[لامارا]

البارت العآشر ..



‏"من مختصرات الحياة : ما في فرحة دائمة ولا حزن مستمر".





اخذت شهلا الجوال وعطت سما مشغول ..


ناظرت لي بعصبيه ونطقت : تبين تعرفين شي اعرفيه من زوجك وبس ... لاتصدقين انها بتصف معك ضد اختها .. اعقلي يافجر .. الرجال عطاك فرص وفرص وانتي كل يوم تصدمينه مره تتقبلينه وعشره تصدين ..! انتي عندك انا واهلك لو علاقتكم مو بذاك الزود .. وعندك سعد ولمياء وطارق .. اما ليث !! لاأم ولا ابو ولااخ ولااخت ماعنده غيرك ؟؟؟؟؟


نزلت رأسي وشهلا قامت وهي معصبه ..




تنهدت بتعب مدري ليش مو فاهمتني ...! انا صح احب ليث لكن احس حياتنا راح توقف باي لحظه .. حياتنا انبنت على غلط .. مع اي مشكله ..بتنتهي ... انا ساكنه فوق اعدائي .. وهو اخذني من وسط اعدائه .. صعب نعيش كذا ..!



مسكت جوالي ودقيت عليه ... مارد !




استغربت رجعت دقيت ولارد .. وقفت بقلق معقوله تزوج .. معقوله اليوم ملكته



رحت لشهلا اللي تصحي ولدها بيروحون لبيتهم .. ناديتها بضعف : شهلا ساعديني


ناظرت لي بزعل وقالت : ماحد يقدر يساعدك غير نفسك والله .. انا تعبت منك


: ادق عليه مايرد .. مايردد اخاف تز


قطعت كلامي بضحكة إستهزاء .. ولبست عباتها ووراها ولدها وشغالتهم . ..




خير شفيها ذي زعلت ..!!




دقيت على سعد ورد علي بالعله

: سعد شفيك .. وكمان صاحبك اختفى من الظهر ادق عليه مايرد ..

رد بهدوء : هو كلمني العصر ويبيني اجيبك له لان عنده شغل كثير ..خليك جاهزه بكرا فالليل ..


رديت وانا حاسه في شي : لا ابي توديني الحين

ضحك علي سعد ورد : كل ذا شوق انتظري لبكرا الحين الساعه 1


رديت بعناد : لا تكفى تكفى ابي الحين


رد وهو فاقد الامل فيني : خلاص ابشري يلا تجهزي والله يعيني على الخط فهالليل ..



جهزت شنطتي .. شفت امي تصلي الوتر انتظرتها استأذنت منها وقالت لي خلاص من بعد زواج سعد لاتجين الخط تعب عليك انا مابقى لي شي عن الحداد وبصير اجيك ..

حضنتها بقوه .. وطلعت لسعد المعصب ..

: عمه والله دايخ عالاقل مخليتني انام بس


رديت بهدوء : ماعليك بتنام هناك عندنا وتمشي لارتحت



ابتسم واعجبه الكلام ...مشينا على بركة الله وانا خايفه ..جلست اتخيل كل شي سيء بيقابلني ..


وصلنا نزلت شنطتي واخذها سعد مني بالقوه .. ركضت للبيت وانا قلبي يرقع طول الطريق ندق عليه انا وسعد ولايرد .. فتحت الباب دورته بأجزاء الشقه .. سمعت صرخة سعد ...



: لييييييييييييييييييث




مغصني بطني .. وانا ارجف. .. شفت سعد شايله بدون قميص وجرحه شكله بشع صرخ علي : لاتخافين مافيه شي يلا امشي معنا ..


له نص ساعه بالغرفه وماحد جاء يطمنا .. اول مره اشوف ليث بهالهدوء والضعف .. كان فاقد الوعي ..والحمدلله لحقنا عليه .. ندمت على تفكيري السيء فيه .. كل يوم يثبت لي انه افضل مني بكثير .....


طلع الدكتور وقف سعد يسأله .. الحمدلله نظفوا جرحه وخيطوه .. وحرارته نزلت .. كان معاه التهاب بالجرح رفع من درجة حرارة جسمه ..



12 مساء ...



جالسه اتأمله وهو نايم مثل الاطفال ...يدي حاضنه يده .. وسعد نايم على الكنبه ياقلبي تعبته معاي ..


شفته فتح عيونه .. قربت له بهدوء ...، ناظر لي حسيته مستغرب همست له : امس رجعنا انا وسعد الساعه 1 وحصلناك بالشقه مغمى عليك .. جبناك هنا والحمدلله بس التهاب فالجرح .. سمعنا صوت شخير سعد ولف ليث يناظر له وهو مبتسم ..

حسيت فيه شي .. كأنه زعلان مني ! توقعته يحضني ..يطمني بكم كلمه !؟


جلست بهدوء فكرسيي وانا اتأمله .. شفته رجع غمض عيونه بتعب .. وقبل لاينام قال لي : صحي كيس النوم ذا وخليه يوديك للبيت وجودك ماله داعي بس تعب عليك انا الليله بطلع ان شاءالله .. وقفل عيونه ونام


مثل ماتوقعت .. ليث متضايق من شيء ...




صحيت سعد ورحنا للشقه حاولت فيه يكمل نومته هنا لكن رفض وقال ان عنده اشغال وتجهيزات لزواجه باذن الله .. ودعته وانا ادعي ربي يحفظه ويسعده


اخذت دش بارد .. وتذكرت بكرا ببدأ دوام .. افف تعودت على الراحه والنوم .. ومن بكرا بيبدأ التعب .. انسدحت على سريرنا وانا اشم ريحته فيه ابتسمت بعشق وغفيت ...



صحيت الساعه 9 دورت ليث بعيوني ماشفته توضيت وصليت .. طلعت دجاج وانا خاطري بصينية دجاج بالخضار ..رتبت البيت مسكت جوالي بدق على ليث ..سمعت صوت الباب عدلت لبسي اللي كان قميص نوم اسود طويل شفته دخل وقفل الباب .. جيت قدامه ابتسم لي ببرود ! حضنته بقوه وانا احس ببروده يقتلني .. جلسته على الكنب وخليت جلسته مريحه رحت للمطبخ وضبطت العشا وريحته بس تشهي ... سويت بالعصارة عصير برتقال طبيعي وضبطت السفره ..

جيت بناديه لقيته يطقطق بجواله وحواجبه معقوده .. شافني وقام بدون كلام

تعشينا بهدوء وانا مقهوره من بروده ..! خليته بكيفه مستحيل ارمي نفسي عليه ...