[Hiba Ab]

مرحبا
أولا أنا بعتذر عن عدم تعليقي على الفصول السابقة لظروف عدة..
تانيا أنا عادتي بكتابة التعليقات على الفصول فيها نوع من الفكاهة بس هالتعليق بالذات رح يكون طالع من تعصيب!! وهالمرة ما رح أطلب من أي حد يسكتني لو طولت بكلامي!
........................................
أولا فراس وأمان، ما بعرف كيف انقلبت الآية وصرت مع فراس ضد أمان، ما نسيت طبعا الشخصية المنفرة الي كانها من قبل وتصرفاته الباردة وفرضه لنفسه وتصرفاته عليها، بس هيي حد غبي، أحسن كلمة ممكن توصفها انها ساذجة، غِرّة، عديمة التفكير، طيبة زيادة عن الحد المسموح لدرجة الهبل!
اتوقعت بعد التطور الي صار بعلاقتهم انها توعى على حالها ووضعها، انها تجلس جلسة محترمة معه ليحكو بكل اشي، بدون استثناء، يخرجو كل الي بقلبهم لبعض، تعرف أسبابه ويعرف عقدتها، تعذره وتساعده يوصل لداخلها، من بعد وفاة الجدة هوليا ومن بعد ما شافت شو وضع امه كان لازم تاخد خطوة واعية بحقه بس أثبتت انه تفكيرها محدود وعنادها مؤذي للي حوليها وبتستاهل الضربة الي أكلتها على راسها لحتى تعرف شو قيمة الأشخاص الي حولها خصوصا فراس، ما عرفت توصل للتفكير الصح وتفيق الا لما كانت على وشك انها تخسر خسارة عمرها.
........................................
عزيز وهزار، كنت مبسوطة على الوتيرة الي مشيت عليها أحداثهم الأخيرة، من تقارب وتفاهم وتكسير حواجز ووصول عزيز لدواخلها وانها هي تسمحله يقترب لهالحد ويوصل معها لهالمرحلة، بس الغلط بلش من لما عزيز ما أصر انه يعرف شو طبيعة الخلاف بينها وبين بيان، بحكم الحالة الخاصة لهزار، وبحكم علاقتها بعائلة ليان كان لازم يعرف كل التفاصيل بس هاد كان تقصير منه، والغلط الأكبر منها انها غامرت وراحت لمكان هي عارفة انه ممكن يفتح عليها بواب عم تحاول كل جهدها انها تسكرها، أوكي رغبتها بمساعدة بيان وانه ما يكون مصيرها متل ليان عمى على قلبها، بس كان لازم تحكم عقلها أكتر وتتصرف تصرف صح، لانه لو كانت اتصرفت بطريقة صح كان اتجنبت الحديث الي صار بالمستشفى، واتجنبت الكزب والاتهام البشع، واتجنبت الصفعة الي أكلتها، واتجنبت نظرات الارتباك والتردد الي طلعت من عزيز، وقدرت تواجه كزبة بيان بكل عين قوية (أكيد رح تعمل هيك الفصل الجاي بس كانت بتقدر تتجنب كل هالحكي هاد)، وبتمنى بتمنى انه الكف الي انضربته هزار ينرد على وج بيان لانها خبيثة وحقيرة ومشوهة من جوا، وبعد ما ينردلها الكف يا ريت تنقطع كل علاقة لهزار بهالعيلة، لانه أولا ازا بدها تتشافى لازم تواجه كل شخص كان إله صلة بحادثتها مع ليان وكريم وعائلة ليان همي طرف الخيط فتقطع علاقتها فيهم جذريا بكون أحسن، وتانيا لانه أم ليان الي المفروض انها شخص حكيم وبتعرف مين هي هزار وبتعرف انه بيان شخص متهور ومراهق، كان لازم ما تتسرع بهالطريقة البشعة، وبتهيألي إيمان رح يكون إلها دور الفصل الجاي، ممكن تحكي اشي يثبت انه هزار بريئة من الموضوع، بس لو عزيز بيسكت عن هالكف فهو رح يلغي أي حق إله بهزار (من رأيي طبعا).
........................................
آدم ونوار، آدم شخصية انهزامية كتير مع نوار بغض النظر عن كل الي مر فيها لإنه ولا اشي ببررله الي عمله معها والطريقة السيئة الي خرجها فيها من حياته، بس بحيي وليد على الخطوة الذكية الي أخدها، لإنه لو شو ما كانت الظروف، نوار هي أكتر وتر حساس بيمس آدم، ووليد لعب على الوتر الصح، والكلام الي صار بين آدم وعصام من بعدها كان كتير عقلاني ومؤثر ورح يكون بداية تعافي آدم، بالبداية كنت مفكرة نوار هي المفتاح لعلاج آدم، بس ما حد بالدنيا ممكن يفهم الرجل إلا رجل متله!
........................................
همام وليلى، العلاقة بينهم صارت عبارة عن كآبة، جوز تيران وعم يطناطحو، والمشكلة انه لما تنظر للموضوع من وجهة نظر كل واحد بتحس التنين غلطانين، والتنين معهم حق!!! ما رح أكرر شو غلطة كل واحد لانه كلنا منعرف وين الخلل، بس المشكلة مين رح يتنازل؟ همام ما كان إله حق يحط ليلى بموقف انه ازا هي بدها ياه رح تيجيله وهو عارف شو شخصيتها وكيف عم تفكر وشو الجرح الي مسببلها ياه بحياتها، كان لازم يقدّر ويبرر انه تصرفها أوكي كان بدافع من شيرين، وماشي هي غلطت بانها اتهمته بالخيانة بعد كل الي عمله ليحاول يثبتلها انه بيحبها، بس يفهم انه هاي ال 9 سنوات أثرت فيها وبثقتها بنفسها ونظرتها لحالها، قد ما تكون عم تبين قوة وثقة وجلادة، هي حد ضعيف من جوا، ولهلأ انا مش عارفة شو الحل، مش متخيلة ليلى تتنازل، يي ولا بأحلامي السعيدة بتخيلها تتنازل، وهو ما رح يقدر يروحلها لانها كسرت فيه اشي من جوا باتهامها، بلومي شو الحل فهميني شو الي رح يصير؟!!!!! خصوصا انه مر كام فصل لهلأ ما في ولا أي تفصيل عن مستقبلهم!!
........................................
يعني بالمختصر المفيد:
فراس: جلف وخشن وأناني.
أمان: ساذجة وما بتحكم عقلها.
آدم: انهزامي وحبيس مخاوفه.
همام: مذنب كبير وليلى تنحة، بس ما بقدر أحكي أكتر من هيك لانه حكيت من قبل انه هالتنين همي الثنائي المفضل عندي!
بيان: بكرهك.