05-12-15, 07:36 PM
|
#7 |
كاتبة في قسم قصص من وحي الأعضاء ومنتدى قلوب أحلام | في منزل صلاح الدسوقي ،،،، كانت زينب تعد الطعام حينما سمعت طرقاً على باب منزلها و... -تررررررررن ... تررررررررررن -زينب : اكيد دي ندى ، أيووووه يا ندى ، جاااية ، انتي مش معاكي المفتاح يا حبيبتي ، اصبري توجهت زينب إلى الباب لكي تفتحه لتتفاجيء بجارتها و... -آمال: ازيك يا زوزوو -زينب: آمــال ، ازيك ؟ خير في حاجة يا حبيبتي -آمال: انتي هاتسيبني واقفة كده ع الباب كتير ؟؟ -زينب: لا مؤاخذة ، اتفضلي -آمال: أنا عارفة انها ساعة غدا ، بس قولت هضمن ان ألاقيكي فيها ، وكمان مايكونش الحاج صلاح جه -زينب: طيب ثانية أقفل البوتجاز واجيلك -آمال: خدي راحتك يا حبيبتي -نيرة من الداخل : ماما .. هه .. ازيك .. يا.. يا طنط -آمال: ازيك يا حبيبتي دلفت نيرة خلف والدتها إلى المطبخ و.. -نيرة: هي الولية دي عاوزة ايه -زينب: والنبي ما أعرف يا بنتي ، أنا هاشوفها وبعد كده اغرفلكم الغدا -نيرة: ده انا جعانة أوي -زينب: اصبري .. وبعدين اكرام الضيف واجب -نيرة: ده لما يكون ضيف خفيف مش زي الولية دي -زينب: شششش .. روحي انتي ع أوضتك وشوفي مذاكرتك ، وأنا خمساية وهخليها تمشي -نيرة: ماشي ، بس ماتطوليش عن كده وإلا وربنا هأجي واحرجها -زينب: ربك يسهلها رحبت زينب بجارتها آمال وقدمت لها المشروب وبعض الحلوى ثم تحدث آمال عن ... -آمال: شوفي يا زوزو يا حبيبتي وعشان معطلكيش أنا جاية لبنتك ندى عريس -زينب: عريس ! -آمال: اه يا حبيبتي ، راجل ملو هدومه ، ومحترم -زينب: أنا مقولتش حاجة ، بس مش بدري ع الكلام ده -آمال: بدري ايه بس ، ده النبي حارسها وصاينها كبرت وفارت وادورت واحلوت ،واللي زيها الوقتي حامل -زينب: حامل ايه بس ، ده لسه ندى معدتش العشرين -آمال: ياختي البنات بتجوز أول ما تجيلها الدورة -زينب: الكلام ده كان زمان أوي ، لكن الوقتي البنات بتتجوز أما تخلص تعليمها وتشتغل وآآآآ... -آمال مقاطعة: وهو في حد لاقي عريس اليومين دول -زينب: أما يجي نصيبها وقتها بقى -آمال: لأ نصيبها عندي ان شاء الله -زينب: بصي أنا مش هاقدر اديكي رأيي في الموضوع ده إلا لما اسأل أبوها الأول ، ولو وافق ساعتها نبقى نتكلم -آمال: طيب أنا هأقولك برضوه شوية معلومات عنه ، عشان لما تحكي مع الحاج -زينب: مافيش داعي ، استني أما أشوف رأيه الأول -آمال: دي معلومات مش هاتضر ، هو اسمه علاء ، وعنده 27 سنة وشغال في الضرايب -زينب: اها -آمال مكملة: وعنده شقته في نفس العمارة اللي هو ساكن فيها مع أمه -زينب: الله ساكن مع أمه ؟؟ -آمال: لأ شقته في نفس العمارة -زينب: أها .. -آمال مكملة: المهم هو بيقبض حلو من شغلانته وعنده عفشه كمان -زينب باستغراب: عفشه ؟؟ -آمال: أصله كان كاتب كتابه وآآآ... ويعني آآآ -زينب: ما تقولي يا آمال على طول -آمال: يعني هو كان متجوز بس جواز كده وكده -زينب: نعم ؟؟؟ هو ايه كان متوجز ، وكان جوازه كده وكده -آمال: أقصد يعني انه اتجوز لكن ما دخلش ع مراته وانفصلوا بعدها بأسبوعين -زينب: يا ساتر يا رب -آمال: مالهاش في الطيب نصيب -زينب: بس متأخذنيش يا ست آمال ، أنا بنتي ماهياش بايرة ولا خرج بيت عشان تتجوز واحد مطلق -آمال: ده ملحقش يدخل دنيا ، ده في حكم كتب الكتاب -زينب: بس برضوه -آمال: ماتحكميش عليه من غير ما تشوفيه الأول -زينب: بصي أنا هاخد رأي الحاج الأول وبعد كده يبقلنا كلام -آمال: اللي تشوفيه ، وصدقيني مش هتلاقي أحسن منه -زينب: اللي فيه الخير يعمله ربنا -آمال: طيب أسيبك أنا بقى ، واجيلك وقت تاني -زينب: ما لسه بدري -آمال: لأ يدوب ألحق أسخن الأكل للعيال وأبوهم ، وإن شاء الله أسمع منك الأخبار الحلوة قريب -زينب: ربنا يسهل كان زينب على وشك فتح باب المنزل حينما وجدت ندى تدلف للداخل و... -ندى: ماما .. طنط آمال -آمال بفرحة وهي تقبلها : أهلاااا بعروستنا الحلوة -ندى: ازيك يا طنط -زينب: خشي يا ندى جوا ، غيري هدومك لأحسن اخواتك مستنينك من بدري -ندى: هه -آمال: خشي ارتاحي يا عروسة -زينب: احم... ماشي يا آمال .. سلميلي ع العيال ، وتسلم رجليكي ع الزيارة دي -آمال: الله يخليكي يا حبيبتي أغلقت زينب الباب لتجد ندى مازالت واقفة في مكانها و.. -ندى: كانت عاوزة ايه طنط آمال -زينب: هه.. ولا حاجة ! انتي لسه مغيرتيش هدومك ، يالا أوام عشان ألحق أغفرلكم الغدا -ندى:حاضر يا ماما .......................... في غرفة البنات ،،،، دلفت ندى لداخل الغرفة ، فأسرعت إليها فاطيما لتقبلها وتقص عليها ما حدث مع اختها نيرة و... -فاطيما: فاتك يا ندى الخناقة بتاعة نيرة -ندى بعدم فهم : خناقة ايه ؟ -نيرة: انتي يا بت يا زئردة انتي ، مش أنا منبهة عليكي ماتفتحيش بؤك وإلا هاقصلك شعرك قرعة وانتي نايمة -فاطيما وهي تمسك شعرها: عاااااااااااااا ، والله لقول لماما عليكي -نيرة: قوليلها ، وهخليكي قرعة برضوه فاطيما وهي تجري خارج الغرفة: مامـــــــــــــا ..!!! -ندى: بس يا نيرة ماتخوفيهاش -نيرة: انتي مش شايفة بتقول ايه رغم إني محذراها -ندى: دي لسه عيلة -نيرة: اوووف -ندى: في ايه اللي حصل ؟؟ -نيرة: عادي ، خناقة زي أي خناقة ، وخلصت ! -ندى: بس كده -نيرة: ايوه .. المهم أنا كنت عاوزاكي تفتحي بابا في موضوع كده -ندى: موضوع ايه -نيرة: عاوزين نركب نت في البيت -ندى: نت !! بس انتي عارفة ان بابا مش هيرضى ، ده كان رافض الموضوع ده واحنا في السكن في السعودية -نيرة: بس احنا في القاهرة دلوقتي مش في مصر ، هناك كان النتغالي وبالشيء الفلاني ، لكن هنا هو رخيص ، وبعدين أنا مش محتاجاه عشان ألعب ، ده انا عاوزاه للدراسة -ندى: يا سلام -نيرة: أه طبعااا ، وتقدري تروحي المدرسة عندي وتسألي الميس بتاعتي وهي تقولك انها عاوزة الأبحاث من ع النت ! -ندى: مممم... -نيرة مكملة: وبعدين انتي في كليتك أكيد هتحتاجيه ، ماهو مش معقول يعني كل ما هنعوز حاجة من ع النت هننزل ندور على سايبر نقعد فيه مع الشباب -ندى: مش عارفة -نيرة: استحالة مش هتحتاجيه ، ده الكل الوقتي بيشتغل ع النت ، بس عشان انتي لسه في الأول فمطلبوش منك حاجة ، خليكي حلوة واتكلمي مع بابا اننا نشترك في النت -ندى: بصي هو انتي ممكن تكوني بتتكلمي صح ، ان الدراسة حالياً بتتطلب حاجات تنزل من ع النت وأبحاث ومراجع نجيبها منه ، بس ده مايغنيش عن أهمية المكتبة والكتب وآآآ... -نيرة: بمناسبة المكتبة والكتب ، انتي هتلاقي اللي عاوزاه من أي كتب ع النت ، ممكن تقريها عليه ، وساعتها مش هتحتاجي تروحي لمكتبة -ندى: لأ أنا بحب أقرى في الكتاب وأنا ماسكاه في ايدي -نيرة: يعني لو كتاب مش لاقياه تقدري تدوري عليه وتقريه من ع النت -ندى: مممم.. -نيرة: احسبيها بعقلك كده هتلاقي اننا هنستفيد أوي من وجود النت ، ويعدين هو احنا زي الشباب اللي بيبقى عاوز النت عشان يدخل ع المواقع اياها -ندى: استغفر الله العظيم يا رب -نيرة: يعني احنا هنركب النت بغرض تعليمي بحت -ندى: اها -نيرة: بصي هي ماما هتفاتح بابا أما يرجع ، واحنا بقى علينا نزن عليه ، وان شاء الله يوافق -ندى: اوك -نيرة في نفسها: أخيرااااا ندى وافقت ع حاجة بدون ما تذلني عليها ، كده مش قدامي غير إني بس أقنع بابا ، وساعتها يبقى عندنا نت في البيت ، وأقدر اتابع كل حاجة براحتي ....!!! ......................... في مكتب صلاح الدسوقي للمقاولات ،،،، دلف علي إلى المكتب وهو في قمة فرحته حينما تم ابلاغه بأن مكتبهم سيتولى المقاولة القادمة و... -علي: الله اكبرررر .. يا بوصلااااح .. المقاولة رست علينا -صلاح بعدم تصديق: انت بتكلم جد ؟؟ -علي: اه والله ، الحمدلله احنا اللي هنعمل مقاولة الشركة الجديدة -صلاح: طب وانت عرفت ازاي ؟؟ -علي: لسه سكرتارية شركة النقيب مكلمني ومبلغني بده -صلاح: الف حمد وشكر ليك يا رب ، الحمدلله ، عاوزين بقى يا علي نشد حيلنا ونثبت نفسنا -علي: بأمر الله طبعاااا ... اطمن -صلاح: كلم المحامي بتاعنا عشان لما نروح الشركة نبقى ماشيين رسمي معاهم -علي: وهما يعني مش هايجيبوا محامي ليهم -صلاح: لأ اكيييد هيجيبوا ، بس برضوه عشان لو في جزئية مش فاهمينها هو يوضحهلنا -علي: ماشي يا بوصلاح -صلاح: أنا لازم اجيب للعيال حاجة حلوة بمناسبة الخبر الحلو ده -علي: وماله ، حقك يا أبوالبنات -صلاح : ايوه ، وأنا مروح ان شاء الله هاجيبلهم جاتوه -علي: والغلبان اللي زيي -صلاح: هبقى أعمل حسابك في لقمة -علي: ههههههههههههههههههههههههه ههه -صلاح: يدوب عشان السكر -علي: ان كان كده ماشي ................................. في أحد المطاعم الفاخرة ،،،،، كان يوسف ومروان وباقي أصدقائهما يتناولون الطعام حينما اقترح ... -مروان: ايه رأيكم نعمل رحلة -يوسف: رحلة -مروان: اها -أحمد: مش وقتها ع فكرة -مروان: ليه مش وقتها ، احنا نعمل رحلة لمدة يوم لاسكندرية ولا الفيوم ولا أي حتة -مايا: ومين هيطلعها ؟؟؟ -مروان: احمد ومايا دي لعبتكم -أحمد: ممممم -ماجد: اعملوها عن طريق الأسرة بتاعتكم -مروان: بالظبط وأهي تبقى دعاية تانية لأسرتكم -أحمد: هي فكرة مش وحشة -مايا: وانا هاكلم دادي يظبطلنا الباصات -مروان: وادي مشكلة الباص اتحلت كمان -يوسف: حلوو أوي ، يبقى احنا طالعين فيها وش -مروان: متفقين -مايا: اوك ، أنا هاكلم رضوى وأعرفها بده -يوسف: اوك ................................ في شركة الكومي للاستثمار والتطوير الxxxxي ،،،، كان سليم الكومي جالساً في غرفة الاجتماعات يتحدث مع عميد كلية تجارة و.. -سليم: واحشني والله يا عماد -عماد: وانت أكتر يا سليم -سليم: لازم يعني اطلبك مخصوص عشان أشوفك -عماد: ما انت عارف مشاغلي ، والكلية والطلبة -سليم: اها .. الله يكون في عونك -عماد: شكراً يا سليم. مقولتليش انت كنت عاوزني في ايه ؟؟ -سليم: بص يا سيدي ، أنا ابني يوسف اقترح عليا اقتراح ومصمم انه يعمله -عماد بعدم فهم: اقتراح ايه ؟؟ -سليم: هو عاوز يعمل في الشركة عندي دورات تدريبية للطلبة زمايله بحيث يديهم خبرة قبل ما ينزلوا يشتغلوا بعد التخرج -عماد: والله فكرة حلوة -سليم: وأل ايه مصمم ان الدكتور بتاعه اللي اسمه ممم... مش فاكر كان قالي عليه ممم.. يعني يكون المشرف معاه في ده بحكم خبرته -عماد: مين الدكتور ده -سليم: مممم... أظن ان اسمه مدحت تقريباً -عماد: أه فعلاً الأستاذ مدحت الفرماوي بيدي الفرقة الرابعة -سليم: اهو يوسف ابني معجب أوي بالاستاذ مدحت، وأخده قدوته ، خيل انت يا عماد ، مش سائل في أبوه وعاوز يبقى زي الأستاذ ده -عماد: ههههههههههههه غلطان فعلاً ، ده المفروض يستفاد منك -سليم: فأنا يا سيدي عاوزك تكلم الأستاذ مدحت وتعرض عليه اقتراح يوسف ابني لأحسن هو محرج ان الاستاذ مدحت ميرضاش بده -عماد: خلاص سيب الحكاية دي عليا ، وأنا هاتكلم معاه -سليم: ده العشم برضوه منك يا عماد -عماد: المهم خلي يوسف يشد حيله بقى السنادي ، مش معقول هيفضل كده في الكلية ، ده بقى أقدم مني -سليم: هههههههههههههههههه على رأيك ................................. في منزل صلاح الدسوقي ،،،،، عاد صلاح من الخارج وهو يحمل في يده علب من الجاتوه والحلوى و... -صلاح بفرحة: يا زينب، يااااا بنات -زينب من الداخل: ايوه يا حاج ، انت جيت ؟ -صلاح: ايوه -زينب وهي تحمل عنه العلب: ايه دول يا حاج -صلاح: حاجات حلوة ليكي وللبنات -زينب بفرحة: ماشاء الله ، وده بمناسبة ايه -صلاح: شغل جديد الحمد لله جالنا ، فأنا قولت أفرحكم معايا -زينب: ربنا يرزقك يا أبوعيالي ويوسع عليك رزقك -فاطيما: بابا ، انت جبت ايه معاك ؟ -صلاح: جيبتلك يا طمطم جاتوه -فاطيما: بالتشيوووكوليت -صلاح: اه يا حبيبتي -فاطيما بفرحة وهي تحتضن والدها: هييييه ، هيييييه -نيرة: ازيك يا بابا ؟ -صلاح: ازيك يا بنتي ، تعالي يا حبيبتي كلي من الجاتوه اللي جبتهولكم -نيرة: شكراً يا بابا -ندى: بابا ! حمدلله ع سلامتك -صلاح: الله يسلمك يا بنتي ، اخبار الكلية ايه ؟ -ندى: ماشي الحال -صلاح: ربنا يكرمكم يا رب ، وينور مخكم -ندى: اللهم أمييين -صلاح: بالحق يا زينب ، بكرة ان شاء الله هايجي السواق الجديد -زينب: خيررررر -فاطيما: هو في حد هيوصلنا المدرسة يا بابا ؟؟ -صلاح: اه يا حبيبتي ، الأسطى مجدي -نيرة: كويس ، بدل ما الواحد بيمشيها ع الصبحية -صلاح: المهم هو هيجي ع 7 وربع الصبح ، يا ريت تبقوا جاهزين -زينب: ان شاء الله يا حاج ، اطمن أنا هتأكد انهم جاهزين قبل كده كمان -صلاح: بأمر الله -نيرة هامسة لوالدتها: ماما ماتنسيش تفاتحي بابا في موضوع النت -زينب: ربنا يسهل -نيرة: ماشي .. -زينب : يالا يا حاج عشان ترتاح شوية -صلاح: اه يا زينب ، أنا فعلاً محتاج أرتاح ، جسمي كله مكسر -زينب: أنا هاعمل صينية غدا معتبرة وتاكل وانت ع السرير -صلاح: طيب يا زوزووو -زينب في نفسها: ربنا يستر من ردة فعله لما يعرف بموضوع النت وموضوع عريس ندى .................................................. .... !!! ......................................... |
| |