[اسطورة !]

البارات الحادي عشر
بيت سمير
بعتب ام محبه : يعني يابنتي لو مااجيتك انتي ما بتجي عندي؟
بحياء : الله لا يحرمني منك ...بس انا مقدر اجي وحدي وقدني استحي من علي كل شيء عليه عادني ازيد ارمي حملي عليه !
بقلة حيلة : الله يصلح لك زوجك بس ...وفاء كل جمعة وهي عندنا الا اذا هي مشغولة او عندها اختبار
بضيق من المقارنه الدائمة : يمه اصابع بنانك ما تتساوى ...بعدين سمير مش فاضي يالله يلحق على شغله ويروح يرتاح وماكون اشتي اشغله فيني وبخرجاتي
بتيرجه وتهكم : الله اكبر ...ماهو الشغل هذا الذي ما يخليه يتنفس ؟ ما كلهم متوظفين ويقضوا حوائج بيوتهم الاهو مدري كيفه !
في محاوله لتغيير الموضوع الذي يرهقها : المهم خلينا منه الان ...ايش اخبار زياد ليش ما جبتيه معك ؟...والله اني فاقده له قدلي كثير منه
: والله كان نفسه يجي معي بس بكرة معه اختبار وقال بيروح يذاكر مع صاحبه ...بس تعرفي ايش قال لي ؟
: اكيد ارسل لي بوسه مع سلام
:لا قد راحت عليك حتى ماذكرك ...الا يقول جيبي سباء معك والا ما ترجعي البيت من غيرها
: هههههههه الله يقطع ابليسه ماعاد لي كرت عنده من يوم جت هذه المقصوفه
: تشتي الصدق كلنا نحبها اكثر منك اصلاً ما شاء الله عليها تنطرح على الجرح يبراء
:الله عليكم بس يالله فديتها بنتي ...الله يحفطها لي ..خليني اقوم اجهز لها غيارات عشان تأخذيها معك
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛
في بيت ابو سيف
ابو سيف : مسكين سيف ماعاد هو طايق نفسه من يوم ماراحت مرته بيت ابوها
ام سيف : هههههه الله يعينه ما يقدر حتى يروح عندها توحمت عليه كل ما شافته رجعت ...يالله بتعدي الايام بسرعه وبتبقى ذكريات
يدخل عليهم وامه تحدث اباه ويسمع نهاية حديثها :ايوه بتبقى ذكريات بعد ما تكون روحي قد خرجت
بخوف : بسم الله عليك وعلى روحك ياولدي....كثير حريم يصير لهم كذا
عايدة : ما جاءت الا على سيف والله اني راحمتك ياخوي
بنظره متفحصه متهمه : راحمتني والا ضايقه مني ومن شغلي؟ قدنا داري بخباياك
بزعل واضح في نبرات صوتها :الله يسامحكم كلكم ظالمين لي ...بس يالله خلي هذا الشهر يعدي وبترجع سناك وماعاد اشتي اشوف وجهك قدامي
بضحكه ابويه خالصه :هههههههه ...هذا ما جنته براقش على نفسها
يقوم سيف ليطبع قبله علي راس عايدة: انتي الاصل والبركة ...انا امزح معك بس
: عادي قدني صابره عليك شهرين ماعاد يضرني الباقي ...بس صدق قد سناء احسن امس لمن رحنا عندهم قالت ان الوحام خف عندها كثير
: ايوه ياولدي ... الحمد لله قدها بتخلص الرابع زيد خليها اسبوعين ورجعها
: ان شاء الله ...الله يصبرني لذك الوقت
ابو سيف : يلا انا رايح العمل ناقص شيء اجيب معي بعدين
سيف :اصبر يبه انا خارج معك يلا مع السلامة
: الله معاكم ما نشتي الا سلامتكم
مع السلامة اذكروا الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛
بعد ساعات
؛؛
؛؛؛
؛؛؛؛؛
: وين بنتك قومي جهزيها قد علي بيجي بعد شويه
: يمه هذه الزيارة ما تحسب لانها الصباح انا اشتيك تجي عصر نجلس سواء
: والله يابنتي الصباح احسن علي الاقل الوقت اطول من العصر
: يلا الله معاكم ...هاتيها ابوسها اول ..وهي تضم ابنتها الي صدرها : تروح سباء حبيبي مع جدة عند خالوا زياد ؟
بفرحه طفوليه : اوه الوح عند اياد واحليك وهدك " ايوه اروح عند زياد واخليك وحدك "
: ياربي بموت انا منك خذيها يمه قبل اكلها ... يمه خلي بالك منها ولا تخليها تزعج ابي وبكره خلي علي يرجعها
: تمام ان شاء الله ما يصير الا كل الذي يرضيك ...يلا في امان الله
: الله معكم مع السلامة
دخل في هذه اللحظة علي للسلام على وضحى وبعد السلام : ها بتجي معنا حبيبت خالها ...هاتي يمه انا احملها ...تعالي سباء عند خال علي ...يلا مع السلامه
:بحفظ الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛
بعد كم يوم
؛؛
؛؛؛
؛؛؛؛؛
وهي ترى اثار ضربه لاختها : انا مش عارفة على ايش صابره عليه ياختي اطلبي الطلاق وخلصي نفسك من هذا العذاب وارتاحي
وضحى: ياقلبك الواسع ...وتعتقدي اني لو طلبت الطلاق بيطلق بالساهل هذا استاذ ابليس في الخبث يدور كيف يأذيك بكل شيء وكيف يستفيد منك ....وانا ما حيلتي ولا حاجة ماعاد طرح لي شيء حتى ذهب العرس بعت نصه في ولادت سباء والباقي بعته على دفع كل ما احتاج شيء ابيع منه لانه سمير يصرف كل فلوسه على البلا الذي ياكله ....وبعدين انا وراي اثنين سباء وهذا الذي ببطني الدكتوره تقول 80% ولد والله اعلم ...وين تشتيني اروح انا وهم اذا تطلقت ...يعني رغم عيوبه الا انه يبقى فاتح لنا بيت ويصرف علينا حتى لو يقصر بحقنا بس احسن من ما فيش وان شاء الله يتعدل
وفاء: والله ذيل الكلب عمره ما يتعدل ...بس اذا الوضع عاجبك بكيفك والا بيت ابي موجود وامي عادها تعيش الحمد لله
: انا حتى شغل ما اقدر اشتغل بشهادة الثانويه باعيش من وين انا وعيالي وانتي تعرفي ابوك كيف يحب القرش اكثر من نفسه
بضيق على حال اختها : والله ما اقول لك الا خير بس كيف بتعملي ؟
بعد تنهيده حاره : خليها على ربك وهو مابيضيعنا ...وبصبر لبعد مااولد ويصير خير بعدها ....يمكن هذا الولد يكون فاتحة خير علينا وينصلح حال ابوه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛
نهاية البارت الحادي عشر
ويارب احصل ردود تشرح خاطري
ودمتم بالف خير
المحبه لكم اسماء