البارات الرابع
في بيت اوس وهذه شخصيات جديده وهم
أوس رجل كبير القلب واسع النفس محب لابنائه قصير القامه قليلاً ممتلئ الجسم كثيف شعر الراس عطوف على شريكة حياته وام ابنائه يعمل مع فضل في نفس الشركة
وهبيه ام رؤوم مليانه حنان لمن تعرفهم وخاصة ابنائها
ولهم من الاولاد
سيف 24 سنه زميل محمد سالم في العمل طويل القامه وسيم جداً كريم وطويل البال
سعيد 22 سنه يدرس في السنه الاخيره من الجامعة اسمر البشره مرح نشيط محب لاسرته
عايدة 20 سنه في السنة الاولى من الجامعة مشاكسه ربة بيت جيدة تحب الاثارة محبوبه من اسرتها كونها الاصغر والبنت الوحيدة
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛
ام سيف "وهبيه" : اليوم قال ابوك بيكلم فضل صاحبه نروح عندهم البيت
عايدة : ليش اليوم ؟ مش كان احسن نتفق على موعد عشان بنتهم المزوج تجي ونشوفها كمان
ام سيف : هو قال بيكلمه وبيشوف ايش بيقول له
عايدة : "يارب انك تقدم الذي فيه الخير وترزق سعيد اخي الزوجة الصالحة "
سيف ممازحاً : وانا ابن الجيران سعيد بس اخوك صح ؟
عايدة : لا بس انت الحمد لله خاطب وباقي سعيد نخطب له ونرتاح منكم ومن شغلتكم
سعيد : ها ظهري النوايا الحقيقية يالي عامل نفسك قلبك علينا
عايدة : هههه .... ايش تشبهوا انه قد زاد الحب لكم اشتيكم ترتاحوا... انا اصلاً اشتي ارتاح من شغلتكم .. يعني عشان نفسي
سيف : كذا افتهم لنا وصارت الامور واضحة ومحد يلعب على حد
ام سيف : يلا ياعيال قد الساعة سبعة ونص قوموا على اشغالكم
سعيد : انا ما عندي محاضرة الا بعد الساعة عشره
سيف : وانا اليوم مقدم علي اجازة ومش رايح العمل
ام سيف : الله يصلح حالكم ويوفقكم للي يحب ويرضى لكم ... الله يرضى عليك ياعايدة قومي صفي البيت وصلحي حلا نأخذه معنا بيت فضل اذا رحنا العصر
عايدة : ان شاء الله يمه .. ايش رايك اصلح رواني والا شعوبيات
ام سيف : صلحي رواني اصلاً الشعوبيات تحتاج وقت وما بتلحقي تصلحيها ... مرة ثانيه بنصلحها عاد الجيات والريحات كثير ان شاء الله
عايدة : على قولك رواني اسرع واسهل
سعيد : اضبطيها تمام وأرفعي راسي
عايدة : الحمد لله والشكر ليش بيخطبوني والا احنا بنخطب منهم؟
سعيد : لا قصدي بيقولوا ياسلام كيف تطبخ البنت هذه اكيد جاءت على اخوها وبيوافقوا على طول على الخطوبه ..هههههههههههه
عايدة بسخرية : بس اقلب وجهك بس ...قال على اخوها قال
ام سيف بحزم : بس يابنت احترمي اخوك وقومي شوفي شغلك
عايدة : يلا ذاني قائمة بروح اكنس البيت
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛
في بيت فضل على الغداء
اليوم بيجيب اوس صاحبي مرته وبنته يتعرفوا عليكم
ام علي : حياهم الله اهلاً وسهلاً
بعد الغداء ام علي : شوفي ياوفاء المجلس لو يحتاج تنظيف وبخري البيت ... والله ماني عارفة ايش نقدم لهم
وفاء : الحمد لله البيت نظيف وما يحتاج شيء صفيته الصباح وبروح الان اعمل كيك بالقرفه نضايفهم فيه ها ايش قلتي ؟
ام علي : تمام ...الله يحفظك يا بنتي ويصلح حالك
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛
بيت سمير
الارهاق لا يفارقها هذه الايام وتشعر بالنوم و بالغثيان كلها امور تدل على انها حامل ولكنها لاتريد ان تعترف لنفسها بذلك
وضحى تحدث نفسها : يالله رحمتك ارجوا ... الظاهر اني حامل لازم اكلم بيت ابي اخليهم يشترون فحص دام زوج الهناء ماهو فاضي لي
تخرج هاتفها الذي تخفيه عن سمير بعد ان اكلت علقة محترم عندما اخبرته بمتلاكها هاتف وامرها بارجاعه لاخيها
وضحى : السلام عليكم ...كيف الحال
: وعليكم السلام ... الحمدلله .... وضحى
: ايوه ...مالك ماعرفتيني ؟
: اه مدري كيف صوتك تعبانه والا شيء ؟
: شوية ارهاق ... كيفكم
: الحمدلله ... اقول وضوح اليوم بيجون عندنا ناس يتعرفون علينا
: من وين يعرفوكم
: واحد صاحب ابي بالعمل بتجي مرته وبنته ... وامي تقول تحس ان وراء هذه الزيارة شيء يعني ماهي لله
: ههههههههه ... ايوه قلتي لي .....شكله فارس احلامك قرب يظهر
: وضحــــــــــــــــى بسك ... الا قولي لي ايش مناسبة الاتصال
: اسلم عليكم والا حرام
: على حساب علي تسلمي علينا لمن يكون على حسابك هذك الوقت بتسلمي علينا بس الان العبي غيرها قدني عارفتك ماتتصلي الا للضرورة
: أي والله اسمعي وفاء بكره لمن تروحي المدرسه شفتي الصيدلية اللي قريبة منها روحي اشتري فحص حمل من غير ماحد يعرف ولمن اجي عندكم باخذه منك تمام
: كلووووووووووووش .... مبرو....قطعت كلمتها بسبب صرخت وضحى
: اشششششششششش الله يقطع شيطانك ياسخيفة ...الان اقولك من غير محد يعرف وانتي سمعتي العالم ...وبعدين عاده مافي شيء اكيد وان شاء الله مااطلع حامل
: خلاص تمام يلا باي بروح اشوف الكيكة ... بتقدرين تجين اليوم
: لا والله تعبانه بالموت وسمير ماهو في البيت مره ثاني بنتعرف عليهم ان شاء الله ... يلا مع السلامه
: مع السلامه الله معك وخلي بالك من نفسك
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛
بعد صلاة العصر بيت فضل
ام علي : ياهلا ويامرحبا حياكم الله نورتونا
ام سيف :الله يحييك ويصلح حالك ... هذه عايدة بنتي
عايدة: هلا خاله ..كيف حالك ؟
ام علي : الحمد لله يابنتي ...حياكم ..حياكم ..تفضلوا ..فسخوا عبايكم .. خذوا راحتكم ما في حد في البيت غيرنا
ام سيف : الله يديم فضلك
تدخل وفاء وبيدها العصير وتسلم عليهم : السلام عليكم .. يا هلا ويا مرحبا
ام علي : هذه وفاء بنتي ... ثم اردفت تقول لوفاء هذه خاله ام سيف وهذه عايدة بنتها
ام سيف : ما شاء الله تبارك الرحمن صف كم تدرسي يابنتي ؟
وفاء وهي تجلس في جوار عايدة بعد ان وزعت كاسات العصير : اول ثانوي ...
ام سيف : ماشاء الله عليك
ام علي : يامرحبا بمن زارنا حياكم
ام سيف : الله يحييك ويبقيك
وفاء تحدث عايدة : كيف حالك عايدة؟
عايدة : الحمد لله ايش اخبارك انتي ؟
وفاء:الحمد لله ...وانتي صف كم تدرسي ؟
عايدة :انا الان سنه اولى دراسات اسلاميه
وفاء :ما شاء الله ما يبان عليك انك في الجامعه
عايدة :هذا من ذوقك
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛
اما في جبهة النساء وضمن احاديثهن المتشعبة
ام علي : والله ماقد كلمنا عنكم فضل والا كنا جينا عندكم تعرفنا عليكم
ام سيف : المهم اننا تعرفنا على بعض وما يهمش من الذي جاء عند الثاني
تهم وفاء بالخروج من الغرفة
ام سيف : خذي يابنتي هذا رواني صلحته عايدة
ام علي : ليش تعبتوا نفسكم والله ما كان يحتاج
ام سيف : ما عملنا شيء الذي كنا بناكله في البيت جبناه معنا عشان يصير بيننا وبينكم عيش وملح
ام علي : كثر الله خيرك والله احرجتونا
بعد الضيافه والقيام بالواجب
وفاء وقد اخذن على بعض هي وعايدة : تعالي ارويك البيت ونروح غرفتي اوريك شغلات تخصني
عايدة : اشتي اشوف صور وضحى حق العرس تمام
وفاء : تمام يلا بلا تضييع وقت ... احنا نستاذاً بنروح غرفتي
ام علي : الله معاكم
تعرفت عايدة ووفاء على بعض عن قرب وتحدثتا بكل شيء واخذت وفاء رقم عايدة ولم تكن هي تملك رقم خاص بها ولكنها وعدت عايدة بالتواصل عبر هاتف البيت
؛؛؛؛؛؛؛؛؛؛؛؛؛؛؛؛؛
بعد كم يوم وضحى تبكي في غرفتها والعبرة خانقتها ماهي قادرة تستوعب الامر اللي ظلت قرابة الشهرين تنفيه وبعتقادها انه سيغير الوضع والله ماني مستعده لثقل جديد كافي عليا نفسي ازيد اظلم نفس معي يارب اغثني يارحمن عارفه ان لله حكمه بكل شيء وماني معترضة على قضاءه وقدره بس كيف بتكون حياتي بعدين ماني عارفة اني بستمر والا بيصير عليا شيء يالله فرجها من عندك ياكريم
هكذا تقبلت الامر بقلب مؤمن بقضاء الله وقدره وفرح لها اهلها واما زوجها فمر الامر عليه كانه لا يعنيه
وبعد مرور شهر تمت خطبة وفاء على سعيد وتحدد العرس بعد 8 اشهر لتكون وضحى قد ولدت بعد ان اتضح حملها وسعيد قد تخرج من الجامعة
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛
وضحى : سبحان الله كيف القدر جمع بينك وبين سناء بنت الحاج سالم بتكونوا في بيت واحدة
وفاء:لمن عايدة قالت لي ان عندها اثنين اخوان اكبر منها سألتها متزوجين قالت واحد خاطب اخت صاحبه والثاني عاده ما توقعت تكون سناء ابداً مع انها قالت لي انهم ساكنين في هذا الشارع بس مش عارفه وين بالضبط
: ليش انتي ما سألتيها ايش اسمها
: الا بس مدري بايش انشغلنا وما عاد قالت لي ، انتي الان في أي شهر ؟
: دخلت الرابع من اول الاسبوع هذا
: يعني بيجي العرس حقي وانتي قد لك شهرين من لمن ولدتي صح
: ان شاء الله يكون حسابنا صح واكون قد خلصت النفاس
: كم جلستي بعد العرس وحملتي؟
: تقريباً شهرين .... تأخرت امي مش من عوائدها يأذن المغرب وهي ماروحت
: هذك كان زمان الان تقول سوالف الحريم ما تخلص ما تنتبه الا وهو يآذن المغرب
تدخل الام رؤوفه بانفاس متقطعه من سرعتها في المشي : السلام عليكم ،الله يقطع سوالف الحريم ما عاد انتبه الا وهو يآذن
تنخرط وضحى ووفاء في ضحك شديد وهما تتبادلان النظرات
رؤوفه فزعه : اعوذ بالله من الشيطان الرجيم ايش حصل ؟ وبعدين انتي عندنا يامقصوفة الرقبه ليش ما رسلتوا لي زياد ؟
تقوم وضحى لتقبل راس امها ويديها : هلا يمه والله قلنا ما بنقطع عليك سوالف الحريم ...الا قولي لي ايش اخبار جيراننا؟
: الحمد لله .. خليني اقوم اصلي وبعدين بكلمك
وضحى : وحنا كمان بنقوم نصلي الان
يدخل على عايداً من المسجد : السلام عليكم عادكم للان ماصليتوا ...استغفر الله العظيم من كل ذنب عظيم ... المغرب وقته قصير ما يجوز تأخروه كذا
وفاء : ياربي من المطوعين ليش تعتقد انه احنا كلنا مطوعين مثلك ؟
وضحى : بس وفاء لقافة هو صادق وما كذب يلا قومي صلي
بعد الصلاة في غرفت الام : ها يابنتي كيف الوحام خف والا عاده ؟
وضحى : الحمد لله بس احس بارهاق طول الوقت واتعب قوي لو عملت أي حاجة
ام علي بحنان وهي تربت على كتف ابنتها : عادي هو كذا الحمل بس انتي حاولي ما تجهدي نفسك زيادة وكوني ارتاحي وقت طويل وهتمي باكلك
تدخل وفاء وفي يدها الشاي والمعجنات : تفضلوا يااغلا اثنين على قلبي
وضحى بضحكة : قد هو واضح من اول ما جبتي لي شي تقولي صيام ...والان عشان امي بتصيح عليك رحتي تجهزي ضيافه
وفاء بصدمة : انا يا الظالمة تقولي عليا كذا.. مش انتي الا كنتي تقولي لي خليك جالسه.. وما يحتاج شي ..وخليني اشبع منك.. وانا من البيت ومدري ايش ..الان قدام امي عامل نفسك ياحرام مسكينه ؟
وضحى : ههههههههه اعوذ بالله كأنك بالعه راديوا ..ما شاء الله مجهزة دفاعاتك على طول!
وفاء : عشان انا عارفه بنواياك الشينه
ثم تنخرطان في الضحك هههههههههههه
وضحى بعد انتهائها من شرب شاهيها : يلا انا بخلي علي يروحني
وفاء: ليش وين السي السيد بتاعك ؟
وضحى : اولاً عدلي لسانك وثانياً بطلي لقافه وثالثاً الحمد لله انه مش انتي الذي بتروحيني والا كنت عفنت جمبك
وفاء : الحمد لله أصلا انا مش شغاله تباع احد
ام علي بحب : يلا قومي يابنتي ومالك منها عشان علي ما يتأخر بالرجعة ... الله معك يابنتي وانتبهي على نفسك ودلا دلا على روحك
وضحى : يلا مع السلامة .. تصبحوا على خير
الجميع : وانتي من اهل الخير
؛؛؛؛؛؛؛؛؛؛؛؛؛؛؛؛؛؛؛؛؛؛؛؛
عايدة : الله يمه قد نفسي الأيام تمر بسرعة الريح ويجي عرس إخواني
: على ايش مستعجلة .. قد هي الأيام تمر بسرعة الريح على قولك طبيعي من غير ما تتمني
: أشتي أشوف إخواني وقد هم مزوجين وبعدين يا بختي بيكون معي ثنتين مونسات بدل ماني وحدي
: الان وحدك ها ؟! قومي من قدامي طيب ... على ايش جالس تشغليني دامك ما تعتبريني مونسة لك ؟
عايدة تحضن امها : انتي الخير والبركة ياست الحبايب .. بس انا قصدي بيكونوا مشاركات لي على خبالي وجناني
: بهذه صدقتي ...بس ما اعتقد بيجوا على هواك بيكونن يستحين مننا
: سناء انا معك ايوه بتستحي واصلاً مش من طبيعتها الخبال ..بس وفاء ما اعتقد لانه طبع فيها وما يقدر الواحد يغير طبعه بسرعة
: الله العالم ...بس اصلاً الزواج بحد ذاته دافع قوي أن الواحد يتغير من الداخل ...وفي كثير بنات يتغيرين بعد الزواج
: يلا باي تصبحي على خير يمه قد الوقت متاخر وانا عندي بكرة محاضرة من بدري
: كم مرة قلت لك لا تقولي باي ما يجوز عشان معناها كانك تدعي للبابا حق المسيحيين
: ان شاء الله هذه اخر مره يلا مع السلامة
: وانتي من اهل الخير .. لا تنسي تقرائي الاذكار
؛؛؛؛؛؛؛؛؛؛؛؛؛؛؛؛؛؛؛؛؛؛؛
نهاية الجزء الرابع
اسفة على الخطاء الاملائية
ودمتم بالف خير
|