[لامارا]

البارت التاسع..(9)



____________________________
بحر؛
صحيت ع الدنيا وجني مولود يديد
مش عارف فيها الا مايد اللي كان وياي
من يوم اني صحيت لين احين
حسيت اني ضايع..
مش متذكر شي
يارب ساعدني
اليوم خروجي من المستشفى
وانا اصلا مش عارف شو استوى لي
تمسكت بأيد مايد وشد عليها وسرنا نمشي بالممرات
والكل يطالعنا بإبتسامه وانا مش عارف ليش
وخصوصا مايد..
ومايد كان فرحاان واييد وانا مش عارف ليش اهو فرحان
شو السبب!!
ركبنا السياره واهو لو اوصف لكم فرحته ماقدرت
سندت راسي لورا وتنهدت
مايد/انا فرحان وايد يابحر
انا /ليش
مايد-بإرتباك-/ماشي ماشي
غمضت عيوني وانا احاول اذكر شو استوى لي
تمنيت لو ترد لي لو ذكرى وحده
شديت على عيوني وانا احاول اذكر شو استوى
ياتني الذكرى وكأن فيه سياره ترد علي وانا ماسك طفل
فتحت عيوني بسرعه وبخوف
بلعت ريجي بقوه وانا اعرق
مايد-بخرعه-/بحررررر!!! بلاااك شو استوى
انا حسيت بعوق في راسي ..
وتميت ماسكنه وضاغطن عليه وانا صاخ وبس اتلوى
________________________
أثير ؛
تربعت بذا الصاله الوسيعه وانا اتفكر
كيف تبدل حال ابوي من حال لحال
سبحان الله..
كان مو ذاك الغنا يعني الحمدلله بس مو مره غني
او بالاصح مو زي ابو فيصل
اما ذلحين مشالله الله يسعد اروى ربي عوضها
اي على طاري اروى وش مسويه الحين!!
خلي اتصل عليها..
واتصلت وطلع مشغول!!
مين تكلم ذي لا يكون الزفت كايد
تنهدت وانا تعبانه من وضع اروى احس بألمها
مع اني بعيده عنها..
حلمها يتكسر قدام عيونها
واصلا كايد انا اللي ارحمه اكثر
مع اني دايم اتضارب معاه من يوم اننا صغار
بس انه اخوي ..
زي ما اروى اختي
علاقتهم حلوه ويحبون بعض كثيير
هه! المشكله ان كايد يحكيلي عن حبها
واروى كمان تحكي لي
انا كنت الوسيط بينهم وكانو يفرغون كل همومهم عندي
الله يسقي ايامهم..
الحين ضغطوا على انفسهم كثير وكتموا بصدورهم
لين فرغوه لبعض من دون وسيط
طفشت من القعده هاذي
وطبعا جدي وجدتي جالسين مع بعض ويشوفون فلم ابيض واسود
ههههه الله يخليهم لي ولا يحرمني منهم
جدي/اثير ابويه
,انا /لبيه
جدي/سيري يبي لي دواي من الغرفه
انا/طيب
جدي/تطيب حياتج
رحت لغرفه جدي اللي كانت ظلمه وفيها نور بسيط
رحت للكوميدينه وظليت ادور دوا جدي
وانا اقلب بين الادويه رفعت عيوني للمرايه
وانا اشوف شكلي..
شعري طال وجسمي تغير
كبرت!!
وظليت ارمش بعيوني وانا اسوي حركات غبيه
هههه حسيت وقتها اني حلوه
مافيه بنت بتحس انها ماهي حلوه اذا طالعت للمرايه
شوي وشفت شي كروي تحت سرير جدي بس كان اسود
لان اصلاً. الغرفه كانت شوي مظلمه
رجت بفضول وابعدت الفراش من تحت سرير جدي وشفت كوره
ابتسمت ..
واخذتها شوي والفها كذا وانا ببالي افكار جهنميه
شوي وانصدم بتوقيع واسم بحر!!
الكوره ذي لبحر؟
يوه وش جابها تحت سرير جدي
اي صدق على طاري بحر
انا في بعض الصباحات اروح واشتري لجدي جريدته من الدكان
ولا اشوف بحر ولا له اي حس
غريبه وين مختفي!!
يلا ماعليناا
اخذت الكوره وطلعت وانا كأني حكم
وقعدت اقول /اهلا وسهلا بكم في مباراه الديربي مع الحكمه الدوليه اثيره واللاعبه كمان اثيره ومعكم المعلقه اثيره
جدتي/وخييييبه هالبنت تباا تجلطني ياابنت استوي شرات البنات انا/ماعلينا ماعلينا من تلك الفاتنه "رفعت الكوره وصفرت فمي وبديت اشوت الكوره بشكل عشوائي وانا اضحك على جدتي اللي فهت فيني "
جدي/وين دواي يا الخبله
انا -تركت الكوره وطالعت في جدي بإبتسامه وصنمت-
جدتي -تنهدت-/الله يعين على هالبنيه"وراحت للغرفه تجيب الدوا "
وانا ركضت وجلست جنب جدي
انا/جدو بقولك شي بس امانتك ماتقول لحد انا عهدتك كتوم
جدي-مسح على راسي-/قولي ابويه شو تبين انا كاتم اسرارج
انا -بحزن-/اروى..
جدي/شو بلاها
انا -طالعت لورا اخاف جدتي تجي-
جدي/ماتبين جدتج تعرف؟
انا هزيت راسي بأيوه
جدي /انزين قولي بسرعه واتا بحاول اخليها تروح ماتيي
انا/اروى ياجدي..مدري وش اقول قصتهم طويله
جات جدتي وعطت جدي الدوا
جدي/ام مايد نسيتي تكلمين ام جاسم ؟
جدتي ضربت جبهتها/هيه والله الله يذكرك بالشهاده بسير ارمسها
وراحت جدتي عنا وابتسمت لجدي /والله ياجدي منت سهل
جدي/هيه شو تتحريحن..انزين يدتج وسارت شو فيها اروى
انا /تخيل ياجد "وقعدت احكي له عن علاقه اروى من الطفوله لين اخر موقف"
جدي حك دقنه وطل يدق عصاه بتوتر بعد السالفه /ما اعرف شو اقولج
انا/جدوو انت دايم تحل مشاكلي الله يخليك ترا مالي غيرك
جدي ظل يفكر..
____________________________
كايد؛
ردت علي وانا كنت قلقان عليها.
بس ردت علي بكلام خلاني اتحطم اكثر واكثر
اروى/وش تبي
انا ظليت في حالة صمت
اروى-بحزن-/كايد.. احترم قراري انا ابغى ابتعد
انا/شلون ؟
اروى/عادي جدا ابعد عن طريقي وانا ابعد عن طريقك
انا/متأكده انه عادي.
اروى بإرتباك/ا..اي.. بعدين لاتلعب بمشاعري عشان قلت لك كلشي يخصني
انا /اها صحيح مره عادي والدليل ارتباكك اروى لا تكابرين انا عارف مشاعرك ولا العب فيها
اروى/كايد انت تبي العلاقه تستمر صح ؟
انا/وش رايك يعني
اروى/طيب..نفرض انا سحبت قراري وعاندت الظروف طيب وبعدين
انا/اكمل مهرك الي بقي واجي اخطبك..
اروى/وتقدر؟
انا /وش المانع يا اروى علميني
اروى/المانع الظروف اللي حولنا كل شي حولنا يقول لا مستحيل
انا/مافيه مستحيل ابد
اروى/كون صريح مع نفسك امك تكرهني وتكره امي من يوم انخلقت وامي وامك مستحيل يوافقون على ذا الشي هذا واحد ثانيا جدي مستحيل يزوجنا لبعض لانه فاهم وواعي كويس بالمشاكل اللي حولنا ثالثاً ابوي مو واثق فيك بعد ذيك السالفه
انا -بصراخ-/ارررروى انننتي ليييي اناا بسسسس واناا مستحيييل اكون لغيرك حطيها ببالكك يا انهم يزوجونا لبعض يا نظل عزاب للابد
اروى/كايد شيل من بالك انت هالفكره انا مو لك ..
وسكرت بوجهي وخلت كل آمالي تطيح فوق راسي وتسبب لي ازمه
جلست على سريري وانسدحت بتعب
وغطيت عيوني بذراعي
وانا اشوف كل الذكريات الطفوله..
يوم كنت امسك يدها ونروح للمراجيح وتركب وانا اقعد ادفها
يوم كنا نروح نخوف جدتي الله يرحمها من خلفها
وهي جالسه تقرا قرآن
يوم كنا نطلع بالمطر ونلعب ونرش بعض ونضحك
وبعدها نمرض سوا..
يوم كنا نتسسل لغرفه جدتي وناخذ من عندها علك
وهي ماتدري وتتسأل بكل يوم وين يروح العلك؟
ولا يوم كنا ندخل غرفه امها وناخذ كحل وروج
وتقول حط لي وانا احط لها
ابتسمت لهاذي الذكرى بالذات
لان شكلها كان تحفه ماقصرت انا شوهتها
يوم كنا ناخذ الشرشف واحطه على راسك ونلعب عريس وعروسه
هه! موجعه انتي يا الذكرى
مسكتي يدي بقوه وسحبتيني معاك للماضي
عشان اشوف السعاده وافتح فمي واصير ابتسم تدريجياً
رجعتي سحبتيني بقوه وصرامه ورميتيني بكل عنف
على الواقع المرير..
كأنك تقولين نفس جمله اروى بالضبط ؛ شيل من بالك الفكره اروى مو لك ..
وبكذاا اكيد اني ابتسامتي اختفت تدريجياً
نفس ما ارتسمت في مبسمي تدريجياً
قمت ببطئ عن فراشي وظليت اطالع بفراغ
أنتظر احد يجي يقولي قوم لا تخاف
محتاج احد يطمن قلبي القلقان اللي ماهدا له بال
محتاج احد يضمد جرحي..
وكل هذا ماهو الا بيد شخص واحد وهي والكل عارفها اروى
بدل هي ماتخفف علي
وتعطيني امل اكمل
كانت هي اول سبب تخليني ارجع خطوه لورا
_____________________________
فتون؛
صحيت من نومي على صوت تواويل امي
يمه شصاير!!
قمت وحالتي حاله باقي ببجامتي وشعري منتثر على كتوفي
رحت ركض للصاله
وشفت امي بعبياتها ووراها فيصل
يهديها وهي راسها والف سيف الا لازم تروح للشيخ
وشايله بيدها اوراق وشعر وخرابيط
انا-حكيت عيوني-/اشبكمم!!
فيصل-حب راسها-/يمه ياحبيبتي خلاص.. العصر انشالله بس الحين وين بنلاقي شيخ الحين
امي/سحر ذااا سحرر..صااحي انت الا توديني الحين
فيصل/يمه وين اوديك ماعندنا موعد عند شيخ
امي فتحت الورقه /شوف اسم زوجتك شفته شكله سحر قوي لين ماتت حسسبي الله على من سواه
فيصل حك راسه وظل يطالع في امي بقلق
امي -دمعت-/وانا اقول اشبها المره مقلوبه عليك ماكانت تعاملك بذا المعامله كنتوا تجننون بس انجنت بعدها اه اه يابنت اختي اه عليك الله يرحمك
انا رحت وضميت امي /خلاص حبيبتي خلاص
امي/وتبغاني اصبر للعصر اخاف يصير فيك شي
فيصل-بحنان-/يمه حبيبتي ان بيصير فيني شي ف ذا قضاء وقدر حتى من دون السحر استودعي الله وارتاحي الحين وانا بكلم شيخ يجيك لين عندك وش قلتي
امي-بإصرار-/ابييه اليوم فهممت
فيصل/ابشري
____________________________
مايد؛
لفيت بصري لبحر اللي جالس يضغط على راسه بألم
انا مسكت ايده/بحر لا تتذكر شي..
بجر طالع فيني بأمل /مايد انا احس اني بعالم غريب انا اجوف كل شي يديد ومختلف مش متذكر شي ولا شي مستوعب انته
انا/لا تخاف بتتذكر كل شي مع الوقت صدقني وانا وياك لاتنساني
ومن الآن سميت نفسي دليل بحر
بيستوي يعتمد علي بكل شي حتى سواقه السياير بيعتمد علي
عقدت حواجبي وانا اتذكر كلام الدكتور قبل ما اطلع
'
'
الدكتور/مايد حاول بقدر الامكان ماتخليه يشرب كحول لانه واضح انه كان يشرب كحول ولولها كان ذاكرته باقي معاه
'
'
تنهدت وانا اتذكر نصايحي اللي كأني كنت اقطها بالبحر
ياما نصحتهم وقلتلهم بس اهم مارضوا
ياني قهر مايعلمه الا الله وطالعت في بحر بغبنه
وانا اعاتب نفسي على اني ماسويت مجهود اكبر
عشان ابعدهم عن هالمنكر
وها اهو عقاب ربي لبحر.
ذاكرته راحت بسبب تهوره وشهواته
ليش يتبع هالشهوه واهو اعلم ان الله ممكن يحل مشاكله
كان يشرب عشان ينسى كل شي يحصل له
بس ربي اعطف عليه لو انه استغل كل هاك الوقت في الدعاء
والله العظيم ربي يستجيب له
ليالي راحت عليه واهو بسكره وهوسه
جره وقته بسرعه لبعيد
وشهواته وشيطانه يوم جافوا حالته تركوه
احبابه اللي يحبهم وايد تركوه!
بقي له الله..
الله وحده ماغيره
علمه درس ان كل شي يبتعد وكل الناس خونه
الا اهو..
اهو اللي يظل وياه لا تخلى عنه الكل
اهو اللي يمسك ايده ويقومه وينصبه وينصره
الله وحده القادر انه يبدل حاله من ليله وحده
لحال يسره ويريحه
بس اهو خسره وعانده
عصاه وما اهتم له..
ترك الصلوات..اخرها احيانا..ترك الصوم..
"ابتسمت" بس تدري يابحر هاي رحمة الله فيك
جفت رب العالمين شلون
افقدك الذاكره عشان ترد له..
وانا بساعدك وبردك لربي وربك
مش انا دليلك؟
_____________________________
اثير ؛
جدي/سمعي يابنيتي انا اعرف حبكم هاليومين كله جذب بس احس انه هذا كايد
يحب اروى وايد قولي لها لاتهده مووول!!
بس تنتبه منه ولا تتعلق فيه وايد عشان ماتتعلق فيه
انا -بقهر-/ياجدي بس هم مو لبعض!
جدي -ابتسم-/بإذن الله لبعض
انا/جدي انت شايف كيف المواقف تعاندهم وكيف الواقع يسقيهم المر لين يتركون بعض واصلا امي بتوافق ولا امه
جدي/اولا امج علي ويدج اعرفه الا بالزواج لا يا واحد وخاطره بوحده من حفيداته او بناته مستحيل يرده خايب عشان مشاكل بسيطه الحل بيده اهو
انا -بأمل -/يعني..تتوقع تضبط الامور؟
جدي-ابتسم وجعلني فدوه بسمته-/قلت لج بإذن الله
انا رفعت يدي/ياااارب ياحبيبي..عدل وضعهم وسخرهم لبعض واكتب نصيبهم لبعض
جدي/هههه انزين سيري جوفي مين على الباب
انا/دق اصلا ؟
جدي /هيه
انا لبست شيلتي ورحت ركض
وجدي ظل يهز راسه ويضحك على شكلي الطفولي
ورحت فتحت الباب من دون ما اسأل لاني متأكده انها شما
فتحت الباب بسرعه وصحت/شمامه ياحيوان..."انصدمت انه مايد وضحكت ورجعت اصيح" ميوود وينك ياارجل ماعاد شفتك
كانت هيئته احسن من قبل بكثير مبتسم وفرحان
مايد-حك راسي-/حبيبتي.. انزين وين ابويه
انا/جوا في الصاله
مايد-سحب يد واحد ودخله للبيت انا ابعدت عن طريقهم وما عرفت منهو -
على طول رحت غرفتي وسكرت علي
وفتحت جوالي وشفت رساله بيبي من اروى
ياويلي لايكون مسويه شي
انا توقعت اصلا من يوم جوالها مشغول
شفت رسايلها؛
اروى/اثير خسرته خلاص
انا فتحت عيوني للاخر وقلبي طاح مين اللي خسرته!
لايكون كايد.. حسبي الله على بليسك يااروى ليش!!
مااستحملت انتظر او اكلمها محادثه
فيني كلام كثير ودي اقول لها
اتصلت عليها وانت انتظر الرد...
اروى-بصوت باكي-/الو..
انا-انصدمت من صوتها بس بديت توبيخ-/اروووى انتي صااحيه عقلك معااك ولا ؟؟؟ ياامجنونه ليشش تضيعين كايد ليششششش!!!!
اروى-بكت ولا عاد تكلمت-
انا حنيت عليها ورحمتها
هديت شوي وتعوذت من ابليس
انا -بهدوء- /اهدي وقولي وش حصل
اروى-كفكت دمعها وبان صوتها المبحوح-/قعد يدق علي..وتشجعت ورديت.. وقلت خلاص انت مابتقدر تاخذني وحطمته وجرحته وسكرت..
انا-بحزن-/ليش؟
اروى-بخيبه-/فكري معاي كيف بتكون حياته لو ما ابعدته عني فكري كيف يتعلق بشي وهمي!! كان لازم اتكلم وابعده عشان مايظل متحسر على بعدنا مستقبلا وعشان ما اعلقه فيني
انا-بزمجره-/ااقسسسم بالله ماعندك قققللبب حرااام عليكك وششش قلتي له!! ليششش ماتحسين فيه ؟؟؟
اروى/انا احس فيه وفاهمه كويس وش شعوره اذا ماصرنا لبعض ورفض جدي تعرفين كايد كيف عصبي والله يقلب الدنيا ويقعدها
انا/انتي غبيه!! وماتحسين بأحد ورثتي طبع عماتك والله مالي كلام معاك لين تعتذرين له..
اروى/اثير وش هالكلام تكفين انا متحطمه نفسه ومقهوره اكثر منه انا اللي ابين له قوتي لكن بالخفاا اموت
انا-رحمتها-/اروى صدقيني مافي شي مستحيل بهالدنيا وماتدرين ربي وش بيسوي بالمستقبل!
اروى-بحزن-/ليش ماحذفتيني من البيبي!شفتي انك ماتقدرين تبتعدين عني وانا بعد ما اقدر
انا -استغربت وصنمت-
اروى/مرسل لي الحين ذا الكلام
انا-طالعت للارض بخيبه وسكت-
اروى/ويقول: انا بداخلي طفل حزين يبكي كل ماحن للقاك انا احتاجك اكثر من اي شي والله .. اروى كيف كرهتيني بثانيه ؟ كيف وانتي كنتي تحكين لي انك تحبيني!
انا -دمعت-/شاطر هالولد!
اروى/ليش
انا/خلاني ادمع شكله هايم فيك..
اروى/رذيت عليه وخليته يحذفني
انا-شهقت-/ايششش!!! من جدك وش قلللتي انتي ليش تخربين كل شي
اروى/قلت له لو سمحت اتركني بحالك انا كرهتك وكرهت امك ابعد عني لو سمحت واحذفني ومالي في مشاكلك، وحذفني من دون مايقول لي اي شي
انا /حسبي الله عليك يا اروى!
اروى/خليه يستاهل..
انا-بتعجب-/يستاهل انه يحبك!! بس هذاا اللي سوا
اروى/هو كذب علي وقال انه بنت بعدين انا ابغى اقطع امله نهائيا واصحيه من اوهامه اني اكون له
________________________________
شما؛
ماسكه السكين ويالسه اقطع الطماطم عشان اساعد امي في الفطور
تميت اتأمل يدين امي المترهله وويها اللي كله تجاعيد
وانا اتذكر تضحياتها
واتذكر مأساتها
ابتسمت بحزن لوضعنا..
ابوي مش معطينا ويه ودومه بعيد
حتى شكله مش متذكرتنه وايد ولا صوته
زايد هو ابوي واخوي وكل شي
بس خذلني بيوم..
وضليت متألمه من العالم كله
بيوم واحد وبنفس الليله
كرهت اخوي..فقدت حبيبي..خنت ثقه اخوي الثاني بحر..راحت سمعتي
ياتني هالأشياء بنفس الوقت ومرت من جدام عيوني بسرعه
من دون ماتخليني حتى استوعب اللي يستوي
عطتني صفعه قويه هالمواقف وقالت لي اني غبيه وايد
مسكت ايدي واخذتني لمكان بعيد واايد
عن كل هالبشر..
وردت تقول مالج الا ربج..
يارب انت الوحيد اللي معي.. مالي الا انت
كلهم خوانين وقذرين كلهم كذابين وحقودين
يارب انت بس اللي تغفر للناس
والناس ماتغفر لحد
يارب انت بس اللي تحبني بصدق وبدون اي شروط
والناس حبهم خداع وبشروط..
يارب انت بس اللي مهما غلطت تصفح عني وتغفر لي
والناس ينسون كل الماضي الحلو معهم ويذلوني عشان غلطه وحده
احبك يارب..
___________________________
مايد؛
استأذنت من ابويه وسرت ويا بحر لبيته
طقيت الباب
وفتح لي هاك الريال اللي الشيب ملى ويهه
وويهه استوى أسمر عن قبل
ارتسمت بسمه بويهه وطبعا ماجانت هاك البسمه العريضه
وايد كانت صغيره وترحيبيه وباين انها تنطبع من صميمه الحزين
اختفت ابتسامته يوم شاف بحر
وضل يطالعه بصدمه ويطالع فيني وكأنه يسألني
صج انا اجوف بحر!!!
ابتسمت له..
امتلت عيونه بالدموع ومد ايده وضم بحر بقوووه
واهو يقول كلام مش مفهوم
رحمته وايد ودمعت انا بنفسي..
بحر كان مستغرب من هذا ؟؟؟
نسى ابوه اللي كان مرافقه بكل مكان
بس شغله ابعده عنه..
كله عشان يجيب فلوس ومايحسسه بنقص في دراسته
او في هدومه او في اكله
انا/عمي ممكن اقولك شي على انفراد..
ابو بحر ابتعد عن بحر وقال/هيه يا ابوك شو تبا
طالعو في بحر ودليته على غرفته وسار اهو لهناك
انا/جوف ياعم..انا ما ابا اخرب فرحتك بس بحر..
عمي/شوه بلاه بحر!!
انا-بحزن-/ف..فقد الذاكره
عمي -انصدم -
انا ارتبكت وتكلمت بسرعه ولعثمه/ل..لا انته ترا.. اقصد لا تخاف..اهو يتذكرني انا...انا بساعده.. يعني فيه امل يتسعيدها
عمي تم يطالعني بخيبه وجر وقبض على عصاته بقوه
تعابير ويهه استوت مرآيه لدواخله المكتومه
دواخله المكتومه بغاز الألم والصبر
دواخله المكسوره والمتحطمه..
قصته مؤلمه وتدمع لها العين
حبيبته في مراهقته..
وزوجته في شبابه..
وولده في رشده..
والايام تدور ومايندرى امنو ضحيتة اليايه
انا مسكت كتفه وبنبره حنان /عميه.. توكل على الله ولا تخاف انا بساعد بحر وبخليه يستعيد ذاكرته هذا وعد.
عمي طالع فيني بأمل..
انا -ابتسمت-/بس ياعم الحين انت لا تذكره بشي لانه مايتحمل هالفتره لازم يكون براحه ولازم يحفظ ذكريات يديده عشان يتذكر السابقه
عمي -بضعف-/الله يوفجك ويخليك له.. انته الصديق والاخو له من طفولته ويعلني ما اعدمك ويعل اجرك عند الله اضعاف اضعاف
انا -بست راسه -/امين يارب..السموحه ياعمي بسير لبحر
عمي-ابتسم بمعنى سير-
________________________