......
هاجر كانت مصدعه من هنوف ونوره اللي يسخنون لزواج عندهم هالاسبوع .. ... هم الوحيدات اللي توافق تروح لهم وعادي تسولف معاهم ..
هنوف بصوت خشن : هلا بريحة هلي هلا باللي إلي ..هلا بتالي العمر هلا بالاولي
نوره بصوت مبحوح :اويلي اويلي اويلي اويليييي
قطع بروفاتهم دخول ساره ..ناظروا لها بصمت ..
عيونها مليانه دموع .. خشمها احمر .. نطقت هنوف بعربجه وهي تشرب من البيبسي البارد : خير يابو الشباب شصار ؟
نوره حطت يديها على فمها بتمثيل : لايكون عملها ابن الإيه ..
ناظرت لهم ساره ومسحت دموعها ..هنوف ونوره صديقات الطفوله .. هم اصولهم افريقيه لكن مجنسين بالسعوديه ..ابوهم مسجون .. وامهم ماضعفت ولاشحذت .. اسست فرقه طقاقات مع بناتها وخواتها وعايشه من خيرها ..قويات رغم الظروف ونظرة المجتمع لهم ..
ابتسمت لهم وهي تمسك الطبله وتغني معاهم .. تحمسوا ونسوا او تناسوا يسألونها شصار مع خالد ..
رجعوا للبيت وهاجر كانت عارفه ان خالد جرح ساره للمره الالف بس يارب هالمره تتعظ ..
دخلوا وحصلوا موضي بالحوش ومعها عصا صرخت بوجيههم : الساعه 6 الحين وانتم طلعتوا من 3 ليششش
ردت هاجر وهي تشوف سرحان وصمت ساره : كانوا يسوون بروفه السبت زواج ناس اغنياء وجابوا لك كرت لاتشيلين هم ..
نست موضي كل شي وابتسمت من قلب : صدق والله !! اجل بتونس واتنكس واآكل ..ودخلت داخل وهي تفكر وش تبلس ..
تنهدت هاجر براحه مالها خلق هواش هالثنتين ،، شافت ساره سرحانه وواقفه على جدار الحوش ...
: هيه ياحياة الفهد ادخلي كملي الدراما بغرفتنا لاتشوفك ام فيصل وتفتح معاك تحقيق ..
دخلت ساره وهي مخنوقه .. كل هالحب اللي شايلته له وبالاخير مايدري اذا يحبها ولا لأ ؟؟
طعنت بكل مبادئها عشانه .. وتقابله كل فتره .. تكلمه يوميا ... من تصحى لحد ماتنام وهي تفكر فيه .. وبالاخير تطلع مشاعر من طرف واحد ..
حطت رأسها على السرير ونامت بدون ماتحس ..دخلت هاجر بعد ماختارت فستان لموضي .. انصدمت لما شافت ساره نايمه .. مو بعوايدها هالنومه .. وبكرا الاحد وعندها اختبار متى بتذاكر ..
رجعت للصاله بطفش وهي تفكر بحال ساره ..
بعد ساعتين /
دخل فيصل عليها وهو معاه البلاستيشن
: فاتك خاله فزت على عمي سعدون بالفيفا
:ماشاءالله يلا خلينا نلعب طفشانه
ابتسم وهو متحمس يكمل انتصاراته هالليله ..
دخلت عليهم موضي بصينية المكرونه بالبشاميل ..
:يلا تعالوا تعشوا بسررررعه وين سوير ذي اكلتها المفضله ..
قام فيصل يناديها وتفاجأ انها نايمه هالوقت طفى المكيف وصرخ بقوه : خااااله بسرعه المكرونه لاتفوتك تجنننن
فزت وهي مفجوعه
:حسبي الله عليك يافصيل عرق الدفاشه متأصل فيك دام امك موضي..
طنشها وركض للصاله عشان يأكل ..
توضت وصلت .. ولبست بجامة بينك مريحه .. دخلت وعيونها مورمه وشعرها رافعته بوني تيل ..
ناظرتها هاجر بقلق .. اعطتها ساره اجمل إبتسامه عشان تريحها ... وفعلا ارتاحت وبدوا يتعشون بهدوء ..
-
..........
جالسه على الصوفا البيضاء وتلعب باطراف دراعتها الذهبيه وشعرها مرفوع بإهمال لكن رغم ذلك جمالها ودلالها واضح ... توها قفلت من زوجها وهي خلاص مقرره ترجع ... اشتاقت له وكسر خاطرها وهو يترجاها .. هي فعلا زودتها بهالوحام ؟؟ لكن غصب عنها لادخلت شقتها او شافته مسكها خجل مو طبيعي للحين ماتعودت عليه وهو جرأته ماتساعد
دخلت عليها فرح برجه وهي لابسه ثوب روز وشعرها رافعته بطوق لولو : هاه اخيرا حنيتي على إبن عمك
ابتسمت سعاد وهزت رأسها بخجل ..
فرح : لاحول للحين تخجلين الله يعينه عليك ..
وشهقت فجأه لدرجه خلت قلب سعاد يدق بسرعه ..
فرح : بتروحين له بهالدراعه !!! خيررررررررر قومي اكشخي وخليني امكيجك يلا
حطت يدها على قلبها : حسبي الله على ابليسك وش هالشهقه فجعتيني
سحبتها فرح لغرفتها وهي تتحلطم على غباء اختها ..واختارت لها فستان عنابي ناعم وبالغصب لبستها بعدها حطت لها مكياج خفيف مع استشوار ..
ناظرت سعاد لنفسها بحيا : وشذا قسم استحي الحين يشك بنواياي
ضحكت فرح على حيا اختها : عادي خليه يشك يعني بتفهميني ماشتقتي لحضنه
ضربتها سعاد على كتفها : اصصصه لو يسمعك ذياب قسم يعلق رأسك
اكتئبت بسرعه فرح وتنهدت بتعب .. جلست قربها سعاد وهي حاسه بأختها .. هي عانت مثلها من همجية ذياب لكن هي كانت مستسلمه وراضيه ..
:فرح ياقلبي ترى ذياب يحبنا والله .. وعصبيته من خوفه علينا
دمعت عيون فرح بسرعه : اي خوف بالله ؟ مافي طلعات مافي اسواق الا عند الضروره وينشب معنا .. يتحكم بنومنا ووقته ؟ دراستنا ؟ اكلنا شربنا .. قسم ياسعاد طقيت ..حسوا فيني انا عمري 21 سنه مالي صديقات الا ثنتين هم الوحيدات اللي يسمح لي اكلمهم ويزوروني ..ابي اعيش زي هالبنات ابي اسهر اطلب من المطاعم افرفر بالمولات .. ليش حياتنا كذا ؟ ليشششش؟؟
سكتت سعاد .. وهي تدري ان فرح معاها حق ..
................
جالس يدخن بالحوش .. ماينكر انها من طلعت من البيت زعلانه وهو متضايق ؟ ليش مايدري ..
لكن دايما يحس معاها بمشاعر متناقضه ..حتى لما خطبها ابوه ووافقت كان متنكد وحاس بهم فوق صدره .. ولما تأجلت الخطبه بسبب وفاة عمه وخالته ارتاح .. مايدري ليش هالتناقض معها ..
سمع صوت امه تناديه .. رمى سيجارته ورفسها برجله : جايك يمه جاي
دخل لقاها بسريرها .. جلس قربها وهو يشوف صحن العشا مثل ماهو ...
مكرونه ؟ كأن طيف ساره الليله حالف مايخليه !!!!
: يمه ليش ماكلتي عشان موعد علاجك بعد ربع ساعه ..
بيديها تحاول تمسك وجهه .. قرب منها
همست بتعب :والله ماذوقه ياولدي لحد ماتأكل معاي ..
ابتسم وحضن يديها وقرب الصحن له وبدأ يأكل ويأكلها ..
..........
دخل للبيت وهو تعبان ومهدود حيله وشماغه على اكتافه .. ومثل ماتوقع امه بالصاله تنتظره ..
: يمه الله يهديتس وش مصحيتس هالوقت ..
: خفت انام قبل لاتطمن انك بسريرك .
ضحك بحب وباس رأسها : يالغاليه وصلت ل32 سنة وانتي للحين تعامليني مثل زمان
: والله لو عيالك طولك ببقى احاتيك انت فرحتي وسندي من لنا غيرك ..احط لك العشا يمه ؟
: لا لا تعشيت .. فرح وسامي ناموا ؟
تنهدت وهي ترد : ايه ناموا .. خف عليهم ياذياب
: يمه تكفين خليني اربي اخواني مثل مابي ..
هزت رأسها بضعف قدام نظراته القاسيه ..وبخوف نطقت
: ماودك اخطب لك ؟
حاول يتمالك اعصابه ...
: انتي تعرفين اني مابي غيرها ؟؟ وبتساعديني تكون لي مثل ماوعدتيني ؟؟
: بس
وقف وهو يقاطع جملتها ببوسه على رأسها ... : يمه تكفين خلاص ياساره تكون لي او انسي اني اتزوج .. ومشى لغرفته وتركها حايره ...
قفل باب غرفته وهو معصب ... ذياب اللي كل شي سهل يحصل عليه ؟ الا هالساره ماقدر ؟؟ خطبها 3 مرات ورفضته ..
فسخ ثوبه ودخل الحمام .. فتح المروش وصار تحته .. يمكن المويه تطفي ناره .. يتذكر مكالمتها لفرح وهي تمدح بخالد
خالد الصايع المنتف ؟ تفضله علي انا ... ضرب الجدار بقبضة يده الخشنه وهو يصرخ : اوعدك تصيرين على ذمتي وقريبيب قريبيييب ..وقتها بعلمك كيف تحبين ياحفيدة الذيب ..
.........
1 صباحا ..."
جالسه بالحوش وكتابها قدامها تذاكر اهم شي مستقبلها مستحيل تفرط فيه ، جتها هاجر بصعوبه وهي معها كوب قهوة مدت لها الكوب ..، وجلست تراقبها
وين ساره القويه دايم كانت تحسها سند لها وتكره لحظات الضعف اللي تمر فيها .. تذكر ابوها كان يفتخر بقوتها وشخصيتها ويقولها انها الولد اللي ربي مارزقه فيه .. لكن من انخطبت لخالد تغيرت صارت حساسه وكل همها قربه ورضاهـ ..
غريب الحب كيف يغير شخصياتنا .. ويضعفنا بدل مايقوينا ..
تكره خالد بعد ماكانت تحبه مثل اخوها .. كيف يلعب بمشاعر اختها مره يرفعها فوق والف مره يطيحها للأرض ..
وتكره ضعف اختها كيف ارخصت نفسها وتكلمه وهي مو حلال له لكن تعبت تنصحها وماتغيرت ..
قطع تفكيرها جوال ساره ،، ناظرت لملامحها المتجمدهـ ..
هاجر : من يدق خالد ؟
هزت رأسها ساره بصمت ..
هاجر : ردي وانهي كل شي يايملك عليك او خلاص انتي بطريق وهو بطريق !!
ردت ساره وهي مقتنعه بكلام اختها الصغيره : هلا !
خالد بصوت مبحوح :اخبارك ساره ماقدرت انام قبل ماكلمك ..
ماتنكر انها فرحت .. بس تذكرت اللي صار لها اليوم وردت بقوه : صحيح ماشاءالله يالحنون .. اسمعني خالد انا مليت من وضعنا
ضحك ببرود : اخيرا مليتي توقعتك بدون إحساس ..
انصدمت من كلامه الجارح تو صوته كان حنون بهالسرعه تغير ! ووقفت بغضب .. شافت موضي دخلت الحوش وهي تراقبها بنظرات ناريه ،،
ساره : الا عندي احساس ياولد العم لكن مات من حبيتك واليوم لما انتهئ حبك رجع لي .. من اليوم انسئ شي اسمه ساره الا لابغيت تملك ..
خالد ببرود : لاتسوين حالك مظلومه انتي اللي حطيتي نفسك بهالموقف .. انتي جبتي رقمي وكلمتيني .. انتي تلاحقيني وتقابليني .. انا ماقد طلبت منك هالسخافات ..
حست نفسها صغيره .. فعلا هي الغلطانه بهالقصه .. هي ذلت نفسها وكرامتها لواحد اناني ..
صمتت وهو صمت ..
ساره : طيب يلا فأمان الله
خالد بسرعه : ساره انا ماقصد ...
ماسمعت باقي كلامه لانها قفلت بوجهه .. ناظرت لموضي : تبين تهاوشيني يلا هاوشي .. خلصوني حطموني كلكم اليوم .. اجرحوني ..
ناظرتها موضي بعصبيه : ساره حرام اللي ..
صرخت بقهر مقاطعه لكلامها : كافي مبي نصايح ، انا غلطت واستاهل وعرفت غلطي والله .. ممكن تدخلون وتتركوني اذاكر ؟
تبادلوا هاجر وموضي النظرات .. وساعدت موضي هاجر بالدخول ..
جلست على الارض وهي مقهوره .. نفسها تصرخخخخ بأعلى صوت .. نفسها تحطم وجه خالد وتفرغ قهرها فيه .. تنهدت بقوه وهي تستغفر .. يارب سامحني سامحني .. وكن معاي .. يارب ثبت قلبي على حبك .. وابعد عني جميع مايغضبك ..
.......
حاطه السماعات وتكلم صديقتها ود .. صديقتها السريه بنت الجيران .. تعجبها هالبنت وطريقة تفكيرها ..وماحد يدري من اهلها عن هالصديقه ..
ود : اقول فرح شرايك تسيرين علي ..؟ لاتتعذرين بذياب المتخلف .
شهقت بنخوه : حدك ود الا اخوي .. مو معناته اشكي لك وافضفض تاخذين راحتك
ضحكت ود بمياعه : تصدقين اخوك يجنن كل البنات ميتين عليه .. ولما طلع بلقاء تلفزيوني كل خواتي فهوا عليه حتى زوجات اخواني .. ماشاءالله ..بس لما اتذكر كيف حاشركم اشيل تفكيري عنه ..
سكتت فرح وهي تتأمل ان ود تكون لذياب يمكن تقدر تغير تفكيره لما يتزوجون .. سمعت صوت الباب وقفلت جوالها بخوف ..
فرح برجفه : من ؟؟
سمعت صوته الضعيف : انا .. افتحييي بسرعه
وقفت بسرعه وفتحت له ..
فرح : سامي انت تعبان فيك شي ؟
سامي : لااا ازعجتوني ترى ؟ انت تعبان انت تعبان انا وصل عمري 12وللحين تعاملوني كأني طفل ..
عرفت انه متضايق ويبي يفضفض .. سحبت يده النحيله .. للسرير
فرح : شفيك ؟
سامي : من غيره ؟ تخيلي توه دخل علي ويقول بينقلني من المدرسه لمدرسة اهليه ؟ وماهمه رأيي قرر وخلاص ..
سكتت فرح وهي محتاره .. هي عارفه ان سامي يعاني من كلام الناس وان ذياب يبي يحميه بأي طريقه ..لكن للأسف ذياب يتعامل بصرامه وبدون احاسيس .. سكتت وهي تشوف دموع سامي .. حسبي الله ونعم الوكيل .. حسبي الله على من ضيع حياته وحطمه .. وضيع حياتهم معاه .. من حادثة سامي قبل 5 سنوات .. وذياب قلب لشخص متوحش كل همه يكونون قدام عينه وتحت طوعه .. اشتاقت لذياب الاب .. ذياب الاخ ..
............
ركبت السياره وهي متضايقه من الاغاني اللي تصدح .. ناظرت له بعتب الساعه 2 جاها ومروق الاخ ..وهي تنتظره من 11 .. لكن نظراته الحارقه لعيونها اخجلتها ونزلت رأسها ..
تنهد برومنسيه .. يحبها ، يعشقها ، مو مصدق انها زوجته وقريب بتصير ام لطفله .. سحب يدها النحيله وباس اصابعها واحد واحد وهو ينطق بحب : احبك / اشتقت لك / اهيم فيك / اشششتقت لك /
سحبت يدها وهي ترجف ودخلتها بحضنها وهمست بخجل فطري : مازن الله يهديك لو ذياب شافنا ولا واحد من الجيران
ضحك وهو يرفع حاجبه : عادي حلالي وكيفي ..
وشغل السياره ومشوا لشقتهم وقلبها يدق فرح وحيا ..