30-11-12, 07:22 PM
| #71 | ||||
| كاتبة قسم قصص من وحي الأعضاء 
|  ******** عليان جالس مع عليا :سمعت انتس طالبه الطلاق تدرين عاد يا عليا اني عتبان عليس وبالحيل بعد قالت عليا وهي عارفه وش بيقول : ليه يا عليان عتبان علي عليان : رفضتي تتممين الموضوع ولا حتى سألتيني او شاورتيني عليا: تكفى عليان اللي فيني مكفيني كافيني اللي فيني محد حاس فيني من حقي ارفضه ومن حقي اعافه هو عافني 18سنه عليان : هدي وانا اخوس صح كلامس من حقس ترفضينه لو منتم مملكين لس حق ترفضين لو ماكل الناس عارفه انكم متزوجين وهم الان متوقعين نعزمهم على زواجكم مو نعلن عن طلاقكم الحين اسمحي لي بهذي الكلمه اكيد بيقولون عافها ولد عمها اكيد ان فيها بلا عليا دمعت عيونها بقهر : ماعلي من احد ابدا سمعتو وطلعت من المقلط اللي جمعها بعليان *********** صباح مدرسي بارد تتخله غيوم داكنه تبشر بأمطار الخير رياح خفيفه تحمل معها ريحة الحيا فايزه صاحيه من صلاة الفجر واشرفت على تجهيز الفطور لسند والصغار ماجد وفارس اما منوله الصغيره فكانت نايمه مشطت لماجد شعره : ها حبيبي يالله نراجع النشيد ماجد : خالتي اخاف اني اغلط فايزه :لا ياحبيبي يالله انت امس حفظتها تمام بدا ماجد يسمع باسته على راسه : ماشا الله عليك هذاك حافظ فارس جالس معاهم بس نايم على الكرسي طلع سند من غرفته لابس ومستعد للدوام :صباح الخير ردت بهمس وماجد راح وحضن ابوه وجلس يفطر بصمت قالت بخجل بعد محاولات : احم اقول ابو ماجد ممكن توديني للمدرسه سند من دون ما يرفع نظره : ابشري اذا جاهزه مشينا باغتها بعدها مباشره : افطرتي ؟ هزت راسها بلا قال وهو يناظرها : ها افطرتي قالت : لا شربت بس شاهي قال سند : لا تعالي على الاقل شابوره قالت فايزه وهي تغطي فمها : لا مشكور ما اقدر احط أي اكل بفمي الصباح تقلب معدتي علي طول اليوم وراحت تلبس عبايتها وتوصي الخادمه اللي لها كم يوم واصله ******** في غرفة المعلمات امنه وفايزه وعليا بعتب من امنه : ليه يا خبله رفضتي على ماسمعت عنه انه فيه خير وانه بوظيفه زينه عليا بزهق من الموضوع : ومع هالشي ما ابيه فايزه عارفه ليش رافضه عليا : لا تتعبين نفسس امنه هي ماتبي تتزوج ياسر ولا غيره هي تبي تجلس عند امها امنه : صدق عليا؟!؟! امتس في من يراعيها ابوتس اول واحد بيراعيها واختس منيره وعليان وزوجته اجل مسويه امتس حجه بلا دلع بس والله لااقول لمنيره واشيشها عليس راح عمرتس ألحقي عليه ياغبيه وجيبي لتس عيال لا تسوين سوات ابلا مزنه شوفيها لا ولد ولاتلد والرجال هج يدور العيال كثر اللوم علي وكثر العتاب من الكل وانا زهقت من هالسالفه ابو عليان في نقاش مع عليا :تقدرين تعيبين ياسر في دينه او خلقه هزت راسها عليا بصمت بلا قال :اجل ما لتس حجه ترفضينه انا ادرى بمصلحتس منيره بعد حوار مطول مع امنه بالتلفون توجهت لعليا في بيت اهلها وبدت معاها بهجوم :قسم بالله انس مدلعه شوفي ان تطلقتي منه مالس عن بندر شهقت عليا من كل قلبها :وع وع الله لا يقوله ردت منيره بكره لبندر : شوفيه مثل الكلب يتصيدس وانتي عارفه عقليات ربعنا ماللمطلقه جلسه الا يزوجونها وشفتي مأساة خالتي قمرا مع ابو ساري تنهدت عليا " طفشت طفشت من هالسيره والله ملييييت منيره سكتت عارفه الحين لايمكن تسمع منها طلعت وخلتها *********** ليل الخميس وصل ياسر في وقت متأخر من بعد صلاة العشا راح لبيته نزل اغراضه طلع مع باب بيتهم بيتوجه لبيت عمه وشاف منظر فجر الدم براسه قبلها بدقايق ام احمد كانت سهرانه مع قمرا عند ام عليان وخلاص بتروح لبيتها وهي طالعه مع باب الصاله ظربت رجلها بالباب وتعورت جدا لدرجة اصبعها انجرح وانكشط الجلد ركظت لها عليا :بسم الله عليس يا خاله ونزلت تشوف الجرح جلست ام احمد المسكينه و بعدها ضمدت لها اصبعها قالت قمرا: خليس هنا يا ام احمد شوفي منتي قادره تمشين قالت ام احمد وهي تتألم :لا يا وخيتي بروح بيتي ما اقدر اخاف يرجع احمد ويفقدني قالت قمرا لعليا: امرنا لله خلاص وصليها ياعليا لبست عليا عبايتها وطرحتها وبطرف الطرحه الخفيف غطت وجهها بما انه ليل وماحد بين البيتين المتلاصقين وصلت ام احمد وفتحت لها البيت البسيط اللي هو عباره عن حوش اسمنتي داير مايدور احواض زرع وعلب وتنك مزروع ووبيت بسيط عباره عن اربع غرف بمدخل كبير باب ألمونيوم فضي بطرف زجاجي يفتح على الصاله دخلتها لغرفتها وجابت لها مويه وتطمنت عليها :تبين شي يا خاله ام احمد : الله يرضى عليس ويوفقس يا بنيتي تبسمت عليا على الدعوه الحلوه وطلعت كان احمد توه واصل وسكران طينه يوم دخل مع الباب وشاف عليا وبلسان ثقيل :اووووه وين وين ياحلو كانت عليا للآن ماغطت وجهها بما انها في حوش ام احمد تفاجأت فيه انرعبت من طلعته فجأه بوجهها كان مرره قريب غطت وجهها بطرف العباه وقالت بصوت يرجف : وخر قال وهو مبتسم ويهز راسه : وإن ما وخرت وش بتسوين ما توقعت رده ابدا وعرفت انه اكيد ماهو بوعيه فاجأها مسك يدها وجرها له هي شهقت ودفته بقوه : يا حيوان بدى يفقد احمد اعصابه : من الحيوان وعطاها كف فاجأها فيه صرخت عليا بسرعه فكرت تهرب منه ما تضمن ردة فعله الجايه وبسرعه فتحت الباب خطت خطوه برى للشارع سحبها من يدها بقوه بيرجعها للبيت وهو متمسك فيها بقوه وحشيه صرخت فكيني يا كلب فكني رفعت عينهاوطاحت بعين ياسر اللي هجم على احمد بقوووه يا خسيس ياحقير ووجه له ظربه رمته في الارض وعليا معاه عليا من خوفها قامت بسرعه سحبها ياسر بقووه ناحيته ودفها على البيت انقلعي للبيت يالله وركز انتباهه لأحمد بشراسه بدون رحمه مسكه من ياقة ثوبه وسحبه لداخل حوشه وصك الباب بقوه ورصه على الجدار بعنف : شلون تحط يدك عليها ياحقير وعطاه بوقس على فمه ادماه : كيف تسمح لنفسك تتعدى على محارم جييرانك يا رمه قال احمد بلسان ثقيل : هي اللي جتني وهي اللي رمت حالها بين ايدي لكمه بقوه افقده وعيه و تر كه مرمي في حوشهم تفو عليك يا رمه تفوو على اشكالك وبهيجان راح لبيت عمه . . . . . | ||||
|  |
|
30-11-12, 07:28 PM
| #72 | ||||
| كاتبة قسم قصص من وحي الأعضاء
| عليا مسكينه بعد ما وصلت لبيتهم وانهارت بالصاله ماتقدر تمشي خلاص وعبايتها مغبره ووجهها وارم من كف احمد ودموعها تحرق خدودها مسوده من غبار الشارع شافتها خالتها :ياويلي وش فيس بسم الله عليس عليا بدت تبكي بصوت عالي مرعوبه من اللحظات اللي مرت فيها قبل شوي ما تخيلت في اسوأ كوابيسها انها ممكن تتعرض لموقف مثل هذا وزاد عليها ان ياسر هو اللي انقذها من هالمصيبه : اااااه ياخالتي. تكفين ألحقي على ياسر يتضارب مع احمد قمرا انفجعت وشو ؟؟ يا ويلي ولدي وطلعت من دون عباه بس طرحتها عليها الا ياسر في وجهها وضمها بقووه هي تتلمسه :وش صار وش فيك تنفس بقوهووجه احمروعروقه نافره : ابي اعرف هالحين وش اللي موديها لبيت هالسكران في هالحزه قالت قمرا :راحت توصل ام احمد تعورت عندنا وانا قلت لها توصلها يبي يهدا مو قادر منظرها وهي احمد يجرها لبيته يزيد بعصبيته وغيضه اعوذ بالله من الشيطان الرجيم وراح للمغسله وتوضأ عشان يهدا قمرا راحت تجيب له مويه تبيه يهدا جا ابو عليان ياسر متى جيت رد ياسر وهو يتنفس بهدوء يحاول يهدي نفسه :من شوي ياعم ي واقبل على عمه وحب راسه نزل عليان وشافهم وتوجهو للمقلط قمرا دخلت داخل وطمنت عليا وانتبهت لخد عليا الوارم :وش صار يا حبيبتي علمتها عليا وهي ترجف لازالت تعيش الموقف قالت لها قمرا اطلعي تروشي وانا اجيب لس كمادة بارده عندي خبره بالكفوف ما يبرد حرها الا الثلج جالسين بالمقلط وابو عليان ملاحظ على ياسر انه متوتر وعلى باله عشان موضوع عليا ما درى عن الموقف اللي صار وياسر سكت ماله داعي يحرق دم عمه ابو عليان: ياسر انا والله معاك وابيك زوج لبنتي وقادر على اني اغصبها بس ابي لا بدت حياتكم ما تبدى بالغصب وكسرة النفس سكت ياسر شوي وقال : ولا انا ارضى اني اخذها مغصوبه انا بس ودي اتكلم معها واعرف اسبابها يمكن اني اقدر اطمنها او اقنعها ابو عليان ناظر بعليان وقاله :رح ناد اختك قلها ابوي يبيتس ********* :بندر عاوزه اكلمك بندر منهمك يقرأ الجريده وكاسة الشاي بجنبه : هممم سعديه : هممم ايه؟؟ بؤلك(اقولك ) عايزه اكلمك عندي موضوع مهم بندر رفع راسه وتبسم : قولي يالله وش عندس سعديه جلست بجنبه ومسكت يده وشبكتها بأصابعها : بندورتي اقولك ولا تزعلش بندر : قولي ماراح ازعل كان رايق جدا سعديه : عايزه اروح اتعالج بندر تغيرت ملامحه : رحتي لكم دكتور يا سعديه؟؟ وكلهم قالو ما عندس مشكله سعديه برجاء: بس انا عايزه اروح عند الست اللي بتعالج ام فالح بندر بصرامه : لا حريم لا وطب شعبي لا سعديه دمعت عيونها : طب ليه ؟؟ حس بيا ربنا يخليك عايزه اكون ام بندر بغضب : وانا قلت لس لا تكونين ام !!!! الخرافات هذي ما صدقها ضررها اكبر من نفعها سعديه بدموع وصراخ : طيب سيبني اجرب هو احنا خسرانين ايه بندر قام بيطلع من الغرفه بس قال : الموضوع هذا منتهي ولا عاد تفتحينه مره ثانيه وطلع وصفق الباب وراه وسعديه انهارت على السرير تبكي : عاوزه اكون ام يانااس ده ابسط حقوقي ********** نزلت عليا وتوجهت للمقلط وبالها كله عند ابوها اللي اكيد عرف بتهجم احمد عليها ما توقعت ولو لثانيه ان ياسر موجود مع ابوها نزلت بجلابية البيت البسيطه متماوجة الالوان بتطريزه خفيفه عند الصدر والاكمام ماسكه من الصدر والخصر وواسعه من تحت بقصة نص كلوش والشعر مفتوح ومبلول بعد الترويشه ومنشفتها فوق راسها تحاول تخفي خدها عن ابوها دخلت للمقلط وهي تقول : سم يابوي بغيتني وتفاجأت بوجود ياسر اللي جالس ويناظرها وما على وجهه تعابير ارتدت راجعه بس ابوها نادها : تعالي يا عليا وقفت برى وهي تتمنى تنشق الارض وتبلعها جاها ابوها وسحبها من يدها ودخلها وجلسها بجنبه مقابل ياسر تمسكت بمنشفتها اكثر وكأنها حجاب قال ابوها : الحين ابيكم تجلسون مع بعض وتتفاهمون وناظر بعليا وبهمس حنون : عطي نفسس فرصه وامس خليها خارج حساباتس طلع وخلاهم مع بعض نزلت راسها اكثر ما تبي تشوفه ومنحرجه منه ياسر بهدوء : شلونس عليا عليا بإحراج :الحمد لله ياسر : انا اقصد بعد اللي صار قبل شوي عليا دمعت عيونها تحس رجفة عظامها اللي تشاغلت عنها بطلب ابوها رجعت لها وقالت : من فضل ربي انك جيت بالوقت المناسب الله يجزاك بالخير ياسر : الحمدلله ربي ارسلني بهاللحظه والا دخلتي في مشكله كبيره سكتت عليا ما عندها شي تقوله قال ياسر : اظن انتي عارفه وش ابي منس هزت عليا راسها بلا قال ياسر :ابي اعرف اسباب رفضس لي قالت بوضوح : انا وانت ما ننفع لبعض انا اكرهك من سنين وانت نفس الشي ومن زمان وانا اوعد نفسي اني لازم اقولها لك كرهتني حياتي وحنا صغار وعيفتني الدنيا وحنا كبار ما ابيك واظن هالسبب يكفيك ""لامت نفسها بداخلها كيف قالت هالكلام قالتها بنبره قويه بس رجعت تعزز لنفسها دام هدفها امها ورعايتها خلتها تكمل:ما اظن انك ترضى تاخذ وحده ماتبيك ياسر تبسم ابتسامه صفرا وقال : انتي على ايش شايفه نفسس ان كنتي بتحاسبيني على زمان انتي اول من يتحاسب وان كنتي بتحاسبيني على زواجنا وحنا صغار ماهو انا اللي تحاسبيني حاسبي عمي اللي رضى اما الحين مالس خيار بنت عمي وطلاقس عيب بحقي عقب هالسنين قبل ما يكون عيب بحقس سامعتني و انا ما اشوف اسبابس كافيه دلع بنات ومع الايام بتنسينه ماتت غيض منه ومن ثقته بنفسه بس فاجأها يوم فتح باب المقلط نادى : يا عمي جا ابو عليان ونظراته كلها استفسار يبي يعرف وش صار ووش تقرر بس ياسر قال :بعد اذنك ياعم وغمز بخفيه لعمه :ابي اشوف خالتي ابي اسلم عليها قال ابو عليان وكل علامات الترقب على وجهه : حياك ياولدي روحي يا عليا شوفي امس صاحيه والا لا وطلعت عليا بسرعه لغرفة امها وهي تغلي من الغيض ما تعرف وش يدبر ووش قصده من اللي قاله واللي بيسويه بس احساسها يقول انه ماهو ناوي خيررر دخلت غرفة امها لقت قمرا عندها تسمع اذاعة القران وكانت امها صاحيه بس من شافتها صدت بعيونها عن عليا قالت بمراره وعذاب : يمه ياسر بيدخل عندس تغطت قمرا بشرشفها ودخل ابو عليان وياسر نزل ياسر لخالته وسلم عليها بود وإبتسامته الحلوه وجلس على طرف السرير وجهه لخالته وظهره لعليا وعمه وامه وقال : باركي لنا يا خالتي بعد يومين دخلتي انا وعليا قراءه ممتعه لكم وردود حلوه لي حابه اقول لمتابعين الانستغرام في قصه قصيره مصوره حسابي هناكa2zaz اتمنى تشرفوني هناك | ||||
|
| |
|
02-12-12, 01:41 AM
| #73 | ||||
| نجم روايتي وأميرة حزب روايتى للفكر الحر وفراشة الروايات المنقولة 
| صباح الورد ام رنو ........تسلم ايدك ياقلبي ...... انا مع البنات انو البارت قصير بس اكيد لانك مضغوطة لاني من خلال متابعتي لروايتك زهرة ضامية كانت بارتاتك اطول وكنتي بعض الاحيان تنزلي اكثر من بارت على حسب الظروف ..شنسوي الاحداث بدت تحمى واعصابنا معاها متشوقة اشوف هل بتنقلب الاحداث بشكل غير متوقع وايش ينتظر ابطالنا ....الله يسهل امورك يارب حتى تقدري تطولي البارت عليا وياسر عليا تتعذر ب18 سنة الي غاب فيها ياسر وهجر اهله فيها والا هي من هالسنين متى نضجت وصارت بسن مناسب للزواج طبعا مو كل ال18 سنة وهالشي كان من صالحها درست وتخرجت وتوظفت ..... حتى لو ياسر ماغاب هالسنين بالبداية كانت لازم تنتظر كم سنة علشان تكبر وتفهم الحياة وماادري لما كبرت ونضجت اكيد صار الحادث لامها يعني ظروفها كانت موكويسة لو ياسر جاها قبل ست او خمس سنين لانو بيكون الحادث صار واختها ماتت وامها انشلت طيب لو تطلقت على قولتها هي موضامنة عمر امها يمكن تطلق بيوم وامها تموت بنفس اليوم يعني عذرها مو من صالحها وغير كذا امها زعلانة منها حيل لو ماتت وهي زعلانة شبتفيدها تضحيتها انا معاها صعب جدا تترك امها ولو كانت بنفس المنطقة اهون مو من بعد بيت خالتها عنها لا والمشكلة حتى قمرا بعد هالسنين بتنجبر على الغربة يمكن وجودها يخلي عليا تسيطر على عنادها لانها بتخجل تسوي حركات سخيفة قدام خالتها ولا بتقدر تنام بغرفة بعيد عن زوجها مع اني اعتبر هالحركة سخيفة من بعض الزوجات لانو الشرع يحاسبهم عليها وهي بنت ناضجة مو صغيرة لو تطلقت الناس مابترحمها الحين تقول مو مهم بس لو عاشت هالظروف بتتعب نفسيتها .......عنادها ماله حل الا اجبارها على اتمام الزواج ووضعها امام الامر الواقع بس حتى انا مستنكرة انتقالها لجدة يعني هي موظفة وحابة شغلتها مو من حق ياسر يحرمها من هالشي بدون ارادتها ويضيع سنين تعبها ودراستها وبعدين يومين شبيسوون اقل حاجة يخليها بوقت اجازة المدارس والبنت تجهز لعمرها هو خلاص حطها امام المدفع ماتقدر تنكر ومافيها شي لو اعطاها وقت تدبر امورها وتنقل لجدة وفعلا لو تطلقت بيلصقها ابوها ببندر فياسر افضل لها وبيجي اليوم الي بتحمد ربها على انها انجبرت على اتمام الزواج بس تترك العناد لانها مو طفلة هي بنت ناضجة لو بشي يخص حقوقها ماقلنا شي تدافع عنها وبقوة بس اذا الحبل مرخي لاتدخل حالها بدوامة مثل المراهقات الي تصرفاتهم متهورة بندروه وسعدية دام ماتشكي من شي وهو سبق وجاب عيال من حقها ينحرق قلبها على الحمل لانو عندها امل كبير وبعدين دامها مو مقصرة معاه ليش مايخليها تجرب مو خسرانة شي اعتقد بعد زواج عليا بندروه بيزودها مع سعدية واتمنى من قلبي تسافر عنه وخليه ينقلع لين يحس بقيمتها هو اختارها وتزوجها وحصة صار لها سنين ميتة خلاص اجل يرضى بنصيبه ودامه ماشاف منها اي شي ينفره منها يخاف الله فيها دام عندها جمال وتعرف تلبس ومو مقصرة بواجباتها شيبغي يعني عليا ماهي حصة لايمشي ورى سراب مابينفعه فايزة وسند مازالت حياتهم هادية مايعكرها اي شي ومازال سند محترم ارادة فايزة بس كل ماتقدمت الايام والشهور راح يلتفت لها سند ووالرجال الي داخله بيتحرك وبيكون له متطلبات مثل اي زوج واتمنى فايزة وقتها تكون لانت شوي وتعطي حالها فرصة لانها انثى وتستاهل تعيش حياتها ......اتمنى حياتهم تظل للاخير معتمدة على التفاهم والعقلانية على الاقل مانعيش مع كل الابطال بينهم حزازيات ومشاكل في انتظارك ياقلبي | ||||
|
| |
|
08-12-12, 07:48 PM
| #78 | ||||
| كاتبة قسم قصص من وحي الأعضاء
| السلام عليكم ورحمة الله وبركاته كل الشكر لكم يامن قرأتم حروفي وكل الامتنان لكم يامن سطرتم اروع الردود للاسف ضيق الوقت يمنعني من الرد لكن والله سعيده جدا جدا بها اسعدكم الله دنيا واخره مثل ما تسعدوني بردودكم 10 قمت من النوم وبالي خالي من اية تفكير يمكن هذا الهدوء اللي قبل العاصفه مع ان العاصفه مرت بي من يومين يوم قال وابتسامه تملى وجهه :باركي لنا يا خالتي دخلتي انا وعليا بعد يومين حسيت انه صفقني بأقوى كف في وجهي ماقدرت حتى اتنفس لين خالتي قمرا ضمتني بقوووه وهي تقول : مبروك حبيبتي دموعي تحجرت في عيوني ياكبرها غصتي حسيت بطنين ماعدت اسمع شي اشوفهم صحيح بس مفصوله تماما عن عالمهم مدري كيف وصلت غرفتي اخر شي اذكره نظرته لي نظره لئيمه هلت علي الاقتراحات والخدمات كلهم يقولون مافي وقت ولازم اجهز بأسرع وقت بس كنت جااامده مع الكل لين شفت عيون امي امي يا ناس مبســــــــــوطه والله من زمان ما شفتها تبتسم ياربي ان كان هالشي بيوريني ابتسامة امي لآانساق فيه ولو به موتي جلست معها وقلت وانا مبهوره باللي اشوفه : يمه انتي فرحانه لي صح يمه والله ما اكسر فرحتس رضاس يمه عندي بالدنيا ومافيها ******* :بقولك ايه يا منيره انتي مش حتطلبي مني اية مساعده انا عارفاكي بصي انا بعز عليا والله كأنها اختي الصغيره وعاوزه اخدمها فقولي من الاخر ايه اللي عاوزاني اساعدك فيه الوقت ديق ومش حتلحقي منيره بإمتنان : والله ما تقصرين يا سعديه شوفي انا امس رحت انا وخالتي واخذت لها اهم الاشياء بس باقي الفستان في محل يمدحونه خذي نسرين وخذي اكبرمن مقاسها برقم انا اثق بذوقس سعديه : انتي تأمر ياجميل وانا في ديك الساعه لما اخدمكو دنتو اهلي وحبايبي ********** :لا صدقيني والله ا ن شافته لترميه في وجهس انا اعرف خالتي لايمكن تلبس هالموديل سعديه وبمكر : ههههههه ومن قالك اني حخليها تشوفو دا هيا حتدبس بيه وحتلبسه غصبن عن عينها دا انا سعديه والاجر على الله نسرين : انا قلت لس لا تقولين ما علمتس بترميه في وجهس سعديه وهي تبتسم : انتي اطلعي منها وهي تعمر مالكيش صالح اتفقنا نسرين بضحكه : اتفقنا سعديه :بصي يا بت يا نسرين اوعي تجيبي سيره قدامها انا عاوزه اصدمها يوووه يقطعني وهي تحط يدها على فمها وبضحكه افاجأها ********* يا شين السوق لارحتي تركظين ورجعتي تركظين والمشكله للحين وراي كم مشوار قمرا: ههههه هالحين بتقنعيني انس ما انتي مبسوطه بهالدوجه بالسوق منيره : ههههه الا والله مبسوطه مافي احلى من زحمة تجهيز عروسه قمرا : العروسه عساها قاست اللي شريتيه لها منيره : لا طبعا يا خالتي انا احطه عندها وهي تقول زين خليه اشوفه بعدين والاكياس مثل ما احطها مثل ما القاها ولا ناظرت فيها الا يا خالتي ياسر ما قالس وش صار بينهم وشلون وافقت عقب ماكانت رافضه قمرا : الا سألته وما قال الا ان الله هداها ************* التجهيز كان من الكل تخيلو زواج في يومين يالله يمدي ومن فضل ربي لقوا القاعه غير محجوزه وتولى ابو عليان وعليان عزيمة الناس للزواج ******* ادري اني لعبتها بخبث وادري انها لا يمكن تقول غير اللي قلته سويت اللي ابيه ارضيت امي بزواجي وارضيت عمي بإكمال اللي بداه بس زعلتها هي غصبتها وحطيتها قدام الامر الواقع وادري انها لا يمكن بتعديها بالساهل بس وش بتسوي مثلا بتزعل لها يومين وبترضى من اصبح الصبح رحت البنك وسحبت مهرها وسلمته عمي وكلمت سلطان ابيه يحظر زواجي هذا اخوي اللي ما جابته امي ************* اليوم زواج صديقتي وابي احضره لو سمحت سند : طيب مافي مشكله فايزه بتردد : ابي اروح عند امي ومن هناك ابي اروح للعرس سند : بتشترين لها هديه قبل ما تروحين فايزه : لا بعطيها فلوس وهي تشتري اللي تبي سند : اذا تبين رأيي انا اقول اشتري لها هديه الفلوس بتصرفها وبتنساها مع الايام اما الهديه كل ما تشوفها بتتذكرس فيها فايزه : صحيح بس الزواج بالليل ومايمديني اشتري شي سند بعد ماناظر في الساعه : تبين اوديس محلات الذهب قبل لا تروحين عند اهلس ناظرها ينتظر منها جواب فايزه كانت محرجه منه ما عندها رد عرف انها محرجه منه قال :يالله قومي هالحين ألبسي عباتس تنحت فايزه ضحك سند : يالله ترى هالعرض لمدة عشر دقايق بسرعه تحركت فايزه ولبست عباتها وطلعت له بالصاله قالت انا جاهزه ******** رحت لبندر لازم اشو ف ردة فعله من بعد ماسمع عن زواج ياسر وعليا وما تخيلته بتكون هذي ردة فعله شفته واقف مع عليان وياسر مع العمال يعلقون لمبات العرس ووعقود الاناره لخيمة الرجال واشوفه يضحك ويعلق على ياسر وبقلبي اقول الله يستر منك يابندر ***************** مرتاح الحمد لله احس اني فرحان لهم وفرحان لنفسي اني بترك هالهم اللي عقدني لي كم ليله اترجى ربي وادعيه ان الله يصرف عني هاجس عليا والتفكير فيها من كلام بدر لي قبل كم يوم وانا الضيق خانقني بس ربي مسح على قلبي الراحه اللي احس فيها عقب كل مره ادعي ان الله يصرف عني التفكير بعليا وهذا يزيدني اصرار اني فعلا ما افكر فيها وادعي لها بالتوفيق *************** | ||||
|
| |
|
08-12-12, 07:49 PM
| #79 | ||||
| كاتبة قسم قصص من وحي الأعضاء
| صحيح امي ماتقدر تقوم معاي وتفرح فيني مثل كل ام لكن انا بخليها تشوفني وانا اتجهز واتزين قدامها كل شي بيكون لامي وتحت نظرها وبخلي اللي مايتسمى ياخذني من غرفتها وافرحها فيني زي ما تتمنى دايم البارح جت ام احمد السودانيه ونقشت ايديني وجت بتنقش رجولي رفضت قلت خلاص يديني تكفي منيره ماخلت كلمه ما قالتها انتي عروس ولازم من هالكلام بس ما علي منها نسرين معي من بعد الغدا قالت : خالتي وش فيس ساكته مرررره ما توقعتس بتستسلمين كذا وانتي لس سنين تتوعدين وتهددين قلت لها بعد ما عطيتها نظره : انا عشان امي بس ماشيه بهالمهزله انحرجت مني وحبت راسي قالت طيب :شفتي فستانس قلت لها : لا قالت : علووي لازم تقيسينه يمكن ضيق يمكن واسع قلت لها بقرف : بلبسه لو هو خيشه واسعه فكيني بالله تبسمت نسرين دخلت الريم وقالت جت الكوافيرا وين تبينها تجلس عليا : هاتيها هنا عند امي شوي اتصلت على البيت فايزه وقالت بتمرني وفعلا خمس دقايق وهي عندي ياحياتي جايه تبارك وتقدم هديتها قبل لا تمشي قالت لي : حاولي تتقبلينه عشان تعيشين قلت لها :يا فايزه انتي قدرتي تتقبلين سند ؟؟ ردت علي بأسى : انا غير وضعي غير وضعس وتراني احاول المهم يا قلبي حاولي والله يوفقس ويسعدس وطلعت من عندي رجعت اكمل التجهيييز و جا وقت لبس الفستان وكان صاعقه لي وماكان عندي الامنيره خالتي والريم ونسرين في القاعه :منيره انتي من صدقس جايبه لي هالمسخره وتبيني ألبسه ضحكت منيره من كل قلبها : هههههه محد قالس ما تشوفينه قلت بعصبيه بس بصوت واطي عشان امي : دبريني هالحين هذا شلون بلبسه ببرود قالت منيره :عااادي فكي ازاريره والبسيه قلت لها وانا ودي اخنقها :بالله ! كذا ينلبس طيب واذا بفصخه من بيفك الازارير ؟؟ قالت منيره بخباثه وإبتسامه عريضه : يعني مين بالله ؟؟ ويالله بسرعه البسي ودفتني قلت لها متأكده ان هذا انتي اللي شريتيه ؟؟ مستحيل يكون ذوقس !! ضحكت منيره وقالت : ههههه عرفت ان سعديه بتجيب شي حلو بس تفاجأت بظهره وحمالاته شهقت وتفاجأه : منييره يا دبى والله لااردها لس انتي وسعديه وطلعت دموعي قهر شلت الفستان المصيبه ورحت البسه الحمد لله ان الطرحه ثقيله وطويله والا لو ايش ما اطلع بذا المنظر بس هو للحقيقه فستان جدا حلو ابيض من قطعتين الصدر بحمالات رفيعه جدا ومشغول كريستال كثيف ويبدا يخف الى الخصر والظهر شفاف وكله ازار صغيره والتنوره ذيل سمكه وبكريستال كثيف بالاطراف ناديت منيره تقفل الازرار بعدها اول شي سويته رحت سلمت على امي وخليتها تشوفني دمعت عيونها ادري بها فرحانه لي قلت لها وانا ارجف: يمه الله خليس بلاها الدموع الحين اخرب كل شي واقعد اصيح والا اقول يمه تراني بهون وانا ابتسم لها دخلت منيره جايبه المبخره : كللووولييييش ماشاء الله تبارك الله روعه يا عليا تهبلييين تعالي اوقفي هنا خليني اعطرس وابخرس امسكي الطرحه فوق خليني ابخر شعرس قلت لها :خلاص خنقتيني خلاص يكفي قالت لي منيره : اقول عليا اجيب لس سندويشه صغيره انتي ما اكلتي شي كشرت وقلت : لاا لا ما ابي بس ابي مويه ذبحني العطش منيره : ابشري وبجيب لس شي تاكلينه غصب قلت :لااااا ما اقدر معدتي احسها مقفله بعد ساعه دخلت علينا خالتي قمراا وعليان :ماشاء الله تبارك الله الف الف الف مبارك يا حبيبتي وضمتني وصارت تقرا علي كنت بحاجه للقراء ه ابي قلبي يتطمن عليان عند امي ماسك يدها ويغني لها ويلو يام العروسه الله يتمم هناكي منيره لبست عباتها وخالتي تغطت وانا تجمدت اطرافي عرفت ان ياسر بيدخل هالحين كنت باهرب واطلع من الغرفه بس جمدت قلبي فرحة امي وابوي تستاهل هالتضحيه وهالديكور شوي دخل ابوي وفز له قلبي كاشخ ببشته البني وشماغه وعقاله اللي ما يلبسه الا نادرا واليوم لبسه عشاني فرحان فيني بعـــــــــــــــــد قلبي يا بوي ناظرني وتبسم وقال : : تفضل : سلم برسميه وانا رديت بقلبي لو ماهو واجب ما رديت ابوي اقبل علي وتعلقت فيه ابي اتطمن بحضنه قلت له بهمس : راضي علي يابوي قالي بنفس الهمس : كل الرضا يا عيني حبيت يده وراسه قلت له : يا ابوي هذا راس مالي تبسم برضا وقال : الله يوفقس يا حبيبتي ووقف جنبي ياسرسلم على امي وحب راسها وايدينها والتفت لي وتوجه لي وانا من بعد ما سلمت على ابوي جلست وحطيت رجل على رجل وقعدت اهز رجلي بتوتر اثر الكلام غير والواقع غييير قالت خالتي: يالله يا ياسر سلم على عروستك واقبل علي ماقمت من مكاني ولا طرى لي بس عدلت جلستي صافحني وجذبني بيدي ووقفت له قال : مبروك يا بنت عمي قلت وانا اضغط على الحروف :الله يبارك بك جلس وانا جلست ابوي قام يعطي ياسر من الوصايا وهو يقول :عليا بعيوني لا توصي ياعم وصها هي علي والتفت يشوف ردة فعلي قالت خالتي: لا والله انت اللي نوصيك عليا ما تطلع منها العيبه ابدا ضحك وقال :كذا يمه ترا انا ولدس قالت خالتي : كلكم عيالي قال :مشينا ووقف وطلع برى الغرفه هو وابوي وعليان وانا توجهت لامي وحضنتها بقوووه وقلت يمااااه ما ابي ارووووح معاااه وانهرت ابكي على صدر امي ************* | ||||
|
| |
|
08-12-12, 07:49 PM
| #80 | ||||
| كاتبة قسم قصص من وحي الأعضاء
| ************* بعد ما شريت الهديه لعليا وصلني سند للبيت ورحت وصلت هدية عليا وهناك يقالي بانصح عليا ورجعت لي النصيحه حاولي تعيشين وتتقبلين سند ناظرت نفسي بالمرايه وهزيت راسي الفكره مرفوضه تماما كملت لف شعري بالفير وتزينت وتمكيجت ولبست فستاني العودي ورحت للزواج مع ابوي انبسطت كثير غيرت جو بصراحه بعدالعشا سمعت ابوي ينادي على اسم عيلتنا ووادعت صديقاتي ولبست عباتي وطلعت وقعدت ادور ابوي وينه بس ما دريت ان ابوي راح وخلاني وارسل لي سند وقف جنبي وقال: غطي عيونس غطيت عيوني ومسك يدي ومشى رايح للسياره ركبت معاه ومشينا شفته متوجه لبيته قلت له : وديني لبيت اهلي قال : رايحين للبيت قلت له: خلينا نروح نجيب العيال قال: نايمين بكره عمي بيجيبهم ********** كنت جالس بالصاله اتفرج على التلفزيون ودق تلفون البيت الا عمي يقولي: روح جيب فايزه وروحو لبيتكم والعيال نامو بكره اجيبهم لك رحت للقاعه وناديت وطلعت عرفتها من زولها شفتها تدور بعيونها الكحيله يا سبحان ربي وقفت جنبها وقلت غطي عيونس وتغطت ومشينا للسياره قالت لي : وديني بيت اهلي قلت لها: رايحين لبيتنا قالت : والعيال قلت لها: بكره عمي بيجيبهم اول ما وصلنا نزلت بسرعه وتوجهت بعباتها للغرفه وصكت الباب عليها لحقتها للغرفه دقيت الباب فتحت لي وهي منزويه ورى باب الغرفه بس بان لي وجهها قالت بربكه : خير ابو ماجد تبي شي قلت : في شي لازم اوضحه لس دفيت الباب ودخلت وليتني ما دخلت وليتني ما لحقتها ماشاء الله جميله جدا كلها على بعض ومع فستانها العودي وشعرها بسواده زادها سحر قلت وانا ابعد ناظري عنها : اسمعي يافايزه اتمنى اذا كنتي برى ما تكشفين عيونس وذاتا لاكنتي متزينه قالت بإحراج : ابشر وقفت مثل المراهق ما عندي شي بس ما ودي اطلع قالت وهي منكمشه من الحيا تبي شي ثاني ابوماجد قمت اتأمل بشوف فيها فوزه الله يرحمها لكن ما شفت الا فايزه فايزه وبس قلت : لا شكرا وجيت بطلع بس رجعت لها وقلت : الا على فكره انتي قريتي على نفسس اليوم قبل لا تروحين قالت : أي الحمد لله قريت بقلبي اية الكرسي وقربت منها ونفثت عليها وطلعت *************** انا بالله وش اسوي الحين لي ساعه واقف بالصاله مع عليان وعمي رجع للمعازيم جت منيره تتعذر : معليش يا سر هالحين تطلع لك عليا بس تلبس عباتها عذرتها اكيد الحين مسويه مناحاه تبكي من يومها وهي بكايه بس بنت اللذينا صايره قمر طلعت لي لابسه عباتها ومتغطيه رحب بها عليان : هلا والله بنوارة بيتنا اللي من غيرها بيظلم وحضنها قمت سحبتها من حضنه وهي بعنف نفضت يدي تغاضيت عن هالشي ما ابي اعكر مزاجي قلت :يالله اسمحو لنا مشيت وهي وراي ركبنا السياره ماتكلمت مشيت واخذت لفه بالحاره ورجعت لبيتياللي هو اصلا ملاصق لبيت عمي من الخلف قلت لها : يا حيالله عليا ماردت علي الله يعييين على المزاج الخربان عارفها لا يمكن يكون هذا حيا نزلت وفتحت لها الباب ونزلت ودخلت البيت ودخلنا الحوش اللي مضوي بعقود أنوار العرس وقفتها وقلت : نورتي بيتي يا بنت عمي وما زالت ملتزمه الصمت بس هالمره سبقتني لداخل البيت وتوجهت للصاله وقالت : انا تعبانه وابي انام الله يعافيك بلا ازعاج قلت بمسخره: حاضر عمتي دخلت غرفة النوم وانا وراها نزلت بهدوء شديد عباتها وتفاجأت باللي لابسته وش ذا !!!!!! ************ خالتي قمرا تترجاني ومنيره تتوعدني وانا معنده لا يمكن اطلع واروح معاه بهذا الفستان قلت تبوني اروح معاه فكو ازارير الثوب واغير واروح معه بعد محاولات باءت بالفشل رضخو للي ابيه وفكت منيره الازارير مع كم قرصه في ظهري ويديني مقهوره مني وركظ دخلت الحمام وتروشت وومسحت الخرابيط كلها ولبست قميصي وطلعت لهم وشعري يرشح مويه لقيتهم مجهزين لي فستان حق سهره طنشته وقلت هاتو عباتي هاوشتني منيره لين انبح صوتها وخالتي اكتفت بترديد: لا حول ولا قوة الا بالله جابت عباتي منيره بعد ما يأست مني وطلعت له ورحت معاه توقعت اني اروح معاه فندق بس الحمد لله وداني لبيت خالتي ودخلت لغرفة النوم بعد ما سفهته مرتين والثالثه جبتها على بلاطه ما ابي ازعااج لحقني للغرفه وانا قلبي يرقع مدري وش ردة فعله على كلامي وسواتي بس طز فيه ما يمشي كلامه علي وانا بنت ابوي بس ما قدرت اتحمل ردة فعله هههههههههههههه فكيتها ضحك جا بيمسكني هربت منه على الحمام وقفلت وانا اضحك اضحك يكلمني من ورى الباب : يا مجنونه يا خبله اطلعي برى الحمام صرت اهز راسي بلا كأنه يشوفني اخر شي قلب الضحك بكى ومن كثر البكى لاعت كبدي وهو ما وقف دق على الباب اخر شي صار يسمع استفراغي :عليا خلاص افتحي وش صار معدتي فاضيه ومعدتي مصره تقلب علي وقفت ورجولي تتراجف ورحت فتحت الباب ياسر وقف بطريقي قلت بضعف : الله يرحم والدينك وخر من وجهي قسم بالله ماني طايقتك وخر عني وانا رحت للسرير ورميت نفسي عليه وسحبت اللحاف وتغطيت كلي ابي ما اشوف شي ابي انااام يمكن انسى انا وين ومع مين | ||||
|
| |
 |
| أدوات الموضوع | |
| انواع عرض الموضوع | |
|
|
8Likes
.png)
.png)
العرض العادي
