمج هالسوالف ..
اصحي ولج لااكسر رجليج واخليج مگرمة والله ..

ياقوت .. كااافي حاكم من گد الضرب والاهانات بعد مااخاف من تهديداتك ..
تستغل اني يتيمة ووحيدة هيج تسوي بيه ..
اني شنو الي سويته الك .. شو فتحت عيوني عليك وحبيتك ورغم كلشي بقيت احبك وماكرهتك. .
ليش گوة تكرهني بيك ..
ليش ..

حاكم .. اوووه راح تبدي الاسطوانه .. خلي ابدل واطلع احسن ..
وهااا ارجع مااريد الوجوه مگلوبه انتي والجهال ..
لاتعلميهم الحقد ..
اني ابوهم غصب ماعليهم وشمااسوي يطيعوني ويحترموني ..

طلع هو سويت العشا وتعشينا اني وياهم .
ووصيتهم من يجي ابوهم يسلمون عليه عادي ومعليهم بمشاكلنا ..

حضرت الصينيه وخليتها ع الميز..
ودخلت غرفه جهالي ..
اجة هو ويصيح بأسمي ..
گلت الدرة اطلعي وگليله ماما نايمة والعشا مالته ع الميز ..

طلعت وگالتله ..
حاكم .. هاااا هيج صارت يعني .. تعزل عشاي وحدي مثل الجلب ..
براحتها خليها .. هم عشاها مااريدة ..
وطلع ..

درسوا جهالي وراجعتلهم وكملوا وناموا وهو ماكو ..
بقيت گاعدة النص الليل وهو مااجة ..
سمعت الباب انفتحت ..
غطيت راسي ونمت ..

سمعت باب الغرفه انفتحت ورجع سداها وراح ..
بقينا ع هذي الحاله ايام ..
مااخليه يشوف وجهي ..

بيوم اجت ام احمد يمنا ..
سوتيلها جاي ..
وخايفه لايجي حاكم يشوفها ادري مايحبها ..
اوووف يحاكم راح يگاطعني وي العالم كلها ..

ام احمد .. والله ابو احمد يمدح بشغل ابو امير ويگول شاطر بالكهربائيات ..

بقيت صافنه هاي شتحجي ..
ياقوت .. ياشغل ام احمد ..
ام احمد .. يايدادة معقوله ماتدرين .. مو ابو احمد ملاگي ابو امير بالسوگ ومفاتحة بموضوع الشغل الي گلتيلي عليه ..
وابو امير اشتغل وياه وهاي صارله خمسة ايام وشغله حلو ورحمة من الله ..

بقيت مصدومة .. معقوله .. حاكم وافق ع الشغل ..
جا ليش اتكاون وياي وضربني وبهذلني لأن طلبت يشغلوه بالمحل ..
لا وفوگاها ماگالي .. واني اگول وين يروح طول اليوم ..

ام احمد .. شبيج خيه شو صفنتي شنو ماتتحاجون ..
ياقوت .. لا بس يجي تعبان وينام ويطلع فيمكن نسى يگلي ..

استحيت من المرأة شتگول عليه .. الله يسامحك يحاكم ولو هي حست علينا متعاركين ..
ليش وين اكو مرأة ماتدري برجلها يشتغل لو لا ..

ماحجيت وياه ولافتحت الموضوع ..
وبقيت على نفس الحاله وياه ..
منتضرة شوكت يحن گلبه علينا لو يجي ويخبرني بشغله وي ابو امير ..
ولو ماهامته اني بس درة يصيحها ويشتريلها هي واخوتها وحتى مايسألهم عني ..

لليل نايمة ومااحس الا واحد فوگاي وبغرفة جهالي ..
فزيت واشوف حاكم ..
همست .. حاكم شتسوي منا الجهال ..
حاكم .. گومي وياي للغرفه لااسوي كلشي هنا وگدامهم .. زعلي معليه بيج بس حقوقي اخذها شوكت مااريد ..

مانعت وقاومت بس ماكو فايدة . وماردت جهالي يشوفونا بهيج وضعيه وخاصه امير كلشي يفتهم ..

استسلمت وگتله .. انت روح واني اجي وراك بس لاتگعد الجهال ..

عدلت ثوبي وگمت عاينت عليهم نايمين طلعت ع كيفي ورحت وراه ..
حتى ماكلف نفسه يعتذر لو يسمعني كلمة حلوة ..
اجة متلهف على حقه وشهوته وبس ..
وعبالك ماخذني بس الهاي الشغله ..

احس روحي نكسرت ومايفيد الحجي لو الزعل وياه لأن حاكم هو حاكم ومراح يتغير ..
ولازم اتحمل واقبل بي مثل ماهو الخاطر جهالي ..

دخلت لگيته بوضع اول مرة اشمأز منه .. رغم شگد كنت احبه ..
حاكم .. يله بسرعه انزعي هذا ثوبج عبالك ثوب امي وبيبيتي وتعاي هنا ويأشر ع الفراش ..
وكالعادة اخذ الي يريدة ودار وجهة ونام ولاعبرني ولاگال كلمة وحدة الي ..
من هذي اللحظة صارت علاقتـي بحاكم علاقة فراش وبس واب الاولادي ..
اما الحب الي كنت اشوفه بي والعشگ الي احسة اتجاهة احسة بدأ يموت ويختفي بالتدريج والسبب برودة وقسوتة عليه ..

‏ ‏ المرأة كـ المظلّة لا يمكن أن تعتني بك إلا عندما تضعها فوق الرأس ..!

بقلمي_الكاتبة_شمس
يتبع...... .

لامارا · 25-08-19, 01:55 AM

//// البارت الثالـث ////
عجـاف_القلـوب ..
الكاتبـة_شمـس ..

يؤلمني أن قلبي لم يعُد يتحمّل ..
وأن روحي ماعادت تتلهّف إلى شيء..
وأن ابتسامتي لم تعد تحب الظهور حتى مجاملةً.. تؤلمني الكثير من الأشياء من بينها فكرة أن أبدو ثابتًا من الخارج بينما تُقام مجزرةً داخلي كل ليلة...

بقيت طول الليل اعاين عليه .. انت ليش ماحبيتني ..
شنو الي قصرت وياك بي ..
من اني طفله وفتحت عيوني عليك وحبيتك ..
من يگولون ياقوته الحاكم افرح وگلبي يفرفر ..
معقوله لأن جبروك عليه هيج تسوي بيه ..
بس شنو ذنبي تعاقبني الي ..

احجي وي روحي واكل بيها من القهر .. الى ان غفيت
وماحسيت بنفسي ..
گعدت الصبح بسرعة سبحت وبدلت ..
طلعت من الغرفه صار گبالي امير ..

-يمة ابوي صالحج يعني بعد ماتتعاركون ..
ضحكت وگتله اي يمة ابوك بالليل اعتذر وبعد مايسوي النا شي ..

حسيته فرح ووجهة گام يضحك ..
درة .. مو گلتلكم بابا يحب ماما ومايضربها بعد ..
وحيدر عاند ويگلهم لا مايحبها هسا يرجع يضربها ..
بس علي جان مايشاركهم لأن بطبعه فقير وهادي ..

اعاين عليهم ودموعي بعيني ..
الجهال بعمرهم تفكر بالاكل والشرب واللعب ..
واني جهالي يتناقشون على حياتنا اني وابوهم ويفكرون بينا ..
حسيت طفولتهم ضاعت بسببنا ..
من جنا ببيت عمي وهمة يشوفون ياهو اليگوم يحجي على امهم ويضربها ..
ومن اجينا لهنا عبالهم يرتاحون تالي ابوهم يطلع قهرة بينا كل يوم ..

سويت الريوگ وبدلتلهم ..
گعد حاكم ..
ولاعبالك صاير شي ولاحتى سمعني حجايه حلوة لو صباح الخير ..

حاكم .. ياقوت خليلي ملابس بالحمام بسرعة اتأخرت ..
راح سبح وطلع ..
وگعد ع الصينيه ياكل ..
-لاتنتضروني ع الغدا اني من الدوام واطلع للشغل ..

ياقوته .. شو ماگتلي موافق على شغل ابو احمد ..
حاكم .. ادري بصديقتج الحافوفه ماتضم عليج بعد عليمن احجي اني ..
ياقوته .. حاكم بعد لاتگول عليها هيج گدام الجهال عيب وبعدين انت مو تشتغل وي رجلها ليش تحجي عليها ..
حاكم .. تدرين ياقوت .. لو باقية على زعلج احسن ع الاقل خلصان من السانج ..

خلي اگوم اروح احسن ..
يله بسرعه جيبوا جنطكم وتعالوا ..،صاح على الجهال ..

واني بقيت على گعدتي ..
مااعرف شسوي ووين اروح .. جانت عمتي تنصحني وتخفف عليه هسا وين اروح واني لاام ولااخت الي ..

نضفت وطبخت ..
اجت ام احمد ..
سلمت عليها ودخلتها للبيت ..

-شبيج ام امير شو ضعفانه ومتغيرة شني حامل ..
-لاخية ويني وين الحمل .. الحمد لله على الي عندي ..
-ام امير انتي خيتي وصدگي لو ماعزيزة جان مافتحت الموضوع وياج ..

-گولي دادة شدهتيني شكو ..
-انتي حلوة وماناقصج شي .. بس يراداج تعدلين بروحج تگصين شعرج تحفين وجهج ..
-يادادة شبي وجهي اصلا مايبين بي الشعر ..
-الرجال يخية يباوع وعينه فارغة .. شگد حلوة انتي وماناقصج شي بس تروح عينه ع الغريبه ويدور بيها اللبس والاناقة ومن هاي السوالف ..

-انتي سامعه شي خيه شو احس عندج حجي مضموم ..
-لا شعندي بس رجلج موضف ووياه موضفات ويشوف ..
والله لو مااريد مصلحتج مااحجي ..

حسيت ام احمد عندها شي وخايفه تحجيه لو ماتريد تضوجني ..
استحيت اگلها حاكم مايهمني بعد وهو اصلا مايحبني ..بس حجيها فتح عيني من گالت ..

انتي يتيمة ومحد الج غير رجلج وخاف وحدة تلوف عليه وتاخذة منج ومن جهالج وشلون تعيشين وتربيهم وحدج ..

اي حجيها صدگ اني منو الي يعيشني لو يتحملني ان وجهالي اذا صار شي اسم الله ..

-دگومي سدي قنينتج وقفلي بابج وتعاي يمي اسويلج شعرج واحف وجهج ..

اخذتني ورحنا البيتها .. نضفت وجهي ورتبت حواجبي وطلع وجهي غير شكل ..
اني اگول مايبن الشعر بي ..
بس لمن حفتلي طلعت اخبل ..
وگصتلي شعري لحد كتفي وسوته مدرج حلوة طلعت ..
وهو بي شگار ..
گالت مايحتاج اصبغه الج .. بس خية بعدج صغيرة وشعرج شاب ..

اخذت حسرة وگلتلها اي من صغري واني شعري بي شيب . جانت عمتي الحجيه تگلي ذني الشيبات ينورنج بيوم القيامة ..

من كملتني شفت روحي بالمرايه غير شكل ..
شكل تغير وصرت اصغر رغم الدنيا كبرتني واني طفله ..

شكرتها وردت اطلع .. شالتلي صرة وگالت هاج خيه مو تحسبيها غير شي بس والله ذني جديدات ومايصيرن عليه لأن سمنت وليش انطيهن الغيرج انتي هم اخيتي ..

گلتلها لادادة وليش اضوج الله شاهد انتي خلتيني احس الدنيا بعدها وياي موش ضدي ..

اخذتهن ورحت للبيت .. جانت امنيتي اگلها لامااريدهن ابو امير مامقصر عليه بشي ويشترلي كلشي ..
بس ماگدرت ..
شفت دشداشتي بيها كم فتگ وخياط لأن مااهون اشتري والبس واعوف جهالي ..

فتحت الصرة واشوف اشكال الدشاديش والثياب الحلوة
هي اختها خياطة المنطقه كلها تحلف بخياطها ..
مثل الجاهز تسوي ..
اكو بيهن دشاديش ربع ردن مال بيت ومخصرات وبيهن فتحة من الصفاح ..
لبست وحدة طلعت بيها شحلاتني ..

ضحكت على روحي .. يايياقوت معقوله هاي انتي ..
ولج يغبرة وين جنتي دافنه روحج ..
فكيت شعري والگصه لايگه عليه ..
وحواجبي مرفوعات ..
فتحت المجر ماعندي مكياج بس كحل عرب جابته عمتي الحجيه الي من الحج ..
خطيت عيني بيهن .. وبين الفص الازرگ الي بوسطهن ..
------------------------------------------
اريد اشوفك يحاكم شتسوي من تشوفني ..
طلعت من الحجرة ..
درة شهگت .. ماما تخبلين ..
فرحت من سمعت حجايتها الحلوة ..

-صدگ يمة طلعت حلوة ..
-اي تخبلين .. هيج سوي كل يوميه دور ..

حضنتها وشميتها ..
وصارت عيني بعيونها الزرگ الي اخذتهن مني ..
عسا حضج يصير احسن من حضي وتاخذين الي يحبج ويدللج ..

گمت صفطت الملابس الي جبتهن من ام احمد بالكنتور ..
ورحت اسوي الخضرة لأن راح يجون الجهال ..

صبيت اكل الحاكم بالصفر طاس .. خاف مايلحگ ياكل وهو گال لاتنتضروني ..

سمعت صوت الجهال دخلوا البيت ..
ركضت بالصفر طاس للباب خاف يروح وماالحگ عليه .

گتله حاكم هذا غداك ..
دار وجهة وشافني .. صفن ..
ولج هاي شمسويه بروحج ..
ضحكت .. شمسويه ليش مو حلوة ..

دخل وسد الباب وعصر ايدي ..
ولج شلون تطلعين هيج للطارمة ماتخافين واحد بالسطوح يشوفج بنت…..

راحت ضحكتي ورجعت ملامح الحزن بوجهي ..
ليش شمااسوي مايعجبه ..
-راح ادخل بس لو گايل كلمة حلوة مو احسن بس هذا طبعك وماتغيرة لو شمااسويلك ..

لزمني من شعري .. حسابج من ارجع واريد اشوف منين جبتي هاي الفلوس وسويتي بيها شعرج ومغيرة خلقتج ..
سدي الباب ودخلي بسرعه يلة .
حجاها بصوت عالي ..
حتى ماحسب للجيران لاتسمع واحنه كل يوم صوتنا طالع من وراه ..

ضجت ودخلت مقهورة والدمع ترس عيونـي ..
جهالي فرحانين بيه ويگلولي يمة تخبلين ..
من سمعتهم نسيت كلام حاكم الي ..
الصوج بيه اني .. نسيت الي سواه البارحة ورجعت اتأمل من جديد ..

بس ليش انقهر .. المفروض تعودت .. والا البس واعدل على عنادة ومايهمني اذا عجبته او لا المهم اني عاجبتني نفسي وولدني معجبين بيه ..

تغدنا وكملنا واحذتهم الحضني ونمت ..
كمل اليوم بنفس الروتين دراسة الجهال وغسل ملابسهم والبيت ..

لليل اجه حاكم تعبان گال سويلي عشة اريد انام ..
تعشا ونام ..
وبقينا اني وجهالي وحدنا ع التلفزيون ..
بعدها نومتهم ورحت نمت ..

گعد النص الليل شبعان نوم .. اتقرب مني واخذ الي يريدة بلا اي مشاعر ولااحساس ..
وكأنه اني جثة يمة مو انسانه والي مشاعري ..

هم مااهتميت وبقيت على هذي الحاله ايام واشهر ..
هو طول النهار ماهو وبس بالليل يجي ومايشوفني اصلا رغم البس وارتب بنفسي وتغيرت حيل حتى ضعفت ..
كل الي يشوفني يتعجب ..
لكن هو بقى مثل الثلاجة وياي اهم شي عندة الفراش ..
بس اني حاسبه حسابي وجنت اخذ حبوب مانع حمل ..
رغم هو مايقبل ..
لان يگول مصاريف زايدة .. والطفل رزق ليش نتبطر ..
عساس هو حاس بيهم لو بتربيتهم ..
بس من گلت الام احمد مااريد جهال بعد من قبل اشهر وهي اشتركتلي بالمستشفى عندها عرف وگمت استلم كل شهر شريطين ..
واضمهن .. مايدري بيهن هو اخذ بسكته عنه ..

بيوم حلمت بعمتي الحجيه جايتني بالحلم وتعاتبني ..
فزيت مرعوبه وخفت لاصاير بيها شي. .
گتله حاكم ..
عمتي شو شبيها ..
حلمت بيها حلم ضوجني ..
انت هم تروح وتشوفهم ..

حاكم .. اي رحتلهم ذاك الاسبوع مابيهة شي رجعي نامي ..

بقيت افكر بيها ومشتاقتلها .. وليش حاكم مايخلينا نروح ومانعني ..

بقيت يومين اتوسل وماكو ..
تالي گال .. ياقوت اهلي مايردوج وكتلتي روحج تردين تطلعين عنهم بعد شعندج تلحين هسا ..

سكتت وماحجيت .. گتله .. جا اخذ الجهال خلي يشوفون بيبيتهم خطيه تحبهم وتشتاقلهم ..

گال يصير خير احاول اجي بالليل من وكت واخذهم ..
صدگ لليل اجة اخذهم وراح ..

وخلاني بالبيت وحدي وگال قفلي بابج ..
گمت الوب وخايفه ..
هسا لو رايحين بالنهار .. هاي اول مرة ابقى وحدي بالبيت بالليل ..
هو بالنهار واخاف لو ما درة وياي ملهيتني ..

فاتحة التلفزيون وعيني ع الساعه شوكت يجون ..
اتأخروا صارت الـ 11 وهمة مابينوا ..

شوية وسمعت صوت وصياح برة بالشارع .. خفت افتح ..
بقيت اسمع من باب المطبخ ..
والناس تصيح وتگول طفر على بيت ابو امير ..

ضربت على صدري .. يمة شنو هذا الطفر بس لاحرامي وينك يحاكم صدگ هيج تعوفني وتمشي ..

اندگت الباب وتكسرت .. واني جامدة بمكاني وخايفه اطلع ..
لا ماافتح خاف هاي عصابه وتدخل علينا وتكتلني ..

مخليت لااية ولاتسبيح ماقريته ..
والباب بعدهي تندگ والشارع هوسة ..

وعبالهم ماكو احد بالبيت ..
شويه وسمعت صوت حاكم يسولف وياهم .. برد گلبي الحمد لله واخيرا اجه ..

دگ باب المطبخ وگال هاي اني حاكم افتحي بسرعة ..
فتحتها دفعني ودخل للبيت يدور ..

من خوفي حضنت جهالي وابجي ..
وامير يگلي .. يمة لاتخافين احنه يمج ماتخلي الحرامي يجي نكتله ..
وحيدر يگلي .. كاكو حلامي لاح لاتخافين ..
بس علي يگلهم لا ولكم الحرامي وحش خاف يكتلنا سدوا الباب ..

رجع حاكم دفع ولدي وسحبني .. وينه ولج ..

اتعجبت وصفنت بوجهة .. منو هو. .

حاكم .. لاتغشمين روحج .. هاي مال حرامي وبالشارع ماتمشي عليه ..
كلها تگول طفر عليكم وانتي وحدج بالبيت وين راح ..

ضربت على وجهي .. أفة عليك ياابن عمي تشك بيه ..
حاكم .. جا شتسمين ملحتج صار كم يوم على روحة اهلي وتالي گتيلي اخذ الجهال بيبيتهم تشتاقلهم واني الغشيم صدگت ومشيت ..

اسمع ومامصدگة واني اشوفه يتهمني بعفتي وشرفي گدام جهالي وبعلو صوته ودنيا الليل والناس تسمع ..

ماتحملت وتفيت بوجهة .. تف عليك ولك اني اشرف منك مايوم واحد شاف ذيال عباتي ..
وانت هسا جاي تتهمني بشرفي ..
ريتني ميته ولاسامعه هالحجي ..

سحبني للغرفه من شعري ..
-ومنو گالج راح اخليج عايشه .. اليوم اموتج اذا مااعترفتي وگلتي منو هذا المتواعدة وياها ..

-وخر عني شعري ااااخ .. منا جهالنا حاكم شبيك تخبلت شلون تشك بيه هيج وتتهمني ..
بقيت اضرب بي وادفع بكل قوتي .. ماردت جهالي يسمعون حجي ابوهم وغلطة عليه ..
وهو يتهمنـي بأبشع الالفاظ ..
----------------------------------------------
دخلني للغرفه وجان يضرب بيه .. بس جسمي خلص بعد مايحس بالوجع بگد وجع گلبي ..

وينك يابة وينج يمة .. تعالوا شوفوا بنتكم الي جبتوها للدنيا وخليتوها وحدها ..
اليسوة والمايسوة ينهش بيها ..
مااگدر اصيح ولااحجي اخاف الناس تسمعني وانفضح ..
احنه ناحية صغيرة والسالفه ماتنضم بيها ..

احس جسمي ثلج وعيونـي غوشن .. وهو يصيح بأذني گولي منو ..
الي تبدليله كل يوم وتعدليله وغيرتي شكلج وضعفتي علمودة ..
حجاياتة مثل الخنجر بگلبي ..

سودة عليه امير .. اسمعة يصيح بالباب ويگله لاتضرب امي حرام عليك ..
اطلع اضربني اني بمكانها خطيه لاتضربها. .
هو يصيح واخوانه يبجون وياه ..

گومني وگال گومي خلي شي على راسج لو اطلعج هيج گدام الناس ..

-احس وجهي مورم ومااگدر احجي بس اهمس ..
حاكم وين ماخذني حرام عليك والله مامسوية شي ليش تفضحني شسويتلك اني مو عرضك ..

-گومي ياعار اخذج الابوي يغسل عارج ..
-اذا متأكد اني عار .. اغسل عارك بيدك ولاتاخذني لهناك كافي اهاين گدام اليسوة والمايسوة موتني هنا وريحيني ..

حاكم .. هههههه تخافين من اللسان سهيله .. بس هي طلعت تعرفج .. والله وگالتها ..
ياقوت عندها شي هالكونت ع الطلعه ..
بس اني الاثول المافهمت حجايتها .

عاينت عليه وبودي اغرز سجينه بگلبه على حجاياته الزرفن گلبي وگدام ولدي ..

-هاهي يحاكم اخذني وين ماتريد بس حوبة اليتيمة ماتروح ان شاء الله..
واذاا الي حوبة عند الله يطلعها بيك ..

-تدعين عليه بنت… .. گومي لااطلعج بهاي هدومج وافضحج گدام الناس ..

جانت الساعه راح تقرب ع الوحدة بالليل ..
سحولني تسحول واخذني البيت اهلة مشي . وغلط
عيني تعاين ع الشارع لايشوفنا احد ..
وبالي يم جهالي العافهم يبجون وقفل عليهم ..

وصل البيت عمي فتح الباب وكسر باب المطبخ عليهم ..
اسمع الكل يتراكض ..
صاح قاسم .. منهووو
حاكم .. اني حاكم افتح الباب ..
فتح قاسم الباب .. وشهگ .. شجابكم شكو وشبيها ياقوت شني هذا الدم.

سحبني من عباتي وشمرني بالهول ..
وينك يابة تعال .. تعال شوف بنت اخوك الشريفه. .

اني بس دموعي تجري على جروح وجهي والي حرگني حرگ ..
دنگت راسي ماردت اشوف عيون سهيله وشماتتها بيه ..

وهي كل شويه تسأل .. شسوت ياقوت وليش ضاربها هيج ..

طلع عمي مرعوب .. شكو ولكم ياهو المات.

حاكم .. ياريتها ميته ولاجابت العار ..
هاك هاي بنت اخوك الي بليتني بيها ..
رجعت منكم ولگيت الشارع مگلوب والناس كلها تگول حرامي شفناه طفر على بيتكم ..
ودخلت لگيتها مبدله ومعدله .. وقبلها تلح عليه اخذ الجهال واجيكم بحجة امي مشتاقتلهم ..
واني الغبي اگول شبيها تغيرت وگامت تعدل بروحها وتلبس ..
طلعت سالفتها مو خاليه ..

عمي .. صدگ هذا الحجي ولج ..
ياقوته .. عمي والله ماعندي شي .. حرام وحدة تبدل وتلبس الرجلها .. جيبوا القرآن احلفلكم ..

قاسم .. بريئ منج القرآن ومن حلفج .. رجلج مايحجي لو مشايف شي ..
المشكله محسوبه علينا شلون نفضح روحنا ..

لافة نفسي بالعباية وابجي ومحد يصدگني ..
سمعت صوت عمتي الحجيه ..
انجب انت وياه تخسون ويخسى شرفكم اذا جبتوا ياقوت بالموزين ..

حسيت صوتها مي بارد على گلبي ..
طلعت بعصتها تمشي ..

ولك شلون تطعن بشرفها وهي تربات ايدي .. اذا هي تسوي العيبه معناها اخواتك هم مثلها ..

قاسم .. يمة لاتقارنيها بأخواتي ..
الحجية .. انت تسكت وماتفك حلگك . ماتحجي حجي ترضاها واحد يطعن بشرف بنت اخوك ..
وانت يحاكم .. دوووم اعرفك مابيك حظ وماتقدر الجوهرة الي اخذتها الك ..
بس ماتدريت بيك اغم وتتهم مرتك هيج تهمة ..
حتى لو شايفهة بعيونك ماتصدگ ..
لأن هاي مرتك وعرضك وخلصت عمرها وهي رابيه عدنا .
حاكم .. بس يمة ..
الحجية .. وغمة التغمك .. لااني امك ولااعرفك ..

عمي .. كااافي ولكم شو ماحاسبيلي حساب .. وانتي سهيله اخذي بناتج وابنج وخشي الحجرتج يله ..

وانتي ياقوت گومي وراي وتعال حاكم انت هم ..

گمت وبالگوة امشي .. رحنا الغرفه عمي ..
جاب القرآن وخلاه گبالي ..

هاج احلفي ماعندج صاحب ولاتخونين رجلج ..

بقيت صافنه بوجهة واگله .. معقوله يعمي تحلفني بالقرآن .. يعني انت مصدگ اني اسويها ..

-لاتخلين اكتلج بالعصا .. العني الشيطان واحلفي اذا ماعندج شي خلي گلب رجلج يرتاح وماياكله الشك ..

عاينت على عمتي .. هزت راسها ..
خليت ايدي على القرآن وابجي ..
-وحق هذا القرآن وكلام الله .. مايوم شفت ولاعرفت غير رجلي ..

حاكم .. احلفي اليوم الي طفر مو الج حرامي وماتعرفيه
عاينت عليه وهزيت راسي وحسيت بكرهي اله ..
-وحق الله مااعرف الي طفر الليله ولاالي دخل بي ..
واريد الله يطلع برائتي وياخذ حقي من ظالم ان شاء الله

عمي .. كافي ولج گتلج احلفي مو ادعي ..
وانت حاكم اخذ مرتك وارجع الجهالك يله ..
وحدهم لايصير بيهم شي ..

عمتي الحجية .. لا ماتروح ..

صارت عيني بعينها ..
حاكم .. شني يمة ..
-مثل ماسمعت .. مو انت ضربتها ودميت وجهها وتهمتها بشرفها وماصدگتها ..
مااخليها ترجع وياك وجهالك عندك وانت تبتلي بيهم ..
حتى تعرف قدر ياقوت الي نزلته بالگاع ..

حاكم .. يمة شتحجين .. تردين تقويها عليه ..

الحجية .. ولك يالاغم جان فكرت قبل ماتضيع عشرة السنين بسالفه ماسخة ..
جان حسبت حساب الجهالك وماضربت امهم جدامهم ولانزلت راسها ..
الي سويته موش هين وماينسكت عنه ..
شوكت ماتعرف قيمتها تجي تاخذها ..
وهسا يلة ولي روح البيتك وجهالك حير بيهم وماتراويني وجهك ..

حاكم .. يابة ماتحجي انت ..
عمي .. ام قاسم العني الشيطان وخليها ترجع وي رجلها ماكو بيت ماتصير بي مشاكل ..

الحجية .. انت بمثابة ابوها يحجي بس حلفتها بالقرآن وماصدگتها .. بس اني مااخلي بنتي يذلها حاكم. .
بحياتي ماكسرت الك جلمة ولاعصيتك ..
وشگد اذيتوها وضربتوها وماحجيت ..
بس هاي السالفه ماينسكت عنها ..
خلي يتربى حاكم ويتهدى ويخلي رجلة بالگاع لايجي يوم والله يگلبها بي ومايلگي يمة لا ولد ولاتلد ..

اشر عمي الحاكم وگاله روح انت مناك جهالك . والصباح رباح ..

عاينت على عمتي وگلتلها . جهالي…

-اششششش لاتخليني اكسر راسج .. امشي وراي ومعليج . موتي گلبج شويه واخذي شوري ..
-------------------------------
سكتت وماحجيت ..
بالي يمهم منو ينيمهم .. ودرة شلون بيها ماتگدر بدوني
لو مخليتني اخذ جهالي ومالي علاقه بحاكم لو ابقى العمر كله مااشوفة ..

صاحت عمتي سهيله ..
سهيله .. هااا عمة رايدة شي وعينها عليه من فوگ لجوة تعاين ..
عمتي .. طلعي هدمة نضيفه منج وخلي ياقوت تسبح وتبدل ..
وفرشيلها ترتاح ..

سهيله .. جا شني راح تبقى هنا .. بس لا حاكم طلگها ومايريدها ولو حقة ..

الحجية .. ولاكلمة اذا فكيتي حلگج وحجيتي لأحد لو سمعتي ياقوته حجي .. بهاي العصه على راسج ..

هزت راسها وراحت ..
جابتلي دشداشة قديمة منها وشمرتها عليه . هاج گومي بدلي ..

اخذتها مضطرة وگمت .. دخلت للحمام ماگدرت اسبح جسمي يوجعني بس غسلت وبدلت ..
طلعت لگيتها شامرتلي فراش بالهول ..

اخذتة ورحت للاستقبال .. غرفتنا القديمة مسويها القيصر ابن قاسم ..

ردت انام وانسى ماگدرت .
بالي يم جهالي . هسا منو الهم . يبجون نايمين لو گاعدين ..
خاف ضربهم لو ماغطاهم ..
الف سالفه وسالفه ببالي .. لحد ماطر الفجر واني مانايمة ..
اتعوذت من الشيطان وگمت اصلي ..
ودعيت الله يريح بالي ويفرجها عليه .. لأن تعبت ومليت
وماعندي ملجأ غيرة ..

كملت صلاتي .
-اي صلي بلكي الله يخفف ذنبج شويه.

درت وجهي .
وگلتلها .. الحمد لله ماسوينه العيبه بيوم والله شاهد علينا ..

سهيله .. ماتشوفين الله معثرج من جذبج وسوالفج ..

سحبت البطانيه ونمت وغطيت حتى راسي ..
اريد اصيح وافرغ همي بس صوتي مايطلع ..
اتجاهلها واسكت عنها بس هي مصرة تجرحني وتأذيني بحجيها ..

غفيت شويه وسمعت صوت هوسة ..
فتحت عيوني الصبح طر ..
اتذكرت اليوم جمعه والبنات كلهن يلتمن هنا ..
شلون سالفه هاي ؟؟

اذا شافني هنا شيگولن لو شافن وجهي وشكلي ..
واكيد سهيله ماراح تسكت وتحجي كلشي ..

اوووف يااهلي الصبر منك ..
صفطت الفراش والبطانيه .
ولبست حجابي وشلتهن ..
وديتهن ع النضيدة ..

شفت عمتي تتريگ ..
همزين ماشفت عمي مالي خلگ حجاياته التوجع ..

سلمت عليها ..
گالت ..
تعاي تريگي مادام الجاي حار ..

عمتي طبعها تحلي الجولة بالگاع بالمطبخ وتخدر الجاي عليه ..
گعدت بصفها ..
ناوشتني خبزة وبيضة وگالت اكلي بين مااصبلج جاي ..

سهيله .. ااااايه ليش لا . وكليها بيدج بعد .. والله لو سهيله مسوية عملتها جا بيدج طردتيها.
بس الغريبه ماتعيش وياكم ..

الحجية ضحكت ..
والله اني الغريبه بهالبيت موش انتي .. تنهين وتامرين وتحكمين بكيفج . بعد شناقصج ..
وخاف لبالج اني صافه وياها ..
بس لو ماادريها ماتغلط جان عرفت صرفتي وياها ..

خافي ربج يسهيله عندج بنات ثلاثة .. لاتحجين بعراض الناس ..

سهيله .. يمة اسم الله عود انتي بيبيتهن وهيج تحجين بيش تطلبيهن يعمة ..

بقت تدردم علينا وزعلت ودخلت ..
عاينت العمتي وگلتلها . عمة بالي يم جهالي ..

ضربت على رجلي وگالت ..
لاتخافين وديت بلقيس تشوفهم وتسويلهم ريوگ ..

ياقوتة .. ماگلتيلها تجيبهم اشوفهم ..
عمتي .. هم گلتلها اذا شفتيهم يبجون امي غراضهم وجيبيهم ..

ارتاحيت من سمعت كلام عمتي ودبت الروح بيه شويه ..
جاي اكل .. بعدني بس خليت الجاي بحلگي ..

سمعت صوت حاكم وهو يصيح ..
وينها الجلبه بنت……
تنكر وتگول ماعندي شي . بس الله كشفها الي.

دخل وتوجه الي ..
دفعته عمتي بعصتها وگالتله . يواش لاتصير ثور فهمني شبيك ..

اخذ نفس وطلع شريط حب من جيبه وگال شني هذا… .
ودخلت بلقيس وراه وجهالي ..
وحالهم حال من البجي ..
گمت اركض الهم.
حسيت بدفعه حيل على گلبي وانشمرت ع الگاع ..

بقلمي_الكاتبة_شمس
يتبع …

لامارا · 25-08-19, 01:58 AM

//// البارت الرابـع ////
عجـاف_القلـوب ..
الكاتبـة_شمـس ..

ضـاعت درابـين العمـر !!
مـاندري نمشي بيآ درب
چا ليش من دون الخلـگ
عشنـاَ ويَ أهالينـا غُـرب ..

سمعت صوت حاكم وهو يصيح ..
وينها الجلبه بنت......
تنكر وتگول ماعندي شي . بس الله كشفها الي.

دخل وتوجه الي ..
دفعته عمتي بعصتها وگالتله . يواش لاتصير ثور فهمني شبيك ..

اخذ نفس وطلع شريط حب من جيبه وگال شني هذا... .
ودخلت بلقيس وراه وجهالي ..
وحالهم حال من البجي ..
گمت اركض الهم.
حسيت بدفعه حيل على گلبي وانشمرت ع الگاع ..

ردت اخذ نفس ماگدرت .. واحس الدنـيا ضاگت بعينـي
اجة اميـر يركض وصار گبالي ..

-عوف امـي لاتضربها .. احنه مانحبك نكرهك ..

حاكم .. ولك هاي امك تعلمك .. ضربة راجدي ..
حضنت ابني وابجي ..

-حرام عليك .. موتنـي وخلصنـي بس لاتسوي هيج بجهالي مو كرهتهم بعيشتهم ..

بلقيس .. خلي يولي مامربيته شلون يحجي هيج وي ابوه الحجية .. انتي مالج شغل ام البلاوي ..

وانت كسر ايدك اذا جست واحد منهم بعد ..
حاكم .. هاج شوفي مو هاي الي تدافعيلها .. شعدها تاخذ حب يمنع الحمل ..
بعمرها مااخذت حب وكلما اگلها اريد طفل تسويلي ..
شغيرها هسا لو ماعندها شي وتخاف ... .

بعدة ماكمل ..
صاحت بي عمتي وگالتله .. گطع اللسانك ان شاء الله يالاغم لو بيك حظ جان سوتهم درزن الك ..
بس شتسوي بالجهال من واحد مامراعيها ..
وهاي عندك رحمة من الله شتسوي بيهم بعد ..

حاكم .. ابقي يمة ابقي دافعليها لمن تصخم وجهنا ..
عاف البيت وطلع ..
اخذت ولدي الحضني وحضنتهم وابجي ..

بلقيس .. الله اليستر منج .. اااخ لو ماامي ..

الحجية .. تعاي ولج .. مو عبالج مااعرف هاي سوالفج ليش حاكم وين شايف حب المانع ..
لو ماانتي تورجي وتشحني وتخليه يتخبل علينا ..

بلقيس .. يايمة اني شعليه بدال ماتحاجيها تجين عليه ..
وانتي ليش ملفيتها ماادري ..

الحجية .. اخذي ولدج واطلعي وبعد لاتجيني مااريدج البنية الي تعصى امها ومو على گلبها مااريدها ..

بلقيس .. تطرديني من بيت ابوي ييمة ..
الحجية .. واكسر رجلج اذا اجيتي منا لمن تخلص سالفه ياقوت وترجع البيتها ..
التجي تجي بأحترامها ..
عبالك عدوتجن مو بت عمجن ..

زعلت بلقيس واخذت ولدها وطلعت تبجي وتدعي عليه ..

صاحت القيصر ..
تعال يمة ..
قيصر .. هابييي شتردين اريد اباوع تلفزيون ..
الحجية .. هاي بدال دراستك مجابل التلفزيون .. گوم طلع هدمتك من الغرفه وخلي مرت عمك وجهالها بيها .

قيصر .. وشعليه هاي غرفتي ماتخليهم بالاستقبال .
الحجية .. مو هي غرفة الخلفك .. اطلع منها لا اگوملك
شطولك وعمرك خمستعش وعقلك مال زعاطيط ..

قيصر .. دلفضيها عدل بالاول ..
الحجية .. شگلت ولك ..
قيصر .. ماگلت شي .. رايح ..

سهيله .. ياعمة الولد كبر ليش تعامليه هيج شنو ذنبنا تتغير حياتنا علمود مشاكل غيرنا ..

الحجية .. دگومي ركبي الگدور بدال سوالفج صار الضهر وانتي كلشي ماطابخة ..

اخذت جهالي دخلتهم بالغرفه .. ورحت اركب الگدور وي سهيله لأن مالي خلگ تحجي عليه ..

البنات بيومها مااجن لأن بلقيس مسولفتلهن وزعلانات ..
وعمي ضاج وگام يحجي على عمتي خطيه ..
اجتها حجاية من وراي ..

مر كم يوم واجة حاكم بالليل اخذي جهالي حتى يعاقبني بيهم ..
وگال لو تجين وياي لو تبقين هنا وماتشوفيهم ..

عمي ضغط عليه وگال روحي وي رجلج واعقلي .. مابينه حيل مشاكل مو الولاية اكلت وجهنا من وراج ..
تعودت الصوج يطيح بيه ..

الحجية بعد ماحجى عليها عمي وتعاركوا ماگدرت تحجي
وشبيدها عليه ..

رجعت وي حاكم .. بس ماعدنا مثل الاول ..
حياتنا عادية ..
واني مشغوله بجهالي وبس ..
بس هم ماقصرت وياه رغم اذاني ..
عشاها وغداها وملابسة دوووم جاهزة ..

مر شهر وام احمد اجتني ..
عتبت عليها لأن ماتسأل ..

ام احمد .. صدگ ام امير المفروض اني الازعل ..
ياقوت .. ليش شمسويه اني ..
ام احمد .. جا مادريتي قبل شهر رجلج اجة وتعارك وي رجلي وگاله مرتك مااريدها تحجي وي مرتي لأن تعلمها سوالف موزينه ..
ليش شمسويتلج اني وشنو السوالف العلمتج عليها ..
ويگله روح ربي مرتك الحافوفه وشوف النسوان الي تدخللها شنو ..

ضربت على وجهي .. ياامير يبني .. امسحيها بوجهي خية والله ماادري هسا سمعت منج ..

ام احمد .. والله ابو احمد منبه مااطب عليكم بس گلبي ماانطاني ..
وادري بيج معدله وماترضين بالعيبة مثل رجلج ..

ياقوت .. اي والله ماادري سودة بوجهي ..
ام احمد .. لاخية اسم الله .. بس هاي قسمتج الله بلاج بواحد نسونجي ومايخاف الله ..
-------------------------------------------------
ياقوت .. شگلتي ام احمد .. نسونجي شنو .. شفتي عليه وتحجين هيج ..
ام احمد .. لاخية اعذريني هيج طلعت مني بس من قهري والله ..
ياقوت .. خية ضامة عليه شي گولي .. عليج الله لاتخليني بحيرة

ام احمد .. خية ليش اضلم بخته .. ماشايفه بعيني.
بس مرة وحدة حفت عندي ..
وسألت عليج ورادت تجرجني بالحجي .. وگالت هي حلوة وشكم جاهل عدها ..
بس اني مانطيتها وجه ..
ومن سألت ابو احمد عليها .. گال هاي موضفه بالكهرباء واستغفر الله عانس وتريد تلزگ روحها بأي رجال ..
الهيج حذرتج ..

ياقوت .. ماادري بس حاستج ضامة عليه شي . جاليش گلتي عليه سونجي اذا مامتأكدة ..
ام احمد .. يوووه يياقوت سالفه راحت وولت . بس اني اجيت اشوفج وگلت خاف وصلج شغله علينا لان طردة ابو احمد بعد ماحجى وغلط علينا ..

ياقوت .. لا وين يحجي اصلا هو مايحجي اي شي ..
هو من اشتغل وي ابو احمد عرفته منج ..

ام احمد .. اووووف الله يعينج عليه .. وامانه اني مااگدر اجي لأن موصيني ابو احمد ومحلفني .. اي شي تحتاجيه وديلي واحد من الجهال ولاتستحين ..

ياقوت .. ان شاء الله خيه جا شعندي غيرج اني ..

طلعت ام احمد واني الحسبات تاخذني وتوديني ..
اوووف يحاكم اعرفك مو خالي ..
وفوگ كل هذا مفشلني وي العالم .. زين مااشتكو عليه
بس هاي منو الي سألت عليه وشتريد من حاكم ..

اجة حاكم من الدوام ..
مااتحملت وسألته ..
ياقوت .. حاكم انت عندك شي وي موضفه وياك بالكهرباء حاكم .. هااا هاي منو گالج شني تردين تذبين عليه بلوة شعندي قابل ..
ياقوت .. وشمدريني .. الناس كلها تسولف عليك ..
حاكم .. وياهو هذا الكلب ابن الكلب الي يحجي عليه . جيبي وواجهيني وياه ..
ياقوت .. سكتت وماعرفت شأحجي شگله وهو بس يسمع طاري ام احمد يتخبل ..
يااا بس لا يسأل جهالي ويعرف ام احمد جايتنا وتالي يروح يتعارك ..
شورطني اني وسألت بسرعه من غير ماافكر ..

حاول يعرف منو الي گال . ماحجيت وغيرت الموضوع
تغدا ونام ..
ركضت وصيت جهالي مايحجون الابوهم ويگلوله خاله ام احمد اجتنا ..

گعد من النوم .. گال ياقوت ..
گومي بدلي للجهال .. راح اجيب سيارة قاسم واجي واخذكم للحمزة عليه السلام ونتعشا هناك ونجي ..

بقيت اعاين بوجهة وصافنه .. مامصدگة ..
هذا حاكم لو غيرة ..

حاكم .. ها شبيج مو احجي وياج . بسرعه بدلي للجهال مو اجي الگيكم ماكاملين ..

الجهال فرحوا .. من زمان وهمة ماطالعين ولازايرين ..
بدلوا بسرعه ..
وطلعت بتيتة وكبة على السريع گليتهن واخذت خضرة وطماطة وخبز ..

اجة لگانه جاهزين ..
وفرحت من شفت عمتي الحجيه وياه ..
صعدوا جهالي وصعدت وبقى حاكم يصعد العلاليگ بالجنطة ..

صعد وسد الباب ..
هاي شنو ياقوت شمسويه تارسة العلاليگ .. لو مخليتها ماخذين شي مناك احسن من التعب والتنعثل ..

الحجية .. من يوم يومها مرتك نادرة وام بيت بس انت ماتقدر الجوهرة الي بيدك ..

حاكم .. ها يمة بدينا هسا اني شمسوي ؟؟
الحجية .. ولك يالاغم موزين سوتلك لگمة وماخسرتك واكل البيت انضف من المحلات اني وحدة من الناس مااكلة ..

حاكم .. لا هاهي عمي حقج علينا ضهرج قوي مانگدر نحجي بعد ..
يله نتوكل ..
بسم الله ..

مشينا واشوف الفرحة بوجه جهالي .. واني گلبي ناغزني .. حاكم موش حاكم نفسة ..
وهيج دعائي استجاب والله هداه الي ..

جان طول الطريق يضحك وي الجهال ويسولف ..
واني اعاين عليه ومامصدگة ..

وصلنا للامام سلام الله عليه ..
نزلنا .. وانطيت كل واحد من جهالي شغله يشيلها حتى مايحجي حاكم ..
والعلاگة الجبيرة شلتها اني ..

نزل من السيارة وقفلها واخذ العلاگة مني ..
-جيبي اني اشيلها وانتي الزمي امي لا تعثر بشي وتوگع ..

اخذها واني صافنة بي ..
حاكم .. ها شبيج ياقوت نمشي لو نبقى واكفين ..

رحت العمتي اخذت اديها ونمشي على كيفنا ..
والجهال تتگامز گدامنا ..
وتطلب كلشي يشوفوا گدامهم ..

حاكم .. اي بابا اشتريلكم بس من نطلع خلي نزور وتنعشا وبعدين نطلع نشتري ..

دخلت وصارت عيني بعين الامام ونزلت دموعي مااتحملت جسمي مدري شبي من ادخل الحضرت امام ..
ولو اني من زمان مازايرة..
بس من ماتت امي اخر مرة ورحت للنجف وجنت صغيرة
وعمتي جانت تاخذني وياها حملات والابن الكاظم بالديوانية ..

فتت وعيوني تجري .. وگتله ياربي بجاه بخت ابو منصور عندك .. تريح بالي وتهدي حاكم الي والجهالي ..

صليت وعمتي هم كملت وطلعنا ..
گال حاكم حضرن العشا بين ماازور واجي ..

رتبت الاكل بالماعين والجهال تحوس من الجوع منا لمن اجة ابوهم ..
گعدنا اكلنا وسوالف وضحك وماحسينا بالوكت ..

رجعنا للبيت ..
گال حاكم نروح البيت اهلي ونرجع مشي .. حتى ارجع السيارة القاسم ..

اني هم گتله الحاكم اخذ حلاوة فشله نطب فارغين ..

دخلت بيدي الحلاوة .. شفت سهيله گبالي ..
گلتلها دعينالكم وهاي حلاوة من الامام واعذرينا من التقصير ..

شمرت الحلاوة علية وگالت ..
خليها الج مااريدها .. اني لو ادري تصعدين بالسيارة جان گلبتها للدنيا ومخليت قاسم ينطيها ..

الحجية .. هايسهيله بدينا .. اخو وانطى الاخوه انتي شني وحاشرة روحج بنص .. جايبتها من كدج لو من بيت ابوج ..

سهيله .. سيارة رجلي سيارتي واني حرة المن انطيها اني وبناتي ماطالعين ولازايرين بيها وتالي هاي ام الوسخ هي وجهاله يصعدون بيها ..
اااااخ يقاسم ..
---------------------------------------------
الحجية .. اذا ياقوت ام الوسخ انتي شني .. خليني ساكته منا بناتج مااريد اهينج ..
بس الله يرحم هدومج الي يتكومن جوة الدرج لمن ريحتهن تطلع يله ينغسلن ..

سهيله زعلت ودخلت وبناتها يحجن ويگولن امي محصله الرزايل من وراها بس المشاكل تجيبها النا ..

استغفرت ربي وگعدت .. ضاعت فرحتي وونستي بالطلعه كلها ..
حاكم راح يجيب ابوه وقاسم من المحل ولسا مااجة واني تضايگت حيل ..

اجت بلقيس واولادها .. گمت اريد اسلم عافتني وراحت الغرفه امها ..
ضجت حيل ..

دخلوا عمي والولد .. سلمت عليه رد عليه بس شكله متعوب وماله خلگ ..
تعذر وگال اروح ارتاح بحجرتي تعبان ..

راح قاسم الغرفته وحاكم گعد يمي واجت بلقيس سلمت عليه وتسولف وياه ..
وسمعنا صوت عياط سهيله ..
وتتعمد تعلي صوتها ..
وتگله .. شلون تنطي سيارتك الهاي السلابات تصعد بيها مايوم اخذتنا وونستنا بيها ..
وصايرة وقف الياقوت كلما تضوج يطلعها ..
لو هي صارت هيج الي تتواعد وماتصون رجلها تخلوها تاج ع الراس. .
والشريفه ماتردوها ..
حجت وحجت وماخلت شي بگلبها ..

تالي حاكم گال گومي .. اخذنا الجهال وطلعنا ..
ومن يومها حاكم مادخل الاهلها ومايحجي وي قاسم ..

گاعدين وگتله حاكم .. الى متى تبقى زعلان وماندخل بيت عمي. انت شعليك بسهيله ..
ليش مهتم الها ..

حاكم .. وج بالجذب رجلها اعتذر لو گال امسحها بيه خوية .. السانها السان دلاله ..
يمكن الله يحبني وبعدني عن ترثتها رادت تورطني ..

فهمت شيقصد وغلست ..
-بس شنو ذنب عمي وعمتي مانروح نشوفهم
-ياقوتة خليني مرتاح لاتضوجينـي .. گلت بعد مانروح وهاهي ..

ماردت اضغط عليه تركته على راحته .. حياتنا هادئه هو بالدوام واني ملتهية بأمتحانات الجهال النهائية ..
ماصدگت خلصوا وارتاحو ..
ودرة فرحانه لأن راح تدخل مدرسة ..

اجة حاكم من الدوام ضايج ومقهور .. لونة مخطوف واصفر ..
اول مادخل صاح ياقوت ياقوت ..

اجيت اركض .. خير حاكم شبيك .
حاكم .. بسرعة حضري الجهال والبسي عباتج ..
ياقوت .. ليش شصاير ..

نزلت دموعة واختنگ .. ابوي...
ضربت على وجهي .. شبي صحت بصوت ..

حاكم .. ابوي يعالج مريض صارله شگد ومحد يگلي ..
ياقوت .. يمة سودة عليه . والله گلبي حاس وگتلك يحاكم خلينا نروح ولاتگطع عنهم ..

حاكم .. مو وكتج هسـا فضيها ..
لبست عباتي واخذنا الجهال ومشينا .. صار الطريق شطوله ولاعبالك كم شارع بينا ..
من غير الشمس تدگ براسنا ..

وصلنا لگينا البيت مگلوب .. البنات كلهن ملتمات وولدهن ورجولتهن ..
وگرايبنا كلها ..

دخلت والدموع ينزلن وحدهن ..
صح ماحسيت بحنيته ولاسمعت كلمة حلوة منه .. بس هذا من ريحة ابوي ..
تذكرت ابوي من مات واني صغيرة وماشبعت منه ..
دخلنا اني وحاكم الغرفة ..
لگيناهم موجهيه على القبله ويقروله العديله ..
اتقربت منه مو ذاك هو نفسة الي يأمر وينهى ويصبح ..
دنگت عليه بست راسة ..
گوم يعمي .. ماتلوگلك هيج نومة ..
من تدخل البيت كلها تخاف من طولك ..
جانت عيونه تباوعلي وتريد تحجي بس مايگدر ماله حيل ولابي نفس ..

حسيت اكو حجي ومعاتب بينا وبعيونا ..
ماادري ليش خفت من افگدة مثل اهلي ..
نسيت السواه كله .. ودعيت الله يدب بي الروح من جديد
ويگومة النا بالسلامة ..

اعاين على حاكم حاضنه ويبجي مثل الطفل ..
مااتحملت ورحت حضنت عمتي الحجية وابجي ..

-اشششش ياقوت ماوزين عليه لاتبجين ..
سمعت شوخر درت وجهي ..
سلم روحة الله ..
مااتحملت المنضر ..
صرخت من الرهبة والخوف ..
واجتني ضربة على حلگي من قاسم ..

-اطلعي برة فضحتينا ..
صارت هوسة ودخلن البنات يصيحن وسهيله شگت ثوبها
ومحد حجة الا ياقوت دووم گملتها بيضه ..

شفت جهالي اخترعوا ويبجون ..
اخذتهم ورحت للغرفه ..
گلتلهم لاتخافون يمة .. اگعدوا هنا ولاتطلعون لمن اجيكم وانت حيدر .. خلي بالك على اخوتك ..

طلعت شفتهم مغطيه ومطلعين النسوان كلها من الغرفه
وعمتي الحجية گاعدة على القنفة ومخليه راسها على عصتها ..

بينت كسرتها ووجعها بس ماتبين الواحد من يومها قوية وماتهزها ريح ..

البنات يصيحن ويبجن اتقربت منهن وگابلتهن ..
بهذا اليوم كلنا مصاب واحد ..
هو ابوي مثل ماهو ابوهن ..
سلمت على سندس وحضنتها وبقينا نبجي سويه ..
اول مرة احس بهيج احساس فرغت همي بحضنها ..
بس نرجس وبلقيس دفعني وماقبلن ..

الجيران التمت علينا ..
اجة حاكم وصاح ياقوت تعاي ..
گمت اركض وابجي ..
حضنته وبقينا نبجي سويه ..
گال اريد اروح للبيت تعاي وياي .
باوعت القميصه مگطعه الدگم ..
اول مرة اشوفه هيج متأثر ..
حاكم مو من النوع الي يبين مشاعرة ..

ياقوت .. اني هم اريد اروح اجيب ملابس الي والجهالي
رحنا اني وياه بسيارة ماادري منين طالبها ..

الطريق كلها يشهگ ويصيح يابه ..
وصلنا طلعت دشداشة سودة وماعندي بس هي ..
عود بعدين اخيط كم وحدة ..
واخذت ملابس الجهالي وگتله يله حاكم ..

حاكم .. شبيها شفتج زرگة ..
لزمتها وتذكرت ضربت قاسم ..
ياقوت .. ماادري خاف من ضربت على وجهي ..

حاكم .. يله قفلي بسرعه خلي نروح اتأخرنا ..
رجعنا البيت عمي ..
لگينا الناس افواج افواج ماندري منين اجت وشوكت ..
اخذوا الجنازة وطلعوا ..
وبقينا بس النسوان ..

رفعت راسها عمتي وگالت .. اسمعن كلجن وقبل ماتجي الناس الغربه .. حجاية وحدة بيناتجن وعرك وروح الحجي اطردجن ومااخلي وحدة تحضر فاتحته ..
خلن الفاتحة تعدي بسلامة ..

صياح وشگ الهدوم مااريد موزين عليه .. تعذبنه بگبرة
الطمن بسكته وابجن بسكته ولايطلع حسجن ..

مرت ايام الفاتحة بهدوء .. واني وسهيله وبنات من گرايبهم لزمنا الطبخ والبيت ..
منا لمن فضت الفاتحة بسلامة ..

بقينا اسبوع ببيت عمي .. ماقبلت الحجية نروح وگالت خليج يمي ..
اني جنت بالنهار شفل وبالليل اقرأله قرآن وماانام للفجر تعبت حيل بذيج الفترة ..
ولدي ضاجوا من البجي والنوح ويردون يرحون ..

اجة حاكم وگال اني تعبان وصار شگد مامداوم .. خلينا نروح البيتنا ..
لمينا غراضنا ورحنا ..
بس كل يوم نجي نشوف عمتي بالليل ومانتركها وحدها ..
وخاصة اني ترتاحلي وتحبني .. وتگلي اقرأي قرآن واني اردد وراج .. خطيه تريد تختمله وماتعرف تقرأ ..
همزين اني العرفت اقرأ واكتب حتى اذكر موتانا بشي ..
اني جانت قرايتي مو هالگد بس من گمت ادرس جهالي حفضت وياهم وتقويت ..

بيوم گاعدين وحاكم گال ..
قاسم اني اريد اشتغل بالمحل بمكان ابوي ..

قاسم .. ليش عود .. المحل تعبي اني وابوي وشركة بي انت شنو ..
حاكم .. انت ناسي هو ابوي والي حصة بحصته ..
قاسم .. گوم ولك . اني اتعب وانت تجي على الجاهز
اذا تريد اشغلك صانع عندي بس تحلم تشاركني ..

حاكم .. اني اشتغل صانع عندك ليش منو انت . مال ابوي وحلاله وغصب عنك اشتغل بحصته ..

تعاركوا وتضاربوا والحجية تصيح واحنه نصيح وماكو ..
حاكم .. باعوا مو تشوفوني ساكت والله حصتي من المحل والبيت والگيعان اخذهن غصب عليكم ..

الحجية .. عفية بولدي عفية .. تفووو عليكم ريت هالبطن ماشالتكم وتضرب على بطنها ..
ولكم شمسويه عند الله وشالع گلبي بالولد والبنات ..
شمالكم عوجان وغمان والحقد تارس گلوبكم ..
ابوكم بعدة مانشف گبرة ولاطلع اربعينة وانتم تتكاتلون على الفلوس والبيت ..

باع ولك انت وياه .. هذا البيت ماينباع مادام اني عايشة وانت قاسم اخوك يشتغل وياك ..
وتصيرون ايد وحدة ..
يزي عاد مو الناس اكلت وجوهنا من وراكم ..

الكلام ماعجب قاسم ..
وحاكم اشرلي وگال يله ..

مشينا واحسة يريد ينفجر من الغضب ..
واول ماوصلنا راح نام وماحجة شي ..
ثاني يوم اجة من الدوام .. تغدا وبدل وگال اني رايح للمحل مال ابوي ..

لزمت گلبي خاف تصير سالفه .. ويفشلونه گدام العالم
بس الحمد لله ماصار شي ..
واستمر حاكم يشتغل وي قاسم ..
يطلع من الدوام للشغل .. ورزقه كثر والحمد لله وامورنا تعدلت ..
سوينا اربعين عمي ورحنا زرناه وزرت النجف ورحت للامام علي فدوة الاسمة ..
وحاكم اخذنا السوگ النجف وتسوگنا للجهال مناك للمدارس وحتى درة كلشي اخذ الها لان اول سنه ..
وسهيله حاسدتني وتگلي بله ياسحارة رحتيلها وخليتي حاكم هيج يتغير ويصير محبس بيدج ..
گمت امشي واقرأ المعوذتين من عيونها ..

جهالي بدت الدوامات وداوموا كلهم .. وصفيت وحدي جانت درة مونستني ..
مرات تجيني ام احمد بالسكته ..
تسأل عليه وتشوفني شمحتاجة وتروح ..
مااگدر اروحلها اني لأن اخاف من حاكم ..

مرت الايام وحياتنا مستقرة .. بيوم اجانـي حاكم وفاتحني بموضوع ..
-ياقوت تدرين اوضاعي جانت مو خوش بس هسا رحمة من الله ..
واني اگول نمشي ندير البيت بأسمي . لايروح من عدنا
-شني يروح ..
-مو البيت اذا بس مكاتبه .. ابو المكتب يگدر ياخذة ويبيعه الغيرنا .. واني جان ماعندي اداور بس هسا صار عندي ..
شتگولين نمشي باجر نداور ؟؟

بقلمي_الكاتبة_شمس
يتبع ....

لامارا · 25-08-19, 01:59 AM

//// البارت الخامـس ////
عجـاف_القلـوب ..
الكاتبـة_شمـس ..

كبرنا من وكت ويلي علينا
العمر ضاع وبعدنا ما بدينا
خسرنا من وكت كلشي خسرنا
راحة بالنا وحبنا وعمرنا
ماندري بعد شيصير بينا
شما نقصت علينا همومنا تزيد
بس ضلينا نصفك ايد بالايد
عافونا ومشو شنو صرنا منفيد
طيبة كلوبنا وبيها ابتلينا
كبرنا من وكت من كثر الهموم
وشفنا العمر يخلص يوم عن يوم
يا عين التغمض بعد يانوم

مرت الايام وحياتنا مستقرة .. بيوم اجانـي حاكم وفاتحني بموضوع ..
-ياقوت تدرين اوضاعي جانت مو خوش بس هسا رحمة من الله ..
واني اگول نمشي ندير البيت بأسمي . لايروح من عدنا
-شني يروح ..
-مو البيت اذا بس مكاتبه .. ابو المكتب يگدر ياخذة ويبيعه الغيرنا .. واني جان ماعندي اداور بس هسا صار عندي ..
شتگولين نمشي باجر نداور ؟؟

-هاااا ماادري انـت بكيفك ..
-خوش جا الصبح نتوكل حتى مايروح البيت منا ..
وهسـا گومي سويلنـا لگمة من ايدج كلش جعت ..

خليتة يلعب وي درة وگمت سويت اكل ..
اجة امير للمطبخ ..
-يمة اساعدج ..
-لايمة روح اقرأ دروسك صعبه اريدك تنجح وترفع راسي -لاتخافين عليه يمة اني شاطر ..
-ادريك شاطر وگرصته من خدة ..
-يمة لاتسويلي هيج اني كبرت ..
-هههههه ولك اني امك لو تكبر وتتزوج ويصير عندك جهال هم تبقى عندي صغير ..

ضحك .. يمة حلوة من تضحكين بعد لاتضوجين ..
ياقوت .. ان شاء الله يمة ماكو شي يضوجنا بعد ..

جنت متمنية ماتتغير حياتي بعد ماحاكم رجع وصار زين وياي ..
ووضعنا تحسن وماكو شي يضوجة بعد ..

ثاني يوم رحنا وداورت البيت بأسمة ..
واخذنـي للصايغ اشترالي حلقه مواعدني بيها من زمان لأن ماعندي لابسة حلقه شبة ..
فرحت كلش بيها. اول مرة يشتريلي حاكم هدية ويفرحنـي ..

مرت اشهر وحاكم يشتغل وي قاسم ..
الى ان بيوم اندگت الباب حييل ..

فتحتها لن ام احمد بلگوة تاخذ نفس وتحجي ..
-شبيج خيه دخلي ..
-ولج خية هسا سمعت من الجيران رجلج واخوه تكاتلوا بالسوگ والناس ملتمة ..

ضربت على وجهي .. يمة ياامير ليش شبيهم ..
-ماادري خيه بس يگولون ابو قيصر يصيح على ابو امير
ويگله الا اسجنك ..

-يااسم الله .. شسوة حاكم هالمرة ..
والله گلبي نغزنـي من هالراحة واگول ربي فتحها عليه
تالي تنگلب عليه ..
گعدت بالگاع واندب بحظي واحجي ..
-ولج يياقوت مامقسوملج ترتاحين ..

ام احمد .. گومي هيه جوه اني هم اجيت وخرعتج بس من سمعت مااتحملت واجيتج ..
ياقوت .. وهسـا شسوي خية ووين اروح. .
ام احمد .. روحـي البيت عمج وشوفي جا تبقين هيج مخليه اديج على خدج ..

ياقوت .. اي خلي اروح بس خاف حاكم مايقبل ..
ام احمد .. ولج خيه قابل انتي رايح البيت غريب غير عمامج همة .. ورجلج وحماج تعاركوا ..تبقين هيج گاعدة

سمعت كلام ام احمد .. واخذت جهالي ورحت البيت عمي وادري اجيت للحجي برجلي ..

طبيت البيت واشوف سهيله صوتها للباب ..
شافتني وگالت ..
لا هلة شعندج جاية . من يوم الشفتج ماشفت الخير ..
اكيد انتي ورى السالفه .. ادريج ماتشبعين وضليتي ورى حاكم لمن خليتي يتخارب وي اخوه ويفضحونا بالسوگ ..

اني صافنه ومااعرف شني السالف وهاي تلوم بيه ..
اخواته موجودات والحجيه گاعدة ..

ياقوت .. هي شني السالفه غير افتهم اني سمعت من الجيران تعاركوا ماادري شكو واجيت ركض لهنا ..

بلقيس .. اووووف اوووووف من صغرج وحياله وجنتي تتلوگين الامي وخلتيها تفضلج علينا ..
ودگيتي وطلعتيه من البيت واكيد تنگين براسة ليل ونهار حتى يجيبلج فلوس ..
والمگرود منين يجيب حتى يشبعج .. باگ اخوه وتكاتلوا بسببج ..

الحجية .. يزي ولجن .. ياقوت شعليها هو اخوجن من يومة اعوج ماينصلح حقجن مامتورجات على سوالفه بس اني وابوجن جنة نطمطم وراه ..

نرجس .. يمة تحجين صدگ . تدافعين على هاي ضد ابنج والله ساعات اشك احنه مو ولدج بس هي بنتج ..

سندس .. كافي احنه وين وانتن وين خلي نشوف جارتهم شني وبعدين احجن ..

ياقوت .. لاخليهن .. خلي يطلعن الي بگلبهن خلصن العمر وهنة يكرهني وماحسبني اختهن ..
كلما اتگرب منهن يطردني ..
ويضوجن اذا عمتي تحبني لو تدافعلي ..
بس اني بنت عمجن مو غريبه ليش تسون وياي هيج ..
والله مااعرف بسوالف حاكم ووين يودي الفلوس ..
ماتشوفن هدمة زينه ماعندي بعد ليش تتهمني بالباطل ..

ابجي واحجي بحرگة .. وسمعت صوت وراي فززني ..
قاسم .. شتسوين هنا ولج ..
----------------------------------------------
درت وجهي وتراجعت ..
ولدي اجوا حاوطوني ..
دخل هو واحسان وعدنان ورجل سندس ..
جانوا كلهم بالمركز ..

الحجية .. ولك ماتستحي تشتكي على اخوك وتتماطلون بالسوگ .. فضحتونا بين الوادم ..

قاسم .. يمة انتي اسكتي .. گضيتي عمرج تدافعين على اليسوة والمايسوة .
نگيتي عليه .. شغل اخوك وياك وصيروا ايد بإيد ..
تاليها يعظ ايدي ويبوگ حلالي ..
بعد مااتسامح .. لان الي يسامح مايعيش ..
وحاكم ماله حصة بعد عندي ..
يتنازل عن حصته بالمحل ويولي يله اطلعه ..
ماكو اخليه ينام بالسجن ..

وانتي بعد اذا شفتج بهذا البيت اكسرها الرجلج .. تدرون بأمي فقيرة وتضحكون عليها حتى تنطيكم حصتها لو الله العالم شتخططون ..

ياقوت .. حرام عليك اني شني تحرمني من عمتي ..
الحجية .. مالك حجايه عليها هذا بيتها وتجي شوكت ماتريد ..

اجة عليه وسحلني من عباتي وجهالي تتصارخ ..
اريد اشوف بعد تعتبين الباب والله اخليج فرجة ..
الحجية تصيح ..
واحسان وعدنان يگلوله عيب وهي مو غريبه وبنت عمنا ..
وهو ومامهتم ..
سحلني للشارع وشمر جهالي عليه ..
وامير يگله .. انت مو عمنا اني اكرهك ومن اكبر اعلمك شلون تضرب امي ..

قاسم .. تف عليك تربات امك ماعليك عتب ..
اجة قيصر يركض ..
بوية بوية .. بيبتي وگعت ..

سد الباب ودخل ..
واني بالي يم عمتي وابجي ..
اعاين ع الشارع فارغ ..
وادگ بالباب محد يفتح ..

شويه وطلع قاسم واحسان شايلين عمتي للسيارة ..
ردت اشوفها ماخلوني ..
اخذوها وراحوا ..
واني ادعي وابجي مايصير بيها شي . كله صوجي لو ماجايه مااحترگت روحها وتخربطت ..

سهيله بقت تحجي عليه وتدعي .. وتگلي عساج بمصيبه تفرث بيتج مثل مافرثتينا انتي وجهالج ..

اخذت جهالي ومشيت .. دموعي ماوگفن ..
كافي يياقوت كافي ..
ليش دومج مذمومة ومحد يريدج ..

رجعت افكر بعمتي .. ربي لايصير بيها شي ..
ماعندي غيرها .. بعدها محد يرحمني ..
ومنا حاكم الماعرف وين وشوكت يطلع ..
ااااخ يحاكم ماتحمد ربك وتگعد وين تودي الفلوس ..

جهالي يسحلون بعبايتي والتراب تارسهم لان شمرهم عمهم بالگاع ..
بجيت عليهم اكثر ممابجيت على روحي ..
الي يصير بيكم كله بسببي اني جبتكم الهاي الدنيا وحملتكم هموم وانتم بعدكم ورود ومو حملها ..

دخلت للبيت غسلتلهم وبدلتلهم گالوا يمة جوعانين ..
الوكت صار مغرب واني مااعرف لااخبار عمتي ولاحاكم
عشيت جهال ونيمتهم ..

وصارت روحي بأم احمد ..
لبست عبايتي ورحتلها ..

بتول .. هلا خاله ادخلي ليش واگفه بالباب ..
ياقوت .. لاخاله اولادي بالبيت صيحيلي امج بسرعه ..
بتول .. هسا اصيحها ..

ام احمد .. ياخية ليش بالباب ..
ياقوت .. خية ماعندي غيرج وگلبي نار منا اني والجهال وحدنا وحاكم انسجن وماادري شوكت يطلعوه .
ومناك عمتي تخربطت واخذوها للمستشفى مااعرف اخبارها .. وماعندي غيرج ..

ام احمد .. يا خطيه الله يشافيها الحجيه حبابه وماتستاهل .. بس شبيدي عليج ..
تدرين ابو امير شسوة بابو احمد وماتگدر اگله روح شوفه شبي مابي ..

ياقوت .. اي والله اني الفشلانه منكم بس ماعندي غيركم حتى اذا احمد يروح للمستشفى يشوف عمتي شلونها
گلبي النار ..

ام احمد .. دروحي خية البيتج واني راح احجي وي ابو احمد ابات عندج الليله واخلي احمد يروح يسأل على عمتج وابو امير ويجي ..

ياقوت .. ياخيه ماانسى افضالج لو ماانتي شحالي هسا
ام احمد .. روحي الولدج خية قابل اني غريبه اني خيتج نسيتي ربينا سوة ..

رحت للبيت واجت ام احمد وراي ..
گالت راح احمد يسأل ويجي ..

فرشنا بالهول وگعدنا .. گلتلها خلي اسوي جاي عشا خاف مامتعشيه ..

ام احمد .. انتي اگعدي معليج وينج ووين العشا ..
هسا تجي بتول تجيبلنا وصيتها ..

اندگت الباب واجت بتول .. بالعشا ..
وي دگت الباب اجة امير ..
منو يمة منو اجانه .. مخترع سودة عليه ..

قرأت على راسة ايات وگعدته يمي ..
خلت الصينيه بالگاع وگالت خاله اني اسوي جاي لاتگومين ..

خطية حايرة شجايبه بس النفس ماتشتهي بالي يم حاكم اخاف مايطلع وشلون بينا اني وجهالي ..
يوم واحد وهيج صار بينا ..

ومنا عمتي الحجية ماادري شصارلها .. ليش ياربي مكتوبلي القهر طول عمري ..

ام احمد .. ياخية وين رحتي صار ساعه احجي وياج ..
ياقوت .. اعذريني يخية مو بيدي احس راسي يريد ينفجر من كثر ماافكر ..
ام احمد .. وليش تفكرين خليها ورى ربج هو يحلها ..

بالگوة اكلت لفه صغيرة .. واندگت الباب طفرت ..
بعدين ذكرت هذا يمكن احمد اجة ..

طلعت ام احمد واني وراها ..
فتحت الباب ..
-هايمة بشر ..

احمد .. يمة ابو امير موقفيه للصبح .. والحجية طالعه ماهي بالمستشفى ..

ارتاحيت شويه من سمعت عمتي مابيها شي ..
ام احمد .. يله يمة بتول روحي وي اخوج واقفلوا بابكم اني راح ابقى يم ام امير ..

بقينا الليل كله وحدة تسولف للثانية .. وگعدت اسولفلها كلشي مريت بي ببيت عمي ..
وهي تبجي على حالي ..

ااااه يالدنيا الناس الغربه تبجي عليه واهلي ياكلون بيه ويعذبونـي .. مدري الدنيا راح تنگلب بينا ..
مدري طبع الناس عوجة وماتنعدل ..

ام احمد .. خية اعذريني مااتحملت .. ماتگليلي شلون تتحملين كل هذا وبعدج صغيرة ..

ياقوت .. تعودت خيه .. تعودت وگمت استغرب اذا يوم مر بحياتي حلو .. شريد اشوف بعد اكثر من الي شفته ..
مادام جهالي بخير وعافيه كلشي مااريد ..

امير .. يمة اودعج من اكبر مااخليج تبجين ولاتضوجين اخذج ونهج من الولاية كلها ..

ضحكنا عليه اني وام احمد ..
ام احمد .. ولج ياقوت هذا ابنج رجال غير هسا احنه نضحك عليه بس مبين يسويها والله ..

ياقوت .. اي ادري بي يسويها .. هو هسا لو شايفته شلون يدافع عليه .. بسته من راسه وگرصته من خدة وهو يتخبل من هاي الحركة ..

امير .. يمممممة شگلنا .. وترى اني كبرت ماتشوفيني راح اصير بطولج ..

ام احمد .. هههههه اي والله يياقوت هذا ابنج يطلع ضخم .
اذا هو بالسادس هسا وشوفي شطوله ..
ياقوت .. اي جا عليمن يطلع شو اهلة كلهم ضخمين واطوال .. هو احنه ماورثنا بس الطول ..

ام احمد .. احمدي ربج ورث منهم الطول ولاالخبث ..
ياقوت .. لا الحمد لله ..

اخذتنا السوالف لين طر الفجر .. وماحسينا بروحنا ..
صلينا ونمنا ..
للصبح گعدت لگيت ام احمد طالعة .. اضن راحت البيتها
عاينت ع الساعة ..
بالتسعه .. يايمة ولدي راحت عليهم المدرسة ..

يمة امير گوم راحت عليكم المدرسة ..
فتح عينه ..
امير .. يمة شبيج غير اليوم جمعة ..
ياقوت .. هاا اي والله يمة شلون نسيت ..
ذكرت وصحت .. يااا يمة جا خاف ابوك اليوم مايطلعوه لأن جمعه ويبقى بالسجن ..

امير .. خليه يمة أحسن ..
ياقوت .. امييييير شلون تگول هيج يمة .. مو عيب هذا ابوك ..
امير .. يمة الابو مايعذب مرتة وجهاله ولايضربهم .. مو هاي جماعتي كلهم ابهاتهم تحبهم وماتضربهم ..
واحنه ابوي بس يصيح ويضرب ..

ياقوت .. ميخالف لو شمايسوي ابوك ماتكرهة وتبقى تحبة سمعت .

ضاج وگام عني جن ماعجبة حجيي . اووووف ياامير مااريدك تصير حاقد ييمة .. ماعلمتكم على الكره ليش هيج صرت ..

گعدت كفيت البيت وريگتهم .. طلعوا كتبهم يقرون وگلتلهم هسا اجي اروح اشوف خالتكم ام احمد طلعت الصبح وماادري بيها ..

مشيت الباب مفتوح ..
دگيتها ودخلت ..
اجت بتول .. هلا خاله دخلي . بشري ماكو اخبار عن عمي ابو امير ..
ياقوت .. لا والله ماكو .. امج وين ..
بتول .. جوة بالهول يمها مرة تحفلها ..

دخلت .. وگلت السلام عليكم ..
ام احمد .. هاا امير هلا خية هلا ..
ياقوت .. هلا خية اعذريني ماحسيت عليج من طلعتي الصبح ..
ام احمد .. ادريج تعبانه هالماگعدتج .. بشري ماكو خبر
ياقوت .. لا والله منتضرين رحمة الله ..

صارت عيني بعين البنية الي تحف . تعاين عليه من فوگ لجوة ..
حتى شكيت بروحي بيه شي ..
گلتلها .. البنية منا ..

البنية .. هااا اي بس مو من المنطقه ..
ياقوت .. ها موشفتج تعاينين عليه عبالي تعرفيني ..
البنية .. لا شعندي معاينه عليج .. يله ام احمد بسرعه خلصيني اريد اروح ..

هي متوسطة بالعمر ومالابسة حلقه وتعجبت لأن تحف ..
استغفر الله هسا واني شني بيها ..

گلتلها خية ام احمد انتي عندج شغل اني اروح مناك الجهال وحدهم .. اذا اجة حمودي ماتخليه يروح يشوفلي شصار ..

ام احمد .. ان شاء الله خيه ..
رجعت الجهالي قريتهم بس امير يقرأ وحده ..
لو مرات اوديه يم بتول تقريه ..

بقيت الوب واروح منا واجي منا .. لمن اجاني خبر عنة باجر يطلع ..
يارحمتك ياربي .. ان شاء الله يهدي نفوسهم وحاكم يرجع الفلوس الاخوه ويتصافون ..

طلع حاكم والنار تطلع من عيونه ..
تلگيته وردت اسلم عليه . دفعني وگال حضريلي الحمام اريد اسبح وسويلي سم اكله ميت من الجوع وحضرتج اكيد مرتاحة بدوني وتطلعين وتمشين ..
ويمكن تدعين حاكم مايرجع ..

ياقوت .. يايحاكم ليش تحجي هيج .. شعندي غيرك لاابو ولاام .. والله گلبي يلوب عليك .. بس لااگدر اجيك ولاعندي واحد يطمني عليك ..
خلف الله على ام احمد ماعافتني وكم مرة ودت ابنها يسأل عليك ويجي يطمني ..

رجع عليه .. ولج يعني ماجزتي من الحافوفه ..
موگتلج ماترحيلها ..
ليش رحتي ..

ياقوت .. جا منو الي ماتگلي .. رحت لهلك طردني قاسم وبهذلني وعمتي تخربطت ..
المن اروح گلي ..

حاكم .. امي شبيها ..
ياقوت .. ماادري بس شفتهم اخذوها للمستشفى ويمكن طلعوها ..

حاكم .. ااااخ قاسم بسيطة ..
ياقوت .. عيني درجع الفلوس اله .. الناس كلها تسولف بفضيحتكم وعمتي جبيرة لاتوگع لو يصير بيها شي ..

حاكم .. ولج يافلوس صدگتي هذا جذاب ..
ياقوت .. جا ليش تهمك .
حاكم .. يعني تصدگين بي وتجذبني ..
ياقوت .. اني شني غير هو يگول ..
حاكم .. روحي من وجهي. خلي اسبح وامشي الامي اشوفها ..
ياقوت .. اروح وياك بالي يمها .
حاكم .. اگعدي انتي يم جهالج مو تردين حجة تطلعين ..

سبح وتغدا وطلع .
مااجة النص الليل ماعرفت شصار وشلونها عمتي ومن سألته گال زينه وسكت ماحجة بعد ..

راح انام واني هم نمت مالحيت عليه مالي خلگ يضل يصيح ويحجي ..

اطباعة رجعت مثل الاول ..
يصيح ويهوس على اقل شي ..
وعصبي دوووم ..
حالتنا تدهورت ورجعت سالفة الديون وماعندي. .
وعبالك مقسوملنا نعيش بالفگر ..
ماصدگت تحسن وضعنا شويه ..

يعني حاكم صدگ مابايگ من قاسم وهذا قاسم يجذب حتى يخلص منه ..
اي لو صدگ بايك جان طلع علينا . لو اشترى سيارة فدشي .
هسا صارت العلاگة حسرة علينا ..

گام مايلفى للبيت گله لو بالگهوة لو بالدوام ..
اجاني بيومة متعارك ودمة بطوله .

تخبلت ..
ياحاكم شني هذا الدم ومنو الي ضربك ..
حاكم .. ماكو شي تعاركت ..
ياقوت .. ويامن وليش .. شبيك حاكم صاير تعارك ذبان وجهك ..
لاخليت اخو ولاصديگ شبيك ..

حاكم .. ههههههه والله وطلع السانج .. ولج ياقوته اني روحي بخشمي اذا ماتسكتين افرغ قهري بيج اضن جلدج يحكج صار هواي ما…

انتبهت الجهالي .. گاله كافي حاكم منا الجهال ...
اخذتهم وعفته ..
بيومها مااهتميت اله ولادرت بال .. هو عالج روحة بروحة وسبح ونام حتى ماصاحني.

ثاني يوم گعدت مالگيتة بالبيت ..
اخذت نفس زين مافكر بهاي الجهال منو ياخذهم للمدرسة ..
بدلتلهم وريگتهم واخذتهم اني ..
المدرسة قريبه البيت عمي ..
من رجعت گلت امر على عمتي اشوفها بلكن قاسم ماهو
دگيت الباب وطلعن بوجهي بنات سهيله . يردن يرحن للدوام ..
-ها خالة شعندج خاف يجي ابوي ويشوفج. .
- هاي مكان ماتسلمن عليه .. اني جايه اشوف عمتي واروح وخرن ..

واگفات بالباب وساداته عليه .. ايييي يسهيله والنعم ماربيتي ..

دخلت لجوه لگيت البيت فارغ همزين ماشفت سهيله ..
رجعن بناتها وراي ..
اني گبل دخلت الغرفه عمتي ..

لگيتها نايمة .. دنگت على راسها واديها بستهن .
فتحت عيونها وشهكت ..
يايمة بنيتي ولج گلبي ياكلني عليج وكل مااوديلج طارش يگولون ماتقبل تجي ..
عبن اعرفهم يجذبون انتي گلبج ماينطيج تعوفيني ..

نزلن دموعي وحضنتها .. اي والله يعمة ماينطيني گلبي عليج .. انتي امي الربتني شلون اعوفج ..

دخلت سهيله .. انتي شعندج هنا مو قاسم منبه ماتجين لهنا ..
ياقوت .. سهيله العني الشيطان عمتي مريضه واني جايه اشوفه واروح ماابقى هواي ..
سهيله .. يله شفتيها شمتانية بعد ..

الحجية .. ولج سهيله حيلي بايد ومالي خلگ ولي منا خليني اشبع منها ..
البيت بيت عمها وشوكت ماتجي تجي مو بيت الخلفج ..

ياقوت .. صحتج عمة لاتفرفحين .. اني هم مااريد مشاكل اجيت اشوفج ورايحة .

الحجية .. مو تگطعين عليه .. وگلي الحاكم حرامات التعب من وگعت لهسا مافكر يجي يشوف امة ..

صفنت ياعمة غير اجاج من طلع من السجن ..
الحجية .. حرررام ماشفته . اوووق يقاسم خاف ماخلاه يخش للبيت لو تكاونو ..

ياقوت .. بقيت مستغربه جا شلون من سألته على عمتي گال زينة ..
يمكن ماگدر يگول تعاركنا اني وقاسم من هيج اجة ضايج
-يله عمة اني اروح وراي غدا لايصير الظهر وغير مرة اجي اشوفج ..

الحجية .. اي تعاي واذا ماقبل قاسم تخشون البيت خلي حاكم يجي ياخذني ابقى يمكم كم يوم هم اني مليت من سهيله وسوالفها ..

ياقوت .. ياعمة يوم الهتا اخليج بعيوني والله لو العمر كله تگعدين عدنا ..
الحجية .. ههههه ادريج يمج گلبج مثل اسمج .. عود بوسيلي الجهال وياج ..

طلعت من غرفة عمتي ولگيت سهيله متخوصرة ..
-هايمسعدة شبعتوا بالفلوس شسويتوا بيهن بله ولو حالج مبين ماشامة فلس منهن ..
اكيد حاكم اخذهن الحبيباته ..

ياقوت .. انتي شتحجين حاكم مااخذ ولافلس وقاسم يريد يبليه .
سهيله .. هههههههههه ياقوت صايرة تقهريني انتي نايمة ورجلج بالشمس .. روحي دوري ورى رجلج وشوفي وين والمن وداهن الفلوس وانتي وجهالج مخليكم جوعانين ..

طلعت بسرعة ماردت اسمع سمها اكثر . ادريها تكرهني وتريد تضوجني .
حاكم ماعندة شي .. هو اني وجهالة بالگوة معيشنا ..

بقت حسبه تاخذني وحسبة توديني . اي جا الديون هاي شنو والمن . اوووف يحاكم وين راح يوديني وياك الدهر

رحت ومااعرف وين والمن اشكي .. مختنگة واريد احجي واسولف بس منو اليسمعني ..

شفت ام احمد تدگ الباب عليه ..
دارت وجهها .. ياخية وينج ضل بالي عليج حسبالي صار عليج شي ..
صار ساعه ادگ وماكو ..

اريد احجي مااگدر مختنگة ..
ماصدگت گالت شبيج ..
شهگت والدموع تنزل وحدها ..
اوووف يهالدموع ماتخلصن ..
هم لو حظي بكثرن جان اني بخير ..

ام احمد .. تعاي خية ادخلي جوة وفهيني شبيج ..
دخلنا للبيت وجنت محتاجة اسولف واحجي الي بگلبي ..
من سولفتلها اخذتها الصفنه ..

ياقوت .. ها خية شوفي انتي ماتحملتي وصفنتي جااني شگول ..
ام احمد .. لا خية صافنه عليج غير . بس تردين الصدگ هاي سهيله جنها تحب تغثج وانتي گلتي ماتحبج ليش تاخذين بحجيها ..
هي رادت تقهرج وربحت شفتي شلون حرگتي روحج ع الخالي بلاش ..

ياقوت .. اي هم گلت اني بس حاكم احس ضام عليه شي يعني لو هو صدگ ماماخذ فلوس المحل.
جان سكت عن قاسم وسوايته ..
هو حتى مانعه من دخلت البيت وماحجى ولاگال ..
ومن اسأله على عمتي يگلي زينة .. وهو اصلا مارايح

ام احمد .. تردين الصدگ بهاي يسويها لأن ماردت اگلج وگلت فشله ..
ابو احمد طردة من المحل لأن ينصب ع الوادم من يصلح السيارة وياخذ الضعف ويخلي بجيبه ..

ياقوت .. شنووووو يافشلت الفشله شگد عيب من ابو احمد .. والله يخية زين منج وتدخلين بيتي بعد سواياته وياج ..
ام احمد .. اني ماداخله بيته .. هذا بيت اخيتي وانتي مالج دخل بعمايله ليش هو انتي خلصانه منه حتى الناس تخلص ..

من گالت بيتج . سكتت ماگلتلها درت البيت بأسمة خفت ماتجيني بعد لو تلوم بيه ..
هسا يله بديت اوعى واتندم ..

راحت ام احمد واني ركبت الغدا بسرعه بين مااجو الجهال وحاكم ..

حاكم .. حضري جاي راح يجيني خطار هسا ..
ياقوت .. حاكم اني رحت البيت عمي اليوم من اخذت الجهال الصبح ..

رجع .. شگلتي ليش رحتي وشعندج ..
ياقوت .. اشوف عمتي گلبي يمها.
حاكم .. مو گتلج زينة بعد ليش ترحين لو تحبين الاهاين صارت عندج عادة اذا ماتنهانين من قاسم وسهيله ماترتاحين ..
ياقوت .. مااعتب عليهم اذا انت تهيني وماتحترمني شلون غيرك يحترمني ..
حاكم .. يااااقوت جفيني شرج . لاابتلي بيج .
ياقوت .. كافي حاكم كل يوم اعرف جذبة عليك جديدة ..
انت اصلا مارحت العمتي ..
من غير الفلوس .. وسكتت
حاكم .. احجي ليش سكتي گولي الفلوس البگتهن ..
اي اخذتهن حتى اسوي مشروع الج والجهالج بس خسرتهن لأن متزوج وحدة فگرية مثلج تطير الفلوس من اعاين بجهرتها ..

ياقوت .. ليش ماتگول فلوس حرام مادامت ..
حاكم .. لا صدگ يحكج جلدج ..
لو ماالعالم تريد تجي جان عرفت شلون اربيج .

اجو زلم وراح يمهم .. صحت امير ياخذ الجاي ..
اتگرب مني وگال .. يمة ابوي حرامي وباگ فلوس من عمي وسجنه مو ..
ياقوت .. عيب امير شنو هذا الحجي.
امير .. جماعتي كلهم يسولفون يمة حتى صرت اكرهة لأن فشلنا ..
والجاي مااخذة صيحي علي ياخذة ..

دار وجهة ودخل .. هاي اول مرة يعصى الي كلمة ..
اوووف يحاكم حتى جهالك اتعقدوا من سوالفك.
لازم اخليه يجيب عمتي لهنا بلكي تحجي وياه وتهديه ..

طلعوا الزلم والي فهمته .. حاكم مشتكي على ولد بايگ فلوسة وضاربة ..
عرفت ليش اجة دمة بطوله ذيج المرة ..
واهلة جايين يقنعون حاكم يتنازل ..

تكومت المصايب علينا من كل جهة .. ياخوفي تنكتل يحاكم من مشاكلك وتخلينا اني وجهالك وحدنا ..

لليل فاتحتة بموضوع عمتي .
صاح علية ونتر .. اگلج ياقوت لاتفتحيلي بيبان كافي عليه انتي وجهالج ناهبيني ..
دور اجيب علة ثانية عليه ..
وهي مريضه وتريد علاج منين اجيبلها ..

لعبت روحي منه .. انت شلون تگول على امك عله.
بعد شلون تريد جهالك يحبوك وانت هيج تگول على امك خاف الله بيها لايعاقبك بكبرتك ..

عاين عليه وضحك .. شوفي ياقوت انتي الضرب بعد مايمشي عليج جسمج تعود واللسانج طال وصايرة قوية
موش ذيج الضعيفه الي تسمع كلامي ..
بس اذا ماكسرتج وخليتج تبجين دم بدل الدموع مااتسمى حاكم ..
الضرب مايجيب نتيجة بعد .. اعرف شلون اكسرج واخليج تمشين عدل ..

گمت من يمة .. وگتله . سوي الي تريدة يحاكم تعودت على شينات حتى گطرة حب مابقت بگلبي الك ..
بس مااگول الا الله يهديك ..

عفته ونمت يم جهالي ..
ثاني يوم اخذ جهالي واحنه مانتحاجة ..
اجة تغدا ونام ..
گعد بدل وطلع ..

للمغرب دخل ووياه بنية متوسطة بالعمر شايفتها قبل بس وين ماادري ..
عاينت عليه ومستغربه وجهالي التموا يمي ..
گتله .. منو هاي يحاكم ؟؟

بقلمي_الكاتبة_شمس
يتبع .…

لامارا · 25-08-19, 02:01 AM

//// البارت السادس ////
عجـاف_القلـوب ..
الكاتبـة_شمـس ..

حقاً مؤلمة الحياة عندما تصدمك بمن ظننت بهم خيرا .. بمن اعتقدت انهم سنـداً لك ..
ويشاء القدر ان يظهر لك حقائق غائبة وبعيدة كل البعد عن تفكيرك.....
نعم هى مؤلمـة ..
ولكنها حقائق لا تراها ولا تشعر بها .....
الا عندمـا تنصدم بالواقع وتصحو ..
من غفلتـك الطويله ..

للمغرب دخل حاكم ووياه بنية متوسطة بالعمر شايفتها قبل بس وين ماادري ..
عاينت عليه ومستغربه وجهالي التموا يمي ..
گتله .. منو هاي يحاكم ؟؟

ماحجة شي ..
التفت عليـها وگالها ..
احلام ادخلي گدامي ..

دخلت وعينها بعينـي ..
بلا وعـي صيحت عليه ..
وين تدخـل ومنو هاي الجايبها البيتـي ..

حاكم .. حسج مااسمعة ادخلي جوة منا عالم ..
سد باب المطبخ ودخل ..

واني واگفة بمكانـي جامدة ..
گلبي نغزنـي وعرفت الي مسويه بس لأخر لحظة جنت اجذب روحي واغشمها ..
واگول لا الي بالي غلط ومو صحيح ..

اجيت امشي ع كيفي وعيني عليها ..
صاح الجهالي ..

تعالوا بوية تعالوا سلموا على خالة احلام ..
ماراحوا جهالي ..
وهو بوكاحة عين يلح عليهم يجون يسلمون ..
صاح ..
بوية درة تعاي لهنا ..
اجت درة تركض وحضنت رجلي ..

عاينت على امير وگتله اخذ اخوتك وروح جوة بالغرفه ..
سحب اخته واخوانه واخذهم ..
دخلهم واجة يمي ..

گتله يمة روح يم اخوتك ..
امير .. لايمة مااروح ابقى يمج ..

حاكم .. شوفي ياقوت صار شگد اريد اگلج بس ماگدرت
والمصايب تراكمت علينا وحدة ورى الثانية ..
وماردتج تعرفين شي بس انتي الجبرتيني ..

هاي احلام مرتـي ..

من صدمتي ضحكت .. هههههه مرتك .. عاينت عليها ..
انتي وين شايفتج اني ؟؟
اي تذكرت انتي الي تحفين عند ام احمد ..
اي انتي هي ..
شنو من وكاحة عليج وگعدتي گبالي وتباوعين عليه .
يعني تدرين بيه مرته ..
شلون انطاج گلبج تاخذيه من بيته وجهاله .. الله لاينطيج
بقيت الطم واسب واغلط عليها وعليه ..

احلام .. حاكم انت جايبني هنا تهيني ..
اجة حاكم الي ..
ياقوت اسكتي .. الي صار صار.
ياقوت .. لاتجيسني ولك .. انت محرم عليه اليوم الدين
شلون جنت عمية عنك ومصدگتك ..
ضحكت عليه واخذت مالي وحلالي ..
وفوگاها جبتها البيتي ..
جان سويت الي تريدة بعيد عني لو الا تكسرني مثل ماگلت .
كل هذا حتى تكسرني ..
ابشرك نجحت ..
وهسا اخذ سلاباتك واطلع من بيتي يله ..

حاكم .. ولج انتي تطردين منو .. انتي ناسيه هذا بيتي
ومسجل بأسمي ..
وهاي مرتي وبيتي بيتها ..

ياقوت .. لا مانسيت بس الله لاينطيني لأن صدگتك وسلمتك بيت ابوي .. عبالي صرت ادمي وانعدلت .
بس ذيل… بعدني ماكملت لطمني على حلگي ..

اسمعي ولج .. اي حجاية زايدة وناگصة .. اسربتج بالشوارع .. واريد اشوف منو يلفيج ..

تحترمين نفسج وتگعدن كل وحدة بحجرتها ومالها دخل بالثانية ..
واني باجر اجيب غراضها من ذاك البيت لان طلعونا منه ماعندي ادفع ايجار ..
وغصب عنج تتحملين وتربين جهالج وتسكتين ..

ياقوت .. عساك ماتتهنى بحياتك يحاكم انت وياها .. دعوة يتيمة ضحكت عليها واخذت حلالها ..
انت بالنسبة الي ميت من اليوم ..
وگاعدة هنا علمود جهالي .
بس لاتنتضر مني شي ..
لااخدم ولاالي علاقه بيك ..
عندك مرة تخدمك وتگوم بواجبك ..

حـيل
#تـخـنــك

مــن تـشــوف إربـــات كــلـبـك
عــايش بــصـف
#ألــغــريب
..

اخذت جهالي ودخلت ..
وامير يگلي يمة يعني هاي راح تعيش ويانا ..
يريد يعرف كلشي ويسال واني مااگدر اجاوب ..
احس اللساني انعگد ..
اريد اصيح وابجي ..
اريد افرغ حرگتي بي وبالحية الي جابها الي ..
گعدت ابجي وانحب وادعي ومافرغ همي ..

علي .. يمة جوعانين ..
امير .. عوفوا امي اني اروح اسويلكم لفات واجي ..

امير .. اشوف امي شلون تبجي واني مابيدي شي عليها ابوي اذا احجي يضربني ويضربها ..
دور راح وجاب هاي المرة وراح تعيش ويانا ..
اخواني جاعوا وامي تبجي وضايجة ..
طلعت اسويلهم لفات ..

رحت للمطبخ وشفتها اجت وراي ..
احلام .. انت امير موووو ..
ماحجيت وياها لان امي تبجي من وراها ..

احلام .. اني مرت ابوك يعني مثل امك ..
اجت يمي ..

وخرت عنها .. اني ماعندي ام بس وحدة ..
ولاتحجين ويانا ..

احلام .. السانك اذا طولتة عليه اخلي ابوك يگصه .. تصير حباب انت واخوانك وتحبوني ادللكم واخلي بابا يطلعكم ويشتريلكم ..

امير .. اني مو طفل وتضحكين عليه ..
احلام .. هههههه ادري بيك مو طفل لهذا احجي وياك .
ابوك يحبني واذا گتله يطردكم انت وامكم يطردكم فأسمع كلامي حتى اخليكم تبقون بالبيت ..
اذا انطردتوا وين ترحون بعد ..

ضجت كلش من حجيها ..
اخذت الخبز وماعون بي العشا ورحت للغرفه ..
شفت امي عيونها حمر ..
خليت الاكل بالگاع ورحت يمها ..

امير .. يمة ماتاكلين ..
ياقوت .. لايمة مااشتهي عشي اخوانك واتعشى ..
مسح دموعي بيدة وگال ..
يمة لاتبجين اضوج واني هم مااكل اذا ماتاكلين ..

گمت يمهم .. سوتلهم لفات .. شنو ذنبهم ..
اذا ابوهم ظالم اني هم اظلمهم ..

تعشوا وناموا ..
طلعت من الغرفة واسمع ضحكها بغرفتي تخبلت ..

ماگدرت ادخل ..
دگيت الباب حيل ..

فتحتها ..
لگيتها مبدله وتعاين عليه وتضحك ..

مادرت بال الها ..
صحت بي .. اسمع يحاكم جبتها البيتي وسكتت بس غرفتي اكسرها على روسكم اذا نمتوا بيها ..
روحوا للهول لو للاستقبال فرشوا ونامو
لو اخذ غرفه الجهال غرفتي اني وجهالي ننام بيها ..

رحت للكنتور.. طلعت ملابسه وشمرتهن بالهول ..
وهي تضحك ..
گوم عيني گوم .. شو هي غرفه ومكسره .
باجر جيب غرفتي وانصبها بذيج الغرفه ..
وانتي اشبعي بيها ..

عاينت عليه .. انت ماتشوف .. لو فرحان بيها ترزل بيه
ولك ماتگلي شعجبك بيها .. شو لاخلقة ولااخلاق ..

احلام .. هيييي الزمي السانج ع الاقل اصغر منج وبعدني بشبابي واكيد لگة عندي الما لگاه عندي ..

ياقوت .. بالعافية عليج .. اخذيه ..
الي واگفه گدامج عمرها بالعشرينات بس ضيم الي اخذتيه وعذابه وقهرة هو الي سوة بيه هيج ..
وهذا عمرج الفرحانه بي راح يخربه ويضيعه بمشاكله وديونة الي جنت اگول وين يوديهن ..
ويجي يوم يسوي بيج مثل ماسوة بيه ..

حاكم .. اسمعن ولجن .. اني مالي خلگ مشاكلجن. وسوالف النسوان والله اذا اشوف مشكله بالبيت ماتلومن الا نفسجن ..
وانتي احلام اني طالع ..
فرشيلنا بذيج الغرفه بين ماارجع .

طلع .. واني فرغت كلشي يخصه بالغرفه ..
ورحت جبت ملابس اولادي وغراضي ورتبتهن بغرفتي ..
وشلتهم واحد واحد ونيمتهم يمي ..

وهي وگعدة بالهول وتتفرج ..
احلام .. معقوله صارلنا سنة واحد يحب الثاني وتزوجنا وانتي ماحسيتي جا شگد غشيمة ..
وتخرخش بذهبها الي لابسته بيدها ..

سديت الباب عليه وقفلته ..
گعدت بالگاع وعيني ع الحلقه ..
-اي والله اني غبية .. قشمرني بهاي الحلقه وفرحانه بيها وهي تارسة روحها بالذهب ..
اخذ بيتي وشبابي وحياتي وانطاها الوحدة الله العالم شني ..
المن اروح والمن اشكي ..
لاابو عندي ولاخو .. الله لاينطيك يحاكم ..
عمري ماراح اسامحك ولاادعيلك بالخير ..

الليل كله مانمت .. واني اسمع اصواتهم وسوالفه وعبالك متقصدين يسمعوني ..
شگد ثوله ولج شلون ماحسيتي عليه ..
واني فرحانه لان مايتقربلي وخلصانه منه ..
تالي معوض رغبته وسوالفه الطايحضها بغيري ..
هيج اني ثوله ومافهمت ..

الفجر گمت صليت ودعيت الله ينصرني ويريح بالي ويخلصني من عذابي ..
لان مااضن اگدر اعيش العمر كله واني اشوفهم سويه ..
ويمي وگبال عيني ووبيت ابوي الي بيدي انطيته اله ..

استاهل الي جرالي .. مو عمتي الحجية حذرتني ووصتني ليش مااخذت بوصيتها لييييش ؟؟

گمت سويت ريوگ الجهالي ..
ودخلت ابدللهم ..
منا وجاي يياقوت لازم تحيرين بجهالج وبس ..
الخلصتي العمر تداريه وتباريه عافج وذبج مثل…..

بدلت الجهالي ومشطت الدرة ..
طلعت اجيبلهم الريوگ .. اعاين ع الميز الصينية ماهي ..
طلعت هي ..
اخذت قوري الجاي وراحت ..

ياقوت .. وين ريوگ الجهال مخليته الميز ..
احلام .. اخذته اني ورانا دوام مانلحگ ..
ياقوت .. ماگعدتي من الصبح سويتي هذا ريوگ الجهال شنطيهم هسا ..
احلام .. مو عساس جايبته من كدج وتحجين هو كله من حاكم ..

ودخلت بصلافه للغرفه وخلتني اكل بروحي ..
شلون راح تصفى وياج يياقوت ..
هاي الحية الجابها حاكم الج ماراح ترتاح اذا ماتسربتج انتي وجهالج بالشارع ..

طلع حاكم من الحمام ..
على عيوني حجيت وياه ..
-هاي الجبتها اخذت ريوگ الجهال ع الحاظر وعندهم دوام شأنطيهم ..

حاكم .. لو حاسبة حسابنه بالريوگ ماجان اخذته ..
ياقوت .. تحجي صدگ انت هي هاي الناقصه تريدني اسويلها ريوگ بعد ..
حاكم… يوووه ياقوت انتي فايخة وتردين تسولفين اني وراي دوام ..
دخل للغرفه وعافني وحدي بالهول صافنه ..
حتى ماانطاني فلوس اجيب الجهاله ريوگ والثلاجة فارغه

طلع امير .. ها يمة وين الريوگ مو راح نتأخر ..
ياقوت .. اي يمة هسا اجيبلكم ..
امير .. مو مساع شفت الصينية ع الميز من غسلت وين راحت ..

اخذت نفس وخنگتني العبرة وغمضت عيني واتمنين اموت بهاللحظة ..

امير .. عادي يمة احنه مو جوعانين لاتضوجين ..

نزلن دموعي غصب عني .. بعد امة عرف الي ضوج امة وفهمني وماراد يغثني ..

ياقوت .. يمة اموري انتو تحبون الدهن وشكر اسويلكم
امير .. اي يمة طيبه نعمة من الله ..
ياقوت .. خوش يمة روح صيح اخوانك وتعال ..

رحت للمطبخ .. طلعت خبز ودهنت عليه دهن ورشيتة شكر ولفيتهن .
گعدوا بالمطبخ ياكلون ..
لااعترضوا ولاحجوا ..
عيني مابطلت بجي على حالهم ..
شلون انطاه گلبه ياكل ريوگ جهاله ومافكر بيهم ..

طلع من الغرفه مبدل هو وياها ..
وطلعوا گبال عيني ..
ومن غير مايعاين عليه ..

حاكم .. الجهال انتي وصليهم اني اتأخرت .. واحنه نتأخر لأن امر بالبيت نلم غراضنا مناك ابو البيت يريد البيت لازم نفرغة ..
وغرفه الجهال فرغيها كلها ..
حتى من اجي انصب الغرفه ..

درت وجهي عنه وجن ماسمعت حجايته ..
حاكم ..ماتحجين اخرسيتي ..

امير .. امي مو خرسة لاتصيح عليها ..
حاكم… اتأدب لاارفس ببطنك ..
احلام .. اوووي شنو هالتربية . شلون تخليه يتدخل بكلامكم…

ياقوت .. ابني مربة بس العتب على الي تفرث بيوت وتاخذ الرجال من مرته وجهاله هاي وين تربيتها ..

حاكم .. يااااقوت اگول خطيه ومااحجي لاخليني ارجع الاسلوب قبل تعرفيه مووو .
وانت ولك اذا ترادد بعد اموتك والله ..

اخذها وطلعوا وهي تعاين عليه بطرف عينها ..
نفس نضراتها الي ببيت ام احمد ..
وجن هي احسن مني ..
----------------------------------------
وصلت جهالي للمدرسة ورحت الام احمد ..
يمكن تعرف اهلها .. اروح احجي وياهم ..
ياخذون بتهم عني ..
اذا بقت يمي اموت مااتحمل ..

دگيت الباب عليها ..
طلعتلي ..
-شبيج خيه وجهج مكدر ..
-الحگيلي خيه .. مصيبة ووگعت على راسي .. من البارحة واليوم اريد اموت ..
-احجي خية شكو خوفتيني ..
-ولج خية حاكم طلع معرس عليه .. والبارحة جابها البيتي وگعدها وياي ..
احجي وابجي بس شفتها سكتت ومانصدمت ولااستغربت
-خية شبيج باردة .. جاي اگلج حاكم اتزوج عليه ..

ام احمد .. ادري .. بس ماجنت اتوقع يجيبها بوكاحة عين ويخليها بوسط بيتج ..

ياقوت .. صدگ خية .. تدرين وساكته .. هي هاي الخوة يينا تخليني مثل الثوله النايمة وماتدري شيصير وراها ..

ام احمد .. لأن اختي خفت يصير عليج شي .. والله شاهد مادريت بي متزوجه الا من ايام .. جنت ادري عندة علاقه بيها واجت كم مرة وگالت يگول عليج هاملته وماتحبيه وحتى ملابسة ماتغسليهن ..
رديتها وگلتلها جمال ونضافه واحلى منج بعد ..
وكم مرة طردتها ورجعت ..
بس ابو احمد ماقبل اتدخل ويگول رجلج شراني ويسويلنا سالفه ..
وتردين الصدگ ماردت اخرب بيتج ..

لطمت على وجهي .. بعد هو خرب وراح يابيت تحجين عليه خيه يابيت ..

ام احمد .. خيه البيت الج ومامن حقة يجيبها يمج .. اطرديه هو وياها وربي جهالج واني اشوفلج شغله وعيشيهم وداعتج يجي يركض وراج بعد مايخسر كلشي ويمل منها ..

ابجي واون بگلبي .. وج خيه يابيت .. البيت قشمرني واخذة مني .. لو گايلتلي ومنبهتني جان مادرته بأسمة ولاخليتة يضحك عليه ..

ام احمد .. يايمة يااحمد ولج يمعزاية شلون تصدگين بي وهو تدرين بي جذاب ومايتأمن ..
شلون تضيعين بيت ابوج وتنطيه الواحد مضوگج المر ومعيشج بعذاب شلون ..

ياقوت .. مايفيد اللوم بعد خية لو اموت روحي هسا ماارتاح .. الفاس وگعت بالراس ..
وبعد مايفيد ..
وين اروح والمن اشكي ..

ام احمد .. روحي العمتج احجيلها كلشي وخليها تاخذلج حقج ..
ياقوت .. شأكلها مو حذرتني وگالتلي لا تدورين البيت بأسمة واني ماسمعتها ..
صدگت بحاكم وردت اخلص من ضيم عمي ..
اثاري الضيم مكتوبلي بحياتي كلها ..
لو باقية على ضيم عمي وسهيله ولا منطيه البيت الحاكم
بيت ابوي وشگاه راح راح والطم ..

لزمت ايدي وحضنتني .. ولج خيه كافي مردتي گلبي. .
لاينطيه على هاي العملة…
والله مايتوفق صدگيني مدام اخذة بالحيله مايرتاح بي ولايتهنى ..

ياقوت .. لاخية يتوفق .. حاكم كلما يوگع يعرف شلون يگوم الا اني الغبية الخلصت عمري اركض وراه لا لزمتلي صنعه ولاشغله اعتمد بيها على روحي ..
وج خيه الصبح اخذت الريوگ مال جهالي واكلوه ومافكر بجهاله ..
ودهنتلهم خبز وشكر بالخبزة وانطيتهم ..
راحوا بطرگ الخبزة والدهنه للمدرسه الله محمد يرضاها

ام احمد .. سودة عليه خيه .. شبيدي عليكم ..
ياقوت .. خية مااضل هيج .. هاي محيله وماتخلي عليه فلوس اگول ليش مديون عمرة كله .. طلعت تاخذ منه وتصوغ ذهب تارسة روحها بالذهب وماتنطيه ..
واني طلعت بطرگ هالحلقه ..

ام احمد .. زين خية ماتخبزين للناس ..
ياقوت .. المن اخبز ..
ام احمد .. انتي خبزج طيب وكبار وجنه كاهي .. واكو ناس ماتگدر تخبز لو موضفات ..
اني اوصيلج النسوان واخبزيلهن واعتمدي على روحج ..

ياقوت.. اي فدوة اروحلج خية مااريد امد ايدي اله ويفشلني گدام مرته ..
اريد اعيش جهالي بلگمة هنية مو منيه ..

طلعت من بيت ام احمد ..
واني الدنيا ضلمة بعيني ..
اكل بروحي اكل .. شلون خليت اعتمادي عليه .
تالي باعني وهجرني واخذ وحدة عليه ..

دخلت للبيت نضفته واخذت غراض جهالي من الغرفه مالتهم خليتهن بغرفتي ..
سويت مرگة وتمن تكفينا اني وجهالي وبس مالي دخل بيهم ..

رحت جبت جهالي واجيت غديتهم ..
ونيمتهم ..

خليت قرآني اقرأ بلكن الله يريح گلبي ويطفي ناري ..
للعصر سمعت اصواتهم وهوسة ..

دخل حاكم .. اگلج راح اشيل الغراض بالمطبخ والهول لفوگ ..
لأن غراض ذاك البيت هواي وماتكفي فوگ ..

ياقوت .. تحجي صدگ انت .. الفوگ شبي هي غرفتين وين تصير غراضي .. فوگ مابيت ابوي وتآمرون وتنهون بكيفكم ..

حاكم .. كم مرة اذكرج هذا بيتي مو بيت الخلفج .. عرفتي ليش درته بأسمي حتى ماتعيريني كل يوم ببيت ابوج ..

فتحت حجاب وتوجهت لله ..
يخلصني من هذا الضيم ..

گال الامير خلي امك لاتطلع راح تدخل زلم ..
كملوا وطلعت ..
شفت الاثاث والغراض مالتها شني يخبلن ..
زايح غراض اهلي فوگ ومخلي غراضها ..
غراضها الي مشتريهن بتعبي وضيمي وعوز السنين وصبري ..

الكاونتر شني والقنفات وغرفتها صاج تخبل ..
احلام .. ها عجبنج. غراضي ..
اگلج ياقوت .. مو اسمج ياقوت ..
المهم .. اگلج غراضج صعدناهن فوگ لأن موديلهن قديم
وياليت غرفتكم هم تنقلوها فوگ لأن مااريد هوسة وجهال تهوس وتخرب الغراض ..

ياقوت .. بعد اطردينا واگعدي بالبيت وحدج ..
احلام .. اذا ممأذيتني ومحترمة نفسج ليش اطردج ..
والافضل تعزلين بالطابق الفوگ حتى متضوجين من تشوفينا سوة .

ياقوت .. شگد ماعندج تربيه وبلا اخلاق ..
امير .. انتي شلون تحجين هيج وي امي وتطرديها ..
بس اكبر اطردج منا ومااخليج ..

احلام .. ههههه .. ضبي ابنج لايصير شي ميعجبج
حاكم .. شكو
ياقوت .. خلي مرتك تضب روحها ..
وهذا بيتي لو شماتسوي .. تردون خلي هي تعزل فوگ اني مااصعد ..

حاكم .. يووووه بدينا .. احلام سويلي غدا تعبان وجوعان
احلام .. عيني ماكو غدا ماكليه كله او ماطابخين ماادري
حاكم .. هاك ولك جيبلنا لفات وتعال بسرعه ..
امير .. مااروح ومانحبك انت مو ابونا بعد ..

تعال ولك انت تعانديني ..
لزم ابني گضاه گضيان وموته كتل ..
واني اصيح واريد اطلع ابني من جواه مااگدر ..
وولدي تتصارخ ويضربون ابوهم ..
خافوا على اخوهم ..
وهي واگفه تعاين علينا وتتبسم ..

تفيت بوجها واخذت جهالي وطبيت ..
يمة ابني شو يمة خلي اشوفك بيك شي ..

حلگة يجري دم ..
-لايمة مابيه شي لاتخافين ..
-ولك يمة لاتدافعلي معليك لو ميت جواه ..
-يمة اني مو صغير واگدر ادافع الج ..

اشر الاخوته .. وانتو هم لاتسكتون . دافعوا الامنا وانتي درة بعد اذا رحتي يمهم ازاعلج ..
درة .. لا مااروح مااحبه بعد ..

اعاين عليهم واشوف بعيني الحقد المرسوم على وجههم
من شأگول عليك يحاكم ..
يومين اجت للبيت گلبتك علينا بعد يومين شتسوي بينا ..

يومين خلانا بلامسواگ ولااكل ..يريد يعاقبنا ..
شگد جان يتعصب بس مايوم حرمنا من مسواگ ..
وهي مخليه ثلاجتها بغرفتها ومن تطلع تقفلها ..

خلف الله على ام احمد تتسوگ وتجيبلنا ..
گلتلها خية ماشفتي ناس تريد خبز ..

ام احمد .. اي شفتلج كم بيت بس لمت يستلمون الحصه ويجبيون الطحينة الج انتي تعجنيها وتخبزين ..

امير .. يمة واني اخذ بايسكل صاحبي واوصل بي الخبز اني اشتغل وياج ونحصل فلوس ونطلع منا ..

ام احمد .. اوووف وج ياقوت هالولد يكسر گلبي يريد يسوي كلشي حتى يطلع من ظلم ابوه ..

ياقوت .. شكاسر ضهري غيرهم .. وج خية حتى مدرسه حرمهم منها ..
مايخليهم يرحون وهذا الولد سادس وحلف يكسر رجله اذا دوام ..

ام احمد .. وشمنتضرة ماترحين لعيالج وتحجين وي عمتج ياقوت .. هالتشوفين وضعي شلون اروح وهو. حابسني وحالف يهجولنا بالشوارع اذا گلت العمتي .. واخاف يصير على عمتي شي وابتلي ..

ام احمد .. الله كريم .. اروح اني لايجي رجلج يشوفني

هم حقها المرة ابتلت بيه .. تخلي طابوگات ع الحايط وتحجي وياي ..
قافل الباب من برة علينا باقفل خاف اروح الاهله واشكي

دخلت لجوه عجنت عجينه وسويتها دوگات بالطاوة ووياها جاي وگعدنا ناكل ..

الجهال يلعبون واني اسبح بدرة ..
واسمع صياح ..

طلعت واشوفها تضرب بعلي لان گاعد ع القنفه ..
ياقوت .. ليش تضربيه سحبته منها ..
احلام .. ليش مخليتهم يگمزون ع القنفات .. اكسر رجلههم اذا دخلوا للاستقبال ..
خلي يجي حاكم .. الا اگله يصعدكم فوگ اني مااتحمل هوية ووساخة ..

ياقوت .. عيب عليج .. ماصارلج كم يوم اجيتي وگالبه البيت .. حاكم واخذتيه بعد شتردين ..

احلام .. البيت وتبتسم ..
تسودنت من سمعت .. وگمت اصيح واهوس عليها ..
تريد تاخذ ابوي ..
ضربتني مااتحملت ضربتها ..

نسيت اولادي واگفين گبالي ومافكرت شراح يصير بيهم من يشوفون امهم تنضرب ودرة تبجي وتصيح ..
وتگمز برجلها ..
وجهالي يدفعون بامير يگلوله .. امير ولك امي راح تموت ساعد امي ..
امير جاب الجفجير وضربها على راسها حيل ..

هي صاحت ووگعت والدم نزل على وجهها ..
من شفتها تسودنت وگمت الطم على وجهي وابجي ..
ولك يمة ليش هيج ..
امير .. يمة احسن كافي صارلها كم يوم بس تغلط عليج وتسب ..
ياقوت .. لميت جهالي واخذتهم للغرفة ..
وگلتلهم .. اذا سألكم واحد گولوا امي ضربتها لاتگولون امير ..
امير .. لاگولوا اني امي مالها دخل ..

واني ابوس وبي وابجي بس اريدة يقنع ومايگول هو ضربها ..
اذا ماتت خاف ياخذوه مني ويسجنوه وهذا عنودي ومايقبل يذب التهمة علية ..

طلعت اعاين عليها واگعة ووجهة كله دم ..
گعدت بالگاع والطم وابجي ..
وادعي ربي ماتموت ..
خلي تاخذ البيت وشتسوي تسوي بس كون ماتموت وابني يروح بيها ..

فزرني صوت الباب تكسر ..
طفرت من مكاني وارجف واحس رجلي ماتمشي ..
يايمة بس لاسمعت الجيران لو خابروا الشرطة وراح ياخذون ابني ..

وصلت الباب واسمع حاكم يصيح .. ماتفتحون الباب ..
اول مرة افرح بجيته ..
اي اجة حاكم ..
وهو راح يحلها ماينطيه گلبه .. يعوف ابنه ينسجن ..
فتحت الباب وصاح بوجهي ..
وين جنتن نايمات ..

دخل وسد الباب ..
هو يمشي واني وراه خايفه ..
دخل البيت ..
گتله حاكم .. والله هي گامت تغلط وتصيح علينا مالنا دخل هي ضربتني بالاول ..

حاكم .. شمصخمة گولي .. ووين احلام ..
اشرتله عليها بالهول ..

ركض شافها وتخبل .. تلمسها وگام يصيح ..
-يابوية ماتت .. كتلتي المرة يياقوت كتلتيها ..
ويروح منا ويرد منا ويصيح ..
لفاها بعابيتها واخذها ..

ويصيح بالشارع تكسي جيبولي تكسي لم العالم عليه ..
ردتة يسترنا تالي فضحنا ..
اجت الجيران وام احمد يمي ..
واني بصدمة. وخوف وحاظنه جهالي وگاعدة ..
اول مرة احس روحي وحيدة ومالي احد من صدگ ..
خوفي على اولادي ومن الي راح يصير اكبر من خوفي على نفسي ..
ادعي الله ينقذها وماتطلع ميته ..
رغم الخوف الي شفته بعيون حاكم عليها وحبه الها قهرني بس مااتمنالها تموت ..
علمود ابني لايروح بيها وهو بعدة طفل ماشاف من الدنيا غير بس ضيمها وقهرها ..

بقلمـي_الكاتبة_شمس

يتبع ....

لامارا · 25-08-19, 02:03 AM

‎//// البارت السابـع ////
‎عجـاف_القلـوب ..
‎الكاتبـة_شمـس ..

‎عندمـا تتكابل عليك الهموم ..
‎وتغلق بوجهـك الابواب .. تشعر وكأن الدنيا اوشكت على الانتهاء .. وان الجميع من حولك تخلى عنك ..
‎اصبحت وحيدا في هذه الدنيـا الغريبـة ..
‎فإياك أن تستسلم أبداً لوجع الظـروف ..
‎'فـ للأمل والألم نفس الحروف🌸'

‎مرن يومـين ولاحس ولاخبر عن حاكـم واحلام ..
‎بقيت اكـل بروحـي وابجي ..
‎يمـة بس لاماتت وحاكم ملتهي ومااجـة ..
‎شلون بأبنـي وشراح يكون مصيرة ..

‎ام احمد ماعافتني ابد .. جانت تواسي بيه وتگلي لاتخافين الموزين مايموت ويبقـى عاله على گلوبنا ..

‎اني اسأل واردلج خبر ..
‎للعصـر اجت وبشرتنـي ..
‎ام احمد .. وج ياقوت مو گالج عار ومايصيرلها شي ..
‎اليوم سمعت مطلعيها للبيت وراحت وي امها وحاكم وياها ..
‎لأن جانوا مخليها تحت المراقبـة خاف يصير بيها شي ..

‎ياقوت .. يمـة فدواتك يربـي استجابيت الدعائي وماصار بيها شي ..

‎ام احمد .. والله يياقوت امرج عجيب .. تدعيلها تعيش وهي سبب عذابج .. لو داعيه الله يخلصج منها مو احسن ..

‎ياقوت .. خيه اني افكر بأبني .. ماافكر بيها .. لاهي ولاحاكم يهمونـي بعد ..
‎خلي اربي جهالي واكبرهم وخلي حاكم الها تشبع بي ..

‎ام احمد .. والله يياقوت .. المفروض تخافين من الجاي هاي الحية ماتسكت .. وخاف تحيل رجلج عليكم ..

‎ياقوت .. يعني شتسوي .. تحبسنا فوگ خلي تحبسنا ..
‎اگلة يطلعلنا درج على الطارمة وابتعد منها ومن شرها
‎ولو يعز عليه اعوف بيت ابوي الها تطارد بي ..

‎ام احمد .. اووووف والله مدري شأكلج كلما اتذكر درتي البيت بأسمة اتسودن ..
‎ياقوت .. جا اني شأگول .. اسكتي خيه ولاتدوسين على جرحي ..
‎تراه ينزف وماوگف من يوم الشفتها دخلت عليه ..

‎امير .. يمة وهسا شيصير ..
‎ياقوت .. يمة الي يصير يصير بس انت اسكت اروحلك فدوة ولاتوجع گلبي عليك ..
‎ولك يمة اموت من ابوك تنمد ايدة عليك ..
‎لاتوجع گلبي اكثر مماهو موجوع ..

‎امير .. هاهي يمة .. بس خلي نگعد وحدنا عنهم وگتلج اني افتر على البيوت اجيبلج الطحين مالتهم واخذلهم الخبز ..
‎وانتي خاله ام احمد .. خلي عمي ابو احمد يشغلني وياه واساعدة بالمحل ..

‎ياقوت .. ضربت على صدري .. يمة امير مااريد اسمع هذا الحجي منك .
‎اذا تريد تموتني عوف دراستك ..
‎كلشي ولامدرستك .. اريدك تنجح وتتخرج وتتوضف وتعيشنا من راتبك ..

‎حيدر .. واني هم اشتغل يمة ..
‎درة .. يمة واني علميني اعجن الج واشتغل وياج ..

‎ياقوت .. عساكم طيبين يمة وترفعون راسي ..
‎ام احمد .. وج ياقوت .. الله ياخذ شي وينطي شي ..
‎اخذ من حاكم الحنية وانطاها الولدة .. ذوله سندج وعزوتج لاتضوجين وتنقهرين بعد ..
‎ياقوت .. وج خية جا شمصبرنـي غيرهم ..
----------------------------------------
‎جاي نحجي واندفرت الباب ..
‎لن حاكم اجة والنار تطلع من عيونة ..

‎وين هذا الكلب ..
‎گمزت وصرت گبال ابني ..
‎حاكم .. وخري ولج لااطبگج وياه . ويمكن انتي الوصيتي وگلتيله يكتلها حتى تخلصون منه ..
‎المفروض اشتكي عليه واخلص منه .
‎هذا اذا كبرت يكتلني ..

‎ياقوت .. على بختك حاكم استهدي بالله هو طفل شمفهمة راد يدافع عني لأن ضربتني ..

‎ام احمد .. خوية ابو امير گول يله هذا ابنك ومايفتهم والصار صار والله ستر ..

‎التفت عليها .. وانتي يـ...... شعندج ببيتي .. انتي البلاوي منج تحيلين ياقوت عليه وطلعتي عينها ..

‎ام احمد .. عيب عليك لاتشوفنا ساكتين .. المثلنا يسويها عشائريا ويبهذلك ..
‎اذا شايف نفسك عار وتحب مرأة متزوجة وتطلگها من رجلها وتاخذها فاحنه الحمد لله .. عشنا بشرف وماطلعت الموزينه منه ..

‎حاكم .. اطلعي من بيتي يله اطلعي واذا اشوفج بعد اكسرها الرجلج ..

‎هزت اديها ام احمد وعاينت عليه .. ولج ياقوت اذا بيج حظ تخلصين من هذا لان مايرتاح اذا مايموتج انتي وجهالج ..

‎دفع المراة وطلعها وهي هددته وگالتله لو اني لو انت ..
‎واني ببالي شغله وحدة .. هيج حاكم نذل وحب وحدة متزوجة واخذها من رجلها ..
‎وهي شنو شافت منه واخذته وبشنو وعدها وضحك عليها وخلاها توافق ..

‎طفرت من عياطة وهو يسحب بأبني ويضرب بي ..
‎اريد اخلص ابني مااگدر ..
‎دفرني وسحبه مني ..
‎وگاله .. اطلع منا . مااريدك ببيتي ..
‎شوفلك بيت يلفيك ..
‎اني مااربي ثعبان بحضني ياكل بزادي ويكتلني واني نايم ..

‎ياقوت .. ماكو غيرك انت الثعبان .. التفيت علينا ولدغتنا بسمك .. بعد مااخذت البين مني ..
‎مو بكيفك تطرد ابني .. وين يروح والمن .. هذا طفل حرام عليك ..

‎حاكم .. بكيفج تردين ترحين وياه الله ومحمد وعلي ..
‎المهم من تجي احلام ماتريد تشوفه بالبيت ..

‎ياقوت .. تحجي صدگ انت .. ولك هذا ابنك وگطعة من گلبك شلون تسمع كلام وحدة غريبه وتطردك ..
‎ذوله عزوتك وسندك منو الك اذا كبرت ..
‎احلام مادايمة الك .. مثل ماعافت رجلها تعوفك ..

‎حاكم .. ها علمتج الحافوفه صديقتج ..
‎انتي هم مو وجه نعمة ..
‎لمي غراضج واطلعي مااريدج هنا ..

‎ياقوت .. انت مو صاحي شو شسوتلك هاي . غاسلة دماغك غسل ..

‎حاكم .. اروح وارجع اذا لگيت ابنج بالبيت اطردج انتي وياه ..

‎طلع وسد الباب ..
‎يربي ساعدني شلون اخلي ابني بالشارع ..
‎واني اسمع صوتة يصيح بالباب ..
‎يمة افتحي الباب يمة ..

‎وحاكم يگله .. اذا دخلت للبيت اطرد امك واخواتك برة وياك ..

‎سمعت صوته اختفى ركضت الابني اشوفه ..
‎لگيته گاعد على طابوگة يم. بابنا ..

‎شافني ودنگ .. يمة ادخلي جوه انتي واخوتي ..
‎ياقوت .. سودة علية ..تعال يمة تعال معليك بي هسـا يهدأ ويسكت ..

‎امير .. يمة معليج بيه .. حلف اذا دخلت يطردكم انتي واخوتي .. وين ترحون اذا طردكم ..

‎ياقوت .. ولك يمة شلون اعوفك بالشارع مااگدر اموت .
‎امير .. انطيني بس بطانية وفراش اگعد عليهن هنا ..

‎ياقوت .. ولك يمة اذا تحبني ادخل معليك بي .. نصعد لفوگ ومااخليه يشوفك ..

‎اجت ام احمد وابو احمد ..
‎يهدون ويحجون عليه ..
‎-خوية احسبها عليه . اني اليعرفني لازم يتأذة مني ..
‎هذا الله مشور بي حتى ابنه مايريدة بالبيت ..

‎ام احمد .. ياقوت خليه يجي عندي بين مايهدا
‎ابو احمد .. ام احمد كافي لهنا وبس .. كم مرة عصيتي كلمتي وماسمعتيني من گتلج ابتعدي عن بيته ..

‎عاين عليه وگال .. اعذريني خويه بس هذا رجلج ماعندة لاذمة ولااخلاق ..
‎واني مااريد اتورط بهيج واحد باجر عگبه يروح يشتكي عليه ويگول خاطفين ابني ويطلع عزيز ومو هو الطاردة من البيت ..
‎اني مااتحمل هيج مسؤوليه واصلا اني حاجيت عمامي وراح نشتكي على سبة وغلطة علينا ..

‎ام احمد تتعذر واخذها رجلها وراحت ..
‎واني اتوسل بأبني يدخل ومايقبل عنودي ..
‎گتله اذا ماتدخل اني اگعد يمك بالشارع ..
‎بالگوة اقتنع وصعد لفوگ ..

‎صعدت ارتب الغراض فوگ حتى نستقر ومانشوفها من تجي ..

‎گمت اشتغل وهمة گاعدين يمي ..
‎سمعت صوت الباب انفتحت ..
‎اشرتلهم يسكتون ..

‎مشيت ع كيفي واسمعها تگله .. طردته الهذا المجرم
‎حاكم .. ولعنت والديه .. انتي بس ادخلي وارتاحي جوة
‎سمعت مرة وياهم تحجي .
‎وتگله .. جا وينها مرتك ذيج شو البيت فارغ ..

‎حاكم .. ماادري خلي اشوفهم خاف فوگ ..
‎اشرت الامير يدخل بسرعه بين الغراض ..

‎بعدة ماختل اجة حاكم وشافه ..
‎حاكم .. هذا شيسوي هنا مو گلت مااريدة بالبيت ..
‎ياقوت .. حاكم شوف . احنه راح نگعد هنا فوگ وباجر شوفلك عامل يطلعلنا درج للطارمة ومانخليكم تحسون علينا ..
‎والطابق الجوة كله الكم .

‎حاكم .. انتي شبيج ثوله اگلج مااريدة بالبيت كله طلعيه ..
‎راح سحبه بالگوة وامير يماطل وياه واني اسحب بأبني واصيح ..

‎نزله لجوة واني اركض وراه ..

‎طلعت احلام وامها ..
‎تگول شمرته بالشارع هذا شيسوي هنا ..

‎من حرگة گلبي على ابني رحتلها واتوسل بيها ..
‎الله عليج احجي لاتخليه يطردة طفل وين يروح ..
‎لو عندج ابن تقبلين هيج يصير بي ..

‎احلام .. اني لو عندي طفل اربيه مو مثل ابنج مامربة شوفي راسي عشر خياطات بسببه ..
‎مو زين ماطردتكم وياه ..

‎من سمعت تخبلت ..
‎ولج انتي تطردني . هذا بين ابوي الي اخذتوه بالحيله انتي السبب بخراب بيتي .. عسا الله يخرب بيتج ومايهنيج ويضيع نسلج وماتشوفين يوم حلو مثل ماهجمتي بيتي وضيعتي ولدي ..

‎احلام .. حاكم ماتسمعها شلون تدعي . طلع غراضها واشمرها من البيت لو اني لو هي .
‎مادام امي هنا امشي وياه وماتشوفني ..

‎حاكم .. باعي ولج ياقوت اني تعبت من مشاكلج .لمي ملابسج وملابس ولدج وروحي يم اهلي ..
‎وغراضج يجن وراج ..
‎صار كم يوم ماشفت راحة من وراج انتي وابنج ..
‎مو تردين ابنج .. اخذيه وروحي ..

‎دموعي يجرن واني اشوف ابن عمي ورجلي وابو جهالي يفضل الغريبه عليه ..
‎گتله طالعه ياابن عمي . بس حتى اذا طلعت لاتصدگ تشوف يوم حلو وانت عايش ببيتي هذا ..

‎امير .. امشي يمة امشي مانريدة بعد .. والله بس يصير عدنا بيت الا نطردك مثل ماطردتنا ..

‎لميت ملابس جهالي وجنطهم مال مدرسة وطلعنا ..
‎طلعت من بيت ابوي ..
‎البيت الي دخلت اله فرحانه لأن راح استقر وي رجلي وجهالي ..
‎تالي طلعن منه مطرودة والغريبه اخذته واستقرت بي ..

‎طول الطريق مانشفت دمعتي ..
‎وصلت البيت عمي ..
‎ورجعت ببالي ايام قبل والي عشته هنا ..
‎جنت عايشة وي حاكم وماخلصانه من سهيلة ..
‎مو هسا رجعت مكسورة ..
‎وبلا رجل شراح يصير بيه وشلون اعيش ..
‎بس الي مهون عليه ..
‎عمتي الحجية موجودة وماتخلي واحد يأذيني اني وجهالي ..

‎دگيت الباب واخذت نفس .. اتحملي يياقوت اتحملي وعيشي الخاطر جهالج ..
------------------------------------------
‎فتح الباب قاسم جان وكت ظهر والشمس حارة ..
‎عكف وجهة وگال ..
‎خير شكو شعندج هنا ومحمله علاليگ ..

‎ياقوت .. ابو قيصر اخوك اخذ بيتي واتزوج عليه وماعندي مكان اروحله ..
‎طلعت سهيله وراه ..
‎ها يياقوت واخيرا انكسرتي ورجعتي ..
‎قاسم .. وشعتدج جايه لهنا .. مو كتلتي روحج على الطلعه منا وضايجة من عيشتنا .
‎بعد شعندج راجعة ..
‎انتي ورجلج الحرامي مالكم عيشة هنا ..
‎وسبق وگتله الرجلج مايدخل البيت ولايعتبه هو وانتي ..

‎ياقوت .. وليش تعاقبني اني وجهالي .. خافوا الله بينا وين نروح هسا وانت تعرف مالنا احد ..
‎مارف گلبك على جهال اخوك ووگفتنا بالشمس ..
‎وين عمتي اريد احجي وياه ..

‎سهيله .. عمتي ماهي .. ومو بكيف واحد مدام احنه بالبيت فأحنه الي نقرر منو يعيش هنا ..
‎اذا تردين روحي لحمواتج وبنات عمج بلكي تقبل وحدة منهن تعيشج عندها ..
‎ولو مااصن هالشي يصير ..

‎امير .. يمة امشينا كافي ذله . نعيش وين ماجان عوفيهم قاسم .. اسمعي كلام ابنج ..
‎وروحي ..

‎سد الباب بوجهي ودخل هو ومرته ..
‎شهگت وبجيت ..
‎گعدت بالگاع وشلت راسي للسما ..
‎ياربي عطفك اذا جان هذا اختبارك فأني راضيه بس جهالي مالهم ذنب يعيشون بالشوارع ويتبهذلون ..

‎دنگوا عليه وحصنوني ويبجون ..
‎امير .. يمة اني الصوج بيه سويت هيج وخليت ابوي يطردنا بس ماگدرت اشوفها تضرب بيج واسكت ..

‎مسحت دموعي وگلتله .. لايمة لاتلوم روحك ..
‎ابوك مغسول عقله وهو رايد حجة حتى يخلص من عدنا .

‎نفضت هدومي وگمت انفتحت الباب وصار قاسم بوجهي .
‎فرحت واجاني امل .. اكيد حن گلبه عليه اني وجهالي وماانطاه گلبه يشمرنا بالشارع ..

‎قاسم .. ياقوت اذا تردين تعيشين هنا واخليج على راسي انتي وجهالج ..
‎واعيشج بجنه .. بس بشرط ..

‎ابتسمت .. گول ياابو قيصر مستعدة كلشي اسوي ..
‎قاسم .. مايهون عليه مرة مثلج جمال وبياض تبقى بالشوارع وحدها ..
‎فأذا تردين اطلبي الطلاگ من حاكم ..
‎وتعاي عيشي عندي ومن تخلص عدتج اعقد عليج واتكفل بولدج وبيج طول العمر ..

‎حسيت بطابوگة وضربتني على راسي ..
‎مامصدگة الاسمعة ..

‎قاسم .. ها شگلتي ..
‎ياقوت .. احسبي ماسمعت ياابن عمي .. ولوما ولدي واگفين جان عرفت شأحجي ..
‎اعيش بالشوارع اهون عليه من اسمع كلامك هذا ..

‎اخذت ولدي ومشيت ..
‎صاح وراي .. ياقوت فكري ماعندج غير هذا الحل ..
‎شلون يفكر هيج ..
‎هذا تسودن يمكن ..
‎عينة على مرت اخوه شلون عشت وياه بتفس البيت ماادري ..

‎وين صفا بينا الوكت اخاف من اهلي وافضل الشارع عليهم ..
‎امير طول الطريق ..
‎يريد يعرف عمة شيقصد وشيريد . اعرفه سمع وفهم بس يريد يتأكد ..
‎اني استحيت من ابني لأن سمع . وقاسم مااستحى مني من هيج حجة ..

‎بقيت افتر بالشوارع ومااعرف وين اروح ..
‎عاينت ع الحلقه مالتي واخذت ولدي واسحل بيهم وبغراضنا للسوگ ..
‎بعتها ..
‎واجرت سيارة ورحت للامام ..
‎التجأ الاهل البيت احسن من بنـي ادم ..
‎هم يحمونـي من ظلم البشر وقسوتهم عليه ..

‎شجاها الناس ..
‎گبل الناس من سم الحيايه تخاف
‎هسه الناس تلدغ والحيايه اشراف
‎گبل الحجي معدل كل دغش ما بيه
‎وهسه الحجي مصفط من تفسره اصناف
‎گبل الغيرة نكطه وتحترمها الناس
‎هسه الغيرة بوك بلا خجل وانصاف
‎گبل الناس تمتاز بحجي الطيبين
‎وهسه الطيب اليلبس اهدوم نضاف
‎گبل گعدة عمام ولمة محبين
‎هسه الگعدة غيبه وغلطة واستنكاف

‎بقيت يومين بالامام .. جهالي يركضون ويلعبون بالليل ينامون ..
‎الا اني مگابله الامام وابجي ..
‎وادعي الله يفرجهـا عليه ..

‎الگوام جانوا من يشوفون حالي يجبولي اكل الي وللجهال وانطونا فراشات وغطوات ..
‎وگال بوية ..
‎هذا يعتبر بيت الله وابقي بي شگد ماتردين ولاتشيلين هم اي شي ترديه تعاي النا واطلبي ..

‎فدواتك يربي . الناس الغربة ارحم من اهلي عليه ..
‎عرفت ماخذين حجي من درة ..
‎درة رغم عمرها صغير بس كلشي تفتهم ..
‎من سألتها لجت وگالت والله ماما ماحجيت اسرار بيتنا بس گلتلهم بابا طردنا واجينا هنا لان ماعدنا بيت ..

‎عذرتها البرائتها الي گالته مو جذب ..
‎ومااگدر اعاقبها فرگ عقاب الزمن عليهم ..
‎لأن اني منبهتم مايسولفون اي شي للغرب واسرار بيتنا ماتطلع ..

‎امير جان حاير بأخوانه ويراعيهم واني ماعندي لاحول ولاقوة ..
‎گمت من فرغتي ..
‎انضف الصحن واخدم اهل البيت ..
‎احسن من الگعدة ..

‎مرة اجت وحدة گعدت يمي وگالت ..
‎انتي مبينه الوكت ماخذ عمر منج ..
‎تعاي اخذلج خيرة ..

‎گلتلها خية اني مااحب هاي السوالف وشأشوف بعد الي شفته ..

‎لحت عليه وگالت اسمج ..
‎من حيرتي گلت مااخسر شي خليني اعرف شيصير بيه بعد ..
‎انطيتها اسمي واسم امي (ياقوت بنت زمردة )

‎اخذت نفس وجرت حسرة .. اووووف يياقوت دربج طويل وصعب ..
‎بس الله راح يعوضج بواحد من ولدج يشيل حملج ويصيرلج ابو واخو ..

‎صارت عيني بعين امير وضحكت .. اي هو اميري واخوي وابوي فدوة اروحله ..

‎كملت حجيها .. بس يخية انتي راح تنتقلين او تسافرين ماادري بس حياتج تتغير ان شاء الله ..

‎ضحكت وگلتلها .. خيه وين اروح ليش هو عندي مكان اروحله بعد ..

‎گمت من يمها ومشيت اريد اطلع من الضريح ..
‎وسمعت وحدة تصبح بأسمي ..
‎يا وج هاي انتي ياقوت ..

‎درت وجهي وشفت ام احمد وبتول وابو احمد ..
‎نزلت دموعي وحضنتها ..

‎ام احمد .. وج خيه وينج انتي .. من عرفت طردج المايتسمى واني ادور عليج ..
‎ورحت البيت عمج وطلعت مرت حماج وطردتني وگالت مااجت ولاشفناها ..
‎وحتى گمت الوم بأبو احمد ..

‎ابو احمد .. اعذريني ياخوي والله گمت ماانام ليلي من وراج احس بضميري ماكلني لان منعت ام احمد عنج ..

‎گعدت مهدودة بالگاع وسولفتلها شلون طردني قاسم وشلون اجيت لهنا ..

‎ام احمد .. گومي خيه وياي ..
‎ياقوت .. يا وين اروح خيه ليش اني عندي مكان اروحله
‎ام احمد .. گومي البيتي ..
‎اذا ماتشيلج الگاع اخليج على راسي ..

‎ياقوت .. خية مااگدر مااريد احملكم حملي اني وجهالي
‎والناس ماترحم شيگولون اذا گعدت عندكم ..

‎ابو احمد .. خوية الارزاق على الله واللگمة نقسمها
‎واذا ع الناس ..
‎لاتشيلين هم .. اگعدي يومين عدنا واني اشوفلج بيت لو مكان واگعدج بي انتي وجهالج ..

‎ياقوت .. ينطيك العافيه خويه ماادري شلون اجازيكم انت وام احمد وگفتكم محد وگفها الي من اهلي ..

‎ابو احمد .. دگومي خويه گومي احنه اهل ان شاء الله

‎لميت غراضنا وشالها ابو احمد للسيارة ..
‎وتشكرنا من الگوام وسلمت ع الامام وطلعت ..
‎وصلنا الشارعنا ..
‎وشفت بيتي مصبوغ ..
‎خلصت عمري اتوسل بي يجيب حاجة للبيت وهسا بكم يوم صابغلها البيت ومسويه يخبل ..
‎اضن ابقى عمري كله اتحسر وابجي على بيت ابوي الراح -----------------------------------------

‎دخلت البيت ام احمد ووصيت ولدي مايطلعون برة البيت لايشوفهم ابوهم ..
‎ويسويلنا مشكلة ..

‎بقيت اسبوع عند بيت ابو احمد الرجال مايجي للبيت ابد يبات ببيت اخوه ..
‎عشت اسبوع عندهم بعز ودلال ..
‎حاروا شجابوا وشخلوا ..
‎حتى ملابس اختها الام احمد خياطة ومخيطتلهم قمصان والدرة ثوب ..
‎والي دشداشة ..

‎ليش مابيوم .. اجة ابو احمد
‎وفاتحني بموضوع ..
‎گال خوية الامتحانات اجت وولدج صارلهم شگد مامداومين وخاف ينفصلون ..
‎ولگيت مديرهم ووصيته وسولفتله ضروفج ..
‎وگال خلي يداومون امتحانات اخر السنة قربت واني من يمي راح احذف غياباتهم ..

‎فرحت من سمعت كلامة ..
‎بس شلون اخذهم واوديهم خاف يشوفنا حاكم ..

‎ابو احمد .. اني هم فكرت ..
‎وشفتلج مشتمل بي غرفه ومطبخ وصحيات ومطارمة صغيرة قريبه على المدرسة ..
‎وحاجيت راعيها وگال اتساهل وياكم بالايجار ..

‎ياقوت .. يطيك العافية خوية بس اني ماعندي غير فلوس الحلقه البعتها وهم صارفه منها ..
‎منين اجيب ايجار ..

‎ابو احمد .. خويه انطي العندج مقدمة .. وام احمد راح تحاجي الناس الرادوا وحدة تخبزلهم ..
‎والباقي الله يدبرة ..

‎ام احمد .. وج خية وصي على غراضج الي بالبيت واخذيهن والعصر نجيب سيارة تحمل الغراض للبيت ..
‎وهسا اني وياج وبتول نروح ننضفه ..

‎ياقوت .. بس... .
‎ام احمد .. ماكو بس . دگعدي انتي وجهالج واستقري والباقي يم الله ..

‎ماانطوني فرصه احجي ..
‎بسرعة بسرعة نضفن البيت ورتبنا .. هو صح صغير بس ويرادله تصليحات بس المهم نگعد بي اني وجهالي ..

‎ابو احمد راح واتنازل وحجى وي حاكم ..
‎وحاكم اصلا يخاف منه لأن ابو احمد مشتكي عليه وبينهم دعوة ..
‎ويمكن راد بس يخلص من عدنا ..
‎انطاه الغراض ..

‎وبعدين عرفت من ام احمد .. رايد يعرف مكانه وين بس مرته مصيحة عليه وساكت وگالته انطيهم السكراب مالتهم لو اشمرهن ماعايزة وساخة بالبيت ..

‎ماادري ليش ماانقهرت ولاضجت ..
‎وعبالك ماكو واحد اسمه حاكم بحياتي ..
‎بعد الي سواه كرهتة وكرهت كلشي يخصه ..
‎الاهم عندي جهالي وتربيتهم وهاهي ..

‎وبيت ابو احمد ماقصروا .. خلوا ذاك البيت الصغير جنة الي ..
‎ابو احمد صبغ البيت ورتبه ووياه ابنه واخوه ..
‎وام احمد جانت كلشي تطبخة تجيبلي منه ..

‎حياتي استقرت واصلي واشكر ربي الي خلى بطريقي هيج ناس ..
‎رجعوا جهالي للمدرسة .. وامتحنوا ونجحوا والمدرسة جانت قريبه علينا ..

‎اني گمت اخبز للمنطقه كلها والحمد لله احصل نعمة من الله صح اتعب وضهري مكسور من الصبح لليل بس كلشي يهون الخاطر جهالي ..
‎درة رغم صغرها بس شايله البيت كلة من تنضيف وكنس
‎تساعدني ..
‎وولدي ياخذون الخبز ويوزعوه على الجيران ..
‎بس اموري بالبايسكل مال احمد انطاهيا يروح للبيوت البعيدة علينا ..

‎ام احمد مافارگتني وجانت كل يوم يمي ..
‎وفاتحتني بموضوع ..
‎-خية ماتخلين امير يشتغل وي ابو احمد ويتعلمة صنعه وهم يفيدكم ويفيد روحة ..

‎-لاخية ابني بعدة صغير وعندة مدرسة وكافي عليه بالشموس يوزع خبز ..

‎امير .. يمة اني اريد اشتغل .. والمدرسة بعد وكت الها
‎ياقوت .. يمة تتعب مو حمل شغل انت ..
‎امير .. يمة اني مو زعطوط لاتسوين هيج وياي اني كبرت واريد اشتغل واتعلم ..

‎ام احمد .. خية شبيج خايفه هذا احمد هم يشتغل وي ابوه وابو احمد ماراح يضغط عليه بس يعلمة ..
‎ع الاقل صنعه تفيدة للكبر ..

‎من شفت امير يلح وافقت بس بقى بالي يمة ..
‎من الشغل بالمحل للخبز يوزعة ..
‎احس روحة تروح ولليل ينام مايدري بروحة من التعب
‎جنت اگابله وابجي ..
‎بس ابو احمد زين ويراعية وينطيه يومية زينه .. اعرف بيهم يردون يساعدونا بأي طريقه ويدرون بيه مااقبل اخذ فلوس .. لهذا طلبوا امير يشتغل وياهم ..

‎حياتي تغيرت بهذي الاشهر القليلة ..
‎جنت اتوقع غياب حاكم عنا يشتتنا ..
‎بس من شفت جهالي فرحانين وحياتهم الجديدة راضين بيها ..
‎اني نفسي تغيرت ومو ذيج ياقوت العايشة بضل حاكم
‎المصاعب والهموم خلقت مني انسانة جديدة ..
‎ومن جهالي شبان بأجسام اطفال ..
‎ماخليت طفولتهم يضيعوها بالشغل ..
‎جنت اوفرلهم كلشي يحبوه من العاب ..
‎وابو احمد دوم ياخذنا زيارات وطلعات وياهم ..
‎بس الي مضوجنـي ..
‎انه ماكو احد سأل علينا من اهلي وعمامي ..
‎وحتى حاكم اشهر وهو ماعرف جهاله واني شلون عايشين ومنين ناكل ونشرب ..

‎وبيوم اندگت الباب ..
‎وراح امير يفتح ..
‎شويه وسمعت صياحة ..
‎اطلع منا مانريدك هذا بيتنا .. طلعت وشفته ويدفع بأبوه ويصيح ..

‎دفعه حاكم ودخل ..
‎ياقوت .. شعندك هنا مو طردتنا وماتريدنا ..
‎حاكم .. لاتخافين ماجاي علمودكم .. اجيت انطيج هذا التبليغ ..
‎ياقوت .. تبليغ شنو ..
‎حاكم .. ياقوت اني اريد اطلگج ورفعت دعوة الي اشوفه مرتاحين وتگدرون تعيشون بدوني ..
‎فماكو مانع نتطلگ مووو .

‎ياقوت .. من شفتك گلت تندم وجاي يشوفنا شلون عايشين .. مافكرت من طردتنا شنو صار بينا وشلون اخوك ومرته طردونا ..
‎ووين رحنا ..
‎ايام واني وجهالك بالشوارع .. وخلف الله على الناس الطيبه الي ساعدتنا واجرتلنا هذا البيت ..
‎الحمد لله الي گدرنا نعيش بدونك ..
‎وحتى جهالك مايردوك ..
‎ومايفرق عندي اذا طلگت او لا لأن اني من زمان طلعتك من حياتنا ..

‎حاكم .. المهم يومين وتجين للمحكمة حتى نفض الشغله بس ها . اذا فكرتي تطالبين بحقوق لو نفقة اخذ جهالج منج ومااخليج تشوفيهم طول عمرج ..

‎ياقوت .. لاتخاف كلشي مااريد منك بس خلصنا من شرك واطلع من حياتنا ..

‎شاف درة صاحلها ومد ايدة الها ..
‎عافته ودخلت لجوة .. حسيته ضاج لأن هو جان يحبها ومتعلق بيها ..
‎امير .. خلصت حجي يله اطلع من بيتنا مانريدك بعد واذا اذيت امي بعد اكتلك والله ..

‎دفع ابنه ووگعه بالگاع وطلع ..
‎وامير يفرفح ويحجي .. يمة انتي ليش انطتيه مجال لاتخليه يحجي اطردي دور ..

‎وباجر اشتري سلسله للباب حتى مايفتحوها اخواني ومفتاح عندج وعندي بس ..
‎اتعذب من اشوف ابني بهيج حالة ..
‎الله لينطيك يحاكم خليت ابني يحقد عليك وع الدنيا وعلمته الكره ..
‎هونت عليه وگتله الي تريدة يصير بس لا تقهر روحك وتفرفح ..
‎گمت اخاف على ابني من ابوه ..
‎لأن مجرد ماينذكر اسم حاكم بالبيت يتسودن ..
‎وماادري شيصير بي ..

‎اجت يوم المحكمة ورحت اني وامير ماقبل يعوفني وحدة وقعت والقاضي گال عندج حقوق تطالبين بيها ..
‎گتله لا ..
‎كلشي ماردت بس كون اخلص من حاكم وارتاح ..

‎رجعت للبيت واحس هم وانزاح مني ..
‎صحيح ✔ ذكرت الايام والعشرة الي نساها بسرعه وباعنا بس الي سواه خلق مني ياقوت ثانية ياقوت مستعدة تسوي كلشي وتنسى كلشي علمود جهالها ..

‎وصلت للبيت وشفت مرة عجوز گاعد بباب البيت وولازمة عصتها بيدها ..
‎اني جهالي عفتهم عند ام احمد ..
‎والبيت فارغ ..
‎رفعت راسها ..
‎من شفتها شهگت ..
‎عمتي الحجية .. مامصدگة شفتها ..
‎ركضت الها وابجي ..
‎وهي تضرب بيه وتگلي .. ولج ليش يغبرة كل هذا يصير بيج وماتجيني ..
‎واني اگول البذات هاي الماغزر بيها الربة ليش ناسيتني وماتذكرني طول هاي الاشهر ..

‎بجيت وعاتبتها بعيوني ..
‎عمت عيني اذا انساج وانسى رباج .. بس الوكت اغبر والناس الماترحم هي الي بعدتني عنج ..

‎گومتها اني وامير ..
‎گومي عمة خلينا ندخل لجوة واسولفلج الي جرالي وانتي حكمي اذا اني بذات لو لا ..
‎دخلتها لجوة وگلت الامير روح جيب اخوتك وتعال من ام احمد ..
‎گعدت وسولفتلها كلشي من ذاك اليوم الهذا اليوم ..
‎وهي تسمع وعيونها تبجي على حالي ..

‎بقلمي_الكاتبة_شمس
‎يتبع .....

لامارا · 25-08-19, 02:05 AM

..
‎//// البارت الثـامـن ////
‎عجـاف_القلـوب ..
‎الكاتبـة_شمـس ..

‎فـي بعض الاحيـان ..
‎يكـون الهروب هو الحل الوحيد .. لبعـض المواقـف التـي يصعـب فيـها المواجهـة ..
‎وغالبا ماتكون افضل من الهزيمـة والاستسلام !!

‎سولفت العمتي كلشي من ذاك اليوم الي اجيت اشوفها بي الهذا اليوم ..
‎وهي تسمع وعيونها تبجي على حالي ..

‎اجو جهالي وحضنتهم وتبجي ..
‎ومشتريتلهم حلويات فرحوا بيها ..
‎الا امير جان منتفض وماقبل ياخذ شي ..
‎وعبالك يطلب ثار من كل واحد بي ريحة ابوه ..

‎اشرتله ياخذ ..
‎مسحت دموعها ..
‎واول ماحجت گالت ..
‎مو گتلج يغبرة هذا ضمانج وسندج ..
‎لاتتنازلين عنه الحاكم حتى لو جان ابني الرجال من ياخذ حلال المرة احسبي باعها وذلها ..

‎اني گلبي حسني صاير عليكم شي ..
‎وسألت سهيله وقاسم وگلتلهم ودولهم طارش ..
‎وگالوا مابيهم شي زينين ..
‎بس گلبي ماانطاني ابقى گاعدة ..
‎ولبست عباتي وطلعت من غير مايدرون بيه ..
‎ورحت البيتج ..
‎طلعتلي وحدة مرة ..
‎گلتلها انتي ياهي ووين ياقوت ..
‎جاوبتني وگالت ..
‎-ياقوت مشت طلگها حاكم .. وهذا بيت بنتي ..
‎-وياهي بنتج .. هذا بيت ياقوت .. وين وديتوها ..
‎-عيني حجيه لاتدوخينا .. روحي دوري عليها شمدرينا احنه وين هي ..
‎اجة حاكم بهاي اللحظة هو ووحدة وياه ..
‎حاكم .. ها يمة شعندج هنا ..
‎الحجية .. ولك وين ياقوت وجهالك .. وهاي مني ..
‎حاكم .. يمة اني طلگت ياقوت اليوم .. وهاي مرتـي احلام ..

‎تفيت بوجهة .. تف عليك ياناقص تطلگ بنت عمك علمود وحدة غريبه .. وهذا بيتها شلون تطردها منه ..
‎حاكم .. البيت بأسمي يمة ..
‎الحجية .. ياناقص اخذت بيتها وطردتها منه .. روح يحاكم من هاي اللحظة لااني امك ولااعرفك متبرية منك اليوم الدين .. وعسا ماتتهنى بالبيت طول عمرك دعوة والدة محروگ گلبها وغضبانه عليك ..

‎اني احجي وياه وهاي المفعوصة ماعجبها تگله ..
‎-اوي حاكم اني داخله عود من تخلص دعاوي ورزايل ادخل مالي خلگ ..

‎عاينت عليه .. ولك هي هاي البعت بنت عمك علمودها .. ماعندها كل تربيه وادب ..
‎وين ياقوت گلي . وين صفى بيها الدهر ووين راحت وعندها كوم لحم ..
‎حاكم .. ياقوت ماجرة ببيت قريب على مدرسة الجهال بالفرع اليمة بيت مشتمل صغير بابة حمرة مامصبوغة ..

‎تفيت عليه وگتله غضبانه عليك اليوم الدين واجيت بتكسي لهنا ماعندي حيل امشي ..
‎ودگيت ماكو لمن اجيتوا ..

‎ياقوت .. اي مو جنت بالمحكمه ومناك تسوگنا واجينا اني وامير ..
‎الحجية .. يعني طلگج الاغبر وونطاج حقوقج لو لا ..
‎ياقوت .. مااريد كلشي منه .. المهم جهالي عندي وهذا جان شرطة ..
‎الحجية .. ولج يمة راح اموت .. شنو السويته عند ربي وانطاني هيج ولد عارات ..
‎مابيهم واحد ريح گلبي لاولد ولابنيه بس الهم محصلة منهم ..

‎وهذا قاسم اني اعلمة هو مرته شلون يطردوج انتي وجهالج من بيت عمج ..
‎مثل ماالهم الج ..

‎ياقوت .. كل شر وراه خير عمة .. يمكن لو ماطاردني قاسم جان اني هسا بنفس الضيم والقهر عند سهيلة ..
‎وجهالي متدوهنين ..
‎بس الله رادني اوگف على حيلي واعيش جهالي بالحلال
‎الحمد لله مستورة ومادامهم بخير مااريد شي ..

‎الحجية .. تحجين صدگ ولج .. اني طيبه واعوفج تگعدين وحدج وبالايجارات .. گومي لمي غراضج وروحي وياي ..

‎تذكرت كلام قاسم وروحي لعبت منه ..
‎بعد مااگدر اامن على روحي هناك ..

‎ياقوت .. لاعمة اعذرينـي مااگدر اروح اني استقريت وي جهالي وكافي اخلص عمري متهجوله كل يوم بمكان ..

‎امير .. بيبي احنه هذا بيتنا ومانطلع منه .. وحتى اذا امي تريد ترجع اني مااخليها ..

‎الحجية .. ولك صاير تحجي يااموري ..
‎امير .. اني مو صغير بيبي .. امي شافت هواي من ابوي وعمي وحتى جدي جان گدام الناس يضرب بيها محد يحبها هناك ..
‎هنا عايشين مرتاحين وامنا تحبنا وجامعتنا ..
‎صح بيتنا صغير بس حلو وهدوء ومابي مشاكل ..

‎اعاين عليه وابتسم .. ابني كبر ويدافع الامة وياخذ قرار عنها ..
‎گلتلها هاهي عمة مثل ماگال امير .. مدام جهالي مرتاحين هنا . مااطلع منا ..
‎وصاحب البيت متساهل ويانا بالايجار وحباب ..

‎الحجية .. بس يمة البيت قديم وهذا بالشتا خاف يخر عليكم ..
‎ياقوت .. منا للشتا الله كريم . المهم احنه مرتاحين ..
‎الحجية .. اذا انتي هيج گولج هاهي . واني هم مااعوفكم .. راح اجي ابات يمكم بين فترة وفترة لأن مااگدر اعوف مكاني وبيتي .
‎تدرين بسهيله شني ..
‎بس اغفل عنها لن مسويتلها عمله ومو بعيدة تجيب اهلها وتسكنهم بي ..

‎ياقوت .. لاعمة اني هم مااريد ادولبج ويانا وبيتنا هنا صغير .. بس بيوم التجين اخليج على راسج ..

‎عمتي .. اعرفـج بنيتي ماتقصرين ..
‎طلعت من جيبها فلوس وخلتهن بيدي ..
‎-هاج يمة ولو گليلات ..
‎-ياعمة مااخذ انتي منيلج وكافي عليج دواج وطبيبج ..
‎-ولج ياقوتة تردين ايدي .. معليج بيه اني مستورة الحمد لله وعندي خير من الله ..
‎اخذي لاتدولبيني ..

‎اخذتهن منها وبست راسها ..
‎شوية ومانحس الا الباب اندگت ..

‎راح علي فتحة ..
‎لن اسمع صوت قاسم يصيح ياالله ..
‎فزيت من مكاني واخذت شيلتي على راسي ..
--------------------------------------
‎دخل لجوة .. وگال السلام عليكم ..
‎تعجبت من جيته وشعندة جاي ..
‎من يوم الطردنا من البيت ماسأل ولاگال وين گاعدين وشتاكلون لو تشربون ..

‎الحجية .. ها ولك شعندك جاي .. احسابك انت ومرتك بعدين .. هو بيتك وتطرد ياقوت وجهاله منه ..
‎ولك يالاغم مافكرت وين يرحون وهي ماعدها احد غيركم
‎بس مااعتب عليكم لأن ادريكم ناقصين غيرة وناموس انت واخوك الاخذ بيتها وطردها ..

‎قاسم .. يمة خلصتي غلط ورزايل ..
‎الحجية .. والك عين وتحجي ..
‎قاسم .. يمة اصبريلي خلي افهمج اني من طردتها حسبالي رجعت البيتها .
‎وحاكم هم ماسأل ولااجه گلت يمكن اتصافوا ..
‎ولأن مغثوث من حاكم هالطردتهم ..
‎وحقها عليه ياقوت وهاي راسها احبنه ..

‎طفرت من مكاني وحسيت جسمي كزبر منه .. لسة حجايته ترن بأذاني وهو يگول اطلگي واخذج ..
‎واكيد جيته هسا وبهالوكت مو خاليه ..

‎الحجية .. جا اذا مثل ماتگول شمعرفكم بمكانهم واجيت
‎قاسم .. مو سهيله گالت عمتي ماهي طلعت وماندري بيها وين ورحت البيت حاكم اسأل عليج وگالت مرته انتي هنا ..
‎وانطتني العنوان وعرفت منها حاكم مطلگ ياقوت اليوم
‎فار دمي ولو لاگيه جان اعرف شلون اتصرف ..
‎يبيع بنت عمة وجهاله علمود وحدة مامعروفه منين ..
‎شتگول علينا الناس ..
‎مرة مطلگة ووحدها وي كوم لحم ..

‎-اسمع ومامصدگة .. هذا يحجي صدگ لو يمثل ..
‎ليش مو هو الطردني وخلاني بالشوارع ومارف گلبه علينا ..
‎الحجية .. الله يهديكم يمة . ع الاقل واحد بيكم يريحني
‎قاسم .. يله ياقوت لمي جهالج وگومي البيتنا ..
‎ياقوت .. مشكور ابو قيصر اني وجهالي هيج مرتاحين والحمد لله مانريد نضايقكم ..

‎الحجية .. يمة ادريج ماترتاحين من ورى سهيله والسانها بس وانتي يمي ارتاح ومايضل بالي ..
‎ياقوت .. عمة اني مو بعيدة يمكم بكم شارع .. واذا صار شي لو اريد شي ادز واحد من الولد ..

‎الحجية .. اي جا ابقى يمج اليوم اني كم يوم مشتاقتلكم
‎وانت روح يمة وحجرتي قافلتها مو واحد يدخللها .
‎مثل ذيج المرة رحت للزيارة ولگيت مرتك كاسرة القفل وطابه ..
‎قاسم .. لايمة وين تبقين انتي ماتگدرين بغير حجرتج وهنا المكان ضيگ ..
‎ام امير گومي والعني الشيطان واني اضمن الج محد يدوسلج على طرف ..

‎ياقوت .. لا رحم الله والديك مشكور ..
‎وعمة اذا ماتگدرين مامجبورة ..
‎الحجية .. لايمة شعندي اليوم اني ابات يمج مشتاقة للجهال ..

‎ياقوت .. هلا بيج يوم المنى .. خلي اگوم احمي الاكل ونتغدا ..
‎قاسم .. وين تلحگين اروح اجيب من السوگ اني ..
‎ياقوت .. مشكور خوية اني طابخة من الصبح قبل لااطلع الحجية .. قابل مثل مرتك للضهر يله تطبخ هاي ياقوت السنعة تربات ايدي ..
‎قاسم .. والنعم منها .. خسران العافها وماعرف قيمتها .

‎حسيت نضراته واسلوبه متغيرات ..
‎ابد ماارتاحيت اله .. گمت للمطبخ وصحت امير ودرة يساعدوني ..

‎حضروا الماعين والسفرة ..
‎وامير سوة الزلاطة ..

‎واني بديت اصب وهم ياخذون الماعين ..
‎وقاسم ماراح بقى ع الغدا ..

‎حسيت واحد وراي طفرت ..
‎-تردين اساعدج ..
‎-لا مشكور خوية .. روح انت يم عمتي كملت اني
‎-ياقوت شبيج خايفه مني اني اريدج بالحلال ..
‎-خوية الله يخليك عوفني عندك مرة وجهال واني جنت مرت اخوك ليش تسوي هيج ..
‎-لاتگولين خوية اني مواخوج .. واخوي هو الباعج وماعرف قدرج اني الي ردتج اول واحد وامي اخذتج الحاكم ..

‎ضربت على صدري .. خوية رحمة لأهلك استر عليه وعوفني ..
‎التفتت شفت امير واگف وراي ويخوزر وضايج ..

‎عليت صوتي .. روح ابو قيصر السفره كملت ..
‎اتقرب وهمسلي ..
‎راح انتضرج منا لمن تخلص العدة فكري زين ورديلي الجواب ..

‎امير .. عمي تفضل للغرفة الاكل برد ..
‎راح قاسم لجوة ونضرات ابني أكلتني .. أول مرة استحي من روحي واضوج لأن ابني شافني بهيج موقف ..
‎هذا قاسم تخبل وراح يسويلي مصيبه ..

‎گعدنا ناكل .. وماعرفت شلون اكل . من الحرگة الي بگلبي ومن نضرات امير المافارگتني ..

‎ماصدگت كملنا غدا وهو سلم على امة وطلع ..
‎وگالها اجي بالليل اخذج للبيت ..

‎ارتاحيت من مشى بس حسيت امير ضايج ..
‎امير .. يمة اني رايح للشغل تحتاجين شي ..
‎ياقوت .. لايمة روح وخلي بالك على نفسك ..
‎عندي بيتين يردون خبز ..
‎راح اوديهن بيد اخوتك ..
‎گمت عجنت وخبزت بين ماعمتي ارتاحت شويه هي تحب تنام الضهر ..

‎گلت خلي اسويلها خبز باللحم تحبه هي وي الجاي ..
‎وديت علي يجيبلي ربع لحم وشحم من الگصاب بالدين
‎ووديت على كرفس ..
‎وخبزتلها بسرعه ..
-------------------------------------------
‎گعدت عمتي اشتمت الريحة ضحكت وگالت ..
‎ولج ياقوت الله انطاني بنات من بطني بس مايذكرني ولايعرفن شني احب بگد ماانتي مداريتني وتعرفيني

‎اكلنا وي الجاي واجة امير تعبان دخل يسبح واني گمت اسوي عشا ..
‎تفاجأت بجية قاسم ووياه علاگة ..
‎گال ياقوت همزين بعدج ماطابخة هاي عشا جبت من السوگ ..

‎ياقوت .. لاخوية رحم الله والديك اخذة للبيت هناك اني راح اسوي ..
‎قاسم .. معليج بيهم اني اخذلهم منا وجاي اي شي تردين اطلبيه مني انتي وجهالج مسؤولين مني اني فاهمة ..
‎ويخوزر بيه ويگلي اخذي لاتردين ايدي اني موغريب ..

‎كح امير .. طفرت من مكاني . مخلي الخاولي على راسة وعيونه حمر .. اعرفة اذا ضاج عيونه تنگلب حمر

‎امير .. عمي شني هاي ..
‎قاسم .. انت مالك شغل بيني وبين امك ..
‎امير .. شلون مالي دخل وهذا بيتي وهي امي واني الرجال هنا ..
‎قاسم .. والله وكبرت وصرت ارجل من ابوك . عفية بيك هيج اريدك تحمي امك واخوانك اذا اني ماهو ..

‎ضجت وعصرني گلبي من كلامة وتلميحاته ومااعرف شناوي عليه ..
‎جان كله يعاملني بالضرب والغلط وهسا يجيب ويشتري
‎ياربي لاتبليني ببلوة ثانية ..

‎عمتي اشوفها فرحانة لأهتمام قاسم ومرتاحة ..
‎وماگدرت احجي شي ..
‎واني اشوفها تدعي وتگول الله هداه عليج وانكسر گلبه ماتدري هو ناوي على غير نية ..

‎من مشوا عمتي وقاسم ..
‎ناموا الجهال لأن احنه نگعد من الصبح ..
‎الا امير مانام ..
‎خلى اخوانة نايمين وگال ..
‎يمة اريد احجي وياج ..

‎عرفت يريد يحجي على عمة ..
‎عمري كله ماخجلت مثل ذاك اليوم ..
‎-گول يمة شتريد
‎-يمة عمي شعندة وياج ..
‎-شني تقصد امير فهمني
‎-يمة اني موصغير وسمعت كلشي .. من اليوم الي مشينا البيتهم وطردنا . عرفت شيريد عمي يريدج تتزوجيه مو ..

‎ماعرفت شأحجي واحس گلبي يدگ ونار تطلع من وجهي ابني كبر ويحس ويفتهم ..
‎شلون خليتي روحج بهيج موقف يياقوت ماحسبتي الابنج وسندج ..

‎امير .. يمة لاتضوجين ادري انتي موبيدج وهو يجبرج بس مااريدج توافقين اذا اخذتيه اخذ اخواني ونهج منا ومانخليج تشوفينا بعد ..

‎ياقوت .. انت شبيك يمة ليش هيج تحجي . اني مااتزوج بعد انتو تسوون الدنيا عندي ..
‎وعمك مايصير اتزوجة عيب هذا وحدة يحجي معليك بي .

‎امير .. اعرفج يمة بس اني گلت هيج لأن مااريد حاكم ثاني بحياتنا .. هيج احنة مرتاحين وحياتنا حلوة واني جاي اشتغل ومااخليكم محتاجين شي ..
‎وبس اكبر احميج منهم ..

‎بجيت واني اسمع ابني شلون يحجي ويفرفح ..
‎ياقوت .. كافي ولك يمة مااتحمل بعد .. ولك حاكم وقاسم يرحون فدوة الاضفرك ومثل ماگلت انت اني شحصلت من حاكم حتى احصل من قاسم ..

‎حسيتة ارتاح وضحك ..
‎وحتى اذا اني ماحجيت صدگتي عمتي سهيله تخليج بيومها تموتج هههههه ..

‎ضحكت وياه واعرفه يكابر ويريد يغير الحديث ..
‎ياقوت .. روح يمة وتطمن غيركم مالي بالدنيا ..
‎امير .. واذا اجة مرة ثانية .. اني مااحب يبقى يجي كل يوم بحجة يشوفنا ..
‎ياقوت .. معليك اني احجي وياه واذا مافاد احجي وي عمتي تحاجيه ..

‎الليل كله مانمت واني افكر بكلام امير وبقاسم الماعرف منين طلعلي لو باقي على كرهة الي احسن

‎مر اسبوع وقاسم كل يوم يجي ويستغل امير ماهو
‎ويحير شيجيب مسواك ..
‎ومن يسمع امير يتخبل ويصيح عليه ..
‎ويلوم بيه ويگلي ليش تدخليه للبيت ..
‎طگت روحي واني اشوف ابني يلوم بيه ويعلمني الصح من الغلط ..

‎مااتحملت وطگيتها بوجه قاسم ..
‎خوية بعد لاتجي احنه ولاية صغيرة والناس اكلت وجهي ماصار عشر ايام من تطلگت وانت رايح وراد علينا
‎عمتي كل يومين والثالث عدنا وماحتاجين شي لهنا وبس ورحم الله والديك ماقصرت ..

‎قاسم .. شوفي يبنت الناس مال اعوفج انسيها اني ماصدگت رجعتيلي بعد هذي السنين ..
‎واني الي گلت الحاكم يطلگج مادام تزوج ونساكم وساومته وخليته يطلگج ..
‎تالي تگليلي مااريدك ..
‎گتلج وراح اعيدها .. الج منا لمن تخلص العدة اجيب شيخ واعقد عليج واخليج بين عيوني انتي وجهالج ..
‎وامي تحبكم وتريدكم .. احليج ببيت اهلي وسهيله اجرلها واطلعها ماخليها وياج وتضوجج ..
‎انتي الي راح تنهين وتحكمين بس گولي اي ..
‎احسن من تعبج ووگفت الشمس والخبز بهذا الحر ..
‎يله اني رايح والمرة الثانية ارجع حتى اخذج البيتي مرة الي ..

‎ابتسم وهو يعاين عليه بنضرة لعبت روحي منها ..
‎واحس بلوة ووگعت على راسي ..
‎گمت اخرمش بخدودي واضرب بيها ..
‎ولج ياقوت وين ترحين ..
‎والمن تشكين ..
‎اي ماكو غير عمتي لازم احجي العمتي هي تحلها ..

‎اجة امير شاف حالي تسودن وحاسب اخوانه عباله هم الي مضوجيني ..
‎بعدين سألهم ..
‎عمي قاسم اجة ..
‎درة .. اي اجة وانطانة فلوس نشتري ..
‎عاين عليه ..
‎يمة شسوالج گولي ..
‎ياقوت .. ماسوالي شي .. اريدك تروح تصيح بيبيتك تجي اشتاقيتلها ..
‎امير .. يمة گولي والله احرگ البيت عليه اذا سوالج شي
‎ياقوت .. يمة شبيك فوگ ضيمي تزودها عليه ..
‎تروح تصيح بيبيتك لو لا ..
‎امير .. رايح اجيبها واجي ..

‎اجت عمتي وحيلها مهدود وگلبها فاحط ..
‎ها ولج ياقوت خير يمة شبيج جبتيني بهالمغربية ..
‎شكو ..
‎-ماكو شي عمة تعاي للغرفة ارتاحي ..
‎وانتي درة جيبي ماي من الثلاجة البيبيتج ..
‎عمتي .. ولج گولي مو گلبي وگف ..

‎ياقوت .. امير اخذ اخوانك واطلع ..
‎امير .. اي يمة ..
‎ياقوت .. عمة اريد احجي وياج بس لاتضوجين ..
‎عمتي .. احجي ولج
‎ياقوت .. قاسم
‎عمتي .. شبي
‎ياقوت .. من يوم الطلعت واجيتكم طردني وگالي اذا تردين تعيشين هنا اتطلگي واخذج اني ..
‎واني عفته ومشيت وتحملت انام بالشارع ولاانذل ..
‎وبعد ماوگفت على حيلي ومااحتاجيت احد ..
‎هـسا رجع ويريد يتزوجني ..
‎وطلع هو الجابر حاكم يطلگني ..

‎الحجية .. عزا العزاه هذا ماتاب واني لبالي السنين نسته ياقوت .. شكو عمة
‎الحجية .. يمة انتي جنتي صغيرة وحلوة وجسمج خشن وشبيتي بسرعه ..
‎شفت نضرات حاكم الج شني ..
‎ومرة مرته لزمته يعاين عليج بالغرفه ..
‎وتعاركت وياه ورادت تفضحة وهو گالها اني احبها واريد اخذها عليج واتزوجها لأن انتي خلفتج بس بنات واني اريد ولد يشيل اسمي ..
‎وهي تسودنت ولمت الناس علينا وعمج راد يسد الموضوع گال نخطبها الحاكم ..
‎وهو مامتزوج ..
‎وحاكم ماقبل لأن سهيله جانت تريدلة اختها ومخليتها بباله وحتى عندهم علاقه ..
‎بس من صارت سالفه قاسم ..
‎گلبت وگالت الحاكم اختي ماتريدك وتحبلها واحد وراح يخطبها ..
‎هو انقهر وضاج وتعارك ويانا ..
‎وتالي اجة وگال اني موافق اتزوج ياقوت ..
‎وبيومها قاسم ضاج وهج من البيت ..
‎عمج استعجل بالعرس وبأسبوع تزوجتوا ..
‎واسبوع واحنه ماندري بقاسم ..
‎ومن اجة صار قاسم ثاني وتغيير علينا كل احنه ..

‎ياقوت .. جنت طفله وماافتهم فتحت عيني على حب حاكم وماشفت غيرة بعيني ..
‎اتذكر اكو مشاكل وعمي وقاسم تعاركوا بس مااعرف شني السالفه وانتي ودتيني عند بيت سندس وگلتي مايصير تبقين هنا منا للعرس ..

‎معناتها الهذا السبب تكرهنـي سهيله والهذا السبب قاسم شد ويانا ...
‎وهسا شلون عمة انطيني حل ..
‎مااريد قاسم ولااريد جيتة الناس تاكل وجهي گامت ..
‎وعيون الناس ماترحم ..
‎الراح راح واني كبرت وهسا همي جهالي وبس .
‎كرهت كل رجال من ورى حاكم ..

‎الحجية .. يمة اني مااريد الناس تگول جان حاط عينه على مرت اخوه وماصدگ تطلگت وتعرفين هنا ولاية صغيرة وتضل تطلع حجي بكيفها ..
‎انتي اذا اجة مرة ثانية اطرديه ..
‎واني الي حجي وياه ومااخليه يوصلج بعد ..

‎ياقوت .. اوووف يعمة هم وانزاح من گلبي لو تدرين شلون جنت خايفه ..
‎الحجية .. انتي عليج بجهالج وبس وعوفي قاسم عليه ..
‎وهسا خليني اروح قبل لايرجع حتى احجي وياه ..

‎ياقوت .. وين رايحة هسا ابقي يمنا اليوم وباجر روحي
‎الحجية .. لايمة اذا مااحجي وياه هسا ماارتاح ..
‎واني من باجر اجيب هدومي واجي يمج هنا ..
‎الغلط مني عفتكم وحدكم ..

‎هذا حجينا طلع امير كله سمعة وضاج وگام يصيح وحلف اذا عمة جبرني يكتله بالگوة هديته وگتله يمة بيبيتك راح تحجي وياه وتجي تعيش يمنا هنا يعني مايگدر يسوي شي ..

‎ارتاحيت من عمتي عاشت عدنا ..
‎مر كم شهر وقاسم مايجي واذا اجة عمتي تطلعله وتطردة لو تگله تعال شوفني وروح لاتطول ..
‎وحسيته نسى الموضوع بعد ماحجت عمتي وياه ..
‎وجهالي داوموا ..
‎وامير فرحان لأن كبر وصار بالمتوسطة ..
‎وعلي وحيدر ودرة هم فرحوا لأن كبروا وتقدموا سنه بالمدرسة ..

‎من يطلعون الجهال للمدرسة نگعد اني وعمتي بالطارمة هي تشنگ العجين وتلوثه بالطحين ..
‎واني اخبز .. هيج صاوت اسهل عليه ..
‎عمتي صح جبيرة بالعمر بس قوية ..
‎وحياتي تغيرت لأن هي موجودة عبالك امي يمي تخاف عليه وعلى جهالي ..
‎والعصريات تجي ام احمد والجيران يمنا لأن يحبن عمتي ونسوي جاي وضحك وسوالف ..

‎بس ام احمد ضوجتني بسالفه من گالت احلام حامل وبطنها كبرانة وحاكم شلون مدللها وحتى اشترى سيارة علمودها ياخذها ويجيبها للدوام ..

‎منين جاب الفلوس وهو خلص عمرة يبجي ماعندي ..
‎بحياته مادللني من احبل ولايهتم ..
‎وهسا عايش حياته وي مرته وببيت ابوي وراح يصير عندة جهال وينساني ..
‎واني خلصت عمري اشگى واتعب ومحد وگف وياي ..
‎بس من اشوف الناس والجيران واولادي گبالي يلعبون وعمتي يمي ..
‎احمد الله واشكرة ..
‎واني افكر بكل حياتي المرت ومعاناتي ..
‎انفتحت الباب ودخلت علينا سهيله ..
‎استغربت بجيتها ..

‎سهيله .. وين هاي المطلقه السا…. ام الزلم .. ماحوت رجلها وتريد تاخذ رجلي ..
‎صفنت عليها ووجهي اصفر .. جيراني كلها گاعدة وتسمع
‎عمتي .. سهيله تأدبي ولج وروحي على بيتج ..
‎سهيله .. مااروح اريد الناس كلها تعرف حقيقتها وانتي يالعجوز اگول شعندج گاعدة هنا وعايفه بيتج وبناتج تالي تردين تطبخيها من وراي وتاخذيها القاسم حتى تكوشن على البيت واني وجهالي ننطرد ..

‎سهيله تحجي واني اخرمش بخدودي ..
‎جهالي واگفين ويتفرجون وامير يصيح عليها ويگلها امي ماتريدة وطردته ..

‎احس روحي رخيصه گدامي جيراني والناس الغربه ..
‎مااتحملت ورحت للغرفه دخلت والطم وابجي ..
‎واسمع صياح سهيله وعمتي وحدة ترد على الثانية ..

‎من راح الصوت اجت عمتي وگالت ..
‎يمة ليش تشردين وتستحين وتبجين .. انتي مالج ذنب واشرف من هاي العايقه لاتنزلين راسج ..
‎المطلگة مو عيب ..
‎لأن انتي صاينه بيتج وجهالج وتشتغلين ومعيشتهم بالحلال ..
‎بس الكاتلني هاي شلون درت ..

‎قاسم .. اني گلتلها يمة ..
‎الحجية .. سود الله وجهك ولك مرتك فضحت البنيه بالمنطقه وانت فرحان لأن گلتلها ..
‎اني مو گتلك جوز منها ولاتفكر بيها ..

‎قاسم .. گتلج اي يس ماگتلج بطلت اتزوجها جنت منتضر العدة تخلص وخلصت ..
‎واني حجزت غرفه الها وگلت السهيله لو توافق لو اطلگها وماتحصل شي مني ..
‎وحتى اجرت بيت السهيله وجهالها يعني مااقصر عنهم واذا على الناس من اتزوج ياقوت وحدها تسكت بعد تصير حلالي ..

‎امير .. مو بكيفك امي ماتريدك اطلع برة اطلع لااشتكي عليك ويضرب بي ..
‎ياقوت .. انت ماتحس جاي اگلك مااريدك عيب عليك تستغلني لأن مالي احد ..
‎اكو قانون واشتكي وهسا اطلع وجفينا شرك وشر مرتك. مو فضحتوني گدام العالم ..

‎قاسم .. القانون التحجين بي اگدر اخذ ولد اخوي . كم فلس الحاكم يطالب بيهم وتبقين وحيدة ..
‎اذا تردين مصلحة ولدج وتعيشين ملكة اقبلي واني باجر العصر اجيب سيد واقد عليج واخذج للبيت انتي والجهال وامي ..
‎لمي غراضج وهذا السكراب كله عوفيه اشتريلج اغاته ..

‎طلع ببرود وعمتي تصيح عليه وتگله اتبرأ منك اذا سويته وهو ولاعبالك ..
‎امير تخبل وحلف ياخذ سجينه ويكتله ..
‎مااتحملت وضعفت ..
‎مليت من الاستسلام وياهو اليجي يمشي كلمته عليه ..
‎گلتلها عمة اذا قاسم جبرني وجاب سيد صدگ ..
‎اني احرگ روحي ..
‎ويبقون جهالي امانه عندج ..
‎لاتخلين واحد يضربهم ويأذيهم ..
‎درة تحب شعرها لاتخلين واحد يگصه ..
‎وامير حساس لاتذلوه ..
‎علي فقير ويتقشمر لاتخليه يطلع وحدة ..
‎وحيدر مشيطن ويسوي مشاكل ديري بالج عليه ..
‎اني احجي وابجي وعمتي تبجي وياي ..
‎وولدي يفتهمون وعرفوا شأحجي ..
‎تخبلوا ويصيحون ويتوسلون مااعوفهم ومااسوي شي بروحي ..
‎درة تگلي يمة والله اساعدج واشتغل وياج وعلميني على الخبز والعجين مااتعبج بس لاتعوفيني بلا ام ..

‎ماردت واحد يكسرني فضلت الموت ولاواحد يدنس سمعتي ويجبرني اسوي شي مااريدة ..

‎مسحت دموعها عمتي وگالت .. يزي ولج گطعتي گلبي
‎مادامي عايشة مااخلي واحد يجبرج ويشوه سمعتج ..
‎صار سنين ضامة عنج وكله بسبب عمج ..
‎حلفني ولزمني شباك الامام ..مااگلج ..
‎وضمينا عليج كل هاي السنين ..
‎بس هسا ماكو واحد يحميج غيرة ..
‎اني بعد كبرت ومالي كلمة على قاسم ..

‎مسحت دموعي وصفنت بوجهها .. منو عمة شني السالفه فهميني ..

‎عمتي .. خالج ..
‎ياقوت .. خالي . اني عندي خال
‎عمتي .. اي عندج خال ورادج من ماتوا اهلج بس عمج طردهم وهددهم وماقبل يسألون عليج ..
‎وحلفني وهددني بالطلاگ اذا جبتلج سيرة ..

‎ياقوت .. تحجين صدگ عمة بعد كل هاي السنين تگليلي عندج خال .. وانطاج گلبج يعمة تشوفين حالي والدنيا تلط بية من مكان المكان وماتگليلي ..
‎وهو شنو من خال اذا مايسأل على بنت اخوه ..

‎عمتي .. جنتي صغيرة وماتتذكرين واصلا ماتعرفيه بس اني شفته من اجة راد ياخذج ..
‎هيبه وشخصيه وشيخ .. ومن شاف اهلج وعمامج واسلوبهم ماراد يسوي مشاكل بس انطانه عنوانه اذا فد يوم احتاجيتي شي ..

‎اسمع عمتي ومدري اضحك ومدري ابجي ..
‎ياقوت .. وهسا شسوي اروح شأگله وين اعرفه ويعرفني ..

‎عمتي .. ماعندج غير هذا الحل لازم الفجر تاخذين جهالج وتطلعين ..
‎اني مخليه الورقه بجوزداني من زمان ..
‎وهو گال بيته بالدوانية قريب على ابن الكاظم مايتيه ..
‎يمكن اسمة شيخ مجبل لو مرزا ماادري ..
‎هاج الورقه وشوفي ..

‎عمتي تحجي واني مامصدگة .. سبحانك ياربي وين جنت وين صرت ..
‎بجيت وطلبت الله يخلصني من هالمصيبه وكلها دقايق وانحلت ..

‎ياقوت .. عمة وانتي ماترحين ويانا ..
‎عمتي .. لا يمة روحوا انتو واخلصوا من هالناحية الگشرة .. واني راح ابقى هنا واضيع غيابكم حتى محد يندلكم ..
‎اذا رحت وياج حاكم وقاسم مايعوفوني وراي وراي يبقون بحجة امهم وبأسمي حصص مايعوفوني .
‎روحي يمة مودعه بالله وسرج ومكانج وياي الحد مااموت

‎بجيت وحضنتها .. وج يمة يعني مااشوفج بعد ..
‎عمتي .. هذا ربج القادر خلاني اگطع حلفي واحجي هو القادر يجمعنا بيوم من الايام ..
‎اني ماانساكم يمة وراح ابقى ادعيلج انتي وولدج العمر كله .. اذا الله خلاني عدله ..

‎جهالي فرحوا واني الم بغراضهم ..
‎فكرت بالمدرسة والبيت وغراضي ..
‎عمتي طمنتني وگالت انتي استقري وكلشي ينحل ..
‎انتي بس خابري ام احمد وهي تجيني خليها تطمني ..

‎للفجر واني وياها ماتفارگنا ..
‎اني ابجي وهي تواسي عليه ..
‎اني ماشفت امي هواي ولاشبعت منها ..
‎بس عمتي صارتلي امي وعوضتني عنها شلون راح اگدر على فراگها ..

‎صار الفجر اتفقنا وي ابو احمد يجي ياخذنا بسيارتة لأن سواق الگراج يعرفون قاسم وحاكم وخاف يدلوهم عليه

‎ودعت عمتي وام احمد بس همة الي يعرفون اني رايحة للديوانية ..
‎وعمتي شالت فلوس وخلتهن بإيدي وگالت تحتاجيهن ..
‎وركبنا السيارة وطلعنا ..
‎وجانت عيني على كل مكان بولايتي وذكرياتي العشتها لحد ماطلعنا ..
‎ولهنا خلصت اول مرحلة بحياتي اني وجهالي وانتقلنا المرحله جديدة وناس جديدة ومانعرف الزمن شضام الياقوت بعد وشنو تشوف اكثر من الشافته ..

‎بقلمي_الكاتبة_شمس
‎يتبع ....

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري