مر علي ليث الساعه 10 واخذني لمطعم اجبرني افطر وهو كل شوي يحط شي بفمي غصب .. بعدها رحنا بنشوف ابوي لكن عمامي للأسف رفضوا تهاوش معاهم ليث حسيت يكرههم كلهم مالومه خذلوه وهو طفل بحاجتهم .... سحبه سعد ودخله السياره عندي وهو يقوله : الله يهديك شفيك انت ! شلون بتدخلها بين هالرجال
ناظرت له وانا اشوفه معصب ومتضايق مسكت يده قدام سعد وقلت : انت وفيت بوعدك ليث وماقصرت خلاص اصلا مابي اشوفه اخاف اموت بجنبه ..
رد بسرعه : بسم الله عليك
ناظر لنا سعد وهو منصدم .. وابتسم لي ابتسامه لها معنى ()
نزلت للبيت وانا اشوف البيت مزحوم ..
جلست بجنب امي وخواتي ونظراتهم ناقده علي .. لاني طلعت مع زوجي فوقت عزا ..
مشت ثلاث ايام ثقيله على قلبي .. لكن فالليل مانام الا على صوت ليث ..يجلس يسولف معاي لحد مانام ..
اليوم سادس يوم من وفاة الغالي .. امس امي طردت خواتي لبيوتهم وقالت خلاص لاتتركون رجالكم وخالتي قررت تجلس عندها .. قلت اروح مع ليث قبل لانطرد انا بعد جلست ارتب شنطتي تفاجئت بدخول امي الغاضب ..
امي : بتروحين معاه هاه ! نسيتينا اشوف
ناظرت لها وانا مستغربه .. بناتها امس فالليل راحوا وهم معاها بنفس الديره وماتكلمت شمعنى انا ؟،
رديت بهدوء : يمه ليث بكرا تخلص اجازته وبيداوم لازم اكون معاه ولاتشيلي هم كل اسبوع بكون عندك ..
سحبتني من يدي بقوة وردت : وش ابي فيك لاتجين بس المهم خلصي موضوع هالبيت
اها ... تو فهمت !!
ابتسمت لها بتوتر وانا توي اتذكر سالفة هالبيت .. اخاف ليث يطالب بحقه ياربي شسوي ... ()
دخلت معاه بالسياره وانا مو على بعضي اتذكر كلام امي تبيه يتنازل عن حقه خلال هالاسبوع قبل حصر الورث ..
كيف افاتحه بهالموضوع ..!
ناظر لي وهو مبتسم : حي هالزول والله اشتقت لك
ارتبكت اكثر .. وسكتت
سحب يدي لحضنه وهمس : حياتي انتي قويه وابوك ربي يرحمه ..
ابوك !! كأنه غريب ماقد قال عمي ..
همست بتعب وانا خلاص بخربها :
ليث .. وش بتسوي بقضية هالبيت
فجأه لزقني فيه وهو معصب يمه شكله متوحششش وين الحنون اللي قبل دقايق ..يارب ماحد يشوفنا بهالسياره
ليث : فجر ياليت لو تبين حياتنا تستمر بسعاده ماتجيبين طاري هالبيت ! وتبيني اريحك مستحيل اتنازل عن حقي وببيع نصيبي من هالبيت لأي احد غريب
ناظرت له وانا مصدومه .. !
رديت بسرعه : طيب وامي فين تروح !
ضحك بقوة حسيته موب طبيعي ..
ليث : مثل ماراحت امي قبل 22 سنه لأهلها .. وانطردت من هالبيت وانقذفت وانهان شرفها وعرضها وماتت حسره ولاشبعت منها ولاعرفتها الا من الصور .. امك بتروح يالخواتها او لرجال بناتها بإستثناء انا يحرم علي تدخل بيتي ..
ناظرت له ابي اناقشه شفته عاقد حواجبه. .. ويناظر قدام ترك يدي .. وصرخ بغضب :
هذا وقته العاشق الولهان يراقبنا
نزل من السياره شفت رجال قدامه صارت مشاده بينهم فجاه ليث سحب الرجال ونزله عالارض .. يمه وقف قلبي سحبت جوالي بسرعه ودقيت على سعد
نزلت من السياره وانا خايفه مابي اشوف شي .. دخلت داخل البيت وانا ارجف شافتني
خالتي وسحبتني لغرفتي وهي تقرأ علي. .
بعد نص ساعه دخل ليث وهو مبهذل ناداني بصراخ :
فجر فجر
وقفت بسرعه وطلعت له وانا جاهزه للموت .. سحب يدي وهو يقول : يلا مشينا لبيتنا
طلعت امي له وهي تقول بحنان مزيف
: والبيت ياولدي
قاطعها بصرخه لاول مره اشوف امي
خايفه :
انا مو ولدك ولا اتشرف فيك انا ولد حصه الغازي
ارتبكت امي ودخل سعد .. ووقف جنب ليث
حسيت انه جاء وقت تصفية الحسابات فعلا ..
دخلت للحمام لان معدتي بدت تقلب علي .. تركتهم يتحاربون وحدهم رجعت كل اللي اكلته اليوم .. ناظرت لنفسي بالمرايه ..
وجهي نحف اكثر .. هالات سوداء ..شفايفي اختفى لونهم
سألت نفسي .. وين فجر القويه !؟
ليش مو عارفه اصف مع من .. ذاك زوجي ومعاه حق بس لو يحبني ينسى حقده ..
عشاني عشان حياتنا بكرا بيكون بينا اطفال وامي بتكون جدتهم ! كيف بيتقبل هالشي ولابيكرههم فيها .. ليش صرت نسخة من شهد وموضي نعبد الرجال عبادة !!
امي تبقى جنتي .. صح غلطت بس لازم اوقف معاها عشان ضميري يهدأ ، وليث بيفهم موقفي اذا مو اليوم بعدين ..
طلعت وانا رافعه رأسي .. بسم الله كل الانظار توجهت لي ..
سحبتني امي لها .. وهي تناظر لليث بحقد :
تبي زوجتك تنازل عن هالبيت غير هالكلام ماعندي ..
آه حياتي خيبه ورا خيبه والسبب واحد هو امي ..
ناظر لي ليث باستفهام !!
نزلت رأسي بضعف .. صعب اترك امي صعب اخليها تتشرد لو جلست هنا معها مستحيل راح يبيع البيت عالاقل بينتظر لحد ماتنحل امورنا ..امي ماحد يقدر يتحملها لانايف ولانواف ولارجال خالاتي .. اعرفها عدل مالها الا بيتها
رفعت رأسي للي وراه ... طفلي .. اخوي .. سندي .. رفيق عمري
انتظر مساعده منه .. لكن تفاجئت بنظراته البارده الموجهه على امي كأن الموضوع مايهمه ..
يالله يايمه .. وش كان بيضرك لو اكرمتي هالايتام .. كان بيكونون سند لك فوقت ضعفك ..
طلع ليث وهو يصرخ : 10 دقايق انتظرك برا
ناظرت لي امي بغضب وهي تمحي اي فكره برأسي ...
قرب لي سعد وهو يهمس :
لاتخسرين زوجك يافجر !
ناظرت له وانا مقهورة منه ..وصرخت : وانت واقف معاه كلكم ضد هالمسكينه !!
ابتسم باستهزاء .. قهرني
ضربته على كتوفه بقوة .. وانا رأسي يوصل لصدره ..
تكلمت وانا مخنوقه : عشاني عشاني تنازلوا شوي .. امي ماضربتكم ولاعذبتكم امي موب لهدرجة سيئه سامحوها عشاني انا !! ولا صرتوا تكرهوني مثلها !؟
بعد يدي عنه وهو يرد بصراخ لاول مره اشوف سعد الهاديء بهالغضب :
فعلا مو سيئه ماسألتي نفسك من تزوجتي وين انام وين آكل من تزوجتي لقيت ملابسي بالحوش .. الحمدلله اني كبير وموظف ومو بحاجه لها .. لكن تخيلي ياعمه كنت اكلم لمياء كانت تبيني اوديها لصاحبتها طلعت لنا وهي تسحب لمياء وتهاوش موضي وتقولها اني غريب ومفروض ينخاف مني ..
ناظرت لأمي بعتب .. لكن ولاهمها اشرت له على الباب بمعنى اطلع برا ..
طلع مهان واخذ روحي معاه .. جلست بالصاله ابكي جت خالتي تبي تقومني لكن ماقدرت اوقف ، ابي ابوي احتاجه .. قبل كنت اقول ابوي ضعيف وماله دور فحياتنا لكن اليوم فعلا حسيت بدوره ..
*************************************
جالسه على سريري وشهلا تحاول فيني آكل لي 3 ايام صايمه الا عن المويه ..
شهلا : خلاص يافجر حرام عليك شوفي جسمك والله صايره جلد على عظم
(شايله هم سعد اللي مقفل جواله من 3 ايام !
ماحد حاس فالنار اللي بداخلي .. انا ادري سعد ماكان يجي هنا وينام هنا بعد ماتوظف الا عشاني عشان مايخليني كنت اترجاه وماكان يردني . .سعد القلب الطيب اللي ماقد خذلني خذلته انا واتهتمه .. )
دخلت ميري وهي تناظر لي نظرات ترقب .. حسيت ان سعد مرسلها لي وقفت بسرعه وحققت معها وفعلا طلع سعد يكلمها ويتطمن علي وهي تنقل اخباري له ... رجعت ابتسم الحمدلله هو بخير ولسى يحبني ماكرهني ..
شهلا انهبلت من تقلباتي .. جلست آكل قدامها بشهيه مفتوحه بعدها لبست فستان اسود على جسمي ورفعت شعري بوني تيل .. وناظرت لها والابتسامه شاقه وجهي ..
طلعت انا وياها لبيتهم واخذنا ولدها معاه مربيته ؛ رحنا لدار الايتام ومعنا هدايا .. حبيت اغير جو واعدل من نفسيتي المضطربه .. ومافي افضل من هالمكان وانتي تشوفين فرحتهم فالهدايا ونظراتهم البريئة
..
جلسنا ساعتين هناك ورجعنا للبيت وانا مروقه .. الحمدلله الواحد لما يشوف مصاب غيره تهون عليه مصايبه
راحت شهلا لبيتهم بعد ماتعشينا سوا ..
جلست لحالي قمت سويت لي كوب حليب مشتهيته ليش مدري وضبطت جو غرفتي .. احتاج جلسة مع نفسي اعيد فيها حساباتي ..
شغلت الشموع وجلست افكر ..
الحلم اللي مضايقني واخاف افكر فيه !
امي اللي زعلانه مني ومتجاهلتها انا !
ليث اللي خذلني ويبيني اتركه ينتقم من امي !
خفت امي يصير لها شيء .. هي صح قاسيه بس تظل الجنه تحت رجولها
طلعت ادورها وانا لابسه بجامتي الرمادية المفضله .. قبل لادخل غرفتها سمعت صوتها تبكي وتردد إسم ابوي ؛ اوجعني قلبي
دخلت ولقيتها حاضنه كرسيه جيت جلست عندها بسرعه وانا اهديها بست راسها وهي تمنعني اقرب منها بنظرات غضب ماهمني رجعت ابوس يديها دخلت خالتي علينا وهي تضحك على عناد امي ...
جالسه مع امي وخالتي .. اتأمل حالنا
خالتي مطلقه .. وامي ارمله .. وانا !؟
كلنا بدون رجال .. ومعروف عن بنات عائلة امي .. عآئلة الفيصل .. انهم يقدسون الزوج بشكل مو طبيعي ؛ خالتي ذي زوجها كان عقيم وماحملت 20 سنه ورفضت تتطلق منه ..رغم محاولة خوالي معها .. بالاخير طلقها وتزوج اجنبيه وللحين نشوف نظرات الحب والحنين له ؛
امي تزوجت ابوي وهي صغيره وهو يكبرها ب30 سنة .. ماقد شفتها مقصره بحقه تدلعه وتهتم فيه اكثر مننا حنا بناتها ..
موضي وشهد ورثوا هالشخصيه منهم ...
بقيت انا ، انا صح تعلقت فليث بفترة قصيره وسامحته بسرعه .. لكن مارضى اني انهان مرة ثانيه .. تأففت وانا ادعي اني اكون طفره جينيه فهالعآئلة مثل ماكانوا يرددون .
- 4 فجرا -
صحيت وانا تعبانه ومعدتي تقلب علي ركضت لدورة المياه اعزكم الله .. مارتحت غير لما رجعت مدري شفيني هالايام مايبقى شي فبطني شكيت اني حامل !!
دقيت على شهلا وقلت لها قبل لاتروح لدوامها تاخذني معها بسوي فحوصات ..
رحنا للمستشفى وانا خايفه لو حملت !!
اكيد بيرجعني ليث عشان اللي فبطني .. ابيه يرجعني عشاني انا ... ابيه يكون قد كلامه قبل لما قال اني كل شي بالنسبه له ...
رجعت للبيت بشعور مختلف .. احس اني طايره انا بصير ام ؛ بجرب هالشعور ابتسمت بفرح من وصلت لغرفتي سجدت شكر ودعيت ربي يتمم علي حملي ..
جلست اتخيل بطني كيف بتكون واتمشى قدام المرايه واضحك على نفسي ..
انتبهت ان في باقة ورد احمر على سريري زادت دقات قلبي ..وانا اتمنى انها من ليث ()