البارات الثالث عشر
في بيت اوس
وفاء: يالله كيف الوحام تعب طول الوقت وانا نوم
سناء: احمدي ربك انك نوم بس وما كرهتي سعيد
وفاء : الحمد لله ...ما كنت بقدر انام وانا بعيد عنه قد تعودت اكون جمبه
وضحى بضحكه : جمبه والا في حضنه وانتي الصادقة ؟
وفاء وقد احمرت خجلاُ: بس ياقليلة الادب ...صدق انك ما تستحي
سناء وعايدة :هههههههههههههههه
سناء : قد هي باتوفي السنتين من يوم تزوجت وهي على ماهي تستحي لمن نذكر سعيد وعاد انتي زيتي بها
ام سيف : مالكم دخل في بنتي خلو لها حالها ...وبعدين الحياء زينه المراءة وتاج راسها
عايدة : بس زي وفاء ما قد شفنا
سناء : والله صدق ما قد شفت زيها ....اقول وضوح خلي اليوم سباء عندنا وبكره انا رايح بيت ابي برجعها معي
وفاء بسرعه : لالالا واللي يرحم والديك مالي خلق احد صدق اني احبها واموت فيها بس مالي خلقها هذه الايام
وضحى: الله اكبر عليك ...من قال اني بحطها عندك ...اصلاُ انا مااقدر انام الا وعيالي في حضني والا النوم يجافيني وما يقرب صوبي
ام علي : سبحان الله ....بهذه صادقه والله اني احالفها تخليهم يناموا عندي في الغرفه اذا ابوها مش موجود وما ترضى تقول يمه والله ما يجيني نوم وهم بعيد مني
وضحى : الله يطول لي في اعمارهم والله انهم الهواء الذي اتنفسه وما ارتاح الا وهم معي من غير رضاي لو ماهم قدام عيني مدري كيف ابقاء وتجيني الهواجس وتركبني الهموم كلها
ام سيف : الله يحفظهم لك ويعوضك فيهم يابنتي على حياتك وشبابك
الجميع : آآآآمين
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛
في الليل بيت سيف
: بكره ان شاء الله بتوديني بيت ابي عشان الولاده
: انا ما صدقت على الله تجي عندي وقدك بترجعي عندهم
: الان يفرق ...تقدر تجي كل يوم والا حتى لو تشتي تنام عندي مسموح
وهو يحتضنها : والله ماقدر افارقك لو كنتي تشوفي حالي وانتي هناك بترحمينا ايش رايك تولدي عندي وانا والله لعمل لك كل شيء
بدلع واضح : سيوفي قد اتفقنا على كل شيء ايش الذي تغير الان ؟
: تغير إني ماكنت عامل حسابي انك بتجلسي بعيد عني ثلاثة اشهر ....وتغير كمان إن الاتفاق اوبرم وعادنا ما جربت فرقاك ...اما الان ما اقدر والله العظيم ما اكذب عليك
وهي تدفن نفسها في صدره : سيوفي لو سمحت هي كلها شهر ونص وبرجع وبعدين انت تقدر تجي كل يوم عندي ...ها ايش قلت ؟
: قلت انك انانية ...والله حتى ابي يلاحظ كيف اتغير بس ايش اعمل امري لله منك ومن دلعك ...تعرفي اني مقدر ارد لك طلب وما ترحمينا
:احبك يااحلا زوج في الكون ...يلا بقوم اجهز ملابسي
: ايوه العبي على بكلمتين والا بالصدق انا الذي احبك مش انتي الذي تحبينا ....بس مابوديك بكره خلي ادواتك جاهزين متى ما جاءت الولاده اخذناهم معنا ووديناك المستشفى ورجعناك بيت ابوك
: على امرك حبيبي ...تسلم لي ياغالي
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛
قضت سناء فترت نفاسها في بيت ابيها وكان سيف تقريباً كل يوم يمر عليها وعلى ابنتهما شهد
ومحمد راضي عن نفسه و زوجته التي قبلت راضية ان تعيش مع اهله بعد زواج سناء
اما وفاء فقد عدت مرحلت الوحام وهي سعيدة بحملها
ووضحى تعيش في ترقب دائم وخوف على ابنائها من ان يظهر ابيهم ويأخذهم منها او ان يغصبها ابوها على الزواج مرة اخرى
وعلي الان في اول مرحلة من الثانوية ويعتبر رجل البيت فكل شيء على عاتقه
اما زياد فيدرس في الصف السادس وسعيد بوجود وضحى واولادها عندهم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛
بيت ابو علي
: اليوم جاء خاطب لوضحى وهو متزوج بس مرته مريضة وهو عاده في قوته ويبيله مره ....وانا نفسي ازوجها وارتاح انتي داري ان البنات هم وعاد هي معاها عيال
: حرام عليك انت ما ترحم البنت عادها متأثره من زواجها الاول وانت تشتي ترجمها لتجربة ثانية الله اعلم ايش عواقبها
: انتي قولي لها وشوفي ايش بترد عليك ..وبعدين انا ما قلت بغصبها تتزوج
: وايش معنى انك كل يوم والثاني جايب لها عريس مالها الا شهرين من خلصت عدتها وشوف كم عريس قد جبت
: ايش اعمل لهم يجوني يخطبوا وانا اقول لكم لا ادور لهم ولا شيء
: يلا خير بروح اكلمها
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛
في غرفة وضحى
: وضوح يابنتي ابوك يقول جاءك خا...
تقاطعها : لا تكملي ولا شيء انا زواج ما افكر فيه الان الا اذا ناوين تغصبوني
: لا ما بنكرهك على شيء ما تبيه وانا قد قلت لابوك بس هو قال اسألك ...يلا تصبحي على خير ولا تكدري نفسك ولا شيء كل شيء بيصير على ما الله يقدر
: تصبحي على خير
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛
:ها ويش قالت بنتك؟
: قالت ماتشتي تتزوج ...وخلاص فكنا من هذه السالفة الله يرحم والديك
: لا حول ولا قوة الابالله ....متى بتعقلي انتي وبنتك ؟ انا مابدوم لكم على طول
: الله هو الرازق ومحد يموت جوع والا قبل عمره
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛
بعد اسبوع
؛؛
؛؛؛
؛؛؛؛؛
يعود زياد من الخارج راكضاً وبصوت عالي : يمه ....يمه ...يمه
: خير ايش فيك..... مالك كذا تصيح ؟
:يمه زوجة محمد ابن الحاج سالم اسعفوها المستشفى يقولوا يمكن ماتت
: لا حول ولا قوة الا بالله ....بسير اشوف ايش حصل ...بتجي معي ياوضحى ؟
: يلا انا وراك اسبقى وانا بتبعك
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛
بيت ابو محمد
: السلام عليكم .....خير ايش حصل ولدي زياد روح يقول اسعفوا مرت محمد
: وعليكم السلام ...والله ماني عارفه ايش حصل لها كنا جالسين بعد الفطور مع بعض قالت بتسير تتمدد مع ولدها الا محمد بعد نص ساعة يدخل عندها ويخرج حاملها ويقول مدري مافيها ما تتنفس وشالها المستشفى
: الله يجيب العواقب سليمة ان شاء الله مايكون فيها شيء
تدخل سناء : الله يسمع منك ياخالة
وضحى : من متى انتي هنا ياسناء؟
: اول ما محمد خرج مرته الا احنا واصلين والان سيف معه
بعد فترة صمت ليست قصيرة تدخل وفاء وهى متغيرة الوجه
: السلام عليكم
الجميع : وعليكم السلام والرحمة
تجلس بجوار وضحى وتهمس : اشتي اقول لك شي
سناء: مرت محمد فيها شيء ياوفاء ؟ قد هو باين من وجهك ومن جيتك المفاجاة
وفاء بنظرات الدهشة والمفاجاة : انا مش عارفة عن مرت محمد حاجة ...ليش ايش فيها ؟ انا جيت بيت ابي قالوا لي عندكم.... خير ايش حصل لها ؟
سناء : ولا شيء ...انا قلت ان عندك خبر خلاص بس
وضحى تحدث وفاء همس: ها مالك ايش عندك ؟
وفاء بهمس ايضاً : مرت محمد ماتت وتقاطعها وضحى بشهقه مكتومة ... الله يقطع ابليسك خليتيهم ينتبهوا لنا
: اسفه ...كيف بنقول لهم
: انا ما اشتي اقول لهم ...الان سيف خارج مع الحاج سالم بنخلي سناء وامها يروحوا المجلس وهم بيكلموهم ....تمام؟
وضحى وهي تنظر لسناء برتباك مما اثار تسألها : خلاص انا بكلم سناء وانتي قولي لامها
سناء : مالك ياوضحى ايش فيك؟
وضحى : كذا روحي شوفي من في المجلس ..صوت رجال ليكون محمد رجع وما قدر يدخل لاننا موجودات ...هاتي شهد وروحي
:بس انتي كيف عرفتي انه يمكن في رجال في المجلس ؟
: سمعت الان اصوات واجيه من هناك
وفي الجانب الاخر من الغرفة بعد خروج سناء
وفاء : ياخالة ...سيف في المجلس يشتي يكلمك
تقوم ام محمد بعجلة وخوف : خير ايش في ؟ الان رايحه له
وفاء : مافي شيء بيسلم عليك بس
: والله ان قلبي ناغصني الله يستر بس
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛
نهاية البارت الثالث عشر
ودمتم بالف خير
المحبة اسماء
|