[فيتامين سي]

البارت السابع

مسك المها يجرها للزواية حقت غرفة استراحتهم و بما ان الصبح مافيه الا قليل فأستغل الفرصة

المها تطقه ع صدره : ساعدووني
سمية بصراخ ضربته بشنطتها ع راسه بحكم جسمه العملاق ما تاثر من ضربها : يا حيوان ابععد عنها يا وسخ الله لا يوفقك ساعدووونا يا ناس

امتنان اخذت جزمتها و جت تضربه فيها الا دخل من بينهم الكايد بعصبية دف العامل بعيد عن المها و سحب المها وراء ظهره : ايا اللي ماتستحي تتحرش ببناتنا و لا بمكان عملك!!

العامل قام بيهرب بس مسكه الكايد و اعطاه بكس على وجه ثم مسك يده و لواها و بصوت عالي : يا امن يا امن!!

جاء احد الامن اسمر البشرة باين انه صالح : هلا اخوي

الكايد رمى العامل عند رجول السكيورتي و بحدة : هالقذر لقيته بغى يتحرش بزوجتي وين مكتب المدير ابتفاهم معاه يطرده

العامل الهندي ببكاء : سير انا اسف كلاس اخر مره والله ما اسوي كزا مره تانيه سير سوري

السكيورتي بعصبيه مسكه من كتوفه : امش قدامي يالله ناقصين قذرين حنا يالله امش


امتنان : شكراً يا ولد الكاظم ما تقصر لكن ماله داعي تشتكي عليه حرام

الكايد بإستخفاف : كان بيتحرش بزوجتي و تبيني اسكت و ما اشتكي عليه عشان يغتصب بنات بلادنا!!!

المها عقب ما هدت : مشكور مره ثانيه!! امتنان يالله امشي قبل تجي عمتي و تذبحنا

الكايد : مع من جايين؟

امتنان بنظرة : مع السواق و معنا عمتي

الكايد مط عيونه : وشهو وشهو؟؟ سواق و كلكن حريم لوحدكن معه!! طيري السواق اللي معكن انا اللي بوصلكن يالله

امتنان بطفش : اخوي مثل ما حنا بنركب معاك بنركب مع السواق و كلنا حريم لوحدنا اللهم شكلك غير عن شكل سيدراث هذا الفرق الوحيد بينك و بينه!!

سمية و المها كتموا ضحكتهم من شكل الكايد اللي تغير من كلام امتنان

قطع عليهم صوت عليا و نجود : بنات! ولد الكاظم!!

امتنان : عمتي انا اقولك كل شي اذا رجعنا

عليا بعصبية : قولي الحين

الكايد : يا عمه واحدن من العمال كان بيتحرش بالمها و الحمدلله اني تدخلت قبل لا يصير شي و الحين اسمحي لي اوصلكم لاني ما راح اطمئن عليكم الا لين اوصلكم البيت

عليا و نجود شهقوا بخوف

عليا بخوف : فيك شي المها سوى لك شي؟؟؟

المها : تطمني يا عمه ما صار شي لي

عليا بصدق : مشكور يا الكايد هذا عشمي فيك لكن اعذرنا بنروح مع السواق ينتظرنا تحت

الكايد بإصرار : قلت لك يا عمه انا اللي بوديكم ما ابي اعتراض و بعدين فيه فرق بيني و بين السواق انا اعتبركن اهلي لكن السواق مجرد يشتغل عندكن و ما بيهتم لكم لا صار شي هذا الفرق " و اعطى امتنان نظرة "

سمية فطست ضحك على حركة الكايد

عليا عطت نظرة استحقار لسميه و سكتت سمية : صادق يا ولدي يالله مشينا اجل يالله يا بنات

نجود طالعت سمية و امتنان وش صار

سمية رفعت يدينها فوق بمعنى مدري

امتنان سحبت نجود و المها : يالله امشوا قبل اذبح زوج المها ذا

_________________


في الكوفي

اسرار بتعب : ياخي خمينا السوق كله انا تعبت خلاص

حازم رشف الاسبريسو و ضحك : والله اني تعبت وراكم من سوق لسوق صراحةً الله يعين رجلك يا اسرار داعيه عليه امه

اسرار مطت عيونها: اسسستغفر الله حرام عليك تلقى امه داعية له

حازم ابتسم بلعانة : داعيه له بليلة القدر بحرمة تطير عقله و تخليه من عاقل لمجنون

اسرار بزلة لسان : ع اساس سمية بتطالع بوجهك تلاقينا نلقاها ثاني يوم بشهار

عايدة : اسرار!

اسرار بخوف و حزن على اخوها : انا اسفه ما قصدت

طالع فيها حازم بهدوء و فرك يدينه دليل على التوتر و سكت يطالع بالاسبريسو

ام الكايد تغير الموضوع : حازم يا قرة عيني دق على الكايد شف وينه كأنه خلص يجي يتغدى معنا بالمطعم

حازم بحرقة : ابشري يمه

ام الكايد و عايدة طالعوا أسرار بلوم

قام من الطاوله لبرى الكوفي يحس انه مختنق

_______

بيت ال وافي

وقف السيارة بالكراج ودخل للبيت و بيده ترف يبي يشوف فرحة اخته ببنتها

فهد بفرحة و صوت عالي : يا أهل البيت يا أهل البيت جبت لكم شيخة الغيد الترف بنت نجود الوافي جتكم

ابتسمت ترف بفرح

مزنه بفرح بكت وضمت ترف : هلا ب تروفه حبيبت جدتها يا مسهلا كيفك يا عيون جدتك انتي بخير؟

ترف ضمت جدتها و بكت : بخير يا جدة بس ماما وين

الجدة بفرحة : يا هلا و مسهلا بترف الفرح كيفتس يا امتس؟

ترف : بخير يا ماما الكبيرة

الجدة ضحكت : و نجيد مغير تحفظتس هالكلمات

فهد : وين نجود؟

فاطمة بإبتسامة : راحت مع عليا و امتنان و المها و سمية لبنده و جايين بالطريق

فهد : زين اجل عمي وين

سالم دخل بإبتسامة : فاقدني مثلا؟ وبعدين مو قلت لك لا تتصرف الا بإذني

فهد بإبتسامة : لا تشيل هم خذتها بدون مشاكل ريح جعلك للجنه

سالم ابتسم على صديق دربه فهد اللي ما كان مجرد ولد اخ!

نزلت العنود من الدرج ببكاء : والله ما اسامحهم والله

سالم : هلا بحبيبة عمها

العنود بكت : عمي شفت نجود الكلبه و امتنان عيوا يخلوني اروح معاهم بنده خير ليه ان شاء الله!


فهد ضحك بقوة : ما طردوك عبث

العنود : ليه ياخي؟

فهد : بزر هالطول طولك و لسانك يا طوله غير كذا لو تشوفين جبنه منتهية مدتها شريتيها تقل مفجوعه ع العيشه صراحةً ما ألومهن

بوزت العنود بزعل

سالم حضن العنود : حدك عاد الا عنودتي و لا تزعلين بعد عرس راجح اوديك بنده لوحدك تشترين اللي تبين

ابتسمت العنود برضا

الجدة : سالم اذا خلصت من هالوغده تعال عندي هرج معك

سالم : يا عساه خير ابشري


________


بسيارة الكايد

عليا : كيف امك و خواتك؟

الكايد : بخير يا عمة الحمدلله

عليا : الحمدلله سلم لي عليهم

الكايد : يوصل

دق جوال الكايد وبدون ما يقرأ مين رد : الو

حازم : انا اخوك

الكايد : حازم؟ هلا والله


باللحظة هذه طالعت سمية فيه خاطرها تسمع صوته!!


حازم بتعب : وينك فيه؟ خلصت من بنده

الكايد : تقريبا الا ، ليه وش بغيت

حازم : امي تقلك اذا خلصت تعال تغدى معنا بنجيب اكل من المطعم للبيت نحسب حسابك ولا؟

الكايد : احسب بجي انا ساعه بالكثير و انا بالبيت

حازم : فمان الله

الكايد : فمان الكريم

"
نجود بأدب : اعذرنا يالكايد اخرناك على اهلك

الكايد هز رأسه بالنفي : لا والله وبعدين انتم صرتوا اهلي

نجود : ما تقصر ياخوي

الكايد بإبتسامة : هذا حنا وصلنا يالله فمان الله و انتبهوا لأنفسكم

عليا : فمان الكريم

نزلوا من السيارة و راح الكايد
عليا بتهديد : اذا سألوكم قولوا السواق جابنا يا ويل اللي بتقول الكايد

نجود : ابشري ياعمه

دخلوا و سمعوا صراخ طفلة تنادي بماما

التفتت نجود للصاله و مسكت فمها من الصدمة و بكت : ترف!!! حبيبتي يمه

ترف ضمت امها بقوة و بكت : ماما اشتقت لك حيل
ماما وحشتيني مره

نجود طاحت على رجولها و جلست ترف بحظنها و ضمتها بقوة وتمسح على شعرها : ترف كيفك يمه كيفك؟ اه يابنتي اه

المها بإبتسامة : تروف نور بيتنا فيك يا عمري

امتنان قربت من ترف و مطت خدودها بقوة و ترف كشرت : اشتقت اقرص خدودك و اشوف تكشيرتك

سمية بضحك : الحين يبي لنا قلابي ولا وينش يشيل هالتريلة و بنتها ، يا مره قومي

نجود ببكاء مدت رجولها : اه قوموني ما اقدر اقوم

امتنان بمزح : مع السلامه بروح لزوجي

نجود تمسكت بعباة امتنان : يا خاينه قوميني امانه

مدت يدينها امتنان لنجود اللي طيحتها و قامت

امتنان طاحت على ظهرها : نجييييد كسرتي ظهري يا بعير

نجود ببكاء و ضحك : حوبتي انا و ترف

امتنان قامت بعصبيه وطقت ترف و راحت لغرفتها

نجود بصراخ : يا كسر يا امتنانوه

المها : الريم وينها

مزنه : عندها امتحان الاسبوع الجاي و تذاكر

المها : يا دفارتها ما شاء الله

سمية رفعت يدينها فوق : الله يرزقنا مثلها

ضحكت المها و طلعت فوق هي و سمية

" "
بغرفة الجدة

وقف سالم بعصبيه : يمه قلت لك من قبل و ارجع اقولها لك زواج مب متزوج قضينا

الجدة نزلت دموعها : يا جنيني ابك عمرتس صار ٣٨ سنه بتوصل الاربعين و انت ما تزوجت ولا كونت لس عايلة مغير تطارد ورى عيال اخوانس ارحم نفسك و تزوج و انسى سميرة هي خلاص تزوجت و جابت بزارين كبرها

سالم بعد نظره عن امه : يمه ما اقدر انسى قلت لك ما ابي اتزوج

الجدة بكت : يا بكيت عينتس يا مهرة على وحيدتس

سالم غمض عيونه : يالمهرة لو سمحتي لا تبكين وانتي تكلميني تراك تجبريني على اشياء النفس ما تبيها

الجدة ببكاء: كأنتس تبي رضاي دنيا و اخره تزوج بنت العيسى الفارسة اللي ما تهاب احدن جيداء العيسى صدقني ما احد بيروضها غير سالم الوافي

سالم بهدوء : يمه قلت لك زواج مب متزوج قضينا

الجدة بعصبيه : اقطع معاك لين بعد زواج المها و تعطيني قرارك و نروح يمهم نبي الخير

سالم طلع بعصبيه

عليا بإبتسامة : سالم لحظه

طلع لبرى مطنش

فاطمة بإستغراب : هاو غريبة سالم يطنش!!

سارة بحزن : اكيد امي جابت له سيرة الزواج و عصب

عليا بحزن على اخوها : الله يصلحك ياخوي الله يصلحك


___________

مرت اليومين و كأنها ثانيتين للبعض و كأنها سنتين للبعض
!!

" زواج راجح الوافي و عايدة الكاظم و ملكة الكايد الكاظم و المها الوافي "

بعد صلاة العشاء الاوضاع متوترة بين العايلتين

بالاستراحة المزينه و كأن فيها حفل كبير ، زواج عائلي فقط!!

بجهة النساء....

بغرفة العروس " عايدة و امها و اسرار "

مسكت يد امها بخوف عايدة : يمه تكفين لا ترميني بالنار

ام الكايد بدموع : عايدة ياروحي خلاص ملكتي و شوي بتروحين معه هدي يا وانا امك هدي

اسرار : انا بطلع طفشت من الجو الكئيب هذا ، وانتي لا عاد تبكين و تخربين مكياجك هذا مصيرك بكيتي ولا ما بكيتي متزوجته متزوجته

طلعت بعصبيه قابلتها امتنان : انتي اخت عايدة صح؟

اسرار لفت عليها : ايه مين انتي؟

امتنان بإبتسامة مدت يدها تسلم : انا امتنان الوافي بنت عم راجح و المها

اسرار كشرت بضيق و ابتسمت تسليك صافحتها ومسحت يدها بطرف فستانها بقرف : اهلا

امتنان لاحظت تكشيرتها مطت عيونها و سكتت على الحركة : عمتي تبي امك و عايدة المملك جاء!

اسرار : طيب

دخلت اسرار تنادي امها و عايدة

امتنان عصبت : اقسم بالله وقحة!!! مقيولة هذول عيال الكاظم وش بأرتجي من بنتهم!!!

سمية بإستغراب مرت من جنب امتنان و وقفت : امتنان!!! تكلمين مين؟

امتنان بعصبيه : اذا ارسلتوني مره ثانيه عند هالقسم بذبح نفسي ، تخيلي بنتهم المتكبرة اتكلم معها زي الناس برقي قلت لها انا امتنان بنت عم راجح و المها و مديت يدي اصافحها كشرت و سلمت علي و مسحت يدها بطرف فستانها !!!! قهرتني يا سمية تحمد ربها اني ما مردغتها !

ضحكت سمية بقوة : اسرار؟ حرام عليك والله انها كيوت و طيبه و فلة بس انها اكيد بتأخذ منا موقف و تبين لنا كرهها!!

تحلطمت امتنان : امشي بس حنا بقسم العروسة اخاف احد يدخل من عيالهم و يمسحون يديهم بثيابهم مني بعد

ما كملت كلمتها الا و دخل حازم اللي باين انه سرحان !

ضحكت بقوة سمية : امتنان مب صاحية والله

"

رفع عيونه هذه ضحكتها ايه بالله ضحكتها و شلون كانت تطربني بصوتها و رنتها رفع عيونه و شافها م انفجعت و اللي معها تخبأت ورى الجدار ابتسم بحزن : لا طاحت العين بالعين و القلب تحولت دقاته للخبط هذه انتي

سمية نزلت دموعها ناظرته بعيون مشتاقه !!


" "
ماكنت ابيها تصير واليوم صارت
هاللحظه هذي ماتمنيتها تصير

اوادعك واشوف دمعتك حارت
واهمس لك بحسره اشوفك على خير

لاتلومني بالله دنياي جارت
وظروفي اقسى من حروف المعاذير

حتى ظنوني في بعض الاصحاب بارت
واللي حسبته ذخر في الواقع { صغير}

احلامنا والطيش عنا توارت
طعم الحقيقه مر وانفاسها غير

وماللهوى بعزوم للود ثارت
شرهه مدام الوقت ماله تدابير

وماكنت ابيها تصير واليوم صارت
اودعك { واشوف وجهك على خير }

للشاعر الكبير فيصل العدواني

" "

حازم نزل عيونه بتعب حرام شوفتها : ما كنت ابيها تصير اليوم يا سمية لكنها صارت غصبن عنك وعني يا شينها لامن تشوف حبيبتك و بينكم امتار و امتار و شوفة عيونك السود حرامًا علي يا شينها قدامي لكن ما اقدر حتى اقولك مشتاق و الشوق ذبحني ، " غمض عيونه بألم " الله معك يا بنت الوافي الله اللي خلق عيونك الدجلة معاك اشوفك على خير اشوف الخير بعيونك يا

سمية بكت و بحدة : لو سمحت يالحازم ولد الكاظم ابتعد عن طريقي تراني ما احل لك ابتعد خلني امر انا وبنت عمي

اعطاها ظهره و ابتسم ابتسامه ألم : دربك خضر يا السمية

سحبتها امتنان و بنظرة لحازم و دقة له : يا ولد الكاظم انتبه على حركاتك ترانا بنات قبايل وكلامك هذا لو اشتكيك عليه يسمى تحرش الزم حدك حنا بنات قبايل ما راح نذوب و نخق بكلمتين

سمية مطت عيونها من كلام امتنان!!

حازم بدون ما يلف : يا بنت الوافي وفري كلامك لنفسك و انا منيب بلا اصل و بايع ديني مثل اللي خبري خبرك اذا ابي شي فأخذه بالحلال ، ال كاظم عارفين حدودهم و عارفين دينهم وش يقول على العموم الله يجزاك خير و يا ليت تبعدين عشان امر للغرفة

سكتت بفشله امتنان و بعدت مشى من جنبهم بدون لا يطالع بهدوء

طلعت بعصبيه و وراها سمية توجهوا للقسم اللي كان فاضي و مافيه غير المها اللي نزلت مع امها توقع على الملكة
، امتنان بعصبيه ضربت رجلها على الارض : حسبي الله عليك يا راجح! حتى رد ما خلاني ارد زي الناس و عاره هذا راح يبقى عيرة للوافي حتى ال كاظم يدقوننا بالكلام اه يا راجح اهه

سمية طالعت فيها عيونها متجمعه الدموع فيها : ما كان له لازم تقولين هالكلام و تدقين بالهرج

امتنان بنظرة: سمية ليكون تأثرتي بكلامه لك!!! سمية هذا بياع حكي لا توحين له

سمية غمضت عيونها و كحلها سال : امتنان مهما كان كلامه ما راح يأثر و مصيرنا هو نفسه ما راح نجتمع لكن بيأثر هذا الشي بقلبي و كلامه مثل رشة الملح على الجروح ، مثل ماهو مشتاق لي انا مشتاقه له اضعاف كلامه حرك فيني اشياء ماتت من سنين احس كلامه خلاني اعيش بأمل حتى لو هو بسيط و صغير هالامل لكنه حلو

امتنان مسكت يدينها و بحدة : لا تتأملين بأمل حتى لو صغير اللي بالماضي صار ماضي ، حازم ماله مكان بحياتك لا تفكرين مجرد تفكير انهم تزوجوا من عندنا يعني الامور زينه و فيه امل ترجعون حق بعض؟ ولو بترجعون لبعض بيصير كل شي مثل قبل؟ حبكم مثل قبل؟ حبكم ما تأذى؟ تحسبينه لامن تزوجك بتصير حياتكم حلوه؟ لا ياحبيبتي هذا حازم راح ينتقم منك على رفضك له و تخليك عنه !!

سمية بدموع : حازم مو كذا انا اعرفه مستحيل يأذيني او انه ينتقم مني هو هو قلبه رهيف و رقيق حنين يا امتنان مستحيل تلقين مثل طيبته و حنيته! هو اذا حب حب بكل صدق و مشاعر ، انا ما استحقه ما استحق حبه يا هنيّ اللي بتاخذه و تكسب قلبه بعدي يا هنيّها

امتنان بنظرة : سمية مرت سنين و اكيد انه نساك من مدة ، و احوال الناس تتقلب لا تثقين بحب كان مجرد حب مراهقة !! تغير حازم و تغير بقوة حتى نظرته لك غير ، نظرة انكسار و ألم و حزن و الاهم نظرة انتقام ! مهيب نظرة حازم العاشقه لسمية مهيب هي ابد

سمية بكت : انا مالي ذنب والله انكساره يذبحني اكثر من انتقامه !! انا احبه والله

تنحنح رابح قبل يدخل و دق الباب

امتنان بسرعه : لحظه لحظه

لبسوا العباية والطرحة حطوها على وجيهم

امتنان : ادخل وش تبي؟

رابح بدون لا يطالع : تحبين من يا بنت؟

امتنان بعصبيه : وانت وش دخلك اصلا كيف تتجرأ تتسمع علينا !!

رابح مط عيونه : اقطعي انتي انا سألت سمية ما هرجتك

جت بتتكلم امتنان بس قاطعتها سمية : وانت وش عليك فيني؟

رابح بعصبيه : كيف وش علي فيك وانتي خطيبتي؟؟؟

سمية انصدمت و سكتت!!

امتنان مطت عيونها : خطبة ايش؟؟ اصلا كيف صارت خطيبتك من من خطبتها انت

رابح بعصبيه : خطبتها من جدتي قبل لا تصير سالفة راجح و وافقت ومع الاجواء تلخبطت الامور لكني هرجتها امس و قالت بعد اسبوعين الملكة

سمية بعصبيه : كيف تتجرأ انت و جدتي تخطبون قبل لا تأخذون رأيي ؟ الموافقه جت من مين يا سيد!! على العموم زواج منك او من غيرك انسى و وصل هالكلام لجدتي

رابح مط عيونه بعصبيه : سمية!!! زواج و بتزوجك غصبن عنك وعن اللي خلفوك توحين؟ و هالحازم اللي عاشقته تنسينه لان مافيه امل تتزوجينه حتى لو فيه امل و صار لاخذ الرشاش و احطه براسه و راسك ثم اذبح نفسي
استعدي يا مدام بلا هالافكار

صفق الباب بقوة وراه

سمية انجنت : امتنان سامعه وش يقول هذا المجنون !!!!
اقسم بالله لاخرب هالزواج على رؤوسهم و خاصةً هالجدة اللي فارده عضلاتها علي

امتنان مسكتها : بنت اهدي خليه بعد الزواج نتفاهم الحين ما ينفع تخربين عرسهم

سمية جلست بعصبيه تهز رجلها


__________

عند باب الاستراحة اللي يفصل بين النساء والرجال

وقعت بتردد : خلاص كذا؟

سالم : ايه ، تبين تشوفينه ولا

المها بهدوء : لا ما ابي اشوفه

سالم ناظرها و يتأمل الحزن بوجهها : المها انا اسف جد
ما كان ودي ملكتك او ملكة اي احد من عيال اخواني تكون كذا الحزن طاغي على وجهك! انا اسف

المها بإبتسامة: ماعليك انت انقذ نفسك ترى جدتي مغير تمدح ببنت العيسى

سالم كشر بضيق : اه الله يعين بس

المها ابتسمت بلعانة : امين يالله عمي بروح اجلس مع مرتك شوي و بقولها عمي يوصل سلامه لك

سالم طالعها بنظرة و طلع لقسم الرجال

ابتسمت المها و راحت تدور على سمية و امتنان

جتها الريم و ضمتها : مهوي مبروك يا بنت العم

المها ابتسمت : الله يبارك فيك يالله عقبالك انتي و مشاري

استحت الريم : ما تستحين ابد!! المهم شفتي مرت عمي يالله ما شاء الله شعرها تقل انه شعر فرس و اجعد ما شاء الله تبارك الله

المها : جد؟ وريني ياه

الريم بدون لا تأشر : شفتي الطاولة هذه

المها : ايه وينها

الريم : اللي ورى الطاولة يعني الطاولة الثانيه ذيك ام اسود و مجعده شعرها؟

المها بعد فترة تكلمت : ما شاء الله فتنه يا حظ عمي فيها

الريم : اي والله

المها: ما علينا شفتي سمية و امتنان؟ وينهم

الريم بإستغراب : مدري امك ارسلت امتنان تروح عند ام عايدة تناديها و لما تأخرت امتنان ارسلت وراها سمية و عاد مرت ساعه ولا جو

المها ضربت يدها على صدرها : يا ويلي ليكون شافته سمية!!

الريم : شافت من؟

المها بخوف : مين يعني غير حازم؟

الريم شهقت و سكتت : ماينفع نروح اسمعي نشوفهم اذا جينا البيت الحين الوضع ما يساعد نروح




_______________
_______________

عند الباب

ام الكايد بدموع ضمت بنتها: استودعتك الله بنتي

اسرار ببكاء: عايدة انتبهي لنفسك و اذا سوى لك شي اتصلي والله ان اذبحه

عايدة ضمت الكايد و حازم و ركبت السيارة بدموع

الكايد : عايدة امانه برقبتك يا راجح صن اختي عشان نصونك ،لك حقوق عليها و لها بالمقابل حقوق كثيرة عليك الطاعه بالمعروف يا راجح و حقها انها تحترمك و تصونك ، و تذكر أن لمست اختي و جتنا تشتكي ان ما يشبعني غير دمك

حازم بنظرة : "فإمساك بمعروف او تسريح بإحسان " اختي امانه عندك صونها يا ولد الوافي

راجح بهدوء : ان شاء الله فمان الله

ركب السيارة و حرك

اسرار ببكاء : خايفه يسوي لها شي

حازم :يخسي ما يقدر

دخلوا بهدوء و كلن بتفكيره!!

و بكذا انتهى الزواج على خير ان شاءالله
اشوفكم الخميس على خير

نهاية البارت السابع