[كاردينيا الغوازي]

المشاركة الأصلية كتبت بواسطة فاطمة كرم

الفصل الخامس

فصل خانق جدا
رباب بتقابل ضعفها تجاه عبد الرحمن بعنف رهيب , بتعرف تردعه من الاقتراب بمنتهى البساطة لما تفكره انها رفضته, عنيفة جدا بقدر ما هي ضعيفة جدا تجاهه ومش قادرة ألومها لأن مشهد تذكرها لوالدهم وهو بيدلل والدتهم بشكل استثنائي فظيع , بقدر ما كانوا مبهورين به كرمز كبير وأمان وبيت أصله عمره ما يتزعزع هو هد كل ده بنزوة طائشة قبل وفاته
مش قادرة أتخيل حالته لو رجع ولو ليوم واحد وشاف هو بتصرفه الأرعن هد تعب عمره كله كسر قلوب بناته كلهم قبل زوجته
دلوقتي عبد الرحمن بيكيدها بزواجه وناوي يسكن في بيت والده عشان فقط تشوفه وهو مع غيرها وأطفاله اللي من غيرها حواليه .. دائما لما نمشي ورا مشاعرنا وننسى عقلنا في أغلب الأوقات بنتورط ورطات نندم عليها كثير
عبد الرحمن مش حاطط رانية في حساباته أصلا هو بيعاند رباب فقط وهو مش عارف ان صحيح هي هتعيط بس يمكن هترتاح لأن هي عايزة تعيش في الحالة اللي فرضتها على نفسها الحالة دي كان هو الوحيد اللي بيقدر يهددها لأنه بيضعفها بمشاعرها تجاهه ما سوى ذلك سواء بالنسبة لها هتعيط يومين وتزود نشاطها في الشغل وتستمر في حياتها مع عائلتها وشغلها تحت شعار لا للعاطفة , فعلا مأساة

حسناء بصراحة يا حسناء يا أختي أنا مش بلعاكي نهائيا .. قال أجيبلك سكن لا مقبلش صدقة لازم اتجوزك يا سيييييييييدي ايه يا أختي ده يا أختي واشمعنى رضا بالذات .. لا والحي كله رعاع وقطاع طرق وحشاشين وسكارى وتقوليله انك عايشة فيه زي السمك متعرفش تخرج من المياه طيب يا ست سردينة هانم أهو جالك البلطجي اللي كنت عايشة في ضله في أمان ايه لزمتها بقى دخيلك يا سيدي رضا ها ؟ ما تتجوزي البلطجي وتبقي بلطجية هانم ما الحارة عجباكي لا هتروحي تجري دلوقتي وتقوليله تحسين رجع اهيء ومخوفني ومفيش حل الا انك تتجوزني عشان يحل عني ما تتلمي يا ولية وقولي بصريح العبارة انك طمعانة في رضا كرجل ... عينك قوية يخرب بيتك أوعي تفتكري حبة الرعشة دي هتخيل عليا اتظبطي يا بت بضهر ايدي على خلقتك قال حشمة قال عشنا وشفنا

نيجي بقى لجوري واضح ان صاحب المطبعة معجب بيها أي نعم ملجم اعجابه وبيكلله بالاحترام بس هو بيظهره على أي حال .. أم مهند دي انسانة عجيبة المهم اللي بوظت ابنها بدلعها الخايب فيها ودلوقتي بقى شحط ومعدي الثلاثينات ومش عارف يستقر على حال وبتلوم جوري ما هي ضحيتك يا طنط موكوسة هانم يا شوية أمهات فشلة تربوا وحوش وتبلوا بنات الناس بيهم وفي الاخر تلومها هي , داري على خيبتك واسكتي والله انا منتظرة صاعقة جوري بصبر نافذ تقع على دماغكم واحد واحد يا عيلة منيلة

تعرفي يا خلود بما اني انهارده في مزاج متعكر بسبب عبد الرحمن ورباب بسبب غباء اصرارك على تزويج حذيفة نفسي يتهف ويعملها عشان أنا مش بحب الاغبياء بصراحة وبكره الخنوع .. يعني فوقي بقى من دور الخدامة ده انت زوجته وربيتي بنته ومدرسة قد الدنيا بلاش سياسة الانبطاح دي قدام حماتك كانها احسنت عليكِ عشان مكرهكيش وللعلم بدأت أكرهك يالا بشرى سارة

رضا وآسيا بصوا أنا هقولكم حاسه باحساسكم المريع بسبب عبد الرحمن ورباب سيبوهم يخلصوا التجربة لنهايتها , أصل لما بنصدرلهم أرائنا بصفتنا الأكبر بيحسوا بالحصار واننا عايزين نفرض عليهم نمط حياة على مزاجنا .. هما هيوصلوا لنفس النتيجة بس لما يشوفوها بعينيهم مش من خلال نصيحة

شكرا يا كاري بجد على الفصل اللي عمل فيا ده كله نردهالك في الافراح يا توأمتي وانتِ فاهمة والأيام بيننا اهيء
في أمان الله

ربنا يخليكي لي يا توأمتي