( جوازة بالتدبيس )
بقلم / حسناء محمود
الحلقة الاخيرة
* الجزء التانى *
فى مول مشهور
ياسر بعصبيه : بس انتى ماقولتيش ان هيبقى فى شاب معاكى
سلمى : معلش ياياسر انا اسفه
ياسر : برده مفهمتش كان ايه لازمته
سلمى بحزن : المشكله انى مش هعرف افهمك كدا هاضطر احكى
سالى : خلاص يا دكتور ياسر عندى انا المره دى
ياسر : لا عندك ولا عندها كله عشان خاطر مصطفى ومها بس
سالى : ايه دا وانا ماليش خاطر دا انت شرير متتخطبيش ليه يابت
ياسر : ههههههه لا كلكوا ليكوا خاطر بس يلا عشان نشوف الفستان قبل ما الحاج يتصل يقولى خطفت البت
،،،،،،،،،،،،،،،،،،،
فاتت ايام كتير ومفيش جديد فى الموضوع
ويوم الخطوبه
فـى التليفون
سلمى بزعل : يعنى مش هتيجى معايا الكوافير يا مها
مها : معلش ياسلمى بلاش اانا
سلمى : يوووه يعنى مش هتيجى الخطوبه كمان ؟
مها : لا ازاى هاجى طبعا بس قوليلى وجاوبى بامانه يا سلمى
مصطفى هييجى ؟
سلمى : والله معرفش يامها عشان ماابقاش كدابه بس حتى لو جه احنا مالنا ياستى مش هاحكم على ياسر مايجيبش صاحبه
مها بتردد : طيب ياحبيبتى ربنا يتمملك ع خير اشوفك هناك
سلمى : ماشى ياستى وماله
و بــالـلـــيل
لبست مها فستان طوويل لونه اسود فى فضى
وعليه طرحه عاديه لونها فضى
وراحت مع امها وخالتها للقاعه اللى فيها الخطوبه
وبعد ما دخلوا بشويه دخلت العروسه
وكانت لابسه فستان ازرق وداخل فيه فصوص فضى
والعريس بدله فضى وكرافت ازرق
الام : ما شاء الله زى القمر
مها : اه سلمى طول عمرها قمر
وبعد تقاليد الخطوبه العاديه
وفى نص الحفله قامت مها عشان تقف جنب سلمى
مها : الله اكبر ايه القمر دا
سلمى : بجد ياميهو ؟
مها : بجد ياحبيبتى ربنا يحميكى
الف مبروك يا ياسر ربنا يتمملكوا على خير
وسابتهم مها ودخلت بلكونه فى القاعه
وسرحت شويه
مها ( ياارب انا تعبانه اوى ومنكده على كل اللى حواليا يارب حلها من عندك انت اللى عالم )
ومن غير ما تحس قالت بصوت عالى : يااارب
فجأه سمعت صوت من وراها
: يارب ايه ؟
ضربات قلب سريعه نفس داخل طالع بسرعه كأنها بتجرى كيلو
رعشه ف الجسم
انا عارفه الصوت دا مش غريب عليا !
لفت مها بسرعه
مها بصدمه : مصطفى !
مصطفى بابتسامه : شايفه حد غيرى هنا
سكتت مها من الصدمه ماعرفتش ترد
مصطفى : وحشتينى !
مها باستغراب : نعم !
مصطفى بهزار : ايه يا مها مابقيتيش تسمعى ولا ايه بقول وحشتينى
مها بعصبيه : انت جاى تهزر بعد شهر وبكل سهوله تقولى وحشتينى ! ميوحشكش وحش يادكتور مصطفى بعد اذنك
مصطفى ومسك ايدها بسرعه : رايحه فين استنى
مها : لو سمحت اياك تلمسنى تانى انت مش محلل ليا عشان تلمسنى
مصطفى : امممم بسيطه ابقى محلل
وخد نفس طويل وقال :
مها انا رديتك لعصمتى
ومسكها من ايديها تانى
مها بذهول : انت انت ازاى تعمل كدا
مصطفى : انا حر فى مراتى
مها : انت فاكر نفسك مين لعبه فى ايديك ترمينى وتاخدنى وقت ما انت عايز
وشالت ايديه بعصبيه
اوعى كدا لو مطلقتنيش هرفع عليك قضيه
مصطفى : ترفعى على حبيبك قضيه !
مها : حبيبى ميييييييين انا باكرهك اوعى كدا سبنى
رجع شدها بس المره دى بره البلكونه فى القاعه
وبصوت واطى : امشى كويس قدام الناس عشان بيبصوا علينا
مها : هاصوت والم الناس اللى بيبصوا دول عليك
مصطفى : وتضيعى فرحة صاحبتك ؟ امشى امشى خلينا نطلع بره فى الهدوء
واستسلمت مها وخرجوا بره القاعه
ووقف قدام العربيه
مصطفى : ادخلى
مها : مش هادخل سيبنى بقى
مصطفى ودخلها غصب : لما جوزك يقولك ادخلى يبقى تدخلى
وركب العربيه وقفل ابوابها
مها بعصبيه : انت ايه يااخى بجد مشوفتش فى برودك عايز منى ايه
مصطفى : اممممم بغض النظر عن الشتيمه عايزك
مها : ههههههههههه لا بجد ؟ ضحكتنى دلوقتى عايزنى ؟ ايه مش كنت وحشه وخاينه وكل الحاجات دى
مصطفى : طيب هتهدى وتسمعى ؟
مها : مش عايزه اسمع منك حاجه
مصطفى : لا اسمعى وليكى القرار بعد كدا ولو الكلام معجبكيش هطلقك ومش هرجعك تانى
مها : اتفضل يامصطفى عايز ايه
مصطفى : بصى يا مها احنا الاتنين غلطنا
انتى غلطتى لما عملتى اللى عملتيه وانا غلط لما مسمعتكيش
مها : بمعنى ؟
مصطفى : لو سمحتى اسمعى للاخر
مها : اتفضل
مصطفى : بعد ما شفت الصور وسمعت بودنى المكالمه كنت عامل زى المجنون ماكنتش عارف افكر اى حد مكانى كان هيبقى كدا
طلعت اللى فيا فيكى من غير ما افكر او اقرر او حتى اسيبلك فرصه تدافعى ماكنش عندى استعداد اسمع
بعد ما نزلتى بصيت ف الصور تانى وركزت لقيت اللى انتى معاه دا محمد اللى يسرا السكرتيره قالت عليه خاطبها
طبعا انا شكيت فيهم وخصوصا ان يسرا دى ماكانتش مظبوطه معايا
وسألتها عليه قالت انهم فسخوا الخطوبه ودا شككنى اكتر فيها
ولما خرجت من المكتب كان فيه قلم وقع منى وانا بامضى اوراق ولما نزلت اجيبه لقيت جهاز تصنت تحت المكتب ماكنتش شايفه
مها باستغراب : جهاز تصنت !
مصطفى : اه والله
وبعدها بدأت الصوره توضح ليا اول باول
وقررت انى اتأكد وشديت مع ياسر وقولتله اننا اطلقنا وانى مسافر
وبعدها خرجت ورا يسرا وعشان ربنا رايد انها تنكشف الغبيه راحت بيت محمد واللى سألت بعد كدا وعرفت انه بيته
مها : وبعدين ؟
مصطفى : وبعدين روحت ع مبرمج كمبيوتر وبيفهم ف الفوتوشوب واكدلى ان الصور ملعوب فيها
وساعتها فهمت كل حاجه
بس النقطه اللى ماكانتش واضحه عندى انتى ازاى عرفتيه وازاى قولتلى ان دا فعلا صوتك فى المكالمه
ولما مقدرتش اوصل قررت انتقم من محمد
وبلغت عنه ناس حبايبى واتاخد قضيه اعمال مشبوهه
ويسرا صبرت عليها لما صفقات الشركه خلصت وخليتها تعترف بكل حاجه واترجتنى اسيبها وطردتها عشان ماتطلعش اسرارنا بره وسبتها لربنا عشان ماابقاش فضحت واحده
مها : والمطلوب منى دلوقتى تعرف علاقتى بمحمد
مصطفى قاطعها : لا ياستى انا لما خلصت كل دا ورجعت تانى الشركه من اسبوع جاتلى سلمى وزميلكوا محمود وحكوا الموضوع ع اساس انى معرفش حاجه ويأكدوا انك مظلومه
مها باستغراب : سلمى عملت كدا !
مصطفى : ايوه وانا عملت نفسى مش موافق قدامها ولما مشيت كلمت محمود وفهمته كل حاجه وشكرته كمان
وبس ياستى ادينى جتلك
وبقولك انا بحبك ومسامحك وعايزك تفضلى مراتى ام ولادى
وليكى القرار
مها : قبل اى حاجه لازم اشرحلك علاقتى بمحمد
مصطفى : من غير ما تقولى انا كلمت سلمى وفهمتنى اكتر وعارف انك غلطتى بدون قصد وصدقينى مش عايز اسمع دلوقتى اكتر من قرارك
موافقه نرجع يامها
مها برخامه : افكر
مصطفى : هههههههه يابت انتى تطولى
مها بدموع : مصطفى انت مسامحنى ؟
مصطفى : اهم حاجه انتى اللى تسامحينى يامها
مها : مسامحاك
وخدها فى حضنه
مصطفى : بحبك اوى والله
مها : وانا كمان
مصطفى : طيب يلا بينا نفرح ماما واردك قدام كل الناس
،،،،،،،،،،،،،،،،
وبعد 3 سنين
مصطفى : يامهااااااااااااااا يا مهااااااااااااا
مها : ايه يامصطفى بتنادينى من تانى بلد
مصطفى : خدى بنتك جننتنى
مها : هههههههههه احسن اشرب شويه يا استاذ
وبصت لبنتها ( لجين ) : براحتك ياقلبى طلعى عين بابى
مصطفى : ههههههه بقى كدا ماشى بتعملى ايه ياختى وشاغلك عنى
مها : ابدا ياسيدى باكتب روايه تلخص كل حاجه حصلت فى حياتى عشان البنات تستفاد منها وتبطل تمشى ورا عواطفها من غير ما تتأكد
مصطفى بابتسامه : ربنا يباركلى فيكى
مها : ويباركلى فيكوا ياحبيبى
،،،،،،،،،،،،،،،،،،،
نروح لبقيه ابطالنا
ياسر وسلمى اتجوزوا وربنا رزقهم بأدم
ميار اخت مصطفى _ خلفت توأم سمتهم مها ومصطفى
سالى _ ربنا رزقها بساره وعمر
،،،،،،،،،،،،،،،،،،،،،،،،، ،،،،
وتوته توته خلصت الحدوته
يارب تبقى حلوه واكون عند حسن ظنكوا
وياريت اكون قدرت افيدكوا والرساله تبقى وصلت
تمت بحمد الله ،،،،،،،،،،،،
|