[فيتامين سي]

دگ الباب
رنيم:منو
فارس:انا
رنيم:ادخل.
دخل فارس وگعد گبالهم ع كرسي التسريحة
رنيم:خير شكو جيتك مو لله
فارس:گبر ماجاي الج...وبعدين مايصير اگعد وياكم ضجت بالغرفة
جوري:معليك بيها هلا بيك بأي وقت
فارس التفت عليها:يووومة فووديتج
رنيم:ها ها خيير يالاخو ترانا بعدنه گاعدين
فارس:ههههه ثول....المهم جيت ارد اخذ رأيكم بموضوع
البنات:شنو؟
فارس:بما ان باجر رح نروح انا ورشا للمحكمة حتة اطلگها...شنو رأيكم فد مرة تجي جوري ونعقد القران
جوري انصدمت:ها؟!!...باجر؟!!!
فارس:اي باجر...احسن خير البر عاجله
رشا تشجعها:اي صحيح حجيه...تعالي ويانة باجر فد مرة
جوري مترددة:مادري...زين انت گلت لعمة سعاد وعمي ناصر؟
فارس:لا بعدني...گلت اشوف رأيكم تالي اگلهم
رشا:معقولة مايقبلون؟
رنيم:لا مامعقولة....لأن همة مايتدخلون بحياتنا وخاصة فارس يسوي الي يريدة
رشا:تمام...(توجه كلامها لجوري)...هذاهو بعد ماعندج عذر...وافقي
جوري سكتت شوي تفكر
فارس بترقب:ها شگلتي؟؟
جوري:طيب موافقة
فارس شگ الحلگ وطفر:Yeeeeees
رنيم تضحك عليها:ولك فشلتنة شبيك ماشايف زواج...ماجنك رح تطگ ال30
فارس:ها ها على كيفج شنو 30 بعدني بعز شبابي توني 27
رنيم:شيبت يابعز شبابك
فارس تنرفز:رنيمو سكتي عني احسلج لاتخربين فرحتي
رنيم:هههههههه...زين ماگتلي منو الشهود؟
فارس:منو بعد ...اكيد مهند وفادي
رشا:عفية هالمهند وفادي....والله خطية هذول الاثنين....بكل مشكلة ساحبهم وياك
فارس:اااا حلوة هاي...غير اصدقائي واخواني
جوري طول الوقت ساكتة تالي حجت:اگول فارس
فارس:عيونة
جوري:مو كأن شعرك طولان؟
كلهم صفنو
رنيم:شجاب الراجدي ع الجلاق؟
رشا:وين الرباط بالموضوع؟
جوري:وجع شبيكم...هسة انتو شعليكم ماسئلتكم انا
فارس:هههههههههه عوفو حبيبتي لاتزعجوها...(التفت ع جوري)...ترديني اگصة؟؟
جوري ابتسمت:لا بالعكس كلش حلو هيج لا تگصة
فارس:تم...ماگصة لعيونج
التفتو ع رنيم ورشا ولگوهم يمثلون....وحدة كانما تعزف بيانو والثانية تعزف كمان ويهزون بروسهم
فارس يحجي وي جوري:معليج بيهم...شاخطين
جوري:هههههههههههه
رنيم:اگول فارس...شنو رأيك تنگلع من غرفتي...هو بس اليوم وباجر اخذها وولي بيها وفكنة
فارس بهيام:اخيييه...يمتة يجي باجر
رنيم گلبت بعيونها:اوهووو عليينا...شيفكنة اليوم
فارس ببرود:هسة انتي ع شنو حارگة گلبج
رنيم بنرفزة:ياخي زاعجني گاعد ع گلبي انگلع وولي من غرفتي وفكنة
جوري هدت برنيم:هييي انتي لاتحجين وياه هيج
فارس تونس:هلا هلا هلا
جوري كملت:حبيبي روح گل لعمتي ع باجر قبل لاينامون
فارس طاح وجهه:طردة محترمة....وانا تونست
جوري:هههههههه لالا ماعاش من يطردك...بس گعدة بنات شلك بيها
فارس يتوعدلها:هه عود تكحلها...ماااشي ياجوري...هسة مالي حكم عليج...خلي يجي باجر واوريج
جوري بثقة:لعد احلم اروح باجر وياكم وخنشوف شلون تتزوج
فارس يريد ينرفزها:عادي....اشوفلي وحدة صاكة من الصاكات الي يعرفهم فادي واتزوجها
جوري تتحداه:اتحداك تسويها...والله ماتگدر
فارس:هههههه بابا تجين باجر ورجلج فوگ راسج
رنيم نفذ صبرها:والتاااااالي....شلووو� � يعني اليوم ماتفكنة
فارس:طااالع....والله ماگول غير الله يعين بهاء ع نفسيتج الزفرة
رنيم:اي خوش خوش هو متزوجني مو انت بس ووولي عني فكننني دخييل ربك

گام فارس من كرسي التسريحة وطلع من الغرفة...قبل لايسد الباب غمها وشرد لاتنفجر بي
رنيم:اووووف....انا مادري شلون تتحملينة
جوري تضحك عليها:ههههههه عسسل ع گلبي فديتة
رشا:بناااات انا متوووونسة
جوري:هههههه حقج....الله يدومها يارب
رنيم:ماتگلين لحسام
رشا:لا خليها باجر من يتم كلشي افاجئه

فجئة انفتح الباب ودخل فارس بس راسة:ع فكرة رشا گولي لحسام يجي يخطبج من عندي...مو من ابوج اوك
رشا بأستغراب:ليش؟
فارس:ابوج لا تدخلينة بالموضرع نهائي هو مايعرف ارضج من سماج...ف انا ولي امرج اوك
رشا ابتسمت:اوك
فارس:جوري
جوري:هلا
فارس:اموواااحح

طلع بسرعة وهو يضحك....جوري حطت ايديها ع خدودها تقيس حرارتها
رنيم تباوعلها بنص عين وفاكة حلگها:لاااا....عاجبج تصرفاتة
جوري:طبعاً...اعشق تصرفاته
رنيم تبوس ايدها وجه وگفة:الحمدلله والشكر يارب
رشا تضحك:ههههههههههه هسة انتي ع شنو مقهورة...لأن بهاء مايسويلج هيج؟
رنيم:يعني هسة تقنعيني ان حسام يسوي هيج؟
رشا:ههههههه لا مايسوي هيج...بس حلوة تصرفات فارس رومانسية
رنيم:گولي خبال....يارومنسية
جوري ضربتها ع راسها:ثول لاتحجين عنة هيج غبية
رنيم تهز بيدها:هه شوف الثانية
رشا:هههههههههههههه
_____________________________
يوم ثاني الصبح....
فارس گعد بنشااااط ومتونس لشغلتين
اول شي واخيراً رشا رح تطلع من حياتة ك زوجة ويرتاح من الهم الي جان شايلة
وثاني شي ان جوري رح تكون زوجتة بعد عناااء طويييل

المهم گام ودخل سبح وطلع لبس جينز اسود وشيرت ازرق مرسوم عليه skull بالاسود وشوز سبورت ازرق ولبس ساعة سودة والسلسلة الي بيها الحلقة
اتصل ع فادي وفهمة ع كلشي وگلة يروح للمحكمة بعد نص ساعة
اخذ بوكة وفونة والسويج وطلع من الغرفة...دخل لغرفة الطعام وشاف البنات وسعاد گاعدين يتريگون
سحب كرسي وگعد:صباح الخير
الكل:صباح النور
سعاد:رح ترحون؟
فارس:اي هسة بس نخلص ريوگ
سعاد:طيب الله يوفقكم
فارس:امين...(شرب الشاي وگام)...يلا انتظركم بالسيارة بسرعة تعالو
البنات:اوك

طلع من البيت...
ورا ثواني طلعو وراه جوري ورشا
جوري جانت لابسة جينز ابيض وشيرت بحري عليه ميكي ماوس وشوز فلات ازرق...ولمت شعرها ذيل حصان عالي ولبست طوق عليه وردة حمرا وساعة ذهبية روليكس وعقد ناعم...وحطت كحل وقلوس فقط

رشا لبست جينز اسود وشيرت مقلم ابيض واسود وشوز كعب ابيض وخلت شعرها مفتوح براحتة بدون اي اضافات وحطت كحل وروج وردي فاتح وبلاشر خفيف وساعة ناعمة بيضة وعقد بسيط وطويل

ركبو بالسيارة وتوجهو للمحكمة...فارس شغل بالسيارة اغنية ون دايركشن -kiss you-
وعلة الصوت والجو حماس بالسيارة
جوري:بلة هسة احنة اشكالنا مال رايحين لمحكمة
فارس:ههههه لا وانتي الصادقة...اشكال فيطية
رشا:ههههههههههه
فارس داس سرعة زيادة...والاغنية صوتها يرگع....من قربو يم المحمكة طفا المسجل وخفف السرعة...
جوري:الله شوووف الادب والهدوووء
فارس:لعد شعبالج
جوري:ههههههه امشي امشي بابا
وصلو للمحكمة وشاف فارس سيارات فادي ومهند وركن سيارتة يمهم
نزلو من السيارة وشافو مهند وفادي متكين ع السيارة والكشخة ع اخر حبة وريحتهم تهفهف
فادي لابس جينز ازرق وشيرت احمر مخصر وبارز عضلاتة مرسوم عليه angry bird وشوز سبورت اسود محدد بأحمر وساعة سودة وسلسلة فضية ونظارة سودة وطالع شوود

اما مهند...لابس جينز ثلجي وقميص اسود مخصر وفاتح االازرار ال3 الاولى ومبينة عضلات صدرة ومشمر الاكمام لثلث...وشوز سبورت ابيض مطعم بسمائي وساعة فضية وسلسلة فضية ونظارة تعكس الوان زرقاء وكذلك طالع فد شي

اجة فارس يمهم وهو يضحك:مو گتلكم اشكال فيطية
فادي ضرب كفة بكف فارس:هههههه اي والله فيطية...احنة شكل محاكم احنة
مهند:هههههههه امشو خل ندخل بسرعة لا انوب تصير هوسة مالنة خلگ الترقيم
فارس:والله وااااثق
مهند بغرور:يحقلي
جوري:هههههه امشو انسمطنة بالشمس

دخلو للمحكمة وماكو واحد ماباوع الهم....البنات تخبلو ع فارس وفادي ومهند والشباب عيونهم تعلگت ع جوري ورشا...وهمة ماشين بثقة وهيبة وغرور ولااااهامهم اي واحد...والي يشوفهم يعرف انهم ناس طاااگين اغنيااااء لأبعد حد من طريقة لبسهم ومشيتهم
گعدو ع كراسي الانتظار ينتظرون دورهم والتصنيف والتحشيش ع الرايح والجاي شغال والضحك عالگ ولا كأنما گاعدين بمحكمة...<<خرب اريد اگعد ويااااهم��

________________________________
عند رنيم....
گاعدة بالصالة وتتفرج تي في
ملت ماكو شي بالقنوات...اخذت فونها وگلبت بي...طلعت صورها هي وبهاء وابتسمت وهي تگلب بينهم...تالي ضلت تضحك ع حركات اخوانها شلون يزعجون بهاء.....حتة بالصور حاشرين روحهم....
دگ فونها وهو بيدها
ردت:الوو
مرام:مرحبااا
رنيم:مرااااحب
مرام:شلوونج..شخبارج
رنيم:تمام الحمدلله انتي شخبارج
مرام:موزينة...ضووووجة مللل طاااگة روحي
رنيم:نفسج
مرام:شنو رأيج نجتمع احنة البنات
رنيم تفكر:ممممم لا مو بس البنات...خنغير شوي...خلي اليوم اگل لاخوي نجتمع احنة الشلة ونطلع نفتر ونتعشة برا
مرام تونست:حلوو...منو ومنو يروح
رنيم:انا وجوري ورشا وفارس ومهند وفادي ورح اگل لبهاء هم يجي وانتي تعالي وگلي لحسام هم خل يجي
مرام تحمست:اوووك...رديلي خبر من يقبلون حته اگل لحسام
رنيم:ووك
مرام:يلا باي
رنيم:بايات
سدو الخط ورنيم متحمسة للفكرة وتدعي كون يقبل فارس

بعد ساعتين...دخلو فارس ورشا وجوري للبيت
رنيم نطت:هااا...شصار
فارس:ههههه شصار يعني شنو رايحين معركة
رنيم:ثول يعني كملتو كلشي
سعاد دخلت:ها جيتو؟؟
فارس:يي
سعاد:عقدتو؟؟
فارس بفرحة:اييي وصارت جوري زوجتي
سعاد ورنيم بنفس الوقت:كللللللللوووووووووو� �شششش
سعاد حضنت فارس:مبروووك
رنيم حضنت جوري:مبروووك يالعوبة
جوري:الله يبارك بيج
وخرت من جوري وراحت لفارس وحضنتة:مبروووك يالغثيث
فارس صگعها ع راسها وهو حاضنها:غثنيث بعينج حقيرة...والله يبارك بيج
رشا ابتسمت وفرحانة ع فرحتهم:مبررووك
فارس:الله يبارك بيج...يوم لألج..(وغمزلها)
رشا:ههههه تسلم

سعاد طلعت من الصالة وراحت للمطبخ تكمل الغدا....
البنات وفارس گعدو
رنيم بحماس:اگول فروس حبيبي
فارس يعرفها:من الاخر...شكو
رنيم:بمناسبة هالفرحة...شنو رأيك نجتمع احنة الشلة ونطلع نفرفر ونتعشة برا
جوري تحمست:ييي صدگ خل نطلع
فارس:اوووك...يمتة نطلع؟
رنيم:العصر
فارس:ماشي..(طلع فونة)..خل اخابر الشباب
رنيم:ترا ع فكرة رح اعزم مرام ورح يجي اخوها هم وزينة
فارس:صديقاتج وفهمناها...اخوها شكو؟
رنيم:مو الله يسلمك اخوها يصير...
رشا بسرعة گامت وحطت ايدها ع حلگ رنيم
فارس:شنو يصير؟؟...ليش سديتي حلگها خل تحجي
رشا:يصير الي يصير ميخالف خلي يجي
فارس:شنو يجي واحنة مانعرفة
جوري:رح تتعرف عليه...لان اخو مرام هو حسام
فارس بتساؤل:حسام هو نفسة؟؟
جوري اييوا
رشا تباوعلها بحقد:اييوا ايوا ايوا
فارس طگها ضحكة:هههههههه گولو من الاول انه حبيب رشا ع شنو هالف والدوران
رنيم وخرت ايدين رشا:هف خنگتيني...(التفتت ع فارس)...تستحي عود
فارس:هههههههه...خوش خلي يجي نتعرف عليه
جوري:انا رايحة اخابر مرام
رنيم:وانا اخابر بهاء اگله هم يجي
فارس التفت ع رشا وبضحك:وانتي وياهن گومي خابري حسام
رشا استحت:انطم...جوري رح تگل لمرام وهي تگلة انا شكو بعد
فارس:هههههههههه
گامت رشا تبدل ملابسها وتلبس ملابس البيت
فارس فتح فونة واتصل ع مهند وگلة ع الطلعة تالي اتصل ع فادي وهم انطاه خبر....تالي گام وراح للغرفة بدل ملابسة....شوي وصار الغدا وگعدو يتغدون