[لامارا]

الحلقة السادسة


طبعا كلكم عايزين تعرفوا عملت ايه؟
بقيت اتصلت بيه كل شوية اتطمن عليه وساعات كنا نخرج سوى
ومرة واحدة رحت معاه السينما وقعدنا ورا خالص (ايموشن مكسوف)
حيلك حيلك انتي وهيا ......
طبعا صدقتوا, بقي انتوا تعرفوا عنى كده برده؟؟اخص عليكم اخصصصصص
انا اه عايزة اساعده بس بصراحة مش عارفة اعمل ايه ومينفعش اعمل حاجة غلط
اعمل ايه فالاحترام ده بس
ياريتني اعرف انحرف شوية افك فيهم عن الواد
ايه قلة الادب دي؟؟ انتي بقيتي مجرمة يا لولو بطلي هزار بقى وفكري بجد
هتعملي ايه يالولو هتعملي ايه يا لولتي
بس وجدتهااااااااااا
الولد ده مش هيخفف عنه الا انه يشترك فجمعية من جمعيات الخير
وافتكرت ان منار بنت خالتي متطوعة فجمعية اسمها احباب الرحمن
انا هتطوع معاهم اشوف ايه نظامهم وابقى اقوله يجي معايا قصدي معانا مرة
المهم بقى الاسبوع خلص وهشام رجع يحضر محاضراته تاني
انتهزت فرصة اني كنت جمب معامل الكيميا يوم الحد كنت طالعة مش فاكرة اعمل ايه بس اكيد يعني مكنتش رايحاله مخصوص هع هع هع
وسلمت عليه وهو داخل السيكشن بتاعه واصحابه فضلوا يتغامزوا ويتلامزوا طبعا لما شافونا
دتكم نيلة عيال هم , بس انا مش هخليهم يبوظوا خطتي
معرفش ليه قلتله على الجمعية بتاعة احباب الرحمن دي علطول مع اني كنت ناوية اروح اشوف نظامها ايه الاول
قولتله انا ملاحظة ان الحزن مأثر عليك جدا وده مش صح لان اكيد والدك الله يرحمه هيبقى حابب انك تعيش مبسوط
علشان كده حبيت اقترح عليك تيجي تتطوع معانا فجمعية احباب الرحمن
دي جمعية بتعمل اعمال خير وهتتبسط اوي معانا ان شاء الله
قالي هي فكرة حلوة جدا انا محتاج اني اعمل حاجة زي دي بس معلش ممكن اول مرة اروح فيها تبقي موجودة معايا لاني اول مرة اسمع عن الجمعية دي ومش هبقى عارف حد هناك
ولا انا وحياتك يخويا (فدماغي طبعا مينفعش اقوله كده لحسن يفتكرني بتمحك فيه هو كويس انه افتكرني بعمل دعاية للجمعيه بتاعتنا هههههههههه حلوة بتاعتنا دي)
قلتله طبعا زي ما تحب وان شاء الله تتبسط جدا معانا انا بقالي فترة مبروحش علشان الدراسة وكده بس ان شاء الله يوم الخميس هروح بعد الكلية لو تحب تروح
قالي تمام ممكن ابقى استناكي لما تخلصي محاضراتك ونروح سوا
اول ما قال كده لقيت واحدة بتردح جوه دماغي :نعم نعم ؟؟سوا فعينك انت فاكرني خلاص صعت بقى ولا ايه
طبعا سكت طنط اللي بتفرش الملاية دي ورديت انا قلتله لا طبعا مينفعش اللي حضرتك بتقوله يا استاذ هشام انا هبقى اعرف حضرتك العنوان وتروح لوحدك وانا هبقى هناك ان شاء
طيب ما تقوليلي العنوان دلوقتي
اصل انا معرفش العنوان بالظبط بروح بالشبه كده فالافضل اني اتاكدلك منه
براحتك زي ما تحبي
الحمد لله انه مقليش اقوله العنوان بالشبه والا كان شكلي هيبقى بايخ اويييييييي الحمد لله
رحت بقى سألت منار بنت خالتى ربنا يسامحها بقى (بعدين هبقى اعرفكم عملت ايه) وقالتلي العنوان بالظبط
تاني يوم مشفتوش فالكلية بس يوم التلات قابلته عند الكافيتيريا بالصدفة البحتة طبعااااا انا مكنتش بدور عليه ولا حاجة
واديتله العنوان وقلتله اني هروح يوم الخميس من الساعة 4 ان شاء الله
وقلت قبل ما اخلي الولد يروح بقى ونتفاجئ احنا الاتنين اروح انا يوم الاربع
ورحت بالفعل يوم الاربع لقيتهم عاملين دروس دينية عن الحجاب والصلاة وحاجات كده
فقولت الحمد لله الجمعية طلعت كويسة واتبسطت من الناس اللي هناك اوي
وقالولي ان بكرة وبعده ان شاء الله هيبقى استكمال للدروس الدينية , وبعد كده هيبقى في ندوة للتعريف بنشاطات الجمعية لان في ناس كتير لسه جايين جديد وميعرفوش هما ممكن يشاركوا معانا فاي نشاط بالظبط
المهم يوم الخميس فالكلية بقى انا اتأخرت لغاية الساعة 4 ونص ولما نزلت لقيت هشام مستني تحت وقاعد لوحده
شكله كده مستنيني ولا ايه, انا هعمل هندية ولا كأني شايفاه اصلا هو هيستعبط ولا ايه
بس حرام هو فضل مستني شوية لغاية مانا خرجت من الكلية وبعدها بخمس دقايق كده خرج
كنت انا لسه مش لاقية تاكسي عمري ما ابقى محتاجة تاكسي بسرعة والاقيه
المهم جه تاكسي يتيم ماشي لوحده كده تحسوه دخل الشارع بالغلط شاورتله ووقف الحمد لله ومتأمرش عليا ولا قالي رايحة فين الاول وكان عمو عجوز شكله عسول ووشه بشوش كده
وقلتله العنوان ومشى خطوتين وبعدين وقف ادام هشام وقالي بعد اذنك يا استاذة ومدنيش فرصة ارد
ولقيته بيقول لهشام على فين يا استاذ فقاله نفس المكان فقاله طيب اركب
انا اعترضت طبعا وقلتله مينفعش لو عايز تركب معايا حد تركب بنت
فهشام اتحرج وقاله خلاص يا اسطى انا هستنى تاكسي تاني
الراجل الرخم قاله والله ابدا لازم تركب ولفلي وقالي متخفيش مش هنخطفك
(اما راجل رخم صحيح ما الواد اتنيل وقالك هيستنى تاكسي تاني)
خلاص يا عمو مش مهم انا ممكن انزل انا
الراجل يختي قام شاخط فيا حتة شخطة وانا بفتح الباب وقالي اقفلي الباب ومنتيش نازلة
ولف بص لهشام اللي كان اتحرج ومرضاش يركب وقاله اخلص يابني واركب هتطيروا اليوم وانتوا واقفين
وطبعا سمعنا كلامه لحسن يضربنا
صعب اوي عمو ده
انا محروجة جدا جدا وفضلت باصة فالارض طول الطريق
هو ماله الطريق طويل كده ليه ومبيخلصش ياااااامسهل
اخيرا الحمد لله وصلنا واول ما نزلنا من التاكسي لمحنا عربيات بوليس ماشية من ادام المقر بتاع الجمعية
والناس واقفين يتفرجوا روحت اسأل ست عسولة كده واقفة باسدال البيت واضح انها من قاطني العمارة
قالتلي ينيلهم ال مسمين نفسهم احباب الرحمن ال منهم لله , طلعوا ارهابيين وعايزين يحرقوا البلد ربنا يحرقهم مطرح مهما قاعدين
لقيت هشام اول ما سمع الكلام ده برق وعنيه طلعت لبرة شكله كده افتكرني ارهابية وعايزة اجنده معايا
منك لله يا منار والله لقايلة لخالتو على الجمعية الزفت اللي انتي بتروحيها دي هخليها تعلقك
وبقيت فنص هدومي ادام هشام ياربي اعمل ايه دلوقتي الواد هيخاف مني
قلتله بص بقى بصراحة انا معرفش الجمعية دي واول مرة اجي كانت امبارح
علشان كنت عايز اخليك تنشغل بحاجة بدل الي انت فيه انا اسفة جدااااا
وجيت بقى اجري من وشه لاني نفسي الارض تنشق وتبلعني
مسك دراعي وقفني
(هو بجد عمل كده ومسك دراعي انا من الصدمة اتسمرت مكاني)
هو ساب دراعي بسرعة وقالي اسف والله مش قصدي بس خفت تمشي وانتي متضايقة كده
وعموما لو كان هدفك انك تخففي عني وتكسبي فيا ثواب فانتي نجحتي
بصيت عليه لقيت وشه محمر من كتر الضحك وبيكتم الضحك بالعافية
قلتله طيب الحمد لله ان حد فينا مبسوط( وانا متضايقة خالص ومكشرة )
فضحك ساعتها بصوت عالي وفضل يقهقه
قلتله انا لازم امشي بقى قبل ما البوكس يرجع ونتكلبش احنا الاتنين وحاولت اكتم ضحكتي بس بصراحة كنت فرحانة جدا اني خليته يضحك من قلبه
مش قلتلكم اني هتبنى حالته واعالجه
الله عليا بجد ياريت في مني عشرة ولا حتى مليون
قالي طيب اشوفك بقى يوم الحد ان شاء الله فالكلية
ايه التطورات دي يا علياء الواد بيديلك ميعاد كده عيني عينك انتي عيارك فلت
مردتش عليه بقى ففضل مستني ولقيته بيوقف تاكسي وبيقولي بيتك فين
قولتله ها؟
قالي علشان التاكسي قوليله العنوان فقلتله
ولقيته ياختي بيحاسب التاكسي لسه جاية انطق واقوله لأ لقيته برقلي بعنيه وخفت اوي
(بس اول مرة اخد بالي من عنيه لونها عسلي ورموشه تقيله وتجنن, استغفر الله العظيم من كل ذنب عظيم شكل كده محدش هيوديني النار حدف الا هشام ده)
فسكت بقى والتاكسي روحني
فضلت احلم بيوم الحد ومستنياه يجي بفارغ الصبر وافكر هو ليه قالي اشوفك يوم الحد
معقول همشي معاه فالكلية كده ادام الناس ولا نعد عالكافيتيريا
اكيد لأ هشام اصلا محترم وعارف اني محترمة ومليش فالجو ده
هو اكيد قصده انه بيتبسط بس لما بيشوفني فالكلية
يوم الجمعة والسبت دول طوال بشكل ده انا غسلت كل سجاد بيتنا وغسلت الستاير وكويتها
وطبخت وغسلت المواعين و مسحت البيت كله دي حتى ماما مكنتش مصدقة ان انا بنتها , كنت عايزة اعمل اي حاجة تطير اليومين دول وتخلي الوقت يعدي بسرعة
وبرغم كل ده صحيت يوم الحد متاخر لاني مكنش جايلي يوم قبلها كنت حاسة كأنه اول يوم اروح فيه الكلية
وفاتتني اول محاضرة بتاعة دكتور وليد
احسن انا اصلا مش بفهم منه حاجة دكتور وليد ده تحسوه عبقري كده
ودماغه كلها علم ومش عارف يتعامل مع عقولنا الصغيرة هو مفترض اننا على درجة معينة من العلم ومن الطبيعي اننا نفهمه, مش عارفة جايب الثقة دي كلها فينا منين
ما علينا المهم بقى انا مبسوطة خالص اني هشوف هشام النهاردة
روحت الكلية على الساعة 12 لقيت هشام رايح جاي من المبنى اللي فيه المكتبة وفايده كتب عملاقة بس شكله متضايق اوي
يادي اللنيلة اعمله ايه علشان يتبسط ده؟؟, اخلينا يتقبض علينا بجد بقى المرة الجاية ولا ايه
روحت اكلمه لقيته بيرد عليا ببرود وحسيته متضايق مني
قلتله في ايه يا هشام هو انا زعلتك فحاجة انت اتضايقت من اللي حصل يوم الخميس
قالي لا ابدا يا استاذة علياء
استاذة ؟! طيب بعد اذن حضرتك بقى يا استاذ هشام
قالي اتفضلي ومشي وكان شكله مخنوق اوي
بس يولع ولا يهمني انا عملتله ايه علشان يعاملني وحش كده
رحت المدرج اللي كان عليا فيه المحاضرة بتاعة الساعة 1 قلت هستنى بقى فيه مليش نفس اشوف البنات ولا اقعد معاهم
لقيت واحد ملزق كده من العيال الفرافير اللي معانا فالدفعة جاي يكلمني
وبيقولي ازيك يا علياء عاملة ايه , قولتله الحمد لله , خير في حاجة؟!
قالي هو فيه والحمد لله اني لقيتك لوحدك كنت عايز اتكلم معاكي شوية
(يكلمني فايه ده كمان هي ناقصة)



يالا ادينا هنعرف الحلقة الجاية
استنونى