[اسطورة !]

" خذتهم السوالف مع بعض و شلة بنات الشرقية مستغربين من إلهام"

(( الفصل السابع ))
بعد مرور عدة شهور ..
" ليان كلمت شهد تلفون ...... "
ليان : شهودة اسمعني بكرة تاريخ 6/6 اش يعني لك هالشي ..؟
شهد : ما يعني لي شي ليش .. ؟
ليان : بكرة يوم ميلاد إلهام الـ20 ودي يعني نسوي لها مفاجأة ..
شهد : انتي تعرفين احنا ما نحتفل بهالأشياء هذا احنا كملنا الـ20 ما احد احتفل فينا ..
ليان : تكفين خلينا نسوي شي جديد هالمرة بعدين إلهام مو صديقتي و بس هي صديقتي وحبيبتي و اختي بالفترة الأخيرة حسيتها متضايقة ودي اني افرحها .. و خلي هذي الحفله عذر عشان نستانس شوي ملينا من الدراسه و اجوائها
شهد : اييييه قولي كذا انتي تبين تستانسين و بس و إلهام عذر .. خلاص طيب اوكي جهزي انتي كل شي و علميني اش المطلوب مني ..
ليان : اوكي أنا ببدأ أحضر من اللحين طلبتك بلغي هديل و اذا حبيتوا تشترون لها هدايا ذكرى منكم براحتكم ..
شهد : رح ابلغ هديل والهدايا اكيد رح نشتريها ههههه ما يصلح حفل ميلاد بلا هدايا ..
ليان : طيب اسمعي رح نلتقي بإستراحتنا انتي تدلينها انا بديت أحضرها من امس هي تقريباً جاهزة انتي شوفي اشلون تجيبين إلهام بدون ما تعرف شي .. و الباقي خليه علي الساعة 8 لازم تكونون هناك اتفقنا ؟
شهد : اوكي اتفقنا و اعتمدي علي ..
-------------------------
" دقت شهد على إلهام و أقنعتها بطريقتها انها تروح على الاستراحة بس بدون ما تدري إلهام اش محضرين لها .."
شهد : اوكي اتفقنا الساعة 7 إلا ربع تكونين هناك يا ويلك لو ما جيتي ..
إلهام : خلاص على القرقة هذي اكيد بجي ان شاء الله .. صار لك ساعة تحنين على راسي اشلون اسويها و ما اجي ..
شهد : ههههههههههههه عصبتي ؟ شكلي هذرت واجد ..
إلهام : أي واجد خلاص اعتمدي بإذن الله رح اجي ..
شهد : اوكي انا و الشلة نستناك يلا باي ..
" سكرت إلهام و راحت تدور لها على فستان مناسب على انها بتروح لملكة وحده تعرفها شهد .. و بالموت حتى رضت تروح .. بهذا الوقت دخل خالد الغرفة .."
خالد : اش تسوين ؟
إلهام : زي ما انت شايف قاعده ادورلي على فستان حلو احضر فيه ملكة وحده تعرفها شهد ..
خالد : يعني شهد كلمتك و طلبت منك تجين ؟ ( على باله انها طلبت إلهام عشان تشوفه هو )
إلهام : ليه ؟ كانك مستغرب .. ( بعد لحظة تفكير ) خلود بسألك سؤال ابيك تجاوبني بصراحة انت ما تخبي على اختك حبيبتك صح ؟
خالد : أي اسألي .. بس في أشياء لازم اخبيها يعني ما يصير ..
إلهام : أوكي بس قولي اش لك علاقة بشهد ؟
خالد : مين شهد ؟ خويتك .. ما لي أي علاقة فيها ..
إلهام : خلود ( خلود دلع خالد طبعاً ) قول ما رح اعلمها هي عاجبتك قول .. لا تخبي .. كل شي صار واضح بعدين تراها صديقتي واختي وحبيبتي و أنا ما ارضى انك تجرحها او تلعب فيها بأي شكل من الأشكال ..
خالد : اش هالكلام يا إلهام معقول انتي تعتبريني من هالنوع من الشباب اللي يلعبون على البنت بعدين يرمونها لااا إلا انتي ما توقعت تقولين عني كذا ..
إلهام : طيب اثبت لي و جاوب على سؤالي ترى ماني ببزرة ما الاحظ ..
خالد : شكلك ما رح تتركيني الا لين تسحبين مني الكلام ..
إلهام : أي هذي خويتي و تهمني يلا قول اسمعك ..
خالد : أنا أحبها .. و أموت فيها و كل ما طال الوقت كل ما حبيتها اكثر و صدقيني ما ني قاعد العب معها و لا شي و لا يخطر ببالك اني اسوي مثل هالشي ..
إلهام : طيب اش نهاية هالحب ؟
خالد : ما فكرت .. اقصد يمكن بعد ما اخلص دراستي بقى لي سنه وحده بس رح اتقدم لها بعد ما أأمن حياتي ..
إلهام : ان شاء الله يكون كلامك صحيح و تتقدم لها شوف انا بقولك شي عنها بس هي ما كانت حابه اني اقوله لك لأنها تعتقد نفسها انها مو متأكده من هالشي .. هي بعد تحس انها تحبك ..
خالد ( بفرح ) : صدق والله ؟ ..
إلهام : قلت لك هي مو متأكدة من هالشي لا تتأمل عالفاضي ..
خالد : لهو تكفين خليني اعيش اللحظة .. اهاا قبل لا انسى انا بوصلك للاستراحة يلا اللحين بطلع باي ..
إلهام : اش فيه هذا شكله ما صدق لا و يبي يوصلني بعد.. الله يعيني عليهم ..
" وصل خالد إلهام على الاستراحة و كانت إلهام بكامل شياكتها على بالها ملكة ما تدري انها حفلة ميلاد .. أول ما دخلت الأضواء جت عليها على طول و كل شلتها و الناس اللي تحبهم كانوا موجودين و كلهم بصوت واحد [ سنه حلو يا لهو ...............] إلهام تفاجأت كثير و انبسطت حست الدنيا ماهي واسعتها من الفرحة اول مره احد يسوي حفلة عشانها لدرجة ان دموعها طاحت .."
ليان : اش رايك بالمفاجأة ؟
إلهام : ضمت ليان بقوة وقالت لها ليه الحفلة يعني تتوقعون اني بترككم .. اللحين اشلون اقدر اردها لكم ..
ليان : اش هالكلام ندري انك ما رح تفارقينا بس حبينا نحتفل ملينا من جو المدارس و اليوم الخميس وصادف انه يوم ميلادك فقلنا هذي مناسبة حلوة .. و ما نبيك تردين لنا الحفل اعتبري هذا حفل ميلادنا كلنا طيب ..
إلهام : طيب .. شهد هذي هي الملكة هاا ؟..
شهد : هههههههههه لا تزعلين ان شاء الله قريب تكون ملكتك ههههه ..
إلهام ( تغمز لشهد ) : لا اعتقد انتي رح تكون ملكتك اقرب ...
" شهد فكرت بكلام الهام و قالت : اللي فهمته انها تقصد اخوها يعني يمكن نوى يتقدم لي.. حست بإحساس حلو و كأنها تقول استناك.. "
" كان الحفل لا ينسى و هدايا الشلة اروع من الرائع انبسطت إلهام كثير اش قد كانت محتاجة لحفله من هالنوع اطلعها من اجواء الشوق اللي كانت تملاها .."
---------------------
" بعد مرور عدة أيام كانت الأختبارات على الأبواب و الكل كان يستعد لها ."
في المدرسة ..
هديل : رجع توتري من الأمتحانات ..
شهد : مو غريب دايما تتوترين مع انه عادي ..
إلهام : اسمعوا كلكم احنا لازم ندخل كلية مع بعض من اللحين نتفق ندخل بجامعة الدمام في احد عنده اعتراض ..
ليان : لا ليش الاعتراض بس لا تنسين هم ياخذون على النسبة الموزونة يعني مو اكيد نكون كلنا مع بعض ..
إلهام : انتو اعتمدوا و بس وهذي خلوها علي ابدخلكم حتى لو كانت نسبتكم الموزونة صفر ..
شهد : ههههههه صح لهو اللي محد قدها ..
إلهام : ههههه افا عليك اعجبك انا ..
هديل : اقول خل نختبر اللحين و نعدي الاختبار على خير بعدين لكل حادث حديث ..
ليان : و هي صادقة ليه تستبقون الأحداث بعدين ما تدرون يمكن ترسب و حده مننا ..
إلهام : اش هالفال ..
هديل : الله لا يقولها انتي تزيدين توتري ..
شهد : معليكم منها اذا في احد بيرسب فهو هي ..
ليان : يا سلام انا ادفر وحده في الشلة ..
إلهام : خلاص انتي وياها اللحين ابيكم بسالفة او بالأصح ابي ليان بسالفة ..
هديل : معناته احنا نروح ..
شهد : أي طرده يعني ..
إلهام : اش هالكلام .. لا عادي خليكم اناما قلت لكم روحوا بس السالفة تخص اكثر شي ليان ..
شهد : لا احنا كنا رايحين اصلاً في مسائل بالفيزياء ما عرفناها بنسأل المعلمه عنها و بعدين اذا حبيتي تعلمينا بالسالفة علمينا فيها بعدين ..
إلهام : طيب براحتكم ..
" راحوا شهد و هديل .. و بتردد من إلهام ودها تكلم ليان بالسالفة وبنفس الوقت ما ودها .. لكن مافي أي خيار قدامها لازم تقول لها .."
ليان : يلا قولي سالفتك الخطيرة ..
إلهام : لا خطيرة ولا شي .. بس .. بغيت أسألك .. اش اسم الجامعة اللي يدرس فيها إبراهيم و ابي عنوانها بالضبط و ابي موعد حفل التخرج حقهم ..
ليان ( منصدمة ) : اش تبين بهالمعلومات ليكون تبين تروحين له كندا ؟
إلهام : أي ابي اروح له فيها شي هذي ؟
ليان ( ماهي مصدقة ) : من جدك انتي ؟ .. شكلك جنيتي لهالدرجة تحبينه ؟
إلهام : و اموت فيه بعد .. بتعلميني ولا اشلون ..
ليان : لا بعلمك .. شكلك من جد تحبينه .. بس بصفتك ايش تروحين له ؟ ما فكرتي بهالشي ؟
إلهام : يوووووه صح نسيت .. والله ما فكرت بالشي .. يا الله اش اسوي اللحين لازم اروح ..
ليان : لأ مو لازم ..
إلهام : بدال هالكلام دوري لي على حل ..
ليان : انتي ما تعرفين احد يدرس بكندا ابد ؟
إلهام : لأ للأسف ( مرت من قدامها نور ) اه الا تذكرت نور ..
ليان : نور ؟ اش دخل نور اللحين ..
إلهام : نور عندها اخت تدرس بكندا بس ان شاء الله انها تطلع معاه بنفس الجامعة .. خليني اروح أسألها ..
ليان : أي روحي و الله انك مجنونة بس ما ادري هو يستاهل هالحب كله ..
" راحت إلهام بلهفة و جنون بنفس الوقت تسأل نور و تحلم باليوم اللي بتشوفه فيه .."
نادتها إلهام : نوووووووووور ..
نور : هلا ..
إلهام قالت حق خويات نور : معليش بنات باخذ نور منكم شوي اوكي
خوياتها : أي عادي خذوا راحتكم ..
" إلهام خذت نور و راحوا يتمشون حاولت تبدا معها السالفه بس خافت لا تحس نور انها تبيها بس في مصلحة .. "
نور : اش فيك ساكته مو كان في سالفه تبيني فيها ..
إلهام : هاا .. أي كنت ابي أسألك بتروحين كندا تحضرين حفل تخرج اختك سمر ..
نور( هذي هي السالفة اللي تبيني فيها و انا فكرت انك تبين تسألين عن حالي و بتعتذرين مني ليش انك تجاهلتيني بالفتره الاخيره .. ) : و الله ما ادري على حسب ..
إلهام : بطلب منك طلب بس اوعديني تكون بينا لا تعلمين فيها أي احد اوك ؟
نور : طيب وعد قولي و ان شاء الله ما يصير خاطرك الا طيب ..
إلهام : أول شي ابي اعرف اختك بأي جامعة بعدين هذي اخر سنة لها صح ؟
نور : أي اخر سنة و هي بجامعة ................. الكندية ..
إلهام : تمام بس هذا اللي ابيه و الباقي بعلمك فيه بعدين ..
نور : هو في شي مو زين ..؟
إلهام : لا اطمني ما في الا كل خير و كل شي بوقته حلو ..
نور : أوكي .. اللي تشوفينه ..

" بعد ما انتهى الدوام المدرسي رجعت ليان و جمعت كل المعلومات عن إبراهيم .."
" إلهام ما قدرت تصبر و دقت على ليان تسألها اش صار معها "
إلهام : الو .. هلا .. اش سويتي ؟
ليان : اش هالدفاشة على طول ما قدرتي تصبرين لين بكرة ؟
إلهام : تكفين ماني رايقة من الصبح قاعدة على اعصابي و انتي تقولين لي اصبر لين بكرة .. خلصيني اللحين وعلميني اش صار معك ؟
ليان : ما صار الا الخير طلع يدرس بجامعة .............. الكندية و احتفالهم رح يكون يتاريخ 15 / 8 ..
إلهام : وااااااااو الحمدلله يا ربي اللي استجاب دعائي طلع بنفس جامعة سمر اخت نور اللحين اقدر اروح ..
ليان : و الله ؟! ..يعني طلع بنفس الجامعة معناته حظك حلو يا بنت .. يلا انا لازم اسكر اشوفك بالمدرسة بكرة ان شاء الله ..
إلهام : ان شاء الله .. يلا باي
" إلهام : ماني مصدقة يا اني مستانسة و طايرة من الوناسة رح اتجرأ و أكلمه ولا اخت زوجة اخوه بتآخذه مني ما بقى الا الهنوفوه.. متى يجي ذاك اليوم يا الله تصبرني الين يجي ذاك اليوم "
" بعدين انتبهت إلهام على نفسها اشوي و رجعت تفكر بعقلانية : أللحين أنا من صدقي احبه يا ربي اش هالاحساس ماني قادره افهمه .. أنا احبه يا ترى ؟ و لا اوهم نفسي بحبه ؟ لا أكيد أنا احبها انا يوم اشوفه يتغير فيني كل شي و احس بفرح و سعاده ما تنوصف غير دقات قلبي اللي تصير قويه .. لااا و وجهي اللي يصير احمر .. و إذا جا طاريه يا ويلي عليه احس كانهم يتكلمون عني مو عنه .. أش معناته هذا الشي ؟ ما له الا معنى واحد انه دخل قلبي و سيطر على تفكيري و امتلكني ؟ .. لحظة ! و إن طلع هو ما يحبني ؟ ان طلع يحب هاذيك البنت اخت زوجة اخوه ؟ ان طلعت انا من جد اوهم نفسي و كل هذا اللي قلته سراب و حلم ؟ لو سمعت انه خطب اش بيصير فيني ؟ "
( كانت كل هالأفكار تدور براس إلهام و أسئلة ما لقت لها إجابة صار ما قدامها أي خيار لازم تشوفه وتكلمه وجها لوجه وتتأكد ) ..