[فيتامين سي]

الفصل الثالث

" أحقاد خفية "



كان يمشي بصعوبة وما صدق أنه وصل بسلامة وكان بالصعوبة يشوف الطريق وبهدوء نزل من السيارة وتقدم لقصر أو بالأصح القصور اللي يمتلكها عمانه وبهدوء تقدم ولا حظ السكون عليها ما عدى أحدهم وتأكد أنهم هناك يجتمعون وابتسم بإستحقار وهو يشعر بالنصر أنه متواجدين !!!
كان يمشي بصعوبة وكل من راح ينظر له بتأكد أن فيه شيء وهو لحظتها ما فكر في هذي الأمور لأنه كان شبه فاقد الوعي ولا يدري باللي يسويه وتقدم وقبل لا يدخل طلع له أحدهم ونظر لـه بخبث وعلى وجهه ابتسامة غامضة !!!!

تركي بتلعثم : هلا بالـغـالـي فـهـد
فهد بإحتقار : سكـران !!! طول عمرك ما تتغير !! انسان سافل وحقيـر ! صدقني موتك ما راح يريحني !!!
تركي بعصبية : طبعا أنت ما يريحك شيء لكن صدقني أنا ... وبسخرية ... يكفيني مـوتك
فهد : استغفر الله العلي العظيم !!! كنت عارف أنك لا يمكن تترك هالخرابيط عنك !!!!
تركي : ..........

تقدم فهد بحقد ومسك تركي اللي يعترض لكن ما قدر يقاوم خاصة وهو في وضع سيء وما يدرك باللي يصير ... سحبه فهد معه لسيارته وهو يفكر وين يبعده خاصة عن عمه سلطان ما يبغى يسبب مشاكل لعمه ولأبوه ومنظر تركي سكران وممكن يتكلم كلام يدمر كل شيء في لحظـات ..
انطلق فيه وهو معصب على الآخر وشاف الحل الوحيد يروح الشرقية لسعـود لكن وش بكون رده لأبوه وعبد الرحمن وحتى أمه عن اختفائه فجأة !! ماكان يدري وش الحل لكن الأهم يبعد " تركـي " !!!

// × // × //× // × //

عبد الرحمن : وينك يافهد ..!؟
فهد بإرتباك : خوي اتصل علي تعبااان وما عنده سيارة فأنا معه بالمستشفى وشوي وأجيكم
عبد الرحمن بخوف : أي مستشفى !؟
فهد : ما يحتاج بس دقايق وأكون عندكـم !!
عبد الرحمن بشك : خلاص لا تطول ننتظركـ ..

// × // × //× // × //


سعود : وش فيه !؟
فهد : كان سكـ... ـران والحمد لله أني جبته ولا فضح نفسه قدام أبوه وأبوي وعماني كلهم !!!
سعود بإستنكـار : سكـ...ـران !!؟؟
فهد : للأسف .. قلتها لكم هذا الإنسان تافه ولا يمكن ينفعه سجن ولا غيره وعلى كل الموضوع تستر لكن مرة ثانية أنا بنفسي بفضح كل شيء عنه ووقتها ما ظنتي بتشرف أبوه أن يتكلم معه !!!!!
سعود : استغفر الله !! المهم أنا بنتبه له وأنت لا تقول لأحد عن اللي شفته
فهد : ما راح أتكلم عشاني وعشان سمعتنا لكن لو السالفة على تركي كان من زمان قلت عن كل شيء أعرفه عنه !!! المهم انتبه له يا سعود بس لا تقوله أني جبته هنـا أو أي شيء !!! دبر له سالفة ثانية !!!
سعود : خلاص وانتبه لنفسك
فهد بضيق : إن شاء الله

طلع فهد من عند عمه سعـود ويحس بضيقة وتمنى أن تركي مات قبل عشر سنوات كان ممكن في أشياء كثيرة تتغيـر في حياتـهم لكن ... ! ما ينفع الندم كل شيء صـار وانتـهـى !!!

// × // × //× // × //

فجـر بدلع : هـلاا حبيبي
أحمد : هلا فيك يا قلبي .... اشتقت لك !؟
فجر بغنج : وأنـا أكـثـر !
أحمد بإبتسامة : فجـر بصراحة مليت من التلفونات وأبـغـى أشوفك
فجر بدلع : ما تكفيك الصورة
أحمد : لا طبعاً ما يرضيني إلا أشوف جمالك على الطبيعة !!
فجر : بشوف يوم نتقابل فيه
أحمد : صدق
فجر : أكـيـد !
أحمد : تسلمـيـن يا قـلـبي ..
فجر بكذب : يلا أحمد أمي .. جات
أحمد : مع السلامة يا قلبـي !!

ابتسم أحمد وهو يتوعد " بسيطة يا فجر والله راح تندمين وراح أحطم مستقبلك مثل ما حطمتي مستقبل أخوي وراح أكسر غرورك وأعلمك وش مصير اللي يقـرب من أخـوي "

أحمد : 29 سنة ...

أحمد بإبتسامة : خلاص يا فارس انسى الموضوع ومثل ما قلت لك راح أنتقم منها وأعلمها الحق !!
فارس بألم : أحمد قلت لك لا تضرها والله يسامحها .... أنا خلاص نسيتها و...
أحمد يقاطعه : تكذب علي ولا تكذب على نفسك !!! فهد قايل لي أنه لك أسبوع ما داومت !!! المهم فارس أنا تعرف وراي شغل لكن أبيك تطلع من هذي العزلة وتنسى الموضوع وهذي فجر راح أردها لها وبتندم كثير على اللي سوته فيك !!! ... ولبس النظارة وبإبتسامة : المهم فارس بكرة داوم وانسى الموضوع أوكي !
فارس : أوكـي ..

// × // × //× // × //


فتح عيونه بصعوبة وقعد يحاول يستوعب " وين أنا ... !!! " وبعد دقايق تذكر هذي شقة عمه " سعود " لكن الأكيد أنا أمس ما كنت هنـا أتذكر أني رحت لـ ... !! لكن ما جيت هنا يمكن رحت لبيتنا !!! آخ ماني قادر اتذكر !! استغفر الله ليه رجعت له لـيـه !!!!!!!!!!
سعود بهدوء : آخيـراً صحيت !
تركي بتوتر : وش جابني هنـا ؟
سعود بسخرية : أنت ما تتوب يا تركي توك طالع من سجن وشكلك تبي ترجع من جديد !!! تخيل بس أنك ذبحت لك رجال وأنت سكران !!! بتثبت عليك جريمة سكر وقتل !!!
تركي بعصبية : أنت وش عليك !!!! سؤالي محدد وش جابني هنا !!! أنا متأكد أن رحت لبيتنا ولا اتذكر وش صار
سعود : أكيد ما راح تتذكر ... !!! .. بكذب ... أنا جبتك هنا كنت رايح لبيتكم وبالصدفة أنت كنت جاي وسكران وسحبتك عشان لا تسبب مشاكل مع أبـوك !!!! واسمعني تركي لازم تترك عنك هالخرابيط ولا صدقني بتضيع صحتك ونفسك و دينك و..
تركي بعصبية يقاطعه : أنت وش عليك !! أنـا حررر أضيع اللي أضيع أنت مالك دخل !!!!!
سعود بآلم : أجل لوسمحت تركي دورلك مكان ثاني لا يمكن تسكن هنا
تركي بغضب : الحمد لله أنها جت منك لأني كنت ناوي أطلع سواء وافقت ولا رفضت !

وبغضب طلع وسكر الباب من وراه وسعود كان جالس وهادي وفي نفسه " سامحني يا تركي لكن لازم أطلعك من اللي أنت فيه !!! قبل لا تضيع من جديد "

// × // × //× // × //


تركي بإبتسامة : أنت وش تبغى تعرف .. !؟
عبد الرحمن : الحقيقة !!! وش صار بينك وبين فهد !!؟
تركي ببساطة : ولا شيء !
عبد الرحمن : تركي لا تكذب علي !!! أنت قلتها ما يفهمني كثرك يا عبد الرحمن !!! وأنا متأكد بينكم شيء كبير بس ايش !!
تركي بألم : عبد الرحمن لا تحـاول !! صح بينا شيء كبـيـر وأنا ما أنكر أني السبب فيه لكن يخص انسان ممكن ينهدم مستقبله لو أحد عرف بالسالفة وأظنك ما ترضاهـا !!
عبد الرحمن : ما دام السالفة كذا راح أسكت !!! وأتمنى تتفاهم مع فهد وتنتهي المشاكل بينكم !!!
تركي : المشكلـة كبيرة ولا يمكن تنحل بأي طريقة !
عبد الرحمن : ياخوي وش دعوة !!! نسينا كيف كنا أنا وأنت وفهد !!!
تركي : انسى الموضوع ... المهم رحت لأبوي اليوم !
عبد الرحمن : بشـر ؟
تركي بألم : قرر يسامحنـي لكـن ..
عبد الرحمن بفرح : مبـروك !! صدق سعود وأنت تظل ولده في النهاية ولا يمكن يتخلى عنك
تركي : لكن فيه شرط
عبد الرحمن : وش الشـرط ؟؟
تركي : أتـزوج ..
عبد الرحمن يقاطعه : مشاء الله تتزوج !! شكل أبوك رضى عليك بالمرة ..
تركي : أنت ما تفهم .. !!
عبد الرحمن بإستفسار : وش ما أفهم
تركي : يبيني أتزوج ... وبعد فترة صمت ... الـهـنوف !
عبد الرحمن بإستنكـار : ايش !!! الهـنـوف لكن
تركي يقاطعه : طبعا مب حب فيني لكن عشان يضمن أنه يقدر يلوي ذراع عمي راشد !!
عبد الرحمن : معقـولة !؟
تركي : متـأكـد !! والدليل أنه كان ناوي يخطبها لزياد لكن زياد رفض وقال ما راح يتزوج إلا على مزاجه مب على مزاج أبوي !!
عبد الرحمن : وأنت وش عرفك
تركي بتهرب : سعود قالي !
عبد الرحمن : أنت طيب وش رايك
تركي : ياخي اذا علي لا يمكن أوافـق !!؟ البنت توها بزر ما تخرجت من الجامعة !! وأنا بالثلاثين !! لـكـن الأمر مب بيدي غصب لازم أوافق ولا أبوي طول عمره ما راح يرضى !
عبد الرحمن بتردد : عادي يارجال ترى الفرق بينكم 13 سنة .. !
تركي : عادي !! ياخي البنت صغيرة علي وبصراحة أكثر أنا راح أظلمها معي !!!
عبد الرحمن : ياخـي أنت قلتها بتوافق خلاص يعني ما ينفع كلامك هذا !!
تركي بضيق : الله يعـين ..

// × // × //× // × //


مشاعل : آخيـراً أبوي رضـى عليك !!
تركي : الحمد لله !!
مشاعل : صدق عمي سعود لما قالي أنه بيرضى عليك في الأخير لأنك ولده
تركي : ما رضى من حبه لي !!!
مشاعل : ليه ؟
تركي : اشترط أني أتزوج الهنوف عشان يرضى علي !!!
مشاعل بعصبية : وشـو !!!!!!
تركي ببساطة : طلب مني أتزوج الهنوف
مشاعل : وأنت كيف توافق
تركي بدون اهتمام : هذا أبوي وأبغى رضـاه !
مشاعل : حسـافة أنك أخوي
تركي : نعم !؟
مشاعل : أجل ترضي أبوي وتظلم انسانة مالها دخل !!! وكله عشان ترضى أنت وأبوي مخططاتكم !!! صراحة أقولها لك حسـافـة مية مـرة أنـك أخـوي ... !!!
تركي : أنا وش ذنبي !! تبيني أرفض طلب أبوي ويظل غاضب علي !!!!!!!
مشاعل : تركي اعترف ولا تكذب أنت وأبوي نفس الشيء ظالمين وما تعرفون الحق !!! والله لايسامحك !!! لكن إن شاء الله أن عمي راشد بيرفضك !!
تركي : اسمعيني .. سكت لأن مشاعل طلعت فوق وهي تبكي وحس بتأنيب ضميره لكن خلاص أنا عطيت أبوي خبر ولا عاد أقدر أغير رايي !!!


// × // × //× // × //


أبوتركي : جيتك بطلب يا راشد ولا ظنتي ترفضني !!
أبوفهد : أنت أخوي وتآمـرني آمـر ..
أبوتركي : بصراحة وبدون مقدمات أبي بنتك الهنوف لولدي تـركـي .. !!
أبوفهد بصدمة : نـ ... ــ .. ـعـ...ـم !
أبوتركي : كأن كلامي مب عاجبك !؟
أبوفهد : لا بس .. تركي !! يعني أنت مب راضي عليه !!؟؟
أبوتركي : رضينا عليه والحمد لله !!! وجاي أبدء معه صفحة جديد وأزوجه وأفرح فيه
أبوفهد بشك : بس ما تلاحظ العمر بينهم وبعدين هو كان خاطب فجـر وأخاف هذا يأثر على فجر !!!
أبوتركي : فجـر الله يحفظها لك رفضت عن قناعة ولوتبغاه ما رفضته !! وفارق العمر لازم بين أي زوجين والفارق بينهم عادي !!
أبوفهد : خيـر أنا أسأل البنت وأعطيك خـبـر
أبوتركي : من متى حنا نسأل بناتنا يا راشد ! الأمر بإيدك وأن قلت ايه بنتك مالها كلمة بعدك !!
أبوفهد : لكن هذا زواج ومهما كان أسمع رأيه حتى لو كنت موافق
أبوتركي : خيـر ... المهم ما تطول .. !!


// × // × //× // × //


سعود : تركي تقدر تبلغ أبوك أنك مب موافق !!! ياخي والله حـرام تظلم بنت عمك !!
تركي : خلاص أبوي توه مكلمني ويقول أنه كلم أبوفهد وبصراحة رفضي الموضوع بخليني أخسر أشياء كثـيرة أنا منب مستعد أخسرهـا .. .. !
سعود : صدق ما كذب فيك فهد !!! أنت انسان ما تهمك إلا مصلحتك ومثل أبوك لكن تذكر أن الله حق !!
تركي بسخرية : زين أنك عرفت !! ومصلحتي عندي فوق كل اعتبـار !!
سعود : وبنت عمك عادي عند تظلمها
تركي : عادي بالعكس أحس بمتعة بالظلم !
سعود : تركي راجع نفسك ولا راح تندم !!! توقعت عشر سنوات سجن ممكن تخليك تنتبه لنفسك لكن زادتك ظلم وطغيان !!!
تركي وهو يقوم : المهم تـآمر بشيء ... لأن وراي مشـوار وبيني وبينك أبوي قالي متى ما تبي تعال البيت ولك غرفة جاهزة لين تتزوج ويشتري لي بيت !! يعني مثل ما أنت شايف مغريات كثيرة كيف تبيني أرفض أتزوج !!!
سعود بعصبية : والإنسانة اللي بتظلمها
تركي : عااادي !! يا سعود أول شيء قبل لا تتهمني بالظلم شف نفسك وبعدين تعـال تكلم
سعود بصدمة : وش قصدك
تركي : قصدي واضح وأنت تعرفـه ... ! سـلامـ ..


// × // × //× // × //

أبوفهد : حصة ..؟
حصة : آمرني !؟
أبوفهد بتوتر : اليوم تقدم ولد أخوي تـركـي للهنـوف
حصة : نعم ؟
أبوفهد : أقول اليوم ولد أخوي تركي تقدم للهنوف
حصة : الهنـوف ؟
أبوفهد : أيـه
حصة : ايه لما رفضته فجـر جاي ياخذ أختها ما درى أنه مافي فجر في الدنيا كلها إلا وحده !!
أبوفهد يقاطعها : وش رايك أوافق ولالا !
حصة ببساطة : وافق
أبوفهد بعصبية : أوافق أزوج بنتي لتركـي ؟
حصة : ايه وافق !! مزعجنا بنتك !!! تراها اذا ما تعرف مريضة نفسيـاً وصحيح أنها تعالجت ولكن مالها إلا سنتين ويمكن ترجع لها الحـالـة وتحمد ربها أنها لقت أحد يتقدم لهـا ...
أبوفهد : الله وكبر عليـك !!! يوم كان خاطب فجر استحقريته وطلبتي مني يطلقها ولما خطب الهنوف وافقتي !!! وش الفرق بينهم ولا عشان هذي بنتك وهذيك بنت ليلى !!!
حصة : صدقني السالفة مب كـذا ياراشد لكن فكر فيها من عشر سنوات وكل من تقدم للهنوف من يعرف أنها كانت مريضة نفسيا يمشي وبسببها وقفت بنتي فجر إلى من يتقدمها لها واحد ويعرف حقيقة أختها يخاف ويختفي !!!!!
أبوفهد : بس الهنوف بنتي كيف تبيني أتركها لتركي !!!!
حصة : لا توافق لكن تتوقع في أحد بيرضى يتزوجها !؟
أبوفهد : .............. !
حصة : شفت ما عندك جواب لأنها الحقيقة !! خلاص يابوفهد وافق والله يهنيها مع تركي !!
أبوفهد : لكن بسألها عن رأيها ... !!

طلع فوق الدرج وهو يتمنى من أنه ما يظلم بنته ويجبرها على شخص ما تبيه وبهدوء تقدم لغرفتها وفتح بابها لأول مرة من توفت زوجته الثانية ليلى يدخل لغرفة بنته !! هو ابتعد عنها من يوم وفاة زوجته وكانت الغرفة ظلام والهنوف جالسة بهدوء وكان واضح أنها شاردة بخيالها لكن لمحة الحزن واضحة وحس لحظتها أبوفهد بالحقد على نفسه !! كيف ترك هالملاك يعيش بحزن وألم وهو عايش !!!

أبوفهد بهدوء : هنـوف !
الهنوف بإستغراب : يـبـا ...؟
أبوفهد : بغيتك بموضوع .. !!
الهنوف بإبتسامة : آمرني يالغالي
أبوفهد في نفسه : " سامحني يا ليلى ما اهتميت في الهنوف وظلمتها وخليت حصة تظلمها !! سامحني ما كنت قد الأمانة "
أبوفهد بألم : أنتي مشاء الله كبرتي وبدون أي مقدمات ولد عمك تركي تقدم لك !
الهنوف بصدمة : تركي !!
أبوفهد : ايه ولد عمك تركي ... وبهدوء ... شوفي يابنتي أنا عارف أنك ممكن ترفضينه لأنه توه طالع من السجن لكن ..
الهنوف قاطعته : أنا موافقة يبـا .. !
أبوفهد : لكـن ..
الهنوف : قلت لك يبـا أنا موافقة وبعدين أنا مريضة نفسياً من راح يرضى فيني !!!
أبوفهد : من قال هالكلام
الهنوف : ما يحتاج احد يقوله يبا !!! كلكم عارفين أني كنت مريضة نفسياً !!! وبعدين ما يحتاج الله يخلي عمتي حصة كل يوم وهي تعيد الكلام لين حفظته !!!
أبوفهد : أنتي الحمد لله طبتي وصرتي زينة ..!
الهنوف : قلت لك يبـا أن موافقة وعن قناعة ... ولما شافت نظرة أبوها الخائفة ... وما يحتاج تخاف يبـا !!
أبوفهد : الله يوفقك يا بنتي وماراح أوقف في طريقك !!!

ولما طلع أبوفهد قعدت الهنوف تبكي بـألـم ودموع وهي تصرخ في نفسها " الله لا يسـامـحـك أنت السبب .. !! الله لا يسامحك أنت اللي هدمت مستقبلي ودمرت حيـاتـي ... !!! "


// × // × //× // × //


مشـعـل : الحمد لله على سلامتك عبـود !!
عبد الله : الله يسـلـمك يالـغـالـي .. !
مشعل : يارجااال مع أنك غبت يومين لكن اشتقت لك
عبد الله : تسلم يالـغـالـي !! المهم ما ودك بحفلة حلوة اليوم
مشعل بإبتسامة : المهم فيه شراب
عبد الله ما يحتاج هذا الأساس
مشعل : أجل هلا وغلا...
عبد الله : خلاص الساعة ست أوكـي .!
مشعل : أوكيـ ...!
عبد الله : يلا عاد بروح أسلم على أهـلـي ..!!

وتقدم عبد الله لقصرهم وهو يبتسم وسعيد ومرتاح أن الوضع استقر !!! ومشعل ما درى عن حقيقة السفرة !!! طول عمره غبي هالإنسان لكن إن شاء الله بعطيه درس أعلمه الشغل الصح !!!!!

عبد الله بإبتسامة : هلا يبا
أبوعبد الله : هلا وغـلا !! زين شرفتنا !! ممكن تعطيني سبب للسفرة المفاجآة ولا تحسبني غبي بصدق سالفة الشغل !! أنت طول عمرك ترفض تشتغل معنا في الشركة توافق ألحين تشتغل في مكان ثاني !!!!
عبد الله : بصراحة يبـا لقيت هناك شغل حـلـو في جدة و...
أبوعبد الله : وشو الشغل ؟!
عبد الله بكذب : بشتري أراضي وشقق وبتاجر فيهم
أبوعبد الله : من وين لك الفلوس !
عبد الله : الله يخليك لـنـا يبـا !
أبوعبد الله : وتحسبني بأعطيك !!! لازم توريني الشقق وعقود الشراء وأحضر معك لما توقع !! لحظتها ممكن أعطيك فلوس !!
عبد الله : وليه كل ذا !!!!
أبوعبد الله : عشان لا تتغافلني !!!
عبد الله : أنا ولدك يبـا كيف أتغافلك !!!
أبوعبد الله : حتى لوكنتي أبوي !! لا يمكن أضمنك !!
عبد الله : ما عندي مشكلة أحدد موعد مع صاحب العمارة !!
أبوعبد الله : خلاص وبعطيك المبلغ اللي تطلبه واذا نجحت بأزيدك !!
أم عبد الله بإبتسامة : هلا وغلا فيك يالغـالـي !!
عبد الله : هلا يمـا ..
أبوعبد الله : جهز الغداء
أم عبد الله : ايه ... وأنت ياعبد الله بدل ملابسك لين أجهز غداك تعرف ما حسبنا حسابك ...!
عبد الله : إن شاء الله .. !!



// × // × //× // × //


رهف ببراءة : يعني خلاص أنتي تتزوجين
الهنوف وهي تحضنها : ايه يا قلبي
رهف : بس مابيك تروحين أنا أحبك !! ما في أحد يلعب معي إلا أنتي !!
الهنوف : ياقلبي بزورك كل يوم ..
رهف ببراءة : صدق
الهنوف : أكـيـد ..
رهف : احبك مررررة
رهف : وأنا أكثر
فجر بسخرية : أجل ببتزوجين تركي !! ايه بعد ما رفضته راح لك يتوقع بلقى مثلي ما درا أنه مافي مني
الهنوف : ............ !
فجر : وش بلاك ساكتة !!! أكيد من الفرحة مانتي قادرة تتكلمين من الفرحة ولا من يرضى في وحدة مجنونة !!!!!!!
الهنوف : ............!
فجر بعصبية: تكلمي !!!! ردي لما أتكلم معك مب تسكتين !!
الهنوف بصياح : أنتي وش تبين !!! كاني مب أختك !!! لما أسكت تعصبين ولما أتكلم تعصبين !!! أنتي وأمك وفهد كلكم تكرهوني !! يمكن ما ألوم أمك لكن أنتي أختي وفهد أخوي ومع ذلك في حياتي كلها ما حسيت في أخوتكم بس رهف هي اللي تحسسني أنها أختي !! يعني اذا تكرهيني ارحميني على الأقل !!!!
فجر : ايه أسلوبك هذا ما ينفع معي !!!!! ما كذبت أمي فيك !!! تبين تجمعين الكل حولك عشان تصيرين السيدة في هذا البيت لكن تخسين !!! أنتي بتظلين ولا شيء طول عمرك !!!!!
فهد بعصبية : وش فيكم !!
فجر : بارك لأختك انخطبت !
فهد بصدمة وخوف : أيـش !؟
فجـر : أقولك انخطبت ما تسمع !!!!!
فهد بتوتر : من خطبها ؟!
فجر : خطيبي السابق تركي !!! المجرم !! دايماً الناقصة للناقص !!! والكاملة للكامل !!! وأنتي مريضة نفسياً وهو مجرم قاتل !!! صراحة وشلون بجون عيالكم !!! أظن واحد ..
فهد يقاطعها : أنتي وافقتي !! ... وهو يطالع الهنوف ينتظر الجواب منها !
فجر : أكيد بتوافق أصلا من يرضى فيها !!!!!
فهد : فجر ما سألتك !!! هنوف أنتي وافقة عليه
الهنوف بهدوء : ايه
فهد بعصبية : كيف توافقين !!!
الهنوف : وأنت وش دخلك !!! أبوي موافق وأنا موافقة وأنت مالك راي علي
فهد بعصبية : بسيطة ...........!!

طلع فهد معصب وثاير وهو يمشي بالسيارة ولا يعرف وين يروح لكنه متأكد لازم يلقاه ألحين ويصفي كل شيء ... خلاص عشر سنوات سكت لازم يتكلم ويضع حد لتجاوزاته وظلمه !!! كان يمشي ولا يعرف بالضبط وين يروح !!!

فهد : السلام
سعود : وعليكم السلام ... هلا فهد آمـر .. !!
فهد : تركي عندكـ .. !؟
سعود : عندي بس ليه تسأل ؟
فهد : اسمعني يا سعود وبدون نقاش طلبتك تروح برا الشقة وهو لا يطلع أبيه بموضوع مهم وبصراحة خاص بس لا يعرف أني جاي لأنه بيطلع ولا راح يرضى يقابلني
سعود : خيـر وش الموضوع !!
فهد : قلت لك يا سعود الموضوع خاص وما ينفع أقوله لأبوي !!! تكفـى يا سعود طلبتك !!
سعود : خلاص تـآمـر .. !! ( وبصوت منخفض ) بس تعـال بـسـرعة ترى يجهز أغراضه بيمشي لبيت أخوي سلطان !
فهد : خلاص دقايق !!!!!

كان فهد يتمنى يوصل بسرعة وتمنى الوقت يتوقف عشان يوصل لتركي !! خلاص لا يمكن يأجل الموضوع وبعد فترة وصل وحس أنه سنوات وبسرعة طلع من السيارة وبعد ما قفلها طلع الدرج وهو يتمنى يوصل للشقة قبل لا يطلع تركـي .. !! ولما وصل ضرب الجرس وهو ينتـظـر المجـهـول !!



// × // × //× // × //


مشاعل : وافقتي .. !!!
الهنوف بإبتسامة : ايه وافقت ...
مشاعل : ليه توافقين !!
الهنوف : ليه ؟
مشاعل : هنوف عشاني لا توافقين والله تركي ما يستاهلك أنتي تستاهلين رجااااال أحسن منـه !
الهنوف : مشاعل هذا أخوك !!! وصدقني أنا ما راح أغير رايي مهما حاولتي ...
مشاعل : هنوف عشاني صدقيني تركي ... وسكت ما عرفت وش تقول
الهنوف : مشاعل أنا وافقت عن قناعة .. وبصراحة يكفي أن أكون معك وأكون زوجة أخوك ..!!
مشاعل بدموع : هنوف فكري برايك والله يوفقك ... !!
الهنوف : يلا مشاعل ... عمتي حصة تناديني .. مع السلامة
مشاعل : مع السلامة ... !!

الهنوف بعد ما سكرت قعدت تبكي وهي تقول " مفروض تقولين أحمد ربي أن واحد مثل تركي بغاني أنا انسانة مريضة !!! الله لا يسامح اللي كان السبب !!! الله يعذب أهله مثل ما عذبني !!! "

// × // × //× // × //


ابتسمت لبنتها وحييت فيها ... كانت ملامحها تدل على كبر السنين وأن الزمن أثر عليها والحزن يخيم ملامحها ومع ذلك يظهر ثباتها وهدوئها وفهمها لأمور .. !!

مشاعل بدموع : يمـا أبوي بظلم هنوف .. !!
حضنتها نورة وبهدوء : مشاعل لاتبكين .. !! وبعد ما هدئت شرحت لها الموضوع .. !!
نورة : مشاعل أبوك لا يمكن يظلم بنت أخوه
مشاعل : لكن يـمـه أنتي تعرفين أكثر مني كيف أبوي ظلمك أول والكل يعرف ظلمه للناس !! اذا حنا عياله يظلمنا توقف على بنت أخوه !!
نورة : يا مشاعل لا تذكرين سالفة أنا وأبوك هذيك كانت لها ظروفها والله يسامح أبـوك .. !! لكن أنتي قلتي بزوجها تركي وتركي لا يمكن يظلمها وأنا واثق من ولدي !!
مشاعل : يـمـا .. تركي صار مثل أبوي تغيير ما عاد مثل أول !! واللي سوى جريمة قتل ممكن يسوي أي شيء ... !!
نورة : مشاعل أنا متأكدة أخوك انظلم في القضية لكن الله سبحانه تعالى بظهر الحق سواء في الدنيا أو الآخرة ..
مشاعل : ياليت يمـا يطلع تركي مظلوم ... ياليت هذا أخوي !! لكن ألحين هو طلع وانتهينا من هالموضوع !!! المهم ألحين الهنوف والله راح يظلمها أبوي بزواجها من تركي !!! تركي ما ينفع لها وفارق السن كبير .. !!
نورة : شوفي مشاعل بكلم أخوك .. !! وبتفاهم معه .. !!
مشاعل : يمـا تركي زارك !!؟
نورة : لا .. !!
مشاعل بصدمة : ولا كلمك ..؟
نورة : ولا كلمني ..!!
مشاعل بضعف : شفتي ما قلت لك تغيير ولا في ولد في الدنيا ما يزور أمه !!! وهو توه طالع من سجن مفروض الواحد يشتاق لأهله وأظن أمه أولى من غيرها وهو له أكثر من أسبوعين ولا سأل عنك !!!
نورة : أنا عاذرته يا بنتي ... !!
مشاعل : يـمـا تآمـريـني بشيء .. لأني تآخرت
نورة : سلامتك .. وانتبهي لنفسك !
مشاعل : إن شاء الله يما ... وحبت راسها

وطلعت وهو تدعي أن الله يوفق الهنوف ولا تنظلم بزواجها من تركي .. !!


// × // × //× // × //


فتح الباب وانصدم صدمة عمره !! مستحيل يصدق اللي يشوفه !! آخـر انسان يتوقع أنه يواجهه في هذي اللحظات !! تحسف أنه ما طلع من قبل هو مب مستعد لهذي المواجهة ولا يمكن يغامر ويواجه فهد في هذي الـظـروف !!!

فهد بإستحقار : قلي تفضل على الأقل !!! ولا تدري الأمر ما يحتاج أذنك لأن الشقة لعمي سعود مب لك !!
تركي وهو يسكر الباب ويدخل ويجلس معاه وبهدوء : وش بغيت !؟
فهد : جاي تسأل !! أنت انسان تافه !!
تركي بهدوء : مـشـكـور .. !! ويجي منك أكثر يا فهد
فهد بعصبية : تدري وش مشكلتك أنك تنفع تمثل !! تظن قدامك عبد الرحمن عشان تقعد تظهر طيبتك يالحقـيـر !!! أنا عرفت معدنك وأقولها للمرة المليون حسـافـة أني كنت في يوم من الأيام خويك !!!
تركي بصراخ : وش تبغى !! جاي تغلط وأنا ساكت لك
فهد : تعجبني اظهر على حقيقتك
تركي بعصبية : ايه بظهر على حقيقتي !! أني انسان حقير !! وش تبغى !! ولا تبغى أمسحك عن وجه الأرض مثل ما ذبحت الغبي جاسر !!! مسكين مثلك ظن أنه يقدر يوقف في طريقي !!! عشان كذا مسحته عن وجه الأرض !!!!!
فهد وهو يقوم : كل هذا حقد على هالمسكين لأنه عرف حقيقتك وأنك انسان ظالم !!! حسـافـة أن أبوجاسر ما عرف حقيقتك وظنها لحظة عصبية منك وعفى عنك !!!
تركي : أنت جاي تسمعني هالكلام !!
فهد : لا .. ممكن أعرف ليه خطبت الهـنـوف ؟
تركي بإبتسامة : ألحين جاي عشان هالسؤال !!! أنت أعرف بالجواب !!
فهد : أنا لا يمكن أصدق أنك خطبتها عشان تصحح غلطتك !!
تركي : صدقت ولا ما صدقت ما يهمني !!
فهد بعصبية : الله لا يسامحك !!! ظلمت هالإنسانة وهي طفلة وخليتني أكرهها مع أنه ما لها ذنب إلا أنه جاء واحد نذل مثلك ... وبعد فترة صمت ... واعتدى عليها !!! هدمت مستقبلها ودمرتها !!! وألحين بكل بساطة جاي تخطبها وأنا متأكد زواجك منها عشان تظلمها مب تصحيح لغلطتك !! يعني ما كفاك أنك ظلمتها قبل عشر سنوات جاي تظلمها ألحين !!! وأنت عارف أنها لا يمكن ترفض !!! أصلا كيف ترفض وأنت ... !! سكت فهد ما عرف وش يقول لكن الدموع نزلت من عيونه ولحظتها نطق ... اسمعني يا تركي راح أسكت ولا أقول شيء لأن كلامي راح يضر الهنوف قبل لا ينفعها لكن اسمع لو فكرت تغلط عليها صدقني راح أذبحك !! اللي منعني قبل عشر سنوات أذبحك ما يقدر ألحين يمنعني !!! وقلتها لك أحذرك ... !!!


وهنا طلع فهد وصفق الباب ولحظتها تركي كان واقف بجمود وضعف وبصعوبة قعد يتنفس ومسك الكرسي وجلس وهو يصرخ في داخله " الله لا يسامحني ظلمتها !!! أنا السبب !!!!! " وهنا حس بضعف في نظره وكل شيء يظلم وثم سقط ... !!!

// × // × //× // × //


وصلت للبيت وهو تحس بالألم يقطعها والدموع تغطيها .. !!! وهي تدعي من قلب أن الله يوفق الهنوف !!! علاقتها مع الهنوف كانت علاقة أخت مع أختها !! عكس عبير هي صديقتهم وعزيزة عليهم لكن الهنوف غير هذا أختها وروحها !!! حبتها في الله !! وطول عمرهم يتمنون للمستقبل وحتى كل وحدة اتفقت تسمي أول بنت على اسم الثانية لكن .. !!!!!!!
بعد ما فتحت الباب دخلت ومشت وهي تبي تطلع فوق لكن في صوت وقفها ونظرت للخلف وشافته !!! مستحيل !! آخـيـراً رجع !! وبإبتسامة قالت : زيـااااااااااااد .. !!!

// × // × //× // × //