[لامارا]

الحلقة الخامسة


مش قادرة اوصفلكم الاجازة مرت بطيئة ومملة اد ايه المفروض انها اسبوعين اتنين بس بسسب الاوضاع الامنية في البلد قعدنا شهر ونص
وحتى مخرجتش
يحرق السياسة اللي بتضيع الاجازات
المهم بقى اخيييييييرا رجعت الدراسة عمري ما كنت افتكر اني هفرح برجوع الدراسة والقرف بس مش عارفة ليه المرة دي كان نفسي اروح الكلية اوي اشوف منة واصحابي
وبصراحة بردو الواد هشام ده مع اني معرفوش اوي بس اتعودت انى اشوفه وحاسة انى عايزة انزل بقي عشان اشوفه
متفتكروش حاجة وحشة انا عارفة دماغكم شمال (ههههه زيي)* انا بس علشان اشكره واقوله اني جبت امتياز بسببه
روحت بقى اول يوم الكلية طبعا انا كنت علطول قبل ما انزل اخد وقفت كتييييييير فتجهيز الاكل علشان افطر والمم اشيائي المرة دي بقى اول مرة اطول ادام المراية مع اني كنت بلبس فثواني
صحيت من الساعة6 الصبح
تخيلوا وانا عدوة الصحيان بدري ينيلك يا منة للدرجة دي وحشاني (ههههههههههههههه صفوا النية اصلي بحبها صاحبتي بقى)
اعدت اجرب احط زبدة كاكاو حمرا وامسحها واحطها وامسحها تحسوني عندي تخلف عقلي فالاخر قرت امسحها اصل معلش يا منة مش هبوظ اخلاقي من اولها علشانك انتي فاكرة نفسك ايه (ههههههههههههههههه)
الساعة بقت 8 مرة واحدة
اما اكلم البت منة بقى اقولها ننزل بدري بقى لحسن خلاص مبقتش طايقة قعدة البيت دي وانا بكلمها اقولها ننزل بدري مكانتش مصدقة ودانها انا اللي بفوت محاضرات الصبح بدري مصممة ننزل بدري سبحان الله
المهم بقى مش هطول عليكم نزلنا الكلية وفضلت مستنية اليوم كله مش عارفة مستنية ايه بس استنيت ومحصلش حاجة انا حاسة اني بكره الكلية دي اوي ...انا ايه اللي حصلي بس انا عمري ما كنت مودية كده ده غير اني بقت دمعتي قريبة جدا
وجه تاني يوم والتالت وهكذا لاخر الاسبوع
لأ بأه كده كتير بصراحة ازاي يعني فلتة ومعيد المستقبل ويبقى مستهتر بالشكل ده ؟؟اسبوع كامل غياب ,,, وانا مالي انا ايه يهمني اصلا ما كل واحد حر وبعدين انا شاغلة نفسي بيه ليه ,,,, متبقيش عبيطة انتي بتفكري وشاغلة نفسك بيه وهو تلاقيه نسى انتي مين اصلا,,, لحسن يكون عنده مشكلة يا لهوي اكيد تعبان او تلاقيه محبط وعنده اكتئاب يارب ميكونش حصل حاجة وحشة ويكون كويس ويكون مسافر بيتفسح فاي حتة ياااااااااااااااااااااااا رب
معرفش ايه خلاني ادخل على جروب الدفعة على الفيس بوك مع اني عمري ما دخلت عليه بوستاتهم بتستفزني اوي بصراحة ,,,,, بس قلت ادخل ادور عليه ومجاش فدماغي اني اشوف اعضاء الجروب ذكاء مستفحل بقى بعيد عنكم
فضلت ادور بالطريقة المتخلفة بقى اشوف بوست بوست ومين عامل لايك عليه ومين كاتب كومنت بعد تلت او اربع ساعات تقريبا (مش عارفة الناس دي رغايين كده ليه كل دي بوستات ينيلكم) لقيت بوست نازل من اسبوعين عزاء للطالب فالفرقة الرابعة كيميا صناعي هشام عبد السلام الدمنهوري في وفاة والده
معقول يكون هو؟؟
اناا معرفش غيران اسمه هشام فلته
يارب ميطلعش هو
وبعدين لو كان هو اكيد كانت منة عرفت من اخوها وقالتلي ولا ايه ؟
خلاص هسألها .....
اتصلت بمنة اسالها بس طبعا حاولت مايبانش انى بسال عليه
فبقولها دانا دخلت على جروب الدفعة بقلب في البوستات لقيت ياعينى طالب في رابعة والده اتوفى
الواحد بصراحة مايتخيلش الحياة ممكن تكون ازاى من غير بابا
الطالب ياعينى اسمه حاجة كده الدمنهورى
يا ترى عامل ايه دلوقتى؟؟
ربنا يصبره يارب ويصبر مامته لو عايشة
يالهوى لمتكونش عايشة يبقي ابوه وامه الاتنين ميتين يا حبيبي
واخيييييرا ابو الهول نطق
لقيت منة بتقوللى لا يابنتى مامته عايشة ربنا يصبرهم يارب
قولتلها هو انتى تعرفيه؟؟
قالتلى اه يابنتى دا هشام فلتة
دا طلع هو فعلا واتجننت عليها انتي ازاي متقوليليش وفضلت ازعقلها
قالتلي عادى يعنى ماجتش مناسبة وبعدين انتى مالك مهتمة اوى بالموضوع كده؟
قولتلها عشان عيب اوى يعنى عالاقل المفروض نعزيه ده اقل واجب
دا عطل نفسه ايام امتحاناته عشان يذاكرلنا , داحنا جايبين امتياز في الكيميا بسببه
قالتلى يابنتى اصلا مش هتعرفي تعزيه ده قافل تليفونه ولا بينزل من البيت ولا بيشوف حد
الظاهر كان متعلق اوى بباباه الله يرحمه
قولتلها يا حبيييييبي
حبيبك؟؟ طب ياختى كنتى قولى نعرف ان الواد محجوز
محجوز ايه يابنتى وايه الكلام الفارغ ده
بت يا منة انتى قفلتينى اقفلى اقفلى عيلة رخمة صحيح
يييييه طب كنت خدت منها الرقم , بس هيا قالت انه قافل تليفونه , ياترى عامل ايه؟؟
لا حول ولا قوة الا بالله ربنا يصبره يارب
هو كده فوت اول اسبوع دراسة اكيد هيجى تانى اسبوع
ساعتها بقي ابقي اروح اعزيه ان شاء الله
يووه هستنى كل ده؟؟ اعمل ايه بس ياربي
ماهو مافيش في ايدى حاجة غير انى استنى
عدى تانى اسبوع وهو ماجاش برررررده
وكل اللى يشوفنى يقوللى انتى مالك شكلك بقي عامل كده ليه؟
واللى يقوللى بقيتى شبه الموميا
منة قالت انه هيقدم اعتذار السنة دى ومش هيجى
قولتلها طب ممكن تجيبيلى رقمه من اخوكى ونعزيه يعنى دا واجب برده
قالتلى اه مانا حسيتك هتقولى كده وجبتلك الرقم اهو
اتحرجت اوى بصراحة هتقول ايه عنى دلوقتى
بس بقي خلاص يعنى هعمل ايه مش لازم اعزيه
ولا يقول علينا ماعندناش دم ولا ايه
اووووووف خدت منها الرقم ولقيتها بتقول على فكرة هو فتح موبايله خلاص
روحت البيت وكل شوية امسك التليفون اقول اكلمه ؟؟ لالا مش هكلمه
لا اكلمه هعزيه بس, لالالا وانا مالى
لا مالى ازاى بس الواد قعد يشرحلنا ودفعلى التاكسي وجابلى حلويات لما تعبت
لا ايه الهبل ده وبعدين افرض قاللى انتى متصلة ليه
خلاص اخر قرار انا مش هكلمه
وفضلت احاول انام كتييييييير لحد ما رحت اخيرا في النوم
طبعا صحيت متأخر ونزلت الحمد لله المحاضرة كانت الساعة 1
وانا قعدة مع منة في الكافيتيريا شوفففته
يالهوووووى شكله متغير اوى خاسس وحوالين عنيه اسود شبه الباندا
استاذنت من منة وقولتلها هروح الحمام
قالتلى طب استنى جاية معاكى
قوتلها لالا هاجى بسرعة خليكى عشان ماحدش يقعد مكانا
وجريت عشان الحقه , لقيته داخل مكتب وكيل الكلية , شكله جاى عشان يقدم الاعتذار
فضلت واقفة متنحة قدام المكتب وفضلت مستنياه وهو فضل جوه كتييييييير
ومنة قعدت ترن ونا اكنسل وترن تانى واكنسل مش وقتك بقي يا منة
في الاخر لما زهقت لسه جاية برد عليها وقوتلها ايوة يا منة , لقيته خرج قولتلها طب انا هقفل دلوقتى واكلمك بعدين سلام
وجريت وراه لو سمحت يا هشام فضل ماشي ندهته تانى وتالت وفي الاخر رحت وقفت قدامه وقولتله انت اخد في وشك كده ليه
عمالة اندهلك بقالى نص ساعة نفسي اتقطع وكل ده طبعا وانا بنهج
قاللى انا اسف يا علياء ماسمعتكيش خالص والله , كنتى عايزة حاجة؟؟
قولتله انا سمعت يعنى باللى حصل وكده وكنت ... كنت يعنى ... كنت عايزة اقولك البقاء لله
اتلاقيت عنيه دمعت وقاللى اه البقاء والدوام لله بعد اذنك ولسه جاى يمشي
لقيتنى فاجاة بقوله هو انت قدمت اعتذار عن السنة دى خلاص؟
لقيته لف وبصلى شوية وقاللى انتى عرفتى منين؟
قولتله انا ... انا ... يعنى انت خلاص فعلا مش هتيجى السنة دى تانى؟؟
قاللى لا انا كنت جاى بصراحة اظبط مع الدكاترة ووعدتهم انى التزم ان شاء الله من الاسبوع اللى جاى
قولتله امال كنت بتعمل ايه عند الوكيل؟؟
ابتسم ابتسامة رقيقة خالص وقاللى ماهو بيدينا مادة , وكنت ماشي رايح لباقي الدكاترة عشان الحقهم قبل مايمشوا
قولتله بس انت كنت ماشي في الناحية دى والمكاتب من الناحية التانية
لقيته ابتسم تانى وقاللى اه صحيح
معلش مش مركز , طب الحق امشي انا بقي عن اذنك
الله ابتسم ومرتين انا خلاص عرفت انا هعمل ايه
انا هتبنى حالة هشام
اه مش ادخال السرور على قلب مسلم عمل خير؟؟
انا هفضل وراه بقي لحد ما ينسي اللى هو فيه
واهو كله لوجه الله


هعرفكم بقي الحلقة الجاية انا عملت ايه
استنونى