[لامارا]

الحلقة التاسعة والأربعون


امضت سيرين اليوم برفقه زوجها وعائلته وحضرت سهيله فى المساء برفقه زوجها هى الاخرى
كانت سيرين متعبه للغايه فقد شعرت ان اليوم قد كان طويلا للغايه وملت من كثره الاحاديث
والاكثر مللا مراقبه سهيله لها فقد خشيت ان توقع بزوجها
فكرت سيرين ان سهيله انسانه حمقاء بالفعل وتعجبت كيف تكون الابنه بهذا التفكير وتلك العقليه وامها بهذا العقل المتفتح والطبيعه السمحه الخلوقه
توجهت سيرين الى المطبخ لمساعده الام التى لم تهنأ ولم تجلس لبرهه واحده منذ عوده زوجها الى المنزل فقد انشغلت باعداد الاطايب والمؤكلات اللذيذه فرحه بعودته
سيرين: اساعدك فى حاجه انتى واقفه من الصبح
مديحه: لاء انا خلصت خلاص هدخل بس المواعين الغساله واجى ااقعد
سيرين: طيب سيبينى انا ادخلهم
مديحه: لا يا حبيبتى روحى ااقعدى انتى
سيرين: بالله عليكى تسيبينى اعملهم
مديحه: طيب ليه بس تحلفى
سيرين: انا حلفت خلاص ولا عيزانى اصوم 3 ايام
نظرت لها الام بامتنان وقالت طيب بس لو تعبتى سيبيهم
سيرين: ماتخافيش عليا
انصرفت مديحه تاركه سيرين تنهى عملها الذى تطوعت له بعد قليل رن هاتف سيرين فأحضره لها سيف قائلا: موبايلك بيرن
انتبهت سيرين فى الحال وقالت: شكرا
كانت المتصله منى صديقتها ولكنها لم ترغب فى محادثتها فالوقت غير مناسب للقيل والقال خاصه فى وجود سيف
سيف: ايه مش هتردى
سيرين: لاء دى واحده صحبتى وعايزه ترغى طبعا وانا مافييش دماغ
سيف: ولا مش عايزه تردى وانا واقف عامه انا طالع
سيرين: ليه بتقول كده؟
سيف: لانها الحقيقه لانك مصره تبعدينى عن حياتك وطالبه الطلاق عموما براحتك انا قولتهالك قبل كده انا مش هجبرك على حاجه
تركها سيف وخرج وعندها ذرفت سيرين دموعها الحبيسه
شعرت بضروره التحدث الى صديقتها فهى تحتاج لسماع صوت ما علها تستطيع بث بعضا من احزانها اليها
ولكن ليس الان فالوقت غير مناسب وان عاد سيف ووجدها تتحدث فى الهاتف ستتأكد ظنونه
بعد قليل طلب منها سيف الاستعداد للمغادره
فاعترضت مديحه: ماتخليكو بايتين معانا النهارده
نظر لها منصور نظره ذات معنى: سيبيهم على راحتهم يا مديحه
مديحه: خلاص.خلاص انا بس بقول بدال مايروحوا بالليل كده
منصور: ويروحوا ليه مش يمكن هيتفسحوا
سيف: طيب انا ماشى بأه مش عاوزيين حاجه
مديحه: سلامتك ياخبيبى صحيح منال اتكلمت النهارده وبتسلم عليك انت وسيرين جدا
تذكرت سيرين منال تلك العمه المرحه وقالت: بجد دى وحشتنى اووى
مديحه: وهيا كمان بتقول انكم واحشينها ناويه تيجى اخر الاسبوع يكون جوزها فاضى يجيبها
سيف: طيب انا هبقى اكلمها تصبحو على خير
مديحه: وانت من اهله ياحبيبى مع السلامه خدوا بالكم من السكه ربنا يحفظكوا يارب
قبلت سيرين مديحه وسلمت على حماها وانصرفت بصحبه زوجها الذى ظل صامتا طوال طريق العوده
ما ان وصل سيف الى المنزل حتى توجهه الى غرفته واغلق الباب وترك سيرين وحيده
اغتسلت سيرين وابدلت ثيابها وغرقت بنوم عميق فى الصباح التالى استيقظت على رنين الهاتف انها صديقتها مره اخرى
سيرين: الو ازيك يامنى
منى: صح النوم انتى فين مابتسأليش عليا وامبارح كلمتك مارديتيش عامله ايه اخبارك ايه؟
سيرين: ماشى الحال انتى ازيك وازى جوزك؟
منى: الحمد لله انا حامل
سيرين: بجد؟ مبروك الف مبروك يامنى
منى: عملتى ايه يا سيرين فى موضوع خالك ومراته الله يرحمهم
سيرين: الله يرحمه انا قريت الخبر فى الجرنال بس يعنى المفروض اعمل ايه
منى: مش ترجعى بيتك هتسيبيه لمين بعد الاتنين ما ماتو
منى: لاء يا منى خالى بس اللى اتوفى مراته فى المستشفى
منى: انا لسه قاريه فى الجورنال امبارح انها اتوفت وان ابن خالك اتحول لفضيله المفتى كده هو قتلهم الاتنين
انتفضت سيرين بقوه: ايه؟ بتقولى انها ماتت دى لسه كانت فى المستشفى
منى: تفاصيل الخبر اهه قدامى وفاه زوجه رجل الاعمال بعد ان طعنها ابنها المدمن رغم مكوثها فى المستشفى لعده ايام وتحسن حالتها الصحيه
واحاله اوراق الابن لفضيله المفتى .كده خلاص شكله هياخد اعدام
شعرت سيرين ان الارض تدور بها وانها فاقده التركيز
منى: الو الو سيرين انتى رحتى فين
سيرين:لاا ابدا انا معاكى انا لازم اقفل دلوقتى يامنى
منى: طيب بالله عليكى ابقى طمنينى يا سيرين وعامه هتصل بيكى تانى
سيرين: اوك مع السلامه
قامت سيرين من على السرير واتجهت الى غرفه سيف الفارغه تفقدت انحاء المنزل فلم تجد فكرت بالتأكيد ذهب الى عمله دون ان يوقظها
اغتسلت سيرين سريعا وتوجهت الى المستشفى فى سياره اجره وطلبت من السائق ان ينتظرها وصلت الى الطابق السفلى وتوجهت الى منصه الممرضات
سيرين: السلام عليكم
الممرضه : وعليكم السلام
سيرين: من فضلك كنت بسأل عن المريضه نعمه السيد متولى
ردت عليها الممرضه بأسى: البقاء لله اتوفت امبارح واهلها جم اخدوها اظن ان الدفنه النهارده
سيرين: انتى متأكده؟
الممرضه: ايوه طبعا حضرتك تقربيلها؟
لم ترد سيرين وانصرفت شاعره بمزيج من الراحه والاسى على تلك المرأه الحقوده كيف ستواجه ربها بعدما قضت حياتها بجمع المال وتحريض الغير على فعل المنكرات
خرجت سيرين من المستشفى شاعره بانها خفيفه وان كل ما كان يهدد استقرار حياتها قد اختفى ان الله كان على ذلك قديرا
ركبت السياره وطلبت من السائق ان يقلها الى حيث مكتب سيف سوف تخبره انها لا تريد الابتعاد عنه سوف تخبره انها تود قضاء ماتبقى لها من ايام بجواره وانها كانت مخطئه فى شكوكها
ستخبره بما هددتها به زوجه خالها المتوفيه وانها فضلت الابتعاد على ان تجرح مره اخرى
وصلت سيرين الى البنايه القديمه
وصعدت الدرج بسرعه شديده دخلت المكتب والسعاده مرتسمه على محياها العذب البرئ
وفى قبالها تجلس تلك السكرتيره المتكبره ذات الملابس الفاضحه و التى تفحصتها من اعلى رأسها الى اخمص قدمها
سيرين: سيف موجود
السكرتيره: ايوه موجود بس معاه تليفون مهم ثانيه واحده ابلغه انك هنا
قامت السكرتيره ولم تمهل سيرين فرصه للرد عليها
قالت سيرين فى نفسها"مش مهم لما ادخله واحكيله كل شىء ساعتها يهون"
بعد قليل سمعت ضحكات السكرتيره العاليه وصوتها المايع وهى تنادى "لاء سيف ......سيف الله مش كده .........بس بقى يا سيف الله انا بغير هههههههههه" سمعت عده ضحكات رقيعه مختلطه برجاء السكرتيره المنحله لسيف بالتوقف عما يفعله
شعرت سيرين بقبضه شديده تعتصر قلبها والدموع الساخنه تنهمر من عيونها خرجت سيرين من المكتب وتتسابق خطواتها على الدرج الرخامى القديم نزلت الشارع ولم تدرى الى اين تذهب وماذا ستفعل
اشارت الى سياره اجره لتقلها الى المنزل عليها لملمه اشيائها ومتعلقاتها ومغادره ذلك المنزل وتلك الحياه وانهاء تلك العلاقه الشبه زوجيه فى الحال فقلبها لن يحتمل مزيدا من الصدمات.....

يتبع......