الحلقة الثالثة
ظبطت المنبه على قبل ميعاد السيكشن بساعة
عشان انا عارفانى بموووت في الانتخة
كل ما المنبه يرن اطفيه واقول هاخد بس غفوة 5 دقايق
واصحى بعدها بنص ساعة
المهم فطرت وغسلت وشي ولبست واتشيكت
نزلت ركبت الميكروباص
طب هعرف هو فين ازاى بقي؟؟
ولا اعرف ليه هو اصلا كل شوية الاقيه في وشي
قعدت طوول اليوم ماشوفتش خلقته
ياربي اجيبه ازاى ده وانا ولا اعرف اسمه ولا اى حاجة عنه
ايه الغباء ده يخربيت الزهايمر
ماهو كان في السيكشن الاحد الساعة 10 معمل كيميا
ايوة انا اروح اشوف مين كان هناك وانا هعرف جدوله
الله عليا والله
رحت الحيطة اللى متعلق عليها الجداول
يابوووووووووووى
ايه كل الجداول دى
وبعد معاناااااة وتمحيص وتفحيص في الجداول
اخيييييرا وجدتتتتته
سنة تالتة قسم كيميا صناعى
دا ايه النحس ده ياربي مش عليه محاضرات ولا انهاردة ولا بكرة
هفضل بقي مديوناله يومين
يارب يدينى العمر واديهومله خلينى اخلص
احسن ده شكله عيل تيت ممكن يدخلنى النار على 5 جنيه
اوووووف انا اصلا مش عليا محاضرات الاربعاء مش مشكلة بقي انزله مخصوص
خلصت محاضراتى وروحت
وكذلك اليوم اللى بعده
خلصت وروحت البيت وقولت اظبط المنبه قبل ما انام
هو كان عنده اول محاضرة تانى يوم الساعة 8 الصبح
وانا لو وقف على شعر راسه مش هنزل بدرى
دانا بفوت كل محاضراتى اللى بتبقي 8 الصبح دى
استنوا اقوم اجيب الجدول اشوف عنده تانى امتى
اهو عنده محاضرة من 8 ل10 وسيكشن من11 ل1
انا اكون عنده هناك 10 بعد المحاضرة بالظبط عشان الحقه في الساعة اللى قبل السيكشن
اروح الزقله عالباب من قبل 10 احسن يروح في حتة كده ولا كده معرفش اجيبه
قششششششطة الحق انام بقي عشان اخد راحتى في النوم
جه يوم الاربع صحيت الساعة 9 نطيت في الهدوم بسرعة
وخدتلى ساندوتش اكله في السكة ونزلت ركبت ورحت على باب السيكشن
حبة ولقيت العيال كلهم طالعين قعدت ابحلق فيهم مالقتهوش
يييييه شكله ماجاش انهاردة ونزلت عالفاضى
ماشية بقي انفخ ومش طايقة نفسي
لقيت البت صاحبتى اللى كنت حكتلكم عنها قبل كده
مانا عارفاكم زهايمر وبتنسوا
هيا مش صاحبتى اوى يعنى
بس قررت انها تبقي صاحبتى اهو عالاقل في الدفعة اللى قبلى وتظبطنى
ورق وتلخيصات والذى منه
لقتها قاعدة مع حبة بنات شكلهم كده عساسيل
ومع انى انطوائية ومعرفش اتكلم مع حد معرفوش
بس قولت الواحد دخل كلية بقي ولازم ينفتح على الحياة
رحت قعدت معاهم واتعرفت عليهم وطلعوا بنات عساسيل خالص
قولت استفيد بقي واسالهم عالدكاترة ونزلوا حكايااااات
يالهووووى دول الدكاترة دول طلعوا حكاية
لمحته بطرف عينى ماشي مع اتنين اصحابه
قولت للبت صاحبتى الواد اهوووو
قالتلى واد مين؟؟ قولتلها اللى دفعلى التاكسي
قالتلى انهى فيهم
قولتلها اللى في النص ابو نضارة ده
قالتلى هشام!!
قولتلها انتى تعرفيه منين
قالتلى يابنتى ده اشهر من النار عالعلم
داحنا مسميينه عندنا هشام فلتة
عارفة انتى نجيبة متولى الخولى
هو بقي النسخة المذكر منها
ده يابنتى هشام معيد المستقبل
اى حد مش فاهم حاجة دفعته او الدفعات اللى قبله وحتى دفعة رابعة
بيروحوله يشرحلهم والدكاترة كلهم بيحبوه ويحترموه
قولتلها طب استنى بقي اما اديله الفلوس واجى
قالتلى استنى ايه بس فهمينى الاول
قولتلها بعدين بعدييين
رايحة عليه لقيت اصحابه بيقولوله يا عم خنقتنا كل ده عند الدكتور بتهبب ايه
رد وقالهم كنت بقنعه بوجهة نظرى وماسبتوش غير لما اقتنع
الدكتور اقتنع بوجهة نظره؟؟
شكله طلع فلتة بجد بس ما علينا وانا مالي انا عايزة اديله فلوسه ومشوفش وشه تاني
- احم احم لو سمحت
اللهم طولك ياروح (في سرى طبعا)
- لو سمحت
يادي النيلة هيعمل فيها عم الزفت التقييل (في سري بردو اصلي مقلتولكوش اني شجاعة جدا)
- لو سمحت يا استاذ هشام
اوباااااا طلعت منى عالية مسرسعععععة باصرخ
ولقيتلكم بقي كل الكلية بتبص عليا
- لقيته لف بكل هدوء حضرتك بتكلمينى انا؟؟
عبيط ده ولا ايه
- احم احم ايوة اتفضل
- ايه دول؟؟
- دول الخمسة جنيه اللى حضرتك دفعتهم للتاكسي
- تاكسي ايه؟؟
هيعملي فيها هندى بقي
- اتفضل خد الفلوس وخلصنى
(يخربيتك خدهم بقي الناس هيفكرونى بتنحرش بيك)
بص على ايدى وبكل برود قاللى
- عيب يا انسة احنا زمايل
كلاكيت تانى مرة ونفس الموشح اللى اديته لسواق التاكسي
- نعم نعم هو حضرتك هتبقشش عليا انت اصلا تعرفنى منين عشان تدفعلى
ولسه جاية اكمل الموشح لقيته بيسكتنى وبيقوللى بس بس احنا في الكلية هتلمى علينا الناس وفي عنيه نظرات رجاء
وياستى لو عالفلوس طلعيها لله بعد اذنك ومشي وسابنى واقفة لوحدى والناس كلها بتبصلى بصات غريبة
الواد المجرم ده احرجني خالص
خلاني فنص هدومي ا نا عايزة اعيط منك لله يا بعيد الهي ما تكسب ولا تخسر وتفضل متعلق كده حسبي الله ونعم الوكيل فيك انا غلطانة اني عايزة ارجعلك فلوسك والله لجايبة بيهم بيبسي وشارباه ومش هخليك تاخد ثواب يا معفن
اهئ اهئئئ
فاجأة لقيت النور طفا وماحستش بنفسيمضروبة في عيني
صحيت فاجأة لقيت ناس كتير اووووووى حواليا
واللى يدينى عصير واللى يدينى شيكولاتة
هو فيه ايه ليكونوا فكرونى بشحت
وبعدين ايه التراوة دى
بحط ايدى على وشي لقيته مبلول اه يا اندال مين اللى تف عليا؟؟
حسيت بحد بيحاول يقلعنى الطرحة
انتى بتعملى ايييه ومسكتها من ايديها
(حتى البنات بتتحرش بيا يا وقعة مربربة , بس لاااااا كله الا الشرف هيا البنت مننا ايه غير شرف وحبة حاجات فوق بعض)
قمت حاولت اقعد والناس عمالة تسالنى انتى كويسة؟؟
نجيبلك حاجة؟؟
انتى بتشتكى من الضغط او السكر؟؟
ببص حواليا لقيته واقف معاهم وعنيه فيها نظرة قلق
هو فيه ايه ؟؟
لقيت البت ياسمين صاحبتى بتقولهم خلاص هيا فاقت وسندتنى هيا والبنات اللى معاها
(اه فقت خلاص بيتك بيتك ياختى منك له له له , هيا الناس كده مابتصدق تلاقي جنازة وتشبع فيها لطم )
ودونى عالكافتيريا لقيتلكم بسلامته جاي وجايبلي شيكولاتات وعصاير وبيقوللى انتى كويسة؟اتفضلى
هو جاى يكمل عليا ولا ايه البااااااارد
تعرفوا انا لو بس كان فيا صحة كنت قمت جبته من زمارة رقابته وادتله المين على وشه عدلوه
هو فاكرنى شحاتة ولا ايه جاى يصرف عليا
لقيت ياسمين بتقوله شكرا يا هشام هيا خلاص بقت كويسة
(اه كويسة غور بقي روح بيتكم ياض شكلك بيلبش جتتىىىى)
جدا
البت ياسمين روحتنى لحد البيت حرام والله طلعت اصيلة البت دى
سلام بقي اشوفكم الحلقة الجاية