[فيتامين سي]

الحلقة الثانية والعشرون


" يعني ايه الى انت بتقول ده .. انت ازاى تعمل حاجة زى ديه من غير ماتقولي "
خرجت تلك العبارة من فم "كريمة" وهي تشعر بالغضب الشديد من "مراد"
"مراد" بجدية : ممكن تهدي يا ماما لو سمحتي .. انا عملت ايه يعني
"كريمة" بعصبية : كل ده وبتقولي انا عملت ايه .. اتقدمت لواحدة من غير ماتديني خبر حتي وبتقولي انا عملت ايه
"مراد" : انتى يا ماما المفروض تتعصبي اوى كده لو لقتيني دخلك بيها وبقولك انا اتجوزتها من وراكوا .. انا معملتش حاجه غير اني روحت اتقدمتلها .. وحتي مش عارفة هي حتوافق ولا لاء
"كريمة" بدهشة : وهي حترفض ليه ان شاء الله .. هي تطول تتجوز واحد زيك
"مراد" بمزاح : ايه يا ماما انتى من اولها كده حتحسسيها انها اقل مني
"كريمة" : انا قولت حاجة يابني .. ثم أردفت بضيق : وديه عاملة ازاى بقي
"مراد" بجدية : محترمة ومؤدبة .. وهو ده الي يهمني
"كريمة" بسخرية : علي عيني وعلي راسي مؤدبة .. انا عايزة اعرف شكلها عامل ازاى
"مراد" بصرامة : برضو يا ماما الي همك الشكل .. ثم أدرف ببرود : متقلقيش حتعجبك
"كريمة" بإبتسامة : ربنا يرزقك بيها ياحبيبي بدل عجباك
"مراد" بخبث : دلؤتي ربنا يرزقك بيها .. ماهي من شوية مكنتش عجباكي .. ولا عشان عرفتي انها حلوة
ضحكت "كريمة" قائلة : اهم حاجة تبقي بنت حلال
"مراد" بجدية : ان شاء الله ادعيلي انتي بس .. صمت قليلا ثم اكمل بتردد : بس كنت حابب اقولك حاجة عنها .. عشان اول ماتشوفيها ما تتصدميش
"كريمة" بإستغراب : خير .. ايه الحاجة ديه
تنهد "مراد" قائلا بتردد : هي .. مقعدة
"كريمة" بإنفعال : ايه .. مقعدة ! .. يعني يوم ماتتجوز تتجوزلي واحدة مقعدة
"مراد" بخسرية : تتجوزلى ! .. واتجوزلك ليه .. انا متجوز لنفسي مش متجوز لحضرتك
"كريمة" بعصبية : ده مش وقت هزار يا "مراد" .. ثم أردفت بإستغراب : وايه الي عجبك في المقعده ديه بقي
"مراد" بجدية : منا قولتلك .. محترمة ومؤدبة
"كريمة" بعصبية : وهي يعني كانت الوحيدة المحترمة والمؤدبة في الدنيا ديه .. لا يا "مراد" اكيد في سبب تاني
تنهد "مراد" ببرود قائلاً : عشان انا السبب في عجزها ده .. خلاص يا ماما ارتحتي كده
نظرت له بصدمة قائلة : يعني ايه .. انت السبب ازاى
قص كلها كل ماحدث يوم الحادث ثم أنهي كلامه قائلا بجدية : وكويس ان والدها طلع راجل طيب .. غيره كان زمانه رفع عليا قضية وعملي كذا محضر و لففني فى المحاكم والاقسام
"كريمة" بحزن : انا مكنش قلبي مستريح اليوم ده .. وكنت حاسه ان اخوك مخبي عليا حاجة .. ثم أردفت بضيق : بس انت يبني متجوزها عشان انت الي تخدمها ولا هي الي تخدمك
"مراد" بإستغراب : تخدمني ! .. وهو الواحد بيتجوز عشان يخلي مراته خدامة مثلا
"كريمة" بضيق : مش قصدي يا "مراد" .. انا قصدي يعني ازاى حتعرف تهتم بيك وبتها وهي عاجزة
"مراد" بجدية : ان شاء الله حتعمل عملية وحتبقي كويسة
"كريمة" بإستغراب : عملية ايه ديه
"مراد" : عملية حتعملها عشان ترجع تمشي تاني على رجليها
"كريمة" بتساؤل : وانت بقي حتتجوزها عشان تخلص ضميرك من الذنب ده ولا عشان بتحبها
فكر قليلاً ثم قال بجدية : الاتنين
تنهدت "كريمة" بضيق ثم ربتت علي كتف "مراد" قائلة بجدية : ربنا يقدم الي في الخير
أبتسم "مراد" ثم أنحنى يقبل يدها قائلاً : ادعيلي انتي بس
***
مرت المدة التى حددها "مراد" "لقمر" بسرعة
امدتها "قمر" في التفكير و صلاة الاستخارة فقط
كانت تخاف ان تتسرع في قرارها فتندمت
***
كانت جالسة في مكتبها بشرود هل تتصل بيه الان .. هل تخبره على قرارها .. ام ستندم ؟
تنهدت بضيق قائلة بخفوت : يارب متخلنيش اندم ابدا
ثم جذبت حقيبتها وأخرجت هاتفها
ظلت تعبث في هاتفها حتي وجدت رقم "مراد"
ترددت قليلة هل تتصل به ام لا
ظلت تفكر ثم سمت الله وضغط اتصال
ظلت منتظرة رده ولكن لم يُجيب
كررت اتصالها مرة اخرى وهي تقول في نفسها " لو مردش المرة ديه مش حتصل بيه تاني"
بعد ثواني قليلة سمعته صوته الرجولي وهو يقول : السلام عليكم
"قمر" بخجل : وعليكم السلام
أبتسم وهو يقول : أيوة يا آنسة "قمر" .. اخبارك ايه
"قمر" : الحمدلله كويسة
"مراد" بجدية : دايما يارب .. فكرتي اكيد
"قمر" بخجل : اه فكرت
"مراد" بحماس : خير ان شاء الله .. ها قولتي ايه
تنهدت قائلا بجدية : بص يا استاذ "مراد" .. انا الاول حابة اتفق معاك علي حاجة .. عشان لو بالفرض وفقت يبقي تعملها ان شاء الله
"مراد" بدهشة : لو بالفرض وقفتي ! .. ثم أردف ساخرا : معني كده انك بتتصلي بيا عشان اساعدك في انك تاخدي قرارك ولا ايه مش فاهم
تنهدت بضيق ثم قالت ببرود : ممكن تسمعني بس الاول
"مراد" بجدية : اتفضلي
"قمر" : ان شاء الله لو حصل حاجة مابينا فانا مش عايزة يكون في فرح .. عايزاه كتب كتاب بس وكمان محدش يحضره
تفاجئ من طلبها .. فقد كان يتصور ان يكون فرح كبير في قاعة فاخمة يحضره جميع اهلها واصدقائها
صمت قليلا ثم قال بتساؤل : ممكن اعرف ايه سبب طلبك ده .. اصلها حاجة غريبة بصراحه
"قمر" بجدية : لا مش حاجه غريبة ولا حاجة .. بس انا مش حابة اعمل فرح وانا بحالتي ديه .. مش عايزة في فرحي بدل متكون الناس فرحان عشاني لا زعلانين على حالتي ديه
"مراد" بجدية : ربنا يسهل في الموضوع ده .. ثم اردف متسائلاً : في حاجة تانية حابة توضحيها
"قمر" بجدية : لا خلاص الي كنت حابة اقوله قولته
"مراد" بجدية : طيب كويس .. ثم اردف بتساؤل : ممكن بقي اعرف ردك ايه
"قمر" بإرتباك : يعني بعد كل ده المفروض تكون فهمت ردي
"مراد" بخبث : فهمت اه .. بس عايزة اعرف ردك منك انتي
"قمر" بإرتباك : لو سمحت يا أستاذ "مراد" انا عندي شغل كتير
ضحك قائلاً : ماشي اهربي برحتك .. ثم أردف بجدية : حابة الفرح يبقي امتي
"قمر" : الي تحبه
فكر قليلاً ثم قال بتساؤل : ايه رأيك كمان شهر
"قمر" بدهشة : شهر .. لا طبعا فترة قليلة
-------