[اسطورة !]

بسم الله الرحمن الرحيم..

السلام عليكم و رحمة الله و بركاتة..

سوري سوري سوري و الله مالي وجه بس عاد يعني اممم ما ادري ويش اقول.. انا كنت ناوية ابدا في البارت من بدري عشان انزله لكم بدري.. و دايم الشيء اللي ابيه يصير عكسة الحمدلله.. و مره تأخرت جات الساعة 10 بالليل و انا ما كتبت الا 20 صفحة قلت يا بنت مالكـ الا تخلينه فصلين فصل اليوم و الثاني هاليومين تنزلينة اول ما تخلصينة و يقفل النت علي و انا بـ اطلع من البيت يعني الساعة 12 بـ تجي و انا ما نزلتة.. قلت خيره .. و الحمدلله يوم رجعت قدرت اخلص البارت و سلكـ الموضوع الحين ادري متأخرة 4 ساعات عليكم.. بس السموحة ان شاء الله احداث البارت تعوضكم.. بس اربطوا لي قلوبكم.. و دموعكم بعد لا تبكون..

سوري للأشخاص اللي ما رديت عليهم للحين.. مره سوووري دايم و انا مشغولة و انا عاطلة ما ادري ويش بلاي يعني احساسي ما يعرفة الا الباطل مثلي..

غيرت احداث البارت و عدت هيكلتها و هذا اللي اخرني اني كنت من قبل كاتبة شيء و رجعت غيرتة حسيتة مو مناسب للوضع.. و فيه اشياء غلط تنافي اشياء كتبتها من قبل.. لكن ان شاء الله و بإذن الله بس انتم ادعوا لي اخلص البارت الجاي بدري قبل حتى يوم السبت عشان انزلة السبت بدري.. دايم و انا متوهقة و ادري كارهين الوقت المتأخر بس مو بيدي.. و الا تبون بارت عشر صفحات ترى عادي هاذي اخلصها و احطها لكم على طول.. ما تفرق.. ما يمدي الحدث حتى يخلص.. < قرقرة..

أخيـــراً شكرا ـ لـ سها على الإهداء في الأسك الله يسعدكـ و يسلم يدكـ يارب..

حياكم الله جميعاً.. و شسمة قراءة ممتعة..

البارت الخامس و الخمسون..

ما عاد لكـ في خاطري رغبة
وفاكـ عندي مثل تقصيركـ ..
انا وصلت لمرحلة.. صعبة
ما حبّك و لا احب احد غيركـ !

لـ / أحمد المطيري..

بيت ابراهيم..
وليد جلس مقابلهم : انا قريب بـ اجيب الأوراق اللي دخلت عشانها هالمكان الوسخ.. و قريب بـ ينتهي كل شيء.. لكن هم ناس يوصلون للي يبونه حتى بأشنع الطرق..!! خطفهم لـ وعد ما جاء من فراغ.. كل شيء مدبرينة..!! المره الأولى كانت من صلاح بس الثانية.. من رجال الرئيس.. و الرئيس يعرف ابوي..!! و متقصدة..!!
ابو سعود : نعــــم..!!!
وليد : وعد ما ذكرت هالشيء بإفادتها رغم انها تعرفة..!! لما انحاشت من المزرعة ما كان بطولة من وعد..!! بـ طلب من ... (سكت يوم انتبة بـ ينطق اسم عمر) الصقر ..!! و الصقر تقصد يسمعها حكي ان السبب حقدهم على ابوي و بـ ينتقمون من ابوي فيها..!! و وعد ما قالت هالشيء.. ليش ما ادري.. وهم عرفوا ويش هي افادتها و ويش اللي سجلتة..!! اصلاً كان شيء بديهي شلون عصابة ذكية يخلون شغالة تفتح الباب لها و تتركة فاتح و تنحاش من غير لا احد يشوفها..؟!
سعود : قصدكـ وعد تدري ان الرئيس عدو لأبوي وما قالت هالشيء..!!
وليد : ايه..!! ما علينا.. مقصدهم مو بس وعد.. فيه اسم انطرى غيرها عندهم..!!
رمى وليد سيجارتة على الطاولة من غير لا يطفيها و كلهم يناظرونة..!! بـ عيونهم تساؤل قلق..!! مين..؟! وليد ناظر ياسر : زوجتكـ ..!!
ياسر اتسعت عيونة مصدوم!! صبـــا..!! : ايــــــش..! وهي ويش دخلها..؟!
وليد ما يبي يقولة عشان عمر ممكن يقهرونة فيها : و وعد ويش دخلها..؟! كلها نفس الشيء..!! لو ما تخليها تدوام ازين ..!!
ابو سعود يناظر وليد اللي يحل و يربط : البنت عندها اختبارات..!!؟
وليد يسحب سيجارة جديدة : الوقاية خير من العلاج..!!
مشعل : اذا هم بـ ينتقمون من ابوي مثل ما قلت ان الرئيس عدو لأبوي عمي سعد ويش دخلة..؟!
وليد يشغل سيجارتة و يجلس على الطاولة مقابلهم : ما ادري انا انقل لكم اللي صار هناكـ .. الحين السؤال المهم ويش الشيء اللي بسببة الرئيس حاقد على ابوي.!.! (ناظر ابوه) ويش هو يبه..؟!
ابو سعود : و انا ادري من هو الرئيس ذا اللي تحكي عنه عشان تنشدني..؟!
وليد : يبه تذكر مين صار بينكـ و بينه مشاكل بالشغل بالحياة بأي قلعة المهم انكـ احتكيت فيه و هالشيء هو اللي سبب الحقد..!!
ابو سعود : اذا بـ الشغل فاعدائي ويش كثر.. و اذا بالحياة انا ما اعادي احد الحمدلله..
مشعل : و اول اعدائكـ عامر..
عماد ناظر مشعل : ايش تقصد..؟!
مشعل : ولا شيء.. بس مجرد تذكير..!!
عماد : اخاف قصدكـ ابوي هو الرئيس..؟!
وليد : لا لو كذا ليش يضر اخوه و ولده..؟! ما احنا اغبياء عشان نشكـ بـ ابوكـ .. بس هذا ما يعني ان الرئيس يعرف ابوكـ اكيد.. مو شرط تكون علاقتهم كويسة ممكن ابوكـ بعد يكون عدو له.. لكن همهم الحين ينهون ابراهيم بن مساعد..
غازي : الحين عطنا الحكي اللي يجمد على الشارب..
وليد ينزل سيجارتة حتى يطفيها بالطاولة جنبة و من غير لا يناظر بـ أحد فيهم : الصقر عنده بنت وحده.. و من كثر ما هو ما يثق بأي احد .. يأخذها معاه حتى لـ شغلة بالعمليات اللي يسويها.. يعني اكيد بـ تكون معاه بـ عملية التهريب.. بتكون بـ سيارة بعيدة عن المكان لكن بـ نفس المنطقة.. من وسوسته بعد ما انقتلن بناتة وقت ما كان عنده عملية صار يأخذها معاه ما يخليها حتى لو حط عنده 100 حارس.. عشان اول ما يخلص يروح يطمن عليها..!!
كلهم يناظرونة مصدومين..!! الصقر يأخذ بنتة لـ عمليات ارهابية..!!
نايف : بـصراحة سؤال محيرني..!! بنتة كم عمرها..؟!
وليد ناظرة : يقول 12 سنة..
نايف : يعني كم سنة قدام ممكن تطلع مثل ابوها..!!
وليد : لا طبعاً.. اذا داهمتوا المكان بـ عملية التهريب..!! انتبهوا لـ ذا النقطة.. اقصد بنتة.. (اخذ نفس استعداد لـ تفجير قنبلتة) لا يصير لها شيء..
غازي : بنتة بزر و حتى لو كبيرة مستحيل نحاسبها على خطأ ابوها.. اكيد راح تكون معنا بأمان..
وليد : اذا اخذتوها وين بـ تحطونها..؟!
غازي : يمكن نحطها بـ دار رعاية ايتام.. نشوف وقتها ويش يصير..
وليد وقف : لا.. بـ تجيبونها هنا..
عساف : ويش اللي نجيبها هنا ..!! انت صاحي..؟!
وليد : انا .. تزوجتها..!!
لحظة .. لحظة.. يستوعبون ..!! وليد بن ابراهيم متزوج بنت الصقر..!! ما احد فيهم نطق ..!! و كأن عقولهم وقفت عن الإستيعاب..! لين صرخ مشعل : ويـــش قــــلت..؟!!
وليد : اللي سمعتوة..!!
ابو سعود وقف : انت صاحي..؟! بـ تجيب بنت واحد مجرم عندي في البيت..؟!
وليد : زوجتي يبه..!!
غازي : لا و الله ..!! شكلكـ نسيت انت ليش مضحي بـ كل شيء ..!! رايح عشان تتزوج بنت الصقر..؟!
ابو سعود : تطلقها يا وليد.. تفهم.. تطلقها.. ما تعتب باب بيتي..!! ابوها واحد من اللي افجعوا بنتي و عذبوها.. و حرموها بنتها لولا ستر الله كان من زمان فقدت عقلها..!!
وليد : يبه .. هدي شوي خليني اقولكـ اللي عندي..!!
ما كان غازي اقل نرفزة من ابراهيم بسبب هالموضوع!! صدمة لهم : ويش تبي تقول يا وليد..؟! شلون اصلاً فكرت تتزوجها..!!؟ وليد!! انا خايف انكـ ناسي ليش انت معاهم..؟! ليش انت تركت اهلكـ ليش انت تضحي بـ حياتكـ ..؟!
وليد : و عشان انا عارف ليش دخلت معهم اضطريت اتزوجها.. الصقر يعتبرني ولده..!!
ابو سعود بـ حدة : ما انت ولده..!! تفهم ما انت ولده..
وليد : يبه انا دخلت هناكـ بإسم ايمن المنذر .. بـ معلومات غير عن وليد بن ابراهيم.. و عشان الصقر واثق فيني.. و مفجوع في بناتة قال يأمن على الباقية فيهن بـ زواجها مني..!! يبه الصقر ما يخليني اشاركـ بأي عملية من خوفة علي..!! انا ادري ان الموضوع مو سهل..!! لا تحسبون انه شيء هين اشوفهم يكيدون لأبوي و لكم كلكم.. و يوجعون اختي بـ بينتها و اروح اتزوج بنتة بـ رضاي..!! انا مجبور..!! و الله انحديت..!! حاولت اقنعة ان بنتة بزر و انا ماني راعي زواج.. لكنه ما اقتنع يقول لا كبرت بـ تعقل انت..!!
سعود : بس انت بـ تجيبها بيتنا..!! استوعب يا وليد..!!
وليد بـ قهر : وين تبوني احطها..؟!
ما احد فيهم رد..!! بس اكيد الكل مو متقبل وجود بنت واحد مجرم بينهم..!! و لو مجرم ما اذاهم الموضوع اهون بـ كثير من تكون اذيتة واصلتهم..!! شلون يتقبلونها..؟!
وليد : أي مكان بـ احطها فيه بـ اضطر ابقى معاها.. انا عطيت الصقر كلمة..!! وما راح اتراجع عنها.. اوكِ ابوها مجرم.. بس هي مالها ذنب (يقنع نفسة..؟! و الا يقنعهم..؟! وده يضحكـ على كلامة ..!! ماهو طايق يشوفها..!! لكنها بـ تبقى معاه على الأقل لين يخلص كل شيء و بعدها ممكن فعلاً يحطها بـ دار ايتام اذا ابوها مات صدق..)..
ابراهيم رجع جلس جنب غازي : بـ يلهدني ذا الولد.. قايلكـ ماهو طبيعي..!! يطلع متزوج..!!
غازي : بـ يجنني..!! اذا صار فيني شيء فـ هو من ولدكـ ..!!
عساف : طيب انا فيه شيء محيرني..!! انت تزوجت بنت الصقر على انكـ ايمن المنذر.. و بما ان ابوها ينقلها معاه وين ما راح يمكن تكون شافتكـ و عرفتكـ و انت بـ تجيبها هنا .. وليد بن ابراهيم..!! شلون بـ يصير كذا..؟!
وليد يناظر جوالة و رسالة من مجهول "اليوم بداية النهاية" عرف انه عمر و انه يقصد عملية التهريب و متأمل القبض عليهم و بداية النهاية يقصد فيها نهاية العصابة : ماني غبي هالكثر.. بـ جيبها هنا و بـ حطها بالملحق وما راح اخليها تشوف احد من اهلي خير شر.. و بعدين يصير خير..
غازي وقف : انا بـ اروح المكتب .. اذا عندكـ شيء مهم كلمني بأي وقت..
وليد ناظرة : العملية اليوم..
غازي رفع حواجبة : اول ما كنت تعرف أي يوم .. ايش عرفكـ انها اليوم..؟!
وليد ابتسم : عاد عرفت.. اهم شيء لا تفوتونهم.. و على فكرة.. شغلة بـ انبهكم عليها.. لا تحطونهم بـ مركز واحد.. خلوا كل واحد بـ مركز.. عشان الرئيس لو يحب السماء ما يقدر يطلعهم..
غازي ابتسم : بمشي لكـ معرفتكـ بـ وقت العملية الحين بس تأكد بـ اجي و احقق معاكـ يا وليد ما راح اخليكـ .. و لا عاد تلقي اوامر.. فاهم...
وليد : ما القيت بس حبيت افيدكم كم مره وهم ينحاشون مننا .. وهم زياد و صلاح و طقتهم.. كيف ومعاهم الرأس الصقر ..؟!
عماد وقف : لا تشيل هم بس نمسكهم و نأخذ الأدلة بـ نرسلها للمحكمة لإصدار الحكم..
عساف : ما راح يفلتون منها ذا المره..
وليد : عساكـم ع القوة..
..
مقر العصابة.. جناح الرئيس..!!
الرئيس ما قدر يمسكـ نفسة من الضحك : هههههههههههههه ويش ذا المخ اللي عندكـ ..؟!
عمر ابتسم : بركاتكـ ..
الرئيس : من جدكـ حامل..؟!
عمر : ايه..
الرئيس : اتخيل شكل غازي وهو يشوف بنتة حامل..!! و الله و كسرتة يا عمر..
عمر : تدريبكـ .. الحين صراحة البنت صارت ثقل علي.. تدري هالفترة كلها عمليات.. و انا من ادخل الجناح هي تزعجني و بما انها حامل بـ زيادة السالفة..
الرئيس يحركـ اصباعة بإتجاة عمر : يسمونها هرمونات الحمل يا خبل..
عمر : اللي هي.. انت تعرف ان دورتي الوهمية على نهاية ذا الشهر مخلصة يعني لازم ارجع للشغل.. و تعرف ان الصقر و البقية يكرهوني و انا تبي الصدق.. ابي هالولد.. ما فحالي اربيه الحين خله لين يكبر و اخذه منها و اشكله على مزاجي..
الرئيس : ما فهمت ويش تقصد..؟!
عمر : اقصد الصقر ممكن ينتقم مني بـ هالولد.. انا ودي ارجع لينا عند ابوها منها هناكـ أأمن لـ ولدي.. و منها نضغط على جرح غازي..
الرئيس : انت من يوم ما تزوجت هالبنت ما احنا مستفيدين منها.. بس عشان خاطر ولدكـ .. انتبة من الصقر تراه نبيه.. و لا تتوقع ان بيت غازي امان لـ ولدكـ لو اشتهى الصقر دخل بيت غازي و ذبح ولدكـ و طلع..
عمر : اجل..؟! هنا ماهو امان بعد.. خصوصاً مع رجعتي للشغل..
الرئيس : لا تخبر احد انه بـ يجيكـ ولد.. خلهم على عماهم.. و رجعها لأبوها.. و ما اتوقع يوصل الصقر و الشباب خبر لأن غازي اكيد بـ يحاول يلم الفضيحة..
عمر مصدوم من موافقة الرئيس..!! بدا قلبة ينغزة من هالموافقة..!! ما توقع ان خروج لينا من هالمكان بـ ذا السهولة.. اللي كان متوقعة اقل شيء كم اصابة.. اما انه يطلع فيها من غير أي اصابات و برضا الرئيس..!! اكيد فيه ان بالموضوع.!! : طيب بـ اشوف.. لاني مشتهي اريح من صداع الراس اللي مسببتة لي..
الرئيس : ردها اليوم وقت ما يكونون هم بالعملية لأنكـ ما راح تشاركـ فيها..
عمر بإستغراب : ليـــش..؟!
الرئيس : ما ابي احد يشوفكـ و يشكـ فيكـ .. انت اخر الشهر بـ ترجع لـ وظيفتكـ و اذا اضطرينا نقدمها بـ ترجع لو بكره.. ما ابي كل رجالي اللي اثق فيهم بـ عملية وحده..
عمر : اللي تشوفة..
الرئيس بـ تأكيد : بس اكيد بـ نستغل روحتها لأبوها..!!
عمر : شلون..؟!
الرئيس : بـ تكون هي جاسوسنا الجديد.. دام خسرنا وعد.. ما راح نخسر لينا..
عمر حاول يبين الموضوع عادي : كيف بـ نستغلها البنت عنيدة بـ شكل ما تخيلة..
الرئيس : بـ تضغط عليها بـ ولدها .. بـ تهددها انكـ بتأخذة منها بس تولد و بتحرمها منه اذا ما نفذت اللي نبيه.. (بعدم اهتمام) و اللي نبيه بسيط.. مجرد اداة تنصت تحطها بـ ملابس ابوها..!! بسيطة مره..
عمر هـــدوء ما يبي ينفعل .. : اوكِ بـ اتفاهم معاها على ذا الموضوع بعدين بـ اجيب لها طاري تروح عند ابوها لأني ما اضمنها لو ساومتها على الروحة قبل..
الرئيس : حلوو خلكـ دايم كذا ذهنكـ حاضر.. شلون بـ ترجعها لأبوها..؟!
عمر استغرب من السؤال : بـ وديها لـ بيتة بـ اخليها تدخل و امشي..
الرئيس رفع حواجبة دليل على الرفض : لا .. بـ تروح بيت عمكـ ابراهيم.. و تقابل غازي هناكـ و تسلمة بنتة.. ابي حتى عمكـ يولع من الموضوع..!! فاهمني..
عمر : من جدكـ ..؟! انت ما تعرف عمي ابراهيم..؟!
الرئيس : الا اعرفة .. و عشاني اعرفة ابي اقهرة بـ كل شيء .. حتى لو موضوع تافهة.. بس هذا الشيء مو تافهة.. علاقة غازي بـ ابراهيم قوية.. و الإثنين ينقهرون مع بعض..!! يعني مشهد ينشرى بالألماس.. عدا ان ابي غازي يلهى بـ وجود بنتة عن العملية.. فهمتها يا ذكي..
عمر : اجل يبي لي اخذ سلاحي معاي.. مع وجود عساف و سعود ممكن الرصاصة يحطونها بين عيوني..
الرئيس : اذا حسيت انه الشيء بـ يصير اطلع قبل.. لسى محتاجكـ بـاقي ما خلصت حسابي مع ابراهيم.. ان ما خليتة يلف الشوارع يدور لقمة عيالة..!! راح اخذ حقي منه ثالث مثلث..
عمر : و انا ابي حق ابوي.. عمي ما قصر.. استغل هدوء ابوي و تفاهمة و طيبتة و لهف كل فلوسة.. ما خلى و لا بقى على قلبة..!!
الرئيس : انا وعدتكـ يا عمر بـ ارجع حقي منه و حق ابوكـ بس اصبر علي.. بـ تشوف عمكـ هذا اللي رافع خشمة راسة بالتراب.. و بتدوس عليه بـ رجلكـ ..
عمر وقف : قريب.. ان شاء الله قريب..


بيت ابراهيم..
ابو سعود : وين مشعل..؟!
ام احمد : طلع مع عمه راكان..
ابو سعود : طبعاً ما استأذن مني عشان ما ارفض..؟!! هايت لي مع راكان يبي لهم الإثنين مين يقضبهم القاع..
وليد : ليش ويش مسوين..؟!
خالد : ابد على ذا الإستراحات..
وليد : اها... الا من يوم جيت ما شفت سهاوي وينها..؟!
لا رد..!! السالفة اللي يتناسونها من ثلاث شهور ..!! لأن مجرد التفكير فيها قهر..!!
ام احمد تناظر ياسر : وين زوجتكـ يا ابوي..؟!
ياسر : نايمة..
ام احمد : يا عيني عليها يمديها تعبانة اليوم عندها اختبار و بكره عندها اختبار..
ياسر هو نفسة اللي حط لها منوم عشان ما تذاكر و يقنعها ما تروح الإختبار : الله يعين..!!
وليد : ليش حولتي الموضوع يمه..؟! سها وينها..؟!
رند نقزت جنب وليد و مسكت شعرة : سعركـِ تويل..!! زي البنات.. اعطيني هو انا بنت و انتِ ولد..
وليد يناظرها ناقزة عنده و هي حتى ما فكرت تسلم عليه.!.! و حاسدتة على شعرة..!! : نعم..!!
رند تناظر جدها تبيه يوقف معاها : ابوي دوله يعطيني السعر هذا حق البنات.. مو الأولاد..!!
ام احمد : صادقة بنيتي و الله هالبزر تعرف ان الشعر للبنات.. و هذا مطول لي شعرة على ويش هاه..؟!
وليد ما فاتة تحويل الموضوع لكنه يجاريهم : الحمدلله ربي منعم علي بـ شعر ناعم و الكل يتمناه ليش ما اطولة و افرح فيه..؟!
ام احمد : ان ما حشيتة لك على الصفر و انت نايم ما اكون ساره..
وليد : ههههههههههه لا عاد سوسو خصوصاً هالفترة تراه غالي علي.. لا تتهورين..
ام احمد : و نازل لي بـ هاللبس و انا ناهيتكـ عنه.. ويش قصتكـ تبي تعصيني..؟!
وليد : ما عشت و لا كنت.. مير ما جبت لي ملابس و هاللبس مريحني..
ام سعود : ويش مريحكـ فيه يا ولدي و الله يجيب الغلقة..
نزل سعود بسرعة تنحنح .. انتبهوا له اول من وقف شوق..!! لما شافت لبسة..!! بالليل.. يعني يمكن.. يكون عنده شغل خطر..!!
ام سعود ناظرتة و قلبها بـ يوقف ما قدرت توقف : انت.. وين رايح.!.!
تقدم لها سعود و جلس جنبها باس راسها : دعواتكـ ..!!
ام سعود : عندكـ عملية..!! يا ويل قلبي..!!
مسك كفها و باسها : لا تدعين على عمركـ بالنار.. يمه انا قد قايل لكـ الويل وادي في جهنم.. تكفين لا تقولينها.. و انا ان شاء الله مو مطول..
ام سعود : رايح للموت..؟!
سعود : عشان الوطن الأرواح ترخص..
بكت شوق..!! طلعت من الجلسة..!! مو متخيلة الوضع.. ابوها ما قد قالهم ان عنده عملية يروح و يجي بـ حفظ الله .. ناظرها سعود وهي تطلع من جلستهم..!! تنهد..!! اصعب مهمة هي هاذي اصعب حتى من المداهمة..!! انه يقلق امه و ابوه اخوانة و خواتة و زوجتة.. بس مضطر..!!
ام سعود : تكفى لا تطول علي.. غير تطمني من يوم تصير بأمان..
سعود : تكفين لا تنتظريني.. الله يخليكـ لي نامي و ارتاحي الشغلة بسيطة ماهي صعبة.. انتِ بس ادعي لي..
ام سعود : الله يوفقكـ و يحميكـ ..
وقف سعود و اتجه لأبوه اللي وقف له .. باس راسة : دعواتكـ ..
ابو سعود : الله يحميكم.. انتبة ..
سعود : ان شاء الله..
جود : يالله ويش هاللحظات..!! سعود رجاءاً غير هالشغلة كذا بـ نصيح..!!
شد سعود اذنها لين وقفت : كلنا للوطن فدا..
جود باست راسة : ترى من جد بـ ننتظركـ مو تسحب علينا.. ما احنا متعشين لين تجي..
سعود : انتِ بالذات تعشي و ارجعي لكتابكـ و اقضبية تراكـ مهملة.. فاهمة.. عليكـ رياضيات يوم السبت..
جود : اقولكـ خلاص نام هناكـ لا تجي..
سلموا عليه اخوانة احمد خالد ياسر حاتم و وليد.. بعدها خواتة باست وعد راسة : عمليتكـ لـ صلاح و جماعتة..!!
ناظرها شوي بعدها نطق بـ هدوء : لا.. انتبهي لـ بنتكـ صيـــاحة..
بقي اخر ثنتين اللي بكن اصلاً قبل لا يسلم عليهن.. دانه و ميار.. حضن الثنتين مع بعض : افااا الصياح ذا و انا لسى ما طلعت مع الباب..!!
ميار : الله يخليكـ طمنا عليكـ كل نص ساعة..!!
سعود : اووف كل نص ساعة..!! عز الله ما خلصنا.. روحي اقضبي كتابكـ و خلصي مادتكـ .. عليكـ هالترم مواد كثيرة عشانكـ ما درستي الترم اللي فات .. ضايفة مواد اكبر منكـ ..
ميار : ما عليكـ انا قدها..
سعود : امتياز.. اقل ما يعتبر..
ميار : طيب..
سعود : دندونة خلاص .. و الله تحسسوني اني ما عاد بـ راجع لكم.. استهدوا بالله.. ترى ما عاد اسلم عليكم.. اروح لـ شغلي و ارجع من غير لا تدرون.. كل مره بـ تصيحون كذا..؟!
دانه ابتعدت عنه بـ فشل انها تسكت.. سعود ناظرهم ناقص ندى و نهى و مشعل و اكيد سها..!! موجعة قلبة يروح و يمكن ما يرجع.. آشر لـ حاتم و ابتعد عنهم.. لحقة حاتم مستغرب.. : ايش فيكـ ..
سعود : شوف انا بـ اروح وما ادري ان كان هذا نهاية عمري.. ابي اطلب منكـ طلب..
حاتم : افا عليكـ تأمرني مو تطلب..
سعود : اذا روحي راحت .. ابيكـ تقول لـ سها اني مسامحها.. حتى لو ماني راضي عن اللي سوتة بس اختي و اعرفها قلبها رهيف لو يصير لي شيء بـ تجلس كل عمرها بـ حسرة اني رحت و انا زعلان.. عشان كذا قولها اني راضي عنها.. و لو ربي كتب لي عمر جديد راح اصلح اللي صار ان شاء الله..
باس راسة حاتم..!! سعود الأخ الكبير احيان يحسة اب ثاني للعيلة.. تقاربة من ابوه فضيع.. حتى يفهم على ابوه من غير لا يحكي.. نفس شخصية ابوه بـ كل شيء.. و مستحيل يرفض لأبوة أي شيء بالعكس ينفذ وهو راضي لأنه مقتنع ان ابوه يسوي الشيء الصح.. : الله يحميكـ و يردكـ لنا سالم.. بس لا تنسى زوجتكـ ..
ابتسم سعود : ماني ناسيها الحين بـ اطلع لها..!!
رجع حاتم للجلسة و طلع سعود فوق.. تفاجأ اول ما فتح الباب بـ شهقات شوق..!! تبكي من قلب و كأن صاير له شيء..!! اخذ نفس .. تقدم منها : الله يهديكـ ..
زاد صياحها من سماع صوتة ما رفعت عينها له بالعكس غطت وجهها و بكت زود.. ماهي متخيلة ان ممكن يصير له شيء و ما عاد تشوفة مره ثانية.. جلس جنبها : شوووقي بسم الله عليكـ ويش ذا اللي تسوينة..!!
شوق من غير لا تشيل يدينها عن وجهها : لا تروح.. ما ابيكـ تروح..!!
سحب يدينها و كشف عن وجهها .. ابتسم : ما توقعت اني غالي هالكثر.. من جدكـ هالدموع كلها عشاني بـ اروح بس..
شوق تحركـ رجولها و كأنها بـ تنقز استنكار من كلامة : و الله غالي و الله غالي لا تروح..
سعود اختفت ابتسامتة مسك يدينها بين يديه : بسم الله عليكـ اهدي.. لا تخليني اروح و قلبي يغلي عشانكـ .. تكفين هذا الوطن لو يطلبنا ما نتردد لحظة وحده.. لا توجعيني شوق..
شوق : آســـفة.. بس و الله مو قادرة اتحمل..
سعود : اعتبريني رايح الشغل عادي مثل كل مره.. انسي الموضوع و ذاكري و ان شاء الله ما تحسين الا و انا داخل عليكـ .. بس انتِ الهي نفسكـ بـأي شيء..
شوق ما ردت ..!! سعود : شوق كلميني..!!
شوق هزت راسها .. سعود شدها من معصمها : يالله قومي معاي غسلي وجهكـ ..
قامت مستسلمة..!! دخلت الحمام وهو وقف على الباب يناظرها غسلت وجهها ثلاث مرات رفعت نظرها له دموعها تخالط قطرات المويا على وجهها ما تبيه يعرف انها لسى تبكي : لا تطول..
سعود : من عيوني.. بس انتِ ذاكري و ابي ارجع الاقيكـ مخلصة المادة.. اوكِ..؟!!
هزت راسها.. طلع حتى تنهار جالسة اول مره تعيش هالوضع..!! سمعها ..!! وده يرجع بس ما عنده وقت.. نزل يجري على الدرج .. اتجه للجلسة ناظر خواتة : شوفوا شوق.. اذا جلست على ذا الوضع اعطوها منوم..!!
كلهن ما ردن استغربن..!! منوم..!! ام سعود وقفت : ليش..؟!
سعود : شوفيها يمه.. اذا ما قدرتوا عليها نوموها..!!
ابتسم ياسر لا شعورياً الحل الأول و الأمثل.. التنويم..!! هو منوم زوجتة ما يبيها تذاكر عشان ما تداوم بكره.. و الحين سعود بـ ينوم زوجتة..!! صدق شر البلية ما يضحكـ ..!!
ام سعود وقفت جنبة : خلاص يا ابوي انت روح و انا بـ اشوفها..
سعود باس راسها : فمان الله..
: مع السلامة..
ام سعود : الله يحفظكـ و يردكـ لي سالم..
ابو سعود : خالد دق لي على مشعل قولة يرجع الحين..
خالد يسحب جوالة من جيبة : ان شاء الله..
ابو سعود : هاه جودي.. وين كتابكـ ..؟!
جود تحكـ شعرها : بـ غرفتي..
ابو سعود : يالله ما ابي اشوفكـ بدون كتابكـ ..
جود : بابا ليش هالتعقيد.. شوف اول كانت عندي ريما.. و قالت انها ما فتحت المادة حتى ابوها ما هاوشها بس يعنني يقولها ذاكري وما يدري.. انت سو مثله قولي ذاكري وما عليكـ بالباقي..
ابو سعود : ريما بنت مين..؟!
جود : بنت غازي يبه ويش فيكـ .. ربيعكـ عاد غازي..
ابو سعود ابتسم : اجل بـ اهاوش غازي اخليه يقضبها كتابها.. قمي ذاكري اشوف..
ميار وقفت : انا بـ اروح اشوف شوق و اذاكر..
جود : خذيني معاكـ شكلي مطرودة من الجلسة بعدين ينادوني يقولون لي تعالي اجلسي افتحي أنفسنا ..!!
ام احمد : ذاكري ازين كود تدخلين الجامعة و الا بـ تقعدين عندي لا زواج و لا دراسة..!!
وقفت جود عند ذا النقطة اللي ما خلصت منها رغم ان ابوها رد على خالها بالرفض عشان ما تفشلة..!! : ماماتي خلصنا من ذا الموضوع..
ام احمد : لا ما خلصنا.. انتِ متى بـ تكبرين..؟!
جود : ماما انا عندي اختبارات يعني لازم نفسيتي تكون كويسة و حلوة و انتِ كذا تضغطين علي..
ابو سعود : خليها تقعد عندنا توها بزر ما تحمل مسؤولية بيت.. يبي لها دق راس للحين..
جود : احم احم.. عن اذنكم..
وليد يناظر الدرج بعد ما طلعت جود لف على امه : ليش ويش مسوية تهاوشونها..؟!
ياسر : خالي خطبها لـ مهاب و رفضتة..
وليد : اهــا.. و ليش زعلانين غيرها ردوا ناس يجي لهم قبيلة ما زعلتوا..؟! < من باب المبالغة..
ام احمد : لانها ما تعرف مصلحة نفسها بزر و تاركين امرها بـ يدها..
وليد : طيب .. متى بـ تتكرمون علي و تجاوبون ليش ما شفت سها للحين..؟!
وعد نزلت بنتها على الكنب و اتجهت لجهة ابوها و جلست جنبة.. ناظرت وليد : زين انكـ فتحت الموضوع.. عشان ما يبقى معلق..
ابو سعود : انتِ خليكـ بـ بنتكـ و لا تدخلين بـ شيء..
حاتم : يبه.. انا قايلها.. ابي احد يعاوني.. مو حرام اللي قاعد يصير..؟! ما تشوف انها تعاقبت فوق غلطها..؟!
ياسر : لا ما تعاقبت للحين..
حاتم : ياسر لا تقسي قلبكـ عليها.. مهما كان هاذي اختكـ .. الحين الكل صاد عنها لو تعتاز شيء بسيط و الله ما راح تفتح فمها بـ كلمة.. تخيل لو هي تعبانة..؟! ترضاها تألم طول الليل و انت ما تدري عنها..!؟ انا ما ادري طبعكم غير..؟! قلوبكم ما اصنفها لا قاسية و لا طيبة ويش طبيعتكم ما ادري..؟!!
وليد : ليش..؟! ويش مسوية سها..؟!
ام حاتم حاطة يدها على قلبها.. لا يكمل وليد اللي بدوه خالد و ياسر من ثلاث شهور و وتروح بنتها فيها..!! بنتها اللي منحبسة بـ غرفتها من ثلاث شهور..!! ما تدري عن أي شيء يصير بالبيت.. مجرد الشغالة تدخل لها اكلها و تطلعة.. حتى هي ما تطمنت عليها.. مجروحة منها ايه.. بس ما ترضى احد يضرها..
خالد : من ثلاث شهور.. جانا واحد يخطبها..
وليد استنكر الموضوع..!! : طيب وين الإشكالية..؟!
خالد : مصري.. و بوسط مجلسنا يقول انه يحبها و تحبة..!!
وليد ابتسم : وشو..!! هههههههههههههههه..
ياسر : ما احنا جالسين نتريق.. يحمد ربه اللي ما كنت بالجلسة و الا كنت خليت ابوه يشيلة محمل.. ما عاد الا هي..
وليد : طيب و انتم زعلتوا عشان كذا..؟!
حاتم ابتسم دام وليد ماخذ الموضوع ببساطة ممكن يوقف معاه.. و ينهون هالموضوع بالشكل الصحيح..
احمد : اللي زعلنا مو هذا.. اللي زعلنا بنتنا اللي نوديها كل يوم الجامعة تطلع عشان تشوفة..!!
وليد تفاجأ ..!! : تطلع معاه..؟!
وعد بـسرعة : لا.. لا تفهم غلط..!! مو كذا..
وليد احتد نظرتة وهو يحركـ راسة اتجاهها : اجل وشو..؟!
وعد : هو .. ولد دكتورتها.. و هالدكتورة.. يعني دايم.. تكلمها عن ولدها .. حتى هو مو ولدها ولد اخوها بس هي مربيتة.. و سها مره طلعت مع الدكتورة و شافتة.. بس و يعني.. قلبها شفق عليه..
ياسر يستهزء فيها : بس يالله..!! (تحول صوتة للحدة) انتِ يا مدمغة.. من كل عقلكـ بيجي عندنا و يقول انه يحبها و تحبة من غير لا تكلمة و لا يكلمها..؟! حتى هي ما استحت منّا جالسة بيننا و تصرخ فينا تحبة..؟! كل ذا عشان مره طلعت مع دكتورتها و شافتة..؟! ليش ماهو حرام مو المفروض تقصر نظرها عن الرجاجيل..
خالد : هي خانت ثقتنا فيها .. مودينها الجامعة عشان تدرس.. مو تعرف على الرجال..
حاتم انقهر : انتم ويش فيكم.. انا نشدت عن الرجال الكل يمدحة ماشاء الله ما يقصرة شيء.. الكل يشيد بأخلاقة..!!
ابو سعود تقدم بـ جلستة سند ذراعة على افخاذة : مين طلب منكـ تروح تنشد عنه..؟!
حاتم : ما احد انا من نفسي رحت.. يبه اللي تسوية فيها غلط.. غلط.. هذا مو اسلوب لـ حل الموضوع..
ابو سعود : تبي تعصيني يا حاتم..؟!
حاتم : لا .. بس ما يرضيني اشوف الغلط و اسكت.. اخواني كلهم مأيدينكـ على صدكـ عنها.. و كلكم صادين عنها.. يبه بس لو فكرت شوي بـ تعرف ان الموضوع ما يسوى.. اول سعود ناداني عشان ما يدري هو يرجع و الا لا.. يبيني اكلمها لو صار له شيء.. يبه تخيل الوضع و صعوبتة عليها و عليه.. هو رايح للموت ما يدري يرجع و الا لا.. و بـ خاطرة شيء عليها.. لو صار لـ سعود شيء سها ويش بـ يصير فيها..!؟ كيف.. كيف.. لو..
ابو سعود : لو انا صار لي شيء و انا زعلان منها..!!
حاتم : بعيد الشر عنكـ .. يبه تكفى الموضوع ماهو مستاهل.. غلطت ايه.. بس ماهو ذا الإسلوب اللي نسوي فيه الغلط.. يبه كلمها.. بس ابعد عنكـ الناس و الدنيا .. فكر بـ بنتكـ وبس.. سها صغيرة و تعلق بـسرعة شيء طبيعي تعلق فيه.. بس اللي مو طبيعي اللي تسوونة انتم..!!
ما علق ابو سعود..!! فعلاً لو صار له شيء.. و بنتة كذا معلقة..!! ما هو متطمن عليها حتى بين اخوانها.. "كلكم راعٍ وكلكم مسؤول عن رعيتة" ما يبي يضيع رعيتة.. هي غلطت و هو حرمها دراستها و حياتها بعد..!! ثلاث شهور هي محبوسة بـ غرفتها ما طل عليها مره.. مو شيء غريب يكون دكتورتها هي اللي ضاحكة عليها.. وقف .. وقف حاتم معاه.. ابو سعود ناظرة : اجلس هنا.. ما ابي احد يلحقني.. (ناظر ام حاتم) تعالي..
طلعوا الإثنين ام حاتم مع ابو سعود.. يحلون مشكلة تعلقت.. و يحاولون يجبرون الكسر من بنتهم..
وعد : ياااااارب ينحل ذا الموضوع ..
حاتم ناظر اخوانة : تكفون ما عندكم كلمة عدلة لا تقولونها عند ابوي.. مهما كان هاذي اختكم..
ما احد فيهم علق.. كلام حاتم عن سعود و خوفة ما يرجع و تظل سها زعلانة هز قلوبهم..!!
وليد يناظر بنت وعد تبكي : سكتي بنتكـ صدعت براسي..
وعد وقفت : و الله يا زينها و يا زين صوتها..
خالد : و الله صياحة الله يصلحها لكـ و يهديها..
بـ غرفة سها..
دخل ابو سعود.. و وقفت ام حاتم وراه.. عيونهم على السرير.. الإضاءة مقفلة.. ما تبي تشغلها و هي حاسة نفسها تعيش في ظلام..!! بعيد عن الكل..
تقدمت ام حاتم حتى تجلس على السرير حطت يدها على سها : سها..!!
قمزت سها مفزوعة لأول مره من ثلاث شهور احد فيهم يطل عليها.. و هالصوت صوت امها.. جلست شافت امها و ما كانت لـ وحدها ابوها واقف.. ناظرت الإثنين وسط الظلام مجرد ضوء خفيف يقتحم الغرفة من الباب المفتوح .. نزلت عيونها اللي امتلت دموع.. ابو سعود شغل الإضاءة..
همست بـ ضعف : و الله.. ما كلمتة.. ما خنتكم.. ما خنتكم.. و الله..
حضنتها نوال و تربت على ظهرها : لا تبكين.. اهدي..
سها تعلقت فيها : ماما .. و الله .. مو بيدي.. قلبي يعورني.. مو قادرة.. اتحمل..
جلس ابو سعود جنب سها .. سحبها من حضن نوال.. ما ناظرتة ما قدرت..!! شهقاتها كفيلة توصل له قد ايش هي موجوعة و خايفة.. : علميني سها ويش اللي غلطتي فيه لا تخبين علي..
سها : و الله ما كلمتة.. امه حاولت .. بس انا رفضت.. بس و الله غلطت.. لما اطلع اشوفة.. بس ما قدرت.. حاولت امنع نفسي.. ما قدرت.. بابا .. و الله ما خنتكم.. ما طلعت معاه.. ما كلمتة.. بابا .. بس ما قدرت.. ما قدرت ما احبه.. ما قدرت.. قلبي مو بيدي.. انت .. انت قلت تعرف.. الحب.. ما راح تحرمنا من انّا نحب..!!
تنهد ابو سعود وهو يشوفها تحكي و تناظر السرير ما تناظرة : ادري ويش قلت .. بس يا بابا مو ذا الحب.. انتِ لسى صغيرة و ينقدر عليكـ ..
سها : و الله ما طلعت معاه ليش مو مصدقني..!!
ابو سعود : مصدقكـ .. و الله مصدقكـ .. بس يا بنتي اوجعتي قلبكـ بـ طلعتكـ .. انتِ تعرفين اني مستحيل ازوجكـ اياه.. احنا غير و هم غير.. و هذا اصلاً مو حب.. بكره بـ يجيكـ واحد ينسيكـ اياه..
زاد صياحها.. يا اهلها.. يا طارق..!! او بالأصح يا اهلها و تمشي حياتها معاهم انها نست حبها.. يا اهلها و تتعذب منهم فقدان ثقة و دراسة مع حبها اللي الكل بـ يدري فيه..!! اما انها تتزوج طارق هذا من سابع المستحيلات.. شيء بديهي من قبل لا يميل قلبها.. بس ماهو بيدها حبتة.. ما احد بالدنيا يقدر يتحكم بـ قلبة مين يحب و مين يكره..!! ما احد يقدر..!!
ام حاتم : قومي يا امي صلي ركعتين و ادعي الله يشرح صدركـ و ييسر لكـ امركـ .. رددي دايم اللهم اجعل لي من كل هم فرجا و من كل ضيق مخرجا..
هزت راسها : اخواني..!!
ابو سعود باس راسها تظل ضعيفة..! كلمة توديها و كلمة تجيبها.. يكفيها هالثلاث شهور عانت لحالها.. ما راح يخليها.. لو تركها بـ تهوجس بـ طارق ما راح تنساة بـ تحبس نفسها بـ قوقعة ما تطلع منها للحياة : ما عليكـ منهم.. لكـ علي ما احد فيهم يحكي معكـ ربع كلمة.. بس ارفعي وجهكـ بابا خليني اشوفكـ ..
ما كان جوابها الا تعلقت بـ رقبتة و تشهق تترجاه : بابا لا تتركني.. الله يخليكـ .. انت توجعت قبل صح.. ما تزوجت خالة منيره و انت تحبها.. بابا لا تخليني اتوجع .. لا تخليه يوجعني.. ما راح اتحمل انا مو قوية مثلكـ .. لا تتركني..
اوجعة قلبة عليها.. شلون خلّاها ثلاث شهور لحالها تعاني.. و الله ضعيفة ماهي حمل هالشقا.. ندم انه تركها لحالها.. ما راح يخليها مره ثانية.. هي اضعف من كذا بـ كثير : خلاص بابا لا تبكين ما راح اخليكـ .. لا تبكين..
..
قدام باب بيت ابراهيم..
لينا : انت مجنون..؟!
عمر : و بعدين معاكـ ..؟! علميني ويش تبيني اسوي..؟!
لينا : تبيني ادخل عندهم و اقولهم اني منحاشة اتصلوا على ابوي..!؟ ماشاء الله يا الذكاء و انا ويش عرفني ببيت عمـكـ .؟!
عمر : ويش الحل.. علميني..!؟
لينا : عمر الله يخليكـ لا تخليني كذا.. مو انت قلت بـ ترجعني لأبوي..!!
عمر متوتر يدري ان الرئيس طلبة يروح بـ هالوقت بـ الذات عشان يلهي غازي عن العملية..!! و لينا حامل يبي لها مين يعتني فيها.. و الرئيس يبيها تتنصت على ابوها..!! ويش الحل..!! فتح الباب : يالله انزلي انا بـ اكلم عمي.. بس اسمعيني.. سالفة انكـ حامل خبيها هالفترة.. ما ادري ويش ردة فعل ابوكـ .. عشان كذا خليكـ فاهمة ان معرفة احد بـ هالحمل الحين مو بـ مصلحتنا..
مو بـ مصلحتنا..!! مصلحتة و مصلحتها..!! و مصلحة الطفل اللي صار بينهم.. قبل لا ينزل مسكتة من ذراعة لف لها يناظرها .. اما هي انبح صوتها : انت تورطت معاي.. يعني.. اذا .. ما .. ودكـ .. بـ هالطفل.. بـ انزلة.. وما راح احد يعرف.. ما راح اقول لأبوي..
عمر : و الله يا لينا لو ادري انكـ ما انتِ محافظة على اللي بـ بطنكـ ما رجعتكـ .. ما راح اخليكـ تشوفين اهلكـ لين تولدين.. انا ابي هالولد فاهمة.. ابيه..
هزت راسها من غير لا ترد عليه.. فتحت بابها و طلعت..
مشى قبلها يمكن حتى هو خايف..!! عليها على اللي بـ بطنها.. الكل اختة اهلة عمه هدف الرئيس الأول..!!
: نعم مين تبغى..!!؟
عمر ناظر الحارس : وليد.. قوله عمر برا..
: وليد مسافر..
عمر : طيب ناد لي ياسر او خالد أي احد من العيال..
الحارس : وريني بطاقتكـ ..
عمر سحب بطاقتة و مدها لـ للحارس : تفضل..
الحارس : انت ولد عمهم..؟!
عمر : ايه..
الحارس : تفضل.. حياكـ الله..
دخل عمر وهو متنرفز سعود متوصي بالحرس.. ضرب الجرس و لف على لينا : لا تخافين..
لينا : ما اعرفهم.. على طول قولهم يكلمون ابوي..
عمر : طيب لا تخافين.. اختكـ هنا..
لينا : مين..؟!
عمر : اختكـ الكبيرة مرت سعود..
لينا تمسكـ فيه : قول و الله شوق هنا..؟!
عمر يناظر الباب اللي انفتح : ايه.. خليكـ عاقلة..
طلع ياسر متفاجئ من وجود عمر : عمـــر..!!!
عمر ابتسم : ما فيه سلام..؟!
ياسر ابتسم و سلم عليه : يا هلا حيـــاكـ الله.. الحمدلله على السلامة..
عمر : الله يسلمكـ ..
ياسر فتح الباب : حياكم.. تفضلوا..
دخل عمر و بعده لينا ما كانت تبعد عنه غير 1 سم .. يمكن خايفة و تعودت على انه يكون هو أمانها..
ياسر : يا ولد درب.. درب..
اختفوا من الصالة .. وعد و ام احمد.. دخل ياسر و بعده عمر.. التقت عينة بـ وليد اللي وقف متفاجئ من وجودة..!!! مليون علامة استفهام ما لحق يلقى اجابات على اسئلة وجودة بين العصابة حتى يشوفة هنا كل اللي يعرفة انه اصلاً مو معاهم..؟! و مع عملية التهريب اللي خبرة عن موعدها بـ رسالة.. كيف مو مشاركـ فيها..؟!
عمر سلم على العيال و لينا واقفة بـعيد موقف سخـــيف انحطت فيه..!! ما يكفيها اللي فيها حتى تعيش هالوضع..!!
عمر : وين عمي ابراهيم..؟!
خالد : موجود.. استريح.. قولهم يدخلون وعد و امي بالغرفة هنا..
عمر اشر لها بـ راسة لكنها ما تحركت..!! تيبست مكانها..!! قرب منها : ايش فيكـ ..؟!
لينا : قولهم ينادون شوق.. ابيها..
عمر : ادخلي بـ تلقين وعد قولي لها تنادي لكـ شوق.. تبيني اقول للعيال نادوا مرت اخوكم..؟! انتِ وين مخكـ ..؟!
لينا : عطيتكـ اياه..!!
مشت وهو يناظرها متنرفز.. يكفية اللي فيه..
وليد ما جلس وهو يناظر عمر وده يعرف هي بنت غازي : مين..؟! هي..؟!
عمر : بنت غازي..!!
وليد مصدوم : شلون..؟!
عمر : لكل شيء ثمنة..!! كلمه قولة يجي ضروري..
وليد : تدري انت ويش عنده الحين..
عمر : لازم يتركـة و يخلي رجالة يكملون الشغل.. لازم يكون متواجد هنا..
وليد : طيب بـ اكلم سعود.. ما ادري ويش انت مسوي..!!
ياسر : ويش فيكم..؟!
عمر جلس : ناد لي عمي.. ابي اكلمة ضروري..
احمد : طيب الحين ابوي ينزل..
دقايق حتى يرجع وليد و معاه ابوه بعد ما كلم غازي و بالقوة اقنعة يجي..
ابو سعود : عمر..!!
وقف عمر و باس راس عمة بـ هدوء : كيف حالكـ يا عم..
ابو سعود : بخير يا عمي.. سلامة الأسفار..
عمر : الله يسلمكـ ..
ابو سعود : غريبة ابوكـ اليوم كان عندي ما قالي انكـ راجع..؟!
عمر : ما رحت لأبوي للحين.. جيتكـ ابيكـ بـ موضوع..
ابو سعود : اجلس يا عمي..
عمر جلس جنب وليد.. و العيال كلهم مقابلين لـ عمر و وليد.. احمد و حاتم و خالد و ياسر..
ابو سعود : خير يا عمر..
عمر اخذ نفس : خير ان شاء الله.. انا ما عندي اجابات لأسئلة.. انا جبت بنت غازي.. هي كانت عندي.. انا اللي تزوجتها..
ابو سعود بـ صدمــة : وشـــو..!!
وليد : يبه لا تفهم غلط مثلي.. حبه حبه..
ابو سعود احتد صوتة عليهم : وشو اللي ما افهم غلط..!؟ فهموني طيب..!!
عمر : عمي.. انا ما اقدر افسر لكم شيء.. بس و الله بنت غازي كانت بـامان و ما احد طالها بـ شيء.. و وليد يشهد على هالحكي..
ابو سعود : شلون صرت منهم..؟! فهمنا..!!
عمر : ما اقدر.. بس انا جبتها هنا عشان تقابل ابوها و يأخذها.. ابيكـ تكلمة .. يمكن لو كلمتة انا بـ يعصب.. معذور بس مو بيدي ارجعها من بدري..
ابو سعود : اكلمة ويش اقولة يا عمر.. بنتة صار لها شهور عارف ويش يحس فيه الرجال..؟!
وقف وليد على صوت الباب : هذا غازي..
عمر يناظر عمه حس انه فقد الأمل من انه ينال شيء من غير لا يشرح..!! ما يبي يخرب شغلة على الأخير..!!
دخل غازي : خيـــر ويش الموضوع المستعجل اهم من شغلي..؟!
ابو سعود : استريح.. عمر بـ يشرح لكـ ..
وقف عمر مهما كان غازي رئيسة بالشغل.. صحيح علاقتهم مع بعض ماهي قوية.. مثل علاقة غازي بـ عساف و سعود.. لكن غازي يعرف عمر.. و عمر يعرف غازي..
غازي جلس بعد ما سلم على عمر : ممكن سريع سريع.. عندي شغل..
عمر : ادري.. و عشان الشغل يكتمل انت لازم تكون هنا..!!
غازي : نعــم..!!
عمر : واضح اني ما لقيت لي مؤيدين و لازم اقولكم كل شيء..!!
ابو سعود : قول الحكي مثل العالم و الناس.. لا تحكي بـألغاز ما احنا حمل نفكك و نحلل و نربط..
وليد : ما يبي لها ربط و تفكيكـ يبه.. عمر كلنا نعرف وظيفتة.. وهو داخل بـ مهمة مثلي.. الفرق هو ضابط على العلن و انا سري..
غازي مستنكر : مهمة..؟! مهمة ايش..؟!
وليد : العصابة اللي انت مدخلني فيها.. عمر بعد داخل فيها.. الرجال اللي تزوج بنتكـ هو عمر..
اتسعت عيون غازي..!! عمر..!!
وليد : عمر هو اللي يحمي بنتكـ منهم..
غازي يناظر بـ عمر..!! مشاعرة مضطربة..!! لكن الأكيد فيها من الخوف و القهر و اشياء كثير ما قدر يترجمها مو فاهم اصلاً..
عمر بـ ثقة : بنتكـ كانت عندي و الله شاهد علي كنت صاينها.. ما قدرت اهربها من قبل.. مو انا اللي جبتها هناكـ بس انا اللي جبرتهم على سالفة الزواج عشان احميها منهم.. اقنعتهم ان هالشيء بـ يقهركـ و انا و الله مو قصدي قهركـ قصدي احميها منهم.. و تزوجتها كان بـ ودي اعلمكـ بس المهمة سرية.. و ما قدرت اجيبها الا اليوم.. يبون منها تتنصت عليكـ .. انا جبت اداوت التنصت.. و انتم استغلوها صح.. يعني خلوهم يسمعون حكي غير اللي انتم بـ تسوونة..
غازي : يبون بنتي تنصت علي..؟!
عمر : ايه.. تحطها بـ ملابسكـ .. اساساً كانت المهمة لـ وعد.. و فشلت بـعد ما طلعنا بنتها من هناكـ و قرر الرئيس انه يستغل بنتكـ بالمهمة..
غازي سند ظهرة على الكنب : حسبي الله و نعم الوكيل فيهم..
عمر : هو اللي اصر اني اجيبها الحين عشان يضمن انكم ما تدرون عن التهريب.. وجودكـ هنا ما راح يخليهم يشكون بـ شيء..و عندكـ رجال ماشاء الله يكفون و يوفون..
غازي : وينها..؟! بنتي..؟!
ابو سعود : داخل مع وعد.. بـ نشوف لكـ درب الحين..
غازي وقف..!! وده يذبح عمر.. و وده يشكرة..!! كل شيء بـ يتضح مع كلام لينا.. رغم انها قالت له بـ الرسالة يحميها.. بس لازم يشوفها عشان يعرف هو صدق يحميها و الا لا..!! ان كان صدق فـ وجود عمر بينهم نعمة من الله..
وليد وقف قريب من الباب : هنا مع وعد..