[فيتامين سي]

الفصل الثاني

" غلطة الماضي "



في شقة سعود المتواضعة والتي تمتاز بصفة البساطة .. صفة رائعة تصنع جمال خاص لا يعرفه إلا البسطاء .. !!
تركي : قلت لك يا سعود ... أبوي لا يمكن يسامحني !!
سعود : وأنا قلت لك يا تركي أنه بتحتاج وقت عشان يسامحك .. ورح مرة ومرتين وثلاثة وفي النهاية أنت ولده من لحمه ودمه !!
تركي : ياحليلك يا عم .. هذا سلطان بن مالك !!! ما يعترف في لحم ولا دم
سعود : أنت يا تركي مصعبها ومعلن استسلامك !!! وين تركي اللي كان ما يعترف بالهزيمة مهما صار له !!!!
تركي : قالها أبوي تركي مااااااات !!!!!!
سعود : أقول لا يكثر وخلني أروح أجيب لنا غداء ... وإلا اذا بنتناقش بضيع الوقت وبأموت من الجوع
تركي بإبتسامة : أفى يا عم .. ما يهمك إلا بطنك !!
سعود : استح ياولد ... أنا عمك تقول عني هالكلام !!!
تركي : خلاص آسفين
سعود : المهم أنا رايح أطلب الغداء وأجيك .. ما راح أطول !!
// × // × //× // × //


أبوفهد : ولدك تركي طلع من السجن !!
أبوتركي : ايه يا راشد .. شفته واقف قدااامي
أبوفهد : خلاااص يابوتركي .. اعف عن ما سلف !!
أبوتركي : حط راسي في التراب وداسني وتقول اعف عن ماسلف !! أنت تعرف أنه أمر مستحيل أسامحه مهما صااااار بالنسبة لي تركي ماااات من عشر سنوات ..
أبوفهد : اسمعني ياخوي ... أنت محتاج لتركي يدعمك ويوقف معك وأظنك شايف حالك .. مرهق نفسك بالشغل وما في واحد يوقف جنبك .. !!! زياد الله أعلم بأحواله !!! يغيب بالشهر والشهرين وبعدين ياخي عشان بنتك !!! والله يابوتركي أن حالها يقطع الصخر
أبوتركي : ..........
أبوفهد : أنت فكر ياخوي لكن خذها مني ... تركي بفيدك كثير وأنت محتاج لولدك هالفترة وأظن الكل عارف وش كان تركي في الماضي وبالذات بالشركة .. !!! أنت تاخذ اجازات بالشهر ولا تهتم لأن ولدك تركي موجود لكن ألحين محد واقف جنبك !!!
أبوتركي : خير .. أفكر وأشوف !
أبوفهد : خذ راحتك بالتفكير وصدقني بتوصل لنقطة أن عودة تركي لك مهمة حتى لو مارضيت عليه بس يوقف معك !!!!
أبوتركي : أشوف الموضوع ويكون خير ..

// × // × //× // × //


فهد بصراخ : وش تقووول ... ؟!
عبد الرحمن : وش بلاك معصب ... تركي طلع من السجن !!
فهد بإستنكار : محكوم عليه مؤبد !!! كيف يطلع ؟؟
عبد الرحمن : الحمد لله أبوجاسر عفا عنه ؟!
فهد : كيف يسامحه !!!!
عبد الرحمن بإستغراب : ياخوي وش فيك أنت !!! فهد هذا تركي خوينا !! بدل ما تفرح أنه أعفي عنه !! أشوفك معصب !!
فهد : لا تلومني لأني اكتشفت معدن تركي الحقيـر !!!!!
عبد الرحمن بصدمة : فهد أنت صاحي ولا وش فيك !! وش معدنه !!
فهد : تركي انسان حقـيـر وأنا شفت حقيقته ... بس لا تسألني !! هذي اللي أقدر أقوله ... !!

وطلع فهد معصب وعبد الرحمن مصدوم .. !! وش اللي صار بين فهد وتركي وهم مثل الأخوان وأكثر !! أكيد في شيء ولا زم يعرفه !!

مشعل : وين وصلت يالحبيب ... ؟!
عبد الرحمن بألم : ما وصلت لشيء .. !!
مشعل : المهم الوالدة تقول تعال أنت وفهد تراها جهزت الفطور ..؟
عبد الرحمن : خلااااص فهد راح !
مشعل : أجل تعااال .. ترا الفطووور ما يتفوووت كالعادة ..
عبد الرحمن : فيه أحد يفوت فطور أم عبد الرحمن !!
مشعل : بهذي صدقت ياخوي .... فطور الوالدة ما يتفوت !!

وتقدم عبد الرحمن ومشعل وكل واحد حب راس أمه وجلس .. عبد الرحمن كان ضايع في هذي اللحظة وهي يبي يعرف وش سالفة فهد مع تركي !!

أم عبد الرحمن : وين وصلت يا عبد الرحمن
عبد الرحمن بإبتسامة : لا يالغالية بس شبعت ... الحمد لله
مشعل بإستغراب : ما أكلت شيء يارجااال !!
أم عبد الرحمن : ايه يا ولدي ما كلت شيء
عبد الرحمن : والله شعبت يما ... وبعدين اليوم ورانا شغل بالشركة وتعرفين عمي سلطان شديد في التأخير وهذي الأمور مع الكل وأنا يالله أوصل ثمان !!
أم عبد الرحمن : على راحتك ...

خرج عبد الرحمن وبدل ملابسه واستحم وبعدها مشى لسيارته المتواضعة أمام فخامة سيارات عيال عمه لكن طول عمره عبد الرحمن يحمد الله .. !! كان يتألم كل ما سمع أن أبوه أخذ كل ما تملك أمه على أساس يستثمره لكن الحقيقة طلعت أنه يلعب قمار وخسر كل شيء ومن الصدمة أبوه توفى .. !!!
ومن ذيك اللحظة وعمانه يحقدون عليهم لأنهم عياله وهو سبب خسارة أمهم لكل شيء .. وهو متأكد مب من محبتهم لأختهم لكن طمعهم في الفلوس !!!


// × // × //× // × //


أبوفهد : وش فيك معصبة ؟
أم فهد : كيف ما تبيني أعصب وأنت تقول ولد أخوك لا بارك الله فيه رجع !
أبوفهد : واذا رجع وين المشكلة .. ؟
أم فهد : في مضااااااااااار كثيررررة !
أبوفهد : وش هي المضار ؟
أم فهد : راشد تعرف ولد أخوك من وين طلع ؟؟
أبوفهد بإستغراب : وش قصدك ؟!
أم فهد : ولد أخوك طالع من السجن وبجريمة قتل !!! اذا عرف أحد هذي الحقيقة من راح يرضى في فهد ولا من راح يخطب بنتنا فجر !!؟ وحتى رهف اذا كبير مستقبلاً من راح يرضى فيها وهم ولد عمهم قااااااااتل مجررررم !!؟؟
أبوفهد : والله صدقتي يا حصة !!؟ بالذات البنات فجر ورهف والهنوف من راح يخطبهم بعد سالفة تركي ... الله لا يبارك فيك يا تركي !!!
أم فهد : لازم يظل تركي بعيد !!
أبوفهد : خلاااص اليوم أروح له أنا وحمد ونتفاهم معه في هذا الموضوع .. من جد لا يمكن نرضى يجيب ولده ونخسر سمعتنا .. !!
أم فهد : من جد بالذات بناتي فجر ورهف ... ولا الهنوف بالطقاق الله لا يوفقها !!
أبوفهد بعصبية : هذي بنتي !!! تقولين عنها هالكلام ما تستحين أنتي !!!!!
أم فهد : سامحني يا بوفهد .. بس وش تبيني أقول في بنت ليلى اللي فرقتنا وكنا بنتطلق بسببها !!
أبوفهد : ليلى الله يرحمها .. وفي الأخير تظل الهنوف بنتي وصدقني مهما صار لا يمكن أتركها تضيع فاهمة
أم فهد بعصبية : فاااااهمة !!
أبوفهد : يلا أجل حطي الغداء عشان أنام شوي قبل لأروح لأخوي سلطان
أم فهد : إن شاء الله

// × // × //× // × //


أبوفهد : ياخوي بصراحة في موضوع نبي نتكلم فيه معك ..
أبوتركي : آمرني ياخـوي .. !؟
أبوفهد بتوتر : بخصوص ولدك تـركـي !!
أبوتركي : شف يا بو فهد اذا بتقولي رجعه فانسى الموضوع لأني منب مقتنع برجعته .. !!! هو غلط ولا يمكن أسامحه
أبوفهد براحة : بصراحة أنا معك
أبوتركي بإستغراب : لـيـه ؟
أبوفهد بإرتباك : عشان عيالنا وعيالك بعد يا سلطان !!
أبوتركي : .... ؟
أبوعبد الله : راشد يبغى يقول ... أن رجعتنا تركي بيني وبينك تضرنا وأنت أعلم بحالنا .. !!! لو تقدم واحد لبنتي أو بنتك أو بنت راشد وعرف بحقيقة تركي بتكون مشكلة ولا ... ؟
أبوفهد : سلطان لا تاخذها بعصبية وصدقني يظل ولدك ويقدر يجي بس يعني ما يسكن هنا في الرياض عشان لا يضرنا ولا يضرنا سمعتنا !!؟؟!
أبوتركي : أنا ما كان لي نية أسامحه
أبوفهد بنفسه : الحمد لله !!


// × // × //× // × //


سعود : عارف أن الشقة مقلوبة فوق تحت !! لكن هذي وضع العزوبية !!
تركي بإبتسامة : ما نويت تطلق العزوبية يا عم !؟
سعود : لا يارجااال !!؟؟ مافي أحلا من الحرية ولا أنا غلطان
تركي بصدق : صدقت ياعم .. !!! الحرية مافي أحلا منها ... لكن سعود ليه ما تتزوج ترى أنت محتاج لوحدة تهتم فيك وخاصة أنك في الأربعين !!!
سعود بإستنكار : وشو الأربعين !! تونا ستة وثلاثين شبااااب !!
تركي بإستهزاء : لا ياشيخ !!؟؟ ما عاد باقي على الأربعين شيء
سعود : بمنطقية تركي من راح يرضى فيني وأنا في هذا العمر !!؟؟ ترى ما حد يزوج بنته لرجال في عمري إلا أن كان راعي فلوس وخير وأنت شايف حالي
سعود : أفى يا سعود !! تراك فخر لأي رجال تناسبه بأخلاقك ويكفي أنك محامي وتدافع عن كل مظلوم وياما وقفت في قضايا بدون ما تاخذ شيء ومنهم ... بعد صمت ... قضيتي !!
سعود : يقولون القرد في عين أمه غزال !!؟؟
تركي : يارجااال في عين أمه مب ولد أخوه
سعود : ما فرقت تظل قريب مني وبتجاملني
تركي : يعني ما في نية
سعود : ياخوووي ليه ما تتزوج أنت !!؟؟ بدل ما توقف على راسي
تركي بألم : ومن يرضى في مجرم .. !!!؟؟! يكفي أني كنت مخطوب لفجر بنت عمي من يوم أني صغير مع عدم رضاي لكن أبوي قالها لي وقتها من تكبر فجر زوجتك سواء رضيت ولالا ؟؟ وآخرتها من عرف عمي بدخولي السجن جاني وقالها حتى لو طلعت لا عاد تجيني واللي صار اعتبره كلام واندفن !!!!
سعود :ياخوي .. بصراحة احمد ربك !! فجر هذي انسانة ما تستاهلك وأنت قلتها ما تعرفها ووقت الكلام عمرها 16 سنة وأنت وقتها اكتشفت حقيقتها وبصراحة الله يعين أختها الهنوف ورهف عليها وبالذات الهنوف والله هالإنسانة مسكينة ماتت أمها وتخيل أنها جت فترة كانت تخاف من أبوها وأخوها والجميع يارجاال لكن الحمد لله تشافت !!
تركي بألم : الله يعينها !! ومن ناحية انكشفت حقيقة فجر فأنا عرفت وقتها معادن أخوياي وعرفت اللي يعزني ... وبألم ... واللي ما يعزني !!
سعود : تركي .. هونها !! والله يجوني ناااس لهم قضايا وأنصدم من كلامهم ومشاكلهم وأحمد الله أن مصيبتي هينة كثير قدام مصايبهم !!!
لحظتها رجع تركي لناصر خويه اللي معه في السجن طول العشر سنوات ووصيته له قبل لا يطلع من السجن بفترة !!!
تركي بألم : والله صدقت !
سعود : المهم تركي لا زم تدور لك شغل على الأقل هذي الفترة لين يسامحك أبوك !
تركي : يضحك بهستيرية .. ههههههههههههههههههههههههه هههههههههههههه .... !!
سعود : قلت شيء يضحك !!
تركي : تمزح !! وين أتوظف !! ولا بدخل بشهادتي اللي قبل عشر سنوات واللي ايش شهادة ثانوية !! يارجال أي وظيفة أي خرابيط !!؟
سعود : أجل بقعد أصرف عليك
تركي : لا تزعل ولا شيء كلها كم أسبوع وبدبر عمري
سعود : كيف تدبر عمرك وأنت ما راح تشتغل
تركي بغموض : أنت ما عليـك !!


// × // × //× // × //


فـجـر : نعم وش تبين !!؟؟
الهنوف : لوسمحتي فجر توطين صوت التلفزيون عشان أقدر أركز !!؟
فجر بإستحقار : ومن قالك تدرسين عندي !!؟؟ ولا هذا الحقد اللي زرعته فيك أمك العقربـ ... !
وقبل لا تكمل فجر كلمتها جتها صفعة قاسية من الهنوف وكانت تصرخ فيها : العقربة هي أمك ياحقيرة !!! تبين أعلم أبوي عن سواليفك يا تافهة !!
فجر بعصبية وهي ما سكه مكان صفعة الهنوف : أنا حقيرة !! والله راح تندمين على هالكلام يا بنت العقربة !!

فجر : 26 سنة !

طلعت فجر فوق بعصبية وهي تتوعد والهنوف راحت غرفتها وهي تبكي وتتألم !! هذا حالها من توفت أمها صارت لا شيء في البيت والكل يكرها حتى أبوها اللي يحبها يعاملها بقسوة وما يرضى على بنته فجر كأنها مب بنته وانسانه !!!!

فهد بعصبية : نعم !! !!
فجر بألم : الهنوف ضربتني كف وتقول أني ما تربيت وأني حقيرة !!!
فهد : هي قالت كذا !!
فجر : ياليت بس كذا حتى أنها قالت أمي حقيرة وسافلة
فهد بجنون : والله راح تندم

لحظتها فهد صعد لغرفتها وكل الحقد متجمع في قلبه عليها !! من يوم دخلت ليلى بيتهم وهم عايشين في عذاب وجحيم لكن يوم ماتت رجعت حياتهم لهدوئها لكن وجود الهنوف بينهم سبب بعض المشاكل خاصة أنه أبوه كان ما يرضى عليها لكن مع كل سنة يقل حب أبوهم لها ويزداد حبه لهم وهذا ما يسعده وكان أمنيته أن الهنوف تتزوج ويرتاحون منها !!!!

فهد دفع الباب ودخل بقوة وتقدم وقعد يضرب الهنوف بجنون وهو يحط كل حقد يملكه فيها : ياحقيييييييييرة !! أنتي تتكلمين عن الأخلاق يا بنت ليلى ياللي ما تستحين !!! أنتي شكلك نسيتي نفسك !!! ونسيتي فعايلك !!!!!!! والله راح أندمك وأخليك تبكين دم !!!!!!!!!!

الهنوف حاولت تفلت لكن قبضة فهد قوية وبدا يضرب بجنون وحقد وكره متجمع في قلبه عليها وكانت تشعر بالألم وأن هذي هي النهاية ولحظتها استسلمت واعترفت أنها خلاص انتهى كل شيء !!!!!

.... : ابعد عنها .. وش سويت يا مجنون !!!!!؟؟
فهد : يبا خليني عليها !!؟ ما تستحي تقول عن أمي حقيرة وأن أختي ما تربت وأنها سافلة !!! خلني يبا أعلمها الأخلاق !!!
أبوفهد : قلت لك ابعد عنها لأ ... !
فهد : يبـا ... !! يبـا !! وش فيك !!
أبوفهد بصعوبة : مويـ ... ! مويـــ .... ـه !
فهد بسرعة : إن شاء الله

وراح يجيب الموية لكن قبل لا يوصل سمع صرخة أمه وقعد يركض بجنون ولما دخل شاف أبوه طايح وبجنون شاله وهو يدعو ربه أن الوقت ما فات وبدون لايفكر بشيء انطلق في أبوه لأقرب مستشفى !!


// × // × //× // × //



أبوتركي : السـلام .. !
فهد بألم : وعليكم السلام
أبوتركي : بشر يا فهد وشلون حال أبوك
فهد بألم : تعباااااان ياعمي والطبيب ما عطاني شيء محدد كل اللي قاله بشوف الفحوصات ويقرر !!
أبوتركي : خلك قوي ياولدي ... والرجال تظهر في الشدايد !!
فهد : ...............
أبوتركي بخوف : وأختك الهنوف وش سويت فيها !؟
فهد وكأنه فهم عمه : لا تشيل همها .. قلت لأمي تهتم فيها وتنتبه لها واذا تعرف طبيبة تجي تزورهم لكن ما ياخذونها لأي مستشفى
أبوتركي بإبتسامة : تعجبني ياولد أخوي .. !!! أهم شيء لا تروح مستشفى ولا بكون فيها تحقيق وممكن يتسبب في دخولك للسجن !
فهد بعصبية : هي سبب اللي صار لأبوي الله لا يبارك فيها بنت الـ ..... سكت فهد وهو يتذكرها أنها بنت أبوه !
أبوتركي : فهد الغلطة غلطتك !! مفروض ما ضربتها ياخي قدر حالة أبوك !!!
فهد : وش أسوي فقدت أعصابي لحظتها بسبب كلامها
أبوتركي : صار خـيـر .. !
تقدم لهم الدكتور وبتردد : من .. من ولده فيكم !
فهد : أنا ولده يادكتور
أبوتركي : وأنا أخوه
الدكتور بعصبية : ياخي الرجال تعبااان وحالته صعبة وصدقني المرة هذي انكتب له يعيش وبسلامة لكن المرة الثانية اذا عاش بكون مشـلول !!!
أبوتركي ببرود : ألحين هو بخير !
الدكتور : الحمد لله .. حالته طيبة لكن لازم ما يتعرض لضغط وتبعدونه عن أي خبر يزعجه أو بسبب له قلق
فهد : إن شاء الله يا دكتور .. متى نقدر نشوفه !؟
الدكتور : متى ما تبون !
فهد : شكـراً يا دكتـور !

// × // × //× // × //


أم فهد بدموع : الله لا يبـارك فيها .. هي السبب !!
أبوفهد بتعب : ولدك هو السبب ولا يضرب أخته قدام عيوني ... أنتي ما تخافين ربك ! والله راح تتعاقبين على كل اللي تسوينه في بنتي ويمكن يكون في أحد بناتك !
أم فهد : الله لا يقوله !!
أبوفهد بصعوبة : أجـ.. أجل لا تقعدين تعذبين الهنوف ولا صدقني ما راح أرضى عليك !
أم فهد بعصبية : إن شاء الله
فهد تقدم من أبوه وحب راسه وبهدوء : سامحني يبـا
أبوفهد : الله يسامحك ياولدي .. وبإستفسار .. وين الهنوف وفجـر .. و رهف !؟
أم فهد : الهنوف تعبااانه وخليت عندها فجر !!! أما رهف فالبنت مسكينة نامت من التعب وما حبيت أقومها !؟
أبوفهد بشوق : المرة الجاية يا حصة جيبي معك رهف ...
أم فهد بإبتسامة : من عيوني يالغـالـي .. !
فهد بإبتسامة : رجعت المياه لمجاريها !!
أبوفهد : وفيه أحد يزعل من أمك
أم فهد : الله يسلمك يابوفهد

// × // × //× // × //

أبوعبد الله : ما فهمتك ياخوي !
أبوتركي : الأمر سهل يا حمد ... وأظنك شايف حالة أخوك وضربة وحدة تقضي عليه وبصراحة هذا اللي أبغى أوصله
أبوعبد الله بخوف : تذبح أخـوك !!!!!!!
أبوتركي : لا راح نذبح ولا شيء ... بنخلي غيرنا اللي يخلصنا منه
أبوعبد الله بتوتر : تكفى ياخوي لا تورطنا في مشاكل مع أبوفهد ويكفينا الخير اللي حنا فيه
أبوتركي : صدقني ما راح يرضيني غير حلال أبوفهد كله يكون بيني وبينك !!
أبوعبد الله في نفسه : وبعدها تتخلص مني .. أنت مستحيل تكون انسان في يوم يا سلطان
أبوتركي : وش فيك ...!
أبوعبد الله : خيـر خلني أفكر في الموضوع ويصـيـر خير
أبوتركي : لا تطول !
أبوعبد الله : المهم ما ودك نزور أبوفهد اليوم
أبوتركي : زرته أول ما طلع لكن كان نايم وأظن ألحين عياله عنده نخليها بكره ..


// × // × //× // × //


تقدمت لها بطفولة وعذوبة وابتسم لـهـا بكل حب وحضنها وهو يشوف البراءة اللي تريحه من هم الدنيا ومشاكلها .. يالله ما أروع براءة الأطفال هذي هي الكلمة اللي دايم ينطقها لسانه ويحمد ربه أنه منحه طفلة مثل رهف !!
رهف : بابا ... وقعدت تصيح
أبوفهد : لا تصيحين يالغالية ... صدقيني كذا تتعبين قلب أبـوك !
رهف بطفولة : خفت عليك
أبوفهد يا بعد قلبي ... لا تخافين أنا بخيـر وصحة ..
ووجه نظره لفجر وبإبتسامة : هلا وغلا فيك يالغالية
فجر حبت رأس أبوها وبحب : هلا فيك يالغالي ...!!
أبوفهد بإستفسار : فجر
فجر : هـلا
أبوفهد : وين الهنوف وأمـ... أمك !
فهد : يبـا لا تشيل هم الهنوف وبخصوص أمي فهي معها عشانها تعبانة شوي ولكن بكرة بتكون عندك
أبوفهد : وش بكرة !! أنا اليوم بطلع من المستشفى
فهد : لكـ....
قاطعه أبوفهد : قلت لك أنا بطلع اليوم ... الحمد لله صرت بخير وماني محتاج أني أقعد !!
فهد : إن شاء الله أبلغ الدكتور !!
رهف : 9 سنوات
// × // × //× // × //


خرج من الحي اللي يدل على فقره وهو نفذ وصية ناصر الوحيد اللي كان يتكلم معه في السجن وحس بالألم وهو يتذكر الماضي واللي صار وقتله لجاسر وفي نفس الوقت حس أنه نفذ الوصية وهذا طلب ناصر ولا يمكن يخذله .. !
وحس بالألم لناصر وخاصة أنه محكوم عليه عشرين سنة بسبب اختلاسه مبلغ كبير وغير كذا ديونه الكبير اللي تقدر بالملايين هذي هي الحقيقة ناصر كان تاجر مشهور وفي النهاية خلف القضبان أمر غريب !!
سبحان الله اللي يبدل حال الناس حتى تركي كان مساند أبوه وفي ظرف سنتين رفع الشركة بطرق ذكية ومجنونة خلت أبوه يعطيه الصلاحية بكل شيء في الشركة لكن في النهاية قتل انسان وحكم عليه مؤبد لكن أبوجاسر سامحه .. !!
قعد يرجع لسنوات وهو يتذكر الماضـي وكيف كان هو وفهد وعبد الرحمن وشعر بالألم لما تذكر فهد وتذكـر .... انقطع تفكيره وانتبه للمكان اللي وصله !! معقولة تقوده رجوله من جديد هنـا بعد كل شـيء !!
كان يصرخ في نفسه ما يكفي يا تركي خسرت كل شيء وتبي تخسر نفسك !!! خلاص هو قالها خسرت كل شيء هي فارقه وش أخسر بعدها خلاص دمرت من حولي ودمرت نفسي وتسببت في آلام غيري .. !!! تذكرها وحس بالحقد لنفسه وحقارته وهو يلوم نفسه هو السبب في كل شيء !!!

// × // × //× // × //



عبد الرحمن : الحمد لله على سلامته لكم
فهد : الله يسلمك يالغالي
ابتسم عبد الرحمن وهو يشوف عمانه متجمعين ويتكلمون عن الشغل ويتحمدون لأبوفهد بالسلامة كان يتمنى لو يكون أبوه بينهم لكن هل كان ممكن يتكلمون معه كذا .. !! لا يمكن أبوه كان ... والله ماني مصدق أبوي اللي كان مثلي يطلع انسان مستهتر ويخلينا تحت رحمة عماني .. الله يسامحك يبا ويغفرلك !!
فهد بصراخ : وين وصلت
عبد الرحمن بإبتسامة : معك
فهد : واضح !! بالله وش كنت أتكلم عنه
عبد الرحمن : ها ... عن أبوك !
فهد : واضح بالمرة أنك معي
مشعل وهو يجلس جمب فهد : لا تغلط على أخوي ولا راح تشوف شيء ما يعجبك !!
فهد : إن شاء الله ياطويل العمر تآمرني بشيء
مشعل : تعجبني أبيك كذا مطيع
فهد : والله لولا أنكم ضيوف كان عرفت أعطيك الرد المناسب !!!
مشعل : جرب حظك وبتشوف مصيرك !!
فهد : بجرب حظي في يوم ثاني ... إلا ليه ما جاء عبد الله !!
مشعل : والله مدري وش فيه ... أمس اتصلت عليه وقال أنه بسافر لـ جدة عنده شيء ضروري !!
عبد الرحمن : غريبة من متى عبد الله عنده شيء ضروري
مشعل : وأنت مشاء الله تدور عليه سبب عشان أبعد عنه لكن أقولها لك .. عبد الله أخوي وصديقي !!
عبد الرحمن : ما قلنا شيء .. لكن ... سكت لما سمع صوت الجوال ورفعه وشاف اسم سعود واستغرب .. !!
عبد الرحمن : هلا سـعـود
سعود : هلا عبد الرحمن بالله بسألك ما شفت لي تركي
عبد الرحمن : لا من يوم قابل أبوه ولا عاد شفته
سعود : غريب ياخوي الرجال طلع من عندي على أساس يرجع للعشاء .. لكن ما عاد رجع أبد !!
عبد الرحمن : ما شريت له جوال
سعود : لا ... على أساس بكرة نروح نشتري الجوال له لكن ... المهم دور عليه وأنا بشوف يمكن يرجع بعد شوي !!
عبد الرحمن : خير ... وبعد ما سكر الجوال
فهد : وش فيه سعود متصل
عبد الرحمن : تركي اختـفـى
فهد : الله لا يرجعه بعد !!
مشعل : ياخي هالإنسان منب مرتاح له وبصراحة مدري وشلون هو خويكم !!
فهد : يارجااال بالنسبة لي خلاااص ما عاد أعرفه ولا عاد يكلمني وهو أصلا لا يمكن يفكر يكلمني !!
عبد الرحمن : وش سبب مشكلتكم يا فهد !!! ياخي ما أخبرك شايل على الرجال ولا عشان قتل انسان خلاص نسيته !! ياخي كلنا نخطي وتركي اعترف بذنبه!!
فهد : الأمر ما وقف على كذا ياخي هذا خويه ومع ذلك غدر فيه وغير كذا أمور ثانية عرفتها عنه و... سكت !!
عبد الرحمن : وش هي .. !!؟
فهد : اعذرني يا عبد الرحمن ما جا وقتها
عبد الرحمن : لكن صدقني يا فهد راح أعرف السبب منك ولا من تركي ؟!
فهد : خـيـر ...


// × // × //× // × //


كان يمشي بصعوبة وما صدق أنه وصل بسلامة وكان بالصعوبة يشوف الطريق وبهدوء نزل من السيارة وتقدم لقصر أو بالأصح القصور اللي يمتلكها عمانه وبهدوء تقدم ولا حظ السكون عليها ما عدى أحدهم وتأكد أنهم هناك يجتمعون وابتسم بإستحقار وهو يشعر بالنصر أنه متواجدين !!!
كان يمشي بصعوبة وكل من راح ينظر له بتأكد أن فيه شيء وهو لحظتها ما فكر في هذي الأمور لأنه كان شبه فاقد الوعي ولا يدري باللي يسويه وتقدم وقبل لا يدخل طلع له أحدهم ونظر لـه بخبث وعلى وجهه ابتسامة غامضة !!!!