نجم روايتي وكاتبة في منتدى قصص من وحي الأعضاء
| ? العضوٌ???
» 303335 | | ? التسِجيلٌ
» Aug 2013 | | ? مشَارَ?اتْي » 548 | ? الًجنِس »  | ? دولتي »  | ? مزاجي » .png) | ?
نُقآطِيْ
»   | | 
الفصل الثالث عشر
اقتباس:
وفتحت الصندوق اللي اصلا بدون قفل وشافت مجموعة من الاوراق والدفاتر والصور القديمة
ولفت انتباهها دفتر مزركش بورود وقلوب اخذته وفتحته وانصدمت من اللي شافته, شافت 3
صور حديثة ل(عبد الله)ويه بنت وكانت البنت حلوة ولابسة ستريج ضيق وبودي لكن الصدمة اللي عقدت لسانها انه الصور من داخل الشقة وتأكدت اكثر من تاريخ الصور انه بعد الزواج وبالضبط التاريخ اللي سافرت بيه لأهلها بالعراق لوحدها لانه عبد الله كان عندة امتحانات , وكانت وحدة من الصور
داخل غرفة نومها والاثنين الباقيات بالصالة, اسرار ظلت ترجف بمكانها وعينها ما
بطلت دمووع وتحس نفسها انهارت وصار تلوم بعبد الله (ليييييش عبد الله ؟ ليش ؟ تدخل
وحدة لبيتي ولغرفتي ليش؟ شسويتلك اني ؟شنو ها الحظ يااربي )
وبعد تفكير عقلاني اسرار قررت تواجه عبد الله واللي يصير يصير,وفعلا بهذا اليوم اسرار جهزت الغداء وانتظرت عبد الله وتغدو سوة وطول ما هم كاعدين عبد الله يسألها اذا بيها شي لأن كان واضح من عيونها واصلا ما أكلت شي ولا نطقت بكلمة وهذا مو من عوايدها .. وبعد الغداء والشاي عبد الله مدد عالقنفة يتابع التلفزيون ولأول مرة اسرار تكعد بعيد عنه وعينه ما نزلتهة من عليه وقررت تسأله.
اسرار: عبد الله اني مقصرة ويااك بشيء ؟
عبد الله مستغرب: لا حبي حشاج من التقصير ليش صاير شي؟
اسرار:عبد الله اني وياك اتفقنا محد يحاسب الثاني عالماضي صح لولا؟
عبد الله تعدل بكعدته: اي صحيح بس كولي شكو خبلتيني؟ اسرار بسرعة راحت جابت الدفتر والصور وخلتهم كَدامه ,
عبد الله ارتبك:هاي شنو؟
اسرار تعصبت وفتحت الدفتر وطلعت الصور وخلتهم كدامه وصارت تبجي بحرقة : هذا انت
استاذ عبد الله وية وحدة من الشارع موقرها وجايبها لبيتي وعلى فراشي وبغيابي, لعد
شكد اني رخيصة عندك ؟
عبد الله احمر وجهه: اسرار اهدي شوية واني افهمج كلشي .
اسرار: شتفهمني بعد مو كلشي واضح عبد الله.. بعدك على سوالفك وخرابيطك وسويت نفسك كدامي الوفي اللي ظل يحبني طول هالسنين واني الغبية صدكتك (وضربت على وجهها يا ربي بعد ما اتحمل والله) عبد الله من شافها بهالحالة بسرعة لزم ايدها
وكَعدها عالقنفة وحضنها : اسرار الله يخليج لا تسوين هيجي بنفسج , اسمعيني بس.
اسرار بعدته عنها:شنو اسمع عبد الله ؟ شتريد تكول بعد؟
عبد الله كعد على ركبته وعيونه تدمع : الله يخليج بس هالمرة اسمعيني وبكيفج
بعد.
اسرار وهي منهارة: احجي اسمعك خلي اشوف شعندك,(وبتهديد) ودير بالك تضم عني شيء كوللي منو هاي ووين عرفتها ؟
عبد الله بتردد وبين كل كلمة والثانية يسكت شوية :هذي اسمها نادية... فد وحدة تعرفت
عليها بالصدفة اول ما جيت للاردن وبعدين تبادلنا الارقام و صرنا نحجي بالتلفون
وعرفت انه هي مطلقة وعدها توأم اولاد وتسكن هي وولدها ابيت جدتها ام ابوهة , هي
يتيمة الاب وزوج امها جان قاسي وياها و زوجها وهي صغيرة لفد واحد كبير بالعمر
وميخاف الله وبطلعان الروح يالة اتطلقت منه واول ما رجعت لبيت ابوها, زوج امها
طردها وامها اصلا ما لها كلمة بالبيت بعدين هي اخذت اطفالها وراحت لبيت جدتها وهي
تشتغل وتدرس مسائي حتى تعيل نفسها واطفالها.
اسرار مذهولة: اييييييه وبعدين؟
عبد الله بارتباك:حاولت اساعدها بس هي عدها عزة نفس ومتقبل ولا قرش من اي احد وبعدين وصيتلها اصدقائي ولكيتلها شغل مريح وتطورت علاقتنا وصرنا اصدقاء وصار واحد يحجي للثاني عن همومه ومشاكله وبيوم عزمتها بالمطعم وبالصدفة كلتلها انه ماكو مثل الاكل العراقي وكلتلها شنو احب من الاكلات.
(بعدين سكت عبد الله واحمر وجهه):وتفاجئت بعد يومين انه هي جايتني للشقة وطابخة الاكلة اللي احبها وبعدين اكلنا سوة وو...
اسرار: و شنو بعدين؟
عبد الله غمض عيونه:يعني قصدي ...اا... صارت بيناتنا علاقة بلحظة ضعف.
اسرار شهقت : معقووولة؟بس هذا يسموه....
عبد الله قاطعها: اسرار اني فاهم واعرف بس خليني اكمل ... وبعدين اعتذرت منها بس.. بس طلبت منها انه نتزوج ويكون زواجنا بالسر لان احنة بوقت جان واحد محتاج للثاني بيه واتفقنا على
مسألة الاطفال لمصلحتنا احنة الاثنين
اسرار:وتزوجتو؟
عبد الله: ما جان بيدي غير حل وبعدين شتريدين مني؟كلت يمكن نادية تخليني انساج.
اسرار خلت ايدهة على راسها: ايييه و هي بعدها على ذمتك لو لا؟
عبد الله متردد:اي بس احنة اتفقنا عالطلاق اول ما وافقتي انتي على الزواج مني ,وجنت مقرر اطلقها قبل زواجنا .. بس جدتها نومت بالمستشفى وانشغلت بيها .
اسرار مذهولة : يعني ضحكت علية مو؟وتكلي ما حبيت غيرج وما حلمت بغيرج واني مصدكة, وبعدين اذا انتو متفقين عالطلاق لعد هذي الصور ايمتة؟
وشمعنى ابيتي! ؟
عبد الله وهو يبلع ريقه: من سافرتي للعراق هي اتصلت بيه وكالت اكو شي مهم اريد اكوله الك قبل مننفصل.
اسرار وهي تبجي: ايييه وانت كلتلها ما دام الغبية مو موجودة تعالي اخذي راحتج.
عبد الله: لا اسرار ليش هيج تكولين عمري ما كلت عنج غبية واكص لسانه اللي يجيب سيرتج
اسمعيني بس الله يخليج ,هي بيومها اجتني للشقة واعترفتلي انه هي حامل مني وكالتلي
انه اتفقت وية طبيبتها انه تسقّط الطفل لان بعدها ابداية الحمل وحتى تتجنب مشاكل هي
بغنى عنها بس بصراحة هي جانت منهارة وخايفة بنفس الوقت و...
اسرار صارت تبجي بانيين: يا ربيي اني بحلم لو علم؟ عبد الله ليش هيج تسوي والله حرام عليك(وبعدين انقهرت من سالفة الاجهاض):وبعدين حرام عليكم اكو ناس تتمنى الطفل وانتو ابساطة تسقطوه يا ربييي والله حرام .
وظلو ساكتين شوية وبعدين اسرار التفتت عليه:وصار شيء بيناتكم هنا ابيتي ؟
عبد الله التفت للجهة الثانية:اسرار مو كلتلج نادية زوجتي وبيوم اللي اجت هنا جانت منهارة يعني شتتوقعين ؟
اسرار:واتفاقكم عالطلاق لغيتوه؟
عبد الله: لااا بس هي سقطت الطفل وانتظرها لبعد الاربعين يوم وكلمن يروح لحال سبيله .
اسرار: بس اسألك سؤال انتة من جنت تخابرني وتكلي راح اتاخر تروح عليها مو صحيح؟ يعني تشتاقلها حتى واني ويااك مو؟
عبد الله انصدم من سؤال اسرار وسكت.
اسرار بصوت عالي : ليش متحجي؟ جنت تروح تقابلها مو؟
عبد الله هز راسه(اي) اسرار: ياااااااه لعد من ترجع وتمثل عليه الشوق واللهفة وتسويلي فلم وين رحت وليش تأخرت.متصورتك هيج اناني وممثل درجة اولى , عبد الله هذا كله يطلع منك واني مستغفلني ومستغل ثقتي بيك هي هاي جزاتي. ما اتصور اني طلبت شي اكثر من انه تكون الي لوحدي وبس ...بس والله استاهل ااااه هبة لو سامعة كلامج اااه .
عبد الله بعد ميتحمل منظر اسرار وهي تبجي ,
بسرعة وبدون تفكير اخذ التلفون واتصل على نادية وفتح السبيكر حتى اسرار تسمع كلشي نادية: الووووو هلا عبودي شعجب ذكرتني؟
عبد الله: هلا نادية اشون صرتي هسة (باعتبارها سقطت الطفل)؟
نادية: الحمد لله احسن, ما كلتلي شبيك مو متعودة انتة تخابر؟
عبد الله(ببرود) : اسمعي نادية .. اسرار عرفت كلشي وهسة هي كدامي ومنهارة ومو مصدكة انه احنة متفقين عالطلاق
نادية قاطعته:وشنو المفروض اسويه مثلا؟
عبد الله:مو انتي اللي تسوين اني اللي راح اسوي.. اسمعي نادية اريدج تعرفين انه من هاللحظة كلشي بيناتنا انتهى خلاص وراح انتظرج هالاسبوعين وبعدين نروح عند نفس الشيخ اللي عقدنا عندة وينتهي كلشي.
نادية وهي تبجي: هذا كله اعرفه ليش خابرتني؟ حتى ترضيها مثلا ؟ كلكم الزلم نفس الشي اللي تموت عليكم تبيعوها بسرعة واللي متنطيكم وجه تحفون وراهة,مو هي هاي
اسرار اللي فضلت صديقك عليك وخلتك تعاني سنين, كوللها بالعافية عليها ..
عبد الله : نادية بلا كلاام زايد, احنة اتفاقنا بعد اسبوعين بس من هاللحظة بعد لا تتصلين واني
بنفس اليوم راح اخابرج بس حتى تاخذين ورقتج ومنا لذاك اليوم اعتبري نفسج طالق بالثلاثة. نادية بسرعة قفلت التلفون, واسرار اللي انذهلت من تصرف عبد الله بسرعة حضنت نفسها
عالقنفة وبجت بأنين لأن تعرف انه اصعب كلمة تسمعها المرأة هي الطلاق وهي جربتها
قبل . عبد الله بسرعة ترك الشقة وطلع حتى تكون اسرار براحتها وحتى تفكر بغلاتها
عنده عل وعسى تسامحه. ظلت علاقة اسرار وعبد الله شبه متوترة وبعد اسبوعين اسرار
وعبد الله كاعدين يتغدون وهم ساكتين ,
اسرار كملت ووكفت تشيل صحونها, عبد الله لزم ايدها وسحبها:اسرار مو
كافي عاد شتريديني اسوي بعد؟
اسرار:ليش ناقصك شي لو مقصرة وياك بشي؟
عبد الله : ناقصني هواية اشياء وانتي تعرفين شقصد.(وطلع ورقة من جيبه):اسرار هذي ورقة طلاقنا اني ونادية اخذيها وتاكدي بنفسج .
اسرار(دمعت عيونها وصارت تبجي). عبد الله(سحبها ومسح دموعها):حبي انتي هسة ليش تبجين؟
(وهمس بأذنها): وحضري نفسج اليوم نسهر برة واي مكان تريدين بس
اشريلي عليه.
اسرار(استسلمت لهمسات عبد الله ودفنت وجهها بصدره) وشوية شوية رجعت
الثقة بيناتهم ومن شروط اسرار كانت انه يفتح القفل السري للموبايل والرسائل اللي
توصله على موبايله هي تفتحها وطبعا عبد الله وافق بس حتى يرضيها.
وبيوم كانو عبد الله واسرار بالكوفي شوب, اختارو مكان وراح عبد الله حتى يجيب الطلبات واسرار كعدت تنتظره, انتبهت اسرار انه عبد الله سلّم على مجموعة مكونة من 5 بنات وكانو البنات
متانقات كانه رايحين لمناسبة وانتبهت اكثر انه وحدة منهم ما رفعت عينها من عبد
الله, اسرار صارت تغلي بمكانها لكن عبد الله واثناء وكفته وية البنات التفت عليها
واشرلها كأنه يكول للبنات (هذي زوجتي)وفعلا البنات كلهم التفتو على اسرار وسلمو
عليها برفع الأيد واسرار ردت بأبتسامة ورفعت ايدها ومن رجع عبد الله كان متوقع اسرار راح تحقق وياه.
عبد الله راد يفرفش الجو:اووف يعني شسوي معجباتي بكل مكان وين اروح للمريخ حتى اخلص. اسرار بعصبية ممزوجة بغيرة:اييه الله يساعدك ,ما كلتلي منو البنات يعني اول مرة اشوفهم.وبعدين احنة شنو اتفقنا؟
عبد الله وهو عينه بعينها صار يغني: بالهداوة يا حبيبي بالهداوة,احنة تجمعنا المحبة مو عداوة, انا لا والله ما اقصد اذيتك , بيه صب نارك وفرغ عصبيتك , انت ابو القلب الحنين منين الك كل هالقساوة؟
(وسحب ايدهة)كلهم بكفة وانتي وحدج بكفة والله ما اشوف غيرج حبي انتي.
اسرار انغرت بنفسها:اي مو اكول عبد الله ذوقه ارقى من هيج يعني ماشفت بيهن ولا وحدة حلوة بس اكولك منو هاي البنية اللي لابسة خمري.
عبد الله: هاا قصدج سلمى ؟ اي هي زميلتي بالكلية وهي عرفتني على صديقاتها لان الظاهر عدهم مناسبة وجايين هنا يقضون وقت.
اسرار:اممم زين سلمى هذي مخطوبة؟ مرتبطة؟
عبد الله استغرب من سؤالها : لالا مو مخطوبة.
اسرار:شعجب يعني ؟
عبد الله: والله ما اعرف بس واحد من زملاءنا تقدملها ورفضت تكول تريد تكمل دراستها
بالاول.
اسرار(بحدس المرأة): يمكن تحب واحد مو حاس بيها ؟
عبد الله:اسرار اكولج شي بس حتى لا تكولين يضم علية ؟
اسرار فتحت عيونها:ايييه احجي.
عبد الله: وحدة من زميلاتنا كالتلي انه سلمى دائما تسأل عني .
اسرار: ايييه وانتة؟
عبد الله:اني شنو يعني؟عادي حالها حال الزميلات الباقيات وبصراحة هي شوية شايفة نفسها
ومتنطي مجال ولهالسبب اني دائما اتجنبها وحتى السلام لو اسلم لو ما اسلم
عليها.
اسرار(حبت تغير الموضوع):اكول عبد الله خلي نطلع ناكل ايسكريم.
عبد الله : اوكي حبي براحتج
. اسرار وعبد الله مسكو ايد بعض وطلعو لكن اسرار راقبت سلمى بطرف عينها وانتبهت
انه فعلا عينها ما نزلتها من عبد الله لكن اللي طمنها انه عبد الله ميحب نوعية
البنات المغرورات واللي تعتبر سلمى وحدة منهم.
مرت الاشهر وعلاقة عبد الله واسرار تتحسن يوم عن يوم وبدت الثقة ترجع بيناتهم الى ان اجى هذا اليوم. عبد الله كان يتصل على بيت اخته ضحى وطالت السوالف بيناتهم ومن كمل الاتصال ترك تلفونهبالصالة وراح للمطبخ حتى يجيب كاستين عصير
وفجأة رن تلفونه معلن عن وصول رسالة, اسرار بسرعة اخذت التلفون وفتحت الرسالة وقرتها
وصاحت بصووت عاالي (لاااااااا)وظلت لازمة التلفون بايدها وترجف
عبد الله بسرعة اجى للصالة واخذ منها التلفون وقرا الرسالة .وصارت عينه بعينها ولكاها مغورقة بالدموع. الرسالة كانت من عزيز وكان محتواها
(عبد الله وينك صارلي ساعة اتصل بيك بس حبيت ابلغك انه عبد الرحمن سوى حادث بالسيارة وهسة هو بين الحياة والموت ادعيله الله يخليك),
اسرار بسرعة سحبت نفسها لغرفتها بينما عبد الله صار يغلي بداخله وبسرعة رجع اتصل على عزيز.
عزيز(بصوت مخنوق): الووو.
عبد الله: السلام عليكم.
عزيز:وعليكم السلام عبودي هلا خوية.
عبد الله: عزيز كولي شصاير؟
عزيز: مصيبة ونزلت على عبد الرحمن, المسكين سوى
حادث بسيارته قريب من نقطة تفتيش امريكية وتعرفهم ميرحمون اذا واحد اقترب منهم وضربو سيارته .
عبد الله بغصة: لاحول ولا قوة الا بالله وبعدين ؟
عزيز وهو يبجي:خطية زوجتة (ام سارة) توفت بسرعةهي والطفل اللي ابطنها,و الاسعاف اخذو عبد الرحمن هو وسارة بنته... بس الحمد لله بنته طلعت اليوم ما بيهة بس كدمات بسيطة بس هو المسكين فاقد الوعي ومحد يعرف.
عبد الله بقهر: زين والاطباء شيكولون ؟
عزيز(دمعت عينه): والله ما ادري شكولك, الاطباء ناس رايحة وناس جاية وهو خطية ملفوف بالشاش من كل مكان (وبعدين اختنق عزيز بالعبرة):عبد الله اذا تكدر تعال شوفه لان محد يعرف .... بس ادعيله والله حالته تصعب عالكافر.
عبد الله (انقهر ودمعت عينه): ان شاء الله اشوف حجز هاليومين, زين وانتة وينك هسة ؟
عزيز: والله اني وياه بالمستشفى لازم المصحف وكاعد لان اخوته خطية مشغولين بالفاتحة ومتناوبين منو يروح ومنو يبقى ويااه .وانتهت المكالمة بين عبد الله وعزيز.
عبد الله كعد عالكرسي مصدوم من اللي سمعه من عزيز
ومصدوم من اللي شافه بعينه
وبصوت عالي صاح: اسرااار تعالي هنا.
اسراركانت بغرفتها ورجفت من سمعت صوت عبد الله وخافتتروح للصالة.
عبد الله (بصوت اعلى): كلتلج تعالي هنا .
اسرار ما ردت للمرة الثانية وفعلا عبد الله راح للغرفة وفتح الباب بكل قوته وسحب اسرار
من ايدها: بعدج تحبيه مو؟
اسرار هزت راسها(لااا),
عبد الله صار يمسح دموعها بأيده: وهاي الدموع الخاطر منو؟
ودفعها ع السرير بكل قوته..
اسرار وهي تبجي: غصبا عني والله.
عبد الله :ها لعد يمكن بعدج تحبيه غصبا عنج مو؟
اسرار : عبد الله حرام عليك لا تظلمني.
عبد الله(بعصبية): وانت مو حرام عليج اللي دسويه, روحي اسألي طفل بالشارع وكوليله اذا وحدة متزوجة تبجي على رجال غريب شنو معناها راح يكولج معناها تحبه(واقترب منها اكثر)اي معناها تحبه.
اسرار وهي تبجي: ابشنو تريد احلفلك انه عمري ما فكرت بيه من ساعة زواجنا والله العظيم و... قاطعها عبد الله: اااه اسرار حلفانج كله بكفة وهاي دموعج لوحدها بكفة
(واقترب منها وحط عينه بعينها): ذبحتيني اسرار,ذبحتيني. وكسرتي كلشي حلو بقلبي,مع الاسف عليج . بس بعدج ما عرفتيني اسرار ..لسة ما انخلقت اللي تقهرني وترفضني .
اسرار انصدمت من كلامه و لزمت ايده حتى يهدى لكن هو نفض ايده من ايدها بعصبية وطلع من الشقة وترك اسرار بدموعها وحيرتها. هنا اسرار حست انه حياتها مع عبد الله على وشك تنتهي او انتهت خلااص.
| (سبحانك اللهم وبحمدك اشهد الا اله الا انت استغفرك واتوب اليك)
التعديل الأخير تم بواسطة كاردينيا الغوازي ; 05-09-13 الساعة 10:44 AM |
آخر 10 مشاركات
04-09-13, 11:41 PM
الله يكون فى عونها ...
1Likes
.gif "Eh S(7)")
العرض العادي
