[لامارا]

الساعه تسعه الليل ..
وفي إحدى مطاعم جده الشهيره .. وبقسم العوائل ..
طقطقت آنجي بجوالها وهي تقول: لنا نص ساعه هنا وماكو أثر لحبيبنا اللي خلتنا مام نتعشى بدري حتى يمديه يرجع لبيته وينام ..
حلا: إصبروا يمكن زحمه ..
ملك: وبعدين معك آنجي ..؟!
آنجي بملل: مام مليت .. هذه كُل السالفه ..
طالعتها ملك بعدها لفت بنظرها على أُسامه اللي جالس بشرود ..
أكيد تفكيره بذاك الطفل اللي للحين ما قال لأبوه عنه ..
لفت نظرها على كِرار واللي هو بعد بالقوه أجبرته يجي ..
تنهدت وطالعت بعزام تقول: دق عليه شوف إن كان بيجي ..
عزام بهدوء: مو لازم .. ننتظره للساعه 10 .. إذا ما جاء فخلاص معناته ما بيجي ..
حلا: توني سألته بالواتس بس للحين ما شاف رسالتي ..
طالعها أُسامه يقول: على طاري الواتس .. راكان اللي عمله صحيح ..؟!
حلا: يب ..
لف نظره عنه وهو يهمس: طفولي ..
شوي رن جوال حلا فقالت بحماس: أهو رد ..
طالعت بأمها وكملت: يقول وصلت المطعم .. ماما بروح أجيبه أوكي ..؟!
وراحت قبل لا يردوا عليها حتى ..
لف عزام على كِرار يقول: روح قلهم يجيبوا لنا الطلب اللي طلبناه ..
قام كِرار بهدوء وخرج ..
دخلت حلا وجلست بمكانها بحماس فدخل وراها جهاد ..
طالعهم شوي بعدها إبتسم يقول: السلام عليكم ..
عزام: هلا جهاد وعليكم السلام ..
ملك: تعال حبيبي إجلس هنا جنبي ..
ميلت حلا شفتها تقول: هذا مو عدل ..
جلس جهاد وطالع بأُسامه شوي بعدها لف على أُمه يقول: وين كِرار ..؟!
ملك: قال له أبوه يروح يطلب طلبنا ..
إبتسم جهاد وهمس: حلو .. هذه طريقه حلوه تخليه إجتماعي أكثر ..
ما فهمت ملك وش يقصد فقالت: شفيك تأخرت ..؟!
جهاد: لا بس شوي زحمه ..
حلا: شفتو ..؟! قلت لكم ..
آنجي: واااه عبقريه ما شاء الله ..
حلا: ها ها ها محد ضحك ..
دخل كِرار ورجع جلس بمقعده واللي هو مٌقابل مقعد جهاد .. جنبه على اليمين حلا وعلى اليسار آنجي وبعدها أُسامه .. وقدام أُسامه أبوه وعن يساره أمه وبعدها جهاد ..
حلا: راكان إنت تخصص وش ..؟! بالجامعه ..؟!
جهاد: أممم تخصص إدارة أعمال ..
حلا: وهذا شيء حلو ..؟!
جهاد: ههههههه نوعاً ما ..
شوي دقوا الباب فقام جهاد وأخذ العربه من النادل وبدأ يحط الأكل على الطاوله ..
آنجي: كان خليتهم هم يحطوه أفضل ..
طالع فيها يقول: ماله داعي دامه عوائل يا آنجي ..
وزع كُل الأكل بعدها رجّع العربه للنادل وقفل الباب ..
سموا بالله وبدأوا ياكلوا ..
رفع جهاد نظره لأُسامه وشافه ياكل بهدوء ..
للحين يحس هالشخص شوي ماكبر ما يدري ليه ..
تنهد ولف بنظره لكِرار فشافه كمان ياكل بهدوء ..
ظل يطالعه شوي فرفع كِرار نظره له .. إبتسم له جهاد ..
ردة فعل ما توقعها كِرار فتجاهله وكمل ياكل ..
جهاد: كِرار إنت إيش تخصصك ..؟! بأي جامعه يمكن نطلع مع بعض بنفس الجامعه ..
آنجي: جامعة عزوز ..
جهاد بدهشه: جد ..؟!!!
طالع بكِرار وكمل: معناته إحنا بنفس الجامعه ..
ملك: شيء حلو .. تقدروا تتقابلوا هناك ..
آنجي: هههههههههه مدري ليه بس حاسه إن كِرار متورط ..
جهاد بتعجب: وليه ..؟!
آنجي: تتقابلوا هناك ..!!! مُستحيل هالإنسان يعرف شيء مثل نقابل بعض و و .. هو يا دوب طلع له صديق واحد وبعد مات ..
إندهش جهاد من كلامها ولف يطالع بكِرار بعدها قال: الله يرحمه إن شاء الله ..
ما رد عليه كِرار فقال جهاد: معليش ذكرناك فيه ..
طالع في آنجي بمعنى ما كان له لزمه تجيبي هالطاري ..
طالعته آنجي بتعجب .. ما تحس إنها صلحت شيء خطأ ..
ملك: على العموم تكلموا وإنتو تاكلوا مو توقفوا .. بيبرد الأكل كِذا ..
حلا: حاضر ..
أُسامه: حلا هاتي لي كوب مويه ..
مطت حلا شفتها تقول: جهاد أقرب له مو أنا ..
أُسامه: قلت هاتي لي الكوب ..
مده جهاد لها فأخذته وأعطه أُسامه ..
طالع أُسامه بجهاد فقال جهاد له: ليه طبعاك شوي كِذا قاسيه ..؟! أطلبها بهدوء وما بتقول لا ..
أُسامه: ما أضن لك علاقه بالموضوع ..
ملك: أُسامه وش قلت لك ..؟!
أُسامه بلا مُبالاه: تذكرين ..؟! قلت لك من قبل .. مثل ما عاملتي كِرار بتحييز وإحنا صغار ماهي بعيده تعاملي تؤامه إذا لقيتيه كمان بتحييز .. وفعلاً شوفي كيف تدافعي عنه بكل مره ..
ملك: أُسامه ما أضن الوقت أو المكان مُناسب لمثل هالتخاريف اللي تقولها ..
ضحك أُسامه نصف ضحكه سخريه وكمل أكله ..
طالعهم جهاد لفتره بعدها لف بنظره لكِرار ورجع يطالع بأمه ..
تنهدت ملك وطالعت بجهاد تقول: راكان لا تعطي الموضوع أهميه .. أُسامه عليه طلعات غبيه ببعض الأحيان ..
هز راسه بهدوء ورجع يطالع بأُسامه بهدوء وبعدها كمل ياكل ..
رفع عزام عيونه لأُسامه وعطاه نظره خلت أُسامه يمط شفته بإنزعاج ويضطر يظل ساكت بدون تعليقات سخيفه كالعاده ..
لفت ملك وعشان تغير الجو بدأت تسأل عزام أسئله عن الشغل و و و ..
تنهد جهاد وطالع فيهم من جديد وسأل آنجي: إنتي صف كم ..؟!
إبتسمت غصب عنها تقول: توك تسأل ..؟! أول جامعه ..
إبتسم يقول: مثل وحده أعرفها .. هي كمان أول جامعه ..
حلا: أختك من أبوك اللي رباك ..؟!
جهاد: لا وحده ثانيه .. المُهم وإنتي ..؟!
حلا: سادس إبتدائي ..
طالع بأُسامه بعدها لف على آنجي وأشر بعيونه عليه يسأل: كم عُمره ..؟!
آنجي: ههههههههه تقريباً 26 ..
جهاد بهمس: تزوج ..؟!
هزت آنجي راسها بالنفي فإندهش وقال: أجل كيف كِرار بهالعمر عنده خطيبه وأُسامه مو متزوج ..؟! توقعته كمان تزوج بدري ..
آنجي: يقول ما يبغى ..
لف بعيونه على كِرار وسألها: وهو يبغى ..؟! أقصد كِرار ..
هزت آنجي كتفها تقول: مدري .. ههههه بليلة خطبته ما حظرها ..
طالعها جهاد بدهشه بعدها طالع بكِرار يقول: جد ..؟! إنت اللحين من جد تبغى تتزوج أم الحيوانات ذيك ولا لا ..؟!
آنجي بتعجب: أُم الحيوانات ..؟!
ظل جهاد يطالع بكِرار بس ما لقى منه رد ..
جهاد: كِرار ليه ما تحب ترد ..؟!
تجاهله فقال جهاد: هذا هو سبب قلة حظورك بين الناس .. إنت بنفسك تتجاهلهم وهذا شيء مو كويس ..
رفع كِرار نظراته البارده لجهاد فقالت آنجي: جهاد خلاص .. هو من النوع اللي إذا طنشك معناته لا تزيد بأسألتك ..
جهاد: وإنتم مشيتم معه على هالمنوال صحيح ..؟! هذه وحده من أسباب إنطوائيته عن الناس ..
طالع بكِرار وقال: كِرار جاوبني حتى لو بإيماء من راسك .. يعني التجاهل بينفر الناس منك ..
ما رد كِرار وإستمر ياكل ..
تنهد جهاد وقال: نظراتك مو نظرات واحد إنطوائي .. أحسك تتعمد تتجاهل الناس وتبعد عنهم وهذا شيء مو كويس لك .. لا تكون شخص عِدائي ..
آنجي: صدقني مافي فايده فلا تحاول ..
جهاد: كِرار ..
ترك كِرار ملعقته وبعدها قام فإنتبهت له ملك وقالت: كِرار وين ..؟!
ما رد عليها وطلع فقالت آنجي: قلت لك .. شفت إصرارك وش صلح فيه ..؟!
جهاد بدهشه: يعني لو واحد ضغط عليه يترك الأكل ويخليهم كِذا ..؟! معقوله ..
حلا: هذا هو أخونا كِرار .. معقوله ونص ..
ظل جهاد يطالع بكرسي كِرار بعدم تصديق ..
ما توقع ردة الفعل هذه .. أصلاً يحس توه ما تكلموا كثير حتى يوصل إنه يترك المكان ويروح ..
أُسامه: قلل من ثرثرتك وبيكون كُل شيء بخير ..
طالعه جهاد شوي بعدها تنهد وكمل ياكل بهدوء ..
لف بعدها بنظره لأبوه .. من ذاك اليوم ومافي بينهم أي إحتكاك ..
ومع هذا لسى هو على رايه .. راح يخلي أبوه بنفسه يروح لهم ويحاول يصحح غلطه ..
بس للحين ما لقى وقت يكلم فيه أبوه ..








▒▓ ×✖• ►︿︿︿︿︿︿︿︿︿︿︿︿◄•✖× ▓▒








الساعه تسعه ونص الليل ..
جالس بهدوء ومتكي ظهره على الشجره وعينه على القصر ..
تنهد وهمس: الكُل برى البيت .. راحوا يتعشوا بمطعم .. أدخل اللحين ولا أنتظر لي فرصه أفضل ..؟! ما أبغى أتهور وبعدها أنكشف وأفقد كُل فرصي اللي مُمكن تجي بعدين ..
غمض عيونه شوي وهمس: وينك يبه ..؟! وحشتني أيام جلوسك معنا .. الله لا يسامح اللي كان السبب ..
فتح عيونه من جديد بعدها قام ..
طفش من كُثر ما كُل يوم ينتظر فرصه أفضل ..
مل من جلوسه بمكان يكره فيه صاحبته ..
هاليوم فرصه مُناسبه .. حتى إن حسين اليوم ماخذ إجازه ..
الوضع مُناسب وتأخره بالتفكير مُمكن ينقلب عليه بالنهايه ..
لف بنظره على اليمين ناحية سواق جالس مع الثاني يسولفون ..
عشان أصحاب البيت مو موجود ما حلت لهم الجلسه إلا بالساحه الأماميه .. شوي وأجيب لهم قهوه ومكسرات ينقنقوا عليه ..
تنهد وكمل: المُكسرات تكون مع الشاي مو القهوه ..
طنش الموضوع وراح للجهه الجانبيه للقصر ..
تقدم من الباب الجانبي اللي كذا مره حاول يدخل منه ..
القصر فاضي .. هو عارف إنه بس تقريباً خدم فيه .. وحتى ساحات القصر مافيها غير سواقين متكين في الساحه الأماميه وواحد نايم بالغرفه ..
مافي أحد .. تأكد من هالموضوع من قبل ..
إبتسم وطلع حديده صغيره وحاول يفتح قفل الباب ..
من ذاك اليوم وهو يأخذ له دروس عالنت وصار عنده خبره لا بأٍ فيها .. مُمكن تفيده بالأقفال العاديه ..
أخذ وقته قبل لا ينفتح فإبتسم ودخل بهدوء ..
قفل الباب وراه بهدوء بعدها خلاص هو تقريباً حفظ المكان ..
خرج من هالقسم الرياضي وإتجه للدرج بهدوء .. طلع لفوق وفعلاً مالقى أحد بطريقه ..
وبالأخير وصل لغرفة ملك بأمان ..
لف مقبض الباب فلقاه مفتوح .. دخل الجناح وقفل الباب وراه وبعدها شغّل كشاب جواله ..
تنهد وقال: واللحين وين مُمكن ألاقيها ..؟! آخر مره ما لقيت الورق اللي بالضبط أبغاه ..
لف بالكشاف على المكان وكمل: دورت بالمكتب وبدولابها وبأدراج التسريحه بس ماش .. وين يعني بيكون ..؟!
بس لحضه .. هالمره رجع زوجها من سفره ..
مع إنه عارف إن زوجها ماله علاقه بالموضوع بس يمكن تكون بين أغراضه ..
كُل شيء جايز ..
تقدم من غرفة النوم ولف المقبض ففتح معه ..
يتذكر آخر مره كان كُل شيء تقريباً مُقفل .. شكلها هالمره نسيت ..
تقدم من الدولاب وبدأ يدور في كُل مكان بعدها بطّل وقرر يطلع .. إتجه لباب المكتب .. هنا أكيد بتكون ..
جلس عند أدراج المكتب وبدأ يفتح الأول .. مسك الجوال بفمه وبيديه يقلب بين الأوراق الموجوده ..
كذا ملف وكذا ورق بس ولا وحده لها علاقه بالشيء اللي يبغاه ..
قفل الدرج وفتح الثاني اللي تحته .. طلع ملف كان موجود وقلّب فيه ..
بس .. كُلها صكوك ملكيه وما إلى ذلك و...
إتسعت عيونه بصدمه وبسرعه رفع راسه لفوق .. لهالشخص اللي واقف قدامه يطالعه ..
هذا ... هذا .. متى دخل ..؟!
ومين يكون ..؟!








▒▓ ×✖• ►︿︿︿︿︿︿︿︿︿︿︿︿◄•✖× ▓▒








وفي إمارة أبو ضبي وبإحدى المطاعم الموجوده فيها ..
الهنوف بحماس: واااااه الأكل يجنن .. يجنن ..
نادر بهمس: حتى لو قسم لحالنا فصوتك يطلع .. كوني أعقل شوي ..
الهنوف: بس ياخي شوف .. الأكل شكله يجنن ويشهي ..
إبتسمت غصب عنها لما طاحت عينها على سلطة جزر وقالت: نادر جزر كثير .. والله كثييير ..
نادر: لا حول ولا قوة إلا بالله .. تزوجت أرنب مو بشر ..
سحبت السلطه لقدامها تقول: بأبدأ أول بهذه ..
نادر: الهنوف هذه ما تنأكـ..
بعدها وقف كلامه .. تذكر إن الكلام معها ما منه فايده ..
مسك الملعقه وبدأ ياكل فقالت الهنوف بحماس: ندّور وين بنسافر بُكره ..؟!
نادر: إختاري المكان اللي يعجبك ..
الهنوف بحماس: ياخي إنت وناسه والله .. طيب إسمع الليله شرايك ...
قاطعها نادر إبتسامه: حبيبتي الليله بلاش .. أبغى أنام ..
طالعته بدهشه وإبتسمت على كلمة حبيبتي وبنفس الوقت تعجبت ..
يعني واضح إنه تعب اليوم بس .... مو من عادته يتعب بسرعه ..
ما إهتمت بالموضوع كثير .. كلمة حبيبتي طيرتها لعالم ثاني ..
هزت راسها تقول: ماشي .. بنروح لشقتنا ننام ونأجل اللي نبغاه لبُكره ..
هز راسه فقالت: على طاري السفر .. مو كنت بتسافر عشان شغله .. ليه ما سافرت ..؟!
نادر: إنشغلت شوي .. المُهم ما عليك أرسل فراس بدل عني ..
الهنوف: ومتى بيرجع ..؟!
نادر: بعد بُكره .. يمكن ويمكن يطّول أكثر .. ليه تسألي ..؟!
الهنوف: ههههههه لا بس أحسك إفتقدته .. دايم أشوفك تكلمه وببعض الأحيان تطلع معه ..
نادر: إيه أعرفه من زمان ..
طالعها وكمل: المُهم متى بتخلصي ..؟! كم لك تاكلين ..؟!
الهنوف بدهشه: نادر حرام عليك ..!!! توني بدينا ناكل ..
نادر: ههههههههه أدري أدري .. ياللا خلينا ناكل .. جد نعسان وودي أنام بدري ..
الهنوف: ماشي من عيوني ..
سكتت شوي بعدها سألت: شمعني كلمة من عيوني ..؟! ما أحس لها مغزى .. يعني أقصد وين الرومانسيه بالموضوع لما الواحد يقول من عيوني ..؟! هذا هياط وكذب مو رومانسيه ..
نادر بتعجب: أجل وش تبينه الواحد يقول ..؟!
إبتسمت وقالت: مثل تامر آمر .. أو امممم مدري بس مو شيء خرابيط مثل من عيوني .. من فين بتطلعه بالله عليك ..؟! من عيونك ..؟! يستهبل هذا اللي فكر بهالجمله ..؟! كُل يهون واللي يقول لا تشيلي هم أجيبه لك من سابع سماء ..!! هيــــــــــــاط ..! لا جد هيــــاط والخبله تستحي وتقول تسلم حبيبي .. خبله .. عبيطه .. كمية بلاده فضيعه .. الحمد لله والشكر ..
ضحك نادر على تفكيرها اللي دايم يفاجئه ..
نادر: ههههههه خلاص خلاص كُلي كُلي بس وبطلي ..
إبتسمت وكملت تاكل ..








▒▓ ×✖• ►︿︿︿︿︿︿︿︿︿︿︿︿◄•✖× ▓▒








وقف بهدوء وعيونه على هذا اللي دخل للمكتب بدون لا يحس عليه ..
حتى ما تجرأ يأشر بنور الكشاف عليه ..
خلاص إنتهى .. خلاص إنتهى بس كيف ..؟!
المفروض ما يكون فيه أحد أبداً ..!
كُلهم راحوا .. ما بقي أحد ..
بعّد هالشخص من قدامه بهدوء وإتجه للمبه ..
مد إيده وشغل الضوء فغمض قُصي عيونه من هالنور القوي بما إنه تعود عالظلام ..
شوي فتح عينه وطالع بهالشخص ..
ضاقت عيونه .. مو هذا ولدهم الهادي اللي إسمه كِرار ..؟!
طالعه كِرار من فوق لتحت فعض قُصي على شفته يقول في نفسه: "خلاص تورطت .. هو من البدايه نظراته لي مو مريحه .. من البدايه شاك فيني وخصوصاً بعد موضوع حلا بس كيف عرف إني هنا .. مافي غير إنه من البدايه شافني أحاول أفتح الباب وقرر يلاحقني" ..
تقدم كِرار منه وسحب الملف اللي كان بإيده وحطه بهدوء على المكتب ..
تردد قُصي .. يبغى يتكلم بس وش يقول بالضبط ..؟!
ما عنده وجه يقول شيء ..
خلاص وده يهاوشه ويطرده أحسن ويخلص من هالجو المتوتر ..
رفع كِرار نظراته له بعدها سأل بهدوء: أبوك مسجون من 12 سنه صح ..؟!
إنصدم قُصي ورجع خطوه لورى ..
هذا ... هذا شدراه ..؟! معقوله بحث خلفه ..؟!!
مسك كِرار الملف ورجعه بالدرج مثل ما كان وهو يقول بهمس: الأوراق اللي تبغاها مو هنا ..
زادت صدمة قُصي أضعاف .. هذا بالضبط وش قاعد يقول ..؟!
طالعه كِرار ولما شاف الصدمه اللي بوجهه قال: إذا تبغاها تعال لي وأقولك فينها ..
شد قُصي على أسنانه وضاقت عيونه ..
كلامه .. مع إنه ما يعرف كيف لكن كلامه يدل إنه عارف بكل شيء ..
وجملته الأخيره ..؟!!
معناته ما عنده مُشكله لو ورّط أُمه ..!!!
بس ذي أُمه ..!! أو يمكن لأنه عارف إنها ظالمه وما يبغاها تستمر بظلمها أكثر ..؟!!
مو عارف .. مو عارف وش هو سببه ..
لكن اللي واضح حالياً قُدامه إن هالشاب ما بيعلم أحد عنه بسبب ردة فعله الهاديه ..
سحب جواله وطفى الكشاف .. طالع بكِرار شوي بعدها لف وطلع من الغرفه ..
ظل كِرار واقف بمكانه لفتره بعدها لف .. طف النور وطلع من الجناح كُله ..
وهالليله عدت وكأنه ولا شيء صار ظاهرياً ..
لكن .. هذا فقط ظاهرياً ..












ولهنا ننتهي من البارت السابع والثلاثون ..
ونوقف لفتره عشان دوشة الإمتحانات والإستعداد لها وبيكون لنا لقاء ثاني بعد شهرين بإذن الله :$
قِراءه مُمتعه ولا تحرموني من تعليقاتكم ()
وأخيراً ربي يوفق الجميع ويسدد خطاء وينال أعلى الدرجات في الدُنيا والآخره ..
أشوفكم على خير ()




.•◦•✖ || part end || ✖•◦•.


مسآاء الورد ()*



حبيت أقولكم لحد ينتظر البآرت اليوم لأنه مَ راح ينزل ..
آخر بارت نزل كنت ناويه أخليه آخر بارت وبعدها أتوقف لأنه مَ بقي غير شهر واحد وتبدأ إمتحاناتي الجامعيه .. بس لأنه مَ كان بالطول اللي بغيته قلت لنفسي خلاص البارت الجاي بيكون الأخير ..
وبرضوا جاء يوم الجُمعه واللي هو اليوم ومَ وصلت للطول اللي بغيته .. فراح يتأجل ليوم الأحد الجاي وبيكون بطول يجي تقريباً 15 ألف كلمه بما إن آخر بارتات كانت بحدود الـ6 و7 آلاف كلمه >< وبتطلع إن شاء الله كُل الشخصيات وبمليه أحداث حتى يكون كافي تصبروا لشهرين كمان .. شهر حتى أذاكر وشهر لأمتحاناتي بما إن الإختبارات الجامعيه تاخذ ثلاث أسابيع .. وطبعاً الأسبوع الأخير عشان أكتب لكم البارت اللي بعده ()



المُهم إختصار الهذره اللي فوق هو إني بأأجل بارت الليله ليومين وبينزل الأحد الجاي وبيكون بطول مَ قد كتبت مثله بهالروايه

+ تعليقاتكم جميله بس فيه مسأله صارت أحسكم شطحتهم بتوقعاتكم .. بنشوف بالأحداث الجايه إن شاء الله ()



نلتقي إن شاء الله يوم الأحد بآخر بارت بينزل لأن بعدها بأوقف لشهرين ..
+ تصدقون بغيت من الأسبوع اللي راح أوقف حتى يكون لي خمس أسابيع للمُذاكره بما إني مُخططه كُل ماده أخلصها بأسبوع لكن مَ كتب الله





وتحيه لأرواحكم الجميله