[لامارا]

الحلقة الثامنة عشر


حبة ولقيت بابا جه وركب العربية وبيسوق
احم احم هو الدكتور كان بيقولك ايه يا بابا؟
بصلى بصة مش لطيفة وسكت
يالهوى هو الموضوع طلع عدوى ولا ايه؟ يا ترى قاله ايه رخامة المنيل على عينه
قضينا الطريق برده في صمت مطبق وكل ما احاول اتكلم ولا افتح بؤى الاقي نفس البصة
مابدهاش بقي انا احط الجذمة في بؤى واخلينى ساكتة احسن
ووصلنا البيت ودخلنا
- اتاخرتوا كده ليه ده انا مجهزة العشا من بدرى
ومازلنا في صمت تااااام
- غيروا وتعالوا الاكل عالسفرة
غيرت وروحت لقيت بابا عالسفرة وعمال ياكل قعدت انا كمان
- بس عارف يا بابا منة ما شاء الله كانت طالعة زى القمر لا قمر ايه دى تقول للقمر قوم فز وانا اقعد مطرحك
بابا ماكلفش نفسه حتى ورفع عينه يبصلى ولا حتى شذرا
- مالك يا بابا في ايه؟
- يعنى مش عارفة في ايه؟
- لا والله مش اخدة بالى
- ايه اللى خلاكى تسيبي التدريب في المصنع؟
- التدريب؟ عادى بصراحة شغل تعب وكله قرف وكده ومرتب ملاليم قولت على ايه كل ده؟
- ممممممم عظيم عظيم
- هو فيه ايه يا بابا؟
- فيه ان سعادتك خنتى ثقتى فيكى
- انا؟؟ ليه عملت ايه؟
- رجعتى يوم الاضراب مع الدكتور بتاعك والله اعلم حصل ايه فقررتى ماتروحيش المصنع تانى وكل ده من غير ماتفكرى تقولى للناس اللى في البيت اللى المفروض انهم ابوكى وامك عاللى حصل لا وكمان اسالك بتكذبي
- لقيت ماما اتدخلت وبتقول لا ماتقولش كده ياخويا البت يومها جت وحكتلى وعادى يعنى ده الدكتور بتاعها وماحصلش حاجة ظروف وعدت وانا اللى شجعتها تسيب المصنع لما قالت شغل تعب وكمان بره البلد وانا بخاف عليها
- لا والله؟ وانتى عارفة وانا اللى نايم على ودانى؟؟ طرطور انا بقي في البيت ماليش لازمة وبصلى وقاللى امال لو ماكنتش مصاحبك ومعودك تحكيلي وطول عمرى بحاول افهمك واقرب منك الظاهر ان ده اخرة دلعى ليكى لما يجى الغريب يسالنى بنتك سابت المصنع ليه ويقوللى انه وصلك وانا اخر من يعلم وجاى يعتذرلى
خلاص بقي اعتبرتونى مت وبتتصرفوا من نفسكم
- بعد الشر يا بابا ماتقولش كده بالله عليك
- بلا بابا بلا بتاع بقي ماخلاص ومن هنا ورايح لسانك مايخاطبش لسانى
ومشي راح الاوضة ورزع الباب وانا قعدت اعيط
- معلش يا حبيبتي هو بس متضايق شوية وبكرة يروق ويصفى
- اهئ اهئئئئئ يعنى انا غلطت في ايه انا بس عادى يعنى ماحسيتش الموضوع فيه حاجة علشان احكى يعنى وبعدين انتى لما سالتنيى انا قولتلك على طول هو انا عمرى بخبي عنكم حاجة يا ماما؟
- لا يا حبيبة ماما اهدى بس وهو بابا متعصب وشوية ويهدى ماحصلش حاجة
- لا يا ماما انتى ماشوفتيش كان بيكلمنى ازاى ؟ بابا عمره ماكلمنى كده
- وهو شاف الدكتور ده فين بس؟
- كان في الفرح ماهو صاحب مصطفي ومعرفش ايه اللى خلاه يتكلم معاه اصلا هو كده مش طايقنى وعايز يعملى مشاكل وخلاص
- بس يابنتى ان بعض الظن اثم الراجل كان بيسال عليكى وبيعتذر لابوكى يعنى عداه العيب بصراحة
- انتى كمان بتدافعى عنه؟
- لا يا حبيبتى انا بس بقول الحق ماتظنيش وحش في الراجل
- اهئ اهئئئ خلاص اتخرست اهووووو ولا هظن حلو ولا وحش انا مش عارفة هو اللى بنتك ولا انا
- انتى طبعا يا حبيبة قلبي اهدى بس ماتعيطيش
- انا رايحة انام
ماشي يا حبيبتى تصبحى على الف خير

ودخلت اوضتى كملت عياط لحد ما راحت عليا نومة وصحيت على صوت تليفونى
- سلام عليكم
- وعليكم السلام انتى لسه نايمة؟
- اه
- ههههههههههه طب اصحى ياختى اصححى دانا اللى عروسة وصاحية من بدرى وقولت بقي هتتصلى تسالينى عملت ايه وقعدت استناكى تتصلى مافيش قولت اتصل انا بقي مابدهاش
- معلش يا منة حصلتلى شوية مشاكل بس
- مشاكل ايه؟خير
- الزفت رخامة الله يسامحه قابل بابا في الفرح امبارح وحكاله علي يوم الاضراب وبابا زعل منى واتشاكل معايا امبارح حتة شكلة ومخاصمنى
- ياباى ليه كل ده هو كان حصل ايه يعنى؟
- معرفش الله اعلم رخامة سخنه عليا قاله ايه تلاقيه قاله بنتك مش محترمة وكانت رايحة تركب مع رجالة ماتعرفهومش وماشية على حل شعرها
- لا يا علياء اهدى كده انتى بتخرفي تقولى ايه د\محمد لا يمكن يكون قال كده ابدا
- حتى انتى بتدافعى عنه؟ هو عاملكم عمل ولا ايه؟
- لا يا حبيبتي بس الراجل ماشوفناش منه غير كل خير ولو تعرفي كمان الموقف اللى عمله يوم هشام تعرفي اد ايه هو راجل محترم وذوق
- عمل ايه خير اشجينى يا حضرة المحامى
- يابنتى مصطفي حكالى امبارح انه لما راح لهشام الحيوان قاله انك كنتى خطيبته وبعدين سابك واتجوز بنت عمته لما عرف ان اخلاقك مش ولابد وانتى عمالة تطارديه وهو سقطك علشان يهددك فتبعدى عنه
- نعم نعم؟ السافل الحيوان الحقيييييير وانا اللى بقول رخامة اخد عنى فكرة مهببة منين
- يابنتى اسمعى للاخر د\محمد بقي قاله عيب اوى اللى انت بتقوله ده وانه حرام وانه اصلا عارفك من زمان وانتى جارتهم وعمره ماشاف منك حاجة وحشة وانه عارف حكايتك اصلا وعارف ان هو اللى طلع ندل وهدده انه هيشتكيه للعميد لو مانجحكيش وهيخلي العميد يطرده
- جارنا؟
- اه معرفش ازاى يمكن قال كده بس عشان يسكته
- لا هو قال اخته ساكنة في العمارة اللى قصادنا
- مممممممم علشان كده بس شوفتى بقي انتى كنتى ظالماه ازاى
- علشان كده بقي هشام سافر خاف على نفسه من الفضيحة بس تصدقي ماكنتش متخيلة انه بالحقارة دى
- اااااه طلع ازبل خلق الله
- وانتى ماقولتليش الحوار ده من بدرى ليه؟
- انا لسه عارفاه امبارح بعد كتب الكتاب جت سيرتك وكده انتى ود\محمد فمصطفي بقي قعد يحكيلي
- ممممممممم بس تصدقي كبر في نظرى بس امال هو ليه بيعمل كده وبيغتت عليا ويعاملنى وحش
- اعتقد انه علشان بي..... احم
- بيايه؟
- ها؟ لا ولا حاجة
- قولى يامنة عارفة ايه ومخبية ؟
- يابت انا برده هخبي عليكى؟
- لا ازاااااى انتى؟ اطلااااااااقا
- هههههههههه ماشي يا جذمة بس هو قال لصاصا انه الاول كان اخد عنك فكرة انك متدلعة وكده بقي واستغرب لما هشام راح يطلب نتيجتك وفكرك من بتوع نرتبط وكده بس مصطفي بقي فهمه كل حاجة وهو قال انه اصلا اول مابدا يدرسلك وشافك اد ايه مجتهدة عرف انه كان مكون فكرة غلط عنك وكده وهو بيشد عليكى بس علشان شايفك احسن واحدة وعايزك تبقي احسن واحسن كمان
- ييييييييه خلتينى احس بالذنب بعد ماكنت هولع فيه
- ذنب ليه بس؟
- اصل بصراحة انا بعد كتب كتابك جه يكلمنى وانا ولا عبرته ومشيت وسبته اصلا
- عيب كده يا علياء ده مهما كان الدكتور بتاعك دانا لو حد عمل كده مع مصطفي كنت خنقته , المهم بقي مش هتيجى معايا المصنع؟ واهو فرصة تعتذريله
- ماظنش بابا يوافق وخصوصا انه مخاصمنى اصلا
- زنى انتى بس عليه وخلى مامتك كمان تزن واهو شوية من عندك وشوية من عندها وهو يوافق ان شاء الله
- يااااارب ادعيلي يا منة بالله عليكى احسن انا مش عارفة هعمل ايه بصراحةد
- يااارب يا لولو يااااااارب هههههههههههه
- بتضحكى علي ايه حضرتك
- هههههه لا ابدا افتكرت مصطفي وهو بيحكيلي عاللى د\محمد كان بيعمله في دفعتهم
- ليه كان بيعمل ايه؟
- هههه كانوا مسميينه عدو الحبيبة كان كل مايشوف ولد ولا بنت قاعدين مع بعض يزعقلهم ويقولهم دى مابقتش جامعة واتفضلوا امشوا من هنا ولا هسحب كارنيهاتكم يالهوووووى كان مشيبهم
- غريبة يعنى ما هو كان متبط بزميلته ولا هو حلال ليه وحرام للناس
- بس ماتفكرنيش دى قصته تقطع القلب هو ومريم
- مريم مين؟
- ماهى مريم دى يابنتى حبيبته ومن ساعة ما ماتت بقي وهو اتغير كده
- مممممم هيا تموت وهو يصدرلنا الوش الخشب
- يابنتى بقي بس حرام عليكى وهو من النوع اللى يحب الواحد يمشي مستقيم وعلى راى المثل امشي عدل يحتار عدوك فيك
- مثل ؟ ما علينا بس برده ده مايديهوش الحق يعمل اللى عمله
- وهو عمل ايه يابنتى ؟
- بقولك خلى بابا يقلب عليا
- ماهو اكيد مش قصده يمكن مايعرفش ان باباكى مش عارف وكده
- بقولك ايه يقصد بقي ولا مايقصدش المهم انه عملى مشكلة وخلاص وكفاية عليكى رغى كده بقي يا عروسة
-ههههههههههه عروسة ايه بقي انتى لسه فاكرة؟ عامة الله يبارك فيكى يا حبيبتى وعقبالك يارب
- يالا بقي سلااااام
سلام
وكالعادة بعد ماقفلت قعدت ادور الكلام في دماغى
انا غلطانة اه ازاى سيبته ومشيت كده عيب برده ده مهما كان دكتورى
انا لازم اروح اعتذرله عاللى عملته
يعنى هو كان بيحاول يساعدنى وانا كنت زى المغفلة وعمالة اغلط فيه


يا ترى علياء هتروح تعتذرله ويا ترى باباها هيوافق ترجع المصنع ولا لا؟