((الجزء الثالث))
اه كيف هالدنيا غريبه توقف مع ناس وبنفس الوقت توقف ضد ناس عجيب امرها محد فاهمها ولا احد ضامنها كل يوم لها حال يوم لك ويوم عليك بس اللي كاتبه ربك بيصير.....
السعوديه الساعه7 مساء...
فيصل:ياجوجو ياحياتي ليش زعلانه ان شالله بعوضها والله كانت عندي ضروف
جوجو وصوتها كله دلع:لا مابي اليوم نطلع مع بعض ولا ناسي انه عيد ميلادي
فيصل:لا ياعيون فيصل احد ينسى عيد ميلاد حبيبته والله لاجيبلك احلى هديه وش تبين بعد
جوجو:تسلم ياحلى فصولي بالعــــــــالم
فيصل:لا حرام عليك اموت انا الحين ماقدر اخ متى اتخرج بس عشان اجي اخطبك
جوجو:ههههه لا خلك كذا معذب متلهف علي
فيصل:يعني عاجبك عذابي طيب زعلت ولاتكلميني
جوجو:اصلا ماتقدر تزعل مني عارفتك,,متى تبينا نطلع اليوم؟
فيصل:الساعه 10 وبنفس المطعم وش رايك؟
جوجو:تمام يلا حبيبي باي
فيصل:باي ياروحي ياحياتي انتي
بعد ماسكر منها فيصل راح دخل الحمام عشان يتروش ويرح يجيب هديه لحبيبة قلبه......
ندى:طيب متى ناويه تسوينها ترا مابقى شئ والناس بيسافرون
سارا:وش رايك الاربعا ونبدأ تجهيزات من الحين اونقسم الشغل بيننا انا وانتي وريم وش رايك
ندى:طيب بس كيف تقسمين الشغل
سارا:شوفي انت تدقين على الناس وتقوليلهم وريم تروح تسوي بطاقات الدعوه والاكل وانا بدق على حقتDj وارتب البيت لاني بسويها عندنا وبكذا يمدينا احنا اليوم الجمعه لسى باقي 5ايام ها وش رايك اعجبك؟
ندى:خلاص اوكي وانا من الحين ببدأ ادق على الناس بس كم تبين نعزم
سارا:شوفي الصاله اللي بحطهم فيها كبير يعني ممكن 100
ندى:كويس بس لاتنسين تدقين على ريم وتقوليلها
سارا:ان شالله يلا باي وناسه اخيرا بسويها
ندى:هههههههه طيب يلا باي
سكرت سارا من ندى ودقت على ريم وقالتها وبكذا بدأت التجهيزات لحفلة الDj وكل وحده قامت بشغلها على أكمل وجه.....
في بيت ابو سلطان....
سلطان وأمه ولمياء اخته كانوا قاعدين بالصاله الام تشرب الشاهي ولميا تشوف التلفزيون وسلطان يلعب بالجوال وهو يفكر كيف يبدأ الموضوع مع امه اخذ نفس عميق وذكر ربه وبدأ الحوار اللي مجهوله نهايته....
سلطان:يمه ممكن اكلمك بموضوع
ام سلطان:ايه ياوليدي تفضل
سلطان:يمه انا قررت اتزوج!!
أم سلطان:بس ياوليدي لسى توك صغير
سلطان:يمه الله يهديك وش صغير الشهر الجاي بصير23وتقولين صغير
أم سلطان:وليش مستعجل هو في وحد فبالك
سلطان:الصراحه يمه اي في وحده نوره صديقة لميا
أم سلطان:والله ياوليدي خير ماخترت بس تو البنت صغيره ولسى بدري على الزواج
سلطان:الحين بس نخطب واذا تخرجت تزوجنا يمه تكفين لاترديني,,لميا تكلمي قولي شئ...
لميا:والله مدري وش أقول بس انا عن نفسي موافقه وماعندي مانع
سلطان مسك المخده اللي جمبه ورماها على لميا:الحين هذا اللي طلع معاك انا موافقه في احد قال اني جاي اخطبك انتي
لميا:هههههههههه وش اسوي اغير الجو شفته متوتر
سلطان:اقول اكرمينا بسكوتك احسن
أم سلطان:طيب انت قلت لابوك
سلطان:لأ بس انتي اذا وافقتي اكيد بيوافق ابوي
أم سلطان:خير ان شالله اذا رجع ابوك قلتله
سلطان:يعني موافقه الله لا يحرمني منك يــــارب
لميا قامت وخمت أخوها:مبرووووووك ياخوي أول بنت بتجيكم بتسمونها لمياء
سلطان:خليها توافق أول وبعدين يصير خير
لميا تخبط اخوها:لا تخاف انا اظمنلك موافقتها وتغمز له
ابتسم سلطان وطلع لغرفته عشان يقول لسارا اللي صار بس للاسف ماكانت سارا داخله الماسنجر,انسدح على السرير وهو يتخل حياته كيف بتكون مع نوره ودعى ربه انها توافق ويوفقهم بحياتهم........
*********************
معن من زمان ماتكلمت عنه وش أقول عن معن اصحاب السوء خربوا حياته بعد اللي صار باستراحة مشعل قعد معن اسبوع مايكلم فراس بس الشيطان شاطر خلاه يرجع يكلمه وبدأ بالشرب كل اربعاء وخميس اذا راح عند مشعل بالاستراحه وكان يشوف الاشياء اللي يسويها معاذ واصحابه وتدهورت حالته بس محد لاحظ لانو معن اصلا شخص نحيف سوء تربية مشعل ولعبه بالفلوس ومحد يسأل عنه خلاه بنظر فراس ومعن رجال حر بتصرفاته وفي الاجزاء القادمه بتشوفون وش يصير فيهم........
**********************
الساعه 11وبنفس مكان اللقاء الدائم كان فيصل وجوجو جالسين وماسكين يدين بعض والكلام الرومانسي كان محور الحديث....
على الساعه 12كل موظفين المطعم كانوا حاملين كيكه وماشين ناحية جوجو وفيصل ويغنون
Happy Birth Day to jojo Happy Birth day to you
وكل المطعم كان يغني معاهم ولما خلصوا صفقوا وحطوا الكيكه على الطاوله وراحوا
فيصل:وش رايك حبيبتي بالمفاجأة حلوا
جوجو قامت وباست خد فيصل:شكرا ياحلى حبيب تجنن احبك احبك احبــــك
فيصل:هههه وانا كمان اموت فيك بس لا تفضحينا وطي صوتك وهذا هديتك
أخذتها جوجو وفتحتها ولقت سلسال الماس من (بولقري) كان يجنن وشكلو غالي
جوجو:ياااااااي يجنن تسلم حبيبي بس حرام شكلو غالي
فيصل:مافي شئ يغلى على جوجو حبيبتي كنوز الدنيا كلها مستعده اجيبها لك
جوجو:شكرا بس خلاص ترا استحي
فيصل:اموت انا على اللي يستحون
جوجو:فيصل ممكن نمشي الوقت اتأخر صارت الساعه1بالليل
فيصل:اوووه الوقت مر بسرعه يلا امشي بس ان شالله اكون عوضت اليوم اللي ماطلعنا فيه مع بعض ياروح فيصل
ابتسمت جوجو ابتسامه تجنـــــن وطلعوا وبكذا انتهى لقاء الاحبه...
في بيت ابو سلطان الظهر الساعه2...
أم سلطان:صباح الخير بدري كان نمتي أكثر
منى:وش أسوي ماأصدق متى يجي اليوم اللي أغيب في عشان انام
أم سلطان:يالكذابه يعني مو تعبانه انا اوريك
منى:لا تعبانه بس لما نمت صرت احسن
سلطان كان ينزل من الدرج وهو يغني ورايق ومبسوط
منى:وش عندك ان شالله محمد عبده من الصباح
سلطان:صــــــــباح الخير جميعا
منى+أم سلطان:صباح النور
سلطان:يمه كلمتي أبوي امس بالموضوع
منى:اي موضوع ليش ماقلتولي
أم سلطان:إلا كلمته وما عنده مانع بس استنى لمياء تصحى عشان تدق على نوره وتقولها اننا بنجيهم
سلطان:ولسى بتستنينها وصرخ بأعلى صوته لميــــــــــــــــــــــ ـــــــــــاء
لميا كانت توها صاحيه بس منسدحه وأول ماسمعت الصرخه طلعت علطول وهي خايفه
لمياء:خير وش فيكم وش صاير مين مات
سلطان+منى:هههههههههههههههه ههههههههههههههههههههههههه هههههههههههههههههههههه
سلطان:بالله هذا منظر تطلعين فيه من غرفتك كأنك شيطان
لميا:وش فيك ليش تصارخ؟
سلطان:سلامتك بس ابيك تدقين على نوره وتقوليلها انكم بتجونها اليوم
لميا:الحين كل هالصرخه عشان نورا صدق ماعندك سالفه والله لاوريك وتركض عشان بتضربه وسلطان يركض بس ماقدرت تمسكه لانه تخبى ورا الكنبه وطلعت لغرفتها طبعا بعد ماتصلت على نورا لان سلطان مسكها وخلاها تدق غصبن عنها......
في بيت أبو عمر....
ديمه منسدحه بغرفتها وقاعده تسمع أغاني وغرقانه بالجو ونست القلب اللي جرحته قلب عشقها بكل جوارحه قلب كان مستعد يبيع الدنيا كلها بس عشانها بس للأسف هي ماقدرت هالشئ وباعت نفسها لواحد يمكن أوأكيد حبه لها مايوصل ربع حب سعود لها بس يمكن الايام تثبتها انو وليد يحبها أكثر بس شلون وسعود حب الطفوله حب المراهقه حب حياتها كلها,,دق جوالها وصحها من التفكير وكانت النغمه(صدفه ومن بين كل الناس علقني من يوم شفته وعين جات في عينه حست شئ بعيونه حيل يجذبني لما ابتسم بات بوجهي تلاوينه) وكان الاسم حبيبي وحياتي
ديمه:الو
وليد:هلا والله بأحلى ألو
ديمه:اهلين حياتي
وليد:ديمه حبيبتي وش صار مع ابوك تراي ماقدر اصبر أكثر من كذا تبين اتقدملك مرا ثانيه ولا أدق على ابوك ولا وش يبي أبوك ترا ماقدر اصبر اكثر من كذا ابيك الليله عندي بالبيت
ديمه:هههههههههههههههههههه� �هههه حلوا الليله عندي بالبيت خلك صبور كيفك تبي تدق على بابا دق والله يستر
وليد:خلاص الحين بدق عليه الوقت مناسب بس ادعيلي ابي قلبك معاي عشان اتطمن
ديمه:قلبي طول عمره معاك ياحبيبي
وليد:وتقول اصبر يلا باي قبل لا أموت من شوقي وحـــــــبي
ديمه:ههههههههه باي
سكر وليد ودق على أبو عمر وهو خايف انه يرفض..
ابوعمر:الو
وليد:السلام عليكم عمي
أبو عمر:وعليكم السلام والرحمه مين معاي
وليد:معاك وليد عبدالرحمن
أبوعمر:هلا والله بولدي كيف حالك
وليد:الحمد الله وانتي ياعمي كيفك وكيف الاهل وصحتك
أبوعمر:العمر له حقه تركنالكم الصحه يالشباب والاهل يسلمون عليك
وليد:وش دعوى ياعمي لسى شباب
أبو عمر:ها ياوليدي بغيت شئ
وليد:والله ياعمي بغيت اسألك وش صار بوضوعي مع بنتكم ديمه ترا الوالده تسألني كل يوم
ابوعمر:والله مو الوالده اللي مستعجله انت اللي مستعجل بس على العموم احنا موافقين الف مبروك وعقبال مانشوف عيالكم
وليد:الله يبارك فيك ياعمي واول ولد ان شالله بنسميه سعد على اسمك
أبوعمر:لا ياوليدي مابي منكم شئ إلا انك تحافظ على ديمه هذي الغاليه والولد سميه على ابوك المرحوم عبد الرحمن الف رحمه عليه
وليد:الله يرحمه تسلم ياعمي ماطول عليك بروح ابشر الوالده
أبوعمر:طيب روح بشر الوالده يالنصاب وان شالله مسألت الزواج والخرابيط خلي الحريم يتفقون عليها احنا سوينا اللي علينا
وليد:ان شالله يلا مع السلامه
ابوعمر:في حفظ الرحمن مع السلامه
بقول نبذه صغيره عن ابو عمر هذا انسان طيب وقلبه ابيض بس بالشغل والمسائل الجديه مافي اقوى من شخصيته كان صديق ابو وليد من ايام الجامعه كان بينهم صداقه بس بانتهاء الجامعه انتهت الصداقه كان يشوفه بس مو دايم اتوفى ابو وليد قبل 6سنين وليد وديمه ماكانوا يعرفون انه ابائهم اصدقاء بس لما اتقدم وليد علطول ابوعمر رحب فيه بس كانت المشكله اللي عند ابوعمر ان سعود كان يبي ديمه كمان بس لما شاف موافقة ديمه ماحب يغصبها على شئ هي ماتبيه فوافق....
نرجع للأحداث....
وليد:ديمه ابوك وافق مو مصدق اخيرا
ديمه:وااااااااااااااااو الحمدالله شفت اللي يصبر وش يصير فيه
وليد:شفت شفت ياعيون وليد انتي
ديمه:شوف عاد ماراح اكلمك الين تملك علي
وليد:ليـــــــــِش حرام عليك تخربين فرحتي انا ماصدقت ابوك يوافق تقولين لا تكلمني الين نملك
ديمه:اي عادي ومافي ملكه إلا بعد الصيف
وليد:لا والله احلفي ترا انا الرجال ولو بغيت بكرا اخلي الملكه
ديمه:ههههههههه اذا فيك خير سوها بكرا وش مين اللي بينزلك
وليد:هههههه لا خلاص بعد الصيف امري لله ها حبيبتي توصين شئ قبل ماسكر
ديمه:لا شكرا سلامتك
سلطان:سوسو سارا سارونا
سارا:خير وش هالازعاج
سلطان:معليش اليوم سماح تخيلي وش صار معاي
سارا:ها ياترى وش صار؟
سلطان:سارا وجع لاتتطنزين
سارا:طيب سوري وش صار
سلطان:كلمت امي عن نوره وقالت انت توك صغير
سارا قاطعته:هههههههههههههههههه� �هههههههههههههههههههههه حلوا توك صغير اجل انا وشو لسى فبطن امي والله امك عجيبه
سلطان:لاتتطنزين على امي لاذبحك المهم وبعد محاولات وافقت واليوم بنروح نخطبها واااو سارا مو مصدق احسن نفسي احلم الحمدالله الحمدالله يارب صدق الصبر مفتاح الفرج مين يتوقع ان نوره تصير لي بعد سنتين من الحب
سارا:الف الف الف مبروك ان شالله عقبال ماشوف عيالك قول امين
سلطان:أمـــــــــــــــــ� �ـــــين
سارا:وجع طالعه من قلب هالامين وين نوره تشوف كلامك بس شوف ترا ماعلي من نوره تقولي لاتكلمين زوجي وتخرب الصداقه اللي بيننا
سلطان:افا افا والله ياسارا محد يقدر يخرب الصداقه اللي بيننا ويفرقنا إلا اللي خلقنا,سارا معليش اسأل سؤال انتي ماقد حبيتي بحياتك؟
سارا:الصراحه لأ ماقد فكرت احب صح اني رومانسيه واحب اشوف اللي يحبون بعض مبسوطين بس مدري ماقد فكرت احب مالقيت الشخص المناسب مدري ليش بس اذا لقيتو صدقني بتكون انت اول اللي يعرفون
سلطان:ههههه طيب ولا معجبى بأحد اكيد في احد معجبى فيه
سارا:الصدق وبدون كذب في شخص معجبى فيه بس مين مع الوقت بتعرف
سلطان:لا مالي دخل بتقوليلي مين والحين
سارا:سلطان لاتصير كأنك بزر مع الايام بتعرف,صح نسيت اول ماترجع من نوره كلمني ماراح انام وبقعد على الماسنجر الين ترجع
سلطان:ان شالله بس ادعيلي سارا لوسمحتي
سارا:ان شالله بقعد ادعيلك بس انت خلك ثقل ورجال
سلطان:اففف كأنك فهد خلك رجال تراني رجال اذا نسيتو
سارا:ياحبيلو فهد نفسي اشوفو احسو واحد فله
سلطان:والله حتى هو يبي يشوفك ان شالله بأسبانيا تشوفون بعض يلا انا بطلع الحين تشاو
سارا:طيب تشاوات يالعريس
وبكذا انتهى الحوار اللي دار بين سارا وسلطان,,الله كيف الصداقه حلوا حتى لو كانت بين بنت و ولد وماقد شافوا بعض وأساس الصداقه الصراحه بين بعض عدم الكذب الاخلاص حتى لو ماكانوا يحبون بعض نادرفي هذا الزمن تشوف صداقه خاليه من المصالح كلهم يبون مصلحتهم وسارا وسلطان من الصداقه النادره في هذا الزمن على انهم بنت وولد وكثير من الناس لا يؤمنون بالصداقه بين البنت والولد وانا حطيت سلطان وسارا من ابطال القصه الاساسيين لانو في مجتمعنا السعودي في ناس زي سارا وسلطان بس مو كثير وهذا واقع مو خيال ولا شئ اتمناه.....
وبالليل على صلاة المغرب كانت نوره تكلم لمياء..
نوره:هههههه والله ماتخيل اني بصير زوجة اخوك
لمياء:لسى بدري على هذا الكلام يمكن ابوك مايوافق
نوره:لا الله لايقولها لا ان شالله بيوافق
لمياء:صدق انك ماتستحين كذا بوجهي تقولينها لو رحت وقلت لسلطان
نوره:عادي قوليله مو خايفه تلاقين اخوك متحمس اكثر مني
لمياء:هههههههه سلطان من العصر وهو قاعد بالصاله يقول يلا اتأخرنا
نوره:هههههههههههههههههههه� �ه يجنن تحفه عادي خلي يجي
لميا:لا حبيبتي مافي قعده معاه لحالكم إلا بعد الملكه بنات اخر زمن
نوره:طيب يالعجوز بسكر طفشت منك ومن سواليفك لسى بقعد معاك طول العمر
لميا:انا عجوز هين يانوره انا أوريك ان ماوريتك النجوم بعز الظهر ماكون لميا بنت محمد
نوره:والله اللي بيدك سويه ولا تقصرين باي سي يو بالليل
لميا:سي يو باي
في بيت ابو معن.......
سارا:العنود يوم الاربعا بسوي Djبالبيت
العنود:ياي وناسه والله فيني رقص مو طبيعي بس ها ترا بعزم بسمه
سارا:يا سلام ترا العزيمه عزيمتي وانتي مالك دخل
العنود:لا والله احلفي مالي دخل ياأعزم بسمه ولا ترا ماراح انزل عند الناس
سارا:وش فيك عصبتي اكيد اعزمي بسمه اصلا مايحتاجلها عزيمه وان بغيتي اعزمي اهلها كلهم افا بس
العنود:هههههههه اشوا علبالي ماتبني اعزمها
سارا:الحين بسمه يبيلها عزيمه هذي صديقتك متى ماتبي جت مايحتاج عزيمه تقولين غاسله وجهها بمرق(يعني ماتستحي)
العنود:والله مالك دخل البيت مو بيتك واللي يسمعك يقول ابدا ماكأنوا ندى 24ساعه عندنا بالبيت
سارا:ماعلينا من بسمه وندى خلينا بالمهم
العنود:وشو المهم يا أنسه سارا
سارا:المهم انو ماعندي لبس للعزيمه
العنود:والملابس اللي بالدولاب وش تسوي
سارا:لأ ابي شئ غريب كذا حركه
العنود:كيفك البسي اللي تبين بس اني اروح معاك السوق انسي
سارا:هو ليش ماتروحين معاي؟؟
العنود:لا والله عشان يرتفع ضغطي وبالنهايه ماتشترين شئ
سارا:احسن بالطقاق مابيك تجين معاي
طلعت سارا وراحت غرفتها
في بيت ابو ريان(ابو نوره).....
أم ريان:يلا نوره قومي البسي الناس على وصول
نوره:لا لسى بدري كمان شوي وأقوم البس
أم ريان:ياربي على راسك اليابس الحين يجون وانتي بهالمنظر
وبهالوقت دخل سطام اخو نوره الصغير عمره 15سنه...
سطام:يمه الناس جو وين ادخلهم
ام ريان تكلم نوره:ياويلي شفتي قايلتلك بسرعه روحي البسي,وجهت كلامها لسطام:وانت دخل الرجال بالمجلس ودخل الحريم بالصاله
سطام:ان شالله بس يلا بسرعه
طلع سطام وسوا اللي قالتله عليه امها وقعد عند الرجال اللي كانوا سلطان وابوه وريان وابوريان وسطام,,عند الحريم كانوا لميا وأمها وأم ريان ونوره بعد مالبست...
عند الرجال....
ابوريان:ياحي الله من جانا
ابوسلطان:الله يحيك ويبقيك والله يابو ريان انا جايك بطلب وابيك تقول تم
ابوريان:اطلب وامر
ابوسلطان:مايامر عليك عدو انا جاي اخطب نوره بنتك حق سلطان ولدي وش قلت واللي تامرون عليه احنا جاهزين
ابوريان:هذي الساعه المباركه وماراح نلقى احسن من سلطان لنوره ومايحتاج تربية لميا واخلاقها تخليني اوافق وبدون تردد
سلطان:تسلم ياعمي بس احنا مو مستعجلين على راحتك شاور الاهل وردوا علينا
أبوريان:والله انا عن نفسي موافق حتى العيال موافقين بس باقي رأي الحريم وان شالله موافقين
ابوسلطان:خوذوا راحتكم اهم شئ تكون البنت موافقه
أبوريان:ان شالله مايصير خاطرك إلا طيب يابو سلطان
عندالحريم......
أم سلطان:ها يانوره وش قلتي
نوره:اللي تشوفونوا خالتي
أم ريان:خلينا نسأل الرجال ونرد عليكم
أم سلطان:بس احنا نبي نسمع رأي البنت
لميا:ماما لاتحرجين البنت شكلها موافقه
نوره ابتسمت وماقالت شئ
أم سلطان:اجل شاورا الرجال واحنا بانتظار ردكم
أم ريان:ان شالله
أم سلطان:يلا احنا نستأذن وننتظر جوابكم
أم ريان:ان شالله والبنت بنتكم وماراح تسمعون إلا اللي يرضيكم
أم سلطان:اجل ننتظر زيارتكم بأقرب فرصه
طلعوا عائله ابوسلطان من عندهم واتجهوا للبيت وسلطان كان مبسوط والدنيا مو سايعته من الفرح وأول مارجع علطول دخل الماسنجر وقال لسارا وفهد كل اللي صار واللي بدورهم باركولوا ودعولوا بالتوفيق وانتهى اليوم اللي كان صعب على سلطان وكان ينتظر الجواب على احر من الجمر وحط راسه على السرير وغمض عيونه وماكان يشوف إلا صورة نوره قدامه وكيف بتصير حياتهم بعدين......
بعد يومين من الاحداث اللي صارت....
لندن في ارض الجامعه كانوا قاعدين كل الشله اللي مكونه من راشد وهند الكويت,سعود السعوديه,كارلو بريطاني,سوزان من لبنان وخطيبها خليفه من قطر,واخيرا البنت الدلوعه الامريكيه مارلا,,معلومه صغيره كارلو ومارلا يفهمون عربي بس مايتكلمون لان هذي الشله صارلها مع بعض اكثر من ثلاث سنين.....
سوزان:شباب صبايا مابدكن نطلع نتغدى مع بعض إلنا زمان ماتغدينا
مارلا:ya lets go today
خليفه:احسنno tomorow
سعود:noانا مع مارلاtoday احسن وش رايكم هند وراشد
هند:عادي اليوم بكرا ماعندي شئ
كارلو:today it's fine
سوزان:خلاص اليوم بنروح أول مابيخلص الدوام لاني بدي موت من الجوع
خليفه:بسم الله عليش ان شالله عدوينتش
سعود:no i cantايش الكلام الرومانسي هذا
خليفه:غيران احسن
كارلو:lets go the class will start
راحوا كل الشله للمحاضره وانتهى الحوار اللي بينهم.....
نرجع للبلاد الطاهره بلاد الحرمين السعوديه.....
بكرا الحفله اللي مسوينها ندى وريم وسارا وكلهم محتاسين مو عارفين كيف يتصرفون وسارا لسى مالقت اللبس اللي تبيه دقت على ندى تروح السوق معاها لان العنود مارضت لانها تعرف اختها بتروح اسواق الرياض كلها وبالنهايه ماراح يعجبها شئ...
في سوق المملكه كان ندى وسارا يمشون من محل إلا محل وفي واحد من المحلات لقت سارا اللبس اللي تبيه...
سارا:وش رايك ندى حلوا البلوزه صح
ندى:اي تجنن بس وش تلبسين معاها يبيلها تنوره
سارا:اي انا عندي تنوره جينز فوق الركبه والحين نروح محل جزم واشتري صندل فوشي كعب والله يطلع مرا حلو
ندى:واخيرا لقيتي اللي تبين مابغيتي بس أخاف مانلاقي صندل فوشي زي لون البلوزه
سارا:ندى احس البلوزه ضيقه علي شوفي شلون<<حطت البلوزه على جسمها
ندى:لا عادي امشي بس اشتريها لا اذبحك
راحوا ندى وسارا يحاسبون وكان في 3عيال واقفين وندى وسارا يسولفون ومو دارين بالعيال
أول ولد:شفوا البنت اللي ماسكه البلوزه تجنن(يقصد سارا)
الثاني:لا يالغبي صديقتها جسمها يخقق(يجنن)
الأول:والله كل وحده فيهم احلى من الثانيه
الثالث:كم تتوقعون اعمارهم
الاول:انا اقول ثالث ثانوي
الثاني:لا حرام عليك ثاني ثانوي
الثالث:هم اعمارهم يا17 أو 18
الاول:واحنا وش دخلنا بأعمارهم امشو بس نرقمهم(يعطونهم ارقامهم)
الثاني:لا اسنتا الين يطلعون اخاف المحل يسويلنا سالفه
الثالث:يلا يلا خلصوا محاسبين امشوا نطلع
طلعوا العيال ورا سارا وندى اللي ماكانوا حاسين فيهم ويسولفون عادي
ندى:يلا وين تبين نروح اليحن تراي تعبت
سارا:بس اشتري جزمه نسيتي
ندى:يلا بسرعه اي محل تبين
سارا:والله مدري امشي نروح عند محلات الجزم وهناك ندور
والعيال لسى وراهم وكل مرا يقربون اكثر للبنات الين صاروا مررا قريبين
سلمان:ياحلو عطينا نظره
معاذ:ارحمينا وناظري
مشعل:انتي اللي ماسكه الكيس عطينا الرقم
معاذ:لا شكلهم ثقال مو خفيفات
سارا:اضربهم بالكيس عشان يفهمون
ندى:ماعليك منهم طنشيهم
سارا:ماعرف بلف اضربهم
ندى:سارا اعقلي لاتسوين سالفه
معاذ:شف شف كيف تمشي الله جسمها رهيـــــب
سلمان:حرام عليهم المفروض يتغطون اذا عندهم هالجمال
معاذ:لا الله يعافيك خلينا نتمتع بهالجمال
سارا:ندى والله ماقدر اصبر شوفي وش قاعدين يقولون الله يخيلك بضربهم
ندى:وش تضربينهم تبين تفضحينا
سارا:الله يخليك كلامهم وقح قليل ادب لا انا ماقدر
لفت سارا راسها وكان اللي وراها معاذ
معاذ:واخيرا تكرمتي وعطيتينا نظره اموت على هالعيون ولا الشفايف ولا الجسم
سارا مانطقت بحرف واحد بس رفعت يدها وضرب معاذ كف خلته يوقف محله قالت:بس عشان تتعلم كيف تلاحق بنات الناس وان كنت شاطر تعال وراي عشان اعلمك الادب
وراحت وتركت العيال واقفين محلهم
سلمان:اوووه قويه والله
معاذ:انا انا انضرب كف قدها هي قدها
مشعل:انا اشهد انها قويه
معاذ:بس والله لاوريها والايام بيننا مصيري بشوفها يلا امشوا نطلع
ندى:ههههههههههههههههههههه� �هههههههههههههههههههههههه� � والله انك قويه
سارا:ههههههههه اموت واشوف ردة فعله اصلا مدري كيف جتني الجرأه وضربته
ندى:بس احسن يستاهل خلي يعرف ان بنات الناس مو لعبه
سارا:امشي ندخل هذا المحل شكلو عندو اشياء حلوه
دخلوا المحل ولقوا الصندل اللي تبيه سارا فوشي فــــــاقع زي لون البلوزه وطلعوا من السوق وراحوا البيت وكان على اذان العصر...
في لندن راشد وهند ماسكين يدين بعض وجمبهم سعود كانوا راجعين للشقه بعد ماتغدوا مع شلتهم اول مادخلوا الشقه كل واحد راح غرفته عشان يرتاحون بعد النهار المتعب...
سعود أول مادخل الغرفه مايدري ليش تذكر سديم اخته وعلطول دق عليها,,سديم كانت بالبيت قاعده تتغدى هي وأحمد زوجها لما دق جوالها..
سديم:احمد تخيل مين اللي يتصل
احمد:مين ان شالله
سديم:سعود اخوي والله من زمان عنه
احمد:طيب ردي بسرعه
سديم:الووووووو سعودي
سعود:سديم ام كرشه كيفك والله من زمان عنك اشتقتلك كيف احمد
سديم:والله حتى انا مشتااااقتلك واحمد تمام وقاعد ياكل كيف لندن وراشد وهند
سعود:والله كل شئ تمام ويسلمون عليك انتي كيف امي وابوي دودي وفيصل
سديم:والله كلهم تمام ومشتاقيلك وندى وفيصل طول الوقت يتهاوشون ومنهبلين مدري متى بيكبرون مجننين امي
سعود:ههههه والله اني مشتاقلهم(وبغصه قال)كيف بيت عمي محمد وكيف عمر
سديم:الحمدالله كلهم بخير ويسلمون عليك بس في شئ صار ومدري كيف اقوله
سعود كأنه كان عارف اللي بتقوله سديم:خير وش صاير
سديم تناظر احمد:وقالها قوليله لازم يعرف
سديم:ديمه اتقدملها واحد ووافقت
سعود:مبروك الله يوفقها
سديم:سعود اقولك ديمه انخطبت تقولي الله يوفقها
سعود:اي الله يوفقها لانها قالتلي انها انخطبت وباركتلها
سديم:والحب اللي بينكم وين راح
سعود:قالتلي خلينا عيال عم واصدقاء احسن
سديم:والله غريبه ديمه تقول كذا
سعود:سديم يلا ماطول عليك سلميلي على احمد واللي في بطنك وان شالله بجي قبل ماتولدين
سديم عرفت ان سعود مايبي يتكلم بالموضوع:طيب وانتبه لنفسك وسلم على هند وراشد
سعود:ان شالله الله يسلمك مع السلامه
سديم:الله يحفظك فمان الله
سكر سعود من سديم ومسك دفتر خواطر وكتب:
اليوم كعادتي
سقطت مني دمعة ليست كباقي الدموع...
دمعة سقطت من فؤادي
هزت كياني وحركت وجداني..
دمعة احسست انني سأسقط
على الارض من قوتها...
دمعة قهر وحزن
دمعة تمنيت ان لا اراها بعين
او المسها بيدي
دمعة كادت تحرق قلبي
لم اعد احتمل هذا القلب
لقد اتعبني كثرة البكاء
تعودت عينياي الدموع
ولكن هناك ماهو اصعب من دموع
العين..
انها دموع القلب دموع اجبرني
غدر الزمن على اسقاطها...
دموع سقطت مني وكل قطرة
منها كالخنجر المسموم ...
يخترق صدري.
ويخرج احشائي.
ماذا فعلت له كي يقابل
وفاءي بغدره
واحساني باساءته..
آآآه لقلبي المسكين
وآآآآآه لعمري الحزين
وآآآآآآآآآآآه لحياتي والانيــــــــــــن..
مااقسى الحياة
عندما تتحطم امآلك بيد غيرك
وتمزق صفحات حياتك كتبتها بحبر دمك
مااقسى الحياة
عندما تتحول حياتك الى حزن دائم،ودمع حالك
وبكاء لايتوقف...
بيوافقون اهل نوره على سلطان؟
مين بتشوف سارا بالحفله؟
وش بيصير بين سارا وفيصل يوم الحفله؟
نعرف الاجابات بالجزء الجاي...
|