البارت الثاني عشر
بيت سيف
وهو يضمها اليه : والله كنت بموت وانا وحدي والا بجن كنت كل ما دخلت الشقة اشوفك قدامي بكل مكان... ريحتك...ملابسك...كل شيء كان يذكرني فيك لحد ماحرمت اطلع الشقة ...حتى ملابسي وادواتي رجعتهم غرفتي القديمة ببيت ابي ...الله يسامحك بس ....بهذلتينا ياشيخة
وهي تدفن نفسها بين احضانه : هههههههه ..... هذا عشان تعرف قيمتي وما تستهين فيني ...لكن تشتي الصدق والله كنت ساعات افقدك قوي واقرر ارجع حتى لو اني متوحم عليك بس ارجع ابطل واقول بعيدة محبوبة ولا قريبة مكروهة
:ههههههههههه.... بهذه صدقتي لانك كنتي بتكرهيني بنفسي وانتي كل ما شفتيني والا شميتي ريحتي رجعتي
: الله لا يعيدها من ايام ...بس والله انها ذكريات حلوه
؛؛؛؛؛؛؛؛؛؛؛؛؛؛؛؛؛؛؛؛؛؛؛
بعد شهرين
؛؛
؛؛؛
؛؛؛؛؛
بيت سمير
: ايش رايك ياوفاء تجي عندي في ولادتي لاني ما اشتي اروح بيت ابي اولد ولازم يكون معي احد في الايام الاولى
:والله ؟....من صدقك انتي تشتيني اجي عندك ...والوحش حقك نسيتيه ...لا ياعمري انا مش بايعه نفسي عشان اجي اجلس عندك
بصوت باكي والدموع تترقرق في عينيها :لا حول ولا قوة الا بالله ...انتي ما تشتي تجي عندي ...وامك ماتقدرش تسيب بيتها وزوجها ...وابوك قد قال مرة واحدة تكفي يعني ايش بيدي اعمل ....اموت نفسي وارتاح واريحكم ؟ وعلا صوت نحيبها
تقوم لتحضن اختها : بعيد الشر عنك ...بس انا عندي حل يرضي الكل
وما زالت الدموع في عينيها :تحفيني بالحل المثالي الا انا ما قدرت اوصل له يمكن ينفع
: ياعمري انتي ...شوفي ....سباء نخليها عند امي طول فترة نفاسك لحد ما تقدري تقومي على نفسك ..وبما انك مرتبة لنفسك وحدة تجي عندك وقت الولادة فخلاص هي بتولدك ...وبعدين انا بكون اجي عندك كل يوم النهار ارتب شؤونك واشوف ايش يلزمك وارجع بيتي ...ها ايش قلتي ؟
: والله حل حلو ...بس كم بتجلسي على هذا الوضع ؟ بتتعبي
: يعني اسبوع ... عشر ايام ...عادي لانك بعد كذا بتكوني تقدري تعملي شغلك وانا ما بقطعك بكون اجي بين الفترة والثانيه اعمل الشغل الكبير ...الكنس وغسل الثياب ...وسباء عادي تتأخر عند امي كم ما تشتي
: خلاص تمام ...مع اني ما كنت اشتي سباء تكون عند امي اخاف ابي يتضايق
: يتضايق والا يكسر راسه بالجدار ...ايش نعمل له يستحمل
: استغفر الله ...ما يجوز تقولي على ابوك كذا مهما يكون هذا ابونا الذي تعب عشانا ...يلا استغفري ربك
: استغفر الله العظيم من كل ذنب عظيم ....الا انتي متي بتولدي
: اعتقد في هذه اليومين الله يخارجني بس ويسهل لي
: ان شاء الله يلا انا مروحة قد سعيد خارج ينتظر وسامحيني لو انا ضايقتك والا زعلتك ...وتتقدم لتقبل راسها
: لا عادي ....انا عارفة انك ما تقصدي ...يلا الله معك وسلمي على بيت عمك
: الله يسلمك ..يلا في امان الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛
في بيت اوس
سناء : ياربي على ولد وضحى ...عمري ما شفت ولد زيه ما شاء الله عليه ...عادعمره شهرين بس وربي يجنن واحلى حاجة فيه عيونه ما شاء الله عليهم مرة حلو ..ان شاء الله بنتي تكون كذا حلوة وتأخذ العقل على قول اخواننا المصريين
ام سيف : أي طالع لابوه الله يحفظه ...بس وضحى كاسرة خاطري صح وفاء كل كم يوم تروح عندها وتقول انها طيبة ..بس احسها تاعبة مدري فيها شيء ...قبل كم يوم لمن شفتها اوجعت قلبي
عايدة : أي والله صدق تشوفي بعيونها التعب والارهاق مدري الحزن ..الله اعلم وحده ايش فيها... يلا الله يريحها ....الا وين وفاء ياسناء مانزلت معك ؟
سناء : راحت عند امها قالت بتمر وضحى وبتروح معها بيت ابوها
ام سيف : الله يريح قلبها مثل ما تحاول تريح قلب اختها ....قومي يابنتي شوفي وين ابوك واخوك وجيبي لهم شاي وفطائر
عايدة : على امرك الان بقوم اودي لهم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛
في بيت سمير
وضحى: والله تعبت ياوفاء وما عادني قادرة اصبر ..تصوري قد وصل فيه الامر يضربني على الطالع والنازل من غير سبب .. ويجلس بالايام ما يروح البيت ما ادري عنه شيء ولا وين ارضه من سماه
وفاء: احسن فكة من مكة .. فكة من وجهة النحس
وضحى: على قولك ...بس انا استخرت ربي ونويت اقول لابي كل حاجة واروح انا والاولاد عندهم ويحلها الف حلال
وفاء : افضل حاجة سويتيها بحياتك...توكلي على ربك واستحملي ابي افضل من زوجك المنحوس هذا .. وعلى قول المثل نار ابوك ولا جنة زوجك
وضحى بحزن: أي والله على قولتك ...يلا بيكون سعيد قد رجع من المشوار ..وانا مابروح معك اليوم قد انا بكرة بروح لهم مرة وحدة
وفاء: يلا على كيفك ...اقول لامي ولا كيف ؟
وضحى : لا ماتقول لها حاجة انا بكلمها بنفسي
وفاء: اشوفك على خير مع السلامه
وضحى : الله معك ..مع السلامة
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛
اليوم الثاني عصر
دخلت وضحى بيت ابوها حاملة اولادها وتجر شنطة ملابسها خلفها
بجزع ام وقلب حنون : عسى ما شر ايش فيك ؟ ايش الذي صاير مالك كذا ؟وبعدين ليش جايبه ملابسك معك ؟ايش حصل بينك وبين زوجك ؟
تجهش ببكاء حاد دون ان ترد بكلمة واحدة على تسألات امها
: استغفر الله ...استهدي بالله يابنتي وقولي لي ايش حصل
: ما عادني راجعه له لو تقطعوني ...خلاص تعبت وما عادني قادرة استحمل اكثر ...كل ما قلت بيتعدل يزيد ينحرف
: ايش الذي حصل عشان تقولي كذا ؟ أي زوجين تصير بينهم مشاكل وتنحل .. وبعدين انتي ناسيه انه في ذمتك عيال بتشرديهم من ابوهم يعني عشان راحتك هذا سنة الحياة لازم المشاكل تقع وبعدين تنحل وكل شيء يعود لما كان ومحد معصوم من الخطاء
: البلا انك مانتي عارف ايش بقلبي ....وين ابي ؟ انا بقول لكم كل شيء من يوم ما تزوجته لحد الان وانتم احكموا
: لا حول ولا قوة الا بالله ...والله قلبي كان حاسس انك معذبه وما تبي تقولي ...الله يسامح الذي كان السبب ...يلا قومي توضي وصلي ركعتين وإهدأي ولمن يرجع ابوك واخوك يصير خير
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛
بيت سعيد
فجاءة بتنهيدة عميقة وبصوت هامس : لا اله الا الله محمد رسول الله ...استغفر الله العظيم ...اللهم اجعله خير يارب
: ايش فيك ؟خير ايش حصل ؟ فجعتينا الله يهديك
: ما فيني شيء ...بس حاسس انه اليوم بيصلح شيء ...ان شاء الله خير
:ان شاء الله ....اجلسي وخليني اتونس بسوالفك وخليها على ربك
تدفن نفسها في صدره وهي تتذكر حال اختها : الله لا يحرمني منك ياروحي
: ولا منك ياوفائي
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛
بيت ابو علي
بعد رجوع ابيها اخبرتهم بكل شيء منذ بداية تهاونه في الصلاة ثم انقطاعه عنها وتركه العمل بسبب كثرة غيابه حتى ادمانه المخدرات مع شربه الخمروحضوره الي المنزل برفقت اصدقائه وصولاً الى ضربها واخبرتهم انها بعد ان فاض بها الكيل وبعد ان اذاقها طعم السياط واللهب جسدها بكل صنوف العذاب اتت اليهم مستنجدة بهم
وهي تبكي : اسألك بالله يابي ما تردني له ...والله ما شفت يوم مريح من يوم ما تزوجته وكل يوم اصبر نفسي واقول يابنت اعقلي دائماً البداية صعبه وبيتغير ...ارحمني يبه الله يخليك... وماعاد ترجعني للعذاب عنده
ابو فضل بحزم : ما فيش عندي الان كلام لازم نسمع الطرفين ...بشوف ايش عنده وبعدين نشوف كيف نعمل
وضحى بقوة من يتمسك بالحياة بعد ان ذاق الموت : والله ما عادني راجعه له ابداً هذا فاسق لا يخاف ربه ولا يخاف عباده ...والله لاموت نفسي لو تغصبوني ارجع له
وهي تبكي لبكاء ابنتها : اتقي الله في بنتك يافضل وخاف ربك بتسأل عنها يوم القيامة ...البنت تقول لك يضربها ومعذبها حياتها كلها وفوق هذا كله ما يصلي ولا يعرف ربه وانت تقول بتتفاهم معه
بغضب مكتوم : والله وصار لك لسان تردي عليا ياروؤفة
: هذه بنتي وانا خائفة عليها ليصير فيها شيء ونكون احنا السبب
واخيراً تحدث بعنفوان الشباب وحميتهم : اسمح لي يبه ... انا اختي ما بترجع له الا على جثتي ...والله ما عاد يشوف منها شعره هذا الكلب النجس... ولي معه حساب على كل اللي سواه فيها والا ماكون علي بن فضل
ابو علي باعجاب بشهامة ولده :الله يحفظك ياولدي مش كذا تنحل الامور ... ولا بالغضب والحميه تأخذ حقك
علي : باخذ حق اختي منه باي طريقة ... وبعدين ايش باقي عشان نسأله والا نشوف الامر واضح وضوح الشمس ولازم يكون موقفنا واضح وحازم
ابو علي: يصير خير دامكم اجتمعتوا عليا ....بكلمه يطلقها والله يقدم الذي فيه الخير
تقوم لتقبل راس ابوها : الله لا يحرمني منك ويطول بعمرك ياتاج راسي
تطلقت وضحى بعد مرور شهرين وبعد اخذ وعطاء وتحكيم ومشارعه مع زوجها وهي عند ابيها منذ حضرت اليهم وكانت متعلقة بأولادها لا تفارقهم ابداً وكانت تشعر بستثقال ابيها لها وانزعاجه من اولادها فكانت تحاول ان تبعدهم قدر المستطاع عن اماكن وجوده حتى لا يزعجوه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛
يجلس في مكتبه وضع راسه بين يديه
" يارب ماكون انا السبب بظلمها ... والله ماكنت اشتي لها الا الافضل وماجاء في بالي حتى واحد بالمية اني راميها هذه الرميه ... يارب سامحني وعسى الضرب اللي حصله هذا الكلب من علي واصحابه يكفر عننا ماجنيناه عليها ... يالله ماعادني قادر اشوفها قدامي ... كل ماتقع عيني عليها والا على عيالها يزيد حزني وغبني واحس اني عاجز عن محو لمحة الحزن والالم اللي في عيونها ... انا لازم ازوجها عشان تنسي الاول وتبداء حياتها من جديد ... بس يارب تطاوعني هي وامها "
نهاية البارت الثاني عشر
ودمتم بخير
المحبة اسماء
|