نسائم الماضي للكاتبة/ رهينة الشوق (أميرة الخيال) (مكتملة)

[فيتامين سي]

دق جرس باب نورة ..
- من ؟؟
- انـــا .. ام مازن تأبريني .. انتي جاهزة ؟
- ايه .. خالة ام مازن .. لحظات ..
فتحت نورة الباب ..
تفاجأت ام مازن بوضع نورة ..وبتلقائيه ردت ..
- انتِ بتطلعي هيــــــك ؟
- نورة في تعجب : ايه شو فيها ؟؟
- هااااااايك .. مغطية على وشك ؟؟؟ ومو باين الا عيونك ؟؟
- ردت نورة باعتزاز : ايـــــه ..
- بس هيك بتلفتي الانزار لالنا .. يا نورة .. انت هو في امريكا ..
قاطعتها نورة بحزم : خالة .. صحيح حنا في امريكا بس مش معناها اني اتخلى عن ديني الاية الكريمة تقول ( لكم دينكم ولي دين)
ابتسمت ام مازن : خلاص يا خاااالتووووو براحتك .. اهم شي انك تنبسطي .. في السوق .. يالله قل لا يرجع سامر من المدرسة مع اني قايلت له اذا تاخرت يسخن الاكل وياكل مع ابوه ..




ركبت نورة السيارة مع ام مازن .. فيه اول مرة تركب سيارة من اول يوم وصلت فيها هذه البلاد الغريبة .. منذُ اكثر من تسع شهور .. بدأت ام مازن تجوب شوارع واشنطن قاصدة ذاك السوق الجميل (( لاند مارك )) الذي تعودت الشراء منه ام مازن فهو سوق جميل ومتكامل واسعارة مناسبة .. كانت الساعة 10 صباحاً .. كانت نوررة مسرورة جداً .. بهذه النزهة التي لم تخطر لها على بال .. اصبحت نورة تنظر الى تلك البيوت الجميلة والشوارع الانيقة والتنظيم في كل شي .. كانت نظر بشغف .. تمام كالسجينة التي اطلق سراحها بعد سنوات من السجن ، دخلت نورة السوق بفرح الاطفال مع جارتها لم تشعر نورة بنظرات الناس من حولها نظرات الاستغراب على ما ترتدي من ملابس ساترة وكانت بعض النسوة الحشريات يتوقفون برهة من الزمن ينظرون الى نورة والى حجابها لم تعيرهم نورة اهتمام فهي واثقة من ما تفعل ..
كانت ام مازن سعيدة وهي تتسوق مع نورة فنورة .. فتاة مؤدبة وذات ذوق جميل جداً .. حيث كانت تختار البضاعة الراقيه ذات السعر المناسب جداً .. لم تشعر نورة وام مازن بمرور الوقت فالساعة قاربت على الثانية ظهراً .. .. الا بعد انتهاء جميع مشتروااتهم ..

لذلك قررت ام مازن ان تدعوا نورة على وجبة غداء لذيذة .. لم تتردد نورة في الموافقة فهي كانت مثل العصفورة الهاربة من قفصها سعيدة بهذا الانطلاق ..توجهت ام مازن الى احدى المطاعم التي كانت ترتادها مع اسرتها في نهاية اخر الاسبوع ..واختارت زاوية بعيدة عن اعين الناظرين كي تتمكن نوره من الاكل بحرية ...





بدأت نورة مع ام مازن تتجاذب اطراف الحديث ريثما تأتي وجبة الغداء المنتظره ..

ام مازن :الله يعطيك العافية ، تعبتك اليوم معي ؟
نورة : وش دعوة ياخالة بالعكس انااللي اشكرك .. خليتني انبسط بس ما قلتي لي ليه قاعده تشترين هذا الاشياء .؟؟
ام مازن : لاني بسافر الى بنتي شرين في كندا أيام عطلة راس السنة الميلادية بد اسبوع هيك .
نورة في حزن : بتسافرين .. يالله طيب متى بترجعين ؟؟
ام مازن : ابداً .. ازا خلصت العطلة شي هيك اسبوعين 10 أيام بالكتير ..
نورة : يالله كثيرة .
ام مازن : عادي الايام بتمشي بسرعة تأبرني ..

في هذه الاثناء اتت وجبة الغداء المنتظره شرعت نوره وجارتها بالاكل وبعد 10 دقائق ..

لمحت من بعيد .. شخص .. وبدون شعور .. نطقت باسمه امام ام مازن ...

- محـــــــــمــــــــد ...

نظرت ام مازن الى نورة في استغراب : شو بتؤلي .. يا نورة .. من محمد ..

ثم نظرت الى الاتجاة الذي تنظر له نورة ..

لمحت من بعيد شاباً في مقتبل العمر وسيماً جذاباً يصطحب معه فتاه اقرب ما تكون الى الملامح العربية ..

لم تستطيع نوره تحديد موقفها وردت فعلها ..بل بلا شعور منها نزلت دمعتها وعرفت سبب هجره لها ..

عرفت ام مازن ان ذاك الشخص هو زوج نورة الخائن احست بخيانته ولكن لم تحاول ان تجرح شعور واحساس تلك الزوجة المسكينة بل على العكس حاولت تهدئ من صاعقة المفاجأة لدى نورة فليس هين على اي امرأة ان ترى زوجها مصطحب فتاة في مطعم ..
- يا نورة .. لا تفهمين الرجال غلط .. يمكن هاي زميلته في الدراسة وجاي فترة الغداء يتغدى معاها ..
ردت نورة ولكن بينها وبين نفسها .. ( وانامن اللي يتغدى معي !!؟؟)
- ام مازن تواصل : يا بنتي خليك عادية بدك نؤم من هون ؟؟
هزت نورة راسها بالرفض .. فهي تريد ان تشاهد زوجها الحبيب عن قرب فهي لها اكثر من اسبوع لم تراه ..
ام مازن احست بطعنة نورة وحاولت ان تمسك بيدها المرتجفه واستطردت قائلة : نورررررة .. احكي لي انت علاقتك مع زوجك مش هاااا القد ليه .. مع انك تقولي توكم عرسان ..

استمرت نورة في صمتها القاتل فهي الزهرة التي ذبلت قبل اوانها .. واستمرت النظر الى زوجها وهو يتجاذب اطراف الحديث مع تلك المخلوقة ..

كان محمد غارقاً بالحديث الممتع مع تلك الفتاة ..وكان يداه لا تبتعد عن يد فتاته .. وعيناه لا تفارق عيناها .. هاهو الان يمد لها اللقمة ويضعها في فم فتاته ..

صرخت نورة في آلم . صرخت الصمت الذي يقتل كل زهور الحياة الجميلة ..وبدون ادنا شعور من أم مازن . قامت ناهضة من كرسيها .. قائله :
- يخرب بيته شو ما اوقحه .. اناقائمة له اعرفه نفسة ..
امسكت نورة بيد ام مازن مترجية ..
- الله يخليك يا خالة .. لا تروحين انا ما ابيه يعرف اني شفته .
- ليه !!!! الا .. اومي وكسري المطعم على راسه وراسها ..
- خالة .. من ستر على مسلم ستر الله عليه وهذا زوجي ولد عمتي .. خلينا نطلع لانه حتى لو مشيت من قدامه ماراح يحس لان شكله غارق لشوشته ..

&&&&&&&&&
ركبت نورة السيارة . على غير الحالة التي كانت فيها في صباح هذا اليوم فلم تعد الشوارع تبهرها ولم تعد المنازل الانيقة تلفت انتباهها .. ولم يعد عبير الزهور الملونه بألوان الطيف تدغدغ انفاسها .. لم يعد امامها الا منظر زوجها ..ومع تلك الفتاة .. وصلت البيت .. وارتمت على الاريكة التي بغرفة الاستقبال وهي لا تعرف للامل عنوان .. وما اصعب على الانسان ان يتجرع مرارة الآلــم بكاس الغربة ..

مرت الايام ... ونورة حبيست ذاك المشهد .. اتت اليها ام مازن تودعها . فبعد غداً سوف يأتي عيد الشكر .. ويبدأ العالم يعد العد التنازلي .. لعام 2001 ودعتها ام مازن وطلبت منها التماسك والتوفيق الى ان تعود من كندا ..

&&&&&&^^^^^^&&&&&&&&
كانت نورة جالسة امام التلفاز تراقب في صمت العالم اجمع وهو يحتفل بنهاية هذه السنة وبداية سنة جديدة وقد تذكرت احتفالات قريتها بالعيدين مع فارق الشبه .. دقت الساعة الـ 12 تماماً .. صباحاً .. لتعلن بداية عام 2001 ونهاية 2000 وبدأت سماء واشنطن تتزين بالالعاب النارية جرت نورة كطفلة لتشاهد تلك المناظر الجميلة من بعيد ..

وبعد ساعتين .. لم تشعر الا بحرس الباب يدق .. اقتربت من الباب بهدوء ونظرت من العين السحرية .. انه ..هو ...

- محمد ...!!! غريبه وش جايبه في هذي الساعة من عادته ..
فتحت الباب بقلق فحضوره نذير شؤم اكيد ..
قالت له مفزوعه :: محمد .. وش فيك عمتي فيها شي اتصلوا عليك السعودية فيهم شي تكلم .. ؟؟؟
دخل محمد وهو يتأرجح في مشيته .. ورائحته تفوح برائحة كريهة لم يتعود عليها .. حاول محمد ان يتماسك ليصل الى اقرب كرسي .. لكن قوى تهدمت بمجرد دخوله شقته ..

نظرت نورة الى زوجها وحاولت ان تعرف ما به وبادرته بالسؤال ..
- محمد .. وش فيك :.. يا عمري ؟؟
فتح عيناه يحاول اي يعرف مصدر هذا الصوت الحنون لكنه لم يرى امامه الا صورة منال .. ورد قائلاً : لا ياعمري لا تخافين يا منولتي ..
- منولتي .. قالتها بصوت منخفض انت اكيد ما تقصدني ..

بعد نصف ساعة .. من حضور محمد ..

بدأ يصرخ .. ويتألم انه آلم في معدته ..

- بططططططني .. يا منال بطني ..

لازال يكرر اسمها على مسامع نورة ./. حاولت نورة ان تقتل الغضب الصارخ في داخلها ولكن كان منظر محمد المتألم اقوى من اي غضب .. ماذا تفعل .. هل تذهب معه الى المستشفى ولكن كيف انها لا تعرف السياقة .. اين ام مازن ... سافرت . ياللهي .. ماذا .. تفعل تلك المغضوب عليها .. نورة .. وفي لحظة اتجهت مسرعه الى بنطال محمد ..تبحث عن جواله .. سوف تستعين باحد اصدقائه .. القادمين معه . ... اسرعت نورة وفتحت الجوال .. لكن اي من الارقام سوف تتصل عليه ..؟؟؟؟

- ياربي ..ما اعرف احد...
بدأت تبحث عن رقماًً فالارقام مختلطه ما بين ارقام سعودية وارقام امريكيه .. مدموجه مع بعضها ..
توقف بحثها عن كلمة شقه العيال ..

- ايه اكيد هذي شقتهم ..؟؟
- اسرعت نورة تتصل ..

رن ... رن .. كانت الساعة 3 صباحاً ادركت نورة انه لا يوجد مجيب ..وقبل انقطاع الخط .. سمعت صوتاً نائماً .. يقول ..
- هــــــالوووووو ..

- الووووووو... انت تتكلم عربي .. ؟؟
- نعم ..من انتي ؟؟
- عفووووا .. اسفه على ازعاجك هذي شقة اصحاب محمد .؟
- ايه ..من انتي ؟
- انا اهل محمد .. ومحمد تعبان وزي اللي مغمى عليه وبحاجة انه يروح المستشفى ..
- طيب المشكلة اني ما اعرف العنوان .. انتي تعرفينه .؟
- والله .. ما ادري .. صراحه بس لحظة ..

ذهبت مسرعة الى محمد لعلة يستطيع ان يدلها على العنوان .. ولكن كان محمد من شدة الالم لا يستطيع ان يجمع قواه ..

رجعت نورة الى المتصل ...
- ياخوي .. سالتها من الآلم مش قادر يتكلم ..
- طيب وش فيه تعبان هو ؟
- الله يخليك مافي وقت شرح .
- طيب خلاص ان بتصل على فهد يمكن يدل البيت ، طيب اسألي جيرانكم ما في جيران عندكم ..
- اللي اعرفها مسافرة ..
- طيب .. مع السلامه ..
- اسمعي اذا دليت البيت بتصل عليك ؟؟
مع السلامة ...
يتبع.....
***************

[فيتامين سي]

(( الجزء السابع ))

بعد 10 دقائق دق جوال محمد ..وكان على الشاشة مكتوب علي .. ردت نورة من غير أستاذان ..

- الووووو...

- الووو .. محمد ..

- لا انا اهله .. من انت ؟

- انتي اللي كلمتيني على شقتنا ؟

- ايه
_ .. انا خلاص باقي ربع ساعة واوصل ، عرفت الطريق ، محمد شلون وضعه الحين؟

- مازال زي اللي يصحى ويقوم .. اول مرة اشوفه كذا ..

- لا تخافين .. الحين جاي .., بس اذا وصلت باب الشقة بتصل علي الجوال ..


بعد اقل من 20 دقيقة كان علي موجود عند باب الشقة .. فتحت نورة الباب في رعب فالمواقف المتلاحقة اكبر من عمرها الافتراضي .



دخل علي وقد استغرب من تلك المرأة اللابسة العباءة السعودية والمنقبة ومن غير كلام أو سلام قالت نورة :

- تفضل يا خوي .. هو في الغرفة على يدك اليمين .



اسرع علي إلى صديقة وشاهده ممدداً على السرير .. اقترب اكثر ..

- محمد .. محمد وش فيك .. سلامات ؟؟

اشتم علي رائحة محمد الكريهة وايقن ان الأمر خطير ..

التفت إلى الباب ينادي ..

- يا اخي .. يا ولــد ..

اقتربت نورة من الباب ..

- سم ..نعم ..

اقول لك محمد يوم جاء البيت كان بشكل طبيعي ؟؟

- شلون يعني ما فهمت ؟

- يعني اقصد كان يمشي عادي ؟

- لا ..لا .. كان ماصدق يوصل إلى الكرسي !!

- طيب اختي شكله لازم اودية المستشفى ..

حاول علي ان يحمل صديقة المخمور إلى السيارة ولكن ثقل محمد كان عائقاً .. اقتربت نورة من محمد تحاول ان تساعد صديقة في حمل زوجها الخائن ..



واخيــــراً .. وصلوا إلى السيارة ..



طلب علي من نورة البقاء في المنزل إلى ان يتصل بها ويطمئنها على وضع محمد ..لكن رفضت نورة بشدة ..

ولم يكن للجدال وقت عند علي فحالة محمد تبدو خطيرة استسلم لرغبة تلك الفتاة المنقبة واسرع بعجلات السيارة إلى أقرب مستشفى ..





بعد الكشف قرر الدكتور عمل غسيل للمعدة فيبدو ان محمد تناول كمية كبيرة من الكحول الفاسدة المنتهية صلاحيتها .. مما يضطر الدكتور بتغير كامل لدم محمد..



كان الوضع اكبر من علي ونورة .. ترجم علي لنورة ما قاله الدكتور وصدمت نورة من ما سمعت !!!



تناثر الحلم الجميل ، وتشتت سحاب الحب ، وذبلة ازهار الامل .. فاللوحة الملونه باللون الوردي لهذا الزوج بدأت تنقل تدريجياً إلى اللون الاسود فالامس القريب كان الزوج الخائن واليوم الزوج المخمور .. ياألهي .. ماذا سوف تعرف عنه اكثر ..



وقف على ينظر إلى عيون نورة .. الغارقة في الدموع فهي لا تكاد تصدق ما يحل بها من وراء هذا الزوج القاسي .. ولم يقطع خيبة املها الا صوت علي :

- ياختي وش الحل ؟؟ انا اخاف عليه من تغير الدم أخاف يصير دم غير صالح فهي ايدز أو مرض لا سمح الله ..

بحلقت نورة النظر في زميل محمد الذي إلى الان لا تعرف اسمه : أيــــدز ..وش تقول انت ؟؟ اجل شوف انا بعطيه من دمي ..
- انا اعرف انك خايفة على اخوك ... بس خلينا نشوف فصيلتك تناسب أو لا ؟؟




اسرعت نورة مع علي إلى الطبيب المختص .. وعرض عليه نقل الدم من نورة .. وبسرعه .. اتجهوا إلى غرفة الممرضة لاخذ عينة من دم نورة لمعرفة نوع الفصيلة ..


طلبت الممرضة اسم نورة واسم المريض المنقول لها الدم ..



نظر علي إلى نورة يطلب منها الافصاح عن اسمها .. لكي تتمكن الممرضة من اكمال عملها ..

نورة : اسمي .. نورة عبدالرحمن عايد ..

لم يستغرب علي من عدم تشابه الاسماء بينه هذه الفتاة ومحمد .. فربما اخته من امه أو احدى بنات اخته حضرت مصطحبة امه المريضة .. كما قال محمد ..



طلبت الممرضة معرفة صلة القرابه بينها وبين محمد فقالت :

زوجــــي ..



لم يصدق علي ما سمع فهل معقول ان محمد قد تزوج ولماذا لم يخبرنا بذالك الخبر ..ولم كل هذا التكتم .. حاول على ان يعرف رموز تلك النورة ومتى وكيف تزوجت ،،، كانت اجابات نورة جداً مختصرة فهي لم تتعود ان تتكلم مع الغرباء ...







انتقلت نورة إلى الغرفة التي يوجد بها محمد .. اجلستها الممرضة بالسرير المجاور لمحمد ومدت بينهما انبوب بلاستيكي وبدأ دم نورة الطيب يغزو جسد محمد ...



كانت هذه المرة الأولى التي تستلقي نورة على سرير ويجاورها محمد هذا المنظر الذي لأول مرة تراه .. منذُ ان كتب ذاك الشيخ عقد النكاح بينهما .. من اكثر من 11 شهر ..

كانت تنظر إلى محمد بنظرات الاشفاق والرحمة وقد نست أو تناست قسوته عليها ، وتجاهله لها ، فهو الآن اضعف ما يكون اقتربت من محمد وجلست في الكرسي القريب من سريرة ، كانت دماء نورة لا تزال تتدفق إلى عروق ذاك الزوج الهاجر .. محمد الآن فاقد .. الوعي .. بدأت تمسح بيدها على شعره الأسود الناعم ، وتجرأت ان تلمس بيدها ذاك الذقن الجميل الذي زاد محمد جمالاً .. انه الآن فقط يستطيع ان تمسك بيده .. فهو لا يشعر بها ولن ينهرها .. ولن يصرخ في وجهها أمسكت يده ورفعتها إلى خدها وحاولت ان تقوم بدور الزوج الحنون وتمسح دموعها بيد محمد الغائب عن الوعي .. كانت نورة تسرق ذاك الحنان من يد محمد .. فيده اول يد رجل تمسح تلك الدموع

بعد والدها – رحمة الله – فتحت شفتاها تريد ان تسأل وتخرج ذاك السؤال الغائر في اعماقها ..
- ليـــــــــــــــــــــــ ــــه .. يا محمــد تسوي فيني كــــذا ؟؟

لم يكن لسؤالها جواب .. ولم يقطع صمت سؤالها .. الا علي يريد ان يستأذن نورة في الدخول ..



- اختي.. تقول الدكتورة ..خلاص بعد ربع ساعة بينتهي الوضع .. تبين ارجعك البيت ؟؟

ردت نورة بخوف : ومحـــمــد !!

- لا تخافين ..هو الحين خلاص عمل غسيل المعده والحمد لله الدكتور طمني ، ويقول على بكرة الظهر بيصحى من البنج ..

- اجل اقدر اجلس معاه ..؟؟

- ايه اكيد بس مش تعبانه انتي ..؟؟

- لا ..الله يجزاك خير ..

- على العموم انتي اذا احتجتي شي رقم جوالي عندك اتصلي واذا جو ولا عرفتي تتفاهمين معاهم اتصلي على وانا اترجم لك ..

- لا انا اعرف انجليزي .. الله يجزاك خير .. ما قصرت .. وربي يجعلها في موازين حسناتك .. واستر على ما وجهت ..





انصرف علي وهو لا يكاد يصدق انه يوجد على هذه الحياة فتاة بهذا الجمال الروحي فالانسان امام نورة يشعر بالارتياح الغريب والارتياح الاجباري .. ولم يرد جمله واحده ..





(( حسافة .. عليك يا محمد ))









في صباح اليوم التالي .. الخبر إلى اصدقاء محمد فهد وحمد وايضاً منال .. لم يتردد الجميع في زيارته ولكن كان على اول الحاضرين ..



- دخل إلى غرفه محمد ووجدوه لا يزال نائماً ونورة جالسه امامه .. كان الأم التي تسهرعلى راحة ابنه .. سألها علي .. برحمة ..

- انتي .. نمتي .. يا أ خت نورة ؟؟

- لا .. ما فيني نـــوم ..

- ايه .. بس كذا بتتعبين ؟؟

- لا ولا يهمك ..



في هذه الأثناء دخلت منال إلى غرفة محــمــد ..

منال : هاااااااااااااااي ..

علي : وعليكم السلام ..

منال : علي وش فيه محمد سلامته ؟؟



ركزت نورة النظر إلى وجه تلك الفتاة القادمة بلهفة إلى زوجها ..انها هي تلك الفتاة التي شاهدتها معه منذُ ايام ماضية ترى من تكون ...هل فعلاً زميله كما قالت ام مازن ؟؟



واصلت منال الكلام ..

- علي ..البارحة كان سهران معنا ليلة راس السنة مافيه الا العافية ...!!

علي بإزراء : هو ما جابة وراء الا ليلة راس السنة .. والبلاوي اللي فيها ..

منال : وش قصدك ..؟؟

علي : قصدي واضح ؟؟

منال : لا وضح ..

علي اضطر ان يتكلم باللغة الانجليزية كي لا تفهم نورة من كلامه شي : عمنا محمد اول مرة يشرب في حياته خمره .. وشكله يوم شرب شرب العيار الثقيل ..وانتي الله يجزاك خير بما ان عندك خبرة في انواع الشراب وقدرات الناس عليها كان لازم تعرفين ان محمد سكير مبتدئ يعني دورتي لها اخف الانواع .. محمد كان بيروح فيها الا شوي ..

منال : ليه وش صار له ؟؟

علي : تسمم في الدم وغسيل معده ..

منال : وغيرت دمه عسى مش من المستشفى ؟؟

علي : لا لا تخافين حـــرمـ ...

قاطعت نورة علي خوفاً من ان ينطق بصله القرابه التي بينها وبين محمد ..

نورة : لا ياختي .. الحمد لله ..كل شي تمام وعسى ربي يقومه بالعافية كان ودي اضيفكم بشي بس للأسف اخي.. اخي علي ولا عليك كلافه ممكن تجيب لنا من المطعم تحت مشروبات عصيرات أي شي ..



استغرب علي من تدخل نورة .. لحواره الساخن .. مع منال ..

علي : ابشري .. .. يااخت نورة ..



غادر علي الغرفـــة .. وبقيت نورة ومنــــال وبينهما محمد ممدد على السرير نائماً ..

فتحت نورة غطاء وجهها بعد خروج علي .. وواصلت الحديث مع منال ..

منال: اوه حلو ..انتي شكلك مرة حليوووا ..

نورة : تسلمين ..
- انتي .. من يا اخت نورة .؟؟

- انا بنت خال محمد .
- وليه انتي في أمريكا ؟؟

نورة لم تعرف ماذا ترد أو تجاوب : انا جاية مع زوجي للدراسة ..

- حلو.. وش تخصص زوجك ؟

- نفس تخصص محمد ..

- وليه انتي في المستشفى ؟

- ابد .. صار دمي يطابق دم محمد وجيت اعطيه من دمي ..تعرفين ولد عمتي .. لازم نضحي له .

- مطوله في أمريكا ..

- اكيــــــد لا .

- ليه ؟؟

- لانها بلــد شقاء .

- شكلك ما ارتحتي صح ؟؟

- جنة بلا ناس ما تنداس .. الاانتي زميلتهم في الدراسة ؟؟

- ا م م م م م م م تقدرين تقولين صديقة محمد ..

- صديقه .. بس محمد دايم يتكلم عنك ..حتى في البنج يناديك.!
- ههههههه ياحياتي هو يحبني موت ..

- وانتي ؟؟
- والله .. مادري ما افكر في الحب الحين يا نونو ..

- اجل .. وش فيه تفكرين ؟؟

- افكر اكمل دراستي وبعدها يصير خير ..

- وهو يحبك صــح ؟

- محمد .. شاب حبوب مرة .. لو تقدم لي اكيد ما اقدر ارفضة ..

نورة في تماسك شديد : ربي يوفق الجميع ..



يتبع..


*************

[فيتامين سي]

تماثل محمد للشفاء فقد كانت بقربه نورة كلما فتح أو اغمض عيناه .. واخيراً.. اصدر الطبيب امر بالسماح له بالخروج من اسوار المستشفى .. غادر محمد إلى شقة نورة ..



ازدات حيرة محمد من موقف نورة اتجاه منال .. فهو علم بأنكار نورة لصلة القرابة الاساسية معه وظل هذا السؤال يجول في خاطره .. إلى ان اتي ذاك اليوم ..



.



.


.

جلست نورة بقرب محمد ..ولأول مرة تريد ان تتحدث معه .. فقد طافح كليل هذه الفتاة البرئية .. اقتربت منه اكثر .. وفي هدوء .. كما تعود منها .. قالت :



- يا .. ولد عمتي .. يا زوجي .. بكل هدوء .. وبصمت طلقني .. ارجوك ..

- أيــــش ؟

- كلامي واضح ..

- ليه طيب ؟

- عشانك ما تناسبني ..وانا ما اناسبك .. قلبك لا يمكن ينبض لي .. وانا ارفض اكون انسانه أو حتى زوجة في الظـــل ..

- وامي .. واهلي وش بتقولين لهم ؟

- بقول لعمتي .. سوينا تحاليل في أمريكا وقالوا .. دمائنا وانسجتنا ما تركب مع بعض لذلك مستحيل الانجاب .. وعليه قررنا نترك بعض ...

- وانتي من وين لك هذا العذر ؟؟!!

- الغريق يا ولد عمتي يتعلق بقشاية ..وانا لازم ارجع ديرتي يا محمد لانه خلاص ..مافي امل ادخل قلبك ..

- نورة انتي كويسة بس انا ما اقدر ...



قاطعته نورة فهي لا تريد ان تسمع نباء فشلها ..

- اسكت يا محمد .. يكفي تجريح .. ارجوك .. انا عارفه ان زواجك مني كان دافعة رضوخ لقرار عمتي وخوفك عليها ..وعارفة ان انت تحب وحده ثانية .. منال بصريح العبارة .. وعارفة انك متعلق فيها .. محمد ارجوك كمل اجراءات الطلاق الله يخليك ..خلني ارجع لموطني لعلي اجد هناك قلوب تحبني وتخاف علي لا تخليني ذلييلة لك في هذي الديرة اشوف الخيانة منك واسكت ولا اقدر اعاملك بالمثل .. ريحيني الله يخليك ..

- ابشــــري .. بس ابي اعرف ليه انكرتي عند منال انك زوجتي .؟؟؟!!

- ردت بعد طول صمت :

محمد .. انا شفتك معاها مره في المطعم ..وليلة راس السنة وانت تعبان ما كنت تنطق الا باسمها .. وعرفت انه شي كبير في حياتك ..ربما دخولي في حياتك خرب عليك لذلك ما حبيت اني اضرك ..ولا احب اصلاً اني اضر احد .. كان بإمكاني اقوم واسوي هوشة معاك في المطعم .. وكان بإمكاني اوضح لمنال اني زوجتك وكان عندي فرصتين ..المطعم والمشتشفى ..لكن .. احساسي انك تحبها ، وانك سعيد معاها خلاني ما اقدر اخرب عليك وصدقني كنت حاسه اني مثل عابرة سبيل في حياتك لازم ترحل في يوم من الايام ..وخلاص جاء وقت الرحيل .. واليوم الموعود .. كان ودي ان امارس في حياتك دور الحبيبة .. والزوجة والصديقة .. لكن للأسف قلبك كان محجوز لغيري .. محمد .. كنت اتمنى انك تكون احسنت الاختيار لان منال لو تزوجتها وهي على هذا الحال راح تأذي كل اهلك ..معاك وانا منهم ..



- وش قصدك .. يا نورة ؟؟

- قصدي واضح .. وحده تسهر معاها وتشرب الخمرة معاها .. وتطلع قدام الناس سافرة ..وبكامل زينتها .. كيف تبيها بكرة تربي عيالك على الاستقامه ..انتبه لنفسك يا ولد عمتي .. انت مني وفيني ..اخاف عليك .. وربي يوفقك ..



نهضت نورة من امام محمد ..فهي لا تستطيع ان تكمل ..





وتم الطلاق .. بين نورة ..ومحمد .. بهدوء كما تم زواجها منه بهدوء ..







ركبت نورة الطائرة بعدما ودعت أقسى الذكريات المرة في هذه القارة الخضراء .. وأعلن الكابتن خالد الحربي من جديد إقلاع الرحلة إلى الأراضي السعودية ..وهي تحمل بين ركابتها نورة الحاملة معها صك طلاقها ..



كانت الدموع هي المسيطر الوحيد على نورة .. فهي لا تبكي على طلاقها ولكن تبكي على مستقبلها الذي شارف على الانتهاء والدها الراحل حرمها من مواصلة دراستها ..وكذلك زوجها حرمها من مواصلة حياتها كأي زوجة ..كان الكابتن خالد يخترق السحاب متجهاً بسرعة الريح ، ليوصل نورة إلى مستقبلاًً مجهول .. ولكن استطاعت ان نورة ان تقرر وهي في احضان السماء ان تكمل دراستها الجامعية فهو الفرق الوحيد الذي بينها وبين منال ، واذا استدعى الامر ان تبيع بعض من محلات والدها لتصرف على نفسها ، وسوف تطالب بسكن في سكان الطالبات في الجامعة ..كانت هذه احلام نورة في السماء ولكن هل سوف يرضى الأرض بما قررته نورة في السماء ..





نورة في السعودية ..



وصلت نورة إلى بيت عمتها ، ومع الايام لم تستطيع ان تصارح امر طلاقها الا لزوج عمتها فهو الوحيد الذي ممكن ان تعتمد عليه في ايصال الخبر لعمتها، اندهش كثيراً من هذا النباء واندهش اكثر من سبب طلاقها الاقرب ما يكون للواقع ..



استقبلت العمة بحرقة من الدموع والقهر على مصير ابنة اخاها وعلى حظ تلك الفتاة العاثر .. ولكن نورة حاولت ان تخفف عن عمتها ألم ذاك الخبر .. وتشعرها بانه استخارت الله كثيراً فدلها إلى قرار الطلاق .. حيث لابد لمحمد ان يتزوج من فتاة تناسبة ، واقترحت نورة على عمتها امر اكمال دراستها الجامعية فرحبت عمتها اشد الترحيب وحاول زوج العمه ان يساعد نورة في امور التسجيل فوضع نورة حساس خصوصاً انها ليست من خريجات هذه السنة ولا السنة الماضية انها متخرجة من 3 سنوات ماضية .. ولكن كان مجموع وتقدير نورة يساعدها عن تجد مقعد جلوس في مدرجات الجامعة .......



وبدأت نورة اول خطوات النجاح ، كانت نورة تحب التعليم والدراسة فهي متعتها الوحيدة ، لمت تنسى نورة الفارق الذي كان بينها وبين منال وكلما تذكرت الفارق زادها همة ونشاط وحماس كي تواصل في الكفاح ،، بينما محمد كان يواصل طريقة في الفشل ..





بعد خمسة أشهـــر ...



بعد 5 شهور من طلاق نورة وإنقضاء مدة العدة .. تلقت نورة اتصالاً على هاتفها الخلوي .( الجوال )

- السلام عليكم ..

عليكم السلام .. من معي ؟؟

- انتي الاخت ... نورة ؟

- من تبي ؟؟

- ابي نورة عبدالرحمن .هذا جوالها ؟

- انا .. نورة سم وشبغيت يا خوي ؟

- يمكن ما تذكريني .. ؟

- لا والله من ؟؟

- انا علي ال**** ، صديق محمد في أمريكا ..ا للي جيت اخذته من الشقة عندك وهو تعبان .. تذكرتي ؟

- اه ه ه .. اهلين ..سم في شي اخ علي ؟ انت تتكلم من وين ؟

- انا في السعودية ..خلصت ترم وجيت اجازة بسيطة وراجع .

- الحمد لله على سلامتك .. امر يا خوي ؟

- ما يامر عليك عدو ... بس كنت ابيك في موضوع مهم بالنسبة لي .

- ســم .. اقلقتني يا اخ علي .. تفضل وش عندك ؟

- اول شي انا اسف جداً ان بحثت عن رقمك ويالله حصلته واسف اني دقيت من غير أستاذان ... بس لان الموضوع مهم كان لا زم ابحث عنك ..

- خير وش فيك وش اللي صاير ؟؟

- نورة .. بالمختصر ..انا ابي اتقدم واخطبي اذا انتي موافقة علميني عشان اخلي اهلي يجون لكم في اسرع وقت .



صدمت نورة من الكلام ..

- ايش .. كيف .. طيب وليه انــا ؟

- انا انعجبت فيك من اخلاقك واحتشامك في حكمتك وفي صبرك ..وتضحيتك ويمكن مرت كل المواقف هذي قدامي يوم راس السنة .. وفي المستشفى ..ودايماً الانسان ما تطلع اخلاقه سواء كانت حميدة أو سيئة الا في السفر .. انا ما راح اصر عليك بس من جد يشرفني انك تكوني زوجة لي وام لعيالي ، وانا افتخر بالعيال اللي بيجون منك .. انا صحيح تزوجت وربي ما وفقني .. مع حرمتي وكل واحد راح في طريقة .. وانتي فكري بالموضوع واننظر ردك ..



- طيب انا ادرس الحين ..

- صحيح .. والله .. حلو .. وانا كنت بقول لك ادرسي .. اذا ماخلصتي جامعة واذا تبين تدرسين معي في أمريكا الله يحيك بالعكس انا اعين واعاون ..واتمنى انك ما تقفلين في وجهي باب الزواج .. لاني من جد محتاج لانسانة مثلك .. هذا كل اللي عندي بتركك يوم تفكرين وبكره مثل هذا الوقت اختي بتتصل عليك تعرف منك الاجابة .. طيب استأذن الآن .. مع السلامة ..



- مع السلامـــة ...


يتبع...
******************

[فيتامين سي]

قالتها وهي لا تستطيع ان تستوعب ما قد يحصل حولها .. معقول ترجع نورة تتزوج من جديد وترجع من جديد إلى أمريكا ..لا لا .. هذه اكيد مكالمة كاذبة ..لم تستطيع نورة ان تركز فالموضوع كبير جداً .. ومره أخرى مصيري .. ولم تتردد بعد سويعات من المكالمة من ان تصلى صلاة استخارة تطلب فيها الله سبحانه وتعالى العون في اتخاذ القرار ..







وبسرعة تم عقد النكاح مرة أخرى على نورة .. وفي نفس المكان الذي عقد لها بالمرة الأولى .

ولكن هذه المرة كانت ( الزغاريط ) هي التي تدوي في المكان بدلاً من الدموع .. كانت عمة نورة تكتم دموع القهر على ابنها الذي خسر جوهرة ثمينة فنورة قد لبست الثوب الابيض لأول مرة ..وهاهي كالقمر ليلة اكتماله ..



كانت عائلة علي قد جهزت حفلاَ في استرحتهم الخاصة وقد دعوا إليه العديد من الاهل والأصدقاء وكانت من ضمنهم أهل نورة ..



ُزفت نورة .. تلك العروس الجميلة .. ونثرت عليها الزهور والرياحين ..





كان الجميع ينتظرون اليها بفرح والكل يقول .. ماشاء الله ..



كانت نورة جميلة الجميلات في تلك الليلة كان الثوب الابيض الذي ترتدية جعلها تشع جمالاً .. والورد الحمراء التي تمسك بها زادها احمراراً.. كانت الالحان والاناشيد تتصاقع في ارجاء الحفل ..وكانت الفتيات الصغيرات يتمايلن امام نورة تلك العروس الخرافية .. لم تغادر الابتسامة شفاه نورة فهي لأول مرة ترى هذا الحشد من النساء يتبادلن التهاني ،،



وبعد ليلة صاخبة بالفرح والسرور ذهبت نورة مع عريسها .. إلى بيت الزوجية



دخلت نورة شقتها وهي لا تكاد تصدق ما قد حدث وما سوف يحدث وكانت تسأل نفسها طوال الحفل .. هل القدر ضحك لي ..



كان علي فرحاً جداً فأخيراًً نورة في بيته وبعد قليل بين احضانه ..

اقترب من نورة وهي ترتدي فستانها الثلجي .. وكانت الطرحه تغطي على وجهها لتخفي ذاك الجمال الذي لم يقدره محمد من قبل .. كان علي هذه المرة الأولى التي يرى فيها نورة .. فهو خطب الاخلاق ..واكتفي بمدح اهله له .. ولكنه اكتشف ان اهله ظلم نورة في وصفهم لها .. من دون شعور بحلق النظر وكانه ينظر إلى جوهرة تلمع ..

- بسم الله عليك ..صراحة .. انتي احلى من الوصف ..

ابتسمت نورة ابتسامة الخجل .. وكعادة تلك الفتاة الخجولة .. نكست راسها ..

رفع على بيده وجه نورة فهو لم ولن يشبع من هذا الجمال الذي نزل عليه من السماء ..ومن غير شعور ..توجهت شفتاه إلى جبين نورة .. وطبع قبلة اعتذار .. وقال :

- اعتذر يا نورة على كل اللي صار لك، واوعدك اني اكون لك الزوج والآب والاخ والابن والصديق .. وترى أي شي تشوفينه مني ما يعجبك تراك ما نتي محللــه اذا ما علمتيني فيها . فاهمة ..



هزت نورة راسها وقالت : فاهمة .. وانت بعد ارجوك انا ما وافقت الا لم شفت طيبتك معي فارجوك لا تكون طيبة مزيفة .. تراني في ذمتك .. وترى اللي شفته في الماضي ماهو سهل ..

ومن دون شعور نزلت دمعه من عين نورة مسحها على قبل ان تشق طريقها إلى خد اميرته فهو من الآن سوف يكون محارب كل دمعة تنزل من عيونها .. ومن دون شعور .. احتضنها ..



امضت نـــورة باقي تلك الليلة سهرانه مع علــــــــــــــي ...

...



=======================



في اليوم التالــــــــــــي ...



استيقظت نورة .. على صوت علي العالي .. فهو يتشاجر ولكن مع من ؟؟؟ ...



نهضت من سريرها الحريري .. لتبحث عن زوجها الجديد .. انه هناك في غرفة المجلس .. سمعته يقول وهو يتحدث في الهاتف الجوال ..



- انت لو تعرف العيب والاخلاق يا محمد كان ما اتصلت تهاوش .. البنت وش جاك منها ..غير الطيبة والحلم والاخلاق .. !!!وانت وش عطيتها غير الخيانة ...

- .............................. .....

- اسمع يا محمد .. انا عرفت كيف كنت تتعامل معاها ..ياخي هذي وهي بنت خالك .. انسى انه زوجتك .. ترميها في شقة في أمريكا لا حول لها ولا قوه .. يعني لو ذاك اليوم جاها حرامي من زنوج أمريكا ذولي .. لو اغمي عليها .. لو حدث أي شي لها وينك عنها .. وبعدين ما تكفي منال ياخي اشبع فيها ..

- .............................. ......

- ايه .. هذا اللي عندي .. شوف يا محمد انا ما اشكرك الا على شي واحد بس انك طلقت نورة .. والغريبة انها عاشت معك سنة كاملة في أمريكا وظلت إلى ليلة البارحة عذراء .. والله حرام عليك .. استاثمت في البنت يا رجال .. على العموم صداقتنا ما ابيها لان أخلاقك ما صارت تناسبني .. ولا تمشي مع أخلاقي .. مع السلامه ...



اغلق على الخط وقد تغير لونه فهو احس بالخوف ان نورة ممكن ان ترحل عن حياته ، دخلت نورة مفزوعه ..

- علي ..من اللي تكلمة ؟

- نظر اليها ..ودرجة حرارة دمه لا تزال تغلي .. من شدة ا لحوار الساخن : هذا محمد متصل العم يقول عني اني حقير ..ونذل وسرقت حرمته ..

- محمد يقول كذا من جدك ..وش قصده ؟؟!!!

- مادري شكله حن لك يبكي .. قالها وكادت الدماء تتفجر من شرايينه من الغيرة ..



نظرت نورة إلى زوجها : علي محمد ما عمرة حبني .. ولا فكر فيني ..اصلاً هو اكيد انزعج مثل الطفل حس ان لعبة اخدها واحد ثاني فهو يبي يرجعه ويحطه في صندوق ألعابه.

جاوب سريعاً .. : نورة .. انتي تبين ترجعين له .؟؟

نورة وقد انزعجت من السؤال : اررررررررررجع .. ارجع لمين .. وليه ارجع .. ارجع لذل والاحتقار والاهانه ..والخيانة والسُكر لا صحيح انه حاله ما عجبتني بس وش اسوي هو كبير .. ارجوك على لا تخلي الموضوع هذا يخرب فرحتنا ..ارجوك ..

- نورة .. يا عمري .. شوفي انا من فترة وانا افكر اني ما اواصل دراسة الماجستير في أمريكا واكملها هنا .. والحين احس اني لازم اتخذ القرار لاني ماراح اكون مبسوط في أمريكا خصوصاً ان كل الربع هناك تلقينهم ماخذين موقف مني ..

- عمري .. براحتك ..انا هنا ولا هناك ما تفرق ولول اني افضل ديرتي . احسن بكثير .. يالله تبي اجهز لك الفطور ..


عاشت نورة .. مع علي حياة مليئة بالحب والحنان والرحمة والتسامح .. والتشجيع وواصلت نورة وعلى درب الدراسة كلاً في تخصصه .. واجتازت نورة السنة الأولى بنجاح بينما على واصل دراستها العليا .


وبعد سنة ..وتسع اشهر من زواجهم .. رزقت نورة بمولود ذكراً .. جميلاً .. شبة امه .. وقرر علي أن يسميه (( عبدالرحمن (( ليخلد اسم والد نورة الراحل الذي حرم من ذرية الذكور .. فرحت نورة وعمتها بالمولود الجديد ..واستمرت نورة في نجاحها بالجامعة فلم يكن هذا المولود إلا دافعاً للمواصلة ..







رجع محمد إلى السعودية بعد الفشل المتواصل في الدراسة ..وخاف على ان تضيع منه وظيفته .. الحالية لذا آثر الرجوع بدل المواصلة في المجهول ..



&&&&&&&&&&&&&&&&&



كان هاجس نورة وطيفها لا يغادره خصوصاً بعدما اكتشف ان منال لا تصلح ان تكون زوجة نهائياً فعاداتها وأخلاقياتها .. كما قالت له نورة . .لا تناسب محمد .



كانت عمة نورة تروي لمحمد أخبار نورة ومدى سعادتها وحب زوجها لا وبين الكلمة والأخرى كان يتذكر خسارته لتلك الجوهرة ..







بعد مرور أربع سنوووووووووات



عاش الجميع حياتهم بهدوء فالحزن امتلاء به قلب محمد ..وقد ابعد فكرة الزواج عن باله إلى اجل غير مسمى ..بينما لم يستطيع محمد ان يترك منال تعيث خراباً وتلطيخاً بسمعة أباها الدكتور لذا حاول ان يشرح له حال ابنته بعدما أرسل له أيميل على بريده الإلكتروني .. ونورة وعلي وابنهما .. يعيشون باستقرار وهدوء ..









في تمام الساعة الرابعة عصراً .. في يوم الثلاثاء المشئوم جاء لنورة خبر وفاة زوجها علي في حادث سيارة أليم أدى إلى موته على الفور ............
يتبع..........

[فيتامين سي]

(( الجزء الثامن والأخير ))

عادت الدمعة والحزن من جديد .. يصافح نورة .. ويحتضنها بقوة .. وكأنه كان راجعاً من سفراً بعيد ..ولكن هذه المرة الحزن آليم والدمعة حارقة والحياة القادمة .. أمر من المر نفسه ..



خيمت السحب السوداء على منزل عائلة علي الطيب حيث كان الحدث اشبه بالصاعقة النارية التي احرقت كل الزرع الاخضر الذي زرع في حياة نورة الجديدة .. وخلف وراءه اكواماً من الرماد ...



مرت الايام ونورة معتزله في بيتها .. حداداً على ذاك الزوج الحنون الذي عاشت معه اربع سنوات لم تنزل منها الدمعة ولم يقهرها ولو لمرة واحده ..


كان محمد من الاشخاص الذين حزنوا وتألموا لرحيل علي ..وكان يطلب من امه الاتصال الدائم على نورة لتعرف ماذا تحتاج وماذا ينقصها وكأنه يريد ان يكفر عن ذاك الجرم الذي اجرمه في حقها ..



استمرت نورة تجد الاهتمام والرعاية من كلا العائلتين عائلة زوجها الراحل وعائلة عمتها الغالية .. ولم تستغرب فالجميع متأثر بالحدث .





كانت تضم ابنها عبدالرحمن الذي تشاهد فيه ملامح زوجها علي وبعد انقضاء مدة العدة .. فاتحتها خالتها – ام زوجها – برغبة العائلة بانتقالها هي وطفلها الى العيش معهم في فيلاتهم الخاصة لكي يتمكن الجميع من مراعاتها هي وطفلها ..ولكي يظل عبدالرحمن بين احضانهم ..



وافقت نورة فهي ايضاً بحاجة الى حضنهم ..ورعايتهم اكثر من ابنها ..
في مساء تلك الليلة الشتوية قرر محمد قراراً ..

اتجه الى امه وطرق باب غرفتها عليها .. كان اباه يتجاذب مع امه اطراف الحديث :



-الاب: من ؟؟!!

-محمد : انا شريكك .. محمد ...

ضحك الاب : تفضل الله يحيك ..

دخل محمد وجلس بقربهم وقال :

-كويس انك هنا ..

-الاب : وش عندك ؟؟

-الام : وراك على الولد خله على راحته يتكلم ؟

-محمد: يمه .. تذكرين من 5 سنوات او اكثر قررتي انك تزوجيني نورة .. لان ما عندها احد يحميها .. تذكرين ؟؟!

-الام في حسرة : اآآآآآآآآآه ... ايــــــــه .. اذكر ..



الاب في استغراب : وش عندك يا محمد وش تبي توص له ؟

محمد : ابي ارجع ..اتزوج نورة من جديد ..

الام : والتحاليل .. ا للي تقول انك ما تناسبها ...

محمــد وكانه نسى هذا العذر : هــــــــاااااه .. ايه خلاص يمة اذا نورة عندها ولد يكفينا .. واذا ربي بيرزقني ربي كريم ..

الام : والله فكرة ...

الاب : ام فيصل .. انتي مش تقولين ان نورة بتجي بكره مع البنات .. فاتحيها في الموضوع .وشوفي وش تقول لك ..
اتت نورة على الموعد لزيارة عمتها الغالية واستغلت العمة عدم حضور بناتها الى هذه اللحظه .. وحاولت ان تدخل في الموضوع بعدما نادت زوجها ومحمد ..



استغربت نورة من تصرف عمتها .. وارجعت السبب انها تريد ان يسلم عليها ..



ولكن استغربت من جلوس الجميع .. معها ...

العمة : محمد .. تعال .. نورة متغطية تعال يا وليدي ..

دخل محمد .. فنورة اول مرة تراه بعد 5 سنوات من الفراق .. دق قلبها ليس حباً بل خوفاً .. فقد تذكرت الماضي الحزين ..



محمد : السلام عليكم .. كيف حالك نورة ..

ردت نورة في توتر : عليكم السلام بخير جعلك بخير ...

الأب : شوفي يا بنتي انتي منا وفينا .. واللي يسعدك يسعدنا واللي يحزنك يحزنا .. صح يا بنتي ..

نورة : اكيد صح .. خير يا عم وش فيه ...

الأب : حنا ..... ودنا ترجعين لمحمد وترانا خطبناكِ من عمتكِ وعمتكِ ما عندها مانع ...



نورة صمتت صمت الغرابه .. وكيف ان القدر .. دار دورته لتعود الى محمد .. استجمعت قواها .. وقالت :



عمتي .. معليش ارفض.. الزواج من ولدكِ ..

محمد من غير شعور : لـيــــــــــــــــــــــ ـــــ ه !؟؟



نظرت نورة الى محمد وكان هذه الكلمة التي نطق بها فجرت كل براكين السنوات الماضية الراكده واستجمعت قواها مرة اخــرى وقالت :



وتقول ليــــه ؟؟!! وليه اوافق يا محمد وش اللي شفته معك زين عشان يرجعني لك او يشفع لك عندي !!! تبيني اقول ايه .. تبيني ارجع لسجنك ..



ثم نظرت الى عمتها وقد نهضت من كرسيها .. وهي تشير باصبعها الي محمد تمام كالطفله التي تشير لمجرم اغتصبها :



ياعمة شفتي ولدكِ هذا .. هذا كان المجرم والظالم اللي ظلم بنت اخوكِ .. شفتي ولدك يا عمتي هذا .. هذا سجني في شقة في امريكا ولا كان يجي لي الا لما تتصلين تسألين عني .. شفتي ولدكم هذا . يا ما تركني في شقة اموت خوف في اليوم 1000 مرة .. كل صوت يخليني انتفض من الخوف .. شفتوا ولدكم هذا .. كان خاين .. راميني ويطلع ويروح مع عشيقه له .. وانا مثل الميته في حياته .. شفتوا ولدكم هذا ما عرف بيتي الا يوم كان مخمور .. وخلاني انادي ربعه مثل المجنونه وربي رحمني لو ما كان علي الله يرحمة رجال يخاف الله كان استغل غيابه عن الوعي وسوى فيني اللي يبي .. .. شفتوا ولدكِ يا عمة .. اللي دايم تقولين عنه كل شي زين .. ما عرف قدري ..وطلقني بمجرد ما طلبت منه الطلاق .. شفتي ولدكِ الرجال هذا .. قعدت مه سنة كاملة رحت له وانا بكر ورجعت وانا بكر .. وينك يا محمد .. يوم كنت اتصل عليك واتوسل لك .. تعال .. وينك قتلت الفرح في حياتي معك وين الزهرة اللي زرعتها في حياتي معك .. حاولت امد لك يدي مرات ومرات ومرات .. ولكن كنت ترفضها .. كنت احلى من منال بكثييييييييييييييير .. كنت احبك اكثر منها بكثيييييييييييييييييير .. كنت اخاف عليك اكثر منها بكثييييييييييييييييير .. انا للي رميت لك طوق النجاة يوم دمَك تلوث منها .. بالنهاية فضلتها علي .. وتركتك لها ..

العمه وقد صدمت من حمم البركان التي قذفتها نورة : وش تقولين يا نورة معقوله محمد سواء فيك كذا .. ؟؟؟



نورة : واكثر يا عمة .. و اكثر لو ما ربي رحمني بعلي .. ..



اتجهت نورة الى عمتها .. : عمه انت الحين بان لك السبب رفضي وسبب طلاقي من ولدكِ .. وتكفين يا عمة تكفين انا ما ابي تقطعيني .. لان رفضت محمد .. وخليه بعيد عنا ..



محمد وهو لا يكاد يستطيع ان يتكلم : نورة . انا ارجوكِ تسامحيني .. وخلينا نبدأ صفحة جديدة ..وصدقيني .. بتكوني في عيوني انتي وولدكِ ..



نظرت نورة لمحمد بكل كبرياء .. وقالت :

اسفه .... بعيش على ذكرى علي حبيبي .. الله يرحمة .. اللي اعتبرها .. نسائم من الماضي ...



*



*


*







ثم التقطت طفلها عبدالرحمن ورحلت من منزل عمتها .. بعدما عاهدت نفسها ان تعيش طوال عمرها لابنها ..

كانت صدمة والد محمد كبيرة في ولده ، فلم يتوقع ولم يخطر على باله لحظه من اللحظات ان هذه افعال ابنه .. في الغربة .. فقد فضحته نورة بعد صمت دام طويلاً ..

كانت علامات الغضب مرسومه على وجه والده .. احس محمد انه مجرم والمذنب .. فلاول مره يشعر بجرح نورة .. الدامي .. ولا ول مره يشعر انه صغير وحقير امام اعين والديه .. لذلك قرر ان يهرب الى غرفته فهي الحامية له من تلك النظرات الحارقه ..والغاضبه ...


في اليوم التالي ..



دخلت ام محمد على ابنها الذي لم يغادر غرفته طالبه منه تناول طعاماً ..

-ياوليدي ..قوم يا محمد ..كل لك شي ..

-لازم ... محمد الصمت ..وواصلت الأم الكلام ...

-وش فيك .. زعلان لان نورة .. رفضتكِ .. لازم ترفضك على اللي سويت فيها .. اجل تبيها توافق ..انت ما حفظت عليها ودستها ..وهي الحين بتدوسك ..وخلاص اذا انت ناوي على الزواج انا وخواتك .. ندور لك .. ولا تسوي في نفسك كذا ..



نظر محمد الى امه التي حتى في غضبها حنونه ..ولم يقدر الا ان يرتمي في حضنها باكياً .. سقطت من عيونه دموع الندم على تفريطه بتلك النورة ..وقال بصوت يرتجف مخنوق ..



-يمة .. الله يخليك ِ حاولي في نورة تكفين ابوس رجلك .. قولي لها هو غبي .. كان بزر كان اعمى ..



في هذه الاثناء دخل والده فهو سمع بكاء ابنه الغالي وفضل الوقت عند الباب ليشاهد ..

الأم : وش اقول لها .. نورة ما صارت ذيك البيت اللي على خبرك الضعيفة اللي كانت تخاف وتسمع الكلام لان ما عندها أحد ،الحياة قوتها والحين هي معيدة في الكلية يعني شورها في يدها..



نظر محمد الى امه والدموع هجمت على عيناه بلا رحمة : يعني ايش ما في أمل !!!



رد الوالد الذي كان يشاهد ابنه في لحظات ضعف .. وقال :

-الا ... يا وليدي في امل .. انا بحاول اتصل فيها .. واقنعها وهي تعدني مثل ابوها ..



نهض محمد من سريرة واتجه راكضاً .. الى اباه وامسك بيده يقبلها .. ثم ارتمى في حضنه ... مسح الاب على شعر ابنه المنكسر وقال :

وتذكر ياوليدي يوم تقول .. انك تبي انسانه متحررة تعيش معها قصه حب .. في ذاك الوقت ، قدمت لك امك بنت فيها كل ما يبي الرجال العاقل :: جمال واخلاق ومال ودين .. لكن للأسف يا وليدي ضيعتها من يدك ..
يتبع...

[فيتامين سي]

محمد : انا عارف انها ضاعت يبه تكفا يبه .. كلمها ..

الاب : طيب يا وليدي .. امسح دموعك ونورة تستاهل من يبكي عليها ..
جلس الوالد على سرير محمد .. قرب زوجته واخرج الجوال من جيبه .. وشرع بالاتصال على نورة .. فهي المحاولة الاخيرة لانقاذ ولده من هذا الصراع القاسي ..



فتحت نورة الخط ..

-السلام عليكم يا النوري ..

-- هلا عمي وعليكم السلام ..

-اخبارك .. وشلون دحومي ..

-هههههه يسلم عليك ..

-اقول انتي تحبين ولدكِ دحومي ؟؟

-اكيد .. يا عمي .. غريبه سؤالك ؟؟

-حتى حنا نحب ولدنا حمودي ..وحموودي من امس وهو بس صياح يبي النوري .. وتراني انا وعمتكِ جلدناه الى ان قال آآآمين وهو ندمان على اللي صار ..

-عمي .. الله يخليك ..

-شوفي سالفة انك تبين تعيشين حياتك على ذكرى زوجك هذي ماهي داخلة عقلي .. انتي يا بنيتي .. حلوه واخلاق واي واحد يبيكِ وبعدين فكري لحظة في ولدكِ دحومي .. كم اخت وكم اخ عنده .. يالله قولي ؟؟!

-ولا احـــد ..

-وانتي كم اخت وكم اخو عندك .. ؟؟ ولا احد يعني انتي طول حياتك اللي راحت تحلمين بأخت او اخو تلعبين معه وتحاكينهم وتسكنين معن وتروحين وتجين معاهم . صح يا نورة او لا ..؟؟

-صـــــــــح ...

-اجل وراس .. تبين تحرمين والدكِ من اخوان وخوات يساندونه في الحياة . تبين يعيش وحدي . لا يغرك وجود عمانه الله يخليهم له .. بس يا بنتي ترى الاخ غـــير .. وانتي سيدة العارفين .. وانا ابد اتعهد لك ان محمد يصير عصاك اللي ما تعصاكِ ويخاف الله فيكِ واي شرط تبينه . اشرطية . بس حنى على وليدنا .. والله حالته تقطع القلب هو وعمتكِ .. اسمعي يا بنتي .. لك وعد ان ظلمكِ ان انا اللي اوقف معاكِ وادعس خشته في التراب لو اذاكِ بكلمة ، وبعدين انتي وش مسوية في ولدنا .. شكله متعلق بقوة ..

-هههههه مدامه متعلق يا عمي وراه تركني ..!!!

-بلاه دلخ الله يبعد عنكِ الدلاخة ..

-هههههههه حرام عليك لا تقول عنه كذا .. شف يا عمي اتصالك وكلامك علي عيني وراسي بس وش يضمن لي ان محمد ماهو مغصوب مثل المرة الاولى ..

-مغصوب ,,,!!!! لالالالالا اول نغصبه والحين ما نقدر طيب ودس تكلمينة وتسألينه .. خُذيه ..



مد الاب الجوال لولده .. وكانه مد حبل النجاه له :
محمد : نورة .. انا ما ني بزر عشان يغصبوني ..

نورة : محمد.. انت حساسك بالذنب اللي مخليك ترجع صح ..

محمد : مادري بس من سافرتي .. من امريكا وان بس افكر فيك .. ويوم دريت انك تزوجتي .. انجنيت وبلا شعور اتصلت على علي الله يرحمة – وهاوشته.. انتي فكري بتصرفي وش يخليني اتصل على زوج طليقتي .. الا بالعكس افرح عشان امي ما تضغط على ارجوك نورة انا كنت اعمي وفتحت ..كنت مجنون وعقلت ..



في هذه الاثناء خرجت .. ام فيصل وزوجها.. من الغرفه ..بينما يواصل محمد استماتته من اجل اقناع نورة .. وكان القدر يسخر منه فمن سنوات ماضية كان الجميع يحاولن اقناعه للقبول بها زوجه ..

نورة : محمد وش اللي خلاك تغير رأيك ؟؟

محمد بعد صمت : امور كثيرة . بس اولها .. ورقة نسيتياها في درج غرفتك في امريكا..

نورة في اندهاش : اي ووووووورقة ؟؟؟

محمد : ورقة كاتبه فيه كلام وشكلك نسيتي تاخذينها او انك قاصده تخلينها او ربي خلاكِ تنسينها عشان تكون لي مثل الكف اللي يصحيني ويعرفني قيمتكِ ..

نورة وقد اثار روح الحماس فيها : وش ذك الورقة يا محمد تكلم ..

محمد :: الورقه .. كانت خاطره ..

نورة في دهشة : خاطره ..

محمد : ايه كانت موجه لي .. حتى لو لم تصرحي باسمي ...

نورة وقد تلخبطت كل اوراقها امامها : ايش مكتوب فيها تكلم ؟؟

محمد : االخاطره .. كانت تحكي معاناتك معي .. سميتها :::

جربت معك .. تذكرينها ؟؟؟

نورة وقد احست ان قلبه الميت بدأ ينبض .. نبضات ضعيفه .. قالت : هي معك ..

محمد : اكيد .. بس في قلبي حفظتها .. وكانت تقولين فيها ...






جربت مَعَك ..

كيف اعيش بلا وطن ..

وكيف أحيا بلا أمان ..

وكيف أكون بلا انتماء ..

وكيف أخلف شواطئ الاستقرار خلفي ..

وكيف ابحر بغباء في الأمواج الهوجاء ..



نورة تكمل ::

جربت مَعَك

كيف يكون الحزن جارجاً ..

وكيف يكون الغياب حادّاً كالنصل

وكيف ابتلغ السكَّين في صمت

وكيف تُسافر الذكرى بي كالسكّين

وكيف أتقياُك كدماء ..



محمد :::

جربت مَعَك ..

كيف اتقن دوري أمامك

فمارست دور الوفية

ومارست دور الغبية

ومارست دور الحبل المعلق

ودور الكرة المتدحرجة

ودور الريشة في الهواء ..



يكمل محمد :

جربت معك ..

كل طقوس الموت

وعرفت كيف نموت بلا موت

وكيف نُدفن بلا أكفان

وكيف يضيق الوجود

حين تضيق الصدور

وكيف يصبح المكان كالقبر في الظلماء ..



نورة وقد شاركتها الدمعه تكمل ..

جربت معك ..

كيف اضحك من شدة الخنجر

وكيف اتناسى من شدة التذكر

وكيف اتجاهل من شدة الصفعه

وكيف اصمت من شدة الذهول

وكيف اتغابى من شدة الذكاء ..



جربت معك ..

كيف اكون عاشقة غبية ..

وكيف حين أرى .. لا أرى ..

وكيف حين أسمع لا أسمع

وكيف حين افهم لا أفهم ..

وكيف حين أعلم لا أعلم ..

وكيف اكون تحت شمس الخديعة كالعمياء ..



جربت معك ..

كيف اكون مُتحضرة

وكيف انصت الى حديثك عنها ..

وكيف انتقي الهدايا لها ..

وكيف لا أعترض

وكيف لا اشعر

وكيف لا اثور كالبركان ..



كمل محمد :::

جربت معك ..

كيف اكون امرأة عظيمة

وكيف امارس الوهم على نفسي

وكيف أدعي ان الكون لي وحدي ..

وكيف اتخيل الكائنات طوع أمري ..

وكيف اكون امام القافلة

وكيف اكون فوق كل الاشياء ..



نورة تواصل حروفها المنسيه :



جربت معك ..

كيف اكون امرأة ابدية ..

كيف لا تطويني بك حكاية جديدة

وكيف لا ينال النسيان من ذكرى

وكيف لا يستبدلني قلبك بغيري

وكيف أكون نقطة في أول السطر

ونقطة في آخر السطر

وكيف اكون قصيدة متوهجة في دفاتر الشعراء ..



جربت معك ..

كيف اكون وطناً

وكيف تطرق ابوابي عند المحن ..

وكيف اكون لك في الغربه السّكن ..

وكيف تسافر إلي عبر الأمكنه والزمن ..

جربت معك ..

كيف اقف أمام المرآة أُسافر في

تفاصيلي

أُحدثني

ابحث عنك

ابحث عني

ارسمك فوقها بأحمر الشفاه

و اكتب .. تحتك ..

(( هذا الرجل :

علّمني كيف أحيا بلا ارض ..وبلا أمن ..وبلا سماء ))

كان صوت نورة مخنوقاً بالدموع .. فقد تذكرت كل يوم وكل ثانيه في حياته هناك ..



احس محمد بدموع نورة ولكن واصل الكلام .. لعل امل يشرق من بعيد ..

-نورة .. مثل ما قال لك ابوي .. حطي الشروط اللي تعجبك .. وانا موافق عليها ..

سكتت نورة بينما ..محمد يواصل ..

نورة .. ما اقدر اقول لك اني فرحت يوم عرفت ان علي مات لا بالعكس موته اثر فيني كيثير .. بس حسيت انك مكتوبه لي في السماء مكتوب اني ارجع لك .. نورة تكفين .. احس اني ضايع .. نوره في داخلي دمك في عروقي .. واحس انك في داخلي عايشة .. معي . نورة بختصار .. انــــا .. احبك

اغمضت نورة عيناها .. بمجرد ان سمعت الكلمة الاخيرة .. فهي كلمة لم تسمعها من شفاه ذاك المحمد طوال حياتها .. ابحرت في تلك الكلمة وتذكرت ضعفه وهو في المستشفى مريض .. وبدأ قلبها يزيد في النبضات .. احس محمد بنبضات قلب نورة ..

نورة.. احبك .. احبك
نورة: كل تصرفاتك كانت تقول ان نورة تحبك .. ليه ما حسيت فيها ليه ..؟ ليه خليتني وتركتني ..

-كنت غبي .. ابله .. مغفل .. ضايع سربوت ما اعرف ولا ابي افكر ..

-والحين ؟؟؟
الحين ..تغيرت مثل ما انتي تغيرتي . وواوعدك وربي شاهد علي .. اني اكون لك درع الامان .. واحميكِ من غدر الزمان .. وشجرة تظلل عليك وانك تصيري في عيوني . وقلبي ولا راح اسمح لاي انسان يجرحكِ او يطاول عليكِ بكلمة . وعبدالرحمن بيكون في عيوني .. وان شاء الله ربي يرزقنا اخوان وخوات له .. هاه وش قلتي .. موافقه ...

-خايفة يا محمد ..يكون كلام ..

-لا تخافي .. توكل على الله .. وتأكدي هذي المرة اني احبك .. بصدق بصدق ..

-محمد ...

-سمــــــــــــــي ...

وبصوت دافئ دفء الخريف قالت نورة :

أ ........... ح............ ب................ك ..

محمد وهو كالمسافر العطشان : هااااااااه عيديها الله يرحم والديكِ

-احبك .. يا محمد ..

-طيب موافقه نرجع لبعض ..

سكتت .. ثم تكلمت :: على شرط ..

-ايش هو .. شروطك اوامر ..

-نسكن في بيت عمتي .. الجوهرة ..

-بس .. من عيوووني ..


تزوجت نورة مرة اخرى من محمد ..وعاشت في الدور العلوي ..وزرقت بولدين .. وبنتين .. وعاشت مع عائلتها الصغيرة في حباً وسلام .. وسعادة ..

تمت بحمد الله

[لامارا]

	السلام عليكم ورحمة الله وبركاته كيف حالكم إن شاء الله دائما بخير ؟ كانت هذه احدى روايات باقة شهر إبريل المختارة لكم بعناية قراءة ممتعة لكم جميعاً...... شـكــ وبارك الله فيك ـــرا لك ... لك مني أجمل تحية . موفق بإذن الله ... لك مني أجمل تحية .

[ايمي 2009]

السلام عليكم ورحمة الله وبركاته الحمدلله والصلاة والسلام على رسول الله وعلى آله وصحبه أجمعين موفق بإذن الله ... لك مني أجمل تحية .

[امال س]

شـكــ وبارك الله فيك ـــرا لك ... لك مني أجمل تحية . موفق بإذن الله ... لك مني أجمل تحية .

[أغرودة]

بسم الله الرحمن الرحيم