[فيتامين سي]

البارت ال٢٥


بيت عمي بو حمد


مريوم : ها حصوه ما رد عليج ! اخاف استوى فيه شي والله
حصه : صبري مريوم نحن ما نعرف هو وين بالضبط ، خل اميه تقوم وبترد علينا وبعد انتي ما تعرفينه ريلج كيف رقاده ثقيل ، اكيد راقد وين بيسير يعني ؟
مريوم : وانتي شو دراج انه راقد ها ! هو قال بيي وبنسير بيت هلج وبنبات هناك واليوم طيارتنا لكنه مختفي ، انا للحين حتى هب راقده احاتيه ، دخيلج ردي اتصلي ف سعود ولا ف اي حد
ام حمد : بلاكم اميه شو صاير !
حصه : لا عموه ماشي بس قلنا بنسير بيت هلي لانه سالم رقد من التعب هناك وماحس بعمره ومريوم تبا تشوف اميه بالمره ، ف بناخذ تكسي لانه ...
حمد ينزل من فوق : ماله داعي التكاسي ، يالله قومن بوديكن بس سويلي حصه كوفي قبل عسب اصحصح
ام حمد : يوم بترد من الدوام اشتر لنا غدا ، متعايزه اطبخ ، اخ ي مهره شو سويتي فينا
مريوم : هيه والله اميه فضحتنا عند يدي وقوم عمي ، ليش اميه ما اتييبونها هنا احسن
حمد : وهذا شوري انا بعد ، البارحه كذبت ع ابويه وقلتله سرت اشوفها بس الصراحه ما كان لي ويه احدر بيت عمي عقب اللي سوته
ام حمد : الشور شور يدكم ولا انا ما ودي اخليها هناك دقيقه
حصه تييب الكوفي : انزين عادي عموه ، خلي عمي يرمس يدي وبيرضى ان شاء الله

،،،

الكافيه

سالم : احينه ماقدر أرد عليها عسب تتحرانيه راقد ، يالله كيف مستوي رقادي ثقيل اف
عواس ينازعه : وانت شو مودنك هناك عندها وانت معرس ، خاطريه أدفنك حي والله ، ياربيه منك
سالم : ساير اشوف بنتي ، ها سفر والواحد ما يضمن عمره ( ويرن فونه ) هذيه اتصلت ، شسوي عواس
عواس : عادي انزين رد عليها ، اكيد مسكينه تحاتيك
سالم : هلا حبيبي ، هيه سامحيني رقدت والله ف حضن اميه بدون ماحس ، آسف خوفتج علي ، وين يايه ! لا تمي ، انا الحين برع عند عواس وبمر عليج ، وين ! بيت عمي عبدالله ! اوك نتلاقى هناك ، فداعة الله
عواس يقوم : يالله سير لها ونا بتوكل ع الدوام ( ويسلم عليه ) تسيرون وتردون بالسلامه ي الغالي
سالم : ما اوصيك ف بنتي وامها ، مالهم غيرك ، ع الاقل شوفهم اذا احتايو شي
عواس بضيق : ان شاء الله ، ف عيوني

،،،،،

بيت ام عبود


بو وديمه : والله ي عمي ما نعرف وينه ؟! تحريته رجع البيت لانه ولدي محد مسافر
يدي : سير ازقرلي حرمتك
ام عبود تنزل صينية الفواله : آمر ي عمي
يدي : لا تقصين شي ي بنتي ، خيركم سابق ، الحين هزاع وين ؟
ام عبود : هزاع ! مدريبه فديتك ، اللي اعرفه سار يوصل ولدي المطار هو وربيعهم حمود
ابويه : يالله ابوي خلنا نسير ، تلاقيه ياي ف الطريق ، انا بتصلبه الحين
بو وديمه : انزين استريحو تغدو عندنا
يدي يقوم : مشكور ي ولدي ما تقصر ، السموحه منكم غثيناكم من صباح الله
ام عبود : لا تقول جي الوالد ، البيت بيتكم وتنورونا اي وقت
بو وديمه : ربي يحفظكم ( ويسكر الباب ) هزاع وينه ؟
ام عبود : والله اروحي ماعرف حالي حالك ، تراهم قالو بيتصلون به
بو وديمه : تحريتج تعرفين وما تبين تقولين لهم ، تراهم اهلنا بعد الحين ولازم ما نرضى لهم بالأذيه

،،،،،

لندن

وديمه : شفيك بلال ! والله انه يعرف اني مسافره بس يتحرانيه حول العالم ، ما يعرف اني بستقر هنا
بلال : احس فيه شي يالسه تخططين له من وراه ، عن يكون بتسوين له حفلة ميلاد هنا
وديمه : ههههه لا ، عقب بخبرك ليش مستعيل ، يالله انا بسير ارقد ، حدي منتهيه ، ولا تنسى تنتبه لفونك عسب اخويه اوك
بلال : ان شاء الله لا تحاتين
زهره تحدر : وديمه ! الحمدلله ع السلامه ، تو ما نورت لندن
وديمه تحضنها : النور نورج زهوره ، شحالج وحشتيني ي عسل
زهوره : ايم فاين بيبي هههه ، من قالي باباه بتين لندن وايد استانست ، عيل بنت خالتج وين
وديمه : راقده ونا شكلي بلحقها ههه ، بلال شسمه ...
بلال : لا توصين حريص ، خبرت الكل ومحد بيخبره ، انتي سيري ارتاحي وحطي ف بطنج بطيخه صيفي هههه
زهوره تغمز لها : هيه لا تخافين ههه

،،،،،،

ف الطياره


انا : شفيك !!! هاي ثالث مره تسير الحمام
عبود بألم : آخ مدري ، بطني وايد يعورنيه
انا : عن يكون عاطينك لحم خنزير هههههه
عبود شوي وبيصفعني : لو هب الألم جان أدبتك ( وفجأه يصارخ ) ااااه هزاع الحق علي
انا بخوف : عبود شفيك عبوووود ( وازقر ع المضيفة ) ساعدوني
آرثر : انا طبيب لا تقلق سأتولى الأمر ( ويرمس عبود ) أين مكان الألم ؟
عبود : آخ هنا
آرثر : يبدو انك لم تتقبل أكله معينة ، لا تقلق ، أيتها المضيفة احضري له زبادي من فضلك
انا : ولما الزبادي ؟
آرثر : انه مفيد في القضاء على أي شي مضر ( ويسلم علي ) انا آرثر بريطاني مسلم
انا اسلم عليه : مسلم !
آرثر : نعم ف لقد أسلمت قبل عشرة ايام في الامارات والآن اعود الى لندن لأدعو أمي الى الاسلام وأدعو من الله ان يهديها ف لقد وجدت الراحة بعد ان اسلمت
عبود ياكل الروب : آمين ( ويسلم عليه ) انا اسمي عبدالله
آرثر : انه من أحب الأسماء الي واتمنى ان احول اسمي لعبدالله ههه ، هل أنتما ذاهبان للسياحة ؟
انا : لا ف نحن ذاهبان لرؤية زوجتي المستقبليه هههه
عبود : اختي طبعا ههه
آرثر : إذاً اختك تسكن في لندن ، اعتقدت انك ستتزوج من بريطانيه
انا : لا لا هههه ( و ف نفسي ) ماشي احلى من بنات البلاد

،،،،،،

بيتنا

اميه : كيف يعني !! ولدي وين ؟؟؟
ابويه : انا شاك انه مسافر ، سواها ترا قبل
يدوه : ياربيه من زعل الأولاد راسهم يابس
مريوم وحصه يحدرون : السلام عليكم
يدي : وعليكم السلام ، هلا بعروستنا
حصه : ايوا يعني انا مالي وجود الحين هههه
شموه : ونحن نقدر نعيش بدونج هههههه
شهود تطنز : ليش هوا ونا مدري
حصه : افا شهوده الدووبه دواج عقب هههه ، شحالك عمي ان شاء الله بخير
ابويه : بخير الغاليه ، جان يايين لمهره هي فوق
مريوم : هيه عمي وقلت بسلم عليكم بعد قبل السفر ، يالله عيل من رخصتكم
شواخه : وانتي بعد حصوصه تعالي خلنا نسير فوق
اميه : سيري اول شي المطبخ وشلي ريوق لمهره
يدي : والحين وش السوات ويا ولدك ، شٓيبلي راسي
ابويه : فديت راسك ابويه ههه ، وين بيسير يعني ؟ مصيره يرد

ف حجرة البنات

مهروه : مريوم !!! ( وتركض تحضنها وتصيح ) لا تخليني اختيه هنا الله يخليج
مريوم : اشش خلاص لا تصيحين ، سيري زهبي ثيابج
شموه : وين تاخذينها ! يدي بيعصب
حصه : بيعصب شوي وعقب خلاص ، عيل شو بتم تسوي هنا ؟ تتعذب ع الفاضي !

،،،،،

بيت عمي المرحوم


ام سالم : ووين ناويين تسافرون ان شاء الله
سالم : ماليزيا اميه
موزوه : ناس تسافر وناس ف البيت
سعود يضربها ع راسها : معاريس شو تبين فيهم ي النشبه
موزوه : والله يوم بتعرس بخبر شواخه عسب اسير وياكم بتشوف بعد
سعود : ف المشمش هههههه
سالم : ما عليه موزوه ، ف اجازة المدارس برتب لكم سفره ان شاء الله ( ويرن فونه ) هلا مريوم ، الحين بيي ، بلاج شو فيها مهره !!!
موزوه : ياربيه ، انا ابا افهم هاي متى بنسلم منها وبتفكنا من شرها
سعود يعصب عليها : انجبي ي الحماره بتسمعج ، عسى ما شر سلوم شفيها مهروه ؟!
سالم : اونه تبا ترجع بيتها ويدي هب راضي ! شسالفه اميه !! انا هب فاهم
ام سالم : ويييه انت ما تدري عنها واعلي عنك ، سوت علوم فيهم حسبي الله ع ابليسها

،،،،

لندن

انا اسلم ع آرثر : لقد سعدت بمعرفتك ، هل يمكنني الحصول على رقمك ؟
آرثر : بالتأكيد ، تفضل ، الى اللقاء
عبود : الى اللقاء ، خل اتصل ف ودوم
بلال : الحمدلله ع السلامه طال عمرك ، هات الجنط عنك
انا : طال عمرك اونه ههههه
عبود : هزاعوه جب ، انت غلطان ي اخوي ههه شكلك مشبه علي
بلال يرويه الفون : هب هاي صورتك طال عمرك واسمك عبدالله سلطان ال...
انا مستغرب : هيه هو هذا !
عبود : انت امنو !
بلال ياخذ الجنط : انا اشتغل عند الوالد طال عمرك
( وركبنا الموتر وشفنا جمال لندن ومبانيها وشوارعها وعبود منبهر فيها ، ونا أفكر ف هلي ، ي ترا يدورون علي ؟ ولا هب هامنهم ! اشتقت لهم وايد بس الله كريم )
عبود : حووو شفيك ! من متى ازقرك ، يالله انزل وصلنا
انا : مسرع هههه ، اوه شحلاته بيتكم ، والله ابوك طلع شي شي هههه
عبود : هيه انزين ، مع انه قبل كان ريال عادي ، ما شاء الله كوّن نفسه بنفسه
ام زهره : اهلًا وسهلا نورتو البيت
بلال : هاي حرمتيه ام زهره
زهره : ونا زهره ، الحمدلله ع سلامتكم ، اكيد انت عبدالله صح
انا : لا انا هزاع
ام زهره : بسج اميه سوالف ، خليهم يرتاحون ، دقايق وبييب لكم شي تاكلونه
بلال : تفضل طال عمرك هذا فونك اللي بتستخدمه هنا مع رقم خاص وهذي البطاقة فيها أرقامي لو احتجت اي شي
عبود يقرا اسمه ع البطاقة : عاشت الأسامي بلال بس ازقرني باسمي لو سمحت بدون طال عمرك ههه
زهره تيلس صوبنا : غريبه وديمه ما قالت بيي وياك حد ، شكلكم وايد ويا بعض
انا ف نفسي : ( شو تبا هالنشبه بعد ) ليش ارجع البلاد يعني !
عبود : هيه ها صديق الطفوله ، عيل الديم وين ؟!
منى تحدر من فوق : دودو نايمه ، الحمدلله على سلامتكم ، ليش ما جبتو حمود معاكم ؟
انا : ليش حلاوه هي ، بناخذ الكل هههه ، شحالج
منى : هههه ايه حلاوه ، تمام ، كيف كانت رحلتكم
عبود : افف لا تذكريني ههههه

،،،،،

ف بيتنا

يدوه : ها آخر زمن انتو الصغاريه تعصون أوامر يدكم
حصه : يدوه نحن ما عصيناه والله بس حرام تقعد جي ف بيتكم وتتعذب
ابويه : جب ولا كلمه ، تراددين بعد
سالم : سكتي ي حصه ، السموحه عمي ، والبنت بنتكم ، سامحنا يدي ، حقك علي ، يالله بنسير
مهروه تصيح : لاااا مابا اتم ، الله يخليك يدي خلني اسير ابوس ايدينك اااه
يدي يمسح ع شعرها : سيري فوق ي مهره ، وانت ي سالم سير الحق ع طيارتك
حصه تقوم وبضيق : السموحه منكم ، فداعة الله
اميه : ربي يحفظكم ، اخ ي ولدي ( وتصيح )
منصور : اميه لا تصيحين انا باجر بسير ادور عليه
يدي : باجر سير اسأل عنه ف الشرطه ابا اعرف سافر ولا لا
ابويه : ان شاء الله ، سيري شموه حطي العشا

،،،،،

بيت عمي المرحوم


مريوم : شوووه ! انت اكيد تستهبل
سالم : لا ما استهبل والله طارت عنا ، بس ما عليه بشوف باجر اذا شي حجز الصبح ، انا بظهر شوي وبرد انزين
موزوه : عيل مر ماك واشترا لنا يوعانين صح سعود
سعود : والله انتي اروحج اللي ما تشبعين اكل هههه
ام سالم : خلها تاكل يمكن تمتن شوي ، غاديه هيكل عظمي
مريوم : وين بتسير !
سالم : بسير اشوف بنتي قبل السفر
مريوم توقف : ريولي ع ريولك ، ما بتسير اروحك
سعود : كفو حرمة اخوي ههههه
حصه : انا بعد ودني بيتنا ، اف والله اني مضايقه لانه عمي قالي جب
ام سالم : تستاهلين ، عيل تراددين الكبار وانتي حرمه عوده ام عيال
سالم : ما عليه اميه لا تزيدينها ، هي عرفت غلطها ، شسمه يالله خلنا نسير وانتي مريم تمي باجر بسير لها احسن ، احين فليل يمكن راقدين

،،،،،

بيت ام عبود

بو وديمه : وانت كيف تاخذه وياك ها ! بس ما عليه دواك عقب ، احين شقول لاهله ها خبرني ، يالله ما عليه تحملو بعماركم ، مع السلامه
ام عبود : جان عطيتني ارمسه
بو وديمه : انتي اروحج تعبانه ، خف الصداع عنج ؟
ام عبود : لا والله بعده ، حتى قابظتني لوعه ، احس اني برجع ( وفجآه تركض تكرمون الحمام وترجع )

،
،


ادري وايد اتآخر بس السموحه ،