[فيتامين سي]

السلام عليكم
اعذروني تاخرت بالتنزيل بسبب الاختبارات جد جد مضغوطة هالاسبوع ضغط الله لا يوريكم الاحد و الاثنين و اليوم وراء بعض المُشكلة !! فكنت اذاكر من الاربعاء اللي فات لاختباراتي ونسيت انزل البارت حتى! و شكلي جبت العيد بإختبار الاحد): ! معليه ان شاء الله اعوضها ، كنت ما راح انزل لكم البارت الا يوم الخميس اثنين سوى بس مو حُلوة بحقكم تنتظروني ع الفاضي حتى بكره عندي اختبار صعب و مفروض اذاكر و اترك الجوال بس قلت انزل البارت و اكمل مذاكرة ،ادعوا لي حبيباتي): +اعذروني اذا فيه اخطاء املائية بالبارت (:

…

البارت الثامن
____

بالفندق تحديدًا غرفة 260

دخلت بإنكسار و دموعها تنزل ناظرته رمى البشت ع الكنب و جلس و حط يدينه ع رأسه بهدوء..

ترددت تدخل فوقفت و صوتها بكاها ازعج راجح

راجح بإنزعاج : ما راح اكلك و يا ليت ما تزعجيني ببكاك! ادخلي الغرفة

طالعت فيه بخوف و تردد

راجح تنهد بتعب : يابنت الحلال منيب مقرب لك ادخلي و قفلي الباب عليك و ارتاحي و ريحيني

خذت شنطتها و دخلت بسرعه للغرفة و قفلت الباب قفلتين


ناظر الباب و انسدح على الكنبة يحاول ينام..


"
داخل الغرفة

فصخت الفستان بقوة و تسريحتها فكتها بعنف و جلست عند السرير تبكي

دخلت الحمام ^ اكرمكم الله ^

و شغلت الدش على مويه حارة تحرقها تبي تتألم و تصارخ بس هي من فقدت اغلى شي تملكه ما صارت تحس ابد ، طلعت و لبست بجامتها الثقيلة رغم ان الجو حار !! مسكت المشط و مشطت شعرها بقوة

رمت المشط و مسكت رأسها بتعب تحس فيه رنين و هالرنين ازعجها بالحيل صارخت من شدة الألم صارخت مرة و اثنين حتى سمعت صوت راجح عند الباب يدق صارخت مره ثانيه ماتبي تسمع صوته تحس بغثيان وانها بترجع كل اللي اكلته!!

كسر الباب بقوة و قرب من عندها حتى طاحت بين يديه و قطرات المويه من شعرها غرقت يديه ، انصدم و خاف اخذ عبايتها و طرحتها و لبسها العباية وشالها للسيارة طاير للمستشفى و الخوف مالي قلبه عليها !!


___________
___________

ف بيت الوافي

دخلوا بتعب ما يبون غير النوم، بس وقفهم صوت سمية!

سمية بصوت عالي : يا ال وافي فكوني من شركم ، و ولدكم لا تلصقونه فيني تراني ما ابيه وان تزوجته لأذبح نفسي

الجدة بعصبيه : عوذة من لسانتس يالقشرا وش فيه رابح؟ يا قليلة الحياء

سمية بعصبيه : ما به شي لكن النفس ما تبيه و هذاني قلت لكم

الجدة طقت بعصاها على الارض بحدة : اقطعي يالرديئة و والله ثم والله ثم والله و هذه ثلاث حلوف ان ما تتزوجين غيره ياسميه

سمية ببكاء : وانا اخت مشاري ان ما اتزوجه يا عجوز قريح ريحيني منك و من شرك ، مشاري تفاهم معاها حاطتني برأسها و ليش عشاني بنت الوايل؟

مشاري : يا جدة انا ولي أمر اختي و مهيب متزوجه لا رابح ولا غيره وانت يا رابح اعذرني لكن اختي ما تبيك

الجدة بعصبيه : سميوه اطلعي برى بيتي اطلعي انتي و اخوتس الردي بيتي ما يشرفتس اطلعي لا اشوف وجهتس مالتس غير رابح كأنتس تبين رضاي و تجلسين بهالبيت و امتس تحرم عليتس و على اخوتس شوفتها و اطلعوا يا عيال الوايل من بيتي اطلعوا

سالم بحدة : يمه !!! سمية انتي و مشاري روحوا غرفكم ومهب صاير غير اللي يرضيكم

مشاري بعصبيه : يا خال ماقصرت لكن انا مالي قعده بهالبيت لا انا و لا اختي ، قبل سنين جلست عشان امي لكن الحين والله ان ما اغير قراري يا سمية جهزي اغراضك و انزلي انتظرك انا بنعيش بشقتي

سمية طلعت لغرفتها تاخذ اغراضها بعزم

لحقتها المها و امتنان و الريم

عليا ببكاء : مشاري لا تاخذها تكفى كفاية انك ما تعيش هنا مغير تجي ساعات و تروح شقتك لكن سمية طول عمرها معي لا تاخذها يا مشاري يا حبة عيني

مشاري طنش امه و طلع لسيارته ينتظر

رابح طالعهم بعصبيه و راح الملحق

فهد صفق بسخرية : برافو برافو سيناريو الماضي قاعد ينعاد قدامي لكن الحين صار جد؟ برافو جدتي انتي بطلة مين باقي تنحشينه من البيت؟؟؟

الجدة بعصبيه : فههد اذلف عني هالسعة

طالعها بسخرية و راح ينام

سالم بهدوء : كل واحد لغرفته لامن هدت الاوضاع بكرة نتفاهم بالامور ذي

راحوا كلهم ما بقى الا عليا و الجدة


""
بغرفة سمية

حطت ملابسها بالشنطة و سكرت السحاب

المها بدموع : سمية لو سمحتي لا انتي عارفه ان لو رحتي من هنا ما راح نشوفك؟؟؟سمية تكفين لا

امتنان ماسكة دموعها لا تنزل و بغصة : سمية الله يوفقك بحياتك اتصلي فيني اول ما توصلين لشقة مشاري

الريم ببكاء ضمت سمية : سميية

سمية بدموع : لا تقطعون يا بنات مهوي ترى بحظر زواجك لا تخافين

المها ضمتها : اصلا لو ما تجين ما راح اتزوجه

سمية بضحكة و دموع ماليه وجهها : بيسحبك الكايد من شوشتك ثم يحرم عليك شوفتي

المها : يعقب

امتنان اعطتهم ظهرها و بكت مسحت دموعها بيدينها ما تبي تكدر خاطر سمية زيادة..

سمية ابتسمت بحزن و ضمتها من ورى و بدموع : لا تحاولين تمسكين بكيتك امتنان نتقابل بالجامعة ياروحي لا تبكين

امتنان ضمتها بقوة : سمية امانه عيشي حياتك و صيري سعيدة صدقيني انتي الوحيدة اللي تستاهلين السعادة انتي اللي ما عشتي شعور ان عندك ابو جد اتمنى تكونين اسعد انسانه حتى لو كنتي بعيدة عني اهم شي تكونين مبسوطه

سمية شدت على ضمتها : مين قال اني عشت بدون ابو؟ ابوي خالي سالم ابوي مشاري ابوي ولد خالي فهد هذولي الثلاثه بعمرهم ما نقصوا علي شي كانوا اباء لي

المها : سمية لا تعتبين هالبيت ابد روحي حققي حلمك اللي دوم تتمنينه يتحقق روحي انتي و مشاري دوروا ابوكم و اعرفوا ليش ، اعرف انك تكرهين طاريه بس انتي تكذبين دايما اسمعك تهذين بأسمه اكيد عنده سبب روحي ياسميه الله يوفقك انتي و مشاري

سمية ضمتهم بقوة و نزلت من الدرج قابلت امها اللي ضمتها بقوة و تترجاها ما تروح بس طلعت و كسرت قلب امها وراها

ركبت السياره ببكاء

مشاري بإبتسامة : لا تبكين هذا احسن شي لك

شدت على يده بقوة و رجعت رأسها على المرتبة بتعب


___________

ببيت الكاظم

بغرفة عايدة
ام الكايد بدموع ضمت مخدة عايدة

الكايد بحنية : يمه واللي يخليك تعالي نامي كفاية ذبحتي نفسك بكاء

ام الكايد بدموع : ما اقدر يا كايد ما اقدر هذي بنتي حبة البركة ياويلي عليها اكيد هي بين دموعها ليتني ما عطيتها راجح ليتني ما زوجتها

الكايد ضمها و مسح على ظهرها : تعالي يا حبيبتي لغرفتك تعالي ولا اقول تعالي غرفتي من زمان ما نمت معك يالله يمه

ام الكايد بإبتسامة و دموع : تعال يالله

دخل غرفته ونامت امه بحضنه و كأنه الاب و امه طفلة بين ضلوعه!!


______________

اشرقت الشمس تعلن وجود يوم جديد..

في قطر " الدوحة "

في أرقى و أغنى أحياء الدوحة بقصر " محمد ال وايل "
عائلة سعودية من أب سعودي وصل عمره الى الثمانينات و ام قطرية وصل عمرها الى نهاية السبعينات ، تزوجوا عن حب و قصة حب وصلت للقتل لكنهم تمسكوا ببعض اكثر و اكثر رغم كل هالمشاكل و المصايب حب من سبعين سنه و اكثر ولد عن طريقه ثلاثة اولاد و بنتين ولكل واحد فيهم "سلمان، سعود، متعب، حصه، الجوهرة قصة و عائلة " سلمان صاحب السته وستين سنه متزوج بنت عمه نورة و عياله ظ¢ ماجد و عبدالمجيد، سعود صاحب الاثنين و خمسين سنه تعرفون عايلته من الاحداث، متعب صاحب الاربعين سنه متوفية زوجته و عنده سند و ابرار ، حصه صاحبة الاثنين وستين سنه متزوجه قطري من اهل امها عندها ناصر و صباح و التؤام السماء و السحاب ، الجوهرة صاحبة السبعه و عشرين سنه غير متزوجه ..عايشين في قصر كبير و لكل ابن له قسم كبير عدا حصه مع زوجها

في اكبر غرف القصر

ام سلمان مسحت دموعها بجلالها واللي تعلمت اللهجة السعودية البحت من زوجها : يا محمد هذه مب حالة سعود مهب ولدي الاول مشتاق لعياله و الشوق ذبحه وانا بعد ابي اشوف احفادي قبل لا اموت

ابو سلمان 'محمد' : يا مره اتركي الولد بحاله ، واذا على عياله بالحفظ و الصون و ابشرك يقولي واحدن من اللي راسلهم يراقبون انهم تهاوشوا امس و الولد خذى اخته و راح شقته

ابتسمت ام سلمان : يا زينه من خبر يا محمد

ابو سلمان ابتسم و بانت تجاعيده اكثر : طال الزمن ولا قصر عيال سعود راجعين لبيتهم راجعين و امهم الله يحاسبها حسبي الله عليها ونعم الوكيل

ام سلمان بحزن : الله لا يسامحها مثل ما فرقتنا و فرقت سعود عن عياله دمرته و دمرت عيالهم

ابو سلمان : بعد بكره بإذن الله تناظرينهم قدامك

ام سلمان تهلل وجهها بالفرح : صدق؟ يا فرحتك ياسعود يا فرحتك

دخل باللحظة سعود بإبتسامة : فرحتي ب وشهو؟

ام سلمان بفرح : خلها مفاجأة لك يا وليدي

سعود ابتسم : والله وتطورتي يالغاليه

ام سلمان بإبتسامة : دنيا يا ولدي

ابو سلمان : وش رايكم تكشتون بالغرفة بعد؟ اقول يالله انزلوا نفطر و نتقهوى وكلن يتؤكل على شغله


سند امه سعود و نزلوا


الجوهرة بتوتر : اشوف الفرحة بوجهكم الله يديمها يالغوالي

ابو سلمان بنظرة ثاقبة : وجهك علامه يالجوهرة منتي بخالية

الجوهرة ابتسمت بتسليك : ههههه يبه حبيبي مابه شي مغير انت متوهم ولا انا ما فيني شي يبه

ابو سلمان : بسكت عنك هالسعة لكن

قاطعته الخدامه بلهجة مكسرة و خوف : مس الجوهرة همزة لحق سير سند لكن سير سند راح مطار يسوي تذكرة و يروح لسعودية رحلة ماله بعد نص ساعه

الجوهرة غمضت عيونها بفشلة سونا فضحتهم خلاص

ابو سلمان مط عيونه : وشهو !! سند وش له يروح السعودية

سلمان دخل مع الباب اللي يفصل عن قسمه : السعودية وش يابوي

ابو سلمان لف على الجوهرة : انتظر تفسيرك يالجوهرة

الجوهرة بتبرير : يبه انا اسفه اني خبيت عنك بس سند راح راح للسعودية بعد ما سمع ان ال وافي طردوا عيال اخوي سعود و جته الحمية و راح لهم يجيبهم

سعود مط عيونه بصدمة : وشهو وشهو؟ ال وافي طردوا عيال عليا طردوا عيالي ليه؟؟

ابو سلمان بعصبيه : من اللي طلب منه ان يفزع لهم و تركبه الحمية!!!!! نادوا لي على متعب يجي يلم ولده

ام سلمان بقوة : خله يا محمد خله اصلا انت بتجيبهم بعد يومين خله يجيبهم الحين

ابو سلمان بصوت عالي : متعب يا متعب متععب سونا روحي نادي متعب

هزت رأسها سونا و راحت

الجوهرة برجاء : يبه لا تكبر الامور انت اصلا كنت بتجيبهم كذا ولا كذا فخلاص هد و ريح سند راح يجيبهم و اذا عيوو يجون انت تروح وتتكلم معاهم مثل ما خططت

سعود بعصبيه مرعبة لأول مرة بعد سنين : كنتوا مخططين بعد!!! ناوين تذبحوني انتم! عيالي مابي اشوفهم مابي اشوف ملامح امهم بوجيهم ولا تجيبونهم ولا اشوف وجيههم هنا

الجوهرة بقوة : لا ياخوي لا تحرم نفسك من عيالك ولا تحرمهم منك كفاية انهم عايشين سنين بلا اب وعزوة

ام سلمان بعصبيه كملت : لا تحرم عيالك يا سعود عشان مره لا راحت ولا جت تفهم انت؟

سلمان بإبتسامة : اسالك بالله يا سعود ما اشتقت تضمهم و تشم ريحتهم ما عمرك تسائلت كيف حالهم الحين كيف اشكالهم؟

سعود بعصبيه : قلت و اعيد اكرر شوفتهم ما ابيها
طلع بعصبيه من البيت بكبره

ابو سلمان : خلوه يعاند و يبس رأسه لكن ترى بالنهاية بس يشوفهم يضعف


متعب دخل بفجعه و وراه بنته ابرار : وش فيه احد صاير له شي؟

سلمان : هد هد ما صار شي

ابو سلمان بهدوء : سند راح يجيب عيال سعود عقب ما درى انهم انطردوا خل سند يرجع و اعلمه شلون يسوي شي بدون ما يعلمني

متعب بفجعه : وشهو يا دافع البلا

ابرار بنظرة : جدي سند ما سوى الا الصحيح ال وايل ما يرضون المهانة لعيالهم و فعلة اخوي فعلة رجال

سلمان ابتسم : خذ لك يابوي بتقعد تدافع عن اخوها من اليوم لين سنه قدام

ابو سلمان : ماجد وينه ما شفته يا سلمان مغير شفت عبدالمجيد اولنا راح للشركة

سلمان بضيقة : مادري يابوي له اسبوع كل ما اقول قم معي للشركة يتعذر انه تعبان مدري وش بلاه يا يبه

ابو سلمان عقد حاجبيه بإستغراب : يا دافع البلا

متعب : خير ان شاء الله يابوي خير


…………
____________

في السعودية "الرياض"
تحديدًا بالمستشفى **

جالس على الكراسي اللي برى قدام باب غرفة عايدة ينتظر تصحى ما امداه يسكر سكر عيونه الا سمع صوت من الغرفة فز بسرعه و دخل : صحيتي

عايدة كشرت بضيق : انا ويني فيه ليه بالمستشفى

تغاضى عن تكشيرتها : اغمى عليك امس و جبتك هنا

عايدة غمضت عيونها : ابي امي دق عليها

راجح بعصبيه : ايه عشان يقولون من اول ليلة بالمستشفى لانها ما قدرت تتحمل معاشرة زوجها

عايدة مطت عيونها من كلامه و سكتت بعد ما اعطته نظرة

دخلت الدكتورة السعودية بإبتسامة : الحمدلله على السلامة يا عايدة كيفك الحين؟

عايدة عدلت حجابها : الحمدلله بس شوية ألم ببطني

الدكتورة بإبتسامة : هذا شي طبيعي حبيبتي بالفترة هذه

راجح عقد حاجبيه : كيف يعني؟

الدكتورة بإستغراب : كيف يعني'!!!! زوجتك حامل لها ثلاث اسابيع تقريباً او اقل انتم ما تدرون ولا كيف

عايدة شهقت ببكاء : ايش ؟ انا حامل !!!

تقلب وجه راجح : دكتورة انتي متأكده؟

الدكتورة استغربت اكثر : ايه متأكده اللي اعرفه اذا خبرت احد بهالخبرية الحلوة يفرح بس انتم!!!

راجح بإبتسامة مزيفة قرب من عايدة و مسك يدها : بالعكس حنا مبسوطين بس انصدمنا يعني بهالعمر و نجيب طفل ههه

الدكتورة ابتسمت: الله يسعدكم و يهنيكم و ان شاء الله تكون ذرية صالحة

طلعت بهدوء الدكتورة

…

بعدت يده عنها بقوة و بدموع : اموت ولا اولد هالولد ياولد الوافي و هالولد ما راح يلوي ذراعي انا بطلق منك بالوقت اللي اتفقنا عليه

راجح بعصبيه : على اساس ميت على ولد منك يا شيخة اموت ولا اعتبر هالولد مني و يفضل انك تجهضينه دامك بأول شهر بدون لا احد يدري

عايدة بصدمة : اجهض !!!! مستوعب اللي تقوله انت!!! هذا ما يرضي الله مستحيل اجهض

راجح : بالله!!! الولد ما راح اعترف به

عايدة بدموع رفعت اصبعها بوجهه : لا تعترف فيه احسن بعد دام ولدي بيعيش بعيد عنك و عن شرك و اعمالك القذرة احسن ع الاقل يعيش بلا نسب احسن من ان يعيش بنسب واحد حقير مثلك

راجح بعصبيه لوى اصبعها حتى تألمت : اصبعك ما ينمد بوجهي يا بنت الناس و كلامك هذا وفريه لنفسك "ابتسم بخبث" لا تخليني اخذ الولد بعد ما تولدينه واحرمك منه طول العمر

عايدة بألم : الحكومة معي و روح الله لا يســـامــحك

طالع فيها بغضب و طلع


بكت بقوة و ضربت بطنها بخفيف : ليش ليش جيت تبي تعذبني قبل حتى لا تولد اصلا حياتك ما راح تكون سعيدة ابد دامني امك و ابوك ذاك اللي ما يتسمى

نامت بين دموعها و تردد بهذيان "يارب تموت يارب"



……

__________

انتهى الى هنا البارت الثامن انتظروني يوم الخميس بزواج
المها و الكايد اخيرا "


"نهاية البارت الثامن"