[اسطورة !]

بسم الله الرحمن الرحيم..

السلام عليكم و رحمة الله و بركاتة..

مساء الخير للجميع.. ما عندي مقدمات مستعجلة مثل كل مره ^_^.. ادري طولت بالبارت بس من الصبح صاحية و عليه و ما بعد وصلت للنقطة اللي ابيه انهية فيها.. مو مشكلة وصلنا لـ نص الجلسة..!! البارت هذا انا احسة تمهيـــد لإجرام البارت اللي جاي..!! انكشف عن مجهول اللي بارت اللي فات.. و طلع لنا مجهول جديد هالبارت ^_^.. عمر الشخصية الجميلة و انحب على طول ماشاء الله عاد لو ينقلب على ليون بـ تنقلبون عليه كلكم .. اعرف حركاتكم..
توجعتوا البارت اللي فات من وعد و انتظرتوا لقائها ببنتها .. و ان شاء الله بـ تشوفونة اليوم و لا تبكون لا اوصيكم.. يمكن تبكون كم مره بـ هالبارت مين داري..!! ما ابي احرق عليكم..
< من العجلة مضيعة ويش كنت ابي اقولكم..!! ما عليش لو طرى علي بعدين بسوي تعديل على المقدمة و الا بـأجلها للبارت الجاي ان شاء الله..
اخر شيء كلمة للي متضايقين من طول الرواية..!! ما عليش اعتقد كلامي كان واضح البارت اللي فات.. و هالبارت انا اقولكم اذا انتم مو عاجبكم الوضع ترى انا ما جبرت احد فيكم يفتح الرواية كل سبت و ينتظرني.. وجود الجميع شرف لي بـ روايتي بس دام مضايقكم وما ودكم تكملون تأكدوا اماكنكم محفوظة سوا كملتوا معانا و الا تركتونا.. و الله يضايقني اقولكم كذا.. و يضايقني اكثر لما اقرأ كلام عن نهاية الرواية.. ما عليش على الأسلوب صايرة نفسية ..!!

حيـــاكـم الله جميعـــاً.. لا تنسوني من دعواتكم..


البارت الرابع و الخمسون..

قبل أعرفك ما أعرف معنى الحنين
و الحزن ما كنت أعرفه و أشبهه

أنت واحد .. لكن أشوفك : اثنين
واحد أحبه .. وواحد أكرهه !!

لـ حمد العيد..

عماد شايلها : وي جعلني فدوة لكـ ..!!
سعود : ترى بـس تصحى وعد بـ نأخذها..!!
عماد : ويش بلاكم بـ تحرموني منها..!؟ نشبتوا لي من يوم صحت ما تخلوني اتهنا تراها بنتي مثل ماهي بنتها..!!
خالد : ويش نسوي لكـ .. نبي نحافظ على العقل اللي باقي براسها.. انت استمتع الحين لين صلاة الفجر.. ما اتوقع تصحى قبلها..
عماد يبوس بنتة وده يقولة صار اختكـم براسها عقل بس عارف راح يهبون فيه مسك لسانة عشان ما يطقطق عليها قدامهم : و الله اذا بـ تجلسون كل شوي تذكروني ما راح استمتع.. (انسدح و حط بنتة عليه) خلوني مع بنتي بـ راحتي..
ابو سعود وقف : انا بـ اريح قبل الفجر.. قفلوا البيبان..!!
احمد : لا تشيل هم يبه كلنا صاحين..!!
ابو سعود : حتى لو.. اقفلوها..
وليد : ويش اخر اخباركم..؟!
مشعل : غير زواج اخواني و ندى ما صار شيء..
وليد : اهـــااا.. انا بـ اروح اشوف خواتي و امي.. و بعدها بـ اريّح.. (وقف و اتجه لـ شباك المجلس يشيك على المكان)..
سعود : ويش فيكـ ..؟!
وليد التفت له : مجرد احتياطات.. انت اللي مختار الحرس..؟!
سعود : ايه.. ليش..؟!
وليد : بس اتأكد.. عن اذنكم..
عماد يناظر وليد لين ما طلع.. و لف على سعود و اخوانة : صاير مهذب اما عن اذنكم..!! خبري فيه يصفق البيبان وراه من غير لا يستأذن..!!
مشعل : من جد.. شكله ماهو طبيعي..!!
ياسر : يمكن بعد اللي مر فيه.. اكيد انه جاب البنت ماهو شيء سهل.. يمكن يكون متوتر او خايف..!!
سعود : ما اتوقع وليد يخاطر.. اذا ماهو متأكد من ثقتهم فيه ما راح يخاطر و يجيب البنت..!!
حاتم : الا ويش بـ تسمونها صار عمرها ثلاث شهور..!!
عماد ابتسم : سميتها.. فجر..
احمد : متى سميتها..؟!
عماد يرفع بنتة فوق : من زمان سميتها بس ما قلت لأحد..!!
ياسر متنرفز : ما كان لازم تأخذ شور اختي..؟! هي بنتها بعد ماهي بنتكـ لحالكـ عدا ان لها حق اكبر منكـ يومكـ تنكرت لـ بنتكـ اول حمل وعد فيها..!!
عماد جلس وهو يناظر ياسر بـ هدوء ما يبي يتهاوش معاه..!! مو خوف .. بس خوال بنتة وما يبي يكسب عداوتهم فوق اللي صار بينه و بين وعد.. خلاص كل مين راح بـ حال سبيلة و ما بينهم الا هالبنت و بس : البنت تتبع ابوها.. و لا تجلس تعيد في الحكي.. اذا اختكـ ماهي متقبلة الإسم عادي بـ اغيره.. (ناظر بنتة) وما سميتها فجر الا عشان الأمل كل يوم يتجدد مع الفجر.. ما ابي افقد الأمل بـ رجعتها و سميتها فجر.. الفجر بداية جديدة لكل يوم..!!
خالد : كلامكـ مقنع..!! الإسم حلوو ماهو شين..!! بس دام عندكـ استعداد تغيره عشان وعد بـ نشاورها..!!
عماد : على فكرة لا عاد اسمع كلمة ان لها حق اكثر مني.. هي بنتي.. مثل ما هي بنتها.. اوكِ اختلفنا تهاوشنا و تطلقنا ما يعني تهضمون حقي في بنتي..!! ما راح امشي هالموضوع..!!
سعود : ويش شايفنا..؟! لا تخاف متى ما حبيت تعال و تسدح هنا مع بنتكـ لين تمل ان ما شالكـ البيت تشيلكـ عيونّا..
..
مقر العصابة..!!
صقر يصرخ عليهم : شلـــون يعني ماهي موجودة..!؟
صلاح : انا فتحت باب الجناح على اساس بعطيها الرضاعة حقتها وما لقيتها..!!
زياد : يعني وشو مشت على رجولها و طلعت..؟!! مين اللي له مصلحة بإنه يرد البنت لأهلها..؟!
صقر ناظر عمر الواقف بـ برود عادي الوضع عنده وما كأن الموضوع يعنية : ومين غيره..!!
عمر ناظر الصقر : خيـــر..!!
صقر : انت ما فيه غيركـ ..!!
عمر : على كيفكـ تتهمني..!! انتم كلكم تعرفون ان البنت ما تهمني.. لو تهمني رجعتها من اول ليلة جبتوها..
سطام : يعني بـ تفهمنا انكـ مو انت اللي رديت البنت عشان ما نجيب وعد..!!
عمر : لا لا لا كذا نوسع الإتهامات.. و ليش ما يكون واحد فيكم اخذ البنت لـ مكان ثاني.. و عنده هدف غير عنكم..؟!
زياد : ما فيه غيركـ هنا يخالفنا..
عمر : عاد انا اليوم ما طلعت من خير شر.. و بـ تأكدون راجعوا الكاميرات على البوابة..!!
صقر : ناصر روح جيب تسجيلات الكاميرات..
ناصر : ان شاء الله..!!
طلع ناصر لـ غرفة المراقبة الخارجية .. و هم واقفين ما جلسوا .. عدم وجود الطفلة بينهم يعني ما يقدرون يوصلون لـ وعد عشان يجبرونها تزرع ادوات تنصت بـ ملابس سعود..!!
عمر يجلس بـ هدوء بينهم و كلهم واقفين ..!! يدري انهم يتمنون امنية وحده يخنقونة لين يموت..!! وهو بعد يتمنى لهم الموت بس في ظل القانون و تحت العدالة..!! و قريب.. قريب ناويها عليهم..!!
ناصر يدخل و جلس و سحب اللاب من الطاولة و يركب نسخة من تسجيلات الكاميرات .. جلس جنبة الصقر ..
مرت ساعة و الصقر و ناصر يعجلون بالتسجيل تبع اليوم كله .. مرت ثقيلة على عمر خايف لا يشكون بـ وليد .. بس يعرف تفكيرهم الخبيث فيه اشياء غبية كثير يرتكبونها..!! و بسبب ثقة الصقر العمياء في ايمن المنذر ما راح يطري عليه انه جاسوس اساساً.. راح يشكون فيه هو.. و هو تثبت براءتة الكاميرات..!!
الصقر وقف : ماهو معقول يعني شلون البنت فص ملح و ذاب..!!
ناصر : اكيد لا... المشكلة اللي اهم..!! اذا غازي و رجالة يعرفون مكانّا..!!
زياد : مستحيـــل اذا يعرفون مكاننا ليش ما داهموا المكان..؟! ليش يضيعون عليهم الفرصة..!!
صقر : عمر انت لازم تعرف لنا التطورات بالمركز..
عمر : الحين عرفتوا قيمتي..!! من شوي لو بيدكـ رصاصة كنت حطيتها بـ راسي..!!
صقر : عميـــــر ترى ماني فايق لكـ ..!!
: خيــــر ايش فيكم..!!
وقفوا كلهم على قدم وحده..! بالأخير كلهم يشتغلون عنده..!! بداية من الصقر مروراً فيهم جميعاً لأصغر حارس هنا..
صقر : بنت عماد ماهي موجودة.. مأخذينها من المكان..!!
: اهــا .. مو مشكلة صغيرة .. نقدر نجيب عماد بـ راسة هنا ما عازة نجيب بنتة..!!
صقر : بس انت تدري ليش احنا جايبينها..
جلس بـ صدر الصالة فـــخم..!! فخــــم..!! فخامة اجرامية بعيد عن الطمأنينة و الراحة.. من تسريحة شعرة اللي غازية الشيب لـ طرف جزمتة البنية : ادري.. راح ندور لنا طريقة ثانية نجيب فيها معلومات من عند غازي و رجالة.. وين الرجال اللي عندكـ ما تعرفت عليه..!!
جلس الصقر : اخذ اجازة.. طفشتة انا هالفترة..!!
: لا تدلعة.. الا قلت لي ويش اسمة..!؟
الصقر : ايمن المنذر..!!
: اهـــا ايمن المنذر.. اسم رنان.. انا عندي شغلة بـ اصفيها بكره الصبح.. ابيكـ يا سطام انت و ناصر معاي..!! عشان لا خلصت بـ ارسلكم بـ مشوار مرتب..
سطام و ناصر : تامر طال عمركـ ..
: و بكره الساعة 2 بالضبط بالليل بـ تتم عملية التهريب.. كلكم بـ تكونون مشاركين فيها.. ما ابي ادنى غلطة .. لأن الغلطة بـ يشوفها غازي بـ بساطة.. و هالمره ما راح يكون فيها رحمة..!! بنتة عندنا من سبع شهور.. ما راح يسكت..
الصقر : لا تشيل هم.. ان شاء الله كل شيء بـ يتم مثل ماهو مخطط له..!!
وقف و وقف معاه الصقر .. : انا بـ اروح جناحي .. على ما يجي الصبح و اصفي اول حساباتي..
دخل الرئيس جناحة الخاص.. و كلهم جلسوا من بعده.. عملية بكره..!! و الغلط بـ يوديهم كلهم بـ داهية..!!
ناصر : ويش يقصد الرئيس.. بـ يصفي اول حساباتة..؟!
الصقر : اكيد مع ابراهيم..!!
..
تفتر بالجناح صلوا الفجر و حضرتة ما رجع و ما يرد على اتصالاتها..!! متنرفـــزة منه.. ماهو معطيها وجه خير شر..!! صار لها شهر و ثلاث اسابيع زوجتة..!! وما هو مهتم فيها كل اهتمامة بـ بنتة اللي ما شافها غير دقيقة..!! همست : الله يأخذها هي و امها و يريحني منهم..!! لبست عبايتها فوق البجامة الحرير و قفلت الأزارير و حطت الطرحة على راسها و طلعت.. نزلت تحت.. شافتهم مجتمعين عدا هو مو موجود..!!
البتول : صباح الخير..!!
: صباح النور..
البتول : عماد ما رجع..؟!
ام ناصر : لا يمه ماهي غريبة عليه تعالي افطري..
البتول كتفت يدينها : لا مو مشتهية..!!
انهار تهمس : يا جعلة دوم..!!
عهود ابتسمت : ناوية تحارشين احد..؟!
انهار : لا انا ما ابلش نفسي بناس بـ مستواها وع..!!
ام ناصر تهمس لـ زوجها : كلمة فضحنا ببنت اختي..!!
عامر : على اساس ولدكـ يسمع كلامي.. ما ينقدر عليه.. حاط لي رجال يتابعونة و قالوا لي البارح سهران ببيت ابراهيم..!!
ام ناصر : ويش يسوي هناكـ ..؟!
عامر : ويش دراني عنه..!!
ناصر مجلس ولده بـ حضنة و يكلم اخوه عبدالله : امي ماهو عاجبها على حساب السنيورة اللي ما تستحي..!!
عبدالله : حتى اخوكـ ما علمها السنع و الا ودي انه يطلقها قليلة الحيا.. نازلة اول ما تغطت و هي تخبر اننا نجلس الصبح هنيا و يعنها يوم شافتنا تلثمت يا عل عيونها العمى..!!
ناصر : بعطيه يومين لو ما رجع لـ عقلة و سنع حرمتة ماني عايز لا اسنعها..!!
عبدالله : ما عاد الا تفضحنا..!
: هـــــــــــاي..!!
ام عامر : لقعــــاي و صقعــــاي يا قليل الحيا..
يوسف : السلام عليكم و رحمة الله و بركاتة.. زين كذا يمه..!!
ام عامر : ما بغيت كنكـ كافر.. الطول طول نخلة و العقل عقل صخلة متعلم و دارس دينكـ و اخر شيء تسلم علينا سلام كفار..!!
يوسف : يمه خلاص سلمت لا تسوين من الحبة قبة..!!
ام يوسف : تعال يا ابوي افطر..!!
يوسف باس راس امه و جلس جنبة : يا عل يومي قبل يومكـ هاذي اللي تفهمني.. مو تسفل فيني..!!
ام عامر : عمكـ وينه البارح ما طل علينا..؟!
يوسف : البارح بـالذات كان مشغول قالي انقلع لأنه ماهو فاضي لي .. سمعت ان فيه احد متصل على وعد و قايلها اذا تبي بنتها تجيهم.. و انقلبوا..
عامر ناظر ولده : تقولة صادق..؟!
يوسف : و الله هذا اللي سمعتة منهم.. حتى يقولون هو نفس الشخص اللي خطف وعد اسمه صلاح..
مريم واقفة جنب البتول : صباح الخير..!!
: صباح النور..
ام عامر : هو صدق اللي يحكيه هالخبل.. متصلين على بنيتكـ ..؟!
مريم جلست بعد ما باست راس امها و اخوها : ايه يمه صدق..
ام ناصر : طيب ويش صار بعدها..؟!
مريم : راح سعود بـ يحققون بالموضوع و كلمت نهى قالت انها انهارت عليهم الا تبي تروح و نوموها و ما كلمتهم بعدها..
عهود : ويش هالحالة بس ينومونها ماهو زين بـ تعود عليها ما راح تنام من غيرها..!!
مريم : لها فترة هادية.. بس البارح رجعت لحالتها اول ما ولدت..!!
عامر : ناصر دق على اخوكـ شوف وينه..
انفتح الباب حتى يدخل عماد وجهة غيـــر عن دايم.. مبـــسوط.. و فجر اليوم غير عشان عاشة مع فجر.. : السلام عليكم..
: وعليكم السلام..
ام عامر : هاه يا وليدي طمنا ويش صار..؟!
عماد مبتسم : رجعوها يمه.. رجعوها .. بنتي رجعت..!!
عامر وقف : الحمدلله شلون شلون.. و .. و..
عماد عرف قصد ابوه يسأل ان كان قدروا يرجعون بنت عمه : لا يبه.. للحين..
عامر تنرفز : شلون للحين..؟! كيف رجعتوا بنتكـ و لا رجعتوها..؟!
عماد : يبه الموضوع مو مثل ما انت فاهمة.. بس ما قدرنا و بس..
ام عامر : و عمكـ ويش حالة..؟!
عماد : ما عليه يمه.. خبري فيه الساعة 2..
ام عامر : الله يفرجها عليه مثل ما افرجها عليكـ يارب ... الله يريحة و يطمنة..
ام ناصر : ليش ما جبتها معاكـ نشوفها..؟!
عماد يجلس معاهم على السفرة تجاهل البتول و يمكن ما شافها اساساً واقفة : ما بعد شافتها امها.. بعدين الوضع ماهو مطمن نطلعها من بيتهم هاليومين.. انتم اليوم روحو شوفوها..
ام يوسف : و كيف صحتها ان شاء الله زينة..؟!
عماد : الحمدلله.. خوالها شافوها و طمنوني عليها..
كانت تهز رجولها من العصبية..!! مووولعة.. من هالبنت اللي رجعت لفت و طلعت.. عماد اصلاً كان معطيها ظهرة لـ ذلكـ ما انتبة ..
ام ناصر : يا وليدي مريتكـ شكلها زعلانة..!! ما يصير اللي تسوية..
عماد يمد يده و يأكل : اللي يزعل من حالة يرضى من حالة..
ام ناصر : ناوي تطفشها مثل ما طفشت اللي قبلها..!؟
عماد : يمه تكفيـــن وعد شيء و البتول شيء ثاني.. لا تخلطينهن بـ بعضهن..
عامر : راضي البنية من يوم تزوجتها و انت مو معبرها .. صح اني ما خليتكـ تأجل زواجكـ كنت ابيكـ تغير جو عن الحالة اللي مريت فيها كنكـ منهبل.. وبغيت ازوجكـ عشان تلهى شوي.. لكنكـ حاط بنت الناس صفر على الشمال و تراكض وراء بنيتكـ و هذا هي رجعت الحمدلله .. يعني ما عاد له داعي تطنش البنية..
عماد وقف : تكفون ما ابي اخرب فرحتي بـ بنتي.. و البتول لا احد يتدخل بيني و بينها.. بـ اروح انام.. تمسون على خير..
عهود : اهم شيء البنت رجعت حمــــاس بـ نروح نشوفها..
ناصر : خير عيالنا ماهم عاجبينكـ ست عهود..!!
عهود : ما قلت كذا بس خلاص ملينا من عيالكم نبي نشوف بنت عماد شلون طالعة..
عبدالله : حتى ولدي انسحب عليه وهو توه ماله الا كم شهر..!!
عهود : ياربي خبري الغيرة للحريم مو للرجال..
في جناح عماد دخل ناظرها و عرف نفسيتها ما يحتاج واضح من ملامحها المقلوبة انها ماهي راضية.. همس : الحين بـ تخرب روقاني..!!
البتول وقفت وهي تناظرة : تو الناس كان ما شرفت يا سيد..؟!
عماد رفع حاجبة الأيمن يناظرها بإستغراب : هالإسلوب تكلميني فيه انا..؟!
البتول : شايف احد بالغرفة غيركـ معي..؟!
عماد يهز راسة : اممم طيب صحصحي و تلاحقي على نفسكـ و التزمي حدودكـ قبل لا اعلمكـ شلون تحسبين حسابي من تسمعين اسمي..!!
البتول : كان زين على الأقل اعرف انكـ معطيني من وقتكـ ... مو راميني هنا لو اني عنز كان طليت عليها كل صبح حطيت لها اكلها و شربها..!!
عماد : استغفر الله .. البتول ترى ما انتِ غافلة عني .. المرادد ما احبة..
البتول : و انا ما احب التهميش.. انت مهمشني بـ حياتكـ .. حياتكـ لـ طليقتكـ اللي ما عادت لكـ ما عادت لكـ تفهم..!!
عماد : انتِ اصلاً تلفين و تدورين عشان توصلين لـ وعد.. يا ادمية وعد صفحة و طويتها من حياتي انتهت حياتي معاها خلاص قضينا..!!
البتول : واضح ماشاء الله.. و بنتها..؟!
عماد وقف مقابلها وهو متنرفز يبي ينهي الموضوع قبل لا يطير الباقي من الترويقة : بنتي.. بنتي فجر بنت عماد.. حطي هالشيء قدام عيونكـ بنتي خط احمر يالبتول ما راح اسمح لكـ بـ حرف واحد تنطقينة بـ حقها..!!
البتول : شوف عماد انا ما تزوجتكـ عشان اكون على هامش حياتكـ و انت تراكض وراء طليقتكـ و مشاكلها.. انا لي حياتي معاكـ زوجة تطلع تروح تجي تسولف معاها .. انت مو معطيني وجه خير شر..
عماد : شوفي انا الحين مروق ومالي خلق الباقي من مزاجي تطيرينة.. لا صحيت ان شاء الله نتفاهم.. و على فكرة انا ما اراكض وراء مشاكل طليقتي.. بنتي اللي انخطفت.. ومن حقها علي القاها و أأمن لها حياتها.. ويش خانتي اب اذا بنتي تنام بين يدين عصابة و لا حميتها منهم.؟! و بما ان بنتي رجعت ان شاء الله بـ القى لكـ وقت..
دخل عماد وهو يشوفها ما خلصت كلامها و تبي تحكي و تهاوش زود..!! ما راح يضحي بـ فرحتة على حساب مشاكل عائلية بسبب غيرة البتول من وعد..!! هذا وهو مطلق وعد كيف لو هي على ذمتة للحين..!! يمكن تذبحة هالبتول..!!
البتول بعد ما سكر عماد باب غرفة النوم : الحين بيروح لها على حساب يشوف بنتة و بيقهرني !! الله يأخذها هي و بنتها اخذ عزيز مقتدر..
..


بيت ابراهيم.. الأغلبية مجتمعين على شرف حضور فجر.. عدا هي ما زالت نايمة عندهم بالصالة بعد ما خدروها..!!
ام حاتم : بسم الله عليها..!! تجنن..
جود جالسة جنب خالتها ام حاتم و تترجاها : خالتي تكفين اعطيني اياها بـ اشيلها..!!
ياسر : ليش احد قايلكـ عايفينها..؟! لا يا حبيبتي ما تشيلينها انتِ مطفوقة و تطيح منكـ ..
جود : لا و الله ما اخليها تطيح .. تكفين خالة الله يخليكـ ..
ام احمد : نوال لا تعطينها اياها و الله غير تدبغ منها تراها بزر..
انقهرت جود ماهم معبرينها : لا و الله..؟! في كل شيء تعاونون ضدي دامني بزر ليش تبون تزوجوني..؟!
احمد : ههههههههههه و الله حشرتكم..
جود جلست جنب ابوها تمسكن : شوف ادري انكـ زعلان مني بس انا مالي غيركـ .. قولهم يعطوني اياها.. الله يخليكـ ..
ابو سعود سحب جود حتى يجلسها جنبه : دانه بابا هاتيها من خالتكـ ..
دانه وقفت و شالتها ابتسمت وجود الصغيرة بينهم يخفف من اشياء كثير و رجعتها فرحة تكسر كل حزن و خوف و قلق يعيشونة طبعاً بعد موضوع سها و خطف الصغيرة.. : سم بابا..
ابو سعود : بسم الله.. (مدها لـ جود) يالله جاء دورك.. بس انتبهي لا تزحلق منكـ ..
جود مادة يدينها بـ حماس حطها بحضنها اول ما حست فيها على يدينها و ابوها ابعد يدينها ضحكت بصوت عالي : ههههههههههههههههههه ونااااااااسة..
ياسر وهو يناظرها الخبلة تضحكـ بـصوت عالي : يبه تكفى غير تأخذها..
ابو سعود : مالكـم دخل في بنتي.. ثبتيها جودي..
جود : بابا خفيفة زي الريشة..!!
شوق و صبا : السلام عليكم..
: وعليكم السلام.. صبحوا على عمهم اول ابو سعود و وقفوا يوم شافوا البيبي بـ حضن جود وهي تضحك..
شوق : مين..؟!
سعود وقف جنبها : بنت وعد..
شوق اتسعت عيونها و ابتسمت بـ فرحة : والله..!!
سعود : ايه.. رجعناها البارح بالليل..
صبا جلست بين عمها و جود على ركبها : وااااو تزنن يا حياتي..
طبعاً ياسر ارتفع مؤشر الضغط عنده للألف من هالكلمتين اللي قالتها..
جود لفت عليها وهي متربعة : تبين تشيلينها..؟!
صبا قامت على طول : لا و الله اخاف..!!
ابو سعود : اجلسي يا عمي ما فيه شيء يخوف..
صبا ابتعدت : لا و الله عمي بعدين تطيح و تبكي راح ابكي معاها..
صحت و هي تسمع اصوات ما تدري هي واقع و الا حلم تشوفة.. فيه صوت طفلة صغيرة تبكي.. و اهلها يتكلمون بـ سعادة عن هالطفلة.. ما فتحت عيونها كل اللي تعيشة حلم .. حلم من كثر ما تتمنى كل شيء ينتهي صارت تشوفة بالحلم..!! دام ما قدرت بالواقع تعيشة تجسد لها بـأحلامها رجعت بنتها..!! .. لفت و اعطتهم ظهرها تبي كل شيء يوقف احساسها سمعها نظرها قلبها كل شيء فيها يوقف..!! تسمع صوت بأذنها بكاء طفلة صغيرة بكت معاها لا شعورياً و هي تدفن وجهها بالمخدة.. ثلاث شهور تعاني.. ثلاث شهور فاقدتها.. لو هي ميتة كان ما زعلت يمكن تبكي يوم يومين لأنها ام .. بس متأكدة انها عند ربها الطف فيها منها.. لكن انهم يأخذونها من حضنها مجموعة عصابة سفاحين هالشيء ما تتحملة فـــوق طاقتها بـ كثير..!!
ام حاتم : ابو سعود ..(آشرت على وعد براسها) صحت..
وقف ابو سعود و جلس عند راسها و يمسح على شعرها : وعد..!!
وعد بصوت مكتوم لأنها ما رفعت راسها : ما ابي احد يكلمني خلااااص حتى انتم حرمتوني منها كل اللي يصير بسببكم انتم.. ما خليتوني حتى احاول ارجعها .. حتى الأمل اخذتوة مني..!!
مد يدينها لتحت اكتافها ورفعها حتى يسندها على صدره : اشش اهدي..
اخوانها منصدمين معقولة ماهي مستوعبة ان بنتها تصيح هنا..!! سعود شال البنت من يدين جود و حطها بحضن وعد اللي مغمضة و تصيح.. : بنتك هنا وعد.. فتحي شوفيها..!!
حلم..!! ايه حلم!! انا من كثر ما احلم انهم يرجعونها لي صرت اسمع اشياء انا ابيها..!! لو افتح بـ اشوف كل شيء مثل ما هو..!! انا ولدت و ثقلي راح..!! بنتي اختفت و انا ما شفتها..!! احمد و حاتم ينوموني عشان ما انهار..!! ياسر يجلس عند راسي حتى يقرأ علي..!! و خالد يذكرني بالصبر .. و مشعل يحاول يضحكني و ينسيني..!! كل شيء مثل ما هو!! خواتي مكتئبات عشاني و عشان سها..!!
ابو سعود مسك يدينها و حطها على بنتها يبيها تلمسها يمكن تفتح و تصحى.. : شوفي بنتكـ .. بنتكـ هنا يا امي..
فتحت عيونها حتى تلتقي بـ عيون سعود.. ابتسم لها يطمنها.. و ناظر بـ بنتها اللي تبكي من بكاء امها.. نزلت عيونها للي يناظرة سعود.. شافتها تبكي مغمضة عيونها و فاتحة فمها تصيح من قلب..!! شهقت : هــــئ..!!
ابو سعود : بـ هدوء بابا.. (ناظر سعود) لا تفلتها يمكن تطيح منها..
سعود هز راسة و وعد تبكي مع بكاء بنتها..!! : بابا هاذي بنتي..؟!! بنتي..؟!
اخذتها من سعود و ضمتها لـ صدرها قبل لا يرد ابوها..
ابو سعود حاضن بنتة و حفيدتة لأنها سحبتها من سعود خايف لا تطيح البنت من يدينها : يا امي اهدي.. بنتكـ بـ حضنكـ خلاص.. هدي..
وعد تشاهق : بابا بنتي..!! هاذي بنتي..!!
ابو سعود : بنتكـ و الله بنتكـ بس هدي..
حاتم جلس على ركبة جنبهم : وعد خذي نفـــس عميـــق..
وعد اصلاً مو مستوعبة كل مشاعرها و حياتها و استيعابها وقف عند نقطة ان بنتها بـ حضنها .. تتنفس من فمها حتى صوت تنفسها واضح للجميع..
حاتم حط يدها على كفوفها اللي شايلة بنتها : وعـــد..!! ركــــزي معي..!! (لكن وعد ماهي مستوعبة صياح و فرحة حتى جسدها صار يرتعش من فرحتها.. حاتم ناظر ابوة).. يبه خذها منها..
وعد تناظرهم مفزوعة : لا .. لا بابا.. لا خلاص..(تمسح دموعها بسرعة) خلاص انا هديت.. و الله بابا هديت..!
انكسر قلبة ما كان قصدة يفجعها.. يبيها تهدأ وما تنفعل .. ممكن يغمى عليها من صدمتها..!! او لـ فرط انفعالها..!! قام حاتم و ابتعد رغم خوفة عليها..
ما كانت وعد الوحيدة اللي تبكي..!! فيه من بكاء عشانها بكت..!! ما تحملوا منظرها و فرحتها شاركوها حتى دموعها.. دانه و صبا و ميار ثلاثتهن بكوا عشانها بـكت قدامهم و الا قبل كانوا هاديات ما دمعت عيونهن..
ياسر يناظرهن صبا واقفة و حاضنة كتابها و خواتة الثنتين جالسات جنب بعض : من جدكن تبكن..؟! احنا نبيها تهدأ و انتن تبكن .. تزيدنها ترى ما تنفعنها بـ دموعكن..!!
صبا انبح صوتها .. لكن بحة دلع : تكسر الخاطر..
ناظرها اول مره يسمع هالنبرة منها..!! نسى انه يكره صوتها..!! صد عنها و ناظر اختة ازين.. وهو بينه و بين نفسة يفكر لو صوتها يبقى كذا على طول ازين من المياعة اللي فيه طول الوقت..!! بس ما ينكر.. ما يتخيلها الا بـ هالصوت..!! مستغرب من وين جاتة هالميوعة كلها..!! يعني صدق هاذي طبيعتها..!! يتذكر اذا كان سمعها مره تحكي بـ نبرة غير هاذي.. اللي يتذكرة انه دايم صوتها يستفزة..!!
وعد و ما زالت بنتها بـ حضنها : خلاص و الله هديت..!!
ابو سعود : طيب ياالله يا امي قومي صلي طافتكـ الفجر..
وعد : ليش كم الساعة..؟!
ابو سعود : ست ونص..
وعد بـ قلق متفجر على بنتها : و بنتي.؟! تخليها معكـ ما تبعد عينكـ عنها..!!؟
ابو سعود اخذها منها : من عيوني .. تطمني البيت محاوط بالحرس روحي صلي و بـ تجين ان شاء الله و بـ تلقينها تنتظركـ لا تطولين عشان ما تبكي..!! يقولون صياحة..!! (قرص خدها الأيمن) طالعة عليكـ ..!!
ابتسمت : عشر دقايق و راجعة..!! نقزت تتوضأ عشان تصلي مو بس الفجر.. ركعتين شكر لله على رجعة راحة فقدتها و فرحة انسلبت منها..!! الحمدلله..
ام سعود : تأخرنا ما حطينا الفطور..
ابو سعود يجلس على الأرض و البنت مخليها بـ حضنة : ابي القهوة..
ام سعود وقفت : ان شاء الله خمس دقايق و كل شيء جاهز..
: السلام عليكم..
: وعليكم السلام .. دخل مبتسم .. متغــــير.. متغيـــــر.. لكنه هو.. "وليد".. شعرة طويل واصل لأخر رقبتة يلامس كتفة .. لبستة ضيقة عليها مبرزة تفاصيل جسدة.. حتى اكتافة عرضت عن اخر مره شافوة فيها.. عضدة.. جسمة تغيـــر.. و حتى لبسة.. لبسة غريب.!! تيشرت اسود سادة بدون اكمام.. و بنطلون اسود.. ضحك على اشكالهم المصدومة : هههههههههههههههههه ويش فيكم..؟! ما عرفتوني..؟!
ام احمد وقفت : و غبني ويش مسوي بنفسك..؟!
وليد يتقدم لها وهو يضحك : هههههههههههه بعيد الشر عنك تدعين على نفسك بالغبنة.. (يقبل رأسها) ويش اسوي انا لا انغبتني..؟!
ام احمد حطت يدها على اكتافة : ويش ذا..؟! هذا اللي مرسلك غازي له..؟!
وليد : ههههههههههه و الله كل شيء يجي بوجة الرجال الله يعين على ما بلاه.. حتى لو ماله ذنب.. بس يمه ترى ما سويت شيء.. كلها رياضة..
ام سعود : أي رياضة يا ولدي.. و الله كنك من هالدشير الصايعين..
قبل وليد رأس ام سعود : ويش بلاكم أي واحد يسوي رياضة صار داشر..؟!
ام حاتم مبتسمة : سلامة الأسفار..!!
وليد : الله يسلمكـ يا خالة..
ام حاتم : صاير كنكـ بودي قارد..!!
وليد يجلس جنب ابوة بعد ما باس راسة : و الله ناوين تسفلون فيني..!!
ام احمد : هاذي سواة مسوية بـ عمركـ ..؟! ويش ذا..؟!
وليد : يمه ويش فيكـ ما اشتقتي لي..!!
ام احمد : هو انت اشتقت لنا..! ما تقول عندي اميه انشد عنها و الا اب اطمنة علي..!! و الا اخوان يمكن احد بهم معتاز شيء..!!
سكت وليد..!! كان شيء متوقع لوم امه..!! ابو سعود ناظر ام احمد : ويش فيكـ عليه.. خفي شوي.. توه جاي ما لحق يرتاح.. بعدين هاوشية مثل ما تبين و ادبغية بعد..
ام احمد تناظر وليد بـ حنان حتى لو هو غلطان بـ نظرها و غايب عنها و لا نشد عليها : جوعان يا ابوي..؟!
وليد : واااااجد..!! مشتهي اكل من يدينكـ الحلوة..!!
مشعل : الله من الفقع..!! بس جالس تسلقها امي..
ام احمد وقفت : انت افتح كتابكـ و ادرس.. خله عنكـ ..!!
مشعل يكلم امه اللي رايحة المطبخ : ههههههههه الحين صرت كخة..!! بـ ازعل يا سوير و انا بعد با اسافر..!! (ما حس غير بـ علبة المناديل على جبهتة..! من غير لا ينشد عرف مين ما احد يجيب الضربة بـ نص الجبهة كثر ابوه..!!) احم ..
ابو سعود : حلوه هاذي سوير.. ما تستحي على وجهكـ ..!!
مشعل : نمـــزح ابو سعود .. شكلكـ حتى انت ناوي تسحب علي..(يلعب بـ حواجبة) يالله عشان اخذ راحتي شوي..!!
صبا فاتحة كتابها و جالسة جنب ياسر يقالها تراجع..!!
جود : لا بـ تجيبين الفل مارك يا دفره..
رفعت عيونها صبا و ابتسمت : ياليت و الله.. بـ انقهر لو ما جبتها الا هالدكتورة عاد لو ما جبت عندها أي بلس بـ انقهر و بـ تذبحني..!!
جود : بـ تنقهرين ابلعها تذبحكـ ليش ويش دخلها..؟!
صبا : تحبنا يا اختي .. نقصت درجة بالإختبار الدوري و زعلت.!! و البارح ارسلت لي اذا كنت محتاجة شيء و هددتني لو ما جيب الاي بلس يمكن ما ارجع..
ياسر يردد بـ نفسة فــــراغة..!! دكتورة معنية نفسها..!!
لف على صبا و هي تصبح على صاحبتها بالجوال : يا حياتي الحمدلله .. لا نمت الساعة خمسة..!!.. هههههههه ادري مو كثير بس بـ اعوض لا خلصت اختبار اليوم احس بـ انام يوم كامل.. ايوه عندي..!! اوكِ لحظة اشوفة لكـ .. (فتحت شنطتها حتى تسحب اللاب توب و تفتحة و بنفس الوقت تكلم صاحبتها و ياسر جنبها عينة على لاب توبها .. اشتغل اللاب و هي فتحت الملفات المصغرة و منسجمة مع صاحبتها) اوكِ .. خلاص لقيتة بـ اسوي لكـ منه نسخة على فلاش.. لا تشيلين هم ما راح انساه ان شاء الله .. مع السلامة..
قفلت الجوال و مدت يدها للشاشة حتى تسكر اللاب لكن وقفتها يد ياسر اليسار على الشاشة تثبتها حتى ما تسكرة صبا .. بعدها سوى تصغير للملف حتى يشوف خلفية سطح المكتب اخذ نفس و عيونة تدور بالمكان و بعدها سكر الشاشة وهو مــتنرفز ما بقى الا هي ..! تحط صورتها خلفية!! ليش ويش هي مستفيدة..؟! لو انسرق اللاب توب و صورها فيه..
وقف ياسر و صبا تحاول تتنفس طبيعي وما تبين انها خايفة..!! ليش ما طرى عليها تغير الصورة..!! لاب توبها يعني عادي ما يستاهل الموضوع يعصب عشانة..!! انتبهت لـ ياسر وقف : يالله..
ام احمد تصب الشاهي : وين يا ابوي ما افطرتوا.. مريتكـ عندها اختبار لازم تأكل..!!
صبا صوتها راح من الخوف تتمنى يسمع الكلام و يخليها لين ما يروق..!!
ياسر : بـ اجيب لها شيء تأكلة بالسيارة..!!
سحب شنطة لاب توبها يشيلها و صبا عروقها كلها تنبض وقفت و هي حاسة نفسها فضحت علاقتهم هي و ياسر..!! تحس واضح انه معصب منها و بـ يفرغ حرتة فيها بـعيد عنهم..!! طلع ياسر و هي لفت عليهم ما تشوف بس لازم تسلم قبل تطلع : مع السلامة..
: مع السلامة..!!
ام احمد : الله يحفظـكـ يمه..
جود تناظر امها بعد ما طلعت صبا : الله يحفظها من ولدكـ بتكون بـخير..!!
ام احمد بـ حزم : وشوو..!!
جود ما همها نبرة امها اللي بـ تهاوشها : انا صادقة.. البنت ذرررربة وهو اعوذ بالله جلاااافة ما ادري من وين جايبها..!!
احمد وقف : لا تدخلين عصكـ بـ شيء ما يخصكـ .. فاهمــة..!!
جود : الله و اكبر احمداني يهدد.. مو لايق عليكـ ما ينفع لا تغير اسلوبكـ اول ازين ترى..
ام احمد تناظر ولدها : خلكـ من هالبزر لو هي تعرف مصلحة نفسها كان ما ردت ولد خالها .. انت ما افطرت يا ابوي..
احمد : معزوم على فطور ملكي بالمستشفى.. عندي عملية لازم اكون بـدري هناكـ ..
نهى : يالله فيه ناس تكره تروح المستشفيات و فيه ناس تستلذ تأكل بالمستشفيات ..
ام احمد : دام عندكـ عملية كل من هالأكل الزين يا ابوي لا تأكل خرابيط هالمستشفيات و الله اكلهم ماهو من زينة الله يكرم النعمة..!!
احمد ابتسم : يمه اقولكـ معزوم يعني احد عازمني .. اذا ما سممني اكلة الله يستر بس..
جود : و هالأحد ماله اسم..؟!
احمد : لو بـ اقول اسمة كنت قلتة من غير لا تنشدين.. و توني قايلكـ لا تدخلين عصكـ بـ شيء ما يخصكـ صاير عجيز عن كل شيء تنشدين.. (رفع يدة) مع السلامة..
: مع السلامة..!!
ام احمد : ما ادري ويش بلاهم هالعيال متغيرين علي..!!
خالد : ههههههههه ويش بلانا يمه هذا احنا ويش حليلنا..!!
ام احمد : ما تشوف اخوكـ هذا اللي جالس و ما حكى شيء من يوم جاء.. و ناظر لبسة و شلون هو قايل..!!
مشعل : انتِ موسوسة يمه .. والا ويش زينة وليدان..
وليد : ما نمت زين يمه و جاي تعبان من السفر يعني غصب بـ اكون هادي.. بس اريح بـ اتشيطن عليكـ و لا يهمكـ ..
جات تجري بـسرعة و كأنها تتأكد اللي قبل دقايق ما كان حلم تشوفة.. بـ تأكد ان بنتها للحين موجودة..!! و هي تركتها مع ابوها و بـ ترجع و تلقاها مثل ما هي معاه..!! ناظرت في ابوها و شافتها بـ حضنة..
سعود يناظرها و تنفسها سريع مبين جاية جري : بسم الله عليكـ هدي..
ما انتبهت لـ وليد اتجهت لأبوها وهي واقفة تناظر ابوها الجالس على الأرض و السفرة مفروشة قدامة و بنتها بـ حضنة مثل ما تركتها بس كان جالس على الكنب و الحين مغير مكانة على الأرض..!! جلست جنبة ويدها ترتعش حطتها على بنتها : يعني صدق..!!
ابو سعود حط يده وراء ظهرها و شدها له : ايه يا امي صدق.. صدق..
بكت .!! وليد صد عنها ..!! مقهــــور ويش اللي بـ يهدي قـــهره.. الشخص اللي عذب اختة هو نفسة اللي زوجة بنتة عشان يحميها..!! يالله قد ايش هي صعبة عليه..!! يحمي بنت الصقر..!! الصقر نفسة هو اللي عذب اختة..!!
ام حاتم تناظر وعد تبكي بـ حضن ابوها : خلاص يا بنتي لا تبكين.. اهدي.. خذيها بـ حضنكـ عشان ترتاحين..!!
جود : ترى ملينا من الدموع خلاص عاد كافي..!!
نهى : انا شكلي بـ اروح بيتي .. طول الوقت صياح..!! نبي شيء يونس..!!
رند الجالسة بـ حضن ابوها : سح و الله بس تسيحون..!! ما يصير تذا..!! الأبلة بـ اللوضة دالت القوي ما يسيح..!!
جود : هـــااااه.. يسيح..!! ليش شايفتنا زبدة حاطينها على النار..!!
خالد يحضن بنتة و يتمايل معاها : و الله صادقة بنيتي القوي ما يصيح..
جود : الله و هالبنت عاد.. لو بنتي متبرية منها من زمان..!!
وعد : وليــد..!!
وليد التفت لها و ابتسم جالس جنبها .. هي اللي جات جلست بينه و بين ابوه : ايه وليدان ما عطيتية وجه..!! ما اشتقتي له..!!
وعد : ما شفتكـ و الله متى جيت..!؟
وليد باس راسها و هي باست راسة.. : البارح..!!
وعد : رجعتكـ فال خير علي..!!
ابتسم وما علق..!! عشانة رجع بـ نفس اليوم اللي رجعت فيه بنتها..!! ما درت ان هو اللي مرجعها.. كانت عنده..
نهى : اقول بنتكـم بـ يصير عمرها سنة و انتم ما سميتوها..!!
حاتم : عماد سمّاها.. فجر..!!
جود مستغـــربة : نعـــم!!! ويش ذا الإسم..!؟! فجر ظهر عصر مغرب عشا..!!!
سعود يناظر جود : فجر.. بالعكس اسم حلو و معناه حلو.. و خلي عنكـ الهلاقة..
وعد تبوس خد بنتها : ما يهمني ويش ما يسميها اهم شيء بنتي عندي..!!
خالد : تراه قال اذا ما اعجبكـ بـ يغيره.. بـ صراحة احنا كنّا بـ نعصب عليه .. بس اقنعنا بالسبب.!!
ام حاتم : ويش السبب..!!
مشعل بـ شاعرية : يقول انه مع الفجر يتجدد الأمل ..! .. وهو كان عنده امل و سمّى بنتة فجر عشان ما يفقد الأمل ..الفجر بداية جديدة لـكل يوم ..! لا لا لا لا ..
ام سعود : ما شاء الله هذا زينة الاسم و الله صادق ابو فجر..
سعود : هههههههههههه اقتنعت امي خلاص..
رند : بابا كم عمرها..؟!
خالد : ثلاث شهور..
رند : يوووه صعيرة متى تتبر عسان انا تلعب معاها..!!
جود : هيـــه انتِ جدتي ترى بينكـ و بينها سنين..
خالد : و انتِ ما انتِ جدتي يومكـ تناقرين بنتي..؟!
رند : لا بابا هازي زود مو زدتي..!!
ام احمد : وين ولدكـ ما افطر..؟!
خالد : نايم..
ام احمد : و الله اكلة ماهو زين هالولد.. ما ادري ويش بلاه..!!
وليد ناظر اخوانة : اقول عطوني ملابس ما جبت معاي بـ اروح اتحمم..
ام احمد : ازين بعد عشان تغير لبس الكفار هذا .. يا ويلكـ ان شفتة عليكـ مرتن ثانية..
وليد : هههههههه يمه مين قال انه لبس كفار بنطلون و تيشرت.. خفي علي يعني ما اشتقتي لي بس تهاوشيني من يوم جيت..!!
ام احمد : تستاهل.. هاذي سواة تسويها بـ عمركـ شوف شكلكـ كيف غادي.. شوف ويش مغبر بـ عمركـ لا يكون تأخذ ابر و الله ما اسامحكـ يا وليدان..
وليد : ويش ابره يمه..؟!
ام احمد تكمل هواشها : شوف زندكـ بـ ينفجر..!!
وقتها ما تحملوا اولهم مشعل اللي انفجر ضحكـ و كملها وليد و اخوانة.!.!
وليد يمسح دموعة من الضحكـ : يا زينكـ يمه و الله تونسين.. هاذي رياضة و الله رياضة.. اجل لو شلت اوزان اكبر و صرت ضخم مثل المصارعين ويش بـ تسوين..؟!
ام احمد : تعقب.. ما ادخلكـ بيتي من بعدها.. ما عاد الا هي تصير مصارع..!!؟
وليد : ما يحتاج تعصبين.. خلاص موقفين.. هي نفس الأثقال ما زدناها.. مكتفين كذا..!! ازين من العصقلة كذا جسم رياضي..!!
مشعل : و الله راق لي الوضع.. ويش رايكـ تعلمني ابي اصير كذا عضلات..
حاتم : ترى الوضع مو سهل..!! (ناظر وليد) انت صار لكـ قد ايش تدرب..؟!
وليد : حول التسع شهور..
حاتم : غريب تكون عضلاتكـ بـ هالشكل الا ان كنت تسوي تدريب مكثف لأن بناء العضلات ماهو شيء سهل..!!
وليد : وهو كذلكـ نتونس بالرياضة و نضيع وقت..
ام احمد : يا وليدي ويش لكـ بالشقا و تعني نفسكـ ..؟!
حاتم : بالعكس يا خالة الرياضة مفيدة.. بس لازم تنتبة لـ نفسكـ و اكلكـ مو تهلكـ نفسكـ تدريب و ما تأكل.. و توصى بالماء..
وليد وقف : ان شاء الله .. انا بروح اتحمم و انام.. و ياليت تغسلون ملابسي هاذي.. ابيها جاهزة ان صحيت.. تمسون على خير..
دنق على ابوه و باس راسة ثم امه و خالاتة و طلع..
ابو سعود ناظر جود : ما اشوفكـ تذاكرين يا هانم اختباراتكـ ماهي الإسبوع الجاي..؟! و الا ناوية تجيبين لي نسبة تجلسكـ عندي..؟!
جود : اوووه رجع ابو سعود لـ عادتة الحين فقت لنا .. لا ان شاء الله بـ اجيب نسبة تدخلني التخصص اللي ابيه..
ام سعود : ويش بلاكـ يا نهى ما تأكلين..؟!
نهى : مسوية دايت..
سعود تنرفز منها: خبـــلة انتِ ..!! من يوم عرفتكـ و انتِ تلعبين بـ نفسكـ .. ويش اللي زايد فيكـ عشان تسوين رجيم..!؟
شوق ضغطت على ذراع سعود و كأنها تقولة شوي شوي عليها..!!
ام حاتم : ويش اللي مسوية دايت..!! انتِ صار لكـ فترة ما تأكلين مثل العالم و الناس ما يصير اللي تسوينة بـ نفسكـ ..!!
ام سعود : كلي من النعمة اللي قدامكـ ما يصير تمنعين عن الأكل .. غيركـ يدور اللقمة وما يلقاها..
نهى : ويش فيكم هبيتو فيني..!! مسوية دايت.. يعني شيء لي.. (ودها تقول ما يخصكم.. بس مو اخوانها اللي تكلموا بس خالاتها)..!!
جود : ما عليكـ بس سوي اللي يريحكـ..
ميار : انتِ ما تشجعين غير على الشيء الشين..!!
جود : اوووه اخيراً تكلمت انسة صامتة.. خير صايرة لكـ فترة ما تحكين.. و اليوم نطقتي ذا الدرة المكنونة..!!
مشعل : و الله صادقة جويد.. صايرة صامتة ويش عندكـ ..!!
ميار : ويش بـ يكون عندي يعني..!! اقول قم ذاكر بس لا تجيب العيد..!!
مشعل : اووبس كأني تهزأت..!! تراني اكبر منكـ يا عيني.. لا يغركـ اني اولى جامعة..
ميار : انت اللي جبتة لـ نفسكـ ..!!
جود تناظر مشعل : و الله لسانها طايل..!!
مشعل : مـــره يبي له قص..!!
ابو سعود : انا اعلمكم الإثنين شلون لسانها طايل..!!
مشعل وقف : ما عليش عندي اختبار الساعة 1 ماني عايف عمري.. تشاااو..!!
ميار تناظر جود : بقيتي انتِ لحالكـ يعني الحين امردغكـ هنا..!!
جود تستهزء فيها : هه .. جربي يالله..!!
ميار وقفت : ماني رايقة اتهاوش مع بزارين..!!
جود : ما البزر الا انتِ.. يالشينة..!!
ابو سعود : ما بقي الا تهاوشين انتِ و اياها عندي..!! خيـــر ان شاء الله..!!
جود قامت مع ميار و انحاشت قبل لا تكبر التهزيئة..!! ما بقي على السفرة الا ابو سعود و حريمة الثلاث.. و سعود و شوق و خالد و حاتم و نهى و وعد..!!
نهى : دام كذا الجوو صار هادي (ناظرت ابوها) احنا نبي نكلمكـ بـ موضوع..
ابو سعود : انتم مين..؟!
نهى : انا و اللي جنبكـ ..!!
ابو سعود بـ هدوء : اعتقد الموضوع منتهي و حكينا فيه من قبل اكثر من مره..(احتد صوتة) ما هو اسلوبي يا نهى اعيد و ازيد بالحكي.. كلامي واضح..!!
نهى : ليش تبي تقفلها بـ وجيهنا.. احنا ما طلبنا منكـ شيء كبير..
ابو سعود : و بــعدين معـــاكـ ..!!
وعد تناظر السفرة من غير لا تلتفت لأبوها : نهى صادقة..!! الموضوع اصلاً ما يفرق معاكـ .. بس يفرق معانا احنا..!! انت لو تبي تأخذ الرابعة بـ تأخذها من غير حتى لا تشاورنا.. طيب مو الأفضل تأخذ وحده احنا نبيها..!!
ابو سعود هالمره هو اللي وقف : قلتيها لو ابي.. و لو ابي ما راح اخذ وحده على ذوقكـ انتِ و اياها.. انا ماني بزر عندكـ تمشنة على هواكن.. عشاني سكت عنكن تطاولت السنتكن علي..!! صحصحي انتِ و اياها و افتكرن من هو ابراهيم بن مساعد..!!
تركهم حتى يناظرونهم كلهم..!! متحطمات امهم من جهة و ابوهم من جهة..!! لو واحد اللي فيهم رافض اهون..!! الإثنين كلهم رافضين..!!
خالد : انتن من جدكن تقولن لأبوي تزوج..؟! غريبة..!! يوم تزوج خالتي منيره اول من زعل انتن..؟!
نهى : تخلخلت عظامها.. ايه نبيه يتزوج ويش فيها..؟!
سعود يناظرهن يستفسر ..!! : خالتي مريم..؟!
وعد : ايه..!! بس هو رافض وهي رافضة..!!
سعود : قايلات لها بعد..!! مو المفروض تأخذون رأي ابوي قبل..!!
وعد : كنّا بـ نشوف ويش رأيهم بالموضوع على بلاطة..!!
خالد ابتسم : و الله عاد خالتي مريم مــزه!!
ام احمد : ويش مزتة..!!!
خالد : ههههههههههه يمه يعني ماشاء الله عليها زين..!!
ام احمد : ايه ماشاء الله دايم مهتمة بـ نفسها اللي يشوفها ما يعطيها عمرها..!!
سعود يأشر على نهى : اصلاً انا ما اصدق هالقرد بنتها..!! المفروض اختها عشان الشبة بس..!!
شوق : حرام عليكـ ويش قرد..!! و الله تهبل نهاوي..!!
سعود : ويش تهبل الا شيفة..!!
شوق : يعني عمتي مريم شيفة..!!(سعود رفع حاجبة يناظرها) انت قلت ان بينهم شبه نهى و عمتي مريم و الحين تقولها شيفة يعني عمتي شيفة..!!
سعود : هههههههههههه لا تحجرين لي مره ثانية.. نهى شيفة و نص بس عاد خالتي مريم ما ينقدر عليها..
نهى : ان شاء الله يارب ترزقة بـ بنت تشبهني..!! عشان يعرف شلون انا قرد و شيفة بعد..!!!
وعد : خليكـ من ذا.. سعيـــدان كلم ابوي .. يعني انت الكبير و كذا يمكن يسمع منكـ ..!!
سعود : ويش تبيني اقولة..؟!
وعد : أي شيء.. تكفى عشانّا ..
خالد : كنت بـ اوقف معكم بس خلاص ما تبون مساعدتي..!!
وعد : خويـــلد لا تخفف دمكـ علينا..!! تكفـــون..!!
سعود : اصبروا فترة لأن ابوي توه مطلق خالتي منيره ما راح يفكر يتزوج الحين..!! خصوصاً هالموضوع اصلاً مو في بالة.. و انتم بعد فاجئتوة بـ هالطلب..
..
قدام بوابة الجامعة..
ما نطق حرف واحد هو اصلاً معصب منها.. دخلت السيارة سكرت الباب بـ هدوء : السلام عليكم..
: وعليكم السلام.. (التفت عليها) نقلتي اللي تبينة من اللاب توب..؟!
صبا رمشت بـ عيونها : ايه..!!
ياسر مد كفة اليمين بعد ما حرك السيارة : هاتيه..!!
صبا : ياسر الله يخليكـ و الله فيه اشياء كثير حتى لو نقلتة انا ما قدرت انقل كل شيء..
ياسر : ويش اللي ما قدرتي تنقلينة صوركـ ..؟! من بعد اختباركـ للحين ويش كنتِ تسوين..!؟
صبا : و الله كنت اشتغل عليه..!!
ياسر : كلامي كان واضح.. ما اعطيكـ الهاردسكـ حقي عشان ترجعين لي باللاب توب..!!
صبا : ويش بـ تسوي فيه..!!
ياسر صرخ فيها : صبـــــــــا..!!!
مدت شنطة اللاب وهي ترجف عادي في اللاب توب و لا فيها.. نطقت بـ صوت يرجف : بس هذا هدية من عمر..
ياسر سحب اللاب من الشنطة ورماها بالشارع..!! و حركـ عليه السيارة اكثر من مره قدام عيون صبا..!! وهي مصدوووومة!!! كل ذا الحقد على حساب كم صورة..!! يمكن يتمنى تكون هي مكان اللاب و يدهسها مثل ما يدهس اللاب الحين..!! مجنـــون تصرفاتة مجنونة..!! ما عرفت شلون تعامل معاه..!! عليه تفكــير غريب..!! احيان تشكـ انه يكرهها من زمان..!! و احيان تشوفة ما يقصر عليها بـ شيء لو يكرهها ليش يهتم بـ امرها..!! حتى يشيل عنها اغراضها خصوصاً ان كان معاها اكثر من شيء.. و عصبيتة المجنونة..!! أي شيء يستثيرها..!! تناظرة وهو وقف السيارة و نزل منها و مخلي الباب فاتح .. يبي يـتأكد ان كل اجزاءة صارت فتات شال بعض منه و رماه بـ كيس و دخل السيارة و رمى الكيس بالمرتبة اللي وراء..!! ويش تفسر تصرفاتة..!! كل ذا عشان صور لها..!! معقولة غيرة..!! غيرة هالكثر..!!
ياسر يحاول يتمالكـ اعصابة و يكلمها بـ هدوء : و الله يا صبا لو ادري ان لكـ صور بالجوال و الا باللاب ما تلومين الا نفسكـ فاهمـــة ..!! هالمره مشيتها لكـ المره الجاية ما راح اعديها..!!
ناظرتة بـ صدمة ..!! مشاها..!!؟! كل اللي سواه و يقول انه مشاها..!! الا لو ما عداها لها ويش بـ يسوي فيها..!! اكيد بـ تكون مكان اللاب..!! عشان يرتاح منها ومن صوتها اللي يضايقة..!!
..