[فيتامين سي]

��يوم خطوبة رنيم وبهاء��
الحفلة بقاعة سووها
البنات بالصالون وحاجزينة اليوم بس الهم حتة ع راحتهم
والصالون مخبوص....
ع الساعة ب7 المغرب جهزو البنات
رنيم لبست فستان فخم جداً...لونه وردي غامق بدون اكمام من الصدر للخصر ع شكل ريش طاووس مرتب بتشكيلة كلش حلوه وينزل كلة كلوش ع شكل طبقتين طبقة قماش حرير وفوگاه طبقة شيفون اسود...ووياه كعب اسود وطقم مجوهرات كامل باللون الاسود مزين بكريستلات وردية غامقة ع لون الفستان مكون الطقم من عقد وتراجي(حلق) وسوار ومحبس(خاتم) والميك اب كان ثقيل شوي...عبارة عن شادو اسود مطعم بالوردي الغامق ع الوان الفستان وايلاينر مخطوط بطريقة كثيفة ومسكرا وبلاشر وردي وروج وري صارخ وطالعة غاية الجمال والاناقة والانوثة

جوري لبست فستان فيروزي الوانه متدرجة بين الغامق والفاتح وطويل بدون اكمام...مشكوك من الصدر لحد نص البطن بكريستلات كبيرة شوي ومخصر لحد الخصر وتالي ينزل كلوش بس خفيف ذبة وحدة...وكعب ابيض وطقم مكون من عقد واسوار وخاتم من الذهب الابيض ومطعم بحجر فيروزي فخم وناعم بنفس الوقت وميك اب بسيط (cat eye) عبارة عن ايلاينر بشكل عين القطة وشادو فيروزي غامق جدا متداخل بيه قليل من الاسود ومسكرا وبلاشر لحمي وروج احمر غامق وطالعة شي ثاني

بقية البنات كذلك كشخو ع اخر حبة وكذلك طلعو جميلات بس طبعاً رنيم الاحلى صح جوري احلى منها بس رنيم اليوم ملكة الحفلة...
خلصو شغلهم كلش وطلعو من الصالون وركبو كلهم بسيارة وحدة كبيرة..في غضون عشر دقايق وصلو للقاعة
دخلو والحظور استقبلو العروس وبعد الهوسة والهلاهل وصلت للكوشة
طبعاً القاعة جانت فخمة جداً جداً لأن اهل بهاء راقيين جداً ويهمهم المظهر كلش

گعدت رنيم ع الكوشة بمكانها المخصص....طبعاً اكو مصورات ثنين...وحدة تصور العروس لحظه بلحظه وىحدة تصور الحظور
شوي وگامو البنات يرگصون
شغلو دبكات شامية وضلو يركصون عليها
تالي مرام طلبت من مشرفة الديجي تشغل اغنية بلقيس...دگو خبيتي...
وضلو يركصون عليها رشا وجوري ومرام وزينة وگومو رنيم ترگص وياهم
تالي سوو دائره ورنيم بالنص ترگص

دگو دگو دگو خبيتي دگو
دگو دگو دگو خبيتي دگو
دگو دگو خبيتي جا حبيبي في بيتي جا وطالب يدي شوفو شوفو الدبلة
باركولي يلا صار ليه وحدي رگصو محبوبي

ياهلي يخواني جمعو جيراني دنيا مش سيعاني ايه ابيكم بگربي
غنو دان ياداني سمعو عدواني خلي بين احضاني احمدك ياربي

دگو دگو خبيتي جا حبيبي في بيتي جا وطالب يدي شوفو شفو الدبلة

ياولد مااسمع طارك اصگع اصگع خلي كل العالم تنزل بهالساحة
هاذي مو اي فرحة

خلصت الاغنية ورجعت رنيم لمكانها
بلشت اغنية تامر حسني كل اللهجات
هنا گامت جوري وزينة...اسطى الرگص الشرقي
كل وحدة شدت خصرها بشال وضلو يرگصون بأحترافية ع وقع الاغنية

ياحبيبي اهو بقولك كل اللهجات وبعين والصوت ولو عايزني اخترعلك لهجة حبيبي انا جاهز موت
هالبا هالبا برشا برشا مرة مرة كتير كتير بزاف وايد اوي اوي
انا نبغيك ونموت عليك ربي يخليك على طول ليه وهلا والله يا بعد عمري يامحلا الحياة بكربك ياكمري
ياحبيبي اهو بقولك كل اللهجات وبعين والصوت ولو عايزني اخترعلك لهجة حبيبي انا جاهز موت

كملو ركص لحد ماخلصت الاغنية وگعدو فحطانين
ورا دقايق اجة وقت دخول بهاء����
ع فكرة بهاء ورنيم قبل يوم الحفلة عقدو قرانهم عند الشيخ ونفس الوقت ثبتوه بالمحكمة وبما ان بهاء دكتور معروف وكذا ف تحاليل الدم بسرعة طلعت ماطولت اكثر من ساعتين
نرجع للحفلة...
دخل بهاء بهيبتة وجمالة واناقته...جان لابس قاط اسود وقميص ابيض من دون ربطة العنق
رفع نظره ع رنيم وانبهر بجمالها...شاف ابتسماتها الخجولة الي زادتها جمال
تقدم وهو مركز نظراته عليها...وصل يمها ولزم ايديها بأيديه الثنين وعيونة تباوعلها بنظرات كلها حنية وحب
كعدو ع الكوشة...واجت ام بهاء وبيدها علب الذهب
فتحت علبة الحلق(خواتم الزواج) وجانن عبارة عن حلقتين وحدة رجالية والثانية كلها الماس لرنيم
اخذ بهاء الحلقة ولزم ايد رنيم برقة ولبسها الحلقة وباس ايدها
اخذت رنيم الحلقة ولبست بهاء
تالي اخذ بهاء العقد ولبسها والسوار والتراجي
تالي جابو الكيكة والعصير
الكيكة كان شكلها كلش حلو..ومكتوب عليها اسم رنيم وبهاء
المهم قطعو الكيك...اخذ بهاء قطعة بالشوكة وتعمد تكون جبيرة
حطها بحلگ رنيم وتلفت بجانب شفايفها بالكريمة
انحنة عليها بهاء واخذ الكريمة بشفايفة
رنيم انصدمت واستحت وتمنت الارض تنشك وتبلعها...ابداً ماتوقعت هيج يسوي
وبهاء متووونس والمصورة اكيد صورت اللقطة مستحيل تفوتها هيج لحظة
تالي رفع بهاء العصير....قربة من شفايفها وشربها بهدوء تالي رفع العصير ناحيته وشرب من نفس المكان الي شربت بي
البنات متونسات ع حركات بهاء لأن يسويها بدون محد يگلة ورنيم بدها تغوص بملابسها من الخجل

خلصو من التلبيس والاكل...گعدو شوي
تالي اجت جوري ناحيتهم
جوري:حنشغل اغنية هادئة گومو رگصو سلو
بهاء:طيب
جوري:ببالكم اغنية نحطها؟
بهاء:شغلي جنات -ملهوفة عليك-
جوري بأبتسامة:ماشي...يلا گومو وهسة اگلهم يشغلون
بهاء لزم ايد رنيم وگومها:يلا حبيبي امشي

نزلو من الكوشة وتوسطو القاعة...خففو الاضاءه وصارت القاعة ظلمة بس اضواء خفيفة ورومانسيه على بهاء ورنيم
اشتغلت اغنية جنات...بهاء لزم خصر رنيم بأيديه الاثنين ورنيم حوطت رگبته وراسهم براس بعض وخشمهم يتلامس
منظرهم جداً رومانسي
ضلو يرگصون بهدوء...وبهاء كل شوي يهمس بذان رنيم بكلام ورنيم تضحك بخجل

عند البنات....
واگفات سوا ويباوعون للعرسان ويعلقون
مرام سايحة:ااااه يمامي
رشا نفسها:ااااه ياويييلي
زينة نفس الشي:اااه ياقلبي
جوري برومانسية:ااااه رح اخجل
البنات التفتو عليها ويباوعولها بنص عين
جوري انتبهت الهم:شنو؟؟..گلت شي غلط؟؟
زينة:رح اخجل هاا
جوري:هههههه منظرهم كيوت يخلوني غصب اخجل
مرام:اي واضح من رح اخجل
جوري:هههههه باوعو باوعو وتعلمو وراكم مستقبل
رشا:تعلمي انتي
جوري بغرور:انا اعرف مايحتاج
زينة بضحك:اي عن خبرة...مرتين مخطوبة..وبعد جايتها ثالثة
البنات ضلو يضحكون:ههههههههههههه

نرجع للعصافير اقصد العرسان....
بهاء بهدوء:رنومتي
رنيم:همم
بهاء برمانسية وهمس:اعشقج
رنيم ابتسمت وماردت
بهاء:حبيبي
رنيم بخجل:هلا
بهاء:رفعي راسج شوي
رنيم رفعت راسها وتفاجئت بشفايف بهاء ع شفايفها
وخر عنها بهاء وشافها مصنمة كتم ضحكته:شبيج؟؟
رنيم مصدومة وبهمس:شسوييت
بهاء ببراءة:ماسويت شي
رنيم:ليش تسوي هيج كدام الكل عييب
بهاء برومانسية:لاعيب ولا شي حلالي ملكي زوجتي...اسوي الي اريده...

عند البنات...
جوري تسوي روحها يغما عليها...ولزمتها رشا وزينة
جوري بصوت ذايب:لالالالا انا ذبت سحت رح اموت قلبي الصغير لا يتحمل سوف ينفطر
مرام:هههههههه وج فشلتينا گومي
جوري:اريد واحد مثل هذا...يمااامي جيبولي واحد مثلة
رشا رفعت التلفون:هلا فارس....(بتفاجئ)...سمعت جوري!!!!

جوري نطت من مكانها وفتحت عيونها ع الاخر
خمشت التلفون:فارس والله جذب اصلاً مو انا الي حجيت هاي رنيم...اا اقصد هاي زينة
انتبهت انه ماكو صوت...وخرت الفون عن ذانها وشافتة مطفي...يعني رشا لعبت عليها
رفعت نظرها ع البنات وشافتهم فاصلات ضحك
جوري بحقد:بسييييطة...حسابكم بالبيت...ختخلص الحفلة واوريكم شغلكم...ماطلع جوري اذا ماأدبتكم
البنات ولا يمها....يتخيلن شكلها شلون اخترعت ويوگعن ضحك



خلصت الحفلة على خير وكلها تونست وفرحت لرنيم وكانت الحفلة من اروح مايكون
وكلمن رجع لبيته وذب روحة ونام من التعب
________________________________
عند فادي��
گاعد بغرفتة ع السرير
كاعد بوسط السرير وحاط راسة بين رجليه وايديه ع راسه
گلبة يوجعة...بالحيل يوجعة...شيسوي...مو بيدة حاول وحاول ينساها لكن مو بسهولة يگدر....حب سنين صعبة ينسا بيوم وليلة
اليوم الي عشقها گلبة صار اسمها بأسم شخص ثاني غيرة...بمجرد التفكير انه غيره يلزم ايدها يحضنها يبوسها...يشتعل ناااار
هو كان بأمكانه انه يفركش الخطبة وهو يتزوج رنيم حته لو كان بالاجبار ومن دون مايتعب بس مايگدر يإذيها...مايگدر يجبرها
دامها تحب غيرة ف ماكو فايده لو جبرها تتزوجة...يقنع نفسه انه دام هي مرتاحة فهو مرتاح

خنگتة العبرة بس بلعها وحارب نفسة...ماسمح لدموعة حته انها تتجمع بمحاجرة...مو فادي الي يبجي بسهولة...مو فادي الي يبجي عمود بنية حتة وان كانت كل حياتة...ضعف مرة وحدة وبجة علمودها بس مستحيل يسمح لنفسة يبجي مرة ثانية
اخذ نفس عميييييق وگام شغل التكيف ورفع درجاته وخلاه على اعلى درجة ونزع تيشريته وشمرة باهمال ع الارض وتلحف ونام
______________________________
عد حسام.....
گاعد بالمكتب ويحجي وي البديگارد
حسام بصرامة:من باجر تبلش تراقبة...خلال هذا الاسبوع نسوي الي گتلك عليه ماشي
البديگارد:حاظر
حسام:يلا روح هسة والاخبار اول باول توصلني
البديگارد:ماشي

طلع البديگارد ورا دقايق لحگة حسام...طلع وقفل المكتب وصعد لغرفتة...قبل لا يدخل توجه لغرفة مرام يتطمن عليها...فتح الباب ودخل وشافها نايمة ع السرير بالعرس بملابس الحفلة وحتة الحذاء مانازعتة من التعب...ضحك عليها ودخل نزعها الحذاء وعدل نومتها وغطاها وطفا الضوا وطلع وسد الباب
دخل لغرفتة...غير ملابسة ولبس بجامة النوم وانسدح ع السرير وتلحف...اخذ فونة...راد يتصل ع رشا بس تذكر انها اليوم بحفلة ف اكيد تعبانة ونايمة ماحب يزعجها...كتبلها رسالة وقفل الفون وتلحف عدل ونام والابتسامة ع وجهه
_____________________________
عند هبة....
گاعدة بالصالة تشوف تلفزيون...
دگ فونها
رفعتة شافت رقم الشخص المجهول
خافت
ردت:الو
..........بصرامة:اسمعيني زين...خلال يومين ان ماجت للبيت....تعرفين شسوي
هبة برجفة:ح...حاظر على امرك
..........بتهديد:واياني وياج تحاولين تفرين بذيلج...تعرفين انا منو مايحتاج اوصيج
هبة:اي ا..ااعرف
،.........يلا ولي

سد الخط بوجهه
هبة نزلت الفون وهي ترجف ومرعوبة:الله يستر الله يستر...شيريد يسوي هذا....ياربي هسة انا شورطني وياه شورطني...الله يلعنك ياشيطان...ساعة الي خلتني انغري بالفلوس....يارب الطف بية يارب ارحمني برحمتك...









.....انتهــــــــــى البـــــــــــارت.......


أرائكم...توقعاتكم....تعليقات� �م


هاي الفترة ماجاي انضبط بمواعيدي بس غصب
انا ع وقت فراغي اكتب لأن كلش مشغولة
حتة فكرت مااكمل الرواية بس انا واعدتكم اكملها وكذلك هي مابقة بيها شي
ان شاء الله هي 30 او 29 بارت وتخلص ف ماتسوى اتركها
حتة لو اتاخر بالتنزيل المهم اكملها