[لامارا]

\\



البارت(34)●●

احتاجك ♡


الكل اجتمع تحت الا حياة اللي كانت نايمه
الصمت مخيم على الكل حتى قطعه خالد: سم يا يبه الكل هنا مثل ما طلبت
ابو خالد وعينه بعين زوجته: فيه شخص تقدم لحياة وانا عطيته موافقتي
عقد سعد جبينه: ومن يكون هالشخص
خالد وهو يأشر لسعد يهدأ: يبه ماتبي تسأل عن الرجال بالاول
ابو خالد بحزم: الرجال معروف بطيبه واخلاقه وانت تعرفه الموظف اللي في الشؤون الماليه طارق ال...
سعد: موظف عندك
ابو خالد وهو يناظر لسعد : وش فيها الرجال مايعيبه شيء ولا تبي كل الناس مثلك
سعد وهو يوقف بعصبيه: تراك تعيب على تربيتك يايبه
واذا كنت بترمي بنتك هالرميه فأنا ما استبعد بكره ترمينا بعدها
ابو خالد بصوته الضخم: انطم يالرخمه
خالد وهو يجلس سعد ويغمض له بعيونه بمعنى اهدأ
لف راسه لابوه: حقك علي يالغالي بس ترا مهما كان اخلاقه عاليه قدامنا لا بد إنا نسأل عنه واذاعني ماني رامي عضد يدي للي راح يبترها يالغالي
وقف ابو خالد وهو معصب من كلام عياله: انا كلمتي ماتنثني الرجال عطيته كلمه وهو جاي خلال هالاسبوع بيخطب ولا اشوف منكم اي اعتراض الا وربي مايصير خير
مشى والكل اعصابه مشدوده
سعد ناظر لامه: ذنبها في رقبتكم ذنبها فيكم ماراح يزول
حياة من على الدرج: ذنبي ماهو على احد ياسعد وترا تكلمت مع ابوي عن هالموضوع وعطيته موافقتي
سكت الكل بعد كلامها وشهقات امها المقهوره على حال بنتها








7:20p.m

سهاد : هدددددى
طلعت هدى تركض : وش فيك بسم الله
ابتسمت سهاد باستهبال: فيني الزهايمر
هدى وهي تضربها على راسها : هاه راح زهايمرك
مسكت سهاد بألم على راسها: يا ظريفه روحي كلمي زوجك لبركتن فيه مزعجني حتى صلاتي استغفر الله بس ما ادري كيف صليتها من كثر مارن
هدى بتعجب: جوالي عندي مارن
رفعت سهاد جوالها قدام وجه اختها وشافت رقم بلا اسم ومفتوح الخط
: امسكي جعلك بالي مانيب قايله امسكي لا بركتن في رومانسيتكم المعوقه روحي كلمي رجلتس بعيد ورجعي لي جوالي تف عليكم
مشت وخلت هدى في حاله لا وعي من عقل اختها
رفعت الجوال لاذنها وسمعت ضحكته خفق قلبها .. كان ودها تتفداه لكنها سكتت
طلال: قسم بالله حتى انفاسك يفز لها قلبي تكلمي سمعيني صوتك..وبضحكه قال... ولا اختك نشفت لك قلبك مثلي
ضحكت بخفه على كلمته وهي تتخيل شكل سهاد قبل دقايق
هدووء
هدى: الو
:......
هدى: الو... ابعدت الجوال عن اذنها لسى على الخط... الووو
طلال يتنهد: جعل ماحد يقول الو غيرك بالله عيدي ضحكتك ماشبعت منها
هدى وهي تمنع نفسها من الاندماج معه: سم وش بغيت
سكت طلال لدقايق وبعدها قال بصوت كسير: سم الله عدوك ابد اتصلت عليك لانك ماكنتي تردي على جوالك وانشغل بالي فاخذت رقم اختك من عبير واتصلت
هدى:تسلم بس انا الان مشغوله وباروح مع بنات عمتي لبيت صديقتهم
ابتسم لما حس من نبرتها انها تستأذن : طيب اجي اوديكم
هدى : لا لا وش بيقولوا علينا
ضحك : ماحد يقدر يتكلم انا زوجك اللحين
هدى: ولو استحي وما ابي شيء ينقال بحقي
سكت طلال لدقايق وبعدها استأذن بادب وقطع الخط
رفعت الشاشه ناظرت في رقمه حست بالدموع تتجمع في عيونها شيء منها ماتبيه يقفل الخط وشيء منها يمنعها ويمنع الشعور الحلو اللي تحسه معاه
فتحت غرفة سهاد لقتها ساجده على سجادتها حطت جوالها على التسريحه وطلعت بسرعه..




امريكا...

شرب المويا اللي اعطاه يوسف
يوسف: كيف تحس نفسك
نايف وهو يحرك راسه: الحمدلله احس نفسي تمام ولا كان شيء جاني
يوسف : الحمدلله
نايف: اخذت رقم راشد لاني باشكره
يوسف:لا بس معلوماته بتكون في مكتبك بكره
نايف: وش سر هالرجعه
يوسف : بما انك صرت احسن فاسمع مايسرك طويل العمر درى بحساب الانسه
نايف وهو مفتح عيونه: قل والله
يوسف بنظرته البارده: والله
نايف ضحك على برود يوسف : استغفر الله بس والدبره اللحين وش اقول له
يوسف: صرفتها وقلت له انها مهري
نايف : مهرك؟!
يوسف: ماعرف ان الحساب يكون للانسه لما سأل قلت له بان الحساب لي وانت حولت لي سلف عشان اجمع منه مهري
نايف وهو متشقق من الفرحه: تدري انك احلى شي بحياتي
يوسف بنظره مشمئزه: وفر كلامك بس
تقهقه نايف على اسلوب يوسف اللي ماراح يتغير
اعلنوا عن الرحله ومشوا الاثنين وهم يحسبون متى يوصلون بما ان رحلتهم دايركت لرياض


اللي ماتعرفوه عن يوسف انه كان ابوه مدرب في النادي الرياضي لنايف تعرفوا على بعض وهم بسن العشرين وبعدها افترقوا نايف درس بامريكا ويوسف بسنغفورا
وبعد تخرجه تفاجاء نايف بان يوسف قدم على وظيفه عندهم فصار هو اليد اليمنى لنايف في كل شيء


8:00p.m


موعد اعتراف...

ريحة القهوه والبخور ماليه البيت والاجواء البناتيه اللي عملتها في الحديقه والمسبح
جاسم وهو يضحك على حماسها: خفي اشوي لا تطيرين
ضحكت بفرحه: وربي فرحتي اليوم لا توصف صديقاتي وحريم خواني بيجتمعون يااااي
جاسم وهو يضحك: اسكتي لايسمعك احد
حطت يدها على فمها: في الحفظ والصون ..غمزت له... وش رايك اضبط لك الجو.. ااااي
جدتها من خلفها ضربتها بالعصا : يلي ما تستحين جو وش اللي بتضبطينه خربي خربي بس بعقل الولد
ندى وهي تمسد ظهرها: يمه والله يان جسمي يشكي من عصاك
الجده هيا: انتي اللي تجيبينه لنفسك
جاسم وهو يضحك على تعابير وجهها اللي تغيرت من الالم
الجده هيا: وانت يا مال الطير وش تبي مرتز هنا وتعوبل بهالجنيه اذلف مابقى شيء ويوصلون الضيوف
ندى تمد له لسانه : الدنيا اتلف اتلف اتلف وتدور يا سبحااان الله
الجده هيا: جهزوا العشاء
ندى وهي ترمش بدلع: دام عين السيح هنا مابه شيء ناقص تطمني يالغاليه
الجده هيا : نشوف بعدين
دخل ابو نايف: السلام عليكم
الكل رد السلام
جلس بجنب امه بعد ماحب راسها: جاسم عمتك مريم دقت تقول روح جيبها هي وبناتها سيف نايم ورجلها ماهو بالبيت
غمزت له ندى: قوم ياسيد قوم لا تتأخر
قام جاسم وهو يتوعدها بعيونه
ابتسم ابوها: اتركي عنك اخوك وقولي لي جهزتي كل شيء ناقصك شيء
تكلمت جدتها مقاطعه لها: ابد تقول ماهو ناقصها شيء وليا راحوا قالت يايمه نسيت ذا وذاك
ضحك ابو نايف على عيون ندى اللي كبرت من كثر ما هي مصدومه من تقليد جدتها لها: غمضي يايبه لا تروح كحلتك هههههههههههههخ
ناظرت له امه: اتصلت على زوج اختك شفت وينه فيه
تغيرت ملامحه : لا ما اتصلت
ناظرت في ندى اللي حست بان الجو تكهرب: قومي شوفي ضيوفك قربوا يوصلون
وقفت ندى وهي فاهمه ان جدتها مجهزه نقاش حاد وماتبي احد يسمعه غير ابوها



p.m9:00

نزلت عذاري ووراها لمى وهم يتهامسون ويضحكون مع بعضهم
ابو سطام: حيى الله هالطله
لفت لمى حول نفسها ووقفت قدامه: وش رايك ببنتك
كانت لابسه فستان اسود قصير باكمام طويله وشعرها لامته ذيل حصان وبف بسيط من قدام
ابو سطام: حلووووين
غمزت له عذاري: بس مو احلى من خالتي
ضحك وهو يمسك اذنها: من فين جبتي هالشقاوه
ضحكت عذاري : اعجبك
هديل وهي نازله من على الدرج: يبه ترا البيت ماهو بخالي العيال هنا بس اذا قروشتهم...صرفتهم... بيفضى لك الجو يالحبيب
ابو سطام وهو يناظر عذاري: ابعدي عنها ترا ماوراها الا الخراب
هديل توقف بنص الدرج و بطريقة تمثيليه تضرب صدرها وتشهق: هذاا جزاتي باعطيك خلوه شرعيه
قرصتها امس : انزلي بس
تحسست مكان القرصه : يمه ترا باشكيك لابوي من كثر القرص
ابو سطام وهو يطوق كتف زوجته اللي نزلت عنده: اشكي ماراح اسمع لك
بوزت : حكم القوي على الضعيف
ام سطام وهي تسمي على عذاري ولمى: اسم الله عليكم وش هالزين
هديل: لااااا ظلللم ليه ما تسمين علي ولا انا البذره المنتهيه
تقهقه ابوها على وصفها ..مادرت بانها اغلى شيء عند جدها..





ركبت السياره وهي مستحيه لكزتها شيماء وهي تهمس لها: ناظري ناظري ماهو بحولك تمقلي زين يمكن مايعجبك
ضربت شيماء بفخذها حتى تأوهت التفتت امهم اللي كانت راكبه في المقعد الامامي: وش بلاك
حركت لمياء كفها بان مافي شيء
ابتسم على حركتها وقلبه يخفق بجنون
رفعت عينها له كان طويل وابيض عكسها هي حنطيه
شعره اسود وناعم عكسها شعرها كيرلي عيونه ورسمتها الحاده وذقنه البارز وابتسامته الحلوه غير ادبه بالسوالف مع امها دنقت وهي تفرك يديها بحياء.. وش اللي اعجبه ببنت عاديه مثلي ..
رفع بصره للمرايا شافها مدنقه لتحت ابتسم وبقلبه دعوه حب ان ربي يحفظها له



...☆لقاء حبيبين☆.....


فتح عيونه وهو يحس بتعب : يوسف
تقرب منه يوسف: سم
نايف وهو يمسح على عيونه: كم صار لنا في الجو
يوسف: تقريبا ساعه ونص وش فيك تحس بشيء
نايف : ايه احس بخمول وتعب في رقبتي
يوسف رفع يده لرقبة نايف : شيء طبيعي من بعد الجرعه اللي اخذتها
مسح نايف على وجهه الى الان ماهو مستوعب اللي حصل له: الحمدلله على كل حال وش سويت معاه
يوسف : خلصت كل الاجراءات وقررت بعدم المسامحه ارسلت التفويض للمحكمه وهي بتشوف شغلها وعطيتهم رقمي اذا احتاجوا شيء يكلموني .
هز نايف راسه وكانه يشكره
ذاع الكابتن بالدول اللي مروا منها
يوسف: خلاص هانت مابقى الا 3 ساعات ونوصل باذن الله


p.m10:00

دخلت وبيدها اكواس العصير : يا هلا ومسهلا مابغينا نشوفكم
ضحكت سهاد: ندى ماهو بلايق عليك اجلسي بس
ناظرت لها ندى بطرف عينها وقربت العصير منها: اكبه
سهاد صرخت : لا لا امزززح
ندى بضحكه: ناس ماتجي الا بالعين الحمرا
تقربت من عذاري وهي تبتسم لها باعجاب: تفضلي ياحلوه
ابتسمت عذاري بارتباك واخذت عصير البرتقال
ناظرتها ندى بابتسامه كبيره: تحبين البرتقال
عذاري بتعجب لكن بادلتها الابتسامه: ايه
هديل: تشرب باليوم اربعة اكواس منه
ندى : هههه باالعافيه
عذاري وهي تتوعد هديل بعيونها: الله يعافيك

دخلت هنادي وبعدها سمر نزلت النقاب وهي تتنفس : احح يازين الهواء
قرصتها سمر بعد ماشافت بان الكل جالس
هنادي: ااي وجع ان شاء الله
اشرت سمر لها بعيونها على البنات
لفت وجهها وهي تبتسم بهبله: اوووبس
الكل ضحك عليهااا واكثرهم عذاري اللي بتحرها
دخلت شيما وبيدها انواع كثيره من الشبيات والعصيرات الغازيه: طرررريق
ابتعدت سمر وهنادي وهم يبعدون العبايات ويعطونها للخدامه
حطت شيماء الاغراض على الطاوله وناظرت في لمياء اختها وفي ندى اللي تسولف ولا هي يمها: اااااااه قومن يامال العافيه انكسر ظهري وانتن جالسات
سهاد وهديل: هههههههههههههخهخ احسن
ناظرت فيهم: علي الحرام ان ماتقدمون الباقي الا انتم
رفعت سهاد الخداديه: انقربتي بارميها عليك
شيماء وهي ترفع شعرها اللي نزل على وجهها : يلا ارميها
لمياء : ههههه ما انصحك
ناظرت لها وهي تقلدها: ما انصحك
ندى وهي تحضن لمياء: كله ولا مرت اخوي
الكل ناظر بتعجب الا هنادي وشيماء
سمر: زوجة ميين
ندى وهي تشد بحضنها لمياء المستحيه: زوجة جسوم ان شاء الله
الكل بارك لها ودعوا لهم بالسعاده
رفعت عذاري عينها لسمر لان سؤالها عن زوجة من تكون كان
واضح فيه شوي حذر وخوف
اشاحت بنظرها بعد ما جت عين سمر بعينها
استغربت سمر منها لكنها طنشت



لقاء كتب من الماضي البعيد..♡



بعد ماوصل خواته و سلم على خاله وجاسم طلع لسيارته وحركها رن جواله رفعه: الوو
سامر: وينك فيه
بدر وهو عاقد جبينه: سامر وش فيك انا ببيت خالي سعود
سامر: دريت ان ابويا طلع من البيت ولا عطاكم خبر
بدر وهو ينفث: حسبت فيك شيء
سامر: وذا ماهو بشيء
بدر وهو يلف بالسياره للكفي اللي قدامه: ابوك ماهي اول مره يسويها
سامر: تدري انه هنا بامريكا
بدر : وشو امريكا
سامر: ايه امريكا اللحين دقت علي السفاره لان ابوك ضيع
بدر وهو يضرب بيده على الدركسون بقهر: راح لها طق هالمسافه كلها عشان يشوفها
سامر: مين تقصد
بدر: اسأله دامه عندك وانا اللحين باقفل وياويلك اذا دقيت على امي وقلت لها شيء يكفي اللي فيها

10:54p.m

عند البنات .. طلعن للحديقه وجلسوا بالخيمه اللي صممتها ندى والكل انبهر باالجوء اللي عملته لهم
جلسوا حول الجلسه الدائريه وصاروا يسولفون عن اشياء كثير و من ضمنها مخططاتهم لزواج هدى وساره
وقفت ندى: بنااات
الكل لف لها
ندى: وش رايكم نجيب كره ونلعب
سهاد وهديل صرخوا بحماس: موافقييين
ندى: ههههههههههه مافيكم رجا والباقي
ساره وهدى وشيماء اعتذروا بحكم لبسهم الطويل
لمى قررت تلعب بالفستان ماعندها مشكله

عذاري وهديل وندى بفريق
سهاد ولمى وهنادي بفريق
لمياء هي الحارس لفريق ندى ووحده من الخدم لفريق سهاد
سمر مابغت تلعب فصارت حكم

بدوا باللعب والصراخ والضحك اللي ماينتهي


بعد ربع ساعه لعب الكل تعب وجلس وكان 1 -0 لفريق سهاد
عذاري: لاااااا اهئ
الكل ناظر فيها: وش فيك
عذاري : بنطلوني انقطع
الكل: هههههههههههههههههههههه
سهاد: من جريك الاعوج
عذاري بحزن على بنطلونها المفضل: انقلعي اهئ بنطلوني كله من الست هديل كل ما جيت باركض سحبتني منه
هديل: يا ويلي وانا وش دخلني ببنطلونك
عذاري بوزت : واللحين وش السوات
ندى ناظرت بلبس عذاري كان بنطلون اسود وجاكيت جلد بني وجزمه جلد لنص الساق شعرها لامته لفوق بطريقه عشوائيه معطيتها شكل جذاب: تعالي اعطيك من بناطيلي حتى اخلي الخدامه تخيطه لك
ابتسمت عذاري: تكسبين اجري
مشت ورا هديل وهي تمد لسانها للبنات
رجعوا البنات لسوالفهم الا ساره تراسل حمد^-*

وصلوا لصاله الداخليه وشافوا الجده هيا قفت عذاري بحرج وهي تضغط على يد ندى
لفت ندى لها باستغراب لكنها ابتسمت لما شافتها منحرجه وتنزل الجاكيت لجل ما يوضح القطع اللي فيه
همست لها ندى: ماعليك ماراح تلاحظ لان القطع مو واضح وانتي واقفه
سحبتها لعند جددتها وهي تحرك حواجبها لجدتها اللي فهمت عليها
عذاري: السلام عليكم ... تقربت من الجده هيا وحبت راسها ورفعت يدها وحبتها...
ندى ابتسمت لحركة عذاري العفويه
ابتسمت الجده هيا من اخلاقها وهي تمسح على راس عذاري: استريحي يمه
عذاري منحرجه وساكته
ندى تأشر لجدتها ان بنطلون عذاري انقطع لكن جدتها مافهمت
نفثت بقلة صبر : يمه باطلع عذاري لفوق ونرجع لك
ناظرت الجده في عذاري اللي كانت تبتسم لندى : خلاص روحوا يمه وبعدين مروا عندي اسولف معكم
عذاري: ان شاء الله يمه
ابتسمت الجده... والله و فزت يا نايف ...
...
...
.....
فتحت لها غرفتها : تفضلي
دخلتها عذاري وهي تسمي كانت غرفتها غرفة ناعمه طاغي عليها اللون الرمادي والوردي مكتبتها الصغيره الرماديه وصور عليها جهلت من يكونون اصحابها الا صوره وحده عرفت الشخص اللي فيها.. هذا هو...
طلعت ندى من غرفة الملابس وبيده اربع بناطيل بالون الاسود وزعتها على السرير وجلست: يلا اختاري
تقربت عذاري منها: كان اخترتي لي انتي اي شيء
ندى وهي ترفع لها واحد كان قماشه ناعم وماسك: شوفي ذا بيطلع عليك يجنن يلا البسيه ووريني
عذاري باحراج : ابي دورة المياه ... اعزكم الله... لان يديني كلها تراب
ندى بوزت لان حمامها حالياً اقطعوا عنه المويا لانها حبت تغيره لمعت براسها فكره ابتسمت: اوك انا حمامي الان قيد التصليح باوديك حمام ثاني
حركت راسها بالموافقه ومشت وراها فتحت لها باب الغرفه المقابله لها دخلت ورا ندى اللي تقدمت وشغلت الانوار وهي مندهشه كانت ريحتها عطر رجالي انفتحت الاضواء واندهشت اكثر من الغرفه كانت كبيره وواسعه او بالاحرى كان جناح اللون الطاغي عليها هو الاسود والذهبي الا قليل من المداخلات البيضاء
قالت بانبهار : ماشاء الله الغرفه رهيبه
ابتسمت ندى...
ليتك تدرين لمين بتكون هالغرفه...
اوك تعالي هذا هو الحمام خذي راحتك مافيه احد هنا ومتى ماخلصتي انزلي اوك عيوني
ابتسمت لها عذاري بمحبه : مشكوره حبيبتي
ردت لها الابتسامه وطلعت وبقلبها الف دعوه لعذاري ولاخوها


11:00



نزل من الطايره: احسني بدري وصلنا
يوسف: وين بدري وانت من الساعه 7 وربع وانت بطايره
نايف بضحكه: والله احس بسرعه وصلنا
يوسف : تبي عشا
نايف : لا لا مشتاق للبيت ابي البيت
استقبلهم السواق وتحركوا للفيلا




دخل سطام عليهم بعد ماسمع صوت التلفزيون : وش تتفرجون
راكان وهو يخم من المكسرات اللي قدامه : تعال والله فلم على مستوى
جلس سطام بين راكان وحسام وصب له شاهي
حسام: متى بتروح للبنات
سطام: اروح وين
حسام: راحوا عند صديقة بنت خالي يحيى ابوي وصلهم وقالي اقلك ترجعهم
سطام: والله يا ان جسمي مكسر طيب هم اتصلوا
راكان بضحكه وهو يرمي قشر الفستق: والله لو العيب ماتشوف ارقامهم تلقاهم اللحين منغمسين في فساتينهم ولا شعورهم ولا مكياجهم ومن السوالف كلها مايلقطون غير الحش
ضحكوا الاثنين على مصداقية راكان
سطام :ربي يعين اذا دقوا رحت لهم لبيت مين راحوا
ناظر راكان لوجه حسام وقال: بيت اهل نايف الحمد
لفوا حسام وسطام له : وشوووو
راكان وهو يرفع يده :اللي سمعتوه
نزل سطام كاسة الشاي : الله يستر لا يخر احد بكلمه وتدري
حسام وعينه على الشاشه لكن قلبه مع عذاري




دخلت ولقت عذاري تفك جزمتها.. اكرم القارئ.. ابتسمت لها وهي تحط عندها المشط والمكياج : خذي راحتك البنات تحت بالمسبح جالسات اذا خلصتي انزلي
عذاري: ان شاء الله رجعت دنقت لجزمتها .. اكرمكم...
ندى: وش فيها
عذاري وهي عاقده جبينها: مو راضيه تنفك
ندى هاتي احاول
عذاري وهي تنزل رجلها: حشى والله انا باحاول فيها لين تنفك
ندى: عادي والله هاتي احاول
عذاري رفضت وبالاخير استسلمت ندى وطلعت
رفعت عينها لساعة الحيط الذهبيه : اووف 11:20
حاولت فيها لين انفكت اخذت البنطلون ودخلت للدوره المياه







نايف وهو يناظر من النافذه : يوسف بكره ابغاك تراجع في سبب الغاء الحساب
يوسف: ان شاء الله
نايف: تهقى عادل له يد بالسالفه
يوسف: الله اعلم
نايف زفر بضيقه وسكت وبعد ثواني لف ليوسف: فيه احد يدري اني رجعت
يوسف: ايه ابوك يدري
سكت نايف وجلس يتفقد جواله






دقت الباب ودخلت بعد ماسمعت صوت حياة الخافت
مشاعل: حياة انزلي سولفي معي طفشت
حياة: مالي خلق
نطت مشاعل على السرير وجلست تناقز عليه
قامت حياة وهي تناظر لمشاعل : مشاعل انقلعي خليني انام
مشاعل وهي ماوقفت : لا لا لا قوووومي
حياة ضحكت عليها وقامت تناقز معاها: ربي بلاني فيك
مشاعل بدلع: واجمل بلاء صح
حياة تضحك: ايه هين مانقول الا ان الله مع الصابرين
وقفت مشاعل وتخصرت: نعم يابنت وش فيني وش زيني الكل يحبني بسم الله علي
ضحكت حياة وجلست لانها عرفت وش اللي يهجد اختها
: هاااااااااي
التفتوا الثنتين على الصوت ابتسمت حياة وركضت له تسلم عليه
رفعت مشاعل عينها لسقف اكملت
عمهم ناصر: وش قلتي يا شعيل ما سمعتك
ضربت برجلها على الكرسي بحره لانها تكره هالاسم لكن اختل توازنها وطاحت وانفجر الكل ضحك على شكلها
ناظر ناصر لحياة وهي تضحك وابتسم على ضحكتها





p.m.11:35


: وصلنا
نايف: الحمدلله على سلامتنا . فتح بااب السياره ونزل بسرعه سمع صوت ازعاج من الجهه الثانيه للحديقه توجهه للباب ودق الجرس فتحت له الخادمه اخذت من الاغراض ودخل توجه لغرفة جدته
كانت مشغله التلفزيون على القران وانسادحه تسمعه ولما شافت نايف فزت بسرعه وهي تهلي : ياهلا وغلا ياهلا اسفرت وانورت .. حضنته وجلست تبوس فيه وتضربه ليه ماعلمها بانه راجع...
ضحك عليها وهو يحضنها : اشتقت لك يالغاليه
ابتعدت عنه: دامك اشتقت لي وراك ماترجع ابكر من كذا
ابتسم لها وباس راسها : وين ابوي وجاسم
: طلعوا من البيت لان صديقات اختك هنا ..قالت بضحكه... وهي تطرد فيهم من الصباح
نايف: ههههههههه بعدي والله خليها تستانس شوي اجل انا طالع اتحمم واريح شوي وخلي الخدامه تجهز لي العشا
الجده هيا: ان شاء الله يابوي
باس كفها وراح
ناظرت بكفها بنفس الكف ونفس المكان اللي حبتها فيه عذاري


رقى الدرج وجواله رن رد بسرعه: هلا وغلا بقمر
بدر: يامال العافيه وينك انت بالسعوديه
نايف ايه توني واصل وحدي منتهي ادور لسرير





نزلت الكحل من يدها بعد ماسمعت صوت رجال
تقربت من الباب وهي تسمع ضحكته : ياربي ليكون هذي غرفته
رفعت يدها لصدرها: لا لا قالت مافيه احد اكيد تسامعت تقربت من الباب اكثر وماعاد سمعت شيء
اطرافها بردت من الخوف لما سمعت الصوت قرب من الغرفه
دارت بالغرفه تبي تتخبى وركضت للحمام : اهئ لا لا ياربي ليه مافيه مفتاح على الباب
ياااارب استرها علي اهئ


فتح باب غرفته واستغرب ان الانوار شغااله قفل الباب وتوجه لسرير فتح عيونه على وسعها لما شاف المكياج على التسريحه تقرب منها وهو يرفع الروج المفتوح ويقفله والكحل المرمي باهمال
: ما احد غير ندى
فصخ تيشيرته واخذ له من الكبت


منشفه جديده وادوات الحلاقه وتوجه للحمام




عند البنات

ساره : عذاري تأخرت
ندى: شوي واروح اشوفها اكيد جدتي مسكتها لجل تسولف معها
هديل: هههههههههه هذا اذا حصلت سوالف من عذاري
الكل: هههههههههههههههههههههه
شيماء: ماشاءالله عليها تستحي مره
شهد: سبحان الله مثل سهاد
سهاد تناظر لها من طرف عينها: وش قصدك
شهد: ماقصدت شيء
سهاد: ايه تعدلي
الكل: هههههههههههههههههه
سمر: ايه يالمياء متى الخطوبه الرسميه
لمياء بخجل: ان شاء الله بعد مايرجع نايف
الكل يعلق عليها وعلى خجلها





فتح باب الحمام وحط اغراضه على في المكان المخصص لها : يوه نسيت الرغوه
طلع ورجع جابها قفل الباب وجلس يحلق ذقنه


دمعها على خدها وترجف من الخوف حست باطرافها تبرد... اكيد يبي يتروش اااه ياربي وانا ماجلست الافي البانيو اه ياربي وش اسوي

نايف وهو يلعب بشعره اللي طال: يلا بكره اروح الصالون يقصونه لي
فسخ بنطلونه ومابقى عليه الا الشورت توجه للبانيو حس بخيال اسود سم بنفسه : مين هنا
تقرب وابعد الستاره وفتح عيونه على وسعها من اللي شافه..

انتهى....