[اسطورة !]

البـــ[39]ـــارت

سديم: انا عرضت عليك و انتي حرة بالاختيار
غرام ناظرتها
سديم قامت: صراحة انا ودي اشوف دا غانم
غرام بعصبية ضربت الطاولة بيدها: اجــــــــــلــــــــــــ ـســــــــــي
سديم ابتسمت و جلست
غرام: تعرفين ادا عرف بندر راح يعصب و ممكن يتركك كمان
سديم: فكرت بكل شي قبل اكلمك ،، حتى بترك بندر ، بس ادا سمع غانم ايش ممكن يسوي ما اعرف !
غرام: باللهي ؟
سديم: ايوه
غرام اخذت جوالها: اوك يعني اقدر اقوله و انا مطمنة انك بخير
سديم حطت رجل ع رجل براحة: طيب كل وحدة تدق ع اللي تباه ــ طلعت جوالها ــ
غرام طنشتها و دقت ع بندر
بندر: الوو
سديم طنشتها و طقطقت بجوالها و حطته ع الطاولة و فتحته سبيكر
بعد دقتين انفتح الخط
غانم: الوو
غرام ناظرت جوال سديم
بندر: غرام ؟ الوو
غرام انتبهت لبندر: ءء معليه بالغلط
بندر: حصل خير ، وينك
غرام: شوي و ادق عليك
بندر باستغراب: طيب
غانم: الووو ؟؟ مين معي ؟
غرام ناظرت سديم
سديم قربت من الجوال: معليه غلطانه بالرقم
غانم: حصل خير ــ و سكر ــ
سديم ابتسمت لغرام
غرام: يعني؟
سديم: ترجعي امريكا
غرام سكتت
سديم: من لما جيتي و بندر منشغل عني
غرام: لاننا مضغوطين دي الايام
سديم: ما يخصني
غرام: بس تمر دي الايام بيرجع لك نفس اول و احسن
سديم: ما حنتظر
غرام لفت وجها بضيق ورجعت ناظرت سديم: لو تبين بكلمه لك
سديم: ما احتاجك
غرام من بين اسنانها: همك اسافر بس؟
سديم: يعني
غرام سكتت
سديم: بتروحين دحين تحجزين لك ع اقرب طيارة لأمريكا
غرام: مردي حرجع هنا !!
سديم: وقتها يكون كل شي تغير
غرام سكتت
سديم: وقتها نكون مخطوبين او حتى متزوجين ،، لك يومين و كمان كثيرة عليك
غرام ظلت ساكته
سديم قامت: تشاو
و طلعت برا و دقت ع بندر
بندر: هلا
سديم: وينك ؟
بندر: رايح البيت اريح
سديم: طيب
بندر: وينك اسمع صوت سيارات
سديم بكذب: دوبني طلعت من المول بروح البيت
بندر: طيب انتبهي لك
سديم: طيب باي
ركبت السيارة و حركت
غرام طلعت و ركبت السيارة و الضيق واضح بوجها
هيثم ناظرها من المرايه: ممكن اسأل؟!
غرام ناظرته
لؤي بهمس: وقتك !
غرام: قول فول ما عليك منو
هيثم: مين دي ؟؟ للامانة ما عجبتني
لؤي مزح: المرة الجايه تسألك ادا عجبوك ولا لا
هيثم ناظره بطرف عيونه
غرام ابتسمت: وحدة
هيثم: اها ،، آسف كنت افكره واحد
غرام: فلتت منها ضحكه جانبيه: دي عرضت لي شغلة و ان شاء الله بفكر بعرضها
هيثم هز راسه بالفهم

&&& الكورنيش &&&

فاطمة: اوك انا غلطانه بس كنت فرحانه بغرام
هاني: كلنا فرحانين بغرام
فاطمة: بس ترا ابوك زودها
هاني: ايش اسوي ابويه !!
فاطمة بانزعاج: دي المشكلة
هاني سكت
فاطمة تغير الموضوع: بعزمك
هاني ناظرها: هاه ؟
فاطمة: بعزمك ما يصير؟
هاني: بس انا اللي ادفع
فاطمة باعتراض: كيف تصير عزيمه كدا !!
هاني: بكيفك انتي اللي تطلبين و انا اللي ادفع
فاطمة باستسلام: طيب هيا مت من الجوع

&&& سيارة الوليد &&&

غزل بحلطمه: كان وصلتها بنفسك مو احسن ؟
الوليد ينرفزها: هيا ما طلبت بس ان شاء الله المرة الجاية
غزل بعصبية: الوليد لا تنرفزني
الوليد سكت و كتم ضحكته
غزل سكتت شوي بعدين كملت حلطمه: قال ايش قال انتي مو متغطيه كويش ما شاف ازرارو المفتوحة
الوليد ناظر ازرارة: احس بكتمه ادا سكرتها
غزل: باللهي !! ما حتموت
الوليد ناظرها ببراءة مصطنعة: ادا انكتمت مت
غزل بقهر: يكون احسن
الوليد لف وجهه عشان ما تشوف ضحكته اللي كاتمها
غزل ناظرته: طالع الطريق لا نصدم و اموت
الوليد: انا افديك
غزل بدون ما تناظره رفعت يدها: تكفى ! ــ و شمقت ــ
الوليد ضحك
غزل ناظرته ورفعت حاجبها الايسر
الوليد: سوري بس انتي غيووورة بشكل
غزل باستنكار: ميييين انااا ؟؟
الوليد هز راسه بنعم
غزل باستخفاف: ع مين يا حظي ؟
الوليد: علي طبعاً !
غزل: لا يا ابويه ما اغار عليك ريح
الوليد بطريقة تنرفز: sure sure = طبعاً طبعاً
غزل لفت وجها لدريشة
الوليد: ايش رايك نتعشى بمطعم
غزل بدون ما تناظره: عيالي بالبيت لو مفتكر و امك برا
الوليد: اعرف، بقول للخدامة تأكلهم و تنومهم
غزل: دولا عيالي مو عيال الخدامة
الوليد: ما قلنا شي بس خلينا نتعشى بمطعم احسن !
غزل: ماليا نفس
الوليد سكت

&&& فلة بو منصور &&&

دخل خالد الجناح و رما شماغه
ديم: مبكر اليوم
خالد: رما نفسه ع الكنبة: ما في شيء
ديم: احسن
خالد عدل جلسته و حط رجوله ع الطاولة ــ الله يعزكم ــ: تعالي جنبي
ديم اخذت من المطبخ التحضيري ثنين آيس كريم و راحت له و مدت له كوب الآيس
خالد اخذ منها
ديم حطت كوبها ع الطاولة
خالد اكل ملعقة من الآيس: حلو القميص عليك
ديم ابتسمت بخجل: عيونك الحلوة حبيبي
خالد كمل اكل
ديم تلعب بشعر خالد: رحت المستشفى اليوم
خالد لف عليها و عقد حواجبه: فيك حاجه ؟
ديم وهي لسا تلعب بخصلات شعر خالد هزت راسها بالنفي: رحت افحص
خالد ناظرها بعدم الفهم
ديم: الدكتورة تقول اني سليمة و كويسه ما فيا الا العافية و انو ممكن ربي مآخر حمالي او ممكن بعد فترة يرزقنا و من دا الكلام يعني
خالد كمل اكل: الحمد لله
ديم شالت يدها من شعره: افكر لو انت كمان تروح تفحص ؟
خالد ناظرها: نعم ؟
ديم: تفحص انت كمان
خالد: سمعتي الدكتورة بنفسك قالت ممكن بعد فترة ربي يرزقنا
ديم: بس قالت كمان ما في مانع زوجك يفحص
خالد قام بانزعاج: يلا بس قال ايش قال افحص ، الحمد لله انا سليم
ديم قامت: طيب دامك عارف انك سليم خلينا نستشير دكتور
خالد قرب منها بعصبية: انتي ايش تبغي بالضبط ؟
ديم بتشديد: ابــا اصيير أُم !! كا يحق لي ؟؟؟
خالد: و انا كمان ابا اصير أب بس ربي ما رزقنا دحين يرزقنا بعديين
ديم: لنا تلات سنين تلااااته اللي مثلي خلفو و كبرو عيالهم !
خالد: و خير يا طير تلاته في غيرك 12 سنه و اللي 20 سنه !! صبروا وربي رزقهم
ديم: انا ما حنتظر زيهم ــ برجاء ــ يا أخي افهم ابا اصييير أُمم ــ امتلت عيونها بالدموع ــ
خالد توجه للباب: العيشة صارت نكد بدا البيت ــ طلع و صفق الباب بقوة ــ
ديم عضت ع شفايفها السفلية بقهر تمنع دموعها من النزول

&&& سيارة بندر &&&

سديم: مو قلت بتروح البيت تريح
بندر: ايوه بس دقت علي غرام تقول تعال
سديم: ايش عندها؟
بندر: ما اعرف بس ما كان صوتها كويس
سديم: يعني كانت تبكي؟
بندر: لا بس حسيتها متضايقة
سديم: ممكن من ابوها كمان
بندر: ممكن كل شي جايز منو
سديم: حسبي الله عليه
بندر: حبيبي انا وصلت بيتها هيا اخلص و اكلمك
سديم: طيب طمني عليها ادا رجعت
بندر: طيب ــ سكر منها ــ

&&& سيارة ثامر &&&

كان واقف قدام بيت غرام ،، انتبه لسيارة بندر تدخل بيتها
ثامر بقهر ضرب الدركسون و حرك
دق جواله
ثامر: ها معتصم
معتصم: لسا عند بيت غرام
ثامر: كأنك حاس ،، دوبي احرك
معتصم: وين رايح ؟
ثامر: البيت بريح
معتصم: اجيك؟
ثامر: تعال
معتصم: هيا سلام اشوفك

&&& بيت شهاب &&&

ليان صبت القهوة و مدتها له
شهاب اخذ منها الفنجان: الحلا طعمه يجنن
ليان بغرور مصطنع: دايم حلاي يجنن
شهاب قرب منها و باس انفها
ليان انحرجت
شهاب: عمري المغرور
ليان بعدته من صدره: استنا
شهاب ناظرها
ليان ناظرت القهوة: القهوة
شهاب ابتسم
ليان طلعت من تحت الكنبة علبة طويله و مدتها لشهاب
شهاب ناظر العلبة: قلم !
ليان سكتت
شهاب اخذ العلبة: ايش المناسبة؟ اليوم ايش ؟
ليان: افتحها طيب
شهاب فتح العلبة و شاف جهاز كشف الحمل ــ ناظر ليان و عقد حواجبه ــ
ليان تأشر بعيونها ع الجهاز
شهاب شال الجهاز كان تحته صورة فيها خطين وورقة مطوية،، تغيرت ملامحه بسرعه و لف عليها بدهشه: حااامل !
ليان هزت راسها بنعم
شهاب ضمها بقوه
ليان: ههههههههههههههههههههههههه ههه
شهاب وقف شالها و دار فيها
ليان: ههههههههههههههه خلاص ههههههههههههههههه بدوخ
شهاب نزلها بسرعه: آسف
ليان ابتسمت بخجل
شهاب: اخيراً
دخلت لمار بعد ما طقت الباب و عيونها نص مفتوحه: ماما
ليان تأشر لها: تعالي ماما
لمار راحت لليان و جلسوا ع الكنبة
شهاب سحب لمار لحضنه و لعب بشعرها: بجيك اخو
لمار ناظرته باستغراب و لفت ع امها
ليان: ايش بفهمها امانه
شهاب بمزح: بلعب معاه اكثر مننك
لمار قامت و جلست بحضن امها: ماما
ليان ضربت شهاب بخفه بيده: شهاااب
شهاب ضحك
ليان: تبين يكون عندك اخو او اخت ؟
لمار: يعني نونو
ليان: ايوه
لمار هزت راسها بنعم
ليان اخذت يد لمار الصغيرة و حطتها ع بطنها: شوفي النونو هنا
لمار ابتسمت بفرح: طلعيه
ليان: لسا توو صغير
لمار بزعل: متى يكبر ؟
شهاب: بعد 9 شهوووور
لمار: يعني كتير؟
شهاب هز راسه بنعم
لمار مدت شفايفها بزعل
شهاب قرب من لمار: اكل ذي الشفايف الزعلانة
لمار ضحكت

&&& فلة بو ياسر &&&

بو ياسر: كله منك
ام ياسر تصيح
ياسر: ايش بصير لو ما فتحتي معاه موضوع الزواج
ام ياسر بصوت باكي: ابي افرح بولدي
رتاج: بس ماما مو كدا !! هاني قالي انو ثامر شايل من راسه انو يرجع تاني
ام ياسر تصيح
ياسر: محسستني انو اللي طلع بزر عمره 5 سنوات مو واحد عمرو 28
ام ياسر: يحق لي افرح بولدي بدال ما يعدب نفسه مع دي الـ×××××
بو ياسر بعصبية: هوووب دي بنت اخويه
ام ياسر: ادا اخوك ما يباها..
بو ياسر قاطعها: خولـــه
خوله سكتت
ياسر رحم امه: دحين ادق لك عليه
ام ياسر هزت راسها برضا
ياسر دق ع ثامر شوي ورد
ثامر: هلا ؟
ياسر: وينك ؟
ثامر: بالسيارة ايش تبا ؟
ياسر: طيب مرنا ع الأقل
ثامر: بروح البيت
ياسر: طيب ننتظرك
ام ياسر تأشر له: بيجي
ياسر يحرك يده بمعنى صبر
ثامر: لالا قصدي شقتي
ياسر: ثامر امك زعلانه
ثامر بعدم اهتمام: طيب
ياسر: يا ابن الحلال امك تصيح تباك
ثامر: و انا ما ليا رجعه للبيت ازوركم اوك اما انو ارجع لا
ياسر: اتفل الشيطان و تعال
ثامر: انا حلفت ماليا رجعه و ادا بتفتحو دا الموضوع تاني ما عاد ارد عليكم
رتاج تأشر لياسر: اديني اياه
ياسر: استنا رتو تباك
رتاج: الوو
ثامر: هلا
رتاج: خلاص ثامر لا تطول الموضوع
ثامر: بأي لغة تفهمون ؟
رتاج: ثاامر
ثامر: قاعد اقولكم ما ليا رجعة للبيت ايش اللي ما فهمتوه ؟
رتاج: طيب مرنا دحين و تراضي امي
ثامر: بكرا ان شاء الله دحين تعبان بروح اريح
رتاج: ماشي
ثامر: سلام
سكرت منه
ام ياسر: ايش قال؟
رتاج: بكرا بمر بس امي تكفين لا تفتحين لو الموضوع
ياسر: يقول ادا انفتح الموضوع مره تانيه او حاولتو ترجعونه ما عاد بجينا او يرد علينا
ام ياسر نزلت دموعها
بو ياسر: خلااااص يا بنت الناس
ام ياسر بقهر: كلو من بنت الـ××× لفت راسو لف
بو ياسر بدهشه: ايش دنب البنت ؟؟
ياسر: من جد ولدك هو اللي حبها هيا عمرها ما تقربت منو
بو ياسر بمزح: بقي شوي من دموعك لما اموت بتخلصيها من دحين
ام ياسر دفته بخفه وبصوت باكي: اسم الله عليك
بو ياسر ابتسم و مسح دموعها بيده
ياسر: دحين انا اللي اقولكم استأذنكم بروح البيييت
رتاج: من جد يا عمري تلاقي طيف تستناك وفيها نوم
ياسر: من جد يلا سلام

&&& فلة بو هاني &&&

بو هاني: ما في طلعه لين تنقلع غرام
غلا: انا عندي جامعة
بو هاني: قلت لك كلمي توامك خل ترجع من مكان ما جت
غلا: انا ابا توأمي
بو هاني: دا اخر شي عندي
غلا ضربت رجولها بالأرض بزعل و طلعت
ام هاني بسخريه: لدي الدرجة تخاف من بنتك !!
بو هاني: ما اخاف منها
ام هاني: لو ما تخاف منها ما كان حبستنا زي العصافير
بو هاني: و احلا عصفورة قدامي
ام هاني شمقت بوجها: جبان
بو هاني: مو جبن ــ قرب منها ــ بس اخاف عليكم
ام هاني بعدت عنه: ابعد عني ،، متخلف

( اليوم الثاني )

&&& فلة بو ماجد &&&

غرام: لازم ترجعين سونيا
سونيا: ما مر ع جيتك اسبوع
غرام: الا مر
مريم: صيغة مبالغة
غرام: ولو ياختي عندك جامعة
ليان: من جد غرام خلاص باقيه هنا
غرام سكتت
سونيا: عارفه بس ما ودي اتركم
غرام: حنا بنجيك
سونيا: صدق!
فاطمة: ايوه بس لازم ترجعي
سونيا بزعل مصطنع: كأنكم تبون الفكه
مريم: انقلعي مو كدا
غرام: ما عليكم فيها،، بتحجزين دحين
سونيا: طيب بعدين
فاطمة وهي تطقطق بجوالها: ما في بعدين ، قاعدة احجز لك
سونيا لفت عليها: مو من جدكم
غرام جلست جنب فاطمة: الا من جدنا
فاطمة: في رحلة الساعة 8م
غرام: احجزيها
سونيا: هييه انتي وهيا ع كيفكم انا ما جهزت نفسي
غرام: ع اساس ما اعرف انو معك شنطة صغيرة
سونيا سكتت
غرام: الويكند الجاي نروح كلنا عندك

&&& شقة ثامر &&& س 2 الظهر

دخل هاني و معاه فطور !! ،، لقى ثامر منسدح ع الكنبة
هاني بصوت مرتفع: ثــــــــــامر
ثامر رايح بسابع نومه
هاني حط الفطور ع الطاولة و راح لثامر و سحب اللحاف: ثااامر قوووم ــ بكذب ــ الدنيا بتظلم و انت لسا نايم
ثامر تحرك و فتح عين و مسكر عين: الساعة كم ؟
هاني: اتنين
ثامر قام و تمغط و ناظر حوله: وين معتصم
هاني: ما اعرف؟ ، ايشبو المكان قلب مزبلة ؟
ثامر قام
طلع معتصم من الحمام ــ الله يكرمكم ــ: اهلييين هاني
هاني: هلا ،، انت ما عندك زوجة و عيال !؟
ثامر توجه للحمام ــ الله يكرمكم ــ: كلو كتكوت واحد يقول عيال !
معصتم يمسح وجهه: مدري عنو حسسني اني بالخمسين
هاني: نظفوا نظفوا بس و انتو ساكتين
معتصم يناظر المكان: مين ينظفه ؟
هاني: انتو
معتصم يتهرب: بروح اشوف زوجتي وولدي
هاني: صح النوم دوبك تتذكرهم ،، مافي طلعة لين ما تفطروا مدري تتغدو و تنظفوا
معتصم: البيت بيت ثامر مالي دخل
ثامر من داخل الحمام ــ الله يكرمكم ــ: شف الـ××××
هاني: هيا هيا
شوي وطلع ثامر ومسح وجهه
هاني: معتصم بتقعد تناظر لـ متى؟
معتصم: كيف ارتب؟
هاني: ما اعرف تصرفوا
ثامر: بكلم الحارس يطلع لي مكنسة
هاني: يكون احسن
معتصم اخذ اللحافات و لفها بشكل غير مرتب
هاني: كدا يعني رتبتها
معتصم: ادا تعرف ورينا بدال ما تتكلم
هاني سكت لانه ما يعرف
ثامر تخصر: والله مشكله
هاني: ادا مشكله ارجع بيت اهلك
ثامر: ماليا رجعه
معتصم: كل يوم بتجيب احد ينظف؟
ثامر وهو يناظر المكان شال الصحون و حطها فوق بعض: ادا شلنا الاغراض دي بينظف المكان
شمروا اكمامهم و قاموا يرجعون كل شي مكان و كنسوا المكان و رتبوه
رمو نفسهم ع الكنبات
معتصم: جوعااااااااااان
هاني: قوم حط الفطور بصحون
ثامر: مين بغسل المواعين ؟
معتصم: الحمد لله اني متزوج
ثامر: ايش بنسوي طيب؟
هاني: كلها مويه و صابون و تنظف
ثامر: ما اعرف ادا في صابون ولا لا
قاموا ودخلوا المطبخ و فتحو الدواليب يدورون الصابون
ثامر: ما في صابون
معتصم: انزل جيب صابون من البقالة
ثامر: ما فيا انزل هاني
هاني: انا اللي جايب الفطور
ثامر: انا مرتب المكان هيا معتصم
معتصم: و انا كمان رتبت
هاني: خلاص المويه تكفي
حاولوا يغسلون الصحون بالمويه بس ما كان كافي عشان تروح الأوساخ
ثامر بتعب: خلاص خلونا نفطر باللي موجود

&&& كوفي بندر &&&

سديم: قلت لي في موضوع ايش هو الموضوع ؟
بندر: تذكرين لما حكيت لك انو ابا امي تتعرف ع امك
سديم: ايوه
بندر: ودي كل اهلي يتعرفون عليكِ مو بس امي
سديم ابتسمت بخجل
بندر: بس غرام بتسافر
سديم: و غرام من اهلك
بندر: اكيد
سديم: وين بتسافر؟
بندر بحزن: بترجع امريكا
سديم: ليه ؟
بندر: عشان ابوها
سديم: متى بتسافر؟
بندر: بكرا ع الساعة 11 باليل
سديم سكتت
بندر: اوك نفترض انو انخطبنا ما اقدر اتزوج وهيا مو موجودة !
سديم عقدت حواجبها
بندر: غرام من خمس سنين تتمنا تشوف زواجي
سديم: يعني ايش ما نتزوج لين ترجع غرام تاني
بندر: ايوه
سديم: ممكن ابوها ما يسمح لها ترجع
بندر: انا متأكد من دا الشي عشان كدا مو عارف ايش اسوي
سديم: مو لازم تكون موجودة نصور لها كل حاجه
بندر: ما ينفع دي الانسانة لها فضل كبير علي في النهاية ارسلها شويت صور !!
سديم: يعني ايش؟ ما نتزوج
بندر: الا نتزوج بس لازم اكلم ابوها و احاول فيه
سديم سكتت
بندر: غرام طول دي السنين تحن علي اتزوج اتزوج ولما نويت، اتزوج بدون ما تحضر زواجي !
سديم: الخـــلاصة
بندر سكت شوي: مو عارف كل خططي لنهاية دا الاسبوع راحت
سديم: ايش هيا؟
بندر: كنت ناوي نهاية دا الاسبوع اهلي يزورونكم
سديم قامت: اسمع عندي كم شغله بخلصها و برجع نتكلم بالموضوع
بندر: طيب انتبهي لنفسك
سديم: و انت كمان

&&& فلة بو ماجد &&&

فاطمة: روحي جيبيه
مريم: لالا اخاف في احد
الكل ناظر مريم باستغراب
ليان: كل مره تتمشي بالبيت دحين تخافين ؟
فاطمة: ولا كان قبل غير ودحين غيير
مريم انحرجت
غرام: خايفه تصادف حبيب القلب
فاطمة: ارتاحي كلهم برا
الكل: هههههههههههههههههههه
مريم قامت و رمت ع فاطمة الخداديه: انقلعو حمـ×××
طلعت و راحت غرفة فاطمة و قعدت تدور الشاحن ،، لقته موصل بالفيش خذته و نزلت سمعت صوت ماجد ركضت ع طول للمجلس
سونيا: ايشبك اسم الله ؟
مريم: سمعت صوت ماجد
غرام: ما شاء الله ميزتي صوت ماجد
مريم ناظرت غرام بحقد
الكل: ههههههههههههههههههههههههه ههههههه
فاطمة قامت و طلعت شافت ماجد يطلع الدرج: ايش عندك ؟
ماجد لف عليها: باخذ اغراض و بطلع
فاطمة طلعت له: خرشت البنت
ماجد: أي بنت ؟



فاطمة: مريم
ماجد ابتسم: ليش؟
فاطمة: سمعت صوتك و ركضت عندنا
ماجد ضحك: ليتني مو متكلم
فاطمة: اقول امشي بس
ماجد ضحك و طلع
فاطمة راحت للبنات: بياخد اغراض و بطلع ــ جلست ــ
سونيا تأشر بعيونها ع غرام و ليان: ايشبهم دول؟
ليان كانت تتكلم مع غرام بهمس
فاطمة اخذت الخدادية و رمتها عليهم
غرام لفت ع فاطمة: يا ×××
فاطمة: ايش الهرجه ؟
غرام ناظرت ليان: قولي
ليان ابتسمت و اخذت جوالها و ارسلت لهم ع القروب صورة جهاز كشف الحمل
مريم: ايشبكم؟
ليان: شوفو القروب
اخذو كلهم جوالاتهم و فتحوا القروب ،، فجأة صرخوا كلهم مع بعض
ليان ضحكت
قاموا كلهم و ضموها
انطق الباب
فاطمة بصوت مرتفع: هااااااااه ؟
ماجد من ورا الباب: في شي؟؟؟
فاطمة طلعت له: لا
ماجد: ليش تصرخون طيب؟
فاطمة ضحكت: ولا شي خلاص روح
ماجد: طيب سلام
فاطمة دخلت
سونيا: ××× ليه ما قلتي لنا
ليان: دوبي امس اعرف
مريم: طيب تأكدتي من المستشفى ترا الجهاز مو دقيق
ليان: ايوه امس الصبح بعد ما عرفت جتني غرام و قلت لها و رحنا المستشفى
فاطمة بحماس: كيف علمتي شهاب
ليان: جيت اصب له قهوة...
قاطعهم صوت جوال غرام
غرام تناظر جوالها: كملي لهم انا برد ــ طلعت ــ الوو
سديم: الو وينك ؟
غرام: ايش تبغي؟
سديم: ابا اشوفك
غرام: هدا و انتي دوبك تعرفيني واشتقتي لي ايش بتسوين لو سافرت ؟
سديم من بين اسنانها: اشوفك بنفس المكان ، متى يناسبك ؟
غرام بتفكير: 7 و شي لما ااكد الوضع اكلمك
سديم: طيب سلام
سكرت منها و دخلت للبنات
سونيا: مين ؟
غرام: وحدة من الشركة

&&& شقة ثامر &&&

معتصم: لازم تعود نفسك او تحب تاني
ثامر: احب تاني مين ؟
زين يشد تيشيرت ثامر
ثامر ناظره
زين: ابا حواوه
ثامر: تبا حواوه اديك حواوه ــ قام و طلع له كيس من المطبخ ــ
معتصم: ليش متعب نفسك
ثامر: لعيون يزون
يزن استانس و اخذ الكيس
معتصم يناظر يزن: قولو شكرا
يزن ناظر ثامر: ثكرا
معتصم: متى امداك تروح البقاله ؟
ثامر يجلس: اول م قلت لي انك بتجي نزلت جبت كم حاجه ، التلاجه فاضيه يا شيخ
معتصم: و انا متأكد انو ما في شي ينطبخ
ثامر: في اندومي رتاج تقول حطو ع النار لين يفور يطلع بقبق
معتصم مات ضحك ع شرح ثامر: ههههههههههههههههههههههههه ههههههه بقبق
ثامر: هيا قالت
معتصم: والله ما تعرف تعيش لحالك
ثامر: اعرف كنت اسويها قبل
معتصم: بس قبل كنت يا تنام بالاستراحة يا بشقة صاحبك و اكل كل يوم من برا
ثامر: عشان كدا شريت كم حاجه مو كل يوم اكل من برا!
معتصم: و بعد فترة اشوفك تطالع برامج الطبخ،، ههههههههههههههه
ثامر يقلده باستهزاء: برامج طبخ
معتصم: خلاص اسمع ندور لك موعد مع وحدة
ثامر: اناا للله ما ابا احب
معتصم: بتقعد طول عمرك ع غرام
ثامر: ايش اسوي احُبها
معتصم: فهمنا هيا ما تحُبك هيا متزوجه هيا عندها بندر ، و انت؟؟
ثامر سكت
معتصم: تبا تنسا يا تروح عند امك و تزوجك او تروح تتعرف ع احد تاني
ثامر: ما راح اتزوج كدا ع طول
معتصم: غرام مستحيل تطلق من بندر لا تحاول تعلق نفسك ع الفاضي
ثامر سكت

&&& مطار الملك عبد العزيز &&& س 6:17

مريم: انتبهي لك
سونيا: يا الله بتقعدوا توصوني ع نفسي ساعه
غرام ضحكت
سونيا ناظرت غرام: زوروني
غرام: ابشري
سونيا سلمت عليهم كلهم: باااي
ليان: طمنيني ادا وصلتي
سونيا: و انتي انتبهي للبيبي
ليان: طيب
ودعوا سونيا
ليان: هيا ع بيتي
فاطمة: يا ماما حنا ورانا جامعة
غرام: انا بروح مادو عندي موعد مع وحدة
ليان: مين؟
غرام: وحدة معنا بالشركة
مريم: طيب باي
سلموا عليها
غرام ركبت السيارة
هيثم: البيت؟
غرام: لالا مادو
هيثم هز راسه بالموافقة و حرك
غرام دقت ع سديم
سديم: هلا
غرام: انا بالطريق
سديم: ماشي

&&& فلة بو هاني &&&

روان: عمي ليه كدا؟
غلا: كرهه لغرام اعماه
روان: بس دي من دمه
غلا سكتت
روان كملت: انا لو عندي بنتين بحطهم بعيوني و ما بفرق بينهم
غلا: هو يتهم غرام بموت تاج و جدي
روان: خيير ياخي كم عمره عشان يتهمها ! ربنا اراد
غلا سكتت
روان: و دحين حارمك من الجامعة
غلا: و من كل الطلعات
روان: اوفف ايش دا
غلا: حتى جوالي مراقبني فيه
روان: ايش دي العيشة حسبي الله، غرام تعرف؟
غلا: لا
روان: بتقولين لها؟
غلا باندفاع: لاااا و لا اباها تعرف لو عرفت ممكن تسافر
روان: اووفف خيارين كل واحد امر من التاني
غلا: عادي اهم شي اشوف توأمي و اكلمها و اشوفكم
روان: و الجامعة ؟
غلا: عادي
روان: حتى بيتنا منتي قادرة تجينا
غلا: اقدر بس لازم اكلم ابويه و انا ما ابا اكلمه
روان: الله يعينك

&&& قصر الوليد &&&

دخلت غزل الجناح و لقته نايمه راحت له: الوليد ــ هزته من كتفه ــ الوليييد،، الوليد هيا قوم من متى نايم انت حتى ما صليت الصلوات ،، هياا قوووم ،، الولييد
الوليد اخيراً: هممم
غزل: قوم صلي الظهر و العصر و المغرب
الوليد: امم
غزل: هيا قوم ما حمشي الا و انت قدامي
الوليد يأن: برردد
غزل عقدت حواجبها: الوليييد قوووم
الوليد: طيب
غزل حطت يدها ع جبينه و بدهشه: الوليد انت مسخن
الوليد ساكت
غزل حطت يدها تحت رقبته: قوم قوم
الوليد بتعب: بردان
غزل قامت و طفت المكيف و رجعت للوليد: قوم قوم تروش
الوليد: ما ابا ما ابا
غزل تحاول تسنده عليها: هيا قووم
الوليد سند نفسه عليها بتعب
غزل دخلته الحمام بالموت ــ الله يكرمكم ــ و جلسته
الوليد بتعب: تعبااان
غزل حطت يدها ع فمه: اوشش خلاص
الوليد سكت
غزل فصخت له التيشيرت و بقى بالشورت سندته عليها مره ثانيه و حطته بالبانيو و فتحت المويه
الوليد انفجع: بارد بارد غزل بارد
غزل بخوف: طيب حبيبي اوشش عشان تخف الحرارة
الوليد بتعب: بارد بارد
غزل: معليه معليه حبيبي اوششش

&&& سيارة هاني &&&

هاني: موعد مع مين ؟
فاطمة: ايش عرفني؟ اتوقع مع وحدة بالشركة
هاني: وين طيب؟
فاطمة: اتوقع مادو، ليه ؟
هاني: كنت ابا اكلمها بس كويس بمرها بعد شوي
فاطمة: طيب
هاني: رجعتي البيت؟
فاطمة: دوبي ادخل
هاني: طيب
فاطمة: يلا باي

&&& مادو &&&

غرام جلست: سلام
سديم تناظر ساعتها: كان جيتي ع العشاء
غرام قامت: يعني اقوم ؟ ترا عندي شغل لراسي ما خلصت اغراضي
سديم: اجلسي اجلسي
غرام جلست
سديم باحترام: ايش تبغي اطلب لك ؟
غرام بدهشه: من وين دا الاحترام ؟
سديم ابتسمت بمجاملة
غرام: ولا شي بس ان شاء الله ما تطولي
سديم سكرت المانيو
غرام: اخلصي عليا يرحم والديك
سديم سكتت شوي: متى بتسافري؟
غرام: شكلك كنتي دارسة الموضوع و عارفة انو في طيارة بكرا ، ع الساعة 11 بكرا
سديم: كنسليها
غرام: تبغي اعجل من كدا ! عندك طيارة خاصة ؟
سديم: لا ، كنسلي سفرك
غرام: باللهي! , انا مو لعبة عندك
سديم: طيب خلاص انا سحبت كل حاجه قاعدة اقولك لا تسافري
غرام: السبب؟
سديم: بندر ما يبغى يسوي زواج بدونك
غرام: اها يعني مو لله
سديم: طبعاً لا
غرام: يعني بعد الزواج تبغيني اسافر !
سديم: كل شي يتغير حسب الظروف ــ ابتسمت بوقاحه و قامت ــ
غرام اخذت نفس عميق تهدي نفسها
سديم تأشر لها بأصابعها: تشاااو
غرام ناظرتها لين اختفى زولها و ابتسمت بانتصار و دقت ع بندر
بندر: ايش صار؟
غرام: انت بسيارتك؟
بندر: لا غيرتها
غرام: كويس لقيت جهاز تنصت شي؟
بندر: ايوه حتى بمكتبي
غرام: شلته ؟
بندر: اللي بمكتبي ايوه بس اللي بسيارتي لا
غرام: عادي ، اهم شي ما تعرف حاجات تانيه
بندر: قوليلي ايش صار؟
غرام: ابد كنسلت كل شي زي ما خططنا
بندر تنهد براحه: اوووه اخيراً
غرام: حبيبتك مو سهله
بندر سكت شوي: آسف غرام
غرام: بس لا تتركها ابد ولا تهملها
بندر: ابشري
غرام: هيا سكر بطلب لي شي نشف ريقي
بندر: طيب عوافي
سكرت منه و طلبت من الجرسون

( دخل و شافها تدور حول نفسها
بندر: غرام ايشبك ؟
غرام لفت عليه و بهدوء: ليه ما قلت لي انك تحب؟
بندر: دحين مناديتني عشان كدا؟
غرام: سؤال جاوبني
بندر: كنت ابيك تتعرفين عليها
غرام: حلو اسمها
بندر ناظرها باستغراب
غرام: شفت سديم اليوم و تراها حلوه ــ ضربته بكتفه بخفه ــ كان عرفتني عليها من زمان
بندر ضحك بإحراج: الا كيف عرفتيها
غرام: جت الشركة اليوم
بندر: سديم ! ما مرت علي؟
غرام: و قابلتها بمادو قبل شوي
بندر: ليه ؟
غرام: قبل ما اقولك شي حكيني، تحُبها صدق ؟
بندر بحب صادق: ايوه
غرام: لا تخسرها ، و ادا كانت تفكرك برزان او شي من دحين اقولك اتركها
بندر: لالا والله هي غير حتى ما فيها ولا حاجه من رزان
غرام: كويس
بندر: بنتكلم واقفين
غرام: اجلس
بندر جلس
غرام جلست: اليوم هددتني
بندر: نـــعــم ؟
غرام: قالت لي انو لازم ارجع امريكا ولا.............. حكته كل شي ...........
بندر بصدمه: كيف عرفت عن كل دا؟
غرام: ما اعرف ممكن عندها احد يوصلها او شي زي كدا
بندر: مستحيل انا الكلام اللي يكون بيني وبينك ما اقوله الا لسكرتير و السكرتير اصلا يكره سديم مستحيل يعطيها معلومات
غرام: اجل هيا محطيه جهاز تنصت لانو في شغلات ما يعرفها الا انا و انت
بندر: مو لدي الدرجه !
غرام: كل شي جايز
بندر عصب و طلع جواله
غرام: ايش تسوي؟
بندر: انا الغلطان كنت ناوي اخطبها نهاية الأسبوع هه
غرام: بدق عليها؟
بندر: اكيد
غرام: بلا جنوون
بندر ناظرها باستغراب
غرام: من جدك انت عشان ننفضح من جد هيا قالت لي ادا خبرتي بندر بتخبر ابويه يعني علي و على اعدائي
بندر سكت
غرام: دامك كنت ناوي تخطبها نهاية دا الأسبوع كمل مشوارك مو عشاني تخرب كل شي
بندر: مالو دخل عشانك ولا لا ، دي جنت و تهددك ايش دي الوقاحة
غرام: معليه معليه هدي
بندر: ما حخليك تسافر تاني
غرام: طيب ما حسافر بس استنا لا تتسرع
بندر: يعني تبغيني اسكت و اخليها تفضحنا
غرام: ما حنسكت بس خليك ذكي شويه
بندر سكت
غرام: تقدر تروح لها بكرا و تقولها انو غرام قالت لي انها بتسافر ع اساس انك ما تدري انها هددتني
بندر: ايوه !!
غرام: كنت اشوف الرحلات و في رحلة بعد بكرا ع الساعة 11 و حجزتها
بندر: من جدك انتي !!
غرام: خليني اكمل ،، و تحكي لها انو انا كنت ناوي نهاية دا الأسبوع يزورونك اهلي و من دا الكلام و لما تنعمي عيونها قولها بس ما اقدر اتزوج بدون ما تحضر غرام !، طبعاً لو تزوجت و انا مو زافتك بكون دابحتك
بندر ابتسم
غرام: ليا كم احن عليك تزوج تزوج و لما تتزوج ما احضر عرسك !!
بندر بتفكير: و هيا بعد كدا بتجيك و تقولك لا تسافري و احضري زواجي
غرام ابتسمت بمكر
بندر ناظرها بإعجاب: ان كيدهن عظيم
غرام ضحكت
بندر بإحراج منها: مو عارف كيف سوت كدا ، دي من جد مو صاحيه
غرام: لجل حبها تسوي كل شي !
بندر بمزح: ع اساس انتي تحبي عشان تفهمي
غرام: ما احب بس في واحد يحبني بجنون لدرجه اتوقع منو أي شي
بندر ضحك: ثامر
غرام: تعرف انو كل يوم يوقف عند باب بيتي ع بالو ما اعرف
بندر بدهشه: مو من جدك !
غرام: والله ، و اول ما يشوفك يحرك
بندر: مو صاحي والله
غرام: ع اساس سديم صاحية
بندر ضحك )
غرام علا صوت ضحكها
الناس ناظروها باستغراب
غرام انتبهت و مسكت جوالها
دخل هاني و تلفت يدورها و راح لها و جلس قبالها: ايش تسوي وحدك
غرام انفجعت: بسم الله
هاني ضحك
غرام: ايش عرفك اني هنا؟
هاني: فطوم حكت لي
غرام: اهاه
هاني: ايش تسوين وحدك ؟
غرام: ما كنت وحدي ، قابلت وحدة من الشغل
هاني: اخسس يا بزنس ومن
غرام ابتسمت بإعجاب بنفسها: اعجبك
هاني: اطلبي لنا اطلبي لنا

&&& قصر الوليد &&&

لفته بالروب و سندته عليها
الوليد يرجف من التعب
غزل جلسته ع الكنبة و عطته الأدوية
الوليد يهز راسه بالرفض
غزل: معليه حبيبي عشاني ، افتح فمك
الوليد فتح فمه
غزل حطت الحبه بفمه و شربته مويه: عافيه يارب ــ سدحته ع الكنبة ــ
الوليد: بررد
غزل قامت
الوليد مسك يدها
غزل: برجع
الوليد ترك يدها
غزل اخذت صحن و حطت فيها مويه باردة و اخذت منشفة و راحت للوليد ،، بللت المنشفة بالمويه و حطته ع جبينه
الوليد شهق
غزل: آسفه آسفه
الوليد: بااارد
غزل: عارفه عيني عارفه
الوليد شال المنشفه
غزل: تو تو حبيبي الله يخليك
الوليد: باارد
غزل: عشان تروح الحرارة
الوليد يهز راسه بالرفض: ما ابا
غزل: عشاني الله يخليك ــ برجاء ــ بسوي لك كل شي تباه بس ارتاح
الوليد استسلم لها

&&& فلة بو هاني &&&

** جناح بو هاني+ ام هاني **
غانم شافها تتعطر بالعطر اللي يحبه راح لها و ضمها من ورا و حط انفه ع شعرها بحب
سارة لفت عليه
غانم: كل يوم تحلوين انتي؟
سارة: بعيونك انا ملكة جمال
غانم: و احلا ملكة
سارة ابتسمت بخجل و صارت تلعب بأزراره
غانم بابتسامة: لا تحاولي تمثلي علي اعرف انك ما تحبيني ، وتسوين كدا ع بالك اني بترك غرام بحالها
سارة برجاء: انا ما اكرهك بس ما اباك تكره بنتي
غانم: بنتنك سبب كل شي مر بحياتي
سارة: طيب عشاني ع الأقل
غانم: سارة بيبي
سارة ناظرته برجاء
غانم: لا تحاولي و تمثلي ع الفاضي
سارة بعصبية دفته من صدره و اخذت العطر ورمته بقوه ع الأرض
غانم ضحك: ما مشت علي صح؟
سارة: الله ياخد عمرك
و طلعت
غانم ضحك لين سمع صوت الباب يتسكر بقوة ،، تغيرت ملامحه " كلو بسببها "

( اليوم الثاني )

{ الإمارات_ دبي }

&&& الجامعة الأمريكية &&&

سونيا دخلت وهي تمشي بسرعه تأخرت عن المحاضرة بربع ساعة صقعت بواحد و طيحت كتبه، لفت عليه: آسفه آسفه
حمدان نزل يجمع كتبه: متأخرة عن المحاضرة و ما تشوفين
سونيا عقدت حواجبها: انا قد شفتك قبل كدا
حمدان جمع كتبه: صاحب يرانكم = جيرانكم
سونيا تتذكر: حمد ، محمد ...
حمدان: حمدان
سونيا: ايوه ، معليش مره تانيه بس مستعجله
حمدان: الله معج
سونيا: سلام
سونيا مشت
حمدان راح للكافتيريا و جلس قبال مطر
مطر: روح ييب لي شي اشربه = روح جيب
حمدان: يارتكم ردت = جارتكم رجعت
مطر: سهى
حمدان: هيه
مطر: امس
حمدان: اليوم اللي ما يتكم فيه ردت ! = اللي ما جيتكم فيه
مطر: المره الياية نتصل ع حضرتك اذا ردت ولا طلعت
حمدان: يستحسن
مطر: قوم قوم بس ييب لي شي اشربه
حمدان قام وهو يضحك

{ السعودية_ جدة }

&&& شركة بو هاني &&&

دخل السكرتير: سم طال عمرك
بو هاني: وريني داك الملف حق الصفقة اللي خسرناها ، اللي فيها زي الختم
السكرتير: ابشر ــ طلع شوي و رجع ــ
بو هاني اخذ منه الملف و صار يناظر الختم و عاقد حواجبه ، قام : انا طالع
طلع بسرعه و نزل من اللفت
هاني قابله تحت: كنت جاي لك
بو هاني: مو فاضي
هاني: ابويه
بو هاني: ساعه و راجع
طلع و ركب سيارته و حرك بسرعه لمجمعهم
........... وصل .........
نزل بسرعه و طلع فوق
ام هاني شافت غلا: مين جاء؟
غلا: ابويه
ام هاني: ايش عنده ؟
غلا: ما اعرف طلع بسرعه
ام هاني: بالطقاق
** فوق **
دخل بو هاني جناح غلا و صار يدور فيه بشكل عشوائي و يفتح الأدراج و الدواليب لين لقا الظرف اللي يدور عليه و صار يناظر الختمين بدهشه

نزل بسرعه و شاف غلا ورفع الظرف: من مين دا ؟
غلا: انت دخلت غرفتي؟
بو هاني بصراخ: مــــــــــن مين دااا؟
غلا خافت
ام هاني وقف: ايشبك
بو هاني راح لغلا ومسكها من زندها بقوة و صدره يرتفع و ينزل بعصبية: مــــن ميييين ؟
غلا بخوف و ألم: من غـرام
بو هاني ناظرها بصدمه

&&& مجمع العرب &&&

فاطمة: ايش عرفك ممكن كان يلاحقك بس ما حسيتي عليه
غرام بسخريه: لو كان يلاحقني كان شفناه دحين
ليان: ممكن ما حب تنتبهين له
غرام: اقولكم انا فرحانه انو هو من امس ما يلحقني و انتو تدورون له اعذار !
مريم: معليش دا الأنسان يسوي كل شي عشانك فجأة ما صار يلاحقك !
غرام: احسن ارتحت
وصلت رسالة لليان و فتحتها و اتسعت عيونها: جبنا سيرت القط جاك ينط
غرام بدون ما تتلفت: ورانا هو ؟
ليان: لا ، شوفو
تجمعوا ع جوال ليان
غرام: مين دي؟
مريم: مو دي ربى ؟
غرام: ربى مين ؟
مريم: اللي درست معانا سنه بأول ثانوي
فاطمة: اللي خارمه شفايفها
مريم: ايوه شفتي سناب صالحه
فاطمة: ايوه كانت معاها قبل يومين
غرام: طيب ؟
ليان: دا اللي ركزتو عليه ؟
مريم: مين اللي معاها ؟
ليان تناظر غرام
غرام تناظر اللي مع ربى: ثــامر
فاطمة سحبت جوال ليان: من جد ثــــــــامر !






انتهـــى البـــ[39]ـــارت

ان شاء الله ينال اعجابكم..
تـــوقــــــعــــــاتــــ ــكـــــم..



اراكم ع خير ان شاء لله.. ولا تحرموني من ردودكم وتوقعاتكم و بليييييييييييز ما ابي احد من خلف الكواليس شاكره لكم ..
مع تحياتي: جذابة والعيون غلابه { } ^__^

للأسئلة و الاستفسارات..